TUALTHATTU FANU
TUALTHATTU FANU
Written by : Aaron Malsawmdawngzuala
Kan inchhung chu a hnawk hle mai, ka nu chu a au tuar tuar a, kei lah chu kum 5 mi lek niin ka chhan thei si lo, ka hlau hle mai. Thutthleng te chu a let rem rum mai a, light chu a phe zuk zuk bawka, ka pa chuan nasa takin ka nu chu a vau a, mahse enge a sawi ka hre chiang theilo. Kei kum 5 mi lek tana a hlauhawm tur zia leh a hrilhhai thlak tur zia chu tuman an hrethiam phalo ang. Ka nu chuan ring takin ka hmingin min ko a, "Puipui, ka hmangaih che." a rawn ti a, chu veleh ka pa chuan ka chhip samah min hnuk a, roomah min kalh khum a, chem a insat ri chawk chawk hi ka hre zui nghal a, ka hlau lutuk chu ka thidanga, abak chu engmah ka hre tawh lo.
Ka harh zawk mai a, khum atangin ka la tla zui, ka mumang han rapthlak zia kha aw... Ni e, ka mumang vek ani tho nangin, kum 5 ka nih hian ka nu leh pa ten min thih san a, an thih hun hi zan dar 12 vel a ni a, ka hriat zawng chu ka mumanga zantin ka hmuh thin hi ani, enge thleng tih chiang tak chuan ka sawi theilo a, ka hre bawk heklo, mahse tunah kum 18 ka ni ve tawh a, hetiang mumang ka nei ziah pawh hi mak ka inti thin hle. Achhan chu he tualthahna rapthlak tak thlen lai hian ka awm ve a, ka nu leh pa te hi an sawi dan chuan accident vanga thi angin an sawi a, athenin ka nu lo ngaizawng thin tupa in a that dun tihten an sawi a, mahse ka nu ngaizawngtupa anga an sawi hi hemi zan vek hian a thi ve tho bawk si, ka hrethiamlo takzet, kum 5 chiah ka la ni miau a, engtin nge an thih ka hrelo ani. Mahse ka mumangah kha chuan ka pa khan ka nu kha a that angin ka hre bawk si a, mahse engvanga hetiang mumang duhawmloh tak mai hi ka hmuh tlat thin le, mumang mai mai a ni ti dawn ila chiang takin ka nu leh pa hmel kha ka hmu bawk si, atak ang chiahin kan inchhung ngei kha a ni bawk si a, ka hrethiamlo takzet a ni. Tunah hi chuan ka Nutei te nupa bulah ka awm a, ka nu le pa thih atang khan hian anmahni fa ang chiahin min enkawl a, min duat hle a, ka duh apiang min lei thin a, ka tan chuan nu leh pa ang chiah an ni. Ka nutei te nupa hian ka nu leh pa chungchang engmah min hrilh ngailo a, enge achhan tiin ka inzawt fo a, mahse ka hriat a tullo aniang chu, keipawn engmah ka zawt ngai lem lo, ka hriatdan chuan ka nu ngaizawngtu hian ka pa chu thah a tum a, mahse ka nu chuan alo dang a, chuvang chuan a that a, ka pa nen an insual a, an insual na lamah an invit ve ve a, an pathum chuan an thi angin ka hria a, mahse a dik nge diklo chu ka hre chuanglo, chu thil pawh chu kan veng nu tawngthei ho in a min hrilh dan a ni. Mahse sawi leh ta thin ila, ka mumangah kha chuan ka nu ngaizawngtupa (Pa Kunga) kha chu ka nu leh ka pa inhauh laite kha chuan choka ah thi hnuangin a let reng tawh a, ka pa khan roomah min kalh khum a, chumi hnuah ka nu au tuar ka hre leh a, tichuan ka thidang a, chuan ka mumang atangin ka harh chhuak chauh thin kha a ni a, a nihna takah chuan zantin deuhthaw ka mang a ni, he mumang hian awmzia aneih chu ka ring tlat a, mahse midang sawi dan nen a in ang silo, kha thil thlen lai khan awm chu ka awm ve asin mawle, mahse han ngaihtuah let leh turin kha tih lai khan kum 5 chiah ka la ni bawk si. Ka khum atang chuan ka tho chhuak a, peihlo tak chuan college kal turin ka insiam a.
Nidang ang bawkin kan thianho kan inhmu khawm leh chu kan nui thler leh nghal duai duai a, ka thiannu, ka best freind Tepuii chuan, "Puipui, news ka hria a nia aw..." a ti a, keichuan hre chak takin, "Animaw, enge?" tiin ka zawt a. Tepuii chuan, "Vawiinah ka star tawk mai alo lut dawn, Pol Science teacher, Miss Remruati nau ania, a cousin Ronald-a, a hmingpum chu ka hrelo, a chhelo rap." a ti a, a zuang nghal vak vak a. Ka thiannu Chhani chuan, "Awi Tepui, ka hria, an sawi tak e, khapa han chhiatloh zia kha chu, a sawn pai pawh ka thlang." a la ti zui. Kan over tlang a ni e, mahse kan demawm bik lo, vanglai nun kan chen ve nimai a, Bible pawn kan vanglai nun kan chen aphal alawm. Ronald-a chu eng ang fakau a hmeltha tak ni ang maw? Ka hmeltha lutuk lo nangin ka hmel hi a zahpuiawm lemloh, kan thian zingah pawh ka chhelo ve ber a, kan thianho thlang dawn ta se, chu an mihring sawi Ronald-a chuan keimah bak tudang mah thlan tur a hre lovang. Class kan la a, new commer Ronald-a chu subject dang ami zawk alo la ni zui, kan class ah awm ve lo a, ka thiante chu an mood off ngei mai, Pol Science lo la ve der silo a. Class chawlh lai chuan canteen ah kan chawl a, Tepuii chuan, "Kei chu ka puar, Ronald-a ka zawng dawn, kan class ah a awm ve dawn maw tih nakalaiin, a fairlo lutuk. Min lo zawng mai ru....ka chhuak." a tia a tho daih a, min chhuasan ta a. Kan eikham chuan Tepuii chu kan zawng a, Ronald-a nen chuan college library ah anlo inhmu tak tak a, tukverh bulah anlo ding dun a, ache rang bik thin mange...kan va kal hnai a. Tepuii chuan minlo hmuh veleh chuan, "Awi inlo kal alaw a, hei hi ka thiante an nih hi, hei hi Puipuii nia, hei hi Siamtei, chuan hei hi Chhani..." tiin kan thian ho chu min inhmelhriat tir a, Ronald-a chu a lo hawia, "Ronald-a ka nia." tih pahin a nui a, biangsum ala nei zui a. Ava han hmeltha tehreng em, vantirhkoh nimai hian ka hria, an sawi ang chiah chuan hang lutuk lo, ngo lutuk lo a ni a, anui hmel mawlh kha. Ka thianten a fapai an thlang te kha ka lo eilo vel a, kei phei chuan atan chuan phir hial pawh ka pai mai ang, chhelo an tih diktak chu hepa ngei hi nih hi, chhelo tih sawi nan an hmang hial thin ka ring. Kan in chibai liam liam a, a kut te kha hnathawk ngailo mi hausa fapa kut tih hriat reng reng, anem si, ano si. Apian a nalh a, six pack chu anei chiang sa, ka ti ve tawp. A sang si, 6'1 vel lai a nih ka ring. Class tan a hun a, "Nih phawt u." a ti a, akal ta daih a, ka en zui vawng vawng vawng a. Tepuii chuan, "Puipui, enteh, Ronald-a melh dan che kha a diklo tlat, a star che aniang." a ti ringawt a. Kei lah chuan, "Tak tak ami, Tepui ...a van hmeltha em em." ka ti a, ka insum thei thawt lo a ni. Min dem nghal ringawt, mahse a nuam ve reng thpo mai. Class lak lai pawh chuan ka ngaihtuah reng a, a nuih paha abiangsum rawn lang mawlh kha, a chhiatloh dan em em kha, chutia ka ngaihtuah mek lai chuan ban alo hun leh ta der mai. Ka thiante bulah chuan, "Lo va kal ru ka rawn zui ang che u." ka ti a, an scooty an han herh nung sap sap hlawm a, an kal ve mai bawk a. Diktak chuan ka la kal mai loh nachhan chu Ronald-a ka zawn ruk deuh vang a ni. Ka hawikual a, minute 5 vel ka nghah tawh hnuah pawh ka la hmuh mai loh avang chuan ka mood a fuhlo ngei mai, ka thinrim ve ringawt a nih chu. Ka beidawng chu kal ka tum a, ka scooty chu start ka tum a, a nung thei reng reng lo mai a, rik pawh a rilo. Ka hmet ka hmet a, awmzia ka hrelo hle mai, thinrim sa nen chuan ka puakkeh lo chauh. Ka hnung atang chuan mipa aw mawi tak leh pa tak mai hian, "Chahbi vuah la, anung mai ang." a rawn ti a, rang tawkin ka hawi phei a, ka phu zawk thei hial, Ronald-a ngei mai kha ani. Ka scooty ka en a, chahbi ka vuahlo hrim hrim, ka ipte ah ka lo la ak chu niin. Ka zak lutuk chu, "E..anih hi." ka ti bah nuai a. A rawn kal hnai a, min rawn be leh ta.
"Tepuii kha i thiannu mi?"
"Ihh, um ka best friend a nia."
"Nia library ah khan lehkhabu ka en laiin min rawn bia a, thian ka nei vak lo a, inlo awm hlauh a, in fel khawp mai, kan inkawm ho zel ang chu tiraw, thian ka nei miah lo nia."
"Hehe, umm..ihh nia."
"Vawiin chu ka first day a ni sia, bike ka lo kenglo a taxi in ka lo kal a, i rualin ka lo haw ve mai teh ang, pawi i tih loh chuan."
"Aw nia...ihh nangman khalh la."
"Awle, ka lo khalh ang."
Ka mipa duh ruk em em maiin min han phur chu anuam ngei mai, mahse ka si tha ngamlo. Kan college atang hian an in chu a hnai zawk a, an in bulah chuan min chhuk tir a, lo leng lut zuai turin min sawm a, mahse ka zak ve deuh a, ka chak viau nangin ka hnar hram a. Kan in mangtha a, ka haw ta a. Hemi zan hian lehkha zir chu a har ngei mai, amah hlir ka ngaihtuah a, ka mu pawh khumah ka in let ka inlet a, ka ngaihtuah let a, min nuih seih lai te kha, chuan a biangsum mawlh kha, ava han tha chiang em. Achang leh ka in lukhup a, lukham ka kuah a, nuam ka ti lutuk chu ka awm thiamlo a ni ber mai, college kal ti nuam tu ka tawng hi a ni ringawt. Atukah chuan scooty keng lovin taxi in ka kal ve thung a, bike alo ken chuan inphurh haw tir ka tum deuh a. Hma tawkah ka kal a, college kawt velah chuan ka tei kual vel mai mai a, ka thiante nghak tho mah ila ka nghah ber zawk chu Ronald-a a ni. Minute 15 vel ka nghah hnu chuan bike sen nalh tawk nen hian alo kal a, a helmet a phelh a, a side glass ah chuan a hairstyle a siamtha te te a, helmet a dah fel a, bike atang chuan a chhuk a, ka lo en ngun ngei mai. A hawi kual a, min rawn hmu a, a nui nghal ver ver a, min rawn pan a, mahse ka zam leh der mai. “Tunge i nghah a?” a rawn ti a, keichuan, “Ihh..ka thiante ka nghak a, i van kal hma ve..” ka ti bah deuh nuai mai a. “Hma vak tawh hleinem, lo han lut ila an lo thleng ve mai ang.” a ti a, phur tak chuan college chhungah chuan kan inzui lut a. Lunch break ah pawh canteen ah minlo nghak a, thil kan eidun a. Min han duh ve hlauh mai se, ka tan chuan vanram tlafual a ni mai tur. Kan inkawm a, kan nui dun a, a tawng duh phian lehnghal. Class lak lai te hian ka lo ngaihtuah leh veng veng zel a, kan teacher te pawn LALNUNPUI tiin min rawn hau leh nge nge zel. Class kan ban meuh chuan an bang hmasa zawk ni ngei tur a ni, a bike bulah hian alo ding a, min hmu chiah chu minlo nuih var var a, a biangsum alang leh ta, ava han tha chiang tak em. Ka thiante nen chuan kan va phei a, Tepuii chuan, “Ehem.. nghah i nei nimaw?” tiin a chhaih vel a, Ronald-a chuan, “Nangmahni hi ka lo nghak che u, ka thian neihchhunte in ni ve si a.” a ti a, anui sen sen a. Tepuii bawk chuan, “Ronald, hei Puipuii hi a scooty apatea’n a hman sak daih a, phurh tur i neih loh chuan lo phur haw la.” Inla zei fahran hian alo ti a. Ka chak lutuk, ka duhthusam a ni, mahse ka hnial der vel a, “Angai hleinem, a inthlahrun awm mai mai. Chhani hian min phur mai se.” ka ti vel a. Ronald-a chuan, “Niminah pawh min phur haw a, ka phur haw ve loh ten, lo han kal ru, kanlo zui ang che u..” a ti a, nuam ve chiang, Tepuii chuan min siai zeuh pahin, “Nia kal ang u.” ati a, ka thiannu hi chuan min hmangaih thin ania. An kal hnu chuan kan inphur a, kan kal ve ta a. Min be miahlo a, ka be hmasa zak bawk si. Kan in thleng min thlah a, ka chhuk a, “Ka lawm lutuk aw, chaw eitui le.” ka ti a, Ronalda chuan, “Scooty ilo ken a ngai tawh lo ang, kan inthlah ziah dawn nia, aho lutuk inthlahrung suh, ka lo sawm ziah ang che aw.” a ti a, ka lai lek lek, “A ho emai, chutiang angailo.” ka ti a, mahse zeplo chuan ka chak reng. Ani chuan, “I lai hmel kha a cute lutuk, i van lo hmeltha reuh em em, ka kal phawt ange, naktukah ka lo sawm ang che...nihphawt le.” a tia, akal ta daih a. Khawvel hi a ding nimai hian ka hria, ka ding vung vung a, ka ngaihtuahna chu khawvel dangah daih a awm, ka melh ngai ka melh vung vung a, Ronald-a khan hmeltha min ti a nih chu, ka van intithei tak em. Chumi zan pawh chuan ka mu leh thei lo, ka lawm lutuk hi ka tap lo chauh a ni.
