NATHAN episode-12
NATHAN episode-12
THE ADVENTURE OF NATHAN AND RAYMOND
Writtten by : Aaron Malsawmdawngzuala
Raymonda chu a vei kual a, a inngaihtuah nasat hmel hle mai. Nathana pawh chu Raymonda'n a hnekna, a mi duk chur vur a deh pahin a thu tum bur bawk a, kei leh Vala chu kan lo titi mek bawk a, ka mit sir hian Jeneti chu ka melh leh zeuh zeuh thin a, a chhelo reuh em a ni. Raymonda chu a tawng chhuak tawh dawnlo amaw tih hnuah chuan, "Val, engtin nge James-a chu inlo hriat ve a?" a rawn ti chhuak hlawl mai a. Vala chuan, "Jeneti nen hian kan rawn zawng che alawm, engmah sawilovin i bo daih sia, chumi hnuah Inspector Ramtea hnen atangin i awmna kan hria a, DCP Nathana leh ASP Rinawma te case kal mek i puih thu kan hre ta a, chuan DGP Sangliana hnen atangin in chanchin kan hre ta a ni." a ti a. Nathana chuan, "Anih leh kan manager thi theilo hi??" a lo ti ve bawk a. Jeneti chuan, "DGP in min hrilh dan kha chuan Bank Manager hi a thi tawh angin a sawi a, mahse nangmahni kan zawnna lamah che u kan hmu a, tichuan zui ru in kan man ta a ni." a ti a. Nathana chu a tho a, manager chu nikhawhrelovin ala awm reng a, a hmaiah chuan tui a leih a, a rawn harh chiang hle mai, a thaw hrawk hrawk a. Manager chuan hlauh hmel takin, "Khawngaihin min kaltir ru..engmah ka ti velo, James-a vek a ni." a ti a, a tap pur mai a. Raymonda chu rawn pheiin, "Nangmah vang teh hrep hian kan buai zia hi hre rawh, chuan i thianpa James-a vang hian Nathana nen hian kan insual asin." a ti a, Nathana chuan Raymonda chu a va melh hu a, Raymonda chuan, "Ihh..DCP Nathan ka tihna.." a tih bah nuai a, Vala a lo nui huk lehnghal, ava hahthlak thin. Nathana chuan, "Awle, James-a nena in thil plan te, enge in tihtum, engkim sawi la, chuan na i tuarlo ang." a ti a. Manager chuan "James-a hi ka thianpa a nilo, ka thianpa angin ka sawi mai chauh a ni. Diktak chuan ka hmelma a ni mah zawk." a ti daih mai a. Keichuan awihloh hmel zet hian, "Phakar tum duh suh, heti khawp hian police ho min tibuai tawh a, engvangin nge i hmelma chu i puih tehlul ang?" ka lo ti a, manager chuan, "Min tihluih tir a ni, duhthlan tur ka neilo a ni." a ti a, Raymonda chuan, "Enge awmzia?" a ti a, Manager chuan, "Min bum a, min vau a, min blackmail a, Sandy pawh kha ka ngaizawng hauh lo, ka nupui leh fanau te chhanhim nan ka ngaizawng der ta nih kha, chuan kei hian tihluihna avangin Sandy leh Richarda te kha ka thah phah ta ni." a ti a, kan vai chuan mak kan ti tlang hle mai. Nathana chuan, "Thil thleng hi enge awmzia, a bul atangin han sawi vek teh le.." a ti a.
Manager chuan, "Diktaka sawi chuan Sandy kha ka staff te zinga ka ngainat ber a ni, pasal hual a neih thu te a sawi khan ka lawmpui lutuk zawk asin. A hna ah a rinawm a, a taima a, a hun takah te rawn kalin a tlai ngailo, ka fanu ang maiin ka en zawk a ni. Mahse vawikhat chu James-a hi kan bank ah chuan a lo kal a, a tir chuan customer pangngai angin a rawn kal a, mahse a hnuah ka nupui leh ka fanu a kidnap mek thu a sawi ta mai a, tichuan pawisa a mamawh zat ka zawt a, ka nupui leh fanu te chhuah turin ka ngen a, mahse pawisa a duh loh thu a sawi a, a duh chu Sandy mutpui a ni. Ka rilru a hah em em a, tihngaihna ka hrelo. Atawpah chuan ka remhriat dan tha ve bera ka ngaih ang chuan ka che ve ta a, Sandy chu ka ngaizawng der ta a, Sandy pawh chu ka khawngaih em em a, mahse ka zar buai lui ta reng mai a ni. Sandy rilru chu a hah tan ta a, min hlat tial tial a, mahse keiin ka hnaih tulh tulh thung. James-a lah chuan min rawn vau reng bawk a, inhmu turin min sawm a, hmun hran hran ah min hmu a, ka chhungte lahin khawnge ka nupui leh ka fanu awmna min zawt reng a, keichuan an zin angin dawt ka sawi zel ringawt a. Vawikhat chu Sandy chu James-a nen ka inhmelhriat tir ta a, tichuan James-a nen chuan kan zarbuai dun ta reng mai a, a mangang bawk si engmah a sawingam bawk silo chu a rilru thlengin a buai phah ta hial a, ka khawngaih khawp mai. Vawikhat chu James-a chuan Sandy chu hmun pakhata hruai turin min ti a, tlai office banah chuan ka hruai ta a, mahse ka rinloh takin maiin sandy chu a manbet thut a, damdawiin a chiu ta a, sandy chu a zawi nghal vek a, mahse a rilru chu a harhfim vek thung. James-a chuan motorah a luhpui a, a duhtawkin a pawngsual ta a, kei chu ngawi rengin hlauthawng takin James-a chu ka lo veng a. A duhtawk hnuah chuan Sandy chu a rawn hnukchhuak a, silai min pe a, kap turin min ti ta mai a. Atir chuan ka hreh em em a, mahse a phone phawrhin tu emawni a phone a, chumi hnuah phone chu min rawn pe a, ka nupui na tuar thawm ka hria a, ka mangang takzet. Duhthlan tur dang ka neih takloh ah chuan Sandy chu hreh chung chung chuan silai chuan ka tin a, ka tap zawih zawih a. Sandy chu a che thei tawh silo a, mahse a la harhfim reng. "Sir min that suh khawngaihin." tiin min ngen chiam a, mahse duhthlan tur dang ka nei silo, lehlamhawiin kah ka tum chiah chu James-a chuan min rawn dang a, chemte a vit tur zawkin min ti a, ka hreh takzet. Mahse tih luihna avangin Sandy chu ka vit hlum ta a ni." a ti a, a sawi pah pawh chuan a tap pur mai a.
Nathana chu a ngawi vang vang a, "Nihleh Richarda thung kha le?" tiin a zawt leh a. Manager chuan, "Ni e, ani pawh kha ka thah a ni, James-a thu ka awihloh apiang hian James-a hian ka nupui leh ka fanu hmangin min vau zel sia, duhthlan tur ka neilo a ni. Tunah pawh hian James-a chuan ka nupui leh ka fanu chu ala kawl reng alawm. Khami zan in lak atanga ka tlanbo zan pawh khan, James-a bulah chuan ka let leh a, ka nupui leh fanu min chhuahsak tawh turin ka ngen a, mahse hna ila nei a ti tlat sia, tichuan a thu chu ka awih leh ta mai a ni. James-a chuan Richarda chu a kidnap a, a hma ang bawkin that turin min ti leh a, enge a chhan ka zawh lahin ka mimal buaina a ni a, ka hmanrua mai i ni, a chhan i hriat angai lo tiin min vin hrep a, chumi hnuah Richarda pawh chu hreh tak chungin ka that leh ta a ni." a ti leh a. Vala chu a lo tawngchhuak ve ta a, "Khami zana, RAymonda te lak atanga i tlan chhuah dan kha le?" a ti a, Manager chuan, "Khami tlai khan James-a hian ka lu ah hian thil enge maw bawm te tak te hi a bel a, a tir phei chuan bomb amaw ka ti hial a, mahse a nihloh thu min hrilh a. Khami ni khan nangni ho hian min man dawn tih pawh min hrilh lawk vek a ni, mahse engtin nge a hriat lawk erawh chu ka hre hauh lo. Chu thil a bel chu rubber ang deuh hi a ni a, a chhungah chuan tui bootle, chhinkhat vel leka tam aniang, a awm a. Ka lu a a bel hnu chuan sam lem a rawn la a, a them a chep thla a, chu bawm ka lu a a bel ah chuan a bel hnan a, "ZANIN AH HEMI BAWM, I LU A MI HI A PUAK ANGA, CHUAN I THI DER ANG, CHUAN KA RAWN CHHANCHHUAK ANG CHE." a ti a, voice recorder chip hi ka coat ah avuah bawk a, tichuan nangni hian min man ta a, mahse ka tlanchhuak thei dawn emaw ka tih laiin Raymonda hian minlo man a, chuan khami zan khan James-a sawi ang ngei chuan ka lu a thil a puak ta a, ka thi der a, nangni chu motor phenah in biru a, chutih lai chuan ka tlanchhe ta a ni." a ti leh a, James-a chetdan mai mai chu aw...ka va han haw tehkher em. Nathana chuan, "Awle, i thusawi chu thudik a nih chuan, i nupui leh i fanu te chu kan chhanchhuak em em ang, mahse nang erawh i tualthah avang hian kan chhuah zalen ve thei che angem tih chu kan sawi theilo." a ti a, Manager chuan, "Ka pu, keichu ka tihsual man ka hmu em em ang, apawi ka tilo, mahse ka nupui leh fanu te chhan hram ru." a ti a, Raymonda chuan, "Anih chuan tunah enge kan tih ang?" a ti a, Nathana chuan, "Manager hi lock up ah khung phawt ila, tun dinhmunah chuan kan vai hian tumah kan him lo.." a ti a, Vala chuan, "Jeneti nen hian James-a chuan min la hre velo." a tih lai tak chuan Nathana phone a rawn ri a, phone atang chuan James-a aw tih hriat tak chuan, "Hello Pu Nathan, ka bumna che u kha enge a an? Raymonda nena insual chu a nuam maw?" a rawn ti ham ham a, Raymonda chuan thinrim zet leh zawi sap chung si hian, "James....i va la inchhir dawn tak em." a lo ti a, James-a chuan, "Khaih khaih khaih insum teh, chuan Raymond...bialnu i nei chhelo hle mai, Jenet Lalduhawmi maw a hming khah..chuan i partner Vala pawh, a va nuam sawt dawn ve..GOOD LUCK GUYS." tih pahin phone chu a dah daih a.
