VOID (A mizo horror science-fiction story) Written by : Aaron Malsawmdawngzuala Episode - 5 : The Paradox

VOID

(A mizo horror science-fiction story)

Written by : Aaron Malsawmdawngzuala

Episode - 5 : The Paradox

**********************************************

(2018)

Government High School class chhung chu a reh ṭhiap a. Chhun dar 11 a ri thuak tawh a, thlasik boruak vawt vur mai hnuaiah chuan Sir Sangzuala chuan blackboard-ah chalk-in Physics chungchang leh thil hrang hrang hming vel chu a ziak ri hrak hrak a. A thusawi chu a thutakin, naupang ho pawhin ngun deuhin an ngaithla ṭhap a. 

Kar hmasa lawka an school naupang pahnih, Zuala leh Mamawia an bo miau avangin class chhung boruak chu a hlimawm lohin a rit deuh ruih mai. "Theory of Relativity kan zir tawh aṭang khan," tiin Sir Sangzuala chuan class pum chu a han thlir kual a. "Hun (Time) hi kan sana in a kawh ang chiah hian a kal ngai lo tih kan hria. Entirnan, thil pakhat hi eng (light) kal chak zawng tluk deuh thawin tlan ta se, a tan chuan hun a kal muang ve tual tual dawn tihna a ni. Chu chu Science ṭawng chuan 'Time Dilation' kan ti a."

A hmel chu a thutak zual sauh a, a aw han then deuh kharh pah chuan, "A awmzia ber chu, hun hi a ding nghet tlat lova, kan chet dan leh kan awmna boruak a zirin a inher kualin a inthlep (fold) thei tihna a nih chu. Chuvangin, tun hun leh hun liam tawh hian inzawmna thuk tak a nei a ni." tiin thuk hmel takin a sawifiah a.

Chutih lai tak chuan bell a rawn ri ta ral ral a. Sir Sangzuala chuan a chalk ken lai chu dawhkanah a dah thla a, a kut beng fai thak thak pahin naupang ho chu a en a. "Aw le, vawiin atan chuan tah hian duhtawk rih phawt ang u. In hriat ṭheuh angin term exam a hnai tawh hle a, in thlahdah thiang miah lo ania. Physics-ah chuan tun thlaa kan zir zawh tak Thermodynamics leh Electromagnetism lam kha in rawn en uluk dawn nia. Science subject dang, Chemistry-a Organic compounds leh Biology-a Genetics ho pawh kha ngaihthlah miah suh u. Hun a tlem tawh a, ṭhahnem ngai takin lehkha zir rawh u." tiin a chah zui mawlh mawlh a.

Naupang ho chu an ri nghal mur mur a, an lehkhabu te khungin pawn lam pan chuan an chhuak ta sap sap a. Tualzawl a ni lum ai turin an chhuak zo ṭep tawh tihah chuan tlar hnung bera ṭhutthleng pakhat erawh a la ruak ve lo. Rini chu dawhkan bawhin a kun ngal a, a ṭhut ngaiin a la ṭhu ngawi reng a. 

A nau Zuala bo piah lamah, a bialpa Mamawia ngei pawh zawn chhuah tuma a luhna lamah a bo zui ve leh bawk si a, Rini chu a chau ngawih ngawih a, thildang a ngaihtuah thei mawlh lo. Sir Sangzuala chuan a lehkhabu leh register te a khung fel mawlh mawlh a. Dawhkan a chhuahsan tur chu Rini lo la ṭhu reng chu a va hmu a. 

Muangchangin Rini ṭhutna lam chu a va pan phei a, a bul a va thlen chuan zaidam tak hian, "Rini... tinge pawnah i chhuah harh ve loh a? Break a nih tawh hi?" a va ti dam thlap a. Rini chu muangchangin a rawn hawi chhuak a. Zan tam a mu ṭha tawh lo tih hriat takin a mit hnuai chu a val kalh a, a hmel a ngui hle bawk. 

Mahse, Sir Sangzuala a han melh danah chuan lungngaihna mai piah lamah, rinhlelhna leh zawhna lian tak a lang tel tlat. "Sir..." Rini chuan a ti zawi sap a. "Zuala bo zan khan, Saphai Lei-ah khan i awm ve ti raw?" a ti ta thut mai a. Sir Sangzuala chu a hmel a danglam miah lo na a, a pen sawn tur chu a ding khawng deuh lauh a. 

