ONCE UPON A TIME IN MIZORAM (A mizo zombie horror story) Written by : Aaron Malsawmdawngzuala Episode - 7

  ONCE UPON A TIME IN MIZORAM

(A mizo zombie horror story)

Written by : Aaron Malsawmdawngzuala

Episode - 7 : The Binding White

*************************************************

Renga te huan thlam chhûng chu a reh hian a reh tlawk tlawk a. Pâwn lama tiau chhum chhah zet mai chuan thlam a rawn tuam mêk avâng chuan thlam chhûng chu dâp kâr aṭânga êng rawn lût deuh chiai tih loh chu a thîm ruih mai. Renga, Chhuanga, Muanpuia, leh Pi Zari te nufa chu thlam chhuat dâp chungah chuan an ṭhu thlar thap a; tûman ṭawng chhuah hmasak an tum lo.

Renga chuan a thawk a han la hak a, a hmel chu a thutak hlê. "Kan inṭhen hran a ngai dâwn a nih hi." a rawn ti chhuak hlawl a. Midang ho chu an rawn hawi thap a, Pi Zari hmelah chuan hlauhthawnna a rawn lang nghal a. Renga chuan chhunzawm lehin, "Jeep chu kan hmuh ngei ngei a ngai. Khaw ṭhenawm lamah kan kal thei ang a, ṭanpuina te pawh kan hmuh theih phah dâwn. Khaw chhûng boruak lah in hmuh kha, mahni invên pawh a harsa tawh a nih hi." a ti thûm deuh chhak a.

Beidawn hmel zet hian Hlimpuii chuan a nu dâr a va hmer nghet sauh va, "Mahse, U Reng... chahbi kha engtin nge ni ang?" a lo ti tham tiak a. Renga chuan Chhuanga lam chu a hawi a, "I ṭhianpa Sânga hnên aṭâng chuan kan lâk a ngai tihna a ni mai. A mithi tawh lo ni sawm sarih mahse kan zawng chhuak ang." a han ti leh a. Chhuanga chu a inthlahrung hlê a, a kut phah chu a nuai nauh nauh a. 

"Mahse, ṭhianpa... ka rawn tlân chhiatna kha a hla angreng si a, tiau chhum leh ramhnuai pik kârah khan kalkawng pawh ka hre mumal leh tawh lo." a lo ti ve thung a. Renga chu a ngawi deuh vang vang a, thlam bang dâp kâr aṭâng chuan pâwn lam tiau chhum chhah zet chu a va thlêk a, "Kan huan a i rawn chhuah hlawl dânaṭâng hian i rawn phei dân tur chu ka ngaihruat thiam mai ang. Khawi mual lamah nge in kal rêng rêng a, sapel tûr chuan?" tiin a han zâwt leh a.

Chhuanga chu a han thaw deuh hak a, "Lam-thim-ruam-ah khuan a nia. Kei phei chu ka kal ngai lo rêng rêng, Sânga khân sa an tam a ti a, min sâwm tlat avânga kal ve mai chauh ka ni. Hlat chu a hla tih chiah ka hria." tiin a chhâng a. Renga chu a rawn ding hluai a, "A ṭha e. Muanpui, Nu Zari leh Hlimpuii te hi an thlam lamah panpui la, kei leh Chhuanga hian jeep leh Sânga ruang chu kan va zawng thung ang e," a ti ta a. 

Chhuanga chuan a hreh hmel hlê a, thlabâr tak hian, "Thianpa, a thuhrimin hêng mi mak ho hi khawi aṭânga lo kal nge an nih rêng rêng le?" tiin a zâwt a. Renga chuan thlam bang kila chempui, tui-ek nasa tawh tak mai, bil hmel zet chu a la lawk a, "Hri a nih hi. Kan khuaah hian hri râpthlak tak a lêng mêk a ni. Sawifiahna hun kan nei rih lo, i ṭhianpa Sânga chu kan hmuh ngei ngei a ngai." tih pah chuan chem chu Chhuanga a pe a. 

Tichuan, a chemte pai pakhat zâwk chu Muanpuia a pe leh a, "Thlamah chuan Sawmtea te chu an lo awm a nih chuan in rawn hruai phei ang a, tichuan kan thlamah bawk hian min lo nghâk dâwn nia. Jeep chu kan hmu hlauh va, chahbi pawh kan la thei a nih hlauh chuan ṭanpuina kan va zawng nghal ang a, tichuan kan inhmu leh ngei dâwn a nia." tiin a chah a.

