VOID (A mizo horror science-fiction story) Written by : Aaron Malsawmdawngzuala Episode - 2 : The Mirror Of Time

VOID

(A mizo horror science-fiction story)

Written by : Aaron Malsawmdawngzuala

Episode - 2 : The Mirror Of Time

**********************************************

(2 hours later)

Zan thim chhah tak chuan Saphai Lei hlui tak leh a chhehvel ramngaw chu a tuam hlup mai a. Mahse, chu hmun reh leh uap churh thin chu tunah chuan a reh tawh lo. Lei bul leh motor kawngpuiah chuan Police motor engemaw zat a in tlar thup a, an motor chung atanga 'red and blue' light rawn phe zawk zawk chuan chu ramngaw thim tak chu a chhun eng det det a.

Boruak chu a vawt in thlasik thli chu a la tleh heuh heuh a, mahse nichin lawka khawpui ri hum hum erawh kha chu a reh hmak tawh thung. Police rual tam tak chuan an torchlight lian pui pui te chu kengin Saphai Lei chhuat hlui tawh tak leh a sir ramngaw thim zingah te chuan Zuala chu an zawng mek a. 

Lei hnuaia kham ko sang tak, lui tui luang ri hum hum leh thing lian tak tak bul te chu ngun takin an bih kual viau nag a, mipa naupang hlimthla reng reng hmuh tur a awm lo. Lei piah deuh, thir ban lian pui phen a motor kawngpui sirah chuan Rini leh Mamawia chu hlau leh thlaphang takin an lo thu dun a. 

Rini chu a tap bang hlei thei lo, a nau bag kha a awmah a la pawm tlat a. An bul ah chuan Police constable pakhat hian a lo vil ran bawk a, chanchin kimchang zawh zui theih pawh an la ni lo, an thil tawn khan a la barakhaih dun em a ni. Chutih lai mek chuan, khawpui chhung lam atang chuan motor pakhat hi chak mangkheng hian a rawn tlan phei a, police motor piah deuhah chuan a rawn ding dawt a. Kawngkhar a rawn inhawng a, a chhung atang chuan Pu Muana leh Pi Mahruaii chu hlauthawng hmel lutuk hian an rawn tlan chhuak nghal rawk rawk a. 

A nu a hmuh rual rual chuan Rini chu a ding chhuak zawk a, tap chungin anu lam pan chuan a tlan phei nghal a. "Nu... Nu, Zuala a awm lo... Zuala a bo daih..." tiin a nu awmah chuan a va bei nghal thlawp a. Pi Mahruaii pawh chuan lo kuah let ve in an tap dun hawm hawm a. Pu Muana erawh chu ding khawmuang lovin Saphai Lei lam pan chuan a tlan phei nghal vut a.

 Kum 1993-a a thianpa a chan tawhna hmun ngei mai a, a fapa ngei a bo ve ta mai chu a tuar thei thlawt lo a ni. "Zuala! Bawiha, i pa a lo kal a nia!" tiin a aw rawl tawp chuan a au tuarh tuarh a. Mahse Police constable pathum ngawt mai hian an lo man bet nghal a, "Pu Muan,  inbengdai rawh, a him lo a nia, keimanin kan zawng mek alawm." tiin an lo dang tang tang a.

Pu Muana chu patling chak tha tih takah tal chhuah tumin a tang nasa kher mai. "Min thlah rawh u! Ka fapa, Zuala..Bawiha???" tiin beidawng leh mangang takin a au chiam mai a. Chutia  an lo inbuan laih laih lai chuan an hnung lawkah motor dang pakhat a rawn thleng ve leh chiah a. 

Kawngkhar a rawn inhawng a, a chhung atang chuan Sir Sangzuala chu a rawn pen chhuak ta hlawl mai. Rini chuan a lo hmu nghal vat a, zan laiah, a bik takin hetiang hmunah lehzel an Science zirtirtu a rawn lang hlawl chu mak a tiin a en vung vung a. Mahse Sir Sangzuala chuan Rini chu a rawn melh let ve miah lo. 