Rini chuan a mitah tak en ran chungin a sawi chhunzawm leh nghal a, "Chuan, khami zan khan Police Station-ah i lo awm bawk. Police ten thil min zawh fiah lai khan, tukverh aṭangin min rawn thlir reng lai kha ka hmu che a ni. Engvangin nge khang hmunah te khan i rawn lan ve ziah a? Ka nau bo chungchangah hian engnge thuruk i neih?" tiin fiah leh chiang takin a zawt ta fawk fawk mai a.

Sangzuala chu a ngawi vung vung a. A hmelah chuan a thuruk man chhuah hlauhna emaw, phawklekna emaw chhe te mah a lang lo. Zaidam leh thutak hmel tak hian, "Rini, i nau chunga thil thleng hi hrehawm ka ti ve lutuk ania. In zirtirtu ka ni a, chanchin ka lo hriat khan ka ngaihtuah che u a, ka rawn kal ve mai chauh a ni e. Thil dang engmah a awm lo." tiin tluangtlam takin a chhang a.

Engmah sawi zawm tawh lovin Sir Sangzuala chu a inher a, class aṭang chuan a chhuak ta nghal daih a. Rini chuan Sangzuala, kawngka a a pen chhuak lai chu a en zui vawng vawng a. A thusawi kha pakhat mah a awih lo; a chhan chu khami zan Saphai Lei-a a hmel landan leh Police Station tukverh aṭanga a rawn thlir laia a mitmengte kha, mi satliah ngaihtuahna mai mai a ni lo tih a hre chiang em a ni. Rinhlelhna lian tak nen chuan kawngkhar lam chu a melh tlawk tlawk a.

***********************************************

Aizawl khawpui daikil lamah chuan chhum a zing phui mup a, khua a dur khup bawk a. Inspector Miriami chuan a car chu Saphai Lei bulah chuan a tiding a. Officer Peka thupek bawhchhiain, he thuruk rapthlak tak leh zawn hmuh theih lohva school naupang pahnih an bona hmun hi amah chauhva chhui chhuah tumin a rukin a kal a ni. 

Ramngaw pik tak chhung a lut dawn chiah tihah a kekawr ipte a mi a phone chu a rawn ri ta ral ral a. A han phawrh chuan 'Officer Peka' tih a lo chuang kalh a, mahse vawiin atan chuan chhang lovin a 'silent' a, a ak ṭha leh ta hmak a. Saphai Lei ramngaw pik leh thim mup chhungah chuan muangchangin a pen lut ta a. 

Boruak chu a vawtin a uap churh a, thlasik thli vawt tak rawn tleh heuh heuh chuan hnim hnah te chu a chhem ri sap sap a. A kal thuk tial tial a, ramngaw chu a reh tual tual a. Chutih lai tak chuan, a tiril ah hlauhna mak tak hian a rawn ṭham ṭan a. A hnung lawkah hian tu emaw ni hian thawm dim takin a rawn zui ve zel ni maiin a hria a, a tukkhum sam te chu a ding sung sung thei hial a ni.

A tawpah chuan a insum thei tawh lo. Rang lutukin a kawng a a pai pistol chu a phawrh chhuak  a, inring leh hmanhmawh takin a hnunglam chu a hawi let nghal a. Mahse thingkung lian pui pui bak hmuh tur a awm lo. A pistol hmawr chuan thim tham lai chu a tin kual vel a, mahse ramsa thawm takngial pawh hriat tur a awm miah lo chu a mak a ti zual hle a ni.

Thaw huai chungin a pistol chu a la hum reng a, hmalam pan chuan a kal chhunzawm leh ta a. Mahse, pen sawm pawh a la pen hman lo tihah chuan boruak chu a rawn inthlak ta thut mai. Chhum uk khuih mai, chhah leh uap tak hi khawi aṭanga rawn kal nge tih pawh hriat loh hian leilung aṭang chuan a rawn zing chhuak ta chuai chuai a. 

Chu chhum uk chuan a tual vel leh thingkung bul te chu a rawn bawh khat nghal mup mup a. Hlauhthawnna nen a hnunglam chu a han en let leh a. Mak ti lutukin a ding khawng nghal at  mai. Saphai Lei a luh ṭanna lam kawng chu chu chhum uk khuih chuan a lo hliah bo vek tawh a, khawilam nge hawnna tur a hre thei tawh der lo mai. 

Rang takin a phone a phawrh chhuak a, mahse beisei lawk ang ngeiin signal 'bar' khat te mah a lo awm tawh lova, 'No Service' tih chauh hi a lo inziak kuau a. Chutih lai tak chuan, thawk leh khatah, a chung zawn thingkung lian pui pui zar aṭang chuan choak rual (crows) hi mak tak maiin an rawn thlawk chhuak ta sup sup mai a. 

