THE HOSPITAL

THE HOSPITAL

(MIZO FICTION HORROR STORY)

Written by : Aaron Malsawmdawngzuala

Zan dar 11 vel a ri tawh a, khua chu a vawtin ruah a hmi seng seng a. Thli lah chu a thaw nasa em em a, khawpui lah a ri rum rum reng bawk a. Damdawiina security guard pakhat Lalremsanga pawh chu a duty pui tur a thianpa Lawmzuala a damloh avang chuan amah chauh chuan a duty a, khaw awmdan nelawmloh tak avang chuan tlai lama amaha duty pawh pawi a tih lemloh thu a lo sawi te kha a inchhir ta rum rum mai. Mahse amah hi mi huaisen ve tak, thlahrang leh ramhuai tih vel awih ve ngailo leh fiah ngat tum thina anih avang chuan chutin a hlau lutuk lemlo. Dar 11:30 a pel a, Remsanga pawh chu a mut a chhuak ve tawh hle mai, a duty-na room hi damdawiin gate bul chiah a ni a, mi pahnih vel lenna room tetakte a ni a, a hma zawn chu darthlalang atanga siam a ni. A mut chhuak lutuk chu a lo chhing leh sek zel a, tek tla ri dum dum te chuan a ti harh leh zawk thin a. Dar 12 a rik dawn tep ah chuan pawn lama tawng ri bul bul hi a hre ta a, "Tun ang zan rei tawh ah, tunge maw ni chu le?" tih pah chuan a han dak chhuak a, nufa niawm tak rawn in kai phei dawr dawr hi a hmu a. Mak a ti angreng hle mai a, zanlai dar 12 a ri dawn tawh a, chutia nufa rawn inkai phei a hmu chu a ngaih te pawh a tha lo lek lek zawk hial a ni. Mak a tih zual em em nachhan chu kha nufa rawn inkai phei te kha an rawn kal satliah ringawt lova, zawi te te a an rawn zai ri ret ret kher chuan a ti hlau lek lek zawk a ni. An rawn kal hnai zel a, zai ri lah chu a ring tulh tulh a, an hla sak lah chu tawng dang daih amaw tih mai tur a ni, muang fan raih hian an zai dun a, eng hla nge an sak tih pawh hriat a har ngei mai. Remsanga chuan ama hriattham lek hian, "Lo thleng phawt teh se, ka ngaih an ti thalo riau mai." a ti nuah nuah a. An rawn phei zel a, Remsanga pawh chuan a lo thlir reng a. An rawn thlen dawn tep ah chuan an nufa chuan an ding ta thut mai a, Remsanga chu tukverh ah chuan ava dak chhuak a, "Ka pi, enge in rawn tih dawn a? Enge in duh?" a han ti a, mahse an chhang lo. An nufa chuan Remsanga chu ngawi rengin an en reng ringawt a, Remsanga pawh chuan mak a ti angreng hle mai. A nihna takah chuan a hlau lek lek tawh zawk a ni, kawl a phe zuai zuai a, thli a thaw vuk vuk bawk nen, chu mite nufa lah chuan rum em em in an melh reng bawk si. Remsanga chuan, "Enge maw an hriat le?" tih pah chuan a kawrlum a ha sawk sawk a, pawnah chuan ava chhuak ta a. Mahse kha mite nufa kha hmuh tur reng reng an lo awm ta hauh lo mai, a han hawikual a, light te chuan a han enkual a, mahse ahma lawka nufa rawn zai phei rat rat te kha hmuh tur an awm tawh lo. Remsanga ngaih chu a tha ta hauh lo mai, hlauhna chuan a thau ah a man a, kha mite nufa kha mihring an nih a ring ta hauh lo mai. A duty-na room ah chuan a lut a, a khur chhe der mai. Amah chauh a duty a ni bawk si a, thli lah chu a tleh nasa tulh tulh mai si, pawn lam pawh a hawichhuak ngam tawh lo. Mahse chumi zan chuan thawm dang a hre chhunzawm lova, kha mite nufa pawh kha hmuh tur an awmzui ta lemlo bawk. A tukah chuan a thiante, security guard dang te chu ahma zan lawka athil tawn mak tak mai te chu a hrilh a, mahse an lo awihlo nasa mai. A then chuan anlo nuihzat vel a, a then lahin, "I zu chak chiri mai mai a nih chu, thil hmuh sual te hi a awl ve alawm." tiin fiamthu thawh nan te an lo hmang a, a ngaihdan pawh a nilo hle mai.

*******
(KHA MITE NUFA KHA TUTE NGE?)
Ka hming chu Lalnunpuii a ni a, ka thiante chuan Puipui tiin min ko thin. Nurse zirlai ka ni a, intern ti lai mek ka ni. 2nd year lai chu ka ni ve tawh a, ka training tirh khan kan senior te hian kan training-na damdawiin hi a hrang tiin min hrilh thin a, mahse ka awih ngailo. Chubakah hmeichhia mah ni ila, thlahrang leh ramhuai tih vel hi ka hlau ngailo, ka tawn ve ngailoh vang pawh a ni mahna. Mahse thlahrang film tih vel erawh hi chu ka en ngam thak lo thung, kum 20 ka ni ve tawh a, thlahrang leh ramhuai tih vel mai mai a hlau rual ka nilo ka inti ve tlat thin. Zan khat chu surgical ward ah night duty turin min ti a, ka peihlo hle mai. A chhan pawh ka hlauh vang nilovin ka damsam loh vang a ni a, nileng mai chuan ka lu ahai bur mai a, ka peihlo takzet a ni. Mahse hotute thu zawm a ngai si a, chubakah nurse zirlaite zingah pawh a ti tha ber pawl ka ni thin a, insawitheihna nilo se fak hlawh ber leh hmasawn ber pawh ka ni hial awm e, peihlo eng ang mah ila kan thu a ni der silo. Chumi zan chuan Surgical ward ah chuan ka duty ta a, engmah buaina leh harsatna nei lemlo chuan dar 10 vel thleng chu hna kan thawk pangngai thei a, damlo te pawh thu an awihiin an fel hle mai. Dar 10 a pelh hnu chuan damlo te leh a awmpui tute pawh an reh ta thap mai, light kan off a, kei pawh chu duty room ah chuan kan staff nurse U Hmingtei nen chuan kan titi dun melh melh a. U Hmingtei hi kum 28 a ni tawh a, fa pahnih nei tawhin nu fel tak mai a ni a, student dangte pawhin kan nel thin hle. A bulah hi chuan kan ngaihzawngte, kan duhzawng te leh kan harsatna te pawh kan sawi ngam a, ani pawhin tha takin min titi pui a, a theih ang tawkin min fuih ve thin bawk. Hemi zan hian kei leh U Hmingtei hi Surgical ward-ah hian kan pahnih leh Nurse sual zet, U Maengi te nena duty tur kan ni a, kan staff nurse sual zet leh thinchhe zet mai, U Maengi chu a damloh avangin min duty pui dawn lo a. U Maengi lo tel ve lo tur chu ka lawm takzet a ni. Kan duty-na ward hi female Surgical ward a ni a, a zawn chiah ah hian male surgical ward a awm ve bawk. Ka lu na reng mai chuan min ti ngui hle mai a, ka mut pawh a chhuak tawh hle mai. U Hmingtei chuan ka awmdan chu mak a ti deuh aniang, "Pupui, i nuamsam lo em ni?" a ti a. Keichuan, "Nuam e, ka lu hi vawiin chhun atang khan a na angreng lutuk a, mahse a ho lutuk, ka tha e." ka ti a, mahse zeplo chuan ka nuamlo takzet, ka luak a chhuak bur mai. U Hmingtei chuan, "Chutiang a nih te chuan ahma khan in tutor te bulah sawi mai tur alawm, zanin chu i tlin meuh ang maw?" a han ti a, ka inthlahrun ve deuh avang chuan, "Ka tha alawm, min ngaihtuah suh." tiin ka chhang a. Tichuan inbe miahlo chuan kan thu ngawi reng a, U Hmingtei erawh in a phone a hmet mial mial a. Phone khawih ve tur nei ta silo chu ka kuttin te chu ka khal vel ta mai mai a, ka vawikhat night duty-na a nih vang nge mawni, a boring kher mai. Ka luna lah chuan min tur ut ut mai bawk si a, ka lu te chu a hai muai muai mai a, ka dang lah a ro em em lehnghal. A khat tawkin tui chu ka in leh khawlh khawlh zel a, U Hmingtei pawh chuan mak min ti deuh a niang, min rawn en leh hu zel. Tui chu ka in zo ta, bottle ruak ken pah chuan, "Tui kava thun lawk ange aw, U Hming?" ka ti a, U Hmingi lah chuan a phone khawih reng chung chuan min en miah lo chuan a lu a bu nghauh ringawt a, tui la tur chuan ka chhuak ta a. Tui thunna tur filter hi kawngka bul chiah ah a awm a, mahse ward pawna chhuah a ngai tho a ni. Tui chu ka thun a, ka thun pah chuan zawite te chuan keima hriat tham lek hian ka zai a. Mahse ka zai ruala zai ve an awm tlat hian ka hria a, U Hmingtei a nih ringin ka va en a, mahse a phone a lo la khawih mial mial bawk si. Tichuan corridor phei thim ruih mai lam chu ka va hawi a, chuta tang chuan ani zai ri lo chhuak chu. Ka hla sak ang chiah chiah a sa leh ta nghal a, tutak ni ang maw?

Tun ang hun tawha corridor a lo la tei kual an awm chu a mak ka ti tak zet, chumai bakah ala zai ret ret leh ta nghal a. U Hmingtei chu ka va en a, "U Hming, chu i hre ve em?" ka ti a, min rawn en a, "Eng chu maw?" a rawn ti hu a. Mahse zai ri chu a reh leh ta hmak mai a, boruak chu a reh hian a reh tlawk tlawk mai. Ka bengchhe ri a nih ringin ka tui thun lai chu ka thunzawm leh a, U Hmingi lah chuan, "Enge ni a, Puipui?" a rawn ti leh hu mai a, keichuan, "Engmah a ni leh lo, thil ka hresual aniang." ka ti liam mai a. U Hmingi chuan, "Min tihthaih duh suh aw, nang aiin zanah ka duty zing tawh." tiin min rawn nuih a, ward kawngkhar hi saloon kawngkhar ang chi kha a ni a, a tet em avang hian kan inhmu thei vek tho ani. Tui chu ka thun zo a, ka lut leh tur chiah chu corridor phei atang bawk chuan phun ri sep hi ka hre leh ta a. Lut mai lo chuan ka va hawi phei leh a, mahse engmah ka hmu chuang lo, a thim hian a thim phei khup ringawt a, ka awmna lai dim light-ina a en phak chin tihloh chu a thim vek a ni. Male surgical lam ka va en a, nurse duty te chu an dawhkan bawh in ngaihtha takin an lo mu a. Ka ngaih chu a tha zan lo, U Hmingtei bula sawi chu ka tum hman viau nangin ka tihthaih amaw atih leh ka hlauh avangin ward chhungah chuan ka lut a. Dar 12:30 a ri ta a, thawm engmah a awmlo. A reh hian a reh tlawk tlawk amai a, U Hmingi pawh a chau deuh ta aniang, dawhkan bawhin a muthlu bawrh bawrh mai. Kei erawh ka harh tulh tulh thung, ka mut a chhuak hauh lo. Ka dang ro lah chu a reh thei lo, tui pawh vawi 3 lai chu ka thun belh tawh. Ka zung sek bawk a, ka awmdan chu a mak ka ti takzet. Tui chu ka in zo leh ta, tui thun tura ka tho chiah chu kawngka lam ka va hawi a, hmeichhe naupang niawm tak kal phei fua hi ka hmu thut mai. Ka phu nasa lutuk chu ka ding chat a, ka thinphu a rang ngei mai. Tun ang huna hmeichhe naupang lehnghal, damdawiin chhunga tei kual chu tutak ni ang maw tiin ka ngaihtuah thui hman ngei mai. Va en zui ngei chu tha in ka hria a, mahse keimah chauh chuan ka ngam chiah lo a ni. U Hmingi chu kaihthawh tumin thawm dim thei ang berin ka sawi a, mahse a la harh theih thak lo zui. Ka huaisenna zawng zawng ka sawm khawm a, thlahrang tih vel mai mai ka hlau ngailo a ni lawmni tiin ka in hum ruh a, dawhkana torch light chu ka la a, tichuan muangchang chuan kawngka lam chu ka va pan ta a. Pawnah chuan ka chhuak a, corridor thim phei khup mai chu ka va en leh ta a, mahse a ngaite ang bawkin tumah an awmlo. Ward chhunga let leh mai lo chuan second 10 vel chu ka nghak ve ta ngat a, chutah thim zing atang chuan ahma ang bawka hmeichhe naupang zai ri ret ret chu ka hre leh ta. Mak ka tihna em em chu, chu zai ri chuan ahmaa tui ka thun laia ka hla sak ang chiah chiah ka ala sa zui. Hlauhna chuan min man ve ta, ka hlau takzet a ni. Mahse enge a chhan ka hrelo, chu zai ri lo chhuahna lam pan chuan muang chang chuan ka phei a, engthil nge ka tih tak pawh ka inhrethiam biklo. Chu zai ri chuan min ko ni mai hian ka hria, corridor thim mup mai leh nelawm loh zet chu ka pan phei zel a, hlau viau mah ila ka ke chu ka duhvang reng pawh nilovin ka pen zel tho bawk si. Ka torch light ken chu ka on a, tichuan ka hma zawn chu ka va en a. Ka thil hmuh chuan min va ti phu chiang kher em...hmeichhe naupang, naute lem pawm chunga min lo melh reng chu ka hmu a, minlo la nuih vur vur zui. Hlau tak chung si chuan muang changin ka va pan phei a, "Mami, enge i tih?" tiin ka va bia a, mahse min chhang lo. Ka va pan hnai zel a, mit khap miahlo hian min en reng a. Ka ngaih a tha lo takzet, zawimuanga pan hnaih zel pah chuan, "Mami, enge hetah i tih? Heta infiam kan phal hleinem, khawnge i chhungte?" ka ti leh a, mahse minla chhang chuanglo. Enge a sawi hriat theih si loh hian zawi te hian a phun sep sep reng a, "Khawnge i chhungte? Khawnge i nu?" tiin ka han zawt leh a, a phun ri chu a tawp hmak. Ngawi reng hian ICU panna lam chu a kawk a, tichuan a tlan thut a, inhnuai step ah a chhuk ta daih mai.

Umzui chu ka tum deuh uai hman a, mahse ka hlauh ve em avang chuan ka ngam chiah lo a ni. Muangchang chuan step ah chuan ka chhuk a, inhnuai lam ka thleng tep tih ah chuan kut vawt thlur mai hian ka hnunglam atang chuan ka dar ah a rawn vuan thut mai chu ka phu chiang kher mai. Ka tharau a thlawk chhuak tep hialin ka hria, ka t(r)e thawt a, rang takin hnunglam ka hawi let nghal a. Ka nurse duty pui, U Hmingtei a lo ni a. U Hmingtei zawk pawh chu a phu ve chiang ngang mai, a hnungtawlh dawr mai a. Hlauhthawn hmel taka min en pah chuan, "Puipui, enge i tih a? Enge hetah hian i tih a?" a ti hlawp hlawp a. Ka thinphu rang lutuk chu ka han nghak ziaawm phawt a, "U Hmingte, naupang...hmeichhe naupang pakhat ka hmu a ni." ka ti a. U Hmingtei chuan, "Khawiah maw? Tu hmeichhe naupang maw?" a ti a, a hlauh ve hmel kher mai. U Hmingtei ban chu ka va kai nghal a, "Minlo zui rawh, step ah hian a chhukthla alawm." ka ti a, mahse U Hmingtei chuan, "I mawl ami? Duty lai kan nih hi...let leh vat ang." a ti a, tichuan ward chhungah chuan kan let leh ta a. U Hmingtei bulah chuan ka thil hmuhte chu ka hrilh a, mak tih hmel zet hian min en a. Hlauh hmel tak chuan, "Nangmahin tikhan kal hrang tawh reng reng suh, keipawh thawm ri rek ka hria a, ka harh thut a, ilo awm tawh silova. Ka ngaih thalo lutukin ka rawn zawng che alawm." a ti a. Keichuan, "U Hming, ka hmu tak tak, a zai ri ret ret lehnghal." ka ti a, mahse U Hmingtei chuan, "ICU-a damlo riahpui tute zinga mi an ni maithei asin. Hlau duh suh, engmah hlauhna tur a awm lo." a ti a, mahse a ni pawh chuan a hlau ve tih chu a awmdan atang chuan ka hre chiang khawp mai. Hemi zan hian U Hmingtei nen hian kan meng tlaivar thak a, male surgical lama duty te pawh tumah kan hrilh lo. Achhan chu U Hmingtei hian tuma hnena sawi lo tura min tih vang a ni, mahse vanneihthlak takin hemi zan hian buaina dang emaw, thawm dang emaw engmah hriat tur a awm zuilo hlauh a ni. A tuk zanah pawh night duty tur tho ka ni leh a, ka huphurh tawh takzet. Surgical ward bul deuh lawk ah hian ICU pan pheina a awm a, kha hmeichhe naupangte kha ICU-a awm damlo riahpui tute zinga mi a nih chu ka ring hlawl lo, achhan pawh naupang mai ala ni a, chubakah riahpui tu turin naupang hruai tel ve hi phal a nilo hrim hrim bawk a ni. U Hmingtei pawh khan kha hmeichhe naupangte kha mihring pangngai a nih a ring bik hauh lovang, ka hlauh loh nan tiin dawt min hrilh mai mai a ni tih pawh ka hria. Zan alo thleng leh ta, ka va han chák teh chiam tawhlo tak em. Nurse U Maengi erawh ala damlo reng a, zanin chu ka senior U Tetei, student ve tho chu a lo duty ve dawn a, tlem chuan ka thla a muang deuh. Tichuan U Hmingtei, U Tetei leh kei chu kan pathum chuan kan duty leh ta a. Dar 10 alo ri a, light kan off a, kan awmna duty room bik te chu kan on a, tichuan kan titi ho ta a. Reife kan titi hnu chuan damlo pakhat, bathroom bula mu chu a rawn t(r)e chhuak ta chiam chiam mai a, kan phu chiang hlawm kher mai. Keiphei chu ka thutna atangin ka tho nghal zawt a, rang takin kan va tlan phei a. Chu damlo hming chu Sentei a ni a, kum 17 mi a ni a, pneumonia vanga damdawiina awm mek a ni. A riahpuitu a u mipa chuan alo bawihsawm vat a, damlo dangte leh riahpuitu te pawh chu an lo harh vek a, Sentei khum awmna lam pawh chu an lo pan ve bawk a. Sentei chu a tal vak vak a, light kan on a, a meng pual vek mai. Kawchhunga ramhuai lut niawm tak hian, nasa tak hian a eu vak vak a, rang takin a thaw hlawih hlawih bawk a, min ti hrilhhai hlawm kher mai. U Hmingtei chuan, "Sente, enge awmzia? I tha em? Ka tawng i hre thei em?" tiin a be char char a, minute 3 vel zet kan bawihsawm hnu chuan a ziaawm ve deuh ta a.

Hlauh hmel tak hian min melh hrek hrek hlawm a, chutah chhuak em em hian a tap ta hawm hawm mai a. A riahpui tu a U Chhana chuan, "Sente, bawihi....enge awmzia?" a ti a, Sentei chuan hlauh hmel tak hian, "U...hmeichhe naupang ka hmu a ni. Ka khum bulah hian a lo ding reng a, naute lem a pawm a. Mit khap miahlo hian minlo melh reng a, ka hlau lutuk." a ti hlawp hlawp a. U Hmingtei nen chuan kan in en a, sawi tur reng kan hre lo. Hlau ve viau mah ila, ahma zanah ka lo hmuh ve tawh avang chuan mak tihna em em ka nei hran lo, mahse ka hlau takzet a ni. U Tetei chuan, "Tu naupang maw? Tunge chu chu?" alo ti hu a. Sentei chuan, "Ka hrelo, tunge a nih ka hrelo, a hmel a dang vek a, a mit a dum vek. Mit pawh a nei mumal lo, min en reng a, au chhuah ka tum a, mahse ka hmui a rawn hup thut a. Tichuan khumah rawn lawnin min rek vak vak a, mahse light a rawn en chiah khan a bo ve nghal daih." a ti a, a tap zawh zawih a. A u Chhana chuan, "I mumang mai mai anih chu, hlau reng reng suh i bulah kan awm alawm." a ti a, mahse Sentei chuan, "Anilo u, ka ti tak tak, dawt ka sawi lo." a ti a. keipawhin dawt a sawi ka ring lo. Male surgical lama nurse duty te pawh anlo kal hial a, mahse U Hmingtei chuan mumang thalo vang tiin a lo hrilh a, an duty na lamah chuan an let ve leh mai bawk a. Sentei chu nachhawkna in kan chiu a, tichuan reilo te ah a muhil ve thei ta hram a ni. Damlo dangte leh a awmpuitu te pawh chu an in en hrek hrek hlawm a, an ngaih a tha chiah tawh biklo ni ngei tur a ni. Ka lo chhing ve sek a, ka harh leh chuan sana ka en a, zing dar 1 a ri tawh. U Hmingtei chu dawhkan bawhin a lo hnar suk suk mai a, mahse U Tetei erawh ka hmu ve ta hauh lo mai. Tui a thun ve a nih ka ring a, mahse tui bottle chu a khat vekin ka hmaah chuan a inchhawp reng si. Ka ngaih a tha ta hauh lo mai, male surgical lamah ava kal anih ringin pawnah ka va chhuak a, mahse mak tak maiin male surgical ward reng reng a lo awm lo. Hnuglam ka hawi leh a, kan ward duty na pawh a awmlo. Ka awmna lai chu kha corridor nelawmloh zet leh thim ruih mai kha a ni ta diah mai, ka hawi kual a, keimah chauhvin thim zingah chuan ka lo awm reng a nih chu. Hlauhna namen lovin min man a, ka thlan fim a tla zawih zawih mai. Engmah ka hmu chiang theilo, a thim vek a ni ber mai, chutah thil rim chhe em em mai hi ka bul hnai velah chuan a nam rum rum lehnghal. Chutah ka hma zawn, pen 20 vela hla ah chuan thawm ri rek hi ka hria a, tichuan thawk leh khatah chumi zawna dim light chu a rawn in on thut mai. Light zawn chiah ah chuan hnunglam hawi zawngin nu pakhat hi a lo ding run mai a, hmeichhe naupan kum 5 mi vel niawm tak hi a lo pawm bawk. Hnunglam an hawi ve ve avang chuan tute nge an nih ka hre theilova, chu nu chuan a naupang pawm lai chu a awi mek niawm tak hian a su dulh dulh lehnghal a. Ka che ngamlo, hlau leh khur zawih zawih chung chuan ka en reng ringawt mai a ni. Chutah hmeichhe naupang chu a rawn dak chhuak a, ka lam a rawn hawi ta. Chu naupangte chu tudang nilovin, a hma zana ka hmuh hmeichhe naupang ngei kha a ni. Ka hriatchian deuh pakhat chu kha mite nufa awmna lai kha ICU pan pheina zawn a ni a, ICU thlen hma chiaha parda an zar pawh chianglo ruaiin ka hmu thei a ni. Chu hmeichhe naupangte chuan rum tak hian min en a, tichuan min rawn kawk a, ka khur zawih zawih mai. Zawi muang hian a nu pawh chu a rawn hawi let a, an hmel chu rapawm tak a ni. An mit a var pup a, mihring damlai hmel reng an pu lo, an dáng vek mai. Ka hlau lutuk chu zun ka cheh hialin ka hria, tichuan rum taka min melh reng chung chuan zawi te hian an zai leh ta ret ret mai a, ka hlauhna a zual kher mai. Hlau tak chung chuan, "Tute nge in nih? Hetah awm kan phal hleinem." ka han ti ve ngawt a, mahse ka tawng chu an ngaihsak lo kher mai. Chutah dim light chu a phe ta zawk zawk a, min en reng a, an zai ri chu a ring tulh tulh mai. Ka hlau lutuk chu au chhuah ka tuma ka thei thak lo, ka hrawkah hian hnawhtu a awm ang mai hian ka hria a ni. Light chu a phe zawk zawk a, light a rawn en zeuh zeuh pah chuan an ke rawn pen phei miah silo hian an rawn hnai zel a, tlanchhiat ka tuma ka thei chuanglo. A tawpah ka hma zawn chiahah chuan an rawn ding ta, ka hlau lutuk chu ka bîng mup a, ka thidang zui ta aniang, engmah ka hre tawhlo.

