ONCE UPON A TIME IN MIZORAM (A mizo zombie horror story) Written by : Aaron Malsawmdawngzuala Episode - 9 : Ashes of Hope

  ONCE UPON A TIME IN MIZORAM

(A mizo zombie horror story)

Written by : Aaron Malsawmdawngzuala

Episode - 9 : Ashes of Hope

*****************************************************

Tiau chhum kârah chuan Muanpuia, Tluanga, Pi Zari, leh Hlimpuii te chuan thlam chu an va thleng ta a. Kawngka lo inhawng huau an hmuh chuan Pi Zari chu a tlan phei nghal a, "Kawngka a inhawng! Sawmtea a awm a ni ngei ang." tih leh thlam chhûng luh a rual a. "Nilo, Nu Zar! Kal suh!" Tluanga chuan a ti hman ṭawk a, mahse a tlai tawh. 

Pi Zari chu thlam chhûng a luh rual rual chuan a ding chat a. Thlam chhuat dâp, Sawmtea'n a hrei (axe) hmanga a lo chekna kaw huau mai chu an hmu ta a. Pi Zari chuan a hmui hupin a thlîr tlawk tlawk a, "Ka duh thei lo... eng nge awmzia? Kan thlam hi?" a ti tham ṭiak a. Muanpuia chuan fîmkhur takin chhuat awng chu a han bih a. 

"Thlam hi mithi tho-leh (hri-kai) ho khân an hual bet a ni ngei ang. A chhûngah U Sawmtea te kha an tâng ang a, chhuat hi ti chhia in a hnuai aṭâng hian an tlân chhuak a nih dawn hi." a han  ti nuah nuah a. Hlimpuii chu a arwn ṭap chhuak hial a, "A nih chuan ka u chu a la dam i tihna em ni?" tiin beiseina nên a han zâwt a. 

Muanpuia chuan hreh hmel tak hian, "Ka hre lo... mahse tlân chhuah chu an tlân chhuak ngei tih a chiang." tiin a lo chhâng a. Chutah, thlam hnung lam aṭâng chuan mithi rûm thâwm a rawn hnai leh ta tlat mai. "Chu... in hre ve em?" Tluanga'n a tih rual chuan tukverh dâp kâr aṭângin hri kai pakhat hi râpthlak zet hian a rawn vak lût ta thut mai a!

"Tlân ang u! Tlân rawh u!" Muanpuia chuan a ti ṭhawt a, ramhnuai lamah chuan an tlân chhe leh nghal dâwr dâwr a. Mahse an hma lawk hnim buk aṭâng chuan mithi dang a rawn zuang chhuak leh ta thut mai! A hma bera tlân Muanpuia chu a rawn bawh thal tawp a, a hrawk seh tumin a ka a ang tawn tawn mai a.

"Tlân rawh u! Min ngaihtuah suh u!" tiin Muanpuia chu indang ṭâng ṭâng chung chuan a au vak vak a. Mahse Tluanga chuan a ṭhianpa kalsan chu a tum hauh lo. A chempui chu lek kângin, hri kai lû-ah tak chuan a sât ta pawp mai a, thisen a per chhuai a, mithi pawh chu a zal nghal der a. An tlân chhunzawm leh a, mahse a hnuhnung bera tlân Pi Zari chu a inpâl tlu ta tlat mai le! 

Hri kai chuan a rawn hnaih tawh em em a, a sîr lawk aṭângin a dang a rawn inlar leh bawk a. Pi Zari chuan a fate lam a en a, a zui ve a nih chuan hri kai pahnihte hian an seh hman ngei ngei dawn tih a hrethiam a. A rawn tho thut a, midang ho tlanna lam ni lo, kawng pêng thuam lehlam zâwk, ramhnuai thûk lam pan chuan a tlân ta daih mai a! 

Hri-kai pahnihte chuan midangte chu um tawh lovin, Pi Zari tlanna lam pan chuan an tlan ve leh ta daih a. Rei fê an tlân hnu chuan Muanpuia chu a ding chat a, "Min rawn ûm tawh miah lo? Eng nge awmzia?" a ti deuh hu a. Hlimpuii chu hawi kualin a ṭap chhuak ta vak mai, "Khawnge ka nu? Khawnge ka nu kha a awm?!"

