VOID (A mizo horror science-fiction story) Written by : Aaron Malsawmdawngzuala Episode - 3 : The Point Of No Return

VOID

(A mizo horror science-fiction story)

Written by : Aaron Malsawmdawngzuala

Episode - 3 : The Point Of No Return

*****************************************

Tlang chhip sang tak, chhum zing phui mup leh thli vawt tak mai tleh vuk vukna hmunah chuan pitar pakhat, puan dum veka inthuam hi a ding khawng reng a. A hma zawna ruam thuk tak chu mit khap lek lo hian a thlir tlawk tlawk a, a landanah chuan eng emaw thil lian tham tak thleng ngei ngei tur nghak mek hi a ang hle a ni. 

Chutih lai chuan a hnung lam atang chuan pen thawm hi a hria a. Putar pakhat, hmel chang rut mai leh hun harsa tak paltlang tawh tih hriat ngawih ngawih hi a rawn inlan hlawl a. Pitar awmna lam chu muangchang leh thutak zet hian a rawn pan phei chhut chhut a, an inkar boruak chu sawi fiah theih si loh hian a rit nghal luk mai.

Pitar chu muangchangin a rawn hawi let a, a mitmeng thuk leh fiah kalh mai chuan chu putar chu a melh a. A hmelah chuan hlauhna emaw manganna reng a lang lo. Zaidam tak si, mahse thutlukna sawhsawn theih tawh loh tih hriat tak awka hian, "A bul atangin a intan leh dawn... i tih tur chu ti rawh le." a han ti zawi sap. 

Putar chuan engmah a sawi ve lo. Muangchangin a kawr chhung atang chuan silai a rawn phawrh chhuak a. Pitar hma zawnah tak chuan tin in, a mit a chhing sawk a. Silai chu a puak ri thuai a, a meialh a rawn phe nghal zawk bawk a! Chutah Rini chu theihpatawpa ringin a rawn au chhuak a, khum atang chuan a thu chhuak nghal hlawl a. 

A thawk a chhamin a thlantui chuan a bual huh vek a, a awm chu a insep dawrh dawrh mai. A mutna pindan chhung chu tukverh atanga ni rawn lutin a chhun eng ut tawh a, thil thleng rapthlak tak kha a mumang vek a lo ni! Mahse chu mumang chuan a taksa thlengin a nghawng a, a thinphu pawh a la pangngai hlei thei lo.

Saphai Lei-a thil rapthlak tak a thlen atang khan ni 7 lai a lo liam ve ta reng mai. Kha zan, beiseina nena Police ho nen ramngaw an dapkual zan atang khan hun a kal chak lova, Rini te chhungkua atan phei chuan ni khat lek pawh hi kum khat ang maia rei a ni hial tawh. An muthmunah an tap a, chaw an ei thei lova, an mitkhur te chu tla dakin, an hmelah chuan hlimna reng a awm thei tawh lo. 

Pu Muana leh Pi Mahruaii phei chu tawng pawh an tawng tha peih tawh lo a ni ber. Police leh YMA tlawmngai ten ni sarih chhung ngawt Zuala chu an zawng a, Saphai Lei chhehvel ramngaw pilril ber ber thlengin an dap chhuak vek tawh a. Mahse, engmah hnu hma thar hmuh belh tur a awm tawh lo. Beidawnna in an inchhung chu a tuam a, Zuala chu a ruang emaw, nungdam in emaw pawh nise, hmuh tur awm lovin he khawvel atang hian a 'bo hlen' ta a ni tih chu Rini hian rilru na tak chunga a pawm a ngai ta a ni.

********************************************

Aizawl Police Station chhung boruak chu a rit in a uap churh a. Officer Peka chu a office chhungah amah chauhvin a thu a, dawkan chunga file indah hnuk chu beidawng hmel tak hian a keu kual sek a. Zuala bo atangin ni 7 lai a liam tawh a, hma an sawn loh em avang chuan a rilru a hah in a chau tawh hle a ni. 

Meizial phawrhin pakhat a han tan a, a han pak khu tual tual a. Chutih lai tak chuan kawngka a rawn inkik karh karh a. "Lo lut rawh," zawi fiah tak hian Peka chuan a han ti a. Kawngkhar a rawn inhawng a, Inspector Miriami chu hmel thutak leh thil lian tham tak hmu chhuak hmel pu hian a rawn pen lut nghal a. 

