ONCE UPON A TIME IN MIZORAM (A mizo zombie horror story) Written by : Aaron Malsawmdawngzuala Episode - 4 : Unsafe Ground

 ONCE UPON A TIME IN MIZORAM

(A mizo zombie horror story)

Written by : Aaron Malsawmdawngzuala

Episode - 4 : Unsafe Ground

****************************************

Zîng dâr ruk leh a chanve a pêl hret a, Lungthlir khaw vêng hnuai reh ruih lamah chuan Renga leh Hlimpuii te nufa chu fîmkhur takin an inzui tham tham a. A khat tawk chuan mangang au thawm leh silai puak ri dur dur te chu a hriat theih a, chu thâwm chuan khaw chhûng buai zia a rawn târ lang chiang hle. 

Renga chuan kawtthlêr pui zawh lovin, mi in sîr leh hnung lam, hnim buk tam deuhna lai leh ramhnuai hnaivai deuh chu a thlang tlat a. A khat tâwkin in kil leh bang sîr aṭâng chuan a thlêk leh dek dek ṭhîn a, thâwm rêng rêng hmaih a tum lo tih a chiang hle. Pi Zari leh Hlimpuii chu hlauthawng takin an rawn inkuah phei ve chawt chawt bawk a.

"U Reng, khawnge min hruai dâwn?" Hlimpuii chuan a nu dâra vuan chung chuan a zâwt a. Pi Zari chu a rawn ṭawng ve nghal a, "Bawiha, Sawmtea kan nghah a ngai asin. Inah khân min rawn zawng dâwn asin," a rawn ti ve bawk a. Renga chu a pên lai a tâwp chat a, mahse a rawn hawi lêt lo. "Sawmtea chu a fing alawm, dawt a sawi ngai lo bawk a. Min rawn zawng hmu thei em em ang. Tûnah chuan in nunna hi a pawimawh rih ber." a ti thum chhak a.

Pi Zari chu a rilru a nuam thei thlâwt lo, "Mahse, eng nge thil awmzia hi ni rêng rêng? Khaw chhûng mite hi engtin nge an awm a, eng thil ber nge thleng a?" tiin a han zawt leh a. Renga chuan dâk chhuakin khaw chhûng lam chu a thlîr a, a hmel chu a dur khup mai. "Zova ang mai khân mite hi an awm deuh vek tawh. In-seh kualin an hrawk an inseh thler sak zung zung mai. Khaw chhûng hi chu thihna hmun a ni tawp mai." tiin a lo chhang leh a, dawt hmanga mi tawng thlamuan chi a ni ve hauh lo tih a chiang. 

Pi Zari chuan rap hmel tak hian a hmui a hup a, "A nih... i chhûngte? Khawnge i chhûngte an awm?" tiin a han zâwt leh a. Renga chu a ngawi ta vang vang a, a chemte ken lai chu a han hum nghet sauh va, chhânna erawh a pe lo. Chutih lai tak chuan, an piah lawk hnim aṭâng chuan thâwm a rawn chhuak ta tlat mai. 

Thing tang tliak ri rawp rawp ri hi a ang ber, thawm chu a rawn hnai zel a. Renga pawh chuan chemte chu a hum nghet leh zual sauh va, chutah an khaw pa pakhat, Pu Sangtea chu hnim kârah chuan rawn chhuak hlawl in a rawn tlu bawk thlawp mai. Pi Zari te nufa chuan puih tumin an pan a, mahse Pu Sangtea chu zawi muangin a rawn tho va. 

Arawn thawh leh dân chu mihring chet dân pangngai a ni tawh hauh lo, ruh ri rawp rawp leh taksa in-thlep hnawk hnawk chung chuan a rawn ding chhuak a. A hmel chu a rapawm takzet,  a mit vâr pup a, a hmelah chuan mihring hmel rêng rêng hmuh tûr a awm tawh lo. A hmai leh a kawr chu thisen hian a khat vek a, a hrawk thler duai atang chuan thisen a rawn baw chhuak hawk hawk bawk. 

Pi Zari leh Hlimpuii chuan an hlau kher mai, an ṭe chhuak ṭhat a. Pu Sangtea chuan an au thâwm chu a hre ta, a lû chu a thlep thut a, ramsa kawlh rilṭam tak ang mai hian an nufa lam chu a rawn pan phei ta mai a. Renga chu rang lutukin a va kal hma deuh va, hmeichhe pahnih te hmaah chuan a va ding vang mai. An mahni en miah chuang lo chuan, "Au suh u! In au thâwm avang khân midangin an hre zel ania." tiin a vin deuh ṭhawt a. 

