NATHAN SEASON-2 (Episode-5)
NATHAN SEASON-2 (Episode-5)
OBSESSED WITH WWE
Ka phone vibrate chur chur chuan min ti harh a, phone chu ka'n en a, Nathana alo ni a. Kei hi min la hria em aww??? Ka'n insawi leh phawt ange, Lalrinawma ka ni a, Assistant Superintendent of Police ka ni. Thla engemaw zat chu ka senior, ka thianpa leh ka unaupa Nathana nen kan thawkdun tawh lo a, a khawharthlak thin hle mai. Tunah chuan ka lo let leh ta bawk a, kan han che leh tak tak ange. Chuan episode hmasa lam khan thlahrang lampang kan chhui a, kha thla kha a tak tak ania, dawt anilo ania, ka hmu velo nangin Nathana'n min hrilh a, ka hlau teh asin. Phone chu ka la a, Nathana chuan, "Rinte, i tho tawh em?" a rawn ti a. Keichuan, "Tho lo deuh, minlo phone a, ka harh chiah." ka ti a. Nathana chuan, "Station ka thleng der a nia, tualthahna a thleng a, lo kal vat teh." a rawn ti a, ka phu zawk mai. Hriatchak takin, "Enga? Engtin? Khawiah?" ka han ti nghal vak vak a. Nathana chuan, "Lo kal phawt teh." a ti a, phone chu a dah hmak a. Peihlo tak chuan ka tho a, ka duty tan hun pawh ala ni lo, a duh duh hunah hian kei ASP ve meuh tawh si hi constable ang mai hian min tir kual zuah zuah hi a ni ber mai. Ka inbual a, chaw te ka ei te te a, tichuan Station lam pan chuan ka bike, Gixer pawl nen ngei mai chuan ka inkhalh phei ta a. Police Station chhung ka lut chiah chu Nathana chuan a office ah in ko lut nghal a, "Bawihpui, tinge maw kaihthawh ziah i ngaih mai le?" a ti nuah nuah a, ka ngei thin mange, hepa hi chu. Tum hmuk hian, "Bawihpui te mi tih le, naupang te te si." ka ti ve deuh kher a. Nathana chuan nui chungin, "Bawihpuia alawm i nih...han thu phawt teh." a ti a, ka thu ta a. NAthana bawk chuan, "I ngaihawm hle mai, i tellovin vawi 2 lai chu keimahin hnu ka chhui a, a khawharthlak khawp mai." a han ti te te a. Keichuan, "I chhui chhuak vek tho alawm ka tellovin." ka ti a. Nathana chuan, "Ka chhui chhuak lo ka tia mi? Ih e...i tello chuan a nuam tak tak lo, tangkai viaulo mahla, ka bula i awm ve hrim hrim hian a kim alawm. Chubakah, kei chauh nilovin, kan hnuchhuina chungchang ziak mektu Aaron-a pawn a ngai tawh che alawm." a han ti leh a. Keichuan, "Chutiang sawi duah a ngai thin lo, tualthahna a thleng i ti tiraw?" tiin ka zawt a. Nathana chuan, "Umm....tukin zing dar 4 khan Pu Hruaitluanga, Zuangtui ami te in bulah ruang chhar a ni a, keichuan dar 5 vel khan ka hria a, mahse SI Liantea'n ka lo buaipui ang, chaw ei kham velah chanchin ka lo hrilh ang che min ti a. Mitthi hi Laldingliana ani a, Zuangtui Veng ami tho ania, Pu Tlanmawia fapa an ti a ni awm e." a ti a. Keichuan, "Aww..chutiang te chu keipawh minlo kaithawh mai tur alawm." ka han ti ve luam a. Nathana chuan, "Ve lutuk a, i tho thei leh chuang dawnlo tih ka hriat vang alawm. Ruang hmuh hun hi dar 4 a ni a, i muttui lai tak ani awm sia, ka khawngaih che mawle." a ti deuh kher a, ala ngeiawm reng a ni he DCP hi chu. Keichuan, "Anih leh SI chuan a lo be leh tawh che em?" ka han ti a. Nathana chuan, "Bia e, ilo thlen hma deuh khan minlo bia a, ruang chu post mortem turin an rawn phur phei tawh a, a mitthi chhungte thu zawh fiah erawh kan kutah a awm." a han ti a. Keichuan, "Umm...kan kal dawn em ni?" tiin ka han zawt a, Nathana chuan, "Nia, i kal ang hmiang." a ti a, tichuan kan kal ta a.
Nathana zawkin motor a khalh a, a ngawi reng a. Keichuan, "Sir, DIG in engemaw sawi a nei em?" ka han ti a, Nathana chuan, "Neilo, tinge?" a ti a. Keichuan, "Englo ania, DGP Sangliana ka ngaih em vang pawh a ni maithei, kan DIG hi ka mil thlawt lo." ka ti a. Nathana chuan nuih suk pah hian, "Mai mai thin a, chutin mahni pute an sawi ngailo. Chubakah nang hi chu hmeichhia ang mai, eiloh i ngah ve hrim hrim." a ti a, kan han nui dun leh rih a. Tichuan Zuangtui chu kan thleng ta a, mitthi in chu zawn vak pawh a ngai lemlo, a bul velah chuan mi anlo phu mur mur a. Inchhung kan lut a, Pu Tlanmawia chuan min lo welcome tha hle mai. A fapa thi ta, room ah chuan kan han lut a, bangah chuan thlalak alo intar nasa ngei mai. Thlalak intar ho chu ka han enkual a, wrestling ngaina ve tak a ni ngei ang. Thlalak a tar tamtak zingah chuan Hulk Hogan, The Rock, John Cena te leh Undertaker te thlalak chu ka hriat ve te an ni. Abak ho chu kan lo upa ve ta nge, wrestling en rual ka nih tawhloh vang zawk, tuvak mah ka hre hlawm lo, kan en ve thin lai kha chuan Andre the Giant, The Ultimate Warrior te leh Yokozuna te, Owen Hart te kha kan enve thin kha a nia, thlalak ka hmuh avang hian ka'n sawi ve deuh luam a ni, minlo hrethiam teh u. Pu Tlana chu Nathana chuan zawhna ahan zawt leh tan ta a.
"Ka pu, in fapa hi kum engzat nge?"
"Kum 17"
"Awhaww..ava la naupang ve. Azia lo hle mai, school te ala kal em?"
"Aw..pawl 12 a ni a, Mount Carmel ah a lut a. Hei, 1st term exam an zo a, exam chawlh an hman lai mek a ni a, nizan a leng chhuak kha alo haw silo a. Kan hriat leh awmchhun chu a thi tih thu hi a nimai, apawi takzet a ni."
"Anih leh ka pu, i fapa Dinga hian hmelma a neih awm i hria em?"
"Aaa...ala naupang bawk a, chutia hmelma a neih chu ka ring lo."
"A nei ve thei tho ania, an kum chu la naupang hle mahse, tleirawl thisen lum lai a ni a, hetiang rual ho hi chu insual te an hrat a, thu ho te te vang pawhin hmelma an siam teuh thei a."
"A ni tho mai, mahse ka pu...ka fapa hi chu thian a kawm tam ve lutuk lo a, a room chhunga poster a tar ho in hmuh ang hian, wrestling hi a atchilh em em a, amah te hian naupang chhia ang maiin a khumah te hian insual niawm tak hian a let leh tual tual mai thin a. Computer ah lah ni se, wrestling game a khel reng a, a phone ah lah wrestling video a en reng bawk a, thian a kawm vak ngailo."
"Anih chu, nihleh nizan chuan khawnge a len a?"
"A lenna tur a sawi lo a, a chhuak tawp a. Ka rindan chuan a ruang an hmuhna bul, Pu Hruaia te inah a leng a nih ka ring a. Achhan chu Pu Hruaia fapa Michaela nen sawn an inkawm ve zeuh zeuh thin a, mahse Pu Hruaia lah chuan alo kallo a ti bawk si."
"A nih tak chu...nileh Pu Hruaia nen chuan in inkawm ngai em? Ka sawi awmzia chu nangmah hian Pu Hruaia hi i kawm ngai en? Thian in ni hrim hrim em ka tihna a nih chu."
"Vengkhat kan nia, kan inhria a, khawlaia kan in tawh chang te chuan kan inbe ve ziah. Mahse thian ang em em chuan kan inkawm ngailo, hmelhriat satliah a ni mai."
"Awle, engpawh ni se, kan kal phawt ange aw. Chuan lo zin bo lo ula, engemaw thu thar a awm chuan kanlo hrilh leh ang che u. Chuan in fapa Dinga room hi engmah lo khawih danglam suh ang che u."
"Awle ka pu, kan lo tawngtai pui reng ang che u."
