VOID (A mizo horror science-fiction story) Written by : Aaron Malsawmdawngzuala Episode - 1 :

VOID

(A mizo horror science-fiction story)

Written by : Aaron Malsawmdawngzuala

Episode - 1 : The First Breach

**********************************************

(November 7th, 2018)

Ruahpui vanawnin Aizawl khawpui a nuai buan buan a, thlasik intham tan boruak vawt vin tuk mai chuan tlang te chu chhum chhah takin a tuam chuk tawh a. Mahse, Tlangnuam vengah chuan, Pi Mahruaii te in lian leh ropui tak chhung erawh a lum nuam hle thung. A thian hlui, high school an kal lai atanga a kawm ngeih em em, Pi Sangi leh Pi Kimi te nen chuan kum tam tak hnua inhmu khawm leh an ni bawk a, dawhkan kilin hlim takin an titi bawrh bawrh a. 

Pi Mahruaii'n uluk taka a siam, arsa sawhchiar khu vat vat leh tuihnai tak chu suak chhuakin, an tleirawl lai chanchin hlimawm tak tak te chu an sawi chhuak a, an nui leh dar dar thin a. "Awi, Mahruai, i sawhchiar siam tui zia hi chu aw... High school kan kal lai atang tawh khan chawi kan eikhawm apiangin rawng i bawl ziah kha a lo awm reng a ni." tiin Pi Sangi chuan sawhchiar hawp puk puk chung chuan a han fak luam a. 

Pi Kimi pawh chuan nui hak hak chungin a lo tuihnih ve nghal vat a, "Nia mawle, mahse khatih hun lai kha chuan eisiam aiin thlahrang chanchin leh rammhuai thawnthu ngaihthlak kha kan lawm zawk thin a nih kha tiraw? Zan thim hnuaiah chuan inlen pawh kan ngam ngai loh kha." tiin a lo fiam ve bawrh bawrh a. 

An pathum chuan an nui ho leh dar dar a, chu ruahsur zan vawt takah chuan an thianho inngainatna boruak chuan inchhung chu a ti lum nuam zual hle. Mahse, Pi Mahruaii nui hmel chu muangchangin a ral riai riai a. A fian ken lai chu dawhkanah a nghat a, a mitmeng chu a rawn dur khuih mai, "Nangni pahnih hian... kha thil thleng mak deuh kha in la hria em?" a rawn ti chhuak hlawl mai. 

A awki chu a zawi in, fiamthu hmel a pu tawh miah lo. "Kum 1993 vel kha a niin ka hria... Class 10 board exam kan zawh fel lawk, kan awllen lai vel kha a ni a. Saphai Lei bula kan pathuma picnic kan tum khan, ruah a sur nasat lutuk avanga kan thulh leh tak ni kha..." a ti zawi raih a. Pi Sangi leh Pi Kimi te chu an inmelh ralh a, an ngaihtuahna chu an han sawr bing ve vang vang a. 

"Kan haw lam kha... Ramngaw chhungah khan nu pakhat kan tawh kha in la hre reng em?" Pi Mahruaii bawk chuan a rawn ti leh a. Pi Kimi chuan a lu a bu ta nghat a, "E... ka hrechhuak uar uar mai. Nu pakhat, sam thur deuh, hlauh nei hmel deuh, kawr huh hnuang ha kha maw?" a lo ti vat a. 

Pi Mahruaii chuan thawk a han la halh a, "Aw, kha nu ngei kha. Mak ka tih em em chu a thuamhnaw hak kha a ni. Khatih hun lai, 1993-ah khan khatiang 'Hoodie' leh 'Jeans' tight deuh ang kha chu tuman an la ha ngai lo, a tunlai riau in ka hre tlat a ni. Kan hmaah tak a rawn ding chhuak hlawl a, a beidawn hmel ngawih ngawih a nih kha." a han ti leh a, a aw ah chuan hlauhthawn rukna riau a nei a ang hle.