Tluanga pawh chu a hawi kual a, "Ka hnungah a rawn tlân ve reng khân ka hria a!" a ti phâwk hrû mai. Hlimpuii mangang chu let leh a tum a, mahse Tluanga chuan a lo dang vat a. "Nilo, Hlimi. Nang chu nilo. Tah hian Muanpuia nên lo awm rawh u. Keiman ka va zawng ang." a ti khauh fak a. A chempui thisen kâi hnuang chu hum nghetin, tiau chhum kârah chuan Pi Zari zawng tur chuan a let phei leh ta a.

***********************************************

Sikul office kawngka chu a rawn inkik dawt dawt a, "Bawihpui, min lo hawn tu...keimah ni." Marema aw ngei mai chuan a rawn ti lauh lauh va. Bawihpuii chuan rang takin ava hawng a, Marema leh Zauva chu thaw hlawp hlawp chung hian an rawn tlu lût titih a. An dâra buara ip lian zet pahnih chu chhuat dâp-ah chuan an nghat hnawk a, chu thâwm chu office reh tlawk tlawk chhûngah chuan a ri ring kher mai. 

Mahse, chu ip chhûngah chuan eitur tam tak awm mah se, tûman va ban nghal an tum hauh lo. Puii leh Bawihpuii te chu phâwk hrû hian an ding a. Bawihpuii chuan Marema thawmhnaw a thisen kai nuai mai leh Zauva hmel, tap lek lek mai a hmuh chuan a ngaih a tha lo kher mai. Zauva lah chuan kawngka chu a kalh nghal daih a, "Khawnge Chaka?" Bawihpuii aw chu a khûr dar dar a. 

Tuman an chhang lo, "In hnungah a rawn tlân ve a ni lo'm ni? Khawnge a awm? Marem... min chhâng teh!" Bawihpuii bawk chuan a han ti leh a. Marema chuan bang a ngheng a, muangchangin a thu thla hnawk a. A thal (bow) chu a hmer nghet takzet, "Bawihi..." a ti thâm ṭiak a. 

"Kan chhan hman lo a ni. Pu Hmuaka'n...a kap... a kâp palh a... a dulah tak. Hri kai ho khân an rawn nang  ching hman bawk si a... kan..." a sawi zo hleithei lo. Tap chung hian, "Nilo! In kalsan thei lo vang!" tiin Bawihpuii chu ṭe chel chul mai, Marema awm-ah chuan va ṭhâmin a thing nawk nawk a. 

"Min tiam a ni lo'm ni? 'Kan lo lêt leh ngei ang' in ti a ni lo'm ni? Engtin nge in kalsan theih? A la dam ang... a la dam hrim hrim ang!" tiin a tap nasa kher mai. Zauva chu rawn ṭawng chhuak ve in, "Bawihpui, a thi tawh... mahse a thih hma khan a tâwp thlengin nangmah leh Puii vênghim tûr che u in min chah asin." tap lek lek hian a rawn ti ve leh a.

Puii chu kil khatah chuan a ṭhu hnawk a, a lû a dawm vawng vawng a. Chaka, mi zaidâm tak, mangan lai pawha midang hnem ziah ṭhîntu kha tûnah chuan mithi tho leh ho ei tûr mai a chang ta si. A tawt up up a, a ṭap chhuak thei lo hial zâwk a ni. Marema chu a rawn ding chhuak tual tual a, a hmel chu a hma aiin a rûm tawh hle mai. 

Buara ip chu a han hawng a, chhang te, nepnawi, leh ei tur chi hrang hrang chu a rawn phawrh chhuak a. "Eitur chu kan nei ta. Chaka nunna hmanga kan lei a nih hi. Kan ei tûr a ni, chakna thar kan neih loh chuan kan dam chhuak dâwn lo. Chaka pawh khan kan thih hi a duh miah lo vang." a ti chang fak a.

***********************************************

Minute sâwm dâwn lai chu an nghak tawh a, mahse Muanpuia leh Hlimpuii tân chuan kum khat tluk hial a ni. Tiau chhum rawn zîng var mup mup kârah chuan Tluanga rawn lêt hun chu an lo nghâk ṭâng ṭâng a. "A va hmu ang em le? Keichu hrehawm ka ti êm mai," tiin Hlimpuii chu a ṭap khûr hlawk hlawk a.

