ONCE UPON A TIME IN MIZORAM (A mizo zombie horror story) Written by : Aaron Malsawmdawngzuala Episode - 2 : The Curse of Silence

ONCE UPON A TIME IN MIZORAM

(A mizo zombie horror story)

Written by : Aaron Malsawmdawngzuala

Episode - 2 : The Curse of Silence

************************************

4:00 AM

Khua a la thim hle a, mahse Lungthlir khua chu tûmân mutmu an tuah tawh lo. Pu Huma te nupa ruang chu puanvara inkhuhin kawtthlêrah chuan an muttîr a, a sîr hla deuh hleka Zova, thingkunga phuar beh, rawn rûm ri leh hrawih hrawih thin chuan boruak a ti ti rit zual kher mai. 

In chhûng lamah chuan Muani chuan kut khûr dar dar chungin Ruata dâra hliam thûk tak mai chu damdawi te hnawihin a lo tuamsak mêk a, Ruata chu a then sawk sawk a, a vun te chu a dâng deuh pup tawh bawk. Chutih lai chuan YMA Hruaitu Pu Rina chuan mipui chu Zova te in chhûngah chuan a hui khâwm a, "Zanin thil thleng hi a râpthlak hle tih kan hria. Mahse, he kan thil tawn hi khua leh tui dâng hriatah kan tlangau pui tûr a ni lo. 'Mi â khua' tiin mi'n min sawi dâwn a, kan hmingchhiatna tûr a ni. Chuvângin, he thil hi thup tlat tûr a ni a, Zova pawh hi a â thut a, a rilru buai vangin a nu leh pa te a that a ni tih chauh hi kan thuchhuah tûr a ni e," a han ti chang fak fak a.

Sawmtea chu thâwk la hrawk chungin a rawn ding chhuak a, a lungawiloh hmel kher mai. Vin lek lek hian, "Pu Rin, kan khaw mualpho thup nan chuan dawt i sawi thei alawm, mahse he thihna awm belh zel tur hi engtin nge i ven tak ang? En rawh, Zova saw a â lo, a thi tawh zâwk a nih saw! A phuar behna hrui te sawn a vun an ti thler nasa lutuk tawh, a chhan chu na a hre tawh lo, mitthi a ni tawh, tlangval pângngai pawh sâwm rual pawhin an man hneh zo lo a nih kha? Tisawn kan dah reng dâwn em ni? Upa Mawia pawh in lamah a dâra Zova sehna hliam vângin a mu mêk a ni lawm ni? Kan hmuh vek kha, thil thleng kha kan hmuh ve kha." a ti ta tawn tawn mai a.

Mipui chu an phun ta sup sup a, ṭhenkhat chu an hlauhthawn hmelin an hawi kual hruk hruk a. Pu Rina chu a thinrim angreng kher mai, Sawmtea lam chu a va pan hnai a. Vin zet hian, "Nang naupang thinchhe lutuk leh aia upa zahna nei miah lo hian khawtlâng rorel dân min zirtîr i tum em ni? Upa Mawia darah khan Zova'n a seh tih ka hria, anih Upa Mawia chu a lu ah i va vit ve mai dawn tihna em ni? Ruata pawh khu i that ve nghal dawn tihna em ni?" a ti ta hrep hrep mai a.

Chutah mipui lam chu a en leh a, "Inngaihtuah fîm rawh u. He thil hi khaw pum hmingchhiat theihna chungchâng a nih hi." a ti khur khur a. Sawmtea chu a lo zam bik eih lo, "I duhdana kan kal a nih chuan Lungthlir khua hi mitthi khua ah i chan tir dawn tihna a ni mai. Upa Mawia  saw a rawn harh leh hunah mihring a ni tawh lo maithei, Zova leh a nu leh pate ang khan a rawn awm ve anih chuan a chhungte a seh hlum ve nghal vek ang, chu chu nang pawhin i hria." tiin a lo chhâng lêt ve leh sak a. 

