VOID (A mizo horror science-fiction story) Written by : Aaron Malsawmdawngzuala Episode - 4 : History Repeats

 VOID

(A mizo horror science-fiction story)

Written by : Aaron Malsawmdawngzuala

Episode - 4 : History Repeats

**********************************************

(1993)

Zuala chu kum 1993 a rawn thlen aṭangin ni 7 chiah chiah a lo liam ve ta reng mai. Tlangnuamah chuan hun hi muangchangin a kal emaw tih tur a ni a, 2018-a thil thleng chak tak tak te chu 1993 kumah erawh chuan a kal muang em em a. A tirah chuan ṭap in indawm kun reng ṭhin mah se, naupang a la nihna leh belh tur dang a neih miau loh avangin, nula fel leh khawngaihna ngah tak, Chhuangi bulah chuan a tlei ve ta hret hret a.

Chhuangi chuan he naupang bo, chhungte zawng hmu zo lo hi mahni fa ang tak takin a la ta tawp mai a ni. Kum 1993 hunlai a nih angin, thil a la buaithlak lutuk lova; Tlangnuam Village Council President (VCP) leh YMA hruaitute hnenah Chhuangi hian thil awmdan a thlen thlap a. 

Kulikawn Police Station thlengin Zuala bo thu hi an thehlut a, mahse Aizawl khawchhung leh Mizoram pumah hetiang rual mipa naupang bo report pakhat mah a awm loh avangin (a chhan chu 2018 atanga rawn kal a nih miau avangin), khawtlang hriatpuinain thla khat tal lo enkawl rih turin hma an la ta a. 

Chhuangi chuan theihpatawpin mawhphurhna a la a, school-a a luh theih nan a hming thar atan 'Sangzuala' tiin a ziahluh sak ta nge nge a. Naupang lehkha thiam thei leh fing tak a nih avangin, Chhuangi chuan in lama awm awl tir mai mai lovin veng chhung Middle School-ah a luh tir ve nghal a. 

A 2018 school uniform, navy blue blazer fai sar mai kha chu an in luah kil khatah a in-khai ṭha ṭhap tawh a. Tunah chuan 1993 naupang te hak ṭhin, kekawr bul (khaki) leh kamis var ha in, Zuala (tun aṭang chuan Sangzuala ni ta) chuan lehkha a zir ve ta mawlh mawlh a. Zirtirtute pawhin an fak hle na a, a ruk tak chuan a pa, a nu leh a u Rini te ngaiin a khawhar a la zual ṭhin hle a ni.

Zan khat chu khua a chhe deuh a, ruah a sur cherh cherh a. Zan dar 8 vel a ni a, an in chhung thim deuh khupah chuan Chhuangi chu thuk bulah ṭhu in thil a ṭhui mawlh mawlh a, a sirah chuan battery hmanga tih nung chi, radio hlui ve tawh tak aṭangin hla a ngaithla mek a. Chutih laiin Zuala pawh dawhkan te tak te pakhat hmaah ṭhu in, bulb eng vut hnuaiah chuan naktuk lama an school test tur lehkha a lo zir ve mawlh mawlh bawk a.

Thawk leh khatah radio aṭanga hla rawn ri chu awmze nei lo tak hian a rawn ri ta nuai nuai mai a, 'static' (ri vung vung leh chik ruai ruai) hian a rawn thlak ta thut mai. Boruak chu a rawn vawt zual sauh a, chumi rual chiah chuan pawn lamah khawpui a rawn ri dur dur a, kawl a phe ta zuai zuai mai bawk a. 

Chhuangi chuan mak ti takin a thil ṭhui lai chu a dah a, radio rawn ri chhe ta thut chu a han melh vat a. Chutah le, chu radio 'static' ri nuai nuai kar aṭang chuan mipa aw fiah lo ruai, mahse mangan hmel tak mai aw hi a rawn ri chhuak ta tlat mai, "Zuala... Zuala..." tih ri hi a rawn khawk chhuak a. 