Mangan hmel takin an rawn hram chuah chuah a, van pawh chu an hliah thim khuih thei hial a ni. Chu veleh lir a nghing ta emaw tih tur hian a rah lai lei chu a rawn nghing ta dawt dawt a, Miriami chu a inpal phei deuh nawk nawk a. Chu lei rawn nghing dawt dawt rual chuan, a hma atanga a la hriat ngai miah loh, khawl lian tak nung ri ang mai, ri thum leh rapthlak tak mai hi lei hnuai aṭang chuan a rawn ri chhuak ta rum rum mai a. 

Chu ri chu mihring thluak deng dawt dawt thei khawpa thum a ni. Chutah, a hma zawn chhum uk chhah mup kar aṭang chuan eng pawl (blue light) fiah lo ruai hi a rawn inlar ta vet vet a. Rinhlelhna leh hlauhna inpawlh chungin chu eng pawl chhuahna lam pan chuan a pistol nghet taka hum chungin a pen phei ta zel a.

Chu eng pawl a va pan hnaih zel chuan, a hma zawna chhum chhah tak chu mak tak maiin a rawn kiang ta duak a, chutah a hma zawnah chuan puk lian pui mai hi a va hmu ta hlawl mai a. A chhung chu a thim chhah mup a, mahse a tawp lamah chuan eng pawl chu a lang chiang telh telh thung. 

Miriami chuan a phone light chu a 'on' a, puk chhung thim mupah chuan chu eng pawl lam pan chuan muangchangin a lut ve ta a. Puk chhung zawl lai leh zau lai deuh a va thlen chuan, a thil va hmuh avang chuan a ding nghal chawt a. A hma zawnah chuan boruakah hian ball lian tak ang mai, eng pawl vet vet (VOID Orb) chu a lo intheh kual tup tup mai a. 

Chu eng pawl thiltihtheihna mak tak nei a en tlawk tlawk lai chuan, chu Orb sir lawkah chuan boruak aṭangin Sap putar hmel rapthlak leh cher dawk mai kha a rawn lang ta thut mai le! Chu putar hmel dâng leh bal tak mai chuan Miriami chu a mit khur thuk tak mai chuan a melh ta run run mai.

*******************************************************

1993

Mamawia kum 2018 aṭanga 1993-a a let leh hnu aṭangin ni 5 lai a lo liam ve ta reng mai. Chu hun reilote chhung pawh chu a tan chuan kum tam tak liam tawh ang mai hian a rei a. He hunah hian hriat leh belh tur pakhat mah a neih loh avangin, thlarau ang maia inlar ṭhin, a puitling tawh hnu (Older Mamawia) bulah chuan a khawsa ve ta ringawt a. 

Puitling Mamawia chu hmun pilril em em mai, Tlangnuam veng mawng lamah huan kal kawng chhe te a chhuk thlaknaah, thing leh rangva hlui hmanga sak Assam-type in te reuhte ah hian tlangval hmelhriat loh angin a lo cheng ṭhin a lo ni. Chumi ni chhunah chuan an in te reuhte chhung thim deuh khupah chuan an pahnihin chaw an ei dun mek a. 

Sawi tur a vangin, an ngawi dun vang vang a. Thlasik thli vawt takin rangva chung a chhem rik leh zeuh ṭhin bak thawm dang hriat tur a awm lo. Rawlthar Mamawia chuan a hma zawna patling ngawi renga chaw bar mawlh mawlh chu a en zeuh zeuh a; a hmelah amah a inhmu a, a chezia leh a thawk lak dan thlengin amah ngei chu a ni tih a inhria, mahse a thluak chuan a puitlin tawh hnu, kum 40 pel tawh hmel chu amah a ni tak tak em tih a la ring ngam chiah lo a ni.

A tawpah chuan rawlthar Mamawia chuan boruak uap lutuk chu tuar thei lovin a aw a han thian kharh a. "Engtin nge kan awm zel dawn?" tiin beidawng aw lek lek hian a rawn ṭawng chhuak a. "Nitin min awmpui a, khawiah mah chhuah i phal bawk si lo. Zawhna ka zawh lah che in 'nghak phawt rawh' i ti zel bawk sia.." tiin a han zawh zawm zat a.