Raymonda chuan, "Val, James-a chuan Jeneti nen chuan a lo hre leh hman vek tawh che u nih chu." a ti a, Vala chuan, "A che rang hle mai, mi naran chu a nilo tawp mai." a lo ti ve bawk a. Nathana chuan, "Raymond, James-a khan i bulah enge a sawi a?" a ti a, Raymonda chuan, "Inlo thawk dun reng a ni tiin min hrilh a, Police hna i rawn chelh chhoh dan te leh corrupt Police SI i nih lai vel te nen, thiam takin a rawn sawi a, a tir chuan ka awih biklo. Mahse min hrilh zawh hnuah nangman min rawn call tur thu leh amah nen in tangdun reng a ni tih min rawn hrilh dawn angin a sawi bawk che sia. A sawi zo chiah phone adah kha nang lah khan ilo call ve leh chiah bawk si nen...ka tihpalh ani DCP...James-a bum mai mai theihin kanlo awm a, a zia lo hle mai." a ti deuh luam a. Nathana chuan, "Pawilo, keipawh ka lo ringhlel che a, sorry." a ti ve bawk a. Diktak chuan James-a vang hian kan rilru a hahtlang a nih hi, tihtheih lah kan nei tlem si. Raymonda chuan, "Tunah chuan Richarda leh Sandy thihdan chu kan hre ta phawt mai ah, mahse an chhungte bulah engtin nge kan sawi tak ang? A thattu chu kan kawl reng a, mahse a ni pawh a nupui leh a fanu te dinhmun hlauhawmah an awm ve tho si a, Richarda leh Sandy chhungte hian an hriat chuan Manager hi chu an ngaidam dawn hauh silo." a ti a, Nathana chuan, "Ni khawp mai, mahse an thihna chungchang kha chu dahtha ila, an thihdan chu chhuichhuah chawp ngailovin kan hre ta phawt mai a, James-a hian hemi te pahnih a thahna chhan ber chu a huat vang a nilo, min thlem nan leh min vau nan a ti a ni." a ti a, Jeneti chuan, "DCP Nathan , kei hi min mamawh ve dawn em?" a lo ti a, keichuan rang zet hian, "Mamawh." ka lo ti vat a, Raymonda chuan min melh no lo teh e. Nathana chuan, "Tehreng mai Jenet, kan vaia kan thawh tlan chuan James-a hi kan man em em ang." a ti a, Vala chuan, "Keipawh ka theih tawp ka chhuah ang." alo ti ve bawk a. Nathana chuan, "Hei khua a tlai zel a, tunah chuan kan haw vek anga, chaw te kan ei anga, zan dar 8 a che chhuak tan thei turin dar 7 leh chanve ah chuan Raymonda te inah chuan kan kim thap tawh tur a ni." a ti a, a thu ber Nathana thuchhuak chu tha kan ti tlang bawk aniang, kan lu kan bu sap sap hlawm a, tichuan kan haw ta a. Ina ka haw chu ka nu leh nula pakhat kum 23 bawr vel niawm tak, hang ngaihno bei tak mai, sam kir, chhe lemlo tak hi anlo thudun a, an titi bawrh bawrh a. Ka nu in min hmu chu, "Bawiha, hei hi Saituala i Ni Liani fanu naupang ber Tluangi a nih hi." a ti a, kan in chibai a, min nuih seng lehnghal. Ka nu chuan, "Ka fapa a nih hi Tluangi, i u Rina a nih hi, tlangval senior a ni der tawh, nula a ngaihsak lo lutuk a." ala ti zui, ka zak ve teuh hle mai. Tluangi chuan, "Haha, a luck viau kalo ring asin." tiin minlo fiam ve bawk a, ka nu chuan, "Bawiha, Tluangi hi tun thla chu hetah kan bulah a awm ve a ngai dawn a, an in exam dawn a, i room ah sawn mu mai se, nangchu thutthlengah i mu mai anga." a ti a, keichuan peihlo ru tak chungin, "Nia, apawi hleinem." ka ti a. Tluangi chuan, "A ngailo sin, chhuatah pawh ka mu thei a.." a ti a, mahse ka nu chuan a phal tlat silo, ava buaithlak thin em awwwww.
Zan alo thleng a, dar 7:30 a rik chuan Raymonda te inah chuan kan kim ta thap a, DGP Sangliana pawh alo tel ve a. Nathana chu a ding hluai a, "Awle, zanin chu kei leh Vala kan kaldun anga, Raymonda leh Rinawma an kaldun anga, kan inthen hrang ang. Jeneti erawh chu kan DGP bulah i awm thung ang. Raymonda leh Rinawma chu Ramhlun Venglai field atang khan veng mawng lampang thleng in zu kal anga, Tresury te, Khatla te thleng hrut kualin ngun takin zawng ang che u. Rinhlelh awm deuh in hmu anih chuan man pawp mai rawh u, anni lo anih leh kan chhuah leh mai ang. Kei leh Vala erawh Durtlang lam ah kan chho anga, Sihphir thlengin kan hrut chhuak ve bawk ang. Chuan DGP Sir leh Jeneti chu Kulikawn lam ah lo zu zawng ula a tawk chauh ang." a ti a, tichuan dar 8 a ri a, hmanrua te pawh kan inring vek a, tichuan kan chhuak ta hlawm a. Raymonda nen chuan Ramhlun Venglai field atang chuan rinhlelhawm deuh te chu kan melh a, tlangval zuirui ho chu kan hmu zeuh zeuh a, mahse James-a hmel hmuh tur chu a vang kher mai. Nathana te nen chuan kan in contact deuh reng bawk a, anni pawh an beidawng kher mai. Jeneti te lam pawn thu lawmawm an nei lemlo, Nathana te phei chu Serkhan an thleng tep tawh hial a, keini pawh Capital Complex velah kan tei kual vak vak ringawt ani ber mai. Zan dar 11 a ri ta der mai, Raymonda chuan, "Kan inhmukhawm tawh mai dawn mi ASP?" a ti a, keipawh chuan, "Nia, engvak kan ang dawnlo nih hi, mahse haw pahin kan zawng chho leh dawnnia." ka ti a, tichuan kan haw chho ta a. Kan inhmuhkhawm meuh chuan zan dar 1 a ri der tawh a, DGP Scorpio dum nalh tak ah chuan kan vaiin kan thu khawm a, kan titi mawlh mawlh hlawm a. Chutia kan titi lai chuan car pakhat hian chak tawkin min rawn su thawi fua a, kan phu zuk hlawm a. Nathana chuan, "A va mawl mai mai e awww.." a ti nung nung a, Vala chuan, "Tunlai thalai ho tak hi chu a.." a lo ti ve bawk a. Raymonda erawh chuan a en zui vawng vawng a, a ip te a tangchuan thlalak te tak te hi a phawrh a, chutah ring tak hian, "A ni e, um nghal ang u.." a ti ta chiam a, keichuan, "Tu chu maw?" ka ti a, Raymonda chuan, "Manager nupui kha, a seat hnungah ka hmu..tuna car ah khan." a ti a, Nathana chuan, "Enga?" a ti a, DGP chuan motor chu start nghalin kan um ta a. Kan tlan pah chuan Vala chuan, "Raymond, engtin nge Manager nupui a ni tih i hriat a?" a ti a, Raymonda chuan, "Ka dil alawm, vawiin tlai khan ka haw ve nghal mai hleinem, Manager nupui chu tunge a nih tih kan hriat theih nan chuan a hmel kan hriat angai alawm. A walletah alo dah a, tichuan ka kawl sak ta a ni." a ti a, Nathana chuan nui vur vur chungin, "Good Job..very good Raymond." a ti a, Jeneti pawh alo nui sang a.
Kan motor um chu a ding thut a, keini pawh chu hmun biru lai deuhah chuan kan ding ve a, kan enthla ru reng a. Motor atang chuan Manager nupui chu alo chhuak a, a hnungah chuan hmaituam pahnih an rawn chhuak ve bawk a, manager nupui chu an phuar bet tlat a. Tichuan driver seat atang chuan James-a chu a rawn chhuak ta a, kan hmelma ngei mai chu. Nathana chuan, "Sawpa saw anih saw James-a chu.." a ti a, Raymonda chuan, "Hmmm....a chaklo khawp ang." a ti bawk a. Hmaituam pahnih bulah chuan James-a chuan thil a hrilh mawlh mawlh a, mahse enge a sawi erawh kan hre phak lo. Tichuan motor ah chuan an lut leh a, an tlan leh a, kan umzui ve leh a. Minute 20 dawn kan in um hnuah chuan in pakhat bulah hian an ding a, an lut ta a. Tichuan keini chuan kan nghak deuh phawt a, an rei tak em avang chuan Nathana chuan, "Jeneti leh DGP Sir hi motorah minlo nghak ula, kei leh Raymonda leh Vala leh Rina te hian kan luhchilh anga, chanchin kan lo hrilh leh ang che u." a ti a, kan Pistol theuh chu kan phawrh a, tichuan inlam chu kan pan ta a. Kawngkhar chu Raymonda chuan na lo te hian a nem chhin a, a chhunglamah a inkalh tih a hriat theih a. Tichuan Nathana chuan min signal zeuh a, kawngkhar chu ka en ren rawn a, inla Singham-a tawka tlawh hawn pawp ka tum a, mahse Raymonda zawk chuan vawikhat a tlawh pawpa, kawngkhar chu a inhawng chiang teh asin. Rang takin kan lut a, silai chu kah inring sa in kan tin lut a, mahse tumah an lo awm lo, nikhaw hrelova manager nupui lo let reng chu kan hmu a, kan hnung atang chuan hmaituam pahnih te kha an rawn lang thut a, ka pistol chu min petthlak sak a, ka hmaiah chuan min pet thal thuai bawk a. Hmaituam pakhat zawk pawh chuan Raymonda pistol chu a benthlak sak a, Raymonda chu a bin thal tawp bawk a. Vala leh Nathana an rawn hawilet a, nalh em em hian pakhat leh zawk chuan zuan pahin an pahnih chuan ka kick thal dun bawk a, infit dun zak zak tak an ni. Tichuan kan vai chuan min thal ta vek chu a nia, pawnah chuan an tlan chhuak ta daih mai a, Nathana chu thovin manager nupui chu a pawm nawlh a, pawnah chuan chhuahpuiin kan zui nghal bawk a. DGP chuan, "Enge awmzia?" a lo ti a, Vala chuan, "Khami te kha ilo hmu hman em?" a ti a, Jeneti chuan, "An che rang lutuk, an phe zeuh a, abak chu kan hmu hman lo." a lo ti ve bawk a. Nathana chuan, "Manager nupui hi damdawi inah lo va hruai ula, khami te kha kan lo umzui ang,ramhnuai lamah khuan an tlan thla in ka hria, manager fanu zawk chu kan zawn lehphawt angai." a ti a, DGP leh Jeneti chuan manager nupui chu Hospitalah chuan an hruai ta a, keinin hmaituam pahnih te chu kan umzui ta a.
