ONCE UPON A TIME IN MIZORAM (A mizo zombie horror story) Written by : Aaron Malsawmdawngzuala Episode - 3 : Stained Innocence

 ONCE UPON A TIME IN MIZORAM

(A mizo zombie horror story)

Written by : Aaron Malsawmdawngzuala

Episode - 3 : Dawn of Despair

****************************************

Khua a rawn vâr ṭan ta riai riai a, chu khawvar chuan himna aiin thihna zawk a rawn thlen dawn em tih hriat a ni der mai si lo. Kawtthlêr thim mup mai te chu a rawn lang fiah ṭan a, thli fim rawn thaw heuh heuh te chuan khaw chhûng reh tlawk tlawk mai chu a chhêm vawt zual emaw tih mai tur hian boruak chu a hik hian a hik vek mai.

Sawmtea chu a hreipui ken lai hum reng chung chuan thawk a han la kawk a, a kâ aṭâng chuan,  “A hnai ber bawk a, kan in lamah phei phawt ang u.” a han ti a. A mitmeng chu a thîm ruih a, an in lamah a farnu kum 18 mi leh a nu chauh chu an awm avâng chuan a rilru a hmanhmawh tawh hle. 

Sawmtea bawk chuan, “Hetianga chapal nena tual tlân hi chu a harsa emai, pheikhawk pum te bun a, thmawthaw te va thlak ka duh.” a han ti chhunzawm leh a. Awmpuia chuan a khat tâwkin Zova te in, khawchhung mipuite in-kalh hnan tlatna lam chu a va thlêk leh ṭhîn. “Sawmte, kan inṭhen hrang phawt dâwn em ni ang? Pathum chauh kan ni si a, kan in lam ṭheuh va enfiah ila, keipawh pheikhawk pum bun ve ka duh alawm. Kawnah sawn kan innghak khawm leh mai anga?” tiin a han rawt ve a.

Mahse Sawmtea chuan rang zet hian a lû a lo thing a, “Ni lo, kan inṭhen hrang tûr a ni lo. Pathum chauh kan ni a, thim zînga mahni chauhva kan awm a nih chuan thihna kan hmachhawn tihna a ni mai. Ka inthlak zawh hunah inzui zêlin in tin kan enfiah zâwk dâwn nia. In-ṭhen hrang lovang u,” a tiin a lo hnial a, a hmel thutak zet mai chuan hnial chi a ni tawh lo tih a lantir chiang hle.

Siama chuan a chemte ken lai chu han lek kâng hlekin, “Sawmtea sawi chu a dik, inṭhen hrang lovang u. Khawiah nge Zova kha a awm kan hre si lova, inthen hrang ta ila, tawng thut ta ila, pakhat chauh tân chuan thihna a hnai dâwn mah mah a ni.” a lo ti ve bawk a. Awmpuia bawk chuan inthlahrung hmel tak hian, “Tlangval dangte kha, Pu Rina khan a dang reng thei dâwn em ni? Zova zawng tûrin an rawn chhuak ve duh ngei dâwn a, kan lo ngaichang lawk dawn em ni?” a han ti leh a. Pu Rina luhlulna leh khatiang tlangval chak tak takte inchhûnga an tâng tlat tûr kha a fair lo a ti ve pawh a ni mahna.

Sawmtea chu a han ngawi vang vang a, “Lo chhuak ve pawh nise, tûmah innghak hman kan ni lo. Minute khat kan hloh apiang hian tu in emaw thihna an hmachhawn zel a ni dâwn asin. Tunah pawh hian Zova hian tute in nge a tlawh tawh kan hre lo,” a han ti chang leh fak a. Tichuan, Sawmtea te in, kawtthlêr thlang deuh lama awm pan chuan fîmkhur takin an inzui thla ta a. Khawvâr êng rawn lang ṭan chuan kawtthlêra thisen baw nuai mai te, Zova vun them hrui a lo uai hnuang mai te chu a rawn ti fiah chiang tawh kher mai.

*****************************************

Sawmtea te thian ho pathum chu Sawmtea te in kawtah chuan an ding thap a, Sawmtea chuan kawngka chu a han kik dat dat a, "Ka nu, keimah Sawmtea... kawngka rawn hawng teh," a han ti zawi sup a. Rei lo têah inchhûng lamah chuan thâwm a rawn awm a, kawngka kalhna chu rawn ri rakin Sawmtea nu, Pi Zari chu hâm bai bai chungin a rawn dâk chhuak a. Mahse, a fapa kawra thisen kai hnuang leh a hmel dur khup a hmuh meuh chuan a hâm lai chu a tâwp chiang kher mai. "E khai! Bawiha, eng nge awmzia? Ngatinge i kawr te chu? In insual leh tawh em ni? Thisen a nih hi!" tiin a phi nghal chuk mai a, Sawmtea bân leh dâr te chu a han dap kual nawk nawk a, a fapa chu a hliam emaw tiin a hlauthawng takzet a ni.