College chu nuam ka ti hle mai, ka thiante chuan min chhaihdun char char zel a, ka haw lemlo khawp mai, Ronald-a pawh chuan a haw bik lemlo. Chu lek pawh chuan min ti hlim em em a, ka bialpa amaw an ti deuh vek tawh. Kan inkawm ngeih em em a, thiantha tak ang leh a nau ang mai hian min en a, min duat em em a, ka thiante chu ka hlat tial tial mai hian ka hria. Mahse ka bulah ka duh em em Ronald-a a awm a, min care em em a, kei chuan ka ngaihzawng ang mai hian ka hre thin. Ka thinlung a thu inthup awm hi hrilh ka duh a, mahse hmeichhia zawkina han bem chu ka zak deuh bawk si, engtin nge ka tih ang? An inah te min hruai lut a, anu leh pa pawh an fel hle mai, nu leh pa hi ka duh ve thin ngawt mai, Ronald-a an duat zia ka hmuh te hian ka nu ka ngaihna hi a zual em em thin a,vanramah tal chuan min lo en ve thin angem le tiin ka inzawt thin. An in atanga ka haw hnu chuan chaw pawh eilo in roomah ka in kalh khum a, ka tap a. Ka nu kha ka ngai thar em em a, kum 5 lek ka nih in min kalsan a, ka rawn tleirawl chhuah tirh kha chuan ka nu hi ka ngai lutuk lem lo, kum 10 chuang zet nu tellovin ka seilian tawh a, mahse Ronald-a nu leh pa te ka hmu a, a nu in Ronald-a 'bawihte' tia a ko ka hriat te leh a duat zia ka hmuh te khan ka nu kha ka ngaihtuah a, min duat ve thin ngei awm sia, mahse eng vak mah ka la hre silo, chhia leh tha ka thliar thiam ve hma in min boral san daih mai si a , ka lung a leng em em a, ngati nge ka nu rual khan min hruai ve mai loh tiin Pathian pawh ka dem hial a. “Ka nu zanin hian ka van ngai tak che em, i hmel pawh chiang takin ka hmu hman lo ni si a, kum 5 lek ka nih a i hmel ka hmuh khan ka la te si a, ka hrechiang silo. I thlalak chauh hi maw ka chan tawk ni ta le? Ka nu, mi fate chuan nu leh pa an la nei asin. Pa chu ka mamawh lemlo, ka duh tho a mahse ka pa ai chuan ka mamawh zawk che, lo let leh thei i ni tawh silo. Ka nu, ka mumang rapthlak thin zia te hi i hria em? Ka ngai lutuk che, i fanu hian college thleng ka lo rap ve tawh asin, class 12 pawh kha 1st ah ka pass asin. Ka nu min chhuang ve ngei ang tiraw? NU tia koh tur ka nei ve silo a, fahrah turin tinge min kalsan? Ka nu duhtak, i fanu hian maw mipa duhzawng ka hmu ve tawh asin, ani chu mi fel tak ani a, ka nu nangpawn hmu la min duhpui ve ngawt ang, ahming chu Ronald Malsawmtluanga a ni a, a hmeltha asin, nangmah ang chiah, ahmeltha takzet, ka nu, nakinah i thlan ah kan lo la kal dun ang aw, ka ngai che...ka hmangaih che ka nu. Nakinah chuan ka nunna a tawp ve anga, chutah chuan Vanramah minlo nghak la, atak ngeiin kan nufa in kan la inkawm dawnnnia aw, ilo dam thin maw tiin atak ngeiin ka zawt ang che, ka nu ka hmangaih che.” tiin ka nu thalak chu ka be mawlh mawlh a, a tawpah chuan ka muhil ve thei ta hram a. Ka mutthilh tawh hnu hian ka phone hi a rawn ri a, ka en chu Ronald-a alo ni. Rang lutukin ka pick up nghal a, a la thaw hluam hluam zui lehnghal a.
“Hello?”
“Hello, Puipui, in inkawtah ka awm lo chhuak teh, apawimawh teh ania aw.”
“Awi, i ti awm ang lo emai, ka chhungte an mu tawh a, ti hian sawi mai la.”
“Aih, atheih loh...lo chhuak teh, a pawimawh nia.”
“Achiloh min man ang, ka ngam lo.”
“Lo chhuak vat rawh aw, ilo chhuah hma chu ka nghak dawn che nia, ka dah aw.”
“Hello hey, Ronald, Ro...naaa la dah zui.”
Van buaithlak ve aw, engtin nge niang, eng thil tak ni ang maw? Aruka chhuah angai nimaw...umm chhuak ru zal zal ila nimai lawm. Fimkhur thei ang berin ka room kawnkhar chu ka nam hawng a, ka dak de de a, la thim ropui zui. Kan in kawngkhar chu fimkhur tawkin ka hawng a, fimkhur tawkin ka khar leh a, rin aiin ka zei phian mawle, vawi khat naah lehnghal. Ka chhuak thei ta, engmah ka lo ngaihtuah chiang lo a, kawr ban bul pante leh boxer chiah ka lo ha nih hi, ka van zak ve aw. Pawnah chuan alo ding a, minlo au a, ka va pan hnai a, ka banah a apawt thut a, kan in atanga hla vaklo ah chuan min kai phei a.
“Ronald, ka ngaih i ti thalo nia aw, enge ni a?
“Thil pawimawh deuh hrilh tur che ka nei a.”
“Sawi vat la, min man ange aw.”
“Puipui, ka sawi tawp mai ang, ka duh lutuk che.”
(Deuh tawp mai a, enge maw asawi le, dawt nilo se awww, ka vawt tihna zawng zawng pawh reh vek, ka lum pum mai, Ronald-a’n min duh amaw?)
“Ronald, ka..ka, ihh..ka van hrethiam lo ve.”
“Puipui, ka hmangaih che in ka hria, kan inkawm te leh kan intext te hian maw, ka hlim thei lutuk, hrilh che ka duh thin a, mahse ka ngam ngailo a, minlo duhlo ta la ka zak dawn lutuk a, nanglo kawm peih ka nei silo a, ka rilru ka sawi avang hian min huat phah ta la, engtin nge ka awm ang, chuvang chuan ka ngam lo ani, ka nep tiraw, ka dawihzep tiraw? Mahse zanin hian hrilh che ka tum a mahse ilo mu hma bawk sia, chuvang chuan hrilh ngei che ka duh a, zanin hian ka hrilh loh che chuan nidangah chuan ka ngam leh tawh dawn siloa, min huat phah emaw min duh ve lo anih chuan pawi ka tilo mahse ka thinlung zawng zawng hi mipa ka nih angin huaisen takin ka hrilh che a ni.”
(Amitah tak enin a thusawi chu ngun tak leh ngaihnawm ti tak hian ka lo ngaithla a, a ri ava mawi si em, ka mittui a tla tep hial in ka hria.)
“Ronald?”
“Umm, Puipui...”
“Ronald ka hmangaih che.” (Ka insum thei thlawt lo)
“Puipui, i ti tak tak ami?”
“Ronald, ka hmangaih lutuk che asin.”
“Puipui, ka van lawm tak, ihh...min duh dawnlo maw ka tia, ka lo ip nasa hman lutuk a, i ti tak tak em, mawwh? Min phatsan leh si nge aw, ka buai vek animai, thudik a ni ti raw, Puipui ka hma......”
Asawi zawh hma chuan ka lawm lutuk awm ngaihna hrelo chu ka insum zolo, abiangah ka vuan a ka kiss ta tawp mai a, athlum hialin ka hria. Ka hmangaih ber leh duhber maiin min lo hmangaih em em thin amaw? Ka lo van hre har em em ve. Ronald-a hi ka khawvel ani a, ka hmangaih em em a, ani pawn minlo hmangaih ve reng anih chu mawle...reitak mai kan inkiss hnu chuan kan inthlah ta a. Chumi zan chuan kan mutui em em khawp a, ka lawm lutuk chu thlamuang takin ka muhil a, ka mut theihloh kan rin vei nen, college kal chu ahma aiin nuam sawt dawn nih hi. Atukah chuan kan inbul ah hian minlo nghak leh der tawh mai a, ka va kal a, minlo nuih sen sen a, “Ka bialnu thar chu ivan nalh ve a.” a lo ti a, hmangaihna kawng chhukchho chu ka zawh ve tan dawn ta. “Ka bialpa thar chu van chhelo em em, kal ila.” ka ti a, kan chhuak ta a. College break lai chuan ka thiante ka hrlh ciah mai chu, class roomah kan au tuar tuar a, min lo en thupa, haha nuam ve em a ni. Chumi zan pawh chuan Chhani te inah kan lengho a, Ronald-a nena kan nih lawmnan tiin savawm kan talh a, kan kai hlawm hle mai, mahse Ronald-a hriatloh in a nia, chhan chu ka in aphal dawn silo a, arukin kan lawm ve tawp mai. Ka nun hi a hlim ngawih ngawih a, Pathian hnenah pawh lawmthu ka sawi mawlh mawlh a, ka nu min laksak mahse ka nu ai awhin ka hmangaih em em mai min ngaihtuah leh min care em em tu Ronald-a min tawntir a, ka lawm takzet a ni, ka nu ka ngaihna a zual leh thin mahse ka hlim em avang zawka ngai ka ni. Kan inzui chho zel a, thianghlim takin kan inngaizawng a, ka titau hrat bawk sia, min care a min hmangaih em em a, ka tan ui a neilo. Present hi min pe deuh reng mai a, kan inah alo leng a, ka nutei te nupa te lah hian an be mang ngailo a, khawilam mi nge tih pawh min zawt ngai heklo, ho emai, ka nu thlanah ka kal anga, ka nu ber ka hrilh chuan tawk mai. Lehkha zir tha tur ten min fuih nasa em em a, thilsual ka tih aphallo bur a, amah pawn ruih theihthil a ti ngailo a, kuhva chu a ei zeuh zeuh a, meizial erawh a heh em em thung, kan inhauh tamna ber a ni. Ka nu ka hmu let leh nimai hian ka hria, Pathian hian nu thar min pe tiin abulah pawh ka hrilh thin. Inhauh chu kan nei tam ve thin khawp mai, ka thikthu chhe lutuk vang hi a tam zawk chu a nia, mahse atawpah amah zawk a tlawm leh a, ka thiamlohnaah pawh ngaihdam min dil leh nge nge thin, afel thin ania. Inhau ngun ve viau mah ila thinrim hmaisen khawpa inhauh kan nei ngailo, ka bialpa hmasa ber a ni a, mahse keichu a pathumna, haha..mahse engzahna pawh ni ila a tawp berna nih kha ka duhber. Engkim an chhungkaw chungchang te min hrilh a, mahse keichuan ka nu leh pate accident-a an thih thu chiah ka hrilh a, abak chu ka hrilh duhlo pawh nilovin ka hrechianglo em a, hrilhdan tur ka hrelo a ni.