Nathana nen chuan motor lam kan pan a, chak tak chuan kan tlan a. Nathana chuan, "Anihna takah chuan nangpawh hi i nep ve hrim hrim." min ti ringawt a. Hrethiamlo tak chuan, "Enga? Ngawt ngawt zel a, enge min hauh rikngawt a?" ka ti hu a. Nathana chuan, "ASP lai i ni ve a, heng te chu nangmah a chhui chhuah ve a hun tawh, keite chu Station-a awm mai mai tur zawk ak ni tawh asin. Ka rank te hi a sang ve ania, DCP lai ka ni ve a, hnuchhuinaah ka tel ve zel angai a. Rina, i harhchhuah angai, chhiar tu te leh ngaithla tu te pawn comment naah Rinawma hi a mawl e, a thinchhe si..an ti vak vak zel che a nia, a hahthlak emai tiang ngawt chuan." a ti vak vak a, ngawt ngawt zel a. Keichuan, "Enge maw min hauh rikngawt le awwwww???" ka ti a. Nathana chuan, "Sawi tur a vang em a, ka han hau lawk che a nih kha." a ti a, a nui suk a, ava han ho thei mai mai tak. Nathana bulah chuan, "Khawnge kan kal dawn?" ka ti a, NAthana chuan, "Ruang an hmuh naah kal ang, chuan Pu Hruaia te inah pawh chuan kal ve hrim hrim ang, thu zawh fiah ve ka duh a ni." a ti a. Keichuan, "SI Liantea khan engmah hnuhma a awmlo a tih kha." ka lo ti a. Nathana chuan, "An zawng uluk lo ve thin bawk alawm, nidnagah pawh ka tirh apiangin hnuhma a awm lo, engmah a awm lo an ti ziah a, ka kal nawn leh ngat thin a, engemaw hi chu ka hmu leh tho zel." a ti a, keichuan, "Umm...kal ila nimai lawm." ka ti a. Reilo teah chuan Pu Hruaia te in chu kan thleng ve nghal thuai a, an inchhungah chuan kan lut ta a. Kan nihna te kan han sawi a, tichuan Nathana chuan, "Ka pu, nizan chuan Dinga chu alo leng miahlo amaw?" tiin a han zawt a. Pu Hruaia chuan, "Aw...lo leng lo." a ti a. Nathana chuan, "Nihleh i fapa hi a chhuak em?" tin a zawt leh a, Pu Hruaia chuan, "Chhuaklo, amah in be duh em?" a ti a. Nathana chuan, "Umm...mahse chumi hmain..i fapa leh Dinga hi an inkawm thin niin Dinga pa chuan a sawi a, a dik em?" a ti a. Pu Hruaia chuan, "Aw dik e, Dinga hi naupang fel tak niin ka hria. A lo leng ve zeuh zeuh a, ka fapa nen hian an inkawm a, ka fapa room ah hian nileng thak thak in computer an khel dun thin a. Wrestling game hi an khel thin a, exam an chawlh chang phei chuan nitin deuhthaw hian alo leng a, nilengin an khel dun a, tlai chaw ei dawnah a haw veleh mai zel a. Chutiang chiah chuan a changin ka fapa hi Dinga te inah chuan ava leng ve thin a, tlai chaw ei dawnah alo haw veleh thin a, an inkawmngeih ve viau chuan ka hria." a han ti a. Nathana chuan, "Umm...anih chu mawle. Ka pu, i fapa hi kan ringhlel tihna anilo a, Dinga nen hian an inkawm nasat thin em avangin thu tlem zawh ve kan duh dawn a, amah kan be thei angem?" a ti a. Pu Hruaia chuan, "Thei tehreng e...a roomah a awm ang." a ti a, Michael-a room lam pan chuan kan inzui phei ta hlawm a. Michael-a room chu kan han lut a, Dinga ang thovin wrestling ngaina tak a ni. A room bangah te chuan wrestler hrang hrang thlalak a lo awm a, ka hriat ho ka'n sawi vek leh lawk...Kane, Stone-Cold, Chris Benoit te leh Kurt Angle te chu ka hre ve. Nathana chu Michaela hma takah chuan a thu a, Nathana chuan, "Michael, kum engzat nge i nih?" a ti a. Michael-a chuan zam hmel tak hian Nathana chu a melh zeuh zeuh a, "Kum 16" tih ringawt hian a chhang a. Michael-a pa chuan, "Bawiha, tha deuha chhan tur aw.." alo ti zeuh bawk a. Nathana chuan, "Dinga thih zan hian i chhuak lo amaw?" a ti a. Michael-a chuan, "Aw...roomah hian ka awm a, games ka khel char char." a ti a. Nathana chuan, "Nihleh Dinga hi i thiandang te zingah emaw, midang hrim hrim pawh...hmelma a neih awm i hria em?" a ti a. Michael-a chuan, "Aih, ka hrelo ka pu...tumah huat a neih awm pawh ka hrelo." a ti a. Nathana chuan, "Dinga hian rilru hah deuhna a neih awm i hria em?" a han ti leh a. Michael-a chuan, "Chutianga rilru hahna a neih awm pawh ka hrelo, mi fel tak ania." a ti a. Nathana chuan, "A nih chu mawle, i thianpa thihna chhan hi hriatchhuah tumin kan chhui mek a ni a, nang pawh hi kan tan ila tangkai maithei ania, khawiah mah lo chhuak bo suh aw." a ti a, tichuan Pu Hruaia te in chu kan chhuahsan ta a.
Motor lam kan pan a, kan luh dawn chiah chuan Nathana chuan, "E taka, ka theihnghilh tep. Ruang an hmuhna hmun ah khuan zu kal lawk teh ang." a ti a, keipawh chuan engmah sawi lo chuan ka zui ve ta mai bawk a. Ruang an hmuhna hmun chu kan thleng a, Nathana chuan a han en kual vel a. Keipawh chu inla hnuchhui thiam takin ka han thlek kual vel a, engmah rinhlelh tur erawh ka hmu lem chuanglo a. Nathana chuan vei kual pah chuan, "Rina, SI sawidan chuan Dinga hi thah ngei a ni a ti a. A tukhum a pawp a, a kak zau hle a, thisen tam tak a hloh a ni. Chuan tualthattu nen hian an insual phawt ni ngei tur a ni, a hmai a duk chur a, a taksa dangah pawh hliam a nei nual a ni awm e." a ti a. Keichuan, "Tualthattu hian Dinga hi a haw hrim hrim nge, serial killer pangngaiin a that ni zawk ang le? A chhungte sawi dan leh a thianpa Michael-a sawi dan kha chuan naupang fel tak a ni a, mi pawi a sawi ngailo an ti si a. Chutia naupang fel tak ni si chu tuin nge that duh ta ang?" ka lo ti ve bawk a. Nathana chuan, "Nia...mahse mi hi an landan ang ngawt hian teh loh tur a nia. Aruka sual tak a lo ni ve thei tho bawk a, chubakah tuma hriatlohvin hmelma alo nei ve thei tho bawk." a ti a. Tichuan minute 10 vel chu inbe miahlovin hnuhma a awm nge awmlo tih hriat tumin kan han enkual leh phawt a, Nathana chuan, "Rinawm, lo kal teh." a ti thut a, ka val kal a. Nathana chuan, "Enteh, Ganja zuk bung tam zia hi.." a ti a. Keichuan, "A ho e, Ganja zuk bung mai mai." ka lo ti a. Nathana chuan, "Hmun dang hi en la, a fai hlawm em hi. Bawlhhlawh paihna pawh a nilo a, mi huan a ni a, meizial bung pakhat lek pawh hmuh tur a awmloh laiin Ganja zuk bung 5 vel lai a awm bik a, chupawh hmunkhatah chauh lehnghal." a ti a. Keichuan, "Anih leh enge i sawi tum ber chu?" tiin ka han zawt a. Nathana chuan, "Ganja hi han en pawh hian an zukna ala rei lutuk lo ang, an roll-na lehkha pawh hi ala fai tha emai. Nimin emaw, nizan vela zuk a ang ka ti. Thil awmthei chu tualthattu hi Ganja zu thin a nih ka ring. Mahse tlangval dang ho zuk pawh ani thei a, chubakah zankhatah mipakhat chauhvin Ganja tlawn 5 vel a zuk zawh peih ka ring lo." a ti a. Keichuan, "I sawi awmzia chu, Ganja zu tute hi mipakhat aiin an tam i tihna em ni?" ka han ti a, Nathana chuan, "Umm...mahse tualthattu hian Ganja hi a zuk pawh alo nilo thei a, mahse nizan khan helai hmunah hian Ganja zu chu an awm ngei a ni. Chuan mitthi ber Dinga hi helai hmunah hi chuan a kal tih chu a chiang reng a, achhan chu helai hmunah hian a ruang hmuh a ni miau a. Dinga ber pawh hian a lo zu pawh a ni thei tho mai, chhuichhuah a har em em dawnloh hi." a ti a, leh ngawt thin chuan awww. Nathana chu a ding hluai a, "Rina, Station lamah va kal la, post mortem result a chhuak tawh em va zawt teh, a chhuah loh chuan rang thei ang bera tichhuak vat turin va ti rawh." a ti a. Keichuan, "Anih leh nang?" ka ti a. Nathana chuan a motor chahbi min pek pah chuan, "Kha....keichu taxi in ka lo phei ang. Pu Hruaia te inah hian ka kal leh lawk dawn, thu zawhfiah leh lawk ka duh." a ti a, tichuan Nathana chu ka kalsan ta a. Station ka thlen chuan SI Liantea hnenah chuan post mortem result a chhhuak tawh em tiin ka zawt a, mahse ala chhuahloh thu min hrilh a. Chhun dar 1 a ri tawh a, Nathana erawh alo la let lo. Ka phone lahin a dah busy hmiah hmiah lehnghal, a boring hle ani, Nathana tello chuan. Tichuan reilote hnuah ka office ah chuan SI chu alo lut a, "Sir, hei post mortem result.." a rawn ti a. Ka han en chiang a, zanlai dar 1 vela thi a ni a, a tukhum pawp atanga thisen a chhuah hnem em avanga thi a ni ber tiin a inziak a. SI bulah chuan, "Ruang hi tuin nge hmu intih kha?" tiin ka zawt a. SI chuan, "Sir, Zuangtui ami tho, Pu SAngtea zing feh kal lamin a hmu a ni awm e." a ti a. Keichuan, "A that chu..i kal thei e." ka ti a, SI chu a kal ta a.