Hlimpuii chuan Renga chu a en vang vang a,  "U Reng... fîmkhur rawh aw." a ti tham leh ṭiak a. Renga chuan a lû a bu nghat a, "Aw le, nangni pawh in fîmkhur dâwn nia." tiin a lo chhâng a. Thlam kawngka chu muangchangin an hawng ri tuah tuah a. Tiau chhum vawt vûk mai chuan thlam chhûng chu a rawn chîm nghal a. 

An vai chuan thlam chu an chhuahsan a, tiau chhum chhah zet kârah chuan an inṭhen hrang ta hlawm a. Muanpuia techuan Sawmtea te huan thlam lam panna kawng chu thâwm dim takin an zawh chho va, tiau chhum kârah chuan an liam phei ta a. Renga leh Chhuanga erawh, Lam-thim-ruam lam panna kawng chhuk, hnim pik tak kârah chuan fîmkhur takin an inzui thla ve thung a. Boruak chu a reh leh ta tlawk tlawk a, kawtthlêr lam aṭânga mithi rûm thâwm lo chhuak erawh a hma aiin a hnai ta riau hian a hriat bawk.

***************************************************

10 AM

Sawmtea te huan thlam chhûng chu a reh ruih a, Pu Tea chu thlam tukverh bulah chuan a silai vuan reng chung chuan a muthlu lawp lawp a. Chutah, a dârah chuan Siama'n a rawn vuan thut a, a phu nasa lutuk chu a harh chiang hlê mai. Siama chuan thâwm dim tak hian, "Pu Te, ka lo chhawk ve tawh ang che... va mu ve tawh rawh." a rawn ti zawi sap a. 

Pu Tea chu a han hâm bai bai a, a mit a nuai nawk nawk a. "Dârkâr khat em pawh i mu dâwn em ni? Ka lo chhîng zuai mai mai a nih kha... va mu leh rawh, ka la chau hleinem." a lo ti ve thung a. Mahse Siama chuan a lû a lo thing a, "Ka muhil thei tak tak chuang lo keipawh, va mu la, ka lo chhawk ang che." a han ti leh a.

Pu Tea chuan thlam chhuata tui em em a Sawmtea leh Awmpuia lo mu hnar suk suk chu a han en vang vang a, "A nih leh le..." tiin a tho tual tual a. Chutah, thâwm an hre ta tlat mai! Pâwn lamah chuan hnah ro rap ri leh hnim pal buan buan ri an hre ta. Rang lutukin Siama chuan Sawmtea leh Awmpuia te chu a kai tho nghal a. 

"Eng thil nge a?" meng mang lo chuan Awmpuia chuan a lo ti nuah nuah a, mahse Siama chuan zaizir hian bengchheng lo tûr hian a hrilh vat a. An vai chuan an reh thap a, thâwm chu a rawn hnai zêl a. Chutah mithi tho leh rûm chhur chhur thâwm chu an hre tel ta tlat mai! "Hri kai... hri kai ngei a ni." Sawmtea chuan a han ti zawi sap a. 

Siama chu fîmkhur tak hian tukverh-ah chuan a han dâk dê dê a, hla vak lo aṭânga mithi tho leh pakhat rawn tlân phei chu a hmu a. A meng phâwk hlê mai, "Eng nge i hmuh?" tiin Awmpuia chuan a lo zawt vat a. Siama chuan midang ho chu a en a, "Zova." a ti thûm chhak mai.

Rang lutukin Sawmtea chuan tukverh lam chu a han hawi ve a. Zova chu kawr ha lo leh taksa dâng var vek, mit sen rûm leh a hmaia thisen zam (veins) lang thuah chung hian thlam lam panin a rawn kal chhet chhet a, a hmel chu a rapawm takzet a ni. Awmpuia chu a han thaw hak a, "Engtin nge kan tih ang? Silaiin kan kâp ang nge? Hmanraw dangin kan bei ang? Nge ni a ngawi rengin kan biru dâwn?" a han ti a.

