KADIN MÜFETTİŞİ

KADIN MÜFETTİŞİ

(English : Lady Cop)

(Chapter-1)

Written by : Aaron Malsawmdawngzuala

(Inspired by Robby Grewal & Sameer Kohli's Samay)

**********

(Thumahruai : Deputy Commissioner of Police Nathan Malsawmkima chanchin chhiar thin te chuan he story-a a changtunu ber hi tunge a nih in hre ngei anga, ala hrelo te tan he thawnthu hi ka story pakhat NATHAN tih spin-off a ni a, NATHAN tih thawnthu-a a hnuchhuitu ber Police Department te zinga Inspector hmeichhia an neih awmchhun, Inspector Amanda Lalrempuii chanchin leh a hnuchhui dan vel a ni dawn a. Kan writer neih zinga thu thiam em em leh ziak thiam em em, ka thiannu em em ni bawk, Tony Ralte ziah, Boss Amanda tih nen khan hriatpawlh loh hram ula. An hming a lo in ang bawk nen, hnuchhuina thawnthu a lo ni ve ve bawk nen, thenkhat tan chuan copy te pawh a ang mahna. Mahse NATHAN story lo chhiar thinte tan chuan copy a nilo tih inhre chiang viau ang tih ka ring a, NATHAN la chhiar ve lo leh chhiar ngailo tan copy ani lo tih inlo hre dawn nia.)

************

Pa pakhat, kum la naupang tak chu mai ama chenna inah thah a ni a, a hrawk ah hmanraw hriam tak hmanga vih a ni. A ruang hi zingkara hmuh a ni a, khua a la var lo hial a ni. He thihna chhui tur hian Aizawl Veng pakhata Police Department DGP Pu Zonunsanga chuan a hnuaia thawk te zinga a chhuanvawr em em Inspector Amanda Lalrempuii chu a thlang nghal nalh a, Amanda-i pawh chu chumi zing la la chuan a assistant Liantea, Sub-Inspector nen chuan staff dangte hruaiin crime-scene lam pan chuan an kal ta nghal a.

Crime-scene chu an thleng a, ruang chu chung lamah a ban pahnih phar chhovin thisen nena in chiah kawi nuai hian a lo let reng a. SI Liantea chuan a chanchin kimchang vel a han hriatchian hnuah chuan Amanda-i bulah chuan, "Ma'm, Lalnunpuia, industrialist a ni a, mi hausa tak leh hlawhtling tak a ni. Kum 36 chauh ala ni lehnghal, in chhung en hian luhrukna tur awm ang a awmlo hle bawk. Tin, engkim hi plan vek a ni tih a chiang hle bawk, Pu Nunpuia pawh hian a sual let hman eih lo niin a lang." a ti a.

Amanda-i chuan ruang chu chiang em em hian a han en a, a hrawk-a vihna lo kaw huau mai chu a han en vang vang a. Crime scene thla latu te zinga pakhat chu a ko a, "A hrawka vihna hnuhma hi chiang takin han la teh le." a ti a, thla latu pawh chuan thuawih tak chuan a la ve mai bawk a. Amanda-i bawk chuan, "Finger prints te hi?" a han ti leh a. Doctor Sangtea chuan, "Ma'm, finger prints awm ang engmah kan hmulo. Kan hmuhchhun ho hi chu amah Pu Lalnunpuia finger prints vek tho niin alang a, mahse kan la en mek e." a lo ti ve bawk a.

Amandai chuan, "Anih leh inchhung hi in dap chhuak vek tawh em?" a han ti leh a. SI Liantea chuan, "Ma'm engkim kan dapchhuak vek tawh, eng hnuhma mah a awmlo. Tualthattu hian a hnu a thup bo vek a, tihsual chhe te mah a neilo a ni." a ti a. Amandai chuan, "Umm, a nih tak chu. Professional killer diktak a ni, a chetdan hi thil theihloh tluk a ni." a ti a. Tichuan banga thlalak pahnih intar chu a han en leh vang vang a, thlalak chu pangpar lem nalh tak hi ani a. Amandai chuan ava pan hnai a, thlalak pakhat zawk chu square-shape, kil li nei a ni a, pakhat zawl pawh chu kil li nei tho nimahse, a sei zawk a, rectangle-shape a ni.

Amandai chuan a phone chu a phawrh a, torch-light on meuh chuan a han en chiang a. Doctor Sangtea bulah chuan, "Hetah pawh hian finger prints chu in hmu miahlo em ni?" a han ti leh a. Doctor chuan, "Hmulo Ma'm, engmah a awmlo." tiin a lo chhang a. Amandai chuan, "Thlalang square-shape zawk hi en teh u, a chung leh hnuaia bal awm hi in hmu thei em?" a han ti a. Thlalak chu SI Liantea leh Dr.Sangtea te chuan an han en a, Amandai sawi ang ngei chuan thlalak chung leh hnuaiah chuan thil dum, bal tak mai hi a lo awm a. A awmzia chu a thlalak kha a bal nilovin, an tarna bang zawk kha a bal a ni.

Liantea chuan, "Aw ka hmu e." a lo ti vat a. Amandai chuan, "Liante, thlalak pahnih te hi an awmna han thlak teh, heti hi chuan a in-match lo." a ti a. Liantea chuan thlalak tar chu a han thlak thleng a, a inmil ta chiah mai. Liantea chuan, "Ti hi chuan a in match chiah e." a ti a. Amandai pawh chu a nui sak a, "Perfect Match." a lo ti a. Liantea chuan, "Tinge a awmna kha ainmil loh le? Tuin nge lo thlak thleng ni ta ang?" a tih chuan Amandai chuan, "Chu zawhna chu nangmah pawhin i inchhang thei ang chu, Liante. A chhun leh khatte an awmlo a, finger prints engmah a awm si lo a. Thlak thleng tu an awm a nih chuan finger prints pawh kan hmu ngei ang, mahse kan hmu silo. Enge awmzia ni ta ang?" a han tih chuan Dr.Sangtea chuan, "Tualthattu in a thlak tihna ani mai lawm ni?" a lo ti vat a.

Amandai pawh chu a nui sak a, a lu a bu ngat ngat a. A hawikual leh a, sana ban vai rik kharh kharh chu chiang tak hian a han en a. Liantea chuan, "Engemaw hmuhchhuah dang i nei em ni?" tiin a lo zawt a. Amandai chuan, "Nei love, engemaw hian min mawlh tlat hian ka hria a ni." a ti a, sana chu a en reng a, zing dar 4 a pel tawh a. Amandai bawk chuan, "Liante, forensic report khan engtin nge a sawi?" a han ti a. Liantea chuan, "Ma'm, 2.5 cm-a thuk a ni. Hmanruaw hriam tak chu a hmang tih a chiang a, mahse eng hmanrua nge anih chu an la hre thei mai lo a ni awm e." a ti a.

Amandai chuan, "2.5 cm maw? Anih chuan eng hmanrua nge a hman tih hriat lo tum ang che. Chuan, Doctor Samuela pawh lo hrilh bawk ang che." a ti a, Liantea chuan, "Yes Ma'm." tiin a chhang a. Amandai chuan sitting room sira dawhkana thlalak chu a han la kang a, victim Pu Lalnunpuia leh hmeichhe pakhat thlalak hi a lo ni a. SI Liantea chuan, "Lalrinsiami, Pu Lanunpuia nupui a nih kha. Amah ber kha a nia police rawn phone tu chu, zanlai dar 12:45 ah a mobile atangin a rawn phone a." a lo ti a. Amandai chuan, "An nupa a an inbiakna record hi ka duh a ni." a ti a.

Liantea chuan, "Awle Ma'm, mahse Pi Rinsiami statement kan la la ve miahlo ania." a tih chuan Amandai pawh chuan, "Ni dawn tak maw? Kal ila.." a ti a. An nupa room ah chuan Amandai leh Liantea te chu an inzui lut a, khumah chuan Pi Rinsiami chu lo thu in a lo la tap nasa kher mai, abulah chuan hmeichhe pakhat leh pa pakhat hi an lo thu ve bawk a. Amandai chuan ava pan a, "Pi Rinsiam, Inspector Amanda Lalrempuii ka ni a, ka bul ami hi Sub-Inspector Lallianmawia a ni." a va ti a. Pi Rinsiami chuan a chhang lo, a la tap char char a. Amandai chuan, "I pasal thihna chungchang chhui tu tur ka ni a, thil thleng avang hian a pawi ka ti khawp mai. Zawhna tlem zawh che kan duh dawn a, mahse tunah erawh chuan kan zawt hrih lo mai ang che. Engemaw min hrilh duh emaw, min biak duhna i nei anih hlauh chuan hei hi ka number aw.." tih pah chuan a card chu a pe a, an chhuahsan leh ta nghal a.

Amandai chuan Liantea bulah chuan, "Hmeichhe pakhat lo awm ve kha tunge a?" tiin a han zawt a. Liantea chuan, "Melody a nih kha, Pi Rinsiami nau ania.Chuan pa pakhat lo awm ve kha Pi Rinsiami te thawhpui, a thianpa Dinga a nih kha." tiin a chhang a. Amandai chuan, "Umm..ani pawh kha a statement la ve ang che...chuan thil pakhat i theihnghilh loh tur chu.." tia a sawi lai tak chuan Liantea chuan, "Ka hria e Ma'm, 'Awih la, mahse ring vek kher suh.' He thu hi i hnen atanga ka hriat a ni a, ka theihnghilh thei lo." a lo ti vat a.

Amanda-i hi nula chu ala ni ngei mai a, mahse a u fanu Daisy chu a fanu angin a enkawl a ni. Amandai te unau hi pahnih an ni a, a naupang zawk a ni. A u hi mipa ani a, Amandai hi Sub-Inspector a nih laiin a u hian nupui a nei a, fanu pakhat an nei hman a, chu chu Daisy hi a ni. Amandai pa erawh hi chu Amandai kum 10 mi lek a nih laiin a thi tawh a, a u te nupa pawh vanduai thlak takin Daisy kum 1 mi lek a nih laiin accident vangin an thi tawh bawk a ni. Tichuan Amandai chuan Daisy chu a fanu angin a enkawl chho char char a, Daisy pawh hian 'ANU' tiin Amandai hi a ko ve mai thin a, tunah chuan Daisy pawh kum 6 lai a lo tling ve ta. Daisy hi naupang te a nih atangin a mit hi a tha lo a, tarmit a vuah reng mai thin a ni. Amandai pawh hi a kum ala tam bik lemloh vang nge ni, tunlai mobile game lar em em mai PUBG hi a khel ziah a, zanrei tak tak thlengin a khel ve thin a, a atchilh ve a ni deuh ber mai. Daisy pawh hian anu hi a hau fo a, "Games i khelh rei lutuk chuan i mit a chhe thei ania, doctor pawn min hrilh vek." tiin a hau ve thin a ni. Mahse a hna a thulh phah ngai lova, hnuchhuina lamah a buai phah ngailo thung.

Khua alo var a, Amandai leh Liantea te pawn an hnuchhuina chu an chhunzawm zel a. Zing dar 10 velah chuan Amandai leh Liantea te pawh chu Lalnunpuia thawhna Company lam pan chuan an inkhalh phei a, dar 10:25 velah chuan an thleng a. Building chhunga an luh pah chuan Amandai chuan, "Liante, zawhna zawt tur chauh a kal kan nih hi hre reng la, information kimchang takin hriat tum la, statement erawh la suh ang che." a ti a. Tichuan Liantea chuan staff thenkhat te chu thu a zawt fiah a, Amandai erawh an Company Manager roomah a lut thung a.

Manager chuan Amandai alo hmuh chuan, "Tunge i nih aw?" a lo ti a. Amandai chuan, "Inspector Amanda Lamrempuii ka ni e, Crime Branch." a ti a. Manager chuan, "Ihh...DCP Nathan Malsawmkima te Department ami kha i ni em?" a lo ti leh a. Amandai chuan nuih suk pah chuan, "Aw ni e." tiin a chhang a. Manager chuan, "Khawngaihin thu rawh." a ti a, Amandai chu a thu a. Manager chuan, "Enge ka tihsak thei ang che?" a han ti a. Amandai chuan, "Ka zawhna te hi min chhang la, a rei lovang." a ti a. Manager chuan, "Umm...Lalnunpuia thihna chungchang kha ka hriat tirh khan mak ka ti em em a, ka ui khawp mai. Leader tha tak ani a, mi fing leh thluak tha tak a ni. Kan vai mai hian amah hi kan ngaina em em a, a fel em em bawk. A taima a, hun a vawng dik em em bawk." a ti a.

Amandai chuan, "Thian han kawm deuh bik te a nei em?" tiin a han zawt a. Manager chuan, "Thian tam tak a nei alawm, han kawm bik em em pawh a neilo. Mahse han zui ngun deuh bik chu a nei a, chu chu Marema, Enkawla, Thangtea leh Rintea te an nia, hemi te pali hi chu a zui ngun deuh chuan ka hria." a ti a. Amandai chuan, "Chumi te chu ka be duh a ni." a ti a. Manager chuan, "Aaa...ni e, han biak tir che pawh ka duh viau nangin, an zin hlawm a. Enkawla hi anu te khua ah a zin a, Thangtea hi Damdawiinah a awm mek a, a damlo a. Rintea hi Janpan ah kan hna avang hian a zin a, thla hmasa lawk khan.." a tih lai chuan Amandai chuan, "Anih leh Marema chu? A awm ang tiraw?" a lo ti vat a.

Manager chuan, "Nia..Marema hi a hmingpum chu Lalremliana a nia. Lalnunpuia nen hian an inkawmngeih em em a, kan Legal Head a ni mek bawk. Ani hi chu a zin bo lova, mahse kar khat chhung leave a la a. An in an sa mek a, chuvang chu a ni awm e." a ti a. Amandai chuan, "Pu Nunpuia personal files ka hmu duh a ni." a han ti a, Manager chuan Amandai chu a han melh hrawk a. Inthlahrung tak chuan, "A pawi ka ti khawp mai Inspector, mahse a theihloh." a ti ta tlat mai a. Amandai chuan, "Engvangin maw?" a han ti a. Manager chuan, "Enteh ka pi, Nunpuia personal files te hi chu kan company confidential record te a ni hlawm a, ka hmuh tir theilo che a ni. Amandai chuan, "Min hmuhtir thei awmchhun chu nang chauh hi i ni. Nunpuia a thi a, tunah chuan Boss ber i ni tawh a.." a tih lai chuan staff pakhat hi alo lut a.

"Sir, englo..." a rawn ti dek dek chu Manager chuan vin zet hian, "Enge i duh a? Tunah chuan ka buai, chhuak rawh." a lo ti hrep a. Amandai chuan chupa bulah chuan, "Khawngaihin thingpui min lo pe thei angem? A sen hangin aw.." a lo ti a, Manager chuan Amandai chu a ngei hmel kher mai. Amandai bawk chuan, "Chuan...enge i sawi lai khah?" a han ti leh a. Manager chuan, "Ka pi, thil dangah puih theihna che ka nei anih chuan ka lawm ngawt ang." a ti a. Amandai chuan, "Personal files ho chu?" a han ti leh a. Manager chu a tum ta hmuk mai, "Aih, a theihloh." a ti ta tlat mai.

Amandai chu a han thaw hak a, "Mmmm...anih chuan ti hian ti teh ang. Manger i nih angin i thuneihna leh i thil tihtheihna hmangin min dawr a, a tha e. Chuti chu keipawh Police ka nih angin, ka thuneihna leh ka thil tih theihna hmangin ka han che ve dawn em ni?" a han ti ve ta ngat a. Manager chuan rum zet hian Amandai chu a melh a, "Enteh Inspector, min vau tihna em ni?" a han ti a. Amandai chuan, "Enga? Engtik laiin nge ka vau che a? Zawhna ka zawt mai chauh che a nih hi." ati a. Staff pakhat chu lo lutin Amandai chu thingpui a rawn pe a, Amandai chuan Manager chu a han en leh a, "Enteh, thingpui rawn dah nan khan kha staff khan miunte 2 chiah a hmang. Chutiang chiah chuan keini Police Department te hian warrant siam nan minute 2 bak kan mamawh lo." tih pah chuan a phone a phawrh a. Manager chuan, "Awle awle...buaina ka duhlo. I duh ang chuan ni rawh se, file chu ka va la ange." a ti a.