Keima tawkah Nathana leh Raymonda te angin fing ve viau lo mah ila, ka inngaihtuah nasa ve hle mai a. Nathana chu a lo thleng a, ka office ah a rawn lut a. Thutthlenga thut pah chuan, "Post mortem result chu?" a ti a, tichuan ka hmuh tir a. Nathana chuan a en vang vang a, "Zanlai dar 1 vela thi anih chuan...tualthattu hian hemi hun hi a chang reng tihna a ni thei tho mai. Zanlai mi mut reh lai a chuh pawh a ni thei bawk a...mahse khawlaia zurui hovin an sawisa hlum palh pawh a ni ve thei tho bawk. Nge ni a ganja kha Dinga hian amah zawkin a zu anga, a rui lutuk chu huanah khan a kal anga, a tawlhthlu a, a tukhum a sawh palh zawk..mahse kutthlakna hnuhma kha a taksa ah khan a awm nual tho bawk sia." a ti nuah nuah a. Keichuan, "Sir, Ganja zuk bung kan hmuh kha panga lai a ni a, Dinga hian tlawn nga em em amah chauhvin a zu zo peih dawn mi?" ka lo ti a. Nathana chuan, "Ni reng e, mahse Ganja zuk bung kha lak thutak em em tur pawh ani chuanglo. Midang daih zuk pawh a ni thei tho, mahse ka sawi tawh ang khan kha huan kha a fai em em a, sarang pakhat pawh hmuh tur a awm lo a, hmun khata ganja zuk bung lo awm bik khan ka ngaih a ti tha chiahlo deuh mawle." a ti a. Keichuan, "Khami huan neitu te kha Pu Hruaia te tho kha an ni tiraw?" ka lo ti vat a. Nathana chuan, "Aw ni e." tih ringawt hian min chhang a. Keichuan, "Anih leh Pu Hruaia te ina i va let leh khan enge iva zawh a?" ka ti a. Nathana chuan, "Engvak mah...ganja zuk bung ka hmuh thu ka sawi a. A zuk ngailoh thu leh an chhungkua ah meizial zu an awmlo hrim hrim a ti a, an fapa Michael-a zu ru lai an man zeuh zeuh thin, chubak chu zial zu an awmlo hrim hrim a ni awm e." a ti a. Tichuan kan titi char char a, khaw thim dawn tep ah chuan kan haw ta a. Zan chaw eikhamah chuan ka room ah meizial ka zu a, kuhva ka thial sen huam bawk a. Chaw eikhama kuhva hring al zeta han ei paha, farstar han zuk khuh luih luih mai hi chu, a nuamin rilru hahna te hi a kiang sawt sawt hian ka hre thin. A chang hi chuan ka u kha ka ngai thin a ni, ani pawh kha keimah ang tho a police hna thawk kha a ni a, an hnuchhuina lamah an kaphlum ta kha a ni a (Season-1 episode-8 ah Rinawma u chungchang chu kan thailan zeuh tawh kha). Mahse Nathana ka hmelhriat atang hi chuan unaupa thar ka nei leh nimai hian ka hria. Mak ve deuh mai chu, ka boss a nih vang nge pawh ka hrelo, kei aiin naupang ve hle mahse u angin ka en lo theilo thin. Chutia ka inngaihtuah neuh neuh lai chuan ka phone a rawn ri a, ka sitar, ka cousin, ka bem ngam hlawl loh, mahse min duh ve tho tu, Tluangtei a lo ni a. Ka nui vur vur a, phur tak chuan phone chu ka pick up a..
"Hello."
"U Rin, enge i tih a?"
"Engmah tilove, hei roomah ka awm a."
"Vawiin duty te a nuam em? Hnu chhui mek te innei em?"
"Nuam nang aw....hei tualthah case kan chhui leh mek a."
"Awi a nimaw? Ka lo tibuai che em?"
"Hehe, tibuai nang aw...tun hi chu ka free hunlai alawm."
"U Nathana a dam maw?"
"A dam mah mah zawk...min tir kual leh reng tawh mai."
"Hehe, i zinbo hlan khan vawi 3 lai an suspend tihte ka lo hria a, ka lo ngaihtuah ve lutuk a."
"Nia, i u Nathana hi chu e, suspend ala ni fo ang. Diktakin hna a thawk a, thamna a la duh ngailo a, a rinawm em avang alawm suspend pawh hi ngaiah a nei tawh."
"Nangmah i dam tha maw?"
"Ummm dam tha e...nang zawk?"
"Keipawh ka dam e, lehkha ka zir mek a, thingpui ka in lawk a, ka lo call mai mai che, ka ngai em che a, ka'n zir leh tawh ange aw....bye."
"Awle, bye bye, muttui le."
A van reilo tak, zankhuaa biak ka chak asin le. Tluangtei hi chu awww....alo zin leh hun chu ka van bem ve tawh dawn chiang em. "Zanin chu a nuam hle mai." tiin ka nui vur vur a, tichuan hla te ka ngaithla a, dar 10 vel a rik chuan ka muhil ta a. A tuk zingah chuan dar 8 velah Station ka thleng a, Nathana pawh alo awm leh der tawh, ahma thei bik ania. Nathana chuan a office ah min ko lut a, "Rina, Dinga te inah khan iva kal leh teh ang." a ti a, keichuan, "Naaa...ka lo thleng ve chauh a, ka'n thu hahchawl ve phawt ange." ka ti ve deuh kher a. DIG chuan tuna ka thusawi kha hria se chu min kap duh hial ang, senior te zah tur tih hi nitin vawi 10 tal a sawi thin kha a nia. Nathana chuan, "Motorah i thu hahdam dawnnia, kal vat ang." a ti a, peihlo tak chuan ka zui a. Dinga te in chu kan thleng a, inchhungah chuan kan lut a. Dinga pa chuan an nupa room ah min chhoh pui a, tichuan thingpui te in pahin Nathana chuan Dinga pa bulah chuan, "Ka pu, Dinga hian ruihtheihthil a ti ngai em?" tiin a zawt a. Dinga pa chuan, "Ruihtheihthil a tih awm chu ka hrelo a, meizial erawh a zu ru ve fo tih chu ka hria." a ti a. Nathana chuan, "Ganja te hi a lo zu ve mial lo maw?" tiin a zawt a. Dinga pa chuan mak tih hmel tak hian, "Ganja a? T(r)ip i tihna maw? A zu lovang, ka ringlo." a ti a. Nathana chuan, "Englo ania, a ruang an hmuhna hmunah khan ganja zuk bung panga vel lai a awm a." a ti a. Dinga pa chuan, "Ka hrethiam biklo, kan hriat lohvin alo zu ve pawh ani mahna." a ti a. Nathana chuan, "A room kha inla khawih danglam lo tiraw?" a ti a, Dinga pa chuan, "Aw...a ngai ang chiah in kan la dah." a ti a. Nathana chuan, "Kan lo dap tha leh lawk teh ang." a ti a, tichuan Dinga room chu kan dap leh ta a. Minute 10 vel kan dap hnu chuan Nathana chuan, "Rinawm lo kal teh...ka thil hmuh hi." a ti a, ka va phei a. Nathana chuan Risla (ganja zialna paper) chu min hmuh a. Nathana bawk chuan, "Hei hi OCB a ni a, hemi paper hmang hian ganja an zial thin a..." a tih lai chuan, "Ka hre ve tho." ka lo ti hmuk a. Nathana chuan, "He thil hian Dinga chu ganja a zu thin ve thin a ni tih min hrilh chiang hle mai, mahse apa erawh hrilh hrih lovang." a ti a, keichuan, "Ngatimaw?" ka lo ti hu a. Nathana chuan, "A rilru a hah lutuk ang, chubakah a tul hrih lo" a ti a, room atang chuan ka chhuak a. Nathana chuan Dinga pa bulah chuan, "Ka pu, zaninah in inah hian kan lo leng leh dawn a nia aw." a ti a, Dinga pa chuan, "Tehreng mai, in duh duh hunah inlo leng dawnnia." a ti a, kan chhuahsan ta a. Motora kan tlan pah chuan NAthana chuan, "Rinawm, Ganja hi i zu ve tawh reng reng em?" a ti daih mai a. Keichuan, "Zu ve tawh ang chu mawle..." ka ti a, ka zu ve tawh miau alawm le. Nathana chuan, "Engtik hun lai velin nge i zuk ve thin a?" a ti leh a. Keichuan, "Kan tleirawl laiin, Dinga te, Michaela te ang rual ka nih lai hian ka zu ve nasa alawm." ka ti a. Nathana chuan, "Khaii...i tleirawl lai chu a rei tawh awm mange, 1985 kum vel daih a ni tawh ang chu." an ti deuh kher a, a la nui huah huah zui. Ngei hmel tak hian ka melh a, "Inla tleirawl viau suh aw...i naupang vak bik tawhlo ania." ka ti let ve deuh sak a. Nathana chuan, "Kan in upat hleih emai, chubakah kei te chu nupui ka nei tawh tal a, nang ve, ngaizawng ve tu che pawh i bem ngamlo ania." a ti a, kan nui dun huah huah a. Nathana nen chuan Station chu kan thleng a, a office ah min luhpui a. Tui a in te te a, "Rinawm, thil pakhat ka hre chhuak zawk mai. Michael-a leh Dinga hi an inkawm ngeih hle tih kan hria a, anih chuan Dinga'n ganja a zuk thin chuan Michael-a pawh hian a zuk ve ka ring tlat." a ti a. Keichuan, "Nia, ka lo ngaihtuah char char alawm." ka ti a. Nathana chuan, "Eiss...i lo fing ani nang hi chu." a'n ti leh deuh kher a, ngeiawm lutuk mai. Nathana bawk chuan, "Ti hian ti teh ang, Station incharge ah vawiin bik atan ka dah che anga, kei chu Michael-a te inah ka va kal leh ange. Chuan engkim hriat chian ka lo tum anga, zanah ka rawn phone dawn che a nia, khawiah mah chhuak bo lo la." a ti a, "Yes Sir." ka ti a, tichuan a chhuak ta a.