Pu Muana te in-nam buaina lam chu a pan ding nghal a, Police ho kara Pu Muana tal buai vel mek chu va pan hnaiin, a darah chuan a va vuan a, eng thuruk emaw thuk tak hria ang hrim hian inrintawk hmel takin a rawn man bet a. Pu Muana pawh chu a inbeng dai ve deuh va, Zuala erawh hmuh tur a awm ta chuang lo a ni.

***************************************************

Zuala chu a lu a na ngut ngut a, a rawn meng riai riai a. Khua chu a lo eng uar tawh a, nichin lawka thlasik thli vawt tak leh chhum chhah let but but te, khawpui leh t(r)ek ri hum hum te kha hriat tur a awm tawh lo. Ni sa tak mai chuan a hmaiah a rawn chhun a, boruak chu a lum nuam tawk vel chiah a ni.

Muangchangin a thu chhuak a, a mit a nuai a. A awmna hmun a han en chuan Saphai Lei chhuatah ngei chuan a lo la mu reng a. Mahse, mak a tih em em chu, a hriat thin leh a hmuh fo  thin, chu lei hlui tawh tak leh thir ban tuiek nasa tawh tak te kha a lo thar in a lo la tle tha em em mai a, a chhuat te pawh chu a la nghet in, hnim leh hruizam ten an la bawh buai miah lo.

"U Rin? U Mamawi?" tiin a theih tawp a ringin a han au vak vak a. Mahse chhanna a hmu lo, a  bul vel a han en kual a, a school bag kha hmuh tur a awm ta miah lo. Hlauhna chuan a rawn tuam thar leh a, tah chhuak insum teuh chungin a dinna ngaiah chuan a ding khur dar dar a. A school uniform kekawr a bal kai te chu a han beng fai thawk thawk a, hawi kualin ramngaw te chu a han thlir a. 

A landan chu a ngai reng na in, thil dik lo riau awm hian a hre tlat a. Thingkung te chu a hma aiin an la lian lo deuh hian a hria a, boruak pawh chu tlai lam ni lovin, chhun pachang lai a ni tih a hre thei a ni. Zuala chu a tap tep tawh a, a u Rini hming lamin a pen sawn chiah tih ah chuan, lei sir lehlam, ramngaw thengthaw deuh lai atang chuan tlangval nui hawk hawk thawm a hre ta tlat mai. 

Lungkham nei lo tih hriat tak hian an nui uar uar a. Zuala chu a ding chawt a, a bul lawka thir ban lian pui phenah chuan a biru nghal a. Thawm dim thei ang ber hian a va bihthla ta dek dek a. Tlangval pahnih hi an lo kal phei mek a, mak a tih deuh chu an inchei dan a ni. Tunlai rawlthar te inchei dan ang lo tak, kekawr tlawn (high-waisted) hlui tawh hmel deuh leh kamis lian hnek hnawk ha. hlim taka thla lo la dun mek hi a hmu a. 

Pakhat zawk chuan analog camera, film hman ngai chi hlui tawh tak hi a keng bawk a, "Hriatpui, kha lai atang khan han la leh teh, a piah tlang saw lang tel thei se a nalh dawn tlat." tiin a hma a ding tlangval chu a rawn au lung lung a. Zuala chuan chu aw chu a hriat hnu a ang a ti in, a beng a verh zar mai.

Camera keng tu zawk chuan nui vur vur chung hian, "Aw le, Muana, lo in-pose rawh aw, i nuih khan i hmeltha chuang miah lo a nia." tiin a fiam let ve bawrh bawrh a. "Muana" leh "Hriatpuia"... chung hming te chu Zuala bengah chuan a ri nawn tluk tluk a. A pa hming chu Pu Muana a ni a, a pa thianpa, he Saphai Leia bo ta hming, a pa in a sawi thin kha a hming chu  'Hriatpuia' a ni bawk tih a hrechhuak nghal zawk a.