Manager chu a tho a, a kal tur chiah chu Amandai chuan, "Thil pakhat leh....Nunpuia file mai nilovin, i file pawh ka check tel duh ania. Check ringawt animai, kan hna a ni miau a.." nui chung chuan a han ti a, Manager pawh chu lungawilo tak chuan a kal ta a. Reilote hnuah chuan Manager chu lo let lehin files te chu a rawn la a, Amandai chu a pe a. Amandai chuan Manager file zawk chu a han keu thuak thuak a, a pe let leh nghal mai a. Nunpuia file erawh a la a, "Kan lawm e." tih pah chuan a keng chhuak daih mai.

Pawnah chuan Liantea chuan Amandai chu a lo nghak reng tawh a, Amandai chuan Liantea bulah chuan, "Enge chanchin?" a han ti a. Liantea chuan, "Amak khawp mai, tupawh mai hian Pu Nunpui hi an fak hlawm lutuk. A felzia te, a rinawm zia te, mi khawngaihna a ngah zia te hlir an sawi a. Kan ramah hian mi hausa diktaka hna thawk thin leh miina an fak nasat ber ka hriat awmchhun ala ni hial ang." tih pah chuan a nui suk a. Amandai chuan, "Anih tak chu, mahse saw Manager erawh saw chu ka faklo takzet a ni. File hi la la, Income Tax Department hnenah thehlut ang che." a ti a.

Liantea chuan, "Awle Ma'm.." tiin a chhang a. Amandai chuan, "Anih leh tualthattu ina a hmanraw hman khan eng ang hmanrua nge a nih in hre tawh em?" a han ti leh a. Liantea chuan, "Aih, kan la hre chuanglo." tiin a lo chhang a. Amandai chuan, "Hetiang ringawt chuan awmzia a awm dawnlo tlat, ti hian ti teh. Thirchher Pa Mawia kha ila hrai em, Sir Nathana pawhin chemte a siam tir kha, khapa bulah khan va kal la. Nunpuia ruang thlalak te kha han hmuh la, a hre maithei asin." a ti a. Liantea chuan, "Tehreng mai, Ma'm." a ti a, Liantea pawh chu a kal nghal a.

Liantea chuan thlalak chu Pa Mawia bulah chuan a han lek kang a, "Pa Mawi, thlalak kha han en vang vang la, eng ang hriamhrei nge a hman ang le..i hrethei mai em?" a han ti a. Pa Mawia chuan thlalak chu a han en vang vang a, mak a tih hmel kher mai. Liantea bulah chuan, "Liante, kan vengah chuan hriamhrei reng reng hi Pa Mawia'n ala hmuh loh chuan, chu hriamhrei chu anla siam chhuak lo tihna tiin fiamthu in an sawi thin a, mahse a ni tak tak ania. Mizoram ah pawh hian kei aia hria hi chu hetiang lamah kher hi chuan an awm ka ring lo, ka ti tak tak. Mahse he thlalak hi chuan min ti hrilhhai khawp mai, a mak a ni. Eng hmanrua nge a hman ka hre hauh lo mai, chu bakah a hliam hi ka la hmu ngailo." a ti a.

Liantea chuan, "Anih leh eng hmanrua nge a nih i hrelo tihna ami?" a han ti leh a. Pa Mawia chuan, "Hrelo...tihian ti teh. A hriamhrei nilo hian a hriamhrei hmangtu zawk hi zawng phawt rawh u. Mi thiam tak a ni ngei ang, professional diktak a ni bawk ngei ang. In man hunah ka hmu ve duh ania, eng hriamhrei nge a hman tih hi ka hre ve duh a ni." a ti a. Liantea pawh chuan tih ngaihna a hre talo, a kalsan ta ringawt a.

Police Station lamah chuan Liantea chu a let leh a, tualthattu hmanraw hman tur awm ang hriamhrei chi hrang hrang te chu Amandai leh doctor leh Constable Siama te chuan dawhkanah an lo remkhawm a. Liantea pawh chuan Pa Mawia'n a hriat bikloh thu te chu Amandai a hrilh a, tichuan chung hriamhrei te chu an han enfiah hlawm a. Amandai chuan, "Hriamhrei chi hrang hrang chu hei...kan hmaah a inchhawp mek a, mahse engber hi nge tualthattu hian a hman tih kan la hrelo. Doctor, enge sawi duh te i nei em?" tiin Dr.Samuela chu a han melh zeuh a.

Doctor Samuela chuan, "Umm...a hliam kha diametre-a teh chuan 2.5 cm a ni a, a thuk zawng erawh 5 cm ani thung. A hmanraw hman kha enge a nih chu hrelo mah ila, hetiang deuh hi a hmang a ni." tiin screw driver lian tak mai chu a lek kang a. Doctor Samuela chuan sawi zawm zelin, "Tin kha hriamhrei kha tualthattu hian a vawn dan adiklo niin a lang a, chuan a hriam lutuk lo niin a lang bawk. Tualthattu in Nunpuia ava vih khan, a vihdan angle kha..." tih pah chuan Constable Siama chu a han en a. A banah va vuanin, "Siama, hetah hian ding lawk teh." a ti a, a hmaah chuan a din tir a. Doctor chuan, "Nunpuia kha a hmazawn atangin, heti hian a hrawkah a vit a ni." tih pah chuan Constable Siama chu a han vit der chhin vel a.

Amandai chuan, "Doctor, a hma zawn atangin a vit tih i chiang amaw? Hnung lampang atang pawhin a ni thei tho asin." a lo ti a. Doctor chuan, "Ka chiang e, Amanda. Sir zawng emaw, hnung zawng emaw, hma zawng emaw pawh nise...it doesn't make any sense." a han ti a. Amandai chuan, "Anih chuan, i sawi awmzia chu Nunpuia khan second khat chhung lek pawh nise, tualthattu kha a hmu hman i tihna em ni?" a ti a. Doctor chuan, "Aw ni e, 100%." tiin a lo chhang a. Amandai chuan, "Chutak chu alawm ka hriatthiamloh, tinge chet a lak ve hman loh? Crime scene kan en pawh khan Nunpuia khan a beilet eih lo tihna a ni a, bungrua han tlu darh vel emaw pawh engmah a awmlo ania." a ti a.

Liantea chuan, "Hei pawh hi ani thei, tualthattu kha Nunpuia hian a hmelhriat anga, a thianpa pawh a lo ni thei a. A that dawn tih a hre biklo anga, chuvang chuan ngaihtha takin a lo awm a ni maithei asin." a lo ti ve bawk a. Chuveleh Amandai chuan chemte pakhat chu la in Liantea chu a tin thut mai a, Liantea pawh a phu nasa kher mai, a lo indang vat a. Amandai chuan chemte chu dah let leh in, "Khatiang chiah khan Nunpuia pawh khan invenna hun chu a nei ngei anga.." a tih lai chuan Doctor chuan, "Nilove Amanda, Nunpuia khan invenna hun engmah a nei hmanlo." a ti a. Liantea chuan, "Engvangin maw?" tiin a lo zawt a.

Doctor chuan, "Tualthattu khan a nerve a vih chiah khan, Nunpuia chu chawp leh chilhin a thi nghal a ni. Chu chu Jugular Vein tiin an sawi thin, hemi vein hi a chat a nih chuan thluaka blood supply chu a tawp nghal a, chuvang chuan Nunpuia kha a vih rual rual khan a thi nghal a ni." a ti a. Amandai chuan, "Umm..anih chuan tualthattu khan Nunpuia hi thah a tum hrim hrim a, a plan lawk vek bawk tih a chiang a. Hun a vawng dik a, a duhdan takin a that tihna ani." a ti a. Doctor pawh chuan, "Ni chiah e, professional killer diktak a ni." a lo ti ve bawk a.

Amandai chuan, "Thil pakhat ka la hriatthiamloh chu maw...Nunpuia ruang kha, a ban phardan kha i hmu em?" tih pah chuan Nunpuia ruang thlalak, banga an tar chu a han kawk a. Liantea chuan, "Keipawn a mak ka ti, a hliam kha chu a hrawk ah a ni a, mahse a ban erawh chung lamah a awm daih bawk si a. Ka rindan chuan tualthattu hian hmundangah a that anga, tichuan sitting room lamah hian a ruang hi a hnuk phei a nih ka ring." a lo ti ve bawk a. Doctor chuan, "Nilove Liante, thisen khan ruang awmna bulah leh a taksa ah chauh hmuh a ni a, hmundanga that chu nise inchhungah khan thisen farna tam tak kan hmu ang." a ti a.

Amandai chuan, "Ni chiah e, ka rindan chuan tualthattu hian hmanraw dang ahmang a ni, hriamhrei nilo, chemte emaw, bakcheh emaw nilovin, thildang common lo deuh ahmang a ni ngei ang. Tichuan keini hian kan chhuichhuak theilo anga, chuvang chuan a hriamhrei hman hmang hian min bum a tum ani ngei ang." a ti a. Chutih lai chuan Amandai phone chu a rawn ri a, "Helo...awle, ka lo kal ange." a ti a, Liantea leh Doctor bulah chuan, "Min lo hrethiam ru, ka kal phawt ange." a ti a, a kalsan ta a.

Amandai chu Pu Nunpuia nupui Pi Rinsiami te inah ava kal a, Pi Rinsiami'n thil engemaw hrilh a duh vang hi a lo ni a. Amandai ava thleng chu Pi Rinsiami nau, Melody chauh alo awm a. Amandai chuan, "Melody, i u khan min rawn ko si a, tinge a awm leh silova?" tiin a han zawt a. Melody chuan, "Lo thu rawh, a lo let leh thuai ang, a chhuak lawk a." tiin a lo chhang a. Amandai chuan, "Enge i u chu a an tawh reng reng a? A zia tawh em?" tiin a han zawt leh a. Melody chuan, "A tuarna khawp mai, mahse a theih ang tawk chuan theihnghilh chu a tum ve a." a ti a. Amandai chuan, "A nih tak chu, nihleh i u leh Nunpuia te hi...an nupa hi enge an chanchin ni reng reng?" tiin a han zawt leh a. Melody chuan, "An inngeih viau chuan ka hria, an induh tawn a, an inhmangaih hle bawk chuan ka hria. Engemaw thil hriat thar in nei em ni?" ahan ti a. Amandai chuan, "Kan la nei thuai ang, investigation kan nei mek zel e." a ti a.

Melody chuan, "Ka u Nunpuia khan enge maw a tihsual le? Mifel tak a ni a, hmelma a neih awm ka hrelo. Tualthattu khan pawisa te, tlereuh te leh thil dang engmah a la bawk silo a, ka u thah tum ngawr ngawr a ni tihna em mawnile?" a ti nuah nuah a. Amandai chuan, "Rukruk tuma tualthat a nilo, chuan..crime scene kan rawn kal a, room a mipa lo awm ve kha tunge a hming?" a han ti a. Melody chuan, "U Dinga a nih kha, ka u te thawhpui ania. Mi fel tak a ni, kan naupan lai atang tawhin kan inkawm thin." a ti a. Amandai chuan Melody chu a han en vang vang a, "Lemchan thiam tak i ni." a ti ta mai a.

Melody chuan hrethiamlo takin, "Engtin maw?" a ti hu mai a. Amandai chuan, "Ka tih awmzia chu, lemchan i thiam hmel khawp mai. I tawngdan te, i chezia te leh i hmel zawng zawng nen hian lemchan lamah i tui hmel ka tihna a nia." a ti leh ta daih a. Chutih lai chuan Nunpuia nupui Rinsiami pawh chu a lo haw ta a. Amandai chuan, "Ilo haw thei ta maw?" a han ti a. Melody chuan, Lo inkawm ru, ka kal ange." a ti a, a kal ta a. Pi Rini chuan, "Minlo nghak rei viau em?" a ti a. Amandai chuan, "Rei love, thil min hrilh duh i neih thu kha i sawi a, enge ni a?" tiin a han zawt a.

Pi Rini chuan, "Ni e...nimin khan office-a ka awmlai a ni a, ka night dawn a. Tichuan zan dar 12 a rik hma hret khan phone call ka dawng a, ngaihtha tak chuan ka pick up ve mai a. Tichuan phone ami chuan ka pasal a thih thu min rawn hrilh ta mai a, atir chuan tu emawni in min fiam emaw ka ti a. Tichuan rang takin ka pasal chu ka call nghal a, mahse min chhang thei silo a. Inah ka haw nghal a, tichuan ka pasal ruang lo let reng chu ka hmu ta a ni." tiin a tap zawih zawih a. Amandai chuan, "Pi Rin, hahchawl hrih rawh. Ka lawm e, ka theih tawp ka lo chhuang ang. Lo fimkhur la, ka kal phawt ange." a ti a, a kal ta a.

Amandai chu station lamah a let leh a, SI Liantea chuan paper a lo pe a, "Ma'm, hei hi phone bill chu a ni e." a ti a. Amandai chuan paper chu lak pah chuan, "I ti tha e, thu thar mak leh dangdai deuh te a awm em?" a han ti a. Liantea chuan, "Mak deuh chu a awm ngei e...tualthahna a thlen hma minute 5 vel khan Nunpuia te in atang hian tu emawni chuan Pi Rini hi a phone a, mahse second 5 chiah an inbia a ni. Amak ka ti, second 5 chhung lek chuan enge an sawi ang?" a ti a. Amandai chuan, "I PASAL A THI...chu chu second 5 chhung lek chuan a sawi zawh hman lutuk. A awmzia chu Pi Rini khan dawt a sawilo, thudik min hrilh ani." a ti a. Liantea chuan, "Anih chuan Pi Rini phone tu chu tualthattu ngei kha aniang maw?" a ti a. Amandai chuan, "Aw..ni chiah e." tiin a lo chhang a.

Amandai bawk chuan, "Tin an inbiak zawh chiah khan tualthattu khan phone chu a disconnect nghal a ni." a ti a. Paper ami phone number pahnih chu a thai bial a, Liantea bulah chuan, "He number pahnih te hi lo chhui chiang la, a detail engkim ka duh a ni." a ti a. Liantea pawh chuan, "Tehreng mai, Ma'm." a ti a, tichuan an haw ta a. Atuk zingah chuan Amandai chuan a thianpa, a tette atanga a kawm thin, engkima amah pui thin tu leh a u fanu Daisy duat em em thin tu, Doctor Joshua nen chuan chhuak dunin restaurant ah an chawl dun a.

"Enteh Joshua, helai hmun hi ka u khan a duh ber thin a, min chawlhpui ziah thin. Kum tam alo liam ta, ka ngai thin khawp mai. An nupa in an thi ta mai si a, ka mangang thei khawp mai. Engtin nge Daisy hi ni ta ang? Nu leh pa neilova a seilian tur ka ngaihtuah chang te hian ka beidawng thin khawp mai. Mahse nang i awm hlauh a, ka tan i awm reng a, ka lawm takzet."

"Haha, nang chauh nilovin, Daisy tan pawh ka awm reng alawm."

"Nia, kan pahnih tan i awm reng thin. I lakah hian bat tamtak ka neiin ka hria, Daisy hian lenchhuah a duh apiangin APA JOSHUA nen a ti ziah a, check-up a ngaih chang pawhin APA JOHSUA bulah a ti bawk a."

"Aww...check-up a ngai a nih chuan ka bulah a ni lo thei nang, doctor ka ni miau a."

"Ni tho e, mahse a ngaina em che a, i duat bawk si a.."

"A ho lutuk, ka tihtur alawm. Engpawh chu nise, tualthah case kal zel kha enge in an? Hmasawnna te a awm tawh em?"

"Engmaw?"

"Aww...Lalnupuia thihna chungchang kha mawle?"

"Josh, engtin nge i hriat ve a?"

"Engah nge ka hriat lohvang? Industrialist ropui lutuk a ni a, a lar pawh a lar alawm. A thih thu te phei kha chu a hre hmasa pawl ka ni ngei ang, chubakah chanchinbu ah an chhuah chuai chuai alawm."

"Nia...aa, ka lo ngaihtuah lo alawm mawle."

"Duty tur ka la ni si a, kan kal tawh mai dawn em ni?"

"Awle, kal ila."

Station lamah chuan Liantea leh Constable Siama te pawh chu anmahni buai buai chuan an lo buai ve hle a, Siama chuan, "Sir, Pi Rini khan tualthahna thlen lai khan office ah a awm thu a sawi a, a dik ngei bawk a. Mahse ka hriatthiamloh chu maw, an nupa record kan en khan dello engmah a awm silo a, mahse tualthahna chu a thleng tho bawk si a." a ti nuah nuah a. Liantea chuan, "Lungngai mahta che, kan hmu ang, tualthattu pawh kan man ngei anga, engkim kan chhuichhuak vek dawn alawm." a ti a. Siama chuan, "Ni e, kan chhuichhuah hunah meuh chuan promotion kan hmu vek anga, enteh Sir....Madam Amanda-i pawh hi he case vang hian a buai ve hle chuan ka hria, a rilru a hah hmel thei khawp mai."a ti a.Liantea chuan, "Nang leh kei chuan kan mit chauh hi kan hmang tangkai a, mahse Madam Amanda erawh hi chuan kan ngaihtuah phakbak thlengin a hmu thei asin." a ti a. Siama chuan, "Vawiin hian a lo kal dawnlo em ni? Khawnge a awm le?" a ti a. Liantea chuan, "Nunpuia te office ami, Nunpuia thianpa, Marema kha ava hmu dawn ani awm e." a ti a.