Ramhnuai lam pan chuan torch light nen chuan kan inzui thla ta a, kei leh Vala kan kal a, Raymonda leh Nathana an kal hrang a, tichuan kan inthen hrang ta a. Light phe deuh zuai zuai chu kan hmu zeuh zeuh a, mahse han um dawnin a bo leh daih zel bawk si, chu ramhnuai hmun thim tak karah chuan kan zawng ta ngat ngat a. Mahse mak ve deuh mai chu, James-a, kan hmelma ber kan hmu ve miah lo kha a ni. Vala chuan, "A chhak lam saw en la, kei thlang lamah ka zu kal ange aw...kan inphone leh mai dawnnia.." a ti a, ka chhan hma hma chuan a kal ta daih mai a. Tih ngaihna dang awm heklo le, chhak lam ram ngaw lamah chuan hlauh pawh dawnlovin ka tlan chho ta a. Thawm ka hriat theih te chu Raymonda au aw te, Nathana'n, "Kha tilam pawh kha thil engzuai ka hmu a nia.." tih te a ni. Ka zawngkual zel a, ka hnug atang chuan tu emawni hian min rawn tlawh thal tawp mai a, rang takin ka leh hawi a, mi pakhat hmai tuam a lo ni a. Ka tho vat a, chem te a keng a, mahse keiin ka pistol ka lo thlau bawk si. Min rawn vih tum chuan min bei ta chiam a, ka theih ang tawkin ka lo indang a, mahse a hmanraw keng zawk na na na chuan ka ban veilam chu a vit thawi fua a, thisen a per chhawk a, a thip ngei mai. Ka ban atanga thinsen luang chu ka dawm a, "Zawnga leh.." tih pahin a pumah chuan ka tlawh thal thuai a, a rawn tho leh a, a chemte ken chuan min rawn vih a tum a, kalo bum a, a kut ka man a, ka elh vak a, a rak tuar a. Ka hnung atang chuan tu emawni hian min rawn rek a, min pawm kang lawp a, chhuatah chuan min paih thal thuai mai a. Thawh lehnghal ka tum a, mahse ka awmah tak chuan min rap bet a, ka che thei ta lo. A hmel ka han en a, James-a a lo ni. A ipte atang chuan engemawni hi a rawn phawrh chhuak a, min chiu ta a, ka mut a chhuak ta riai riai mai, second 5 vel lek hnuah chuan ka muhil ta a niang chu, engmah ka hre zui tawh lo.
Tui vawt takin ka hmai a rawn theh thawt avang chuan ka harh chiang ngei mai, ka meng a, ka hma zawn taka James-a lo ding chu ka hmu a. Thutthleng ah chuan nget taka phuar beh ka lo ni a, ka che thei thak lo. Ka tal vak vak a, James-a chuan nui chungin, "Haha, tal vak vak duh suh, Rinawm, tinge engmah hi in hriatthiam theihloh le, tunah hian ka naute pahnih khan i boss Nathana leh in detective chhuanvawr Raymonda te chu that turin an kal mek asin. Chuan, Vala pawh kha ka dahthat tir nghal ang, chutih rual chuan Jeneti pawh. Mahse Jeneti erawh kha chu ka duhtawka ka pawngsual hnuah chauh ka that ang, a chhelo ka ti reuh emai." a ti vel ham ham a. Keichuan thinrim takin, "Zawnga, mi tenawmpa, keichu i duh chuan min that rawh, mahse Raymonda leh Nathana erawh i that lovang. Min that pawh ni la, phuba la turin an lo kal em em ang, chutih hunah chuan thihna hlauhawm zia hi i hre ve tawh ang." ka ti ve ngat a. James-a nui hmel chu thinrimna in a inthlak rang kher mai, lehlam a hawi a, a thaw hluam hluam a, a rawn hawi let leh thut a, na em em mai hian min hnek chawrh mai a, a na ngei mai. Mahse na ti awmlo ang deuhin ka ka chhungah thisen chu a hmaiah chuan ka chhak berh luai a, "Kha zawng kha em ni i theih a? I hlauthawng em ni? Nathana leh Raymonda chu an lo kal ang, tichuan an rawn that ngei bawk ang che." ka ti leh ngat a, James-a chuan rum taka min melh pah chuan, "Nang hi chu i luhlulin i tuar a chhel ve khawp mai, ahma pawn ka bum kual hrep hnuah che hliam tuar chungin i pu Nathana chu i chhanchhuak thei kha a nia, maimawm tur nei leh hlauhawm takin a seh hnuah che pawh ila damchhuak thei a, chuvang chuan tunah hian i dam chhuah leh hmain that law law che ila atha ang." a ti ta mai a, min thah chu hlau viau mah ila, tihtheih ka nei der silo. Mahse min that pawh nise, Raymonda leh Nathana te kutah ka inghat a, kei hi min chhan hmanlo a nih pawhin James-a tal hi chu an rawn man anga, a chungthu an rel sak ngei ang tiin beiseina sang tak ka neih tlat avang chuan tlawm hmel ka pu duh thak lo. Silai a phawrh ta a, ka chalah tak chuan min tin ran mai a, "Thuchah hnuhnung sawi duh te i nei mial em?" tiin min zawt vel a, keichuan zam hauh lo hian, "I thihna darkar chu a hnai tial tial, tawngtai nasa rawh, mahse i Pathian meuh pawn a chhan thei tawh dawn silo che a." ka ti a, James-a chuan thinrim zet hian, "Engmaw i sawi a?" tiin lungawiloh hmel tak chuan min en a, keichuan chhang lovin nui lui tih hriat tak hian ka nuih vak vak a, mahse diktaka sawi chuan ka hlauthawng a, ka nuih a za hauh lo. James-a bawk chuan, "I thi mai tawh dawn a ni a, engvangin nge i la nuih vel a?" a ti khur khur a. Keichuan hmuhsit hmel zet hian ka en a, muang chang hian, "Mi dawihzep tak ilo nih hi, min thah i tumna a rei tawh tehreng nen, tun thlengin minla that ngamlo chu a nia." ka ti a, a thinrim ngei mai. Vin zet hian, "Awle, ka ngamloh i ring ani maw? Mangtha le ASP Lalrinawm, hremhmunah kan inhmu dawn nia.." tih pahin a silai chuan min tin ang ren rawn a, ka thi ngei dawn ani tih pawh ka hre lawk vek, ka maimitchhing a, ka mithlaah chuan ka nu leh ka pa, ka chhungte leh ka thian te zawng zawng leh Nathana thlengin anlo lang nghal chuai chuai a, mahse mi kap dawn chiah tih ah chuan a phone a rawn ri hlauh mai a, a silai ken chu a dah thla a, ka thaw huai mai.
Phone chu a chhang a, tichuan ka hma zawn takah chuan hlim hmel tak hian, "Haha...Rina, hei ngaithla teh ka nau te an nih hi, thu lawmawm tak ani, lo ngaithla ve teh." a ti a, phone atang chuan aw tham thiak hian, "Boss, Raymonda leh Nathana chu kan chiu muhil a, Truck hnungah phuar beh in kan dah a, Jeneti leh an DGP erawh kha chu damdawiinah Bank Manager nupui buaipui khan an la awm a, anni pawh kan dahtha vat ang. Tunah lawk khan Raymonda partner Vala chu kan man chiah e, kan that nghal dawn em ni?" a rawn ti ta mai a, ka hmel chapo tak pawh chu manganna in a rawn thlak nghal a. James-a lah chu nasa em em hian a nui uar uar a. Ka thu hriat chuan min barakhaihin min ti hrilhhai hle mai, James-a chuan, "Naute u, in thawk tha e, mahse Vala kha chu ka bulah ngei hian lo hruai ru, keimah ngei hian Rinawma hmuh lai ngei hian ka that duh a ni." a ti a, ka thlan chu a far zawih zawih a, zeplo chuan ka zam chhe der mai. Phone chu a dah a, James-a chuan, "Rinte...tunah chuan i pu Nathana pawh kan kutah a awm a, nang leh Vala kan thah zawh hunah ani pawh kan that ngei ang. Haha, tunah chuan tuin nge chhan ta ang che?" a ti ham ham a. Mahse kei chuan hlauhthawng tak chung si chuan ka luhlul ka la chhuah fan a, "James, nangang mi tenawm lutuk hi chu engtikah emaw chuan hremna i hmu ngei ang. Nathana emaw Raymonda emaw, tupawh chu i hneh a ni thei e, mahse kan ram tana mi rinawm, nangni ang misual man tu tur hi an la piang zel anga, an awm zel tho ang, i chak rei chuanglo ang." ka la ti fan a, "Kan hria ang chu, huiham, thian duhtak Rinawm, nang tak hi chu awww...i danglam dawnlo a nih hi." tih pahin ka thutna chawp chuan min tlawh pawp a, ka thutna thutthleng, thing atanga siam pawh chua atliak sawm vek a, tichuan hmin hnungkhirh a, ka kut chu nghet takin aphuar a. Tichuan a phone chu a rawn ri leh a, "Hello, awww..inlo thleg maw, awle ka lo chhuak e." a ti a, min phih tho lawp a, tichuan pawn lam pan chuan min chhuahpui ta a. Khua alo var der tawh a, zing dar 7 vel niawm tak a ni, khaw awmdan en chuan. Pawnah chuan hmaituam pahnih te khan dimlo baksak hian Vala chu an rawn hnuk phei a, Vala chu a thi hnuang mai a. James-a chuan min pawt thu hnawk a, ka thingthi a, tichuan Vala hma zawnah tak chuan min hnuk phei a.