Chu aw chu mikhual aw a ni lo, Mamawia, kum 2018-a a bo hmaa theihpatawpa Zuala hming lama au tu aw ngei mai kha a ni. Chhuangi chuan mak ti lutukin radio chu a va pan hnai a, a han herh kual vel ṭhin a, mahse a aia ringin a ri chik vawt vawt ringawt a. Zuala chu a lehkha zir lai aṭangin a rawn tho chhuak nghal zawk a, a meng phar kawk a. 

"U Mamawia... U Mamawia aw ngei a ni!" tiin theihpatawpa ring hian a rawn au chhuak nghal a. Chhuangi chuan hlauthawng leh hrethiam lo zet hian, "Bawiha, tunge Mamawia chu?" tiin a lo zawt let hu a. Zuala chuan buai nuai hian, "Ka u ṭhianpa... ka bo hma khan kan kal ho, Saphai Leiah kan kal ho alawm Nu Chhuang! A lo kal ve a niang, hemi kumah hian a rawn kal ve a niang!" a ti bah deuh nuai a. 

A thil sawi awmzia leh hun dang aṭanga kal an nih thute chu Chhuangi chuan pakhat mah a hrethiam lo. Zuala chuan rang lutukin radio chu a va la lawk a, a hmai si chet a keng chungin, "U Mamawi! U Rin! Khawnge in awm?" tiin a au ta vak vak mai a. Chutah radio aṭang chuan a hma aia fiah zawk hian Mamawia aw ngei mai chuan, "Zuala, a chhungah khan i awm em?" a rawn ti leh ta tlat mai le. 

Zuala chu a ṭap chhuak nghal hawm hawm a, "U Mamawi, ka awm! Hetah ka awm!" tiin a au let vak vak a. Mahse, ri 'khep' a awm a, radio chu a reh zui ta hmak mai. Zuala chuan mangang lutukin radio chu a sawi nawk nawk a, "U Mamawi? Min chhang rawh!" tiin a be chhunzawm mawlh mawlh a. 

Chhuangi chuan a tuar thei tawh lova, "Zuala, bawiha... a tawk, a tawk e," tih pahin Zuala chu a va kuah ta thlawp a. Zuala pawh tih ngaihna hre lo, he 'Time Travel' thil mak leh rapthlak tak hi Chhuangi bula a sawifiah thiam si lo chu hrehawm ti takin a ṭap chhuak ta hawm hawm ringawt mai a.  Chhuangi chuan a khawngaih lutuk chu a mittui a tla ve hial a, mahse chutia radio hlui ber mai aṭanga Zuala hming lama rawn ṭawng chhuak a hre ve ngei mai chu mak a tiin, he naupang hian thuruk lian tak a pai a ni tih a hrethiam ta hle bawk a ni.

******************************************

Thawk leh khatah Mamawia chu a rawn harh chhuak zawk a, thawk a la nghal kawk kawk a. A lu a haiin a taksa chu thil rit takin a delh beh tlat ang mai hian a na them thum a. A inbeng  kang a, a han hawi kual chu ramhnuai pilril takah a lo mu reng mai a. A awmna lai vel chu a han thlir kual a, Saphai Lei ramngaw ngei kha a ni tih a hria, mahse a landan chu a danglam vek tawh. 

Kum 2018-a ramngaw hnim pik tak, hnim bawh khah luk tawh leh hlui tawh tak kha a ni hauh lo, thingkung te chu a la thar vutin, hnim te pawh chu a la to ṭha hle a, engkim mai chu a la thar vur mai. Mak a ti em em a, a hlauthawng ṭan hle bawk. Hmanhmawh takin a kekawr ipte aṭang chuan a phone chu a phawrh chhuak rawk rawk a, chhungte biak pawh tumin a power button chu a han hmet a. 

Mahse engmah a nung thei miah lo, a screen chu a thim hmak a, khawl (Void) thiltihtheihna khan a battery a rawn hip ral vek nge ni, a nung thei tawh der lo mai. Beidawng takin phone chu a ak ṭha leh a, Saphai Lei ramngaw aṭang chuan theih ang angin a tlan chhuak ta a. Kawngpui a va pawh chhuah rual chuan a thil hmuh avang chuan a ding nghal chawt mai.