Pu Sangtea rawn tlan phei mêk chu chîk takin a lo thlîr a, a chemte chu a lek kâng ta rân mai. Pu Sangtea chu ngur chhur chhur chung hian a rawn zuang phei ta thut mai a. Renga chuan thiam takin Pu Sangtea nghawngah chuan a lo vai pawp a, mahse engtin mah a awm lo. Pu Sangtea chuan Renga chu hnim buk kârah chuan a bawh phei ta rawp rawp mai a. 

Pi Zari leh Hlimpuii chu an mangang takzet, puih ngaihna pawh an hre lo. Renga chuan a chemte chuan Pu Sangtea hrawkah chuan a la vit ve ngar ngar a, a phawi thei mai bik lo. A phawi a nih chuan a seh hman dawn tih a chiang bawk si. Chutah Pu Sangtea hrawk atang chuan thisen thâng zet mai hi a rawn baw zawih zawih a. Ring tak hian Renga chuan, "Hlimi... Tlân rawh u! Kawn lam panin tlân rawh u!" tiin a au tawk tawk a. 

Mahse, Hlimpuii chuan chutia kalsan mai chu a duh bik lo, thingfak pakhat, a bul lawk mi inhnuaia mi chu ava la lawk a. Renga leh Pu Sangtea inbuan mek chu a va pan hnai a, hlauhna zawng zawng dah ṭhain Pu Sangtea lû-ah tak chuan thingfak chuan a va vaw ta chawrh mai a Pu Sangtea chu a thle lawp a, a aia na chuan Hlimpuii chuan a bekah tak mai chuan a han  hlap leh pawp a.

Pu Sangtea chu a thal tawp mai, chu hun ṭha chu chuhin Renga chuan a chemte chuan Pu Sangtea chalah tak mai chuan a vit tlum ta pawk mai. Pu Sangtea taksa chu a khûr dawt dawt a, a ngur chhur chhur ri pawh chu a tâwp ta hmak a. Renga chu thaw hlawp hlawp chung hian a rawn ding chhuak leh a, "Ka lawm e." Hlimpuii melh pah chuan a phun sap a.

******************************************************

30 MINUTES EARLIER

Zova te in chhûng chu thihna hlimthla leh hlauhnain a chîm hneh hle a. Khaw chhûng tlangval leh patling tam zâwk chu hmanrua lek chhuakin an tlân chhuak deuh vek tawh a, nu ho ṭhenkhat pawh an tlân chhuak nual tawh. Pu Liana chuan hmanrua la in chhuah ve a han tum a, mahse Pu Rina chuan a lo dang vat a.

"Nang tal chu chhuak suh Pu Lian! Pawn lam hlauhawmzia i hria a ni lawm ni? Kan nunna kan chan ve nghal a ni mai." a ti khûr dar dar a. Pu Liana chu a thinrim kher mai, a hmanraw ken lai chu a han hum nghet sauh va, "Ka nupui leh fanau te inah an la awm asin! Nang lah chu i tihian i dawihzep tlat a. Pu Rin, hêng thil zawng zawng hi i dawihzep vâng vek a thleng a nih hi. YMA hruaitu ber i ni a, mahse tinge a dawih berah i tan tlat mai le?" tiin a ankhum ta hrep mai a. 

Pu Rina chu a ngawi hmak a, a hmelah chuan a thiam loh a ni tih a inhre ve tih chu a lang thei a, chhân ngaihna pawh a hre lo. Chutih lai chuan Pu Rina nupui, Pi Tlani chuan a pasal chu va panin, a bânah a va sawi nawk nawk a. "Haw ang, Rina. Hetah hian kan awm reng thei lo, kan in lamah kan him zâwk ang," a rawn ti ve bawk a.

Pu Rina chu a la chhuak duh chuang lo, "Nang leh kan fapa himna tûr zâwk a nih hi. Inah khân tute nge lo lût ang tih pawh kan hriat loh hi." tiin a lo chhang a. An fapa kum 15 mi, Puia chu hrilhhai takin a nu leh pa inhnial mek chu kil aṭângin a lo thlîr reng a. Pi Tlani zaidamna chuan a tlin ta ngang lo, "I dawihzep man hi kan la tuar khawp ang! Dawih lutuk mai!" tiin a pasal chu a ânkhum ve ta hrep a. 