James-a chuan, "Naute u, kha ka pistol hi la ula, chemte zawk kha minlo pe teh u, Vala hi Rina hmuh lai ngei hian ka that dawn a ni." a ti a, tichuan hmaituam pa pakhat zawk chuan chemte chu a pe a, tichuan silai chuan Vala chu a tin a, hmaituam pakhat leh zawk pawh chuan Vala chu silai chuan a tin ve bawk a, kei rawh che theiloa phuarbeh ka ni bawk a, Vala thi tur chu ka en reng a. James-a chu kun hniamin Vala chu a rum tak leh hmuhsit hmel tak hian a en a, "Pu Val, ilo inrawlh ve duh kher kher ani tiraw? Hetiang game hlauhawm lutukah i lo inrawlh ve duh a, i thihphah dawn ta mai mai si a, a pawi ngawt mai, nangchu mangtha phawt mai le..engemaw sawiduh i nei em?" a ti vel a, ka hlauthawng tawh kher mai, ka thin chu a phu dup dup a. Mahse ka rinloh tak maiin Vala chuan chapo hmel tak hian James-a chu a rawn en chho a, a nui ta vak vak mai a. Keipawh chuan mak ka ti em em a, kei aia mak titu chu James-a a ni. James-a chuan thinrim tak hian, "Enge ila nuih vel a, mawh?" a ti vin tuar a, Vala chuan, "Huiham, Mawla, i fingin i lo phakar viau a maw ka lo ti a, rin aiin ilo ropui vak loh hi a.." a ti a, a thusawi chu ka hrethiam thak lo. James-a chuan mak ti tak hian, "Eng thu phiangsen nge maw i sawi le?" a ti a, Vala chu muang chang chuan a rawn ding chhuak a, a bula amah mantu hmai tuam pahnih te chu a signal zeuh a, tichuan chu hmaituam pahnih te chuan James-a zawk chu an silai ken chuan an tin ta daih mai a. James-a hmel chu manganna in a khat tih a awmdan atang chuan a hriat theih a, chutih rual chuan kei ngei pawh chuan mak ka ti em em a. Hmaituam pakhat zawk chuan a hmaituamna chu a phelh a, Nathana a lo ni. Nuih huah huah pah chuan Nathana chuan, "Khai a, thianpa...kan thangah chuan a tawpah chuan i awk ta ngei e, You are under arrest.." a ti a, hmaituam pakhat leh zawk chuan a hmaituamna a phelh ve leh a, Raymonda a lo ni. Raymond apawh chu a rawn nui sang mai a, "Pu Ja-mes Nono-a chu, min tibuai rei bawk a, i huntawp chu alo thleng ta e." a ti a, James-a hmel chu hlauhna in a khat a. Chuti lai chuan motor pakhat hi a rawn tlan a, kan bulah chuan a rawn ding a, a chhung atang chuan Inspector Ramtea leh Jeneti an rawn chhuk a, a hnungah chuan constable pali vel chuan mi pahnih an rawn hnuk chhuak bawk a. Jeneti chuan, "James, hei hi i naute tak tak zawk chu an ni, kan finna hi chu i hneh talo chu a nih hi." a rawn ti a, James-a chu engmah a sawi thei lo, hlauhna leh mak tihna in a kaht a. Constable ho chu an rawn kal a, min phuarna te chu an rawn phelh vat a. Min phelh ta maw tihah chuan ka tlan phei a, ka theih tawpa na in James-a chu ka va hnek thal thuai mai a, Inspector Ramtea chuan minlo dang vat a, ka thinrim em a ni. James-a chu a rawn tho tual tual a, chhuata a chemte tla chu chhar in constable pakhat chu a vit ta mai a, chu veleh Nathana chuan James-a chu a thin ah tak a kap ta dur mai a, a let nghal tawp a, a thi der mai.
Kan vai mai chuan kan ngawi thap a, James-a ruang chu kan en thap a. Raymonda chuan Nathana dara rawn vawn pah chuan, "DCP, keiman mawh ka phur mai ang, lungngai suh." a ti a, Vala chuan, "Nilove, keima kah angin sawi mai ru." a lo ti ve bawk a. Kei pawh chuan, "Tlanchhuah a tum a, encounter shoot order hmangin ka kap ni mai rawh se." ka lo ti ve bawk a. Inspector Ramtea chu lo kal hnaiin, "Aih, keima kah a ni, keima kah angin sawi mai ang u, tawrh tur ang chu ka tuar mai ang." a rawn ti ve bawk a. Nathana chuan, "Atawk, ngawi rawh u, a kap hlum tu chu keimah ngei ka ni a, keima kah a ni. Tlanchhuan a tum a, hei tunah pawh kan constable pakhat ke ah a vit a, chuvang chuan kah mai kha a pawilo zawk. A hrim hrimin tunah chuan kan buaina ber James-a chu a thi tawh a, keichu ka thaw huai mai." a ti a. RAymonda chuan, "Pu Ramte, constable hian na a ti lutuk ange, damdawiinah lo han kalpui ta che." a ti a, Inspector pawh chuan a kalpui ve ta mai a. Tichuan kan hmelma ber James-a chu a awm ta lo, James-a ruang chu constable ho chuan an phur a, tichuan keini pawh chu kan Office lam pan chuan kan kal ta a. Office ah chuan kan thu thap a, DGP chuan kan hna thawhthat zia te chu sawiin min fak hlawm hle a, a bikin min fak bik deuh riau lehnghal a, nuam ve reng. DGP chhuah hnu chuan Nathana bulah chuan, "Sir, engtin nge min rawn zawnhmuh reng reng a?" tiin ka zawt a, Nathana chuuan, "Raymonda zawt mai rawh.." a ti a. Raymonda chuan nui vur vur chung chuan, "Nia, nizana kan zawn lai khan i bo ta daih si a, tichuan James-a te chu theihnghilhin kan inhmuhkhawm leh hnu pawh khan i awm ve tak silohah chuan nangmah zawk chu kan zawng leh ta che a. Mahse kan hmuh awmchhun chu i torch light ken chiah a ni, tichuan kan beidawng chu Station lamah kan let leh a. Chumi hnu reilo te ah James-a chuan min rawn phone a, nangmah a kawl thu che min rawn hrilh ta a, tichuan hmun pakhatah inhmu turi kei leh Vala leh DCP Nathana hi min ko ta a, kan manager man pawh kha hruai ve turin min ti a. Kan va thlen chuan tumah anlo awm lo a, tichuan kan hnunglam atang chuan hmaituam pahnih khan min rawn bei leh ta a, mahse eng tin tin emaw kan hneh thei hram a. Chu mi pahnihte chu kan dawp a, an pu James-a ruahmanna vel chu kan zawt a, engkim min hrilh hnu ah tihian lem chan chu Nathana nen tha a kan hriat avangin tikhan kan rawn zawngchhuak ta che a ni." a ti a. Ka lawm ngei mai, RAymonda pawh hi a lo bawn reuh hle mai. Keichuan, "A van lawmawm ve aw, nihleh kan manager pa kha engtin nge ni ta. A duh vanga tualthat pawh a ni siloa, engtin nge Sandy chhungte leh Richarada chhungte bulah kan insawifiah tak ang?" ka ti a, an vai chuan an in en kual a, an kun ta lap hlawm a. Vala chuan, "Kan insualna lamah Nathana hmaituam zinga pakhatin a vit tur chu Manager khan a lo dang a, manager chu kan chan ta a ni." a ti a, ava han pawi thin tak em. Tichuan keimah bawk chuan, "Nih leh manager nupui kha? Chuan a fanu pawh kha?" ka ti leh a, Nathana chuan, "Kha hmaituam pahnih te khan an rawn hruai a, min vau nan an hmang a, mahse tunah chuan damdawiinah a nu bulah a awm e. A pasal thih thu pawh a hre tawh a, a tuar na viau nangin James-a kan man erawh a lawm thu te a sawi a, tunah chuan kan SI ten an buaipui mek, keini chu inrawlh angai tawh lo ang." a ti a, ka van khawngaih tak em.
Tichuan Raymonda, Vala, Inspector Ramtea leh Jeneti te chu kan mangtha alo hun ta, Nathana chuan Raymonda chu chibai pahin, "Kan hnaa min rawn puih avangin kan lawm hle mai, its an honour to fight by your side.." a ti a, Raymonda chuan, "The honour is all ours...keini pawh kan lawm e, thawhpui in nuam e." a ti a. Vala chuan, "Kan la inhmu leh ang chu, Pathian zarah kan dam anga, kan thawh ho leh ngei ka beisei." a ti a, Jeneti chuan, "Ni e, keipawh in bula thawh a nuam ka ti, chuan thil pakaht chiah, ASP Rinawm, nupui nei ve tawh la, i senior dawn tawh, bialnu tal nei rawh." a ti a, Nathana chu a nui huk a, ka zak ve reng. Tichuan Raymonda te chu kan thlah liam ta a, Nathana nen chuan kan in lamah kan hlawhtlinna lawmnan thingpui kan in dun ve ta vel mai mai a. Nathana a haw hnu chuan ka cousin Tluangtei chu ka room atang chuan alo chhuak a, "U Rin, tunge khapa kha a van chhelo em em." a rawn ti a, keichuan nuih huk pah chuan, "An ti fo a lawm, ka senior a nih kha..Nathan Malsawmkima a nih kha, Deputy General of Police ngat mawle." ka ti a. A nui vur vur a, "Mahse i attractive daih zawk.." a ti a, ka lai lek lek. Amah bawk chuan, "I laptop ka khawih a nia aw, FB ah ka account ka log in a nia, story ka chhiar mek a." a ti a, keichuan, "Eng story maw?" ka ti hu a. Tluangi chuan, "Khaa...Aaron Malsawmdawngzuala ziah ZUALTEI THLA A HRANG tih kha, a hlauhawm rap, hlauhawm lampang ania, a hmelchhiat ang aiin a thawnthu chu a chhiar tlak ve lutuk, thlahrang thawnthu tho HAW RAWH U tih leh EMILY ZODINPUII tih te pawh a ziak alawm. Tunah hi chuan Detective thawnthu, Police Officer te pahnih hnuchhuina lampang a ziak mek a, youtube lamah pawh Chhantea Pautu in ngaihthlak turin a chhiar thin." a ti deuh luam a, tunge Aaron Malsawmdawngzuala pawh chu ka hre ve der lo, dawt phuah chawp mai mai ziak a intih lar tum tiin engavak ka ngai lo, ngawi reng chuan inbual tur chuan ka luhsan ta daih a.
