ONCE UPON A TIME IN MIZORAM (A mizo zombie horror story) Written by : Aaron Malsawmdawngzuala Episode - 10 : Left Behind (LAST EPISODE)

ONCE UPON A TIME IN MIZORAM

(A mizo zombie horror story)

Written by : Aaron Malsawmdawngzuala

Episode - 10 : Left Behind

(LAST EPISODE)

**********************************************************

Khua a thim dâwn ṭan tawh a, tiau chhum chhah leh vawt vûk mai chu ramhnuai mawng lam aṭâng chuan a rawn zing chho nasa tawh hle a. Hnim buk tam tak leh thingkung tam tak kârah chuan an tum ram lam pan zelin Pu Tea leh Siama te chuan Muani te nufa, Pi Kungi leh Fela te chu lui an thlen pui thei ta nge nge a. 

Boruak chu a reh diak mai a, tui luang ri heuh heuh tih loh chu thâwm dang rêng hriat tûr a awm lo. Chutah, an hma lawkah chuan thlam lian ve tak, Assam type-a sak, hlui tawh deuh tak hi a lo ding rân a. Pu Tea chuan a Ulhbun hum rân chung chuan thlam vêl chu fîmkhur takin a han enfiah a. 

Kawngkhâr chu a han nem kâwng a, vanneihthlak takin tumah an lo awm lo hlauh mai. An vai chuan thlam chhûngah chuan an lût hlawm a, thlabâr leh chauh hmêl takin chhuat dâp-ah chuan an ṭhu thap hlawm a. Ramhnuai pik tak leh hri kai rual ho kâra rei tak an tlanchhiat hnuah an chawl hahdam ve thei ta, mahse an hmel erawh a hlim lo hlawm kher mai.

Pu Tea chuan a aw a han thian kharh kharh a, ro a han rêl ṭan ta a. "Kan awmna hmun hi khawchhung atangin a hla em em a, chuvang chuan hri kai ho chu an rawn thleng pha dawn lo hrim hrim. Inchhung vel hi lo ti fel ula, eitur kan ngaihtuah a ngai dawn. Sa kah tur zawnga ka chhuah mai angai ang, tui te lo chawi ula, mei te lo ngaihtuah ang che u." tiin thutlûkna a siam ta a.

Mahse, a nupui Pi Kungi chuan hlauhthawn hmel tak hian, "Tluanga pa, nangmah chauh te chuan a chi dawn em ni? Silai i hmeh puah chuan hri kai hovin an hria anga, an rawn kal thei asin." a lo ti vat a. Siama pawh chu rawn dâk chhuakin a lu a lo bu nghat a, "Ni e...ka lo kal pui ang che." a lo ti ve nghal bawk a. 

Pu Tea erawh chuan a lu a lo thing a, "Ni love..silai hmet puak mah ila, helai hnaiah hian hri kai tumah an awm thei tawh lo hrim hrim, a hla lutuk tawh. Ka sawi ang chuan i ti phawt ang u, Siama..nangpawh hliam i la tuar mek a, enkawl phawt i ngai. Keimahin ka kal ang, chubakah silaimu pawh 6 chiah a awm tawh." tiin Pu Tea chuan thu tawp a siam ta hmiah a. 

Chutih lai tak chuan, tukverh bula lo ding mêk Fela chuan ring tak hian, "Pa..saw U Awmpuiate, mi pahnih a rawn hruai." a rawn ti chhuak hlawl mai! Rang takin midang pawh chu tukverh lamah chuan an rawn tlân khawm a, lui kam panna kawng a tiau chhum zîng mup mup kârah chuan Awmpuia, Muanpuia leh Hlimi te rawn inzui phei hnak hnak chu an va hmu ta a. 

An vai chuan thlam pawnah chuan an tlân chhuak hlawm a, Muani chuan Hlimi chu a lo kuah nghal chawt a, "I tha em? Hlimpui, i lo la dam ve chu ka van lawm tak." tiin a mittui a luang nghal zawih zawih a. Pi Kungi erawh a rilru a la nuam thei lo, a hawi kual nghal ruai mai a, "Khawnge Tluanga? Awmpui...Tluanga chu in hmu ta lo em ni?" tiin Awmpuia chu tap lek lek hian a zawt a. 