Zanah chuan Nathana min rawn call hun nghak pahin Tluangtei nen chuan kan in text mai mai a. Kan thusawi a thlum tan ta khawp mai, tun hi bem hun chiah ani angem tiin ka rilru a insual nasa khawp mai a. "Thil hrilh duh che ka nei a, mahse min huat phah ang tih ka hlau." tiin inla zei fahran hian ka han hel kual ve vel phawt a. Tluangtei chuan, "Enge sawi la, ka haw phal lo che." a rawn ti ve bawk a, ka phur tawh hle mai. Kan inngaihtuah vang vang hnu ah huaisenna zawng zawng leh Nathana huaisenna tlem puk belhin, "KA HMANGAIH..." tih ka type lai takin Nathana chuan min rawn call a, ka va haw tak em. Ka pick up a, ka tawng hma hma chuan, "Lo kal rawh le." a ti a, a dah leh daih a, mood zawng zawng a chhe vek. Ka message type sa chu ka clear leh ta tawp a, "Ka chhuah lawk angai a, nidangah a nimai." ka ti a, inthiamlo tak leh thinrim tak chung chuan ka insiam a, Dinga te in lam pan chuan ka inkhalh chhuak ta a. Inchhung ka thlen chuan Nathana, Dinga nu leh pa, constable pali vel te leh Michael-a te pafa anlo awm bawk a. Nathana chuan Michael-a pa bulah chuan, "A pawi ka ti takzet ka pu, kan hriatdan chuan tualthattu hi i fapa Michael-a hi a ni." a ti ta mai a, an phawk hru hlawm mai a, kei erawh mak ka ti em em lo, ka rindan ve tho a nih vang pawh a niang nge. Pu Hruaia chuan, "Enga? Ka fapa hi maw?" a ti hu mai a. Michael-a chuan, "A awihawmloh lutuk, ka thianpa ania ka that lovang." a lo ti ve pang pang bawk a. Nathana chuan rum zet hian Michael-a chu a en a, a ipte atanga rawlmawl lak pah chuan, "Hei hi i rawmawl a ni em?" a ti a, rawmawl chu a lek kang a. Rawmawl ah chuan WWE tih hi alo inziak bawk a. Michael-a chuan a chhan hma hma chuan Michael-a pa chuan, "Aw ni e, ka leisak alawm, WWE tih inziak kher a duh a." a lo ti a. Nathana chuan, "Michael, tinge i rawmawl hi ka neih theih? Tinge ka kawl daih theih? Achhan i hria em?" a ti a. Michael-a chuan, "Ihh...ih, ka tibo palh a. I lo chhar a nimaw?" a ti bah deuh nuai mai a. Nathana chuan, "Ruang an chharna bula khan ganja zuk bung tam tak kan hmu a, tichuan vawiina in ina ka lo kal dawn khan ruang hmuhna huan ah khan ka kal leh a, ganja zuk bung kan hmuhna bulah lawk khan he rawmawl hi hnim karah ka hmu a ni. Tichuan Dinga hian ganja a zu thin tih kan hria a...a chhan pawh vawiin khan Dinga room kha kan dap leh a, ganja an zialna paper Risla kan hmu a ni. Chuan Michael-a room a Michael-a thu ka zawhfiah khan Michael-a zun lawk hlan khan a dawhkan hnuaiah thlai chi an deuh hi ka hmu a, ganja chi a ang ka tih em avangin ka chhar vek a, sarangah ka khung a, ka ak ta a. Mak ka tih deuh bawk chu Michael-a kha a bai suih suih a, hmanni a Rinawma nena kan kal kha chuan khuma a thut vang khan a bai leh bai loh kan hre theilo a. Chuan i room ka dap khan i wardrope kilah i kawr thisen kai chu ka hmu bawk. Engmah sawi duh hrih lovin kawr pawh chu ka bag ah laiah chuan ka thun a, tichuan ka hawsan ta che a ni. Tichuan kha thlai chi kha Doctor Zuala, kan department a mi chu ka en tir a, ganja mu ngei a ni tih min hrilh ta bawk a ni. Michael, tualthattu chu i ni ngei e kan ti kher lo, mahse i thianpa thih chhan hi i hria a ni. Min hrilh mai rawh, anih loh chuan jail ah i tang thei a nia." a ti a. Michael-a chu a kun lap a, a tap ta pur mai a.
Michael-a chuan, "Ni e, ka duh vanga that pawh ka nilo....a thih pawh ka ringlo a." a ti ta mai a. Pu Hruaia chuan, "Enga? I thah maw ni a?" a ti hu mai a. NAthana chuan, "Constable, Pu Hruaia hi pawnah chhuah pui teh u."a ti a, a duhlo chung chu an chhuah pui ta a. Nathana chuan, "Michael, sawi zawm zel teh le.." a ti a. Michael-a chuan, "WWE hi kan thian dun hian kan atchilh em em a, kan en ning theilo a ni ber mai. Wrestler te in buan ang hian kan pahnih hian kan huanah hian kan infiam thin a, mahse chumi hma chuan ganja kan zu dun phawt zel a. Khami zan khan zuk tur kan nei tawh lo a, Dinga chu la turin Bawngkawn lamah a va kal ta a. A lo haw leh khan dar 10 leh achanve a pel tawh a, tichuan kan ina lo len leh nan a tlai tawh si a, kei lah khami zan khan ka pa'n lenchhuah a phal silo a. Tichuan dar 11 rik veleh ka chhungte mut hnuah ka chhuak ru ta a, tichuan kan inhmu a, kan huan lamah chhukin ganja chu kan zu ta a. Kan kai telh telh a, kan ngaih asam telh telh a, tichuan tlawn nga lai chu kan zu ta a. Kan titi a, kan nui dun vak vak a, tichuan Wrestler ho inbuan dan chuan kan rui phur tawh nen kan inbuan ta a. Chak ta riau leh pa bik ta riau ang hian ka inhre tlat a, tichuan min hneh tha silo chu min rawn hnek ta tak tak a, ka thinrim chuan ka khawih let ve leh a, tichuan kan insual chu a ni ta ber mai. Rei deuh fe kan insual hnu chuan ka chan a tha ta deuh zawk a, ka wrestler duh ber Roman Reigns-a style-in a dulah ka va spear ta a, mahse a tukhum a vaw ri chawrh a, thisen a chhuak vak vak a. a tukhum zawnah chuan lung lian tak alo awm a. Ka hlauthawng bawk si, ka mangang bawk si, ka hamhaih a ni ber mai, tichuan a meng pual vek a, a thi ta der mai a, ka hlauthawng lutuk chu ka hawsan ta ringawt mai a ni. Ka chhungte chu an lo la reh thiap mai a, tichuan hlauthawng tak chuan ka meng tlaivar thak a ni." a ti a. Dinga nu leh pate chu an tap zawih zawih a, Nathana chuan, "A pawi khawp mai Michael, kum ila tling lova, Home ah kan dah che angai. Tual i thah avangin kum 18 i tlin veleh jail pangngai ah kan thawn nghal bawk dawn che a ni. Hei hi hre rawh, WWE hi Family Show a ni a, Entertainment a ni. Wrestler in ngaihsan em em te hi nangni angin meizial te, ruihtheihthil te hi an ti ve ngai lo. Rei tak chhung training an nei a, professional te an ni. Nangni'n helai a lo tih ve ngawt chi a nilo, a hrinchhuah chu hei hi a ni, thihna...tualthattu ah a siam der bawk che anih hi. Chubakah sap tawng in thiam a, Wrestling in en pawn DO NOT TRY THIS AT HOME tih a inziah thin hi, in hrethiam ve vek. A pawi khawp mai, i damchhungin jail bang i zut tawh ang." a ti a, Michael-a chu kan phurliam ta a.