Pi Sangi chuan a hmulthi chu a ding deuh sung sung hian a hria a, a fian chu dahin a han thu tha te te a. "Awi, i sawi chhuah takah chuan ka la hmu chiang lutuk! Min rawn pan hnai a, hrilhhai hmel takin, 'Hei hi eng kum nge?' a rawn ti ringawt a nih kha," a lo ti ve a. Pi Mahruaii chuan uluk takin a lo sawi zawm a, "Chuan a tap pur a, 'Khawngaihin, ka fapa Zuala in hmu em? Mipa naupang te reuh te, Teddy bear pawm a nia...' tiin min zawt a nih kha. Kha nu hmel kha a mak lutuk, ka hmu chiang thei miah lo na a, mahse a mitmenga hlauhna leh beidawnna thuk lutuk kha tun thleng hian ka mitthlaah a la cham tlat a ni." tiin a han sawi zawm leh a.

An reh ta thuap a, reilote hnu chuan Pi Kimi chu a rawn nui chhuak hawk a, boruak chu tih zangkhai tumin, "Chu, nangpawh chu vang chu a mi i fapa hmingah kher 'Zuala' i sak ve ngawt a? Kha nu thil sawi kha i lo la vei tlat a nih dawn chu!" tiin fiamthu ti tak deuh chuan a han ti a. Pi Sangi pawh chu a rawn nui ve nghal uar uar a, "A mak ve ngawt mai, kha nu khan nakin hun a i fapa hming tur kha a lo hre lawk a ni awm sia, nge ni a nangmah hian a thusawi kha i rilruah i lo tuh nghet viau zawk!" a lo ti ve bawk a. 

Pi Mahruaii erawh a nui ve thei miah lo, a chhungrilah chuan thil dik lo riau awma hriatna hian a tuam tlat a, kha nu mak tak mai, kum 25 liam ta a, a hmuh ngei mai kha, a fapa hming inang ta chiah chu thil thleng palh satliah a ni lo tlatin a hria a. Mahse boruak tih chhiat a duh lo va, a nui lui ve hram hram a.

*************************************

November 8th - 2018

Nizan lam ruahsur nasa tak leh thli tleh vuk vuk te kha zing khawvar rualin an reh duak a, mahse thlasik thli vawt tak erawh a la thaw heuh heuh thung. Aizawl khawpui chu chhum zing karah a rawn lang fiah riai riai a. Zinga ni chhuak eng mawi tak hnuaiah chuan Rini leh a nau Zuala chu an school lam panin an inzui hnak hnak a. 

Nizan lama current thim avanga an mut that loh deuh vang nge, Zuala chu a phur loh hmel hle a, a hmui a ti pawrh deuh tarh reng a. Rini erawh chu nula u zawk na na na chu a pen hlawk hlawk a, a nau kal muang lutuk chu a lo tur leh sek thin. "U Rin, nizanah khan khawpui chhung a thim vek hnu khan Saphai Lei lamah eng pawl mak deuh ka hmu ka tih kha, i awih lova, ka hmu tak tak alawm." Zuala chuan a kal tauh nghawng nghawng pah chuan a han ti niah niah a. 

Rini chuan nin hmel zetin a rawn melh a, "Dawt sawi ziah suh ka tih kha, Zuala. I mumang i la sawi zawm a nih kha, zanah thlahrang film i en thin a, khatiang bak kha i thluakah a awm lo." tiin a lo khak vat a. "Sava thi pawh a awm reng a lawm!" Zuala'n a tih ve leh ngat phei chuan, Rini chuan a lu a thin san nar nar ringawt a, a thusawi chu ngaihsak zui lo tih hriat takin a phone a phawrh a, a thiante message a en san daih a.

School tualzawl an thlen chuan naupang dang pawh an lo awm nual tawh a. Khawvawt avangin kawrlum chhah tha tak tak an ha theuh a, thenkhat an lo infiam a, thenkhat an lo titi laih laih bawk a. Zuala nen class lama luh mai an tum lai tak chuan, an hnung lam atang hian aw thum leh zawi deuh tak hian, "Rini, in lo thleng tawh a ni maw?" a rawn ti chhuak thut a.