A awmah chuan file hlui tawh tak, a kawm pawh rawp tan tawh hi a rawn pawm lut a. "Thu rawh, Miriam." tiin Peka chuan a hma zawn thutthleng chu a kawh hmuh a. Miriami chu a thu nghal a, a thil rawn pawm luh chu dawkanah a rawn nawr phei a. "Sir, Zuala bo dan hi inrukbo satliah emaw, ramsa lak tih vel a ni lo tawp mai. He file hi nimin lam khan record hlui dahkhawmna atangin ka hai chhuak a, thil inang (pattern) rapthlak tak a awm a ni." a han ti a.

Peka chuan file chu a han keu a, "Kum 1993 case maw? Saphai Lei bawk...." a rawn ti sup a. Miriami chuan lo tuihnih vatin, "Ni e, Sir. Pu Muana thianpa Hriatpuia bo ni chiah kha November thla ni 8 a ni a. Mak tak maiin, Zuala bo ni nen hian thla leh ni ah a inang chiah chiah a ni." tiin a lo hrilhfiah a.

Officer Peka chu a phu deuh zawk a, a meizial zuk lai chu a han nawr hlum a. "Coincidence (thil thleng palh) pawh a ni thei tho mai." a han ti ngial a. Mahse Miriami chuan lu a lo thing nar nar a, "Keipawhin chutiang chuan ngaih ka tum a, mahse a thuk zawkin ka luhchilh a, thil dang ka hmu chhuak leh tlat a ni, Sir.." a lo ti leh a, a aw chu a zawi sawt hle.

"Kum 1963 record phek tlem a zawng, a hminga lo la awm ve te ka chhiar a..." tiin Miriami chuan a sawi chhunzawm a. "Khami kum, November ni 8 chiah khan Saphai Lei bul lawk ah khuan Mizo pa pakhat 'Kapzauva' leh phai lam mi leilung endiktu (surveyor) pakhat an lo bo ve tawh tlat a ni. An ruang emaw, an hnu hma engmah hmuh a ni lo." a han ti leh a.

Peka chuan mak a tih hmel kher mai. Miriami bawk chuan, "Khami laia thuthang leh record-a a lan dan tlem te ah chuan, Saphai Lei hnuai puk pakhatah khuan Second World War lai (1940s) vel khan British sipai hovin 'khawl' (machine) pakhat, thil mak tak ti thei siamna hmun an lo nei thin a ni awm e. Chu khawl chu hun leh boruak thunun theihna lam chi a ni a, hnam dang laka an inthup nan a ruka an siam a ni an ti." a han tih zawm leh a.

"Chuan chu khawl chu 1963 khan a lo nung leh tihna em ni?" Peka chuan awih chiah lo, mahse ngaihven ru tak si hian a zawt a. "Chu tak chu a buaithlakna chu a ni." tiin Miriami chuan a chhang a. "Heng thu te hi finfiahna tha leh rintlak a awm miah lo. Record tam zawk chu Rambuai laia kang chhe ta ang in an sawi a, a thenin hmanlai thawnthu phuahchawp mai mai an ti bawk. Mahse, November 8 a lo thlen apiang hian helai hmunah hian thil eng emaw, chu khawl hlui nen emaw chuan inzawmna a awm tlat in ka hria."

Officer Peka chu a thu ngawi vang vang a. A chal a dawm a, thawk a han la hawk a. "Thil awihawm loh tak a ni na a, kan ngaihthah ngawt thei lo ang. Finfiahna awm lo mah se, he November ni 8 leh Saphai Lei inzawmna hi rinhlelh thu ah pawh luhchilh hrim hrim a ngai a ni." a ti charh charh a.  "He file hi tuman hmu ve rih suh se." a han ti leh a, Miriami chuan a lu a lo bu nghat a.

***********************************************

Zing boruak vawt ruih leh hnawng deuh churh hnuaiah chuan Rini chu a school kal turin muangchangin a pen chhak chhak a. Zuala bo atanga ni sarih lai a liam hnuah, thei leh thei  lovin school kal chhunzawm leh tawh turin a inbuatsaih ve hram a ni. Kawng kawi a thlen phei rual chiah chuan a hma zawn takah Mamawia school lo kal ve tur chuan nen an inhmachhawn ta thut mai. 