Chutah Awmpuia chu a rawn ding chhuak a, a aw chu a zawi na a, a fiah kak mai. "Pa Rin, Sawmtea hi a thinchhe deuh a ni maithei e, mahse a thil sawi hi a dik a ni.  Kan zinga a tam zawk hi chuan kan hmu ve vek a ni lawm ni? Pu Huma te nupa rawn tho leh thut kha? 'Ramhuai' tiin han chhal dâwn mah ila, an lû-a Sawmtean a vih khân an thi leh thei tho bawk sia. He thil hi natnahrik emaw inkaichhawnna hri eng emaw tak a ni. Upa Mawia hliam, Zova hliam leh Ruata hliam hi a hnuhma a inang vek a, sehna hnuhma vek a ni bawk." tiin Pu Liana lam chu ava hawi a, "Pu Lian, nang tal khân eng emaw sawi teh," a han ti leh a. 

Pu Liana chu ngawi vang vang a, mipui lam chu a rawn melh kual a. "Ngawi rawh u! Inhnialna hun a ni lo. Rina, Sawmtea sawi pawh hi a dikna chen a awm tlat. Mahse, khua kan chîmbuai hma hian, Upa Mawia in lamah sawn tlangval pathum va kal ula, a ṭha em tih va fiah phawt teh u. Ruata hi chu in chhûngah hian kan lo vêng ang," a ti ta a.

**************************************

4:23 AM - (Pu Mawia te inchhung)

Bati pakhat chauh chu khum bula dawhkanah chuan a inchhi eng a, chu chuan pindan chhûng thim ruih mai chu chhe te chuan a ti zia ve deuh. Upa Mawia chu khumah chuan a mu a, mahse a taksa erawh a hahdam lo hle. A thaw deuh hrawih hrawih reng a, a rawn thawk chhuah apiang chuan a hrawk chhûngah chuan hnawh tu awm ang mai hian a rawn ri leh hruk hruk thin. 

A dâra hliam, Zova sehna pawh chu a duk chur tawh a, a vun pawp aṭang chuan tui hnâng, rim chhia leh thâng zet mai hi a rawn chhuak ṭan a. A nupui Pi Remi chuan mangang zet hian tui sâ-in a hmai te chu a lo deh sak a. "Mawia, i awmdân hi a va mak ve! I khua a sik si lo, mahse i vawt vek bawk si. Pi Hliri tal kha kan va ko dâwn em ni ang? Engtin nge maw kan tih dâwn le?" tiin a phun sep sep a, Pi Hliri hi an khua Sub Centre-a an Health Worker a ni a, Upa Mawia hian 'ka tha mai ang, engmah a ni lovang' a tih tlat avangin buaipui a duh lo kha a ni. 

Upa Mawia chuan chhânna pêk tum hmel pawh a pu tawh lo, a khabe chu a sep khûr dawt dawt a, a kutzung tang te chu aikhirh ang mai hian a khawng vek tawh. Pi Remi chuan tui lum chuan a pasal hliam chu va deh leh a tum a, mahse a rim thâng tak vâng chuan a uak deuh ṭhat a. "Mawia, tihian lo awm la. Tlangval ho ka va ko ange, Sub Centre ah kal mai a tha ang." tiin hmanhmawh takin kawtthlêr thim ruih maiah chuan a tlân chhuak ta a. 

Mahse a tirah khan Upa Mawia hian buaipui a duh tlat lova, 'a dam veleh mai ang, ka va tuam tha anga ka lo let leh ang.' tiin in lamah a phei ta kha a ni a. Chuvang chuan tlangval mai nilo, an thenawm hnai zawng zawng te pawh mitthi in(Zova te in) lam panin an lo bo vek tawh bawk si.

Pi Remi beidawng chu in chhûng lamah bawk chuan a tlân lût leh a. Inchhûng chu a lo reh ṭhap a, bati pawh kha a lo thi ṭêp tawh. "Mawia?" tiin thim zîngah chuan a pasal chu a zawng a. Chutah, pindan luhna bulah chuan a pasal, Upa Mawia chu a lo ding rân mai a. A din dân chu a dik lo, a zang a kul em em a, a bân chu a ruh tliak vek ang maiin a uai thla hnup bawk a.