College exam zawh ni a ni a, exam zawh lawm nan tiin an inah ka leng a, tumah anlo awm lo a, inneih naah anlo kal vek chu niin, chance tha lutuk. A room ah min luhpui a, min khawichhe dawnlo tih hi ka chiang ve tawk ani, ka mi rin ber a ni a, engtikah mah ka thianghlimna hi min laksak lovang. Khumah kan thu dun a, kan titia, kan nui dun bawk bawk a, kan va hlim em. Aroom chu ka hawikual a, mipa room ah chuan a felfai khawp mai. Ka room ai pawn a fai zawkin ka hria, chuti khawpa che fel chu ani, ka ngaihsanna a zual hle mai, ka pasal tur ni mai hian ka ngai a, ani lo chu hmangaih dang ka neih leh ka ring tawh lo. A room bangah chuan mipa khat thlalak, kum 40 bawr vel ni awm tak, hmelchhe lemlo thlalak hi a lo intar a, a chungah chuan RIP tih inziak bawk a, Ronald-a bulah chuan, “Duat, khikhi tunge?” ka ti a, a en vung vung a, a nuisak a, “Ka patea nih khi, Pa Rema a nia, kum 8 ka nih laiin min thih san a, ka ngai thei lutuk. Ka hre phak chiahlo nangin, min duat thei em em a, ka pa ai mah hian a bulah ka awm tam a, engkim min leisak a, ka ngen apiang min tihsak thin a, mahse mi nu ngaizawng angin an sawi a, ka nutei (Pa Rema nupui) chu a rilru ana lutuk a, an inthen a, tunah a awmna chin pawh kan hre tawh lo. Ka patea hian dawt a ni tiin ka chhungte pawh a hrilh a, ka pa te chuan an ring mai a, mahse chu anngaihzawngnu anga an sawinu pasal chuan engtik lai mai pawh hian a vau renga, police hnena report pawh kan tum a, mahse aman aduh tlat silo.” A mittui lo luang thla a, a hru hul a, a sawi zel a, “Diktaka sawi chuan angaihzawng anilo a, tet te atanga akawm thin a thiannu a ni a, kum 30 chuang an inkawm tawh. Unaunu ang chiahin a en a, mahse apasal hian a thik tlat a, kut hial te alo thlak phah thin a. Zankhat chu kut alo thlak nasa deuh aniang, tunlai angin mobile a la awm lo a, khatih hun lai khan landline hmangin ka patea a rawn phone a, mahse an inbiak zawh hmain phone chu a tawp a, a ngaih thalo chu a va kal a, ahnua kan hriat zawng chu ka patea chu a hrawkah nasa takin bung tep khawpin zai alo ni a, kan chan ta a ni. Chumi te nupa pawh chu an thi ve nghal ani awm e, chuzawng chu ka hriat a ni. Puipui, ka thu hrilh che hi tuma hnenah sawi suh aw, ka rin em che avangin ka hrilh che a nih hi...ka pa ten tumah hrilh an phal lo nia.” a ti a, a mittui a tling nasa hle mai, ka khawngaih em em a, chu mihring pa chu eng ang mihring nge maw anih le, avan nasa ve aw, ka thin alo rim ve lutuk a, “Awle ka sawilo ang, mahse tualthattu chhungte nen chuan engtin nge in inbiak rem a?” tiin ka zawt, ani chuan, “Ka pa te nen chuan an in be rem ta nih kha, tualthattu ber amah a inthat ve nghal angin an sawi bawk sia...ngaihna kan hre tawh biklo a, tihtheih dang avang bawk sia, rilru na tak chungin kan inngaidam a, mahse khami hnu khan tualthattu chhungte nen hian kan inhaw em em a, inngaidam mah ila kan intlawh ngailo a, kan inbe leh tawh ngailo a, kum 14 lai liam tawh mahse ka chhungte hian an theihnghilh thei lo, mahse tih ngaihna avang em a ni. An sawidan chuan tuathattu hi makpa chhungkhung a ni a, anu leh pate an thi tawh a, a nupui chhungte bulah a awm a, tichuan fanu pakhat annei a, tunge a nih pawh ka hrelo, an fa neih hnu chuan an indang a, tichuan an nupa in ngei ah chuan ani ka patea leh a nupui chu athah tak ni. Ngaihtuah teh, thian inkawmngeih em em kum 30 chuang inkawm tawh chu rawng em em in a that ta nih chu, ka rilru ana lutuk duat. Tihian ka ngaihtuah thin a, khatih hunlai khan kum 8 lek la ni mah ila, ka la thanglian anga, ka patea phuba hi ka la ngei ang, kum 22 ka ni tawh a, an fanu hmang hian phuba ka la ang, ka zawngchhuak anga, hrehawm takin ka siam ang tiin ka ngaihtuah thin, mahse chu chu ka ti leh lo ang, achhan chu ka lunglenna hnemtu ber nang hi ka tawng tawh che a, mahse phuba lak chakna hian min pawt leh thin a, chumi lakah chuan nangpawn min ven a ngai dawn ni.” ati a, a tap tep a, ka van khawngaih tak em. A hmuiah duat takin ka fawp a, “Duat, phuba lak angai lo, an fanu chu pawisawilo a ni a, ani tih hrehawm avang khan i patea hi alo let dawn lo, keipawn ka nu leh pate ka chan tawh a, mahse ka tawng che a, ka tan chuan nu leh pa tha tak i ni a sin. Duat ti miah suh aw, ka hmangaih lutuk che a nia, engkim min hrilh a, min rin em avangin ka lawm e aw.” ka ti a, min kuah a, “Puipui, ka van lawm tak em, nang ka tawng che hi, awle ka ti miah lo ang, ka ti miah lo ang.” a ti a. Chumi zan chuan ka ngaihtuah naah a thil sawi kha a awm reng a, rapthalk ka ti hle mai, ka mumang te kha ka hrechhuak a, thisen hlir ka hmu a, ka hlau deuh hial, ka awm a ti nuamlo ngei mai, Ronald-a ka hmangaih ka duat-a rilru tina tu cu ka haw ngei mai, a thi ve nghal pawh chu chawh ka ti ngawi ngawih a, thinrim tun chung chuan ka muhil ve thei ta hram a.
Chumi zan chuan mumang ka nei leh ta, college ah chuan ka thiante an lo inkawm khawm a, ka va pan hnai a, Tepuii chuan, “Nang hi maw i lo nih a, Tualthattu fanu anih hi, thiante u hlau rawh u, AIDS vei ai pawn a hlauhawm zawk.” min lo ti hrep mai a, mak ka ti hle mai, Ronald a lo kal ka hmu a, ka va pan hnai a, ka va kuah a, ka tap zawih zawih a, mahse min kuah let miah lo, min kuai dak dawrh a, chemte hraim hmel tak hi a rawn lek kang a, nghet tawk hian min rek a, “Nang hi maw Tualthattu rapthlak fa nu chu, ka mi zawn chu ka hmu ta e.” tih ka pumah chuan a vit pawp a, ka harh zawk a, ka thaw nghal hrawk hrawk a, khai awww...eng mumang nge ni ngai le? Ka bialpa in min that maw? Huiham, mumang ani hlauh chu ka van vannei tak em. Mahse nilengin ka rilru a nuam theilo, college exam chawlh ni hmasa ber a ni a, ka nutei leh ka patea te an chhuaka, ka mumang chu ka ngaihtuah a, thutthleng sei ah ka mu a, ka rilru ah thildang alut thei miah lo. Ka mumang kha avan rapthlak tak em, ka hlau ngawih ngawih. Chubakah tinge ‘Tualthattu fanu’ tia min koh kha ka hre thiam lo, ka rilru a ti buai tep lawm le, ho lutuk mumang mai mai alawm le. Ka lung a leng em em a, Ronald-a’n apa in entir naah a kalpui bawk si, tihtur van awmlo tak, huiz...TV ka en mai mai a, channel hmuhnawm a awm lo, ka bialpa duhtak hi ka ngai a ni. Tlai ah chuan min lo call a, kan inhmu a, hlim takin kan lengdun a, zanah pawh alo leng a, kan titi a, nuam takin hun chu kan hmangral leh ta a.
Atukah chuan Ronald-a chuan leng turin min sawm a, kan leng kual a, World Bank road ah te kan kal a, savawm anlo talh sup sup mai, ka van in ve chak mahse inthup a ngai tlats. Chuan zanah chuan an inah te chaw ka ei vel a, zan thleng ka awm a, zanah chuan meilum aiin a chhungte nen kan ti ti a, apa chuan min en leh vung vung thin a.
“Puipui, tunge i pa ni reng reng a, kan la inzawt miah lo?”
“Ka pa chu Sanga ania, Lalliansanga.”
(A aia thutak hian min han melh leh a...)
“Anih i nu kha Zoramchhani tiraw?”
“Aw ni e, kum 5 ka nih in min boralsan tawh a.”
(A mitmeng a danglam nghal vek mai, a thaw hak a)
“Anih chuan Mama hei va thlah tawh ta che, dar 9 ri dawn..”
Ronald-a nu chuan a lo tuihnih nghal a.
“Ni e Bawiha va thlah rawh.”
Ronald-a chuan mak tih hmel takin a nu leh pate chu a en a, chuan a tho akan inthlah ta a, kan inbul kan thlen chuan keichuan, “Duat, tinge i pa te khan min huat hmel tawp.” ka ti a, Ronald-a chuan, “I mawl emai, dar 9 ri tawh a, tlai tawh lawm, i chhungte pawn an ngaihtuah lutuk ang che tih an hlau niang. Nih chuan muttui aw ka hmangaih che” tih pah chuan duat takin min fawp vawng vawng a, kan in thlah leh ta a. Ka awm anuamlo ngei mai, ka pa hming ka sawi laia Ronald-a pa hmel danglam lutuk kha ka mitthla ah a lang reng, engthil chiah nge maw ni le? Atukah chuan hma takah ka tho a, ka va wish a, mahse dar 8 vel ah pawh min rawn reply miahlo, chaw ka ei a, mahse min la reply lo, ka whatsapp message pawh a hmu vek a, mahse engmah chhanletna ka dawng lo. Ka ngaih atha tawh thlawt lo, nizana apa min melh dan te nen khan, engmah lah chu a rawn sawi duh silo. Ka call a, ala duh silo, atawpah phei chuan a switch off daih lehnghal. Ka thinrim ve lek lek tawh, a buai nih chuan sawi ve mai tur ania, min van care tawh lo tak. Nilengin inah ka awm a, min rawn be bawk silo, a khat tawkin ka call renga, a ring quit thak thak bawk si. Ka mangang lutuk ringawt, ka nutei phone atang ten ka patea phone atang ten ka phone a, “hello” a rawn ti a, ka aw a hriat veleh a dah nghal a, ka call leh pawn a dah busy zel a, ka call zawng zawng a block vek bawk. Ka thinrim lutuk chu Tepuii inhmuh puiah ka sawm a, engkim ka hrilh vek a, “Tepui, inthen a duh nih chuan tha takin sawi mai se, ana chu ka ti lutuk ang mahse engmah chiang hleilo a min be duhlo hi ka hrethiam lo” ka ti a, Tepuii chuan, “Ahma in inhauhna in nei mi, tinge i pa hming i lama chutia a mitmeng a dang ringawt? I ngaihbel mai mai niang, ka lo be dawn mi?” a ti a, keipawh chuan lo be chhin turin ka ti a, ka mangang lutuk. Zanah chuan Tepuiin min rawn phone a, pawnah lo chhuak turin min ti a, Ronald-a a awm tiin min hrilh a, phur tak leh tihtauh inring sa in ka’n chhuk tau vei nghawng nghawng a, pawnah chuan alo ding a, ka hmu chiah chu a banah chuan ka beng a, ka chum a, ka vui nghal char char a, ka tap pur a, ka kuah a, mahse min kuah let miah lo. Min kuai dak a, nasa mangkheng in min kiss a, ngaihna ka hrelo hle mai. Kan ha in toh ri bawp bawp leh luak tep khawpin min fawp a, anuam teh chiam lo, min fawp zo chu min nam dawr a, ka tlu tep a. Ka tap tep a, ka hmui ana vek lehnghal, enge maw a hriat le?
“Duat tinge khatia min tih a?”
(Athaw hak a, amittui a tling piau a, a thinrim hmel em em lehnghal.)
“Nang hi maw ka mizawn chu ni a, nang hi nimaw na taka siam ka tum kum 14 chhung teh meuh ka lo zawn chu, hrep tak hian?”
(Engthil nge maw a sawi le, ka mak ti lutuk chu tawng pawh ka tawng hleitheilo.)
“Ro...Ronald, enge awmzia, mawh?”