Ka harh chhuah leh meuh chuan kan hostel-a ka room ah ka lo mu der tawh a, ka bulah chuan ka roommate Hriati a lo awm a. Hriati chuan min hmuh veleh chuan, "Ehe, ilo harh tawh animaw? Min ti hlauthawng hman alawm, enge i an tawh?" tiin min be nghal mawlh mawlh a. Kei erawh chuan ka awmdan chu ka hrethiam lo takzet, mak tih hmel tak hian Hriati chu ka melh a, "Enge awmia? Tinge tah hian ka awm?" ka ti hu mai a. Hriati chuan, "Nizanah luhaiin i tlu an tia, zinglam a ni tawh zawk mah ang chu. Corridoor ah ilo let reng a, U Tetei'n a hmu che a, tichuan casualty lam an panpui nghal che alawm. Doctor sawi dan chuan i chauh lutuk vang a ti a, i damsam lo anih chuan madam te bula sawi ve mai thin tur che alawm." a ti bawrh bawrh a. Mak ka ti takzet, ward ka chhuahsan khan U Tetei zawng tura chhuak ka ni si a, mahse amah zawkin nikhawhrelova ka let reng lai chu minlo hmu zawk chu a nia. Chu mai nilovin mak ka tih em em bawk chu kan duty-na ward ka chhuahsan chiah a ka awmna lo inthlak daih kha a ni, chuan khamite nufa kha tute nge an nih a, enge an duh tih chu ka thil hriat chak ber a ni bawk. Kan tutor pakhat Miss Teresa-i alo lut a, "Puipui, enge i an tawh a?" a rawn ti a, chhan mai nachang pawh ka lo hrelo. Ka bulah chuan thuin ka chal a rawn dawm a, "I khawsik chu ala awm anih hi, in lamah haw hrih mai rawh aw...i chau lutuk anih kha, zan zawnin i duty bawk sia." a ti a, chhan ngaihna pawh ka hre chuanglo, khamite nufa bawk kha ani ka rilrua awm reng chu. Tichuan karkhat chhung leave chu min pe ta a, ka thawmhnaw ka pack mawlh mawlh a, Hriati chuan min lo pui bawk a. Hemi ni hi ka roommate Hriati day-off ni a ni a, "Ka van ngai dawn che." ala ti nuah nuah zui. Tichuan ka chhungte pawh an lo thleng a, chutia ka thawmhnaw tlem azawng motor chhunga kan dahfel lai chuan kan Miss Teresa-i leh Doctor Sangzuala in be lai chu ka va en a, an thilsawi chuan ka beng a verh hle mai. Dr Sangzuala chuan, "Tukin dar 7 vel khan an chatthla chiah a ni awm e, tawngkam mawilo nilo se, ka rin aiin an chatthla har zawk ka ti." a lo ti nuah nuah a. Rang takin ka va pan phei a, "Miss, tute maw? Thi an awm a mi?" ka va ti a. Miss Teresa-i chuan, "Aw..hmanni lawk khan nufa pakhat chu an accident a, truck lian chi in a su a. ICU ah an nufa in kan dah nghal a, an beisei awmloh hrim hrim. An luruh a khi ve ve a, an thluaka thisen zam pawh a chat a, mahse zan hnih lai chu ventilator hmangin kan la chhan thei a, tukin khan an thi a nih chu." a ti a, ka thil hriat duh em em chu ka hre ta in ka hria. Mahse a nemngheh nan an thlalak tal hmuh chu ka duh em em a, mahse engtin nge ka hmuh theih ang? Ka haw ta a, tichuan hun rei tak chhung ka khawih chak em em, ka phone chu ka khawih veleh thei ta. Whatsapp message pawh a lo tam leh ta khawp mai, vanneihthlak takin news group ah chuan tukina mitthi nufa te kha an thlalak anlo post hlauh mai a. Ka rindan chiah a ni, ahma zana ka hmuh nufa te ngei kha an ni. Inah pawh awm tawh mah ila, ka hlauhna an tizual kher mai. Heta tang hian ani, thlahrang hi an lo awm tak tak a ni tih chu ka chiang ve ta. Ka chiang mai nilovin, ka dawih phah em em a, zanan mahni a chhuah chu sawiloh, mahni a zun pawh ka ngam tawk tawk a ni. Ka thil hriat duh zawng zawng chu hre vek tawh tho mah ila, hriat duh dang ka la neih belh tlat mai. Kha mite nufa khan mamawh an nei a, engemaw min hrilh duh an neih hi ka ring tlat. Chubakah engvanga kan damlo Sentei kha tibuai nge an nih a, khatia rapthlak taka an chet kher ni. Mahse he ka thil hriat duh hi hriat ngei tuma finfiah kher erawh ka tum tawh hauh lo thung, ka hmu leh ang tih mawlh kha ka hlau a ni. Ka dam chian huna Hostel-a let leh pawh a huphurawm ta khawp mai, theih nise chuan damloh char char emaw, drop-out tawp a, thildang zir leh mai pawh min ti chak rum rum hial a ni.


(ENGE AN DUH?)

Kum 2 chhung teh meuh chu Ambulance hi ka lo khalh ve tawh thin a, mitthi ruang te pawh ka phur ve nual tawh. A tir chuan hlau ve thin hle mah ila, thla hnih thum vel ka khalh hnu atang kha chuan ngaia neih chu har thin viau mahse, ka hlau lutuk tawh lem lo. Kan unau hi pathum kan ni a, mi inluah a Aizawla awm kan ni. Kan khua chu Thenzawl a ni a, Aizawl lamah Ambulance driver ni turin hna ka hmu ve hlauh a ni. Kan unau zinga upa ber ka ni a, ka hming chu Jeffrey Remlalnghaka a ni a, kan unau hi mipa hlir kan ni. Kei hi kum 25 a upa ka ni ve tawh a, ka nau chiah hi Malsawmzuala a ni a, MS tihin kan ko mai thin. Kan naupang ber hi Lalrindika a ni a, MSa hi kum 21 niin college a kal mek a, kan te ber Rindika erawh kum 18 a ni a, pawl 11 zirlai a ni. Kan chhungkuaah chuan pawisa hlawh chhuak tu ber ka ni a, harsa takin ka hlawh tlem te hmang hian kan khawsa ve naw naw thei a, ka pa hian min boral san tawh a, ka nu leh kan unau thum hian kan khawsa mek a ni. Hlawh hi a tam lemlova, pawisa khawl hram hram angaih avangin keipawh ka hah thin hle. Ka nu lah hi a tar ve tawh a, kan inluahna bulah hian huan tereuh te hi a siam ve a, taksa nuamlo chung chung hian a huan tetakte chu a enkawl ve hram hram thin a, a thlai thar chhete te hi a zuar ve thin. Kan chhungkua hi mite angin sum ngah ve lo mah ila, chhungkaw hlim tak leh inngeih tak chu kan ni ve chuan ka hria. Zan khat chu kan puten Sihphirah damlo han drop turin min ti a, peihlo viau thin mah ila ka tih ngei angai thin si a, tichuan damlo chu ka phur ta a, a awmpuitu, achhungte pahnih nen chuan Damdawiin atang chuan Sihphir lam chu kan pan dawn ta a. Kan kal hma deuh lawk hian Truck in a sut nufa niawm tak, hmanhmawh taka doctor leh nurse ten Hospital chhunga an rawn tlan luh pui chu ka hmu a, an hmai chu thisenin a bual khat vek avang chuan tute nge an nih a, eng ang hmel nge an put tih pawh chu ka hre theilo a, ka ngaihtuah lemlo bawk. Tichuan damlo chu Ambulance chhungah chuan kan hlang kai a, engkim kan tih fel hnu chuan Damdawiin chu kan chhuahsan ta a. Sihphir hi ka Damdawiin thawhna atang hian a hla ve em em a, Dutlang pawh a hla tih tawh nak alaiin, Durtlang atang pawhin han kal fe ala ngai a ni. Kawngtluan chuan chu damlo chhungte nen chuan kan inbe char char a, kawm an nuam in an fel phian lehnghal. Rei fe kan titi ho hnuah chuan Sihphir chu kan thleng ve ta a, damlo chu an inchhung thleng chuan ka zawnluh pui a, hetih lai hian zan dar 9 a pel awrh chauh ang. Damdawiin atanga kan chhuah khan dar 7 ala ri lova, darkar 2 vel lai chu kan thang ve chu ania, traffic jam nasat vang pawh a ni mahna, ka rin aiin kan tlan rei angreng. Ambulance khalh nilo phei ila chu motor dangte khan kawng min kian bik awm der silova, hei aia rei fe chu kan thang chuan ka ring. Thingpui in tur chuan min sawm a, hnial nasa viau mah ila min sawm luih tlat si avang chuan ka in ta a. Dar 9:30 vel a rik chuan keipawh ka let ve leh ta a, motor bul thleng chuan min thlah a. Sihphir chu ka chhuahsan ta, Selesih leh Sihphir kalkawng inkar hi a reh in hmun fianral ve tak mai hi a ni a, a thim deuh ruih lehnghal. Chutia ka tlan mek lai chuan nufa niawm tak kawngsira lo ding chu ka hmu a, minlo phar a. Ngaihthat lohna em em pawh ka nei chuanglo, haw na mai tur an hmu zolo anga, ke-in an kal ta mai a nih ka ring a. Chhete chu ka tlan pel hman, tichuan ka motor chu ka ti ding a, tukverh ah chuan ka dak chhuak a. Mahse kha mite nufa kha an lo awm tawh lo, pen 10 vel bak ka tlan pel hmanlo kha a ni si a, mahse an bo daih mai. Ka hawi kual a, "Ka pi?" tiin ka han au ve ngawt a, mahse min chhangtu an awm lo. Ka hmusual amawni le...ti nuah nuah pah chuan tlan leh mai ka tum a, hmalam ka hawi leh chiah chu ka va phu nasa tehkher em. Ka hma zawn takah chuan chu mite nufa chu an lo ding run mai a, ka motor light in a chhun vang nge ni, an mitmeng te chu a var hian a var pup mai. Ka thinphu rang lutuk chu ka awm dawm meuhvin ka han nghak ziaawm phawt a, tichuan tukverh ah dak chhuakin, "Ka pi, mamawh in nei em ni? In lo chuang ve duh em?" ka han ti a. Muangchang hian ka motor lam chu an rawn pan phei a, ka motor tukverh bulah chuan an rawn ding a.

Chunu chuan, "Damdawiinah kal kan duh a, min lo hruai ve thei angem?" a ti a, keichuan, "Aw...lo chuang ru." ka ti a, a hnungah chuan an nufa chuan an rawn chuang ve ta a. Tlan nghal ka tum a, mahse ka motor chu a nung thei ta tlat lo. Vawi engemaw zah tih nun tuma ka beih hnu pawh chuan a nung thei chuang hauh lo mai a, mak ka ti angreng hle mai. Inthlahrung tak chuan, "Ka han check lawk ange aw, ka pi?" tiin motor atang chuan ka chhuk a. Ka enfiah ngial pawhin diklohna engmah ka hmu hauh lo, mak ka ti hlemai. Motor ah chuan ka lut leh a, chunu chuan, "A la nung thei chuang nange?" a ti a, keichuan, "Aw...diklohna engmah ka hmu chuang silova, a mak khawp mai." tiin ka lo chhang a. Chunu chuan zawi sap hian, "Han tum leh chhin teh, a tha tawh maithei asin." a ti a, tichuan ka han start leh chhin ta a. Mahse mak tak maiin a nung ta hlauh mai, mak ka ti lutuk chu ka phu zawk thei hial a ni. Phawk hru hian chunu chu ka va melh a, "I sawi zo chiah a, hei anung tak tak ania...magic i thiam anilo maw ka pi?" tiin ka han fiam vel a, ka nuih vel a. Mahse chunu chu a nui ve hauh lo, min hua emaw tih mai tur hian rum zet hian min melh a, chhan pawh min chhang lo hrim hrim. Ka zak ru lek lek zawk, tichuan inthiamlo tak chuan ngawi reng chuan ka tlan ta a, kan inbe chhunzawm lo hrim hrim. Rei fe kan tlan hnu chuan Leitan chhuk kan thleng ta a, dar 10 a ri dawn der mai. A boring em avang chuan ka aw ka han thian kharh kharh a, "Ka pi, damdawiinah enge in tih dawn reng reng a?" tiin ka han zawt a, chunu chuan, "Kan kal ngei ngei angai." tih ringawt hian min chhang a. Keichuan, "Enge in tih dawn a? In chhungte damlo an awm em ni?" tiin ka zawt leh a, chunu chuan zawi sap hian, "Awmlo." tih ringawt chuan min chhang leh a. A induh reuh ka ti khawp mai, chubakah ka khawngaih vangin ka phur ve hram hram a, min be tha duhlo khanglang chu ka ngei lek lek zawk. Chutih lai tak chuan ka motor chu a rawn chianglo leh tan ta a, kawng chhuk a tlan reng ni si kha, motor chu a ding ta chut chut mai a. Mak ka ti hle mai, kawng chho taka tlan ang mai hian min zo tha der lo mai, thil rit tak phur ang mai hian ka motor chu a ding leh chut thin. Mak ka tih deuh bawk chu motor front glass atang khan ka hmechhe phurh leh a fanu kha ka han en khan, mangang hmel leh mak tih hmel emaw, hlauthawng hmel an pu thak lo kha a ni. Hlauhthawn chu sawiloh, thinrim hmel em em hian min en run mai a, an mitmeng te chu a sen rum mai hian ka hria. Mahse minute khat vel bak a nilo, motor chu a rawn ziaawm leh thuai a, ka ngaih a tha tawhlo takzet. Hemi te nufa ka phurh atang khan thil diklo a awm tlat tawh hian ka hria a, chubakah an mizia te, an awmdan hrim hrim pawh hian min ti hlau ve tan ta khawp mai. Chutia kan tlan zel lai chuan chunu fanu chuan, "Anu ka mut achhuak, hla sa rawh." a ti a, tichuan a nu malchungah chuan a mu a, a nu chu a zai ta a. Zawi te, mahse fiah tak si hian a zai ret ret a, a aw lah chu a nalh phian lehnghal. Enghla nge an sak a, eng tawng nge a nih tih chu ka hrelo, mizo tawng chu a nilova, sap tawng pawh a nilova, vai tawng pawh a ni hek lo. Enge a chhan pawh ka hrelo, chunu zai ri chuan ka tiril a fan a, ka hlau deuh tlat a nih chu mawle. Chutah ka hlauhna ti zual turin a fanu chuan zawimuang hian a nu zai chu a rawn zawm ve leh ta nghal zui a, an la thluk delh delh lehnghal. Front glass atang chuan chumite nufa chu ka han melh leh zeuh a, an zai pah chuan rum em em hian min melh a, a fanu pawh chu a nu awma bei pah chuan alo meng kur mai a, min lo melh run bawk a. Tunah zet zawng ka hlau a ni, hemi te nufa hi mihring an nih ka ring ta hauh lo. Kan tlan thui tawlh tawlh a, an zai ring dun tawlh tawlh mai lehnghal. Chubakah mak ka tih em em bawk chu, tikhawp khan kan tlan thui tawh a nia, Bawngkawn kan thleng thei lo reng reng. Kawng ngaiah bawk chuan kan chhuak leh ziah mai hian ka hria a, alo berah Leitan chhuk kan pelh atang khan kilometer 8 vel lai chu kan tlan tawh ang. Leitan atanga Bawngkawn inkar kawng hi vawi tam ka kal ve tawh a, a hriat pawh ka hrechiang ngang mai. Mahse Bawngkawn kan thleng thei lo, kawng kual a lo awm zel a, a bul atang bawk chuan kan tlan leh zel a ni ber mai.

Chutah an zai chu a tawp ta hmak a, tawng pawh ka tawng ngam tawh lo, ka tah a chhuak em em zawk hial a ni. Ka lo phur ta kher kher kha ka inchhir takzet, ahma pawh khan lo hriatthiam tur a nia. Min lo phar tirh pawh khan pen 10 vel laia hla ka tlan pel hman kha a ni a, mahse reilote hnuah ka hma zawnah an lo awm leh daih bawk si. Engmah ngaihthat lohna ka lo nei miahlo te kha mawl ka inti hnuhnawh leh kher mai, ka thlanfim a tla zawih zawih mai a, an nufa khan melh pawh ka melh ngam tawh hlawl lo a ni. Tichuan kan tlan zel a, Bawngkawn kan la thleng thei chuang hauh lo mai. Chutah chu nu chuan fiah kak mai hian, "I hlau em?" a rawn ti thut mai chu ka phu chiang kher mai, ka khur nghal zawih zawih mai a. Ka hmazawn en reng pah chuan, "Enge ka hlauh ngawt ang? Enge hlauh tur awm?" ka ti khur dar dar a, hlauh tur chu a awm chiang a ni, tin ka hlau hle bawk. A nui suk a, min biak chhunzawm lo. A tawp atawp ah chuan Bawngkawn chu kan thleng thei dawn ta aniang, Greenwood Hospital a lo lang ta a, ka thaw huai mai. Greenwood Hospital zawn kan thlen chuan, "Ka pi, hetah hian a mi in chhuk dawn?" ka ti ta tawp a, chhuk tawh se ka ti ngawih ngawih. Chunu lah chuan, "Nilo, hemi damdawiin lo zawkah." a la ti zui, ka va han huphurh tawh tak em. Hlau tak chung chuan, "Khawi Hospital ah?" ka ti leh a, chunu chuan, "I kalna tur Hospital ah..." a ti leh a, ava han hrehawm tak em. Ka tap tep tawh hial a, "Chu chu khawilai nge?" te ka ti ta hu mai. Chunu chuan, "I thawhna Hospital ah...tuna i kalna turah hian.." a ti leh ta mai a, biak chhunzawm ka ngam tawh hlawl lo. Tichuan kan tlan zel a, khawlaia veivak lo awm zeuh zeuh chuan ka hlauhna chu chhete chuan a ti ziaawm ve deuh chuan ka hria a, mahse ka va duhkhawp lo tak em. Kan tlan thui zel a, kan kalna tur damdawiin erawh kan la hlat hle thung. Chutah lee...thisen thang rim a nam leh ta rum rum mai, motor chhungah chuan thisen thang rim chu a khah hian a khat vek ani ber mai. Ka luak a chhuak bur mai a, ka lu a ti hai vek bawk, a hrehawm takzet tawh a ni. Ngam leh ngamlo chuan muangchang chuan front glass chu ka han melh leh tawk tawk a, chumi te nufa biangah chuan thisen a lo luang zawih zawih mai. Awm ngaihna ka hrelo, thih daih te pawh ka chak hial tawk zawk, hlauh namen lovin ka hlau a, ka pian ahnu lamah khatiang em em a hlauh kha ka la nei ngailo hrim hrim. Ngil at hian an thu a, tichuan an pahnih chuan an zai leh ta rat rat mai le. Ahmaa an zai ang khan an zai tawh hauh lo, thinrim tak leh lungawilo taka zai hi an ang ber, an hla sak chu enge hre lo mah ila mi rap tak zet zet a ni. Damdawiin kan thleng dawn hnai ta, damdawiin chu kan hnaih telh telh a, an zai ring tulh tulh mai, thisen thang rimchhe em em mai pawh chu a nam nasa telh telh bawk. Ka hriatsual loh chuan, khatia damdawiin kan thlen dawna kha ti tak maia an zai dun chiam chiam lai khan ka tap chhuak hial tawhin ka hria. Chak theih patawp in ka tlan a, hla deuh hlek atanga damdawiin gate lo lang pawh chu ka hmu thei ta. Kan hnaih zel a, an zai rang tawlh tawlh a, khati em em a chaka tlan kha ka la nei ngailo. Ka tlan chak viau aniang, security pahnih te chu an duty-na room atang chuan an rawn chhuak a, min lo vai lauh lauh a. Chu security te pahnih ka hmuh chuan ka thla a muang ta suai suai hialin ka hria, an zawn ka thleng chiah a, motor ka tiding nghal a. Rang lutukin ka chhuk a, an bulah chuan ka va kal nghal a, security guard pakhat zawk kha ka va kuah hialin ka hria. Mak ti deuh hian min lo melh dun a, pakhat zawk chuan, "Enge ni ta U Jeffrey?" min lo ti a, mahse chhanna chang pawh ka hrelo. Ngawi reng chuan ka motor chu ka kawk ringawt a, security pakhat zawk, ka hmelhriat Lalremsanga zawk chuan motor chhung chu torch light chuan a en a, min rawn melh a, "Tumah an awmlo?" a ti ta mai a, a mak ka ti takzet. Remsanga bawk chuan, "I tha maw? Engthil nge thleng a? Iva hlauh hmel em em ve...thil hmuh i nei em ni?" a ti a. Ka chhang mai chuanglo, ka awm hahdam phawt a, tichuan ka ziaawm deuh hnu chuan, "Aaa...ka rawn thlen dawn tep khan engemawni hi ka motor chhungah a rawn thlawk lut a, hnahthel vel mai mai aniang, tullovah ka ti thlabar che u nimaw...ava zahthlak ve." te ka ti kual leh ta mai mai a, gate bula damlo riahpuitute niawm tak, mi pahnih thum vel meizial lo zu mek te pawh chu an lo nui dar dar hlawm a.

Hemi zan hian ka mu thei thak lo, ka meng tlaivar thak a ni ber mai. Ka phone pawh ka khawih ta miahlo, ka phone takngial pawh khawih nachang hrelo khawpin khami te nufa khan min ti thlabar a ni. Ka nau Msa bulah ka mu a, ka room ah khan keimahin ka riak ngamlo hrim hrim. Ka thil tawn te kha tumah ka hrilh lova, achhan pawh an awih ka rinloh vang leh dawih min tih a, minchhaih nan a an hman ka hlauh vang a ni. Atuk zing dar 6 velah khan ka muhil ve thei ta chauh in ka hria, mahse ka muhil rei chuan lo, zing dar 10 velah ka tho leh a. Chaw ka ei lai chuan ka nau MSa chu lo kalin, "Nizan khan tinge phone pawh khawih miahlohva i mut ve teh mial a?" tia min rawn zawh chuan phone khawi nachang reng reng ka lo hre miah lo ani tih ka hre ve chiah. A sawi takah chuan chhang lemlo chuan ka phone chu ka en a, whatsapp message chhiarloh tam tak te chu ka clear vek hnu chuan News group-ah chuan Sihphir-a vengchhung thlen hma hret a nufa pakhat, truck-in a sut thu chu ka chhiar fuh ta a, anu hming zawk chu Vanlalmawii niin a fanu chu Rosy Lalkhawngaihi a ni. Mahse mak deuh mai chu an la thilo tih thu ka chhiar tel tlat kha a ni, ICU ah an awm mek a, Ventilator hmang chauha nung dama la awm an nih thu kha ka chhiar tel tlat mai. A awmzia chu kha mite nufa kha an mahni taksa pangngai nilovin, an thla zawk ka lo phur reng tihna a ni. A tuk zan ah pawh chuan veng dangah damlo drop leh angai a, mahse ka nau Rindika ka hruai tel tawh a, thla te pawh a muan deuh mai bakah, Sihphir lama kal kan nih tawh loh vang nge ni, engthil hlauhawm mah kan tawk lemlo. Mahse thlamuangin ka khalh thei tawh thlawt lo, tun thleng hian ka ambulance khalh lai mek hi motor mai mah nise ka la t(r)ih deuh tlat a, rilru nuam leh thlamuang takin ka khalh thei ngang tawhlo a ni ber mai. A hnua ka hriat leh dan chuan khami te nufa kha zan thum lai mai chu ventilator hmang chuan an la dam a, atuk zing dar 7 vel ah an chatthla chiah a ni awm e. Tin, midang ká atanga ka hriat leh dan chuan khanu Vanlalmawii kha nuthlawi a ni a, apasal nen an inthen tawh a, Sihphir-a khawsa an ni awm e. Mi titi thawmah thudang ka hre leh a, chu chu ka thawhna damdawiina student nurse pakhat chu nikhawhrelovin Surgical ward bul corridor ah zing lam dar 1 pelh velah alo let reng a ni awm a, a chhan engmah hre lemlo mah ila ka ngaih erawh a ti thalo takzet, a chhan pawh kha mite nufa kha kan damdawiinah ngei hian an enkawl miau vang a ni. Thudang hriat belh ka neih leh bawk chu khami zana Sihphira damlo ka han drop dawn zan khan, kan chhuah hma chiah a nufa accident an rawn zawn luh tak kha, keipawh ina ka mit ngeia ka hmuh kha Pi Vanlalmawii te nufa ngei kha an ni tih hi a ni. Pi Vanlalmawii te nufa khan duh an nei tih chu ka hria, engemaw min hrilh duh chu an nei a, mahse an thil duh lo ngaihthlak sak tur kha chuan ka hlau em a ni.

***************
(THLARAU SUAL AN NI KHER EM NI?)

Ka nau kum 4 mi, Lalawmpuii hi TB vangin kar 3 lai mai chu damdawiinah kan awm pui tawh a. Dam a hnekin a zual tulh tulh amaw tih mai tur a ni, ziaawm lam kan pan thei meuh lo. Kei hi Lalrinchhungi ka ni a, kum 23 ka ni. Kan unau hi panga lai kan ni a, Lalawmpuii hi kan te ber a ni. Kan in exam chawlh lai a lo ni bawk nen, ka nau OPi hi ka riahpui deuh chawt a ni ber mai. In lamah ka nu te an lo buai ve thin bawk nen, keilah ka awl lai ber a lo ni bawk a, a awmchhung zawng hian ka riah pui ta a ni. Tuna ka thil rawn sawi tur hi hlauhawm em em chu a ni pawhin ka hrelo, keimah phei chuan engmah ka hmu ve lo hrim hrim a, mahse mak ka tih em avangin ka rawn tarlang ve a ni e. Zan khat chu chaw eikham hnu velah chuan damdawiin canteen-a thil ka lei lai chuan ka thiannu, class-12 kan nih laia ka kawm thin Mamawii ka hmu hlauh mai a. Kan han inhmu chu kan inkuah nghal chiam chiam a, "Rin, enge i tih a? Damdawiinah hian i awm ami?" a ti a, keichuan, "Awmlove, ka nau Opi a awm a." ka ti a. Mamawii chuan, "Opi a? Tunge chu chu?" a ti hu mai a. Mamawii nena kan inkawm lai khan ka nau Opi hi a la piang lo a, kum 6 lai chu alo liam ve ta reng mai. Kum 18 ka nih lai khan class 12 ka ni a, Mamawii hi ka best friend a ni thin. Class 12 kan pass hnu khan Shillongah thil zir turin min kalsan ta daih kha a ni a, kan lung te pawh a leng thar dun hle mai. "Kan te ber ania, 12 ka pass khan nau thar ka nei leh alawm." tih pah chuan kan nuih dun bawrh bawrh a. Mamawii chuan, "Anih chu mawle...i ngaihawm hle mai." tiin min han kuah leh chung chung a. Keichuan, "Anih leh nang enge i tih ve?" tiin ka zawt ve ta a. Mamawii chuan, "Nia, keini pawh hei..Sihphira kan chhungten accident an tawk a...ICU ah an awm mek a, ka nu nen kan lo kan ve a nih hi." a ti a. Keichuan, "Awhawww, ava zialo ve...engtik khan nge?" ka ti a. Mamawii chuan, "Vawiin tlai khan ania, kan hriat veleh kan lo kal ve nghal anih hi...nichin deuh lawk khan kan lo thleng." a ti a. Ava han zialo thin tak em, "Engtia inchhung nge in nih a? Tute nge ni reng reng?" ka ti leh a. Mamawii lah chuan, "Ka hre chiah lo, kan innel lo lutuk. Ka peihlo chung ka nu hian kalpui ah min sawm tlat bawk sia, ka ning ania. Nu Mawi tiin kan au mai thin a, a fanu nena an haw lam Truck-in a su a ni awm e." a ti phawr phawr a, a thawven hmel phian lehnghal. Pawi tih hmel tak chuan, "Anih chu, a zialo hlemai. An beisei awm hmel em?" tiin ka han zawt leh a. Mamawii chuan, "An beisei awmloh khawp mai, ka hriat ve dan chuan Nu Mawii hi an pa nen inhauvin an inti thiamlo a. Hmanni lawk khan an inthen a, a fanu hi a t(r)ul pui ta zel a nih hi. Tunah ti hian accident an tawk leh bawk si a, chupawh an nufa lehnghal in. An dinhmun en hian an damchhuah a rinawm siloh a, an khawngaihthlak takzet a ni." a ti a. Kei lah pek chuan, "An pa pawh chu ava sual ve mawle, enge a then kher a? Ngaihzawng dang a neih san emaw, a lerhsan a niang." ka lo ti ve ngawt a. Mamawii chuan, "Ka'n kal tawh ange aw...ka nu khan rei suh min ti si a, hei mineral water ka lei lawk a." a ti a. Keipawh chuan, "Nia, keipawh hei rosgulla ka lei dawna, kan inhmu leh dawnnia." tiin kan inthlah thei ta hram a. Rosgulla chu ka lei a, tichuan naupang ward lam pan chuan ka chho leh ta a. Ward chhung ka lut chiah chu ka nau Opi chu khumah chuan a lo inkhualtelem a, a bulah chuan midang awm ve niawm tak hian boruak chu a lo be mawlh mawlh a, min ti nui suk lehnghal. A bulah chuan ka thu a, ka Rosgulla lei a hmuh veleh chuan, "Yes, a u ka ei nghal duh." a lo ti nghal chiam chiam a. Rosgulla bur hawn pah chuan, "Pahnih bak ei hrih suh aw, ei teuh chu naupang tan a thalo." ka ti a. Tichuan tui ti tak chuan a ei a, rosgulla a ei lai mek chu a lek kang vu a, khum bula thutthleng lam chu hawiin, "I duh ve em?" a han ti ringawt a. A la inkhualtelem ngei a nih ringin, "Bawihi, ka zung lawk dawn aw?" ka ti a, tichuan ka zun san ta a.

