ONCE UPON A TIME IN MIZORAM (A mizo zombie horror story) Written by : Aaron Malsawmdawngzuala Episode - 5 : No Way Back

 ONCE UPON A TIME IN MIZORAM

(A mizo zombie horror story)

Written by : Aaron Malsawmdawngzuala

Episode - 5 : No Way Back

*******************************************

FLASHBACK – 6:30 AM

Zîngkâr dâr ruk leh a chanve a ri a, Lungthlir khua chu manganna leh hlauhna chuan a chîm hneh tawh hle. Zova te in chhûng pindan thim laiah chuan Muani leh a fapa Kimkima chu an inkuah chawt a. Kimkima chuan hlau takin a nu kawr chu a hmer ngar ngar a, "Nu, ka hlau e, Apa kha a lo lût leh ang em?" tiin a khûr hlawk hlawk a.

Muani chuan a fapa lû-ah chuan a han chul a, a mittui chu thup hram hram tumin, "Hlau suh Bawiha, engkim a ṭha leh vek mai ang. Kan him dâwn alawm," tiin a thlamuan a. Mahse chutih lai tak chuan pâwn lam aṭâng chuan mangang au thâwm a rawn chhuak ta tlat mai. "Muani! Min pui hram teh! Kawngka hi lo hawng teh!"

Chu aw chu Muani chuan a hre chiang hle—YMA President Pu Rina kha a lo ni. Muani chu a thawk a rawn sak nghal ṭalh mai a. A chil a lem dawk a, "Bawiha, hetah hian lo awm tlat rawh." tiin a fapa chu pindan chhûngah chuan a kalh khum a, in chhûng lamah chuan fîmkhur takin a va chhuak phei a.

Tukverh dârthlalang aṭânga a va dâk chu, a thil va hmuh chuan a thinphu a ti rang kher mai. Pu Rina chu a rawn tlân phei hlawp hlawp a, a hnungah chuan mithi tho leh pahnih hian an rawn ûm zui a. Chu mithi pahnihte chu Muani ṭhiante ngei, vawi tam tak tui kâng a nghah pui ṭhin, Thuami leh Rini te an lo ni!

Muani chu a chiai em em a, chet ngaihna pawh a hre lo. Pu Rina chuan kawngka chu a rawn chum dawt dawt a, "Min chhan rawh! Muani, kawngka hi lo hawng teh!" tiin a au chel chul mai  a. Muani chuan chutia khawtlâng hruaitu meuh mangang em em han puih loh ngawt chu niin a hre si lo.

Kawngka chu a hawn sak a, a hawn rual rual chuan Pu Rina chu a rawn bawk lût titih a, Muani chu a rawn nek thal nghal thuai a. Mahse kawngka chu an khar hman tlat lo! Thuami leh Rini te chu in chhûngah chuan an rawn lut hman ta tlat mai. Thuami chuan Pu Rina chu a pan hmasa a, a ngur khum ta chhur chhur mai a. 

Pu Rina hlau lutuk chu bang kil lamah a tawm chawih chawih a, "Min pui ru! Ka duh lo!" tiin a ṭê chêl chul a. Muani chu a rawn harh zawk a, thûk bula chhemthei chu a la lawk a. Rini rawn phei mêk bekah chuan a va hem pawp a, Rini chu a thal nghal thuai mai. Chutah Muani chuan Thuami chu hnung lam aṭângin a thukhumah tak a va hlap leh pawp a, Thuami chu Pu Rina hma zawnah chuan a tlu bawk thlawp a. 

Muani chuan a ṭhiannu chu a va thut bet a, a thinlung chu a rûm vawng vawng a. Kum 20 chuang a lo kawm tawh, a thuruk zawng zawng a hrilh ṭhin a ṭhiannu chu, tûnah chuan ramhuai-ah a chang ta si. Muani chuan chhemthei chuan Thuami lû-ah chuan dimna tel hauh lo hian a hlap ta siah siah mai. 

Thisen leh thluak nâwi vel chu Muani hmai-ah chuan a per chhawk chhawk a, mahse a tâwp thei lo. "Tinge? Tinge hetiang hian i awm ve?" tiin a au vak vak a, a hlap zui zêl a. Thuami lû chu a hek huam tawh a, mahse Muani chu a tawp thei lo, a mittui a tla zawih zawih a. "Muani! Muani... en rawh!" tiin Pu Rina chuan hlau takin a lo ko vak vak a.