An intawk thut chu an beisei loh ve ve a nih avangin an pahnih chuan an ding rual chawt a, an inkar boruak chu sawifiah theih si loh hian a rit nghal luk a. Sawi tur hre lo leh awmdan tur thiam lo hian an inmelh tawn zak zak a, nuam lo an tih hmel dun kher mai. Zuala bo atang khan Rini te chhungkaw dinhmun a chhe em em a, a bik takin Pu Muana leh Pi Mahruaii te chuan he thil thlengah hian Mamawia hi a thiam loh liau liau ah an ngai a ni. 

"Saphai Leiah khan hruai lo se chuan kan fapa hi a bo miah lo ang." tiin an dem em em a. Chu vang chuan Rini pawh Mamawia hi be tawh lo tur leh hnaih tawh lo turin an khap bur tawh a ni. Chu thil chu Rini pawh chuan a hrechiang hle a, a chhungte thu hnial a duh loh avang chuan hrehawm ti tak chungin a mit a la sawn a. 

Mamawia chu hmu lo der hmakin, a sirah chuan ngawi rengin a kal pel ta daih a. Mamawia chuan Rini kal liam lai chu a dinna ngaia ding reng chungin a thlir zui vawng vawng a, a hmelah chuan inthiamlohna leh lungngaihna thuk tak a lang chhuak a. Rini hnunglam lan theih loh thlenga a liam hnu chuan Mamawia chuan thawk a han la hawk a. A thinlung rit tak leh mahni inthiamlohna hlira khat chung chuan a school kalna tur lam panin a pen ve ta chhet chhet a.

Mahse, tlem a han pen deuh chiah tihah chuan, a chhehvel boruak chu a rawn hit deuh sung sung hian a hria a, tu emaw hian chik lutukin a enthla reng ni mai hian a inhre tlat a. Rang takin kawngsir thim lai deuh, thingkung ding tlar thupna lam chu a han hawi phei zeuh a. A thil va hmuh avang chuan a phu zawk a, a ding nghal chawt mai. 

Tah chuan pitar pakhat, a chhip atanga a ke hmawr thlenga puan dum veka inthuam hi khawng rengin a lo ding run a! Chu pitar chu kum 1993-a Zualan ramngaw chhunga a tlanchhiat laia a va hmuh ngei, hmel rapthlak leh ro tak ngei kha a ni. Chu pitar chuan a mitmeng thip leh thuk tak hian Mamawia chu a rawn melh kur mai a. 

Khap miah lo hian a rawn en tlawk tlawk a, Mamawia chu hlauhna a tuam nghal hlup hlup a. A che sawn thei lova, pitar hmel chu hmuh hrehawm a tiin a rap hle na a, a mit a la sawn thei bik der lo. A thluak chu a rawn bing mup mup a. Chutih lai tak chuan a hnunglam atangin tu emaw hian a dar ah a rawn kuah thut mai a! 

Mamawia chu a phu nasa em em a, a zuang lo chauh a ni. A han hawi let chu a thianpa Joseph-a a lo ni. "Ehe, iva han phu nasa em em ve. Eng nge i en vung vung a?" nui deuh chung hian a rawn ti a. Mamawia chuan thinphu dawt dawt chungin kawngsir pitar dinna lam kha a va hawi phei leh nghal a, mahse tumah an lo awm tawh lo, a lo reh thiap tawh a. "Engmah... engmah a ni lo. Kal ang." bah deuh nuaih hian a ti a, hlauthawng ru tak chung chuan an kal liam ve ta a.

***********************************************

(1993)

Zuala chu muangchangin a rawn meng a, a taksa kham them thum leh a lu na ngut ngut chuan a la ti zawi hle a. A mit a han nuai a, nichin lawka thim chhah mup mai leh 'thil' dum lian pui pui, rapthlak zeta rawn hualtu te kha pakhat mah hmuh tur an lo awm tawh lova. Ramngaw chhung chu a reh thiap a, sava hram thawm leh thli in thinghnah a chhem rik bak hriat tur a awm lo.