Sawmtea chuan a nu phi hlut mai chu dârah vuanin a han thing deuh nawk nawk a, "Ka nu, hahdam teh. Thil hrilh tûr che ka nei a, mahse fiamthu a ni miah lo a nia. Khuaah hian natna râpthlak tak a lêng mêk a, mithi tho leh an awm a ni." a han ti thawr mai a. Pi Zari chuan a fapa hmel en deuh hu a, a hrilhhai kher mai.

"Mithi tho leh a? Sawmte, zu i rui em ni? Khua a vâr ṭêp tawh a, tun ang hun hi fiamthu thawhna hun a ni lo a nia." a lo ti vin hlur mai a, a fapa thil sawi chu a âwih thei lo hle a ni. Chutih lai chuan Sawmtea farnu kum 18 mi, Hlimpuii chu a pindan aṭânga rawn chhuakin, a u te ṭawng thâwm chu a rawn hria a. 

Mak tih hmel zet hian, "Engmaw u? Mithi tho leh an awm a?" tiin a rawn zawt ve nghal a. A u hmel thutak zet leh a ṭhiante pahnih hmel dur khup a hmuh chuan a hlauthawng takzet, khua a vâr ṭan tawh si a, hetiang boruak an rawn keng lût thut mai chu a a mumang emaw a ti hial a ni.

Siama chuan Hlimpuii leh Pi Zari chu lo hrilhfiah vatin Zova sapel rawn haw in a nupui a beih dan te, a nu leh pa a sehdan te leh an phuarna atanga a bo thute, Upa Mawia atanga Ruata thlenga hri an kai darh dante chu a han sawi thuak thuak a, "Zova saw mihring pângngai a ni tawh lo, a nu leh pa pawh a seh hlum tawh a, tûnah khawiah nge a awm pawh kan hre lo." tia a sawi lai te chuan Pi ZAri chuan a hmui a hup a, a thuhriat chu a rap takzet. 

Awmpuia pawh chuan tuihnih ve vatin, "A dik alawm, ka nu Zar. Upa Mawia pawh in ama nupui ngei a seh hlum a, Zova ber lah a lo tal chhuak hman tawh bawk si. Tunah hian kan va zawn a ngai a ni," a lo ti ve bawk a. Pi Zari chuan sawi mai tur pawh a hre lo, a fapa leh a ṭhiante chuan dawt sawi hmel an pu der si lo, ramhuai thiltih a nih te chu a ring ve nghal rum rum a, a hlauthawng ṭan hle mai. 

Bah deuh nuai hian, "Eng thil nge maw in sawi hi le? Khawnge tunah veng mipui te leh YMA hruaitute? Tûman thil thleng engmah min rawn hrilh bawk si lo." a ti khûr dar dar a. Sawmtea chuan a nu chu chhâng zui rih lo hian, "Engpawh nise, ka inthlak a ngai." tiin a pindan lamah a lût tlang nghal a.

Sawmtea inthlak mêk lai chuan Pi Zari bawk chuan, "Awmpui, Siamte... engthil tak nge thleng a? In thil sawi chu a va râpthlak ve, ka buai vek tawh. Khawtlâng hruaitute chuan engtin nge an tih?" tiin a han zawt nawn leh a. Awmpuia chuan thâwm zawi thei ang berin Zova te in chhûng boruak leh Pu Rina luhlul zia te, Zova ina awm mipuite chu an inkalh hnan mek thu te chu a hrilh thuak thuak a, "Tunah hian Zova kha a tal chhuak a, khaw chhûngah hian a vâk kual mêk a ni." a tih lai chuan Hlimpuii chuan a lo hlau takzet.

Sawmtea chu insiam zovin pindan atang chuan a rawn chhuak a, hreipui chu a rawn hum chhuak bawk. A nu chu va pan hnaiin, "Nu, kawngka hi kalh tlat ang che u. Keimah ka nih loh chuan tûmah hawn miah suh. Khua a vâr ṭêp a, mahse fîmkhur a ngai tho ania. Tupawn rawn kik pawh ni se, hriat chian hma chuan hawn miah loh tûr." a tiin a chaha. 