Rini tlu mek chu a rawn tho leh ta tlat mai. Mahse Muani chuan a hre tawh lo, Thuami lû chu a lo la vaw char char a, a sawm nuai tawh mai. Rini chuan Pu Rina chu a pan leh ta a. Pu Rina chu a mangang kher mai, "Nilo! Ka duh lo! Rin... Rinte, keimah i Pa Rinmawia ka nih hi!" a han ti thul, mahse chu mithi tho leh chuan hriatna a nei tawh lo.

Rini chu a thleng ṭêp tih ah chuan, a tâwp chat a. Chutah, a mitmu veilam aṭâng chuan tûl thîr hmawr hraw tak mai hi a rawn lawr zawk a! Rini chu a khûr cher cher a, a zal ta hnawk a. Pu Liana a lo ni, "An ûm lai che kha ka hmu a, ka rawn ûm zui ve nghal che a nih hi," Pu Rina en pah chuan thaw hlawp hlawp chung hian a han ti a. 

Muani lam hawi chuan, "Muani, i ṭha em? Khawnge Kimkima?" tiin a zâwt a. Muani chu a chil a lem leh dawk a, "A ṭha... pindanah a awm," a tiin a chhang a. Pu Rina chu a la khûr dar dar a, "Khawnge i chhûngte?" tiin Pu Liana chu a zâwt a. Pu Liana chuan a in-ah a kalhkhum mek thu sawiin, "Nang, khawnge i nupui leh i fapa an awm ve?" tiin a zawt ve leh a.

Pu Rina chu a hnual ruih a, "In ka thlen hma in Rini leh Thuami te hian min rawn bei thut a, Muani te in lam pan hian ka tlan phei leh ta tawp mai a nih hi." tiin a lo chhang a. Chutih lai tak chuan, pâwn lam aṭâng chuan mithi tho leh rûm thâwm a rawn hnai leh ta. Mithi tho leh panga (5) vel hian in chu an rawn pan mêk a. 

Pu Liana chuan hmanhmawh takin kawngka va khar a tum a, mahse a rin loh lutukin thil a thleng ta tlat mai. Pu Rina chuan hnung lam aṭângin Pu Liana chu a nam ta thut mai a. Pu Liana chu a inpal khut a, in hma zawn mithi tho leh ho kârah chuan a va inbarh lût ta mai! Mithi panga te chuan Pu Liana chu an lo man bet a, in chhûngah chuan nawr lûtin an seh rawn ta chiam chiam mai a!

Thinrim tak hian, "Pu Rin! Eng thil nge i tih kha? I mawl em ni?" tiin Muani chu a au ṭhawt a, mahse a tlai tawh. Pu Liana na tuar au thâwm chu hriat a hrehawm takzet, a vun te chu an seh thler hawk hawk hlawm a. Pu Rina chuan Muani chu chhân pawh chhâng lovin, mahni hmasial takin pâwn lamah a tlân chhuak zui daih a. 

Pu Liana chuan thei leh thei lo hian Muani chu a rawn en a, a kâ aṭâng chuan thisen a rawn baw zawih zawih a. "Muani... tlân rawh u... i fapa hruai la... tlân..." a sawi zo hman lo. A tâwpah chuan Pu Liana chu a zawi ta hnawk a. Muani chu ṭap tlawk tlawk chungin pindan lamah a tlân lût a, a inkhalh hnan leh ta hmak mai a.

************************************************

7:20 AM

Muani chuan a thil tawn râpthlak tak chu a sawi zo va, in chhûng chu a reh leh ta tlawk tlawk mai. Chhuat laia Pu Liana ruang, a lû vun thler huau mai aṭânga thisen thâng zet rawn chhuak hmuh tur awm zawng zawng te nen chuan boruak chu a rit zual hle mai a. Pi Kungi chu thâwk la deuh kawk chungin a rawn ṭawng chhuak hmasa ber a. 

A hmêlah chuan thinrimna leh mak tihna a inpawlh nuai tawh a, "Pu Rina chu a va lo van râpthlak ve le! Khawtlâng hruaitu, YMA President meuh ni si, a dâwihzep hle mai, ka rin ang a ni lo tawp mai. A va han nunrâwn thlâk tak em!" tiin a phun hlawk hlawk a. A mittui chu a tla zawih zawih a, a inhnit leh feih feih thin.

