VOID (A mizo horror science-fiction story) Written by : Aaron Malsawmdawngzuala Episode - 6 : Synchronicity (LAST)

VOID

(A mizo horror science-fiction story)

Written by : Aaron Malsawmdawngzuala

Episode - 6 : Synchronicity

(LAST)

**********************************************

Thlasik thli vawt vin tuk mai chuan a hmai a rawn chhem a, a vawt ti lutuk chu a hriatna a rawn fiah nghal kawk kawk mai. Inspector Miriami chu a rawn thaw chhuak hrawih a, boruak vawt leh hnawm lutuk chu a hip lut nghal kawk bawk. A awm zawn chu a rawn na nghal ngut ngut a, a mit a han meng chu khaw hmuh a fiah lo ruai a, engkim mai chu a thim chhah mup mai.

A tukkhum chu hnim hnah ro leh leivut vawt thlerah hian a lo innghat a. A beng chhung chu a la kiu vung vung a, nichin lawka khawl lian pui ri vung vung leh tek ri chuai chuai kha hriat tur a awm tawh lo. A aiah chuan thlasik thli na taka tleh in ramngaw pilril tak a chhem rik hum hum thawm leh, khawi emaw aṭanga ui bauh ri chuah chuah thawm chauh chu hriat tur a awm a ni.

Muangchangin a han inbeng kang a, a taksa kham leh na ut ut chu tuar hram hramin a ṭhu chhuak a. A khaw hmuh a rawn fiah ṭan a, a inen chu a phu zawk mai. A police uniform (khaki) thar lam leh zahawm tak kha a lo balin a lo tet hluk tawh a, a ṭhen lai phei chu mei in a rawh ang mai hian a ut deuh huam bawk a. 

A banrek leh a nghawng velah chuan nichin lawka khawl hrui a (wires) an phuarna hnu hma, sen vual ṭawt ṭawt chu a la lang chiang hle. Khawiah nge a awm? Khawl aṭang khan khawiah nge theh luh a nih? A theih tawp chhuahin a ding chhuak a. A awmna chu Saphai Lei ramngaw bawk kha a ni tih a hria, mahse a landan a dang tlat thung. 

Thingkung lian pui pui te chu a ngaiin an la ding luah na a, a hriat ṭhin ramngaw ang kha a ni tawh lo—mihring la kal pawh ngai lohna, ramngaw pik chhah mup mai hi a ni tawh zawk a. Boruakah chuan lei hnawng rim leh mei khu rim, thil rawh ut rim hi a nam rum rum bawk a. Vawt tiin a khur hlawk hlawk a, kawng awm ang bera a hriat, chhum zing chhah mup lam pan chuan theih leh theih lovin a pen phei ta chhat chhat a. 

Hun eng emaw chen a kal hnu chuan, ramngaw chu a rawn lang fiah ṭan a. Mahse tlang panga in lo ding khup ṭhin, a hriat ṭhin Aizawl khawpui ropui tak mai kha hmuh tur a awm miah lo! A aiah chuan di in leh mauhmanga sak, in hlui leh ung zet zet mai hi a lo intlar phei put a. Kawtthler chu leivut hlir a ni a, electric ban emaw, motor kawngpui emaw hmuh tur pakhat mah a awm lo. 

Khawchhung chu a reh ṭhiap a, mihring reng reng hmuh tur an awm lova, in aṭanga meikhu rawn chhuak la awm neuh neuh te chuan chu khua chu hal a ni tih a ti fiah chiang hle. Miriami chu mak ti tak leh thlaphang tak chuan a hawi kual ruai a. "Engnge... engnge thleng hi? Khawi hmunah nge ka awm?" tiin a phun sep a.

Chutih lai chuan, a piah lawk thingkung lian pui pakhatah hian lehkha hlui tawh tak hi a lo intar a. Hmanhmawh takin a va pan hnai a. Chu lehkha thu inziak a han chhiar chu a thluak hi tek in a deng dawt ang mai hian a rawn bing nghal mup mup a. A lungphu chu a tawp dawn hialin a hria. Lehkhaah chuan lian kel kawl hian hetiang hian a lo in-ziak a:

"NOTICE / THUPEK"

Sorkar thu lova he ramngaw leh a chhehvela lut emaw, Khawkhawm (Grouped Village) aṭanga tlanchhuak reng reng chu hel (hostile) anga ngaih a ni ang.

