ONCE UPON A TIME IN MIZORAM (A mizo zombie horror story) Written by : Aaron Malsawmdawngzuala Episode - 1 : FLESH AND HEMP

 ONCE UPON A TIME IN MIZORAM

(A mizo zombie horror story)

Written by : Aaron Malsawmdawngzuala

Episode - 1 : FLESH AND HEMP

***************************************************

YEAR - 1987

October thla a ni a, chhum a zing chuai mai a. Dar 5 a pel tawh a, khua a thim lek lek tawh. Zova, kum 38 mi, sa a kah theih em avanga khaw pum in an hriat, hmel pawh chhe lem lo tak mai chuan a sanghal kah hliam chu um zuiin a hniak chu a chhui thla zel a. Chu ramhnuai nelawm loh tak mai chu a reh em em mai a, "A va chhuk thui hman em em ve mawle?" tiin Zova chu a phun ri sup a.

Rei fe a chhuk hnu ah chuan vawk nguk vak ri ninawm tak hi a hria a, a sanghal kah hliam ni ngeiin a ring a. Rang takin thawm awmna lam chu a va pan a, a silai ken chu a han kau ri rak a. Mahse thawm chu a reh leh ta hmak mai, a ding dat a. A han ngaithla leh deuh vang vang a, chutah thil hap ri bawrh bawrh ri niawm tak chu a hre ta a.

A pan hnai zel a, chu thawm, ri ruap ruap mai pawh chu a ring telh telh mai. A va thleng ta, lungpui lian deuh bulah hian mipa pakhat hi amah hnungchhawn zawng hian a lo thu tung a. A hma ah chuan Zova sanghal kah hliam tak ngei mai chu thi tawh tih hriat tak hian a lo let bel mai a, a bul velah chuan thisen chu a baw nuai bawk.

Chupa chuan chu sanghal kawchhung chu haiin a ei mawlh mawlh ni berin a hriat a, Zova chuan mak a ti kher mai. Ring deuh leng lawng hian, "Nang kha, tunge i nih a?" tiin a han au vak a, chuveleh chupa chuan a thil tih lai chu a dah hmak a. Muang chang chuan a rawn ding ta a, a thawmhnaw en atang chuan mi pangngai tak chu a nih hmel viau.

Mahse a kawr hak te chu a tet hneng hnuang mai a, amah pawh chu a bal hle bawk. Zova chuan sanghal chu a hmu chiang thei deuh ta a, a dul zawk chu a lo kaw huau mai a, a ril a lo chhuak nuai bawk. Mak ti tak hian, "Tunge i nih a? Engthil nge i tih kha?" tiin a han vin leh tuar a, chutah chupa chu a rawn hawi ta mai a.

Mihring hmel pangngai reng reng a pu lo, a mitmeng te chu rapawm tak a ni. A vun chu a var deuh pup bawk a, a chetdan en reng reng chuan mihring pawh a ang lo. Chutah a rawn tlan ta thut mai a, "Hey, ding rawh, ding rawh." tiin Zova chu a au nasa mai a. Mahse chupa chuan a rawn pan zel a, khatiang em em a mihring rawn tlan chak kha a la hmu lo hial ang.

Zova chuan hlau rilru tak chung chuan, "I din loh chuan ka kap dawn che a nia, ding rawh." a han ti vin leh tuar a, mahse chupa chuan din reng a tum lo. Zova tihngaihna hre lo chuan a kal ta ringawt mai a, a darah tak chuan a fuh a. Mahse mak tak maiin chupa chu a ei zeuh ringawt, na ti awm ang pawhin a lang lo.

Chutah a rawn tlan leh a, Zova chuan mak a ti kher mai. Hnung tawlh pah chuan a silai mu chu a thun leh a, chu mimak tak mai lah chu a rawn hnai telh telh mai bawk si. Tlanchhiat deuh reuh pah chuan Zova chuan a silai chu a load leh a, tin leh vang vangin chupa dulah tak chuan a kap leh a.