Chutah, chhum kâr aṭâng chuan Tluanga hmel a rawn lang ta hlawl mai. Mahse amah chauh a ni. Hlimpuii chu a rawn tlân phei nghal a, "Khawnge ka nu chu a awm? I hmu lo em ni?" tiin a va zâwt nghal chuk chuk a. Tluanga chu a ngal-ah te leh a bânah te chuan hlingin a tai hliamna  hnuhma a awm nual a, a hmel chu a beidawng hlê bawk. 

"Ka hmu lo... tumah ka hmu lo," a ti zawi sap a. "A nih leh hri kai dang ho i hmu em?" Muanpuia'n a lo tih chuan, Tluanga chuan a lû a thing ringawt a. Hlimi chu a ṭhingṭhi hnawk a, a hmai hupin a ṭap ta hawm hawm mai. "Engtin nge kan tih ang? Pitar mai a ni tawh si... keizawng ka ngaihtuah êmai!" tiin a beidawng takzet.

Tluanga chu a inseh-ruh a, a han inngaihtuah vang vang a. "E taka... U Valtea khân a sawi tak e. Zawmthâng ruam pan thlâkna zêl-ah khuan a mawng tawpah lui a awm a ti a, thlam a awm bawk a ti. Chumi chu i zu pan phawt ang u." a rawn ti chhuak hlawl mai a. Hlimpuii chuan inhnit feih feih chungin, "Mahse ka nu kha... kan kalsan ngawt thei lo vang." a lo ti tham ṭiak a. 

Tluanga chuan a chempui chu a hum nghet sauh va, thutlûkna harsa tak a siam ta a. "Muanpui, Zawmthâng ruam kalkawng kha i la hria em? Khami lam pan khân U Muani te nufa leh ka nu te an chhuk mêk a, ka nau Fela'n a hruai mêk a ni. Sairawkherh chauh invênna an nei a, chuvâng chuan Hlimi hi luiah chuan zu hruai la. Kei chuan kawng ka rawn in-zawn chawp thei mai ang a, Nu Zari ka lo zawng leh thung ang." a ti ta mai a.

Muanpuia chuan a lo hnial vat a, "Nangmah chauh chuan a hlauhawm lutuk! Nu Zari chu zawng ho zâwk ang u." a lo ti a. Mahse Tluanga chuan, "Tunah hian dar engzat nge kan hre lo, chhum lah a zing nasa tulh tulh bawk si. Khua a thîm hma hian kal vat zawk rawh u, keipawh khaw thim hma a rawn thlen ngei ka tum ang." tiin a lo chhang let leh a.

Hlimpuii chuan mittui tling teuh chung hian Tluanga chu a en a, "Tluanga, ka nu chu rawn hruai let ngei ngei ang che aw..." a ti tham tiak a. Tluanga chuan a lu lo bu nghatin, "Theih tawp ka chhuah dawn lawm." tiin a lo chhang a, tichuan an inthen hrang ta a. Pi Zari erawh khawnge a awm hriat a ni ta lova, Tluanga hian a va hmu leh kher angem? Hri a lo kai ve der tawh angem tih chu tu hriat mah va ni suh.

**********************************************

Ramhnuai thûk pik tak leh thîm mup mai, tiau chhum chhah zet maiin a tuam mup mup kârah chuan Sawmtea te chu an tlân zêl a. Ni zungin thingzâr kâr vêla êng a rawn chhûn lût pheuh pheuh tih loh chu êng dang rêng hmuh tûr a awm mang lo. Siama pawh a bân tan chhum hlim a nih avângin a chau tawh hlê nâ a, mahse damchhuah ngei tumin a ṭhiante hnungah chuan inveng chung hian a lo insehruh ve tang tang a.

An hnungah chuan hri-kai rual sâwm-thum (30) vêl lai chu rûm ngûr ngûr chungin an rawn tlân darh sup sup a. Pu Tea leh Sawmtea chuan hrikai lo tlan hnai zual te chu silaiin an lo kâp thal pawp pawp a, mahse tlânchhiat pah a silaimu thun chawp zêl chu thil harsa tak a ni. Silaimu lah an nei tlêm tawh bawk si, an mang chu a ang hlawm kher mai.