(THE END)
OBSESSED WITH WWE
Ka phone vibrate chur chur chuan min ti harh a, phone chu ka'n en a, Nathana alo ni a. Kei hi min la hria em aww??? Ka'n insawi leh phawt ange, Lalrinawma ka ni a, Assistant Superintendent of Police ka ni. Thla engemaw zat chu ka senior, ka thianpa leh ka unaupa Nathana nen kan thawkdun tawh lo a, a khawharthlak thin hle mai. Tunah chuan ka lo let leh ta bawk a, kan han che leh tak tak ange. Chuan episode hmasa lam khan thlahrang lampang kan chhui a, kha thla kha a tak tak ania, dawt anilo ania, ka hmu velo nangin Nathana'n min hrilh a, ka hlau teh asin. Phone chu ka la a, Nathana chuan, "Rinte, i tho tawh em?" a rawn ti a. Keichuan, "Tho lo deuh, minlo phone a, ka harh chiah." ka ti a. Nathana chuan, "Station ka thleng der a nia, tualthahna a thleng a, lo kal vat teh." a rawn ti a, ka phu zawk mai. Hriatchak takin, "Enga? Engtin? Khawiah?" ka han ti nghal vak vak a. Nathana chuan, "Lo kal phawt teh." a ti a, phone chu a dah hmak a. Peihlo tak chuan ka tho a, ka duty tan hun pawh ala ni lo, a duh duh hunah hian kei ASP ve meuh tawh si hi constable ang mai hian min tir kual zuah zuah hi a ni ber mai. Ka inbual a, chaw te ka ei te te a, tichuan Station lam pan chuan ka bike, Gixer pawl nen ngei mai chuan ka inkhalh phei ta a. Police Station chhung ka lut chiah chu Nathana chuan a office ah in ko lut nghal a, "Bawihpui, tinge maw kaihthawh ziah i ngaih mai le?" a ti nuah nuah a, ka ngei thin mange, hepa hi chu. Tum hmuk hian, "Bawihpui te mi tih le, naupang te te si." ka ti ve deuh kher a. Nathana chuan nui chungin, "Bawihpuia alawm i nih...han thu phawt teh." a ti a, ka thu ta a. NAthana bawk chuan, "I ngaihawm hle mai, i tellovin vawi 2 lai chu keimahin hnu ka chhui a, a khawharthlak khawp mai." a han ti te te a. Keichuan, "I chhui chhuak vek tho alawm ka tellovin." ka ti a. Nathana chuan, "Ka chhui chhuak lo ka tia mi? Ih e...i tello chuan a nuam tak tak lo, tangkai viaulo mahla, ka bula i awm ve hrim hrim hian a kim alawm. Chubakah, kei chauh nilovin, kan hnuchhuina chungchang ziak mektu Aaron-a pawn a ngai tawh che alawm." a han ti leh a. Keichuan, "Chutiang sawi duah a ngai thin lo, tualthahna a thleng i ti tiraw?" tiin ka zawt a. Nathana chuan, "Umm....tukin zing dar 4 khan Pu Hruaitluanga, Zuangtui ami te in bulah ruang chhar a ni a, keichuan dar 5 vel khan ka hria a, mahse SI Liantea'n ka lo buaipui ang, chaw ei kham velah chanchin ka lo hrilh ang che min ti a. Mitthi hi Laldingliana ani a, Zuangtui Veng ami tho ania, Pu Tlanmawia fapa an ti a ni awm e." a ti a. Keichuan, "Aww..chutiang te chu keipawh minlo kaithawh mai tur alawm." ka han ti ve luam a. Nathana chuan, "Ve lutuk a, i tho thei leh chuang dawnlo tih ka hriat vang alawm. Ruang hmuh hun hi dar 4 a ni a, i muttui lai tak ani awm sia, ka khawngaih che mawle." a ti deuh kher a, ala ngeiawm reng a ni he DCP hi chu. Keichuan, "Anih leh SI chuan a lo be leh tawh che em?" ka han ti a. Nathana chuan, "Bia e, ilo thlen hma deuh khan minlo bia a, ruang chu post mortem turin an rawn phur phei tawh a, a mitthi chhungte thu zawh fiah erawh kan kutah a awm." a han ti a. Keichuan, "Umm...kan kal dawn em ni?" tiin ka han zawt a, Nathana chuan, "Nia, i kal ang hmiang." a ti a, tichuan kan kal ta a.
Nathana zawkin motor a khalh a, a ngawi reng a. Keichuan, "Sir, DIG in engemaw sawi a nei em?" ka han ti a, Nathana chuan, "Neilo, tinge?" a ti a. Keichuan, "Englo ania, DGP Sangliana ka ngaih em vang pawh a ni maithei, kan DIG hi ka mil thlawt lo." ka ti a. Nathana chuan nuih suk pah hian, "Mai mai thin a, chutin mahni pute an sawi ngailo. Chubakah nang hi chu hmeichhia ang mai, eiloh i ngah ve hrim hrim." a ti a, kan han nui dun leh rih a. Tichuan Zuangtui chu kan thleng ta a, mitthi in chu zawn vak pawh a ngai lemlo, a bul velah chuan mi anlo phu mur mur a. Inchhung kan lut a, Pu Tlanmawia chuan min lo welcome tha hle mai. A fapa thi ta, room ah chuan kan han lut a, bangah chuan thlalak alo intar nasa ngei mai. Thlalak intar ho chu ka han enkual a, wrestling ngaina ve tak a ni ngei ang. Thlalak a tar tamtak zingah chuan Hulk Hogan, The Rock, John Cena te leh Undertaker te thlalak chu ka hriat ve te an ni. Abak ho chu kan lo upa ve ta nge, wrestling en rual ka nih tawhloh vang zawk, tuvak mah ka hre hlawm lo, kan en ve thin lai kha chuan Andre the Giant, The Ultimate Warrior te leh Yokozuna te, Owen Hart te kha kan enve thin kha a nia, thlalak ka hmuh avang hian ka'n sawi ve deuh luam a ni, minlo hrethiam teh u. Pu Tlana chu Nathana chuan zawhna ahan zawt leh tan ta a.
"Ka pu, in fapa hi kum engzat nge?"
"Kum 17"
"Awhaww..ava la naupang ve. Azia lo hle mai, school te ala kal em?"
"Aw..pawl 12 a ni a, Mount Carmel ah a lut a. Hei, 1st term exam an zo a, exam chawlh an hman lai mek a ni a, nizan a leng chhuak kha alo haw silo a. Kan hriat leh awmchhun chu a thi tih thu hi a nimai, apawi takzet a ni."
"Anih leh ka pu, i fapa Dinga hian hmelma a neih awm i hria em?"
"Aaa...ala naupang bawk a, chutia hmelma a neih chu ka ring lo."
"A nei ve thei tho ania, an kum chu la naupang hle mahse, tleirawl thisen lum lai a ni a, hetiang rual ho hi chu insual te an hrat a, thu ho te te vang pawhin hmelma an siam teuh thei a."
"A ni tho mai, mahse ka pu...ka fapa hi chu thian a kawm tam ve lutuk lo a, a room chhunga poster a tar ho in hmuh ang hian, wrestling hi a atchilh em em a, amah te hian naupang chhia ang maiin a khumah te hian insual niawm tak hian a let leh tual tual mai thin a. Computer ah lah ni se, wrestling game a khel reng a, a phone ah lah wrestling video a en reng bawk a, thian a kawm vak ngailo."
"Anih chu, nihleh nizan chuan khawnge a len a?"
"A lenna tur a sawi lo a, a chhuak tawp a. Ka rindan chuan a ruang an hmuhna bul, Pu Hruaia te inah a leng a nih ka ring a. Achhan chu Pu Hruaia fapa Michaela nen sawn an inkawm ve zeuh zeuh thin a, mahse Pu Hruaia lah chuan alo kallo a ti bawk si."
"A nih tak chu...nileh Pu Hruaia nen chuan in inkawm ngai em? Ka sawi awmzia chu nangmah hian Pu Hruaia hi i kawm ngai en? Thian in ni hrim hrim em ka tihna a nih chu."
"Vengkhat kan nia, kan inhria a, khawlaia kan in tawh chang te chuan kan inbe ve ziah. Mahse thian ang em em chuan kan inkawm ngailo, hmelhriat satliah a ni mai."
"Awle, engpawh ni se, kan kal phawt ange aw. Chuan lo zin bo lo ula, engemaw thu thar a awm chuan kanlo hrilh leh ang che u. Chuan in fapa Dinga room hi engmah lo khawih danglam suh ang che u."
"Awle ka pu, kan lo tawngtai pui reng ang che u."