THE END
THE ADVENTURE OF NATHAN AND RAYMOND
Writtten by : Aaron Malsawmdawngzuala
Raymonda chu a vei kual a, a inngaihtuah nasat hmel hle mai. Nathana pawh chu Raymonda'n a hnekna, a mi duk chur vur a deh pahin a thu tum bur bawk a, kei leh Vala chu kan lo titi mek bawk a, ka mit sir hian Jeneti chu ka melh leh zeuh zeuh thin a, a chhelo reuh em a ni. Raymonda chu a tawng chhuak tawh dawnlo amaw tih hnuah chuan, "Val, engtin nge James-a chu inlo hriat ve a?" a rawn ti chhuak hlawl mai a. Vala chuan, "Jeneti nen hian kan rawn zawng che alawm, engmah sawilovin i bo daih sia, chumi hnuah Inspector Ramtea hnen atangin i awmna kan hria a, DCP Nathana leh ASP Rinawma te case kal mek i puih thu kan hre ta a, chuan DGP Sangliana hnen atangin in chanchin kan hre ta a ni." a ti a. Nathana chuan, "Anih leh kan manager thi theilo hi??" a lo ti ve bawk a. Jeneti chuan, "DGP in min hrilh dan kha chuan Bank Manager hi a thi tawh angin a sawi a, mahse nangmahni kan zawnna lamah che u kan hmu a, tichuan zui ru in kan man ta a ni." a ti a. Nathana chu a tho a, manager chu nikhawhrelovin ala awm reng a, a hmaiah chuan tui a leih a, a rawn harh chiang hle mai, a thaw hrawk hrawk a. Manager chuan hlauh hmel takin, "Khawngaihin min kaltir ru..engmah ka ti velo, James-a vek a ni." a ti a, a tap pur mai a. Raymonda chu rawn pheiin, "Nangmah vang teh hrep hian kan buai zia hi hre rawh, chuan i thianpa James-a vang hian Nathana nen hian kan insual asin." a ti a, Nathana chuan Raymonda chu a va melh hu a, Raymonda chuan, "Ihh..DCP Nathan ka tihna.." a tih bah nuai a, Vala a lo nui huk lehnghal, ava hahthlak thin. Nathana chuan, "Awle, James-a nena in thil plan te, enge in tihtum, engkim sawi la, chuan na i tuarlo ang." a ti a. Manager chuan "James-a hi ka thianpa a nilo, ka thianpa angin ka sawi mai chauh a ni. Diktak chuan ka hmelma a ni mah zawk." a ti daih mai a. Keichuan awihloh hmel zet hian, "Phakar tum duh suh, heti khawp hian police ho min tibuai tawh a, engvangin nge i hmelma chu i puih tehlul ang?" ka lo ti a, manager chuan, "Min tihluih tir a ni, duhthlan tur ka neilo a ni." a ti a, Raymonda chuan, "Enge awmzia?" a ti a, Manager chuan, "Min bum a, min vau a, min blackmail a, Sandy pawh kha ka ngaizawng hauh lo, ka nupui leh fanau te chhanhim nan ka ngaizawng der ta nih kha, chuan kei hian tihluihna avangin Sandy leh Richarda te kha ka thah phah ta ni." a ti a, kan vai chuan mak kan ti tlang hle mai. Nathana chuan, "Thil thleng hi enge awmzia, a bul atangin han sawi vek teh le.." a ti a.
Manager chuan, "Diktaka sawi chuan Sandy kha ka staff te zinga ka ngainat ber a ni, pasal hual a neih thu te a sawi khan ka lawmpui lutuk zawk asin. A hna ah a rinawm a, a taima a, a hun takah te rawn kalin a tlai ngailo, ka fanu ang maiin ka en zawk a ni. Mahse vawikhat chu James-a hi kan bank ah chuan a lo kal a, a tir chuan customer pangngai angin a rawn kal a, mahse a hnuah ka nupui leh ka fanu a kidnap mek thu a sawi ta mai a, tichuan pawisa a mamawh zat ka zawt a, ka nupui leh fanu te chhuah turin ka ngen a, mahse pawisa a duh loh thu a sawi a, a duh chu Sandy mutpui a ni. Ka rilru a hah em em a, tihngaihna ka hrelo. Atawpah chuan ka remhriat dan tha ve bera ka ngaih ang chuan ka che ve ta a, Sandy chu ka ngaizawng der ta a, Sandy pawh chu ka khawngaih em em a, mahse ka zar buai lui ta reng mai a ni. Sandy rilru chu a hah tan ta a, min hlat tial tial a, mahse keiin ka hnaih tulh tulh thung. James-a lah chuan min rawn vau reng bawk a, inhmu turin min sawm a, hmun hran hran ah min hmu a, ka chhungte lahin khawnge ka nupui leh ka fanu awmna min zawt reng a, keichuan an zin angin dawt ka sawi zel ringawt a. Vawikhat chu Sandy chu James-a nen ka inhmelhriat tir ta a, tichuan James-a nen chuan kan zarbuai dun ta reng mai a, a mangang bawk si engmah a sawingam bawk silo chu a rilru thlengin a buai phah ta hial a, ka khawngaih khawp mai. Vawikhat chu James-a chuan Sandy chu hmun pakhata hruai turin min ti a, tlai office banah chuan ka hruai ta a, mahse ka rinloh takin maiin sandy chu a manbet thut a, damdawiin a chiu ta a, sandy chu a zawi nghal vek a, mahse a rilru chu a harhfim vek thung. James-a chuan motorah a luhpui a, a duhtawkin a pawngsual ta a, kei chu ngawi rengin hlauthawng takin James-a chu ka lo veng a. A duhtawk hnuah chuan Sandy chu a rawn hnukchhuak a, silai min pe a, kap turin min ti ta mai a. Atir chuan ka hreh em em a, mahse a phone phawrhin tu emawni a phone a, chumi hnuah phone chu min rawn pe a, ka nupui na tuar thawm ka hria a, ka mangang takzet. Duhthlan tur dang ka neih takloh ah chuan Sandy chu hreh chung chung chuan silai chuan ka tin a, ka tap zawih zawih a. Sandy chu a che thei tawh silo a, mahse a la harhfim reng. "Sir min that suh khawngaihin." tiin min ngen chiam a, mahse duhthlan tur dang ka nei silo, lehlamhawiin kah ka tum chiah chu James-a chuan min rawn dang a, chemte a vit tur zawkin min ti a, ka hreh takzet. Mahse tih luihna avangin Sandy chu ka vit hlum ta a ni." a ti a, a sawi pah pawh chuan a tap pur mai a.
Nathana chu a ngawi vang vang a, "Nihleh Richarda thung kha le?" tiin a zawt leh a. Manager chuan, "Ni e, ani pawh kha ka thah a ni, James-a thu ka awihloh apiang hian James-a hian ka nupui leh ka fanu hmangin min vau zel sia, duhthlan tur ka neilo a ni. Tunah pawh hian James-a chuan ka nupui leh ka fanu chu ala kawl reng alawm. Khami zan in lak atanga ka tlanbo zan pawh khan, James-a bulah chuan ka let leh a, ka nupui leh fanu min chhuahsak tawh turin ka ngen a, mahse hna ila nei a ti tlat sia, tichuan a thu chu ka awih leh ta mai a ni. James-a chuan Richarda chu a kidnap a, a hma ang bawkin that turin min ti leh a, enge a chhan ka zawh lahin ka mimal buaina a ni a, ka hmanrua mai i ni, a chhan i hriat angai lo tiin min vin hrep a, chumi hnuah Richarda pawh chu hreh tak chungin ka that leh ta a ni." a ti leh a. Vala chu a lo tawngchhuak ve ta a, "Khami zana, RAymonda te lak atanga i tlan chhuah dan kha le?" a ti a, Manager chuan, "Khami tlai khan James-a hian ka lu ah hian thil enge maw bawm te tak te hi a bel a, a tir phei chuan bomb amaw ka ti hial a, mahse a nihloh thu min hrilh a. Khami ni khan nangni ho hian min man dawn tih pawh min hrilh lawk vek a ni, mahse engtin nge a hriat lawk erawh chu ka hre hauh lo. Chu thil a bel chu rubber ang deuh hi a ni a, a chhungah chuan tui bootle, chhinkhat vel leka tam aniang, a awm a. Ka lu a a bel hnu chuan sam lem a rawn la a, a them a chep thla a, chu bawm ka lu a a bel ah chuan a bel hnan a, "ZANIN AH HEMI BAWM, I LU A MI HI A PUAK ANGA, CHUAN I THI DER ANG, CHUAN KA RAWN CHHANCHHUAK ANG CHE." a ti a, voice recorder chip hi ka coat ah avuah bawk a, tichuan nangni hian min man ta a, mahse ka tlanchhuak thei dawn emaw ka tih laiin Raymonda hian minlo man a, chuan khami zan khan James-a sawi ang ngei chuan ka lu a thil a puak ta a, ka thi der a, nangni chu motor phenah in biru a, chutih lai chuan ka tlanchhe ta a ni." a ti leh a, James-a chetdan mai mai chu aw...ka va han haw tehkher em. Nathana chuan, "Awle, i thusawi chu thudik a nih chuan, i nupui leh i fanu te chu kan chhanchhuak em em ang, mahse nang erawh i tualthah avang hian kan chhuah zalen ve thei che angem tih chu kan sawi theilo." a ti a, Manager chuan, "Ka pu, keichu ka tihsual man ka hmu em em ang, apawi ka tilo, mahse ka nupui leh fanu te chhan hram ru." a ti a, Raymonda chuan, "Anih chuan tunah enge kan tih ang?" a ti a, Nathana chuan, "Manager hi lock up ah khung phawt ila, tun dinhmunah chuan kan vai hian tumah kan him lo.." a ti a, Vala chuan, "Jeneti nen hian James-a chuan min la hre velo." a tih lai tak chuan Nathana phone a rawn ri a, phone atang chuan James-a aw tih hriat tak chuan, "Hello Pu Nathan, ka bumna che u kha enge a an? Raymonda nena insual chu a nuam maw?" a rawn ti ham ham a, Raymonda chuan thinrim zet leh zawi sap chung si hian, "James....i va la inchhir dawn tak em." a lo ti a, James-a chuan, "Khaih khaih khaih insum teh, chuan Raymond...bialnu i nei chhelo hle mai, Jenet Lalduhawmi maw a hming khah..chuan i partner Vala pawh, a va nuam sawt dawn ve..GOOD LUCK GUYS." tih pahin phone chu a dah daih a.