Alkatra kawngpui (asphalt) ṭha tak ṭhin kha a lo bo vek a, leivut kawng zim tak, lung hraw pui pui lawr chhuahna kawng hlui tak hi a lo ni ta daih mai! Tlang kual vela in ding te chu in lian leh changkang pakhat mah hmuh tur a awm lova, thing leh rangva hlui hmanga sak 'Assam-type' in hlir a ni deuh ber. 

Mamawia chuan thil awmdan chu muangchangin a hrethiam ṭan a, engkim mai chu a hlui rup mai a, 1993-ah a let ve ta tih chu a pawm a ngai ta. Kawng dungah chuan mangang takin a kal zel a, Tlangnuam kawtthler a thlen phei chuan khawlaia mi veivak leh naupang infiam te chuan an lo en duh hle mai a. 

Mamawia school uniform hak, navy blue blazer mawi leh changkang tak, 2018 design ngei mai chu an hmuh ngai a nih loh avangin mak ti takin an en hu hu hlawm a. Mahse Mamawia chuan tumah a ngaihsak thei lo, a thinphu a rang hle a, rang lutukin Zuala te in, building lian leh ropui tak lam pan chuan a tlan ta hlawk hlawk a.

Mahse, an in awmna hmun ṭhin a va thlen chuan building chhawng sang tak kha a lo awm hauh lo! A hmunah chuan in hlui ve tak, kawtzawl zau deuh nei hi a lo ding a. A hrethiam lo hle a, a ding vung vung a. Chutih lai chuan chu in kawtah chuan tlangval pakhat hi lungngai tih hriat ngawih ngawih hian a lo ṭhu kun ngal a. 

Mamawia chuan chu tlangval chu a hriat hnu a ang a tiin a en vung vung a. Chupa hmelah chuan hlimna reng a awm lova, a nguiin a beidawn hmel em em a. Chutah hmeichhe tleirawl pakhat, hmelṭha leh nungchang zangkhai hmel tak hi a lo kal a. "Muana..." tiin chu tlangval chu dam thlap hian a rawn ko va. 

Chunu chu Mamawia chuan a en leh vat a, a ni pawh chu a hriat hnu a ang a ti takzet mai! Chu nula chu Muana bulah chuan a va ṭhu a, a darah vuanin, "I thiam loh a awm lo ania, heti hian indawm kun reng suh." tiin a hnem mawlh mawlh a. Tlangval chu a rawn ṭap chhuak hlawp hlawp a, "Ka thiam loh alawm... ka chhan hman lo a ni, Mahruai... Hriatpuia chu khawnge a awm ka hre der mai si lo." tiin ṭap chungin chu nula chu a kuah a.

Mamawia chuan mak a ti lutuk chu a thawk a chham lo chauh a ni. An hmel chu a aia chiang zawkin a han en a, a bialnu Rini leh a nau Zuala te nu leh pa, Pu Muana leh Pi Mahruaii ngei kha an ni tih a hre ta! Mahse tinge an hmel chu a la naupan em em a, tleirawl leh tlangval chauh an la nih? 

Hriatpuia (Pu Muana ṭhianpa, 1993-a Saphai Leia bo ta kha) a bo chiah a ni tih a hriat rual chuan Mamawia tiril chu a khur ta dar dar a. Hun kal tawhah a tang ta tih a inhriat chian rual chuan hlau leh mangang takin an in (Mamawia te in) awmna lam pan chuan theihpatawpa chakin a tlan haw ta nghal a.

******************************************

(November 20, 2018)

Mamawia bo aṭangin ni 5 lai a liam ve leh ta reng mai. Aizawl Police Station chhung boruak chu rit tak a ni tawh a, thlasik khawvawt ṭan tawh nen, office chhung chu a uap deuh churh a. Officer Peka chu a dawkan bawhin a ṭhu kun ngal a, a mitkhur te chu tla deuh dakin, zan tam tak mu ṭha tawh lo tih a hmelah a hriat ngawih ngawih a. 

A hmaah chuan file pahnih, Zuala leh Mamawia bo chungchang ziahna chu a in keu huau a. Thil thleng hi awihawm loh khawpin a mak a ni. Zuala ngei pawh zawn hmuh a la nih loh laiin, a bo dan chu chhui chhuah hma hauhvin Mamawia ngei chu khami hmun, Saphai Lei-ah bawk khan a bo leh ta hmak mai si a. 