Sawmtea chuan a chhâng mai lo, Pu Tea chu a en a. Pu Tea chuan a khabe hmul chu a han tuai vut vut a, "Silai kan hman chuan kan thâwm hi hri kai dangin an hre dâwn, an rawn kal belh palh ang. Chhuak vek ila, i hual bet zâwk ang u. Tichuan thâwm dim thei ang berin kan that dâwn nia, kan fîmkhur erawh a ngai hlê ang." a han ti a.

A hrei (axe) ban pah chuan Sawmtea chuan, "Thlam a rawn thlen hnaih hma in kan tih vat a ngai dâwn..." tih pah chuan a chhuak hmasa ber a, midang pathumte pawh chuan an rawn zui chhuak ve nghal a. Zova chuan Sawmtea te rawn chhuak chu a hmu ta, thinrim hmel em em hian a ngûr chhur chhur a, a thle deuh sawk sawk a. 

Chutah a rawn tlân ta vak mai, a lo awm hmasa ber Sawmtea chu a rawn bei nghal chat a. Sawmtea chuan a hrei chuan a lo vai pawp a, mahse mak tak maiin Zova chu a kutin a lo in-dang tlat! Sawmtea chuan a kut chu a lo sât kak duai mai a, a vun pawh a thler duai mai. Zova bân chu a bung lek lek a, mahse na a hre tawh lo. 

Sawmtea'n a vai nat em avâng chuan amah pawh chu a inher sawk a, a hma zawna Pu Tea lo ding chu a va bei leh ta. Pu Tea lah a lo che muang hret si, a silai kawma khawn thlûk a tum chu Zova chuan a rawn bawh thut a, Pu Tea chu a thal ta thuai mai. Zova chuan Pu Tea chu seh a tum ngar ngar a, mahse Pu Tea pawh chuan a silai hmang chuan a lo in-dang ve char char bawk. 

Chutak chu remchangah lain Sawmtea chuan Zova lû-ah tak mai chuan a hrei chu a han chek tlum pawk a. Zova che lai pawh chu a tâwp chat a, a khûr der der a, a zal ta der mai. Sawmtea chu a thaw hak a, Pu Tea chu a kai tho va. Chutah Awmpuia chuan, "Sawmte... en rawh saw!" tiin an sîr lam chu a kâwk a. 

Sawmtea chuan a va en a, mithi tho leh dang pali (4) vêl hi an rawn inzui leh ta mai a. Pu Tea chuan, "Thlamah lût vat ang u, min hmuh hma in..." a lo ti nghal a. Thlamah chuan an inzui lût ta vek a, chung mithi tho leh te pawh chuan an hmu hman lo hlauh mai. Pu Tea chu a han inngaihtuah vang vang a, "Huan lamah an rawn lût ṭan dâwn... an rawn tam tial tial dâwn tih a chiang reng." a han ti nuah nuah a. 

"A nih chuan helai hmun pawh hi a him chuang lo tihna a ni dâwn a, engtin nge kan tih tak ang?" Siama chuan a lo ti ve bawk. Chutah Awmpuia chuan mihring thinrim avânga au thâwm ni awm tak hi a hria a. Tukverh lam a va en nghal a, Valtea an hmu ta hlawl mai! Valtea chuan mithi tho leh ho chu a sâchân chem chuan a lo sât siah siah hlawm a, mahse a dang an rawn kal belh zêl a.

"Saw U Valtea!" Awmpuia chuan a han ti lauh va. Midang pawh chuan an en ve nghal, "Ko lût ang u." tiin Sawmtea chu pâwnah a tlân chhuak a, "U Valte, U Valte... helamah!" tiin a au vak vak a. Valtea pawh chuan lo hre phain a rawn hawi a, chak lutukin a rawn tlân phei hlawk hlawk a. 

A hnungah chuan mithi tho leh rual 20 dâwn chuan an rawn ûm a, an la tlân chak em em zui.  Valtea chu a rawn thleng a, thlam chhûngah chuan a lût a. Mithi ho chuan an rawn man hman teuh kher mai, thlam kawngka lah kalhna awm hek lo. Chutah an rawn nawr ta chiam hlawm mai a, Valtea leh Sawmtea chuan chhûng lam aṭângin an lo nam ve ṭâng ṭâng a. Tukverh lamah chuan a ṭhen rawn luh an tum a, Awmpuia leh Siama chuan tukverh chu an lo dang ve bawk a. Thlam chu mithi tho leh rual tam tak chuan an hual ta thup mai a, an rûm thâwm pawh a ring hlê mai.