Issued by: Security Forces

Date: 21st November, 1968

Miriami chu a tawlh hnung dawt a, a thaw kawk kawk a, "November 21... 1968..." a ti tham tiak a. Hei hi 2018-a Saphai Lei-a a bo ni chiah chiah kha a ni a, nichin lawk mai kha a ni. Mahse a kum a dang daih! Sap putar khan 1993-ah a theh lut lova, a ai hla, Mizo buai lai, khawkhawm (Grouping of Villages) an tih hun thim leh rapthlak ber laiah a lo theh kir daih a lo ni! 

Hun (Time) chuan a hnunglamah a theh let a, mahse a inkual chhuak (loop) chhungah erawh chuan nghet takin a la phuar bet tlat tho si. Chutih lai tak chuan thim tham kar aṭang chuan, sipai rual, boot bun rit tak taka rawn pen ri khup khup thawm a rawn hria a. Hlauhna in a tuam nghal a, bihrûkna tur zawngin a hawi kual nghal ruai a. 

Hmanhmawh lutukin kawngsira lei khuar thuk laiah chuan a zuang lut nghal rawk a, hnim pik leh chirhdiak karah chuan thawm dim thei ang berin a bawk vak ta ngar ngar a. Sipai panga vel hi torchlight eng tak tak chhi in chhum kar aṭang chuan an rawn lang hlawl a, Hindi ṭawngin an inbe mawlh mawlh a, an silai lian pui pui chu an ak far hlawm bawk a. 

Miriami chu thaw miah lo hian a lo ip char char a, sipai boot-in a sir lawka hnah ro a rawn rah rik rawp rawp lai te chuan a lungphu hi a puak keh mai dawnin a hria a. Sipai ho chu an kal liam ta maw tihah chuan, thaw huaiin rawn inbeng kan a han tum a. Mahse chutih lai tak chuan a hnunglam thim zing aṭang chuan tu emaw hian a hmuia rawn hupin, nget lutuk hian a rawn man ta thut mai le! Mizo ṭawng ngei mai hian a beng bulah, "Bengchheng suh... an kap ang che." a rawn ti zawi sap a.

*******************************************************

Zanlai dar 12 a pel tawh a, Rini te in chhung chu a reh in a reh tlawk tlawk a. Rini chu khumah a mu meng kur a, a room banga sana inkhawng ri tluk tluk chu a ngaithla a. Chu sana ri chuan 'hun' (time) a kal liam mek zia leh, a nau Zuala leh a bialpa Mamawia te chu a lak atangin an  hla tial tial ni mai hian a hriattir a. 

Vawiin nilenga thil thleng, Sir Sangzuala a rinhlelhna te, Inspector Miriami bo thu te khan a thluak chu a tibuai nuaih nuaih mai. A theih tawh thlawt lo. Khum aṭang chuan muangchangin a tho chhuak a, dawhkana a nau Zuala nena an thlalak dunna chu a han ban a, thla eng (moonlight) in a rawn chhun luh, eng riai hnuaiah chuan a thlir vawng vawng a. 

"Zualte... khawiah nge maw i awm le?" tiin a phun sep a. A mittui rawn hnam chu hru hulin, a mitmeng chu a rawn inthlak ta thut mai. Nghah reng hian awmzia a nei lo, a chhanna chu Sir Sangzuala hnenah khan a awm tih a chiang a ni. Kawrlum lum (hoodie) dum a ha a, a lukhum chu khumin, thawm dim thei ang berin an in aṭang chuan a chhuak ru ta a.

Zanlai thlasik khawvawt tak chuan a hmai a rawn chhem vawt thler a. Aizawl kawtthler chu mitthi khua ang mai hian a reh ṭhiap a, kawngsira street light eng fiah lo ruai te chu an de phe zeuh zeuh bawk a. Rini chuan a phone flashlight chu 'on' in, Sir Sangzuala te in luah lam pan chuan a kal hlawk hlawk a. 