Chutih lai chuan an fapa Muanpuia chu a pindan aṭang chuan meng bui deuh chungin a rawn chhuak a. "Nu, eng nge ka pa i auh vak vak a? Ka pa chu eng nge a an a?" a rawn ti a. Pi Remi a pasal mak tih hmel taka en reng chung chuan, "Bawiha, i pa hi a—" a sawi zo hman lo. Upa Mawia chu ramsa thinrim ang mai hian Pi Remi lam pan chuan a rawn tlan ta thut mai a.

Pi Remi chuan chet ngaihna reng a hre lo, Upa Mawia chuan a nupui chu a rawn bawhthlu ta rawp mai. Pi Remi chuan chhuatah a tukhum sawh dawtin a ṭe thawt a, a pasal chuan a dulah tak mai chuan a rawn seh ta ngawng ngawng mai le. "A na lutuk, Mawia! Min thlah rawh! Eng thil nge i tih hi?" tiin a au chel chul mai a. 

Upa Mawia chuan riltam hmel zet hian a nupui dul chu vut chu a seh thler vek a, Pi Remi thisen leh a ril te chu chhuat laiah chuan a baw ta nei nuai mai. Ring tak hian, "Ka pa! Thlah rawh!" tiin Muanpuia mangang leh hlau lutuk chu a khûr dawt dawt a, a pa chu va pawh sawn a han tum a. Mahse Upa Mawia rawn hawi chhuak, a ka aṭanga a nu ril leh vun them rawn chhuak hnuang a hmuh chuan Muanpuia chu a tawlh hnung nghal vat a. 

A pa mit chu a lo vâr pup tawh a, mihring hmel reng a pu tawh lo. Muanpuia chuan thinlung na leh mangang zet hian a nu, dul thler veka thal reng mai chu a en tlawk tlawk a, nunna a nei tawh lo tih pawh a hriat hle. Chutah Upa Mawia chu rawn ding chhuakin Muanpuia chu a rawn thlek ve leh ta vung vung mai.

Upa Mawia chuan ngur chhur chhur chungin a fapa lam chu ava pan phei ve leh ta thung a, mahse Muanpuia chu a tlangval chak tha tak leh intha zo tak, insual hrat tak mai a ni a, thiam takin a lo tawlh sawn a. A bula thutthleng hniam chu ban vatin a pa rawn zuang tûr chu a lu ah tak a lo hlap fu hlauh mai. 

Chu chu remchangah la in a tlan chhuak nghal a, apa pawh chu a rawn tho leh vat a. Muanpuia chuan kawngka a khar hman tawh lo, chak takin a tlan a. Ring takin, "Min pui ru...khawngaihin min pui ru." tiin a au vak vak a. Hnunglam ava hawi a, apa chuan ngur chhur chhur pah chuan a rawn um ve mek bawk tih a hmuh chuan a mangang zual kher mai.

*****************************************

4:30 AM

Pu Liana thupêk zuiin tlangval pathum, Sawmtea, Awmpuia, leh Siama te chu hmanhmawh takin Upa Mawia te in lam panin an tlân phei a, inven nan tiin tiang an keng theuh bawk. An thlen dâwn ṭêp chuan, thim zîng aṭângin Muanpuia chu a rawn tlân chhuak hlawl mai a, a hmel atang chuan a hlau hle tih a hmuh theih vek a, a khur hlawk hlawk mai.

"Muanpui! Eng nge awmzia? Eng nge thleng?" tiin Siama chuan a lo zawt vat a. Muanpuia chu a thaw a chham dâwn hial a, "Ka pa... ka pa sawn min thah a tum! Ka nu... ka nu pawh a seh hlum tawh!" a ti ta mai a. A sawi zo hman lo ṭêp, an hnung lawk thim zîng aṭâng chuan thâwm rapawm zet, ramsa riltam ngur chhur chhur thâwm ang mai hi a rawn chhuak a. Upa Mawia chu a nupui thisena bual khah vek chungin a rawn tlan phei mek a. A mit chu a vâr pup a, a hmel pawh rapawm tak a ni.