Sawmtea chu kil khatah chuan a ṭhu ngawi reng a, a hreipui chu chhuatah a nghat a. Zawi sap hian, "Ka nu leh ka nau... i hmu em? In in lamah hian an lo kal ve mial lo maw?" tiin Muani chu a zâwt a. Muani chuan a fapa Kimkima lû-ah chul pah chuan a lû a thing a, "Aih, Sawmte, an lo kal lo. Pu Rina kha a tlanchhuak nghal daih a, a bak chu thil thleng i hriat tawh ang kha a ni mai." tiin a lo chhâng a.

Sawmtea chu a ngawi leh ta vang vang a. A nu Pi Zari leh a nau Hlimpuii te nufa thlabâr taka an biru kual vel tûr chu a mitthla a, a rilru leh ngaihtuahna chu a tawt up up mai. Pu Tea chuan a ṭhianpa, Pu Liana ruang chhuat laia let reng kha a en tlawk tlawk a. A mit chu a sen deuh râm a, "A va han pawi tak em... a pawi takzet a ni. Liana, ṭhianpa, hetiang tûr hi a ni lo asin." a ti chuai raih a. 

A ṭhianpa, midang himna tur atana a nun a chan ta mai chuan a ti na takzet a ni. Awmpuia chu rawn pên hnaiin, "Sawmte, engtin nge kan awm zêl dâwn? Kan tâng reng thei dâwn si lo va, mithi tho leh ho thâwm saw a rawn hnai leh tan tawh ania." tiin a rawn zâwt a. Sawmtea chu zawi muangin a rawn ding a, a hreipui chu a hum nghet sauh va. 

Amaherawhchu, a hma anga thu petu nih reng chu a tum ta bik lo. "Pu Te, eng nge i ngaihdan? Hetah hian kan him rih maithei a, mahse ka nu leh ka nau ka ngaihtuah ve bawk si?" tiin Pu Tea lam chu a hawi ta zâwk a. Pu Tea chuan thawk a han la hawk a, "Hetiang hian ti ang u. Tluanga leh Fela hi hetah lo awm se, kan nu leh Muani te nufa hi lo awmpui rawh se. Thâwm rêng rêng chhuah loh tûr, kawngka leh tukverh zawng zawng hi chhung lam atangin in kalh vek dâwn nia. A bak zawng—Sawmtea, keimah, Siama leh Awmpuia hi chuan Pi Zari leh Hlimpuii zawng tûrin khaw chhûng kawtthlêr kan zawh leh phawt mai dâwn em ni ang? Sawmtea hian kan tân thil tam tak a ti tawh a, a nu leh a nau zawn hmuh sak hi kan bat a ni." a ti chang deuh fak a.

Pi Kungi chuan a pasal bânah chuan a lo vuan vat a, "Nilo, Tea. Sawtiang mithi rual kârah sawn in chhuak thei lo vang! Silaimu pawh i neih mang tawh loh kha... min kalsan suh u." tiin a phal lo nasa mai a. Mahse Pu Tea chuan nupuii chu a dârah vuanin a en rân a, "Kungi, Sawmtea hi kan chhungkaw chhanhimtu a ni a, amah vânga tûna la dam kan ni. Tlangval ṭhenkhat dâwihzep taka an tlân chhiat laiin amah hian min hruai chhuak a nih kha. A nu leh a nau zawn hmuh sak hi kan tih tûr a ni. Sawmtea a awm chuan kan dam chhuak dâwn alawm, lo lungngai suh," tiin a thlamuan a.

Pu Tea chuan a fapa te pahnih, Tluanga leh Fela chu a ko hnai a. Chuang fek fawk hian, "Nangni pahnih hian in hmanrua hi thlah miah suh u. In nu leh Muani te nufa hi in kutah a awm. Tlangval in nih tawh kha, in vêng hneh tûr a ni." a ti thûm chhak a. Tluanga chuan a chempui lek kângin, "Ka hria e, Ka pa. Muani leh ka nu hi chu kan lo awmpui ang, thawm engmah kan chhuah miah lo vang. Engtin mah an awm lo vang, min ring rawh." tiin huaisen tak leh inring tawk tak hian a lo chhang a. 

Fela pawh chuan, "Ka sairawkherh hi ka thlah miah lo vang. Lo hmanhmawh ula, him takin lo kîr leh dâwn nia." a lo ti ve bawk a. Siama chu tukverh dârthlalang ah chuan a va dâk leh dê dê a, "Pâwn lam chu a reh rih hle mai. Mithi tho leh ho kha mi in hnung lamah an kal khawm a nih ka ring. An reh lai hian chhuat vat a ṭha ang," a rawn ti a.