Thisen pawh a rawn baw hawk mai, mahse a ding det ringawt. Engtin mah a la awm chuang lo, Zova chuan silaimu dang thun nan hun a nei tawh lo, a rawn hnai tawh lutuk tlat. A rawn zuang vak a, a rawn bawhthlu ta mai a. Seh tum ni awm tak chuan a ka chu a ang zuau zuau a, a ngur chhur chhur reng bawk.

Theihtawp chhuahin Zova chu a lo indang tang tang a, mahse chu mimak chu a chak lutuk tlat. Thei leh thei lovin a sira lungtum chu a ban tawk tawk a, a ban fu thei hlauh mai. Chupa bekah tak mai chuan a han chhu chawrh a, a thlah ve hram. Leiah chuan a thal tawp a, a vak tual tual a, chu chu remchangah la in Zova chu a tho nghal vat a.

A silai thlauh chu a chhar a, "I va han thi dawn chiang tak em, Zawnga." tiin a insehruh a, a mu chu a thun leh mawlh mawlh a. Chutah a hnunglam atang chuan khapa khan a rawn zuan leh thut a, a darah chuan a seh sak ta mai a. Thisen chu a chik zawr zawr a, a dar vun chu a seh thla nual mai.

Zova na ti lutuk chu a t(r)e chiam chiam a, a namsawn nghal vat a. Chupa chuan a rawn pan leh hram a, mahse a silai kawm chuan a bekah a lo chhu chawrh a, a tawlh hnung ve dawrh mai. Zova chuan a silai chu a han kau ri leh thak a, chupa awmah tak mai chuan a kap leh a. Chupa pawh chu a pai khut khut a, a sir pang awih ve deuh tak maiah chuan a lum thla ta daih mai.

Zova chuan a va enzui a, mahse a hmu hman ta lo nge ni, a mawng tawpah pawh chuan hmuh tur a awm miah lo. Leiah chuan a thu hnawk a, a dar hliam chu a en a. Na a ti takzet, a rawmawl phawrhin a hliamah chuan a nem bet nghal a. Thisen chu a chhuak hnem kher mai, "Mi a.. mi a mai mai a niang." tiin a phun bul bul a, a thlan fim te chu a chhuak zawih zawih mai.

A tho chhuak a, a hliam chu thup nan tiin a shawl ken lai chu a bat a. Mahse a awmdan chu a dik mawlh lo, a khua chu a sik dawn ang tlat te hian a hria a. A thlan a tla zawih zawih nangin a vawt a ti tel bawk a, a lu te chu a hai muai muai mai. A silai chu a ak a, zawi muang chuan a kal chhet chhet a.

Rei fe luna bur chung leh hliam tuar chunga a kal hnu chuan a scooter awmna lam chu a thleng ve thei ta, chutah chu scooter pawh chu a ta ni lovin a thianpa ta a hmansak a ni. A tui pai te chu a han in khawlh khawlh a, in tih harh hram chu a tum a. A thil tawn zawh chiah chuan a ti hrilhhaiin a ti a zo vek hi a ni ber mai.

*************************************

7:48 PM

Lungthlir khua chu khaw lian lem lo tak a ni a, in pawh 80 vel bak a ni lo hial ang, chu pawh a tling lo maithei. An inkawtah chuan Zova chuan a scooter chu a park tha a, a hliam chuan a la tur ut ut tho. Inchhung chu a lut a, a lo thim ruih mai. A nupui Muani chuan tum bru hian a lo melh a, "I va rawn haw tlai em em ve?" a lo ti deuh hlur a.

Mahse Zova chuan a chhang lo, a dara hliam a thup mek chu a han hmet zeuh va, a then sawk mai. A pa, Pu Huma chu thutthleng seiah chuan lo mu zarin, "Chaw pawh kan ei san vek tawh che, kha... i hlawhchham a ni maw?" tiin a lo khi suk a. Zova chuan nui lui tih hriat tak hian, "Ka kal hla lo em alawm." tiin a lo chhang a.

Anu Pi Thangi chu pindan atanga rawn chhuakin, "Awmpuia nen chuan ami in kal tak, nizan kha chuan a peihloh hmel khawp mai a." a rawn ti phei nuah nuah a. "A lo kal ve lo, keimahin ka kal. A scooter ka hman sak a, a hman leh ta lo a nih kha." tiin Zova chuan a chhang a. Chutih lai chuan an nupa indan atang chuan a fapa kum 7 mi, Kimkima chu a rawn tlan chhuak a.