Puia bânah chuan a han pawt lawk a, "Puia, lo kal rawh." tiin a kai dawr dawr a, a pasal chu va en leh in, "I duh leh tikhan awm rawh, keini chu kan haw dâwn. I hmel pawh hi ka hmu duh tawh lo, min ti zak lutuk." tiin thinrim leh rilru na takin Pu Rina chu an chhuahsan ta daih mai a, nu ho dang la awm ve pawh chuan thlabâr tak chung si chuan an zui chhuak ve nghal vek a.

Boruak chu a reh ta tlawk tlawk mai a, chutah hla deuhva silai puak leh au thâwm ina a chhunzawm nghal ri chu an hre ta. Pu Rina, Pu Liana, Muani, leh a fapa kum 7 mi Kimkima chauh an awm tawh a. Pu Liana chu a han thaw hak a, "Haw ve tawh a ṭhain ka hria. Hetah kan tawm bo tlat anih chuan awmzia a awm lo." a ti thum chhak a. 

Pu Rina pawh chuan chhân pawh chhâng lovin, hreh hmel tak leh phûr lo zet hian kawngka lam a pan a, a chhuak ve ta hna hna a. Pu Liana chuan Muani chu a en a, "Fîmkhur hle rawh u. Khaw ṭhenawmte puihna dîla kal ka tum a, chanchin hrilh tur che in ka rawn kal leh ang. Ruata ruang hi ka hnuh chhuahsak ang che, naupang hmuh atân a ṭha lo." a ti a. 

Chhuat laia Ruata ruang let reng mai chu kawtthlêr lamah chuan a hnûh chhuahsak ta a. Muani chuan Pu Liana chhuah rual rual chuan kawngka chu chhûng lam aṭângin a kalh nghal hmak a, Kimkima chu a kuah a, a ṭap zawih zawih mai. Tichuan mangang au thawm te, silai puak leh dur dur te leh tlangval thinrima au vak vak ri te chu hriat chhunzawm tur a awm nghal a.

*********************************************

6:41 AM

Lungthlir khaw kawtthlêr chu a reh hian a reh tlawk tlawk a, khaw mipuite chu an thi ta vek emaw tih mai tur hian an bo duak mai. Sawmtea te ṭhianho chu kawtthlêr pangngai zawh lovin, mi in sîr leh kawr bul vel lamah chuan kalin ral khel tak chungin an inzui tham tham a. Pu Tea chuan a Ulhbun chu a hma zawnah a han lek kâng deuh va, "Sawmte, khawilam nge kan pan mêk hi?" tiin zawi sap hian a zâwt a.

"Zova te in lamah," tiin Sawmtea chuan a lo chhâng a. Pu Tea chuan a en hu a, "Eng nge kan va tih dâwn? Zova te inah chuan tute nge la awm ang a?" tia a zawh leh chuan Sawmtea chu a ngawi deuh vang vang a, "Nizan mithi ina kal ho kha an la tâng mêk dâwn a, anni ho chungah khan eng nge thleng ta tih va chian a tha in ka hria, khawchhung lah hi a reh ruih mai si a." a han ti thum leh chhak a.

Chutah Awmpuia chuan Sawmtea chu a rawn hnaih chilh a, mangang hmel tak hian, "A nihleh i nu leh i nau Hlimi kha engtin nge ni dâwn? Khawiah nge an awm ang?" tiin a rawn zâwt ve leh a. Sawmtea chu a ding deuh dat a, a hmalam en rân chung hian, "Zova te in lamah kan phei phawt ang a, an lo awm ve mial mahna. Kan chhuah dawn pawh khan an tawm khawm vek a, himna hmun hnai ber a nih vângin an va pan ve ngei ka ring a ni." tiin a chhâng leh a.

Chutih lai tak chuan, an hma zawn hla vak lova in pakhata aṭâng chuan tlangval pakhat, Duhsaka chu mangang tak hian a rawn tlân chhuak ta thut mai a. Hlauh hmel tak hian, "Min pui rawh u!" tiin a rawn au chhuak a. A hnungah chuan tleirawl hmeichhe pakhat, Chhingi, a farnu ngei mai, a sam pawr phung leh a kâ aṭânga thisen hnang lutuk mai chhuak hnuang hian a rawn mek hi a lo  ni. 

