ONCE UPON A TIME IN MIZORAM (A mizo zombie horror story) Written by : Aaron Malsawmdawngzuala Episode - 6

 ONCE UPON A TIME IN MIZORAM

(A mizo zombie horror story)

Written by : Aaron Malsawmdawngzuala

Episode - 6 : Where The Fog Swallows

***********************************************

FLASHBACK – 2:07 AM

Khawvâwt leh tiau chhum (fog) kârah chuan dâp-thlâm bang sîra thingkunga an tawnbeh mêk Zova chu Pi Hliri chuan fîmkhur takin a han en dik vel a. Zova chu a mit a sen rum a, a taksa chu a dâng var pup a, Pi Hliri chu chiang taka enin, chilthli tla duah duah chung chuan a rum khum chhur chhur reng a.

A sîrah chuan Pu Liana leh Pu Rina te chu an lo ding ve bawk a. Pi Hliri, Lungthlir khuaa an Health Worker rin ber chuan a aw a han thian kharh kharh a, "Amak hle mai, engtin nge maw a la chet reng theih zâwk le? Hetiang thil hi ka la hmu ngai lo reng reng," a ti nuah nuah a. Pu Rina chuan a kawrlum hâk chu a han hmer nghet deuh a, "A kawchhûngah ramhuai a lût tih a chiang reng alawm... a hmel te pawh a dâng vek tawh hi," a lo ti ve hmanhmawh a. 

Mahse, Pi Hliri chuan a lû a lo thing a, "Nilo, chutiang a ni lo. Zova hi a thi tawh zâwk a ni. A mar (pulse) pawh ka hmu lo va, a taksa pawh hi thihna a rei tawh tih a hriat, a vawt vek tawh." Pu Rina chuan hriatthiam loh hmel takin, "Khua a vawh êm hi?" a lo ti leh a. Pi Hliri chuan a lo hnial leh vat a, "Khaw vawh vâng lam a ni lo, eng emaw tak chuan a la ti nung a ni." tiin a chhanglet a.

Pu Liana chuan Zova hmel chu fimkhur tak chungin a han en a, "Upa Mawia kha a seh a, a ni lah khan 'engmah a ni lo vang' tiin a haw ta daih lehnghal a." a rawn ti ve a. Pi Hliri chuan Zova dâra sehna hliam chu a en vung vung a, "Mihring sehna a ang hlê mai," a rawn ti chhuak hlawl mai a. Pu Rina leh Pu Liana chuan an en hu a, "Engmaw? Mihring sehna a?" tiin Pu Rina chuan a lo zawt vat a.

Pi Hliri chuan a lû a bu nghat a, "Aw... ramsa sehna chu ni se hetiang hian a awm lo vang. A hliam awmdân hi mihring sehna a ang zâwk tlat." a lo ti leh a. Chutah phâwk hru hian Pu Liana chu a melh a, "Upa Mawia a seh maw?" a ti ta hu mai. Pu Liana chuan, "Seh e... a dârah a seh a, a kaw huau alawm. I sawi takah chuan Zova dâra a hliam nên pawh hian a inang hlê mai." tiin a lo chhâng a. 

Pi Hliri hmelah chuan hlauhthawnna a rawn lang nghal a, "Upa Mawia te in lamah chuan kan va kal a ngai..." a sawi zawh hma chuan tlangval pakhat a rawn kal a,"Pu Rin, Pu Lian... saw U Muani a harh tawh a, in lo chho dâwn em ni ang?" a rawn ti a. "Han chho phawt ila, Upa Mawia te inah chuan kan kal dâwn nia," Pu Liana chuan a ti a. 

Pu Rina nên chuan an chho ta a. Pi Hliri chuan zui ve a han tum a, mahse Zova chu a han en leh hram a. Chutah a ding chat mai! Zova hmel chu chiang takin a han en a, thil hmuh a nei tlat a ni. A va kal hnai a, Zova bekah chuan thisen zam (vein) hi a lo lang tuah mai a, a lo phu dut dut bawk! 

Fîmkhur tak chung siin Zova awmah chuan a kut a va nghat a, lungphu (heartbeat) engmah a nei der mai si lo. A mar chu a han khawih leh a, engmah a awm chuang lo. Mahse, a beka thisen zam phu uih uih mai chu a lang chiang êm êm mai si. A han khawih chhin a, mahse a fîmkhur tâwk ta lo tlat! 