 Rini chu a phu deuh zawk a, a han hawi let chuan an Science zirtirtu thar, Sir Sangzuala chu lehkhabu pawm tat chung hian an hnungah a lo ding reng a. A hmel chu a thutak in, a mitmeng chu thil hla tak thlir ang maiin a thuk ruih mai. "Aw, thleng chiah e, Sir.." Rini chuan zah hmel deuhin a lo chhang vat a. 

Sir Sangzuala chuan a tarmit chu a han siamrem hlek a, "Vawiin chu Physics test kan neih dawn kha i la hria em? Nizan ruahsur vangin in lo zir hman loh mai ka hlau a. I ti tha thin bawk a, vawiin pawh uluk deuhin i chhang dawn nia." tiin dam dap hian a hrilh a. A aw ah chuan zirtirtu in a naupang a ngaihsakna satliah piah lamah, inngainatna leh duhsakna thuk tak inphum a ang mah zawk. 

Rini chuan nui sang chungin, "Hria e, Sir. Nizanah current thim hmain ka lo ennawn hman hlauh a." tiin tha takin a lo chhang ve mai a. Sir Sangzuala chuan a lu a bu nghat a. Chutih lai chuan Zuala, an titi ngaithla peih lo leh an thianho lo infiamna lama a kal chak tawh lutuk chu a lo che sek a. 

A u chu a rawn pawt deuh zeuh a, "Au Rin, ka thiante an lo thleng tawh, kan class-ah ka kal dawn aw..." a han ti a. Sir Sangzuala pawh chu melh tha ngam lovin a kalsawn ta nghal hlawk hlawk a. Rini pawh chuan, "Aw le, tlan kual vak suh aw.." tiin a au zui a. Sir Sangzuala lam chu hawi lehin, "Sir, keipawh class-ah ka han lut ve nghal a nge." tiin a kal ve ta a.

Zirtirtu leh naupang dangte an phe suau suau a, mahse Sir Sangzuala erawh chu a dinna ngaiah chuan lungphun ang maiin a la ding khawng reng a. A hma lawka mipa naupang, zangkhai taka tlan liam ta ngei mai chu a en zui vawng vawng a. Chu naupang, engmah lungkham nei lo leh hlim taka a thiante nena infiam chhunzawm ta chuan tu chiah nge a nih a hre der mai si lo, mahse Sir Sangzuala chuan chu naupang pawisawi lo tak, Zuala chu tunge a nih chiang takin a hre reng mai si.

**************************************

Khua chu a vawt ruih mai a, chuti chung chuan khawlaiah chuan mipui an ri nuai nuai tho. Rini leh Zuala te school kal hlan a ni bawk a, inchhung boruak chu a uap deuh churh mai. An nupa pindan chhung, tukverh parda inzar phui deuh khup hnuaiah chuan Pu Muana chu khum tlangah a thu ngawi ngul a. 

Nizan lam ruahsur leh thli tleh vel khan a rilru a ti hnual nge ni, a hmel chu a dur in, a khawhar hmel ngawih ngawih a. A kut chuan thlalak hlui tawh tak, a tlang pawh nget deuh hlep hlawp tawh hi dimte in a hum a. Chu thlalak, a rawng pawh dal vek tawh ah chuan tlangval pahnih, hlim tih hriat ngawih ngawih a nui sang hi an lang a. 

Pakhat zawk chu amah Pu Muana ngei a ni a, a bula ding, a dara rawn kuah tu erawh chu a thiantha ber, Hriatpuia a ni. Kum tam tak liam taa an hlim lai nite chu nizan lawka thleng ang maiin a mitthlaah a rawn lang uar uar a. Vawiin hi November ni 8 a ni a. He ni, he hun chiah hi Pu Muana hian a damchhungin a theihnghilh tawh ngai lo ang. 