A pa lam chu rawn panin, "Apa, i lo haw tawh mi? Eng sa nge i kah?" tiin a rawn tlan phei a. Chuveleh vin zet hian Zova chuan, "Min khawih suh." a lo ti hrep mai. Pu Huma te nupa leh Muani te pawh chu an rawn hawi rual that a, Kimkima pawh chu a ding chat mai. Inchhung chu a reh thuap a, an zavai mai chuan Zova chu an en thup a.

Ani pawh chu a inthiam lo leh deuh va, "Ka.. ka bal vek, Bawiha. Chirh te ka kai nasa lutuk, i bal ve palh ang." zaidam tak chuan a han ti leh lawi a. Muani chuan lungawilo tak hian, "Eng nge khatia i vin vak kher a, tul lo lutuk." tih deuh hlur pah chuan a fapa chu a kai sawn daih a. Zova chuan a thlan chu a hru leh zeuh va, "Ka inbual dawn." tih pah chuan pindan ah chuan a lut a.

A inkalh hnan nghal hmak a, a kawr chu phelh in a dara hliam chu a en a. Thisen chu a rawn la chhuak reng a, chhuatah chuan thu hnawkin a thaw halh halh mai. A lu te chu a na bur hian a hria a, "Tunge? Tunge kha pa kha?" tiin ama hriat tham lek chuan a phun bul bul a. A taksa chu a sa huam huam reng bawk a, a khaw hmuh te chu a fiah lo tan der mai.

"Eng nge maw awmzia le? Tiang khan a awm ngai pawh ka hre si lova?" Pi Thangi chuan a ti nuah nuah a. Tum hmuk hian Muani chuan, "A sa pel hlawhchham lungawilo bak a ni lovang, thinchhe lutuk mai." a lo ti leh hlur a. Pu Huma chuan a aw thian kharh kharh in, "Riak chhuak law law in kan kal dun dawn nia ka ti mawlh mawlh a, Awmpuia nen a hnaiah kan zu kal mai mai ange a ti tlat a nih kha." a lo ti ve bawk a.

Chutah pindan chu a rawn inhawng ri thuai a, Zova chu rawn chhuakin a dara hliam thup nan towel a rawn bat bawk a. Bual In lam chu a pan phei a, "Chaw ei ka lo siam dawn che em ni?" tiin Muani chuan a zawt a. En miah lo chuan, "Ka ril a tam lo." Zova chuan a ti deuh hmuk a, bual inah chuan a lut ta daih a.

Pi Thangi chu a han thaw hak a, "Muani, zanin chu Kimkima kha kan bulah lo riak mai rawh se." a han ti a. "A ngai chuang lo, a ho lutuk." tiin Muani chuan a chhang a. Mahse Pu Huma pawh chuan, "A nupui i nia, eng nge a lungawilohna te tha deuhin zawt la, titi duh rawh u. Kimkima te chu ka bula riah a duh zawk ziah tho alawm, mipa naupang a ni ve tawh a, nu te ngai rual a ni tawh hleinem." a lo ti ve bawk a, Muani pawh chuan a hnial bik ta lo.

*************************************************

1:20 AM

Inchhung lama thawm ri rak awm chuan Muani muhil lai chu a ti harh zawk mai a, a bul chu en vatin Zova chu a lo awm hauh lo. Current a awm loh avangin a thim em em a, bati chu chhi engin pindan atang chuan a chhuak a. Choka lam atang chuan thawm a hre leh ta, "Zova... Zova?" zawi te te chuan a han ti a, mahse chhangtu an awm lo.

Zawi muangin Muani chuan choka lam chu a pan zel a, thawm a hriat pawh chu a ring tial tial mai. Riltam hmel taka chaw hap ri bawrh bawrh ri ni ber hian a hria a, mak a ti kher mai. Tichuan choka chu a va thleng ta a, a thil hmuh chuan a thawng takzet. A pasal, Zova chu chhuatah chuan lo thu tungin sazu thi hi lo kengin a lo pet ngawng ngawng mai a nih chu.