Nathana nen chuan motor lam kan pan a, chak tak chuan kan tlan a. Nathana chuan, "Anihna takah chuan nangpawh hi i nep ve hrim hrim." min ti ringawt a. Hrethiamlo tak chuan, "Enga? Ngawt ngawt zel a, enge min hauh rikngawt a?" ka ti hu a. Nathana chuan, "ASP lai i ni ve a, heng te chu nangmah a chhui chhuah ve a hun tawh, keite chu Station-a awm mai mai tur zawk ak ni tawh asin. Ka rank te hi a sang ve ania, DCP lai ka ni ve a, hnuchhuinaah ka tel ve zel angai a. Rina, i harhchhuah angai, chhiar tu te leh ngaithla tu te pawn comment naah Rinawma hi a mawl e, a thinchhe si..an ti vak vak zel che a nia, a hahthlak emai tiang ngawt chuan." a ti vak vak a, ngawt ngawt zel a. Keichuan, "Enge maw min hauh rikngawt le awwwww???" ka ti a. Nathana chuan, "Sawi tur a vang em a, ka han hau lawk che a nih kha." a ti a, a nui suk a, ava han ho thei mai mai tak. Nathana bulah chuan, "Khawnge kan kal dawn?" ka ti a, NAthana chuan, "Ruang an hmuh naah kal ang, chuan Pu Hruaia te inah pawh chuan kal ve hrim hrim ang, thu zawh fiah ve ka duh a ni." a ti a. Keichuan, "SI Liantea khan engmah hnuhma a awmlo a tih kha." ka lo ti a. Nathana chuan, "An zawng uluk lo ve thin bawk alawm, nidnagah pawh ka tirh apiangin hnuhma a awm lo, engmah a awm lo an ti ziah a, ka kal nawn leh ngat thin a, engemaw hi chu ka hmu leh tho zel." a ti a, keichuan, "Umm...kal ila nimai lawm." ka ti a. Reilo teah chuan Pu Hruaia te in chu kan thleng ve nghal thuai a, an inchhungah chuan kan lut ta a. Kan nihna te kan han sawi a, tichuan Nathana chuan, "Ka pu, nizan chuan Dinga chu alo leng miahlo amaw?" tiin a han zawt a. Pu Hruaia chuan, "Aw...lo leng lo." a ti a. Nathana chuan, "Nihleh i fapa hi a chhuak em?" tin a zawt leh a, Pu Hruaia chuan, "Chhuaklo, amah in be duh em?" a ti a. Nathana chuan, "Umm...mahse chumi hmain..i fapa leh Dinga hi an inkawm thin niin Dinga pa chuan a sawi a, a dik em?" a ti a. Pu Hruaia chuan, "Aw dik e, Dinga hi naupang fel tak niin ka hria. A lo leng ve zeuh zeuh a, ka fapa nen hian an inkawm a, ka fapa room ah hian nileng thak thak in computer an khel dun thin a. Wrestling game hi an khel thin a, exam an chawlh chang phei chuan nitin deuhthaw hian alo leng a, nilengin an khel dun a, tlai chaw ei dawnah a haw veleh mai zel a. Chutiang chiah chuan a changin ka fapa hi Dinga te inah chuan ava leng ve thin a, tlai chaw ei dawnah alo haw veleh thin a, an inkawmngeih ve viau chuan ka hria." a han ti a. Nathana chuan, "Umm...anih chu mawle. Ka pu, i fapa hi kan ringhlel tihna anilo a, Dinga nen hian an inkawm nasat thin em avangin thu tlem zawh ve kan duh dawn a, amah kan be thei angem?" a ti a. Pu Hruaia chuan, "Thei tehreng e...a roomah a awm ang." a ti a, Michael-a room lam pan chuan kan inzui phei ta hlawm a. Michael-a room chu kan han lut a, Dinga ang thovin wrestling ngaina tak a ni. A room bangah te chuan wrestler hrang hrang thlalak a lo awm a, ka hriat ho ka'n sawi vek leh lawk...Kane, Stone-Cold, Chris Benoit te leh Kurt Angle te chu ka hre ve. Nathana chu Michaela hma takah chuan a thu a, Nathana chuan, "Michael, kum engzat nge i nih?" a ti a. Michael-a chuan zam hmel tak hian Nathana chu a melh zeuh zeuh a, "Kum 16" tih ringawt hian a chhang a. Michael-a pa chuan, "Bawiha, tha deuha chhan tur aw.." alo ti zeuh bawk a. Nathana chuan, "Dinga thih zan hian i chhuak lo amaw?" a ti a. Michael-a chuan, "Aw...roomah hian ka awm a, games ka khel char char." a ti a. Nathana chuan, "Nihleh Dinga hi i thiandang te zingah emaw, midang hrim hrim pawh...hmelma a neih awm i hria em?" a ti a. Michael-a chuan, "Aih, ka hrelo ka pu...tumah huat a neih awm pawh ka hrelo." a ti a. Nathana chuan, "Dinga hian rilru hah deuhna a neih awm i hria em?" a han ti leh a. Michael-a chuan, "Chutianga rilru hahna a neih awm pawh ka hrelo, mi fel tak ania." a ti a. Nathana chuan, "A nih chu mawle, i thianpa thihna chhan hi hriatchhuah tumin kan chhui mek a ni a, nang pawh hi kan tan ila tangkai maithei ania, khawiah mah lo chhuak bo suh aw." a ti a, tichuan Pu Hruaia te in chu kan chhuahsan ta a.
Motor lam kan pan a, kan luh dawn chiah chuan Nathana chuan, "E taka, ka theihnghilh tep. Ruang an hmuhna hmun ah khuan zu kal lawk teh ang." a ti a, keipawh chuan engmah sawi lo chuan ka zui ve ta mai bawk a. Ruang an hmuhna hmun chu kan thleng a, Nathana chuan a han en kual vel a. Keipawh chu inla hnuchhui thiam takin ka han thlek kual vel a, engmah rinhlelh tur erawh ka hmu lem chuanglo a. Nathana chuan vei kual pah chuan, "Rina, SI sawidan chuan Dinga hi thah ngei a ni a ti a. A tukhum a pawp a, a kak zau hle a, thisen tam tak a hloh a ni. Chuan tualthattu nen hian an insual phawt ni ngei tur a ni, a hmai a duk chur a, a taksa dangah pawh hliam a nei nual a ni awm e." a ti a. Keichuan, "Tualthattu hian Dinga hi a haw hrim hrim nge, serial killer pangngaiin a that ni zawk ang le? A chhungte sawi dan leh a thianpa Michael-a sawi dan kha chuan naupang fel tak a ni a, mi pawi a sawi ngailo an ti si a. Chutia naupang fel tak ni si chu tuin nge that duh ta ang?" ka lo ti ve bawk a. Nathana chuan, "Nia...mahse mi hi an landan ang ngawt hian teh loh tur a nia. Aruka sual tak a lo ni ve thei tho bawk a, chubakah tuma hriatlohvin hmelma alo nei ve thei tho bawk." a ti a. Tichuan minute 10 vel chu inbe miahlovin hnuhma a awm nge awmlo tih hriat tumin kan han enkual leh phawt a, Nathana chuan, "Rinawm, lo kal teh." a ti thut a, ka val kal a. Nathana chuan, "Enteh, Ganja zuk bung tam zia hi.." a ti a. Keichuan, "A ho e, Ganja zuk bung mai mai." ka lo ti a. Nathana chuan, "Hmun dang hi en la, a fai hlawm em hi. Bawlhhlawh paihna pawh a nilo a, mi huan a ni a, meizial bung pakhat lek pawh hmuh tur a awmloh laiin Ganja zuk bung 5 vel lai a awm bik a, chupawh hmunkhatah chauh lehnghal." a ti a. Keichuan, "Anih leh enge i sawi tum ber chu?" tiin ka han zawt a. Nathana chuan, "Ganja hi han en pawh hian an zukna ala rei lutuk lo ang, an roll-na lehkha pawh hi ala fai tha emai. Nimin emaw, nizan vela zuk a ang ka ti. Thil awmthei chu tualthattu hi Ganja zu thin a nih ka ring. Mahse tlangval dang ho zuk pawh ani thei a, chubakah zankhatah mipakhat chauhvin Ganja tlawn 5 vel a zuk zawh peih ka ring lo." a ti a. Keichuan, "I sawi awmzia chu, Ganja zu tute hi mipakhat aiin an tam i tihna em ni?" ka han ti a, Nathana chuan, "Umm...mahse tualthattu hian Ganja hi a zuk pawh alo nilo thei a, mahse nizan khan helai hmunah hian Ganja zu chu an awm ngei a ni. Chuan mitthi ber Dinga hi helai hmunah hi chuan a kal tih chu a chiang reng a, achhan chu helai hmunah hian a ruang hmuh a ni miau a. Dinga ber pawh hian a lo zu pawh a ni thei tho mai, chhuichhuah a har em em dawnloh hi." a ti a, leh ngawt thin chuan awww. Nathana chu a ding hluai a, "Rina, Station lamah va kal la, post mortem result a chhuak tawh em va zawt teh, a chhuah loh chuan rang thei ang bera tichhuak vat turin va ti rawh." a ti a. Keichuan, "Anih leh nang?" ka ti a. Nathana chuan a motor chahbi min pek pah chuan, "Kha....keichu taxi in ka lo phei ang. Pu Hruaia te inah hian ka kal leh lawk dawn, thu zawhfiah leh lawk ka duh." a ti a, tichuan Nathana chu ka kalsan ta a. Station ka thlen chuan SI Liantea hnenah chuan post mortem result a chhhuak tawh em tiin ka zawt a, mahse ala chhuahloh thu min hrilh a. Chhun dar 1 a ri tawh a, Nathana erawh alo la let lo. Ka phone lahin a dah busy hmiah hmiah lehnghal, a boring hle ani, Nathana tello chuan. Tichuan reilote hnuah ka office ah chuan SI chu alo lut a, "Sir, hei post mortem result.." a rawn ti a. Ka han en chiang a, zanlai dar 1 vela thi a ni a, a tukhum pawp atanga thisen a chhuah hnem em avanga thi a ni ber tiin a inziak a. SI bulah chuan, "Ruang hi tuin nge hmu intih kha?" tiin ka zawt a. SI chuan, "Sir, Zuangtui ami tho, Pu SAngtea zing feh kal lamin a hmu a ni awm e." a ti a. Keichuan, "A that chu..i kal thei e." ka ti a, SI chu a kal ta a.