**************************************************

Renga leh Chhuanga te chuan tiau chhum (fog) kârah chuan Jeep awmna lam zawngin an in-zui chhet chhet a. Vanneihthlak takin hmuh theih chin chu a tlêm hlê nâ a, mithi tho leh hmuh tûr an awm rih lo hlauh mai. An ngawi dûn reng a, thâwm dim a ngaih avângin an thaw hlawih hlawih ri chauh chu hriat tûr awmchhun a ni ber e.

"Lungthlir maw in khaw hming hi?" Chhuanga chuan thâwm zawi thei ang berin a rawn ti chhuak hlawl a. Renga chuan hma lam thlîr ngar ngar chungin, "Aw.." a lo ti chang fak ringawt a. An ngawi leh vang vang a, Chhuanga chuan inthlahrun hmel tak hian, "In khaw ṭhenawm chu eng khua nge ni rêng rêng?" a han ti leh a. 

Renga chuan a chhâng mai lo. Second nga vêl a liam hnu chuan, "Phulvâr khua... a dâwt leh chiahah Khamṭhuam khua a awm leh." tiin a lo chhâng leh a. Inthlahrung tawh tak chung si  hian Chhuanga chuan a han zâwt leh hram a, "Min lo hrethiam la, ṭhianpa... ihh, in khua aṭângin Phulvâr khua chu km engzat vêl nge ni ang?" a han ti leh a. 

Renga chu a ding chawt a, inherin Chhuanga chu a en rûn mai. Chhuanga chuan hlauh hmel takin hnuai lam a melh nghal vat a, "Km 18 aṭânga 20 vêl a ni ang. Ke-a kan kal a nih chuan dârkâr 7 vêl lai a ngai dâwn a, ramhnuai aṭânga kan kal a nih phei chuan naktuk chawhma lamah kan thleng ve ṭâwk ang. Chupawh tlaivâra kan kal te a nih ngawt loh chuan thlen ngaihna a awm lo vang. Chuvâng chuan i Jeep chu kan hmuh ngei ngei a ngai a ni tawp mai. Chu aia pawimawh chu i ṭhianpa Sânga ipte aṭânga chahbi lâk chhuah chu a ni." Renga chuan a ti chang leh fak fak a.

Renga chu a kal leh a, mahse Chhuanga chu a la ding tlat mai. Renga chuan va en lêtin, "Eng nge awmzia? Tinge i din reng?" tiin a va zâwt hu a. Chhuanga chuan beidawn hmel tak hian a lû a thing a, "Kan hlawhtlin ka ring lo... khawiah khân nge Jeep kha kan dah ka hre ve hleinem. Ka rawn tlânchhiatna lam kha khawi lam ber nge ka hre tawh bawk si lo. Khâng mi mak ho kha hmun tinah an awm bawk si... kan thi dâwn, kan hlawhtling dâwn lo." tiin a ṭap lek lek mai a.

Renga chu a han thaw leh hak a, va pan hnaiin Chhuanga kawr awmah chuan a ṭhâm ta hrawk mai a, "Enteh Pu-a, kha tlangval kan bula awm kha, a hming chu Muanpuia a ni a... naupang mai a la ni. Mahse loh theih lohvin ka kalsan a ngai a, chuta kârah nutling pakhat leh a fanu tleirawl a kutah ka dah bawk. Nang ang lo takin vênhim a huam asin. I hmel enin kum 40 i chuang tawh tih a hriat reng, tinge i va nêp bik em em ve?" tiin a vin hrep mai a.