Awmpuia chuan a thîrtiang hmang chuan a lo chhun thal ve pawp pawp a, Siama pawhin thing hmawr zum a chhar hlauh va, chu chu invên nân a lo hmang ve ṭâng ṭâng bawk. Pu Tea chuan silaimu a neih tlem tawh em avang chuan a silai kawm chu a hmang ṭangkai ta zâwk a, mithi ho lû-ah chuan a lo chhu thal ve tawp tawp hlawm a. 

Valtea erawh an zingah a che rang ber a, a chak ber bawk. A sa chan chem hriam zet chuan hri kai ho chu a sat thal tawp tawp hlawm mai, a that hnem bik malh malh kher mai. Inbeihna nasa tak hnuah chuan mithi ruang chu ramhnuai chirhdiakah chuan a let pheng phung tawh a. Rei fe harsa tak leh hah tak chungah an beih let hnuah chuan mithi tho leh pakhat chauh a awm ta. 

Chu hri kai awm chhun chuan Pu Tea chu thingkûngah a lo nawr bet mêk a, Pu Tea chuan a silai hmang chuan a hrawkah a lo rek bet ve ṭâng ṭâng a. Sawmtea'n va puih a tum dâwn chiah tih ah chuan mithi lû chu a rawn ri fawk a, a thle nghal sawk mai. Mithi chu a zawi hnawk a, Pu Tea chuan a nam sawn dâwrh a, a silai kawm chuan a hlap thlu nghal a. 

Rang takin Valtea chu a rawn tlân phei a, mithi lû-ah tak chuan a sa chan chem a rawn sat tlum pawk a. Pu Tea'n thâwm lo chhuahna lam a han en chu, a fapa Fela kha sairawkherh kengin a lo ding rân mai a, a hnungah Pi Kungi, Muani leh Kimkima te an lo awm ve bawk a. Heng  mângchhia zawng zawng kâra mahni chhûngte han hmuh leh chiah chu sawifiah rual lohvin a hlimawm khawp ang. 

Pu Tea chuan a nupui leh a fapa chu a kuah a, a mittui chu a rawn luang nghal zawih zawih a. "Ka van lawm tak em... in lo la dam chu ka va lawm tak em." tiin a ṭap chhuak hial a. Chutah Valtea chuan phâwk hrû hian, "Khawnge Tluanga?" a rawn ti chhuak hu mai. Pi Kungi leh Muani te chu hrilhhai takin an inen hu a, "Kan la hmu bîk lo... i bulah a awm a ni lo'm ni?" tiin an lo zâwt lêt a. 

Sawmtea pawh chuan, "Ka nu leh Hlimi in lo hmu em?" tiin a nu leh a nau chungchang a rawn zâwt ve nghal a. Muani chuan a lu a thing a, "Thlanmual atanga an inhloh hnu khân tumah an la hmu leh lo a lo ni." tiin a lo chhang a, Sawmtea chuan a lu a dawm vawng vawng mai. Pi Kungi beidawng ṭap lek lek chu Pu Tea chuan a lo hnem vat a, Tluanga chu khawiah emaw a la dam em em ang?" tiin a hrilh a. 

Valtea chu a han thaw hak a, hma lam thlîr ngar ngar chung hian, "Pu Te... Siama nên midang ho hi Zawmthâng ruam mawng luiah khan zu hruai la. Kei, Awmpuia, leh Sawmtean midang kan lo zawng thung ang." tiin thutlûkna a siam ta a. Pu Tea pawh chuan a lû a bu nghat a, "Ni e, a ṭha khawp ang. Kan inhmu leh ngei dâwn nia, kan lo nghak reng ang che u." tiin a chhâng a. Tichuan, beiseina chhete nen chu an hun tawn mek rapthlak tak kârah chuan chhungkaw hnih te chu an in-ṭhen hrang leh ta a, ramhnuai thîm mup leh tiau chhum kârah chuan an hmahun tûr hre hauh lovin an liam phei leh ta hlawm a.