Muani chu a rawn ding thut a, "Ngawi lawk teh u, thil ka lo mangnghilh daih alawm!" tiin pindan lamah chuan a va tlân lût a. Rei lo têah Zova silai chu a rawn pawm chhuak ta hlawl mai. Sawmtea hnênah chuan hlân pahin, a silaimu bâwm pawh chu a pe nghal a. "Zova silai a nih hi, silaimu pawh hi sâwm (10) lai a la awm. Hman ṭangkai in tum dâwn nia. Fîmkhur ula, Sawmte... him takin i nu leh Hlimi te chu rawn hruai haw leh rawh u." a han ti a.

Sawmtea chuan chu silai rit leh hraw zet mai chu a lek vung vung a, tûnah chuan a ralthuam a famkim ta hle a mai. Fîmkhur tûrin an in-chah hlawm a, tichuan Tluanga, Fela, Pi Kungi leh Muani-te nufa chu an chhuahsan ta a ni. Mahse, thil pakhat an hre lo. Pu Tea silai puak thâwm kha a rin êm avângin khawchhûng mithi tho leh hmun hla deuhva awmte pawh khân an rawn hre phâk a. Sawmtea te in hma lama an chhuah tum lai hian, in hnung lam aṭâng chuan mithi tho leh sâwm (10) rual vel chu riltam hmel tak leh rûm chhur chhur chung hian Zova te in chu an rawn pan mêk a ni tih reng an hre hauh lo mai.

**********************************************

7:35 AM

Renga te huan thlam chhûng chu a thim deuh ruih a. Ni chu a tlang sâng tawh nâ a, zîng kâr tiau chhum(fog) chuan thlam chu a la tuam chhuak mêk a ni. Renga chu thlam kawngka atang chuan dâk deuh dê dêin, a chempui chu a hum nghet hlê a, "Mithi tho leh ho rûm thâwm ang kha a rawn hnai tial tialin ka hria," a ti zawi sap a.

Pi Zari chu a rawn ṭawng chhuak ve a, "Engtin nge kan awm zêl dâwn, Renga? Hetah hian kan tâng reng thei dâwn lo ania. Ei leh in tur kan nei si lova, he thlamah hian him rih pawh ni ila riltamin kan thi vat dawn." tiin a rawn zawt a. Renga chu a thaw hawk a, "Hei lo chu hmun dang kalna tûr a awm rih chuang lo, kan khua hi a hla si a. Khaw ṭhenawmte va pan dâwn pawhin kan khaw kawtthlêr pangngai aṭânga kal a ngai dâwn a, mahse chutah chuan mithi tho leh an tam tawh si a. Engpawh nise kan him em em ang, ngaihdan ka la siam fel thei mai rih lo a ni." tiin a lo chhang leh a.

Hlimpuii chu kil khatah a ṭhu ngawi reng a, a hnuah a rawn ṭawng chhuak hlawl mai. "U Reng, Pi Hliri chu engtin nge hri a kai ve reng reng ang le? Tu-in nge seh ve ang le?" tiin a rawn zawt ve leh a. Renga chu a thaw hak a, "Remruata in aṭânga ka pawm chhuah khân kawtthlêr kha a buai nasa tawh hrim hrim a. Tu emaw berin Sub-centre-ah luhchîlin a lo han seh pawh a ni mahna." tiin a lo chhâng a.

Mahse, Hlimpuii chuan Renga ngaihdan chu a pawm hauh lo, "Nilo, U Reng. A kut kha tukverh banah a inphuar i ti a, tu emaw chuan a phuar a ni ngei ang. Kawtthlêra mithi tho leh zînga mi-in lo seh pawh nise, Sub-centre chhûng i luh khân Pi Hliri lo midang tumah an awm lo i ti bawk si a." Chu zawhna chuan thlam chhûng boruak chu a ti reh zual tlawk tlawk mai. 

Tu-in nge Pi Hliri kha phuar? Mihring nunrâwng takin Pi Hliri chu a phuar lui tihna em ni ang? An ngawih ṭhap lai chuan mangang taka au thâwm an hre ta tlat mai! Renga chuan kawngka aṭâng chuan a va bih vat a. "Zorama a nih saw!" Pi Zari chuan a lo ti nghal vat a. An vêng tlangval Zorama chu mangang tak hian huan hnim buk kârah chuan a rawn tlân phei buan buan a. 