Pi Zari chu a ṭap lo chauh a ni, "Sawmte, chhuak lo mai rawh u. Hetiang boruak kâra thihna va  hmachhawn chu a hlauhawm emai, police ko zâwk ula." tiin a fapa kut chu lo vuan ve ṭâng ṭâng mah se Sawmtea chuan a nu kut chu a thlah sak a, "Nu, kan khuaah Police Station a awm ve loh hi...khaw thenawm ah daih alawm a awm, nangpawn i hriat kha. A nih tûr ang a ni vek tawh, midang kan vên an ngai, kan hmanhmawh lo chuan midang an thi belh zel dawn." tiin a hnial tlat a.

Chutah Hlimpuii lam chu ava hawi a, "Hlimpui, ka nu hi lo vêng ṭha ang che. Kawngka hi hawng miah suh u, lo kalh tlat ang che u." tiin a chah ve leh a. Hlimpuii chu a hlau tawh hle a, a khûr dar dar a, "U... lo lêt leh vat ang che u. Eng thil pawh ni se, hmanhmawh ula, i laka thil ṭha lo thleng tûr chu ka ngaihtuah ngam lo a nia." tiin a tap lek lek mai. 

Pi Zari chuan phallo tak chung siin a fapa leh a thiante inzui chhuak tûr chu a thlîr zui vawng vawng a, a fapa tlangval huaisen takin a kalsan tâk hnuah chuan an in reh tak mai chu a hma aiin a hlauhawm ta riau hian a hre hial a. Tichuan, Sawmtea te pathum chu an hmanrua theuh hum chungin kawtthlêrah chuan an in-zui chhuak leh ta a.

************************************************

5:33 AM

Zova te inchhûng boruak chu a tawt up up tawh hle a. Khua a rawn vâr ṭan takah chuan mi ṭhenkhat thla a lo muang deuh nge, patling rual thenkhat te chuan chhuah ve mai chu an duh ta tlat a. Pu Rina chu patling pakhat, Pu Chhuana chuan ava pan a, "Pu Rin, khua a vâr tawh hi! Kan nupui fanaute pawh va ngaihtuah ve tawh viau a asin? Kawngka hi hawng tawh teh ang." a va ti a. 

Mahse, Pu Rina chu a ṭawng lo va, tukverh lama ni chhuak mek chu a thlîr ngar ngar a, melh ngai a melh reng bawk. Tlangval ṭhenkhat phei chu an thinrim tawh takzet a, an zînga pakhat chu rawn ding chhuakin, "Mizo zia lo lutuk! YMA hruaitu pawh ni mahla i thu kan zawm reng nachhan tûr ka hre lo. Kan hmaah ngei Ruata khatiang khan a awm a, pâwn lamah kan chhungten enge an tawh pawh hre lovin hetah kan tawm reng a, a dawihzep thlak lutuk." tiin Pu Rina chu a vin ta vak vak mai a. 

Midangte pawh chuan an Khawtlang hruaitu pakhat zawk, Pu Liana lam chu hawiin, "Pu Lian, nang tal khân eng emaw sawi teh! Hetiang hian mi in chhûngah kan tâng reng dâwn em ni?" tiin an han zawt ve leh a. Mahse, Pu Liana chu an piah hla deuhvah chuan rilru buai hmel takin a thu ngawi reng a, sawi tûr reng a hre bîk lo.

Chutah tlangval pakhat, Sentea chu thinrim hmel tak hian a rawn pên a, "Pu Rina hi kan khuaah a thu ber pawh a ni hleinem, mi dawi zep lutuk vângin ka thi ve dâwn lo." a ti khur khur a. Tûman an dan hman hma chuan kawngka kalhna chu hmanhmawh takin a hawng rawp a, pawnah chuan a tlan chhuak ta mai. 

Mahse Sentea chu a kal thui lo kher mai, a hma zawna a thil hmuh chuan a ti ding nghal chat a. Vun pawh nei mang tawh lo, hmel rapawm zet mai, Zova chu a rawn lang leh ta thut mai a, Sentea nen chuan an inhnaih lutuk tlat. Sentea tan pawh tlanchhiat hman ngaihna a awm tawh lo, Zova chuan a man hman ta.

Mipuite chu an au chel chul a, hmeichhe ho phei chu an ṭe ring hlawm ngang mai. Zova chuan Sentea hrawkah tak chuan thisen chik zawr zawr khawp chuan a seh ta ngawng ngawng mai a, Sentea hrawk aṭanga thisen rawn chik chhuak chu kawngka aṭâng chuan mipuite chuan an hmu vek a. 

Chutih lai tak chuan Pu Rina chu rang lutukin a rawn tlân phei a, Sentea tanpui ngaia a mangang au thâwm pawh chu ngaihsak lek lo hian kawngka chu thahrui zawng zawng sâwm khawmin a khar ri dawt a, a kalh nghal hmiah mai. "Sena kha... kan puih a ngai! Kawngka hi hawng rawh, hawng vat rawh." tiin tlangval ṭhenkhat chuan chhuah ve leh an han tum a, mahse Pu Rina chuan hneh takin kawngka chu a dâp tlat a. 