**************************************************

Ramhnuai thûk leh pik mup kârah chuan hri kai pakhat, hmel rapawm zet mai, Sanga chu ngur chhur chhur chung hian a kal chhet chhet a. Thingkûng tam tak kâr ah chuan a hawi kual hrek hrek a. Chutah, a tukhum chu a rawn ri fawk a, a tlu bawk thlawp mai! Mahse a rawn tho leh nghal a, hnung lam a rawn hawi vat a.

Renga chu thing bung hum rân chungin a lo ding reng a, Sanga bekah chuan a hma aiina na zâwkin a han hlap leh pawp a. Sanga lû chu a thle vir nawk a, a thal leh ta tual mai. Renga chuan a bawhbet nghal a, a bula lungtum lian tha nelh nawlh chu chawi lawkin Sanga lû chu a chhu ta chawrh chawrh mai a. 

Vawi sâwm dâwn lai a chhut hnu chuan Sanga lû chu a sawm vek titih tawh a, a zal ta hnak a. Renga chu a ṭhu hnawk a, a thaw hlawi hlawi mai. Sanga ipte chu a han dap leh a, zozial leh nawalh (matches) a lo awm hlauh mai! "Tih-zia hlê mai," tiin a phun sup a, zozial chu ṭan-in a han khu hlat hlat a. 

Beiseina nei tlem tak chungin Zawmthâng Ruam lam pan chuan a kal chhunzawm leh ta a. Dârkâr chanve lai hriamhrei pawh nei lova a kal hnu chuan, a sîr mau hmun thîm ruih aṭâng chuan thâwm a hre ta tlat mai. Thingkûng phenah a fîmkhur takin a biru a. Chutah, Renga rin loh tak maiin Tluanga chu chempui hum rûn chungin mau hmun aṭâng chuan a rawn chhuak hlawl mai!

Renga pawh chu a bihrukna thingkung phen atang chuan a rawn chhuak ve nghal a, "Tluanga, eng nge hetah i tih? Nangmah in em ni i awm?" tiin a va zawt nghal a. Tluanga pawh chuan rin loh tak maia Renga a hmu chu a ka hau mai, "Ehe U Reng? Nang maw?" a lo ti hu mai a. Renga chu a han hawi kual a, "Tu te nen nge in awm? Khawi atangin nge i lo kal?" tiin a han zawt let leh a. 

Tluanga chuan a chempui hum lai chu a thlah dul deuh va, "Pi Zari ka zawng...kan inhloh daih a." a han ti chu Renga a meng phawk nasa mai. "In awm ho amaw? In inhmu amaw? A nih leh khawnge Hlimi leh Muanpuia?" tiin a zawt leh nghal. Tluanga chu a han thaw deuh hak a, "Zawmthang ruam an pan mek...keiin Nu Zari ka zawng thung a, ka nu leh ka nau leh U Muani te nufa pawh chumi lam chu an pan mek." tiin a lo chhang leh a. 

Renga chu a ngawi vang vang a, "Chem kha min lo pe la, nang pawh Zawmthang ruam chu lo zuk pan rawh. Nu Zari chu keiman ka lo zawng ang, ka rawn hruai ve mai ang." a han ti chang fak a. Tluanga chuan a lu a thing a, "Ni love...kan zawng dun ang.." a sawi zo hman lo. An in-biak lai tak chuan mau hmun aṭâng chuan hri kai pakhat hi chak zet hian a rawn tlân thut a, Tluanga chu a rawn zuan thlu ta mai. 

Tluanga'n a chempui a thlauh va, mithi tho leh chuan Tluanga hrawkah tak chuan a seh ta ngawng ngawng mai a, thisen a rawn chik zawr zawr mai! Renga'n chempui chu a chhar vat a, mahse mithi tho leh dang pahnih an rawn lang leh nghal! Renga chuan a lo bei lêt ṭâng ṭâng a, a vai thal pawp pawp hnu chuan Tluanga lam a va pan leh a. 

Tluanga hrawk chu a thler duai tawh a, mithi chuan a lo la seh ngar ngar mai. Renga chuan mithi chhipah tak chuan a sât tlum pawk a, a zal ta der a. Mahse, Tluanga tân chuan kawng a tâwp tawh. A hrawk thler aṭâng chuan thisen a rawn baw chhuak hawk hawk a, a ṭawng thei tawh lo. 