Ka let lehlam chuan Opi chu khumah a lo awm tawh miahlo a, minti mangang hman teuh hle mai. Ka zawng nghal a, mahse ward kawngkhar bulah min hnungchhawn zawnga a lo ding chu ka hmu a. Ka va pan hnai a, "Bawihte, enge khatah i tih a?" tiin ka zawt a. Ala inkhualtelem tui hle ni tur a ni, "Ka thiannu kha ka thlah lawk aa.." a ti a. Nuih suk pah chuan, "Umm...lo kal rawh le, nurse ten naupang vei kual reng an phal lo ania." tih pah chuan a khum lamah chuan ka hruai phei leh ta a. Atuk ah pawh chuan nilengin a inkhualtelem leh char char a, a thiannu lem pawh chu a hming a phuah sak ni ngei tur a ni, "Rosy." tiin boruak chu a be vak vak zel a. Ngaihthat lohna em em chu ka nei chuanglo a, a chhan pawh naupang mai chauh ala ni a, a infiam ve a nimai. Mahse mak ka tih angreng tak chu Opi hi hetia mahnia a inkhualtelem rek rek hi ka hre ngailo, thiante a kawm a, an inkhualtelem ve thin tho nangin, amaha hetia tlei taka a awm hi ka hre ngailo, damdawiinah kan awm rei tawh bawk si a, a boring em avangin amahin a inkhualtelem ve ta mai pawh a ni mahna. Tichuan ni thum lai mai chu mak tak takin a che a, boruak chu a be reng zel a, chu ti em em chuan min ti hlauthawng lo mahse a mak chu ka ti ve tan deuh tawh. Mamawii nen pawh chuan kan inhmu tawh ngai lemlo, number takngial pawh inpek nachang kha kanlo hrelo a, mahse pawi pawh ka ti lem chuanglo. Tuk khat chu tuk thuan eikham velah chuan Opi chu damdawiin tual velah chuan ka lenchhuah pui a, stepah thu in ka phone ka khawih mual mual a, Opi erawh a tihdan ngai te in tualzawl ah chuan a inkhualtelem leh melh melh a. Mahse hemi tlai ah zet hi chuan ka ngaih a titha hauh lo mai, a awmdan kha a mak takzet. A bulah chuan midang an awm ve hi a ang tawh tlat, "Ani maw? Sihphir khawilai nge? Motorin a sut che u chuan a na em?" tih te a sawi tel ta tlat mai. Dawrpui Vengthara cheng kan ni a, ka nau Opi, kum 5 mi lek hian Sihphir veng te chu khawi atang mah hian a hre ve dawn lo hrim hrim, Sihphir tih hming hrim hrim pawh hi a hre lul lovang. Tichuan Opi bawk chuan, "Awle, muttui.." ti a boruak a bye-bye lauh lauh chu ka hmu a, ka va kal hnai a. Opi bulah chuan, "Bawihte, tunge i bye-bye vak vak a?" tiin ka zawt a. Opi chuan, "Ka thiannu Rosy kha..." a ti a. Keichuan, "Anih leh Sihphir tihte kha i sawi a.. Accident tihte kha i sawi a...enge awmzia?" tiin ka zawt leh a. Opi chuan, "Ka thiannu Rosy khan 'Anu nen motorin min su a, Sihphir ah kan awm thin a. Tukin zing khan anu nen chuan kan thi chiah a, vawiin chiah kan inkawm thei tawh dawn' a ti a. Nichin lawk khan ka mut a hun tawh a, ka kal tawh ange a tia, ka bye-bye a nih kha, Au Rinrin, ka ngai dawn e.." tiin min chhang ta mai a, ka thin a phu dut dut thei hialin ka hria. Naupang kum 5 mi lek a ni a, rilru thianghlim tak mai ala ni a, khawiah hian dawt a sawi dawnlo tih ka chiang. Hmu ve miahlo mah ila, ka hlau a, ka khur thei tep hialin ka hria. Chumi hnu darkar 1 velah chuan rinloh tak maiin canteen ah bawk chuan ka thiannu Mamawii nen chuan kan inhmu leh hlawl mai a, tin hemi ni hian mitthi an awm tih pawh chiang takin ka hria, a chhan chu damdawiin mitthi vui naah khan Damdawiin Chaplain-in mitthi alo vui mek vang a ni. Mamawii chuan, "Inla awm a nimaw?" a ti a. Keichuan, "Nia, a dam thei mawlh lo a nih hi....tunge thi a, i hre mial em?" ka ti a. Mamawii chuan, "Awww...ka nu Mawii te nufa kha, tukin khan an thi a, a pawi tak tak a ni. Hei, kan rawn kal ve a nih hi." a ti a. Tichuan ka hriat chak em em chu ka zawt ta a, "Mamawi, i nu Mawii fanu hi tunge a hming?" tia ka zawh chuan Mamawii chuan, "Rosy.." tihin min chhang ta mai a, ka nau Opi khan dawt a sawi hauh lo tih ka hre ta. Rosy thlarau kha hmu ve lo mah ila, ka nau Opi nena kan bulah khan alo awm ve reng thin tih ka hriat chuan ka hlau leh hnuhnawh khawp mai.

(PI VANLALMAWII TE CHHUNGKAW CHANCHIN)

Pi Vanlalmawii hi kum 42 mi niin nu cher lam, ft 5'2 vela sang, nu hmelchhe lemlo tak a ni a. Sihphir-a cheng an ni a, anu leh pate hian an thihsan tawh a ni. Unau pahnih chiah an ni a, a naupang zawk a ni. A u hi mipa a ni a, a hming chu Lalhmachhuana niin kum 30 mi lek anih lai khan thinlian natna avangin a boral tawh a, Pi Mawii nu leh pate thih hmain a ni. Thinlian natna a neih chhan pawh hi engdang vang a nilo, a zu in nasat vang a ni. Pi Vanlalmawii hi kum 36 a nih thleng khan a nula a, mahse vanduai thlak takin a a bialpa pawh nilo, a hmangaih pawh ni chuanglo, an thenawm lawk ami tlangval senior ve tho Liankhuma nen chuan an chesual hlauh mai a, Vanlalmawii hi a rai ta a ni. An chetsual chhan te, engtia chesual ringawt nge an nih tihte erawh thuchiang hriat a la ni lemlo thung. Mi nawlpui ngaihdan chuan an thenawmpa Liankhuma nen hian an inhnim hnai thin hle a, a rukin an induh reng thin a, tichuan an chesual ta mai angah an ngai. Mahse chutiang thil erawh a nih a rinawm lemloh, achhan chu Vanlalmawii fanu Rosy lo pianchhuah hnu kum 2 velah Liankhuma hian a then leh nghal thuai a ni. Vanlalmawii hi kum 36 lai a nih tawh hnuah pawh pasal a neihloh chhan chu a hmuh zawhloh vang a ni bik hauh lo, a unaupa neihchhun Lalhmachhuana chuan a boral san tawh si a, a nu leh pate lah tar an nimai tawh si a, a enkawl a ngaih vang a ni. Thenawm khawveng te, Vanlalmawii lo duhsak tute leh a thiante chuan pasal nei a, amah chawmtu tur nei thuai tur in an hrilh nasa thin hle a, mahse ngaihzawng han nei tur chuan a kum a lo tlem tawh biklo nen, a zak ve deuh pawh a ni mahna. A tunhma chanchin emaw, a tleirawl lai chanchin te chu hriat a ni lutuk lemlo a, ngaihzawng te pawh a lo neih ve nual tawh chu a rinawm. Liankhuma nena an chetsual takah chuan loh theihlohvin a rai thu chu hriat a ni vat a, mualpho ai chuan tiin Liankhuma nen hian dan 2-na hmangin Sihphir Presbyterian Kohhran Centenary Hall ah an innei ta a ni. A fa pai lai pawh chu lo piangin hmeichhia a ni a, naute duhawm tak a ni. Pi Mawii hian a hmingah Rosy Lalkhawngaihi tih a phuah a, zaichhuah a ni nghe nghe. Pi Mawii pasal Pu Liankhuma hian an inneih tir atanga Rosy kum 2 vel a nih thleng kha chuan a nupui leh a fanu te hi a duat hle a, a ngaihsak thin hle bawk. Mahse Rosy-i'n kum 2 a han tlin meuh chuan Pu Liankhuma mizia a danglam ta tlat mai, a thinchhia in a nupui Pi Mawii chu ho te te ah a ankhum ta fo mai a, kut hial te pawh a thlak thin. Zu lah a heh in tlai tin mai chuan buaina a siam reng a, kum 2 mi lek Rosy tan pawh a hrilhhai thlak thin khawp ang le. Tichuan reilo teah chuan Pu Liankhuma chuan Rosy te nufa chu a hnawtchhuak ta a, nupui dang a neihsan zui ta bawk a ni. Pi Mawii te nufa chu a nu leh pate bulah awmin harsa takin an khawsa ve tawk tawk a, Pi Mawii pawhin pasal dang neih tum tawh lovin a theih tawp chhuahin a fanu Rosy chu a t(r)ul pui ta thak a ni. Pi Vanlalmawii hi nu zaidam tak, mi pawisawi ngailo, nu fel leh hawihhawm tak mai a ni a. Thenawm khawveng te pawhin an nelin kawm nuam an ti thei em em a, chutia a pasalin midang a neihsan ta daih mai chu an khawngaih hle bawk a ni. Amah duhsak tu leh khawngaihtu te chuan an theih ang tawkin an tanpui ve thin a, vehbur te pawh an khawnsak hial a ni awm e. A vanduaina belhchhah turin Rosy kum 3 a rawn tlin chuan Pi Mawii nu chu zunthlum natna avangin a boral ta hlauh mai, a boral atanga thla 5 vel ah chuan a pa chuan Heart attack vangin a zui ve nghal bawk a ni. Pi Mawii hi Damdawiin pakhat ah sweeper hna a thawk a, a hlawh tlemte leh vengchhung mitena pawisa tlem azawng an pek hmang chuan a fanu chu a chawm ve tawk tawk a, an veng Primary School ah Rosy hi a kal ve thin a ni.

School zirtirtu te pawhin Rosy hi an khawngaih thei hle a, an dinhmun te hria in engkimah an hrethiam thin. Monthly fee te pawh chu Pi Mawii fanu Rosy tan bik liau liau hi an free sak zeuh zeuh thin bawk a, Pi Mawii pawh a lawm thei hle. Mahse vengchhung mi te leh Pi Mawii nuleh pate pawhina an boral thleng thu chiang an hriat tak miah loh chu Pi Mawii leh Pu Liankhuma te kha engtia han chesual dun ringawt nge an nih a, engtik laiin nge tih te, khawi hmunah nge tihte chu tuman an hre hauh lo. A hretu awmchhun te chu an mahni pahnih, Pi Mawii leh Pu Liankhuma te chauh hi an ni. Anni lah chuan an sawi duh der mai silova, Pi Mawii hi a rai tih an hriat khan Pu Liankhuma nena an chetsual thu chauh hi a sawi duh a, mahse engtik lai khan nge tih a sawi duh lo. A hre awmchhun Liankhuma leh Mawii te lah chu an inthen ta daih mai bawk si a, khawtlang hriat chak leh ngaihven em em ni lemlo mahse Pi Mawii thiante erawh in a zep tlat hi mak an ti hle. Harsa taka nung ve tawk tawk Pi Mawii te nufa chuan tlai khat chu an huan chhete a an thlai thar thenkhat beitham ve tak te chu an zuar kual a, an vannei ve deuh kan ti dawn nge hemi ni hian zawrh tura an kenchhuah ho chu an hralh zo ve ta vek mai. Chutia hlim taka an nufa a an haw leh lampang chu Truck lian tak mai hi chak takin a rawn tlan a, Pi Mawii pawh chuan chuti fakau a rawn tlan chak chu a hlau ve deuh a, kawngsir ah chuan a fanu chu a pawt phei a. Mahse a fanu chuan a kawlthei ken lai chu thlauhvin lamlian ah chuan a lum ta daih mai a, kum 5 mi lek, rilru thianghlim tak, hlauhawm leh hlauhawmloh pawh la thliar hrang thiamlo nanana chuan a kawlthei eilai lum ta daih mai chu chhar tumin lamlian lam chu a pan ta mai a. Pi Mawii lahin Rosy kut chu a lo vuan nghet hman tawh bik silo nen, Rosy tlan thut mai chuan a ti thlabar hle mai. Truck chu a lo hnai zel a, Pi Mawii chuan a fanu chu umzuiin lamlian lam pan chuan a tlan phei ve ta nghal a. A fanu Rosy, a neih chhun, a khawvel leh a engkim chu chhan hram tumin a zu pawm vat a, mahse vanduaithlak takin Truck chu a lo hnaih tawh em avang chuan kawngsir lam chu a panpui ta hmanlo a ni. Truck chuan na em em hian a su leng dun lawp mai a, lamlianah chuan thisen tam tak chu a luang zuih mai a. Truck Driver chuan rang takin Damdawiin lam a panpui ta nghal a, veng mipui te beng pawh a thleng rang hle. A tir chuan Durtlang Presbyterian Hospital panpui nghal an nih a rinawm hle a, achhan pawh Sihphir atanga damdawiin hnai ber a nih vang te pawh a ni mahna. Mahse he Truck Driver hian Aizawl khawchhung lam a pan pui a, Hospital hla zawk a pan pui kher erawh mipuite pawhin an hrethiamlo hle a, a hnuah pawh an titi ber a tling hial a ni. Truck Driver lah chuan, "Durtlang damdawiin kha ka rilru ah a awm lo hrim hrim, ka chiai lutuk a, ka che buai vek ani. In tawng ve lova, in hrethiamlo ang. Ka inthiamlo a, zan tam ka mut theihloh phah hial asin." tiin a insawithiam ve tlat bawk si. Ni e, a tawngtu nih ve miau loh chuan han indem theih ngawt bik va ni suh, amaherawh chu thil nih phung chu a ni chiah lo deuh chuan a alang a, he Truck Driver hian a tum reng vanga su a nih ring hial te pawh an awm nual ta ve ang. Truck Driver hi Malsawmhlua a ni a, Hlutea tiin an ko thin. Han sawi kual leh lawk ila, Pi Mawii pasal hlui Pu Liankhuma kha pa hausa tak chu ni lemlo mahse sum lama harsa lutuk chu a nilo. College zirtirtu ngat chu a ni ve a, Pi Mawii te ang nu rethei a han rai ringawt te pawh kha mi mak tih a tling a ni. Tin, nupui dang a nei kan tih tawh kha, he a nupui thar pawh hi nuthlawi tho a ni a, fa pahnih nei tawh a ni. A hming chu Lalrinengi a ni a, Maengi tia koh thin a ni. Nurse a ni a, a damdawiin thawhna Pi Mawii te nufa te an admit-na damdawiin tho hi a ni.

Pi Maengi hi a la upa chhe lova, kum 32 vel lek chauh a ni a, a pasal hian zu in nasat vang thovin alo boral san ve tawh bawk a ni. Maengi fate hi pahnih niin mipa leh hmeichhia an ni a, a upa zawk chu Lalchhandama, Chhana tia koh thin a ni a, a naupang zawk hi Lalnunmawii, Sentei tia koh thin a ni. Pi Mawii te nufa an accident zan hian mak tak maiin Pi Maengi fanu Sentei hi hman atanga a lo neih tawh, a TB natna chu a rawn zual thut mai a, hemi zan la la hian Pi Mawii te nufa an admit-na damdawiin vekah hian admit nghal a ni a, Female Surgical ward ah admit a ni. An admit tuk chiah hian a nu Maengi hi a fanu an admit-na ward, Female Surgical ward ah hian night duty tur a ni a, mahse ani pawh zingkar atangin thi-in a luak a, a damlo vak mai a ni awm e. Amaherawh chu Pi Maengi erawh damdawiina admit a ni lem lo a, in lamah a pasal, Pi Mawii pasal hlui Pu Liankhuma'n a enkawl ta zawk a ni. Pi Mawii te hi an nufa hian lo boral dun ta pawh ni se, ruang hlawm tu tur chhungte an nei lova, an thisen zawmpui chhungte an neih chhun chu Aizawl lam mi daih anni. Aizawl lama an chhungten chanchin an hriat veleh chuan damdawiin lam chu an pan chho ve ta nghal a, an chahthlak thleng khan ruang pawh an buaipui vek a ni. Veng mipui thenkhatte sawidan chuan Pu Liankhuma hian Pi Mawii nena an inneih hma atang daih tawh khan a rukin Pi Maengi hi a ngaizawng tawh a, Pi Maengi lah pasal sun tawh lo ni bawk nen, Pu Liankhuma lah a mipa duhzawng alo ni ve bawk nen, alo pawm ve mai a ni awm e. Tichuan thil mak deuh pakhat a awm a, chu chu Pi Mawii leh Pu Liankhuma an inneih khan Pi Maengi hi han danglam eih emaw, han lungngaih emaw a nei miah lo tiin an sawi a, "Mak han tih em em na chhan tur pawh ka hre love." ti tawk lah an lo awm ve bawk a. Mahse khati khawpa inzui nasa, inngaizawng nasa leh mite pawh ina innei ngeia tura an rin kha an ni ve a, Pu Liankhuma zawkin mi rethei tak leh nula senior ve tawh tak Vanlalmawii a thlang ta daih mai kha chu thil chik mi deuh chuan diklo engemaw tak a awm an ring a ni. Tin, zawhna ber ni leh ta chu Pi Mawii te nufa khan an accident ni khan chawhmeh an zuar kha a ni a, mahse an accident-na hmun erawh Sihphir Veng chhung a ni lo. Sihphir leh Selesih inkara kawng reh lai tak, fianrial deuh lai kha a ni thung. Pi Mawii hian thian kawmngeih deuh pakhat a nei a, chu chu an inbul lawka mi Pi Siami a ni. Pi Siami nen hian an inkawmngeihin an lungawilohna te, an rilru hahna te, an tahna te, an hlimna te leh an lawmna te, engkim chu kan in hrilh tawn vek thin. Pi Siami pawh hian mak a tih em em chu, an vengchhunga chawhmeh zuar ni si kha engvanga khalai hmun daih daih a accident tawk nge an nih tih chu a hrethiamlo hle a, Selesih lamah a zu zuar ti dawn ila, lirthei neihloh phei chuan kea kal atan chuan a hlat mai bakah chutia hlawkna tur em em a awm bawk silo. Taxi-i'n a kal ti dawn ila, chawhmeh zuar tura Taxi a kal thu awm hek suh, Pi Siami hian mak atiin engthil emaw tak inthup a awm a ring tlat a ni. Pi Mawii te nufa hi an khawngaih thlak in an lainat awm hle a, an dinhmun te ngaihtuah phei chuan an tan hian hringnun hi a fairlo bik ngawih ngawih te pawh kan ti thei ang. Hrehawmna nasa tak leh lungngaihna nasa tak an paltlang ve hram hram zel a, hmuhsit leh diriam pawh an tawk nasa. Rosy pawh hi school lamah naupang dangten an lo chhaih nawmnah thin a ni awm a, "I rimchhe thei si...inbual ve thin rawh...pa i nei tawhlo tiraw?" tih ten an lo tawngkhum thin a ni awm e. Kum 5 mi lek Rosy tan chuan han laknat vakna chang hrelo mahse, anu Pi Mawii bulah chung naupangtena an chhaih dan chu a hrilh leh vek thin a, Pi Mawii pawh zan tam tak chu a tap tlaivar fo thin a ni. A thiannu Pi Siami sawi leh dan phei chuan Pi Mawii hian inthah mai te a duh thu a sawi thin mai bakah, Pathian hi a awm tak tak pawh a rinloh chang a tam thin ani awm e.

**********

(AN ACCIDENT ZAN KHAN ICU CHHUNGAH ENGE THLENG?)

Ka office ah hahdam taka ka thut veng veng lai chuan intercom atangin call ka dawng hlauh mai a, phone chu ka pick up a. Nurse pakhat, casualty-a duty chuan hmanhmawh hmel tak hian, "Doctor, accident a nia, nufa an ni awm e.." a rawn ti hlawp hlawp a. Keipawh chu rang takin ka coat ka ha a, tichuan ka chhuak ve ta nghal a. Accident tawk mek te chu nufa niin naupang phei kha chu kum 5 vel bak a ni ka ringlo, an pahnih a ka hmuh tirh atang khan an condition kha a serious khawp a, an damchhuah ka ringlo hrim hrim. ICU ah dahluh nghal an ni a, an pahnih hian an ruh a tliak nasa hle a, an thluakah thisen a tling bawk. Tin, hemi te nufa ka khawngaihna em em chu chhungte an nei miahlo kha a ni. Mahse Aizawl lama an chhungte leh an veng lama YMA hruaitute an lo kal hlauh a, mahse keichuan darkar 1 lek pawh an daih ka ring tawhlo hrim hrim. Theih tawp chu kan chhuah a, oxygen pawhin awmzia a nei thuilo khawp mai. Zankhatna atangin Ventilator kan hmang nghal a, Truck-in a sut tirh a an thi nghal lo kha amak ka ti zawk. Tin, an nufa a sutu Truck driver pawh kha operation kan tih zawh hnu khan ka'n hauh zek kha. Achhan pawh Sihphir ah daih accident kha a thleng a, Damdawiin hnai ber pan ta mai lova kan damdawiin daih a rawn panpui kher kha a ti awm anglo mai nilovin, a mawl ka ti takzet. Night duty tur ni miah silo kha ka night a ngaih phah ta a, a ngai mai nilovin ka mawhphurhna a ni a, keimah pawn t(r)ul ka tih hrim hrim vang te pawh a ni ta ve ang. Mak tak maiin chatthla mai lo chuan an la dam reng a, a bikin kha naupang kum 5 mi lek kha tiang khawpa ruh tliak hnem si kha a la dam ve reng kha amak takzet. Kei hi Doctor Lalsangzuala ka ni a, Sangte tiin min ko mai thin. Pi Mawii te nufa accident zan pawh hian an damrei ka beisei loh em avang khan an Veng YMA hruaitute bulah khan an in lo singsa nghal tur leh, zanin bak an daih ka rinloh thu te kha ka lo hrilh nghal thawt thawt a, mahse zan hnih lai mai chu an dam dun a ni. Tin, mak leh em em bawk chu an nufa hian an thi rual chiah chiah a ni. Awle, ICU-a kan dahluh zana thil thleng mak tak mai chu ka han sawi ange. Khatia Ventilator chauh hmanga kan thawk tir lai khan nurse te bulah chuan tihtur eng eng emaw ka hrilh a, chutia ka tawng mawlh mawlh lai chuan Pi Mawii zawk chu a rawn tal ta vak vak mai a. Rang takin kan vuan bet a, a taksa chu a khur char char a, rin ai daihin man ngheh a har lehnghal. Ka ngaih ti thalo tu ber chu damlo reng reng hi Ventilator hmanga kan thawk tir tawh anih chuan reilo te chiah thawkna hun kan pe a, thi tur chiangsa ah kan dah thin. An taksa chet chu sawiloh, an thi anih pawhin zawimuangin an thi anga, an thi thut anih pawhin a che eih lovang. Anlo che anih pawhin a phu uih ringawt ang, chutiang khawp chuan ventilator hmanga kan thawk tir hram hram ho hi chu an zawi vek thin a ni. Mahse Pi Mawii erawh kha chu chutiang a ni hauh lo, nasa takin a tal a, man beh kha a har phian lenghal a, mihring taksa chak tha pangngai ang mai khan a kut te kha a la vai thei a ni. Kan man behna lamah kan hah thei hial a, minute 1 dawn vel chu kan buaipui ani. Nurse te pawh chuan mak an ti a, a dawih deuh thenkhat te phei kha chuan an hlau hial a ni. Chutah kan ngawih thep thawp lai chuan kan staff nurse pakhat chu a t(r)e vak a, ka hnungah chuan a rawn biru nghal a, ka kawr a pawt vak vak lehnghal. Hlauh hmel tak hian a khur zawih zawih a, a ngaihna kan hrelo hle mai. He nurse hi a hming chu Ruatsangi a ni a, nurse fel leh taima tak a ni. Ruatsangi chu en hu pah chuan, "Ruatsang, enge ni a?" ka ti a, Ruatsangi chuan hlauh hmel tak hian Pi Mawii fanu Rosy mutna lam chu ava kawk a, "Saww..saw naupang saw a rawn th(r)u thut a, min rawn ban alawm." a ti ta mai a, nurse dangte pawh chu an hlau takzet a ni tih chu an hmel atang leh an chezia atang chuan hai rual a nilo.