“Ka hua che ka haw lutuk che, nang hian min ti hrilhhai lutuk, ka patea, ka pa ang chiah a ka en chu i pa, nangmah hringtu pa ngei hian min thah sak asin. Khawvela ka mi huat ber fanu ka lo hmangaih a maw? Tualthattu fanu maw ka lo ngaihzawng a?”
Ka thinphu chu ka thinlung hi a puakkeh dawn maw tih mai tur hian a phu rang em em a, ka lu ahai a nghal muai muai thei hial a, “Ronald, en...engmaw i sawi kha, Tual...tualthattu fanu min ti alaw?” ka ti thei hram a. Ani chuan ka samah min rawn tham a, vin zet hian, “Ni e, Hmeli, ka patea hi i pa tlaktlai lo thah a ni tih hria ang che...ka haw lutuk che.” min ti hrep a, engmah sawitur ka hrelo, mak ka ti lutuk hi sawithiam a har, ka na ngawih ngawih a, ka hrethiamlo hle bawk. Ka mumanga Tualthattu Fanu tia min koh kha ka mitthlaah alo lang nghal chuai chuai a, ka mittui chu a sur hian a sur zung zung mai a, ka tap theilo, min hnawh tawh lutuk, thawk pawh ka thaw tha theilo. Ronald-a bawk chuan, “Ka ten che, i pa vang liau liau hian ka hua che, ka hmangaihna che zawng zawng kha min pe let rawh, tiang mi i ni tih hria ila..” a sawi zo theilo, a hnuk a ulh a, kei chuan fiahlo leh harsa ti tak chung hian, “Ro..Ronald, enge ka..ka thiamlohna, tinge min..min dem? Min kalsan suh..” ka ti thei tawk a. Mahse awmzia a nei tawh lo, “Tualthattu fanu hi engtikah mah ka nupui emaw, ka bialnu i ni thei ngailo ang...” min tih khum a, akal nal nal a, ka au zui mahse ka aw achhuak tha thei lo, “Ronald, duhtak khawngaihin, ti suh..” ka ti thei tawk a, mahse akal zel a, akal liam ta a. Ka tap a, ka ngaihtuahna a buai a, ka mumang zawng zawng te kha ka mitthla ah alo lang zut zut a, ahmaa ka mumang a ka pa leh ka nu inhauh laia kil khata ngawi renga ka din lai a ka pa ngaizawngtu Pa Kunga, chhuata thisen baw nuai chunga lo let reng kha ka hmu tel ve ziah a, chu chu ka ngaihtuah naah lo lut nghal a, a hmel kha ka hmu fiah chiang chiah ngailo a, mahse ka mitthla ah ka hmu chiang ta, Ronald-a pa tea, Pa Rema ngei kha ani, ka maimitchhing a, ka hmu fiah uar uar mai, ka rap lutuk chu ka tap vak vak a, ka chau tial tial a, ka khawhmuh afiahlo tial tial a, ka chau lutuk...engmah ka hre tawh lo, ka nuteiin mangang tak a, PUIPUI a rawn ti ri chu fiah lo ruai hian ka hria a, nikhua ka hre tawh lo. Ka harh leh chuan khumah ka lo mu a, ka nutei te nupa chuan min lo awmpui a, khumah an thu a, ka patea chuan duat tak hian ka sam ah a lo chul a. Enge thil awmzia min zawt a, ka hrilh ta vek a, ka nutei insum zo lo chu a tap ta hawm hawm mai a, ka patea chuan lungngai hmel takin ti hian min hrilh a...
“Bawihte, thudik tak i hriat chu a hun tawh takzet a nih dawn hi. I hriat hunah chuan i tuar thiamlo anga, rei tak kan thup pawh hi min dem ngei ang, mahse i rilru nat kan hlauh vang a ni. Mami, i nu hian i pa hi kan phallo chung a nei lui a, i pa hian zu a heh em em a, hmeichhe dang pawh a kawp thin tih kan hria, i pa te nen hian kan tlangval laiin kan inhria a, buaina siam leh mi tihbuai a hrat em em a, mahse i nutei nen kan inneih hnu hian i nu hian a duh tlat si a, apawi kan ti, mahse neih kan phallo a, i pi leh puten i nu hi chhuah an phallo hial a. Mahse i pa hian engtin chiah nge a lo dawi at hman kan hre lo, atawpah chuan an inru ta nge nge a, inneih kan la phal chuang lo. Mahse i nu hian a lo pai hman tawh che si a, titla mai turin i pi ten an ti a, chutiang khawp chuan i pa hi kan duhlo a ni. Mahse keimah hian nau tihtlak chu ka phal thei ngang lo a, ilo piang chhuak a, an innei ta a ni. I nu hi kut a thlak nasa thei em em a, i pa hi mahnia khawsa a nih a vangin kan inah ka phalna in kan awm tir a, kan inhnuai ruak khu an luah a, inhau thawm pawh zantin kan hre thin a, hmeichhe dang a tawmpui fo thin. Bawihte, i nu hi ka nau ang chiahin ka en a, ka hmangaih em avangin kan in a apasal rapthlak tak nena chen ve chu ka phal ta a, mahse ka tisual a ni. I pa mizia hi a mak em em a, atawpah chuan i pa hian natna chi khat “bipolar disorder” an tih ang chi hi a vei alo ni a, i nu hian ngaihzawng dang anei ang tlat in a hre ta a, tichuan i hmuh lai ngei hian i nu hi a vaw ta hrep hrep zel a, i mahse kum 3 vel chauh ila ni ang. I mithmuh ah saruak ngalngat te hian a awmtir thin a, a duhtawkin i hmuh laiin a sawisa a, zahmawh tawngkam uchuak tak tak a ahauh chang pawh kan hre hnem mai, inchung lawkah kan awm a kan hre phak a, thenawm khawveng te pawn an hre vek thin, mi sawi sep sep kan hlawhthei hle bawk. Chung zawng zawng kan hriat theihna chhan pawh i nu hian min hrilh leh thin a ni. I nu hian tetlaia thian tha tak mai a nei a, chu chu Remkunga a ni a, i bialpa patea hi ani, an inkawm thin a kan inah pawh hian alo leng fo a, chu tak mai chu i pa hian a ringhlel a, i nu chu thah ah a vau hial thin a ni. Bawihte, chu i nu thianpa chuan zan khat chu i pa in kut athalk nasa lutuk chu a ngaingamlo a, a rawn kal a, chutih lai chuan mitthi inah kalin kan chhungkuain i pi leh pute nen hian kan awm bova, kan inchhungah ngei hian i pa chuan i nu leh i nu thianpa Remkunga te chu a that a, a hnuah amah a intihlum ve nghal niin police te chuan min hrilh a, chu chu thudik anih ka ring, i pa hi mi a ani tlat a, natna a vei tlat miau a lawm. Ronald-a pa ina i pa hming a zawh che a i hrilh chiah khan, khatia a awm nachhan pawh i hrethiam tawh mai em? I haw chiah khan Ronald-a pawh chu thudik an hrilh ani ngei ang, Bawihi, aharsa ngawt ang, mahse i theihnghilh a ngai, Ronald-a hi i kalsan a ngai.”
Ka awmdan a diklo, ka na lutuk, ka thinlung hi chemtea vih ang maiin ana a, ka tap hleitheilo, ka mittui tla nasa lutuk a, ka kut a khur a, ka tap chak lutuk, ka thei silo, ka na takzet, ka lu ahai muai muai a, nikhaw hrelo bawk chuan ka awm leh ta a. Mumang ka nei leh ta, he ka mumang hi chu a chiang ta ngang mai, angai te ang bawkin ka pa chuan ka nu chu a lo vau a, bang kil atangin inthlahrung leh hlau tak chungin ka lo en ve reng a, Pa Remkunga, Ronald-a patea chu alo awm ve bawk a, “Tiang tur ani ngailo, insum rawh” alo ti mawlh mawlh a, ka nu chu vih a tum a, Pa Kunga chuan alo danga, chu veleh ka pa chuan Pa Kunga chu a hrawka a vit a, chemte chu a la herh vir zui, ka hlau lutuk chu zun ka cheh hial a, thisen a luang nasa ngang mai. Ka pa chuan Pa Kunga a thah hnu chuan chemte chuan ka nu chu a tin a, ka nu chu a au tuar tuar a, MIN CHHAN RU a ti a, ka pa chuan a beng tlu thuai a, chuveleh ka lam arawn pan a, ka samah a kek a, roomah min kharhnan a, mahse a kalh lo, ka nu chu chem a asat ri chawk chawk ri ka hria a, ka nu chuan ka hmingpumin PUIPUI, KA HMANGAIH CHE ala rawn ti hram a, tichuan rang takin kawngka ka nam hawnga, ka pa chu a kawrah thisen alo kai hnuang a, ka nu chu alo let reng bawk a, ka pa chuan min en vung vung a, “Puipui, ka fanu...i pa hi tualthattu chu ka ni ta, tualthattu fanu i ni ta...” a ti a, a pumah chuan amah leh amah a invit a, ka mumang ram rapthlak tak atang chuan ka harh hlawl a, tunah chuan thil engkim ka hrechiang ta e.
Pawn ka chhuak ngam lo char char a, Ronald-a nena kan inbiaklohna leh ka thiante ka kawmloh a mahni a ka awm char char hnu chuan thla khat alo liam ta reng mai. Intihhlim ka tum lo, mahse ka na ve thlawt a ni. Thih ve mai ka duh a, KA NU LO KIR LEH RAWH tiin ka tap fo a, KA PA KA HUA CHE tiin ka tap fo bawk. Ka pa ti pawn ka ko duhlo, pa neiloa piang angin ka inngai nghal hmiah a, chu chu ka duhdan a ni. Chutih rual rual chuan Ronald-a, ka lungngaih a min hnem thin tu, ka hmangaih em em ka pasal tur an maia ka ngaih khan min haw em em a, Tualthattu fanu tiin min hmusit ta chu ania, ka ngai thei em em a, whatsapp ah min block bawk si, ka be ngam tawhlo hrim a, chaw ka ei ngailo. Ka cher emem a, hlimhmel ka pu ngailo a, ka thiante ka kawm peihlo bawk. Ka damlo a, ka khua asik zing em em a, mahse intihhlum em chu ka ngam ngai lo, hremhmun ah ka awm nimai hian ka hria, ka nun zawng zawng a chhe vek ni te hian ka hre hial thin. Nikhat chu phone call hi number hriatloh atang hian ka dawng nawlh mai a, ka la a, Ronald-a alo ni a, “Tinge minla rawn phone a? Min hua ni lawm ni?” ka ti a, ani chuan, “Tlaiah inhmu ang, ka tihpalh takzet, kan inhmuhna thin ah khan minlo nghak rawh aw, dar 3 velah, ka hmangaih che” a rawn ti tehmial a, ka thinphu a rang ngei mai, “Ronald, i ti tak tak em ni?” ka ti a, “Duat, ka hmangaih che, ka theihnghilh theilo che, lo kal rawh aw?” a rawn ti leh a, ka lawm lutuk chu ka zuang tawr tawr a, kha leh chen ka lo na tawh a, mahse minlo la hmangaih ve tho a ih dawn hi ka ti a ka hlim ngei mai. Tlai alo ni a phur takin ka insiam a, tichuan ka lo nghak ta a. Alo thleng har phian a, dar 4:30 ah pawh alo la thleng lo a, ka mangang tawh hle mai. Phone call ka dawng a, ka la a, ka thuhriat chuan min thawng ngei mai, RONALD-A A ACCIDENT...tih thu ka dawng a, ka thinphu hi a tawp mai hian ka hria, ka tlu tawp a, engmah ka hre zui lo. Ka harh leh chuan damdawiinah ka lo awm a, ward pakhatah hian Ronald-a nu leh pa te, ka patea te nupa leh ka pi leh pu te leh kan thianho anlo awm a, an hmel chu a ngui bar hlawm a, thil awmzia ka zawt a, tuman min chhang lo, atawpah chuan Ronald-a pa chuan min kai hrang a, room thim deuh pakhatah hian min hruai lut a, dim light a on a, tap chungin min kalsan leh daih a, khum pakhatah hian Ronald-a chu a lo mu a, alu an tuam bur a, nunna nei tawhlo tih hriat tak hian alo mu a. Ka kal hnai a, nasa tak leh chhuak em em in ka tap a, ka tan chuan vanduaina hlir a thleng bik si amaw? Ka hlim dawn emaw ka ti a mahse tahna bawkin min hmuak si a, darkar chanve zet ring taka ka tah hnu chuan ahmui vawt tak ah chuan ka fawp a, ti hian ka tawng chhuak ta a....
“Ronald min ngaidam rawh, tualthattu fanu chu ka ni e, ka hmangaih che” tiin.