Camera in a tin mek tlangval zawk chu hma lamah a rawn hawi phei a, Zuala chuan a hmel chu chiang takin a va hmu ta! A phu nasa lutuk chu a thawk a tawp dawn hialin a hria. A mit a nuai nawk nawk a, a han en nawn leh ngat a. Chu tlangval chu tu dang a ni lo—a pa, Pu Muana, a tlangval lai ngei mai chu a lo ni! 

*************************************

(Back to 2018)

Kum 2018 zan boruak thim tak hnuain ah chuan Mamawia te in lian leh ropui tak chhung chu a reh thuap a. Mamawia chu a khum tlangah thu in a kun ngul a, a hmel chu a ngui bar a. A bul ah chuan a nu, Pi Estheri chu thu in a fapa chu a hnem mawlh mawlh a, "Bawiha, i thiam loh a awm miah lo a nia. Thil thleng palh liau liau a nih kha, hlauthawng suh, Zuala chu police ten an zawng hmu leh em em ang," tiin a fapa hnungzang chu a chul heuh heuh a. 

Chutih lai tak chuan pindan kawngkhar chu a rawn inhawng rawp a, a pa, Pu Siama chu thinrim hmel tak hian a rawn lut a. A hmel dur khup leh a mitmeng sen rum mai atang chuan a lungawi loh zia a lang chiang hle. A fapa hmaah tak chuan va dingin, "Saphai Leiah chuan engti turin nge in kal hrim hrim a?" tiin a rawn vin nghal chhur chhur a.

Mamawia chu muang chang hian a rawn hawi chhuak a, aw khur dar dar chung hian, "Kan... kan kal mai mai... thla la turin kan kal." a ti tham tiak a. A aia vin hian Pu Siama chuan, "Kal mai mai a? Khaw thim dawn ruai tawh ah, khulai hmun pilril leh tlawh pawh mumal lohna ah khuan eng vanga kal nge in nih?" tiin a hrawk leh ta hrep a.

A pasal in a fapa hlauthawng leh mangang lai chutia a vin hrep hrep mai a hmuh chuan Pi Estheri chu a ngawi thei ta bik lo, "Vin kher a ngai hleinem, a hlauhthawn ve em hi. Tha te te in zawt ta che." tiin a lo khap vat a. Mahse Pu Siama chuan, "I duat sual lutuk vang a nih hi! Hetianga a luhlul leh a kawlhrawn em em chhan pawh hi i chhan thin vang leh i duat suat vang vek a nih hi." tiin a nupui chu a lo an khum let zek mai a.

Pi Estheri chu a ding hluai a, engmah pawh sawi tawh lo chuan a ner sak a, pindan atang chuan thinrim takin a chhuak tau ta nghawng nghawng mai. Pu Siama chu a han thaw hak a, beidawn hmel tak hian a chal a dawm vawng vawng a. A thinrim lutuk insum ta hman lo chu a inchhir leh deuh nge ni, "Esther!" tiin a nupui chu a umzui nghal a.

An nupa an chhuah fel hnu chuan pindan chhung chu a reh leh tlawk tlawk a. Mamawia chu amah chauh in a thu kun tlawk tlawk a, a ngaihtuahna chu a buai nuaih nuaih mai. Saphai Lei-a Zuala bo dan mak tak leh a u Rini mangang tap thawm te chu a bengah a rawn ri nawn tluk tluk a.

********************************************************

(1993)

Zuala chu thir ban phen atang chuan muangchangin a rawn pen chhuak a. A hma lawka tlangval pahnih hlim taka thla lo la mek te chuan chu mipa naupang school uniform ha, hrilhhai hmel zeta lo ding reng chu mak ti takin an en vung vung a. Muana chuan Hriatpuia chu a nghawk zeuh va, nui deuh chung hian, "E khai, naupang, khawia mi nge i nih a? Tinge helai hmunah nangmah chauhva i rawn kal a?" tiin Zuala chu zawt a.

Zuala chuan chhan ngaihna reng a hre lo. A hma a ding tlangval chu a pa ngei a ni tih a hriat chian em avang chuan chhan mai dan tur a hre lo, thlahrang hmu ang maiin a en tlawk tlawk ringawt a. Hriatpuia zawk chu rawn nui chhuak hawkin, "I tawngthei lo em ni? Nge ni a sahdah hmuam phawt angai zawk?" tiin a han fiam hlak a. 