A hnungah chuan mithi tho leh pakhat hian hnai zet hian a rawn ûm a. Renga chuan kawngka chu hawng ṭhuaiin, "Zoram! Zoram! Helamah!" tiin a au vak a. Zorama chuan thlam chu a rawn hmu a, a hma zawnah chuan eng nge awm tih pawh ngaihtuah hleithei tawh lo chuan a rawn tawn phei pawp pawp mai a. 

Mahse, a rawn thlen hma chuan mithi tho leh chak zet mai chuan a zuan ta thut mai le! Zorama chu hnim buk kârah chuan a bawh thlu rup mai. "Thlam kha lo chhuahsan suh u!" tiin  Renga chuan a chempui chu a lek chhuak nghal a, Zorama awmna lamah chuan a va tlân phei ve ta rawk rawk a.

A va thleng chu mithi tho leh chuan Zorama beng lehlam chu a lo seh fan dawr dawr a! Thisen a chik zawr zawr a, a râpthlak takzet. Zorama na ti chu a ṭê ring kher mai. Chutah, mithi tho leh chuan Renga lam chu a rawn hawi phei a, a ngur ta chhur chhur mai. Renga chuan a chempui chu a han vawm (throw) ta pawp a, mahse a vawm sual ta tlat mai! 

A lû-ah ni lovin a hrawkah tak chuan a va bur chat a. a thluak a vawm fuh loh avâng chuan a thihpui hauh lo. Mithi tho leh chu a hrawka chempui bur vu chung chuan Renga lam pan chuan a rawn pên phei leh ta mai a. Renga chuan hmanraw dang keng tawh hek lo, a va tlân phei a, a thahrui zawng zawng sâwm khawmin chu mithi chu a dulah tak mai chuan a darin a va su pawp a. 

Hnim buk kârah chuan an let dun tual tual mai. Mahse mithi chu a rawn tho leh nghal a, Renga chu a zuan ta thut mai le! Renga chuan chupa hrawka a chempui bur vu mai chu lo vuanin a nam thûk zual sauh va, thisen a baw hawk hawk a. Mahse a hneh dâwn ta hauh lo mai, Renga chu a mangang ve ta kher mai a.

Chutah, mithi lû chu a rawn ri pawp a, leiah chuan a thal tawp mai. Upa Mawia fapa, Muanpuia kha a lo ni! Thingfak lian zet mai keng hian a lo ding rân mai a. Muanpuia chuan thluak sâwm nuai khawp chuan mithi tho leh chu a han hlap zui chawrh chawrh a, a zal ta hmak mai. Renga chu thaw hlawp hlawp chungin a rawn ding chhuak a, a chempui chu a chhar leh a. 

Muanpuia hmai vel ah chuan thisen a per nuai a, Renga chu enin, "A seh hman che em?" tiin a zâwt a. Renga chuan a lû a lo thing a, "Khawi aṭângin nge i lo kal?" tiin a zâwt lêt a. Muanpuia chu a thaw hak a, "Vengchhûng aṭângin ka rawn tlân chhia a, damchhuak dang pawh helam hi an rawn pan ngei ang." tiin a chhâng a. 

Renga chuan a lû a bu nghat a, "Anih chuan mithi tho leh tam tak an rawn hruai ngei dâwn a nih chu. Thlamah khuan Nu Zari leh Hlimpuii te nufa an awm a, hmun dang him zâwk kan zawn vat a ngai dâwn..." a sawi zo hman ṭêp, Zorama, thisen kâi hnuanga let reng kha a rawn tho chhuak ve leh ta. 

A hmel chu a lo danglam vek tawh a, mithi tho leh dang ang bawk khan a mit vâr pup a, a thle ri sawk sawk bawk a. Zorama chuan Renga te chu riltam hmel takin a rawn ngur chhur chhur mai. Renga chuan a chempui chu a hum nghet sauh va, a hmel hriat ṭha a nihna zawng zawng dah ṭhain, "Tihpalh aw, ṭhianpa." a ti zawi sap a. Chempui chu a vawm leh ta pawp a, Zorama chalah tak chuan a bur ta vu mai a, Zorama chu a thal nghal tawp mai a, a che leh tawh eih lo.