Chhuanga chu a zam takzet, "Ka tel lovin kal mai rawh, keichu ka lêt leh dâwn. Ka thei lo, kawng kan bo zual zêl dâwn." a lo la ti hram a. Renga chuan a kawr awm chu a tham nghet sauh va, "Va lêt leh pawh ni la... thlamah khân kumkhua in i awm thei dâwn lo. Ngaithla teh Chhuanga, nang kan hmu che hi kan vanneihna a ni thei asin. Tunge Sânga chu ka hre ve lo, mahse nang chuan i hria. Keimahin va kal pawh ni ila, chahbi chu tu mithi tho leh berin nge kawl ka hre ve dâwn hleinem. Jeep chu kan hmu phawt ang a, tichuan Sânga kan zawng leh ang. Phulvâr khuaah chuan Police Outpost pawh a awm a... mahse kan khuaah chuan engmah a awm ve lo. Kan khua ka chhanhim theih nân leh nung dama chhuak ho hi him taka hmun ralmuang zâwk ka thlen theih nân ka mamawh che a ni." tiin a fuih leh ngat ngat a.

Chutih lai tak chuan an hma zawn mau hmun luhna tur chiah aṭâng chuan thâwm an hre ta a. Hri kai pakhat hi a rawn kal sawi nghawng nghawng mai a. Chhuanga hlau lutuk chu Renga hnungah a biru nghal vat a. Renga chu a chek hlak a, "Saw hmelchhepa saw chu hman aṭâng khân ka ngei tawh hrim hrim." a han ti zawi sap a. 

Chupa chu an khuaa zu heh zet mai, Renga nêna vawi tam insual tawh, Biaka a lo ni. Renga chuan a chemte chu phawrhin Biaka chalah tak chuan a va vawm ta pawp mai a, a bur chat mai. Biaka chu a thal tawp a, a zal ta der a. Renga'n a chemte va lâk leh a tum lai tak chuan mau hmun aṭâng chuan mithi tho leh pahnih (2) an rawn chhuak leh ta mai le! 

Chak lutukin Renga lam chu an rawn pan a, Biaka ruang chu an rawn zuan kan thuak thuak mai. Chhuanga chu a tlân lêt nghal chiam a, "Ka duh lo... ka duh thei lo!" tiin a au chel chul mai. Renga chuan hma zawna mi chu a dulah tak a lo tlawh siah a, chu mithi chu a let tual mai a, a hnuhnung zâwk a rawn tlân chuan a rawn pal zui bawk a, a tlu bawk thlawp mai. 

Mahse rang lutukin a rawn tho leh a, Renga chu a rawn bawh ta thut mai. Renga leh chu mithi chu hnimbukah chuan an inbuan let tual tual a. Renga chu chung lamah ṭangin, mithi hmel rapawm zet mai chu a rek vak a, a kutzungpui hmang chuan a mitmu pahnih chu a kawm ta vak vak mai a! 

Thisen a rawn luang zawih zawih a, mahse pakhat zâwk kha a rawn tho leh ta tlat. Renga chu a rawn bawh thlu ve leh a, chu mithi tho leh chuan a rawn ṭhut bet a. Renga chuan a seh loh nân a hrawkah a lo rek bet ve ṭâng ṭâng a. Chhuanga chu a mangang takzet, "Lalpa, huaisenna min pe rawh. Lalpa min pui ang che," tiin ṭawngṭaina a han hmang leh rih a, tichuan a huaisenna zawng zawng sawm khawmin a rawn tlân phei ve ta!

Chhuanga chuan mithi mitdel zâwk kha a va bitum a, mahse a chemte ken lai kha a bil êm avângin a sât hlum thei tlat lo. Mithi chuan Chhuanga chu a rawn ûm ta zâwk mai a, Chhuanga mangang chu a tawlh hnung nghal a. "Chhuanga! Biaka chala chem bur saw va la rawh... va phawi la, sât rawh!" Renga chuan a hnuailam aṭânga inveng ngar ngar chung chuan a rawn au ṭawk tawk a. 

Chhuanga chuan hriatthiam loh hmel tak hian, "Tunge Biaka chu?" a rawn ti hram a! Renga chu a thinrim tawh hlê, "Nichina ka vawm kha... a chalah khân chemte a la bur vu alawm, va phawi vat rawh!" a ti leh tuar a. Chhuanga chuan rang takin chemte chu a va phawi a, mithi mitdel lam chu va panin a lû-ah tak chuan a vai ta pawp mai a. A let tawp a, a zal ta hmak mai.