Amandai chu Nunpuia thawhpui, Marema te inlam pan chuan a inkhalh phei a. Marema te in a thleng chu an lo buai khawp mai, Manager sawi ang ngei khan an in chu an lo sa tha mek a. Pawn ah chuan Marema chu a lo thu a, vai mistiri te chu an phe suau suau hlawm a. Amandau chuan Marema chu a va pan a, "I tha maw Pu Marem?" ava ti a. Marema chuan, "Tunge i nih?" a lo ti hmuk a. Amandai chuan, "Inspector Amanda Lalrempuii ka ni e." a ti a. Marema chuan, "Lo thu rawh.." tiin thutthleng chu a remfel sak a.

Marema chuan, "Kan buai lutuk a, engemaw in tur te i duh em?" a han ti a. Amandai chuan, "I hun tlemte chiah kha ka duh.." tiin a chhang a. Marema chuan, "Hmm..hna hahthlak tak a ni. I enkawl loh a, i fimkhur loh chuan ekim hi a buai vek thei a ni." a han ti vel a. Amandai chuan, "Lalnupuia Company ah khan i thawk ve tiraw?" tiin a han zawt a. Marema chuan, "Aw thawk ve e, ka boss chu a ni nang a, thian tha tak kan ni. Managing Director a ni a, Company Owner a ni bawk. A legal department hi keima enkawl a ni a, Leader ah min dah a ni. Engber nge i hriat duh a?" a han ti a. Amandai chuan, "Kar khat chhung leave i lak nachhan ka hre duh a ni." a han ti leh a.

Marema chuan an insak lai mek chu kawk in, "Hei hi a chhan chu a ni, HOME SWEET HOME.." a han ti vel a. Amandai chuan, "Anih leh eng cement nge i hman reng reng a?" a ti ta daih mai a. Marema chuan hriatthiamloh hmel tak chuan, "Enga?" a lo ti hu mai a. Amandai chuan, "I insak nan hian mawle? Eng cement nge i hman?" tiin a han zawt nawn leh a. Marema chuan, "JS Cement...tinge min zawh a?" a ti a. Amandai chuan, "Eng nilove, kan in saw sak that a ngai ve tawh lutuk a. Engpawh chu nise, Nunpuia nen khan engtik nge in inhmuh hnuhnun ber?" tiin a han zawt leh a. Marema chuan, "Office ah a niang, leave ka lak hma chiah khan, anih loh pawhin office ka kal ni hnuhnung berah khan a ni maithei...ka chiang tawh lo." a ti a.

Amandai chuan, "Maithei....maithei chauh maw? Legal Profession-ah hial i awm a, i rilru i va pe awmlo ve." a han ti a. Marema chuan lungawi loh hmel tak hian Amandai chu a han melh run a, "Inspector, Nunpuia kha ka thianpa ani a, a thi ta mai kha keipawhin mak ka ti. A thattu pawh chu tupawh lo nise, ka thin a ti rim a, sawisak hrep ka chak. Lawyer ka ni a, ka statement te pawh a detail in he case nena inzawm thei awm ang chu engkim ka sawi vek tawh." ahan ti deuh hmak hmak a. Amandai chuan, "Anih leh a bak zawng kha? Statement zingah a tel ve hleinem." a ti a. Marema chuan, "Enge i sawi awmzia chu?" a lo ti hu mai a. Amandai chuan, "Thil tamtak hi sawifiahloh in a awm thin, enge maw sawifiah tur a awm a nih chuan....min rawn panna hmun tur chu i hriat kha..ka kal phawt ange." a ti a, a kalsan ta a.

Doctor Samuela chuan Amandai chu restaurant a inhmuh puiah a sawm a, Amandai pawh chu reilote hnuah a thleng vat a. Doctor chuan paper pe in, "Kha hei hi en teh." a ti a. Amandai chuan paper chu a han en vang vang a, "Hei te chu Technical jargon mai chauh a nih hi.." ati a. Doctor chuan, "Amanda, data tam tak a awm a, mahse engmah hrilhfiah a ni chuang silo. Test kan neih zawh vek hnuah pawh kan thil hriat awmchhun chu ahma a kan hriat vek tawh tho te kha a ni. A thihchhan ber chu tualthattu khan Nunpuia jagular vein ah a vit a, chu chu zanlai dar 12 ah a ni." a ti a. Amandai chuan, "I chiang amaw? Dar 12 ah chiah chiah em ni?" a han ti a.

Doctor chuan, "Dar 12 vel chu a ni ngei ang, ka chiang biklo. A thihchhan chu a nerve kha a chat a, tur hmanga hrai a nilova, heart-attack pawh a ni heklo. Chuan maw Amanda, hrianhrei hmanga mi i vit emaw, i sat emaw, i zai a nih chuan an hliam ah khan partical objects a awm ngei tur a ni." a ti a. Dawhkana chemte chu la in, "Entirnan, he chem hmang hian mi i ve bei ta a, he chemte a particle objetcs te hi iva beih a te hliam ah khan a bet ngei ang, chu chu keini doctor te hian test kan neihin awlsam takin kan hmuchhuak mai thin a ni. Mahse Nunpuia case ah kha chuan engmah a awm velo, a hrawka hliam ah khan eng particle mah hmuh a nilova, bawlhhlawh chhe te mah pawh a awmlo." a ti a.

Amandai chuan, "Ehe..ava mak awm ve." a ti nuah nuah a. Doctor chuan, "Mak tak a ni, ka pian ahnu lamah khatiang thil kha ka la hmu ngailo."a ti a. Amandai chuan a Coke in laia vur (ice) tlang chu a han en vang vang a, a nui sak a.

Amandai chu tualthahna thlenna hmun, Pu Nunpuia te inah chuan ava kal leh a, inchhung vel chu ahan en fiah leh a. Chutih lai chuan kawngka a rawn inhawng a, Pi Rinsiami leh a thawhpuipa Dinga te an lo ni a. Amandai chuan, "Ehe, Pi Rin, hetah ka awm tih in hria em ni?" tiin a han zawt a.

Pi Rini chuan, "Aw, SI Liantea'n min hrilh a. Phone che ka tum a, mahse switch off a inti zel a." a ti a. Amandai chuan, "Ka phone battery a zo alawm le." a ti a. Pi Rini chuan, "Thile engemaw lak lawk ka duh a, ka thuamhnaw vel leh ka bungrua tlem ala awm a." a ti a. Amandai chuan, "Awle, i in ania lawm." a ti a.

Pi Rini chuan a thawnhnaw vel a lak fel hnu chuan an chhuak leh ta a, tichuan Amandai chuan in chu a enfiah leh ta a. A enkual hrep hnuah chuan doormat-a vaivut niawm tak lo kai nuai mai chu a hmu a, a mit a la tlat mai. Doormat a vaivut chu fimkhur takin sanrang ah a dah a, tichuan Dr.Samuela hnenah a thawn ta nghal a.

Tlai alo ni a, Dr.Samuela chuan Amandai chu laboratory-a lo kal vat turin a ti a. Amandai ava thlen chuan Doctor chuan, "Thil engemaw ka hmu in ka hria." a ti a. Amandai chuan phur tak hian, "Eng thil maw?" a lo ti vat a. Doctor chuan, "Han en ve chhin teh." a ti a, tichuan Amandai chuan Microscope chu a han bih ve a.

Amandai chuan hrethiamlo tak hian, "Hei hi enge ni a?" a han ti a. Doctor chuan, "Doormat a bawlhhlawh ah khan bawlhlawh bal chauh nilovin thildang ka hmu tel a ni." a ti a. Amandai chuan, "Enge chu chu?" tiin a han zawt leh a. Chutih lai chuan Liantea a lo lut a, Amandai bulah chuan, "Ma'm, nuber min pek kha..." a tih lai chuan Amandai chuan, "Marema number...a dik em?" a lo ti nghal vat a.

Liantea chuan, "Aw ni e, mahse engtin nge i hriat a?" a ti a. Amandai chuan, "Ka hre ve tawp, min hrilh dawn tih ka hre lawk a niang." a lo ti a. Liantea chuan, "Ma'm, Marema hian thlathum liamta khan number pakhat chauh hi nikhatah darkar 3 te, darkar 4 te a be fo thin a. Chu number chu tudang nilovin, Pi Rini number ngei a ni." a ti a. Amandai chuan, "Chuan...enge?" a lo ti a.

Liantea chuan, "Pi Rini kha, tualthahna a thlen hnua in lama a haw khan Police te hnenah a pasal a thih thu kha zanlai dar 12:45 ah phone call hmangin a rawn sawi a. Mahse police te min rawn phone hma khan number dang a call phawt a ni, dar 12:43 ah...chu number chu Marema number a ni.

Minute 1 leh second 25 chhung an inbia a, a awmzia chu keini aiin Marema khan Pu Nunpuia a thi tih hi a hre hmasa zawk tihna a ni." a ti a. Amandai chuan, "Umm..anih chuan a lo hre lawk hmasa tihna a nih chuan.." a tih nuah nuah lai chuan Doctor Samuela chu lo pheiin, "Amanda, Doormat-a bawlhhlawh chauh nilo, thildang awm ka tih kha cement a ni. Chuan chu cement chu Marema te insak nana an hman cement ngei kha a ni, tunah lawk khan ka check a, a in-match chiah chiah a ni." a ti a.

Liantea chuan, "Anih chuan Marema chu kan thlen hmain Nunpuia te inah chuan ava thleng hmasa a, a pheikhawk-a cement kai chu doormat-a chuan a kai chhawng veleh tihna ani ngei ang." a ti a. Amandai chu a nui ta var var mai, "Liante, Police station a lo leng turin Marema chu i va sawm dawn em ni?" ahan ti a. Liantea chuan, "Awle, tehreng mai." a lo ti a.

(2 HOURS LATER)

Marema chu interrogation room ah chuan a thu a, ahma zawnah chuan Liantea a thu ve bawk a. A sirah chuan Amandai a lo vei kual chhen bawk a, Liantea chuan, "Enteh Marem, hetia i ngawi reng anih chuan kan hun min khawhral tir mai mai a ni." a ti a. Marema chuan hlauhloh hmel tak hian, "Ka hun in khawhral mai mai zawk a ni, Inspector. Ka statement te chu ka hrilh vek tawh che u, engmah sawitur dang ka neilo." a ti tlat mai a.

Liantea chuan, "Kan hria e, mahse i statement kan en khan, tualthahna thlen zanah khan Nunpuia te inah i kal tih a kan hmu tello tlat. Dar engzat ah khan nge i kal tih te nen lam kan hre vek, ka hrilh kher dzawn che em? Nge min hrilh zawk dawn?" a han ti a.

Marema chuan thinrim deuh tak hian, "Ngaithla teh, Nunpuia te inah khan ka kal ngei a ni tih chiang taka i hriat chuan, a chhanna pawh i hre ngei tur a ni. Police i ni a, i hna a ni lawm ni?" ahan ti vei pung pung a.

Liantea chuan, "Ka hna chu ka hre chiang khawp mai, nanga min hrilh ka ngailo. Duhthlan tur pahnih i nei, Nunpuia te ina i va kal nachhan min hrilh emaw...khawi cell berah nge i tan duh? I duh thlang vat rawh." a ti khur khur mai a. Marema chuan thinrim tak hian, "Hei hi enge awmzia? Rights ka nei ve tho ania, ka sawi leh sawi loh chu ka thu thu a ni." a ti leh pung pung mai a.

Liantea chu a thinrim kher mai, "Right emaw left emaw, ka zawhna chu chhang mai rawh, hlap i duh loh chuan." tiin a inhum ruh nasa tawh mai a. Marema chuan, "In duh duh danin min ti lui thei biklo ania." a han la ti hram a.

Liantea chu a ding a, "Ka thei nge theilo chu i hre duh em ni?" a han ti khur khur a. Amandai chu alo kal hnai a, "Liante, insum rawh. Keiman ka lo buaipui tawh ange.." a ti a, Liantea chu a kalsawn ta a.

Amandai chuan chiang tak hian Marema chu a en a, "Rights i nei, i duh chuan i sawi thei a, i duh chuan i ngawi tlat thei, kan hria e. Anih chuan keimah ka tawng mai ange, lo ngaithla rawh aw...i him theih nan thudik i thup a, mahse engmah sawi theih kan neilo, keini chauh nilovin, court thuneihna thleng pawh a ni mahna.

Mahse, Mahse he thil i tihna chhan hi engpawh chulo nise, engmah hlawkna i hmulo anga, a chhanhim dawn chuanglo che. Pu Marem, Lawyer i ni a, Evidence awmzia pawh i hre ngei ang. Tin, Pi Rinsiami nen hian in inngaizawng reng a ni tih hi finfiah turin hun tam ka mamawh lo bawk. In phone record pawh kan nei a, chuchuan a hrilhfiah chiang khawp ang." a ti ta phiar phiar mai a.

Marema chu a hmel a danglam a, a zam hmel ta kher mai. Amandai chuan sawi zawm zelin, "Thil pakhat leh...crime-scene ah khan cement nawi tlem azawng hmuh a ni a, chu cement chu i insak nana cement i hman ngei kha ani.

Chuvang chuan tualthahna thlen hun awm ang velah khan Nunpuia te inah khan i awm tih a chiang a ni, he case hi a tawp thlengin ka chhui anga, ka chhuichhuak ngei bawk ang. Chuvang chuan he case-a ka hlawhtlin theih nan chuan engpawh ka ti ang, i hria maw?" a han ti a, Marema pawh a kun ta lap mai.

Muangchang hian a rawn hawi chhuak a, aw khur dur dur hian, "Ka...ka hmangaih a ni. Rinsiami hi ka hmangaih takzet a ni, ka thinlung zawng zawngin ka hmangaih a ni. Mahse Inspector, min ring hram rawh. Nunpuia kha ka thianpa a ni a, ka that lo.

Khami zan khan Nunpuia te inah chuan ka va kal ngei alawm, mahse ka that lo, ka thah a nilo." tiin a mittui a tla a, a in hnit fap fap a. Amandai chuan nui suk hian, "Awle, kan lawm e." a ti a, room chu a chhuahsan a, Liantea chuan a zui ve nghal a.

Amandai chuan Liantea bulah chuan, "A statement a thlak ang.." a ti a. Liantea chuan hrethiamlo tak hian, "A statement maw? Ma'm enge maw i sawi le? A inpuang tawh a, tuna kan tihtur chu a hmanraw hman kha kan trace ang. Evidence pawh kan hmu tawh a, Marema hi khami zan khan Nunpuia te inah chuan a kal ngei a ni tih pawh kan finfiah tawh a. Rinsiami'n a pasal a thih hnua a phone hmasak ber chu Marema hi a ni bawk a, engkim a chiang vek tawh alawm. Open-and-shut case anih hi Ma'm, tunah chuan a hriamhrei hman chiah kha zawn hmuh a ngai tawh ang." a ti a.

Amandai chuan, "Nilove Liante, a statement a sawi ringawt alawm, a inpuang hleinem. A satement chu ziakthla la, keiin ka lo dawp leh deuh ange." a ti a. Liantea chuan, "Ma'm rem i tih chuan keiman kalo dawp zawk ange, vawi hnih khat vel ka han khawih deuh anga, a inpuang em em ang. Chumi hnuah eng ang hriamhrei nge a hman tihte pawh min hrilh vek anga, khawiah nge a thuhruk tih te thlengin min hrilh vek ang." a ti a.

Amandai chuan, "Thuhrukna a? Zawhna atthlak tak a nih chu, Liante. Achhan chu maw, Nunpuia nunna ang chiah khan, a hriamhrei pawh kha a ral ve nghal a ni." a ti a. Liantea chuan a hrethiamlo kher mai, "Enge i sawi tum ber chu?" a han ti hu mai a.