Raymonda chuan, "Val, James-a chuan Jeneti nen chuan a lo hre leh hman vek tawh che u nih chu." a ti a, Vala chuan, "A che rang hle mai, mi naran chu a nilo tawp mai." a lo ti ve bawk a. Nathana chuan, "Raymond, James-a khan i bulah enge a sawi a?" a ti a, Raymonda chuan, "Inlo thawk dun reng a ni tiin min hrilh a, Police hna i rawn chelh chhoh dan te leh corrupt Police SI i nih lai vel te nen, thiam takin a rawn sawi a, a tir chuan ka awih biklo. Mahse min hrilh zawh hnuah nangman min rawn call tur thu leh amah nen in tangdun reng a ni tih min rawn hrilh dawn angin a sawi bawk che sia. A sawi zo chiah phone adah kha nang lah khan ilo call ve leh chiah bawk si nen...ka tihpalh ani DCP...James-a bum mai mai theihin kanlo awm a, a zia lo hle mai." a ti deuh luam a. Nathana chuan, "Pawilo, keipawh ka lo ringhlel che a, sorry." a ti ve bawk a. Diktak chuan James-a vang hian kan rilru a hahtlang a nih hi, tihtheih lah kan nei tlem si. Raymonda chuan, "Tunah chuan Richarda leh Sandy thihdan chu kan hre ta phawt mai ah, mahse an chhungte bulah engtin nge kan sawi tak ang? A thattu chu kan kawl reng a, mahse a ni pawh a nupui leh a fanu te dinhmun hlauhawmah an awm ve tho si a, Richarda leh Sandy chhungte hian an hriat chuan Manager hi chu an ngaidam dawn hauh silo." a ti a, Nathana chuan, "Ni khawp mai, mahse an thihna chungchang kha chu dahtha ila, an thihdan chu chhuichhuah chawp ngailovin kan hre ta phawt mai a, James-a hian hemi te pahnih a thahna chhan ber chu a huat vang a nilo, min thlem nan leh min vau nan a ti a ni." a ti a, Jeneti chuan, "DCP Nathan , kei hi min mamawh ve dawn em?" a lo ti a, keichuan rang zet hian, "Mamawh." ka lo ti vat a, Raymonda chuan min melh no lo teh e. Nathana chuan, "Tehreng mai Jenet, kan vaia kan thawh tlan chuan James-a hi kan man em em ang." a ti a, Vala chuan, "Keipawh ka theih tawp ka chhuah ang." alo ti ve bawk a. Nathana chuan, "Hei khua a tlai zel a, tunah chuan kan haw vek anga, chaw te kan ei anga, zan dar 8 a che chhuak tan thei turin dar 7 leh chanve ah chuan Raymonda te inah chuan kan kim thap tawh tur a ni." a ti a, a thu ber Nathana thuchhuak chu tha kan ti tlang bawk aniang, kan lu kan bu sap sap hlawm a, tichuan kan haw ta a. Ina ka haw chu ka nu leh nula pakhat kum 23 bawr vel niawm tak, hang ngaihno bei tak mai, sam kir, chhe lemlo tak hi anlo thudun a, an titi bawrh bawrh a. Ka nu in min hmu chu, "Bawiha, hei hi Saituala i Ni Liani fanu naupang ber Tluangi a nih hi." a ti a, kan in chibai a, min nuih seng lehnghal. Ka nu chuan, "Ka fapa a nih hi Tluangi, i u Rina a nih hi, tlangval senior a ni der tawh, nula a ngaihsak lo lutuk a." ala ti zui, ka zak ve teuh hle mai. Tluangi chuan, "Haha, a luck viau kalo ring asin." tiin minlo fiam ve bawk a, ka nu chuan, "Bawiha, Tluangi hi tun thla chu hetah kan bulah a awm ve a ngai dawn a, an in exam dawn a, i room ah sawn mu mai se, nangchu thutthlengah i mu mai anga." a ti a, keichuan peihlo ru tak chungin, "Nia, apawi hleinem." ka ti a. Tluangi chuan, "A ngailo sin, chhuatah pawh ka mu thei a.." a ti a, mahse ka nu chuan a phal tlat silo, ava buaithlak thin em awwwww.
Zan alo thleng a, dar 7:30 a rik chuan Raymonda te inah chuan kan kim ta thap a, DGP Sangliana pawh alo tel ve a. Nathana chu a ding hluai a, "Awle, zanin chu kei leh Vala kan kaldun anga, Raymonda leh Rinawma an kaldun anga, kan inthen hrang ang. Jeneti erawh chu kan DGP bulah i awm thung ang. Raymonda leh Rinawma chu Ramhlun Venglai field atang khan veng mawng lampang thleng in zu kal anga, Tresury te, Khatla te thleng hrut kualin ngun takin zawng ang che u. Rinhlelh awm deuh in hmu anih chuan man pawp mai rawh u, anni lo anih leh kan chhuah leh mai ang. Kei leh Vala erawh Durtlang lam ah kan chho anga, Sihphir thlengin kan hrut chhuak ve bawk ang. Chuan DGP Sir leh Jeneti chu Kulikawn lam ah lo zu zawng ula a tawk chauh ang." a ti a, tichuan dar 8 a ri a, hmanrua te pawh kan inring vek a, tichuan kan chhuak ta hlawm a. Raymonda nen chuan Ramhlun Venglai field atang chuan rinhlelhawm deuh te chu kan melh a, tlangval zuirui ho chu kan hmu zeuh zeuh a, mahse James-a hmel hmuh tur chu a vang kher mai. Nathana te nen chuan kan in contact deuh reng bawk a, anni pawh an beidawng kher mai. Jeneti te lam pawn thu lawmawm an nei lemlo, Nathana te phei chu Serkhan an thleng tep tawh hial a, keini pawh Capital Complex velah kan tei kual vak vak ringawt ani ber mai. Zan dar 11 a ri ta der mai, Raymonda chuan, "Kan inhmukhawm tawh mai dawn mi ASP?" a ti a, keipawh chuan, "Nia, engvak kan ang dawnlo nih hi, mahse haw pahin kan zawng chho leh dawnnia." ka ti a, tichuan kan haw chho ta a. Kan inhmuhkhawm meuh chuan zan dar 1 a ri der tawh a, DGP Scorpio dum nalh tak ah chuan kan vaiin kan thu khawm a, kan titi mawlh mawlh hlawm a. Chutia kan titi lai chuan car pakhat hian chak tawkin min rawn su thawi fua a, kan phu zuk hlawm a. Nathana chuan, "A va mawl mai mai e awww.." a ti nung nung a, Vala chuan, "Tunlai thalai ho tak hi chu a.." a lo ti ve bawk a. Raymonda erawh chuan a en zui vawng vawng a, a ip te a tangchuan thlalak te tak te hi a phawrh a, chutah ring tak hian, "A ni e, um nghal ang u.." a ti ta chiam a, keichuan, "Tu chu maw?" ka ti a, Raymonda chuan, "Manager nupui kha, a seat hnungah ka hmu..tuna car ah khan." a ti a, Nathana chuan, "Enga?" a ti a, DGP chuan motor chu start nghalin kan um ta a. Kan tlan pah chuan Vala chuan, "Raymond, engtin nge Manager nupui a ni tih i hriat a?" a ti a, Raymonda chuan, "Ka dil alawm, vawiin tlai khan ka haw ve nghal mai hleinem, Manager nupui chu tunge a nih tih kan hriat theih nan chuan a hmel kan hriat angai alawm. A walletah alo dah a, tichuan ka kawl sak ta a ni." a ti a, Nathana chuan nui vur vur chungin, "Good Job..very good Raymond." a ti a, Jeneti pawh alo nui sang a.
Kan motor um chu a ding thut a, keini pawh chu hmun biru lai deuhah chuan kan ding ve a, kan enthla ru reng a. Motor atang chuan Manager nupui chu alo chhuak a, a hnungah chuan hmaituam pahnih an rawn chhuak ve bawk a, manager nupui chu an phuar bet tlat a. Tichuan driver seat atang chuan James-a chu a rawn chhuak ta a, kan hmelma ngei mai chu. Nathana chuan, "Sawpa saw anih saw James-a chu.." a ti a, Raymonda chuan, "Hmmm....a chaklo khawp ang." a ti bawk a. Hmaituam pahnih bulah chuan James-a chuan thil a hrilh mawlh mawlh a, mahse enge a sawi erawh kan hre phak lo. Tichuan motor ah chuan an lut leh a, an tlan leh a, kan umzui ve leh a. Minute 20 dawn kan in um hnuah chuan in pakhat bulah hian an ding a, an lut ta a. Tichuan keini chuan kan nghak deuh phawt a, an rei tak em avang chuan Nathana chuan, "Jeneti leh DGP Sir hi motorah minlo nghak ula, kei leh Raymonda leh Vala leh Rina te hian kan luhchilh anga, chanchin kan lo hrilh leh ang che u." a ti a, kan Pistol theuh chu kan phawrh a, tichuan inlam chu kan pan ta a. Kawngkhar chu Raymonda chuan na lo te hian a nem chhin a, a chhunglamah a inkalh tih a hriat theih a. Tichuan Nathana chuan min signal zeuh a, kawngkhar chu ka en ren rawn a, inla Singham-a tawka tlawh hawn pawp ka tum a, mahse Raymonda zawk chuan vawikhat a tlawh pawpa, kawngkhar chu a inhawng chiang teh asin. Rang takin kan lut a, silai chu kah inring sa in kan tin lut a, mahse tumah an lo awm lo, nikhaw hrelova manager nupui lo let reng chu kan hmu a, kan hnung atang chuan hmaituam pahnih te kha an rawn lang thut a, ka pistol chu min petthlak sak a, ka hmaiah chuan min pet thal thuai bawk a. Hmaituam pakhat zawk pawh chuan Raymonda pistol chu a benthlak sak a, Raymonda chu a bin thal tawp bawk a. Vala leh Nathana an rawn hawilet a, nalh em em hian pakhat leh zawk chuan zuan pahin an pahnih chuan ka kick thal dun bawk a, infit dun zak zak tak an ni. Tichuan kan vai chuan min thal ta vek chu a nia, pawnah chuan an tlan chhuak ta daih mai a, Nathana chu thovin manager nupui chu a pawm nawlh a, pawnah chuan chhuahpuiin kan zui nghal bawk a. DGP chuan, "Enge awmzia?" a lo ti a, Vala chuan, "Khami te kha ilo hmu hman em?" a ti a, Jeneti chuan, "An che rang lutuk, an phe zeuh a, abak chu kan hmu hman lo." a lo ti ve bawk a. Nathana chuan, "Manager nupui hi damdawi inah lo va hruai ula, khami te kha kan lo umzui ang,ramhnuai lamah khuan an tlan thla in ka hria, manager fanu zawk chu kan zawn lehphawt angai." a ti a, DGP leh Jeneti chuan manager nupui chu Hospitalah chuan an hruai ta a, keinin hmaituam pahnih te chu kan umzui ta a.