Zova chu a rawn thle thut a, Pi Hliri kutah chuan a seh ta mai a! "A na lutuk!" tiin Pi Hliri chu a tawlh hnung nghal a. A kut chu a han en a, a lo thi zawih zawih mai. Rang takin a kut chu a tuam a, mipui hmuh loh nân insir lamah a biru phei a, Sub-Centre lam pan chuan a tlân phei ta hlawp hlawp a.

Rei vak lo hnuah, Pu Liana leh Pu Rina chu Zova an phuar behna lamah chuan an chhuk leh a, mahse Pi Hliri chu a lo awm tawh hauh lo mai. "Khawnge maw a kal daih le?" Pu Liana chuan a han ti nuah nuah a. Pu Rina chuan, "Upa Mawia chu a va en fiah dâwn a niang," a lo ti ve a. Tichuan, engmah hre lovin inchhûng lamah an chhohsan leh ta a ni.

*****************************************

PRESENT TIME

8:05 AM

Zova te in chu mithi tho leh rual 10-15 vêl lai mai chuan an hual a, in chhûngah luh tumin an rûm ngûr ngûr hlawm a. Bang te chu an hiat rang nasa hlawm kher mai. In chhûng lamah chuan thlabâr takin Pi Kungi, Muani leh a fapa Kimkima, Tluanga leh Fela te chu awmkhâwmin an mangang hlawm hlê a. 

Chung mithi tho leh te chuan tukverh te chu an rawn chum dawt dawt a, Tluanga leh Fela te chuan an hmanrua chu an hum nghet sauh sauh va, mahse han chet mai chu an ngam bîk lo. Kimkima pawh a nu kuahin a maimitchhing tlat a, "Bawihte, hlau suh... i nu ka awm ania," tiin Muani chuan a lo hnem hram hram bawk a. 

Chutah choka lam tukverh chu a rawn keh thuai mai, mithi tho leh pakhat hi silhmun bula tukverh aṭâng chuan a rawn vak lût dâwn ta mai a. Ring tak hian Muani chuan, "Tluanga, choka lam..." tiin a kâwk a. Tluanga chuan choka lam va pan pah hian, "Tumah lo kal hrang suh u," tiin a chempui chu a lek kâng a. 

Pi Kungi chuan, "Bawiha, fîmkhur rawh," tiin a lo au zui ve lawm lawm bawk a. Tluanga chuan choka chu a va thleng ta a, sah a han tum chiah chu a tâwp chat mai. Mithi tho leh, silhmun bul tukverh aṭânga rawn vak lut mêk chu a ṭhianpa, a kawmngeih em em mai, Nghaka a lo ni tlat. Tluanga chu a mittui a luang nghal zawih zawih a, a han tin uai uai a. 

Mahse a sât thei hlawl lo. "Nghaka, a ni thei lo..tinge?" tiin a phun sap a, a ṭap tuau mai. Mangang tak hian Muani chuan, "Sat ta che, tinge i din reng a?" tiin a rawn vin tuar tuar a, mahse Tluanga chuan a ṭhianpa chu a that hreh takzet. Muani chuan Pi Kungi bulah chuan, "Nu Kung, Kimkima hi lo ngaihven rawh," tiin a fapa chu Pi Kungi chuan a lo kuah nghal vat a.

Chuveleh choka lamah chuan a va phei a, Tluanga chem chu a chhuhsak lawk a, Nghaka lû-ah tak chuan a sât siah mai a, thisen a per chhuai mai. Nghaka chu a zawi hnawk a, a zal der mai. Mahse a hnung lamah chuan mithi dang tam tak chuan rawn luh an la tum nasa mai a. Chutah inhnung lam kawngka chu a rawn che leh ta vak vak mai, a kilhna te chu a kau tuar tuar mai a. 

Thlan tla zawih zawih hian Fela chuan, "An tam tulh tulh, min hual hneh tawh lutuk," a ti tham ṭiak a. Choka lam tukverh-ah pawh chuan an rawn in-hnawh khat tial tial a, Nghaka ruang, tukverh kotlânga bawk zuar mai chuan a dâng mai mai chauh a ni. Chutah pâwn lam aṭâng chuan thinrim hmel zet a au vak vak ri an hre tel ta tlat mai, chumi rual chuan in-sat sawk sawk thâwm-in a chhunzawm nghal a. 