Thaw hlawp hlawp chung hian, "In hmu a ni lawm ni? Kan chhuak a nih chuan thihna a ni mai! Tûnah hian Sentea saw puih tum mah ula, Zova sawn tute nge a hnungah sawn lo hruai tawh dâwn kan hre lo, engzah nge Zova ang hian awm tawh ang tuman kan hre lo. In chhungte in hmangaih a nih chuan helai hmunah hian in la him ber rih." tiin kawngkhar bulah chuan a ding tlat a. 

Pu Rina'n chutia a sawi takah chuan tûmân sawi tur an hre ta lo va, an mangang chu an in-melh tawn hruk hruk ringawt mai a ni. Pâwn lamah chuan Sentea mangang au thâwm chu an ngaithla thap a, a hnu deuhvah phei chuan thâwm rapthlak tak, tisa seh thler thâwm leh Sentea mangang au thawm zawi ta tial tial pawh chu a hriat theih vek. 

Pu Rina ṭawng theih luat leh dawihzep luat avang chuan tûmân kawngka chu hawn an ngam leh tawh lo va, pawn lamah chuan an ṭhianpa, an khaw tlangval Sentea chu mangang takin an thih tîr ta tawp a ni ber mai. Inchhûng chu thihna rim leh in-thiam lohnain a khat a, Pu Liana pawh a mangang lutuk chu a ding ngawi vung vung ringawt mai a ni.

*********************************************

5:48 AM

Khua pawh a vâr chiang tawh hle a, Lungthlir khaw kawtthlêr chu ni zung chuan a chhun êng phut mai. Sawmtea te ṭhian pathum pawh an inthlak vek tawh a, pheikhawk pum leh thawmhnaw fai an inbel hlawm a. Zova hnuhma hmuh tûr a awm mai loh avâng chuan an mangang ru hle a. 

"Khawnge maw a awm ang le? Zîng dâr ruk a rîk dâwn tawh a, an in lamah te khan a lo awm reng lo maw le?" Siama chuan a han ti nuah nuah a. Awmpuia pawh chuan, "A hlauhawm ber chu a rawn che leh thut tûr hi a ni. In tin hi luh chhuah ila a ṭha lo maw?" a han ti ve leh a. Mahse Sawmtea chuan a lû a thing a, "Chutia kan ti anih chuan hun kan hloh hnem dâwn emai, kawngpui lamah hian...." a sawi zo hman lo.

Kawtthlêr thlang deuh aṭâng chuan, "Min pui ru! Khawngaihin min pui ru!" ti a mangang au thawm an hre ta tlat mai. Sawmtea te pathum chu thâwm lo chhuahna lam pan chuan an tlân phei nghal hlawk hlawk a. Upa Mawia te in bul an va thlen chuan, kawtthlêrah patling pakhat hi mangang takin a rawn tlân chhia a, chupa chu Pu Tea a ni. 

A hnungah chuan Pi Remi, hri kai ve tawh chuan dawi zepna a rawn ûm mek hi a lo ni a. Pi Remi hmel chu a rapthlak takzet, a pasal Upa Mawia sehna avanga a dul thler duai mai aṭâng chuan a ril a rawn uai thla hnuang a, a vun te chu a dang var pup bawk. Mihring pângngai tlân dân pawh a ni lo, a taksa chu a tlan pah chuan a inthlep hnawk hnawk ni berin a lang.

Chu veleh Sawmtea chuan a hreipui chu lek kângin Pi Remi lam chu a pan phei nghal a. Chutah Pi Remi chu a rawn tlan phei a, Sawmtea chuan a lu ah tak lo cheh inring sa ranin a lo tin uluk tawh kher mai. Mahse a rawn thlen dawn tepah chuan Pi Remi chu a rawn zuang ta thut mai a. Sawmtea chuan a hreipui chu a lo vai hman tawh si, a lu ah chek fu ta lo chuan Pi Remi awmah tak chuan a chek tlum ta thawih mai a. 

Pi Remi chu a tawp chat a, Sawmtea chuan a nawr phei dawt dawt a, mahse thil mak tak a thleng ta. Pi Remi chu a chak em avâng leh a lû takah Sawmtea'n a cheh loh avâng chuan na a hre hauh lo. Sawmtea chuan a hreipui chu phawi lêt leh a han tum a, mahse a phawi thei tlat lo. Chutih a la inpal tlu palh zui lehnghal a, leiah chuan a thal tawp mai.