Tichuan, Renga bawhbet mek tu lam chu va pan lehin, a chhipah tak chuan a va vît tlum ta pawk mai a, chu mithi pawh chu a let tawp mai. Renga chu a rawn tho chhuak a, thaw hlawp hlawp chungin, "Ka lawm e, i huaisen hlê mai." a ti zawi sap a. Chhuanga chu ala khûr zawih zawih a, a kuta chemte thisen kâi hnuang chu a en vung vung a, "Ka... ka that ve ve maw le." a ti hu a.

Renga chuan Chhuanga dârah chuan a va vuan a, "Kha kha a ni mai dâwn asin. Tunah khân hlau hlê mah la, ka nunna i chhanhim a ni. A nih leh... Jeep chu kan zawng dâwn em? Kan ngam tawh em?" tiin a han zâwt a. Chhuanga chu a insehruh a, a lû a bu nghat nghat a, "Aw... Sânga ipte aṭângin chahbi pawh kan la ngei ang, Renga... kan kal ang, kan kal ngei ang," tiin huaisenna thar nên mau hmun lam pan chuan an in-zui phei leh ta a.

************************************************

Sawmtea te huan thlam chu mithi rual sawm thum (30) dâwn lai mai chuan an bawh luai luai a, a ṭhen phei chu thlam chung lamah an rawn lâwn hial tawh a. Thlam chhûngah chuan Sawmtea, Valtea, Pu Tea, Awmpuia, leh Siama te chu mangang takin an tâng mêk a. Kawngka lah chhûng lam aṭânga kalhna a awm si lo; Sawmtea leh Valtea chuan hri-kai ho rawn luh loh nân an lo dang ṭâng ṭâng a, mahse an dang rei thei dâwn lo tih chu a chiang reng tawh a ni.

Tukverh lamah a ṭhen rawn luh an tum a, Siama leh Awmpuia'n an lo dang ve ṭâng ṭâng bawk a. Pu Tea chauh chu kut awl awmchhun a ni ta. Valtea chuan Pu Tea chu va enin, "Pu Te, engtin nge kan tih dâwn?" a han ti a. Mahse, Pu Tea chuan chutiang dinhmunah meuh chuan thutlûkna a siam thei bik lo. 

Thlam chung lam thâwm lah a rawn nasa tawh mai si a, an thi vek dâwn ni mai hian an hre tawh a. Sawmtea erawh a la beidawng duh hauh lo mai ni lovin, thi tûrin a la indah phal lo a ni ber zawk. Thlam kawngka dang reng chung chuan a hawi kual a, chhuat dâp chu enin, "Pu Te... i silai khân chhuat dâp hi chhu chhe rawh! Thlam hnuai aṭâng hian kan tlân chhuak thei mahna!" a han ti lawm lawm a.

Pu Tea chuan chhuat chu a en a, "Mahse Sawmte, a sâng ve angreng si a, kan tla na palh ang e..." a lo ti a. Sawmtea chuan hmanhmawh tak hian, "Tih ngaihna dang a awm lo, rei kan dang thei lo!" tiin a lo chhâng lêt a. Awmpuia pawh chuan tukverh a chhiat dâwn tawh avâng leh an danna lamah an kut an seh mai a hlauh em avang chuan, "Tukverh hi an rawn nek chhe mai dawn, min rawn seh thei reng tawh ania..." a lo ti ve lawm lawm bawk a. 

Valtea pawh chuan ring lêng-lawng hian, "Pu Te... chhu chhe vat rawh! A hnuai lamah kan zuanthlâk vek a ngai... a nih loh chuan an rawn lût mai dâwn!" tiin a rawn au ve chel chul bawk  a. Pu Tea chuan duhthlan tûr nei hek lo, chhuat dâp chu a silai kawm chuan a chhu ta vak vak  mai a. 

Dâp chu a phel phawk phawk a, mahse ani tar lam tawh chuan thâ a lo nei tlêm deuh nge ni, a sawt lo hlê mai. Siama chuan, "Pu Te... kâp rawh! Silai khân kâp mai teh!" a lo ti ve a. Pu Tea lah chuan mangang tak hian, "Silai mu chhuak hi a darh dâwn dawn a, keimahni kan inkap fuh palh ang." tiin a lo hlauthawng ve bawk si, an buai kher mai.