Zuala chuan thei leh thei lo hian, "Pa..." tiin phun sup a. Mahse, thil dang a sawi leh hma hauh chuan, an chhehvel boruak chu a rawn inthlak ta thut mai. Chhun pachang ni sa tha tak hnuai a awm kha an ni a, mahse thawk leh khatah van chu a rawn thim ta mup mai a. Khawi atanga lo kal nge tih hriat loh, chhum chhah hi a zing chuia chuai a, reilote chhungin Saphai Lei leh a vel chu chhum chuan a rawn bawh khat nghal vek a. 

Boruak chu a rawn vawt deuh thut a, thlasik thli na tak mai hi a rawn tleh nghal vuk vuk bawk a. Chutah le, lei hnuai ril tak atang chuan nichin lawka Zualan a hriat tawh, khawl lian pui in-on ri hum hum rapthlak tak kha a rawn ri chhuak leh ta tlat mai! Chu thawm chu a ring tial tial a, tlang leh ruam te chu a nghawr hian a rawn nghawr dur dur a. 

Muana leh Hriatpuia te pawh chuan mak an tiin an hlauthawng ve ta hle a, fiamthu thawh a hun tawh lo tih hriain an hawi kual nghal ruai a. "Eng thawm nge ni ngai? Leimin a awm dawn a mawni le?" Hriatpuian hlauthawng taka a tih rual chiah chuan, an piah ramngaw chhah tak chhung atang chuan Choak rual, sang tam tak hi van thengrengah chuan an rawn thlawk chhuak ta hum hum mai a. 

Chu veleh an awmna lai vel chu a rawn nghing ta dawt dawt a, lirnghing na tak mai hi a rawn thleng ta thut mai! Saphai Lei hlui tak leh a thir ban te chu an ri rawk rawk a, hlauhawm khawpin a insawi ta hlawk hlawk mai. Hriatpuia, lei sir deuh a ding chu a tawlh tlu teuh kher mai, theihpatawpin lei ban chu vuanin a inham tang tang a. 

Chhum a chhah tawh em avang chuan pen hnih khat leka inhlat pawh an in hmu hlei thei tawh lo chu a ni ber e. Chhum chhah tak leh boruak tawt lutuk karah chuan Hriatpuia mangang au rawl chu a ring kher mai, "Muan! Muana! Min pui rawh...." tiin a rawn au vak vak a. Mahse chu mangang authawm chu vawilehkhat ah hmawm bo ang hmak hian a reh ta vang vang a. 

Chhum zing karah chuan Muana chuan Hriatpuia chu a zawng kual ruai a, mahse tumah hmuh tur an awm lo. Lirnghing chu vawilehkhat ah a reh nghal hmak a. Boruak chu a pangngai leh ta. Chhum zing te chu muangchangin a kiang a, nisa pawh a rawn lang leh ta a. Mahse Saphai Lei chhuatah chuan Muana chu hrilhhai takin a la ding reng a. 

Thli thaw heuh heuh bak thawm dang hriat tur a awm tawh lo. "Hriatpui?! Khaw nge i awm? Hriatpui... fiamthu thawh hun a ni lo a nia!" tiin mangang tak in a thianpa chu a zawng kual ruai a. Mahse a thianpa chu hmuh tur a awm der mai si lo. Chhuat a Hriatpuia camera lo let ngat a hmuh chuan a thingthi hnawk a. Kum 25 chhung daih tur thuruk rapthlak tak mai chu he hmun atang ngei hian a lo intan leh ta a ni.

***********************************************

(2018)

Aizawl Police Station chhung eng uar hnuaiah chuan boruak chu a rit luk mai. Zan a rei tawh in khawlai thawm pawh a reh thiap tawh na in, Pu Muana te nupa hmelah chuan mutchhuak hmel a lang lo, manganna hlirin a khat zawk a ni. Thuthleng seiah chuan Pu Muana chu a thu kun ngaih a, a bulah chuan Pi Mahruaii chu thu ve in a pasal dar nghengin a tap zawih zawih bawk a.