Pi Remi chuan Sawmtea chu a rawn bawhbet nghal a. Sawmtea chuan a hreipui tlang chu nghet takin a hmer a, Pi Remi awmah chuan a hmet tlum zual sauh a, mahse awmzia a awm vak lo khawp mai. Pi Remi kâ aṭânga chil phuan thâng zet leh thisenhnang zet mai rawn chhuak chu Sawmtea hmaiah chuan ala far zui a, a chak lutuk chu Sawmtea te ang, tlangval tha chak tak pawh chuan a hneh ngang lo a ni ber mai.

Chutih lai chuan Awmpuia chu hnung lam aṭângin a rawn tlân phei a, a thirtiang ken lai chuan Pi Remi hrawkah tak chuan a va thil tlang ta pawp mai a. Mahse, thîrtiang chu a nghawng ruhah a inbat tang tlat amaw tih mai tur a ni, Awmpuia pawh chuan a phawi leh thei mai bîk lo. 

Pi Remi chu a la rawn ding chhuak leh thei ta tlat mai. Awmpuia chuan thirtiang chu a la vuan reng a, mahse Pi Remi chuan a hrawka thirtiang inthil tlang reng chung chuan Awmpuia chu a  bei ve leh ta thung a. Thirtiang vuan reng chung chuan an innawr kual chiam a, Awmpuia tân pawh tihngaihna vak a awm leh ta lo.

Pi Remi chu thihna tuipui aṭânga rawn tho leh ang maiin a la kawlh sen hle a. Mahse Siama chu a rawn che chhuak ve ta, a chemte hriam tak chuan Pi Remi chu a chhipah tak chuan a rawn vit tlum ta pawk mai. Pi Remi taksa chu a khûr dawt dawt a, a ngur chhur chhur ri pawh a tawp hmak mai. 

Siama chuan a chemte chu a phawi leh hrawk a, Pi Remi chu a zai ta riai riai a, leiah chuan a thal tawp mai. Sawmtea chu a rawn tho chhuak a, a thaw hlawi hlawi a. Pu Tea chuan Pi Remi ruang chu enin, U.. U Remsangi a ni lawm ni hei chu...eng nge awmzia?" a ti chel chul mai a, mahse Sawmtea te chuan chhang lovin Pi Remi ruang chu an thlir ngawi reng ringawt a.

**************************************

 6:00 AM

Zova te inchhûng boruak pawh ala tawt up up hle a. Tukverh aṭânga mipuite'n kawtthlêr an thlîr lai chuan, Sentea ruang kawtthlêra thisen baw nuaia mu reng kha a rawn che ṭan tlat mai le. A tîrah chuan a kut leh a ke a rawn phu zawk zawk a, a hnu deuhvah chuan a taksa chu mihring pângngai chet dân lo tak mai hian a rawn inthlep ta hnawk hnawk mai. 

Sentea mit vâr pup leh a hrawk thler duaimai te, a chet pah a, a ruh ri rawp rawp mai te chu mipuite tân chuan hmuh a hrehawm takzet a, thenkhat phei chu an in-hup nghal chawt chawt a. Zova leh Sentea chu kawngka lam rawn hawiin an rawn nam dawt dawt a, mipa thenkhat chuan hmanraw awm awm chu chuh nghalin an lo inring ve hle bawk. 

Mahse, Sentea leh Zova te chu an beidawng leh ta thut nge, hnung lam hawiin kawtthlêr thlang lam chu an hawi phei ta daih a. Chutah, zîng kâr naupang tualvêng inkhel tûra rawn inzui chhuak, naupang pali-nga vêl, eng thil nge thleng tih pawh hre ve hauh lo te chu an rawn lang hlawl mai.

Naupang ho chuan mithi tho leh pahnih, vun them uai hnuang leh hrawk thler duai mai, kawtthlêr laia lo ding rân mai an hmuh chuan an hlau lutuk chu chet pawh an che ngam lo; thlahrang hmu ang mai hian an ding ngawi reng a. Chu veleh Zova leh Sentea te chu naupang ho lamah chuan an tlan phei ta thut a, naupang ho mangang chu au chel chul in an tlanchhe nghal a.

Inchhûng lamah pawh chuan boruak a rawn inthlâk nghal hlawk, patling ṭhenkhat chu tukverh aṭânga dâk chhuakin naupangte hming lam chuan an au chel chul ta mai a. "Ka fapa! Ka fapa a tel ve!" tiin Pu Thana chu mangang takin a rawn au chhuak a, patling pathum-li vêl chuan kawngka lam chu an pan nghal rawk rawk a, an fate nunna chu mimal himna aiin an dah pawimawh ta zâwk hle tih a chiang.