Zova te in pâwn lama mithi tho leh ho ngûr chhur chhur ri te chu a hla tial tial a, in chhûng-a awm mêk ho pawh chuan mak an ti angreng hlê. Choka lama rawn luh tumte pawh chu an lo bo vek tawh a. "Eng thil nge maw thleng le?" tiin Tluanga chuan tukverh lam a va pan a. A han bih dê dê a, pâwn lamah chuan an khaw tlangval palian tak leh sâng ṭha ve tak, chak zet mai, mahse zaidam tak ni si, mi tupawh ina an nel em em Valtea chuan sa chan chem kengin mithi tho leh tam tak chu a lo sât pawp pawp hlawm a.

Tluanga chuan Muani chu a en a, "U Valtea a nih saw, kan puih a ngai," tiin a tlân chhuak nghal a. "Bawiha..kal suh," Pi Kungi chuan a ti hman tawk. A chempui chu Tluanga chuan a va vai kual ve ta pawp pawp a, chung mithi tho leh tam tak te chu Valtea nên chuan harsa tak chungin an bei lêt a. 

Kawngka bul takah Fela chu dingin a sairawkherh hmang chuan mithi tho leh te chu a lo perh ve pawp pawp bawk a. Minute 2 dâwn an han beih fe hnu chuan an sât hlum zo thei hram a, mahse an hah khawp mai. "Kan...kan kal a ngai, khaw chhûngah chuan an tam lutuk," Valtea chuan a han ti a. 

Muani leh a fapa leh Pi Kungi pawh chu an rawn chhuak a. Valtea bawk chu rawn tho chhuak leh in, "Kan hmanhmawh a ngai, bihrukna tûr kan zawn a ngai, a nih loh chuan hei aia tam an rawn kal dâwn," thaw hlawp hlawp chung chuan a han ti leh a. Kawt vêlah te chuan thisen chu a kawi nei nuai mai a, mithi ruang 20 chuang zet chu a let rem rum bawk.

**************************************

Sawmtea te in chhûng pindan thim leh Sentea ruang rim nam t(r)an tawh, thang em em karah  chuan Puii chu a la ṭhu tawm tlat reng a. Thâwk la kâwk chungin a ding chhuak a, inchhunga a tawm reng a nih chuan nakin lawkah riltamin a thi vat dawn tih a inhria, hlau chung chung chuan in chu chhuahsan a tum ve ta a.

Fîmkhur takin kawngka pui kalhna chu a han phelh a, thâwm a chhuah palh ang tih hlauvin thawk pawh a thaw tha ngam meuh lo. Kawngka chu zawi muangin a rawn inhawng riai riai a, Puii chu tîm takin a rawn dâk chhuak a. Zing dar 8 pel tawhin khua a vâr chiang tawh hlê nâ a, Lungthlir kawtthlêr erawh mithi khua ang maiin a reh tlawk tlawk mai. 

Mihring mangang au thâwm leh ṭap ri te pawh hriat tûr a awm mang tawh lo va, chu chuan Lungthlir khuaah mihring dam an tlêm tawh zia leh hri (infection) chuan khua a fan hneh tawh zia a târ lang chiang hlê a ni. Puii chu zawi muangin pâwnah a chhuak a, a kut lehlamah chuan chemte hriam zet mai chu a la hum rân a. 

Inhnung lamah fîmkhur takin a phei a, dâp bang sîr leh thing kûng phenah te chuan a biru phei zêl a. A chhak leh a thlang, hmun tin kîl tinah chuan mithi tho leh te chu an lo têi kual pheuh pheuh va. An mitmu vâr pup leh an hmai dâng lep mai te chu a ṭihbaiawm takzet, seh tûr ramsa emaw mihring emaw zawngin an hawi kual zuk zuk hlawm a. 

Puii chuan thâwm dim takin a hel zêl a, thâwm tê nau pawh a chhuah vaih chuan chung mithi tho leh rual te chuan an rawn seh rawn luai luai dâwn tih a inhriat avângin a fîmkhur hle a ni. Tlâng lam, sikul kalkawng chu a pan chho dâwn chiah a, lungte pakhat a rap hrual palh a, a inchhuih ta hlauh mai. 

Puii chu chirhdiak ah chuan a bawk ta thlawp mai a. Chu thâwm chu mithi tho leh ho chuan an rawn hre ta. An rawn hawi rual ṭhap a, Puii thawh leh tum mêk an hmuh rual chuan ramsa rilṭam tak ang maiin an sa rak ta vak vak hlawm a. Chak em em hian mithi sâwm rual dâwn lai mai chu Puii lam pan chuan an rawn tlân ta khup khup mai le.