Puitling Mamawia chuan a chhang lo, chaw chu a bar zawm mawlh mawlh a. Rawlthar Mamawia chuan dawhtheihna a tlakchham ṭan tawh em avangin, "Khami zan tukverh aṭanga kan va bih laia Zuala bula mi nula kha tunge a nih reng reng a? Engnge tihtur kan la nghah char char hi?" tiin a zawt nawn leh ngat a.

Chutah Puitling Mamawia chu a thaw chhuak hawk a, a ṭhutna aṭang chuan a tho chhuak ta a. A kham nghal daih a a thleng chawiin tui herh hawnna (tap) lamah chuan a va phei a. A kut sil pah chuan beidawn hmel leh nuihzat hmel inpawlh deuh hian, "Zuala saw tun thleng hian tunge a nih i la ring thiam lo amaw?" a rawn ti chhuak a. 

A lu a thing nar nar a, "Ti em em hian ka tleirawl lai khan ka lo mawl bik lo asin le..." tiin amah leh amah chu a insawisel zui nuah nuah a. A kut a hruk hul mawlh mawlh hnu chuan rawlthar Mamawia ṭhutna lam chu a rawn pan phei a, dawhkan chu rawn bawh deuhin a mitah tak chuan a han melh a. 

"Tu in emaw tak chuan he hun (time) hi a control a ni... ngaithla teh Mamawi, tuna mak i tih ang chiah hian kum 25 liam ta, i kum rual ka nih lai khan mak ka ti ve tho alawm." a ti ta mai a . A hmelah chuan kum tam tak hrehawm tuarna leh rinhlelhna hlir a lang chhuak a. Puitling Mamawia bawk chuan thutak fe hian a sawi zawm a, "He thil inkual chhuak (loop) rapthlak lutuk tih tawp dan hi ka zawng nasa tawh lutuk, ka theih tawp ka chhuah tawh. Mahse, tihian a thleng nawn zel tho chu a nih hi. Sangzuala chuan he thil hi tih tawp loh a duh a, mahse keichuan engpawh thleng dawn se tihtawp ngei ka duh a ni." a han ti leh a.

Rawlthar Mamawia chuan a thusawi awmzia chu a hrethiam lo kher mai, a thluak a buai nuai a. "Tunge Sangzuala chu?" tiin phawk deuh hian a lo zawt hu a. Puitling Mamawia chu a ding ngil a, inkuangkuah hlun chung hian thutak lutuk leh fiah fuk hian, "Zuala, Rini nau ngei kha... kum 2018-a in Physics Sir, kan Physics teacher Sir Sangzuala ngei kha a ni." a ti ta mai le!

Rawlthar Mamawia chu a phu dawrh a, a mak ti lutuk chu a meng phar ta awn awn mai. An zirtirtu zahawm tak leh fel tak, Sir Sangzuala kha a bialnu nau, Zuala a lo ni reng a ni tih a hriat chuan a ka hau mai a. "A nih chuan..." tiin a chil a lem dawk a, a aw chu a tham ta ṭiak a, "Khami zana a bula nula kha... Pi... Pi Chhuangi tihna em ni?" a ti chhuak thei hram a.  Puitling Mamawia chuan a lu a lo bu nghat a. Rawlthar Mamawia chuan a hmaa chaw chu ei zawm nachang pawh a hre tawh lo, a thluak chu a buaiin a mak ti lutuk chu a hawi a hu ringawt mai a ni.

****************************************************

Puk thim leh uap churh chhungah chuan eng pawl (VOID) chu a de vet vet a. Chu eng hnuaiah chuan Sap putar, hmel dâng bal leh cher dawk mai chuan Inspector Miriami chu a kal hual  chhat chhat a. Miriami chu a din ngaiin a ding khawng lah a, a mita hlauhna thup hram hram chungin chu putar chezia chu a mit sir chuan a lo vil ru kar a.

Sap putar chu a nui deuh sawng a, a mitmeng a dur khuih bawk. "Nimin chu naktuk a ni a, naktuk chu nimin a ni..." tiin Sap putar chu a phun chhuak sup sup a. A aw chu a thumin a khawk rum rum a. "Hun hi ngil taka kal emaw in ti a, mahse thil inkual kawi ngut ngut reng a ni zawk. A tir chu a tawpna a ni a, a tawpna chu a tir a ni. Kan piang a, kan thi a, kan piang leh a... chu chu dan theih rual lohin a thleng nawn mawlh mawlh a ni. He 'Ruak' (Void) hian hun a ei ral a, keini chu a chhunga lung in tang mai kan ni." tiin aw khur deuh hlek, mahse fiah si hian a phun zui mawlh mawlh a.