Pu Rina chuan theihtâwpa lo dan tumin kawngka chu a lo pawt ve ṭâng ṭâng a, "In chhuak tûr a ni lo! In chhuah chuan in vaiin in thi dâwn asin!" tiin a lo au vak vak a. Mahse, tûnah zet zawng an fate thih leh dam inkara leng mek a nih tawh avâng chuan Pu Rina thu zawm chu thihnaah an ngai tawh zâwk a, tumah an dang hneh ta lo. 

"Min dang suh Rina! I dawihzep vângin kan fate kan thih tîr dâwn lo!" tiin Pu Thana chuan Pu Rina chu a rawn nêk thal tawp mai a, patling dang ho chuan kawngka kalhna chu an rawn phelh nghal rawk rawk bawk a. Pu Rina pawh chu a mangang takzet, chhuatah chuan a thu tum bur ringawt mai a, patling ho chu a dâng hneh ta ngang lo a ni. 

Kawngka chu a rawn in-hawng huau a, patling leh tlangval rual te chu hmanrua an hmuh ang ang keng chungin kawtthlêrah chuan an inphit chhuak ta dual a. "Bawiha! Khawnge in awm?" tiin an fate hming lam chuan an au nasa kher mai, an hmelah chuan huaisenna ai mahin hmangaihna vanga mangangna chu a lang fiah zâwk hial a ni.

Mahse, vanduai thlak takin naupang ho chu an tlanchhe hla hman tawh hle a, khaw chhûng kawtthlêr hrang hrangah an tlan darh vek tawh a ni. Zova leh Sentea pawh chu naupang ho ûm chuan hmuh hman lohin an lo liam ve hman tawh bawk si. Kawtthlêrah chuan pa ho leh tlangval thenkhatte chu an buai nuai nuai a, khawiah ber nge an tlân ang tih hre lovin an hawi kual an hawi kual ringawt a, kawtthlêra thisen kawi nuai mai te chuan an rilru a ti mangang zual takzet.

Inchhûng lama la awm ve ho pawh chu fîmkhur takin an rawn chhuak ve ṭhem ṭhem a, mahse kawtthlêr chu a hma aiin a hlauhawm ta zâwk emaw tih tûr a ni. Khawvâr êng chuan thlammuanna aiin thihna a rawn thlen hnem dawn zawk emaw tih mai tur a ni a, chhungkaw tam tak tân chuan he zîng hi an zîng hman hrehawm ber a ni dâwn tih a chiang ta hle mai.

****************************************************

6:17 AM

Sawmtea te ṭhian pathum leh Pu Tea te chhungkua chu Pu Tea te in chhûng reh ruih mai ah chuan an tawm khawm thap a. Pu Tea chu thutthlêngah ṭhuin a la thaw hlawp hlawp a, a nupui Pi Kungi chuan no in tui a lo pe vat a. An fapa pahnih, Tluanga leh Fela te chuan an pa, hlauh hmel tak mai leh Sawmtea te kawra thisen kai hnuang an hmuh chuan mak an ti hle mai a, Tluanga hi kum 19 a upa niin a nau Fela hi kum 16 leka upa a ni thung. 

Tluanga chuan a thingtuah tûr lian zet chu a hum nghet sauh a, "Ka pa, eng nge thleng a? Ngatinge U Sawmtea te hian thisen an kai nuai a?" tiin hrilhhai takin a zâwt a. Pu Tea chuan tui chu a hmuâm deuh vang vang a, thâwk a han la leh te te a, "Tluanga, i pi Remi... kan ṭhenawm nu kha a rawn lût a, min seh a tum a nih kha. Mihring a ni tawh lo, ramsa kawlh ang mai a ni." tiin khur dar dar chung chuan a chhang a. 

Chutah midang tawng ve hma chuan Pu Tea bawk chu a rawn ding chhuak hlawl a, pindan chhûng lam a pan a, rei lo têah a Ulhbun chu a rawn lek chhuak ta vu mai le! Silai a rawn lek chhuak a hmuh chuan a nupui Pi Kungi chu a lo phu deuh zawk a. A pasal chu mak ti takin a en a, "Mama pa, silai maw? Tual i that dawn tihna em ni?" tiin a lo zâwt vat a.

Pu Tea chuan a silai chu a han endik a, "Kungi, chutiang hun a ni tawh lo. Sawmtea te hian an sawi dik a nih chuan he silai hian min veng him thei ang. SAwmte, silai mu pawh hi ṭhenkhat ka la kawl a nia." a han ti thum chhak a. Sawmtea chuan Pu Tea silai chu enin a bu nghat a, "A ṭha hle mai, Pu Te. Ulhbun i lo kawl hlauh chu kan thlamuanpui khawp ang. Mahse, hriat tûr pakhat chu hei hian tuna thil thleng mek hi a ti tâwp dâwn lo ania, an lû-ah tak vih emaw kah  emaw a ngai dâwn a nia." tiin a lo hrilhfiah a.