Naupang mutna lam chu ka va hawi a, mahse engmah danglam a awmlo. Khumah chuan a mu a, ahmaa kan dah dan ang chiah khan a la awm a. Ruatsangi bulah chuan, "I hmusual anilo maw?" tiin ka zawt a, mahse Ruatsangi chuan, "Aih, Doctor..ka hmusual lo..min rawn ban alawm, min nuih lehnghal." ala ti ta deuh deuh a. Nurse dangte chuan hlauvin, "Engtin nge ni dawn?" tiin an tap pur hlawm mai a. Keichuan ka la awih chiah lo, "I hmusual mai mai aniang, engmah hlauh tur a awmlo." ka ti lui tlat a. Chutih lai tak chuan Ruatsangi bawk chu a au leh ta vak mai a, keipawh hetah zet zawng, ka beng bula au a ni bawk nen, phu chiang tak ka ni. Pi Mawii chuan Ruatsangi kut chu a lo vuan reng a nih chu, Pi Mawii kut chu laksawn kan tum a, mahse a vuan nghet kher mai. Ruatsangi chuan na tih hmel tak hian, "Ana lutuk, awiii ka nu..min chhan ru." tiin a au chel chul mai a. Pawn lama damlo riahpui tu tur te chuan an hrephak ang tih ka hlau bawk si, Ruatsangi hmui chu ka hup leh rih thin, keipawh chu ka buai zo a ni ber mai. Chutah lee...Pi Mawii chu phawk em em hian a rawn meng ta hru mai a, kei meuh pawh ka tawlh hnung dawrh mai. Tichuan a tal leh ta vak vak mai a, kan manbet a, chutih lai tak chuan vanneihthlak tak maiin student nurse mipa pathum vel an lo lut a, damdawi la tura nichin deuh lawka ka tirh te an ni. Min hmuh veleh chuan anlo tlan phei a, tichuan Ruatsangi ban chu a thlah ta a, Ruatsangi ban kan han en chu a duk tluk thei hial a ni. Ka ngaih a tha tawh biklo, hemi te nufa hi mihring nge an nih a ramhuai an nih pawh ka hrethiam tawh lo, achhan chu mihring pangngai tih theih chin piahlam a ni tawh tlat. Ventilator hmang chauh a thaw tawh, ruh tliak nual bawk leh thluak a thisen tling tawh meuh ina khati em ema na a mihring ban, duk vek khawpa ala hmer thei kha chu thil theih hi anilo tawp. Mahse Ruatsangi ban a thlah chiah khan Pi Mawii pawh chu a zal ve nghal rawih rawih a, a muhil ve nghal mai bawk a. Tichuan darkar 2 vel a liam leh chuan dar 10 a lo ri dawn tawh a, an condition a ngai reng bawk a, ka office lama zu chhuk a, chaw ei ve te pawh chu ka tum ta a. Pi Mawii te nufa vang khan tlai chaw pawh ka la ei miahlo a, ka ril pawh a tam ve tawh hle. Tichuan chaw te chu ka ei a, ka eikham chuan ICU lam ka pan leh ta a. Pi Mawii muhil lai chu ka en reng a, a mit chu meng tur ni awm tak hian a rawn phu leh uih uih thin a. Ka va kal hnai a, zawite hian a phun ri bul bul hian ka hre tlat mai. Mahse uluk leh chiang taka ngaihthlak loh chuan a hriat chuangloh, zawi tak hian a ri bul bul hian ka hria. Tichuan ka kun hniam a, a hmui zawnah chuan bengchhi meuhvin ka ngaithla ta a. Mak tak a ni, amak mai pawh anilo, min tihlau a, ka thauvah min man ani, ka khur thei hialin ka hria. Coma-a awm nisi, thi tep tawh tura ngaih ,ventilator hmang chauha thaw tawh Pi Mawii chu a zai anih chu. Ni e, ka ngaithla chiang a, zawi te hian a zai ri ret ret a ni. Ka hlau takzet, ka tiril a fan a, kha ICU chhung vawt ruih mai hnuaiah khan ka thlan a tla hialin ka hria. Chutia Pi Mawii en reng pah a ngawi renga ka din lai chuan nurse pakhatin, "Doctor?" a rawn ti thut mai chuan min ti phu chiang kher mai, ka au chhuaklo kha a mak ka ti zawk. Nurse bulah chuan ka va kal a, min biak pawh chu ka ngaihtuah tha thei lo, Pi Mawii zai ri kha ka bengah a la cham reng a ni. Mahse hemi zan bak hi thil hlauhawm dang a thleng tawh lemlo, an boral ni thleng khan engthil danglam mah a thleng tawh lo. Mahse a mak ani, ka sawi tak ang khan thi tur chiangsa ah ka dah tawh a, a nihna takah chuan an mahni sutu driverin nungdama a rawn phur thleng thei kha a mak zawk a ni. Mahse zan hnih lai an dam thei kha a mak takzet a, awih a har a ni.

(PI MAWII PASAL HLUI PU LIANKHUMA KHAN ENGE A TAWN VE?)

Kei hi Lalrammawia ka ni a, kum 45 na ka hmang ve mek a, ka thiante chuan Mawite tiin min ko mai thin. Mawii te nufa thla a hran thu hi an sawi zeuh zeuh thawm ka hria a, mahse ka tawn ve ngailoh vang nge ni, ka awih lemlo khawp mai. Mawii pasal hlui Liankhuma hi ka thianpa a ni a, tlangval lai atanga inkawm tawh kan ni. Ka thianpa a nih vang ni miah lovin, Liankhuma hi pa fel tak leh thiante duhsak em em a ni chuan ka hria. Mahse mihring te hi kan famkim vek thei lova, Liankhuma pawh chutiang bawkin a fel famkim vek biklo. Kan veng nuthlawi, nurse hmelchhe lemlo tak Maengi nen hian an inngaizawng char char thin a, keipawhin vawi tam ka lenpui fo a ni. Mahse mak tak maiin ka thianpa Liankhuma hian Vanlalmawii, hmuhsitna nilo se, rethei ve tak, khawtlang te pawh ina vehbur hial an khawnsak, MAengi aia thatna nei bik hauh lo chu a rai ta tlat mai a, keipawhin ka hrethiamlo hle. Liankhuma bulah hian vawi tam ka zawt a, engvanga chetsual pui nge a nih tihte, engtik hunlai velin nge, engtik zan ber kha nge tihte pawn ka zawt nasa. Mahse eng anga zu a ruih lai pawhin a sawi duh thak lo, "Kan chesual palh mai mai." tih hlir hian min chhang tlat zel. An inneih ni pawh khan Liankhuma hian mo neitu thianah min hmang nghe nghe a, Mawii erawh kha chuan a thiannu Siami a hmang thung a ni. An inneih senso te, ruai te leh thil dang zawng zawng te pawh kha Liankhuma hian a tum vek a ni. Chutih lai chuan Maengi, Liankhuma bialnu hlui lah chu rilru na hmel emaw, zak hmel emaw lungngai hmel pu hauh lo hian nui sangin Liankhuma te inneih ni ah khan a rawn inkhawm ve a, ka nuih a za lek lek zawk hial a ni. An inneih ni khan Maengi khan a fate pahnih ala rawn hruai tel ve leh ta nghal a, a rilru a na lemlo khawp a ni ngei ang. Nge ni anga khatia Liankhuma'n a phatsan ta mai kha a tuar na lutuk anga, runluih nan tiin an inneih ni ah khan a rawn kal ve ngat zawk ni ang? Engpawh chu nise ka sawi tum ber zawk chu Liankhuma nena thlanmuala kan zu in tuma Liankhuma mize mak lutuk kha a ni. Mawii leh Liankhuma an inneih hnu kum 1 vel khan Liankhuma leh Maengi hi an inhmu leh tan ta zeuh zeuh mai a, amak ka ti angreng khawp mai. Chumai nilovin an fanu Rosy kum 2 vel chauh anih lai kha ni ta in ka hria, Liankhuma chuan a mawza a hmuh zawhloh vang ringawt khan Mawii chu an nufa in ahnawtchhuak ta ringawt mai a. Ahnu reilo teah a bialnu hlui Maengi nen chuan an innei ve lehnghal mai bawk a, engemaw an hriat a, hetia mak taka an chet ni tiin ka ngaihtuah neuh neuh thin. Maengi fate pahnih lah hian Liankhuma hi an nelin 'Ka pa' tih a an han ko thei nghal mai te kha thil awihawmloh tak a ni zawk hial awm e, mahse thenkhat tan chuan a mak lemlo thei bawk. Zankhat chu Liankhuma hian zu lakpuiah min rawn sawm a, kei zu a nih tawh chuan lo hnial ngai biklo nen, RV lam pan chuan kan inphur thla ta nghal a. Sihphir atanga RV zu kal hi thil hautak ve tak chu a ni a, a thang pawh ka thang rei thin khawp mai. Kan veng kan pel chiah, Selesih thlen hma si, Mawii te nufa accident-na bul vel kan thlen chuan kan bike chu a thi ta daih mai. Hetih hunlai hi Mawii te nufa boral atanga ni 5-na vel a ni a, Liankhuma hian a tuar lemlo khawp lehnghal. Liankhuma pawh hi hemi zan hian ka hau nghe nghe a, achhan pawh a fanu Sentei Damdawiinah a awm a, an nu Maengi lah in lamah a damlo bawk nen, amahin a awm tir ringawt a. Chumai bakah a fapa Chhana lah Sentei awmpuiin Damdawiinah a riak mek lehnghal a, mahse zu hi chuan mihring rilru hi a tibuai hneh ngang chu a nih hi maw. Kan bike chu han tih nun ngial kan tum pawhin a nung thei hauh lo mai a, minute 20 dawn lai chu kan buai phah a ni. A thim em em mai lehnghal a, han nawr haw dawnin kawng a chho ve angreng bawk nen, a peihawm chiah bik loh a ni. Kan han bei leh ngat ngat a, mahse awmzia a nei chuanglo. Petrol a full vek bawk si, chhiatna engmah kan hmu chuang silo, thil mak tak zawng a ni.

Chutia kan buai dun lai mek chuan Liankhuma chuan ringzet hian, "Ehe!" a ti vak a, ka phu chiang kher mai. Mak ti tak chuan, "Enge a?" ka ti a, Liankhuma chuan kan hnunglam chu kawkin, "Tah sawn, hmeichhe naupang pakhat a zuangthla daih, kawngsir khamah sawn a zuangthla daih." a ti ta mai a. Ka awih chiah bawk silo, mahse mak ka ti ve bawk si chuan, "Eng a? Awihawm loh emai." ka ti a, min tihthaih a tum a nih ka ring hial zawk. Mahse thutak zet hian Liankhuma chuan, "Dawt ka sawi lo, minlo en reng a, ka va hmu thut kha a tlan zuk a, khamah sawn a zuang thla daih alawm." a ti a, a hmel ka en chuan dawt a sawi hmel bawk silo. A zu chak tawh lutukin a hmu sual amawni aw ka ti hman hial a, "A awihawmloh emai, i hmusual a nih chu." ka ti leh a. Liankhuma pawh chu a lu a hiat nauh nauh a, "Nia, a ni maithei." a ti ve mai bawk a. Tichuan bike chu kan han rap leh chhin a, mak tak maiin a nung thei hlauh mai. Rang takin bike ah chuan ka lawn vat a, chak lutuk tak maiin kan tlan ta a. Kawngtluan chuan ka rilru a nuam chiah lo, a chhan pawh Liankhuma thil sawi vang kha a ni. Ka hlauhthawn ber zawk chu a thil hmuh a sawi vang kha ni tho mahse, kan bike a chhiatna hmun kha a nupui hlui Mawii leh a fanu Rosy te accident-na hmun a nih vang a ni mah zawk. Chubakah patling ve meuh ina dawt a sawi chu ka ring chiah biklo a, a hlauhthawn hmel em em bawk nen. Tin Mawii te nufa hi an thla a hrang tiin an sawi thawm ka hre zeuh zeuh bawk a, awih ngai chiah lo mah ila a lo ni ve tak tak thei tho bawk si a, ngaihthalo deuh chuan ka tlan ve zel a. RV chu kan thleng ta a, zu pawh kan la fel a, tichuan kan haw leh ta nghal a. Hman atang tawha kan thianduna kan inna thin, thlanmual lam chu kan pan leh ta a. Liankhuma chu a ngawi reng a, aphur loh hmel takzet. A awm ve tho mai, a thil hmuh vang te pawh kha a ni mahna. Biak phawt loh chuan tawng pawh a tum lo, ka biak pawh in a rul tawk bakin min chhang lo. Tichuan zu chu kan indun ta a, no 4 vel chu kan in tawh. Keipawh ka rui ve tan ta deuh a, titi pawh a kal tan ta khawp mai. Liankhuma pawh a hma ang a ni tawh lo, a tawng duh tawh khawp mai. Chutia kan titi lai chuan kan chhak lawka hnimbuk chu a rawn che luih mai a, ka phu chiang teh asin. Liankhuma pawh chu a phu zawk a, "Enge..enge a?" a ti nghal chul mai a. Keichuan, "Engmah a nilovang, thehlei an tam alawm helai ah hian, anih loh pawhin zawhte te pawh an ni mahna." kalo ti mai a. Mahse Liankhuma chuan, "Ani lovang, ka ngaih atha miah lo ania, i haw mai teh ang." a ti ta mai a. Ka la haw chak viau lo nen, "Kan rui dawn chauh a, khatiang mai mai ah patling tinge i hlauh a?" ka ti a, a tlawmngai ve deuh ani mahna, a thu ve leh mai bawk a. Tichuan kan han thli leh karh karh a, kan in leh ta. Hetah tak hian thil mak em em mai chu a thleng ta a, tun thleng hian minla ti hlau a ni. Liankhuma chu a ding thut a, ahma zawn chu a en vung vung ta mai. Engah vak chuan ka la ngailo, "Thu mai mai teh, i rui â leh tawh ami?" tiin ka fiam a, mahse min chhang miah lo. A hma zawn chu a en reng a, ahma zawn thim ruih mai chu kawkin, "Mawii..Mawii.." a ti ta mai a. Min tihthaih a nih ringin thinrim deuh tak chuan, "Hmela, thu mai mai rawh. Khatin mahni nupui hlui thi tawh te fiamthu nan an hmang ngailo." ka ti vin hlur a. Zawimuang chuan min rawn en a, a mitmeng mawlh kha, a var hian a var pup mai a, ka tawlh hnung dawrh mai. Mitkhap miahlo a min en pah chuan ahma zawn chu a kawk leh a, "Mawite, saw ka nupui Mawiin min au ania." a ti thum bul bul mai a, hetah zet zawng, hlau tak ka ni. Tichuan muangchang chuan a hma zawn thim ruih mai chu a pan ta chhet chhet mai a, aw khur dur dur chuan, "Liana, kal suh...lo let rawh." ka ti vak vak a, mahse a hmazawn chu a pan zel bawk si. Chutah le, kan hma zawn thim ruih mai atang chuan Rosy tetlaia anu in hla asak sak thin ang chiah chuan Mawii aw ngei mai chu a rawn zai ta ret ret mai.

Ka hlau lutuk chu ka thaw a chham hial thei dawnin ka hria, Liankhuma lah chuan zai ri lo chhuahna lam chu a pan zel mai bawk si a. Va koh let kha ka ngam tawh hlawl lo a ni, eng thil mah chu ka hmu hauh lo, mahse patling mah ni ila hlauh namen lovin ka hlau a ni. Mawii zai ri chu a ring tulh tulh mai si, ka theih tawpa chak chuan ka tlanchhe ta chiam mai a. Bike bul ka thleng a, mahse chahbi kha Liankhuma zawkin a ak tih ka hrechhuak a, ava han pawi thin tak em. Tichuan ke chuan theihpa tawp chuan ka tlan a, vanneihthlak takin tlangval panga vel leng haw ka tawk hlauh mai. Min hmuh chiah chuan mak an tih hmel em em a, min rawn pan vat a, "Tinge ka pu? Enge ni ta?" an lo ti a. Keichuan thaw hlawp hlawpin, "Ka...ka thianpa, khutah..thlanmualah." tih chiah ka sawi thei, ka thaw kha a chham tep ani. Tlangval te chuan, "Engmaw? Thlanmualah chuan i thianpa chu a awm em ni? Enge thleng a?" tiin mangan hmel tak chuan min zawt leh a. Tichuan ka han hahchawl deuh vang vang a, ka ziaawm deuha ka hriat hnuah chuan, "Min pui ru, ka thianpa khu..ihh..a rui nawi lutuk a, thlanmual thim laiah a kal a, a bo daih." ka ti ta ringawt a. Tlangval ho chuan min nuih tet tet lehnghal, an zinga pakhat chuan, "A rui nawi chu i hlau amaw? Thlahrang i hmu amaw kan tia lawm, i rawn tlanchhe chiam sia." a lo ti a, pakhat leh chuan, "Kal teh ang, i zu en ang hmiang." a ti a, tichuan thlanmual lam pan chuan kan chhuk leh ta a. Thlanmual chu kan thleng a, thim zingah chuan ka thianpa Liankhuma chu kan zawng kual ta a. Minute 10 dawn lai kan zawn hnuah chuan thlanmual mawng bera thingkung bulah chuan nikhawherlovin alo let reng mai a, abul lawk a thlan lah chu a nupui hlui, hmanni lawka a fanu nena boral ta, Vanlalmawii thlan alo la ni zui. Chung tlangval fel tak tak te puihna hmang chuan Liankhuma chu damdawiinah kan hruai ta a, mahse reiloteah a harh leh a, hemi zan la la hian kan haw dun leh thei ta hram a ni. Ahnua Liankhuma ka zawh leh khan, "Khatia kan rui kha, ka kai lutuk a, ka chatthla ni mai khan ka hria. Engtin nge Mawii thlanah khan ka awm ka hre biklo, ka chahthlak khan mumang ka nei a, ka mumangah chuan min ko a, Rosy nen anmahni zui turin min ti a, ka zui zel a, mahse an bo daih a, abak ka hrelo." te a ti deuh nuai a, ka hrethiam tawh biklo. Chuan hemi hnu atang hian Liankhuma hi a kaih ta zeuh zeuh bawk a, zan tam tak chu amah buaipui hian an inah kan tlan lut fo a ni. Maengi fanu Sentei lah chu a dam thei reng reng lo mai a, chutiang bawkin Maengi pawh a dam thei reng reng lo. An chhungkua chuan an damlo ta vek ani ber mai, a hrisel tha pangngai ber Chhana lah a nau Sentei riahpui zel angai bawk si. Tin mak deuh mai bawk chu, Sentei hian Mawii fanu Rosy thla a hmuh thin thu a sawi zeuh zeuh bawk a, Sentei hi surgical ward ah a awm a, a damdawiin awmna hi anu Maengi thawhna damdawiin a ni bawk. Damlo dangte pawh a ti thla bar a, a then phei chuan ward danga sawn turin nurse te pawh an ngen hial thin. An sawi dan chuan zantin mai hian zan lai ah a au chhuak thut thut zel a, nurse duty te pawh a ti buai hle thin a ni awm e. Engpawh chu nise Mawii te nufa hi an thla a hrang ngei a ni tih chu ka ring ve ta, a chhan pawh mi sawi vang ni hauh lovin, keimah ngei hian ka tawn ve tawh vang a ni. Kan veng pawh hi Mawii te nufa vang hian veng dang ho pawhin an t(r)ih ru hle tih pawh ka hria, chubakah Mawii te nufa accident-na hmun ah khan thawm an hriat thin thu an sawi fo mai a, abikin 2 wheeler-a tlan te hian accident-na hmun an thlen hian an hnungah midang rawn chuang ve niawm tak hian an lirtheih chu a hniam suih zel an ti ani. Kei erawh chuan an thla tak hi chu ka la hmu lova, mahse chiang takin Mawii zai ri kha chu ka hria a, Rosy tet laia a awihna thin hla ngei kha a sa bawk. Min tihlau tu ber chu Mawii zai ri kha ni tho mahse, Liankhuma mit var pup mai khan min ti hlau ber zawk.

(THAH NGE AN NIH ACCIDENT VANG ZAWK?)

Zarkawta awm kan ni a, kan chhungkua hi 5 kan ni. Ka nu leh pa, ka nau leh ka pu te nen kan khawsa a, ka pi erawh nikum khan asthma natna vangin min boral san tawh. Tlangval kum 27 mi ka ni a, ka nau nen hian kan inthlau hle a, ka nau hi kum 16 mi chauh ala ni. Zankhat ka nau pumna lutuk chu damdawiinah kan tlan chhoh pui ta ringawt a, casualty ah kan zawn lut a, a zunkawng thalo hi alo ni a. Tichuan chu mi zan la la chuan admit nghal tur an ti a, ka pa chuan, "Ti hian lo awm la, a thawmhnaw vel kan zu la ange." a ti a, a kal ta a. Ka nau chu nachhawkna in an chiu a, a muhil a. Ward awmna tur vel ka buaipui fel hnu chuan nurse chuan, "Pawnah minlo nghak lawk la, kanlo ko leh ang che." a tih avang chuan pawnah chuan ka nghak ta a. Smoking zone ah chuan meizial ka zu a, hetih lai hian zan dar 11 ala rilo hret a ni. Smoking zone bulah hian waiting shed a awm a, chutah chuan thuin meizial chu ka zu a, ka phone ka khawih pah bawk. Tin, casualty atanga smoking zone hi a hla ve angreng a, kea kal phei chuan kal ve fe a ngai. Zan a rei tawh bawka, tumah an awmlo. Chutia ka phone ka khawih malh malh lai chuan hmeichhe zai ri ret ret hi ka hria a, a nalh phian lehnghal. Mahse eng hla nge a sak chu ka hrelo, chubakah mizo hla anilo tih chu ka chiang. Chu zai ri chuan engemaw tak hian min fan riau mai a, zai ri lo chhuahna lam ka zu hawi chuan stepah chuan nu pakhat hian a fanu niawm tak chu a lo awi hlarh hlarh hi alo ni a. Inla polite tak hian, "Nau i awi a nimaw kha.." ka zu ti a, chuveleh zai ri chu a tawp hmak mai. Ngawireng hian min hnungchhawn zawng chuan a ding a, mak ka tiin ka zu be kher kher kha ka inthiamlo angreng hle mai. Engah vak ngailo chuan ka phone chu ka khawih leh ta mial mial a, minute 1 vel hnuah chuan chumite nufa lam chu ka zu en leh a, mahse anlo awm tawh miahlo. Mak ka tih deuh mai chu step kha a thui ve ang reng a, step tawp lam phei chu a thim hian a thim thla vek. Engtik laiin nge an chhuk ka hre miahlo, thawm pawh a awmlo. Ka awmna lai hi step bul chiah a ni a, rawn chho ni ta se ka hre ngei awm si a. An chhukthla daih pawh a ni thei tho, mahse chhukthla ta pawh nise a thim em em a, torch light emaw tal an hman ve ngei chu a ngai ang, mahse lo hmang ta se, khati khawpa hmun thimah khan light eng chu ka hmu ve ngei awm si a. Khawiah nge an kal daih angle ti nuah nuah pah chuan phone chu ka khawih zawm leh mual mual a. Chutah ka bul lawkah chuan nichina zairi bawk chu a rawn ri leh ta ret ret mai a, ka phu chiang kher mai. Ka thutna Waiting Shed hi ft 20 vel laia sei a ni a, thutna hi a awm phei duah a, ka thutna atanga fit 10 vela hla ah chuan nichina nufa ka hmuh te kha an lo thu leh daih tawh a nih chu. Hlauh tur a ni em chu ka hrelo, mahse hlauhna hlirin ka khat a, ka thlan a tla zawih zawih mai. Phone chu ka dah a, chumi te nufa chu ka en reng a. Chutah lee...a fanu zawk chu a rawn hawi chhuak a, ka va han rap tak em. Chu naupangte chuan mihring damlai hmel reng a pu lo, a hmai chu a dang vek a, a mit lah a var vek bawk. A kut chu phar chhuakin min la rawn kawk leh ta nghal a, "Anu saw mi an awm ania." a la ti zui. A nu chuan min rawn en ve leh a, mi rawn la nuih vur vur zui a, ka hlau takzet ani. Thawh vat ka tum a, mahse ka khawng vek. Au chhuah ka tuma ka thei thak lo, ka thut ngai chuan ka thu reng a, ka chesawn theilo. Ka bulah chuan an rawn kal leh ta nghal a, ka zawn takah chuan an nufa chuan an rawn thu ve ta mai a. Khatih laia ka bul vel han rimchhiat zia kha ka sawithiam lo zawk, sazu thi uih rim hi a nam rum rum mai. Thla eng chuan chu mite nufa hmel chu a chhun a, chianglo ruai chuan ka hmu thei. Tichuan rum em em hian an nufa chuan min melh a, hawi sawn pawh ka tum nasa, mahse ka lu chu tu emawni hian a vuan bet tlat amaw tih mai tur a ni, anmahni lam chu ka duh vang ni miahlo hian ka hawi reng a, maimitchhin ka tum pawhin ka mit kha ka chhing thei hauh lo.