Renga chuan a kuah bet a, "Tluanga? Tluanga... tal suh, hahdam rawh... hahdam rawh" tiin a mittui a tling nghal teuh mai. Tluanga thawk a zawi tial tial a, hri a kai ve tak tak hmaa a tih hlum mai a ngai tih a hria. Lehlam hawi chungin, mittui luang zawih zawih chuan Tluanga lû-ah chuan a sât ta siah mai a!  Tluanga tal vak vak pawh chu a zawi nghal hnawk mai. Renga chu a ding chhuak a, a mittui hru zeuh chungin Zawmthâng Ruam lam pan chuan a kal ve leh ta hnak hnak a.

*********************************************

Ramhnuai thûk pik tak leh thîm mup mai, tiau chhum chhah zet maiin a tuam mup mup kârah chuan Sawmtea leh Awmpuia leh Valtea te chuan midang bo ta te chu an zawng mêk zêl a, tumah chu an inbe lo. Ramhnuai reh ruih leh hri-kai ho rûm thâwm hla deuhva hriat tûr awm leh zeuh zeuh thin kârah chuan an inzui zel a, hri kai tumah an tawng rih lem lo. 

Rei fê an kal hnu chuan hri kai pakhat an tawng fu ta tlat mai a. Sawmtea chuan a ṭhiante chu melh zeuhvin, "Keiman.." a han ti thûm chhak a. Hri kai chuan Sawmtea te chu a rawn hmu ve nghal bawk a. Sawmtea chuan a silai chu ak ṭha in, rang takin a hrei chu a phawrh ta zâwk a. Hri kai chu rawn tlân pheiin a rawn rûm ngûr ngûr mai a, mahse Sawmtea thinrimna leh manganna chu a inup nasa tawh lutuk tlat. 

Chiang em em hian a bekah tak chuan Sawmtea chuan a hrei hmang chuan a lo chek ri chawk mai a, mithi tho leh thisen thâng zet mai chu a per chhuai mai a. Chutah, an sîr lam deuh aṭâng chuan hmeichhe aw hian, "Ka u.." a rawn ti tham ṭiak a. Sawmtea chu a va hawi phei vat a, a nau, a zawn mêk Hlimpuii a va hmu chu a meng phâwk nasa kher mai. 

Hlimpuii bulah chuan Muanpuia a lo ding ve bawk a. "Bawihte.." tiin Sawmtea chu a va tlân phei a, a nau nên chuan an inkuah thlawp a. Thihn leh dam kâra an unau an han inhmu leh thei chu an mittui a tla dun zawih zawih mai. Sawmtea chuan a nau hmel chu a han en a, "I ṭha em? An seh lo che tiraw? I na lo tiraw?" tiin a zâwt nghal mawlh mawlh a.

Ṭap chung hian Hlimi chuan, "Aw ka ṭha..mahse ka nu.." a ti chuai raih mai. Ngaihṭhat loh hmel tak hian Sawmtea chuan, "Tinge, tinge ka nu? Khawnge a awm ve?" tiin a zâwt leh nghal a. Hlimi chuan a chhâng hleithei lo, a ṭap nasa tulh tulh mai. Muanpuia chu rawn pen hnaiin, "Kan awm ho char char a, mahse kan tlânchhiatna lamah kan hloh daih a. Tluanga'n a zawng mêk a, kei nin Zawmthâng ruam kan rawn pan mêk a nih hi." tiin a rawn hrilhfiah ta a.

Sawmtea chu a mangang nghal kher mai, a nu pitar tawh tak, tiau chhum zînga mahni chauhva a awm tûr a ngaihtuah chuan a ngaih a ngam thlawt lo. "Anih khawi lam aṭângin nge in lo kal? Ka nu chu khawi lamah nge a bo?" tiin a zâwt leh a. Muanpuia chuan zawi sap hian, "In thlam lam aṭângin kan lo kal." tiin a chhâng a. 

Chuveleh a silai ah chu la thla in Muanpuia chu a pe a, "Ka nau hi Zawmthâng ruam mawnga lui lamah chuan hruai thla ang che u... ka nu chu keiman ka zawng dâwn." tih leh a hreipui chu a hum nghet sauh sauh va, tiau chhum chhah zet kârah chuan tlân a rual ta nghal mai a. Awmpuia leh Valtea te chuan ko eng ang mahse Sawmtea chuan a ngaithla tawh eih lo. Chuveleh Valtea chuan, "Awmpui, an pahnih hian zu hruai la, Sawmtea ka va umzui ang e.." tih leh tlân a rual ve nghal a.