Tluanga chu a rawn tawng chhuak ve a, "A nih chuan veng danga kan ṭhiante kha va hrilh ve a ngai dawn lo'm ni? Fela nen hian inkhel tûrin kan lo inpuahchah mek a, kawnah kan thian dang te nen innghahkhawm kan lo tum asin, kan thiante chuan buaina lo tawk ve ta se.." tiin a mangang nghal em em a. 

Chutia a sawi lai chuan a nau Fela chu a u hnungah a lo ding ve ran a, a hmelah chuan rawthar inkhel châk tak hmel aiin hlauhna a lang chiang zâwk mah a. Awmpuia chuan Tluanga chu enin, "Tluanga, tunah chuan inkhelh lam chu theihnghilh phawt rawh. Khawiah mah chhuak hlek suh u. Keini pawh hi zîng kâr khaw var hma deuh hlek khan kan chhuak a, Zova chin kan la hre bawk si lo." a lo ti ve thung a.

Siama chuan hmanhmawh hmel takin, "Sawmte, hetah hian kan awm reng thei lo. Pu Tea te in hi a him tâwk lo, an kawngka pawh a chhe vek ania..hei, i che chhuak ang u." a lo ti ve leh a. Sawmtea chuan a lu a bu nghat a, "I sawi chu a dik. Pu Te, helai hmun ai chuan kan in lamah phei vek ang u. Ka nu leh Hlimpuii chauh an awm a, hetia tlangval pali nga vel kan awm ho tlat  chuan kan invêng thei zâwk ang. Kan in saw vêng sîr deuh a ni a, Zova a lo kal anih pawhin kan hmu hmasa thei dâwn a ni." tiin ro a han rêl a.

Pu Tea chuan a silai chu a han pu a, a fate pahnih chu a han en a. "I sawi chu a dik, Sawmte. Tluanga, Fela... in nu hi vêng tha ula, choka ah chempui va la la, Fela nangin i sairawkherh va la ve bawk la, in hmanrua kha hum nghet hle ang che u. Sawmtea te hnung hi zui ang u...Sawmte, AWmpui... Kan innghahna in ni e." tiin a ding chhuak a. 

Pi Kungi pawh chuan a thawmhnaw ṭhenkhat chu a han ban nghal rawk rawk a, an zavai chuan hlauhna leh rinhlelhna kârah chuan invêng tûrin an inpuahchah ta a. Sawmtea chuan kawngka chhia chu a han hawng ri tuah tuah a, "A ṭha e, inzui chhuak ang u. Mahse thu pakhat, eng thâwm mah chhuah miah suh u. Chuan, tupawh ni se, sehna emaw, hamna emaw in nei a nih chuan min hrilh vat ang che u, he natna hi inseh atanga awm a ni ka tih tawh kha." a han ti leh hram a. 

Tichuan, fîmkhur takin kawtthlêr lamah chuan an inzui chhuak ta hlawm a. Hla deuh aṭânga mipuite mangang au thâwm chu an hre ve vuai vuai a, an inmelh rak rak hlawm a. Zawi sap hian AWmpuia chuan, "An pung, an pung mek zel tih a chiang e." a ti tham tiak a. Tichuan Sawmtea te in lam pan chuan an inzui phei tham tham hlawm a, thawm pawh an dim kher mai.

**********************************************

6:34 AM

Sawmtea te in chhûng chu a reh ruih a, Hlimpuii chuan sana a melh zeuh zeuh reng a. Pi Zari chu thutthlêngah ṭhuin a khat tâwkin a kut a hmer a hmer a, a fapa Sawmtea leh a thiante, khawvar hma a hreipui leh chemte nena an chhuak khân a rilru a ti la mangang hle a ni. "Hlimi, i u te hian eng thil tak chu va hmachhawn dâwn ni maw? 'Hri' a leng a ti a, 'mithi an tho leh' a ti bawk si. Kan khua hi hetiang hian a la awm ngai lo asin." tiin thlabâr tih hriat takin a fanu Hlimpuii chu a be mawlh mawlh a, a tap titih nghal der bawk a.

Hlimpuii chuan a nu dâr chu a lo hmehsak a, "Nu, ka u khân kawtthlêr lamah thâwm a awm pawhin tukverh ah takngial pawh dâk lo tûrin min hrilh kha. Khawchhung a buai tawh a nih hi, ṭhenawm ho thâwm pawh hi an reh thap mai a, amak hle mai." a lo ti ve nuah nuah bawk a. Kawtthlêr lehlam aṭânga mipuite mangang au thâwm leh hla deuhva naupang ṭe chel chul thâwm chu an hre phak a, chu chuan an hlauhna a tizual takzet kher mai. 