Keima tawkah Nathana leh Raymonda te angin fing ve viau lo mah ila, ka inngaihtuah nasa ve hle mai a. Nathana chu a lo thleng a, ka office ah a rawn lut a. Thutthlenga thut pah chuan, "Post mortem result chu?" a ti a, tichuan ka hmuh tir a. Nathana chuan a en vang vang a, "Zanlai dar 1 vela thi anih chuan...tualthattu hian hemi hun hi a chang reng tihna a ni thei tho mai. Zanlai mi mut reh lai a chuh pawh a ni thei bawk a...mahse khawlaia zurui hovin an sawisa hlum palh pawh a ni ve thei tho bawk. Nge ni a ganja kha Dinga hian amah zawkin a zu anga, a rui lutuk chu huanah khan a kal anga, a tawlhthlu a, a tukhum a sawh palh zawk..mahse kutthlakna hnuhma kha a taksa ah khan a awm nual tho bawk sia." a ti nuah nuah a. Keichuan, "Sir, Ganja zuk bung kan hmuh kha panga lai a ni a, Dinga hian tlawn nga em em amah chauhvin a zu zo peih dawn mi?" ka lo ti a. Nathana chuan, "Ni reng e, mahse Ganja zuk bung kha lak thutak em em tur pawh ani chuanglo. Midang daih zuk pawh a ni thei tho, mahse ka sawi tawh ang khan kha huan kha a fai em em a, sarang pakhat pawh hmuh tur a awm lo a, hmun khata ganja zuk bung lo awm bik khan ka ngaih a ti tha chiahlo deuh mawle." a ti a. Keichuan, "Khami huan neitu te kha Pu Hruaia te tho kha an ni tiraw?" ka lo ti vat a. Nathana chuan, "Aw ni e." tih ringawt hian min chhang a. Keichuan, "Anih leh Pu Hruaia te ina i va let leh khan enge iva zawh a?" ka ti a. Nathana chuan, "Engvak mah...ganja zuk bung ka hmuh thu ka sawi a. A zuk ngailoh thu leh an chhungkua ah meizial zu an awmlo hrim hrim a ti a, an fapa Michael-a zu ru lai an man zeuh zeuh thin, chubak chu zial zu an awmlo hrim hrim a ni awm e." a ti a. Tichuan kan titi char char a, khaw thim dawn tep ah chuan kan haw ta a. Zan chaw eikhamah chuan ka room ah meizial ka zu a, kuhva ka thial sen huam bawk a. Chaw eikhama kuhva hring al zeta han ei paha, farstar han zuk khuh luih luih mai hi chu, a nuamin rilru hahna te hi a kiang sawt sawt hian ka hre thin. A chang hi chuan ka u kha ka ngai thin a ni, ani pawh kha keimah ang tho a police hna thawk kha a ni a, an hnuchhuina lamah an kaphlum ta kha a ni a (Season-1 episode-8 ah Rinawma u chungchang chu kan thailan zeuh tawh kha). Mahse Nathana ka hmelhriat atang hi chuan unaupa thar ka nei leh nimai hian ka hria. Mak ve deuh mai chu, ka boss a nih vang nge pawh ka hrelo, kei aiin naupang ve hle mahse u angin ka en lo theilo thin. Chutia ka inngaihtuah neuh neuh lai chuan ka phone a rawn ri a, ka sitar, ka cousin, ka bem ngam hlawl loh, mahse min duh ve tho tu, Tluangtei a lo ni a. Ka nui vur vur a, phur tak chuan phone chu ka pick up a..
"Hello."
"U Rin, enge i tih a?"
"Engmah tilove, hei roomah ka awm a."
"Vawiin duty te a nuam em? Hnu chhui mek te innei em?"
"Nuam nang aw....hei tualthah case kan chhui leh mek a."
"Awi a nimaw? Ka lo tibuai che em?"
"Hehe, tibuai nang aw...tun hi chu ka free hunlai alawm."
"U Nathana a dam maw?"
"A dam mah mah zawk...min tir kual leh reng tawh mai."
"Hehe, i zinbo hlan khan vawi 3 lai an suspend tihte ka lo hria a, ka lo ngaihtuah ve lutuk a."
"Nia, i u Nathana hi chu e, suspend ala ni fo ang. Diktakin hna a thawk a, thamna a la duh ngailo a, a rinawm em avang alawm suspend pawh hi ngaiah a nei tawh."
"Nangmah i dam tha maw?"
"Ummm dam tha e...nang zawk?"
"Keipawh ka dam e, lehkha ka zir mek a, thingpui ka in lawk a, ka lo call mai mai che, ka ngai em che a, ka'n zir leh tawh ange aw....bye."
"Awle, bye bye, muttui le."
A van reilo tak, zankhuaa biak ka chak asin le. Tluangtei hi chu awww....alo zin leh hun chu ka van bem ve tawh dawn chiang em. "Zanin chu a nuam hle mai." tiin ka nui vur vur a, tichuan hla te ka ngaithla a, dar 10 vel a rik chuan ka muhil ta a. A tuk zingah chuan dar 8 velah Station ka thleng a, Nathana pawh alo awm leh der tawh, ahma thei bik ania. Nathana chuan a office ah min ko lut a, "Rina, Dinga te inah khan iva kal leh teh ang." a ti a, keichuan, "Naaa...ka lo thleng ve chauh a, ka'n thu hahchawl ve phawt ange." ka ti ve deuh kher a. DIG chuan tuna ka thusawi kha hria se chu min kap duh hial ang, senior te zah tur tih hi nitin vawi 10 tal a sawi thin kha a nia. Nathana chuan, "Motorah i thu hahdam dawnnia, kal vat ang." a ti a, peihlo tak chuan ka zui a. Dinga te in chu kan thleng a, inchhungah chuan kan lut a. Dinga pa chuan an nupa room ah min chhoh pui a, tichuan thingpui te in pahin Nathana chuan Dinga pa bulah chuan, "Ka pu, Dinga hian ruihtheihthil a ti ngai em?" tiin a zawt a. Dinga pa chuan, "Ruihtheihthil a tih awm chu ka hrelo a, meizial erawh a zu ru ve fo tih chu ka hria." a ti a. Nathana chuan, "Ganja te hi a lo zu ve mial lo maw?" tiin a zawt a. Dinga pa chuan mak tih hmel tak hian, "Ganja a? T(r)ip i tihna maw? A zu lovang, ka ringlo." a ti a. Nathana chuan, "Englo ania, a ruang an hmuhna hmunah khan ganja zuk bung panga vel lai a awm a." a ti a. Dinga pa chuan, "Ka hrethiam biklo, kan hriat lohvin alo zu ve pawh ani mahna." a ti a. Nathana chuan, "A room kha inla khawih danglam lo tiraw?" a ti a, Dinga pa chuan, "Aw...a ngai ang chiah in kan la dah." a ti a. Nathana chuan, "Kan lo dap tha leh lawk teh ang." a ti a, tichuan Dinga room chu kan dap leh ta a. Minute 10 vel kan dap hnu chuan Nathana chuan, "Rinawm lo kal teh...ka thil hmuh hi." a ti a, ka va phei a. Nathana chuan Risla (ganja zialna paper) chu min hmuh a. Nathana bawk chuan, "Hei hi OCB a ni a, hemi paper hmang hian ganja an zial thin a..." a tih lai chuan, "Ka hre ve tho." ka lo ti hmuk a. Nathana chuan, "He thil hian Dinga chu ganja a zu thin ve thin a ni tih min hrilh chiang hle mai, mahse apa erawh hrilh hrih lovang." a ti a, keichuan, "Ngatimaw?" ka lo ti hu a. Nathana chuan, "A rilru a hah lutuk ang, chubakah a tul hrih lo" a ti a, room atang chuan ka chhuak a. Nathana chuan Dinga pa bulah chuan, "Ka pu, zaninah in inah hian kan lo leng leh dawn a nia aw." a ti a, Dinga pa chuan, "Tehreng mai, in duh duh hunah inlo leng dawnnia." a ti a, kan chhuahsan ta a. Motora kan tlan pah chuan NAthana chuan, "Rinawm, Ganja hi i zu ve tawh reng reng em?" a ti daih mai a. Keichuan, "Zu ve tawh ang chu mawle..." ka ti a, ka zu ve tawh miau alawm le. Nathana chuan, "Engtik hun lai velin nge i zuk ve thin a?" a ti leh a. Keichuan, "Kan tleirawl laiin, Dinga te, Michaela te ang rual ka nih lai hian ka zu ve nasa alawm." ka ti a. Nathana chuan, "Khaii...i tleirawl lai chu a rei tawh awm mange, 1985 kum vel daih a ni tawh ang chu." an ti deuh kher a, a la nui huah huah zui. Ngei hmel tak hian ka melh a, "Inla tleirawl viau suh aw...i naupang vak bik tawhlo ania." ka ti let ve deuh sak a. Nathana chuan, "Kan in upat hleih emai, chubakah kei te chu nupui ka nei tawh tal a, nang ve, ngaizawng ve tu che pawh i bem ngamlo ania." a ti a, kan nui dun huah huah a. Nathana nen chuan Station chu kan thleng a, a office ah min luhpui a. Tui a in te te a, "Rinawm, thil pakhat ka hre chhuak zawk mai. Michael-a leh Dinga hi an inkawm ngeih hle tih kan hria a, anih chuan Dinga'n ganja a zuk thin chuan Michael-a pawh hian a zuk ve ka ring tlat." a ti a. Keichuan, "Nia, ka lo ngaihtuah char char alawm." ka ti a. Nathana chuan, "Eiss...i lo fing ani nang hi chu." a'n ti leh deuh kher a, ngeiawm lutuk mai. Nathana bawk chuan, "Ti hian ti teh ang, Station incharge ah vawiin bik atan ka dah che anga, kei chu Michael-a te inah ka va kal leh ange. Chuan engkim hriat chian ka lo tum anga, zanah ka rawn phone dawn che a nia, khawiah mah chhuak bo lo la." a ti a, "Yes Sir." ka ti a, tichuan a chhuak ta a.