Kawl a phe leh zuai thin a, ruah erawh a sur lo. Thli a thaw vuk vuk a, kawl lo phe leh zeuh thin chuan chumite nufa hmel chu a ti lang chiang kher mai, thla eng hnuaiah mai mai pawh an hmel kha ka rap takzet tawh nak alai a, kawl phe in a rawn chhun phei kha chuan an hmai dang vekah chuan thisen zam a awm th(r)uah lenghal in ka hria. An rimchhe em em a, ka luak a chhuak takzet. Tichuan chu nu chu a rawn tawng chhuak ta, "Tlangval, i hlau em ni?" a rawn ti mai chu, zun ka cheh hialin ka hre tawh a ni. Mahse ka chhang theilo, ka aw a chhuak thei lo tlat, thlan tla zawih zawih chuan ka en reng a. Chunu bawk chuan, "Ni e, mihring kan ni lo, mitthi tawh kan ni." ala ti ta deuh deuh a. Ka mumang nise ka ti takzet, ka khur zawih zawih a, ka che sawn thei silo, ka mittui a luang zawih zawih tih pawh ka hria. Chu nu rapawm zet chuan rum taka min melh pah chuan a ding thut a, a fanu chu a pawm a, "Accident vanga thi angin mi zawng zawngin min ngai a, mahse anilo. Thudik chu nang hian zawng chhuak ang che, kan innghahna awmchhun i ni. Tlangval, min pui rawh, min pui hram rawh." a ti a, tichuan lehlam a hawi a, an nufa chuan stepah chuan an chhuk ta a. Step thim ruih mai lam pan chuan an chhuk zel a, mitkhap miahlo chuan ka en reng a. Chutih lai tak chuan kut vawt thlur mai hian a tukhuma min rawn nam bulawp mai chuh...ka zuang tho dawrh mai a, ka au ring kher mai. Ka hawilet chu ka pa alo ni a, a ni pawh chu ka t(r)e vak avang kha a ni ngei ang, a phu ve zuk khan ka hria a ni. Ka pa chuan vin zet hian, "Mawla, tlaktlai lo lutuk. Nurse ten an zawng che alawm, i nau a damlo tih i theihnghilh tawh em ni? Nikhua lo lutuk, hetah enge i tih a?" min ti ta hrep a. Hetih lai hian mumang ang ruai hian ka awm a, ka la harh chiang lo a ni ber mai. Ka thaw hlawp hlawp a, "Ihh..ihh..meizial ka zu." ka ti bah nuai mai a. Ka pa lah chuan, "Ihh, ihh..tih vel angai lo, ben leh i duh em? Lo phei vat rawh, nangmah vangin nurse te pawn min hau hrep..nikhualo lutuk." tiin min hauh chhunzawm char char a. Ka thil hmuh kha sawichhuah chu ka duh a, mahse ka pa hian min duat lemlo a, keilah ka lo sual ve hrim hrim bawk nen. Vawi tam dawt ka hrilh fova, ka chhuanlam a nih ringin a awih dawn chuanglo. Ngawi reng chuan ka zui a, ka awm erawh a nuam lo takzet a ni. Vanneihthlak takin ka nu in ka nau chu a riahpui dawn a, ka lawm teh asin. Mahse kha nu rapawm zet thil min hrilh kha ka bengah a cham reng a, thudik zawng chhuak tur khan min ti lehnghal. Ka hrethiam tawh biklo, tute nge an nih a, khawi venga awm te nge an nih? Ka hmu tak tak nge khatia meizial ka zuk lai khan ka muhil a, mumang ka nei zawk? Mumang chu a nilo chiang a ni, chubakah tunge meizial zuk reng laia mutthlu ngai reng reng ni? Tih tur ber ka hrelo, zawhna hlirin ka khat a ni ber mai. Engmah tilova awm tawp chu ka ngaih a tha silo, ka hmu chiang em em a, ka hnarah pawh hian kha mite nufa rim chhe zet kha ala cham reng hialin ka hria. Thiante bula ka sawi chuan an awihlo dawn chiang sa bawk nen, tumah ka hrilh ta lo tawp mai a ni. Tin, khanu zai ri mawlh kha, ka mumangah hial te pawh ka mangphan a, kha zai ri kha, a tira nalh ka tih em em kha tunah chuan min ti mutheilo tu leh min ti thlabar tu a ni ta. Ka bengah hian, "Min pui hram rawh.." tih ri chu a ri nawn mawlh mawlh mai hian ka hria, kha mite nufa khan duh chu an nei chiang a ni. Mitthi tawh an nih thu an sawi leh ta nghal a, engemaw tak chu ka tih ve angaiin ka hria a ni. Chubakah khami zana min pui tura min ngen lai khan, a hmel kha rapawm viau mahse a mittui a tla tih chiang takin ka hmu a, a hmel ah khan lungngaihna nasa tak ka hmu tel bawk a ni. Enge han tih tan ber tur pawh ka hre chuang lo, tute nge an nih lah ka hre silo. Mahse zan khat chu ka mumang ah kha mite nufa kha ka hmu leh tlat mai, ka mumangah chuan kha nu rapawm zet khan ti hian min hrilh a, "Tlangval, Siami tih hmingpu in a rawn zawngchhuak ang che." tih ringawt hi min hrilh a, abak chu engmah a sawilo a, zandangah pawh ka hmu leh ngai tawh lo bawk.

(PI MAWII THIANNU PI SIAMI THIL TAWN)

Ka thiannu Mawii te nufa thihna pawh kar 2 lai alo liam ta, hun hi alo va kal chak si em, nimin lawk ni mai khan ka la hria ani. Mawii te nufa thihdan an sawi hi keichuan ka awih lo hulhual a, thil inthup engemaw tak chu a awm ka ring tlat a ni. Chawhmeh zuar ni si kha, an ruang bulah khan eng chawhmeh mah a awm lova, an hralh zo tawh pawh lo ni ta tehreng se, engvanga pawisa ak miahlo nge an nih? Chawhmeh an zuar a, an hralh zo vek tiin an sawi bawk a, mahse pawisa chhete mah an ak silo kha a mak a ni. Chumai bakah an accident tuk lawk khan a pasal hlui Liankhuma nupui Maengi kha thi-in a luak vak a, Maengi fanu Sentei lah kha khami zan la la khan damdawiina chhohpui ngai khawpin a TB natna kha a rawn zual thut bawk a, khang te khan ka ngaih a tithalo tlat nia mawle. Chu chauh chu ala nilo, mak ka tih em em bawk chu Mawii te nufa kha an thla an hmuh thin thu hi mi hrang hrangin an sawi a, kar hmasa lawk lah khan Mawii pasal hlui Liankhuma lah chu a thianpa Mawitea nen thlanmuala zu an zuk in naah nikhawhrelovin a zu awm ringawt a, ahnu ah a kaih ta zeuh zeuh an ti bawk a ni awm e. Mak ka tih em em bawk chu Mawitea leh Liankhuma kha engvanga Armed Veng thlanmualah kher zu zuk in an nih tih kha a ni, ka hrethiam hlawl lo. Kei erawh hetiang lamah hi chuan luhlul ve tak ka ni a, Mawii te nufa thla an hmu thin tih pawh hi ka awihlo hulhual. Thlahrang tih vel te, ramhuai tih vel te hi kei ka awih loh zawng tak a ni a, ka tawn ve ngailoh vang pawh a ni mahna. Mahse zankhat thil thu lekah ka thil awih ngailoh leh rin ngailoh te chu ka awihin ka ring ta nghal vek a, ka mit ngei pawn ka hmu ve ta a nih kha. Kum 40-a upa ka ni a, ka thiannu Mawii hi kei aiin kum 2 velin a upa a, mahse, "Min u suh." a tih tlat avangin ka u ngai lemlo. Thian inkawmngeih tak kan ni a, a harsatna te, a hlimna te leh a lungngaina te, engkim chu min hrilh vek thin. Khami tlai an accident tum khan, thil mak em em mai chu khalai hmun daih daih a accident an tawk kha a ni. Chawhmeh an zawrh reng reng hian kan veng hi an pel ngai meuh lova, veng pawnah an zuar ngailo. Kei ngei pawh hian vawitam ka zawrhpui thin a, vengchhung hnaiah bak kan zuar kual ngailo. An accident ni kha ka pasal nen huana kan feh ni a ni a, keiphei chuan an accident tih kha zanah ka hre ve chauh a ni. Sihphir leh Selesih inkar daih daih an lo zu thleng thei kha amak ka ti em em a, Mawii hian kan veng hi a pel ngai meuh lo. Engpawh chu nise ka thil sawi tum tak chu ka han sawi tawh ange, hemi zan hi ka pian ahnu lama ka thil tawn ah chuan ka la hlau ber hial ang. Mawii thih hnu kar khat leh achanve vel nita in ka hria, ka unaunu, Bawngkawna pasal nei, Sangzuali fanu naupang zawk Debbie chu a dam lova, damdawiinah an admit a. Sangzuali chuan min rawn hrilh a, a khawsik a lo sang hluah a ni awm e. An pa zin lai alo ni bawk nen, amah lah a lo damsam bik meuh lo nen, riahpui tur chuan min rawn ngen a, Debbie hi ka fanu ang chiaha ka en leh ka duat a ni a, ka hnial lemlo. Tichuan kan pa ngaihdan chu ni vak lo mahse Damdawiin thleng chu min zu dah a, he damdawiin hi Mawii te nufa an enkawlna damdawiin ngei kha a ni. Zan dar 8 vel daiha min phone tawh kha a ni a, mahse kan veng a hlat deuh avang leh kan pa nen kan inhnial leh phawt avang chuan dar 10 dawnah ka thleng ve thei hram a. Security te leh nurse duty te pawhin min kamkhat nghe nghe a, a nuamlo duh khawp mai. Debbie hi private ward ah admit a ni a, Debbie hi kum 8 mi a ni. Ka nau Sangzuali hi a kawng a diklo a, a ding rei hleithei lova, a thu rei theilo bawk a, chuvang chuan a fanu hi a riahpui ngam chiahlo a ni. Debbie lah hi kum 8 lai ni ve tawh si hian a pangchang em em a, puak hial te pawh ala ngen thin a ni. Mahse min ngai ve em em a, keipawhin ka lo duat bawk nen, ka riahpui tur chu a lawm ngang mai. Dar 11 a rik meuh chuan Debbie chu a muhil ta a, kei erawh megazine chhiarin ka la meng thung.

Chutia megazine chhiara rilru thlamuang taka ka mut veng veng lai chuan Debbie chu a rawn thu kang hlawl mai a. Ka phu chiang lutuk chu ka megazine chhiar lai pawh chu ka thlauh nghe nghe a, Debbie lam chu phawk hraw hian ka va melh a. Debbie chuan min rawn en a, rum zet hian min rawn melh khur mai a. A tho â anih ringin ka va pan a, mahse chiang fekfawk hian, "Lo kal hnai suh...min rawn hnaih tawh suh." a ti khur ta dur dur mai a, ka ding chat mai. Ka hlau angreng khawp mai a, achhan pawh Debbie aw kha naupang kum 8 mi aw a ni lo hrim hrim, nutling tak aw ang mai hi a ni. Chumai nilovin chu aw pawh chu ka hriat hnu a ni, hmanni lawka boral ta, ka thiannu Mawii aw ngei a ni. Mahse ka inti huai lui a, a tho a anih ka la ring lui fan a, "Bawihi, enge awmzia?" ka ti a, mahse ka pan hnai ngam chiah biklo. Debbie chuan, "Siami, ka thusawi hi ngaithla rawh." a ti leh ta mai a, Mawii aw ngei tho ni chuan ka la hria. Hlau rilru tak chung si chuan, "Debbie, khatin mi ko reng reng suh." ka han ti khur dar dar a, mahse ngaih a tha tawh mawlh lo. Rum zet chuan min en reng a, a mitmeng te chu a sen hian a sen rum mai a. Chutah min nuih vur vur a, a maimitchhing a, khumah chuan mu leh ta daih mai a. Rang takin ka tlanchhuak a, nurse ka au vak vak a, nurse te pawh chu lo kal vatin Debbie ward ah chuan kan inzui lut a. Debbie chu a lo la mu reng a, nurse chuan, "Enge nita ka pi?" a ti a. Keichuan, "Ahh..ih..a rawn thuchhuak hlawl a, tichuan min melh run a." tih ringawt hian ka chhang a. Nurse chuan Debbie chu a han enfiah a, reilote hnuah chuan ka bulah lo kalin, "Lungngai suh, engkim a tha vek alawm. A BP pawh a normal a, a khawsik erawh ala sang deuh. A tho á mai mai a nih chu, hlauhthawnna tur a awm love." tiin min chhuahsan leh daih mai a, ka thla erawh a muang tawh hlawl lo. Ngaihtha lo zet chung chuan ka mu ve leh ta a, light off chu ka tumlo bur, a ngam pawh ka ngamlo hrim hrim. Tichuan engtin mah chuan a awm zui lemlo, tui tak chuan a muhil bawrh bawrh a. Keipawh chu reilo teah chuan ka muhil ve ta a, ka mut hma a sana ka en khan dar 12 a pel tawh a ni. Thil engemaw zawi te te a ri dup dup reng chuan min ti harh a, ka ngaithla chiang a, zawi tea zai ri ret ret ka hre tel bawk. Debbie mutna lam kava en a, alo awm tawh miah lo. Rang takin ka tho nghal a, "Debbie..Bawihi..khawnge i awm?" tiin ka au nghal chiam chiam a, mahse min chhang lo. Bathroom lama ri dup dup thawm chu ka ngaithla chiang a, zai ri ret ret pawh chu ala awm reng. Ngam leh ngamlo chuan zawimuangin bathroom lam chu ka pan a, bathroom kawngkhar chu chhete alo inhawng a. Muangchang chuan hlau tak chung siin bathroom chu ka hawng a, chuta ka thilhmuh chuan min ti hrilhhaiin min ti hlau kher mai. Bathroom bang chu zawi te te hian Debbie chuan a lu in a lo tauh ri dup dup a, chumi pah chuan a zai ri rat rat bawk a. A thawh at vang a nih chu ka ring tawh hlawl lo, achhan pawh kha a zai ri kha Debbie aw a nilo a, ka thiannu Mawii fanu Rosy aw ngei a ni. Rosy hi a nuin a awih hian hla a sak sak thin a, Rosy hian mutchhuak em emin alo zaipui ve thin a, chuvang chuan Rosy zai ri ngei a ni tih ka chiang a ni. Hlau viau mah ila han tihtheih vak a awm silo, "Bawihi, enge i tih a?" tiin ka va be leh a, min chhang miah lo. Ring deuh tak chuan, "Debbie." ka han ti vak a, chutah a rawn hawi thut mai. Min rawn pan a, "Anu Siam..Anu Siam." tiin a ban pharin min rawn pan ta mai a nih kha. Ka hlau takzet, achhan chu Debbie hian, "Anu Siam." tiin min ko ngai lova, "Ani." tiin min ko thin. Chumai bakah a aw kha Mawii fanu Rosy aw tho ala ni a, Rosy min koh dan chiah chiah a ni. A hmel chu ka en a, Debbie hmel a ni pawhin ka hre tawh lo, Rosy a ang riau hian ka hre hial a ni.

Ka tawlh hnung a, min rawn pan zel si. Han au vak mai chu ka tum a, mahse thil tih chi niin ka hre bawk silo. Bang ka ngheng a, khur zawih chuan bang kilah chuan ka thu a, Debbie in ban phar chunga min rawn pan chu ka lo en reng ringawt mai a ni. Tichuan ka zawn a rawn thleng a, Debbie hmel chu puitling hmel hi a ang em em mai a, Debbie hmel tho ni mahse naupang kum 8 mi hmel reng reng a pulo, ka rap lutuk kha a hmel awmdan ka sawifiah thiamlo a ni ber mai. A mit te chu a var pup a, a kawchhungah ramhuai a lut a nih ka ring hial zawk. Tichuan a ban chu a dahthla a, chutah lee..ka thiannu boral ta Mawii aw ngei mai chuan, "Ngatinge Siami, Rosy hi tinge i pawm duh loh a? I duat theih tehlul nen, engti zia nge?" a rawn ti mai chuh, ka hlau ngei mai. Thei leh theilovin, "Maw...Mawii..nangmah i ni em?" ka ti khur dar dar a, ka bing mup mai hian ka hria. Chutah light a rawn thim thut a, ka t(r)e thawt a. Thla eng tak chuan kan ward tukverh chu a rawn chhun a, chutah Debbie hmel ka en leh chu Debbie a ni ta hauh lo, ka thiannu Mawii ngei a ni, ka hma zawnah chuan alo thingthi reng chu niin. Chiang em em hian min melh a, a hmai a dang vek a, a mit a var vek bawk. A sam lah chu a dum hian a dum ngûk mai a, lungngaih hmel em em hian min lo melh run mai a. Hetih lai hian ka tap pur tawh a ni, thawk hlawp hlawp pah chuan, "Mawii...nangmah em ni?" tiin ka tap a. Mawii chuan a lu a bu nghauh a, "Thiannu, min hlau suh..Mawii ka nih hi." tiin a mittui a luang zawih zawih mai a. Ka thiannu, ka hmangaih em em mah nise, mitthi tawh ina khatia hmun leh hmuna min bia kha chu a rapawm takzet zet a ni. Hlau leh khur dur dur chung chuan, "Enge i duh? Enge hetah i tih?" tiin ka zawt leh a. Mawii chu a kun ta lap a, chutah alo hawichhuak a, thla eng chuan a hmai a rawn chhun a. Ka thiannu Mawii, a damlai hmel pangngai ngei mai chu a rawn lang ta a. Mahse ka hlauhna erawh a tih kian phah chuanglo, chhete chuan ka zia ve deuh chauh ani. Mawii chu a biangah mittui a luang a, a tah a chhuah hmel em em lenghal. Chutah muangchang chuan, "Thiannu, accident vanga thi kan nilo asin, thah kan ni...thah kan ni." tiin a tap ta hawm hawm mai a. Ka rindan chiah a ni, mahse han zawt chianga, kimchang taka min hrilh tur erawh chuan ka duh chuanglo, achhan chu ka thiannu Mawii thlarau ka bula a awm reng kha thla a muang mawlh lo, ka hlauhna pawh ala kiang chuang lo. Mawii bawk chuan, "Siami, ka ngai thin khawp mai che. He khawvelah hian awm tur ka ni tawhlo, mahse ka thihna chhan hi puanzarin awm ngei se, thudik langchhuak ngei se ka tih vangin ka la kal theilo ani. Thiannu, min ngaidam rawh aw, ka duh reng vanga khatia i hmaa lo lang ka nilo, tih hlauh che ka tum lo." tiin a tap zawih zawih a. Ka huaisenna sawm khawmin hlau chung chung chuan, "Mawii...enge awmzia, engmah ka hrethiamlo." ka han ti a, mahse a hmel kha ka en tha ngam chuang derlo mai. Mawii chuan chiang fek fawk hian min en a, "Aldrin Lalnunkima...chu tlangval chu lo zawnchhuah tum ang che." a ti a, a ding thut a. Chu veleh current a rawn eng a, Mawii chu alo awm tawh miah lo. Khum lam ka va hawi a, Debbie chu ama khum ngeiah chuan tui ti takin alo muhil a, ala hnar suk suk lehnghal. Ka tho a, sana ka en a, zing dar 4 alo ri tep tawh mai. Mu miahlo chuan khua chu ka nghak var ta thak a, khumah pawh chuan ka mu leh ta miahlo. Ward chhungah chuan ka tei kual reng ringawt a, Debbie pawh chu ka hnaih tha ngam tawhlo hrim hrim. Mawii sawi kha ka bengah hian a cham reng a, Aldrin Lalnunkima chu tunge a nih a, engvanga zawng tura min ti nge a nih tih lah ka hre der si lo. Mahse a chhan sawi tura ka bula arawn inlar leh erawh ka duh thak lo thung, ka thiannu ngei ni mahse, hmuh leh kha ka duh tawh lo ani. A tukah pawh chuan Debbie chu ka riah pui tawh lo chiang teh asin, chhuanlam ka siam a, a nu chuan nuamlo chung chungin a riahpui chhunzawm ta zawk a ni. Sangzuali chuan engvak a tawng ve lo a ni chek ang chu, engmah a sawi ngai lem lova. Tun thleng hian ka fanu ang chiah a ka en, ka duat em em Debbie chu ka hnaih tha ngam tawh miahlo a ni.

(Aldrin Lalnunkima hi tudang nilovin Pi Mawii te nufa thla lo hmu ve tawh tu, Pi Siami zawng chhuak tura Pi Mawiin a tih ngei kha ani.)

(PU LIANKHUMA NUPUI NURSE MAENGI KHAN ENGE A TAWN VE?)

Ka pa nupui hlui Nu Mawii ten accident an tawh tuk lawk khan ka nu hi thi-in a luak vak mai a, hemi zan hian night duty tur a ni nghe nghe a. Ka pa hi ka pa tak tak nilovin ka pa hrawn a ni a, kei hi Chhana ka ni a, ka pa hian min thihsan tawh ani. Ka nu leh Pa Liankhuma te hi an innei leh a, tichuan ka pa hrawn Liankhuma hi ka nau Sentei nen 'Ka pa' tiin ka au thei nghal mai a, achhan pawh kan nel em em a, min duat a, pa fel tak a ni bawk. Khami zan khan ka nau Sentei pawh chu a TB natna, hman atanga alo neih tawh, a reh hlen ta amaw kan tih chu a rawn zual leh thut a, a khuh tawp thei reng reng lo mai. Sentei chu ka thianpa Rama nen ka pa car hmangin damdawiinah kan tlan chhoh pui nghal a, admit alo ngai hial a. Hemi zan atang hian ka nau Sentei chu damdawiinah ka riah pui nghal ta char char a ni. Ka nu erawh damdawiina in admit a duh lova, in lama awm a, a that leh mai a rinthu a sawi tlat avang chuan in lamah a awm ta zawk a. Sentei chu zan khat ka riahpui naah kha chuan engvak a thleng lova, tui takin amuhil ve mai a, a khuh pawh a ziawm viau a ni. Mahse zan hnih kan riah na atang chuan thil mak deuh a thleng ta a, keipawh min ti hlau khawp mai. Kan awmna hi surgical female ward a ni a, Sentei hi a kil ber, bathroom bulah a mu a, kei erawh abula thutthleng seiah ka mu ve thung. Zana tui taka kan mut reh thep thawp lai chuan ka nau Sentei chu a rawn rak vak mai a, ka phu chiang kher mai. Rang takin ka tho a, Sentei chu ka vuan bet a. A tal vak vak a, nasa tak hian a t(r)e vak vak mai a, min ti mangang takzet. Kan ward awmnaa damlo dang te leh riahpuitu dang te pawh chu lo tho chhuakin Sentei chu min rawn vawn beh pui a, nurse te pawh chu an lo kal a. Sentei chu reife kan buaipui hnu chuan a ziaawm ta deuh a, amal tete chuan min melh hrek hrek hlawm a, zawn nei a ang ka ti ber. Nurse te chuan, "Enge a? Enge awmzia?" tiin an zawt a, mahse a chhang thei mai lo. A tap hawm hawm a, tichuan nghet takin min vuan a, "U...hmeichhe naupang ka hmu, ka bulah hian, khum bulah hian a lo ding a, min en reng a." tiin hlauh hmel tak chuan a khur dur dur a. Mak kan ti hlawm kher mai, midang ho pawh chu an in en hrak hrak hlawm a. Nurse pakhat chuan, "Enga? Naupang a?" a ti hu mai a. Male surgical lama duty te pawh anlo phei hial a , thawm kha an hre ve a ni ngei ang. Lehlam kawng zawng tak chuan ka zak angreng hle a, a nuam duhlo khawp mai. Sentei bianga chul heuh heuh pah chuan, "Bawihi, i mumang mai mai anih chu, hei i bulah kan awm vek alawm." ka ti a. Mahse Sentei chuan tap chungin, "Anilo U, ka hmu tak tak alawm. Ka khum bulah hian a lo ding a, min en char char a, mitmu var lai pawh a neilo, a dum vek. Ka khumah hian a rawn lawn a, min rek vak vak a, ka hlau lutuk." tiin a tap leh nghal char char a. Damlo dangte pawh chu an hlauh ve hmel kher mai, an in en hrak hrak hlawm a. Nurse te pawh chuan an theihtawp chuan an thlamuan a, tichuan nachhawkna in an chiu a, a muhil ve thei ta hram a ni. Hemi zan atang hian Sentei chu a buai ta ziah a, damlo dang te pawh a ti thlabar nasa thei em em a. A then phei chuan min ngei ve thin ngawt ang, a then lahin ward danga sawn mai turin nurse te leh doctor te bulah min lo complain ani tih te ka hria a, ka zak takzet a ni. Sentei pawh chu a dam thei ta reng reng lo mai a, nitin mai chuan a khuh nasa telh telh a. Mi hmai zah a na duh khawp mai, Sentei pawh ka khawngaih takzet. Kan chhungkua chuan kan damlo ani ta ber mai a, kei a dam awmchhun lah hi ka mu tlem em em a, ka taksa pawh a chau ve tawh hle. Ka nu lah thi-in a luak reng mai si a, ka pa pawh ka khawngaih hle mai.