Amandai chuan, "Liante, i taksa kha eng atanga siam nge?" a han ti daih mai a. Liantea chuan a lu thak lo pui chu hiah nauh nauh pah chuan, "Vun te, tisa te, ruh te.." a tih lai chuan Amandai chuan, "Tui...tui pawh a tel. Kan taksa a 70% hi tui a ani." a ti a. Liantea chuan, "Ka hria alawm Ma'm, school ah pawh kan zir tawh." a lo ti a.

Amandai chuan, "Nunpuia kha tui hmanga thah ani, tui khal...ka sawi awmzia chu, vur tlang hmanga thah a ni. Vurtlang hmawr zum hmang khan tualthattu khan a hrawkah khan a vit a ni, chu vur tlang chu awlsam taka lak mai theih turin fridge ah khan a awm bawk a ni, Nunpuia te fridge ah khan." tih pah chuan a bula fridge chu a hawng a, freezer-a vur tlang hmawr zum chu a pawtchhuak a.

Liantea bulah chuan chu vurtlang chu lek kangin, "Thuhruk angai lova, amahin a tuiral mai a ni. A hrawkah khan a in vit bur reng a, mahse hnuhma engmah a hnutchhiah lo, a ni ang ang khan a ral mai a ni." a ti a. Liantea chuan, "Ma'm, kan case ti hniam tu a ni thei ania, achhan chu hriamhrei a hman kha kan hmu lo a, vurtlang ani tih kan sawi chuan, tuman min awihlo ang." a ti a. Amandai chuan, "Ni chiah e, chuvang reng chuan alawm vurtlang hi hmanrua ah a hman reng ni. Tualthahna satliah a nilo, premeditated murder a ni." a ti a.

Liantea chuan, "Hriamhrei chu kan hmu talo tihna angvel a ni a, Marema hi court ah a inpuang duhlo a nih chuan, an chhuah zalen ngei ang." a ti a. Amandai chuan, "Ni e, a inpuang lovang. Tual a thah miau loh te chuan Marema chu hrem theih a ni dawn hleinem, chuvang chuan he case hi ala zo lo, kan la bawhzui zel angai a ni." a ti a.

(LATER THAT NIGHT)

Nancy Lalchhandami, zaithiam tak mai leh chhelo zet mai chu a studio ah chuan a music video tur a shot mek a. Mi thar a ni a, a la lar dawn chauh a ni. Youtube lamah te pawh kar 2 chhung lekin a music video thar hmasa ber chu mi maktaduai chuangin an view nghal a, Mizoram mai nilovin North East ah a lar nghal em em ringawt mai a ni.

Amah hi cher lam, piannalh tak mai, ft 5'3 vela sang, ngo lutuk lo leh hmeltha em em mai hi a ni a. Zai chauh nilovin lam pawh a thiam tel a, a la lar dawn chauh kan ti tak nangin, zaithiam dang tamtak ai chuan a lar der tawh a ni.

Video a shoot zo chu chawlh lailawk an nei a, Nancy pawh chu a thlan a tla nasa tawh nen, a hah tawh nen, Studio chhung a ama private room ah chuan lutin a inbual a. Hetih lai hian pawn lamah chuan Director te, Producer te, Camera man te leh Side-dancer te, a model hman te leh crew member tam tak an awm a ni.

A inbual lai chuan bathroom hnaih deuha thil ri rek hi a hria a, a han ngawi vang vang a. Thawm chu a awm zui tak silovah chuan ngaihtha tak chuan a inbual chhunzawm leh mai a. Reilote hnuah chuan a ngai ang bawk chuan engemaw ri rek hi a hre leh ta, shower chu a off a, bathrope chu ha-in bathroom atang chuan a chhuak a. A room chu a han enkual a, "Tunge? Awm in awm em ni?" tiin a han au vak vak a, mahse tumah chhangtu an awmlo.

A bengchhe ri mai mai a nih ringin inthlak tum chuan a thawmhnaw vel chu a han enkual leh a, mahse kawngka lam atang chuan thawm a rawn awm leh ta. A ngaih a tha tawhlo kher mai, kawngka lam pan chuan muangchang chuan ava kal hnai leh a, a thlen dawn tepah chuan kawngka chu a rawn inhawng thut mai.

A phu chiang lutuk chu a tawlh hnung dawr a, crew member zinga mi a lo ni a. Paper rawn kenglutin, "Hei aw Nancy, next scene tur a nih kha." a ti a. Nancy pawh chuan, "Ka lawm e." a ti a, chupa pawh chu a chhuak leh nghal a.

Nancy chuan a scene tur chu a han en a, chutih lai tak chuan hnung lam atang hian ban tha chak em em mai hian a rawn rek thut mai a, a hrawkah chuan hrui niawm tak, sinte mai hian a rek bet a, a hmui a hupsak bawk a. A tal vak vak a, mahse rei a daih lo, Nancy chu a thaw achham a, a thi ta der mai.

Nancy thih hnu darkar chanve velah chuan Amandai leh Liantea te pawh chu an va thleng ve nghal a, ruang chu an endik nghal a. Liantea chuan information te chu a theih ang angin a han khawn khawm nghal a, Amandai bulah chuan, "Ma'm, a hmingpum chu Nancy Lalchhandami a ni a, kum 25 a ni.A landan chuan shooting an neih zawh veleh a thi a ni a, Studio ah hian midang tam tak an awm ve a, mahse thawm engmah an hrelo a ni awm e." a ti a.

Amandai chuan, "Pawnlam mi an awm em?" a han ti a. Liantea chuan, "Mi 200 vel chu Studio ah hian an awm a, mahse tute nge unit chhungah hian awm a, tute nge crew zinga mi ni velo tih chu hriathran an har deuh hlek a ni." a ti a. Amandai chuan, "Anih tak chu, chu tak chu tualthattu hian remchangah ala a ni." a ti a.

Doctor Sangtea chu lo kalin, "Ma'm, finger prints engmah kan hmu lo." a rawn ti a. Liantea chuan, "Ma'm, he nula hi a uiawm khawp mai. Zaithiam lar tak tak te ai pawhin a music video hmasa berah viewer tam tak a nei nghal a, a lar dawn chauh a ni." a ti a.

Crew zinga mi pakhat chu Amandai chuan a ko hrang a, "Tunge i hming?" tiin a han zawt a. Chupa chuan Thangtea ka nia, Production assistant ka ni e." tiin a lo chhang a. Thangtea chu a thlan buah buah mai a, a hlauhthawn hmel hle mai. Amandai chuan, "Tinge, iva mangan hmel ve?" tiin a han zawt leh a. Khur dar dar hian Thangtea chuan, "Kha mihring pa kha model tha ber amaw hi a inti a, ka haw takzet." a ti ringawt a.

Amandai chuan, "Tu chanchin nge i sawi a?" a ti a. Thangtea chuan, "Sawmtea kha mawle, Nancy hi a tibuai reng a. Nancy hian music video ah model atan a hmang thin a, mahse kha mihring pa khan a bem reng a, a tibuai reng a ni. Nizan lawk pawh khan Nancy make-up room ah ava lut lui a, kan hau hrep alawm. In-date pui turin a sawm reng a, a inti thu si. Nancy hian a hnar zel a, chuvang chuan kha mihring tenawm Sawmtea khan a that a ni ngei ang, chhuah reng reng suh u Inspector..sawisa hrep rawh u." a ti chiam chiam mai a.

Amandai chuan, "A tawk e, kan lawm e...kal tawh rawh." a ti a, Thangtea chu a kal ta a. Liantea chuan, "Sawmtea an tih chu mizo filmstar ve deuhreuh hi a ni a, a common khawp mai. Music video ah pawh hmeichhe zaithiam hrang hrangin model ah an hmang a, a ler reuh phian a ni awm e. A laka complain file pawh a awm nual a ni awm e, mahse a hotham hlawm em a, bawhzui a ni ngai lemlo." a ti a.

Amandai chuan, "Anih leh Nancy chhungte hnenah thil thleng hi hriattir a ni tawh em?" a han ti a. Liantea chuan, "Apa kha abiak theih loh a, mahse an awmpuinu, kum 60-a upa, Pi Thani chu kan hrilh tawh e." a ti a. Amandai leh Liantea chu Nancy te inlam pan chuan an kal ta nghal a, reilo teah an thleng thuai a. Kawngka chu an han kik a, NAncy te awmpuinu Pi Thani chuan a lo hawng a. Liantea chuan, "Police kan ni e, ka pi." a han ti a.

Pi Thani chuan, "Enge inla duh a? Police te chu nichin lawk khan an lo kal tawh a, kan fanu Nancy thih thu pawh min rawn hrilh vek tawh alawm." a lo ti a. Liantea chuan, "Kan hria alawm, khang ho kha chu kan senior DCP leh ASP te an ni a, keini chu headquater atanga lo kal kan ni a, enquiry titu tur zawk te kan ni e." a ti a. Pi Thani chuan, "Aww..anih tak chu, lo lut rawh u." a ti a.

Pi Thani chuan, "Lalthanmawii ka ni a, tupawh mai hian Pi Than tih vekin min ko a. Ka pu hian a fanu Nancy thih thu a hriat khan a a thawng lutuk a, tunah phei chi chuan a biak hleihtheiloh a. Min lo nghak lawh rawh u, ka va hrilh lawk ange." a ti a. Reilote hnuah chuan Pi Thani chu a lo let leh a, "Lo lut rawh u." a ti a, bed-room ah chuan an lut ta a.

Nancy pa, Pu Chhuanawma chu a melh ngai melh rengin khumah chuan a lo thu a. Amandai chuan va pan hnaiin, "Ka pu, Inspector Amanda Lalrempuii ka ni a. Hunlo taka kan rawn tihbuai che avangin minlo hrethiam dawn nia. Mahse thil pawimawh tak sawipui tur che ka nei a.." a ti a, Liantea chuan, "Ka pu, engemaw tal min hrilh thei anih chuan kan case chhui mek pawh hi a awlsam sawt thei dawn a, khawngaih takin.." a tih lai chuan Pi Thani chuan, "Thil thleng avang khan ala ziaawm hleithei lova, a thawng lutuk a. Zawhna in nei anih chuan keimah hi min zawt mai rawh u." a lo ti a.

Liantea chuan Pi Thani bulah chuan, "Pi Than, Nancy hian buaina engemaw a neih awm i hre thin em?" tiin a han zawt a. Pi Thani chuan, "Eng buaina mah a neih kan hrelo. Hmeichhe fel tak a ni a, kan chhuang takzet a ni. Ka pu fanu neihchhun hi ani a, hetia min kalsan mai hi hriatthiam har kan ti takzet a ni. Ka pu hian nu tellovin a enkawl seilian a, mahse nikhat chu tlangval pakhat, Sawmtea an tih chuan Nancy chu abula thawk tura a duh thu a rawn sawi a. Tichuan Nancy pawh chuan a lo duh ve mai a, NAncy pawh a hlawk phah hle a. Mi fel tak angah kan ngai a, Sawmtea pawh chu a lo leng fo thin. Chuan Nancy neih a duh thu a sawi ta mai a, ngaihthat lohna pawh kan nei lemlo. Mahse kan rin ang alo ni hauh lo a, zu a heh in, mipa ler tak a lo ni a.." a ti a.

Liantea chuan, "Anih chuan Nancy neih a duh thu a hrilh che u chuan inlo hnawl tihna em ni?" tiin a han zawt a. Pi Thani chuan, "Ka pu hian a hmaichhanah a hnawl a, mahse Sawmtea chuan Nancy tenawm zia te, a hurherh zia te leh mipa a mamawh zia te a sawi ta chiam mai a. Nancy chuan apa bulah hian lungngai lo tur leh mangang lo turin a hrilh fo a, engkim a that leh vek tur thu sawiin min hnem fo thin. Mahse, hetiang thil rapthlak hi a thleng ang tih kan ring pha ngailo." tiin a tap zawih zawih mai a.

Amandai leh Liantea te chuan Nancy te in chu an chhuahsan ta a, Liantea chuan, "Ma'm, Nancy pa khan a fanu thi ta mai hi ala awih theilo niin a lang, a thawng lutuk anga, tawng pawh a tawng thei hrihlo a nih ber kha." a ti a.

Amandai chuan, "Ni e, mahse a mitmeng kha ka en reng a. A mitmeng khan thil tamtak a sawi thung a ni, a rilru a na hle anih dawn kha. Tihian ti teh, heng case kan chhui mekte pahnih hi zirchiang leh deuh la, engthil nen nge a inzawm tih lo hriat tum ang che." a ti a.

Liantea chuan hrethiamlo tak hian, "Case pahnih a? I sawi awmzia chu Nunpuia case leh Nancy case hi maw? Ma'm, case dang daih a nih hi.." a ti bul bul a. Amandai chuan, "Ka sawi ang chuan ti mai rawh, Liante." a lo ti deuh hmak a. Liantea pawh chuan inthlahrung tak chuan, "Awle.." tih ringawtin achhang a.

Amandai chu Forensic Laboratory ah ava kal a, Doctor Samuela chuan Nancy ruang chu a lo enfiah mek a. Amandai chuan, "Enge chanchin, Doctor?" a va ti a. Doctor chuan, "He case hi ainteresting khawp mai." alo ti daih a. Amandai chuan nui huk pah chuan, "Interesting a? Enge awmzia?" a han ti a.

Doctor chuan, "Tualthattu in Nancy thah nan hian copper-wire a hmang a ni, a hrawkah copper wire hian a rek a ni. Copper wire sei zawng hi 4 millimetre a ni a, a hriam em em bawk. A hnug lam atangin a rek a ni, a rehna hnuhma pawh a langchiang khawp mai." a ti a.

Amandai chuan, "Anih leh thildang a awm em?" tiin a han zawt leh a. Doctor chuan, "Zan dar 7 velah thi ani a, blood test pawh a lo chhuak tawh e." a ti a. Amandai chuan, "Chuzawng chu em ni?"a han ti leh a, Doctor chuan, "Chuzawng chu a ni e." tiin a lo chhang a.

Atuk zingkar ah chuan Amandai leh Liantea te chu Sawmtea va kawm turin gym ah chuan an va kal ta a, Sawmtea pawh dumbell chawiin a lo work-out nasa hle a. Amandai chuan va pan hnaiin, "Sawmte, Inspector Amanda Lalrempuii ka ni a, Nancy thihna chungchangah ka be duh che a." ava ti a. Sawmtea chuan ngaihsak lo zet hian, "Awle, tikhan sawi mawp mawp mai rawh u." a lo ti sam et a.

Amandai chuan, "Nancy nen hian kum 3 chhung ngawt inlo inzui tawh tih hi thudik a ni em?" a han ti a. Sawmtea chuan, "Ni e, a lar hma daih tawh khan ka re tawh. A zaithiam ka ti a, talent a nei tha ka ti a, chuvang chuan ka ti lar ta anih kha. A awmzia chu, keimah vanga lar a ni." a lo ti ham ham a. Amandai chuan, "A nih chuan in innel hle tihna aniang maw?" a han ti leh a. Sawmtea chuan, "Nel lemlo, ka tan chuan celebrity pakhat ve mai chauh a ni." a lo ti leh hmuk a.

Amandai chuan, "Nizan dar 6-7 inkar vel khan khawnge i awm?" tiin a zawt a. Sawmtea chuan, "Studio ah...shooting neih naah." tiin a chhang a. Liantea chuan, "Mahse nizan shooting naah khan engah mah i tel ve lo, i scene tur a awm velo hrim hrim. Anih chuan nang ang mi buai leh mi pawimawh hi hetah tinge exer ilo lak mai mai a?" a ti a. Sawmtea chu a ding a, "Ka buaina chu ka buaina ani, ka taksa hrisel nan ka work-out thin, zawhna dang a la awm em?" a han ti vel a.

Amandai chuan file pakhat pek pah chuan, "Awm tehreng e, kha kha ticket i book-na record a ni. Dubai ticket, nang leh Nancy tana i book ngei kha. Tin khatah khan Hotel reservation te thlengin a awm vek. Agent atan pawh Royal Travels in hmang, a dik em?" a han ti chu Sawmtea pawh a ngawi ta reng mai.

Amandai chuan sawi zawm zelin, "I sawmna te chu Nancy chuan a lo hnawl a, a dik em?" a han ti leh a. Sawmtea chuan sawi tur a hre talo, zah hmel tak chuan a ding ngawi reng a. Amandai chuan face-towel lo inbang chu a la a, Sawmtea pek pah chuan, "Kha..inhru hul rawh, i thlan nasa lutuk. Chuan maw Sawmte, lehpekah chuan mi i vau emaw, i tihthaih a nih pawhin, zaidam takin tawng tawh ang che.enjoy your workout, and thank you for your time." a ti a, an kalsan ta a.