A lungphu chu a phu rang hle na a, a thutluknaah erawh a chiang hle thung. Reiloté hnuah Sir Sangzuala te veng, tlang pang thengthaw tak leh in awm vak lohna lai chu a va thleng a. Zirtirtu quarters hlui tawh lam, Assam-type in lian vak lo hi a ni a. In chhung chu a thim mup a, a reh vawng vawng bawk. 

Rini chu kawtah chuan dingin a han thlir vang vang a, in neitu chu a mu tawh nge, a awm lo zawk tih pawh hriat theih a ni lo. Fimkhur takin in hnunglamah chuan a lut phei a. Vanneihthlak takin, choka lam tukverh pakhat, darthlalang keh deuh hlek tawh hi a kalhna a lo chhe hlauh mai. 

Rini chuan a theihpatawpa thawm dim chungin tukverh chu a nawr hawng a, a chhungah chuan a lawn lut ta a. In chhung boruak chu a uap in, lehkha hlui rim leh, eng thil emaw rawh ut rim, hriat chian theih si loh hi a nam rum rum a. A phone light chuan a han chhun kual a, sitting room chu a pangngai thlap a, zirtirtu in tih takah lehkhabu a inrem tlar ṭhap bawk.

Mahse, a piah lawka pindan pakhat, a kawngka tala lian pui maia inkalh tlat a va hmuh chuan a ding chawt a. "Engmah zep nei lo ni se, in chhungah hetiang tala lian hian room a kalh miah lo vang." tiin a ngaihtuah a. A hawi kual leh a, dawhkan hnuaia bawm pakhat inhawng huah aṭang chuan chahbi bawr hi a va hmu fuh hlauh mai. 

Chahbi pahnih a dik loh hnuah a pathumna a han rawlh chhin chu a rawn ri ta khep a. Kawngka chu a inhawng ta ruai ruai mai. Room chhung boruak a rawn nam chhuak chu a hma aiin a uap zual a. Rini'n a phone light a han chhun luh leh chuan a thil hmuh avang chuan a lungphu chu a chawl dawn hialin a hria. 

Room bang zawng zawngah chuan Aizawl map lian pui pui hi a lo intar khat vek a. Chung map-ah chuan red string (hrui sen) chuan hmun hrang hrang, a bikin Saphai Lei ramngaw lai bik chu a lo inkham kual ruih mai a. Chu mai a ni lo, bang lehlama thil intar a va hmuh chuan a thidang tep hial a. 

Hriatpuia (1993-a bo) thlalak te, a nau Zuala (2018) thlalak te, Mamawia thlalak te leh nichin lawk a bo ta Inspector Miriami thlalak te chu pin hian a lo inkilh bet thluah a. An thlalak hnuaiah chuan date hrang hrang leh science formula mak pui pui hi a inziak kawi nuaih bawk a. 

Sir Sangzuala chu zirtirtu satliah a ni lo, he mihring bo kualna rapthlak tak phena a bul tumtu  hi a lo ni thei mai ang em? Rini chuan dawhkan lam chu a va pan hnai a. Dawhkanah chuan dairy bu hlui tawh tak, a kawm pawh rawp ṭep tawh hi a lo awm a. Rini chuan khur hlawk hlawk chungin chu diary chu a han keu a. 

A chhunga kutziak a hmuh rual chuan a ṭe chhuak lo chauh a ni. Chu kutziak chu a nau Zuala kutziak ngei mai a ni! Mahse, lehkha phek a date inziak chu "December 14, 1993" tih a ni daih si. A thluak chu a rawn puak keh dawnin a hria. A phek a han keu leh chuan thlalak hlui tawh tak, tuiek rawng kai deuh hi a rawn tla chhuak nawlh a. 

Rini chuan a han chhar a, a flashlight in a han chhun chiang chu a thlarau hi a thlawk chhuak dawnin a hria. Thlalakah chuan hmeichhe pakhat leh a nau Zuala, Zuala ngei mai chu hlim takin an lo nui dun a. Thlalak hnunglamah chuan fiah lo ruai hian, "Kei leh ka nu..Chhuangi, 1993" tih hi a lo in-ziak a. 