Chutih lai chuan Police officer pakhat hi an hmaah rawn thu in, "Pu Muan, Pi Mahruai, pawi kan ti khawp mai. Saphai Lei leh a chhehvel zawng zawng kan dap chhuak tawh a, tun thlengin Zuala hnu chhui tur reng reng kan la hmu lo." a rawn ti ta mai a. Pu Muana chu beidawng takin a thaw hawk a, Pi Mahruaii chu a tap uar zual sauh a.

Police chuan hnem tum tak hian, "Mahse lungngai miah suh u, kan la beidawng bik lo ania.  Naktuk khawvar veleh mi tam zawk nen ramngaw chhung saw a thuk thei ang ber kan luhchilh dawn a nia. In fapa hi damin kan rawn hruai haw em em ang, theih tawp kan chhuah mek e." tiin a thlamuan zui mawlh mawlh a.

Chutih lai tak chuan Rini, a nu leh pa piah deuh a thu, a nau ngaihtuah vanga thlabar leh mittui tling piau chu a rawn hawi chhuak a. Station tukverh darthlalang chhan atang chuan pawn lam thim zing chu a va melh a. Kawtthler light eng fiah lo ruai hnuaiah chuan mipa pakhat hi ngawi rengin a lo ding reng mai! 

A han en chian chuan a phu deuh zawk a—chu chu an school zirtirtu, Sir Sangzuala a lo ni reng mai. Station chhung lam chu mit khap lek lo hian a rawn thlir tlawk tlawk a. Rini leh Sir Sangzuala mit chu darthlalang chhanah chuan a intawng ta siah mai. Sir Sangzuala mitmengah chuan thuruk thuk tak leh thil hriat ruk lian tak a nei tih a hriat theih a, inthiamlohna nge mak tihna zawk tih pawh hriatthiam theih loh hian Rini chu a rawn en ngar ngar a. 

Rini pawh chuan a thlir let ve reng a. Sir Sangzuala chu muangchangin a inher a, zan thim zingah chuan a pen liam ta daih a. Rini'n mak ti leh rinhlelhna nena pawn lam a thlir zui vawng vawng lai tak chuan, station kawngkhar chu a rawn inhawng ri thuai a. Police Inspector hmeichhia, uniform inbel thlap leh hmel thutak zet, chet fello hmel tak hi a rawn pen lut hlawk hlawk a. 

A rawn luh rual chuan station chhung boruak chu a danglam nghal vek a ni ber. Midang chu ngaihven lovin Inspector hmeichhia chuan Pu Muana te nupa thutna lam chu a rawn pan ding nghal chat a. Pu Muana hmaah tak chuan rawn dingin, a melh chhuk run a. Fiah tak hian, "Pu Muana i ni em? Zuala pa kha?" a rawn ti a. 

Pu Muana chuan phu deuh zawk chungin a lu a lo bu a. Inspector hmeichhia chuan a aw thian kharh in, "Khawngaihin i hun tlem te min lo pe lawk thei angem? A falin biak lawk che ka duh a?" a rawn ti ta tlat mai. Thil thleng thar, midang hriat ve chi loh a awm tih a hmelah chuan a hriat theih a. Pu Muana chu mangang leh phili takin a ding chhuak a, Inspector hmeichhia chu room pakhatah a zui hrang ta a.

***********************************************

Pindan chhung chu a reh ruih a, pawn lam boruak ri nuaih nuaih te chu hriat phak a ni tawh lo. Dawkan hlui lam tawh hma tawn chuan Pu Muana leh Police Inspector chu an thu ran a. Inspector uniform-a 'Miriam Lalhriatpuii' tih inziak kalh chu dawkan chunga light eng tak chuan a chhun fiah hle a. 