Chutah le, Sap putar chuan a kawr fual hlui tawh tak ipte aṭang chuan thil eng emaw hi a rawn phawrh chhuak thut a. Remote control rawng dum, hmehna (button) sen chuang hi a lo ni a, hmeh tumin a kutzungpui a han tin nghal uaih a. Mahse, chumi rual chiah chuan Miriami chu a che phut a, a kawnga a pai pistol chu rang lutukin a phawrh chhuak a, chu putar hmaiah tak chuan a tin ta siah mai. 

"Han hmet vaih teh, i thluak kha he puk bangah hian ka kap darh nghal a ni mai!" tiin a aw ki sang leh fiah tak chuan a vau ta khar khar mai. Sap putar chu a ding chawt a, a kutzungpui pawh chu a tawp nghal chat a. Miriami mitmenga thutakna leh a silai hmawr vawt tak chu a han en a, a hmet ngam ta bik lo. 

Muangchangin a ban pahnih chu a phar chhuak ta hluai a. Mahse hlau hmel reng a pu lova, a nui hmel tihbaiawm tak kha a la pu reng tho. "A nih tur ang a ni dawn tho tho, Inspector." Sap putar chuan a ti thum chhal a. "Min dan tum duh suh... hun (time) hi keini mihringte thunun leh control theih a ni lo. I lo thlen hma pawh khan a inkual tawh a, tunah pawh hian i dan theih rual lohin a kal mek a ni. A nih tur ang chu a ni dawn tho tho." tiin a sawi leh a.

Miriami chuan silai in a la tin ngar ngar a, "Kha remote kha chhuatah dah rawh. Muangchangin aw... thil dang tih i tum a nih chuan ka kap nghal ang che." a ti han chang fak a. Putar pawh chuan a thu chu zawmin, muangchangin a kun a, chhuatah chuan remote chu a dah ta a. "Tunah ka lamah rawn chhir phei rawh.." Miriami'n a tih leh chuan, putar chuan a ke in a rawn chhir phei ve leh nghal mai bawk a.

Miriami chuan a pistol a putar chu tin reng chungin chhuata remote chu a chhar a, a ipteah a ak ṭha nghal hmiah a. "Sawi rawh le, khawi aṭanga lo chhuak nge i nih? Engtin nge he puk pilril leh thim lutuk chhungah hian i awm theih? Tunge i nih reng reng?" tiin a zawt ta fawk fawk a. Sap putar chuan a ban a la phar reng chung chuan thawk a han la kawk a. "Kum tam tak... ka hre seng tawh lo, kum tam tak chu he puk chhungah hian ka awm tawh a ni." a ti a. 

Chutah a hnunglama eng pawl de vet vet chu a va melh a, "Kei hi 'VOID Keeper' ka ni. He thil pawl mum lian tak vengtu hi ka ni e." tiin a chhang a. Miriami chuan chu 'VOID' an tih eng pawl, boruaka lo intheh kual tup tup chu a en vang vang a, mak a tiin hetiang thil hi khawvelah a awm thei ang tih a ring ngai lo. 

"Engnge a nih chiah a?" tiin thawk pawh thaw ṭha ngam lo chuan a zawt leh a. Putar chu a rawn hawi let a, a ban a la thla in, "Min rawn zui rawh, ka hmuhtir ang che." a ti a, puk thuk lam pan chuan a pen phei nghal a. Miriami chuan fimkhur leh inring ru takin a silai keng reng chung chuan a hnungah chuan a zui ve zel a.

Puk chhung thim leh thuk takah chuan an kal zel a, a tawpah chuan bang hrul khuar deuh laiah hian thir hlanga siam kawngka lian leh thukru tak, tuiek in a ei ruam tawh hi a lo awm a. Sap putar chuan kawngka chu nemsawnin a hawng ri ruah ruah a. A chhung an han lut chu Miriami chuan mak a ti lutuk a, a ding khawng nghal awt mai! 

Chu pindan chhungah chuan khawl (machine) lian rapthlak tak mai hi a lo awm a, a lo nung ri vung vung bawk a. Chu mai a ni lo, a bul hnai velah chuan 'ration'—buhfai, dal, tui leh ei tur chi hrang hrang, mihring pakhatah pawh kum 50 chuang daih tur hi a lo inhung thluah bawk a. He puk chhung thim mup hnuaiah hetiang khawl ropui leh eitur tam lutuk a lo awm hi awih harsa a tiin, mak ti tak chuan a hawi kual ruai a. 