Muani chu a thin a phu dup dup a, "Zova, engthil nge i tih kha?" a han ti tham tiak a. Chuta Zova chu a rawn hawi ta, mihring hmel reng reng a pu tawh lo. A vun te chu a dang var pup mai a, thinrim hmel em em hian Muani chu a melh ta run mai. Ramsa hram ang mai hian thawm a rawn siam a, chutah a rawn tlan ta thut mai.

Muani chu a indang hman tawh lo, Zova chuan seh tum niawm tak chuan a ka a rawn ang zuau zuau va. Muani chuan a bati chu chhuatah a thlauh va, Zova awmah chuan a lo nam ve tang tang a. Mahse Zova chu a chak lutuk tlat, bangah chuan Muani lu chu a ri chawrh a. Chhuatah chuan a thal tawp a, Zova chuan a bawhbet leh nghal a.

A lu hai muai muai mahse Muani chuan theihtawp chhuahin a indang char char a, Zova hrawkah chuan a rek bet lui ve tlat a, a seh thei mai bik lo. Ring tak hian, "Pa.. Nu... min chhan ru." tiin a au vak vak a. An thawm a rin em avang chuan Pu Huma te nupa pawh chu an rawn tho chhuak a, Kimkima pawh chu a rawn tho ve bawk.

Pindan atang chuan Pi Thangi leh Pu Huma te chu an rawn chhuak a, Zova'n a nupui seh tuma a lo bawhben run mai an hmuh chuan mak an ti kher mai. Pi Thangi zawk chu va tlan pheiin, "Zova, Laltlanzo, eng thil nge maw i tih le?" tiin va pawh sawn a tum a. Chuveleh Zova chuan a nupui chu a thlah a, anu zawk chu ava melh ta run mai.

A fapa hmel rapawm tak mai a han hmu chiah chu Pi Thangi pawh a ding chat a, chutah Zova chuan a rawn kuah bet thut a. A hrawkah tak mai chuan a seh sak ta mai a, thisen a chik zawr zawr mai. Chuveleh Pu Huma chuan an pindan kawngka chu kharin, "Bawihte, lo chhuak miah suh." tih pah chuan a kalh hnan hmak a.

Zova chuan a nu hrawk chu a seh nawn leh mawlh mawlh a, a vun te chu a thler dei duai mai. Thisen chu a baw hawk hawk a, Pi Thangi pawh chu a let tawp a, chutah Zova chuan a dulah te chuan a han seh chhunzawm leh a. Pu Huma chu rawn pheiin a fapa chu a rawn man bet ve a, "Muani, Kimkima hruai la, tlan vat rawh u..." a sawi zo hman lo tep a ni.

Zova chu a tal chhuak a, apa beng chu a seh thla hlawk mai. Pu Huma na ti lutuk chu a au vak vak a, a beng chu hupin thisen pawh a chhuak tam kher mai. Zova lah chuan a bawh tlu a, a nghawngah chuan a seh sak leh a. Chutah a lu chu a rawn ri thuai a, a thal tawp mai. Muani chuan chhemthei kengin Zova chu vuak nawn leh a tum a, mahse a rawn tho leh thut a.

Tihngaihna dang a hre tawh lo, "Bawiha, rawn chhuak miah suh aw. Ka lo let leh ang, ka lo let leh ngei ngei ang." ring deuh leng lawng chuan a han ti a. Chutah a tlan thut a, kawngka pui lam chu a pan a, Zova chuan a rawn um ve nghal bawk. Vanneihthlak takin Muani chu a chhuak hman hlauh mai, pawn lam atang chuan Zova chu a kalh hnan thei ta hram a.

********************************************

Khawlaiah chuan Muani chu tap chunga tlanin an in bul hnaih ber, Pu Liana te kawngka chu a chum nghal bur bur a. MAngang tak hian, "Pu Lian, khawngaihin min pui rawh. Ka.. ka pasal sawn kan vaia min thah a tum ania." tiin a tap hawm hawm mai a. Pu Liana leh a nupui pawh chu an rawn chhuak a, "Ehe, Muani, eng thil nge ni ta?" tiin a zawt vat a.