Chhingi chu a hmel a dâng vek a, a mitmu chu a vâr pup bawk a, Zova te ang bawk a mithi tho leh a ni tawh tih a chiang hle. Duhsaka chuan Sawmtea te lam rawn pan a tum mêk lai chuan, Chhingi chuan hnunglam atang chuan a zuan thut a, Duhsaka nghawngah tak chuan a va seh sak ta sawk mai le. 

Thisen chu a rawn chik chhuak zawr zawr a, kawtthlêr a chirhdiak ah chuan Duhsaka chu a thal nghal tawp a. Sawmtea chu rang lutukin a va tlan phei a, Chhingi'n Duhsaka nghawng a lo seh ngawng ngawng mêk lai chuan,a hreipui chu lek kangin a lû-ah tak chuan a va chek ta pawp mai a. 

Chhingi chu a zawi riai riai a, Duhsaka chungah chuan a tlu bawk thlawp mai. Sawmtea chuan Chhingi ruang chu a tlawh sawn lawk a. Duhsaka chu a la thi lo, mahse a nghawng hliam aṭânga thisen rawn chhuak chu a nasa kher mai. A nghawng chu dawm vawng vawngin a thâwk lak tumin a ri hrawih hrawih a. Pu Tea chu rawn pheiin a zu kun hniam a, Duhsaka mangang hmel chu en rengin a kutah a va vuan a, "Hahdam rawh, Bawiha... lungngai suh...hahdam rawh." tiin a thlamuan a. 

Duhsaka chu a ang hlawi hlawi a, a thâwk te pawh chu a muang tial tial a, a tâwpah chuan a zawi ta hnawk mai, a thi tih a chiang ta. "A rawn chan ve hma hian ti vat rawh." tiin Pu Tea bawk chuan Siama chu enin a han ti thum chhak a. Siama chuan a hreh hle tih a hmelah a lang, mahse Duhsaka chu mithi tho leh-a a chan ve hma chuan a chhipah tak a chem ken lai chuan a va vit tlum pawk mai.

Chutih lai tak chuan, thâwm dang a rawn chhuak leh ta tlat! In hrang hrang aṭângin mithi tho leh eng emaw zat chu an rawn  chhuak ve leh ta sup sup mai a. Chung zinga thenkhat chuan, Sawmtea te ṭhianho chu riltam hmel tak hian an rawn en a, an rawn pan ta mai. "An tam dâwn tlat! Tlân rawh u!" Sawmtea'n a tih rual chuan, an vai chuan Zova te in lam pan chuan kawt  chuan an tlân ta a.

*************************************************

6:58 AM

Renga te huan a thlam chu a reh tlawk tlawk hle a, ni pawh a tlang sang tawh kher mai. He thlam hi khaw chhûng aṭângin a hla lêm lova, khaw chhûng lam a mangang au thâwm leh silai puak ri dur dur chu ri pawh a la hriat vuai vuai theih a ni. Thlam chhûngah chuan Renga, Pi Zari, leh Hlimpuii te chu ngui deuh bar hian an ṭhu ho a, an hmelah chuan an chau tawh tih a hriat hle bawk.

Pi Zari chuan a âwm dâwm vang vang chung chuan a hma zawn chu a thlîr renga. "Bawiha kha... Sawmtea kha engtin nge a awm ang le? Inah khân min rawn zawng ngei dâwn si a, a nu leh a farnu hi min hmu si lo vang a, a mangang dâwn emai." tiin a inhnit leh feih feih thin a, Hlimpuii pawh tawng chhuak lo mahse a u chu a ngaihtuah ve takzet.

Renga chu thlam kawngka bulah chuan a ṭhu a, a chempui ken lai chu a thlêk vung vung a. Chutah khaw chhûng lam mangang au thâwm leh silai puak leh dur ṭhîn lam chu a han en chho vang vang a, "Pi Zar, tiang ringawt chuan kan dam chhuak lo vang. Khaw chhûng buai dân khi a nasa êm mai. Khaw ṭhenawmte va hrilh hriat dân dâwn awm se a ṭhat dâwn teh lul nên, tunah chuan tihngaihna a awm bawk si lo. Hêng mithi tho leh te hi an pun zêl chuan khaw dâng dangah a kâng kai ang a, Mizoram pum hi mângchhia-ah ala chang dâwn a nih hi." beidawn hmel tak chuan a han ti a.