Awmpuia chu a kûn ngul a, zâwi tak hian, "Aih.. kan hmu lo. Muanpuia leh Hlimpuii hi kan hmu a. Pi Zari leh Tluanga erawh kan hmu ve ta lo a ni." tiin a chhâng a. Pi Kungi chu a mangang kher mai, "Engtin nge kan tih tak ang? Ka fapa chu awww... naupang mai ala ni asin." tiin a hmai a hup a, a ṭap ta zawih zawih mai a.

Muani chuan Hlimi chu hrilhhai hmel deuh hian a melh leh a, "Khawnge i u Sawmtea?" tiin a han zâwt leh a. Inhnit feih feih chung hian Hlimi chuan, "U Valtea nen ka nu zawng turin an kal hrang a, Tluanga pawh an zawng nghal ang." tiin a lo chhâng a. Pu Tea chu a han thaw huai a,  "Engpawh nise, inchhung lamah i lut phawt ang u." a rawn ti a, tichuan thlam chhûng lamah  chuan an inzui lût ta hlawm a.

*******************************************************

7 : 16 PM - Night

Sikul tlâng chu a reh hian a reh ruih mai a, thli lah chu a thâw vûk vûk bawk a. Sikul bang hlui tawh takte chu thingzar chuan a vaw ri leh thuak thuak thin a, boruak chu a vawtin thli thaw ri pawh a nelawm loh hle mai. Office chhûng thîm mupah chuan kawnvairat êng nep tak mai pakhat chu a inchhi ve a, duhthu erawh a sam lo kher mai. 

Puii, Marema, Bawihpuii, leh Zauva te chu office dawhkân kîl chuan an ṭhu thap hlawm a. Pu Hmuaka dâwr aṭânga eitur an lâk tak, chhang ro leh nepnawi tlêm angzawng te chu an ei mêk a, mahse tumah chuan tui tih hmel takin an ei hauh lo. Puii chuan tui chu a han in khawlh khawlh a, "Ti hian engtin nge kan awm zel dawn? Tah hian kan awm reng dawn nge naktuk zing khawvar veleh tanpuina zawngin kan chhuak dawn? Ei tur te hi a zawh hunah khawi ami nge kan lak leh ang? Pu Hmuaka dawrah bawk kan zu kal leh dawn tihna em ni?" a han ti deuh duah a. 

A aw chu a khûr dar dar a, a hmel atang chuan a beidawng takzet tih a hriat hle bawk. Marema chu a han ṭhu ṭha deuh va, a ṭhiante chu a han melh kual a. Muangchâng hian, "Pu Hmuaka dawr ami kha chu kan la kim deuh vek tawh, dawr dang zawn a ngai tawh ang." tiin a lo chhâng a. 

Chu thu a hriat rual chuan Puii chu za lo tak hian a khi suk a, mahse a hmêlah chuan thinrimna a rawn lang tlat mai, "In vawikhat chhuahna ah pawh khatiang thil kha a thleng a nia, Chaka khan a nunna a chan phah asin...midang kan inchan belh leh zel dawn tihna em ni?" a han ti vin lek lek a, a mittui a tling nghal ṭeuh mai.

Zaidâm tak hian Zauva chuan a ṭhiannu chu a rawn khap dai a, "Engpawh nise...zing khawvar kan nghak anga...zingah henglaia mau awm ang ang te hi kan khawn khawm anga, thal mu dang pawh suih belh kan ngai alawm. Tichuan thal mu tam thei ang ber kan neih hunah  khawchhung lam pan chuan kan chhuak dawn nia." a rawn ti ve a. 

Mahse Puii chu a beidawng takzet tawh, "Tu emaw talin khaw thenawm lam emaw, tanpuina dil turin kan khua hi chhuahsan se, chhanchhuaktu rawn kal se ka ti ngei mai." a ti zawi sap a. Bawihpuii chu a rawn ṭawng chhuak ve a, "Thal mu engzat nge la awm?" tiin a rawn zawt ve a. Zauva chuan a chhang ken lai han keih rik hmawk pah chuan, "11 vel chu ala awm ang." tiin a lo chhâng a. 