A inbeng kang a, a theih ang angin ramngaw atang chuan a kal chhuak hnak hnak a. Rei vak lo a kal hnu chuan kawngpui lian vak lo hi a pawh chhuak ta hlawl mai. Mahse chu kawngpui a han hmu chu a phu deuh zawk a. A hriat ṭhin Aizawl kawngpui, alkatra dum ṭha tak leh lirthei tlan zut zutna kha a ni hauh lo. 

Kawng chu a zim in, a ṭhen laiah chuan lung a pir chhuak fur a, a ṭhen chu leivut tlang hlang a ni deuh ber a. Kawngpui chu a zawh chho zel a, a chhehvel in ding te leh tlang ruangam a han thlir kual vel chuan a awmna hmun chu an veng 'Tlangnuam' ngei chu a ni tih a hria. Mahse engkim mai chu a hlui lutuk tlat! 

2018-a in lian pui pui, concrete-a sak chhawng sang tak takte kha pakhat mah hmuh tur a awm lova. Thing leh rangva hmanga sak 'Assam-type' in hlir a ni deuh ber a, tui hawk luankawr te chu leia laih kuak tawp a ni hlawm a, boruak te chu a thianghlim in engkim mai chu a hlui rup mai hian a hria a.

Hmanhmawh takin an in awmna lam pan chuan a tlan phei hlawk hlawk a. A thinphu chu a rang in, thawk a la hrawih hrawih a. Mahse an in kawt a thlen rual chiah chuan a ding nghal chawt mai. A beisei leh a hriat ṭhin an in concrete chhawng thum building lian leh mawi tak kha a lo bo vek a! 

Mak ti taka a thlir tlawk tlawk lai chuan, chu in kawngkhar chu a rawn inhawng ri rak a. In chhung atang chuan nu pakhat hi bucket keng hian a rawn chhuak a, bathlarah chuan thil eng emaw ni hi a rawn pho a. Zuala chuan chu nu hmel chu a han en chiang a, a khawng nghal awt mai. 

A thawk a chham lo chauh va, a mit a nuai nawn leh ngat a, mahse a thil hmuh chu a chiang lutuk tlat. Chu nu chu a pi, a pa nu, kum 2011-a boral daih tawh kha a ni! Zuala hi 2008-a piang a nih avangin a pi dam lai hi a hrechiang mang tawh lova, a hriat chhun pawh pitar chak lo tak a nih lai chauh a ni. 

Mahse tunah a hma lawka ding hi chu pitar a ni hauh lo. Nu valai, kum 50 vel chauhva upa, hmelṭha leh hrisel ṭhat hmel tak, nungchang zangkhai hmel tak a ni tlat mai. A hriat chian em em nachhan pawh, a pa in thlalak hlui (album) a dah ṭhat zingah a pi nulat lai leh a pa naupangte a nih laia a pi hmel nen khan a inang chiah chiah a, hai rual a ni lo. 

A pi, Pi Ziri, la nu valai tak mai chu chiang takin a hmaah a ding reng mai chu a ni si a, Zuala thluak chu  a chawmawlh in, sawi tur reng a hre lo. A vai ruai a, a awmna hmun leh hun chu a mumang a ni hial in a ring a, mahse a tak ngei a ni si. Kawngsir lam a han hawi a, naupang thenkhat hi an lo infiam nak nak a. 

An inchei dan te chu a hlui hlawm em em a, kawtlaiah chuan an ṭhu bial laih a, theihpatawpa ringin a nui vak vak a, an lo 'inkawibah' mek a. 2018-a naupang smartphone khawih mual mual ṭhin te nen chuan inpersan tak a ni. Khawvel dang, hun danga cheng a ang ta ber. Chutih lai tak chuan, thlang lam atangin thli vawt tak hi a rawn thaw vuk mai a. 

Khawlaia bawhlhawh leh lehkha chhe tla te chu a rawn len chho sung sung a. Chanchinbu (newspaper) phek thler pakhat hi a ke bulah chiah chuan a rawn len phei a. Zuala chuan muangchangin a zu chhar a, a phek hmawr lama thil inziak a han en chu a meng phar nghal awn awn mai. Chu chanchinbu thlerah chuan fiah kalh hian, "November 8, 1993" tih hi a lo inziak kuau mai.