Inspector Miriami hmelah chuan fiamthu hmel reng a lang lo, a mitmeng fiah leh fing tak chuan Pu Muana chu a melh kar a, an inkar boruak chu a uap in a rit kher mai. "Pu Muan.." aw dam, mahse thutak zet hian Inspector Miriami chuan a rawn ti chhuak hlawl a, "I fapa Zuala bo dan leh a bo na hmun hi thil thleng palh satliah a ni lo maithei a ni. He station record hlui kan han hai kir hian thil mak tak kan hmu chhuak a. Kum sawmhnih panga liam ta, kum 1993 khan, he Saphai Lei-ah ngei hian hetiang chiah chiaha bo hi an lo awm tawh a ni," a ti ta mai a. 

Chu thu chuan Pu Muana thinphu a ti rang nghal dawt dawt mai. Miriami chuan file hlui tawh tak pakhat hi dawkanah a rawn nawr phei a, "Chu mipa tlangval bo ta chu 'Hriatpuia' a ni a. Mak leh zual chu, a bo ni khan nang hi a bulah i awm ve nghe nghe a ni, a dik em?" a han tih zawm nghal zat a. 

Pu Muana chu a thlantuiin a rawn bual nghal pup pup a, a chil a lem dawk a, "Aw... Hriatpuia chu ka thian tha ber a ni a, kha ni khan khami hmunah khan kan pahnihin kan awm ngei alawm.." tiin aw khur dar dar chung chuan a chhang a. Inspector Miriami chu a han awm hnai sauh va, a hmel a thutak zual sauh bawk. 

"A nih chuan khami ni khan eng thil chiah nge thleng min han hrilh teh. Thil thleng engkim, theihnghilh i neih miah loh a ngai ang. In pahnih chauhvin em ni in awm? Nge ni a mi dang in hmu tel?" tiin chiang leh fiah takin a han zawt leh a. Pu Muana chuan a hmai a hup vang vang a, kum tam tak a lo thup bo tawh, a nupui ngei pawh a la hrilh ngai loh thuruk rapthlak chu phawrh chhuah a ngai ta.

"Khami ni khan Saphai Lei-ah thla la in kan kal a..." tiin Pu Muana chuan thawk han la hawk a. "Mahse kan pahnih chauh kan ni lo. Thawk leh khatah, khawi atanga rawn lang nge tih pawh hriat loh mipa naupang pakhat, school uniform ha hi kan bulah a rawn ding hlawl mai a. Chu naupang kan biak lai mek chuan lei chu a rawn nghing a, chhum chhah pui mai hi a rawn zing chuai chuai a, thawm rapthlak tak a rawn chhuah rualin Hriatpuia chu a bo ta daih a ni." tiin a hrilh a.

"Chu mipa naupang chu khaw'nge a awm tak?" Miriami chuan mak ti leh hrilhhai hmel tak hian a lo zawt leh vat a. Pu Muana chuan beidawng hmel takin a lu a thing a, "Ka hre lo. Khami ni bak kha chu ,,,kha naupang kha khawiah mah ka hmu leh tawh miah lo. Khawi a mi nge a nih a, engtin nge a ral leh tak daih tih pawh tun thleng hian ka la hrechhuak zo lo a ni," a ti chuai raih a. 

Inspector Miriami chal chu a chuar nang a, thil awmdan hi finfiahna pangngai hmanga chhui chhuah theih rual a ni lo tih a hrethiam tan ta. Boruak chu a rit leh zual sawt a, Pu Muana chuan hlauhthawn hmel taka Inspector chu melhin, a rawn phun chhuak leh sep a. "Mahse thil pawi ber chu maw Inspector... chu mipa naupang chu Hriatpuia bo hma chiah khan kan be ngei alawm. Mahse engkim a reh fel hnu leh, vawiin ni thleng hian he ka thluak hian... chu mipa naupang hmel chu eng ang nge a nih a hre chhuak zo tawh tlat lo. Ka mitthla theih zawng chu, tun lawka ka fapa Zualan a inbel ang chiah chiah, navy blue school uniform a ha tih chauh kha a ni." a ti leh a.