Tlai khat chu Sentei drip an khai zawh hnu chuan damdawiin tual zawlah chuan ka vah harh pui a, hetah hian Sentei hian ka thil hriat duhloh tak mai chu min hrilh ta a ni. Lungngaih hmel em em hian Sentei chuan min en a, "Ihmaw U, zanlaia naupang min tibuai thin tu kha ka hria ani. A tir chuan ka hlau em a, in awih loh ka rin vang ni miah lovin ka hlauh em avang zawkin ka sawi lo a, ka hrilh tawh ang che. U...Kha hmeichhe naupang min tibuai thin tu kha ka pa nupui hlui Nu Mawii fanu Rosy a ni. Khumah zantin rawn lawn in min rek vak vak a, ENGATINGE APA MIN LAKSAK tiin min vau thin a ni." a ti ta mai a, ka mur sung sung thei hial a ni. Dawt a nih chu ka ring bik silo, mahse ka awih phal mawlh lo a ni. Kan chhungkua chu kan buai a ni ber mai a, kan chunga thil thleng hi a rapthlak tak zet a ni. Chumai ala nilo, tuk khat chu ka Pa MAwitea'n min rawn phone a, "Chhana, hei nizanah i pa nikhawhrelovin a tlu a, damdawiinah kan kalpui hnuah a ziaawm leh mai a. Mahse tukin zing atang khan vawi 2 lai a kaih tawh a, mahse lungngai suh, ka awm ania." a rawn la ti ta deuh deuh a, ka mangang takzet tawh a ni. Zankhat chu ka pa MAwitea tho chuan ka chauh em avang leh in lama ka nu leh pa an damloh ve ve avang chuan Sentei chu lo riahpui ve thung a tum thu a sawi a, tichuan kei erawh inlam ah ka nu leh pate damlo buaipui ve thung turin ka haw ta. Hemi zan pawh hian kan vanduaina a la kal tluang zel a, ka nu chu a luak tawp thei hauh lo mai. Ka pa erawh tui ti takin a muhil bawrh bawrh a, ka nu chu a luak ka thian char char thung. A luak lah chu thisen hlir ani a, a dum hian a dum kuk hial a ni. Tichuan dar 11 vel a rik chuan ka nu pawh chu a zia ta deuh a, a muhil ve ta a. Keipawh chu ka chauh deuh avang chuan reiloteah ka muhil ve ta nghal mai a. Zanlaiah chuan engemaw hian min ti harh zawk mai a, ka thu chhuak hlawl thei hial a ni. Ka nu mutna lam ka va en a, alo awm ta hauh lo mai. Rang takin ka zuang tho nghal a, ka nu chu ka zawng nghal chiam a. Kan in kawngka chu a lo in hawng huau mai a, ka pa pawh ngaihtuah tawh lo chuan ka tlan chhuak nghal a. Ka nu chu zawngin ka au chiam chiam a, ka thawm avang chuan thenawm khawveng te pawh anlo chhuak khawm a. Thil awmzia min zawh chuan ka nu a bo thu te chu ka hrilh a, tichuan thenkhatin kan inah ka pa an lo awm pui a, kei leh ka thianpa Rama leh patling pathum vel chuan ka nu chu kan zawng ta a. Rei ngial kan zawn hnuah pawh kan la hmu tlat lo, kan in bul vel chu vawi engemaw zah kan hel chhuak tawh. Ka mangang takzet a, ka tap pur tawh mai a, kan auh lahin a eih thei silo. Chutia reife kan zawn hnu chuan kan kawmthlanga kan huan atang chuan ka nu au thawm kan hre ta a, mangang leh thlabar tak chuan a au vak vak mai a. Rang takin kan zu chhuk nghal a, ka nu chu kan huan mawnga theihai kung hnuaiah chuan a lo bungbu kût mai a. A sam a thur vek a, ke lawngin a awm a, alo khur zawih zawih mai. Kan kal hnai a, alo tap hluam hluam a, engemaw a sawi mawlh mawlh bawk. Ka nu thusawi chu kan ngaithla chiang a, mak kan ti lutuk chu kan in en hu hlawm mai. Ka nu chuan tap chungin, "Mawii, min ngaidam rawh, min ngaidam hram rawh." alo ti khur dur dur mai a, a ngaihna ka hrelo hle. A bawkkhup a, kutsuih meuhvin, "Ka thiamloh a ni.." tiin a lo tap a, a hma zawn kan en a, tumah an awm der silo. Keiphei chuan ka hlau a, ka nu chu va buaipui nachang pawh ka hrelo, ka bul vel chu ka hawikual a, tumah an awm silo. Ka nu chu patling pathum te chuan an buaipui a, kan in thleng chu an kuah haw thei ta hram a ni. Ka nu pawh chu a muhil ve nghal mai bawk a, mahse hemi zan hian keimahin ka nu leh pa bulah khan ka riak ngam tawh lo, ka thianpa Rama leh apa, Pa Thlamuana te chuan min riahpui ta tawp mai a ni. Kan chhungkaw chunga thil thleng hi a rapthlak ka ti takzet a, engemaw anchhia kan dawng ni ber hian ka hria.

Pi Mawii te nufa thihdan kan sawi lan tak te kha thudik a ni ngei em tih hriat ala ni lova, anmahni sutu Truck Driver sawi dan chauh a ni. Truck Driver hian Pi Mawii te nufa hi ama sut a nih avangin zangna dawmna tur sum pawh tamtham tak chu a pe ve a, mahse a dawngtu tur tumah an awm tawh siloh avang chuan Aizawl lama an chhungte bawk chuan pawisa chu an dawng leh ta a. Truck driver pawh hi an ngaidam a, an biral tuk chiah khan case pawh tih tawp nghal a ni. Aldrina leh Pi Siami te hi an la inhmu lo a, anla inbe pawp chuanglo bawk. Han inhriat dan tur avang dawn em bawk a, Siami tih hmingpu leh Aldrin-a tih hmingpu lah Mizoram chhungah hian tam tak an awm dawn bawk si. Aldrina pawh theih tawp chu han chhuah ve mahse, Pi Siami chu nula nge a nih a, pitar nge a nih a naupang zawk? Engmah lah chu a hre silo, a hriat chhun chu a hming chauh a ni si. Pi Siami tan pawh Aldrina han zawnhmuh chu thil awlsam lo tak a ni ngei ang, Aldrina tih hmingpu chu an vengah ngei pawh an awm nual a, mahse a thiannu Mawii'n a sawi ber erawh ala hmu zo lo thung. Pi Siami hian police hnenah han thlen leh dawn ta se, an lo awihlo nasa dawn mai bawk si a, chutiang chiah chuan Aldrina pawn Police han pum ngawt dawn mahse, an awih a ring chiah bik silo. Pi Mawii te chhung berin chu Truck Driver chu ngaidamin case chu an titawp ta mai bawk si, an thihdan chu chhuichhuah a ni dawn talo a ang khawp mai. Mahse Pi Mawii te nufa thla hi mi chi hrang hrang chuan an hmuh thin thu an sawi zel mai bawk si a, chung an sawi thawm te chu Pi Siami leh Aldrina te pawhin an lo hre ve thin a, an mangangin Pi Mawii thlarau chuan a rawn tlawh leh te pawh an hlau dun khawp ang le. Pi Mawii te nufa ruang hi Sihphir lamah vui a nilova, Aizawl lama an chhungte zawkin ruang chu an hlawm a ni. Khawhar in riak te pawh an nei ve a, mahse chung tlangval khawhar in riak te chu a tukah an inpu chhuak vek a ni awm e. Pi Mawii te nufa ruang hlawm tute hi Armed Veng lam mi te daih an ni a, an chhungkaw pa ber hi Pu Ruatkima a ni a, Pi Mawii cousin a ni. Anmahni hrechiang tuten an sawi dan chuan Pu Ruatkima hian Pi Mawii te chhungkaw dinhmun kha ahre ve vek a, mahse a ngaihsak ngai lemlo niin an sawi. Mahse heng zawng zawng te pawh hi rinthu vek a ni a, thudik tak erawh tuman an hrelo. Thah ngei an ni tih hria awmchhun chu a thattu te leh Pi Siami leh Aldrina te chauh an ni. Aldrina leh Pi Siami te pawh hian thah an nih thu chiah an hria a, engtia thah nge an nih a, tute thah nge tih erawh an hre bik hauh lo thung. Pu Ruatkima nupui hi Pi Duhzuali a ni a, Pi Duhzuali hian Pi Mawii te nufa hi a mumangah a hmu fo thin a ni awm a, mahse an thla tak chu a hmu ve ngailo thung a ni. Ama sawi dan chuan Pi Mawii te nufa hian zan tin mai hian a mumangah fimkhur tur leh tumah ring lo turin an lo hrilh thin ani awm a, mahse a awmzia a hriat loh thu leh mumang satliah mai mai a nih a rin thu a thiante bulah alo sawi fo thin a ni. Vawikhat chu Pi Duhzuali te in lamah chuan Pi Siami chu a zu leng thla a, a chhan pawh a zuk tlawh ve duh vang hrim hrim nilovin, thil hriat chian a duh zawk vang a ni. Pi Duhzuali chuan a mumang chu a lo hrilh a, Pi Siami pawhin a mumang a sawi chu a lo la thu tak hle a, awmzia a neih a ring tlat a ni.

(KHAWHAR IN RIAK TE CHUNGAH ENGE THLENG?)

Kum 19 lai chu ka ni ve tawh a, kan thian ho hian a ruka zu han in ve zeuh zeuh te pawh kan ching khawp mai. Mahse hahthlak ber chu zana han len khawm a, zu han in ruih hnap hnua ina haw leh a ngai hi a ni. Kan thianho hi kan inrual tlang deuh vek a, a upa ber hi Remliana niin kum 21 a ni a, a naupang ber hi Tetea niin kum 18 a ni. Tleirawl sual rawn tem chho ve mek kan ni a, kan chhungte pawh hi an strict hlawm angreng hle. Zan dar 10 a rik tawh chuan a indawt hian min rawn call diat diat zel a, pa tena, "Lo haw rawh." an rawn tih thum dut dut tawh hi chuan haw loh chi hi a ni tawh lo. Zu rim nam rum rumin ka haw thin a, ka chhungte pawhin min man ngun thei hle. An mengrei thin si a, rui lo awm ang deuha va luh hi a ngai thin a, kal ngil tum viau mah ila ka lo inchhui leh khut zel a. Ngil taka han kal chang te pawh nei mah ila ka rim avang hian min man leh nge nge zel. Vawikhat chu kan venga mi Pa Ruatkima te chuan Sihphir lama an chhungte, accident vanga thi, ruang hlawm tu tur an neih loh avanga an mahni inlama vui tura an lak thlak tak thu ka lo hria a, mitthi te chu nufa an ni tih pawh ka hria. Khawhar in riak an mamawh lemloh thu chu sawi mahse kan thian zaho tan huan hun remchang lutuk a ni tlat. Khawhar ina kan riak a nih chuan duh tawkin rui mah ila, zu rim awh lo nam rum rum mah ila chhungte hlauh tur an awm tawh dawn lova, rim thup tum tang tang a awm reng a ngai tawh dawnlo. Kan thian ho chuan inla fel fahranin Pa Ruatkima te inah chuan kan leng lut a, Pa Ruatkima bulah chuan khawhar in riak an duh anih chuan kan thian ho kan awm reng thu te chu kan han hrilh vel a. Pu Ruatkima pawh chuan, "A ngai pawh kan ti lemlo asin, chubakah Sihphir daih a awm an ni a, kan mamawh lemlo. Mahse in inpekna aropui a, in duh anih phaw te chuan a lawmawm ngawt ang. Lo riak ula, in duh chen chen lo riak rawh u." a ti a, kan lawm ngei mai. Kan chhungte bulah theuh chuan Pa Ruatkima'n khawhar in riak a mamawh thu leh kan thian zaho min sawm angin kan sawi leh ta daih thung a, tichuan kan in pu lut ta a. Kan thian ho hi panga kan ni a, kei hi Laltanpuia ka ni a, ka thiante hi Remliana, Tetea, Rozuala leh Mama te kan ni. Nu leh pa zan a ni phawt a, chutia khawhar in programme an hman lai chuan keini chu RV lamah zu la turin kan liam thla nghal a. Tichuan zu chu kan la a, kan duhtawka rui hnep hnawpa kan in hnu chuan riak tur chuan Pa Ruatkima te in lam chu kan phei ta a.

Kan lo kamnam deuh bawk nen, dar 10 leh a chanve vel thleng chu Pa Ruatkima te nupa chu kan han titi pui a, eng eng nge kan sawi pawh kha ka hre mumal leh tawh lo. Ka hriat awmchhun chu Pi Mawii fanu hming Rosy kha a ni a, a pasalin midang a neihsan tih kha a ni leh a, abak erawh engmah ka hre mumal lo. Tichuan dar 11 rik dawnah chuan ka muhil ve ta a, ka rui deuh bawk nen, mut a tui duh khawp mai. Zanlaiah chuan tu emaw zai ri ret ret chuan min ti harh zawk mai a, hmeichhe zai ri a ni. Ka mit ka meng a, thla eng tak mai ina tukverh a rawn chhun en det det tihloh chu a thim vek ani ber mai. Chu zai ri chu ka han ngaithla chiang a, "Nu Duhzuali chu a va hun lo ve mawle, tun ang huna han zai rut rut mai chu." ka ti nuah nuah a. Mahse zai ri chu a ring telh telh a, Pa Ruatkima te room atanga rawn ri a ni tlat lo, pawn lampang zawk a ni. Tun ang hun tawh a pawna hmeichhia lehnghal lo zai rut rut mai chu mak ka ti em em a, ka phone sana ka en a, zinglam dar 1 a lo pel tawh. Zai ri chu ngawi reng chuan ka ngaithla zel a, a thluk raih raih a, a khawk deuh hial ten ka hria. A engmaw nalh reuh phian lehnghal a, mahse mak tak maiin thawk leh khatah hlauhna hlirin ka khat thut mai anih chu. Zai ri chu a rei telh telh a, kha zai ri, mawi ka lo ti em em mai khan min ti hlau zual tulh tulh mai. A chhan ka hre lo, mahse ka hlau em em ringawt a, zai ri chu a rawn danglam ta viau pawh anilo, a zai ngai rengin a zai char char. Mahse a zai rei tawlh tawlh a, ka hlau tulh tulh mai kha keipawh ka inhre thiamlo takzet. Tin mak ka tih deuh pakhat chu kha hmeichhe zai ri kha, enghla nge a nih ka hre tlat lo. A let zawnga t(r)awng hi a ang ber, sawi fiah thiam chi pawh a nilo, a zai fawn hlerh hlerh hi a nimai. Chutah a zai tawp hmak mai a, pen ri in a chhunzawm nghal. Kan riahna in lam pan chuan pen ri chu a rawn hnai zel a, hlauhna namen lovin min man a, ka khur zawih zawih mai. Ka bul chiah ah hian Tetea a mu a, Tetea lamah chuan ka tawlh phei a, ka va kuah deuh titih lehnghalin ka hria. Pen ri chu a rawn hnai zel a, kawngkhar zawnah chuan a tawp ta chat mai. Second 5 vel a reh vang vang a, kan riahna in chu a rawn nghing dawt mai a, ka thiante pawh an rawn harh ta vek a. Remliana chu phawk hru hian a rawn meng a, "Enge..enge a?" a rawn ti nghal chiam chiam a, mahse kei chuan bengchheng lo turin kalo hrilh vat a. Chutah kan riahna in chu a muang chang chuan a kal hual ta a, kan mutna zawn bang te chu a rawn hrut ri phei thuak thuak a. Tichuan thawm chu kan ngaithla zel a, kan hmazawn tak, tukverh zawn a rawn thleng ta. Tukverh zawnah chuan pitar pakhat, sam thur vek leh hmaidang vek, mitmu var pup hi alo ding run mai a. Kan hlau lutuk chu kil khatah kan tawm khawm vek a, min rawn la nui vur vur zui.

Remliana chuan a phone light phawrhin tukverh lam chu ava en a, mahse maw...karei, kha pitar kha chu a la ding reng, mahse light-in a hmai ava en khan a enna chin zawng chu a kawrawng vek. Tetea hlau lutuk chu au chhuah a tum a, mahse a hmui ka va hup hman hram. Chutah lee...tukverh chu a rawn nam hawng thuai a, khur hlawk hlawk hian a rawn bawkvak lut ta anih chu, a rawn vah luh pah te chuan ruh tliak ri bawp bawp ri ang deuh deuh chu a ri tuar tuar bawk. Chumai ala nilo, chu pitar hnungah chuan hmeichhe naupang pakhat a lo bet u bawk a, apua a ni ber ang chu. Chu hmeichhe naupang pawh chu rapawm tak ani, rum em em hian min melh run mai a, khur hlawk hlawk hian an rawn zai lut dun lehnghal. Kan hlau lutuk chu kan sa-ral ta vak vak mai a, kan inkuah chawih chawih hlawm ta mai. Chuveleh light a rawn in on a, pa Ruatkima alo ni a. Tukverh lam kan va hawi leh chuan a hma ang bawkin alo la inkalh fel thlap mai bawk si, mak kan ti lutuk chu mittui tla phungin kan in en hrek hrek hlawm a. Pa Ruatkima chuan, "Enge a? Tinge in au vak vak a?" hlauthawn hmel tak chuan a ti a. Kan thian zinga naupang ber Tetea chuan khur zawih zawih chungin, "Pa...pa Ruat, thla..thla..thlahrang." tih pah chuan tukverh lam chu a kawk a. Mahse Remliana chuan, "Engmah anilo Pa Ruat, a mumangah thil a hmu aniang. A rawn au chhuak vak a, keini pawh min ti hlau alawm." tih pah chuan midang ho pawh chu min rawn mitmei vat a. Tetea lah chuan, "Anilo...tinge dawt in sawi? In hmuh ve reng kha.." tap chuan chuan a ti a. Mahse Mama chuan, "Engmah kan hmulo, i mumang thalo mai mai anih kha.." a lo ti ve vat a.Pa Ruata chuan ngaihthatloh hmel tak hian min en a, "Min ti hlau hman alawm, anih chuan mu leh tawh rawh u...hei dar 2 a ri tawh dawn a, zingah thawh in hai vel ange." tiin a room ah min luhsan leh ta daih a. Chuveleh Tetea chuan thinrim hmel tak hian, "Tinge dawt in sawi a? Kha pitar kha in hmuh ve reng kha?" a ti a. Remliana chuan, "I mawl ami? Kha pitar thla kan hmuh kha tunge a nih i hria em?" a ti a. Keichuan mak ti tak chuan, "Tunge? I hria em ni?" ka lo ti hu a. Remliana chuan, "Aw..hria e..khi nu khi." tih pah chuan banga thlalak an tar, nimin zing lawka Truck in a sut avanga boral ta Pi Mawii te nufa thlalak chu min hmuh ta mai a. Ka lo en miahlo a, ka lo ngaihtuah miah lo bawk. Mahse a thlalak ka han hmuh ve takah chuan nichin lawka pitar kan hmuh kha Pi Mawii ngei hi a ni a, a hnunga naupang a puak kha a fanu ngei mai a ni tih ka hrethiam ta. Hemi zan hian ahlau ber Tetea tih loh chu tumah kan mu leh tawh lo hrim hrim. Khawvar thleng chuan kan meng tlang a, dar 5 vel a rik chuan Tetea kan kai tho a, Pa Ruatkima te thawh hma chuan kan in pu chhuak ta vek mai a ni. Hemi zan atang hian tun thleng hian zanah mahnia pawn chhuah ka ngamloh phah a, khawhar ina riah phei chu ka tum leh tawh ngailo hrim hrim a ni.

(PI MAWII PASAL HLUI PU LIANKHUMA A THI.)

Pu Liankhuma pawhin ziaawm lam a pan thei meuh lova, nikhatah vawi 5 lai te chu a kaih thin ta a, amah pawh a chau tawh hle. Chutih lai karin a nupui Pi Maengi lah zanlaia haluvin a rak vak vak zel a, pawna chhuah phet te a tum thin a, rilru buai ang mai a ni tawh bawk. Chumai ala nilo, an fanu damlo, damdawiina awm mek Sentei lah that lam pan ahnekin a zual tulh tulh a, a khuh nasa lutuk chu a chang phei chuan a thidang tawp zel a ni awm e. Pi Mawii te nufa thil tih vek em ni ang? Nge ni a an vanduai ve hrim hrim zawk? A dam awmchhun, a hrisel pangngai ber an fapa Chhana lah a khua a rawn sik ve tan leh ta nghal a, in enkawl tur an awm bik talo, an vai mai chuan an damlo ta vek chu a ni ber mai. Zan khat chu Pu Liankhuma chu a khawsik a sang hluah mai a, a thidang hial nghe nghe a ni. Rang takin afapa Chhana thianpa Rama leh a pa, Pu Thlamuana te chuan damdawiin lam an pan pui nghal vat a, mahse hemi tum hi chuan Pi Maengi thawhna damdawiin nilovin Durtlang Presbyterian Hospital lam zawk an panpui ta thung a ni. Mahse hemi zan hian Pi Mawii te nufa thla chu rawn inlar lo mahse, thil mak tak leh rapawm zet mai chu a thleng leh ta tho a ni. Pu Liankhuma chu casualty ah zawn luh nghal a ni a, nachhawkna in an chiu a, tichuan admit nghal turin an lo ti bawk a. Riahpui tu tur awmchhun a fapa Chhana lah a lo damsam bik tawhlo nen, in lamah a nu enkawl ngai bawk nen, riahpui thei chi zia zang a ni tawh bik silo. A thianpa Mawitea lah nise, Chhana nau Sentei riahpui a ngai bawk si. Riahpui tu awmlovin amah in han riahtir ngawt dawn ila, khawsik sang em em mai leh kaih reng ani bawk si a, mahnia riah tir chi a ni bawk silo. Tih ngaihna dang thlawt a awm tak silovah chuan tlawmngaiin Chhana thianpa Rama chuan Pu Liankhuma chu peihlo tak chung chuan a riahpui angai dawn ta. Ward dang awl a awm tawh silova, a awl awmchhun Eye-Ward ah chuan Pu Liankhuma chu an dah ta ringawt mai a ni. Mak tak maiin an admit zan hian a ziaawm angreng a, thut te pawh a thu chhuak thei hial a, biak pawhin tha takin a chhang thei a ni. Mahse a riah puitu Rama ngaih ti thalo deuh tu chu an khum awmna zawn chiah ami, mit that loh avanga mitmeng pawl vek leh meng kalh hru mai chuan rum zet hian Pu Liankhuma chu mit khap leklo hian a en reng thin vang a ni. Chu damlo pa chuan Pu Liankhuma chu a hua amaw tih tur khawp hian a melh run reng mai a, Pu Liankhuma lah chuan hria awm ang pawhin a lang lo. Mahse Rama ngaih erawh a tha hauh lo thung, zan dar 9 vel a rik chuan Pu Liankhuma pawh chu a muhil ve ta a, mahse damlo dang te erawh la mengin anla inkawm khawm nasa hle thung. Pu Liankhuma mutna zawna damlo, Pu Liankhuma lo en reng tu chuan ahma aia nasa leh rum hian Pu Liankhuma muhil lai chu a han melh leh run mai a, Rama ngaihdan a ni talo. Rama chu a tho a, chupa lam chu a va pan a, chupa chu putar kum 70 vel laia upa a ni tawh hial ang. Rama chu va kalhnaiin, "Ka pu, engati nge khatia ka damlo awmpui saw i melh reng a, i hriat hnu a ni em ni?" a va ti thawr mai a. Chu putar chuan chhang miahlo chuan Rama chu a lo melh hru mai a, a mitmeng pawl vek leh a mit kalh ru mai te chu Rama chuan a rap lek lek zawk hial a.

A chhan tak mai loh avang chuan Rama chuan, "Min chhang ta che..ka biak che chuu.." a han ti leh a, mahse nurse duty pakhat lo kalin Rama bulah chuan, "Thianpa, damlo kha i ti buai em ni?" a rawn ti a, Rama chuan, "Ti buai lova, mahse ka Pa Liankhuma saw a hua amaw tih mai turin nichin atang khan rum zet hian a melh reng a, a chhan ka zawt a nih hi." a ti a. He putar damlo hian tumah awmpuitu a nei lova, riahpuitu pawh a nei ngai heklo. Nurse chuan, "A tawngthei hleinem, chubakah mit thalo a ni a, a mit thatloh vang hian a melhrum amaw i ti mai mai a nih kha." a lo ti a. Rama pawh chu inthiamlo tak chuan nurse bula leh chu putar bulah chuan ngaihdam a dil a, mahse a ngaih erawh ala tha zan lo. Chu putar damlo lah chuan rum em em hian Rama leh Liankhuma te chu a melh reng mai bawk si, Rama pawhin a mitthat loh vang a meng rum anga lang a nih a ring chiah tawh lo. Rama chuan thildang a han tihsan a, a phone te chu a han khawih a, achang leh megazine te a chhiar bawk a. MAhse chu putar a va en leh apiang chuan mitkhap miahlo chuan chu putar chuan a lo en reng tho bawk si, a thin a rim lek lek zawk hial a ni. Dar 9:40 a ri a, light off pawh a hun tep tawh. Damlo leh a awmpuitu han inkawm khawm te pawh chuan mut a hun dawn hnai a ni tih hria in an khum lam an pan sap sap hlawm a. Mahse Liankhuma erawh a rawn harh ve ta thung tlat mai, a rawn thuchhuak hlawl mai a. Rama pawh chuan mak ti tak chuan a en hu mai a, "Pa Khum, i tha maw?" a ti a, mahse a chhang lo. Damlo dangte leh riahpuitu te chuan Pu Liankhuma chetdan maksak tak chu ngawi reng hian an lo thlir thup mai a. Khum atang chuan a chhuk a, ngil at hian a ding a, phawk hru hian a meng bawk a. Nurse duty te pawh chuan mak ti tak chuan Pu Liankhuma chu an lo en a, Pu Liankhuma lah chuan nurse duty te awmna lam chu mitkhap miahlo chuan a en char char bawk a. Chutah Nurse te awmna lam chu kawkin, "MAwii..Mawii.." tiin a au ta vak vak mai a. Rama chuan a hlau kher mai, achhan pawh khatiang chiah khan a nupui hlui thi ta Pi Mawiin hming lamin thlanmual thim laiah a kal tawh tih an thenawmpa Pu Mawitea'n a lo hrilh tawh vang a ni. Nurse te duty-na lam chu a va pan phei ta chhet chhet mai a, nurse te chuan mak ti tak hian an lo en reng ringawt a. Nurse duty pakhat chuan, "Ka pu, hetah rawn luh ve kan phalo hleinem." tiin alo hau a, mahse hria awm ang pawhin a lang lo. Chutah le, Pu Liankhuma chuan dawhkana bakcheh chu a la lawk a, a hmawr zum chuan ama mitah chuan a chhun ta siah siah mai le. Thisena per chhawk chhawk mai a, hmuntinah chuan a thisen chu a kawi nei nuai ta mai. Nurse te leh damlo dangte chu hlauvin an t(r)e tengtung mai a, a tlan darh ta nuai nuai mai. Athen chu nurse te duty-na lamah an lo tlan phei vat a, a then erawh pawnah an tlanchhuak thung. Vawi 10 dawn lai mai chu Pu Liankhuma chuan ama mit ngei chu a vit siah siah a, amah pawh chu a thal nghal tawp mai a, chhuatah chuan thisen a luang zawih zawih mai. Rama hlau lutuk chuan va panhnaih nachang pawh a hrelo, a damlo awmpui, Pu Liankhuma ruang chu a en reng ringawt mai a, Pu Liankhuma pawh chu hmai chik hrupin thisen nena inchiahpiah nuai mai chuan a thi chiang hle mai. Chutia an buai luai luai lai chuan Rama chuan kha putar, anmahni melh reng tu lam chu a va hawi a, chu putar chu amit alo var pup mai a, rapthlak tak mai chuan Rama chu a lo nuih vur vur ta mai. Hemi zan hian kha putar damlo kha ahnuah heart attack vangin a thi ve nghal nia sawi a ni a, Pu Liankhuma nen an Hopital Chaplain chuan a vui rual nghe nghe bawk a ni.