Muani chu a inhnit hlawp hlawp a, "Zova.. Zova saw.. mihring pawh a ni lo. Min thah a tum a, ka.. ka nu leh pa pawh...a that..inchhungah sawn a awm...ka fapa pawh pindanah ala awm." tiin a sawi tha hleithei lo. Thenawm khaw veng te pawh chu an rawn pung khawm a, chutia mangan hmel taka Muani lo tawng mawlh mawlh an hmuh chuan mak an ti tlang hlawm kher mai.

An veng pa rawn ber, Upa Mawia chuan Muani chu thil a han zawt chiang ve a. Muani'n a hrilhfiah hnu chuan, "In in lamah chuan va kal phawt teh ang." tiin Zova te in lam chu an pan khawm ta hlawm a. Kawnga chu a lo in sawi vak vak mai, "Chu chu Zova em ni?" tiin Upa Mawia chuan a han zawt a.

"Aw, ka fapa pawh pindanah a la awm. Pa Mawi, khawngaihin min chhanchhuah sak rawh u. A nih loh chuan a that ve mai ang." tiin tap chungin Muani chuan a lo chhang a. Upa Mawia chu a va kal hnai a, "Zova, i pa Mawia ka nia. Tha deuhin thil sawi ang, ka rawn hawng dawn nia." a han ti lauh lauh va.

Chuveleh Muani chuan, "Ni lo, hawng ringawt suh. Mihring a ni lo, a kawchhungah ramhuai lut ang mai a ni." a lo ti vat a. Pu Liana chuan thawk a han la hak a, "Engpawh nise tlangval ho kha lo kal khawm ula, a lo chhuah veleh kan lo manbet dawn nia." a rawn ti ve a. Tichuan kawngka bulah chuan inring ranin an ding thap a, Upa Mawia ber chuan kawngka chu a han hawng ta a.

A hawn rual rual chuan Zova chu a rawn zuang chhuak nghal titih a, tumah chu an inring hman lo. Upa Mawia chu a rawn zuan nghal chat a, leiah chuan an inbawhthlu nghal a. Upa Mawia darah chuan a seh ta, ana ti lutuk chu a t(r)e tuar tuar mai. Tlangval ho chuan an pawt sawn nghal a, an man bet a.

Chutia an inchai lai chuan Muani chu inchhungah a lut a, Zova nu leh pate ruang lo let reng a hmuh chuan a ding chat mai. A thaw dep dep a, tichuan pindan lam chu a pan nghal a. A fapa Kimkima pawh chu hlauh hmel tak hian khum kilah chuan a lo thu a, a nu a hmuh veleh chuan a rawn tlan phei a.

Muani chuan a lo kuah a, "Heta hi ka awm e, Bawihte. Hlau suh aw, ka awm e." tiin tap chungin a pawm vawng vawng a. Kimkima chuan thaw hlawp hlawp hian, "Nu, khawnge a pi leh a pu? Tinge apa kha? Eng nge awmzia?" tiin a zawt a. Muani chuan chhan ngaihna pawh a hre lo, "Bawihte, nakinah kan sawi dawn nia...maimitchhing la, meng rawh ka tih hma chu meng suh aw.." tiin a pawm a.

Pindan atang chuan  a chhuah pui a, Kimkima pawh chu a maimitchhing tlat a. A pi leh pute ruang mai bakah apa awmdan chu hmuh tir a duh lo a ni. Pawnah chuan a chhuak a, Zova pawh chu an lo phuar bet thei hram a. Pu Liana nupui Pi Zaii chuan Muani te nufa chu an inah a luh pui a, Upa Mawia pawh chu a hliam a nat em avang chuan an buaipui ve mek bawk a.

2:30 AM

Zan a rei tawh hle a, Lungthlir khua erawh a la titi mur mur reng a. Zova an phuar behna hruizen chu a rawn ri leh ṭawk ṭawk ṭhin a, chumi ri a rawn awm apiang chuan a bula tlangval duty ho chu an phu leh dual thin a. Awmpuia chuan a ṭhianpa, hriatna nei tawh miah lo va rûm hrawih hrawih chu ral khat aṭâng chuan a en vung vung a.