***********************************************

Valtea chuan Sawmtea chu a ûm zêl a, mahse Sawmtea chu a tlân chak em avâng leh tiau chhum a tam em avâng chuan a hmu zo ta tlat lo. Chhum zîng chhah zet kârah chuan metre hnih thum vêl pawh hmuh fiah a har tawh hlê a ni. Valtea chu a ding a, a thaw hlawp hlawp a, ring tak hian, "Sawmte... Sawmte...!" tiin a au vak vak a, mahse chhângtu an awm lo. 

A mangang kher mai, Sawmtea kha thinrim leh engmah pawisa tawh lo ang mai khan a awm si a, thutlûkna dik lo a siam palh a hlau a ni. A hawi kual a, mahse engmah hmuh tûr a awm lo. Chutih lai tak chuan a sîr, tiau chhum kâr aṭâng chuan hri kai pakhat hi a rawn lang thut mai a, Valtea chu a rawn bei ta. 

Mahse Valtea chu midang ang a ni ve lo, a che a rangin a hriamhrei pawh hman a thiam hlê a. Awlsam tak hian a sa chan chem chuan a lo vai pawp a, chu hri kai pa lû chu a phel phawk mai a, a tlu thal nghal tawp a. A hnung lamah a dang an rawn inlar leh a, pathum vêl lai an ni. Mahse Valtea chuan a lo sât thlu leh vek a, boruak chu a reh leh ta diak a. 

Thlarau khawvêl ang maiin ramhnuai chu a reh em em mai a. Valtea chuan a lû a dawm a, zawi sap  hian, "Khawi lamah nge maw i tlan hman le?" a ti nuah nuah a. Chutih lai chuan a hnung lam aṭâng chuan tu emaw hian fîmkhur takin a rawn pan mêk tih a hre der mai si lo. Chutah, a tukhum chu a rawn ri fawk a. 

Valtea lû a hai nghal muai muai a, a mit sulh a, nikhaw hre lo chuan chirhdiakah a let ta der mai a. Hnung lam aṭâng chuan Pu Rina chuan thing bung lian ve tak hian a rawn vua chu niin, ani pawh kha a lo la dam ve reng a ni. Pu Rina chuan Valtea let reng chu a en vang vang a, tiau chhum kârah chuan mithi tho leh ve tho emaw tiin a lo vaw palh a lo ni. 

"Khai aww... mithi tho leh ve tho emaw ka tia, a va han pawi thin tak." tiin a lû a dawm vawng vawng mai a. Valtea hi hri kai ah ngaiin a lo vaw palh tawh si, a rawn harh leh hunah a lakah a thinrim dâwn tih a hre lawk a ni ngei ang, a tih ngaihna hre lo chuan Valtea sa chan chem chu a la a. Tichuan, dawihzep hmel taka hawi kual hruk hruk chungin Valtea let reng chu chhum zîngah chuan a kalsan leh ta nghal daih a.

********************************************

Sawmtea chu thlabâr leh mangang zetin ramhnuai pik tak kârah chuan a tlân hlawp hlawp a. A taksa chu a chau tawh hlê a, mahse a nu, Pi Zari thlabâr taka chhum zîngah a vâk kual tûr a ngaihtuahna chuan thahrui thar a pe hi a ni ber mai. An thlam awmna hmun kha a thleng hnai tawh hlê a, a au vak vak a. 

"Nu..nu..khawnge i awm?" tiin a mittui chu a tling teuh tawh mai a. Mahse, chhângtu rêng an awm lo va, ramhnuai reh ruih leh vawt vûk mai chuan a beidawnna a ti zual hle a, a mittui chu a hmai chirhdiak kai hnuang mai ah chuan a rawn luang thla ṭan ta hial a ni. Chutah, a hnung lam aṭâng chuan mithi tho leh rûm thâwm, zâwi tak si, mahse râpthlâk zet mai hi a hre ta tlat mai. 