Sawmtea chuan a tiang ken lai chu a hum nghet sauh sauh va, Upa Muana chu ava pan hnai a. A tiang ken lai chuan Upa Mawia bekah chuan a lo hlap chawrh mai. Upa Mawia chu a tlu ṭhelh a, mahse rang lutukin a rawn hawi let leh nghal a, rûm hrawih hrawih chung hian Sawmtea chu a rawn zuan ta thut mai. An in-bawhthlu rawk a, leiah chuan an thal dun ta tual mai.

 Sawmtea chu Upa Muana chuan a bawhbet a, a ka ṭânga chil phuan thâng zet leh thisen chhuak hnuang chung chuan Sawmtea hrawkah chuan seh a tum ngat ngat a. Mahse, Sawmtea chuan a thing ken chu Pu Muana kâ-ah tak ava chuktuah a, tiang zawk chu a seh ri ta rawp rawp mai a.

 

"Sawmte!" tiin Awmpuia chu a rawn tlân phei a, Upa Mawia bek lehlamah chuan a rawn hlap ve leh pawp mai. Upa Mawia chu a thal tawp a, mahse a la thi chuang lo, leiah chuan a la tal nasa mai a, a la rûm chhur chhur mai. Sawmtea chu a rawn tho chhuak a, a thinrim lutuk chu a hmel a sen vek tawh. 

A tiang ken lai bawk chuan Upa Mawia, leia let reng chu a lu ah tak chuan a hlap ta nghek nghek mai a. "Nilo! That kher suh u! Ka pa a nih kha!" tiin Muanpuia chuan ṭap chung hian dan tumin a rawn tlân phei a. Mahse Awmpuia chuan a lo dang vat a. Sawmtea chuan vawi 10 dawn lai mai chu a hlap nawn char char a, Upa Mawia lu chu a vaw sawp vek mai a, a thluak pawh a per chhawk chhawk mai.

Upa Mawia chu a che tawh lo, a zal der mai. Chutah Muanpuia chu thinrim hmel tak hian a khûr dawt dawt a, "Zawnga leh.." tiin Sawmtea chu hnek tumin ava pan phei ta. Mahse Siama chuan a lo dang ve thung a, a bânah chuan nghet tak hian a lo man bet a, "Muanpui, harh rawh! I pa ang chiah hian tunah hian Ruata pawh a awm ve mêk asin. Midangin an vêng mêk a, Ruata pawh saw i pa ang hian a awm vat dâwn. I hrethiam lo a ni." a tiin a hrilhfiah a.

Awmpuia chuan rawn tuihnih ve in, "I pa te ramhuai a kawchhunga lut emaw, a thluak a buai lampang a ni lo, inkaichhawn theih natnahri vâng zâwk a ni. I pa saw i kalsan lo a nih chuan nang pawh i nu ang khân a seh ve dâwn che asin," tiin a lo hrilhfiah ve bawk a. Muanpuia chu thlarau hmu ang mai hian a ding khawng tlat a, a hmelah chuan hrilhhaihna leh mak tihna a rawn lang chhuak chiang hle. 

Sawmtea chuan a tiang, thluak them leh thisen kai hnuang chu a han tuai fai nawk nawk a, Muanpuia hnenah chuan zaidam tak, fiah tak si hian, "Zova rawn haw aṭânga in-ṭan vek a ni. Zova'n a nu leh pa a seh a, i pa a seh leh a, i pa-in i nu a seh leh a nih hi. Kan that lo a nih chuan kan khawchhunga mi zawng zawng hi kan thi vek dawn." a ti a. Muanpuia chu leiah chuan a ṭhingṭhi hnawk a, kawngsira a pa ruang let reng leh a nu thih dân rapthlak tak chu ngaihtuah lêtin a melh ngai a melh tlawk tlawk ringawt mai a ni.

*****************************************

4:47 AM

Khua chu a vâr dâwn hnai tawh na a, Lungthlir khua ah erawh khawvâr tûr hmel hmuh tûr a la awm lo, a la thim vek mai. Zova te in chhûng boruak chu a la rit em em a, bati meichher aṭânga vengchhung mi thenkhat te phei chu a hma a, an thil tawn rapthlak tak avang chuan tlawmngai ngam tawh lovin an haw nual tawh. 