Kum 25 liam ta khan, he thlalaka a thianpa Hriatpuia hi khawvel atangin a bo hlen ta a nih kha. Khata tang khan a chanchin emaw, a thawm reng reng hriat zui tur a awm tawh lo. A pawi ber leh a thinlung tina tu ber chu, Hriatpuia'n Saphai Lei a pan lai leh a bo lai tak khan amah Pu Muana ngei pawh hi a awm ve a ni.

A ngaihtuahna a lo kawm melh melh lai chuan kawngka a rawn inhawng ri rak a, a nupui Pi Mahruaii chu zawi te in a rawn pen lut a. A pasal in ngui taka thlalak hlui a lo bih ngawt ngawt a hmuh chuan a thaw chhuak hak a, vawiin ni hian a pasal rilru a nghawng dan tur chu a hriatthiampui hle. 

Muangchangin a pan phei a, a pasal darah chuan a kut nem tak chuan a va vuan a.. "U Muan, i la ngaihtuah reng a ni maw?" tiin Pi Mahruaii chuan dam dap hian a han zawt a. Pu Muana chuan chhang lovin a thlalak ken lai chu a thlir tlawk tlawk a. "Kum 25 lai a liam tawh a nia. I thiam loh a ni lo tih theihnghilh tawh rawh. I thiamloh anga i inngaih tlatna kha paih bo la, tunah chuan chhungkua, fa tha tak pahnih kan nei tawh a, thil kal tawh chu liam tir tawh rawh." tiin a pasal rilru hahdam nan chuan a han hnem leh mawlh mawlh a.

Pu Muana chuan zawi muangin a lu a thing a, "Ka thei lo a ni, Mahruai. Kum tam tak chu a liam tawh ngei a, mahse Saphai Lei a kan hun hman hnuhnung ber tlai kha ka theihnghilh thei thlawt lo. Ka hmaah, ka mit hmuh ngeiah a bo a..." a aw chu a khur deuh dar dar a. "Theihnghilh ka duh a, theihnghilh ka tum thin, mahse he ni a lo thlen apiang hian ka thianpa khan min rawn ko nawn leh thin nimai hian ka hria.." beidawng aw tak hian a han ti leh a. Pi Mahruaii chuan a pasal chu khawngaih hmel takin a kuah vawng vawng a, sawi tur dang reng a hre tawh bik lo. Pindan chhung chu a reh vawng vawng mai.

*************************************

Ni tla tur chuan Tlangnuam kawngpui chu a rawn chhun sen phut a, thlasik ni a nih avangin khua chu a thim ruih tawh a. Zuala chu a school uniform nena kawtzawla ding chungin a u Rini school bang lo thleng tur chu a lo nghak hlel tawh hle a; nizan lama a thil hmuh te kha a u bulah sawi chhunzawm leh a chak tawh hle a ni. 

Rei vak lovah chuan Rini leh a bialpa Mamawia chu an rawn titi phei bawrh bawrh a. Mamawia hi kum 18 mi, class 12 zir lai a ni a, a hmel a fel viau rualin a mizia erawh a thawveng hle a, school naupang dangte pawn an nel hle. Rini erawh hi chu class 11 zirlai a ni a, kum 17 a upa a ni. 

Mamawia chuan Zuala a hmuh veleh a au lung lung a, "Zualte, i u i lo nghak leh tawh em ni? Vawiin chu kan bang hma bawk a, Saphai Lei lamah va kal kawi ila kan lo ti deuh a sin, khaw thim hmain kan va kal zawk dawn em ni?" a han ti lauh lauh va.  Saphai Lei hming a hriat rual chuan Zuala hmel chu a inthlak nghal hlawk a, nizan lama eng pawl a hmuh te leh a pa Pu Muana'n "Kha hmunah khan kal hlek suh u," ti a a vau lawk thinna te chu a rilruah a rawn lang nghal zut zut a. 