Zing dar 10:10 a lo ri a, DGP Pu Zonunsanga chuan Amandai chu a office ah a ko lut a. DGP chuan, "I tha maw, Amanda?" a han ti a. Amandai chuan, "Ka tha e, Sir." tiin a lo chhang a. DGP chuan, "Mahse newspaper-a thuziak te hi chu a tha chiah lo ani, heng te hi han en teh." tih pah chuan chanchinbu chu Amandai hmaah chuan a theh phei a. DGP bawk chuan, "Khawpui ahim lo, mipui te an thlabar. Tualthahna a thleng chhunzawm zel, Police ten engmah an tilo...khatiang hlir kha tunlai news chu a ni." a ti a.

Amandai chuan, "Sir, i lungawilo tih chu ka hria alawm. Mahse ka tiam ache, a rang thei ang berin..." a tih lai chuan DGP chuan, "A rang thei ang berin tih rikngawt, ava rei tawh si ve? Enteh, i case hi DCP Nathan-a hnenah ka hlan chhawng mai dawn nge? Suspect ho kha i man dawn?" a han tih chuan Amandai chuan hrethiamlo tak hian, "Enge i sawi awmzia, Sir?" a ti a.

DGP chuan, "Amanda, kha case pahnih te kha chiang takin ka zirchiang a, he case pahnih te hi High-Profile case ve ve a ni. Nunpuia case ah khan i hna chu tha takin i thawk a, sawiselna tur ka hrelo. Finfiahna engmah awmlo mahse, i kalpui zel a, ka fak khawp mai che. Mahse, evidence zawng zawng pawh i hmu vek a, suspect awmchhun pawh Nunpuia thawhpui Marema a ni. Mahse Marema chu khawnge? Khawlaiah zalen takin a leng mai mai asin, engvangin nge i man loh?" a ti a.

Amandai chuan, "Sir, evidence chu a awm ngei a, mahse thuchiang leh thudik proof-na engmah a awmlo a ni." a ti a. DGP chuan, "Anih chuan tinge i man mai loh?" a lo ti leh a. Amandai chuan, "Sir, engtin nge ka man ngawt theih ang?" a ti a. DGP chuan, "Ani kha suspect a ni, Amanda." a ti hmuk a. Amandai chuan, "Sir, ani kha a innocent a ni. Kan hmuh leh kan hriat te hi thudik angah ngaiin kan kal tlang pui ngawt theilo, finfiahna engmah a awm lo." a ti a.

DGP chuan, "Amanda, engtia rei nge thudik chu a thup theih chuan anga? Chuan engtin nge Marema chu pawisawi lo a ni tih awlsam taka i sawi mai theih a?" tiin a han zawt a. Amandai chuan, "Sir, he tualthahna hi mi fing tak leh mi professional tak thil tih a ni. Plan felfai tak neia ti a ni, Marema tih hi ni ta se chu tual a thah zawh khan engvangin nge Nunpuia nupui Pi Rini kha a biak nghal ngawt ang? Hetiang khawpa tualthattu fing leh thiam, thluak hmang thiam lutuk hian engti kawng mahin mistake ho lutuk chu a nei hauh lo ang. Nunpuia case ah a ni emaw, Nancy case ah pawh nise." a ti a.

DGP chuan, "Enge i sawm tum ber chu ni a?" a han ti a. Amandai chuan, "Sir, he tualthahan pahnih te hi a thlen lai khan, tualthattu hian..." a tih lai chuan DGP chuan, "Lawk lawk lawk, tualthattu chu mi pakhat chauh a ni i tihna em ni?" tiin a lo zawt a. Amandai chuan, "Aw ni e Sir, Nancy leh Nunpuia thattu hi, mi pakhat thil tih a ni." a ti a. DGP chuan, "Enteh Amanda, i rinthu mai mai i sawi a nilo maw?" a ti a.

Amandai chuan, "Sir, ka chhuichhuak em em ang. Ka mamawh zawng chu hun tlemte tal min pe leh la, chu chu a nimai." a ti a. DGP chuan, "Ngawi lawk teh, he case pahnih ah hian, evidence leh motive (chhan tha tak) i hmu tawh a, chumai bakah eng hmanrua nge tualthattu hian a hman tih pawh i chhuichhuak ve ve tawh a. A awmzia chu awlsam takin Marema kha i man thei reng tawh tihna a ni a, enge i la nghah a?" a ti a.

Amandai chuan, "Sir, Marema khan Nunpuia hi a that ngei em tih hi ka la chiang ngamlo ani." a ti a. DGP chuan, "Amanda, Police Department te hian evidence kan nei tawh a nih chuan, kan hna chu case chhuichhuah vat a ni. Kan chian leh chianloh a nilo, tunge pawisawlo tih leh tunge pawi khawihtu tih chu keini nilovin, court rorel tur a ni. Keini thu anilo, court rorelna kutah dah rawh. An hna an thawk anga, nangin i hna i thawk thung ang." a ti a.

Amandai chuan, "Mahse Sir.." a han ti dek dek a, DGP chuan, "Amanda, tun thleng pawhin evidence diktak pawh ila hmu zo lo ani a. Tualthattu hi mi pakhat chauh nge, mi pahnih an ni tih pawh chiang taka proof-na i neilo. Chuvang chuan Marema leh Sawmtea kha suspect an ni a, tiraw?" a han ti a. Amandai chuan, "Aw ni e, Sir." a ti a.

DGP bawk chuan, "Tichuan, evidence a awm bawk tiraw?" a han ti leh a. Amandai chuan, "Aw awm e." tiin a chhang leh a. DGP chuan, "Anih chuan ka thu awih la, arrest warrant siam vat ang che u." a ti a.

Amandai chuan, "Mahse, Sir." a tih lai chuan vin deuh tak hian DGP chuan, "Amanda, ka thu i awih dawn nge he case hi DCP Nathan Malsawmkima hnenah ka hlan chhawng dawn?" a ti ta khur khur mai a. Amandai pawh chuan inthlahrung tak chuan, "Sorry Sir, i thu ang zelin le." a ti a, DGP office chu a chhuahsan ta a.

Tlai alo ni a, Amandai pawh chu anmahni Station lamah chuan a leh ta a, pawnah chuan SI Liantea leh Constable Siama ten an lo nghak a. Amandai bulah chuan Liantea chuan, "Good Evening Ma'm." a han ti a. Amandai chuan, "Good Evening, news a awm em?" a han ti nghal a. Liantea chuan, "Sorry Ma'm, engmah thuthar a awmlo a, case pahnih te pawh khan inzawmna an neih awm kan hrelo. Nunpuia leh Nancy te kha an hobby te, an ngainat zawng te pawh kan han enkawp a, engmah in ang a awmlo a ni." a ti a.

Amandai chuan, "An nunah chuan in ang a awmlo a ni maithei, mahse an thihdan kha chuan inzawmna a nei chiang a ni. Beidawng lola, chhunzawm zel rawh." a ti a. Siama bulah chuan, "Siama, Sawmtea leh Marema arrest warrant tur lo buaipui ang che. Vawiin hi zirtawpni a ni a, tlai dar 5 thleng chauh arrest warrant kha a dil theih dawn ania. Tunah dar 4:30 a ri tawh a, traffic jam nasat hunlai tak a ni." a tih lai chuan a phone a rawn ri a. Rang tak chuan a la a, "Hello.." ahan ti a, mahse a tawp nghal hmak mai.

Amandai chuan a phone chu a han en a, "631991...eng number nge ni ngai?" a ti a. Siama chuan, "631 a? Ehee...duty room number a nih chu." a ti a. Rang takin Station chhungah chuan an tlan lut nghal a, duty room ah chuan an lut a. Liantea chuan duty te bulah chuan, "Nichin lawk khan hemi phone atang hian Inspector Amandai hi in rawn call em ni?" a han ti a. Duty chuan, "Hemi phone hi maw? Nimin atang khan hemi phone hi chu a chhe daih a lawm." alo ti a.

Liantea chuan phone chu ahan check chiang a, "A chhe ngei e, Ma'm." a ti a, Amandai pawh chuan mak a ti hle mai. Dar 5 a pel a, Amandai pawh a fanu Daisy (a fanu tak tak anilo kan tih tawh kha) tan colour pencil lei tur chuan bazar ah a kal a. Chutia Amandai che vel chu kil khat atang chuan tu emawni hian thla a lo lak sak char char a, Amandai erawh chuan a hre hauh lo. Chutia colour pencil vel a en lai chuan dar chhunga darthlalang atang chuan thla lo la mek tu, kawng lehlama mi chu a va hmu ta a.

Rang takin a va hawi phei a, thlalatupa pawh chu a phu zuk mai a. Rang takin camera chu a awrh a, a tlan chhe ta daih mai. Amandai pawh chuan a um nghal vat a, bazar chhungah te, mipui zi nuai nuai karah te chuan an in um ta chiam mai. Rei fe an in um hnu chuan chu thlalatupa chu a chau tawh hle mai a, Amandai erawh Inspector ngat ni thei, training lai pawha ti tha ber thin kha ani bawk a, a la infit zak zak khawp mai. A umpha ta thuai a, pistol phawrhin chupa chu a tin ran mai a.

(ZAN ALO NI A)

Interrogation room ah chuan thlalatupa chu a thu kun lap, tap tuau hian, "Chuzawng chu ka hria, abak engmah ka hrelo." a ti bui bui mai a. Liantea chuan rum zet hian a melh a, "Dawt sawi kan phallo ania, thudik tak sawi rawh." a han ti khur khur a. Chupa chuan, "Sir, dawt ka sawilo." a ti a. Liantea chuan vin zet hian, "Tu thla nge ilo lak ruk hi i hria em?" a han ti vak a.

Hlauh hmel tak hian chupa chuan, "Aw hria e, Inspector Amanda Lalrempuii." a ti a. Liantea chuan, "Tuin nge a thla laksak tura hrilh che?" tiin a zawt a. Chupa chuan, "Sir, hna ka neilo a. Kan rethei bawk si a, mahse ni reilote chhunga Inspector Amandai thla ka laksak nual a nih chuan cheng 12,000 lai ka hlawh tur thu min hrilh a. Inluah man te, tui bill te, electric bill te pek zel a ngai bawk nen, ka lo pawm ta mai a ni.Misual tak chu an ni ngeiin ka hria, mahse an thil tih tum engmah ka hrelo a, ka tel velo. Keichuan ti tura min tih ka ti mai chauh a ni, min ring rawh ka pu." a ti lawm lawm a.

Liantea chuan, "Tunge chu chu? Tu tan nge i thawh?" tiin a han zawt leh a. Chupa chuan, "Amah chu ka hre ngailo, ka hmu ngailo bawk. Vawikhat kan inah a lo kal a, advance in cheng 3000 min rawn pe nghal a, tichuan he hna hi thawk turin min ti a ni." a ti a. Liantea chuan, "Engtik nge i hmuh hnuhnun ber?" a ti a. Chupa chuan, "Khabak kha chu ka la hmu leh ta miahlo." a ti a.

Amandai chu lo kal pheiin, "Anih leh engtin nge thlalak chu i thawn?" a ti a. Chupa chuan, "Vawiin hian min rawn call tur thu a sawi a, a hun leh a hmun chu a rawn sawi tur thu min hrilh lawk a ni." a ti a. Amandai leh Liantea te chuan chupa chu an chhuahsan ta a, Liantea chuan, "Ma'm, a rawn call hunah phone chu lo 'tap' ila, kan trace nghal anga." a ti a. Amandai chuan, "Alo call ka ringlo, ti hian ti zawk teh ang. Lemziak thiam Albert-a call la, a lem ziak zawk rawh se." a ti a.

Albert-a pawh chu a lo thleng thuai a, darkar 2 hnu velah chuan lemziah chu an zo fel thei ta hram a. Liantea chuan lemziak chu fax hmangin Headquarter lama duty te a thawn a, hmanhmawh taka lo zawngchhuak tur leh a chhenna te, a hming te nen lama lo zawng chhuak vek turin a chah ta a.

Atuk zing ah chuan Amandai pawh hma takah a thleng a, a office ah chuan Liantea chu lutin file pakhat hi a pe a, "Ma'm, a hming chu Sahid Khan a ni a, Delhi mi a ni. Mizoramah a awmna a rei tawh a, mosolman kulmuk tak a ni. Mizo tawng pawh a thiam khawp mai an ti a, amah hrechiang tute chuan mifel tak a ni lemlo an ti. Kum 40-a upa a ni a, kum 2011 khan naupang pawngsual a puh niin jail pawh a lo tang tawh a ni. Delhi lama a awm lai pawhin tualthah case 17 vel lai mai ah a lo inhnamhnawih ve bawk a ni awm e, mahse evidence chiang tak erawh engmah a awm lo thung a, chuvang chuan man a ni ngailo hrim hrim. Chuan maw Ma'm, underground contact ka neih ho atanga ka hriat a nih hlawm kha." intithei deuhreuh tak chuan a han ti a.

Amandai chuan file chu a han en a, Liantea bawk chuan, "Ma'm ka rindan chuan Sahid-a hi Nancy leh Nunpuia thattu kha anih ka ring. Evidence engmah a awmlo a, engkim mai kha chhuichhuah hleihtheihloh vek a ni a. Chuan maw, tualthahna kha finfiah nilo mahse athah dan kha a mak a ni.Thil chiang deuh pakhat chu ama hlim nan leh lawm nan tual kha a that ni berin ka hria, a thah khan amah kha a hlim ta veng veng niawm tak ani. Chuan Nunpuia leh Nancy thihdan han en khan..." tia a sawi lai chuan Amandai chuan, "Khawiah nge Sahid Khan hi kan hmuh theih ang?" a lo ti a. Liantea chuan, "A chenna hmun chu ka hria e." tiin a lo chhang a.

Amandai, Liantea, Siama leh Police dang pathum vel te chu Sahid Khan-a chenna in lam pan chuan an kal ta a. Veng hnuai ah a ni a, a awmna lai pawh a pilril hle mai. In chu an thleng a, kawngka an han kik karh karh a, mahse chhangtu an awmlo. Amandai chuan, "In pistol phawrh vek ru." ati a, tichuan pistol chu an hun ta far hlawm a. Kawngka chu Liantea chuan a han chhuih hawng thuai a, mahse tumah an lo awm lo.

Inchhungah chuan an lut a, bangah chuan Amandai thlalak tamtak te chu a lo intar fur hlawm mai a. Tichuan bang kilah chuan Sahid-a chu thisen nena inchiah piah nuai chuan a lo mu a, a ban lehlam a phar a, lehlam erawh a dahthla thung. Liantea chuan a va enchiang a, "Ma'm, a thi tawh." a ti a, Amandai chu a thinrim kher mai.

Sahid-a ruang chu post mortem zawh a ni tawh a, tlai dar 3 a ni. Doctor Samuela chuan Amandai bulah chuan, "Tukin zing dar 6 vela thi a ni a, thah a ni. A thin hnunah tak hmanraw hriam tak hmanga vih a ni a, heart-puncture a ni." a ti a. Chutih lai chuan Constable Siama a lo lut a, "Ma'm, he tualthahna ah hian Sahid-a gang member te tumah an inrawlh lo." a rawn ti a.

Doctor Samuela chuan, "Tunge that ang le? Tin, i thlalak te kha bangah khan a tar teuh mai lehnghal a. Chuan maw Amanda, thil pakhat hrilh theihnghil daih che ka nei a." a ti a. Amandai chuan, "Enge chu chu?" a lo ti vat a.

Doctor chuan, "Nancy kha a ruang an chhar hun kha zan dar 7 zawk a ni a, zan dar 7 a thi a nilo. Crew member te khan a hahchawlh chhung kha rei an ti reng a, tlai dar 2:30 velah shooting kha an zo a, mahse zan dar 7 velah pawh khan room a la rawn chhuahsan silo a. Director te khan a hah ve tawh lutuk anih an ring a, a muhil a nih an ring a. Mahse anva luh khan a lo thi ta der si a." a ti a.

Amandai chuan hrethiamlo tak chuan, "Enge maw i sawi le, Doctor?" a lo ti hu mai a. Doctor chuan, "Sorry Amanda, mahse thudik a ni. Ataksa kha alo la lum vek avang khan ka hre mai biklo a, mahse a hliam leh copper wire ka exam nawn leh atang khan a thih hun kha khaw thim hma a ni. Tlai dar 3:00 vela thi a ni a, tukin zing khan ka hre chauh a ni. A ruang kha morgue-ah kan la dah avangin copper wire ka exam nawn khan ka ringhlel a, ka la chhuak leh a, tichuan ka hmuchhuak chauh a ni." a ti a.