YMA tlangval rual leh Police ah pawh hnuchhui lama thiamna neite zawng zawngin ramngaw an dap chhuak vek tawh a, mahse ramsa seh hnu hma emaw, suamhmang rawkna hnu hma pakhat mah hmuh tur a awm miah lo chu Peka thluak tibuaitu ber a ni. Kawngkhar a rawn inkik karh karh a, Inspector Miriami chu hmel thutak zet hian a rawn lut a. 

A kutah chuan file thep deuh tak hi a rawn keng a. "Sir, Cyber Cell lam aṭangin Mamawia phone tracking report a rawn thleng chiah e," tiin dawkanah chuan lehkha chu a rawn dah a. Peka chuan thawk la hawk chungin, "Eng nge chanchin? An trace thei ta em?" tiin beiseina tlem te nen chuan a lo zawt a.

Miriami chuan beidawn hmel takin lu a thing nar nar a. "Thei lo, Sir. Mak ka ti khawp mai. A phone kha switch-off a ni lova, battery low vanga thi pawh a ni lo. Telecom ho sawi dan chuan, Saphai Lei ramngaw a a luh hnu khan a signal kha a 'drop' thut a, network aṭangin a bo hmak ringawt a ni. Khawl hi a chhiat thut emaw, lei hnuai thuk taka a luh loh chuan hetiang hian signal a bo thut ngai lo. Kan trace ngaihna a awm tawh lo reng reng," tiin thil awmdan chu a hrilhfiah a.

Peka chuan a meizial zuk lai chu a nawr hlum sawk a, a chal a dawm vawng vawng a. "A awmzia chu khawvel aṭangin a bo ta hmak tihna ang a nih deuh mai chu a. YMA ho nen Saphai Lei khu vawi thum lai kan dap chhuak tawh a. Thawmhnaw them tal emaw, rahna hnu-hma takngial pawh hmuh tur a awm lo. Naupang pahnih, ni reilote chhungin hmun khatah an bo a, mahse an ruang takngial pawh kan hmu si lo." a han ti nuah nuah a.

Miriami chuan Peka dawkan bula ṭhutthlengah chuan ṭhut thlak pahin, "Sir, hman ni a 1993 leh 1963 file ka rawn hmuh che kha i la hria em? Mamawia hian inthiamlohna lian tak a nei a, Zuala zawng turin kha hmunah khan a let leh tih a chiang reng. Chuan, chu a let lehnaah chuan Zuala bo chhan ang chiah khan eng emaw ni tak chuan a lo man ve a ni ngei ang. Saphai Lei khuan thuruk lian tak, mihring theihna piah lam thil a thukru tiin an sawi thin tlat a ni." tiin a ngaihdan chu a rawn sawi a.

Peka chu a ngawi vang vang a, Miriami thusawi chu awih chiah lo mah se, thil dang rinhlelh tur a awm miau loh avangin hnial ngaihna a hre bik lo. Chutah Miriami chuan inringtawk tak hian, "Sir, naktukah Mamawia phone signal bo-na hmun (last location coordinates) ah tak khuan keimah ngei va kal ve ka duh a ni. Hmuh hmaih kan nei ngei ngei ang. Puk chhungril tak emaw, lei khuarkhurum hnim in a hliah tlat emaw kan hmuh hmaih thil a awm a niang. A hmunah keimah ngeiin va chian ka duh.." tiin a ngen a.

Peka chuan Miriami chu chik takin a melh a, a lu a thing ta nghut a. "A theih loh. Khu hmun khu a him lo tih a chiang tawh a, nangmah chauhva i kal chu ka remti lo bur. Zawn nawn leh a ngaih chuan team mumal tak nen, uluk zawka inralthuamin kan thawk chhuak leh zawk dawn nia. Mahni chauh chuan tuman Saphai Lei khu an rap tur a ni lo." a lo ti khauh mai.  Miriami chuan a hotupa thupek chu a hnial ngam lova, mahse a mitmengah chuan tlawm mai a tum lo tih a lang thung. Zawi sap hian, "Aw le, Sir.." tiin a chhang a, file chu a la a, ngawi rengin office aṭang chuan a chhuak ta a.