Inchhûng kil khatah chuan Pu Rina leh Pu Liana te chu mangan hmel tak hian an lo inbe mawlh mawlh a. Pu Rina chuan thâwk a han la hak a, "Liana, he thil hi thil pângngai a ni lo hrim hrim. Engtin nge mithi tawh hnu an rawn chet leh theih? Ramhuai thil nge Sawmtea te sawi ang khan natna hrik zâwk ni ang? Kan tlangval va tirh te lah chu an rawn kîr har si." a ti nuah nuah a. 

Pu Liana chuan a khabe tuai vung vung chungin, "Ka hre bîk lo le, mahse khawvâr hunah chuan thup hlen chu thil theih loh a ni tawh dâwn a nih hi," tiin a lo chhang a. Chutih lai chuan Ruata awmdan chu a rawn danglam a, a khur ta chur chur mai. Muani'n a ṭhutpui reng lai chuan a rawn rum ta chhur chhur mai a, Muani pawh chu a tawlh sawn nghal vat a.

Chutah Ruata chu chhuatah chuan a let thla tawp a, a eu vak vak a, a kutzungtang te chu a kawi ngul mai. A chet pah a, a ruh ri rawp rawp leh a taksa rawn in-sep dawt dawt thâwm chu a rapawm hle. Mipui chu hrilhhai leh hlau takin an tawlh hlat san hret hret a, "Eng nge awmzia?" tiin an in-zawt sup sup hlawm a. 

Ruata hmai chu a rawn dâng nghal vek a, a mit a rawn meng kawk a, mahse a dum lai reng reng a awm tawh lo, a mit chu a var hian a vâr pup mai a ni. Kawi sawi deuh hian a rawn ding chhuak a, mipui ho chu a melh kual a. Then khat chu hlauvin pawnah an tlan chhuak a, Pu Rina leh Pu Liana pawh chuan mak ti tak hian an en reng ringawt a.

Chutah a rum chhur chhur a, a rawn rak chhuak ta vak vak mai. Chuveleh a bula Muani ding reng chu a rawn bitum ta nghal a, chak zet hian Muani lam pan chuan a rawn zuang ta thut mai. Mahse, Muani chu a lo tawlh hman hlauh a, Ruata chuan bang a su chawrh a, a thal tawp mai. 

Mahse a rawn tho leh nghal a, tlangval ho chuan manbeh tumin an hual a. "In-seh tîr suh u! Man bet rawh u! In-seh tîr miah suh u!" tiin mipui thenkhat chu an lo au chel chul a. Tlangval hmun hrang hranga lo ding te chuan hmanhmawh zetin Ruata chu an rawn delh bet ta sup sup a, a chak em avâng chuan tlangval panga rual vel pawh chuan an hneh mang lo a ni. 

Ruata chu leiah chuan a tal vak vak a, a sehthei apiang seh tum chuan a ka a ang tawn tawn a. Chutia tlangval hovin Ruata an man beh mek lai chuan Muani chu choka atangin chemte hian a rawn phei a, dimna tel hauh lo hian Ruata lû-ah tak chuan a rawn vit ta pawp mai . Ruata chu a zawi ta hnawk a, a che leh tawh hauh lo. 

"U Ruat!" tiin a unaunu Engmawii chu a rawn ṭap chhuak ta vak vak mai a, Ruata ruang chu va bawhin, "Nilo, ka u...tinge nang kher?" tiin a tap hawm hawm mai. Mipui zawng zawng chu an ngawi ṭhap a, Muani kuta chemte thisen kai hnuang nena ding khawng reng chu hrilhhai h,el takin an en ṭhap ringawt mai a ni.

Chutih lai chuan Sawmtea, Awmpuia, Siama leh Muanpuia te chu hmanhmawh takin Zova te in panin an rawn tlân phei mêk a. Mahse in an thlen hma chiah, kawtthlêr thim laia thingkung, Zova an phuar behna hmun an thlen chuan Sawmtea chu a ding chawt a. Thingkungah chuan hruizen chu a lo in-phelh nuai a, hruia vun them leh thisen kai nuai te, leh hruizen chat nuai mai te a hmuh chuan a meng phâwk kher mai. 