Rang lutukin Puii chu a tho vat a, a tha neih zawng zawng sâwm khawmin tlâng lamah chuan a tlân chho ta zêl a. Mahse, mithi ho chu an tlân chak êm avângin an rawn hnai tulh tulh a, Puii hnungzâng chu an khawih fuh thuak thuak ta mai. Puii chu a mangang hle a, chau tawh hle mahse thihna chu a hnung lawkah a awm si.

A beidawng lek lek tawh a, mahse chutih lai tak chuan a hma zawn tlâng pang aṭâng chuan tlangval mipa pahnih hi an rawn chhuak hlawl mai. An hmel chu a thutak ren rawn hlê a, chu mite pahnih chuan thal (Bow and Arrow) an nei ve ve bawk a. Mithi tho leh ho, Puii rawn ûm mêktu zînga hmasa ber chu thal mu chuan a chhalah tak a va fu ta chat mai. 

A thal nghal der a. Puii chu a ding a, a thingthi dawt mai. Chung mipa pahnih te chuan an thal chu an han kap tak tak a, an thap tawp tawp hlawm mai. Mithi sâwm dâwn lai mai, Puii rawn ûm mêktu zîngah chuan 8 vêl lai chu kawtthlêr chirhdiak kârah chuan an thal phung tawh mai a ni.

Pakhat zâwk, Marema chuan hmanhmawh takin Puii tlân chhia, tlu sual ṭhelh ṭhelh chu a va kai tho va, "Midang tam tak an la awm ania, kan thawm hi an rawn hria anga, an rawn kal belh zel dawn, kan kal vat a ngai!" tiin a pawt phei hlawk hlawk a. A ṭhianpa, Zauva erawh chu a rawn che fîmkhur hlê thung. 

Mithi ruang let phung kârah chuan fîmkhur takin a va phei a, thal mu (arrows) mithi ho lû-a bur vu te chu a han phawi chhuak leh zêl a. Thal mu pakhat chauh pawh hloh hlau tih hriat tak hian a bâwmah a thun leh zêl a. Tichuan, mithi tho leh rual dangte'n an rawn nangching hma chuan tlâng sâng lam, chhum chhah mup kârah chuan an inzui phei ta zêl a.

*************************************

9:10 AM

Zâwmthâng-ruam aṭâng chuan Sawmtea te ṭhianho chu huan thlam lam panin ramhnuai kalkawngah chuan an chhuk thla zêl a. Tiau chhum (fog) rawn chhah leh ṭan kârah chuan boruak chu a vawt vûk a, mahse Sawmtea erawh a thlan tuiin a bual huh zuih mai. A hmalam chu thlîr ngar ngar mah se, a rilruah erawh thil dang rêng a awm thei lo; ama hriat tham lek hian, "An la dam ang, an la dam em em ang," tiin a phun mual mual a. 

Rei vak lo hnuah chuan thlam chu an va thleng ta a. Mahse, thlam chhûngah chuan an tlân lût nghal mai lo. Sawmtea chu thlam kawtah chuan a ding chat a, thlam chu a en vang vang a. A hmel chu a rawn danglam nghal vek a, thlabârna leh rilru hahna in a rawn tuam nghal a ni ber mai.

"An awm lo," a ti zawi sap a. A chhan chu thlam kawngka chu pâwn lam aṭângin thingfakin a lo in-do tlat a ni. Pu Tea chuan thawk a han la hak a, Sawmtea hmel beidawng leh mangang tak  chu hmu mah se, an vai mai chuan chawlh an mamawh tawh tih a hria a. "I lût hrim hrim ang u, hahchawlh pawh kan mamawh alawm." zaidam tak hian a ti a. 

Tichuan, beidawng tak chungin thlam chhûngah chuan an lût ta hlawm a. Sawmtea chu thlam  chhûng a luh rual rual chuan chhuatah a ṭhu hnawk a, a lû a dawm vawng vawng mai. Pu Tea chuan Sawmtea chu ava ṭhut hnaih a, a dâr-ah chuan a va vuan a, "Sawmte, nizân aṭângin i la tlaivâr zak mai chu a ni a, i hah tawh hlê ang. Muhil rawh, rei lo tê tal i mut a ngai a ni." a han ti dam thlup a. 

Mahse, Sawmtea chuan a lû a lo thing a, ṭap lek lek hian, "Nilo Pu Te, ka nu leh ka nau ka hmuh hma chu ka hahdam thei lo a ni." a lo ti tlat a. Pu Tea chuan Awmpuia leh Siama te lam chu a han hawi a. Anni pawh chu a hma zan aṭânga mu lo leh engmah ei lo an nih avângin an chauh hmel tawh hlê a ni. 