**********************************************

(1993)

Saphai Lei atanga tlan chhiain, Zuala chu ramngaw chhah leh thim mup karah chuan a theihpatawpa chakin a tlan rawk rawk a. A thaw hlawp hlawp a, hlauhna in a tuam hneh em avang chuan a thinphu te chu a rawn zuang chhuak mai dawn hian a hre hial a ni. Kum 2018-a a hriat thin ramngaw nen kha chuan a inang tawh lo, a pik in a hnim em em a, khawii lam nge a pan tih pawh a inhre tawh lo, a hma zawnah chuan a tlan mawp mawp hi a ni ber mai.

A tlan zel a, mahse thil mak tak a thleng tlat. Tu emaw hmuh theih si loh hian a hnungah a rawn umzui tlat hian a hria a. A hnung lawkah chuan hnah ro rap ri ruap ruap thawm leh thawk la hlawp hlawp thawm hi a hria a, a han hawi let a, mahse engmah hmuh tur a awm chuang si lo. 

Chu ngaihruatna rapthlak tak chuan a thlaphanna chu a let tam takin a ti zual a, theihpatawp chhuahin a tlan chak zual sauh a. Thlaphang taka a tlan mek lai chuan a hma lawk thingkung lian pui phen atang hian pitar pakhat hi a rawn pen chhuak ta thut mai! Pitar chu a chhip atanga a ke hmawr thlengin puan dum vek in a inthuam a, chu ramngaw thim zingah chuan thlahrang ang maiin a ding khawng reng a, kawng a lo dang chiah bawk.

Zuala chu a phu nasa lutuk leh hlau lutuk chu theihpatawp in a au chhuak tuarh a, a tlan lai chu ti tawpin a ding nghal chawt a. Chutah, chu pitar chuan a mitmeng thuk leh fiah kalh mai chuan Zuala chu chik lutuk leh khap miah lo hian a rawn melh ta ngar ngar mai a. A hmel chu a ro in a thim khup a, hlimna emaw ngilneihna hmel reng reng a lang lo.

Reilote hnuah, chu pitar chuan aw fiah tak mai hian, "BAWIHA, HUN HI TIH DANGLAM THEIH A NI LO. A PAWI KHAWP MAI, MAHSE A THLEN NGEI A NGAI SI A NI." a rawn ti chhuak ta mai le!  Zuala chuan chu pitar thusawi awmzia chu pakhat mah a hrethiam lova, a hriatthiam zawng chu 'thihna in a hmuak' tih chauh chu a ni. Hlauhna in a bual at vek tawh avangin engmah dang ngaihtuah tawh lovin a sir lam ramngaw pik zingah chuan a tlan lut ta ringawt a.

Mahse, thlaphang leh fimkhur lo taka tlan a nih avang chuan a pen a sual ta hlauh mai.  Lung pakhat a rap pial a, a au tuar a. Kham pang awih takah chuan a lum thla ta mai a, hnim leh thing tang  te chu a su thla pawp pawp a. A tawpah chuan thingkung bul pakhatah hian a lu chu a sawh ta chawrh a, a taksa chu a na in amah pawh chu a zawi ta vek mai.

A lu a sawh nat em avang chuan a lu chu puak dawn ang maiin a na ngut ngut a. Thei leh thei lovin a mit chu a han meng a, mahse a khawhmuh chu a fiah tawh lova, thil engkim chu a phe ruai a, a vir muai muai in a hria a. Tlan chhiat leh tumin inbeng kan a han tum a, mahse tha reng reng a nei tawh lo, lei ah chuan a mu zawi ngiai a.

Chutih lai tak chuan a hma zawnah chuan mihring pianzia pu si, mahse lian em em mai, mak pui pui hi thingkung hrang hrang phen atang chuan an rawn chhuak ta khup khup mai le! Chu'ng thil lian pui pui te chu an taksa a dum vek a, hmel (mit leh hnar) pawh hmuh chian theih loh hi an ni. 

Zuala hmaah chuan rawn kal hnaiin, a hma zawnah chuan an rawn ding khup a. Zuala chuan chu'ng thil rapthlak takte chu hlau takin a thlir tlawk tlawk a, a lu na lutuk chu a tuar thei ta lova, zawi muangin a chhing diar diar a, thim chhah takin a rawn tuam a, nikhawhrelovin a awm zui ta a ni.