Marema chu a ding hluai a, a thal (bow) leh Pu Hmuaka silai an lak chhoh tel tak chu a han lek kâng a. "Pu Hmuaka silai kan rawn keng chho tel tawh bawk a, a mu hi 5 vel a awm a. Pawhdawh ah chem, hriam em em lo a awm bawk a. Hmanrua kan neih kim chuan kan inveng thei em em ang. Engpawh nise mut hma i tum ang u, kan menrei chuan naktukah kan chau lutuk ang." a han ti chang fak a.

Zâwi muang hian Puii chu a tho va, bang kil thîm deuh lamah chuan a va ṭhu a. A lû a dawm vawng vawng a, "Ka chhungte? Ka chhungte kha an la dam ve angem le?" tiin a mittui a luang zawih zawih a, a inhnit feih feih mai. Marema chuan Zauva chu a han mit mei zeuh va, a beng bulah chuan zâwi sap hian, "Ka lo veng hmasa anga, kan inmen chhawk mai dawn nia." tiin a hrilh a. Zauva pawh chuan a lu a lo bu nghat a.

******************************************************

Thereng hram thâwm hriat tûr a awm reng a, tiau chhum chhah zet kârah chuan thli a rawn thâw leh vûk vûk ṭhîn a. Ramhnuai pilril tak, thingkûng lian pui pui kârah chuan Renga leh Sawmtea chu an ṭhu dun a, an hmaah chuan mei an chhem a, thehlei pakhat hi an rawh (roast) mêk bawk. 

An ngawi dun reng a, an inbe miah lo, an rilruah chuan an hloh tâk an hmangaihte leh hma lam hun thîm zet chauh chu a awm a. Chutah Sawmtea chu a han ṭhu ṭha deuh va, muangchâng hian, "U Reng...ka lawm e aw...ka nu leh ka nau i lo venhim avangin.." a han ti zawi sap a. 

Renga chuan a hma zawna mei alh hlat hlat chu a en ngar ngar a, a hmelah chuan in-thiamlohna nasa tak a rawn lang a. "Muanpuia kuta ka dah kha ka tisual a ni, naupang mai ala ni si a. Mahse duhthlan tur dang ka nei lo, Chhuanga kha kan innghahna awm chhun a ni a, ka kal pui a ngai bawk si. Tluanga lah ka chhan hman ta si lova, a pawi khawp mai." a lo ti chuai raih a. 

Sawmtea chu a ngawih leh vang vang hnuah chuan, a dinhmun chu Renga nêna an inan zia hriain za lo tak chuan a khi suk a, "Ka nu kha kalsan lo tur ka ni asin, mahse nangmah ang chiahin keipawn duhthlan tur dang ka nei lo a ni." a han ti ve leh a. Renga chuan Sawmtea chu a en a, "Sawmte...kan tawrhchhel hle angai ania, nungdama kan awm hram hram angai. Lungthlir khua chu ti hian a chhe tawh chu a nimai a, a la dama te hi kan tawrhchhel hle angai. I nu chu kal tawh mahse, i nauvin ala mamawh che tih hre reng la, naktuk zing khawvar veleh lui lam chu kan zu pan ve nghal dawn nia." tiin a fuih mawlh mawlh a. 

Sawmtea pawh chuan a mittui a hru zeuh va, "Ni e....Chhuanga pawh chuan jeep chu a han hmuh ngei i beisei phawt ang." a lo ti ve bawk a. Chutih lai tak chuan, thing hnah ro rap ri ruap ruap thâwm an hre ta tlat mai. An hma zâwn ramhnuai thîm mup mai aṭâng chuan hri kai pahnih, an hmel pawh hmuh thiam loh khawpa chhe tawh chu an rawn chhuak ta mai a. 

Sawmtea chuan a hrei chu a ban nghal vat a, Renga pawh chuan a chempui chu a lek kâng nghal a. An tho chhuak a, hri kai pahnihte chuan mei alh lam chu an rawn hawi a, an ngûr ta chhur chhur mai. Sawmtea chu a va kal phei a, pakhat zâwk chu a hmai vun thler duai khawp chuan a chek hawi siah mai a! 

Mahse a tlu miah lo, Sawmtea lam chu rawn hawi lehin a zuan ta thut mai a, Sawmtea chu a bawh ta rûn mai le. Renga chuan puih a tum a, mahse pakhat zâwk chuan a rawn bei veleh thung bawk si. Renga chuan a chempui chuan a han sât siah a, a chulah a sât bur chat a. Mahse a sât na tâwk lo deuh nge ni, chu hri kai chuan thingkûngah a la dâwr bet thei tlat! 