"Nangni pawh in mut hahdam a ngai, nizân aṭângin in la mu lo va, engmah in la ei bawk si lo. Kan mut hahdam hlek loh chuan kan tha hian a tlin dâwn lo. Zari leh Hlimpuii te chu kan hmu em em ang, mahse chumi tûr chuan kan hahchawlh phawt a ngai a ni," tiin hruaitu chan chang tak hian a han hrilh a.

Siama chuan thlam tukverh dâp kârah chuan pâwn lam a va bih dêk dêk a, "Keiman ka lo vêng hmasa ber ang che u, lo muhil ula... nakinah min chhawk mai dâwn nia," a han ti thûm chhak a. Mahse, Awmpuia chu a rawn ṭawng ve nghal a, "Nilo e, Siama. Keimah zâwk hi ka la chau hleinem, lo muhil ula, keiman thlam hi ka lo vêng zâwk ang." a ti ve tlat a.

Chutah Pu Tea chu a ding hluai a, "Nizân khân mithi inah ka tlaivâr ve lo va, dâr 9 vêl khân ka mu daih tawh a. Chuvâng chuan kei aiin in mu tlêm zâwk, keimah hian ka lo vêng hmasa ber ang e." a ti ta a. Sawmtea chu chauh hmel tak hian thlam kil ah chuan a mu a. AWmpuia leh Siama te pawh chu an mu ve nghal a, Pu Tea chuan a silai hum ran chung chuan pawn lam chu a thlir vang vang a.

***********************************************

9:25 AM

Vaimim kûng sâng zet zet, tiau chhum kâra hring dup mai chu Renga chuan a han thuai chhum hmawk a. "Kha, ei rawh u." tiin vaimim mu ṭha zet mai pahnih chu Pi Zari te nufa a pe a. Pi Zari leh Hlimpuii te chuan vaimim hel chu an ei nghal bawrh bawrh a, a hma zân aṭânga engmah la ei lo leh tlân chhe reng an nih avângin an ril a tam tawh hlê tih a hriat. 

Muanpuia pawh chuan a ei ve bawk a, an pali chuan Renga te huan, vaimim hmun thûk laiah chuan an biru mêk a ni. Pi Zari chuan vaimim ṭhial mial mial chung chuan a mittui chu a hru leh zeuh ṭhîn a, "A la dam ang tiraw, Renga... ka fapa Sawmtea kha a la dam ang tiraw?" a han ti leh ṭhîn a. 

Renga chu a ngawi vang vang a, "A la dam em em ang, Nu Zar... tlangval fing tak a ni a, ramhnuai lamah a bihruk ve mêk ka ring a ni." tiin a chhâng a. Chutah Hlimpuii chuan thil hriat chhuah zawk a nei ta tlat mai, "Nu... Ka u hi kan huan thlam lamah a kal mai lo maw?" a rawn ti chhuak hlawl mai. 

Pi Zari pawh chu a harh deuh kawk a, "E, a ni teh tak ang. Kan huan lamah a kal ngei ngei ang, min rawn zawng hial ang ka ring." a lo ti ve nghal a. Mahse, Muanpuia chuan a lû a lo thing a, "Mahse in huan te kha chu Zawmthâng Ruam panna kawng kha a ni lawm ni? Heta ṭâng chuan a hla lutuk, thui fe kal a ngai dâwn asin." a lo ti a.

Chutih lai tak chuan, an sîr deuh lawk, hnim buk chhah lai aṭâng chuan thâwm a rawn chhuak ta tlat mai a, Pi Zari leh Hlimpuii te chu an phu nasa kher mai. Rang lutukin Renga chuan a chem a phawrh nghal a, Pi Zari leh Hlimpuii te chu a hnungah a biruk tîr nghal vat a. Muanpuia pawh chuan a thingfak chu hum nghet sauhvin, thâwm lo chhuahna lam chu a en ngar ngar a.

Thâwm chu a rawn hnai zêl a, hnimbuk chu a rawn che lawih lawih a. Renga leh Muanpuia te chu an inring tawh hlê; mahse mithi tho leh rûm thâwm ang chi kha hriat tûr a awm miah lo thung. Chutah, hnim buk kâr aṭâng chuan mipa pakhat, kum 40 bâwr vêl hi a rawn chhuak hlawl mai a! Renga chuan a sât hman ṭhelh a ni.