***********************************************************

7:40 AM

Mithi tho leh pakhat, an khaw tlangval fel leh khawtlânga inhmang tak mai Akima chu rum chhur chhur chungin an in bul kawtthlêr velah chuan a têi kual reng a. Mihring seh tûr zawngin, a taksa inthlep hnawk hnawk chung chuan a hawi kual hrek hrek a. Inhnung lamah thâwm a hria ni ve ngei tûr a ni, a hawi phei nghal vat a.

Inhnung lam pan chuan chak takin a tlân phei a, mahse Siama a rawn lang thut a, Akima chalah tak chuan a rawn vît tlum pawk mai! Akima chu a khûr cher cher a, a zal ta der mai a. Siama chuan chemte chu a han phawi ri hrawk a, "Khai a... Akima a nih hi..." a ti khûr dar dar a. Pu Tea chuan thutak zet hian, "Tûn dinhmunah chuan tumah hi thliar hran theih an ni tawh lo. Kan ṭhiante, kan chhûngte pawh nise, mithi tho leh an nih chuan thah mai kha a finthlâk ber." zawi sap chuan a han ti a.

Sawmtea chuan thlang lam huan kalkawng chhuk thla chu a thlîr thla vawng vawng a. Awmpuia chu a en a, "Awmpui, hei hi kan huan kalkawng a nia, kan thlam kan zu en chhin dâwn em ni? Ka nu leh ka nau kha an la dam a nih chuan kan huan lamah hian an kal ka ring tlat a ni." a han ti a. 

Awmpuia pawh chuan, "Nia, a ṭha khawp ang." a lo ti ve a. Chutah a han inngaihtuah vang vang a, "Sawmte, in huan kalkawng hian Zâwmthâng ruam a pawh asin. Nimina Zova nêna sa pel tura kal kan tumna kha he in huan kalkawng hian a pawh a. Zova kha a sapel rawn haw, khatianga awm ta kha a ni a. A darah sehna hliam a awm bawk a, in thlam zu kal pahin kan zu tlang hrim hrim dâwn em ni ang?" a rawn tih chhunzawm leh a.

Siama chuan, "Thlamah chuan Sawmtea nu leh a nau chu lo awm ta se..." a rawn ti ve leh a. Sawmtea ber chuan, "An lo awm a nih leh Pu Tea'n a lo vêng ang a, kan pathumin nimina Zova kalna hmunah chuan kan zu kal hrim hrim dâwn nia, eng tak nge awm tih pawh hriat a ṭha." a lo ti a. Tichuan fîmkhur takin an chhuk thla ta a.

Rei pawh an kal lo, an ding chat a. An hma zawnah chuan Zova sehtu ngei mai, kha mi mak tak mai khân thehlei pakhat hi a helin a lo pet ngawng ngawng mai a. Rang lutukin Sawmtea chuan a silai ken lai, Zova silai, Muani'n a pêk ngei mai chu a kau nghal a. Mahse Pu Tea chuan a rawn dang a, "Silai i hmet puak a nih chuan mithi tho leh dangten an hria ang a, kan awmna an rawn pan mai ang." tiin a khap a. 

Sawmtea chuan a silai chu dah ṭhain a kawnga a pai Hrei (Axe) chu a la chhuak ta zâwk a. Chutah chu mi mak tak mai chu a rawn hawi phei a, chak takin a rawn tlân ta mai le! Sawmtea chuan chiang em em hian a hmai vun thler hawk khawp chuan a hrei hmang chuan a lo hem pawp mai a. A thal nghal dawt a, a che leh tawh lo hrim hrim.

Midang ho pawh chu an rawn kal hnai a, Pu Tea chuan a hmai vun thler te chu eng ang hmel pu nge a nih tih hriat theih nân a han siam rem nawk nawk a. "In hriat zawng a ni em?" tiin a zâwt hlawm a, mahse tumah chuan an hre lo. Sawmtea chu a ngawih vang vang hnuah, "Kan khua hi in a tlêm a, tupawh kan inhre tlang vek a. Mahse hepa hi tuman kan hre ngai lo va, Zova sa-pelhna kalkawng aṭânga rawn chhuak a ni bawk a, hei ngei hi Zova lo seh tu chu a ni ngei ang." tiin a rawn tawng chhuak a. Chutih lai tak chuan an sîr lawk, mau hmun aṭâng chuan patling mangang au thâwm ni awm tak mai hi an hre ta thut mai a. An pali chuan rang takin mau hmun thim lamah chuan an tlân lût nghal ta hlawk hlawk a.