Amandai chuan, "Ava mak ve, anih chuan tualthattu hian min bum chu a tum ve nasa tihna nih chu." a ti a. Doctor chuan, "Kalna tur ka nei a, nakinah kan inhmu leh dawnnia." a ti a, a ding hluai a. Chutia doctor Samuela chhuah a tum lai tak chuan Amandai chuan sana a han en zeuh a, engemaw hrechhuak thut niawm tak hian a phu zuk a. Doctor bulah chuan, "La chhuak lo teh...thil hriatchhuah ka nei." a ti a.

Doctor chuan, "Enge?" a lo ti vat a. Amandai chuan, "Siama, Nancy, Nunpuia leh Sahid-a te ruang thlalak kha lo la teh." a ti a. Siama chuan rang takin thlalak chu a lakhawm a, Amandai chu a pe a. Amandai chuan thlalak chu a han en vang vang a, "Siama, Nunpuia kha dar engzat ah nge a thih khah?" a ti a. Siama chuan, "Zanlai dar 12 ah." tiin a lo chhang a. Amandai chuan, "Dar 12 ah chuan sana ban hi khawi lamah nge a awm thin?" a han ti daih mai a. Siama chuan, "Chung lamah, a pahnihin.." a ti a.

Amandai chuan Nunpuia ruang thlalak chu lek kangin Siama leh Liantea leh Doctor te chu a en tir a, Nunpuia ruang chu chung lamah a ban pahnih pharin a lo awm a. Amandai chuan, "Hetiang hian em ni?" a ti a. Siama chuan, "Aw a nih hi." alo ti a. Amandai chuan, "Anih leh Nancy kha?" a ti leh a. Liantea chuan, "Dar 3 ah, a awmzia chu a ban pakhat zawk chu chunglamah a awm anga, pakhat leh chu a ngilin a phar thung ang." a ti a.

Amandai chuan Nancy thalak chu a entir leh a, Liantea sawi ang chiah chuan Nancy ban veilam chu chunglamah a awm a, a ding lam chu a phei zawngin ngil takin a awm thung. Amandai chuan, "Chuan...Sahid-a kha chu zing dar 6 a thah a ni a.." a tih lai chuan Doctor chuan, "Pahat zawk chu chung lamah, pakhat zawk chu hnuai lamah." a lo ti a. Amandai chuan Sahid-a thlalak chu a tilang leh a, a ban veilam chu chunglamah a awm a, ding lam erawh hnuai lamah a awm thung.

Amandai chuan, "A awmzia chu he tualthahna pathum te hi, mi pakhat thil tih vek a ni. A tualthahna ah hian ka zawn awlsam theihnan ti hian HINT min pe a ni." a ti a. Liantea chuan, "Eng HINT maw? Zawnchhuah awlsamna turin thil min hnutchhiah i tihna em ni?" alo ti a. Amandai chuan, "Ka hre biklo, ama hnena min hruai thlen nan emaw pawha ni thei. Tual a thah apiang hian clues tlem te te min hnutchhiah sak a, keini chuan chu chu lo tih tawp kan tum tur a ni." a ti a.

Doctor chuan, "Ka la hrethiam chiah lo." a lo ti a. Amandai chuan, "Nunpuia te inah kha chuan, sana darzat hmangin clue a siam a, chu chu Nunpuia ruang ah khan a ni. Nunpuia ban kha chunglamah pahnih in a phar tir a, hun hmangin min infiampui a tum ani. A awmzia chu tualthattu hi mi pakhat chauh ani a, plan mumal tak hmanga ti a ni. Pattern pathum hmangin tual a that a ni, 12 - 3 - 6, hemi number pathum hmang hian game a khel a ni. A awmzia chu he pattern hi kan tihtawp vat loh chuan tual a thah chhunzawm zel dawn tihn a ni a, pattern ngai hlir a hmang dawn tihna ani." a ti a.

Liantea chuan, "12 - 3 - 6..anih chuan a dawt leh chu..9 ani maw?" alo ti a. Amandai chuan, "Thiante u, a awmzia chu hepa hi Serial-Killer diktak a ni." a ti a. Doctor chuan mak tih hmel deuh hian, "Serial Killer a?" alo ti vat a. Amandai chuan, "Tinge? Iva buai hmel ve?" a lo ti a. Doctor chuan, "Thil hriatchhuah ka nei a, mahse a rei tawh mai. Kum 1996 kuma thil thleng kha ania, chumi tum chuan police pakhatin serial killer a zawng mek a, ka hrechiang tawhlo." a ti a.

Chu case hlui chu a file zawng tur chuan Liantea chuan file hlui te leh chanchinbu hlui an dahkhawmna chu a han hai ta vak mai a, darkar 1 dawn lai a zawn hnuah chuan a hmu ta. Amandai bulah chuan, "Ma'm, thil mak tak a ni. Doctor Samuela'n kum 1996 kuma Police Officer a sawi kha tudang nilovin, Nancy pa Pu Chhuanawma a ni." a ti a, Amandai chuan, "Anih chu, an inah va kal nghal teh ang." a ti a, an kal ta a.

Nancy te in chu an thleng a, Pu Chhuanawma pawh biak theihin a lo awm tawh a. Pu Chhuanawma chuan playin card chu dawhkanah chuan alo rem kual a, Amandai bulah chuan, "I duh ber kha han la teh." a ti a. Amandai leh Liantea te chuan an hrethiamlo kher mai, Amandai chuan pakhat chu a han la a, Zum-King (King of Diamonds) alo ni a. Pu Chhuanawma chuan, "Dah let leh rawh." a ti a, Amandai chuan a khup zawngin a dah let leh a.

Chutih lai chuan an awmpuinu Pi Thani chu a lo kal a, Liantea leh Amandai chu thingpui arawn pe a. Thinpui chu dawhkanah chuan a rawn dah a, Amandai'n thingpui no a la kang chu, a hnuaiah chuan Zum-King card a thlan ngei mai chu a zangthal zawng chuan a lo awm leh reng mai a, mak a ti kher mai.

Amandai chuan Pu Chhuanawma chu a en hau ringawt a, Pu Chhuanawma chuan, "Game awlsam tak a ni, step 2 chauh a ngai. Chutiang chiah chuan tuna tualthattu hian game a khelh pui che u a, step 2 zelin nangni ai hian a hmasa zel a ni. In thil tih leh tur te, in chet leh dan tur te hi engkim a hre lawk vek a ni. Mi fing tak a ni, amah hnenh theih dan chu kawng khat chiah a awm, chu chu...enge a tih leh dawn tih lo hriat lawk a ni." a ti a, Amandai leh Liantea te erawh an bo hu mai.

Pu Chhuanawma chuan sawizawm zelin, "He card-game ah pawh hian eng card nge i thlan dawn tih ka hriat lawk angai a, chuvang chuan kan tan hma hauhvin ka chak ta a ni." a ti a. Liantea chuan, "Mahse hengthil hi engvanga ti nge a nih?" a ti a. Pu Chhuanawma chuan, "A chak theih nan, he game-a a chak theih nana ti a ni. A tana thil pawimawh em em a awm a ni ngei ang, hetia tual a thah chhan hi a tan a pawimawh a ni ngei ang." a ti a.

Liantea chuan, "Enge a chhan ni vak anga, a rilru a buai vang a ni zawk ang." a lo ti a. Pu Chhuanawma chuan, "A rilru a buai lo, mi a anilo bawk. Mi a chu an thluak in hna a thawh tawhlo hian mi a tiin kan ko thei chauh ang. Mahse hepa hi chu, a thluak hi a chak em em a, midang zawng aiin a chak ani." a ti a.

Liantea chuan, "Chhan tha tak chu a awm ngei ang." alo ti leh a. Pu Chhuanawma chuan, "Ani te kha chuan nang leh keia ngaihtuah ang hian thil a ngaihtuah ve ngailo. Mi tupawhin tual a that a nih chuan, a chhan tlangpui chu personal thil emaw, hamngaihna emaw, phatsanna emaw, pawisa vang emaw te a ni thin. Mahse heng serial killer te hi chuan chutiang vangin tual an that ve mai mai ngailo, an mi thahtur a te hi leihlawn ang maiin an hmang a, an thil duh an hmuh theihnan an hmang tangkai thin. Achhan chu an thil duh te hi an tan chuan hmun thianghlima kal ang tluk a ni a, vanrama kal ang vel a ni." a ti a.

Amandai chuan, "Serial Killer te chungchang chu engtin nge i hriatchian em em theih a?" tiin a han zawt a. Chhuanawma chuan, "Tuna i dinhmun hi, kum 24 kal taa ka dinhmun ang chiah kha ani. Police Offcer ka ni a, serial killer pakhat ka chhui mek a. Ka hneh tep tawh a, mahse a tawpah ka chaklo ta a ni. A tlanchhuah khan, hnunglam a rawn hawi a, chiang takin min en a. Kha ta a nui hmel mawlh kha...kha anui hmel khan ka inrintawkna te, ka huaisenna te leh ka rinna te a tibo vek hian ka hria ani. Khami hunlai ah khan ka nun hi tun thleng hian a la cham ni berin ka hria, man a ni ta miahlo a. Mahse kum 4 hnuah amah leh amah a intihlum tih ka hre leh a, a hmel kha ka theihnghilh theilo. Theihnghilh ka tum nasa, mahse ka theilo a ni. Tun thleng hian, kha hmel tenawm tak avang khan thlamuang takin ka awm thei tawh lo a ni ber mai. Kha game ka chak theihloh kha, i chak angai a ni. In Police Department tan leh..ka fanu Nancy tan tal pawh." a ti a, a tap deih fap fap a.

Amandai chuan, "Ka hrethiam e." a lo ti a. Pu Chhuanawma chuan, "He game hi nang leh he tualthattupa game chauh a ni a, a hrechiang takzet che a ni. Mahse nangchuan tung e anih hi hrelo a.." a tih lai chuan Amandai chuan, "Hriat theih dan kawng a a awm em? Nge ni a amah chu ka hmelhriat a lo ni reng zawk?" a ti a.

Pu Chhuanawma chuan, "Ka hrelo le." tiin a lo chhang a. Liantea chuan, "Anih chuan, Madam Amandai hi a hrechiang hle a nih si chuan tinge mikhual ang maia a chet vel a?" a lo ti a. Pu Chhuanawma chuan, "He game hi a tan chuan game satliah mai chauh a ni, ama siama ni a, rules te pawh ama set vek a ni. Rules te hi a set tawh anih chuan, tih danglam theih a ni tawh lo. In chak theih nan chuan, chu dan chu in hriatthiam angai ani. Ama game siam ah ngei hian in chakloh tir tur a ni, hneh theih dan awmchhun chu a chet leh dan tur lo hriatlawk a ni." a ti a.

Amandai chuan, "Kan lawm e, ka pu. Kan kal tawh ange." a ti a, Liantea nen chuan Pu Chhuanawma te in chu an chhuahsan ta a.

Stationah chuan an let leh ta a, Amandai chuan Liantea bulah chuan, "Liante, files ho kha i complete tawh em?" a ti a. Liantea chuan, "Complete tawh e, Sahid-a file kha tukin zing khan ka complete nghal." a ti a. Chutih lai chuan Constable Siama leh Doctor Samuela an lo lut a. Siama chuan, "Madam, Congratulation." a rawn ti ringawt a.

Liantea chuan, "Enge ni a?" alo ti hu mai a. Siama chuan, "Madam tan hian order an pass tih ka lo hria a." hlim hmel tak chuan a han ti a. Liantea chuan, "Eng order maw?" a ti leh hu mai. Siama chuan, "Awww...promotion order mawle." ati a. Liantea pawh chu ahlim hmel hle mai, "Tak tak maw?" a ti leh a. Siama chuan, "Tak tak ni e." a ti a.

Liantea chuan Amandai chu a en a, "Ma'm, ka lawmpui a che. Ka sawi tawh kha..promotion i hmu vat ang ka tih kha. Tunah chuan Mizorama ACP ah chuan a naupang ber i ni dawn tihna ania, record ah a tel ngei dawn e." a ti a. Doctor Samuela pawh chuan, "Amanda, ava lawmawm ve. Ka sawi reng kha maw...nang hi chu Mizoram Police Inspector ah chuan i tha ber mai." a lo ti ve bawk a.

Mahse Amandai erawh lawm hmel pawh apu hauh lo, mangan hmel tak zawk chuan, "Khang mitthi pathum te pawh kha anmahni line theuhah chuan a tha ber te an ni. Nunpuia kha industrialist lar leh hausa tak a ni a, Nancy pawh zaithiam lar leh tha ber te zinga mi a ni a, Sahid Khan-a pawh kha ama thiamna zawnah chuan a tha ber pawl a ni. Mahse an chungah enge thleng? An vaiin an thi a, thah vek an ni asin." a ti a. Lungawiloh hmel tak chuan a chhuak ta daih a, Liantea te pawh chu tihngaihna hrelo chuan an in en hu ringawt hlawm mai a.

Chumi zan chuan Amandai chu a mangang hle mai, tualthattu next target chu amah a nih a inring tlat a. A thla a muanglo hle mai, a theih ang tawk chuan case pathum kal mek te chu a han chhui chiang leh a.

Chaw pawh eilo chuan zan a meng tlang a, a inngaihtuah nasa ngang mai. Khatia mitthi ruang tena an ban an phar dan te, an thih hun darzat ang chiaha ban an lo pahr thlap te, Pu Chhuanawma thusawi te nen chuan a ngaihtuah a, a buai kher mai.

A mu lo tlang ta nge nge a, khaw var thleng chuan a buaipui ta char char mai a. Chutih lai tak chuan a room kawngkhar chu a rawn ri rek rek a, Amandai chuan pawhdawh a pistol chu la chhuakin a hum ran a. Kawngka chu a lo inhawng a, Doctor Samuela a lo ni a.

Amandai chu a thaw huai a, "Hello Doctor." a ti a. Doctor chuan, "I hmel kha in en teh, i chauh hmel zia kha." a ti a. Amandai chuan, "He case hian ka lu a ti hai takzet tawh a ni." ati a.

Doctor chuan, "I ti lutuk deuh a ni, Amanda. Tihte..tho la, i chhuak harh teh ang." a ti a. Amandai chuan, "Ka hmanlo, tihtur ka la nghah lutuk." ati a. Doctor chuan, "Het, engmah sawi suh. Chhuak harh rawh, tiang em em hi chuan DCP Nathana te pawh an thawk ngai lo." a ti a.

Amandai chuan, "Mahse, tih tur tamtak ka la nei asin.." a tih lai chuan doctor chuan, "Amanda, i chau a nih kha. I thawh nasat leh lutuk chuan i thluak kha abuai vek mai ang. Kei pawh he case buaipui tu zingah hian ka tel ve tho alawm, mahse nang ang em emin ka thawk lo. Restaurant ah va chawl teh ang, ka ril a tam emai." a ti a.

Amandai chuan, "Heng ho hi kan dahfel phawt ang e." a ti a. Chutia a dahfel lai chuan Doctor chuan, "Amanda, thufing pakhat ka hrechhuak zawk mai. HMEICHHE HLAWHTLING APIANGTE HLAWHTLINNA PHENAH HIAN MIPA AN AWM ZIAH THIN an tih hi i hre ve ngai em?" a han ti a, Amandai chu a nui suk a, "I chhe mai ea." a lo ti a. Tichuan an chhuak dun ta a.

Motora an tlan pah chuan Doctor chuan, "Amanda, inlungrualna chungchang hi tunalai chu Sawrkar hian a sawi ri deuh reng mai a. Intihbuai te, in tualvuakna te, tualthahna te, heng te hi a khap vek a, mahse hetiang thil te hi thlenglo ta se, ralmuang takin kan khawpui hi awm ta se chu hnathawh tur kan nei awm der silova." tiin anui huah huah a. Amandai chuan, "I ho emai a, khawnge kan kal dawn?" alo ti a. Doctor chuan, "KFC ah kal teh ang, restaurant chu ka peih leh lo." a ti a.

KFC chu an thleng a, eitur order-a an dintlar lai chuan Amandai chuan thil engemaw ahre chhuak thut mai. Doctor chuan, "Amanda, eng ber nge i ei duh ang?" tia a zawh lai chuan Amandai chuan, "Ka lawm e Doctor, i sawi dik e. HMEICHHE HLAWHTLING APIANGTE HLAWHTLINNA PHENAH HIAN MIPA AN AWM ZIAH THIN i tih kha adik e. KFC a min hruai avang hian ka lawm e, mahse tunah chuan Station lamah kan let leh vat angai." a ti ta mai a. Doctor chuan, "Mahse order te kha?" a ti a. Amandai chuan, "Theihnghilh rawh." tih pah chuan a kai chhuak dawr dawr a.