"Ka duh lo. Apa in Saphai Lei bula kal a phal lo, apa a thinrim chuan a hrehawm leh dawn emai." tiin a lo hnar nghal vat a. Mamawia chu a rawn nui chhuak hawk a, "Naaa, i va han dawih tak em! Khua pawh a la thim hleinem, i pa a lo la haw dawn lo tih te chu kan hre vek alawm. I pa rui thinrim te mai mai, ngaiah nei ve tawh ta che" a han ti deuh kher a. 

Rini pawh chuan nuam lo a ti deuh a, "Nia, Mamawi, kal lo mai ang u, khua hi a vawt si, inchhung lumah awm mai mai zawk ila a tha." tiin a lo hnial ve bawk a. Mahse Mamawia chuan a thil tum chu thlah a la tum miah lo, Zuala chu a en a, fiamthu ti tak deuh hian, "Zuala, i u hnunga biru reng rual pawh i nih tawh loh hi. I dawih leh lutuk hi chu aw.. i lo tuai ru reng a ni lo maw?" a han ti leh kher a. 

He thu "tuai" tih hi mipa naupang inla pa ve tak tan chuan hriat hrehawm ber a ni ngei ang. Zuala hmai chu a rawn sen nghal awp awp a, "Tuai ka ni lo! Dawih pawh ka dawih bawk lo!" a ti deuh hlar a. Rini chuan Mamawia chet dan chu a lo duh lo hle a, "Mamawi, khatiang khan chhaih ziah suh, a hlau ve a ni mai a, chhaih kher a ngai lo." a lo ti deuh hlur a. 

Mahse Zuala chuan luhlul chhuahin, "A hlauhawm loh emai, kal ila a ni mai alawm. Tuai leh dawih ka nih loh zia ka fiah khawp ang, tu mahin dawih min ti tawh lovang." a ti ta pung pung  mai. Mamawia chu a nui suk a, a phur hmel hle. Rini erawh a rilru a nuam thei lo, "Kal lo zawk ang u..." a tih pawh chuan Zuala ber chuan kal ngei a duh ta tlat a.

Tichuan, tlai khaw thim hmain Saphai Lei lam pan chuan an unau leh Mamawia te chu an inzui thla ta hnak hnak a. Khua chu a vawt tial tial a, ramngaw lam atanga thli rawn thaw chu a hming chiahin a vawt tawh lo, a hriam hle zawk a ni. Mamawia'n Zuala a bawl kual velna te chuan Zuala thinlunga hlauhrukná chu a hliah khuh ve deuh nge ni, phur hmel deuhin a kal a; a u Rini hmel ngui leh hlauthawng tak erawh a hmu thiam der si lo.

*********************************************

Tlai ni tlak dawn ruih ah chuan an pathum chuan Saphai Lei chu an pawh phei ta hlawl a. He lei hi British hun laia an dawh, thir lian pui pui leh thing hmanga siam a ni a. Kum tam tak liam taa hman tangkai tawh loh a nih avangin hruizam leh hnim ten an bawh khah luk tawh a, a thir ban te pawh tuiek in a ei chhe nual tawh a ni. 

Boruak chu a reh vawng vawng a, sava hram thawm takngial pawh hriat tur a awm lo. Rini chu a hawi kual a, a tir atanga kal ve duh lo na na na chu a thla a muang thei thlawt lo. "Zuala, hetah lo awm ve reng rawh aw, lei chungah emaw a hnuai lamah emaw pawh nise, kal hla miah suh." tiin a nau chu a chah nghal mawlh mawlh a. 

Mamawia erawh chuan a phone phawrhin Saphai Lei chu thla a la kual vel a, "Hlauh tur a awm loh em hi. Helai hmun te chu romantic deuh a sin, mi awm lohna hmun reh nuam lutuk a nih hi." tiin a lo nui hawk hawk a. Zuala chuan a u thu awih hmel takin a lu a bu nghat na a, a mitmeng erawhin chu lei hlui tawh tak leh a chhehvel ramngaw thim t(r)an mek chu a thlir kual deuh chhen a.