Chem a phawi chuan a rawn seh thei nghal dâwn bawk si, Renga chuan mangang tak hian a awmah chuan a nam vak vak ringawt a. Sawmtea pawh a lo la buai nasa mai, hri kai chuan hmai thler duai chung hian Sawmtea chu seh a tum ngang ngang a, Sawmtea pawh a hrei hmang chuan a lo indang ve ṭang ṭang bawk. 

Chutah, theih tawp ana hian Renga chuan amah nawr bet mêk tu mithi tho leh dulah chuan a han tlawh siah a, a chala chempui la bur vû chung chuan chu mithi pawh chu a thal ta tawp a. Rawn thawh leh a tum a, mahse Renga chuan a awmah a rap bet a, a chala chem bur vû mai chu a phawi ri hrawk a. Chutah, vawi 5 vêl a luah bawk chuan a han chek siah siah mai a, mithi tho leh pawh chu a zal der mai. 

Rang takin Sawmtea lam a va pan a, a bekah tak mai chuan Sawmtea lo bawhbet mêk tu hri kai chu a han sât ri leh chawk a, thisen a per chhuai mai. A let tual a, Sawmtea pawh chu a rawn tho ve vat a. Mahse mak tak mai hian chu hri kai, hmai thler duai mai chu a rawn tho leh tlat mai. 

Sawmtea chuan thinrim tak hian, "I va han thi har ve mawle." tiin a hrei chuan a han vai leh pawp a, chu hri kai chu a lû a bung hmawk mai. A ṭhingṭhi dawt a, thisen a chik zawr zawr a, a zal der mai. Mahse an hnung lam aṭâng chuan rûm thâwm an hre leh nghal a, an va hawi phei a. 

Hri kai pakhat dang a rawn kal belh leh tlat mai, mahse hnung lam aṭâng chuan tu emaw hian a rawn chhu thlu ta tawp mai a. Thingtum lian ṭha nelh nawlh keng chung hian Valtea chu a lo ding rân mai a, a lû ah chuan hliam a lo nei bawk a. Valtea chuan chu hri kai, a hma zâwna tlu mêk chu a lû-ah chuan a han hlap leh siah siah a, a lû chu a hlap sawm titih der mai. Thaw hlawp hlawp chung chuan Sawmtea leh Renga te chu a va melh a, "Tu.. tu in emaw, tu in emaw min vaw thlu, ka tukhumah..." a ti thûm chhak a. Sawmtea leh Renga pawh chu hriatthiam loh hmel tak hian an in en hu ringawt a.

***********************************************************

Zîng dâr ruk a pêl hret a, khua pawh a var chiang ta. Vanneihthlâk takin boruak pawh a rawn nuam ṭan a, a hma ni a tiau chhum zîng chuk mai te kha hmuh tûr a awm tawh lo. Ni zung êng mawi tak chuan thlam inchung rangva hlui tawh tak chu a rawn chhun tle sar sar a, ramhnuai thûk tak ni mah se, zîng boruak thar chuan beiseina tlêmte tal a rawn keng tel angem?. 

Thlam chhûngah chuan an vaiin an la mu nuai hlawm a, mahse Hlimpuii chu tho hmasa berin a han zi mar tial tial a. Muangchângin tukverh lam a va hawi a, a thil va hmuh chuan a ti phu nasa hle mai. An awmna thlam lam pana lui dung rawn zawh mêk, a u Sawmtea, Renga, leh Valtea te a va hmuh chuan a zuang tho nghal zawk a. 

Sam thur nuai chung chuan ring tak hian, "Ka u.." a ti vak a. A au thâwm avâng chuan thlam chhûng a mu mêk midang ho zawng zawng pawh chu an rawn harh ve nghal sap sap hlawm a. Hlimpuii chu hmanhmawh zetin pâwnah chuan a tlân chhuak nghal dâwn dâwr a. Sawmtea te   pawh chu an rawn thleng ve nghal a, an unau chuan mittui nên lungchhe takin an inkuah nghal vawng vawng mai. 