**************************************************

(2018)

Tlai lam dar 3:30 vel a ni a. School ban hun a nih avangin kawtthlerah chuan naupang an tam in an ri laih laih a. Rini chu a ṭhiante nen in lam panin an haw mek a, a rilru chu a ruak ngawih ngawih a, ṭawng pawh a ṭawng tam ve peih lo. Kawng kawi an thlen dawn ṭep tihin, an hnung lam aṭang chuan aw thum deuh chhal hian, "Rini..." tiin a rawn ko va. 

Rini chu a ding chawt a, a aw chu a hriat chian em avangin a hawi let hreh hle. A ṭhiante chuan an hnunga Mamawia inthlahrung taka lo ding reng chu an hmuh rualin boruak rit tak a awm tih an hrethiam nghal a. Inmitmei zeuh in, "Rini, kan lo va kal hmasa ang aw." tiin Rini leh Mamawia chu an kalsan nghal daih a.

Mamawia chu zawi muangin a rawn pen hnai a,a hmel chu a nguiin a chauh hmel hle a. A mitmeng, hlim thei tak ṭhin kha tunah chuan mahni inthiamlohna hlirin a khat tawh a. "Rini,  hun reilote chauh min pe rawh. Sawi ngei ngei tur ka nei a ni..." a han ti zawi raih a, a aw chu a khur deuh hlak hlak bawk a.

Rini chuan engmah sawi lovin a melh ngai a melh tlawk tlawk a. Mamawia chuan thawk a han la a, "Khami tlai, Saphai Lei-a kan kal tlai khan... Zuala nen khan kal in duh miah lo a. Keima tih luihna liau liau a ni. Ka thiam loh vek a ni e, Rini. Khawngaihin min haw hlen lul suh." tiin ngenngawl tak leh rilru na tak chung chuan ngaihdam a dil mawlh mawlh a.

Rini thinlung chu a na vawng vawng a, Mamawia inchhir hmel chu a lainat rualin a nau a ngaihna leh a chan ta anga a inngaihna chuan a hmet na zual a. A chhungten Mamawia an huat em avang pawh a ni ngei ang, tah chhuak insum ṭeuh chungin, "Tunah chuan engmah sawi tur ka nei tawh lo, Mamawi." tiin a chhang a. A hawi sawn a, kalsan a tum a.

"Rini, khawngaihin ding teh..." tiin Mamawia chuan a kut chu vawn let tumin a phar chhuak a, mahse Rini chu a ding duh chuang lo, a kal lui hmak a. Mamawia chu kawnglaiah chuan amah chauhvin a ding tlawk tlawk a, a hmelah chuan beidawnna leh hrehawm tihna namen lo a rawn lang chhuak a.

A bul vela naupang dang kal liam sap sap te chu a hre tawh lo. Mamawia chuan thawk a han la halh a, a kut chu a hum ruh a. "Ka thiam loh alawm... Zuala chu keimah ngei hian ka zawng hmu leh khawp ang." tiin a phun sap a. Tichuan, in lam pan ta lo chuan Saphai Lei lam panin a kal ta daih mai.

Chu thil thleng mek chu a piah lawk, kawngsir thingkung hlim aṭang chuan mi pakhat hian chik lutukin a lo thlir reng a. Chu chu Sir Sangzuala a ni. Mamawia inhnem mawlh mawlh thawm leh Saphai Lei lam a pan ta chu a hre phain a hmu vek a. Zirtirtu a nihna angin a zirlai naupang hi va umzuiin, he thil hlauhawm tak ti lo tur hian a dang thei reng a ni. Mahse, Sir Sangzuala chu a che sawn eih lo. A chhan chu, thil hi a nih dan tur takin a thleng mek a ni tih a hria a, he 'Time Loop' ah hian Mamawia hian Saphai Lei a pan ngei ngei a ngai tih hi Sir Sangzuala hian a hre lawk vek tawh tlat a ni.

******************************************

Tlai lam ni a tla fel ṭep a, Saphai Lei ramngaw chhung chu a thim khuih tawh a. Mamawia chu hreh ru tak leh lungphu rang dawt dawt chung hian a pen phei zel a. Ramngaw chu a reh vawng vawng a, sava hram thawm emaw, rannung thawm takngial pawh hriat tur a awm lo. Hlauhna in a rawn tuam a, mahse a inthiamlohna leh Zuala zawn chhuah a duh luat a vang chuan hlau lo awm takin a hmalam a pan lui zel a. 