************************************************

(1993)

Mamawia chuan an in awmna veng lam chu thlantui nen a pan hlawk hlawk a. Kawng laka a thil hmuh te chuan a awmna hun chu a dik lo tih hrilh nawn mawlh mawlh mah se, beiseina chhe te nen an in tal chu a ngai a nih a beisei lui tlat a. Mahse, an kawt a va thlen chuan a ding nghal chawt mai. 

A hriat ṭhin, an in lian leh changkang tak, concrete building ropui tak kha a lo awm hauh lo! A hmun ngaiah chiah chuan thing leh rangva hmanga sak, Assam-type in te fel et hi a lo ding zawk a, Mamawia mak ti lutuk chu a thawk a chham lo chauh a ni. Mak ti taka a en tlawk tlawk lai chuan, chu Assam-type in kawngkhar chu na lutuk hian a rawn inhawng ri thuai a. 

In chhung aṭang chuan tlangval pakhat, thinrim hmel sen tawn tawn hi a rawn pen chhuak hlawk hlawk a. "Aw... ka chhuak ang! Ka chhuak khawp ang!" tiin theihpatawpa ringin a rawn ang chhuak a, a hnunglama kawngkhar chu na mangkheng hian a khar zui nghal bur bawk a. Mahse, chu tlangval chu a ding chawt a. 

A hma zawn lawk, kawtlaia mipa rawlthar dangdai tak, blazer navy blue ha a lo ding khawng reng, Mamawia chu a va hmu thut a. Thinrim hmel pu mah se, a hmaa naupangin mak ti lutuk leh mit khap lek lova a lo thlir reng a hmuh chuan a hrilhhai ve deuh a, an inmelh ta ran mai. Chutih lai tak chuan in kawngkhar chu a rawn inhawng nawn leh sawk a. Nutling pakhat hi a rawn pen chhuak ve nghal a. 

"Lalnunsiam! Tunah i lo let nghal lo a nih chuan rawn let tawh ngai suh ang che! Vawikhatmah rawn haw tawh suh!" tiin chu tlangval chu a rawn vin zui hrep a. Mahse, a fapa a hauh lai mek chuan kawtlaia Mamawia lo ding ve reng chu a va hmu ve a, a awka vin tak chu a tawp nghal chat a.

Mamawia chuan in chhung buaina nge pawn lam thil pawh a ngaihtuah thei tawh lo. A hma zawna tlangval, thinrim taka ding chu a en vung vung a. Chu tlangval hmel leh a pianhmangah chuan thil hmuh hmaih theih rual loh a awm tlat. A theihnghilh theih miah loh hmel a ni. Mamawia chuan awih lo leh mak ti lutuk hian, "Ka pa..." a ti zawi sap a. 

Siama (Mamawia pa, tlangval lai) chuan chu naupang thusawi chu a hriatthiam loh em avangin a ner nawng a, "I a deuh a ni lo maw?" tih pahin a kal pel a, hmanhmawh takin a kalsan ta daih a. A pa, a hriat ṭhin patling tak leh puitling tak mai kha, tlangval luhlul leh thinrim hma tak a lo ni ṭhin reng mai tih a hmu chu Mamawia chuan mak a ti kher mai. 

Muangchangin a hawi phei a, kawngka bula nutling ding chu a han en leh a. A meng phar nghal awn awn mai. Chu nu chu a pi, a pa nu, Pi Rovi ngei mai kha a ni! Mahse, 2018-a a pi, tar chak lo leh sam var vek tawh, tiang hawla kal ṭhin nen kha chuan an inang lo hle. Tunah a hma a ding mek hi chu nu valai tak, la chak ṭhat hmel tak leh thinchhiat hmel em em a ni tlat thung.

Pi Rovi pawh chuan chu mipa naupang, school uniform danglam tak ha a, ramhuai hmu ang maia amah lo thlir tlawk tlawktu chu rum takin a melh let a. "Tunge i nih a? Engnge rawn tih i tum?" tiin nelawm loh tak hian a zawt khur khur a. Mamawia chuan chhan ngaihna a hre lo, a dang a ro vek a, thawk lak ngaihna pawh a hre lo. 