Sawmtea chuan Siama chu a va en a, "Siama... min lo pui teh!" a han i vak a. Siama chu va pheiin Valtea chu thlam kawngka a va dan pui a, Sawmtea chuan a hrei (axe) phawrhin thlam chhuat chu a han chek ta vak vak mai a. Rei fê hnuah chuan mihring lenna khawp chu a chek kaw ta huau mai le.

Siama chuan huaisen takin, "Kal ru! Kan vaiin a ruala kan kal chuan tu emaw ber chu an man hman dâwn tho tho. Chuvâng chuan ka lo dang rih ang. Zuang thla vat teh u, ka thâ hian a daih lo palh ang e, an chak ropui si!" a han ti lauh lauh a. Sawmtea chuan, "Hmanhmawh ang che u!" tih pah chuan a zuang thla hmasa ber a, Pu Tea'n a dawt a. 

Valtea chuan Siama chu zuang thla ve tûrin a ti a, mahse Siama chuan Valtea chu zuang thla hmasa tûrin a nawr tlat a. Kawngka leh tukverh dangtu an tlem tak si loh avâng chuan hri kai ho chu an rawn lût thei titih tawh a. Siama leh Awmpuia chu an inen a, "Khai le!" Siama chuan a han ti vak a. 

Awmpuia chu a tlân thut a, chhuat awngah chuan a zuang thla ta a. Chutih rual rual chuan hri-kai ho chu tukverh aṭâng chuan an rawn lût ta sup sup mai le. Siama chuan zuanthlâk ve a tum a, mahse vanduai thlak tak maiin mithi tho leh pakhat hian a kutah a rawn seh hman ta hlauh mai! 

"A na lutuk!" tiin Siama chu a au ṭhawt a, mahse chhuat awngah chuan a zuang thla ve hman ta tho va. Thlam hnuai an thlen chuan chak takin an tlân chhe ta hlawm a, hri kai ho pawh chu thlam chhuat awng aṭâng chuan hnuai lamah an rawn tla thla ve sup sup a. Sawmtea leh midang ho chu an tlân chhia a, Siama an seh hman tih erawh tûman an hre lo...

**********************************

Renga te huan thlam aṭânga Sawmtea te huan pan tûr chuan mual hnih thum lai liam a ngai a. Ramhnuai chu a pik hle a, chuti chung chuan tiau chhum chhah zet mai chuan hmun tin mai chu a khuh thup a, hmuh theih chin a tlêm hle. Muanpuia, Pi Zari, leh Hlimpuii te chu thâwm dim takin an inzui phei hnak hnak a. An hah tawh hle a, an thaw hlawi hlawi mai a ni.

Pi Zari chu a ding deuh dat a, a awm chu a han dawm vang vang a, "Bawihi, i u Sawmtea chu kan huan thlamah chuan a lo awm i ring em?" tiin thlabâr tak chung hian Hlimpuii chu a han zâwt a. Hlimpuii chu a ngawi reng a, a hmelah chuan beiseina leh hlauhthawnna a inchawhpawlh nuai mai.

"Ka ngaihtuah êmai, keizawng... a la dam ang em le?" Pi Zari bawk chuan beidawn hmel takin a han ti leh a, a mittui chu a luang leh nghal zawih zawih a. "Nu Zar, u Sawmtea hi keichu ka hrechiang ve thawkhat a. Tlangval huaisen leh mi taima tak a ni tih ka hria a, mahni invên thiam tak a ni. Keini pawh kan la dam a nih chuan ani phei chu a la dam em em ang." Muanpuia chuan a lo ti ve vat a. 

Hlimpuii pawh chuan a nu dâr tawn tawnah chuan vuanin, "Nu, ka u chu a la dam ngei ang, keipawn ka ring tlat a ni. U Renga pawn a la dam ang a tih kha. Kan huan thlamah lo awm lo pawh ni se, khawiah emaw tal a awm ka ring, a la dam em em ang." tiin a nu chu a han hnem ve bawk a.

Chutah, an sîr hnim buk pik zet aṭâng chuan thâwm an hre ta tlat mai! Hnah ro rap ri leh thîl eng emaw ri rawp rawp an hriat rual chuan an ding nghal chawt a. Muanpuia chuan rang lutukin a chemte chu a hum nghet nghal sauh sauh va, a hmel chu a rawn thutak nghal hlê. "Ka hnungah awm rawh u." a ti zawi sap a. 