Hlimpuii chu a khûr deuh hlawk hlawk a, "U Reng, khaw chhûngah chuan dam an la awm ang em le? Nge mithi ho khân an ei zo vek tawh zâwk ang?" tiin hlauthawng tak hian a rawn zâwt ve a. Renga chuan Hlimpuii chu a va melh a, a thaw deuh hak a, "La dam ho chuan hmun him lam an zawng mêk ang. School emaw, thlanmual lam hmun reh vel emaw pan an tum ngei ang ka ring. Chûng hmun reh ho chu khaw chhûng kawtthlêr ai chuan a him daih zawk ang." tiin a chhâng a.

Pi Zari chuan Renga chu a en vang vang a, "Renga, nang... i chhûngte chungah eng nge thleng a? Khawnge an awm? Tin, engtin nge he thil thleng mêk hi i hriat ve ṭan dân?" tiin a han zâwt  a. Renga chu a ngawi ta vang vang a, a hmel chu a hnual nghal deuh ruih mai. Chemte chu a hum nghet sauh va, "Nizan zanlaia Muani mangang au thâwm kha ka hre ve a... Zova pawh kha ka hmu ve ngei a ni. Mitthi inah pawh khan ka awm ve a, mahse thil thlen hma khân ka haw hma ta hlauh va... a bak chu..." a ti a, a sawi chhunzawm tawh lo rêng rêng. A hmalam chu a thlîr leh ta tlawk tlawk a.

****************************************

RENGA CHUNGA THIL THLENG - 5:59 AM

Zîng dâr ruk a ri vel ṭawk a, Lungthlir khua chu a la vawt vûk mai. Renga, tlangval senior tawh tak, hmeichhe ngaihsak lo ve tak, mahni a awm nuam ti chi leh ramvak mi tih tak mai, kum 37 a upa, a senior tawh em avanga tlangval senior mai pawh ti tawh lova, tlangval upa ti a an sawi hat thin chu a tui chawi a haw mêk a. A nu leh pate’n an thihsan tawh avângin a u Dika te nupa leh an fapa kum 9 mi lek, Remruata te nên chauh chuan in khatah an khawsa a ni.

Renga chuan tui chu inchhungah a khai lût a, bual in lamah khai lûtin tlangin a chhungkhawm zung zung a. Chutih lai tak chuan in hma lam kawngka chu a rawn ri dawt a, tu emaw mangang taka rawn lût thâwm a hre ta tlat mai. Renga chu bual in aṭâng chuan a chhuak vat a, "Remruat! Eng nge thleng?" tiin a nau fapa, kawtthlêr aṭânga rawn ṭap lût nasa tak mai chu a va buaipui vat a.

Remruata chu a hlauh hmelin a hmêl a dâng vek a, a khabe a khûr dar dar mai. Renga chuan a dârah chuan a han vuan a, chutah Remruata ke ah chuan sehna hnuhma lian zet mai, thisen rawn chhuak ṭiam ṭiam a va hmu ta a. Renga chu a phu zawk mai, "Eng nge awmzia? Ui-in a seh che em ni?" tiin a han zâwt a.

Remruata chu a ṭap nasa tulh tulh mai a, a inhnit hlawp hlawp a. "Zîng... zîng inkhel tûrin kan chhuak a. Khelmual kan pan laiin Pa Zova te in kawtah Pa Zova leh U Sentea te an lo awm a. Min um vak a... chuan U Sentea khân ka ke ah hian min seh a ni." tiin thlabâr takin a hrilh ta mai a, Renga chuan mak a tiin a hrethiam lo kher mai.

Remruata ṭap ri chu a rin êm avângin, in chhûng pindan aṭângin Dika leh a nupui Zuali te pawh chu an rawn tlân chhuak ve nghal a. Zuali chuan a fapa awm dân a hmuh chuan a mangang takzet, "Ehe! Bawiha, eng thil nge thleng? Tu in maw seh che?" tiin Remruata chu a rawn kuah nghal chawt a.

Dika chuan Renga chu a en a, "Sentea’n min seh a ti em ni? Tu Sentea maw? Venglai ami Sentea kha maw?" tiin a han zâwt leh a. Remruata chu a nu âwmah beiin a la ṭap nasa mai a, "Aw... min um vak a, ka ke ah hian a seh." a ti leh ṭiau va. Renga thin chu a rawn sa nghal phat mai, "Sentea mai mai chuh! Engvângin nge naupang chungah hetianga a chet khanglan chu le? Ka va hmu dâwn khawp mai." tiin chhuah a tum nghal mai a. 