Chu pa chu a phu zawk a, a pên kîr leh nghal dawrh a. "Nilo, min tina suh u... min seh lo ania, ka la him!" a rawn ti nghal chiam chiam a. Renga chuan a chem chu a la dah thla duh chuang lo, rum zet hian chu pa chu a en a. "Tunge i nih?" a ti deuh khur khur a. Chu pa chuan thaw hlawp hlawp chung hian, "Ka hming chu Chhuanga a nia, misual ka ni lo ania." tiin a ban a phar a. Renga chuan a awih chiah lo, "Kan khaw mi i ni lo... Lungthlir khaw mi i ni lo. Hetah hian eng nge i rawn tih? Kan khuaah hian eng nge i rawn tih?" a ti leh khur khur a.

Chhuanga chuan fîmkhur takin a han melh kual hrek hrek hlawm a, "Aizawl aṭânga lo kal kan ni a. Ka ṭhianpa Sânga nên helai ramhnuai hla deuhvah hian Saza veh tûrin kan rawn ram riak a. Nizân kha kan riah zan thumna a ni tawh a, mahse tûkin khân mi mak deuh deuh hian min rawn bei thut a. Kan haw lam khân ka ṭhianpa zâwk chu an seh rawn vak vak a... ka tlânchhe ta ringawt a ni. Kalkawng ka bo va, helai hmun hi ka rawn thleng ta a ni." tiin a han insawifiah a.

Renga te chu an in-en hu hlawm mai. "Engin nge in lo kal, ramah chuan?" tiin Muanpuia chuan a lo zawt ve a. "Ka ṭhianpa Jeep-in kan lo kal a, kawngpui-ah khan kan hnut-chhiah a. Mahse... chahbi kha ka ṭhianpa khân a ak daih a, ani lah chu mithi-ah a chang tawh bawk si. Motor kan dahna kawngpui pawh kha khawi lam nge a nih ka hre tawh lo." tiin Chhuanga chuan a chhâng a.

Renga chuan a chem chu a dah thla ta riai riai a, mahse a hmela rinhlelhna chu a la bo chuang lo. Jeep a awm a nih chuan khaw dâng him zâwk an pan thei dâwn tihna a ni a, mahse chabi ak tu ber lah mithi ah a chang tawh a nih chuan chahbi lâk chu thihna hmachhawn tluk a ni dâwn si a.

****************************************************

9:30 AM

Lungthlir Middle School chu chhim zîng mup mai hian a khuh vek a, tlâng sânga awm a nih avângin khua chu a vawt vûk mai a. Marema leh Zauva chuan Puii chu veng deuh reng chung hian sikul kawtlai chirhdiak kârah chuan an pên chho hlawp hlawp a. "Hetah hian kan him rih ang." Marema chuan a ti thûm chhak a. "Mahse midang pawh an rawn tlân chhe ve ngei dâwn tih chu chiang sa a ni. Chuvâng chuan inring rênga kan awm a ngai dâwn... Puii, khawi aṭângin nge nang i rawn tlân chhiat ve? Khawnge i chhûngte?" tiin fîmkhur takin a zâwt nawn leh a.

Puii chu a khûr deuh dat dat a, a chil a han lem dawk a. "Ka hre lo... zîngkârah khân tui chawi tûrin ka chhuak zuai a, ka haw leh lam chuan kawtthlêrah hêng mi mak tak tak ho hi an lo tam tawh lutuk a... kan in pawh ka thleng hman lo. Engtin nge ka chhûngte an awm ve ang? An la dam em ka hre lo rêng rêng." a ti chuai raih mai a. 

A mittui tling chuan a khaw hmuh a ti-phe deuh ruai bawk. Zauva chuan a lû a bu nghat nghat a, "Engpawh nise, inchhûngah lût phawt ang u." a ti a. Sikul office kawngka thing hlui tawh tak, a rawng pawh khawk nual tawh chu Marema chuan muangchangin a han nam hawng a. A chhûng chu a reh ruih a, chalk leh lehkhabu hlui rim a nam chem chem a. 

Zauva chuan kawngka chu chhûng lam aṭângin a han kalh nghal hmiah a. Puii chu office chhûnga ṭhutthleng pakhatah chuan a ṭhu hnawk a, a kut pahnih chuan a hmai a hup vawng vawng a. "Eng nge awmzia? Tinge kan khaw mipuite hi hetia an rawn awm sup sup mai le? U Marem, thlarau sual thil tih a ni thei mai angem?" tiin beidawn hmel takin a phun sap sap a.