********************************************

7:55 AM

Khaw kawtthlêr reh ruih, tiau (fog) chhah mup kârah chuan hmeichhe pakhat, kum 21 mi Puii chu thaw hlawp hlawp chungin a tlân mêk a. A hnung lamah chuan mithi tho leh pathum vêl hian an rawn ûm mek a, an rûm thâwm chu a rawn hnai tawh hlê a. Puii chuan hmanrua rêng a nei lo va, hmeichhe awmnem tak ni mahse, a au miah lo va, a ṭap eih bawk lo. 

A hmelah chuan damchhuah ngei a tum tih a hriat hle a, mahse a mangang ve hle tih chu a hmai dâng lep leh a thlan tui rawn luang zawih zawih aṭâng chuan a hriat hle thung. Vanneihthlak takin Sawmtea te in a thleng hlauh mai! Kawngkapui chu a va chhum vak vak a, "Khawngaihin... U Sawmte, Nu Zar..awm in awm em?" tiin a au vak vak a, mahse chhângtu rêng an awm lo. 

Hawn a tum a, mahse in chhûng lam aṭângin a inkalh tlat bawk si. Mithi tho leh pathumte kha an rawn hnai tawh em em a. Puii chu a tlân leh ta tawp a, inhnung lamah chuan pheiin bang phenah chuan a biru ta tlat a. A lungphu ri pawh chu amah pawn a hre thei hial a ni. Chung mithi tho leh te chuan an hmu lo hlauh va, kawtthlêr lamah chuan an tlân pel ta daih mai a. 

Puii chu a thaw huai mai, muangchangin a ding chhuak a. Chutah a bul lawk tukverh dârthlalang keh huang mai, Sentea'n a tihchhiat ngei mai kha a hmu hlauh mai. Fîmkhur takin a lawn lût ta a.In chhûng chu a lo thim deuh ruih a, chutah Sentea ruang lo let reng a hmuh chuan a ding chawt a! 

Muangchangin a va pan hnai a, a lungphu chu a rawn rang leh tawh hle mai. Sentea ruang chu a han tlawh vel chhin a, mahse a chet tak lovah chuan a thaw leh huai a. Tichuan ngawi reng leh fîmkhur tak chung hian choka lam a va pan phei a, chemte pakhat la in pindan lam a pan leh a.

Fîmkhur takin a veh den den a, room chu a han lût thut a! Tumah an lo awm lo hlauh. Rang takin puan chhah ṭha ve tak a hmuh hmasak ber chu a la lawk a, in chhûngah lêt lehin chu puan chuan a luhna tukverh keh, pâwn lam lang tlang huang mai chu a zar phui hmak a. In chhûng thim zîngah chuan Sentea ruang chu a va en leh a. 

A va pan hnai a, a han kuai let a. Tunge a nih tih a hmuh chuan a hmui hupin, "U Sente..." a ti zawi sap a, a mittui a rawn tling nghal ṭiam ṭiam mai. Chutih lai tak chuan pâwn lamah thâwm a hria a, mithi tho leh ho kha an rawn kîr leh a ni mahna. Puii chu hmanhmawh takin pindan chhûngah lûtin a in-kalh khum nghal hmak a.

***************************************

Mau hmun pik tak, tiau (fog) chhah mup kârah chuan Sawmtea te pali chu thâwm awmna lam panin an tlân lût a. Mau hnah ro ri ṭhat ṭhat kârah chuan an hma zawnah Pu Rina, mangang taka rawn tlân phei chu an hmu ta hlawl mai. A hnungah chuan mithi tho leh pakhat hian hnai zet hian a lo ûm mêk hi a lo ni.

Pu Rina chuan Sawmtea te a va hmuh rual chuan a au chiam a, "Min pui ru, Sawmte... thih ka la duh lo!" tiin a rawn t(r)e chel chul mai. Sawmtea chuan a hreipui chu a phawrh nghal a, mahse Pu Tea chuan a lo dang vat a. 

"Silaia kah a fuh zâwk ang, keiman ka'n kâp ang e." tiin Pu Tea chu a rawn pên hnai a. A ulhbun chu a han kau ri thak a, a hma lam chu a tin ta rân mai a. Pu Rina lah chuan a lo hrethiam lo, a ding a, a bân pharin, "Eng... eng nge maw i tih le, Tea?" a ti hu mai a. "Kun rawh!" Pu Tea chuan a ti thum chhak a. 