"Zuala! Zuala!" tiin theihpatawpin a au vak vak a, a aw chu ramngaw chhung reh takah chuan a khawk rum rum a, mahse chhanna pakhat mah a awm lo. A kal thuk zel a, thawk leh khatah a hnung lam aṭang hian thawm mak deuh hi a rawn ri hrawk a. Tu emaw in a rawn zui ru ang mai hian hnim leh thinghnah ro rah rik thawm ni awm tak te chu a hria a. 

Rang lutukin Mamawia chu a hawi let nghal vat a, mahse tumah reng hmuh tur an awm lo. Hnim pik leh thim chhah mup chauh chu a hmuh theih awmchhun a ni. Thawk a han la kawk kawk a, a tiril chu a khur deuh dar dar a. A pen leh tur chiah chu a piah hla deuh aṭang hian thawm danglam tak a rawn ri ta. 

Khawl nung ri ni awm tak hi a ni. Chu thawm lo chhuahna lam chu zawi muangin a chhui phei zel a. A pen hnaih zel rual chuan chu khawl ri chu a ring tial tial a, thir leh thir innawt ri te pawh a ang lek lek mai. Chutih lai tak chuan boruak chu a rawn inthlak thut a, khua chu chawp leh chilhin a rawn thim mup mai a. 

Chhum vaivut rawng uk kharh mai hi khawi aṭanga rawn chhuak nge tih hriat lohvin a rawn zing ta chuai chuai mai. Thlang lam hla deuh tak aṭang chuan eng pawl (blue light) fiah lo ruai hi a rawn inchhun eng a, mahse a hlat em avang leh chhum a chhah em avang chuan eng chiah nge a nih a hre thei lo.

Mamawia chuan hlau chung chungin chu eng pawl rawn chhuahna lam chu a pan hnai zel a. Thlipui a rawn thaw ta vuk vuk mai a, boruak chu a vawtin a hit nghal sung sung mai. A taksa chu a khur hlawk hlawk a. Mahse, a va hnaih dawn ṭep tihin chu eng pawl chu a rawn thim ta hmak mai a. 

A mit a nuai a, a han en chian chuan, hnim pik kara lei khuar laiah hian lei hnuai puk (cave) thim chhah mup hi a lo awm reng mai a. Chu puk luhna chu a thim in a langsar lo em em a, hnim in a hliah deuh tlat bawk a. Zuala zawngtu Police leh YMA tlangval rual ten ni sarih chhung ramngaw an dap chhuah vek lai pawh khan he puk hi chu tuman an lo hmu miah lo tihna a ni. 

Mamawia chuan mak a ti hle mai a. Puk kawtah chuan dingin, "Zuala! I awm em?" tiin a au nawn leh ngat a. Puk chhung thim tak aṭang chuan a aw khawk ri bak chhangtu reng an awm lo. Beidawng takin let leh mai a tum a, a inher chiah tihin, puk chhung thuk tak aṭang chuan aw fiah lo ruai hi a rawn ri chhuak ta tlat mai. 

"U Mamawi... U Rin... min pui ru..." tih ri hi ṭap ṭiau hian a rawn chhuak a. Chu aw chu Zuala aw ngei a ni! Mamawia phu nasa lutuk chu a zuang lo chauh. Amah ko tu Zuala aw a hriat rual chuan a hlauhna zawng zawng a bo nghal vek a. Rang lutukin Mamawia chu puk chhungah chuan a tlan lut nghal rawk rawk a, "Zuala! Ka lo kal!" tiin theihpatawpin a au let ve nghal a.

Puk chhung chu a thim em avang chuan a kekawr ipte aṭangin a phone a phawrh a, a flashlight chu a on nghal a. Puk chhung chu a hnawm dap a, rimchhe tak, thil ṭawih leh thir hlui tuiek rim inpawlh hi a nam rum rum a, thawk lak a ti harsa kher mai. A kal thuk zel a, puk chhung zawl lai deuh, zau pui mai hi a va thleng ta a. 