Marema chu a bulah chuan a rawn ṭhu hnai a, "U Zova sapel rawn haw aṭânga inṭan chho a ni." a han ti chu Puii chu a rawn dâk chhuak vut a, a phâwk hrû mai. "U Zova a? U Muani pasal U Zova maw?" tiin a zâwt nawn leh ngat a. Zauva chu dawhkan bula ding reng chung chuan a han khuh kharh kharh a, "Ni e... Puii, nimin khân U Zova sapel rawn haw khân a dârah hliam a rawn nei a. Mihring sehna hliam a ni tih a chiang hlê. Muani sawi dân chuan zânlai-ah a tho va, a mizia chu rawn danglam thutin a nu leh pate a seh hlum nghal a ni. Tichuan in-seh chhawng zêlin tihian an pung ta vak a nih hi... eng hri emaw tak  hi kan khuaah hian a lêng mek a ni." tiin a rawn hrilhfiah a.

Puii chuan mak a ti lutuk chu sawi tûr pawh a hre lo, a kâ a âng phiau mai a. "U Zova chu tu-in nge seh ang le? Ramhnuai thûk takah chauh a kal ṭhîn si a?" a ti leh nuah nuah a. "Chu tak chu kan hre bîk lo a ni." Marema chuan a lo ti leh a. "U Zova hma khân tu emaw chu hetiang hian a lo awm der tawh tihna a ni a. Ramhnuai-ah khuan tute nge awm kan hre lo..." a sawi zo hman lo, office chhûng kil khata Ek-in kawngka dâp chu a rawn ri 'rak' a!

Thâwm a rawn awm rual chuan office chhûng chu a reh nghal diak mai. Rang lutukin Marema leh Zauva chuan an thal chu an chuh nghal vat a, Puii pawh chu rawn tho ve nghal vatin a chemte hriam zet chu a hum ve rân bawk. Marema chuan vin zet hian, "Tunge awm? Lo chhuak nghal rawh!" a han ti deuh khur khur a. 

Ek-in kawngka chu muangchang hian a rawn in-nam hawng riai riai a. Chutah, mipa pakhat leh hmeichhe pakhat, an hmel aṭâng pawha thlabâr tih hriat ngawih ngawih hi an rawn chhuak a. Ban an rawn phar chhuak a, "Min tina suh u... khawngaihin!" mipa zâwk chuan a rawn ti tham ṭiak a.

"Chaka... Bawihpui? Engtin nge hetah in awm theih a?" Marema chuan a thal thlah pah chuan a ti hu mai a. Bawihpuii chuan a ṭhiannu Puii a hmu chu a insûm thei ta lo, a va kuah nghal chawt a, an pahnih chuan office chhuatah chuan ṭhu-in an ṭap dun nghal zawih zawih a. Chaka pawh chu a rawn kal hnai a, a kawr chu a thlan leh chirhdiakin a bual huh vek a.

"Sikul lamah hian kan tlân chhia a nih hi. Khaw chhûngah khan an tam tawh ropui si a,  ka tlânchhiatna lamah Bawihpuii hi ka tawng fuh hlauh a, tihian kan lo biru mêk a ni." tiin Chaka chuan a chhang a. Zauva chuan kawngka kalhna chu a han en leh a, "Heta biru mêk si tinge kawngka saw inchhûng aṭânga inkalh miah loh va? Thâwm kan rawn neih khân in lo hre miah lo em ni?" tiin a han zâwt leh a.

Inhnit feih feih chung hian Bawihpuii chuan, "In thâwm kan hriat khân khâng mi mak ho zînga mi kha in nih kan ring a, pâwn lam enfiah tura chhuah kan tum chiah kha a lo ni bawk si nên, kan hlau êm a, kan kalh hman ta lo a, Ek inah kan biru ta tawp a ni." tiin a lo chhâng a. Boruak chu a reh leh thiap a, "A nih chuan helai hmun hi midangin an rawn pan ve nasa dâwn tih a chiang reng mai." Marema chuan kawtlai lam thlîr pah chuan a ti han a. "Mithi tho leh tam tak pawh an rawn hruai ngei dâwn bawk tih a chiang. Kan fîmkhur hlê a ngai dâwn a nih hi." a ti thûm chhak a.