Kum 2006-a piang a nau Zuala kha, engtin nge 1993 ah thla a lak theih? Sir Sangzuala leh Zuala hi... a theih loh! Rini'n thlalak hlui kenga khur dawt dawt chunga a din lai tak chuan, pawn lam aṭangin in kawtah chuan motor a rawn ding ri ta tuar mai. A hnu lawkah front door tala chu a rawn ri ta rawk rawk mai a!  Pen thawm chuan in chhung a rawn luh rual chuan Rini chu thim thamah chuan a biru nghal vat a. Sir Sangzuala chu a rawn haw ta... Rini tan chhuahna tur kawng a awm tawh lo!

***************************************************

(1993)

Tlangnuam veng mawnga in te reuhte, thim leh uap churh chhungah chuan sana inkhawng ri tluk tluk bak chu thawm dang hriat tur a awm lo. Pawn lamah chuan thlasik ruah mal lian pui pui chuan rangva chung chu a rawn far ri fap fap a, boruak chu a vawtin a reh tlawk tlawk mai. Dawhkan hlui tawh tak ah chuan Puitling Mamawia chu ngawi rengin a ṭhu a. 

A hmaah chuan Saphai Lei ramngaw map hlui tawh tak, flashlight lian pui leh a silai (revolver) pai ṭhin chu a inhung a. A kut thap leh lian tak chuan silai mu chu muangchangin a thun ri khep khep a. Kil khat a thim zing aṭang chuan Rawlthar Mamawia chuan hlauthawng leh mangang takin amah puitling zawk che vel chu a lo thlir reng a. 

Amah ngei mai, kum 25 hnua a hmel lo awmdan tur a han inhmu chu a thluak a buaiin, hriatthiamna loh hlirin a khat a. "A nih chuan... tlanchhiatsan daih ta ila?" Rawlthar Mamawia chuan a rawn ti chhuak hlawl a. A aw chu a khurin a beidawng hle a. "He khua hi chhuahsan ila, hmun dangah biru daih ila, he hun inkual chhuak (loop) rapthlak tak hi a chat mai dawn lawm ni?" a han ti leh a.

Puitling Mamawia chuan a thil tih lai chawlin, muangchangin a rawn hawi chhuak a. A mitmenga beidawnna thuk tak leh kum tam tak hrehawm a lo tuar tawhna chu a rawn lang chhuak a, a lu a thing nar nar a. "Ka tum tawh alawm... Kum 25 liam ta, nangmah ang chiaha rawlthar ka nih lai khan, tuna i ngaihtuahna leh i sawi ang chiah kha ka lo sawi ve tawh a sin." a ti zawi ruih a. 

A ding chhuak a, tukverh aṭanga ruah sur lai thlir chung chuan, "Mahse, hun (time) hian min dang tlat a ni. Kan tlanchhiatna kawng ngei chu he hun inkual chhuak thlentu hi a lo ni leh zel ṭhin." a ti thum chhal a. "Mamawi, kan duhthlanna (free will) emaw kan tih, kan thunun theih emaw kan tih hi dawt mai a ni." Puitling Mamawia bawk chuan a rawn ti nawn leh a.

"Lemchan tualzawla milem (puppet), hrui a pawh kual mai mai kan ni. Thil thleng tur hi a inziak lawk vek tawh a, siamṭhat kan tumna apiang hi a chhiatna thlentu a ni zawk zel. Chu chu hun (time) in min hrem dan rapthlak ber chu a ni." a ti a. A thusawi chu a thuk in, rawlthar ngaihtuahna a tan chuan dawnsawn thiam a har lutuk tlat.

Rawlthar Mamawia chu a thaw a pik zual sauh a, a lu a tuai puat a. "Mahse engvangin nge? Engvangin nge Sir Sangzuala... nilo, Zuala chuan he thil hi tih tawp a duh loh? Kum 25 chhung he hremhmunah hian min tan tir dawn chu ani a! A unaunu, Rini pawhin a nau bo vangin hrehawm a ti dawn tih a hre vek awm si a?" tiin a han zawt nawn leh a, a aw ah chuan thinrimna a lang tel tawh hial a.