Hlimpuii chuan an hnung lam chu a han thlêk leh a, mahse tumah dang rawn kal tûr an lo awm tawh der mai si lo. A mangang nghal kher mai, a u chu a en chho a, ṭap ti tih chung hian, "U..khawnge, khawnge ka nu a awm?" tiin a zâwt ta nghal a. Sawmtea chuan a nau chu mittui tla zawih zawih chung hian a en a. Harsa ti tak leh aw khûr dar dar chung hian, "Ka nu....mihring a ni tawh lo. Hri... hri a kai ve tawh." a ti tham ṭiak a.

Hlimpuii chu a thinlung a tliak hnawp hi a ni ber mai, a thingthi nghal dawt a, ramhnuai reh ruih kârah chuan chhuak em em hian a ṭap hawm hawm mai a. Thlam chhûng aṭângin midang zawng zawng pawh an rawn chhuak ve nghal a, Pi Kungi leh Pu Tea te nupa pawh chuan an fapa Tluanga chu hmuh inbeisei takin an rawn zawng ve nghal ruai a. 

Hreh tak chung si hian Renga chuan Pi Kungi te nupa chu a va pan hnai a, a kuta a chempui ken lai, thisen ro tawh leh bal kai hnuang mai chu a hmuh tir a. Pu Tea te nupa chuan chu chempui chu Tluanga ken lai ngei kha a ni tih an hai lo, an thinlung a nghîng nghal lawih a. Renga chuan zâwi sap, inthiamlohna nasa tak nen, "Ka chhan hman ta lo a ni." tiin a phun sap a. 

Pi Kungi chu a ṭap chhuak ta zawih zawih a, a lungchhia chu thup rual a ni tawh lo. "Awiii... Bawihte, a va han pawi tak em.. Tluanga, min ngaidam rawh aw.." tiin a inhnit hlawp hlawp a. Pu Tea pawh chu tah insum tak si chuan a in-sehruh ṭeuh va, mahse a mittui erawh a dang zo bîk lo. 

A nupui leh a fapa Fela chu a kuah a, Fela pawh a u an chân tâ tih a hre ve chu a mittui a luang ve zawih zawih mai a. Chu ramhnuai thûk tak, khawchhûng aṭânga hla em em mai leh tiau chhum zînga mângchhe rapthlak tak an tawnna hmunah chuan, an zavai mai chuan lungngai takin an rûm tlawk tlawk hlawm a. 

Zîng boruak thiang tak leh nî eng mawi tak rawn chhuak chuan an hliam a ti dam zo mawlh lo. Beiseina zawng zawng chu vaivut ang maiin a thamral zo tawh a ni ber mai. Sawmtea chuan a nau ṭap mêk chu a kuah a, Valtea erawh ngawi rengin an chhehvêl ramhnuai chu a lo vêng ru reng thung a. 

A lû-a a hliam aṭânga thisen rawn chhuak pawh chu a pawisa tawh lo, a ṭhiante lungngai taka an rûm thâwm chuan a thinlung a tina ve hle a ni. Lui bula thlam chu an himna awmchhun leh an innghahna awmchhun a ni tawh mai si. Eng chen nge an dam zêl dâwn? Hri-kai rual ho khân helai hmun hi an rawn thleng ve leh mai ang em?  Tânpuitu leh chhanchhuaktu engtikah nge an lo kal ang tih chu tuman an hre bîk der si lo. An hma hun chu zîng nî rawn chhuak ang khân a êng dâwn nge, thihna chuan a la tuam zêl dâwn tih pawh hre lo chuan, lungngaihna ruam ah chuan an tâng ta a ni.

*************************************************

3: 00 PM

Sikul Tlâng lam pawh boruak a thiang ṭha kak kak hle mai a, sava hram ri te pawh hriat tur a awm a. Chhum zîng engmah hmuh tur a awm tawh lo ringawt pawh chu Marema te ṭhianho tan chuan thawk huaina tham a ni. Zauva chuan chemte hian a thalmu tur chu a lo suih mek a, "Zauva, i hman em?" tiin a hnungah chuan Marema chuan a darah a rawn beng thak a. 