Chutih lai chuan an khaw tlangval pakhat Sawmtea chu a rawn kal a, Awmpuia dârah chuan a rawn vuan a. "Awmpui, thil thleng hi i hrethiam em? A râpthlak mah mah a ni," a rawn ti sa sa a. Awmpuia chu a thaw hak a, "Ka la hrethiam lo a nih hi, Sawmte. Engtin nge hetiang hian Zova hi a awm thut theih?" Sawmtea chuan Zova dar hliam chu a kawk a, "A nih leh a hliam saw i hmu em?" a han ti leh a.

Awmpuia chuan chhang lovin ngawi reng hian Zova dara hliam chu a en a, Sawmtea bawk chuan sawi chhunzawm leh in, "Pu Liana khân zawi têin min hrilh a, 'mihring sehna hnu a ang' a ti. Mahse mihring sehna hnu tur chuan a thuk mah mah an ti bawk a, thenkhat lahin mihring ha zia chiah chiah a ni an ti bawk a." a han ti leh a.

Awmpuia chu a rawn hawi chhuak a, "Mihring sehna a? Tu mihringin nge seh ang a? Ka hrethiam lo keichu, Sawmte. Nimin a kal dawn te kha chuan a tha hle sia, kal pui tur ka ni asin mawle." a ti nuah nuah a. "Chu chiah chu alawm!" Sawmtea chuan a lo ti leh a, a hmel chu a rawn thutak zual hle. "Mak i ti ve lo em ni? Muani sawi dang chuan Zova hi a rawn haw a, a rawn danglam nghal em em a. Chutah, zanreiah a nu leh pa a seh nghal a ni a. Muani leh Kimkima lah khati khawp khân an hlau a, a nupui a hmangaih thin em em kha tunah chuan seh tumin a ûm ta zâwk a nih hi. A nu leh pa phei chu a seh hlum hial a nih hi."

Awmpuia chuan Zova rûm ri chu a han ngaithla vang vang a, "Upa Mawia pawh kha seh bawk a, chuan ama darah hian sehna hliam a awm bawk a?" a han ti nuah nuah a. Sawmtea chuan a aw a han thian kharh a, "Zova hi tu emaw chuan a seh ngei a ni, mihring a nih loh pawhin eng ramsa emaw ni chuan a seh a ni. Chuan hetia a awm thut nachhan pawh hi he a hliam vang hi a nih ka ring, eng emaw natnahrik a awm a niang a hliam ah hian." a lo ti leh a.

AWmpuia chuan Sawmtea chu a en deuh hru a, "Natnahrik a? Eng natna hrik nge ni ang a? Ui-a hri lo ni ta se, hetiang hian an awm ngei reng reng a mi? Chuan...i sawi awmzia chu Zova hliam hian Zova hi hetiang hian a awm tir a, tichuan a seh tak, anu leh pa leh Upa Zova te pawh hi Zova ang hian an awm ve dawn i tihna em ni? Natna inkaichhawn theih natna hrik a awm i tihna em ni?" a ti vin deuh hlur a.

Sawmtea chuan a chhang mai lo, a ngawih vang vang hnu ah chuan, "Ani e chu ka ti bik lo, mahse a nih duh hmel ka ti. Chuvang chuan Upa Mawia hi kan enthlak deuh angai ang." tiin a chhang a. Awmpuia chuan inchhung lam chu a va en a, Pu Huma te nupa ruang inkhuh chu ava thlek vang vang a, a bul velah chuan YMA tlawmngaite chu an che suau suau bawk a.

A thaw hak a, "Upa MAwia chauh ni lovin, anih leh Pu Huma te nupa saw engtin nge ni ve ang? Zova seh hlum ve ve an ni a, mipui lah an rawn pungkhawm hnem tawh si a, Zova ang hian rawn awm ta se...Sawmte, an thi tawh alawm. Zova hi a hliam vang a ni lovang, a thluak a buai pawh a ni mahna, Upa Mawia pawh engtin mah a awm lovang. I ngaihdan kha chu ka tawmpui ve lo che, ngaihdan atthlak tak niin ka hria." a han ti deuh hrep a.