Mamawia chuan Rini chu lei sir lam, tlem a thengthaw deuh laiah chuan a pawt phei a. Thingbul lian tak pakhatah chuan an pahnihin an thu dun a. Mamawia chuan an school chanchin te, naktuk lama an thiante nena an thil tih tur ruahmanna te chu phur takin a sawi pui siam siam a. 

Rini pawh chuan a titi chu a lo zawmpui ve zel na a, a mit erawhin a nau awmna lam chu a melh leh ralh thin a. Boruak chu a uap deuh churh hian a hriat a, a khat tawkin thli a rawn thaw leh heuh heuh thin. Chutih lai chuan Zuala chu a dinna ngaiah pawh a lo ding tawh reng reng lo. 

Rini leh Mamawia te titi tui lai chu remchangah la in, a thil hmuh chak leh a hlauh ruk em em ni bawk chu zawn tumin zawi muangin lei chhungril lam pan chuan a pen phei chhat chhat a. Nizan lama eng pawl a hmuhna lai tak ni a a hriat, lei laihawl lamah chuan a va kal hnai zel a. A pen rual chuan thing phek hlui tawh tak te chu a ri deuh rak rak a. 

Boruak chu mak tak maiin a rawn sa deuh ta huam hian a hria a, a khurhna leh a hlauhna te kha rawn bo tial tialin, dawi at (hypnotize) ang mai hian a pan ding ngur ngur a. Thawk leh khatah Zuala chu a au ta chiam chiam mai, "U ..U Mamawi..." Zuala aw chu an hriat rual rual chuan thawm a reh leh hmak mai. 

Rini chu phu zukin a rawn zuang tho nghal zawk a. "Zuala?!" tiin a theih pa tawpin a au let nghal a. Mahse, chhanna a awm lo. Chutih rual chiah chuan mak lutuk maiin khawi atanga rawn chhuak nge tih pawh hriat loh hian chhum chhah mup mai hi a rawn zing ta phut mai a.

Chu chhum chu a chhah em avangin pen hnih lek a hla pawh a hmuh theih tawh loh a, boruak chu a uap in a rit nghal luk mai bawk. "Mamawi, khawnge Zuala? Zuala!" Rini chu chhum zing karah chuan hlauthawng leh mangang takin a tlan lut nghal a. Mamawia pawh chu a rawn tlan ve nghal a, a hmel pawh a uang tawh lo hle.

"Zuala, fiamthu thawhna chi a ni lo a nia, lo chhuak rawh!" tiin a au ve tuarh tuarh a. Chhum a chhah telh telh a, Rini chuan a phone torch a on nghal vat a, lei sir leh thingbul vel te chu a chhun kual ruai a. Mahse, mipa naupang hlimthla reng reng hmuh tur a awm lo. Lei laihawl an thlen phei dawn lai tak chuan, thlipui na lutuk a rawn tleh a, chhum chu a rawn vir let but but a.

Vawilehkhatah, van lam atang chuan khawpui a rawn ri ta dur dur mai a. Chu khawpui ri chu ruahsur tur intham ri pangngai a ni lo, khawl lian pui in-on ri hum hum hi a ang mah zawk. Chu thawm an hriat rual chiah chuan, an chung zawn thingkung lian pui pui atang chuan choak (crows) rual za tel tehzet mai, thil hlauhawm tak tlan chhiatsan ang mai hian an rawn thlawk chhuak ta nuaih nuaih mai a. An hram ri leh an thla zap thawm chuan ramngaw chu a luah khat vek a. Rini leh Mamawia chu an beng hupin an thu hnawk a. Thawm leh thli a rawn reh rual chuan chhum pawh chu a kiang ta duak a. Mahse, Saphai Lei chung chu a ruak huai a, Zuala chu hmuh tur a awm tawh lo.

***********************************************

Pi Mahruaii chu in chhung reh ruih hnuaiah chuan no a sil mek a. Boruak vawt tak chuan in chhung lum nuam tak chu a rawn hmet vawt ve deuh tan tawh a, mahse a rilru ah erawh a hma zana a thiante nena an titi ho na kha a la cham reng thung. Chutih lai tak chuan, thawk leh khatah an in chu a rawn nghing ta dawt dawt mai a. 