THE END
Written by : Aaron Malsawmdawngzuala
Kan inchhung chu a hnawk hle mai, ka nu chu a au tuar tuar a, kei lah chu kum 5 mi lek niin ka chhan thei si lo, ka hlau hle mai. Thutthleng te chu a let rem rum mai a, light chu a phe zuk zuk bawka, ka pa chuan nasa takin ka nu chu a vau a, mahse enge a sawi ka hre chiang theilo. Kei kum 5 mi lek tana a hlauhawm tur zia leh a hrilhhai thlak tur zia chu tuman an hrethiam phalo ang. Ka nu chuan ring takin ka hmingin min ko a, "Puipui, ka hmangaih che." a rawn ti a, chu veleh ka pa chuan ka chhip samah min hnuk a, roomah min kalh khum a, chem a insat ri chawk chawk hi ka hre zui nghal a, ka hlau lutuk chu ka thidanga, abak chu engmah ka hre tawh lo.
Ka harh zawk mai a, khum atangin ka la tla zui, ka mumang han rapthlak zia kha aw... Ni e, ka mumang vek ani tho nangin, kum 5 ka nih hian ka nu leh pa ten min thih san a, an thih hun hi zan dar 12 vel a ni a, ka hriat zawng chu ka mumanga zantin ka hmuh thin hi ani, enge thleng tih chiang tak chuan ka sawi theilo a, ka hre bawk heklo, mahse tunah kum 18 ka ni ve tawh a, hetiang mumang ka nei ziah pawh hi mak ka inti thin hle. Achhan chu he tualthahna rapthlak tak thlen lai hian ka awm ve a, ka nu leh pa te hi an sawi dan chuan accident vanga thi angin an sawi a, athenin ka nu lo ngaizawng thin tupa in a that dun tihten an sawi a, mahse ka nu ngaizawngtupa anga an sawi hi hemi zan vek hian a thi ve tho bawk si, ka hrethiamlo takzet, kum 5 chiah ka la ni miau a, engtin nge an thih ka hrelo ani. Mahse ka mumangah kha chuan ka pa khan ka nu kha a that angin ka hre bawk si a, mahse engvanga hetiang mumang duhawmloh tak mai hi ka hmuh tlat thin le, mumang mai mai a ni ti dawn ila chiang takin ka nu leh pa hmel kha ka hmu bawk si, atak ang chiahin kan inchhung ngei kha a ni bawk si a, ka hrethiamlo takzet a ni. Tunah hi chuan ka Nutei te nupa bulah ka awm a, ka nu le pa thih atang khan hian anmahni fa ang chiahin min enkawl a, min duat hle a, ka duh apiang min lei thin a, ka tan chuan nu leh pa ang chiah an ni. Ka nutei te nupa hian ka nu leh pa chungchang engmah min hrilh ngailo a, enge achhan tiin ka inzawt fo a, mahse ka hriat a tullo aniang chu, keipawn engmah ka zawt ngai lem lo, ka hriatdan chuan ka nu ngaizawngtu hian ka pa chu thah a tum a, mahse ka nu chuan alo dang a, chuvang chuan a that a, ka pa nen an insual a, an insual na lamah an invit ve ve a, an pathum chuan an thi angin ka hria a, mahse a dik nge diklo chu ka hre chuanglo, chu thil pawh chu kan veng nu tawngthei ho in a min hrilh dan a ni. Mahse sawi leh ta thin ila, ka mumangah kha chuan ka nu ngaizawngtupa (Pa Kunga) kha chu ka nu leh ka pa inhauh laite kha chuan choka ah thi hnuangin a let reng tawh a, ka pa khan roomah min kalh khum a, chumi hnuah ka nu au tuar ka hre leh a, tichuan ka thidang a, chuan ka mumang atangin ka harh chhuak chauh thin kha a ni a, a nihna takah chuan zantin deuhthaw ka mang a ni, he mumang hian awmzia aneih chu ka ring tlat a, mahse midang sawi dan nen a in ang silo, kha thil thlen lai khan awm chu ka awm ve asin mawle, mahse han ngaihtuah let leh turin kha tih lai khan kum 5 chiah ka la ni bawk si. Ka khum atang chuan ka tho chhuak a, peihlo tak chuan college kal turin ka insiam a.
Nidang ang bawkin kan thianho kan inhmu khawm leh chu kan nui thler leh nghal duai duai a, ka thiannu, ka best freind Tepuii chuan, "Puipui, news ka hria a nia aw..." a ti a, keichuan hre chak takin, "Animaw, enge?" tiin ka zawt a. Tepuii chuan, "Vawiinah ka star tawk mai alo lut dawn, Pol Science teacher, Miss Remruati nau ania, a cousin Ronald-a, a hmingpum chu ka hrelo, a chhelo rap." a ti a, a zuang nghal vak vak a. Ka thiannu Chhani chuan, "Awi Tepui, ka hria, an sawi tak e, khapa han chhiatloh zia kha chu, a sawn pai pawh ka thlang." a la ti zui. Kan over tlang a ni e, mahse kan demawm bik lo, vanglai nun kan chen ve nimai a, Bible pawn kan vanglai nun kan chen aphal alawm. Ronald-a chu eng ang fakau a hmeltha tak ni ang maw? Ka hmeltha lutuk lo nangin ka hmel hi a zahpuiawm lemloh, kan thian zingah pawh ka chhelo ve ber a, kan thianho thlang dawn ta se, chu an mihring sawi Ronald-a chuan keimah bak tudang mah thlan tur a hre lovang. Class kan la a, new commer Ronald-a chu subject dang ami zawk alo la ni zui, kan class ah awm ve lo a, ka thiante chu an mood off ngei mai, Pol Science lo la ve der silo a. Class chawlh lai chuan canteen ah kan chawl a, Tepuii chuan, "Kei chu ka puar, Ronald-a ka zawng dawn, kan class ah a awm ve dawn maw tih nakalaiin, a fairlo lutuk. Min lo zawng mai ru....ka chhuak." a tia a tho daih a, min chhuasan ta a. Kan eikham chuan Tepuii chu kan zawng a, Ronald-a nen chuan college library ah anlo inhmu tak tak a, tukverh bulah anlo ding dun a, ache rang bik thin mange...kan va kal hnai a. Tepuii chuan minlo hmuh veleh chuan, "Awi inlo kal alaw a, hei hi ka thiante an nih hi, hei hi Puipuii nia, hei hi Siamtei, chuan hei hi Chhani..." tiin kan thian ho chu min inhmelhriat tir a, Ronald-a chu a lo hawia, "Ronald-a ka nia." tih pahin a nui a, biangsum ala nei zui a. Ava han hmeltha tehreng em, vantirhkoh nimai hian ka hria, an sawi ang chiah chuan hang lutuk lo, ngo lutuk lo a ni a, anui hmel mawlh kha. Ka thianten a fapai an thlang te kha ka lo eilo vel a, kei phei chuan atan chuan phir hial pawh ka pai mai ang, chhelo an tih diktak chu hepa ngei hi nih hi, chhelo tih sawi nan an hmang hial thin ka ring. Kan in chibai liam liam a, a kut te kha hnathawk ngailo mi hausa fapa kut tih hriat reng reng, anem si, ano si. Apian a nalh a, six pack chu anei chiang sa, ka ti ve tawp. A sang si, 6'1 vel lai a nih ka ring. Class tan a hun a, "Nih phawt u." a ti a, akal ta daih a, ka en zui vawng vawng vawng a. Tepuii chuan, "Puipui, enteh, Ronald-a melh dan che kha a diklo tlat, a star che aniang." a ti ringawt a. Kei lah chuan, "Tak tak ami, Tepui ...a van hmeltha em em." ka ti a, ka insum thei thawt lo a ni. Min dem nghal ringawt, mahse a nuam ve reng thpo mai. Class lak lai pawh chuan ka ngaihtuah reng a, a nuih paha abiangsum rawn lang mawlh kha, a chhiatloh dan em em kha, chutia ka ngaihtuah mek lai chuan ban alo hun leh ta der mai. Ka thiante bulah chuan, "Lo va kal ru ka rawn zui ang che u." ka ti a, an scooty an han herh nung sap sap hlawm a, an kal ve mai bawk a. Diktak chuan ka la kal mai loh nachhan chu Ronald-a ka zawn ruk deuh vang a ni. Ka hawikual a, minute 5 vel ka nghah tawh hnuah pawh ka la hmuh mai loh avang chuan ka mood a fuhlo ngei mai, ka thinrim ve ringawt a nih chu. Ka beidawng chu kal ka tum a, ka scooty chu start ka tum a, a nung thei reng reng lo mai a, rik pawh a rilo. Ka hmet ka hmet a, awmzia ka hrelo hle mai, thinrim sa nen chuan ka puakkeh lo chauh. Ka hnung atang chuan mipa aw mawi tak leh pa tak mai hian, "Chahbi vuah la, anung mai ang." a rawn ti a, rang tawkin ka hawi phei a, ka phu zawk thei hial, Ronald-a ngei mai kha ani. Ka scooty ka en a, chahbi ka vuahlo hrim hrim, ka ipte ah ka lo la ak chu niin. Ka zak lutuk chu, "E..anih hi." ka ti bah nuai a. A rawn kal hnai a, min rawn be leh ta.
"Tepuii kha i thiannu mi?"
"Ihh, um ka best friend a nia."
"Nia library ah khan lehkhabu ka en laiin min rawn bia a, thian ka nei vak lo a, inlo awm hlauh a, in fel khawp mai, kan inkawm ho zel ang chu tiraw, thian ka nei miah lo nia."
"Hehe, umm..ihh nia."
"Vawiin chu ka first day a ni sia, bike ka lo kenglo a taxi in ka lo kal a, i rualin ka lo haw ve mai teh ang, pawi i tih loh chuan."
"Aw nia...ihh nangman khalh la."
"Awle, ka lo khalh ang."
Ka mipa duh ruk em em maiin min han phur chu anuam ngei mai, mahse ka si tha ngamlo. Kan college atang hian an in chu a hnai zawk a, an in bulah chuan min chhuk tir a, lo leng lut zuai turin min sawm a, mahse ka zak ve deuh a, ka chak viau nangin ka hnar hram a. Kan in mangtha a, ka haw ta a. Hemi zan hian lehkha zir chu a har ngei mai, amah hlir ka ngaihtuah a, ka mu pawh khumah ka in let ka inlet a, ka ngaihtuah let a, min nuih seih lai te kha, chuan a biangsum mawlh kha, ava han tha chiang em. Achang leh ka in lukhup a, lukham ka kuah a, nuam ka ti lutuk chu ka awm thiamlo a ni ber mai, college kal ti nuam tu ka tawng hi a ni ringawt. Atukah chuan scooty keng lovin taxi in ka kal ve thung a, bike alo ken chuan inphurh haw tir ka tum deuh a. Hma tawkah ka kal a, college kawt velah chuan ka tei kual vel mai mai a, ka thiante nghak tho mah ila ka nghah ber zawk chu Ronald-a a ni. Minute 15 vel ka nghah hnu chuan bike sen nalh tawk nen hian alo kal a, a helmet a phelh a, a side glass ah chuan a hairstyle a siamtha te te a, helmet a dah fel a, bike atang chuan a chhuk a, ka lo en ngun ngei mai. A hawi kual a, min rawn hmu a, a nui nghal ver ver a, min rawn pan a, mahse ka zam leh der mai. “Tunge i nghah a?” a rawn ti a, keichuan, “Ihh..ka thiante ka nghak a, i van kal hma ve..” ka ti bah deuh nuai mai a. “Hma vak tawh hleinem, lo han lut ila an lo thleng ve mai ang.” a ti a, phur tak chuan college chhungah chuan kan inzui lut a. Lunch break ah pawh canteen ah minlo nghak a, thil kan eidun a. Min han duh ve hlauh mai se, ka tan chuan vanram tlafual a ni mai tur. Kan inkawm a, kan nui dun a, a tawng duh phian lehnghal. Class lak lai te hian ka lo ngaihtuah leh veng veng zel a, kan teacher te pawn LALNUNPUI tiin min rawn hau leh nge nge zel. Class kan ban meuh chuan an bang hmasa zawk ni ngei tur a ni, a bike bulah hian alo ding a, min hmu chiah chu minlo nuih var var a, a biangsum alang leh ta, ava han tha chiang tak em. Ka thiante nen chuan kan va phei a, Tepuii chuan, “Ehem.. nghah i nei nimaw?” tiin a chhaih vel a, Ronald-a chuan, “Nangmahni hi ka lo nghak che u, ka thian neihchhunte in ni ve si a.” a ti a, anui sen sen a. Tepuii bawk chuan, “Ronald, hei Puipuii hi a scooty apatea’n a hman sak daih a, phurh tur i neih loh chuan lo phur haw la.” Inla zei fahran hian alo ti a. Ka chak lutuk, ka duhthusam a ni, mahse ka hnial der vel a, “Angai hleinem, a inthlahrun awm mai mai. Chhani hian min phur mai se.” ka ti vel a. Ronald-a chuan, “Niminah pawh min phur haw a, ka phur haw ve loh ten, lo han kal ru, kanlo zui ang che u..” a ti a, nuam ve chiang, Tepuii chuan min siai zeuh pahin, “Nia kal ang u.” ati a, ka thiannu hi chuan min hmangaih thin ania. An kal hnu chuan kan inphur a, kan kal ve ta a. Min be miahlo a, ka be hmasa zak bawk si. Kan in thleng min thlah a, ka chhuk a, “Ka lawm lutuk aw, chaw eitui le.” ka ti a, Ronalda chuan, “Scooty ilo ken a ngai tawh lo ang, kan inthlah ziah dawn nia, aho lutuk inthlahrung suh, ka lo sawm ziah ang che aw.” a ti a, ka lai lek lek, “A ho emai, chutiang angailo.” ka ti a, mahse zeplo chuan ka chak reng. Ani chuan, “I lai hmel kha a cute lutuk, i van lo hmeltha reuh em em, ka kal phawt ange, naktukah ka lo sawm ang che...nihphawt le.” a tia, akal ta daih a. Khawvel hi a ding nimai hian ka hria, ka ding vung vung a, ka ngaihtuahna chu khawvel dangah daih a awm, ka melh ngai ka melh vung vung a, Ronald-a khan hmeltha min ti a nih chu, ka van intithei tak em. Chumi zan pawh chuan ka mu leh thei lo, ka lawm lutuk hi ka tap lo chauh a ni.