Puitling Mamawia chuan dawhkana map a hrui sen (red string) inzam nuaih mai chu kawk in, "A chhan chu, he loop hi a tawp a, hun hi a kal pangngai a nih chuan Zuala hi 1993-ah hian theh luh a ni ngai dawn lova, 1993-ah a nu leh pa dik tak te hi a rawn tawk dawn hek lo. Chu aia rapthlak zawk chu... loop a chah chuan Zuala hi a lo piang ngai lo vang a, a lo pian loh chuan a unau nu Rini pawh hi he khawvelah hian a awm ve ngai dawn lo a ni. Hun hi insuih zawm lova a ngil a nih chuan Rini chu a taksa pawh awm lovin a ral (vanish) ang." a ti ta mai a.

Chu thu rapthlak tak a hriat rual chuan Rawlthar Mamawia chu chhuatah a ṭhu hnawk a. "A awmzia chu..." a ti bah nuaih a. "Sangzuala hian Rini a hmangaih em avangin, a thih loh nan leh he khawvela a awm ve reng theih nan he paradox hrehawm takah hian kan vaiin min phuar bet vek zawk a ni. Rini damna tur a nih phawt chuan khawvel hi tihchhiat vek ngai dawn pawh ni se pawi a ti lo." Puitling Mamawia chuan a rawn tih zawm a. 

Rini dam khawchhuah theih nan amah Mamawia ngei pawh kum 25 chhung hrehawm tuarin  he loop-ah hian a lo tang reng chu a ni si a. "Engkim hi... a lo inzawm kual vek a nih hi." a ti zawi sap a. Puitling Mamawia chu a ṭhutna aṭang chuan a tho chhuak a. A kawr ipte aṭang chuan sana hlui tawh tak, a darthlalang keh deuh hlek tawh, thir hrui nei hi a rawn phawrh chhuak a, Rawlthar Mamawia hmaah chuan a theh thla ta a. 

Rawlthar Mamawia chuan chu sana chu mak ti lutukin a en a. Chu sana ngei chu a bialnu, Rini'n kum 2018-a a piancham puala a pek ngei mai kha a ni! Phawk lutukin a banrek chu a han en a, chu sana ngei chu a lo la bun reng si! "He sana hi... ka banah ka la bun reng si a!" tiin mak ti lutukin a rawn tawng chhuak a.

Puitling Mamawia chuan a nuihzat hmel lek lek a, "Kha sana kha vawng ṭha rawh. Zaninah hian Saphai Lei-ah kan kal dawn a. Tah chuan Sangzuala kan va dang ang. Mahse... ka hrilh lawk ang che, kha i sana bun lai kha zaninah i tibo dawn. Chuan kum 25 hnuah, Puitling ka lo nih hian khami zana i tih bo ngei mai kha Saphai Lei aṭangin ka va chhar leh dawn a ni. I hrethiam em? He sana hian siam ṭan hun a nei lova, a tawpna a nei hek lo. Amah in a in-iam chawp a ni. Engkim hi a lo inziak lawk vek tawh a ni." a ti leh a.

Sana inkhawng ri chu a rawn ring thut ni mai hian a hriat a. Puitling Mamawia chuan a overcoat dum lian pui mai chu a ha a, a flashlight leh a silai chu a ak a. "Tho rawh le. Saphai Lei lam kan pan a ngai. Tunah hian 2018 lamah Rini khan Sangzuala in a va luhchilh mek a, 1968-ah Miriami sipai ho lakah a biru mek bawk. Chung zawng zawng insuihkhawmna chu zaninah hian Saphai Lei puk chhungah sawn a thleng dawn." a han ti leh a. 