(ALDRINA LEH PI SIAMI AN INTAWNG TA)

Aldrina chuan Pi Mawii te veng awmna chu Sihphir a ni tih a hre tawh a, a zawnchhuah tur Pi Siami pawh Sihphir mi ngei a nih a ring a. Tichuan Sihphir lam pan chuan a kal ve ta a, mahse a zam hle mai. Pi Mawii te in lah chu tumah luah tu an awm tawh silova, Pi Siami te in lah a hre der silo, Pi Siami hi Sihphir venga mi ngei a ni em tih pawh a hre chuanglo. Sihphir vengah chuan a han kal mawl ve tawp a ni ber a, enge tih hmasak tur ber pawh a hrelo. Tichuan mi hrang hrang zawt kualin, "Pi Siami te hi khawilai ah nge an awm?" tiin a zawt tawp tawp zel a, Sihphir Vengah hian Siami tih hmingpu chu naupang atanga pitar thlengin tam tak an lo awm bawk si. Siami tih hmingpu a biak tawh ho zawng zawng lah a zawn ber Pi Siami an la nilo vek lehnghal a, Pi Siami tih hmingpu a hmuh tawh ho te lah chuan Aldrina thusawi te chu an nuihzat lek lek a, athen lahin an lo hlau bawk. Nilenga a zawn hnuah pawh a la hmu chuanglo, khua a thim dawn ta. Unau hmel hai hun velah chuan Aldrina beidawng tawh lutuk chu a haw mai a tum ta a, Aldrina hi Sihphir venga a vawikhat kalna a ni lehnghal. A haw hma chuan beidawn nan hrim hrim tiin in pakhatah a kal leh a, kawngka chu a han kik karh karh a. Second 10 hnu velah chuan nu pakhat, kum 40 mi vel niawm tak, hmelchhe lemlo tak hian kawngka chu a lo hawn a. Chu nu chuan, "Enge ni ta, tlangval?" alo ti a. Aldrina chuan, "Ka pi thil ka lo zawt lawk che.." a ti a. Chunu chuan, "Han sawi ta che." damdiai hian a lo ti a. Aldrina chuan, "Pi Siami te in hi khawilai nge le?" a han ti leh a, chunu chuan, "Siami chu ka ni a, enge ni ta?" alo ti a. Aldrina chuan, "Aldrin-a ka ni a, Pi Siami ka hmu duh a, ihhh...ka pi, in venga hmanni lawka boral ta Pi Mawii kha i hria em?" a han ti chiah chu chunu chu a meng phawk hle mai. Rang zet hian, "Aldrina maw i nih a? Aldrin Lalnunkima i ni em?" tiin a han zawt a. Aldrina chuan mak ti tak chu chunu chu a en a, "Aw...mahse engtin nge min hriat a?" a ti hu mai a. Chunu chu a tap ta ringawt mai, "Ka va han lawm tak em!" tih pah chuan Aldrina chu a kuah nghal ringawt mai a, Aldrina pawh chuan a hrethiamlo hle mai. Chunu chu tudang nilovin Aldrina zawn ngei, Pi Mawii thiannu Pi Siami ngei kha a ni. Pi Siami chuan in chhungah a kai lut dawr dawr a, a pasal bulah chuan, "Pa-a, hei enteh..kan tawngtaina Pathianin a chhang ta a nih hi. Hei ngei hi a ni Mawiin zawng tura min tih Aldrina ngei mai chu, amah zawkin minlo zawng chhuak ta a nih hi." tih pah chuan a tap zawih zawih a. Pi Siami pasal pawh chuan Aldrina chibai pah chuan, "Tlangval, chaw te i ei tawh em? I ril a tam em?" tiin a lo be ve nghal bawrh bawrh a. Aldrina pawh a lawm ngang mai, a hnuk a ulh hial a, "Aih la eilo...mahse engmah a ngailo." a ti a. Pi Siami chuan, "Hei chaw kanlo ei dawn chiah a, lo ei ve nghal law law teh. Chaw te ei phawt la, chaw eikham hnuah kan inkawm leh zawk dawnnia." a ti a. Aldrina chuan han hnial ve viau mahse Pi Siami te nupa chuan an ngen luih tlat avang chuan chaw chu a ei ve ta a, chaw ei pah te chuan an titi bawrh bawrh a. Chaw te an eikham hnu chuan Pi Siami te nupa leh Aldrina te chu an thukhawm a, Pi Siami chuan, "Aldrin, Mawii chu i hmu ve em ni a?" tiin a han zawt a. Aldrina chuan, "Aw...hman zanah damdawiinah ka nau kan admit a, nurse ten an buaipui laiin pawn lamah mei zu turin ka chhuak a. Chutah chuan ka hmu a ni, chuan nangmah hi zawng chhuak tur che in min ti a." a ti a. Pi Siami pawh chuan, "Aww anih chu mawle, alawmawm hle mai. Keipawh hian ka hmu ve a, kha damdawiinah tho khan a ni. I hming hi a sawi a, a tir chuan ka hlau lutuk a, mahse ka thiannu Mawii te nufa thih dan ah khan thil diklo a awm tlat in ka hre reng a. A hrim hrimin engtin nge min rawn zawn hmuh reng reng a? Sihphirah kan awm tih i hre lawk em ni?" a ti a. Aldrina chuan, "Hrelove, Pi Mawii te kha Sihphir Veng an ni tih ka hria a, ka rawn kal ve tawp mai a ni." a ti a.

Pi Siami pasal chuan, "Aldrin, engtin nge hma kan han lak ang? Enge kan tih hmasak ber ang?" tiin a lo zawt a. Aldrina chuan, "Ka hre biklo, Police te hnenah hrilh dawn lah ila min awih awm der mai silova." a ti nuah nuah a. Pi Siami chuan, "Keipawhin engtia han tih chi nge ka hre biklo, Mawii pasal hlui Liankhuma lah kha nizanah Durtlang Hospital ah a thi lehnghal a, mahnia inthat an ti lehnghal." a ti a. Aldrina chuan phawk hru hian, "A pasal hlui a? Pi Mawii pasal hlui i ti em ni?" a lo ti hu a. Pi Siami chuan, "Aw ni e...Mawii leh Liankhuma te hi kum 6 kal ta khan an innei a, an inneihna chhan pawh Liankhuma hian Mawii a rai vang a ni." a ti a. Aldrina chuan, "Anih leh Pi Mawii fanu kha Pu Liankhuma fa a niang maw?" tiin a lo zawt leh a. Pi Siami chuan, "Aw ni e, a hming chu Rosy a nia. Rosy hi kum 2 vel a nih lai khan Liankhuma hian an nufa in a hnawtchhuak a, an inthen ta a ni. Tichuan a hnu lawkah Liankhuma hian kan venga mi tho nuthlawi pakhat, Maengi a nei leh a. Mak deuh mai chu Maengi leh Liankhuma te hi ahma atang daih tawhin an in ngaizawng tawh a, kha tia inngaizawng reng chung si a, Liankhuma'n Mawii a nei ta daih kha a mak kan ti lutuk a." a ti a. Pi Siami pasal chu lo inrawlh ve in, "Mawii khan Liankhuma nena an chetsual dan kha a sawi duh miahlova, Liankhuma pawhin engmah a sawi duhlo. Tin, Liankhuma leh Mawii an chetsual hun awm ang hi tuman kan hrelova, Mawii hi a rai tih kan hria a, naute pa chu Liankhuma a ni tih a sawi leh ringawt bawk a. Liankhuma lah chuan eng sawi set set lovin inneih a rawt nghal ringawt a, kum 2 vel aliam a, a then lehnghal mai si a." a lo ti ve bawk a. Aldrina chuan, "Anih leh nichin khan Pi Mawii pasal Pu Liankhuma kha nizanah a inthat i ti tiraw?" tiin a han zawt leh a. Pi Siami chuan, "Aw ni e, police te pawhin mak an ti a, han chhui ngaihna vak an hrelo a ni." a ti a. Aldrina chuan, "A awmzia chu Pu Liankhuma pawh hian Pi Mawii thla hi a hmu ve thin tihna ani, in vengah hian midang hmu an awm ve em, an sawi thawm in hre ngai em?" tiin a han zawt leh a. Pi Siami chuan, "Aw...an thla tak chu hmulo mahse Liankhuma thianpa Mawitea'n a sawi a, thlanmuala an zu in zanin Mawitea chuan Mawii te nufa zai ri a hria a ni awm a, chumi hnuah Liankhuma chuan thlanmual mawnglam a zu pan ringawt a, an zu hmuh leh chuan nikhaw hrelovin alo let der a ni awm e. Chuan hman zan lawkah pawh Liankhuma nupui Maengi chu zanrei ah an huan mawngah a tlan thla thut a, thenawm khawveng ten an zawng luai luai a ni awm a. An zu hmuh chuan theihai kung bulah lo thingthi in 'MAWII MIN NGAIDAM RAWH' tiin a lo phun bul bul e an tia, thudik a ni em chu ka hrelo." a ti a. Aldrina chuan a lu a bu ngat ngat a, "Pi Maengi chu kan biak a ngai a nih chu, chuan Pu Liankhuma inthah dan kimchang takin in hriat ang ang min hrilh thei angem?" tiin a han zawt leh a. Pi Siami chuan, "Ka hriat dan chuan Maengi fapa Chhana thianpa, Rama'n Liankhuma chu a riahpui dawn a ni awm a. Liankhuma hi nizan khan a kaih nasa lutuk a, Durtlang Damdawiinah an zawn chho ta ringawt a. Medical ward a indaih loh avangin Eye-ward ah dah a ni a. Dar 10 vel a rik dawn hnaih khan Liankhuma muhil chu a rawn tho thut a, nurse duty te awmna lamah va kal pheiin bakcheh a la a, a mitah a inchhun vak vak an ti a." a ti a. Aldrina chuan, "Umm..nileh tinge Pu Liankhuma chu Pi Maengi fapa Chhana'n riahpui lova, a thianpa Rama zawkin a riahpui daih a?" tiin a zawt leh a. Pi Siami chuan, "An chhungkua in an damlo vek alawm, Maengi lah Mawii te nufa accident zan atang khan thi-in a luak char char a, chumi zan vek chuan a fanu Sentei lah a TB natna rawn zual thutin damdawiinah an tlanchhoh pui nghal bawk a. Chhana hian a nu a buaipui a ngai bawk sia, a nau Sentei pawh Liankhuma thianpa Mawitea'n a riah pui tawp a, an indaihlo nasa lutuk." a ti a. Aldrina chuan, "Pi Siam, Chhana te, Rama te, Pi Maengi te leh a fanu Sentei te chu kan biak leh angai dawn a ni." a ti a.

Pi Siami pasal chuan, "Mahse chutia thu lo zawh ve vak chu a chi dawn em ni? Chubakah kan nupa hian Mawii thian tha tak te kan ni tih an hre vek a, engmah an sawi that duh ka ringlo a ni." a lo ti a. Aldrina chuan, "A ni tho mai. E...taka, Pi MAwii te nufa su tu truck driver kha khawia mi nge in hria em?" tiin a zawt a. Pi Siami chuan, "Aw hria e, Bawngkawn ami a ni a, mizo diktak pawh anilo lehnghal." tiin alo chhang a. Aldrina chuan, "Chupa chu kan biak hmasak ber angai dawn anih chu...ani chuan thil engemaw tak chu a hre dawn tih ka chiang." a ti a. Pi Siami chuan, "Mahse Police te tello chuan, keimahni a lo tih ve ngawt chu buaina kan tawk thei ania." a lo ti a. Mahse Aldrina chuan Pi Siami te nupa kut vawn pah chuan, "Police te chuan min pui dawn alawm...min pui ngei bawk ang." a ti a. Pi Siami chuan mak ti tak chuan Aldrina chu a en hu mai a, "Engtin maw? ENgvangin nge min puih anga?" tiin a zawt a. Aldrina chuan, "Nizan lawkah Pu Liankhuma kha damdawiinah amah leh amah a inthat a, Police te an inrawlh nghal bawk a. Tunah hian chu case chu kalpui mek zel a ni a, keini hian Police te bulah chuan engemaw kan hriat ve thu kan va sawi dawn alawm." a ti ta a. Pi Siami chuan, "Mahse minlo awih ngawt dawn em ni? Chubakah enge kan va sawi ang, Mawii te nufa thlarau kan hmuh thin thu hi kan va hrilh dawn em ni? Min awih sak teuhlo mai." a lo ti a. Aldrina chuan, "Pi Siam, heibak tih theih kan nei lo, Pi Mawii te nufa min ngenna kha kan tih hlawhtlin sak ngei angai a ni." a ti a. Tichuan ruahmanna chu an siam fel a, Aldrina pawh a haw veleh ta a. A tukah chuan Pi Siami leh Aldrina te chuan Pu Liankhuma Suicide case buaipui mek tu Inspector Rintea be tur chuan Police Station lam an pan ta a, Inspector Rintea bulah chuan an thu hriat ang ang te chu an han sawi a. Mahse Rintea chuan alo awihlo nasa mai a, "Pi Mawii te nufa thla in hmu amaw? Nge ni a inlarna in hmu zawk?" a lo ti hrep mai a. Aldrina chuan, "Ka pu, Pi Siami nen hian kan inhmelhriat ngai lova, mahse Pi Mawii khan kan pahnih hian min in hmelhriat tir a ni. Ka pu, Pu Liankhuma nupui Pi Maengi hian engemaw hriat anei ang, tin kha Truck Driver, Pi Mawii te nufa su tu khan engemaw tak chu a hrilh thei bawk ang che. Khawngaih min pui hram teh...i khawngaihna kan dil a ni." tiin a ngen lawm lawm a. Mahse Rintea chuan, "Enteh u, kha case kha chu a tawp tawh. Tin, kha truck driver leh Aizawl lama Pi Mawii chhungte pawh an inngaidam tawn tawh a, case hi re-open mai mai theih a ni hleinem." a ti khur khur a. Aldrina chuan, "Anih leh ka pu, FIR ziak ta ila, min pui thei tawh ang chu tiraw?" a han ti a. Thinrim tak chuan Inspector Rintea chuan, "Ka hun khawhral suh u, nangni mumang mai mai ngaithla turin hun ka nei lo, chhuak vat zawk teh u." alo ti hrep a, beidawng tak chuan an chhuak ta a. Pi Siami pawh a mangang tawh hle mai, a tap a tap ringawt mai a. A theih ang tawkin Aldrina chuan hnemin, "Lungngai suh Pi Siam, ani chauh khan Police a ni hleinem. Chubakah min pui tu tur an awm em em ang, titeh i haw phawt teh ang. Naktuk lamah kan inhmu leh dawnnia." a ti a. Pi Siami chuan lungngai tak chuan, "Ka thiannu hi thah ngei an ni tih kan hria a, mahse keini lah chuan engmah kan ti thei der silo. Ka inthiamlo ngawih ngawih ani, Mawii te nufa hian kan chungah phuba an rawn la duh mai ang tih ka hlauh a ni." tiin a tap zawih zawih a. Aldrina chuan, "Chutin ngai mah ta che, kan damchhung chuan kan bei zel ang. Tunah chuan haw phawt ila, naktukah kan inhmu leh dawnnia." a ti a, tichuan an haw ta a.

(INSPECTOR RINTEA CHUNGA THIL THLENG)

Rintea pawh chu a case chhui lai mek chuan a ti luhhai hle mai a, han chhui zui zel dan tur pawh a hre tawh lo ani ber mai. Zan dar 9 vel ah chuan Police Station atang chuan a haw a, in a thleng chiah chu a chauh em avang chuan chaw pawh eilovin a inthlak a, a mu nghal a. Rintea hi kum 45 vela upa a ni a, a nupui a thi tawh a ni. A nu leh pa leh a nau hmeichhia te nen an cheng ho a, chhungkaw chawmtu ber a ni. Chutia tui taka a muthilh bawrh barh lai chuan bathroom atanga thil engemaw tla ri dup chuan a ti harh zawk mai a, Rintea room hi an bathroom bul chiah a ni. Bathroom ah chuan midang an awm a nih ringin ngaihtha tak chuan a mu ve leh mai bawk a, thawm pawh chu a reh ve nghal mai a. Mahse a muthilh dawn tep ah chuan tu emaw zai ri ret ret hian a ti harh leh ta a, chu zai ri lah chu a fawn hian a fawn hlarh hlarh mai a. Rintea chuan ama hriattham lek hian, "Tunge maw zai le? Hunlo lutuk, dar engzat nge ni tawh reng reng le?" tih pah chuana sana chu a en a, zinglam dar 2 a lo ni der tawh a. Muthilh mai a han tum leh a, mahse chu zai ri ret ret chuan a timu thei tlat lo. A nu zai a ni ang han ti dawn se a nu aw a nihloh mai bakah khatiang em em khan a nu kha a zai nalh a ringlo ani. A nau zai a ni ang han ti dawn ila a nau hi a zai ngailo mai nilovin, Rintea hian a nau hi a zai ngai awm pawh a hrelo hial zawk ang. Chu zai ri chu nalh a tiin mawi ti hle mahse, hlauhna riau a nei tlat mai. Zai ri chu a ngaithla zel a, a tirah kha chuan mawi han ti viau mahse, a zai ring tulh tulh a, a rap ta em em mai a. Zai ri chu bathroom atang ngeia lo chhuak a ni tih chu a hria, va enfiah chu aduh a, mahse enge a chhan pawh a hre biklo, a ngam ta tlat lo mai. Zai ri chu a tawp mai loh avang chuan a inti huaisen lui a, "Engemaw kei police inspector hian hmeichhe zai ri mai mai ka hlauh angle.." tih nuah nuah pah chuan a tho a, bathroom lam chu ava pan ta a. Bathroom kawngkhar bulah chuan a ding a, "Tunge aw? Nu..nangmah em ni?" a han ti a, zai ri chu a tawp ta chat mai. Rintea chuan kawngkhar chu a han kik dat dat a, "AWm in awm em ka tih chu?" a han ti leh a, mahse chhanna a dawng lo. Bathroom kawngkhar chu a han en chiang a, pawnlamah a lo inkalh reng bawk si. A chhungah kha chuan awm an awm ngei a ni tih chu a chiang, achhan pawh chhunglam atang khan zai ri a hre tlat a ni. Kawngkhar chu zawimuang chuan a hawng a, achhung chu a lo thim vek mai. Light a on a, bathroom chhungah chuan tumah anlo awm lo. Mak a ti a, a hlau angreng hle bawk a, a bengchhe ri mai mai a ni ang han ti dawn ila kha zai ri kha a hre chiang em em bawk si a. Ngaihtha lo tak chuan bathroom kawngkhar chu a kalh tha a, a room lam pan chuan a let leh ta a. Muthilh a tum leh a, mahse a thei tawh thak lo. Kha hmeichhe zai ri mawlh mai kha a bengah a cham reng a, a hlau em em a, a muhil ngamlo a ni ber mai. Chutah lee...chu hmeichhe zai ri bawk chu a hre leh ta, tun t(r)um zet zawng, zai ri chu a khum hnuai atanga lo ri chhuak a ni ta tlat mai. A hlau lutuk chu che miahlo chuan zai ri chu a ngaithla reng a, a thlanfim a tla zawih zawih mai. Rintea khum zawn chiah ah hian darthlalang lian tak mai a awm a, a khum atang pawh hian chiang takin a inhmuh theih a ni. Tichuan zai ri chu a ring telh telh mai a, chutah a room a dim light chu a rawn eng hring ta phut mai a. A hma zawna darthlalang chu a va en a, chutah chiang em em mai hian a khum hnuai mawng atanga Pi Mawii ngei mai rawn vak chhuak chu a hmu ta. A hlau lutuk chu a thu chhuak hlawl a, bang nghengin rizai a kuah a, a khur nghal zawih zawih mai. Mahse mak tak maiin Pi MAwii kha darthlalang atang chauh in ahmuh theih a,a room chhung ah erawh a awm miahlo thung. Tichuan darthalalng chu a en reng a, dim light chauh a nih avang chuan Pi Mawii hmel chu a dang vek a, a hmuhchian theihloh. A sam chuan a hmai a khuh vek a, a kawr hak ah te chuan thisen a kai nuai bawk.

Rintea hlau lutuk chu tawng pawh a tawng thei lo, a rizai chu kuahbetin tap pur chung chuan Pi MAwii chu a en ngawih ngawih mai a ni. Pi Mawii chuan Rintea chu chiang kekkawk hian a han melh a, a mitmeng lah chu a var pup mai lehghal. Rintea hlau lutuk chu chetsawn a tum a, mahse a thei tlat lo. A taksa chu a khawng vek mai a, a maimitchhing thei miah lo bawk. Tichuan Pi Mawii chu darthlalang atang chuan alo chhuak a, a khum pan chuan a lo hnai zel a, khum mawng atang chuan Pi Mawii chu a rawn lawn kai ta a, Rintea hma zawnah chuan a rawn bawkvak phei ta mai a. Hnai takah chuan Rintea chu a melh a, chutah Pi Mawii hmel chu zawimuangin a rawn pangngai tan a, chu a hmel rapawm em em mai te chu rawn danglamin Pi Mawiin hmel pangngai a ni ta. Lungchhe em em hian a tap a, Rintea hmaah chuan a thingthi a. Kutsuih meuhvin Rintea bulah chuan, "Ka pu, khawngaih takin min pui hram rawh. Kha mite pahnih thusawi kha dawt anilo, kei hi thah ka ni. Ka fanu, ka engkim, ka neihchhun ngawih ngawih pawh min thah sak a, khawngaih takin min pui hram teh ka pu. Kha hmeichhia leh kha tlangval te khan dawt an sawi lo, khawngaih takin thudik chu min puanchhuah sak hram rawh." a ti a, a mittui a tlan zawih zawih a. Rintea hlauhna pawh chu chhete chuan a zia ta deuh a, mahse a thlanfim erawh a luang zawih zawih a, a la khur char char tho a ni. Pi MAwii bawk chuan Rintea chu a mitah tak enin, "Ka pu, ka ti hlau che a nih chuan min ngaidam rawh...ka duh reng vanga khatia i hmaa lo lang ka nilo. Min puih angai a, i hmaa ka rawn inlan angai si a nih hi." a ti a, a kun a, chhuak ta chuan a tap hawm hawm mai a. Chutah Rintea chu a harh zawk mai a, a thaw hlawi hlawi mai. Khua a lo var der tawh a, phawk hru hian a meng a, "Ka mumang, ka mumang em ni?" tiin a mah leh amah chu a inbe mawlh mawlh a. Khum atang chuan a tho a, a khum hnuai te chu a han bih thul, mahse engmah a lo awm silo. A rilru a buai kher mai, "Kha mite pahnih khan thudik an sawi tihna em ni?" tiin a inzawt a, a vei kual sek mai. Pi MAwii thla chu ahmu ve ta ngei chu ania, Aldrina leh Pi Siami te khan dawt an sawilo tih pawh a chiang ta. Rintea chu a inchhir hle mai a, khami te pahnih kha han hmuh leh pawh duh viau mahse, an phone number emaw, an mahni biakpawh theihna tur engmah a nei silo. A rilru a hah em em a, a room ah chuan a vei kual sek ringawt mai a. Sana a en a, a duty alo hun der tawh mai. Rang tak chuan a insiam a, chaw pawh eilovin Station lam chu a pan ta nghal a. A rilru ah chuan Pi Mawii ringawt mai chu a awm a, a tha a la khur thei hial a, engemaw thawm hlekah pawh a phu zuk zuk reng mai. Kha tlangval Aldrina leh kha hmechhia Siami te kha hmuh leh a duh em em a, mahse engtin nge a hmuh leh tak ang? A hma ni lawk ah khan an thusawi te awih lovin alo hau hrep a, a lo hnar haw kha a ni si a. A case chhui lai mek, Pi Mawii pasal hlui Pu Liankhuma intihhlumna chunchang nen te chuan a thil tawn te chu a han hmehbel a, awmze thui tak a nei a ni tih pawh a hria. Rilru hah tak chuan a veikual sek mai a, atawpah chuan kha mite pahnih, Aldrina leh Pi Siami te chu zawn hmuh leh phawt chu a tum ta a. Mahse chutia a in buatsaih lai mek chuan Pi Siami leh Aldrina te ngei mai chu Station kawta motor bulah an lo inbe lai chu a hmu fuh ta hlauh mai a, rang em em chuan a tlanchhuak a, ava pan ta nghal a. Aldrina leh Pi Siami te chuan Rintea chu an lo en hu mai a, Rintea chuan thawk hlawp hlawp pah chuan, "Lo lut teh u, in pahnih hian ka be duh che u." a ti ta ringawt mai a. Aldrina chuan, "Engthil ah maw? Tihsual kan nei em ni ka pu?" a lo ti a. Rintea chuan, "Ihh...inthu sawi kha ka awih e." a ti a. Pi Siami leh Aldrina chuan mak an ti dun hle mai, an in en hu mai a. Pi Siami chuan, "Niminah te kha chuan min hnar haw daih kha a ni si a, tinge tunah i awih leh si a." a ti a. Rintea chuan vin zet hian, "A chhan chu Pi Mawii thla kha ka hmu ve ani...engmah min zawt tawh suh u, lo lut mai teh u." a ti vak a.