Chutah chuan nichina a hmuh eng pawl vut kha a lo awm leh tawh a. A phone light chu off-in, muangchangin chu eng chu a va pan hnai a. A thil va hmuh chian avang chuan Mamawia chu a meng phar nasa hle mai. Boruakah chuan thil pawl bial, lian em em mai hi a lo invial tup tup a, lei pawh si lo hian a vir kual mup mup a, chu thil aṭang chuan thawm mak tak, ri tuk tuk hi a rawn ri chhuak tel bawk a.

***********************************************

(1993)

Tlai lam a ni a. Ni a tla lek lek tawh a, khua pawh a rawn vawt ṭan sung sung tawh a. Tlangnuam sub-centre-a thawk, nula senior ve tawh tak mai, Chhuangi chu in lam panin a haw hnak hnak a. Nilenga damlo a buaipui avangin a chau ve deuh hlek a, mahse tlai boruak thiang tak chuan a ti harh sawng sawng thung. 

Khawlai dunga naupang infiam ṭin darh sap sap te chu a thlir phei pah zel a. Kawngkawi reh deuh lai a thlen chuan, kawngsir lungpui chunga mipa naupang pakhat lo ṭhu kun ngal hi a va hmu fuh ta hlawl mai. Chu naupang chu a nguiin a beidawn hmel em em a, a tap deuh feih feih bawk. 

Tlai khaw thimah mahni chauhva chutia a lo ṭhut tlawk tlawk avang chuan Chhuangi rilru a lo nuam lova, muangchangin a va pan hnai a. "Bawiha, tinge hetah mahni chauha i ṭhut a? Khawnge i chhungte?" tiin dam thlap hian a va zawt a. Chu naupang, Zuala chu muangchangin a rawn hawi chhuak a. 

A mitmeng chu a sen ram a, thlaphanna leh lungngaihna thuk tak hian a khat a. Zuala chuan a aw khur dar dar leh ṭap ṭiau hian, "Chhungte... ka nei tawh lo," a ti tawi tak ringawt a. A chhanna tawi te chu a fiahin, nula puitling tan pawh hriat a hrehawm rawih rawih hial a ni. Chhuangi chuan mak a tiin a hrilhhai hle mai. 

Tlangnuamah hian kum nga (5) dawn chu a lo khawsa ve tawh a, he veng chhungah hian hriat loh a nei tlem hle. Mahse he mipa naupang, hmelṭha leh fai veng mai hi a la hmu ngai hauh lo. A bikin a school uniform hak, navy blue blazer fai sar leh tie mawi tak te chu khawi school uniform nge a nih a hre ngai miah lo bawk. 

"Tunge i nu hming?" tiin thil awmdan hriat thiam tum chuan a zawt leh a. Zuala chuan zawi sap hian, "Mahruaii.." tiin zawi te hian a lo chhang a. "Khawiah nge in in a awm a?" tiin Chhuangi chuan a zawt nawn leh ngat a. Mahse Zuala chuan engmah a sawi thei tawh lo. Kum 2018-a a nu, Pi Mahruaii ngaih luat vang leh, khawvel danga tang hlen tawh tura a inngaihna chuan a lung a ti chhe em em a. 

A kun tlat a, a rawn ṭap chhuak ta feih feih a. A mittui chu a far fap fap a, naupang kum 12 mi lek tan chuan a thil tawn chu a rit lua a ni. Chhuangi chuan chu naupang mal leh khawngaihthlak tak mai chu a lainat em em a, a hnuk a ulh ve hial a. A va ṭhu hniam a, "Hawna tur i nei lo em ni? Chhungte pawh i nei lo tak tak em ni, Bawiha? Tinge hetah hian nangmah chauh a i awm a?" tiin duat takin a be mawlh mawlh a. 

Chu zawhna leh ngaihsakna aw dam tak a hriat rual chuan Zuala chu a insum zo tawh lova. A rawn ṭap chhuak hawm hawm mai a, a hma a hmeichhe a hmelhriat miah loh chu a va kuah ta thlawp ringawt a. Theihpatawpa nghetin a kuah a, uar em emin a ṭap chhuak ta rawih rawih mai. 