Pi Zari chuan a fate himna tur dilin a ri lo chuan a tawngtai mawlh mawlh a, mahse a fapa rawn haw hma chu a thla a muang thei ngang chuang si lo. "Chu eng thawm nge, Hlimi... mangang au thawm anih chu, engtin nge kan awm ve tak ang?" tiin a mangang nasa tawh mai a, Hlimpuii erawhin a u sawi kha a dik a ni tih a ring thiam nghal a, anu chu a chhang lo.

Chutih lai tak chuan an in hnung lam tukverh dârthlalang chu a rawh keh chhuai mai. Sentea, a hrawk thler duai aṭânga thisen luang zawih zawih mai leh mit vâr pup mai chu tukverh dârthlalang keh atang chuana rawn vak lut ta mai a. A rawn luh dân chu mihring pângngai chet dân a ni lo, darthlalang keh hriam te chuan a vun chu a tai thler nasa mai a, mahse na a hre hauh lo. 

Pi Zari chu a ṭe thei lo hial zawk, a meng phar awn awn ringawt mai a. Sentea chuan an nufa lam chu ngur chhur chhur chungin a va pan phei a, Hlimpuii erawh mangangin a au vak vak a, "Min pui ru...khawngaihin min pui hram teh u." tiin a rak chel chul mai. An nufa chuan bang kilah inkuah chawtin an tawm tlat a, Sentea lah chuan a pan hnai zel a. 

A va khawih fuh dawn chiah tihah chuan khawi lam aṭângin nge tih pawh hriat loh hian chemte hriam zet mai hi tukverh aṭâng chuan a rawn thlawk lût ta fua mai a. Chu chemte chu Sentea tukhumah tak chuan a bur ta vu mai le. Sentea taksa chu a khûr dawt dawt a, tharum chhuat laiah chuan a thal ta tawp mai. 

Hlimpuii ten nufa chuan tukverh keh lam chu an va hawi a, an vêng pa, chem vawm thiam tak mai Renga a lo ni. "Hmanhmawh rawh u! Lo chhuak vat ula, kan bihruk a ngai! Khaw chhûngah hian thihna a pung mêk a nia, tukverh atang hian rawn chhuak mai rawh u." a rawn ti a. Pi Zari chuan Sentea ruang chu a en tlawk tlawk a, "Ni lo, hetiang hi thil thleng thei a ni lo. Ka fapa khan a sawi dik takzet a nih hi." tiin thil awmzia chu a hmu thiam ve ta.

Renga chu tukverh atang chuan a rawn zuang lût a, Pi Zari leh Hlimpuii chu a rawn pawt nghal  dawr dawr a. Hlimpuii chuan a nu kuta vuanin, "Nu, U Renga hi zui mai ang. Ka u chuan min rawn zawng hmu leh em em ang, hetah chuan kan thi ve mai dâwn asin." tiin a nu chu a thlêm a. 

Pi Zari chu a zawi hnawk a, a hma lawka Sentea ruang mu reng chu a en tlawk tlawk ringawt a. Hlimpuii chuan a pawt ding a, tukverh atanga chhuak ve in Renga chu an zui chhuak dun ta a. Rei lo têah Sawmtea te ṭhian thum leh Pu Tea te chhungkua chu an rawn thleng ve nghal a. Sawmtea chuan kawngka chu a rawn kik dawt dawt a, "Ka nu! Hlimi! Lo hawng rawh u, keimah Sawmtea!" tiin a au vak vak a. 

Mahse inchhûng lam chu a reh tlawk tlawk a. Sawmtea chu a mangang tan deuh ta, vawi tam a kik a, a auh hnuah pawh chhangtu a nei si lo. Siama chuan inhnung lama tukverh dârthlalang keh nuai mai chu a hmu ta a, "Sawmte, en teh! Tukverh hi!" tiin a ko phei a, an vai chuan fîmkhur takin tukverh aṭâng chuan an lût ta a.

Inchhûng an luh meuh chuan an hmaah Sentea ruang, a tukhumah chemte bur vu mai chu an va hmu ta a. Awmpuia chuan fîmkhur takin a va en a, "Sentea a nih hi," a ti sap a. Sawmtea chuan a nu leh a farnu hmel hmuh tûr a awm tak lohah chuan a lû a dawm vawng vawng a. In chu a lo ruak huau bawk si, Sentea a lo lût tih chiang tawh bawk si nen, a nu leh a farnu te chuan seh an tawk ve tawh angem tiin a ngaihtuahna a buai vek a. Sawmtea chu ṭap lek lekin a au nghek nghek ringawt mai a ni.

******************************************************

END OF EPISODE 3