Chutih lai tak, a ngaihtuahna lak pena a awm lai tak chuan a hnunglam aṭang hian thil rit tak hian a tukkhumah tak a rawn chhu ta chawrh mai le. Miriami chu a hai chuai a, engmah a hre zui lova, chhuatah chuan nikhawhrelovin a tlu let nghal der a. Sap putar chuan a kuta tuboh rit tak a ken chu a thlek a. 

Nikhawhrelova let reng Miriami taksa chu enin a nui ta sak mai, "Tun ṭum chu a tawp tawh ngei ngei ang...keimah ngei hian ka ti tawp dawn a ni." tiin a phun zawi sap a. Chutah, a hmel chu a rawn rapthlak chho tial tial a, "Subject ka hmu ta... a danglam dawn," tiin khawl lian pui ri vung vung chu beng thak thak chung chuan a nui ta vak vak a.

***************************************************

Khua a tlai ruih tawh a, ni tla tur eng phut chuan kawtthler a chhun mawi hle na a, Pu Muana te in chhung erawh nidang ang bawkin a reh leh tlawk tlawk mai. An fapa neihchhun Zuala a bo aṭang khan an hmelah hlim hmel a lang tawh ngai lova, an sitting room-ah chuan Pu Muana leh Pi Mahruaii te nupa chu beidawn hmel takin an ṭhu ngawi dun reng a. 

An in chhung boruak chu lungngaihna thuk takin a tuam hlup reng mai a ni. "Bawiha chu khawiah tak nge a awm ang aw... a thi nge a dam tih tal hriat a chakawm thin ngawt mai." tiin  Pi Mahruaii chuan a mittui rawn hnam chu a kawr ban hmawrah chuan a hru zeuh a. Pu Muana chu beidawn hmel tak hian a han thaw chhuak hawk a, "Pathian hnenah a himna tura kan dil thin bak chu tih theih dang kan nei rih si lo a nih hi. Police ho lah hian hma an sawn chak mawh khawp mai bawk si a.." a lo ti ve nuah nuah bawk a.

Chutih lai chuan, pindan lehlamah Rini chu a lehkha zirna dawhkan bawhin lehkha a lo zir mek a. A hmaa lehkhabu chu inkeu reng mah se, a thluakah chuan a thu inziak te chu a lut thei meuh lo. Vawiin lama Sir Sangzuala a rinhlelhna te, a nau bo dan mak tak leh Mamawia a hnu lawka a bo ve ta mai te chu a ngaihtuah kual neuh neuh a, a thaw a pik takzet a ni.

Chutih lai tak chuan pawn lam kawngkhar chu thawm dim vak lo hian a rawn inkik ta kauh kauh mai. Pu Muana te nupa chu an phu deuh zawk a. Pu Muana chu hmanhmawh takin a tho chhuak a, kawngkhar lam pan chuan a kal nghal a, Pi Mahruaii pawh chuan a hnungah a lo zui ve bawk a.

Kawngka a han pawt hawng chu, pawnah chuan Officer Peka hi police uniform ha in a lo ding reng mai a. A hmel chu a thutakin a hlauhthawn hmel em em lehnghal a. "Pu Muan, in lo dam maw? Inspector Miriami he lamah a rawn kal mial em?" tiin inthlahrun hmel tak leh chhanna beisei tak si hian a rawn zawt phawng mai.

Pu Muana te nupa chu mak ti takin an inen hu a, "Kal miah lo mai... vawiin phei chu kan inah tu mah an rawn la leng lut lo reng reng." tiin Pu Muana chuan a chhang a. Chutih lai tak chuan, pawn lam thawm hriain Rini pawh a room aṭang chuan a rawn chhuak ve chiah a. "Officer, engnge awmzia ni ta? Thil dik lo a awm em ni?" tiin Pi Mahruaii chuan hlauthawng ru tak hian a lo zawt ve bawk a.

Officer Peka chuan Rini te chhungkua chu a han melh kual a, beidawn hmel tak hian a thaw chhuak hawk a, "Vawiin chhun aṭang khan Inspector Miriami chin hi hriat zui tur a awm miah lo mai a. A phone lah call tlang theih a ni lova, 'out of network area' a inti char char bawk si. Zuala thubuai hi chhuiin a rawn kal mial ka ring a nia... a kalna chin tur awm ang reng reng kan hre tawh lo." a ti ta mai a. Chu thu a hriat rual rual chuan Rini hlauhna chu a rawn thar leh zual a, Zuala leh Mamawia bakah he thuruk chhui mektu ngei, Inspector Miriami pawh chu a bo ve leh ta.