College chu nuam ka ti hle mai, ka thiante chuan min chhaihdun char char zel a, ka haw lemlo khawp mai, Ronald-a pawh chuan a haw bik lemlo. Chu lek pawh chuan min ti hlim em em a, ka bialpa amaw an ti deuh vek tawh. Kan inkawm ngeih em em a, thiantha tak ang leh a nau ang mai hian min en a, min duat em em a, ka thiante chu ka hlat tial tial mai hian ka hria. Mahse ka bulah ka duh em em Ronald-a a awm a, min care em em a, kei chuan ka ngaihzawng ang mai hian ka hre thin. Ka thinlung a thu inthup awm hi hrilh ka duh a, mahse hmeichhia zawkina han bem chu ka zak deuh bawk si, engtin nge ka tih ang? An inah te min hruai lut a, anu leh pa pawh an fel hle mai, nu leh pa hi ka duh ve thin ngawt mai, Ronald-a an duat zia ka hmuh te hian ka nu ka ngaihna hi a zual em em thin a,vanramah tal chuan min lo en ve thin angem le tiin ka inzawt thin. An in atanga ka haw hnu chuan chaw pawh eilo in roomah ka in kalh khum a, ka tap a. Ka nu kha ka ngai thar em em a, kum 5 lek ka nih in min kalsan a, ka rawn tleirawl chhuah tirh kha chuan ka nu hi ka ngai lutuk lem lo, kum 10 chuang zet nu tellovin ka seilian tawh a, mahse Ronald-a nu leh pa te ka hmu a, a nu in Ronald-a 'bawihte' tia a ko ka hriat te leh a duat zia ka hmuh te khan ka nu kha ka ngaihtuah a, min duat ve thin ngei awm sia, mahse eng vak mah ka la hre silo, chhia leh tha ka thliar thiam ve hma in min boral san daih mai si a , ka lung a leng em em a, ngati nge ka nu rual khan min hruai ve mai loh tiin Pathian pawh ka dem hial a. “Ka nu zanin hian ka van ngai tak che em, i hmel pawh chiang takin ka hmu hman lo ni si a, kum 5 lek ka nih a i hmel ka hmuh khan ka la te si a, ka hrechiang silo. I thlalak chauh hi maw ka chan tawk ni ta le? Ka nu, mi fate chuan nu leh pa an la nei asin. Pa chu ka mamawh lemlo, ka duh tho a mahse ka pa ai chuan ka mamawh zawk che, lo let leh thei i ni tawh silo. Ka nu, ka mumang rapthlak thin zia te hi i hria em? Ka ngai lutuk che, i fanu hian college thleng ka lo rap ve tawh asin, class 12 pawh kha 1st ah ka pass asin. Ka nu min chhuang ve ngei ang tiraw? NU tia koh tur ka nei ve silo a, fahrah turin tinge min kalsan? Ka nu duhtak, i fanu hian maw mipa duhzawng ka hmu ve tawh asin, ani chu mi fel tak ani a, ka nu nangpawn hmu la min duhpui ve ngawt ang, ahming chu Ronald Malsawmtluanga a ni a, a hmeltha asin, nangmah ang chiah, ahmeltha takzet, ka nu, nakinah i thlan ah kan lo la kal dun ang aw, ka ngai che...ka hmangaih che ka nu. Nakinah chuan ka nunna a tawp ve anga, chutah chuan Vanramah minlo nghak la, atak ngeiin kan nufa in kan la inkawm dawnnnia aw, ilo dam thin maw tiin atak ngeiin ka zawt ang che, ka nu ka hmangaih che.” tiin ka nu thalak chu ka be mawlh mawlh a, a tawpah chuan ka muhil ve thei ta hram a. Ka mutthilh tawh hnu hian ka phone hi a rawn ri a, ka en chu Ronald-a alo ni. Rang lutukin ka pick up nghal a, a la thaw hluam hluam zui lehnghal a.
“Hello?”
“Hello, Puipui, in inkawtah ka awm lo chhuak teh, apawimawh teh ania aw.”
“Awi, i ti awm ang lo emai, ka chhungte an mu tawh a, ti hian sawi mai la.”
“Aih, atheih loh...lo chhuak teh, a pawimawh nia.”
“Achiloh min man ang, ka ngam lo.”
“Lo chhuak vat rawh aw, ilo chhuah hma chu ka nghak dawn che nia, ka dah aw.”
“Hello hey, Ronald, Ro...naaa la dah zui.”
Van buaithlak ve aw, engtin nge niang, eng thil tak ni ang maw? Aruka chhuah angai nimaw...umm chhuak ru zal zal ila nimai lawm. Fimkhur thei ang berin ka room kawnkhar chu ka nam hawng a, ka dak de de a, la thim ropui zui. Kan in kawngkhar chu fimkhur tawkin ka hawng a, fimkhur tawkin ka khar leh a, rin aiin ka zei phian mawle, vawi khat naah lehnghal. Ka chhuak thei ta, engmah ka lo ngaihtuah chiang lo a, kawr ban bul pante leh boxer chiah ka lo ha nih hi, ka van zak ve aw. Pawnah chuan alo ding a, minlo au a, ka va pan hnai a, ka banah a apawt thut a, kan in atanga hla vaklo ah chuan min kai phei a.
“Ronald, ka ngaih i ti thalo nia aw, enge ni a?
“Thil pawimawh deuh hrilh tur che ka nei a.”
“Sawi vat la, min man ange aw.”
“Puipui, ka sawi tawp mai ang, ka duh lutuk che.”
(Deuh tawp mai a, enge maw asawi le, dawt nilo se awww, ka vawt tihna zawng zawng pawh reh vek, ka lum pum mai, Ronald-a’n min duh amaw?)
“Ronald, ka..ka, ihh..ka van hrethiam lo ve.”
“Puipui, ka hmangaih che in ka hria, kan inkawm te leh kan intext te hian maw, ka hlim thei lutuk, hrilh che ka duh thin a, mahse ka ngam ngailo a, minlo duhlo ta la ka zak dawn lutuk a, nanglo kawm peih ka nei silo a, ka rilru ka sawi avang hian min huat phah ta la, engtin nge ka awm ang, chuvang chuan ka ngam lo ani, ka nep tiraw, ka dawihzep tiraw? Mahse zanin hian hrilh che ka tum a mahse ilo mu hma bawk sia, chuvang chuan hrilh ngei che ka duh a, zanin hian ka hrilh loh che chuan nidangah chuan ka ngam leh tawh dawn siloa, min huat phah emaw min duh ve lo anih chuan pawi ka tilo mahse ka thinlung zawng zawng hi mipa ka nih angin huaisen takin ka hrilh che a ni.”
(Amitah tak enin a thusawi chu ngun tak leh ngaihnawm ti tak hian ka lo ngaithla a, a ri ava mawi si em, ka mittui a tla tep hial in ka hria.)
“Ronald?”
“Umm, Puipui...”
“Ronald ka hmangaih che.” (Ka insum thei thlawt lo)
“Puipui, i ti tak tak ami?”
“Ronald, ka hmangaih lutuk che asin.”
“Puipui, ka van lawm tak, ihh...min duh dawnlo maw ka tia, ka lo ip nasa hman lutuk a, i ti tak tak em, mawwh? Min phatsan leh si nge aw, ka buai vek animai, thudik a ni ti raw, Puipui ka hma......”
Asawi zawh hma chuan ka lawm lutuk awm ngaihna hrelo chu ka insum zolo, abiangah ka vuan a ka kiss ta tawp mai a, athlum hialin ka hria. Ka hmangaih ber leh duhber maiin min lo hmangaih em em thin amaw? Ka lo van hre har em em ve. Ronald-a hi ka khawvel ani a, ka hmangaih em em a, ani pawn minlo hmangaih ve reng anih chu mawle...reitak mai kan inkiss hnu chuan kan inthlah ta a. Chumi zan chuan kan mutui em em khawp a, ka lawm lutuk chu thlamuang takin ka muhil a, ka mut theihloh kan rin vei nen, college kal chu ahma aiin nuam sawt dawn nih hi. Atukah chuan kan inbul ah hian minlo nghak leh der tawh mai a, ka va kal a, minlo nuih sen sen a, “Ka bialnu thar chu ivan nalh ve a.” a lo ti a, hmangaihna kawng chhukchho chu ka zawh ve tan dawn ta. “Ka bialpa thar chu van chhelo em em, kal ila.” ka ti a, kan chhuak ta a. College break lai chuan ka thiante ka hrlh ciah mai chu, class roomah kan au tuar tuar a, min lo en thupa, haha nuam ve em a ni. Chumi zan pawh chuan Chhani te inah kan lengho a, Ronald-a nena kan nih lawmnan tiin savawm kan talh a, kan kai hlawm hle mai, mahse Ronald-a hriatloh in a nia, chhan chu ka in aphal dawn silo a, arukin kan lawm ve tawp mai. Ka nun hi a hlim ngawih ngawih a, Pathian hnenah pawh lawmthu ka sawi mawlh mawlh a, ka nu min laksak mahse ka nu ai awhin ka hmangaih em em mai min ngaihtuah leh min care em em tu Ronald-a min tawntir a, ka lawm takzet a ni, ka nu ka ngaihna a zual leh thin mahse ka hlim em avang zawka ngai ka ni. Kan inzui chho zel a, thianghlim takin kan inngaizawng a, ka titau hrat bawk sia, min care a min hmangaih em em a, ka tan ui a neilo. Present hi min pe deuh reng mai a, kan inah alo leng a, ka nutei te nupa te lah hian an be mang ngailo a, khawilam mi nge tih pawh min zawt ngai heklo, ho emai, ka nu thlanah ka kal anga, ka nu ber ka hrilh chuan tawk mai. Lehkha zir tha tur ten min fuih nasa em em a, thilsual ka tih aphallo bur a, amah pawn ruih theihthil a ti ngailo a, kuhva chu a ei zeuh zeuh a, meizial erawh a heh em em thung, kan inhauh tamna ber a ni. Ka nu ka hmu let leh nimai hian ka hria, Pathian hian nu thar min pe tiin abulah pawh ka hrilh thin. Inhauh chu kan nei tam ve thin khawp mai, ka thikthu chhe lutuk vang hi a tam zawk chu a nia, mahse atawpah amah zawk a tlawm leh a, ka thiamlohnaah pawh ngaihdam min dil leh nge nge thin, afel thin ania. Inhau ngun ve viau mah ila thinrim hmaisen khawpa inhauh kan nei ngailo, ka bialpa hmasa ber a ni a, mahse keichu a pathumna, haha..mahse engzahna pawh ni ila a tawp berna nih kha ka duhber. Engkim an chhungkaw chungchang te min hrilh a, mahse keichuan ka nu leh pate accident-a an thih thu chiah ka hrilh a, abak chu ka hrilh duhlo pawh nilovin ka hrechianglo em a, hrilhdan tur ka hrelo a ni.