Zauva pawh chu a tho va, "Aw, ka inpeih e." tiin a thalmu te chu a khung khawm a. Marema pawh chuan Pu Hmuaka silai an laksak tak chu a ak bawk a. Bawihi leh Puii chuan an eitur la neih tlem azawng chu buaraah khungin an lo buai ve hle bawk. Tichuan, office chhung chu fimkhur takin an chhuahsan ta a, a bul vel chu a reh hian a reh diak mai. 

Mithi tho leh emaw, mihring emaw pawh tumah hmuh tur an awm lo hlauh. Muangchang chuan khawchhung lam panin an inzui thla zel a, rei lo teah chuan khawchhung chu an thleng ta. In lo awm hmasa ber hnungah chuan an biru a, Zauva chu a han dâk dê dê a. A chek hlak a, "An tam lutuk, thawm kan dim fe a ngai ang," a han ti zawi sap a. 

Bawihpuii chuan hlauh hmel tak hian, "Inhnung lamah kal pawh ni ila an awm tho ang; chubakah thawm a reh si a, kan kal pheina turah sawn hnah ro a tam si, an hre phak tho tho dawn," a lo ti khur dar dar a. Marema chu a han inngaihtuah vang vang a, "Inhnung lamah chuan an tlem deuh ang, kawtthler ami ho hi kan buaipui a ngai zawk." tiin a han dâk ve chhin a. 

Anmahni hnaih deuhva awm ho chu a han chhiar a, "Sâwm... sâwm chiah chiah an ni e. Zauva, i thalmu kha min lo pe ṭhen la, inhnung lam ami ho chu i kap hlum vek thei ang. Ka thalmuin a daih tawh loh hunah silai hi ka hmang chauh ang. Keiman ka lo va chhaih buai ang a, chumi hlan chuan inhnung lam aṭangin chak thei ang berin khawchhung luhna lam va pan vat ang che u." tiin ro a han rel a.

Phâwk hrû hian Zauva chuan a lo en a, "I mawl em ni? Nangmah kha engtin nge ni ve ang? Silai i kah puah phei chuan hmun dang ami te pawh an rawn kal khawm ṭeuh dawn asin, a tih chi loh vang." tiin a lo hnial vat a. "Inhnung lam aṭanga kan kal vek chuan Bawihi sawi ang khan kan thawm an hre dawn tho tho va, an rawn kal dawn tho. Chuvang chuan ka sawi ang khan ti ila, kan tawn pawh a rang zawk ang." Marema chuan a ti tlat mai a.

A tawp a tawpah chuan an pawm tlang ta a. Tichuan, Marema chuan silai chu a ak ṭha sawk sawk a, a thal chu lek kangin hri-kai ho awmna lamah chuan a va phei ta a. Chuveleh, inhnung lam chirhdiak leh hnim buk tam em emnaah chuan midang zawng chu hmanhmawh takin an tlan phei ve nghal bawk a. 

Marema chuan a thal chuan a hma zawna mi ho chu a kap thal siah siah hlawm a, mahse a thalmu va phawi lehna hun a awm tawh lo. Hri-kai dangte pawh chuan a thawm chu an hria a, an rawn pan khawm sup sup mai. Zauva te pathum an tlan lai tak chuan an hma zawnah hri-kai pathum vel an rawn lang thut a, mahse Zauva chuan a thal chuan a kap thal nghal vek a.

Marema pawh chuan a thah hnem tawh khawp mai. Khaw tawn tirh lam chu an pan zel a, Zauva chuan hnung lam a hawi zeuh zeuh va. Kawtthler lamah an chhuak a, hri-kai pali-panga vel an lo awm leh a. Mahse Zauva chuan awlsam takin a kap hlum leh vek a, Marema erawh a reh vang vang mai.

Chutah leh, Puii chu a au ṭhawt a. An hma zawnah chuan hri-kai sawmhnih dawn hi an lo ding ṭhup mai a, in tin aṭang chuan pahnih-pathum vel an rawn chhuah belh pheuh pheuh bawk. An mangang hle mai a, Zauva chu a hawi kual a. An sira thingpui dawr chu a va hmu a, a chhungah chuan hri-kai awm mah se pahnih chauh an ni tih a va hmu a. "Helamah, min lo zui ru!" tiin a tlan nghal a, hmeichhe pahnihte chuan an zui ve nghal bawk.