Mamawia ngawi reng chu Pi Rovi chuan a rinhlelh hmel zual sauh a, "Kal bo nghal rawh!" a ti vin ṭhat a, in chhungah lutin kawngka chu a khar leh ta hmak mai. Mamawia chu kawtlaiah chuan amah chauhvin a ding tlawk tlawk a. A hun tawn mek rapthlak zia chu a rawn inlar chiang telh telh mai. 

A pa chuan 'mi a' emaw tiin a kalsan a, a pi ngeiin a hnawt bo bawk a. He kum 1993-ah hian belh tur reng a hre lova, kalna tur dang a hre chuang lo. A school bag chu a siam ṭha a, beidawng lutukin leiah chuan a ṭhu hniam ta hnawk a. Mahse, chutih lai tak chuan kawngsir aṭang hian aw thum lam deuh hian, "Mamawi..." a rawn ti ta thut mai le! 

Mamawia chu a phu zawk a, a rawn hawi chhuak nghal dawrh a. A piah lawk thim tham laiah chuan patling ve tawh tak mai pakhat, kum 45-50 bawr vel awm ang hi a lo ding reng mai a. Chupa chuan Mamawia chu chik lutuk hian a lo melh kur a. Mamawia chuan he khawvel, a pian hma kum daihah hian a hming hria an awm ang tih a ring pha lo hrim hrim. 

Mak ti tak chung leh hlauthawng tak hian, "Tunge i nih? Engtin nge ka hming i hriat?" tiin a zawt let a. Mahse chu patling chuan a zawhna chu pakhat mah chhang lovin, "Min lo zui rawh." a ti tawi tak ringawt a, a inher a, thim zingah chuan a kal liam ta daih a. Mamawia pawh chuan tihngaihna dang a hriat loh avang leh, a hming hretu awmchhun a nih miau avangin, hrilhhai leh thlaphang tak chungin chupa chu a zui ve ta ringawt a.

****************************************************

(2018)

Aizawl khawpui chu chhum dum chhah takin a bawh luk a, khua a thim dawn lek lek tawh a. Ruah chu mal lian pui pui hian a rawn tla sur sur a, boruak chu a vawtin a uap churh mai a. An kawtlaiah chuan Pi Mahruaii chu nihliap pawh khum lovin a ding ngawi reng a, ruah chuan a nan huh zawr vek tawh a.

A sam aṭang te chuan tui a rawn far tluk tluk a, a thuamhnaw inbel te chu a taksaah a bet thlar tawh a. Mahse, chung ruah rawn sur leh khawvawt te chuan a taksaah engmah awmzia an nei tawh lo. A fapa Zuala a bo aṭang khan a thinlung chu a chawmawlh vek tawh a, thlarau nei tawh lo ang mai hian beidawng lutukin a melh ngai a melh tlawk tlawk ringawt mai a ni.

Chu beidawnna ruam thim taka tang mek a nupui chu, in chhung lam aṭangin Pu Muana chuan tukverh parda keu in a lo thlir reng a. A hmangaih em em, a nupuiin tiang em em a nasa a hrehawm a tuar lai leh mi a ang maia ruah sur hnuaia a ding tlawk tlawk mai hmuh chu hrehawm a ti takzet a ni. 

A nupui a khawngaihna leh a fapa a ngaihna inpawlh nuk chuan a mittui chu a rawn ko chhuak a, a biangah chuan a rawn luang thla ngiai ngiai a. Tukverh bul aṭang chuan muangchangin a kalsawn a, a khum bul pawhdawh (drawer) chu a han hawng a. Tah chuan thlalak hlui tawh tak, a rawng pawh da ṭan tawh hi a han la chhuak a. 

Chu thlalak chu kum 1993-a a ṭhianpa Hriatpuia, Saphai Leia a bo hmaa an tlangval laia an lak dunna a ni a. Hriatpuia a chan a, tunah a fapa a chan leh a, Saphai Lei in a hmangaih te a laksak zel chu mai chu a hrethiam thlawt lo a ni. Chu thlalak hlui chu dawhkanah a dah thla a, a bul lawka an chhungkaw thlalak lian tak intar chu a va pan hnai leh a. 