Zova a lo awm tawh lo, thingkunga an phuar behna aṭâng chuan a lo tal chhuak tawh a ni. Sawmtea chuan hruizena vun them lo inkhai deuh hnup chu thlîrin, a thawk hak a. Mangan hmel tak hian, "Khai lehhh..." a ti zawi sap ringawt. An khua chu buaina nasa zâwk leh thihna nasa zâwkin a la hmuak dâwn chauh tih a chiang hle.

**************************************************

Ruata ruang chu mipui te chuan an en thap a, chhuatlaiah chuan a la thal ta reng a. Muani chuan a chemte chu a la hum reng a, tuman engmah reng an sawi lo. Inchhûng chu a reh tlawk tlawk a, Engmawii ṭap thâwm chauh chu hriat tûr a awm a. Chutah vin lek lek hian, "Muani, eng thil nge i tih tak mai hi?" Pu Rina chu a rawn au chhuak hlawl mai, a hmel chu thinrimna leh hlauhna in a khat tih pawh a hriat theih. 

Chutah amah bawk chuan, "Mithi tawh, kan tlangval, kan unau ngei i that anih hi. Engtik laiin nge chemte te kha i lo va lak hrim hrim a? He thil hi khawtlâng dân kalh a ni, i thil tih hi 'tualthahna' a nih hi!" tiin Muani lam chu a rawn pan phei a. Muani chu a lo tawlh hnung eih lo, rum zeta lo melh let pah hian, "Pa Rin, i hmu ve vek a ni lawm ni? Ruata kha mihring a ni tawh lo. That lo ta ila tu nge a seh hmasak ber dâwn i hria em? 'Tualthahna' i tih tlat chuan i mawl hle a nih chu. Kan hmaah, kan mithmuh lai ngeiin mithi an rawn nung leh mêk a, nang chuan 'dân' leh 'hmingchhiat' chauh i la buaipui a nih hi!" tiin a chhang let ve siah siah mai.

Mipuite chu an rawn ri ta nuai nuai a. Ruata unaunu Engmawii chu a rawn ding chhuak a, a mit chu a sen vek tawh. Muani chu melh khurin, "Muani, ka unaupa a nih hi. Tinge i thah kher a, kan khua hi zanin hian tihian kan inthat hmiah hmiah reng mai dawn em ni? I va han nunrâwng ve! He thil hi ramhuai thil tih vek a ni, kan khua hi ramhuaiin min luhchilh mek a ni." tiin a ang tawn tawn a. 1987 thingtlâng rilruah chuan mithi rawn nung leh hi "ramhuai kawchhung lût" angah an ngai tlat a, thah kher kha an la hrethiam lo a ni mahna.

Pu Liana pawh chu a rawn ṭawng chhuak ve ta a. "A dik a ni, Muante. I chet dân kha a râpthlak mah mah a ni. Tlangval hovin an man bet tawh a, phuar beh te pawh a theih dâwn tep tawh a, mahse i rawn that kher kha a zia lo khawp mai. Hei hi chu khawtlângin kan la rêl tûr a ni ang," a rawn ti dam deuh thlup a.

"Khawtlâng rêl hun i la nghâk dâwn em ni, Pa Lian?" Awmpuia aw a rawn ri chhuak a, mipui chuan kawngka lam an va en thap a. Sawmtea te pali chu inchhûngah chuan an rawn pên lût ta hlawm a. An hmel chu a thîm khup a, Sawmtea bân leh a hmaiah chuan thisen a la kâi nuai a. "Upa Mawia pawh a thi tawh. Pi Remi pawh a thi tawh. Muanpuia chauh hi a ni an chhungkua aṭânga dam chhuak chu," a rawn ti ve bawk a.

Inchhûnga mipuite chu an phun leh ta mur mur hlawm mai, Upa Mawia chanchin an hriat meuh chuan an hlauhna a zual hle bawk. Pu Rina chuan hriatthiam loh hmel takin Sawmtea chu a en a, "Eng nge i sawi awmzia? Upa Mawia chu engtin nge a awm a?" tiin a lo zawt vat a. Sawmtea chuan Pu Rina chu rum zet hian a melh a, "Ka sawi zawh chiah kha, he thil hi inkaichhawn theih natna, inseh atanga natna inkaichhawn theih a ni. Upa Mawia khân a nupui a seh hlum a, keimah ngei hian a lû ka vaw sawp vek. Muani thil tih hi 'tualthahna' a ni lo, 'dam khawchhuahna' a nih hi. Tin, pâwnah sawn Zova a awm tawh lo, a tal chhuak ni ngeiin a lang." a tih chuan mipui ho chu an mangang kher mai.