College exam zawh ni a ni a, exam zawh lawm nan tiin an inah ka leng a, tumah anlo awm lo a, inneih naah anlo kal vek chu niin, chance tha lutuk. A room ah min luhpui a, min khawichhe dawnlo tih hi ka chiang ve tawk ani, ka mi rin ber a ni a, engtikah mah ka thianghlimna hi min laksak lovang. Khumah kan thu dun a, kan titia, kan nui dun bawk bawk a, kan va hlim em. Aroom chu ka hawikual a, mipa room ah chuan a felfai khawp mai. Ka room ai pawn a fai zawkin ka hria, chuti khawpa che fel chu ani, ka ngaihsanna a zual hle mai, ka pasal tur ni mai hian ka ngai a, ani lo chu hmangaih dang ka neih leh ka ring tawh lo. A room bangah chuan mipa khat thlalak, kum 40 bawr vel ni awm tak, hmelchhe lemlo thlalak hi a lo intar a, a chungah chuan RIP tih inziak bawk a, Ronald-a bulah chuan, “Duat, khikhi tunge?” ka ti a, a en vung vung a, a nuisak a, “Ka patea nih khi, Pa Rema a nia, kum 8 ka nih laiin min thih san a, ka ngai thei lutuk. Ka hre phak chiahlo nangin, min duat thei em em a, ka pa ai mah hian a bulah ka awm tam a, engkim min leisak a, ka ngen apiang min tihsak thin a, mahse mi nu ngaizawng angin an sawi a, ka nutei (Pa Rema nupui) chu a rilru ana lutuk a, an inthen a, tunah a awmna chin pawh kan hre tawh lo. Ka patea hian dawt a ni tiin ka chhungte pawh a hrilh a, ka pa te chuan an ring mai a, mahse chu anngaihzawngnu anga an sawinu pasal chuan engtik lai mai pawh hian a vau renga, police hnena report pawh kan tum a, mahse aman aduh tlat silo.” A mittui lo luang thla a, a hru hul a, a sawi zel a, “Diktaka sawi chuan angaihzawng anilo a, tet te atanga akawm thin a thiannu a ni a, kum 30 chuang an inkawm tawh. Unaunu ang chiahin a en a, mahse apasal hian a thik tlat a, kut hial te alo thlak phah thin a. Zankhat chu kut alo thlak nasa deuh aniang, tunlai angin mobile a la awm lo a, khatih hun lai khan landline hmangin ka patea a rawn phone a, mahse an inbiak zawh hmain phone chu a tawp a, a ngaih thalo chu a va kal a, ahnua kan hriat zawng chu ka patea chu a hrawkah nasa takin bung tep khawpin zai alo ni a, kan chan ta a ni. Chumi te nupa pawh chu an thi ve nghal ani awm e, chuzawng chu ka hriat a ni. Puipui, ka thu hrilh che hi tuma hnenah sawi suh aw, ka rin em che avangin ka hrilh che a nih hi...ka pa ten tumah hrilh an phal lo nia.” a ti a, a mittui a tling nasa hle mai, ka khawngaih em em a, chu mihring pa chu eng ang mihring nge maw anih le, avan nasa ve aw, ka thin alo rim ve lutuk a, “Awle ka sawilo ang, mahse tualthattu chhungte nen chuan engtin nge in inbiak rem a?” tiin ka zawt, ani chuan, “Ka pa te nen chuan an in be rem ta nih kha, tualthattu ber amah a inthat ve nghal angin an sawi bawk sia...ngaihna kan hre tawh biklo a, tihtheih dang avang bawk sia, rilru na tak chungin kan inngaidam a, mahse khami hnu khan tualthattu chhungte nen hian kan inhaw em em a, inngaidam mah ila kan intlawh ngailo a, kan inbe leh tawh ngailo a, kum 14 lai liam tawh mahse ka chhungte hian an theihnghilh thei lo, mahse tih ngaihna avang em a ni. An sawidan chuan tuathattu hi makpa chhungkhung a ni a, anu leh pate an thi tawh a, a nupui chhungte bulah a awm a, tichuan fanu pakhat annei a, tunge a nih pawh ka hrelo, an fa neih hnu chuan an indang a, tichuan an nupa in ngei ah chuan ani ka patea leh a nupui chu athah tak ni. Ngaihtuah teh, thian inkawmngeih em em kum 30 chuang inkawm tawh chu rawng em em in a that ta nih chu, ka rilru ana lutuk duat. Tihian ka ngaihtuah thin a, khatih hunlai khan kum 8 lek la ni mah ila, ka la thanglian anga, ka patea phuba hi ka la ngei ang, kum 22 ka ni tawh a, an fanu hmang hian phuba ka la ang, ka zawngchhuak anga, hrehawm takin ka siam ang tiin ka ngaihtuah thin, mahse chu chu ka ti leh lo ang, achhan chu ka lunglenna hnemtu ber nang hi ka tawng tawh che a, mahse phuba lak chakna hian min pawt leh thin a, chumi lakah chuan nangpawn min ven a ngai dawn ni.” ati a, a tap tep a, ka van khawngaih tak em. A hmuiah duat takin ka fawp a, “Duat, phuba lak angai lo, an fanu chu pawisawilo a ni a, ani tih hrehawm avang khan i patea hi alo let dawn lo, keipawn ka nu leh pate ka chan tawh a, mahse ka tawng che a, ka tan chuan nu leh pa tha tak i ni a sin. Duat ti miah suh aw, ka hmangaih lutuk che a nia, engkim min hrilh a, min rin em avangin ka lawm e aw.” ka ti a, min kuah a, “Puipui, ka van lawm tak em, nang ka tawng che hi, awle ka ti miah lo ang, ka ti miah lo ang.” a ti a. Chumi zan chuan ka ngaihtuah naah a thil sawi kha a awm reng a, rapthalk ka ti hle mai, ka mumang te kha ka hrechhuak a, thisen hlir ka hmu a, ka hlau deuh hial, ka awm a ti nuamlo ngei mai, Ronald-a ka hmangaih ka duat-a rilru tina tu cu ka haw ngei mai, a thi ve nghal pawh chu chawh ka ti ngawi ngawih a, thinrim tun chung chuan ka muhil ve thei ta hram a.
Chumi zan chuan mumang ka nei leh ta, college ah chuan ka thiante an lo inkawm khawm a, ka va pan hnai a, Tepuii chuan, “Nang hi maw i lo nih a, Tualthattu fanu anih hi, thiante u hlau rawh u, AIDS vei ai pawn a hlauhawm zawk.” min lo ti hrep mai a, mak ka ti hle mai, Ronald a lo kal ka hmu a, ka va pan hnai a, ka va kuah a, ka tap zawih zawih a, mahse min kuah let miah lo, min kuai dak dawrh a, chemte hraim hmel tak hi a rawn lek kang a, nghet tawk hian min rek a, “Nang hi maw Tualthattu rapthlak fa nu chu, ka mi zawn chu ka hmu ta e.” tih ka pumah chuan a vit pawp a, ka harh zawk a, ka thaw nghal hrawk hrawk a, khai awww...eng mumang nge ni ngai le? Ka bialpa in min that maw? Huiham, mumang ani hlauh chu ka van vannei tak em. Mahse nilengin ka rilru a nuam theilo, college exam chawlh ni hmasa ber a ni a, ka nutei leh ka patea te an chhuaka, ka mumang chu ka ngaihtuah a, thutthleng sei ah ka mu a, ka rilru ah thildang alut thei miah lo. Ka mumang kha avan rapthlak tak em, ka hlau ngawih ngawih. Chubakah tinge ‘Tualthattu fanu’ tia min koh kha ka hre thiam lo, ka rilru a ti buai tep lawm le, ho lutuk mumang mai mai alawm le. Ka lung a leng em em a, Ronald-a’n apa in entir naah a kalpui bawk si, tihtur van awmlo tak, huiz...TV ka en mai mai a, channel hmuhnawm a awm lo, ka bialpa duhtak hi ka ngai a ni. Tlai ah chuan min lo call a, kan inhmu a, hlim takin kan lengdun a, zanah pawh alo leng a, kan titi a, nuam takin hun chu kan hmangral leh ta a.
Atukah chuan Ronald-a chuan leng turin min sawm a, kan leng kual a, World Bank road ah te kan kal a, savawm anlo talh sup sup mai, ka van in ve chak mahse inthup a ngai tlats. Chuan zanah chuan an inah te chaw ka ei vel a, zan thleng ka awm a, zanah chuan meilum aiin a chhungte nen kan ti ti a, apa chuan min en leh vung vung thin a.
“Puipui, tunge i pa ni reng reng a, kan la inzawt miah lo?”
“Ka pa chu Sanga ania, Lalliansanga.”
(A aia thutak hian min han melh leh a...)
“Anih i nu kha Zoramchhani tiraw?”
“Aw ni e, kum 5 ka nih in min boralsan tawh a.”
(A mitmeng a danglam nghal vek mai, a thaw hak a)
“Anih chuan Mama hei va thlah tawh ta che, dar 9 ri dawn..”
Ronald-a nu chuan a lo tuihnih nghal a.
“Ni e Bawiha va thlah rawh.”
Ronald-a chuan mak tih hmel takin a nu leh pate chu a en a, chuan a tho akan inthlah ta a, kan inbul kan thlen chuan keichuan, “Duat, tinge i pa te khan min huat hmel tawp.” ka ti a, Ronald-a chuan, “I mawl emai, dar 9 ri tawh a, tlai tawh lawm, i chhungte pawn an ngaihtuah lutuk ang che tih an hlau niang. Nih chuan muttui aw ka hmangaih che” tih pah chuan duat takin min fawp vawng vawng a, kan in thlah leh ta a. Ka awm anuamlo ngei mai, ka pa hming ka sawi laia Ronald-a pa hmel danglam lutuk kha ka mitthla ah a lang reng, engthil chiah nge maw ni le? Atukah chuan hma takah ka tho a, ka va wish a, mahse dar 8 vel ah pawh min rawn reply miahlo, chaw ka ei a, mahse min la reply lo, ka whatsapp message pawh a hmu vek a, mahse engmah chhanletna ka dawng lo. Ka ngaih atha tawh thlawt lo, nizana apa min melh dan te nen khan, engmah lah chu a rawn sawi duh silo. Ka call a, ala duh silo, atawpah phei chuan a switch off daih lehnghal. Ka thinrim ve lek lek tawh, a buai nih chuan sawi ve mai tur ania, min van care tawh lo tak. Nilengin inah ka awm a, min rawn be bawk silo, a khat tawkin ka call renga, a ring quit thak thak bawk si. Ka mangang lutuk ringawt, ka nutei phone atang ten ka patea phone atang ten ka phone a, “hello” a rawn ti a, ka aw a hriat veleh a dah nghal a, ka call leh pawn a dah busy zel a, ka call zawng zawng a block vek bawk. Ka thinrim lutuk chu Tepuii inhmuh puiah ka sawm a, engkim ka hrilh vek a, “Tepui, inthen a duh nih chuan tha takin sawi mai se, ana chu ka ti lutuk ang mahse engmah chiang hleilo a min be duhlo hi ka hrethiam lo” ka ti a, Tepuii chuan, “Ahma in inhauhna in nei mi, tinge i pa hming i lama chutia a mitmeng a dang ringawt? I ngaihbel mai mai niang, ka lo be dawn mi?” a ti a, keipawh chuan lo be chhin turin ka ti a, ka mangang lutuk. Zanah chuan Tepuiin min rawn phone a, pawnah lo chhuak turin min ti a, Ronald-a a awm tiin min hrilh a, phur tak leh tihtauh inring sa in ka’n chhuk tau vei nghawng nghawng a, pawnah chuan alo ding a, ka hmu chiah chu a banah chuan ka beng a, ka chum a, ka vui nghal char char a, ka tap pur a, ka kuah a, mahse min kuah let miah lo. Min kuai dak a, nasa mangkheng in min kiss a, ngaihna ka hrelo hle mai. Kan ha in toh ri bawp bawp leh luak tep khawpin min fawp a, anuam teh chiam lo, min fawp zo chu min nam dawr a, ka tlu tep a. Ka tap tep a, ka hmui ana vek lehnghal, enge maw a hriat le?
“Duat tinge khatia min tih a?”
(Athaw hak a, amittui a tling piau a, a thinrim hmel em em lehnghal.)
“Nang hi maw ka mizawn chu ni a, nang hi nimaw na taka siam ka tum kum 14 chhung teh meuh ka lo zawn chu, hrep tak hian?”
(Engthil nge maw a sawi le, ka mak ti lutuk chu tawng pawh ka tawng hleitheilo.)
“Ro...Ronald, enge awmzia, mawh?”