Mahse Dika chuan a lo dang vat a, "Renga, Sentea ai chuan Remruata hi a pawimawh zâwk. Sub-centre-ah Pi Hliri bulah kalpui zâwk rawh. Keini pawh kan insiam ang a, kan rawn kal ve nghal ang." tiin a hrilh a. Zuali chuan Remruata chal chu a han dek a, "Ehe! Dika, Bawiha hi a pang a sa vek ania! A taksa hi a sa vûr mai!" tiin a mangang zual kher mai.

Remruata chu a rawn chau tial tial a, a chhing ta suk suk mai. A tap zawi tial tial a, "Anu... ka lû a na... ka mit a fiah lo." a rawn ti chhuak ta mai a. Renga chuan thawk a han la hak a, "A hliam hi a thuk lutuk, a pawi dâwn tlat! U Dik, hmanhmawh ula, min rawn zui vat rawh u!" tiin Renga chuan Remruata chu a paw lawp a, in chhûng aṭâng chuan a tlân chhuahpui ta a.

**********************************************

PRESENT TIME

Renga'n a thil tawn a sawi zo chu a mittui a han hru zeuh va, Pi Zari te nufa chuan an lo ngaithla uluk hle mai. "Chuan, eng nge thleng zel? Remruata chu engtin nge a awm?" tiin Pi Zari chuan a lo zawt leh a. Renga chu thlam chhuat ah chuan a ṭhu hniam a, a  "Pâwn ka chhuah khân," a han ti hmasa tê tê a, "Khawvêl chu a lo danglam vek tawh a ni. Zîng dâr ruk a ri tawh a, mahse kawtthlêr chu mithi khua ang maiin a reh ṭhuap mai a. Upa Mawia te dawr pawh a inkhâr ṭhap a, Sentea te thingpui dawr, dâr nga rîk ruala inhawng ziah ṭhîn pawh kha a la reh tlawk tlawk mai a. Eng emaw thil dik lo a awm tih ka hrethei nghal a ni."

Renga chuan thawk a han la leh hawk a, "Remruata kha ka paw phei zel a, Sub-centre lam panin ka tlânpui a. Kawngka ka tlawh hawng nghal thuai a, 'Pi Hlir! Pi Hlir! Min pui rawh!' tiin ka au vak vak a, mahse chhânna ka dâwng lo.  Inchhung kha a reh hian a reh tlawk tlawk a ni ber mai. Ka pawm mêk Remruata chu ka en a, a vun te chu a rawn dang vek a, a mit kha a vai ruai tawh bawk. Chutah, pindan hnung lam aṭâng chuan mihring rûm ri ni chiah si lo, ramsa rilṭam tak rûm thâwm ang mai hi ka hre ta a." Pi Zari chu a lo khûr hlawk hlawk a, Renga chuan a chhunzawm leh a.

"Fîmkhur takin pindan chhûng chu ka va thlêk a... ka thil va hmuh kha ka rap takzet. Pi Hliri, kan Health Worker zaidam leh fel tak kha, a kut lehlam chu hruiin tukverh banah khan a lo intawn a, mahse mihring hmel a pu tawh lo. A mitmu a vâr pup a, a hmel kha a dang lep a, min hmuh rual chuan riltam hmel takin min rawn ban ta chiam mai a nih chu! Chet ngaihna reng ka hre lo, ka chawmawlh vek a ni ber mai."

"Chutih lai tak chuan, ka pawm lai mek Remruata chu a rawn eu zawk a, chhuatah chuan a tla thla a. Va bawihsawm tura ka kun hniam lai chuan, a rawn tal vak vak a, a ruh ri rawp rawp leh a hnungzâng ruh rawn pâwng ṭulh ṭulh te kha ka mitthla hian ka la hmu reng. 'Bawiha! Bawiha, i ṭha em?' tiin ka sawi nawk nawk a, mahse a rawn meng chhuak a, a mitmu kha Pi Hliri ang chiah khân a lo vâr vek tawh! Min rawn bei ta thut a, naupang tê ni si kha a chak lutuk tlat. Bang lamah ka theh phei dawr a, mahse rawn tho leh in a rawn zuang thut a, min bawh tlu a, ka hrawk seh tum chuan a ka a rawn ang zuau zuau mai a."