Kawngka an chhuah dawn chiah chuan a rawn hawi let a, "Mamawi... engpawh thleng se, chak takin i awm tur a ni. A chhan chu, nangmah hi nakinah keimah i la rawn ni dawn a, he hrehawmna zawng zawng hi tuar nawn turin i rawn let leh dawn a ni." tiin a theihnghilh tawh ngai loh tur thu rapthlak tak chu a hrilh ta a.

************************************************

1968

Thlasik thli vawt tak leh chhum chhah mup karah chuan, Kawlhmingthanga chuan Inspector Miriami chu dim tak si, nghet tak hian a hruai phei dawt dawt a. Saphai Lei ramngaw pilril leh pik tak kar, thingkung lian pui pui zung inkham kual nuaih hnuaiah chuan puk (cave) thim ruih mai hi a lo awm a. 

Chu puk chhungah chuan an pahnih chuan an lut ta a. Pawn lama ruah sur leh thli tleh thawm chu a reh nghal duk a, a aiah chuan tui far ri fap fap leh leihnuai rim uap churh, hmuh theih loh thlarau in a bawh khat vek emaw tih mai tur hian puk chhung chu a thim in a reh tlawk tlawk a.

Puk hnuai hla deuh hleka meipui (campfire) lo alh deuh sep sep lam chu an pan phei a. Tah chuan tlangval pathum, Mizo hmel dik tak, silai hlui lam tawh nena lo ṭhu ṭhap hi an va pawh a. Chung mite chuan chik lutuk leh rinhlelhna mitmeng thip tak nen hian Miriami chu an lo melh a. 

A police uniform (khaki) rawh ut leh tet hnuang, an la hmuh ngai reng reng loh, 2018-a siam ngei mai chu an melh tlawk tlawk a. Miriami chu a chau tawh takzet a ni, a mit hnuai chu a duk ruih a, a taksa vawt tak avang chuan a khur hlawk hlawk a. Kawlhmingthanga chuan a ṭhiante mitmenga zawhna tam tak awm chu hmu thiam in, a han khuh kharh a. 

"Vai sipai ho kar aṭangin ka rawn  chhanchhuak a nih hi." a han ti thum chhak a. "A dâng bal mai, a khur hlum lo chauh a nih hi. Khawl a puak rik dur hnu khan kawngsirah nikhaw hre lovin a lo let reng a. Chaw leh thingpui kha rawn pe vat rawh u." tiin thu a pe zui nghal a. A ṭhiante chuan engmah sawi buai lovin Kawla thusawi chu an zawm nghal a.

Miriami chu meipui bula leivutah chuan a ṭhu sawp hnawk a. A taksa chu vawt tih vangin a la khur dar dar a, a thluak erawh chu a buai nuaih thung. Nichin lawk khan 2018-ah puk chhung 'khawl' lian pui bulah khan a ding a, electricity tek in a man a, tunah he ramhnuaiah hian a tang mek si. 

A bengah chuan Sap putar nui ri rapthlak tak kha a la cham reng a, mahse a rim hriat erawh khawl rim a ni tawh lova, leihnuai rim leh meikhu rim a ni tawh zawk. Reilotéah, thir no (tin mug) tlabal awh tak hian thingpui sa ver vawr leh chhangban hi an rawn chhawp a. Miriami chuan khur dawt dawtin a han ban a, thingpui sa in a hrawk a luan thlak rual chuan a harh deuh kawk a. 

A pum ruak lutuk chuan chu chhang ban tlawm tak mai chu a lo mamawh hle tawh a ni.  Mahse  a thil ei pah chuan a ngaihtuahna chu a vâk thui hle a. 'Hun' (Time) hi kan hriat dan chuan a ngil (linear) a, hma lam a pan zel ṭhin emaw a lo ti a. Mahse, hun hi a lo inkual (loop) zawk a lo ni tih a hre chiang ve ta. 

A bul ṭanna leh a tawpna hi thil pakhata inzawm tlat, phelh theih loh a ni tih a hrechhuak ṭan ta. A inbeng daih hnu chuan, a aw thian kharhin muangchang hian a hawi chhuak a. Meipui eng in a hmai chu a chhun sen ruih a, Kawlhmingthanga lam chu en in, "Khawiah nge ka awm? Tute nge in nih?" tiin beidawng leh fiah lo ruai hian a han zawt a. 