"A... a tal chhuak a?!" tiin Pu Rina chu a khûr nghal der mai. "Engtin nge a tal chhuah theih? Kan phuar nget hle si a!" a han ti leh a. Sawmtea chuan a lu a thing a, "A tal chhuah dân a râpthlak hmel khawp mai. A vun pawh a thler vek, a vun them pawh hruaih sawn a uai hnuang alawm. Tunah hian khawiah nge a awm tuman kan hre lo. Inhnial buai hman kan ni lo, kan vaia kan inthurual a ngai a ni." a han ti chang leh fak a.

Inchhûng boruak chu a rit zual hle mai, ngaihdan pawh a inang lo tlang hle bawk. Ṭhenkhat chuan Pu Rina lam ṭangin, Muani leh Sawmtea te chu "tualthattu" leh "mahni mihring pui nunna pawh zahna nei lo." tiin an sawi a; an rilruah chuan mithi tawh hnu rawn che leh chu ramhuai hnathawh angah an ngai tlat mai si a, an lû-a vih leh vuak hlum kher kha "rapthlak" leh "Pathian pawi khawihna" hialah an ngai a ni. 

Thenkhat erawh chu Sawmtea lam an tang thung a, tuman pawna chhuah an ngam lo, a chhan chu Zova kha khawiah nge a awm an hre tlat lo a ni. Pu Rina hmingchhiat hlauhna leh a dawt sawi thup tumna zawng zawngte kha vawm bo ang hlauh an ni tawh, mipuite thinlung chu dam khawchhuah tumna leh thih hlauhnain a lêm hneh tawh zawk tawh tlat.

Pu Liana chuan mipuite chu tumah chhuak lo turin a hrilh hlawm a, patling thenkhat chuan an nupui fanau, in lama mu mek te chu an ngaihtuah takzet a. Rorel thiam dan pawh a har khawp mai, Pu Rina lah chuan a kawi zawng hlirin thil a lo la ngaihtuah ngar ngar a, YMA hruaitu ber a nih bawk si avang chuan a lam tang an awm nual lo thei si lo.

************************************************

5:00 AM

Khawvar hun ni tawh mahse Lungthlir khua chu a vawt ruih mai a, ni zung hmel takngial pawh hmuh tur a la awm lo, a la thim vek mai. Pu Rina chu a rawn ding chhuak hlawl a, mipui phun ri mur mur chu rawn khakin, "Ngawi rawh u! Ngawi rih teh u!" a han ti vin deuh hlur a. "Khua a vâr ṭêp tawh, helai hmunah hian awm khawm tlat rih ila a him zâwk ang. Khua a lo en deuh hunah hma kan la dâwn nia, khawvar nghâk law law ang u," a than tih chhunzawm leh a.

Pu Liana pawh chuan lo tuihnih vatin, "Ni e, kan nupui fanaute kan ngaihtuah tlâng viau ang tih chu a hriat a, mahse pâwn lamah sâwn Zova a tal chhuak tawh si a, khawiah nge a awm kan hre si lo. Thim zînga inphit chhuah nuai nuai hi a hlauhawm zâwk, buaina namen lo a chhuak palh ang e," a lo ti ve bawk a.

Mahse, patling thenkhat chu an lungawi ta tlat lo. Khawtlâng hruaitute mah nise an thu chu an ngaih pawimawh sak hlei thei tawh tlat lo. An zinga mi Pu Thana chu rawn tawng chhuakin, "U Lian, i sawi chu a dik maithei, mahse ka nupui leh ka fate pathum inah engmah thil thleng hre ve hauh lovin thlamuang takin an mu mek asin! Zova khan kan in lam a lo pan a nih chuan engtin nge an lo invên ang? Kei chu ka awm hle hle thei lo, ka chhungte ka thlahthlam thei lo a ni." tiin a insehruh nasa mai a.