Renga chu a chawl dat a, a kuta a chemte chu a hmer nghet sauh a. "Hmanrua ka zawng a, ka hmu si lo. Chutah chhuatah pencil tla ka hmu hlauh va, ka ban vat a... tichuan, ka u fapa, ka fapa ang chiaha ka duat leh ka hmangaih em em mai, Remruata chu a mitah tak pencil tlum vek khawp chuan ka vit ta a ni. A thâwk a tâwp nghal a, ka awmah chuan a rawn bawk thlawp a. Khatih lai khân ka thinlung hi a thler vek a ber mai."

"Ka tlân haw leh nghal a, kawtthlêr chu a lo buai nuai nuai tawh. Mipui an ṭê chel chul a, ṭhenkhat an tlân chhia a, ṭhenkhat lah chu inseh chawt chawtin an lo inbawh nuai nuai a. In ka thleng a, kawngka a lo inhawng huau mai a. In chhûng ka luh rual chuan ka thil hmuh khân min ti na zual takzet... Ka u Dika leh a nupui Zuali khân kan uite an lo ei mêk a nih chu!"

Pi Zari chu a lo uak deuh ṭhat a, mahse Renga chuan harsa ti tak chungin a sawi chhunzawm zêl a. "Ka thâwm avang chuan an rawn hawi phei a, min rawn bitum ta a. Choka lamah ka tlân chhia a, ka u chuan min rawn zuan hmasa a, ka lo tawlh sawn hman hlauh va, dawhkân sirah intauhvin a dâk awrh a, mahse na a hre lo, a rawn tho leh nghal a. Zuali'n min rawn zuan ve leh a, chemte ka chuh hman hlauh va, a awmah tak ka lo vit tlum pawp a, mahse a min la rawn bei thei tho! Bangah min nam bet a, ka dâng hneh ngang lo a ni ber mai. Ka chemte chu ka phawi leh a, a chalah tak ka vih hrep hrep hnuah chauh a zal ta hnawk a."

"Chutah ka u a rawn phei ve leh a. Kan inbei ve leh a... harsa tak chungin, ka pianpui unaupa ngei mai chu thihna khawvêlah ka thlah liam ve ta a ni. Kawngka ka kalh a, ka insiam sawk sawk a, ka chhuah leh dâwn khân Sentea, in in lam pana phei lai kha ka hmu a, ka rawn hmu ta che u a nih kha." tiin Renga chuan a sawi zo va, thlam chhûng chu reh tak a ni.

***************************************************

7:08 AM

Sawmteam Pu Tea te nupa leh an fate pahnih, Awmpuia leh Siama te chu Zova te in kawtah chuan an va tlan thleng hlawl mai a. Kailawn leh kawtkai velah chuan thisen hi a lo la kawi nuai a, a rim thâng zet chu boruak vawt vûk kârah chuan a hriat theih hial a ni. Siama chuan hmanhmawh takin kawngka lam chu a kâwk a, "Sawmte, en teh... kawngka saw tlem a inhawng a nih saw," a ti sa sa a. Sawmtea chuan a hrei chu a hum nghet sauh va, hma hruai leh in kawngka lam chu fîmkhur takin a pan phei a.

Sawmtea chuan kawngka chu tlem a han nam hawng dêuh va, inchhûnga a thil va hmuh chuan a lungphu a ti tâwp lo chauh a ni. In chhûngah chuan mithi tho leh panga lai mai hian ruang pakhat hi chhuat laiah chuan an lo thut bial a, ramsa rilṭam tak ang maiin an lo hap buan buan mai a nih chu. 

Chu thil râpthlak tak va hmu ve tu Pi Kungi chu a insum zo ta lo, a kâ hup chungin, "AWI KA REI!" a ti chhuak ta hluai mai a. Chuveleh, mithi tho leh ho chu an rawn hawi ṭhap a, sa(meat)  thar hmu a ang mai hian thazat hmel takin Sawmtea te lam pan chuan an rawn tlân ta mai! Sawmtea chuan hmanhmawh takin kawngka chu a khar nghal thuai a, mahse a vih kalh hman tlat lo.

Inchhung lam aṭâng chuan mithi tho leh ho chuan rawn nek hawn tumin an rawn nawr dawt dawt a, Sawmtea chauh chuan a dang hneh dâwn lo tih a chiang hle. "Awmpui! Siama! Min rawn pui rawh u!" a tih rual chuan Awmpuia leh Siama chuan kawngka chu an rawn nam pui ve nghal rawk rawk a. 