Ramhnuai lam pan chuan torch light nen chuan kan inzui thla ta a, kei leh Vala kan kal a, Raymonda leh Nathana an kal hrang a, tichuan kan inthen hrang ta a. Light phe deuh zuai zuai chu kan hmu zeuh zeuh a, mahse han um dawnin a bo leh daih zel bawk si, chu ramhnuai hmun thim tak karah chuan kan zawng ta ngat ngat a. Mahse mak ve deuh mai chu, James-a, kan hmelma ber kan hmu ve miah lo kha a ni. Vala chuan, "A chhak lam saw en la, kei thlang lamah ka zu kal ange aw...kan inphone leh mai dawnnia.." a ti a, ka chhan hma hma chuan a kal ta daih mai a. Tih ngaihna dang awm heklo le, chhak lam ram ngaw lamah chuan hlauh pawh dawnlovin ka tlan chho ta a. Thawm ka hriat theih te chu Raymonda au aw te, Nathana'n, "Kha tilam pawh kha thil engzuai ka hmu a nia.." tih te a ni. Ka zawngkual zel a, ka hnug atang chuan tu emawni hian min rawn tlawh thal tawp mai a, rang takin ka leh hawi a, mi pakhat hmai tuam a lo ni a. Ka tho vat a, chem te a keng a, mahse keiin ka pistol ka lo thlau bawk si. Min rawn vih tum chuan min bei ta chiam a, ka theih ang tawkin ka lo indang a, mahse a hmanraw keng zawk na na na chuan ka ban veilam chu a vit thawi fua a, thisen a per chhawk a, a thip ngei mai. Ka ban atanga thinsen luang chu ka dawm a, "Zawnga leh.." tih pahin a pumah chuan ka tlawh thal thuai a, a rawn tho leh a, a chemte ken chuan min rawn vih a tum a, kalo bum a, a kut ka man a, ka elh vak a, a rak tuar a. Ka hnung atang chuan tu emawni hian min rawn rek a, min pawm kang lawp a, chhuatah chuan min paih thal thuai mai a. Thawh lehnghal ka tum a, mahse ka awmah tak chuan min rap bet a, ka che thei ta lo. A hmel ka han en a, James-a a lo ni. A ipte atang chuan engemawni hi a rawn phawrh chhuak a, min chiu ta a, ka mut a chhuak ta riai riai mai, second 5 vel lek hnuah chuan ka muhil ta a niang chu, engmah ka hre zui tawh lo.
Tui vawt takin ka hmai a rawn theh thawt avang chuan ka harh chiang ngei mai, ka meng a, ka hma zawn taka James-a lo ding chu ka hmu a. Thutthleng ah chuan nget taka phuar beh ka lo ni a, ka che thei thak lo. Ka tal vak vak a, James-a chuan nui chungin, "Haha, tal vak vak duh suh, Rinawm, tinge engmah hi in hriatthiam theihloh le, tunah hian ka naute pahnih khan i boss Nathana leh in detective chhuanvawr Raymonda te chu that turin an kal mek asin. Chuan, Vala pawh kha ka dahthat tir nghal ang, chutih rual chuan Jeneti pawh. Mahse Jeneti erawh kha chu ka duhtawka ka pawngsual hnuah chauh ka that ang, a chhelo ka ti reuh emai." a ti vel ham ham a. Keichuan thinrim takin, "Zawnga, mi tenawmpa, keichu i duh chuan min that rawh, mahse Raymonda leh Nathana erawh i that lovang. Min that pawh ni la, phuba la turin an lo kal em em ang, chutih hunah chuan thihna hlauhawm zia hi i hre ve tawh ang." ka ti ve ngat a. James-a nui hmel chu thinrimna in a inthlak rang kher mai, lehlam a hawi a, a thaw hluam hluam a, a rawn hawi let leh thut a, na em em mai hian min hnek chawrh mai a, a na ngei mai. Mahse na ti awmlo ang deuhin ka ka chhungah thisen chu a hmaiah chuan ka chhak berh luai a, "Kha zawng kha em ni i theih a? I hlauthawng em ni? Nathana leh Raymonda chu an lo kal ang, tichuan an rawn that ngei bawk ang che." ka ti leh ngat a, James-a chuan rum taka min melh pah chuan, "Nang hi chu i luhlulin i tuar a chhel ve khawp mai, ahma pawn ka bum kual hrep hnuah che hliam tuar chungin i pu Nathana chu i chhanchhuak thei kha a nia, maimawm tur nei leh hlauhawm takin a seh hnuah che pawh ila damchhuak thei a, chuvang chuan tunah hian i dam chhuah leh hmain that law law che ila atha ang." a ti ta mai a, min thah chu hlau viau mah ila, tihtheih ka nei der silo. Mahse min that pawh nise, Raymonda leh Nathana te kutah ka inghat a, kei hi min chhan hmanlo a nih pawhin James-a tal hi chu an rawn man anga, a chungthu an rel sak ngei ang tiin beiseina sang tak ka neih tlat avang chuan tlawm hmel ka pu duh thak lo. Silai a phawrh ta a, ka chalah tak chuan min tin ran mai a, "Thuchah hnuhnung sawi duh te i nei mial em?" tiin min zawt vel a, keichuan zam hauh lo hian, "I thihna darkar chu a hnai tial tial, tawngtai nasa rawh, mahse i Pathian meuh pawn a chhan thei tawh dawn silo che a." ka ti a, James-a chuan thinrim zet hian, "Engmaw i sawi a?" tiin lungawiloh hmel tak chuan min en a, keichuan chhang lovin nui lui tih hriat tak hian ka nuih vak vak a, mahse diktaka sawi chuan ka hlauthawng a, ka nuih a za hauh lo. James-a bawk chuan, "I thi mai tawh dawn a ni a, engvangin nge i la nuih vel a?" a ti khur khur a. Keichuan hmuhsit hmel zet hian ka en a, muang chang hian, "Mi dawihzep tak ilo nih hi, min thah i tumna a rei tawh tehreng nen, tun thlengin minla that ngamlo chu a nia." ka ti a, a thinrim ngei mai. Vin zet hian, "Awle, ka ngamloh i ring ani maw? Mangtha le ASP Lalrinawm, hremhmunah kan inhmu dawn nia.." tih pahin a silai chuan min tin ang ren rawn a, ka thi ngei dawn ani tih pawh ka hre lawk vek, ka maimitchhing a, ka mithlaah chuan ka nu leh ka pa, ka chhungte leh ka thian te zawng zawng leh Nathana thlengin anlo lang nghal chuai chuai a, mahse mi kap dawn chiah tih ah chuan a phone a rawn ri hlauh mai a, a silai ken chu a dah thla a, ka thaw huai mai.
Phone chu a chhang a, tichuan ka hma zawn takah chuan hlim hmel tak hian, "Haha...Rina, hei ngaithla teh ka nau te an nih hi, thu lawmawm tak ani, lo ngaithla ve teh." a ti a, phone atang chuan aw tham thiak hian, "Boss, Raymonda leh Nathana chu kan chiu muhil a, Truck hnungah phuar beh in kan dah a, Jeneti leh an DGP erawh kha chu damdawiinah Bank Manager nupui buaipui khan an la awm a, anni pawh kan dahtha vat ang. Tunah lawk khan Raymonda partner Vala chu kan man chiah e, kan that nghal dawn em ni?" a rawn ti ta mai a, ka hmel chapo tak pawh chu manganna in a rawn thlak nghal a. James-a lah chu nasa em em hian a nui uar uar a. Ka thu hriat chuan min barakhaihin min ti hrilhhai hle mai, James-a chuan, "Naute u, in thawk tha e, mahse Vala kha chu ka bulah ngei hian lo hruai ru, keimah ngei hian Rinawma hmuh lai ngei hian ka that duh a ni." a ti a, ka thlan chu a far zawih zawih a, zeplo chuan ka zam chhe der mai. Phone chu a dah a, James-a chuan, "Rinte...tunah chuan i pu Nathana pawh kan kutah a awm a, nang leh Vala kan thah zawh hunah ani pawh kan that ngei ang. Haha, tunah chuan tuin nge chhan ta ang che?" a ti ham ham a. Mahse kei chuan hlauhthawng tak chung si chuan ka luhlul ka la chhuah fan a, "James, nangang mi tenawm lutuk hi chu engtikah emaw chuan hremna i hmu ngei ang. Nathana emaw Raymonda emaw, tupawh chu i hneh a ni thei e, mahse kan ram tana mi rinawm, nangni ang misual man tu tur hi an la piang zel anga, an awm zel tho ang, i chak rei chuanglo ang." ka la ti fan a, "Kan hria ang chu, huiham, thian duhtak Rinawm, nang tak hi chu awww...i danglam dawnlo a nih hi." tih pahin ka thutna chawp chuan min tlawh pawp a, ka thutna thutthleng, thing atanga siam pawh chua atliak sawm vek a, tichuan hmin hnungkhirh a, ka kut chu nghet takin aphuar a. Tichuan a phone chu a rawn ri leh a, "Hello, awww..inlo thleg maw, awle ka lo chhuak e." a ti a, min phih tho lawp a, tichuan pawn lam pan chuan min chhuahpui ta a. Khua alo var der tawh a, zing dar 7 vel niawm tak a ni, khaw awmdan en chuan. Pawnah chuan hmaituam pahnih te khan dimlo baksak hian Vala chu an rawn hnuk phei a, Vala chu a thi hnuang mai a. James-a chuan min pawt thu hnawk a, ka thingthi a, tichuan Vala hma zawnah tak chuan min hnuk phei a.