Station chu an thleng a, Liantea leh Siama bulah chuan tihtur eng eng emaw chu a hrilh a, an buai hle mai. Doctor chuan hrethiamlo tak chuan an che vel chu a lo en char char ringawt a, Amandai chuan Nancy, Nunpuia leh Sahid-a te thlalak hrang hrang chu a hai khawm a.

Amandai chuan Doctor bulah chuan, "Doctor, investigation neih lai khan thil ho te te in clue min pe a ni. Entirnan thlalak ka tar hi en la, mitthi pathum te hian tarmit an vuah vek a, mahse engtik lai pawha vuah an nilo thung. A awmzia chu an mit a chak lo tihna a ni a, mahse mit thalo erawh an nilo thung." ati a. Liantea chu lo kalin, "Ma'm, Sahid-a file ka hmu velo." a rawn ti a.

Amandai chuan vin deuh tak hian, "Engtin nge i hmuhloh theih? A pawimawh asin." tih pah chuan file hlui an dahkhawmnaah chuan ava kal ve a, file chu a va hai ta chiam mai a. Chutia file a hai pah chuan, "Khang tualthahna pathum te khan inzawmna engemaw tak an nei a ni. An pathum khan, Nancy, Nunpuia leh Sahid-a te khan tarmit an vuah vek a ni." a ti a, tichuan tarmit bawm pakhat hi a haichhuak ta a.

Amandai chuan, "An pathum khan dawr pakhat ami tarmit an lei theuh bawk a, chu dawr hming chu RK Opticals a ni." tih pah chuan tarmit bawm chu dawhkanah cuan a dahthla a, tarmit bawmah chuan chiang em em hian RK OPTICALS tih hi alo inziak a.

Rang takin RK Opticals lam pan chuan Liantea nen chuan an kal ta nghal a. Dawr neitupa office ah chuan Amandai chu a lut a, dawr neitupa Pu Sangtea chuan mak tih hmel tak hian a lo en hu mai a.

Amandai chuan, "Inspector Amanda Lalrempuii, Crime Branch atanga lo kal ka ni e." a han tih chuan Pu Sangtea chu a phu zawk mai. A ding nghal a, "Hello Sir..awhh sorry, Madam ka tihna." a ti bah nuai a. Amandai chuan, "Chanchinbu i chhiar ngeilo em ni?" a han ti nghal ngawt a. Pu Santea chuan, "Engmaw?" a lo ti hu a. Amandai chuan, ""Eng chanchinbu t enge i chhiar thin?" a ti leh a.

Pu Sangtea chuan, "Ihhh...Vanglaini te, Aizawl Post te...ka chhiar ve nual mai." a lo ti a. Amandai chuan, "Anih chuan tinge heng tualthahna te hi police hnenah i sawi loh?" a ti leh a. Pu Sangtea chuan, "Ahh..ihh...enge i in duh ang? Coffee emaw, Thingpui emaw?" a han ti leh daih a. Amandai chuan rum zet hian Pu Sangtea chu a melh a, "Min chhang mai rawh." ati vin hlur a.

Pu Sangtea chuan, "Ka pi, heng tualthahna te hi engmah ka hre chianglo a, nimin khan heng mitthi te hi ka customer te an ni tih ka hre ve chauh a." a ti a. Amandai chuan, "Anih leh tinge Police hnenah i report loh?" a ti leh a. Pu Sangtea chuan, "Enge ka sawi kher ang? Chubakah tualthahna tih te leh chhiatna dang dang te hi chu a thleng ve fo a, chubakah Police te bula han kal vel te kha ka peih ve vak lo a. Nupui ka nei a, ka fate an la te bawk si a.." a tih lai chuan Amandai chuan, "I dawrah hian mi engzat nge thawk?" tiin a zawt a.

Pu Sangtea chuan, "Ihh...Zualtea ania, Francisa a nia, chuan Mamuani a ni leh mai, an pathumin an nimai." a ti a. Chutih lai chuan Liantea chuan Francisa chu a lo kawm mek a. Liantea chuan, "Francis, heng mitthi pathum te hi in customer te an ni tih i hria em?" a ti a. Francisa chuan, "Aww, an vai khan ka hrevek a, mahse Nancy nen chauh khan kan inbe thin." a ti a.

Liantea chuan, "Engati nge?" tiin a han zawt leh a. Francisa chuan, "Nancy kha chu music video a neih hma pawh khan hetah hian alo kal fo thin a, chuvang chu a nia, A sawi dan chuan, angainat zawng tak ka ni tiin min hrilh thin a." a ti a. Liantea chuan, "Animaw? A ngainat zawng tak i ni amaw? Enge thildang a sawi?" a ti leh a.

Francisa chuan, "Aaa...a music career chungchang vel min sawipui thin bawk a." a ti a. Liantea chuan Mamuani chu a va pan leh a, "Mamuan, in customer te data lo khawih tu ber i ni tiraw?" a han ti a.

Mamuani chuan, "Aw ni e ka pu, kan customer te data hi, a detail kimchang thlapin nitin hian computerah ka dahlut zel thin.Hun ka neiloh chang chuan a tukah ka tih zawm leh mai thin." a ti a.

Chutih lai chuan Amandai leh Pu Sangtea te pawh chu an lo chhuak a, Amandai chuan, "Pu Sangte, i customer te record i nei ang tiraw?" a ti a. Pu Sangtea chuan, "Nei e, an address te, an hming te, an kumzat te, an lo kal hun te leh an lo kal chhan te, computer ah kan dahtha vek thin alawm." a ti a.

Amandai chuan, "Thla thum liamta a customer te record zawng zawng ka en vek duh a ni." a ti a. Pu Sangtea chuan, "Awle, a awm darh nuai a, siamrem angai a, minlo nghak lawk ru." a ti a, a roomah chuan a lut leh ta a.

Amandai chuan, "Liante, record ho chu ilo buaipui dawnnia aw." a ti a. Liantea chuan, "Tehreng mai, Ma'm." tiin alo chhang a. Amandai chu a hawi kual a, room pakhat a EYE TESTING ROOM tih inziak chu a hmu a. Amandai chuan, "Liante, ka mit hi ka'n check tir ve hrim hrim ange, ka lo let leh thuai ang." a ti a. EYE TESTING ROOM ah chuan a lut ta a.

Eye Testing room-a duty hming lo inziak chu a en a, Lallawmzuala, Zualtea tih hi alo inziak a. Amandai chuan room chhunga mipakhat, amah hnugchhawn zawnga lo ding chu a hmu a. Amandai chuan, "Zualtea i ni ang maw?" a ti a. Chupa chuan, "Aw ni e, ka pi." a ti a. Amandai chuan, "Ka mit check tir ka duh a, a theih em?" a han ti a. Chupa chuan, "Lo thu rawh." a ti a.

Room chhung chu a thim ruih mai a, chupa pawh chu a kun tlat avang chuan a hmel a hmuh hleihtheih loh a. Amandai chu a thu a, chupa chuan a mit chu khawl hmang chuan a check ta a. Chutia a mit a check tir mek lai chuan Amandai chuan, "Mi pathumte tual thihna chungchang kha i hre ve em?" a ti a. Chupa chuan, "Hre ve ang chu." tiin alo chhang mai a.

Amandai chuan, "Khang mitthi pathum te kha in customer te vek an ni si a, mak i ti ve ngawt lo maw?" a ti leh a. Chupa chuan, "Coincident mai mai niin ka hria, ka thianpa sawi dan takah, khawvela mi zawng zawng te hi chu hun hmanga khualzin vek kan ni e a tih pek kha. Ka pi, ka check zo aw.." a ti a.

Amandai chu a tho a, "Ka lawm e." tia chhuah a tum chiah chu chupa chuan, "I mit chu a tha pangngai e, 6/6 (six by six) a ni e. Mahse i khawhmu hi a tawi a, i vision a chaklo thung a ni." a ti a, Amandai chu achhuak ta a. Liantea chu lo kalin, "Ma'm, buaina a awm. Data hi vawiinah a chhuak hman lo ang an ti tlat a, floppy disk a chhia a, athara thlak a ngai an ti." a ti a.

Pu Sangtea chuan inthlahrung tak hian, "Ka pi, darkar chanve vel bak nghah a ngailo ang. Lo thu ula, kan buaipui vat ang. Chuan ihhh...ka staff te chu i kawm vek tawh em?" a ti a. Amandai chuan, "Aw..an pathumin ka kawm vek tawh." a ti a. Pu Sangtea chuan mak tih hmel tak hian, "An pathumin a? Zualtea alo kal lo vawiin chu.." a ti ta mai a.

Amandai chu a mengphawk hru mai a, "ENGA?" a ti vak a. Liantea chuan ring tak hian, "Khai awwww.." a ti vak a. Amandai chu rang em em hian Eye Testing Room ah chuan a tlan lut nghal a, Liantea pawh chuan pawnlam chu a va en nghal bawk a. Mahse room chhungah chuan tumah an lo awm tawh lo a, alo reh diak mai.

Liantea pawh chu pawnah chuan a tlanchhuak nghal a, phone a phawrh vat a. Siama a call a, "Hello, Siama, RK Opiticals ah police force ka mamawh, tunah.." a ti vak a. Amandai chuan tumah a hmuh tak siloh ah chuan thinrim tak hian a rawn chhuak a. Pu Sangtea chuan, "Ka pi, enge ni ta? Sawi dikloh ka nei em ni?" a lo ti a.

Amandai chuan, "Zualtea a lo kallo i ti tiraw?" a ti a. Pu Sangtea chuan, "Aw lo kallo, migrane a nei a, a lo kalthei lo a." a ti a. Liantea chu lo lut lehin, "Ma'm, chhuahna zawng zawng hi khar vek ila, unit dang ho te pawh ka be fel vek tawh." ati a. Amandai chuan, "Awmzia a awmlo Liante, a hmel kha ka hmu theilo a ni." a ti a.

Chutih lai chuan Amandai phone chu a rawn ri a, "Hello, enga? Awle, ka lo kal nghal." tiin a tlan chhuak nghal daih mai a. Rang takin damdawiin lam a pan a, ward pakhatah chuan a lut a. A fanu Daisy chu ake tuam bur hian a lo mu a, abulah chuan a thianpa, Dr. Joshua a lo awm ve bawk a.

Amandai chuan rang takin Daisy chu ava pan a, "Bawihi, enge awmzia, i tha maw?" a va ti a. Doctor Joshua chuan, "Hlauthawng suh, a tha e." a lo ti a. Amandai chuan, "Josh...tinge a? Enge awmzia?" a ti hu mai a. Doctor Joshua chuan, "A infiam naah a tlusual palh a, engmah a nilo, a tha vek e." a lo ti dam diai a.

Amandai chuan, "Daisy, i khawilai nge i tih nat a?" a ti a. Daisy chuan, "Ka ngal ruh hi ana deu a." a lo ti a. Doctor Joshua chuan, "Engkim a tha e, ka X-Ray zo chiah a, mahse report alo la chhuak lo deuh a." a ti a, Amandai chu a thaw huai mai a. Doctor Joshua bawk chuan, "Chuan maw Inspector zahawm, hei hi ka case a ni a, chuan he Station hi ka Station ve a nih hi." tih pah chuan a han nui huah huah a.

Daisy chuan, "Anu, ka tha tawh alawm, a na hleinem." a lo ti ve bawk a. Doctor Joshua chuan, "Ka kal phawt ange, tikhan lo awm ru." a ti a, achhuahsan ta a. Amandai chuan Daisy biang chu a chul heuh heuh a, "Ala na em, bawihte?" a han ti a. Daisy chuan, "Na tawhlove Nu, atir kha chuan a na ve deuh a." a lo ti a. Amandai chuan, "Ivan huai tawh tak...TV hi lo en la, mi ka be lawk dawn a, ka lo let leh vat ang." a ti a, a chhuahsan ta a.

Amandai chuan Liantea chu a phone a, "Hello, Liante keimah ka nia, Daisy a inhliam a, ka buaipui lawk alawm mawle." a ti a. Liantea chuan, "Ehe, a tha maw?" a rawn ti a. Amandai chuan, "A zia tawh e, record ho kha lo buaipui la, damdawiinah hian minlo pe dawnnia. Tunah aw...chuan laptop lo keng bawk ang che." a ti a, phone chu a dah ta a.

Liantea pawh chu damdawiinah chuan ava thleng ta a, ward chhung ava lut chu Amandai leh Daisy te nufa chu anlo muhil a. Liantea chuan tihbuai a hreh deuh a, dawhkanah chuan laptop leh record file te chu a dah a, a chhuahsan lehnghal a. Khua a thim tep tawh tihah chuan Daisy chu a harh a, Amandai chu kaithovin, "Nu, saw laptop leh file te saw nangma ta tur aniang." a ti a.

Amandai chu a tho a, laptop awmna lam chu ava pan a. Laptop chu a on a, chutih lai chuan Doctor Joshua a lo lut a, "Amanda, engkim a tha e. X-Ray result a lo chhuak a, engtin mah a awmlo." a ti a. Chuveleh phue zet hian Daisy chuan, "Ka dam tawh tihna mi?" tiin a tho vut a. Doctor Joshua chuan, "Khaih khaih..indim rawh, che vut vut suh." alo ti vat a.

Amandai pawh chuan, "Bawihi, khatin la che vut vut suh, i nat leh phah ange." a lo ti ve bawk a. Daisy chuan, "Anih chuan apa Joshua, kal tawh ila." a ti ringawt a. Amandai chuan hrethiamlo takin, "Khawnge in kal dawn?" alo ti hu mai a. Doctor Joshua chuan, "In inbulah khan damlo pakhat check-up tur ka nei a, Daisy hi ka rualin lo haw se ka tia. Chubakah thil lei tur a nei a, anilawm ni, Daisy?" a han ti vel a.

Daisy pawh chuan, "Ihmaw Anu, school ah kan miss ten chart-paper ah ramsa lem ziah tur an tia, water colour lei angai a, kan tihloh chuan min hrem dawn a." a ti a. Amandai chuan, "Awle atha e, Joshua...i thlah thei tak tak ang maw? Ka tibuai lutuk lo che maw?" a han ti leh a. Joshua chuan, "Tehreng mai, i duh hun hunah i lo haw dawnnia, kan kal phawt ange keini chu.." a ti a, tichuan Daisy leh Doctor Joshua te chu an kal ta a.

An kal hnu chuan Amandai pawh chuan laptop chu a khawih chhunzawm a, RK Optical customer record te chu a han enchiang a. Customer tam tak te zingah chuan mitthi pathum te hming chu a han zawng a, Nancy te, Sahid-a te leh Nunpuia te chu a indawt thlapin an hming chu alo awm a, an mit that lohdan te pawh a lo in ang chiah a ni. An pathum hian an mit hi minus 2.0 vek a ni a, an mit ang chiaha thalo, minus 2.0 ve tho pakhat chu a hnuai berah a awm a, chu chu Michael Lalhmachhuana (Mike) tih hmingpu a ni. Amandai chu anui ta var var a, "Ka man ta che." a ti sap a.

Station lamah a let leh a, Liantea bulah chuan, "Motor la chhuak rawh." a ti a. Tichuan Liantea nen chuan an tlan chhuak nghal a, an tlan pah chuan Amandai chuan, "Liante, Pu Marema leh Sawmtea te case kha titawp rawh, pawisawilo an nih kha." a ti a. Liantea chuan, "Engtin nge i hriat?" a lo ti a. Amandai chuan, "Tualthattu chu ka hre tawh a ni." a ti ta mai a.

Liantea chuan mak ti tak hian, "Engmaw? I hre tawh maw? Khami record hmang khan maw?" a ti hu mai a. Amandai chuan, "Aw ni e, mitthi pathum hming te leh tualthattu hming te kha customer 1700 te zingah ka hmuchhuak a ni. Heng customer 1700 te zingah hian Nunpuia, Nancy leh Sahid-a te hi an mit power chu minus 2.0 vek an ni a. An thihni theuh khan RK Optical ah hian an kal vek a, chutah chuan tualthattu pawh hi a awm ve a ni. A awmzia chu tualthahna thlen hma zel khan mi pakhat chu RK optical ah hian a kal ziah a, chhan tha tak vangin." a ti a.