A bula pa pakhat lo ding ve, Pu Vana pawh chuan, "A dik a ni. Pu Lian...Pu Rin, nangni chu in chhungkuain helai hmunah hian in awm khâwm a, in thla a muang a nih kha. Keini erawh kan in a hla a, ka fapa upa ber lah ram riakin a chhuak daih bawk si. Ka chhungte saw thi tûrin helai hmunah hian ka nghahpui thei lo che u!" a rawn ti ve leh piap piap mai.

Pu Zira chu rawn tawng chhuak ve lehin Pu Rina chu rum zet hian a melh a, "I thup tumna leh i 'mi â khua' nih hlauhna vâng hian buaina kan tawk thui tawh viau a ni. Tunah pawh Ruata kan chân leh der tawh a, helai hmuna kan tawm reng hian himna min thlen dâwn chuang lo. Kan thi dawn a nih leh kan inah ngei kan thi tlang zawk ang!" a rawn ti ve leh bawk a.

Mipui zinga mi Pu Chhuana chu thinrim hmel tak hian a rawn pen chhuak a, "Kawngka hi hawng rawh u! Ka chhungte va hruai ka duh, tûman min dang suh u! Kan in vêng tûr talin ka  awm a ngai," tiin kawngka lam chu a rawn pan phei ta mai a. Upa Kaptea chuan lo dang vatin,  "Inbeng dai teh u, inhnial hi tunah chuan thihna a ni tawh zâwk." tiin a lo khap ve bawk a, mahse tûman a thu chu an ngaithla tawh lo. Inchhûng chu inhnial thâwm leh thinrim au thâwm hian a khat mup mup a, boruak chu a rit zual kher mai.

Chutih lai chuan, Sawmtea chu mipuite kârah chuan rawn pên chhuakin, chhuatlaia Ruata ruang let reng chu a rawn pel phei a. A hmel chu a dur khup a, a mitmeng chu thinrimna in a khat vek bawk. Ring leng lawng hian, "Mizo kan ni lawm ni? Mi huaisen kan ni lo'm ni?" a rawn ti chu an ngawi thap hlawm a. 

Inchhûng chu a reh nghal ṭhuap mai, "Kan inhnial avang hian Zova kha a thi dawn tihna a ni lo, hlauhna hian in chhungte a chhan chhuak dâwn hek lo. A pasal leh a chhungte chan zo chiah, hmeichhia meuh pawhin a tih tûr a hria a ni lawm ni?" tiin Muani chu ava melh zawk a. "Zova zawng tûrin pâwnah sâwn ka chhuak dâwn. Ka hmuh hunah ka that nghal bawk ang. Hlau in awm chuan helai hmunah hian lo tawm reng ula, inhnial hlum ṭhak rawh u!" a ti hmiah hmiah a, bang sîra hreipui lo inhung chu a ban nghal a.

Siama chu a rawn pên chhuak ve nghal a, "Ka lo zui ve ang che, Sawmte. Kan pahnih chauha kan kal pawhin a tawk tawh viau e," a rawn ti ve ta a. Boruak chu a rit zual takzet a, chhuak duh si, mahse pâwn lama thihna hmachhawn ngam si lo rilru chu a insual buai ta nuai nuai a ni ber mai.

Sawmtea pawh chuan a lu a lo bu nghauh va, "A tha e, hmanrua va la la, kal nghal ang." tiin a lo chhang a. AWmpuia pawh chuan, "Keipawh ka lo kal ve dawn." tiin Muani chemte hum lai chu a chhuhsak a, tichuan an pathum chuan an chhuak ta a. Chuveleh Pu Rina chuan kawngka a kalh nghal sawk sawk a, "A bak chu tumah kan chhuak tawh tur a ni lo." a ti ta hmak mai le. Inchhûng chu a reh nghal ṭhap a, pâwn lamah tlangval pathum chauh thihna hmachhawn tûrin an chhuak a, inchhûngah chuan thlamuanna nge an hmuh dâwn thihna hlimthla zâwk tih pawh hriat rual a ni ta lo.

******************************************************

END OF EPISODE 2