Chhuangi chuan tih ngaihna vak a hre lo hle a, mahse chu naupang thlaphang tak chu a hnungah a lo chul sak heuh heuh a. Chhuangi hi Lunglei mi daih a ni a, Tlangnuamah hian chhungte tumah nei lovin mahniin in a luah a. Hetiang naupang bo leh beidawng hi khawlaia kalsan mai chi a ni lo tih a hria a.  "Bang tawh rawh le, ṭap tawh suh le." tiin a thlem a. "Lo kal phawt rawh, min lo zui haw phawt mai rawh," tiin a kai a. Tichuan, hun hrang daiha cheng, khawvel dang mi ve ve chu an inzui haw ta hnak hnak a.

*************************************************

Mamawia chuan puk chhung thim taka thil bial pawl (blue orb), boruaka leng delh delh chu mak ti tak leh mit khap lek lo hian a en tlawk tlawk a. Chu thil aṭanga eng rawn chhuak chuan a hmel a chhun paw phut a, a ri 'tuk... tuk...' tih bak chu puk chhung chu a reh tlawk tlawk a. Thawk leh khatah a sir thim lai aṭang chuan thawm a rawn awm thut a. 

Mamawia chu a phu zawk a, a hawi phei nghal vat a. Puk bang phen aṭang chuan mihring pakhat hi muangchangin a rawn pen chhuak ta hlawl mai. Sap putar, upa tawh tak leh vun chuar bawih tawh mai hi a lo ni a! A hmelah chuan kum tam tak hrehawm tuar hmel a pu a, a sam leh khabe hmul te chu a tuak var phau tawh a. 

A mak zual em em chu, he puk thim leh rimchhia ah hian Scientist ho hak ṭhin 'Lab Coat' var, mahse bal leh pawr fap tawh hi a lo ha a ni. Mamawia chuan a thil hmuh chu a awih thei lova, a meng phar nasa awn awn hle mai. Mizoram tlang ram pilrila lei hnuai pukah Sap putar, tar tawh tak mai a rawn lang hlawl chu mak a tiin a en tlawk tlawk ringawt a.

Chu Sap putar chuan Mamawia hlau hmel chu a en a, a khuh deuh kharh a. Chutah, Sap ṭawng ngei mai, fiah fek fawk hian, "Kha kha Void (Thil Ruak) a nih kha," a rawn ti ta khauh mai. Mamawia chuan a chil a lem dawk a, a huaisenna zawng zawng sawm khawmin, khur dar dar chung chuan Sap ṭawng bawk hian, "Tunge i nih?" tiin a han zawt let a.

Putar chuan beidawn hmel tak hian a lu a thing a. Sap ṭawng bawkin, "Hun thlak danglam hi a har lutuk, tlangval. Hun liam tawh thlak danglam tumin kum chhiar sen loh ka bei tawh a, mahse hun hian min bei let zel zawk a ni." tiin a chhang a. A mitmeng chu a thukin, hun thlak danglam a har zia leh, he thil a beihna avanga a tar bawih tawh zia chu a lang chhuak chiang hle a ni.

Putar chu a lab coat ipte zenin a han indap a. A ipte aṭang chuan thir leh darthlalang inpawlh, 'remote control' hlui leh mak dangdai tak hi a rawn phawrh chhuak a. Mamawia'n mak ti taka a en reng lai chuan, putar chuan chu remote chu a han hmet ri khep a. Chawp leh chilhin, thli thaw vuk vuk mai ri hian a zui a, chu Sap putar chu a dinna hmunah chuan a pil bo ta daih mai!

Putar a bo rual chiah chuan boruak chu a rawn danglam nghal vek a. Thil bial pawl vut mai, muangchanga vir ṭhin kha a rawn ri ta vung vung a, a aia rang leh na lutukin a rawn vir ta mup mup mai! Puk chhung chu a rawn nghing dawt dawt a, thlipui na tak tleh ang mai hian chu thil bial pawl chuan boruak a rawn hip let ta vak mai a. 

Mamawia chu theihpatawpin leiah in-ham tang tumin a ṭang a, mahse chu thil bial hipna force chu a chak lutuk tlat. "Min chhan ru.." tia a au thawm chu a khawk rum rum a, chu eng pawl chuan a taksa chu a rawn hip lut ta hlawk a. A lang liam chiah tihah puk chhung chu a thim zui nghal hmak a.

*******************************************************

END OF EPISODE 3