***********************************************************

Valtea chuan Pi Kungi te nufa thum leh Muani te nufa chu thlânmual lam panin a kalpui mêk a, an fîmkhur ngang mai. Chhum a chhah hlê a, thlân lung kâra hnim hring dup mai te chu chhum chuan a khuh deuh chiai a. Pi Kungi chu a hah tawh hlê a, a thâwk lâk pawh a rawn ring tial tial a, mahse chawl hman an ni bawk si lo. 

Valtea chuan a sa chan chem chu a la hum reng a, a hmel chu a thutak hlê. "U Valte, khawnge min hruai dâwn? Ka nu hi a chau tawh si a, kan chawl lawk dâwn em ni?" Tluanga chuan a han ti a. Valtea chu a ding a, a beng a han chhi deuh vang vang a. "Thâwm chu i hria em, Tluanga? Khaw chhûng lama mithi tho leh ho rûm thâwm chu a la hnai lutuk, kan chawl a nih chuan min rawn hmu vat dâwn." tiin a lo chhâng a. 

Pi Kungi pawh chuan a fapa dâr chu vuanin, "Ka kal thei ang, kal thui deuh phawt ila, tichuan kan chawl dâwn nia." a lo ti ve bawk a. Thlânmual chu a reh tlawk tlawk hlê a, hla deuhva mithi rûm thâwm tih chauh lo chu hriat tûr a awm lo. Muani chuan Kimkima nghet taka vawn pah chuan, "Khawiah nge kan kal dâwn, Valte?" tiin a han zâwt ve leh a. Mahse a chhân hma chuan thlânmual luhna lam aṭâng hian mithi tho leh pakhat hi a rawn lang thut mai!

"Saw.. saw a lo kal a nia!" tiin Kimkima chu a au vak a. A au ri chu mithi tho leh chuan rawn hriain a rawn hawi vat a, Muani chuan a fapa kâ chu a hup nghal vat a, mahse a tlai tawh. Chu mithi tho leh chu a rawn tlân thla ta mai a! Fela chuan a sairawkherh chu phawrhin a han tin vang vang a, a perh ta pawp mai!

Mithi tho leh mit veilam-ah tak chuan a fuh a, a dâk awrh mai. Mahse a tlu hauh lo, a rawn tlân chhunzawm leh a. Fela bawk chuan a aia lung lian deuh chu chharin a han tin leh vang vang a, a perh leh ta pawp mai. Mithi tho leh chalah tak chuan a fuh a, a ri fawk mai! A thal tawp mai a, mahse a la che tual tual a, a la rûm ngûr ngûr mai. 

Chutak chu remchangah lain Valtea chu a va tlân phei a, mithi lû-ah tak chuan a sât ta siah siah mai a, mithi pawh chu a che tawh eih lo. Mahse an thâwm a lo ring deuh nge ni, thlânmual luhna lam a han hawi chho leh chu mithi tho leh paruk vêl hi tiau chhum kâra ṭâng chuan an rawn lang leh ta mai a! 

"Valte, an lo kal belh ania!" Pi Kungi chuan a lo ti vak vak a. Valtea chu a tlân lêt a, "Nu Kung, Muani... tlân thla zêl ula, Zâwmthâng-ruam panna kawngah khan huan a awm a, tah chuan thlam a awm. Pêng kawi lovin a ngilin in chhuk char char dâwn nia," tiin hnuai lam kawng chu a kawh hmuh a.

"I lo kal ve dâwn lo em ni?" Fela chuan a lo ti nghal vat a. Valtea chuan a chem hum ngheh sauh pah hian, "Ka lo ûm ang che u... Fela, Tluanga, tlân vat ru!" tiin a chhâng a. Mahse Tluanga chuan kal ve a tum hauh lo, "Ka pui ang che," tiin a nau Fela chu a en a, "U Muani te nufa leh ka nu hi vênghim ang che... tlân rawh u!" a han ti leh a.

Tichuan hreh tak chung chuan Pi Kungi, Muani te nufa, leh Fela te chuan an kalsan ta a. Mithi tho leh paruk vêl chu an rawn tlân thla zêl a, Tluanga leh Valtea te chuan an chem ve ve hmang chuan an han sât leh ta siah siah hlawm a. Mahse paruk chauh an ni ta hauh lo, chhum kâr aṭâng chuan an rawn tam belh zêl a!  Tluanga leh Valtea te chu an buai ta khawp mai. Tiau chhum chhah zet kârah chuan insat ri sawk sawk thawm leh mithi rûm thâwm chu a inpawlh nuai mai a, rei lo tê hnuah phei chuan chhum kârah chuan an in-hloh ta hial mai a ni.

***************************************************

END OF EPISODE 6