James-a chuan, "Naute u, kha ka pistol hi la ula, chemte zawk kha minlo pe teh u, Vala hi Rina hmuh lai ngei hian ka that dawn a ni." a ti a, tichuan hmaituam pa pakhat zawk chuan chemte chu a pe a, tichuan silai chuan Vala chu a tin a, hmaituam pakhat leh zawk pawh chuan Vala chu silai chuan a tin ve bawk a, kei rawh che theiloa phuarbeh ka ni bawk a, Vala thi tur chu ka en reng a. James-a chu kun hniamin Vala chu a rum tak leh hmuhsit hmel tak hian a en a, "Pu Val, ilo inrawlh ve duh kher kher ani tiraw? Hetiang game hlauhawm lutukah i lo inrawlh ve duh a, i thihphah dawn ta mai mai si a, a pawi ngawt mai, nangchu mangtha phawt mai le..engemaw sawiduh i nei em?" a ti vel a, ka hlauthawng tawh kher mai, ka thin chu a phu dup dup a. Mahse ka rinloh tak maiin Vala chuan chapo hmel tak hian James-a chu a rawn en chho a, a nui ta vak vak mai a. Keipawh chuan mak ka ti em em a, kei aia mak titu chu James-a a ni. James-a chuan thinrim tak hian, "Enge ila nuih vel a, mawh?" a ti vin tuar a, Vala chuan, "Huiham, Mawla, i fingin i lo phakar viau a maw ka lo ti a, rin aiin ilo ropui vak loh hi a.." a ti a, a thusawi chu ka hrethiam thak lo. James-a chuan mak ti tak hian, "Eng thu phiangsen nge maw i sawi le?" a ti a, Vala chu muang chang chuan a rawn ding chhuak a, a bula amah mantu hmai tuam pahnih te chu a signal zeuh a, tichuan chu hmaituam pahnih te chuan James-a zawk chu an silai ken chuan an tin ta daih mai a. James-a hmel chu manganna in a khat tih a awmdan atang chuan a hriat theih a, chutih rual chuan kei ngei pawh chuan mak ka ti em em a. Hmaituam pakhat zawk chuan a hmaituamna chu a phelh a, Nathana a lo ni. Nuih huah huah pah chuan Nathana chuan, "Khai a, thianpa...kan thangah chuan a tawpah chuan i awk ta ngei e, You are under arrest.." a ti a, hmaituam pakhat leh zawk chuan a hmaituamna a phelh ve leh a, Raymonda a lo ni. Raymond apawh chu a rawn nui sang mai a, "Pu Ja-mes Nono-a chu, min tibuai rei bawk a, i huntawp chu alo thleng ta e." a ti a, James-a hmel chu hlauhna in a khat a. Chuti lai chuan motor pakhat hi a rawn tlan a, kan bulah chuan a rawn ding a, a chhung atang chuan Inspector Ramtea leh Jeneti an rawn chhuk a, a hnungah chuan constable pali vel chuan mi pahnih an rawn hnuk chhuak bawk a. Jeneti chuan, "James, hei hi i naute tak tak zawk chu an ni, kan finna hi chu i hneh talo chu a nih hi." a rawn ti a, James-a chu engmah a sawi thei lo, hlauhna leh mak tihna in a kaht a. Constable ho chu an rawn kal a, min phuarna te chu an rawn phelh vat a. Min phelh ta maw tihah chuan ka tlan phei a, ka theih tawpa na in James-a chu ka va hnek thal thuai mai a, Inspector Ramtea chuan minlo dang vat a, ka thinrim em a ni. James-a chu a rawn tho tual tual a, chhuata a chemte tla chu chhar in constable pakhat chu a vit ta mai a, chu veleh Nathana chuan James-a chu a thin ah tak a kap ta dur mai a, a let nghal tawp a, a thi der mai.
Kan vai mai chuan kan ngawi thap a, James-a ruang chu kan en thap a. Raymonda chuan Nathana dara rawn vawn pah chuan, "DCP, keiman mawh ka phur mai ang, lungngai suh." a ti a, Vala chuan, "Nilove, keima kah angin sawi mai ru." a lo ti ve bawk a. Kei pawh chuan, "Tlanchhuah a tum a, encounter shoot order hmangin ka kap ni mai rawh se." ka lo ti ve bawk a. Inspector Ramtea chu lo kal hnaiin, "Aih, keima kah a ni, keima kah angin sawi mai ang u, tawrh tur ang chu ka tuar mai ang." a rawn ti ve bawk a. Nathana chuan, "Atawk, ngawi rawh u, a kap hlum tu chu keimah ngei ka ni a, keima kah a ni. Tlanchhuan a tum a, hei tunah pawh kan constable pakhat ke ah a vit a, chuvang chuan kah mai kha a pawilo zawk. A hrim hrimin tunah chuan kan buaina ber James-a chu a thi tawh a, keichu ka thaw huai mai." a ti a. RAymonda chuan, "Pu Ramte, constable hian na a ti lutuk ange, damdawiinah lo han kalpui ta che." a ti a, Inspector pawh chuan a kalpui ve ta mai a. Tichuan kan hmelma ber James-a chu a awm ta lo, James-a ruang chu constable ho chuan an phur a, tichuan keini pawh chu kan Office lam pan chuan kan kal ta a. Office ah chuan kan thu thap a, DGP chuan kan hna thawhthat zia te chu sawiin min fak hlawm hle a, a bikin min fak bik deuh riau lehnghal a, nuam ve reng. DGP chhuah hnu chuan Nathana bulah chuan, "Sir, engtin nge min rawn zawnhmuh reng reng a?" tiin ka zawt a, Nathana chuuan, "Raymonda zawt mai rawh.." a ti a. Raymonda chuan nui vur vur chung chuan, "Nia, nizana kan zawn lai khan i bo ta daih si a, tichuan James-a te chu theihnghilhin kan inhmuhkhawm leh hnu pawh khan i awm ve tak silohah chuan nangmah zawk chu kan zawng leh ta che a. Mahse kan hmuh awmchhun chu i torch light ken chiah a ni, tichuan kan beidawng chu Station lamah kan let leh a. Chumi hnu reilo te ah James-a chuan min rawn phone a, nangmah a kawl thu che min rawn hrilh ta a, tichuan hmun pakhatah inhmu turi kei leh Vala leh DCP Nathana hi min ko ta a, kan manager man pawh kha hruai ve turin min ti a. Kan va thlen chuan tumah anlo awm lo a, tichuan kan hnunglam atang chuan hmaituam pahnih khan min rawn bei leh ta a, mahse eng tin tin emaw kan hneh thei hram a. Chu mi pahnihte chu kan dawp a, an pu James-a ruahmanna vel chu kan zawt a, engkim min hrilh hnu ah tihian lem chan chu Nathana nen tha a kan hriat avangin tikhan kan rawn zawngchhuak ta che a ni." a ti a. Ka lawm ngei mai, RAymonda pawh hi a lo bawn reuh hle mai. Keichuan, "A van lawmawm ve aw, nihleh kan manager pa kha engtin nge ni ta. A duh vanga tualthat pawh a ni siloa, engtin nge Sandy chhungte leh Richarada chhungte bulah kan insawifiah tak ang?" ka ti a, an vai chuan an in en kual a, an kun ta lap hlawm a. Vala chuan, "Kan insualna lamah Nathana hmaituam zinga pakhatin a vit tur chu Manager khan a lo dang a, manager chu kan chan ta a ni." a ti a, ava han pawi thin tak em. Tichuan keimah bawk chuan, "Nih leh manager nupui kha? Chuan a fanu pawh kha?" ka ti leh a, Nathana chuan, "Kha hmaituam pahnih te khan an rawn hruai a, min vau nan an hmang a, mahse tunah chuan damdawiinah a nu bulah a awm e. A pasal thih thu pawh a hre tawh a, a tuar na viau nangin James-a kan man erawh a lawm thu te a sawi a, tunah chuan kan SI ten an buaipui mek, keini chu inrawlh angai tawh lo ang." a ti a, ka van khawngaih tak em.
Tichuan Raymonda, Vala, Inspector Ramtea leh Jeneti te chu kan mangtha alo hun ta, Nathana chuan Raymonda chu chibai pahin, "Kan hnaa min rawn puih avangin kan lawm hle mai, its an honour to fight by your side.." a ti a, Raymonda chuan, "The honour is all ours...keini pawh kan lawm e, thawhpui in nuam e." a ti a. Vala chuan, "Kan la inhmu leh ang chu, Pathian zarah kan dam anga, kan thawh ho leh ngei ka beisei." a ti a, Jeneti chuan, "Ni e, keipawh in bula thawh a nuam ka ti, chuan thil pakaht chiah, ASP Rinawm, nupui nei ve tawh la, i senior dawn tawh, bialnu tal nei rawh." a ti a, Nathana chu a nui huk a, ka zak ve reng. Tichuan Raymonda te chu kan thlah liam ta a, Nathana nen chuan kan in lamah kan hlawhtlinna lawmnan thingpui kan in dun ve ta vel mai mai a. Nathana a haw hnu chuan ka cousin Tluangtei chu ka room atang chuan alo chhuak a, "U Rin, tunge khapa kha a van chhelo em em." a rawn ti a, keichuan nuih huk pah chuan, "An ti fo a lawm, ka senior a nih kha..Nathan Malsawmkima a nih kha, Deputy General of Police ngat mawle." ka ti a. A nui vur vur a, "Mahse i attractive daih zawk.." a ti a, ka lai lek lek. Amah bawk chuan, "I laptop ka khawih a nia aw, FB ah ka account ka log in a nia, story ka chhiar mek a." a ti a, keichuan, "Eng story maw?" ka ti hu a. Tluangi chuan, "Khaa...Aaron Malsawmdawngzuala ziah ZUALTEI THLA A HRANG tih kha, a hlauhawm rap, hlauhawm lampang ania, a hmelchhiat ang aiin a thawnthu chu a chhiar tlak ve lutuk, thlahrang thawnthu tho HAW RAWH U tih leh EMILY ZODINPUII tih te pawh a ziak alawm. Tunah hi chuan Detective thawnthu, Police Officer te pahnih hnuchhuina lampang a ziak mek a, youtube lamah pawh Chhantea Pautu in ngaihthlak turin a chhiar thin." a ti deuh luam a, tunge Aaron Malsawmdawngzuala pawh chu ka hre ve der lo, dawt phuah chawp mai mai ziak a intih lar tum tiin engavak ka ngai lo, ngawi reng chuan inbual tur chuan ka luhsan ta daih a.
THE END
Comments