Sawmtea chu a khi lui sak a, "I lo thlen hma khan Zova saw ka va enfiah vek tawh, AWmpui. Mar a nei tawh lova, lungphu pawh a nei tawh lo. Mithi ang chiah a ni, min awih lo mahla inring rengin awm rawh." tiin a kalsan daih a, Awmpuia chuan a en zui vung vung ringawt. An phuarbeh mek Zova chu ava en leh a, ani lah chuan a ka ang zuau zuau in a lo melh khur mai. 

********************************************

3:10 AM

Pi Zaii te inah chuan Muani chu thutthlengseiah a ṭhu a, a fapa Kimkima chu a mal chungah tui takin a muhil tawh a. Muani hmel chu a dâng vek a, a pasal hmel rapawm tak mai kha a mitthlaah a rawn lang nawn leh ṭhin. Inchhungah chuan khawtlâng upa rawn ber pahnih, in neitu Pu Liana leh Pu Zira te chuan Muani chu an lo ṭhutpui a.

Pu Liana chuan thawk a han la hak a, "Muante, kan hrethiam hle mai che a nia. Mahse thil hi kan ngaihtuah fîm a ngai a ni. Zova hi hetianga a awm thut nachhan hi eng dang ni lovin, ramhuai hian a luhchilh a nih kan ring ber a. A chhan chu amah hi kan hrechiang a, hetia a at thutna chhan tur hi a awm lo." a han ti a.

Pu Zira pawh chu a lo bu nghat a, "Ni e, kan pi leh pute hun lai pawhin hetiang thil hi chu a thleng ve fo tawh alawm. Ramhuai hian mihring hi an rawn luhchilh a, an hmel an thlak a, an hmangaih ber ber te pawh seh duh khawpin an rawn thlak danglam thei a ni. Pathian hmingin kan vêng rih phawt ang a, nakinah Pastor kan ko ang a, ṭawngṭaina te kan hmanpui dâwn nia," a lo ti ve a.

Muani chu a rawn dâk chhuak a, a mit chu a sen râm mai. "Pu Zir, ramhuai luhchilh a ni lo. A dara hliam saw a rawn haw atang khan a lo thup ngar ngar tihna ania, a mizia kha a rawn dang thut alawm a rawn haw khan. A mit te saw in hmu ve lo em ni? A nupui ka nihna angin a mizia ka hre chiang a, Zova kha chu a thi tawh. Tuna mi saw chu ramsa riltam tak, thlarau nei tawh lo ang mai zawk a nih saw. Ka nu leh pa thah dan te kha. An mangang au te kha hmu ve ula chuan..." a sawi zo hman lo.

Pu Liana chuan a lo pawt chat a, "Mihring hi kan ât thut hian kan huat ber te leh kan hmangaih ber te hi kan hre tawh ngai lo alawm. Muante, Zova hi chu a ṭha leh mai ang. I nu leh pa ruang erawh saw chu zing khua lo var sela, kan vui nghal dâwn nia. Thlamuang deuhin awm phawt rawh u," a la ti fan a.

Muani chu a ṭhen sawk a, "In awih dâwn lo tih ka hria. Mahse inring rengin awm rawh u, Zova hliam saw ramsa sehna a nih loh chuan, eng emaw tak a ni ngei ang. Ramhuai lam a ni lul lovang, engthil emaw tak chuan a ti danglam a ni." a tih lai chuan, pâwn lam atâng chuan tlangval ho rawn au ṭhat ri a rawn awm ta thut mai a.

Inchhunga Upate leh Muani chu an ding rual ṭhat a. Pâwn lamah chuan tlangval ho chu mangang hmel tak hian an rawn phu mur mur a, thil eng emaw thalo tak a thleng a ni tih chu a chiang hle. Chu hnu lawkah chuan, Zova te in atâng chuan hmeichhe rawn au t(r)e nuai nuai ri an hre leh a, mitthi ina awm mipui ho chu hlau leh thlabarin an rawn tlan chhuak sup sup a.

Inchhungah chuan tlangval pakhat a rawn tlân lût a, a hlauhthawn hmel mai. "Pu Lian! Pu Zir! Pu Huma ruang saw... a rawn che... a rawn tho leh." a rawn ti khûr hlawk hlawk a. Muani chuan a fapa pawm chung chuan a hnungtawlh nghal a. Sawmtea sawi kha a thleng dik a ang ta hle mai.