“Ka hua che ka haw lutuk che, nang hian min ti hrilhhai lutuk, ka patea, ka pa ang chiah a ka en chu i pa, nangmah hringtu pa ngei hian min thah sak asin. Khawvela ka mi huat ber fanu ka lo hmangaih a maw? Tualthattu fanu maw ka lo ngaihzawng a?”
Ka thinphu chu ka thinlung hi a puakkeh dawn maw tih mai tur hian a phu rang em em a, ka lu ahai a nghal muai muai thei hial a, “Ronald, en...engmaw i sawi kha, Tual...tualthattu fanu min ti alaw?” ka ti thei hram a. Ani chuan ka samah min rawn tham a, vin zet hian, “Ni e, Hmeli, ka patea hi i pa tlaktlai lo thah a ni tih hria ang che...ka haw lutuk che.” min ti hrep a, engmah sawitur ka hrelo, mak ka ti lutuk hi sawithiam a har, ka na ngawih ngawih a, ka hrethiamlo hle bawk. Ka mumanga Tualthattu Fanu tia min koh kha ka mitthlaah alo lang nghal chuai chuai a, ka mittui chu a sur hian a sur zung zung mai a, ka tap theilo, min hnawh tawh lutuk, thawk pawh ka thaw tha theilo. Ronald-a bawk chuan, “Ka ten che, i pa vang liau liau hian ka hua che, ka hmangaihna che zawng zawng kha min pe let rawh, tiang mi i ni tih hria ila..” a sawi zo theilo, a hnuk a ulh a, kei chuan fiahlo leh harsa ti tak chung hian, “Ro..Ronald, enge ka..ka thiamlohna, tinge min..min dem? Min kalsan suh..” ka ti thei tawk a. Mahse awmzia a nei tawh lo, “Tualthattu fanu hi engtikah mah ka nupui emaw, ka bialnu i ni thei ngailo ang...” min tih khum a, akal nal nal a, ka au zui mahse ka aw achhuak tha thei lo, “Ronald, duhtak khawngaihin, ti suh..” ka ti thei tawk a, mahse akal zel a, akal liam ta a. Ka tap a, ka ngaihtuahna a buai a, ka mumang zawng zawng te kha ka mitthla ah alo lang zut zut a, ahmaa ka mumang a ka pa leh ka nu inhauh laia kil khata ngawi renga ka din lai a ka pa ngaizawngtu Pa Kunga, chhuata thisen baw nuai chunga lo let reng kha ka hmu tel ve ziah a, chu chu ka ngaihtuah naah lo lut nghal a, a hmel kha ka hmu fiah chiang chiah ngailo a, mahse ka mitthla ah ka hmu chiang ta, Ronald-a pa tea, Pa Rema ngei kha ani, ka maimitchhing a, ka hmu fiah uar uar mai, ka rap lutuk chu ka tap vak vak a, ka chau tial tial a, ka khawhmuh afiahlo tial tial a, ka chau lutuk...engmah ka hre tawh lo, ka nuteiin mangang tak a, PUIPUI a rawn ti ri chu fiah lo ruai hian ka hria a, nikhua ka hre tawh lo. Ka harh leh chuan khumah ka lo mu a, ka nutei te nupa chuan min lo awmpui a, khumah an thu a, ka patea chuan duat tak hian ka sam ah a lo chul a. Enge thil awmzia min zawt a, ka hrilh ta vek a, ka nutei insum zo lo chu a tap ta hawm hawm mai a, ka patea chuan lungngai hmel takin ti hian min hrilh a...
“Bawihte, thudik tak i hriat chu a hun tawh takzet a nih dawn hi. I hriat hunah chuan i tuar thiamlo anga, rei tak kan thup pawh hi min dem ngei ang, mahse i rilru nat kan hlauh vang a ni. Mami, i nu hian i pa hi kan phallo chung a nei lui a, i pa hian zu a heh em em a, hmeichhe dang pawh a kawp thin tih kan hria, i pa te nen hian kan tlangval laiin kan inhria a, buaina siam leh mi tihbuai a hrat em em a, mahse i nutei nen kan inneih hnu hian i nu hian a duh tlat si a, apawi kan ti, mahse neih kan phallo a, i pi leh puten i nu hi chhuah an phallo hial a. Mahse i pa hian engtin chiah nge a lo dawi at hman kan hre lo, atawpah chuan an inru ta nge nge a, inneih kan la phal chuang lo. Mahse i nu hian a lo pai hman tawh che si a, titla mai turin i pi ten an ti a, chutiang khawp chuan i pa hi kan duhlo a ni. Mahse keimah hian nau tihtlak chu ka phal thei ngang lo a, ilo piang chhuak a, an innei ta a ni. I nu hi kut a thlak nasa thei em em a, i pa hi mahnia khawsa a nih a vangin kan inah ka phalna in kan awm tir a, kan inhnuai ruak khu an luah a, inhau thawm pawh zantin kan hre thin a, hmeichhe dang a tawmpui fo thin. Bawihte, i nu hi ka nau ang chiahin ka en a, ka hmangaih em avangin kan in a apasal rapthlak tak nena chen ve chu ka phal ta a, mahse ka tisual a ni. I pa mizia hi a mak em em a, atawpah chuan i pa hian natna chi khat “bipolar disorder” an tih ang chi hi a vei alo ni a, i nu hian ngaihzawng dang anei ang tlat in a hre ta a, tichuan i hmuh lai ngei hian i nu hi a vaw ta hrep hrep zel a, i mahse kum 3 vel chauh ila ni ang. I mithmuh ah saruak ngalngat te hian a awmtir thin a, a duhtawkin i hmuh laiin a sawisa a, zahmawh tawngkam uchuak tak tak a ahauh chang pawh kan hre hnem mai, inchung lawkah kan awm a kan hre phak a, thenawm khawveng te pawn an hre vek thin, mi sawi sep sep kan hlawhthei hle bawk. Chung zawng zawng kan hriat theihna chhan pawh i nu hian min hrilh leh thin a ni. I nu hian tetlaia thian tha tak mai a nei a, chu chu Remkunga a ni a, i bialpa patea hi ani, an inkawm thin a kan inah pawh hian alo leng fo a, chu tak mai chu i pa hian a ringhlel a, i nu chu thah ah a vau hial thin a ni. Bawihte, chu i nu thianpa chuan zan khat chu i pa in kut athalk nasa lutuk chu a ngaingamlo a, a rawn kal a, chutih lai chuan mitthi inah kalin kan chhungkuain i pi leh pute nen hian kan awm bova, kan inchhungah ngei hian i pa chuan i nu leh i nu thianpa Remkunga te chu a that a, a hnuah amah a intihlum ve nghal niin police te chuan min hrilh a, chu chu thudik anih ka ring, i pa hi mi a ani tlat a, natna a vei tlat miau a lawm. Ronald-a pa ina i pa hming a zawh che a i hrilh chiah khan, khatia a awm nachhan pawh i hrethiam tawh mai em? I haw chiah khan Ronald-a pawh chu thudik an hrilh ani ngei ang, Bawihi, aharsa ngawt ang, mahse i theihnghilh a ngai, Ronald-a hi i kalsan a ngai.”
Ka awmdan a diklo, ka na lutuk, ka thinlung hi chemtea vih ang maiin ana a, ka tap hleitheilo, ka mittui tla nasa lutuk a, ka kut a khur a, ka tap chak lutuk, ka thei silo, ka na takzet, ka lu ahai muai muai a, nikhaw hrelo bawk chuan ka awm leh ta a. Mumang ka nei leh ta, he ka mumang hi chu a chiang ta ngang mai, angai te ang bawkin ka pa chuan ka nu chu a lo vau a, bang kil atangin inthlahrung leh hlau tak chungin ka lo en ve reng a, Pa Remkunga, Ronald-a patea chu alo awm ve bawk a, “Tiang tur ani ngailo, insum rawh” alo ti mawlh mawlh a, ka nu chu vih a tum a, Pa Kunga chuan alo danga, chu veleh ka pa chuan Pa Kunga chu a hrawka a vit a, chemte chu a la herh vir zui, ka hlau lutuk chu zun ka cheh hial a, thisen a luang nasa ngang mai. Ka pa chuan Pa Kunga a thah hnu chuan chemte chuan ka nu chu a tin a, ka nu chu a au tuar tuar a, MIN CHHAN RU a ti a, ka pa chuan a beng tlu thuai a, chuveleh ka lam arawn pan a, ka samah a kek a, roomah min kharhnan a, mahse a kalh lo, ka nu chu chem a asat ri chawk chawk ri ka hria a, ka nu chuan ka hmingpumin PUIPUI, KA HMANGAIH CHE ala rawn ti hram a, tichuan rang takin kawngka ka nam hawnga, ka pa chu a kawrah thisen alo kai hnuang a, ka nu chu alo let reng bawk a, ka pa chuan min en vung vung a, “Puipui, ka fanu...i pa hi tualthattu chu ka ni ta, tualthattu fanu i ni ta...” a ti a, a pumah chuan amah leh amah a invit a, ka mumang ram rapthlak tak atang chuan ka harh hlawl a, tunah chuan thil engkim ka hrechiang ta e.
Pawn ka chhuak ngam lo char char a, Ronald-a nena kan inbiaklohna leh ka thiante ka kawmloh a mahni a ka awm char char hnu chuan thla khat alo liam ta reng mai. Intihhlim ka tum lo, mahse ka na ve thlawt a ni. Thih ve mai ka duh a, KA NU LO KIR LEH RAWH tiin ka tap fo a, KA PA KA HUA CHE tiin ka tap fo bawk. Ka pa ti pawn ka ko duhlo, pa neiloa piang angin ka inngai nghal hmiah a, chu chu ka duhdan a ni. Chutih rual rual chuan Ronald-a, ka lungngaih a min hnem thin tu, ka hmangaih em em ka pasal tur an maia ka ngaih khan min haw em em a, Tualthattu fanu tiin min hmusit ta chu ania, ka ngai thei em em a, whatsapp ah min block bawk si, ka be ngam tawhlo hrim a, chaw ka ei ngailo. Ka cher emem a, hlimhmel ka pu ngailo a, ka thiante ka kawm peihlo bawk. Ka damlo a, ka khua asik zing em em a, mahse intihhlum em chu ka ngam ngai lo, hremhmun ah ka awm nimai hian ka hria, ka nun zawng zawng a chhe vek ni te hian ka hre hial thin. Nikhat chu phone call hi number hriatloh atang hian ka dawng nawlh mai a, ka la a, Ronald-a alo ni a, “Tinge minla rawn phone a? Min hua ni lawm ni?” ka ti a, ani chuan, “Tlaiah inhmu ang, ka tihpalh takzet, kan inhmuhna thin ah khan minlo nghak rawh aw, dar 3 velah, ka hmangaih che” a rawn ti tehmial a, ka thinphu a rang ngei mai, “Ronald, i ti tak tak em ni?” ka ti a, “Duat, ka hmangaih che, ka theihnghilh theilo che, lo kal rawh aw?” a rawn ti leh a, ka lawm lutuk chu ka zuang tawr tawr a, kha leh chen ka lo na tawh a, mahse minlo la hmangaih ve tho a ih dawn hi ka ti a ka hlim ngei mai. Tlai alo ni a phur takin ka insiam a, tichuan ka lo nghak ta a. Alo thleng har phian a, dar 4:30 ah pawh alo la thleng lo a, ka mangang tawh hle mai. Phone call ka dawng a, ka la a, ka thuhriat chuan min thawng ngei mai, RONALD-A A ACCIDENT...tih thu ka dawng a, ka thinphu hi a tawp mai hian ka hria, ka tlu tawp a, engmah ka hre zui lo. Ka harh leh chuan damdawiinah ka lo awm a, ward pakhatah hian Ronald-a nu leh pa te, ka patea te nupa leh ka pi leh pu te leh kan thianho anlo awm a, an hmel chu a ngui bar hlawm a, thil awmzia ka zawt a, tuman min chhang lo, atawpah chuan Ronald-a pa chuan min kai hrang a, room thim deuh pakhatah hian min hruai lut a, dim light a on a, tap chungin min kalsan leh daih a, khum pakhatah hian Ronald-a chu a lo mu a, alu an tuam bur a, nunna nei tawhlo tih hriat tak hian alo mu a. Ka kal hnai a, nasa tak leh chhuak em em in ka tap a, ka tan chuan vanduaina hlir a thleng bik si amaw? Ka hlim dawn emaw ka ti a mahse tahna bawkin min hmuak si a, darkar chanve zet ring taka ka tah hnu chuan ahmui vawt tak ah chuan ka fawp a, ti hian ka tawng chhuak ta a....
“Ronald min ngaidam rawh, tualthattu fanu chu ka ni e, ka hmangaih che” tiin.
THE END
Comments