Sawmtea chu a va hawi phei vat a, a hriamhrei chu lek kâng nghalin a inring nghal hle a. Chutah le, a thil hmuh chuan a ti-ding chawt a, a meng phâwk hrû a, a thinlung chu hmun tam takah a keh sawm nghal vek hi a ni ber mai. A mittui chu a rawn luang nghal zawih zawih a, a hma zâwnah chuan Pi Zari, a nu ngei mai chu a rawn kal phei chhet chhet a. 

Mahse, chu nu chu a nu, a hmangaih êm êm leh amah duat êm êm tu kha a ni tawh lo, hri a lo kai ve tawh reng mai hi a lo ni. Pi Zari vun te chu mithi vun ang maiin a dang var pup a, tiau chhum kârah chuan a hmel chu a râpthlâk takzet. A ke-ah chuan hliam na tak a nei a ni tih hriat takin a rawn bai phei auh auh a, a mitmeng-ah chuan hmangaihna rêng a awm tawh lo va, seh tumin a fapa chu a rawn pan zel a. 

Sawmtea rilru chu a na takzet a, kha leh chen thlabâr takin a nu zawngin a vâk kual hrep a, a hmuh leh hmasak ber dân lah chu mângchhia ai pawh a râpthlâk a ni si. A hrei hum lai chu a thlauh a, chirhdiakah chuan a ṭhingṭhi hnawk a, a ṭap ta hawm hawm mai. Pi Zari chuan a fapa, rilru na taka ṭap mêk chu tunge a nih a hre ve tawh si lo, a rawn ngûr ta chher chher mai a.

Sawmtea chuan invênna chang pawh a hre tawh lo, a tliak hnawk a ni ber mai. A â vek a, aw chhuah meuh chuan a nu hrikai hmel râpthlâk zet en ngawih ngawih chung chuan a ṭap vak vak a. Pi Zari lah chuan pan phei zelin, a ka atang chuan chil thli thâng zet a rawn luang thla nguah nguah bawk a.

A rawn thleng dâwn tawh tihah chuan, chhum zîng aṭâng chuan Renga a lang thut a, a thahrui zawng zawng sâwm khawmin Pi Zari chu a rawn tlawh thal tawp mai a. Renga chuan Sawmtea ṭhingṭhi mêk, mahni invêng thei tawh lo khawpa kehchhia chu a va sawi vak vak a, "Sawmte..harh rawh...kan kal angai." tiin a pawt vak vak a. 

Mahse, Sawmtea chu a harh fîm tawh lo a ni ber mai, a mit hmuha a nu mithi tho leh a chang ve tawh ta mai chu a pawm thei tawh tlat lo a ni. Sawmtea chuan inhnit hlawp hlawp chungin, a hmaa mithi rawn tho leh mêk, a hringtu nu ngei mai chu a kâwk a, "Ka nu...U Reng..ka nu saw.." tiin a aw chu a chhuak thei ṭâwk a ni. 

Chutih lai chuan Pi Zari chu a rawn tho leh a, a rawn phei leh ta chhet chhet mai. A ngûr thâwm chu a ring tial tial a, a thle deuh sawk sawk reng bawk. Renga chuan thil thleng mêk chu a hlauhawm tial tial dawn a ni tih hriain, Sawmtea chu a darah a tham tho lawp a, "Sawmte..kan kal angai...khawngaihin kal ang." tiin a nam phei rawk rawk a. 

Sawmtea chu ava hawi let leh hram a, a nu, hri kai tawh, ngûr chhur chhur mai a kalsan tûr chu a rilru a na takzet a ni. A  tawp nan a va hawi lêt leh ṭâwk a, mahse a nu hlimthla chu tiau chhum chhah zet kârah chuan a fiah lo tial tial a, a bo ta daih mai. Hreh tak chung chuan Sawmtea chuan a nu chu a kalsan ve ta a.

An tlânna lam apiangah chuan a nu hmel leh a mize zaidâm tak kha a mitthlaah a rawn lang zêl a, mahse tûnah chuan ramhnuai thûk leh thîm mup kar ah chuan a kalsan a ngai si. Renga chuan Sawmtea chu pawt deuh dawt dawt chungin Zawmthâng Ruam lam pan chuan a tlân pui zêl a, chhum zîng chuan an hnung lam chu a khuh hneh zêl a.

**********************************************

END OF EPISODE 9