********************************************

1993

Zan dar 7 leh a chanve a pel awrh a, dar 7:45 vel a ni tawh. Aizawl khawpui kawtthlerah chuan mi veivak an la tam thawkhat hle a, dawr ṭhenkhat inhawng aṭanga light eng chhuak ruih chuan kawngpui chu fiah lo deuh hian a  chhun eng ve chang chang a. Muana, tlangval la valai tak mai chu dawr aṭanga meizial lei haw in an in lam pan chuan a kal mek a. 

Boruak vawt tak karah chuan a meizial zuk khu chu a han phuh chhuak phei hlat hlat a. A rilru ah chuan thil tam tak a ngaihtuah a, a bikin Saphai Lei ramngaw-a a ṭhianpa Hriatpuia bo dan  mak tak mai khan a la kam run reng a ni. Chutih lai tak chuan, kawng kawi aṭang hian hmeichhe pakhat leh mipa naupang pakhat rawn kal phei hi a va tawk thut a. 

Chu mipa naupang chu Zuala a ni a, a bula a kal pui chu Chhuangi a ni thung. Zuala chuan kawngsira tlangval meizial zu mek, Muana chu a rawn hmu ve lova, hmalam panin an nufa chuan an kal pel hmak a. Mahse Muana chu a pen lai a ding nghal chawt mai! A meizial pak khu hlat hlat lai pawh chu a tawp chat a, chu naupang kal liam tur hnunglam chu phawk lutuk hian a thlir zui tlawk tlawk a. 

A mitvai a ni lo, a hmu sual bawk hek lo, chu naupang ngei chu a ni, Saphai Lei ramngaw-a a ṭhianpa Hriatpuia a bo ni taka lo awm ve ngei kha a ni tih chiang takin a hria. Rang lutukin a meizial zuk lai chu leiah a paih thla a, a chhir hlum nghal nawk nawk a. Thawm dim tak leh an hriat loh tur hian Chhuangi leh Zuala te inkai kal mek chu a zui ru ta nghal a. 

Kawtthler light eng fiah lo ruai karah chuan a lang lo chin aṭangin a theih ang angin a biru in a  zui ve zel a. An hnunga a zui zel lai chuan, naupang kai tu hmeichhia chu tunge a nih a hre chhuak ta thut a. Chu nu chu an veng hla deuh taka awm ṭhin, 'U Chhuangi' a ni tih a hria. Mahse, engtik laiin nge U Chhuangi hian mipa naupang fa atan a lo lak tih reng a hre lo. 

Nula senior, amah chauhva in luah ṭhin emaw a lo ti char char thin a. He hun rapthlak takah hian, tu mihring mahin an ngaihtuah chhuah thiam rual loh thil mak a inphum ru tih Muana hian a hre der si lo. A hma lawka mipa naupang, a zui ruk mek leh a rinhlelh em em hi, kum 25 a liam hunah chuan a fapa a ni dawn tih leh, a nupui Mahruaii nena an fapa neihchhun a la ni dawn tih hi a mumangah pawh a la mang phak lo hial ang. 

Hun inkual chhuak (loop) hian Muana chu a fiam kual vel mek chu a ni si a. Muana chuan a zui zel a, a tawpah chuan Chhuangi in luah, Assam-type in te reuhte kawt chu an thleng ta a. Electric ban phen thim lai aṭang chuan Muana chuan a bihthla reng a, Chhuangi chuan tala hawngin, Zuala nen chuan in chhungah an lut a, kawngka an khar zui nghal hmak a.

In chhung light a rawn en rual chuan Muana chu electric ban ngheng chuan a ding ngawi reng a. A kut kuangkuahin a han phun nuah nuah a, "U Chhuangi hi nula senior emaw ka tia, fa a lo nei reng em maw ni le?" a ti zawi sup a. Chu naupang, Zuala chuan a ṭhianpa Hriatpuia bo chungchangah khan eng emaw tak hriat a neih a ring tlat a ni. Mahse, zanin atan chuan engmah ti zui lem lo chuan a thil hmuh mak tak chu ngaihtuah zuiin, thlasik khaw vawt hnuaiah chuan an in lam panin a let ve leh ta a.

*************************************

Miriami chu muangchangin a rawn harh chhuak a, a tukkhum tuboha vuakna avang chuan a thluak chu a la bing mup mup a. A mit a han meng kawk a, a piah lawka khawl lian pui ri vung vung leh eng pawl de vet vet a hmuh rual chuan, puk chhung thuk taka awm bunker hlui takah khan a la awm reng tih a hre chhuak nghal a.