******************************************

3:15 AM

Inchhung lamah chuan thil râpthlak tak a thleng ta tlat mai. Pu Huma te nupa ruang inkhuhna puanvar chu thli rawn tleh thut ang mai hian a rawn hlim chho dawrh a. Pu Huma, mithi tawh tih hriat tak, dâng pup mai chu a rawn ṭhu chhuak hlawl a! Nula leh tlangval inchhunga thu ho chu an phu nasa hle mai a, mahse an tawlh hnung hman lo.

Pu Huma chuan a bula hmeichhe pakhat, ruang kiltuzing a mi, Pi Sangi chu a bawh thut a. Pi Sangi chu a au t(r)e chiam a, Pu Huma chuan ramsa riltam tak ang mai hian Pi Sangi hrawkah chuan seh a tum ta mai a. "Min pui ru! Ka duh thei lo...min pui ru." tiin Pi Sangi chu a au chel chul mai a. Tlangval awm hnai ho chuan Pu Huma chu pawh sawn tumin an va man bet a, mahse mithi tawh si chu a chak lutuk tlat.

Chutih lai tak chuan Pi Thangi ruang pawh chu a rawn tho ve ta! A mit chu a var deuh pup a, mihring hmel reng reng a pu tawh lo. Pu Huma lo pawh sawn tum tlangval pakhat, Ruata chu a rawn zuan nghal chat a. Ruata darah tak chuan a rawn seh sak ta mai a, Ruata na ti lutuk chu a t(r)e chiam chiam a, inchhung chu a buai ta nuai nuai mai a, thawm pawh a ring hle mai.

Awmpuia chu pawn atâng chuan a rawn tlân lût a, a thil hmuh chuan a barakhaih takzet. Pi Thangi'n Ruata a lo bawhbet mêk a hmuh chuan, hlau hle mah se, va ṭanpui tumin a va hnaih a. "Nu Thang! Eng nge maw i tih le?" tih pah chuan Pi Thangi chu a va pawt ve ngawt a, mahse Pi Thangi chu rawn hawi vutin, ramsa ang mai hian a ngûr chhur chhur a. Awmpuia chu a hlau leh deuh bawk si, hnungtawlh a tumna lamah chhuatah chuan a tlu thal tawp mai.

Chuveleh Pi Thangi chuan Awmpuia chu a bawhbet ve nghal a, a hrawkah tak seh tumin a ka a rawn ang ta zuau zuau mai. Awmpuia chuan theihtawp chhuahin a lo dang a, mahse a hneh ngang lo, Pi Thangi chuan a seh dawn emaw a ti hial hman tawh. Chutih lai tak chuan Sawmtea chu rawn tlan lutin choka lam a pan a, chemte hi a rawn keng phei a, Pi Thangi lû-ah tak chuan a rawn vit tlum ta pawp mai! Pi Thangi chu a zal hnawk a, chhutah chuan a let ta reng mai.

Sawmtea chuan muanchanna hman a awm lo tih a hria, Pu Huma lam chu a pan leh nghal a. Pu Huma chuan Pi Sangi kha a lo la bawhbet reng a, tlangval sawm rual pawh in an pawt sawn zo lo a ni ber e. Sawmtea chuan Pu Huma chu hnung lam atâng chuan a va pan a, a tukhumah tak chuan chem chuan a va vit leh ta pawp mai. Pu Huma pawh chu a zawi hnawk a, chutah a thal der mai.

Inchhung chu a reh diak a, thisen leh mithi ruang leh tlangval hliam tuar te nen chuan a râpthlak vawng vawng hle mai. Chutih lai tak chuan kawngka a rawn ri rawk a, Pu Liana leh khawtlâng hruaitu dangte chu an rawn lang hlawl a. Inchhung thil thleng an hmuh chuan an meng phâwk hrû a, sawi tûr pawh an hre lo. Sawmtea chuan a chem, thisen kai hnuang mai chu a la keng reng a, Pu Liana te chu a lo melh phawk ve hrû bawk a.

******************************************

END OF EPISODE 1