Van atanga ruahsur tur intham thawm pangngai ang a ni lo, thir hlui lian pui pui inkhak ri hum hum, khawl lian tak nung thawm rapthlak lutuk ang mai hi Saphai Lei awmna lam atang chuan a rawn khawk phei ta rum rum mai a. In chhung eng chu a rawn thim zawk zawk a, current chu a mumal lo kher mai, a rawn eng leh pup pup thin a.

Pi Mahruaii phu nasa lutuk chuan a no sil lai chu chhuatah a thlauh keh ta chuai mai. Mahse chhuata no keh darh chu ngaihsak zui thei pawh a ni lo. A thinphu chu a rawn rang nghal dawt dawt a, a chhungrilah hian sawi fiah theih si loh, nu in a fa te chunga thil tha lo thleng tur a hriat lawkna mak tak mai hian a rawn tuam hlup hlup a. 

A tiril a khur nghal dar dar a. Chu khawpui ri hum hum karah chuan, kum 1993-a ramngaw chhunga hmeichhe mak tak an tawh, a mitmenga beidawnna lo lang chhuak chunga tap aw tiau a, "Khawngaihin, ka fapa Zuala in hmu em? Mipa naupang te reuh te..." ti a a rawn zawhna aw kha a bengah a rawn ri nawn awn awn mai. 

Kha nu, a fapa ngei mai hming ang chiah pu, hlauthawng taka zawng tu hmel kha a mithla in hmu fo thin mahse, eng ang hmel pu tak nge a nih tih erawh a hrechhuak theih chuang hauh si lo. Chutih rual chiah chuan, an nupa pindan kawngkhar chu a rawn inhawng pawp a. Pu Muana chu thlanfim in a bual huh hluam chungin, hlauthawng leh phili hmel lutuk hian a rawn tlan chhuak a. 

A mitmeng chu hlauhna leh manganna hlirin a khat a, thlahrang hmu ang mai hian a dang var pap bawk a. Kum 25 liam ta chiah, November ni 8, 1993 a a thianpa Hriatpuia a bo dawn chiaha thawm rapthlak tak a hriat kha, tunah chiah hian a rawn ri nawn leh a ni tih a hrechiang lutuk tlat. 

He thawm rapthlak tak hi hmun dang atanga rawn chhuak a ni lo, khawl lianpui ri hum hum hi Saphai Lei ngei atanga rawn chhuak a ni. A nupui lam chu phili zet hian a va pan rawk rawk a, a aw khur hlawk hlawk chung chuan, "Mahruai... Rini leh Zuala te, an... an lo haw tawh em? Saphai Lei ah... Saphai Lei lamah an kal lo ang tiraw? Kha thawm kha..." tiin mangang tak hian a zawt ta chuk chuk a.

****************************************

Sir Sangzuala pawh chuan chu thawm rapthlak leh mak tak, van atanga khawpui rawn ri dur dur leh thir inkhak ri hum hum chu a pindan tukverh bula ding chungin a lo ngaithla ve mek a. Tukverh darthlalang atang chuan thim zingah Saphai Lei awmna lam chu a thlir vawng vawng a. 

A hmelah chuan Pu Muana te nupa anga mak tihna leh phili buaina a lang ve lova, thil thleng tur chiang taka hre lawk sa, pawi ti si, mahse dang thei chuang si lo hmel hi a pu zawk a. Pindan pawn lam atang chuan pen thawm a rawn awm a, muangchangin a nu, Pi Chhuangi chu a rawn pen chhuak ve chhat chhat a. 

Ani pawh chuan chu khawpui ri hum hum chu a bengah a hre chiang hle tih a hmel atang chuan a hriat theih a. A fapa bul chu rawn pan hnaiin, an nufa chuan ngawi rengin an inen a. An hmel chu a thutak dun em em a, hlauhna ai mahin, thuruk rit tak kum tam tak an lo zep tawh rawn inpuang chhuak tur nghak ang mai hian an awm a. 