Pi Zari leh Hlimpuii te chu Muanpuia hnungah chuan an biru nghal a. Thâwm chu a rawn hnai zêl a, tu emaw hi hah hmel tak hian a rawn thaw hluam hluam a. "Mihring pangngai thawm a va ang ve?" Pi Zari'n a rawn tih sap rual chuan Muanpuia chuan a hmuia a kutzungchal dahin bengchheng lo tur in zaizir hian a lo hrilh vat a. 

Chutah, an rin loh tak maiin hnim buk kâr aṭâng chuan Tluanga a rawn chhuak hlawl mai le! A hmel atang chuan a hah hle tih a hriat em em a, a thlan fîm a tla zawih zawih a. A kuta a chempui hum ah chuan thisen a kâi hnuang mai bawk a. "Ehe, Tluanga... nang maw?" Muanpuia chuan a ti hu a, a chemte chu a han thlah dul riai riai a. 

Tluanga chuan Muanpuia te a hmu chu a thaw huai a, a chempui chu a han thlah thla ve hnawk a. "Khai a, eng nge hetah in tih a?" a ti zawi raih mai a. "Kan huan lam pan kan lo tum mêk a nih hi. Khawi aṭângin nge i lo kal?" tiin Pi Zari chuan a lo zâwt lêt vat a. Tluanga chu hnim buk ngheng chuan a han ṭhu  deuh hnawk a, a thlan chu a hru thuak thuak a.

"U Valtea nên thlanmual lam aṭângin kan lo kal a. Khâng ramhuai ho khân min rawn beihrawn vak a, kan inhloh ta daih a nih hi. 'Zawmthang ruam rawn pan thla rawh' a tih avângin ka rawn chhuk a nih hi... Ka nu leh ka nau in lo hmu mial em?" tiin Tluanga chuan beiseina a han zâwt ve leh a.

Muanpuia leh Pi Zari te nufa chu an inen hu a, "I nu leh i nau maw? Khawnge an awm a?" Hlimpuii chuan a ti ve daih thung a. Tluanga chu beidawn hmel takin a thaw hak a, "In lo hmu  bik lo a ni maw..." a ti chuai raih mai. "Eng thil chiah nge thleng a, Tluanga?" tiin Pi Zari chuan a han zawt leh a.

Tluanga chuan a han inngaihtuah lêt a, "U Sawmtea, u Awmpuia, leh u Siama te pathum khân kan in aṭângin kan chhungkua min rawn hruai chhuak a. U Zova te inah kalin u Muani te nufa kan hruai chhuak leh bawk a. Mahse kan inṭhen hrang ta hlawm a ni. Ka pa leh u Sawmtea te pathum khâ nangmahni zawng tûrin an kal chhuak a, keinin u Valtea kan tâwng a. Mahse in thlam lam rawn pan kan tumna lamah khâng ramhuai ho khân min rawn nang ching a, kan inhloh ta vek a ni. Sawi tûr a tam lutuk, han sawifiah ngaihna pawh ka hre lo," tiin a lu chu a dawm vawng vawng a.

Pi Zari chuan a hmui a hup a, a fapa hming a hriat rual chuan a mittui a rawn luan nghal zawih zawih mai a, "Ka fapa Sawmtea chu a la dam maw?" a ti khûr hlawk hlawk a. "Ka hre lo Nu Zar, ka pa te nên an awm mêk ang ka ring. Mahse u Sawmtea khân kan chhungkaw nunna a chhanhim a ni. Tunah erawh khawnge an awm ka hre bik lo, keipawh kawng ka rawn bo lek lek a nih hi, chhum lah hi a zing nasa ropui si a." tiin Tluanga chuan a chhâng a.

Hlimpuii chuan a nu chu a va kuah a, "Nu, ka tih reng kha... ka u hi a la dam em em ang," tiin a nu chu a hnem leh a. Muanpuia chu a rawn ding hluai a, "Engpawh ni se, u Sawmtea te huan lam chu i pan leh phawt ang u. Helai hmun hi a him lo emai, hmanhmawh ang u." a rawn ti ve leh a. Tichuan, an vai chuan tiau chhum kârah chuan an kal chhunzawm leh ta a.

********************************************

END OF EPISODE 7