Mahse, in chhûng lam ho chu an chak lutuk tlat, an rawn nawr hawng leh dâwn ṭhîn. "Pu Te, inring rawh! I silai kha kau rawh!" Sawmtea chuan a ti lauh lauh va. Awmpuia chuan kawngkhar nawr ṭâng ṭâng chung chuan kalh hram a han tum a, mahse a thei bik lo, an rawn nek hawng dawn zel mai.

Sawmtea chuan ring leng lawng hian, "Kan hawng thut ang a, lo lang hmasa ber kha Pu Tea'n a lo kâp ang. Pu Te, a lû-ah tak khân tum ang che! Fela, nang pawhin i sairawkherh khân an chhalah tak khân lo perh ve pawp pawp ang che." tiin thu a pe a. Pu Tea chu a mangang hle mai, a kut a khûr dar dar a. 

"Inveng hman lo ta ila, ka nupui hi an seh hmasa ber dâwn asin," a ti tham ṭiak a. Mahse Sawmtea chuan a lo hrilhfiah vat a, "Tihdan dang a awm tawh lo, an rawn nek hawn thut chuan buaina a tam zâwk dâwn." tiin a lo chhang let a. "Khat... hnih... thum!" tiin an chhiar rual a.

Sawmtea te chuan kawngka an nam lai chu an thlah thut a. Kawngka a rawn inhawng huau va, mithi tho leh pakhat rawn dâk hmasa ber chu Pu Tea chuan a chhalah tak a lo kâp ta dur mai! A thal nghal ṭhuai a. A dawt leh rawn tlân chhuak chu Fela chuan sairawkherh chuan a lo perh ve nghal a, a dâk awrh a, mahse a tlu ve hauh lo.

Chutah rawn zuang thutin Fela chu a rawn bawh tlu ta! "Min pui ru!" tiin Fela mangang chu a au vak vak a. Tluanga chuan a chempui chu hum nghet sauh vin, a nau lo bawh mektu lû-ah chuan a va sât ta siah siah mai. Pi Kungi chuan a fapa mangang lai a hmuh chuan a kâ hupin a lo ṭê chêl chul a. 

Mithi tho leh dang pathum an rawn chhuak leh a, Sawmtea, Awmpuia, leh Siama te chu an rawn bitum nghal a. Sawmtea chuan a hrei chuan amah rawn beitu ber chu bekah thisen per chhawk khawp chuan a lo chek a, a thal der mai. Awmpuia pawh chuan a thîrtiang ken lai chuan a tumpui mek thluakah chuan a thil tlang pawk a. 

Siama erawh che buaiin a tumpui chuan a bawhbet a, a hrawk seh tumin a ka a rawn ang tawn tawn mai a. Chutah, silai a rawn puak leh ta dur mai! Chu mithi tho leh chu Siama awmah chuan a rawn bawk thlawp a, Pu Tea'n a lo kâp leh hi a lo ni. Siama chu rang takin a rawn tho chhuak a, a thaw hlawp hlawp mai.

"In ṭha vek maw? Tumah an seh lo che u tiraw?" Sawmtea chuan a han ti a. In chhûngah chuan an lût ta ṭhem ṭhem a, chutah chhuat laia ruang lo let reng kha zawi muangin a rawn tho tual tual a. An han en chian chuan Pu Liana ngei mai kha a lo ni. Pi Kungi chu a ṭap chhuak ta tlawk tlawk a, "A ni thei lo... U Lian," a ti ṭiau a. Pu Tea pawh chuan a ṭhianpa hmel rapawm taka lo inthlâk ta chu a en tlawk tlawk ringawt a.

Pu Liana chuan hmel rapawm zet leh ngur chhur chhur chung hian an lam a rawn pan mek a,  Sawmtea chuan a hrei chuan a lû-ah tak a lo vai leh pawp a, a let ta der mai. In chhûng chu a reh ta ṭhap a. Chutih lai tak chuan, in chhûng pindan kawngka chu a rawn in-hawng a, Muani leh a fapa Kimkima chu hlauh hmel tak leh ṭî tak hian an rawn dâk chhuak ta hlawl mai. Muani chuan Pi Kungi a hmuh rual chuan, "NU KUNG!" tiin a va kuah chawt a, an pahnih chuan an in-kuah a, an ṭap dun ta ngawih ngawih mai a.

***************************************************

End of Episode 4