Sawi tur tam tak nei si, mahse tawngka a sawi chhuah ngai loh thu inhrilh tawn ang hrim hian an inmelh tlawk tlawk a. Saphai Lei lam atanga thawm rawn chhuak chu zawi muangin a reh ta riai riai a. Chutah le, Pi Chhuangi chu a rawn thaw chhuak hak a, zawi te, mahse fiah fak hian, "A hun a thleng leh ta..." tiin a phun sap a.

*******************************************

Rini chu chhum chhah mup karah chuan a tlan kual ruai a, a nau hming chu a theihpatawpa ringin a au tuarh tuarh a. Mahse, a au thawm chu chhum chuan a hip zo vek ni mai hian a hria, a reh hian a reh tlawk tlawk mai a ni. Ring tak hian, "Zuala! Min lo chhang teh! Khawiah nge i awm?" tiin a han au leh vak vak, a tap pur tawh a, a hrawk te chu a thip vek tawh bawk.

Mamawia pawh chu a rilo hian a lo khur hlawk hlawk a. A hma lawka a inlak huaisenna te, Zuala a bawl kual velna te kha chu chhum chhah tak chuan a lak bo sak vek tawh hi a ni ber mai. A phone light chuan lei chhuat leh a sir vel te chu a chhun kual ruai a, mahse naupang hlimthla reng reng hmuh tur a awm lo. 

"Rini, a awm lo... a awm lo hrim hrim," tiin hrilhhai leh mangang takin a phun sap a. Chu lei hlui, Saphai Lei chu a hma zawng aiin a rawn reh leh ta vawng vawng a. Thawk leh khatah khawl lianpui ri hum hum leh khawpui ri dur dur te, kawl phe zawk zawk te kha a rawn reh hmak a, mahse a nghawr erawh lei hnuai lamah chuan a la kal zui vung vung thung a, chu chuan an dinna lei chu a rawn sawi nghing deuh dawt dawt a.

Rini chuan lei laihawl, Zuala a hmuh hnuhnunna ber lai chu a va pawh phei hlawk hlawk a. Chutah chuan, lei chhuat phek hlui tawh tak chungah chuan Zuala school bag kha a lo let bal mai a. "A bag... Mamawi, a bag a awm!" tiin a va vuan a, a nau hlimthla tal hmuh inbeisei takin a hawikual leh ruai a, mahse khua chu a thim chhah mup tawh a, thingkung lian pui pui te chu hmelma hlauhawm tak ang maiin an ding thim khup tawh a.

Chu thawm mak tak leh nghawr dur dur mai chu Saphai Lei ramngaw chhung atang chuan a rawn in-vibrate chhuak a, tlang pangah te chuan rawn chho zelin Aizawl khawpui lam chu a rawn pan ding nghal vut a. Khawvawt tak karah chuan boruak chu mak tak maiin a rawn lum huam a, thlipui a rawn tleh zui nghal vuk vuk a, chu thli chuan kawtthler leh in tin mai chu a rawn nuai tan ta.

Aizawl khawpui chhung, Tlangnuam leh a chhehvel vengah te chuan mi tam tak chuan chu thawm leh nghawr chu an lo hre ve a. Mi thenkhat chuan lirnghing emaw tiin an in atangin an rawn tlanchhuak hial a. Mahse thil thleng mek chu lirnghing pangngai a ni lo tih hriat takin, electric current chu a rawn phe zawk zawk a, Transformer-a thir inkhak ri ang maiin boruak chu a rik hian a rawn ri hum hum mai a ni.

Rini chu beidawng tawpkhawk in lei chhuat charah chuan a thingthi hnawk a, a nau bag chu a awmah a pawm tlat a. He ni, November ni 8-na hian an chhungkaw tan hremhmun kawngka a rawn hawng tan dawn tih leh, an hma lawkah hian hun kal tawh leh tun hun inkal pawhna (portal) rapthlak tak a awm a ni tih reng a hre der si lo.

**************************************

END OF EPISODE 1