Chutah le, chung hri kai tam tak, sawmnga rual vel zet mai chuan an umzui nghal a. Thingpui dawr chhunga awm hri-kai pahnihte chuan Zauva te rawn tlan mek chu an hmu ta, rum chhur chhur chung chuan an rawn tlan chhuak ve nghal bawk a. Zauva chuan a lo kap thal nghal ve ve a, tichuan dawr chhungah chuan Zauva leh Puii chu an lut hman a. Bawihpuii erawh a lut ve hman lo. 

Hri kai pakhat chuan a rawn zuan tlu hman a, "Ka duh lo! Min chhan ru!" tiin a rak chiam chiam mai. Chu hri-kai chuan seh tumin a bei nghal a, Bawihi chu a lo indang hram hram a. Hri-kai rual ho lah an rawn thleng hnai tawh si; mahse a sir lam aṭang chuan silai a rawn puak dur a, Marema a lo ni. Bawihi bawhbetmektu luah tak chuan a rawn fu a, thisen a per chhawk mai. 

Rang takin Bawihi chu a tho vat a, dawr chhungah chuan a lut a. Chhunglam aṭang chuan a kalh nghal vat a, "Marema... Marema kha!" Puii chuan a lo ti tham ṭiak a. Hri-kai ho lah chuan kawngka chu an rawn bawh tup tup a, an rum ri a ring kher mai. Ṭhenkhat lah tukverh aṭanga rawn luh an tum bawk a, mahse tukverh zawng zawng chu an rawn thlen hma khan Zauvan a lo kalh hman vek a ni.

Chutah silai a puak leh dur mai, hri-kai ho chuan thawm lo chhuahna lam chu an en ṭhap a, an kal darh ta vek a. Chuveleh, Zauva, Puii leh Bawihi te chu tukverh lamah chuan an va tlan nghal a, an dâk chhuak ṭhap a. Kawtthler kawn lai takah chuan Marema chu silai nen a lo ding rân mai, hri kai ho chuan an pan khawm a. 

Marema chuan a rawn thleng hmasa apiang chu a lo kap thal tawp tawp hlawm a, mahse pali a thah zawh hnu chuan silaimu a zo ta tlat mai. A thal bawk chu hmang leh in a han kap thal leh tawp tawp hlawm a, mahse hri-kai ho chu an tam lutuk tlat. An rawn kal belh zel mai a, Marema thalmu pawh a zo dawn tawh.

Zauva chuan a thal chu a ban a, "Ka va pui dawn, kawngka hi chhunglamah kalh tlat ang che u," tih leh tlanchhuah a rual a. Hnung lam aṭang chuan a ṭhianpa bei mektu, mithi tho-leh hmel rapawm zet zet ho chu a rawn kap ve ta siah siah hlawm a. Mahse an pung telh telh mai si, an that seng dawn lo. Kawtthlerah chuan hri kai 100 chuang daih an awm tawh.

Marema chuan a hma zawna lo tlan mek hri-kai ho a thal hmanga a kah mek lai chuan hnung lam aṭang chuan ṭhahnem tak an rawn lang leh ta thut a, Marema darah chuan an rawn seh ta mai a, Marema pawh a thal tawp a, chutah an seh rawn ta luai luai mai. Tukverh aṭang chuan thil thleng mek chu Bawihi leh Puii te chuan an lo hmu ve vek a, ṭap chunga lo au vak vak bak tih theih an nei der mai si lo. 

Zauva pawh chuan, "Ni lo, Marem, ṭhianpa!" tiin a lo au ve lawm lawm bawk a. Marema taksa chu hmuhtlak awm lo khawp chuan a hek hem huam mai a, a thi chiang kher mai. Chutah hri-kai ho chuan Zauva lam chu an rawn hawi leh ta ṭhap hlawm mai. An rawn tlan khawm leh ta tup tup mai a, kawtthler pawh chu a khu rum rum thei hial a ni. Puii chuan kawngka a hawng vat a, "Zauva, lo lut vat rawh!" tiin a au va. 

Zauva pawh chu rawn tlan lutin a kalh nghal a. A hma ang bawk chuan hri-kai ho chuan an rawn hual leh ta a, tukverh te chu an rawn nek keh a, kawngka pawh chu an rawn nek chhe dawn takngial a. A chhunga awm mek Zauva, Bawihi leh Puii te chu an mangang hle a, an thi ve dawn ngei niin an ring tawh.