A aw chu a tham in, a khur deuh hlak hlak a. Kawlhmingthanga chuan a meizial zuk lai chu a pak khu hluah hluah a, "Nula, vai sipai ho chet tlatna hmun, Saphai Lei ramhnuai a nih hi. Keini hi Mizo zalenna sualtu, Mizo National Army kan ni e. Ram leh hnam chhan nan a ramhnuaia biru  leh tawm kan ni." a ti fiah fel fak a, a aw-ah chuan inrintawkna leh huaisenna a lang chhuak chiang hle.

Chu thu chuan Miriami lungphu a tirang dawt dawt hle mai. Rambuai lai... chu chu a pi leh pu te chauhvin a chanchin an sawi ṭhin a ni a, lehkhabu-a a chhiar ṭhin mai kha a ni. Thil theih a ni lo, mahse a taksa ngeiin a tawng mek si. A chil a lem khawlh a, a hriat chian chak loh ber mai zawhna chu theih leh theih lovin a zawt ta hram a, "A nih chuan... eng kum nge? Vawiin hi eng ni nge?" a ti bah nuaih a.

Kawlhmingthanga chuan mak ti deuh takin a en a, "Nula, tek in a deng che nge i thluak a fîm lo zawk? Kum 1968, November thla ni 21 a ni e. Sorkar in Khawkhawm (Grouping of Villages) thupek a tih chhuah lai mek a nih hi. I form hak leh i landan hi rinhlelhawm viau mah se, kan mizo pui i nih vangin kan chhan chhuak che a ni hi." tiin a chhang a.

Miriami chu a nghing dawt a, meipui eng thlir chuan a ngawi tlawk tlawk a. "November 21..." a ti chhuak zawi sap a. Hei hi 1993-a Hriatpuia leh Zuala te bo hnu, ni q2-na chiah kha a ni a, 2018-a amah ngei a bo ni leh thla chiah kha a ni bawk. Kum 50 laiin hun chuan a theh kir a, mahse a nihna ngai, ni ngai leh thla ngaiah chiah a rawn theh lut a ni tihna a nih chu. 

Engkim hi insuih rual kual (connected) vek tihna a ni a, a hun kal tawh chu hun lo la thleng tur a ni a, hun lo la thleng tur chu a hun kal tawh a ni bawk si. Puk chhung thim lam chu a han hawi a, he puk ngei hi kum 50 hnuah chuan 'VOID' khawl lian pui awmna a lo ni dawn si a. Hremhmunah a tang ta a ni tih a inhre chiang ta hle a ni.

**********************************************************

2018

In chhung thim mup karah chuan investigation room inkalh khum tlat chhungah chuan Rini lungphu ri dawt dawt bak thawm dang hriat tur a awm lo. Banga thlalak i-tar te leh hrui sen inkham kual ruih te chu a phone flashlight chuan a chhun kual ruai a, a thluak chu a buaiin a thlaphang takzet a ni. 

Chutih lai tak chuan, in kawtah motor rawn ding thawm leh kawngkhar pui inhawng ri rawk thawm chu a hria a, a thawk a tawp dawn hialin a hria. Sir Sangzuala pen thawm chu sitting room-ah chuan a rawn ri phei chhat chhat a. A pen dan aṭang chuan a chau in, zanlai thlasik vawt tak hnuaiah chuan eng thil emaw rit tak phurh nei a ang hle. 

Sangzuala chuan a overcoat hnawm chu a phelh a, in chhung reh ṭhiap chu thil dik lo a awm tih hria ni awm takin a hawi kual nghal ruai a. A mit chu investigation room, a ruka a siam kawngkhar lamah chuan a fu ta chat mai. Kawngkhar tala-a a kalh ziah thin chu a lo inhawng huau a, a chahbi bawr pawh a lo la invuah va mai. 

Sangzuala chu a ding chawt a, a hmelah chuan mak tihna, lungngaihna leh beidawnna a rawn lang chhuak zut zut a. Thaw hak in, "Thudik a hre dawn ta..." tiin a phun ta sap a. Muangchangin, a thil tawn tur hre lawk vek tawh ang hrim hian kawngka lam chu a pan phei chhat chhat a. 