**********************************************

(2018)

Sir Sangzuala chuan an in kawtah a motor a ti ding a. A hmelah chuan chauh luat vanga ngui hmel ai mahin, rilru hahna leh inthiamlohna hlir a lang chhuak a. Thawk la hawk chungin kawngkhar a hawng a, inchhung reh ruih mai, light eng dul ruihin a chhunah chuan muangchangin a pen lut ta a.

Inchhung a luh rual rual chuan, pindan lehlam atangin a nu, Pi Chhuangi chu a rawn pen chhuak ve nghal a. An nufa inhmachhawn chu sawi tur tam tak nei si, sawi chhuak thei lo ang maiin an inen vang vang ringawt a. Chu an inmelhna ringawtah pawh chuan kum tam tak an lo zep tawh thuruk rit takin a delh beh tlat chu chiang takin a hmuh theih a ni.

Pi Chhuangi chuan a fapa hmel dang bel leh thlabar hmel chu lainat takin a thlir a. Zaidam tak  hian, "I va rawn haw hma leh si ve?" a han ti zawi sap a. Sangzuala chu a kun ngul a, mipa puitling than kin tawh meuh pawh a mittui a tling ve pam mai. Thei leh thei lo hian a rawn tawng chhuak a, "Ka nu... ka tuar thei thlawt lo a ni. An mangang hmel, beidawng thlabar hmel kha ka hmuh zawm thei tawh lo. Engkim hria in, pui thei reng mah ila, ka ngawih tlat  ngai a, khatiang hreawm tuar lai hmel hmuh reng kha a rapthlak lutuk..ka thei tawh lo a ni." tiin a aw chu a khur dar dar a.

A fapa rilru na hmel a hmuh chuan Pi Chhuangi thinlung pawh a na ve vawng vawng mai. Va hnaih chilh nghalin a fapa tlangval puitling tawh chu naute ang maiin a kuah thlawp a. A hnungzangah a chul heuh heuh a, "Ka hrethiam che alawm, a na dawn em a sin. Mahse Mambawih, he thil hi chu kan thu a ni lo. Hun hi tui luang lai ang a ni lova, thir kual, a tawp nei lova inkual char char ang zawk hi a ni. Chu chu kan hriatthiam a, hrehawm ti hle mah ila kan pawm thiam a ngai a ni." tiin a hnem mawlh mawlh a.

Mahse Sangzuala chuan a nu kuahna atang chuan inla hrangin, beiseina chhete la nei hmel pu chung hian a han melh a. "A ni lo, ka nu. Tih tawp dan a awm tur a ni. He hun inkual kawi, mi pawi sawi lo te nuna nghawng pawi tak thlen thin hi tih chah dan a awm ngei ang. Hun hi her letin, engkim hi kan siam tha leh thei tur a ni." tiin ngenngawl takin a hnial let a.

Pi Chhuangi hmel chu a rawn thutak ta hle a. A fapa mitah tak chuan chiang taka melhin, thutlukna sawhsawn theih loh a ni tih hriat tak hian a lu a thing a. "A theih loh, Mambawih. Hei hi kan tana ruat a ni a, siam that emaw tih danglam theih a ni tawh lo. Saphai Lei boruakah hi chuan mihring theihna in hmun a chang ve lo a ni." a ti chang fak a.

Thawk han la leh halhin Pi Chhuangi chuan a sawi chhunzawm leh a, "Tum engang mah ila, dan tum in kan theihna zawng zawng pawh sawm khawm mah ila, a sawt dawn chuang lo. Engti kawng zawng pawhin, a hmaa thil lo thleng tawh te leh thleng tur a ruat te chu eng tin tin emaw a thleng nawn tho tho dawn a ni. Chu hun kal tawh phuar behna atang chuan kan tal chhuak thei lo." tiin thlaphang, mahse thutak em em hian ahan ti leh a. Sangzuala chu a ding khawng reng a, a beidawn hmel takzet.

***************************************

END OF EPISODE 2