(PI MAWII TE NUFA SUTU TRUCK DRIVER A INPUANG)

Inspector Rintea chuan Aldrina leh Pi Siami te chu Pi Mawii te nufa sutu truck driver, burma tlangval, Hlutea te lam chu a pan pui ta a. Muana hi Bawngkawna awm a ni a, mi inhnuai luah a ni. Hlutea hi leivung paih a eizawng a ni a, Rintea chuan eng sawi set set lo chuan Station lamah a hruai phei ta nghal a. Rintea chuan zawhna chu a zawt tan ta a, "Pi Mawii te kha i duh vang renga su i ni tiraw?" a han ti a. Hlutea chuan, "Ka sawi tawh kha, accident vang liau liau a ni. Chubakah engvangin nge min rawn man ringawt a? Pi Mawii chhungte nen pawh kan inrem tawh a, case pawh a tawp tawh a nilawm ni?" a lo ti pang pang a. Rintea chuan, "Tudik takin min chhang rawh, tun chiah ka zawt nawn leh ang che. Pi Mawii te nufa kha i duh vang renga su i ni tiraw? Tu nen nge in in thurual?" tiin a zawt leh a. Hlutea chuan vin zet hian, "Accident a ni, abak engmah sawi tur ka neilo." a lo ti khur khur a. Rintea chuan na zet hian Hlutea chu a beng hawi sawk mai a, mahse ala inpuang duh mailo. Vawi engemaw zah a ben hnu chuan Hlutea chuan tap pur hian, "Pu Ruatkima....Pu Ruatkima min tih tir a ni. Pawisa pawh min pe a, ka duh vang renga ti ka nilo." a ti ta a. Rintea chuan, "Tunge Ruatkima chu?" tiin a zawt leh a, Hlutea chuan, "Pi Mawii cousin a ni a, aman ti tura min tih vang a ni." tiin a chhang a. Rintea chuan, "Engvanga tih tir che nge? Sawi rawh." tiin a han vau leh khur khur a. Hlutea chuan hlau tak chuan, "Engvang nge chu ka hrelo, that turin min ti a. Khalai hmunah khan an nufa in an lo awm dawn tiin min hrilh a, tichuan ka va su ta tawp a ni." a ti hluam hluam a. Rintea chuan, "Anih leh i duh vang renga su nisi, engvangin nge damdawiin i pan pui leh a?" tiin a han zawt leh a. Hlutea chuan, "Pu Ruatkima khan ka sut zawhah an ruang chu hmun hla taka paih turin min ti a, mahse ka hnathawhna a kan puten kalkawngah min lo hmu fuh a, min lo ti ding a. Tichuan Pi MAwii te nufa thi hnuanga ka motor a anlo awm chu an hmu a, chhuanlam siamin ka su palh ka ti a, damdawiin pan pui ka tum mek thu ka sawi ta ringawt a ni. Min hmuhna hmun kha World-Bank Road a ni a, Pi Mawii te nufa lah kha an mar a lo la awm si a, kan pute khan atir phei chuan min ringhlel nasa lutuk a, mahse dawt ka phuahchawp zel a, min awih ta hram ani." a ti a. Pi Siami chu lo inrawlh vatin, "Anih leh Mawii pasal Liankhuma kha a inrawlh ve em?" alo ti vat a. Hlutea chuan, "Aw...amah leh Pu Ruatkima te khan ti turin min hrilh a, achhan erawh engmah ka hrelo a ni." a ti khur dar dar a. Rintea chuan, "Anih chuan khalai kawng, Selesih leh Sihphir inkar kawngah khan engtin nge Pi Mawii te kha anlo awm ngawt theih?" tiin ahan zawt leh a. Hlutea chuan, "Ka hrelo, ka hrelo tak tak." tiin a tap pur mai a. Rintea chuan na zet hian a han beng leh thuai a, "Sawi rawh...engmah zep reng reng suh." tiin a han vau leh a. Mahse Hlutea chuan, "Ka hrelo ka pu...Pu Ruatkima khan khalai hmunah khan an lo awm ang a ti a, va su tawp turin min ti a ni." a ti a. Aldrina chuan Inspector Rintea bulah chuan, "Ka pu, Pu Ruatkima chu kan hmuh leh angai dawn anih chu...Pu Liankhuma lah a thi daih tawh bawk si." alo ti a. Pi Siami chuan, "Maengi pawh khan engemaw hriat a nei ang, Mawii hming lamin ngaihdam a dil an tih kha." a lo ti ve bawk a. Rintea chuan, "A tha e, kan custody ah hian he truck driver hi lo awm phawt se, Pu Ruatkima leh Pi Maengi te chu kan be ve dawnnia." a ti a. Inspector Rintea chuan a senior te chu bia in case re-open leh chu a dil a, Hlutea a inpuan thute an sawi vek hnuah chuan vanneihthlak takin an lo phal ta hlauh a. Tichuan Rintea chuan Aldrina leh Pi Siami te chu FIR ziak turin a ti a, police dang pathum vel hruaiin Pu Ruatkima chu an zu man leh ta a, Pi Maengi erawh anla manlo thung.

Rintea chuan Pu Ruatkima chu a han dawp leh a, "I mi rawih driver Hlutea pawh hian a sawi vek a, a inpuang vek tawh. Thudik i sawilo a, i zep kual a nih chuan hlap i tuar nasa khawp ang." tiin a vau a, a tir chuan Pu Ruatkima pawh chu a pha nasa hle a, mahse police te chuan an han hlap hrep hnuah chuan a inpuang ve ta nge nge a. Pu Ruatkima chuan, "Mawii hi ka cousin a ni a, an harsa hle tih pawh ka hria. Mawii pa hi ka pa nau a ni a, hman atang tawhin kan inmil lo hle a ni. Ka patea (Pi Mawii pa) hian min haw em em a, biak pawh min be duh ngailo. A hmelma lian ber ka ni a, achhan pawh ka nupui Duhzuali hi a ruka ka uire san thin vang a ni. Duhzuali hriatloh hian bialnu dang ka nei a, vawikhat ina kan tawm dun lai chu ka patea hian min hmufuh a, chuta tang chuan ka patea hian min haw ngawih ngawih a ni. Ka patea chuan, 'Engkim i sawi a, i nupui bula ngaihdam i dil a nih chuan keipawhin ka ngaidam ang che. Mahse i zep a, engmah i sawilo a nih chuan engkim ka puang vek ang.' tiin min vau ta a, ka rilru a hah em em a. Ka nupui bula ka inpuang a nih chuan min then dawn tih ka chiang a, chu chu ka ngai ngam silo. Ka patea lah chuan nitin mai chuan min rawn vau thin a, ka hlauthawng takzet a ni. Tichuan ngaihdan ka siamfel ta a, ka patea chu thah mai ka tum ta a. Ka patea hian lung thalo a nei hrim hrim a, chu chu hman tangkai ka tum ta a ni. Tichuan nikhat chu an inah ka nupui Duhzuali nen chuan kan va leng a, tichuan ka patea thingpui in turah chuan tur ka pawlh ta a ni. Hetih hun lai hian ka patea nupui (Pi Mawii nu) chu a boral tawh a, ka patea pawh chu thingpui a in hnu minute reilote ah chuan a thi ve ta a. Post Mortem ti tu tur doctor pawh pawisa in ka tham lawk vek a, Heart Attack vanga thi anga sawi turin ka ti a ni. Ka patea a thih hnu chuan ka thawveng huai a, engmah buaina ka tawk tawh dawnlo amaw ka tih laiin buaina chu a lo intan dawn chauh hi alo ni a. Ka patea khan ka uire thu hi Mawii a lo hrilh vek a, tichuan Mawii pawh chuan nitin mai chuan min vau leh ta a. Ka mangang em em a, ka unaunu ber Mawii han thah leh rikngawt chu ka ngam tawh hlawl lo a ni. Mahse mak tak maiin puitu ka nei ta thut mai a, chu chu Mawii pasal hlui Liankhuma leh a nupui Maengi te an ni. Liankhuma nen hian zu duh veve ta chu kan inkawm thin a, Mawii nena an inneih lai atang daih tawh khan a ni. Zankhat kan zu in laichuan ka rui lutukin ka patea kha keima thah ngei a nih thu ka sawi chhuak palh a, ka tum lawk bik miahlo. Chumai nilovin ka nupui ka uire san thu te, bialnu dang ka neih thute thleng chuan ka sawichhuak ta vek a, Mawii pawhin thudik a hriat thu leh min vau reng thu te thleng chuan ka sawi ta a. Mahse mak tak maiin Liankhuma erawh chuan thil tha tak ka tih thu min hrilh ta daih a, a chhan pawh Mawii leh ka patea te hian Liankhuma thuruk an lo hriat ve vang a ni. Liankhuma pawh chuan a thuruk chu engkim min hrilh ve ta vek a, Mawii nena an chetsual nachhan te, Mawii a rai nachhan te pawh kha thil thleng palh mai chauh a ni a, Mawii kha duhna chhete mah aneihloh thu te chu min hrilh ta vek a. Mahse an chetsual dan leh a hun awm ang vel chu min hrilh duh chuanglo, Maengi'n a hriat ka ring. Tunthleng hian ka la hre biklo a ni, abak engmah ka hrelo ka pu." a ti hluam hluam mai a. Pi Siami rilru na lutuk chuan tap chungin Aldrina chu a kuah a, Aldrina pawhin mittui tla zawih zawihin a lo ngaithla ve bawk a. Rintea chuan, "Anih leh Pu Liankhuma thuruk chu enge ni?" tiin a zawt leh a. Pu Ruatkima chuan, "Mawii nena an chetsual dan kha chu a sawi duh miau silova, engmah ka hrelo. Mahse a thuruk ber ni a asawi chu an inthen chhan kha Liankhuma khan Mawii te nufa kha a hnawtchhuak anilova, a duhthu ngeiin Mawii khan Liankhuma kha a fanu Rosy hruaiin a chhuahsan zawk a ni." a ti ta mai a.

Rintea chuan thinrim tak hian, "Chiang takin han sawi chiang law law teh...chu chauh chu a nih ka ringlo." a ti vin leh khur khur a. Pu Ruatkima chuan, "Mawii khan vawikhat chawhmeh zuara a chhuah laiin an inah Maengi nen an lo mudun a, chu chu Mawii haw chuan a zu phawk a, chuta tang chuan inhauvin Mawii hian a chhuahsan ta a ni. Mawii khan ka thuruk leh Liankhuma thuruk chu a hre ta ve ve a, tichuan a sawichhuah hlauvin Liankhuma nen chuan inthurualin he Truck Driver hi pawisa kan pe a, an nufa a suhlum turin kan ti ta a ni." a ti leh a. Pi Siami chuan, "Chu chauh chu a nilo, khati lai hmun daih daih ah khan Mawii te nufa kha an awm a, chawhmeh an zawrh pawhin kan veng chhung ah bak an zuar ngailo, khati lai hmuna an awm daih nachhan kha sawi rawh." a lo ti a. Rintea chuan Pu Ruatkima chu a han khawih leh deuh hlak a, tichuan Pu Ruatkima chuan hlau tak hian, "Ka sawi ang...min beng tawh suh." tiin a tap pur mai a. Tichuan a sawi chhunzawm zela, "Mawii te nufa kha khati lai hmuna lo awm tir tu kha chu Liankhuma a ni a, keichuan ka be velo hrim hrim. Chubakah be mah ila, min chhanglet duh dawn chuanglo. Liankhuma thil tih vek a ni a, engtin nge an inbiak ka hre ve lo ani." a ti a. Aldrina chuan thinrim tak hian, "Chu vang chauh chu a nih ka ringlo, zep dang ila nei a ni. Chubakah Pi Mawii te nufa in thahna chhan kha thildang ala awm em em ang, Pi Mawii chauh nilovin, engvangin nge a fanu kum 5 mi lek Rosy kha in thah tel kher?" a ti lo ti a. Pu Ruatkima chuan, "Rosy kha thah tel ve kan tum lo, kha Truck Driver khan an pahnih khan a su a, Rosy erawh kan bula awm tur leh kan enkawl tura lak kan tum a ni." tiin alo chhang a. Thudik tluantling chu hriat a la ni ta chuanglo, chumai nilovin Truck Driver inpuanna leh Pu Ruatkima inpuanna chu Rintea te chuan uluk takin ngaithla mahse, a la buai nuai a ni ber mai. Thudik hretu ber Liankhuma lah a thi daih tawh bawk si, thudik tluantling an hriatna ber tur awmchhun chu Liankhuma nupui Maengi chauh a ni ta. Mahse Maengi lah mi a ang maiin tu biak mah a chhang duh lova, tawng nachang pawh a hre ngai bawk silo. A khat tawkin, "U Mawi, min ngaidam rawh." tiin a phun leh bul bul thin a, chaw pawh a ei duh ngailo. Rintea pawh a mangang takzet a, Truck Driver leh Pu Ruatkima te chu a han zawt nawn leh thin a, mahse anni lah chuan an thuhriat zawng zawng an hrilh zoh vek tawh thu bakin an chhang thei tawh bik silo. Tih ngaihna dang awm heklo le, Pi Maengi fapa Chhana chu Station lamah thu zawtfiah turin an hruai phei ve leh ta tawp mai ani. Mahse Chhana pawh chuan engvak mah a lo hre bik silo, damdawiina a nau chetdan mak tak leh a nu awmdan te, a chetdan mak sak tak tak te bak hrilh tur engmah alo nei bik silo. Aldrina leh Pi Siami te pawh an beidawng a, an tih theih awmchhun chu tawngtai a ni tawp mai. Pu Ruatkima inpuanna leh Driver Muana inpuanna khan duhthu a sam lo em em a, thudik hre ber tu tura an ngaih awmchhun Pi Maengi lah mi anglo ang maiin biak tlak a ni bawk silo. A khat tawk chuan Inspector Rintea chuan Hlutea leh Pu Ruatkima te chu zawhna a zawt reng a, mahse chhanna ngai bawk chuan an lo chhang zel mai si a, Rintea pawh a beidawng takzet tawh a ni. Pi Maengi pawh chu an han dawp ve takngial naa, biak tlak ani der silo, "Mawii min ngaidam rawh." tiin a khat tawk chuan a phun leh bul bul thin a, kutthlak a han vuak dawn lahin mi anglo kutthlak an ni dawn bawk si. A tawp atawpah chuan Pi Maengi pawh chu damdawiin lamah dah chhoh a ni ta nge nge a, thudik chu hriat a ni thei ta dawnlo a ang ta khawp mai. Pu Ruatkima leh Hlutea te chu Pi Mawii te nufa thah an tum avangin thubuai siamsak nghal an ni a, Pu Ruatkima phei chu ama patea ngei a thah avangin da,chhunga lung in tang tura hrem nghal a ni. Hlutea leh Pu Ruatkima te hi an inpuan vek tawh avangin thiam an changlo a, mahse thudik hriat hma chu Rintea hian case tih tawp mai chu ala tum lo nasa mai.

(THUDIK CHU....)

Ni 2 chhung zet thudik hriat tuma an buai laih laih lai chuan Pu Ruatkima nupui Pi Duhzuali chu Police Station chhungah a rawn lang ve ta hlawl mai. Pi Duhzuali chuan thil engemaw hriat a neih ve thu te, a mumangah Pi Mawii thla a hmuh ziah thin thute chu a rawn sawi ta ta a. Rintea chuan rang takin Aldrina leh Pi Siami te chu Police Station lama lo kal vat turin a hrilh a, anni pawh chu reiloteah an lo thleng a. Tichuan Pi Duhzuali chuan a sawi ta a, "Mawii te nufa thih hnu khan zan tin mai hian ka mumangah Mawii hi ka hmu thin a, fimkhur tur leh ka fate venghim turin min hrilh fo mai a. Mahse tu lakah nge ka fimkhur anga, engvanga fimkhur tura min hrilh nge a nih engmah ka hre der silo. A tir chuan mumang mai mai a ni ang tiin ka ngaih ka ti tha lui thin a, mahse zantin mai ka mumanga ka hmuh ziah tak ah chuan ka ngaih a thalo ve tan ta a. Tin, ka pasal hi Mawii te nufa thihna chungchangah a lo inhnamhnawih ve tih ka hre leh zel bawk nen, thil inthup engemaw a awm ngei ani tih chu ka ring ve ta a ni. Chumai nilovin Mawii te nufa ruang hlawmtu kha keimah ni kan ni a, kan inah pawh khawhar inriak tlem azawng kan ngei ve nghe nghe a. Mahse zan khat bak an rawn riak lo, a tuk zingah an inpu chhuak leh nghal vek. Khate khan ka mak tihna ti zual a, ka pasal bulah a chhan ka zawh lahin an peih tawh lo aniang tih bakin min chhang bawk silo. Mahse khawhar in riak zinga mi tleirawl pakhat, kan venga mi tho, Tetea chu ka hmu fuh a. Engvanga zankhat chauh rawh riak nge an nih tihte ka zawh chuan Mawii thla an hmuh thu te, a thianten zep tlat tura an tih avanga sawi lo mai mai a nih thute chu min hrilh ta a. Tichuan ka pasal ka zawt a, mahse thinrim takin chutiang engmah a awmloh thu leh, Tetea thusawi te kha a mumang thatloh vang mai mai a ni tiin min hrilh a, a sawi zawng te khan a thinrim em em a, chu mai nilovin a sawi pah khan hlauh nei a ang ka ti em em bawk. Khami zan atang khan Mawii chu ka mumangah zan tin a rawn inlar a, thah an nih thute, fimkhur tur te leh amah pui tur tein min hrilh ta fo mai a. Mawii chungchang ka sawi apiang hian ka pasal hian thinrim tak hian min vin hrep hrep zel a, ka ngaih a tha lo takzet a ni. Tichuan hmanni khan ka pasal chu Mawii te nufa thihna a inhnamhnawih ve angin in rawn sawi a, in rawn man ta a. A tir chuan ka awihlo hle a, hrehawm pawh ka ti takzet. Mahse khami zan khan amah Mawii ngei hian min rawn tlawh ve ta a ni." a ti ta mai a. Rintea chuan phur tak chuan, "Ka pi, enge a hrilh che?" a lo ti vat a. Pi Duhzuali chu a kun a, a tap fap fap mai a. Aldrina leh Pi Siami pawh chuan hriat chak takin Pi Duhzuali chu mit khap miahlo hian anlo en reng a, muangchang chuan Pi Duhzuali chu a rawn hawi chhuak a, "Ka pasal khan ama unaunu ngei, Mawii hi a duhlo chung alo mutpui thin a ni." a ti ta mai a, Rintea pawh chuan mak a ti ngei mai. Aldrina leh Pi Siami te pawh chu mak ti tak chuan an in en hru ringawt mai a, thudik an hriatsa ho zawng zawng te pawh kha a buai leh ta nuai mai. Rintea chuan mak ti tak hian, "Ka pi, engemaw i sawi le?" a ti a, Pi Duhzuali chuan tap chung chuan, "Ni e, keipawhin mak ka ti lutuk. Mahse amah Mawii ngei khan min hrilh a ni. Chupawh chu Liankhuma nena an inneih hma atang daih tawhin a ni a, Mawii pa damlai a ni. Mawii hi ka pasal hian ama unaunu ngei mah nise, ka awmloh hlanin vawikhat chu a thingpui in turah mutthilhna damdawi a lo pawlh sak a, tichuan a duhtawkin a mutpui ta a, chutia ama unaunu ngei taksa a chen lai chu video in a la bawk a ni. Tichuan chu video chu thehdarh ah vau in Mawii chu ka awmloh hlanin a duh duh hunah a mutpui ta thin a ni." a ti leh a, Pi Siami phei chuan a ngaithla thei tawh lo, a beng hupin a tap zawih zawih mai a, Aldrina pawh thinrim takin a lo ding khur zawih zawih mai. Rintea chuan, "Anih ka pi? An thihdan chungchang te a hrilh che em?" tiin a zawt leh a.

Pi Duhzuali chuan, "Aw, ka pasal leh Liankhuma te hi ahma atang daih tawhin an lo inkawm thin hi alo ni a, zu an indun thin a ni. Mawii hnenah chuan tuma hnena sawi lo tur leh a sawichhuak a nih vaih chuan video chu tih leak-out a tum thu te sawiin ka pasal chuan a blackmail thin a, Mawii chuan engmah sawi ngam lovin a tuar tlang ta ngat ngat mai a ni. A bul ber chu maw ka pu, ka pasal Lalruatkima vang vek hi a ni, he mihringpa tenawm lutuk leh hurherh vang vek hi a ni. Mahni farnu ngei pawh a it a, a nupui min bum a, ka awmloh hlanin remchang a zawng a, a unaunu ngei Mawii chu a duhtawkin a mutpui ta thin a ni." a ti a, a tap zawih zawih mai a. Pi Siami chuan rilru na tak hian, "Aww..Mawii, ngawi rengin ilo tuar ngat ngat mai a nimaw? Ka va han lainat tak che em?" tiin a lo tap hawm hawm bawk a. Pi Duhzuali chuan sawi zawm zelin, "Ka pu, ka pasal Ruatkima khan a zep then mai mai a ni, bialnu dang tumah a nei lo. Mawii kha arukin a mutpui thin a, chu chu sawi chhuak duhlovin midang laka uire angah a insawi mai mai a nih kha. Sihphir-a Mawii te han tlawh tura a kal zing lutuk te kha rinhlelh nachang kalo hre lova, engmah ka lo hriat loh vang a ni. Tichuan an video chu ka pasal chuan Liankhuma hi a lo hmuh ve a, tichuan Liankhuma chuan a mutpui ve duh thu a hrilh ta a. Zu um khat vang mai mai chuan ka pasal chuan ama unaunu ngei chu a hralh ve leh ta a, Liankhuma chuan a mutpui ve leh a, chung zawng zawng pawh chu video-in an la leh vek a ni. Mahse Mawii chu a rai ta a, tichuan Liankhuma fa ngei a nih thute pawh a sawi ta a. Liankhuma chuan mualpho ai chuan tiin nupui ah a nei nghal a, Maengi nen pawh an inthen nghal ta a ni. Mahse ahnuah Maengi chu pawisa hmangin a thlem lungngawi leh mai a, Maengi chuan Liankhuma hnenah chuan Mawii then vat tur leh amah nena innei vat turin Liankhuma chu a hrilh reng thin a. Liankhuma chuan Mawii fa pai lai hi lo piang phawt se, kum te lo tling ve phawt se, chumi hnuah Mawii te nufa chu a then tur thu a sawi a ani. MAwii vanduaina belhchhah turin an fanu Rosy kum 2-3 vel alo tlin chuan MAwii nu chu zunthlum natna a vangin a boral ta thut mai a, hetih lai pawh hian ka pasal chuan Mawii chu a la vau reng a ni. Mawii chuan a zep tang tang a, mahse a tawpah a zep thei ta ngang lova, a pa a hrilh ta vek a ni. Mawii pa chuan ka pasal hi nasa takin a hau a, thudik sawi chhuah a tum thu leh a thil tih tenawm tak te chu puanzar sak a tum a. Ka pasal chuan a patea a nih vang te pawh a ni ang, engtin mah a chhanglet ngam biklo. Ka pasal chuan ngaihdam a dil a, mahse Mawii pa chuan a thiltih te leh a sualna te zawng zawng chu ka bula inpuang vek turin a ti a, a inpuan ngei tur thu pawh chu Mawii pa bulah chuan a tiam a. Tichuan ruahmanna siamin Mawii pa chu a thingpui in turah tur a pawlhsak a, doctor pawh thamna pe in heart attack anga sawi turin a ti a, Mawii pa thih ni pawh khan ka awm ve a ni. Thingpui siamtu kha ka pasal ngei a ni tih pawh ka hria a, mahse engmah ka lo hriat veloh avangin lung thalo a lo neisa hrim hrim bawk nen, doctor meuhin a sawi bawk si a, heart attack vanga thi angah ka lo ngai ve ta mai a ni. Chung zawng zawng te pawh chu ka pasal hian Mawii chu a hrilh vek a, video hmang bawk chuan vau lehin a duh duh hunah chuan a mutpui leh ta thin a ni. Mawii chuan a tuar thei ta ngang lova, a nu a thi tawh bawk si a, apa lah an thah sak tawh bawk si, a pasal Liankhuma lah chuan a fanu Rosy nen chuan a hnawtchhuak tawh bawk si a. Chumai chu la duh tawk lovin an mudun lai video hmang chuan ka pasal lah chuan a vau reng a, a duh hun hun ah ala mut pui bawk si. Tichuan a tuar thei ta ngang lova, police hnena report a tum thu chu Liankhuma a hrilh ta a, mahse Mawii tihsual lian ber chu police hnena report a tum thu Liankhuma a hrilh kher kha a ni. Tichuan Liankhuma chuan ka pasal chu a hrilh ta a, tichuan truck driver chu ruaiin Mawii te chu an nufain chu truck driver chuan a su ta a ni." a ti a.

Rintea chu thinrim tak chuan a tho a, Pu Ruatkima leh Hlutea te chu dark room ah hruaiin nasa takin a sawisa ta hrep mai a, thudik engkim chu a lang chhuak ta. Pu Ruatkima pawhin engmah zep neilovin a inpuang ta vek a, "Khatia Mawiin Liankhuma a rawn vau takah chuan kan hlauthawng a, Liankhuma chuan Mawii chu inhmuh puiah a sawm ta a. Khami ni khan chawhmeh an zuar lo hrim hrim, tlaiah khan inhmu turin Liankhuma khan khalai hmunah khan a ko a ni. Mawii hian Liankhuma hi haw hle mahse apasal a lo nih tawh avang leh Rosy pa anih vang te, a lo hmangaih hman avang te chuan a ring leh mai a, chubakah thiam takin Mawii kha phone atangin ngaihdam a dil vang a ni. Mawii chuan Rosy hruaiin Sihphir leh Selesih inkar kalkawng reh ve tak laiah chuan nghak turin a hrilh a, engkim sawifel a duh thu a hrilh bawk a. Kei erawh chuan Liankhuma'n ti rawh min tih dan angin, driver chu ka ruai ta mai chauh a ni. Hlutea chuan a su ta ngei a, tichuan World Bank Road lamah a tlan pui a, an ruang chu paih a tum a, chupawh ti rawh ka tih vang a ni. Ka nau Mawii thlarau hian keipawh hi min tlawh fo thin a, thudik sawi turin min ti thin. Mahse ka nupui Duhzuali hian min then mai ang tih ka hlauh em avangin ka sawi ngam lova, zan tam tak pawh ka mut theih loh phah a ni. Ka thil tihsual te kha a diklo tih ka hria a, mahse thudik sawi tur khan ka huaisen tawk lova, a man chu ka tel ta a nih hi." tiin a tap hawm hawm a. Aldrina pawh a insum zo ngang lo, Pu Ruatkima chu na em em hian a hnek thal tawp mai a. Pi Duhzuali pawh chuan engdang mah sawi belh tawhlo chuan a pasal, tualthattu, mahni farnu te ngei pawh it a, lo sual thin tu, Ruatkima chu a then nghal a. Pu Ruatkima leh Driver Hlutea te pawh chu damchhung lungin tang tura tih an ni a, Pi Maengi erawh mi a dahna inah dah a ni ta a ni. Aldrina leh Pi Siami te pawh chuan thudik an hre tawh bawk a, an thaw huai mai. Inspector Rintea pawh chuan case chu a titawp nghal a, engkim chinfel a ni ta. Chumi tlai chuan Aldrina leh Pi Siami te chu Pi Mawii te nufa thlanah chuan an kal a, mak tak maiin Pi MAwii te nufa thlanah chuan pangpar sen nalh tak mai hi alo awm a, Pi Mawii'n lawmthu sawina atana alo dah a ni ngei ang. Tichuan Aldrina leh Pi Siami te chuan Pi MAwiite nufa chu mittui nen an thlah a, thlanmual chu an chhuahsan ta a. Pi Maengi pawh Mental Hospital atanga an dah hnu ni 3 velah a ward awmna atangin a zuang thla a, a thi nghal a ni. Hemi hnu atang hian Pi MAwii te nufa thla chu tuman an hmu leh tawh lova, an thlarau chu hahdam takin a chawl ve ta a ni ngei ang.

A TAWP TA