Pu Rina a kun rual chuan silai chu a puak ṭhuai mai. Mithi tho leh chalah tak chuan silai mu a va bur chat a, thisen a per chhawk a, a thal nghal der mai. Sawmtea chuan Pu Rina lam chu a va pan a. Pu Rina pawh chu rawn thovin, thaw hlawp hlawp chungin, "Ka lawm e, ka lawm lutuk e... Sawmte, ka nunna min chhanhim sak a ni." a ti han ti vel chiam chiam a.

Mahse, Sawmtea chuan a chhâng hauh lo. Na em em hian Pu Rina bekah chuan a hnek ta siah mai a! Pu Rina chu a thal tawp a. Sawmtea chuan hnek chhunzawm a tum laiin Awmpuia leh Siama chuan an lo dang vat a. Pu Rina chu rawn tho chhuak lehin a thinrim hlê mai, "Engvângin nge kut min thlâk khanglang a, Sawmte? Nang aia upa, i pa rual zet ka nih hi. Eng nge tihsual ka neih?" tiin a vin chiam a.

Sawmtea chu a khûr hlawk hlawk a, a ṭap lo chauh a ni, "I dâwihzep vângin Pu Liana'n a nunna a chan, i hria em? I thah a ni, Pu Liana kha i thah a ni!" tiin a ankhum hrep hrep a. Pu Rina chuan a hmai dawm vawng vawng chungin Pu Tea chu ava en a, "Tea, i lo hmu em? He naupang zakthei lo zet hian dawtin min puh a nih hi... engmah i sawi dâwn lo em ni?" a han ti vel a. 

Mahse Pu Tea hmelah chuan khawngaihna rêng a awm lo, "Muani'n engkim min hrilh vek, YMA President meuh si i lo dâwihzep hlê mai." a lo ti ve ta daih mai a. Pu Rina chu a za lo takin a khi suk a, "Muani sawi kha in awih a maw? Kei hian an nufa kha ka chhanhim zâwk asin. Pu Liana kha chhan duh viau mah ila, mithi ho kha an tam êm a ni. Hmeichhe thusawi in awih a maw?" a la ti zâwk zui a. 

Sawmtea thinrim lutuk chuan, "Dawt bawk maw ila sawi dâwn?" tiin hnek a han tum leh a, mahse Siama'n a lo dang leh hman hlauh va. Sawmtea chuan rum taka Pu Rina melh chung hian, "Ka mihring pui, kan khuaa mi i nih avâng chauhvin ka that lo vang che. Nangmah in invêng la, kan bulah i lo kal ve thei lo vang." a ti ta hmak mai.

Pu Rina chuan Pu Tea chu a en leh a, "Tea, he naupang hi i ring zâwk a maw? Hetah hian min hnutchhiah tawp dâwn em ni?" a han ti leh tuau a. Pu Tea chuan chiang fek fawk hian, "Sawmtea hi ka zui dâwn, kan chhûngkaw chhanhimtu a ni a, chuvâng chuan a thusawi apiang ka pawm ang. Kan bula i lo kal ve a phalloh chuan, i lo kal ve thei lo a ni mai." a lo ti ve hmiah mai.

Pu Rina chu a mangang takzet, "Mahni mihringpui pawh in ngaihtuah lo a maw? He khua a YMA President ka nih hi, in tân hian ka tha leh zung ka seng nasa asin... tihian min kalsan thei lo vang." a ti chiam chiam a. Mahse Sawmtea te chuan an ngaipawimawh lo kher mai. Pu Rina bawk chuan, "Awmpui, eng emaw tal sawi ve ta che..." tiin Pu Rina chuan Awmpuia chu a han melh ve leh a. 

Mahse Awmpuia chuan a lû a thing a, "I mihringpui nunna pawh zah zolovin i ṭhianpa ngawih ngawih Pu Liana pawh i phatsan duh a nia, chuvâng chuan kan bulah i awm thei lo vang." tiin a chhâng lo ve leh a. An pali chuan mau hmun thim lamah chuan an liam san ta a. Pu Rina chuan sawi tûr rêng hre lovin, hlau leh mangang tak chung chuan a en zui vawng vawng ringawt mai a ni.

**************************************

END OF EPISODE 5