Zanah chuan Nathana min rawn call hun nghak pahin Tluangtei nen chuan kan in text mai mai a. Kan thusawi a thlum tan ta khawp mai, tun hi bem hun chiah ani angem tiin ka rilru a insual nasa khawp mai a. "Thil hrilh duh che ka nei a, mahse min huat phah ang tih ka hlau." tiin inla zei fahran hian ka han hel kual ve vel phawt a. Tluangtei chuan, "Enge sawi la, ka haw phal lo che." a rawn ti ve bawk a, ka phur tawh hle mai. Kan inngaihtuah vang vang hnu ah huaisenna zawng zawng leh Nathana huaisenna tlem puk belhin, "KA HMANGAIH..." tih ka type lai takin Nathana chuan min rawn call a, ka va haw tak em. Ka pick up a, ka tawng hma hma chuan, "Lo kal rawh le." a ti a, a dah leh daih a, mood zawng zawng a chhe vek. Ka message type sa chu ka clear leh ta tawp a, "Ka chhuah lawk angai a, nidangah a nimai." ka ti a, inthiamlo tak leh thinrim tak chung chuan ka insiam a, Dinga te in lam pan chuan ka inkhalh chhuak ta a. Inchhung ka thlen chuan Nathana, Dinga nu leh pa, constable pali vel te leh Michael-a te pafa anlo awm bawk a. Nathana chuan Michael-a pa bulah chuan, "A pawi ka ti takzet ka pu, kan hriatdan chuan tualthattu hi i fapa Michael-a hi a ni." a ti ta mai a, an phawk hru hlawm mai a, kei erawh mak ka ti em em lo, ka rindan ve tho a nih vang pawh a niang nge. Pu Hruaia chuan, "Enga? Ka fapa hi maw?" a ti hu mai a. Michael-a chuan, "A awihawmloh lutuk, ka thianpa ania ka that lovang." a lo ti ve pang pang bawk a. Nathana chuan rum zet hian Michael-a chu a en a, a ipte atanga rawlmawl lak pah chuan, "Hei hi i rawmawl a ni em?" a ti a, rawmawl chu a lek kang a. Rawmawl ah chuan WWE tih hi alo inziak bawk a. Michael-a chuan a chhan hma hma chuan Michael-a pa chuan, "Aw ni e, ka leisak alawm, WWE tih inziak kher a duh a." a lo ti a. Nathana chuan, "Michael, tinge i rawmawl hi ka neih theih? Tinge ka kawl daih theih? Achhan i hria em?" a ti a. Michael-a chuan, "Ihh...ih, ka tibo palh a. I lo chhar a nimaw?" a ti bah deuh nuai mai a. Nathana chuan, "Ruang an chharna bula khan ganja zuk bung tam tak kan hmu a, tichuan vawiina in ina ka lo kal dawn khan ruang hmuhna huan ah khan ka kal leh a, ganja zuk bung kan hmuhna bulah lawk khan he rawmawl hi hnim karah ka hmu a ni. Tichuan Dinga hian ganja a zu thin tih kan hria a...a chhan pawh vawiin khan Dinga room kha kan dap leh a, ganja an zialna paper Risla kan hmu a ni. Chuan Michael-a room a Michael-a thu ka zawhfiah khan Michael-a zun lawk hlan khan a dawhkan hnuaiah thlai chi an deuh hi ka hmu a, ganja chi a ang ka tih em avangin ka chhar vek a, sarangah ka khung a, ka ak ta a. Mak ka tih deuh bawk chu Michael-a kha a bai suih suih a, hmanni a Rinawma nena kan kal kha chuan khuma a thut vang khan a bai leh bai loh kan hre theilo a. Chuan i room ka dap khan i wardrope kilah i kawr thisen kai chu ka hmu bawk. Engmah sawi duh hrih lovin kawr pawh chu ka bag ah laiah chuan ka thun a, tichuan ka hawsan ta che a ni. Tichuan kha thlai chi kha Doctor Zuala, kan department a mi chu ka en tir a, ganja mu ngei a ni tih min hrilh ta bawk a ni. Michael, tualthattu chu i ni ngei e kan ti kher lo, mahse i thianpa thih chhan hi i hria a ni. Min hrilh mai rawh, anih loh chuan jail ah i tang thei a nia." a ti a. Michael-a chu a kun lap a, a tap ta pur mai a.
Michael-a chuan, "Ni e, ka duh vanga that pawh ka nilo....a thih pawh ka ringlo a." a ti ta mai a. Pu Hruaia chuan, "Enga? I thah maw ni a?" a ti hu mai a. NAthana chuan, "Constable, Pu Hruaia hi pawnah chhuah pui teh u."a ti a, a duhlo chung chu an chhuah pui ta a. Nathana chuan, "Michael, sawi zawm zel teh le.." a ti a. Michael-a chuan, "WWE hi kan thian dun hian kan atchilh em em a, kan en ning theilo a ni ber mai. Wrestler te in buan ang hian kan pahnih hian kan huanah hian kan infiam thin a, mahse chumi hma chuan ganja kan zu dun phawt zel a. Khami zan khan zuk tur kan nei tawh lo a, Dinga chu la turin Bawngkawn lamah a va kal ta a. A lo haw leh khan dar 10 leh achanve a pel tawh a, tichuan kan ina lo len leh nan a tlai tawh si a, kei lah khami zan khan ka pa'n lenchhuah a phal silo a. Tichuan dar 11 rik veleh ka chhungte mut hnuah ka chhuak ru ta a, tichuan kan inhmu a, kan huan lamah chhukin ganja chu kan zu ta a. Kan kai telh telh a, kan ngaih asam telh telh a, tichuan tlawn nga lai chu kan zu ta a. Kan titi a, kan nui dun vak vak a, tichuan Wrestler ho inbuan dan chuan kan rui phur tawh nen kan inbuan ta a. Chak ta riau leh pa bik ta riau ang hian ka inhre tlat a, tichuan min hneh tha silo chu min rawn hnek ta tak tak a, ka thinrim chuan ka khawih let ve leh a, tichuan kan insual chu a ni ta ber mai. Rei deuh fe kan insual hnu chuan ka chan a tha ta deuh zawk a, ka wrestler duh ber Roman Reigns-a style-in a dulah ka va spear ta a, mahse a tukhum a vaw ri chawrh a, thisen a chhuak vak vak a. a tukhum zawnah chuan lung lian tak alo awm a. Ka hlauthawng bawk si, ka mangang bawk si, ka hamhaih a ni ber mai, tichuan a meng pual vek a, a thi ta der mai a, ka hlauthawng lutuk chu ka hawsan ta ringawt mai a ni. Ka chhungte chu an lo la reh thiap mai a, tichuan hlauthawng tak chuan ka meng tlaivar thak a ni." a ti a. Dinga nu leh pate chu an tap zawih zawih a, Nathana chuan, "A pawi khawp mai Michael, kum ila tling lova, Home ah kan dah che angai. Tual i thah avangin kum 18 i tlin veleh jail pangngai ah kan thawn nghal bawk dawn che a ni. Hei hi hre rawh, WWE hi Family Show a ni a, Entertainment a ni. Wrestler in ngaihsan em em te hi nangni angin meizial te, ruihtheihthil te hi an ti ve ngai lo. Rei tak chhung training an nei a, professional te an ni. Nangni'n helai a lo tih ve ngawt chi a nilo, a hrinchhuah chu hei hi a ni, thihna...tualthattu ah a siam der bawk che anih hi. Chubakah sap tawng in thiam a, Wrestling in en pawn DO NOT TRY THIS AT HOME tih a inziah thin hi, in hrethiam ve vek. A pawi khawp mai, i damchhungin jail bang i zut tawh ang." a ti a, Michael-a chu kan phurliam ta a.
(THE END)
Comments