Chutah silai a rawn puak ri leh ta dur dur mai a, silai tam tak a rual a kap puak thuai thuai ri a ni tlat. Hri-kai ho chuan thawm lo chhuahna lam chu an va pan a, an tlan khawm leh a. Mahse an thal ta tawp tawp hlawm mai. Tukverh aṭang chuan Zauva te chuan an han bih dêk dêk a. Mipa rual tam tak—a ṭhen la naupang deuh, a ṭhen patling leh a ṭhen tlangval ṭha lai te an ni. 

Silai an lo keng vek a, an zîngah pawh chuan Chhuanga, Renga'n jeep chahbi a pêk ngei mai, Aizawl ami ngei mai kha a lo tel ve bawk. Chung mipa rual ho chu khaw ṭhenawm, Phulvâr khuaa mite leh khaw dang hnai ho ami te an lo ni hlawm a, anmahni mai ni lovin police engemaw zat hmuh tur an awm bawk. Motor panga vel an rawn tlan lut bawk a, a tawp a tawpah chuan chhanchhuaktu an lo thleng ta.

********************************************

ONE HOUR LATER

Hri-kai ho zawng zawng, kawtthlêra awmte chu an thi vek tawh a. Damchhuak pawh mi sâwm vêl chu an lo la awm bawk a. Vanneihthlâk takin Puii nu leh pa pawh an lo la dam ve a, mittui nên an inkuah vawng vawng hlawm mai. Chhuanga leh Police Inspector pakhat an lo inbe mêk a, "Huan kalkawng kha chu ka hre ve lo hrim hrim a, mahse an thlamah Renga te chu an la awm ka ring tlat a ni. Anni pawh kan chhanchhuah ve ngei chu a ngai ang; amah vânga nungdama la awm ka ni a, ka bat a ni," tiin Chhuanga chu a lo ṭawng mawlh mawlh a.

Chutah, hnung lam aṭâng chuan pa pakhat hian, "Tukin zîng khân khawchhûng ka rawn thleng ve chiah a, huan lam ami chu ka hmuh chinah tumah an dam chhuak tawh lo," a rawn ti hlawl mai. Chhuanga leh Inspector chu an va hawi phei nghal a, Pu Rina ngei mai kha a lo ni. Inspector chuan a han en vang vang a, "I chiang maw?" tiin a han zâwt leh a.

Pu Rina chuan a lû a bu nghat a, "Aw... an ruang ka hmu nual alawm. A ṭhen chuan hri an kai a, ka hmuh chian zual êm êmte chu Sawmtea, Pu Tea, Awmpuia leh Siama te kha an ni a, chuan Valtea pawh..." a han ti zuah zuah a. Mangang tak hian Chhuanga chuan, "Anih leh Renga te, Pi Zari te, Hlimpuii te i hmu tel em?" tiin a lo zâwt vat a. 

Pu Rina chu a han kûn deuh ngul a, "Aw... anni pathum pawh an ruang ka hmu." tiin dawt chu fiah takin a lo sawi leh ta mai a. Chhuanga chuan a lû a dawm vawng vawng a, "Aw... a va han pawi tak êm!" a ti zawi sap mai. Tichuan, Lungthlir khua chu chhanchhuahin a awm ta a, mahse mihring tumah awm phal a ni rih dâwn lo a ni. 

Mi tlêm azawng leh Zauva, Puii, Bawihpuii leh Pu Rina te chu Lungthlir khuaa damchhuak awmchhun anga hriat chu an ni tawh mai a, an vaiin mi sâwm-panga vêl an ni. Mahse, Lungthlir khua aṭânga hla tak, ramhnuai thûk êm êm mai leh reh takah chuan Sawmtea, Pu Tea, Hlimpuii, Pi Kungi, Muanpuia, Fela, Siama, Valtea, Renga leh Muani te nufa chu an la tâng reng a. Khawchhûngah chuan ṭanpuina a lo thleng tawh tih rêng an hre ve der mai si lo. Kalsan an ni a, Lungthlir khua pawh chu hun rei lo tê hnuah rauhsan a ni mai dâwn a ni.

********************************************

THE END