Kum 25 liam ta a he hun inkual (loop) a thlen hmasak pawh khan, Rini hi he room-ah hian a lo lut ru tawh a, chutah chuan an inhmachhawn tawh a nih hmel hle. Kawngka hawnna thir vawt thlur mai chu a vuan a, muangchangin a han herh a. A han nam a, mahse kawngka chu a che eih lo! 

A ngaihna hre lo takin a han nam na deuh a, a inhawng thei chuang miah lo. A chhung lamah chuan Rini'n a theih tawp chhuahin room kila wardrobe (thuamhnaw bawm) rit tak mai chuan  kawngka dang turin a lo nawr bet tlat a lo ni. A thlan fimin a bual huh vek tawh a, a khur hlawk hlawk bawk.

Sangzuala chuan a aia na in a han nek leh vak a, kawngka chu a rawn ri bur a, mahse a la inhawng chuang lo. Sangzuala mak ti chu a tawlh hnung det a. A thluak chu a rawn vir muai muai a. Kum 25 liam taa he thil a thlen (loop) ṭum khan, Rini hian kawngka hi a dang ngai miah lo! 

Kawngka hi a hawng anga, Rini nen an inhmachhawn tur a ni. Engtin nge hetiang hi a thlen theih? Thil thlen dan tur a inthlak ta tlat mai! "Rini? Kawngka hi hawng rawh!" tiin Sangzuala chu a rawn au vak vak a, a theih tawpin kawngka chu a rawn sawi vak vak a. Room chhungah chuan Rini chu a beng hup in a lo ṭap khur dar dar a. 

Wardrobe chu a rawn nghing dawt dawt a, kawngka inhawng tur dan nan chuan a chakna zawng zawngin a lo do ve ngar ngar a. Chutih lai tak, kawngka a inhawng mai tawh dawn emaw a tih lai tak chuan, a piah lawk darthlalang tukverh chu pawn lam aṭang hian a rawn keh ta chuai mai le! 

Darthlalang keh them chu chhuatah a tla darh chuai a, thlasik thli vawt tak mai chu a rawn tleh lut nghal huk bawk a. Rini chu a phu nasa lutuk a, a ṭe chhuak ṭhawt a. Tukverh keh aṭang  chuan pitar pakhat, kawrfual dum leh lukhum dum khum, dum veka inthuam hi a rawn lang hlawl mai. 

A hmel chu a dâng in a lang upa hle a, vun chuar tam tak a nei tawh a, mahse a mitmeng erawh a fiah in a thip hle thung. "Min lo zui rawh, tukverh aṭang hian rawn zuang chhuak nghal rawh!" a rawn ti fiah fak mai a. Rini chu a phu zawk a, hnunglama kawngka rawn insawh ri bur bur leh tukverha pitar mak tak lo lang hlawl chu a entawn sek a. 

Duhthlan tur dang a nei tawh hek lo, helai hmuna awm reng chu thihna mai a ni tih a hria a. Thih leh thih tiin tukverh ah chuan a lawn liam rawk rawk a, thim thamah chuan chu pitar dum veka inthuam nen chuan an kal bo zui ta daih a. A tawp nan tiin Sangzuala chuan kawngka chu a theihpatawpin a rawn nek leh a, wardrobe rit tak chu a tawlh hnung rawk a, Sangzuala chu room chhungah chuan a rawn lut ta thei ta. 

Mahse room chhung chu a lo ruak huai tawh! Tukverh keh aṭanga thli rawn thaw lutin parda a chhem phe hlep hlep bak hmuh tur a awm lo. Sangzuala chu chhuatah ṭhu sawp hnawkin a sam a tuai puat a, a hrethiam lo kher mai. Hun inkual chhuak (loop) chhungah hian hetiang thil hi a la thleng ngai lo, loop chu a chat ta... engkim a inthlak danglam ta angah ngaiin a mangang hle.

********************************************************

END OF SEASON 1