Chet a han tum a, mahse a theih miah loh avang chuan phawk lutukin a hawi kual nghal ruai a. Thir thutleng lian leh rit tak, misual thihna tura an hman ṭhin 'electric chair' ang takah hian lo ṭhuttir niin, a kut leh a ke te chu savawm hrui chhah tak tak hian nghet takin a lo inphuar bet tlat mai a lo ni.

A taksa a han en thla chu a phu zawk mai. A uniform kawr chu lo in-phelh deuhin, a taksa leh a banah te chuan khawl hrui (wires) leh darthlalang dawt (tubes) te hi a lo invuah kual nuk mai  a. Chu mai a ni lo, a luah chuan thir helmet rit tak, a chhunga eng pawl de sêr sêr awm hi vuah tlat a lo ni bawk a. Chu helmet aṭang chuan khawl lian pui lamah chuan hrui lian pui pui a  inzawm phei ruah bawk.

Thim chin aṭang chuan Sap putar, hmel dâng bal leh cher dawk mai kha nui hmel rapthlak tak pu chung hian a rawn pen chhuak ta chhat chhat a. Miriami chu mitkhur thuk tak chuan rawn melhin, "I lo harh ta maw, ka Subject duh tak? He hun hi a ni kum tam tak ka lo nghah tawh chu." a rawn ti thum ta chhal a.

Miriami hlauhna chu a so sang ta hle mai. A theih patawpin chu thutleng aṭang chuan tal chhuah a han tum a, a banrek te chu a sen ṭawlh ṭawlh hial a. "Eng thil nge tih i tum? Min chhuah nghal rawh! Engtin nge min tih i tum?" tiin mangang takin a au vak vak a, mahse chu putar erawh chu a nui hmel a la reh chuang lo.

Sap putar chuan khawl lian pui lam chu a pan a, control panel-a switch hrang hrang chu khawih kual pahin a plan chu a hrilhfiah ta a. "Hlau suh, Inspector. He hun inkual chhuak (time loop) rapthlak tak, Zuala, Mamawia leh kan vaia min phuar bet tu hi tih tawp a hun tawh a ni. Hun hi a inkual kawi nuaih tawh a, siamṭhat a ngai a ni." tiin thawk a han la leh te te a.

"Chumi siamṭha tur chuan mind (thluak) chak tak, he tek (energy) hi lo dawngsawng thei tu tur 'Subject' ka mamawh a ni. Nangmah hi a ni chu thil ti thei tur chu. He i thluak hmang hian he loop hi kan pawt chat anga, hun hi a pangngaiin a kal leh tawh ang." tiin putar chuan thutak em em hian a rawn ti leh a.

Miriami'n a chhan leh hma chiah chuan putar chuan a hma zawna thir fawng (lever) lian pui mai chu a pawt thla ta pawp mai le! Khawl lian pui chu a rawn ri ta vung vung a, Miriami ṭhutna chu a rawn nghing ta dawt dawt a. Thir thutleng leh a taksa inzawmna hrui aṭang te chuan tek (electricity) pawl hi a rawn de ta chuai chuai mai a, helmet aṭang chuan a thluak chu a rawn deng dawt dawt a.

Chutih lai tak chuan, Saphai Lei ramngaw pawn lam boruak pawh chu a rawn inthlak thut a. Van boruak chu a rawn dur khup a, kawl a rawn phe ta zuai zuai mai a. Khawpui chu tlang chim tur ang maiin rapthlak lutukin a rawn ri ta dur dur mai! Puk chhungah chuan Miriami chu na ti lutukin a tal vak vak a, a phuarna chu tal chah tumin a theihpatawpin a au tuar tuar a, a taksa chu eng pawl nasa lutuk chuan a rawn tuam ta hlup hlup a.

Current tek chuai chuai karah chuan thawk leh khatah, Miriami taksa chu boruakah a ral ta thut mai le! A bo ta hmak mai! Thutleng chu a ruak huai a, a khu deuh hlat hlat chauh a ni. Sap putar chuan thutleng ruak chu a thlir tlawk tlawk a, chutah a kut pahnih phar chhuakin puk chhung khawk rum rum khawpin a rawn nui chhuak ta hawk hawk a. "Ka thei e! Ka thei ta! Ka ti dik e!" tiin a nui uar uar a, a aw rapthlak tak chu puk thimah chuan a khawk zui ta tlawk tlawk a.

******************************************************

END OF EPISODE 5