A nupui, Rini leh Zuala te hlim taka an nuih ho dar darna thlalak chu mittui tling piau in a thlir vawng vawng a. Zuala hmel hlim sang leh thlamuang tak chu a han en chiang bik a, a kut khur dar dar chuan a fapa hmel chu darthlalang chhanah chuan a han chul a, a insum zo tawh lo, a mittui chu a luang zawih zawih a, a ṭap chhuak ta hawm hawm a.

Chutih lai tak chuan, pawn lamah Rini chu a school bang a rawn haw ve chhat chhat a. A school uniform te chu ruahin a nan huh vek a, a sam aṭang te chuan tui a dir tluk tluk a. A bag sirah chuan nihliap a pai reng tih a lang chiang hle a, mahse a do lui a ni tih hriat takin zawi muangin a rawn pen lut a. 

A nau a ngaihna leh a inthiamlohna chuan a thinlung a hnawh tlat a, amah leh amah inhrem  nan ruah hi do lui a ni ber. Kawt zawl a rawn thlen chuan, a nu ruah do va lo ding ngawi reng  bulah chuan a ding ve ta chawt a. Pi Mahruaii pawh chu muangchangin a rawn hawi phei a, an nufa chu ruah sur hnuai ah chuan inbe miah lovin an inen vung vung a. 

Mahse engmah an sawi lo. Rini chuan a mit a la sawn a, a nu chu ngawi rengin a kalsan a, in chhungah chuan a lut ta daih a. Pi Mahruaii pawh chuan a be zui bik lova, a fapa lo haw hun beisei takin, a hawina ngai bawk chu a en leh a, a hma zawn chu a melh leh ta tlawk tlawk a. An chhungkuaah chuan chhe te mahin hlimna hmuh tur a awm tawh lo, an kehdarh vek tawh a ni ber mai.

***************************************************

(1993)

Thlasik khawvawt leh thim hnuaiah chuan Mamawia leh chu patling, a hmelhriat miah loh chu ngawi rengin an inzui zel a. Kum 1993 Aizawl khawpui chu ruahin a nan huh deuh hluam a, street light eng fiah lo tak hnuaiah chuan an pahnih hlimthla chu a rawn lang leh zeuh ṭhin. Mamawia chuan a hma lama patling pen hlawk hlawk chu um hlawp hlawp pahin, "Tunge i nih? Khawiah nge min hruai dawn?" tiin a zawt mawlh mawlh a. 

Mahse chu pa chuan hawi pawh rawn hawi let chuang lovin, aw thum leh zawi tak hian, "Min lo zui phawt mai rawh." a ti liam puat ringawt a. An kal thui zel a, chu veng kawtthler kawi vel leh tlang dung chu Mamawia chuan a han en chian chuan hriat chhuah a nei tial tial mai. 2018 lama an kal fo ṭhinna leh a hmuh fo ṭhin hmun a ni tih a hrechhuak thut a. 

Saphai Lei ramngaw lam ni lovin, an zirtirtu, Sir Sangzuala te in lam ngei mai chu an pan mek a ni tih a hriat chuan a phu deuh zawk a. Mahse he kum 1993-ah hian Sir Sangzuala chu a la awm dawn em ni? Tih ngaihtuahna nen chuan hlauhthawnna leh phurna inpawlh chungin chu patling hnung chu a zui ve zel a.

Rei vak lo hnuah chuan in pakhat kawtah hian an va ding ta a. Chu in chu Sir Sangzuala te in ngei mai kha a ni a, mahse 2018-a in lian leh changkang tak ni lovin, a hmunah chuan Assam-type in te fel et hi a lo ding thung a. Chu patling chu a ding chawt a, engmah sawi lovin in chhung aṭanga eng rawn chhuahna tukverh darthlalang chu a va kawk ta a. 

Mamawia chuan chu pa chu rinhlelh hmel takin a melh phawt a, chumi hnuah muangchangin tukverh lam chu a va pan hnai ta a. Tukverh aṭanga in chhung a va bih dek dek chuan, a thil hmuh avangin a lungphu chu a tawp lo chauh a ni. In chhungah chuan bulb eng vut hnuaiah hian a nau ang chiaha a lo en thin, a bialnu Rini nau ngei mai, beidawng taka a lo zawn mek Zuala chu a lo ṭhu reng mai le! 

A bulah chuan nula pakhat (Chhuangi) hi a lo ṭhu ve bawk a, hlim takin an lo titi mek hi a lo ni. Saphai Leia a bopui ngei mai, Zuala, him dam leh hlim taka a hmu leh thut chu Mamawia chuan mak a tiin a lawm lutuk chu a awmna hmun a theihnghilh ṭhelh a ni. Hlim lutuk avanga a inthunun zo lovin, "Zuala!" tiin a au hluai a, in chhung lam pan chuan tlan luh nghal a tum ta mai a. 

Mahse a pen hma hauhvin, tha chak lutuk mai hian a darah a rawn man thut a, hnung lamah chuan a pawt let ta nawk mai. Chu patling bawk chuan kal luih a lo phal lo chu niin. Mamawia chu a tang ve phat a, mahse chu pa chuan nghet taka chelh chung hian, "Ka thusawi hi ngun takin ngaithla rawh. Zuala saw he kum 1993-ah hian a awm ngei ngei a ngai a ni." tiin thutak lutuk hian a rawn ti chhuak hlawl mai a.

Mamawia chuan mak ti takin a melh a. Chu pa chuan sawi zawm lehin, "He hun ngeiah hian a seilen a ngai a, history hi a nih dan tur taka a kal a ngai. Hun hi thlak danglam tum eng ang mah ila, a ngai angin a kal zel dawn tho tho. Tih theih kan nei lo..." tiin a hrilhfiah a. Mahse Mamawia chuan heng thu 'time travel' leh 'history' tih vel hi pakhat mah a hrethiam lova, a hrethiam duh hek lo. 

A hriat awmchhun chu Zuala chhan chhuah chu a ni mai. "Ni lo! Zuala saw ka hruai haw dawn!" tiin a dar a chelhna chu a theh thla sawk a, kal leh mai a tum a. Chutah le, chu patling chu a rawn che thut a. Mamawia kawr awmah chuan na lutukin a rawn ṭham nawk a, leivutah chuan a theh tlu lo chauh a ni. 

A mitmeng chu beidawnna leh thinrimnain a rawn sen nghal ram a, theihpatawpa ring leh vin hian, "KA TUM LO BIKIN I RING EM NI?!" tiin a an khum ta nghek mai a. Mamawia chu a phu dawrh a. Chu patling chuan a kawr awma ṭham reng chung chuan, "TUNA I AWM DAN LEH KA AWM DAN HI, TUNA KAN AWM DAN MEK HI VAWI TAM TAK A THLENG NAWN TAWH ASIN! NANGMAH ANG CHIAH HIAN KA TUM VE FO THO ASIN!" tiin a han vin leh hrep a. 

Chu aw-ah chuan kum tam tak hrehawm tuarna, mahni inthiamlohna leh khawharna hlir a ri chhuak a ni. Mamawia chu hlauh avangin a khur hlawk hlawk a. He pa hian eng thu nge a sawi hi? Engtik laiin nge vawi tam tak a lo thlen nawn tawh? A mitah chuan mittui a rawn tling pam a, beidawng leh aw tham tiak hian, "Tu nge... tu nge i nih a?" a ti chhuak thei hram a.

Patling chuan muangchangin Mamawia kawr awm a ṭhamna chu a thlah ruai ruai a. A thawk lak a zawi a, a hmel thinrimna chu na tuarna thuk takin a rawn thlak nghal a. Mamawia mitah tak chuan enin, "Nangmah ka ni... Mamawi." a ti ta mai a! "Mahse kei chu kum 40 chuang ka ni tawh. Nangmah ka ni, Mamawi... nangmah ngei ka ni." a han ti zawm leh nghal a. Mamawia chuan sawi tur a hre lo, a hma zawna ding, a puitlin hnu ngei mai chu thlarau hmu ang maiin mak ti lutukin an tlawk tlawk ringawt mai.

********************************************

END OF EPISODE 4