Liantea chuan, "Ka hrethiamlo.." a lo ti a. Amandai chuan, "Customer mi 1700 te zingah khan, tualthahna a thlen ni chiah chiah zelah khan RK Optical ah hian mi pakhat chu a kal ziah a, chupa hming chu Michael Lalhmachhuana a ni. Mitthi hmasa ber kha dar 12 ah a thi a, adawt leh chu dar 3 ah, a a dawt leh chu dar 6 ah." a ti a.

Liantea chuan, "Michael-a chu mi fing tak a nih dawn chu, plan tha tak tak siam a thiam hle bawk ang." a lo ti a. Amandai chuan, "A finna kha a sualpui zawk a ni, ngaiah a nei tawh a ni." alo ti a. Liantea chuan, "Chutia ngaia a neihna chu tih chhiat sak vek ila nimai lawm." tih pah chuan a han nui sak a. Amandai chuan, "An veng hming pawh a inziak a, B-36 flat ah, 8/40 lane ah a awm a, tunah kal ang." a ti a. Liantea chuan, "Awle Ma'm." a ti a, an kal ta nghal a.

B-36 (phuahchawp) chu an thleng ta a, building bula dawr lo nghaktu vaipa bulah chuan Liantea chuan, "Hei hi B-36 building a ni em?" tiin a han zawt a. Chu vaipa chuan, "Aw ni e." tiin a lo chhang a. Liantea chuan, "8/40 lane hi khawiah ber nge a awm?" a han ti a. Chu vaipa chuan, "8/40 lane a awmlo hrim hrim, 8 block ah chuan flat 8 chiah alawm awm, number 40 a awm lo." tiin a lo chhang ta daih mai a.

Liantea chuan, "I chiang maw?" a han ti leh a. Vaipa chuan, "Kum 20 chhung ka awm tawh a, ka hre chiang khawp mai." a lo ti a. Liantea chuan, "Ma'm, engtin nge ni dawn?" a ti a. Amandai chuan, "Pawilo mai rawh se, RK Optical lam i pan leh phawt teh ang." a ti a, tichuan RK Optical lam chu an pan leh ta a.

Dawr chhung chu an lut a, dawr neitupa Pu Sangtea bulah chuan Amandai chuan, "Michael Lalhmachhua a, i hre ngai em?" ava ti a. Pu Sangtea chuan mak tih hmel tak hian, "Engmaw?" a lo ti hu a. Liantea chuan vin deuh tak hian, "Michael Lalhmachhuana chu i hre ngai em?" a lo ti hlur mai a. Pu Sangtea chuan, "Hria e, kan customer a nia, kan innel lutuk alawm." alo ti a.

Amandai chuan, "Enge a tih thin? Eng hna nge athawh?" a ti leh a. Pu Sangtea chuan, "Ka zawt ngai miahlo a, rawn kal hma deuh ula chuan ka inhmelhriat tir tur che u ania." a ti ta mai a. Amandai chuan, "Enge i sawi awmzia?" a ti a. Pu Sangtea chuan, "Nichin deuh lawk khan a chhuak chiah alawm, a rawn leng char char a." ala ti ta deuh deuh a.

Amandai leh Liantea chu an tlanchhuak nghal a, mahse awmzia a awm tawh lo. A hmel an hre bawk silo a, khawlaiah chuan mipui an tam em em mai bawk si nen. Dawr chhungah chuan an lut leh a, Amandai chuan, "Pu Sangte, in customer record bu kalo en leh lawk." a ti a. Pu Sangtea chuan record bu chu a pe a, Amandai chuan ngun tak chuan a en a.

Minute 5 vel a en kual hnuah chuan, "Liante lo kal teh, helaia hming hi...David Lalrinmawia tih hi en teh..." atih lai chuan Pu Sangtea chuan, "Davida kha kan customer hlun ania, guitaris bawn lutuk anih kha. Zanin hian Vanapa Hall ah concert an band hovin concert an nei dawn lehnghal." a ti a. Liantea chuan, "A mit power number engzat nge, in hre mial em?" a lo ti vat a.

Staff zinga mi Mamuani chuan, "Aw...2.0 aniin ka hria." a lo ti a. Amandai chuan, "Nilo, minus 2.0 zawk." alo ti a. Pu Sangtea chuan a hriatthiamloh hmel kher mai, a hawi hu mai a. Amandai bawk chuan, "Ahmasa berah dar 12, adawtah dar 3, chuan adawtah dar 6, adawt leh chu.." a tih lai chuan Liantea chuan, "Dar 9.." alo ti a.

Amandai chuan sana a en a, "A dawt leh chu Davida hi a ni..darkar khat chiah kan nei tawh. Pu Sangte, Mike-a chu i hrechiang viau em?" ati a. Pu Sangtea chuan, "Hre tehreng e, nitin deuhthaw alo kal alawm." a ti a. Amandai chuan, "A chanchin engkim ka hre duh ani, Liante...police force ko la, tin Alberta lemziak turin ko bawk la, chuan Constable Siama incharge ah dah bawk rawh. He mihringpa hi ka hmu duh a ni, a nung chung ngeiin ka hmu duh a ni." a ti a. Liantea chuan, "Awle, Ma'm." a ti a, tichuan dawr chu an chhuahsan ta a.

Dar 8:23 a ri a, concert chu neih mek a ni a. Davida te band pawh chu last item niin an perform mek a, mipui pawh an tam kher mai. Amandai te pawh chu concert-na hmunah chuan an thleng thuai a, an lo la zai mek a. Chutih lai chuan RK Optical lamah Albert-a leh Siama te pawh an va thleng a, Albert-a chuan Mike-a lem chu Pu Sangtea sawi dan ang zel chuan a ziak ta nghal char char a.

Davida chuan guitar solo a rawn nei ta, Amandai te leh Police force te chu pawnah awmin an position theuh ah an awm a. Zai lah chu a rei em em mai lehnghal, dar 9 a rik veleh tualthattu hian Davida chu a rawn that dawn niin alang a, Davida chu an veng a ni ber. Hun a kal zel a, minute 5 aliam hnu pawh chuan Davida te band chu anla zai zo ta chuanglo a, an tui chho tulh tulh zawk amaw tih tur hi ani.

Dar 9 rik nan minute 5 pawh a awm ta lo, Amandai leh Liantea chu Hall chhungah chuan pistol pai reng chung chuan an lut ta a. An zai zel a, dar 9 a ri hnai telh telh a. Amandai leh Liantea te pawh chu an in ring reng tawh a. Tichuan dar 9 chu a ri ta chiah a, zai pawh a tawp ta nghal chiah chiah mai.

Amandai leh Laintea te chu an in en hu mai a, Davida lam an va hawi a, alo la him pial mai bawk si. Tih ngaihna hrelo tak chuan an in en leh a, mak an ti hle mai. Mipui te chuan kut an beng dur dur mai a, tichuan Host chu lo kalin hun tawp a rawn siam ta a. Liantea chuan, "Ma'm, dar 9 a ri tawh." a ti a. Amandai chuan, "A theihloh Liante, thil engemaw tak chu a thleng leh ngei ang." a la ti tlat mai a.

Liantea chuan, "Mahse Ma'm.." atih lai chuan Amandai chuan, "Alo kal ang, Mike-a chu a lo kal ngei ang." ati a. Liantea chuan, "Ma'm, kan chhut dan hi a diklo pawh a ni maithei asin. Anih loh pawhin kan plan hi a hria anga, a idea a thlak daih te pawh a ni thei tho asin." a ti a. Amandai chuan, "Ni e, a nithei tho mai...nilo, a nilo ang, a ni theilo." ati bah nuai mai a, a mangang takzet a ni.

Liantea chuan, "Anih chuan engtia rei nge kan nghah dawn?" a ti a. Amandai'n a chhan hma chuan Liantea phone chu a lo ri a, second 10 vel a biak hnu chuan Liantea chuan, "Ma'm, lemziak chu zawh a ni tawh e." a ti a. Amandai chuan, "A tha e, va buaipui nghal rawh tunah." a ti a.

Liantea chu a kal ta nghal a, Amandai chuan Davida stage atanga a rawn chhuk chu a lo ti ding a. Mipui te pawh chu an haw sup sup a, mahse kawngka bulah chuan police force ho chuan hriamhrei emaw, hmanrua an pai nge pailo tih te chu a mal te te in an lo check zel a. Amandai chuan Davida bulah chuan, "Pu David, Inspector Amanda Lalrempuii ka nia. Thil ka lo zawt lawk che." a ti a.

Davida chuan, "Awle, enge ni ta?" alo ti a. Amandai chuan, "Michael Lalhmachhuana i hria em?" a han ti a. Davida chuan, "Tunge chu chu?" a lo ti hu mai a. Amandai chuan, "Khawngaihin ila haw ve theilo, lo nghak deuh hret rawh." a ti a. Davida chuan hrethiamlo tak hian, "Enga? Engvangin maw?" a ti a.

Amandai chuan, "Pu David, i nunna hi a derthawng a ni, khawngaihin zawhna min zawt tawh suh, reilote i nghah lawk a ngai." a ti a. Davida pawh chu a hlauthawng kher mai, engmah a sawi ngam tawh bawk silo a, tichuan hall chhungah chuan police venhimna hnuaiah chuan a awm ve ta reng ringawt mai a.

Liantea pawh chu RK Opticals dawrah chuan a thleng thuai a, Siama chuan lemziak chu pek pahin, "Hei le, Sir." alo ti vat a. Liantea chuan a han en vang vang a, "Pu Sangte, hepa hi Mike-a chu a ni chiang amaw?" a ti a. Pu Sangtea chuan, "Aw ni e." a lo ti a. Liantea chuan, "Ti rawh le Siama, che chhuak nghal ang le." a ti a, an chhuak ta a.

DAr 10:45 a ri a, Liantea leh Siama te chu Police Headquarter lamah chuan an kal a. An thleng chiah chu an buai nghal hle mai, police dang te pawh chuan an lo pui nghal a. Tichuan a address te chu zawngin computer chu an bial thup mai a. Michael Lalhmachhuana tih hming chu an lo tam em em mai lehnghal a. An passport size thalak theuh te nen chuan an en zel a, atawpah chuan lemziak a mi hmel ang chiah mai chu Liantea chuan a hmu ta a.

A en vang vang a, "Michael Lalhmachhuana...iva han chak dawnlo tak em." a ti nuah nuah a. A address chu a han en leh chiang a, "Ehe...zawnga mai mai chuh." a ti a, Amandai a phone nghal a. Amandai chuan, "Hello, Liante..enge chanchin?" a lo ti vat a. Liantea chuan, "Ma'm, mi phakar tak a ni. a address diktak chu kan hmu tawh e. RK Opticals customer record bu ah kha chuan 8/40 lane tiin aziak a, mahse a address diktak chu 40/8 lane zawk a ni." a ti a.

Amandai chuan, "Liante, unit 2 vel hruai la, a address chu check chiang ula, va kal rawh u." a ti a. Liantea chuan, "Ma'm, raid chu kan ti tho anga, mahse unit remkhawm turin hun kan nei tawh lo. Siama nen kan va kal mai ang, kan pahnihin." a ti a. Amandai chuan, "Awle, mahse fimkhur ru aw.." a ti a, tichuan Liantea leh Siama chu Mike-a chenna lam pan chuan an kal ta nghal a.

Dar 11:35 velah chuan Mike-a in chu an va thleng a, pawnah chuan tumah an lo awm lo a. Liantea chuan kawngka chu achhui hawng thuai a, Siama nen chuan silai kengin an lut ta a. A chhung chu a thim em em mai a, kil khata computer lo eng vet vet chu an hmu a. Liantea chuan Amandai phone nghalin, "Hello, Ma'm, tumah an awm lo." a ti a.

Liantea chuan Computer lam chu a pan a, computer screen ah chuan, "LEVEL ZAWNG ZAWNG I THLENG CHHUAK TA E, CONGRATULATION." tih hi a lo inziak a. Dawhkanah chuan present bawm hi alo awm a, "FOR INSPECTOR AMANDA LALREMPUII." tih hi alo inziak a. Liantea chuan, "Ma'm, present bawm a awm a, i hming a inziak." a ti a.

Amandai chuan, "Awle, lo la phei rawh chu present chu." a ti a, phone chu adah ta a. Police pakhat alo kal a, "Ma'm, mi pakhat alo kal ania." a ti a. Amandai chuan, "Lo kal tlang tir ru, chuan in silai kha load sa vek bawk ru." a ti a. Tichuan pawnah chuan a chhuak a, police dang te nen chuan gate chu an en thap mai a.

Mi pakhat, kum 35-40 vel niawm tak, palian angreng tak, ft 5'8 vela sang, hang lampang, hmel nelawmloh zet mai hi a lo kal phei a. Inthlahrun hmel tak hian Amandai hma takah chuan a rawn ding a, police te chuan silaiin an lo tin nghal thup mai a. Amandai chu zah hmel tak hian a melh a, "Inspector Amanda, atawp atawpah chuan, ka hmu che chu ka lawm e. Mike-a ka ni e, Michael Lalhmachhuana." tih pah chuan Amandai chu chibai a tum a, mahse Amandai erawh chuan rum zet hian a lo melh a.

Amandai chuan, "Engvanga ti nge i nih?" a ti a. Mike-a chuan, "Ka hmuh theih nan che...nang ang police inspector ah pawh hmeichhia ngat, fing leh huaisen tak. Encounter pangngai satliah nei ringawt chu anuamlo em a, chuvang chuan game ka khelh pui ta che a ni." a ti chhur chur a. A kawrhma ipte chu a zen a, chuveleh police te chu kal hnaiin silai chuan an han tin leh thup a.

Mike-a chuan meizial tlawn khat hi a rawn phawrh a, "Sikret mai mai alawm." a ti a, a nui suk a. Sikret chu a tan a, a zu khu hluah hluah a. Amandai chuan, "Mi pathum i that a, pawisawilo lehnghal." ati a. Mike-a chuan, "Ka tihpalh Inspector, mahse chhan neiin ka ti a ni." a ti a. Amandai chuan, "I thil tih hi thilsual lian tak a ni." a ti a.

Mike-a chuan, "Thilsual a? Thilsual leh thil dik sawi thei tu tur chu...sawi ngam tur khawpa huaisenna nei, zam ngailo...chuan nang aia mi fing..chutiang mi chauh chuan a sawi thei." a ti a. Amandai chuan, "I hmelma ka ni a nihte chuan, tinge ilo ka hnenah ilo kal mai loh?" tiin a zawt a. Mike-a chuan, "Ka hmelma i nilo, huatna che ka neilo. Hmuh che ka duh mai chauh ani, chubakah nang chuan eng thil pawh tih nan hun a awm tih i hriat kha." a ti a.

Amandai chuan, "Enge awmzia?" a lo ti a. Mike-a chuan, "Entirnan..Nunpuia kha, kum 36 chiah a ni a, mahse a hlawhtling em em a. Nupui hmeltha tak a nei a, an hlim dun em em bawk a. An chungchang hre tur khan hun tamtak ka hmang asin, chuan Nancy kha....an rinhlel ber chu Sawmtea kha a ni a. Tichuan Sahid-a ka thah dawn erawh kha chuan ka fimkhur khawp mai, achhan chu min chhui reng tih ka hre bawk si a. Chuvang chuan ka game khelh mek kha ka her danglam ta deuh a, tichuan min chhui reng avang khan nangmah chhui ve zel tu tur ka zawng ta a. Enge ka idea kha a an? A tha tiraw?" a han ti vel a.

Amandai chuan rum tak hian a melh a, "A tha khawp mai." a lo ti a. Mike-a chuan sawi zawm zelin, "I finna te, i thiamna te hi keichuan ka ngaisang khawp mai. Sahid-a khan a chhui reng che a, mahse amah zawk kha i chhuichhuak hmasa dawn reng tih ka hre lawk vek alawm. A hun a thleng ve ta a, ka that ta a nih kha." a ti a.

Amandai chu a ngawi reng a, Mike-a bawk chuan, "Tual ka thahna ah zawng zawng khan, min chhui zui zelna turin hnutchhiah ka nei zel a. I thil tih apiangah khan ka pui zel che asin, tual ka thah apiang khan ka thahna hmunah ngei khan evidence ka hnutchhiah zel a. Nunpuia te inah kha chuan, thlalak an tar kha ani a. Police Station duty room number hmangin i phone ah ka rawn call a, engkimah khan thil hnutchhiah ka nei zel a, mahse min chhuichhuak thei chuang silo. Achhan chu maw, i taima tawk lo a ni." a ti a.

Amandai chuan rum zet hian a melh a, "Ka hria e." Mike-a chuan, "Khang mi pathum, Nunpuia, Nancy leh Sahid-a te kha...an thih a huna an thi a nimai. Hun hi a pawimawh ber, achhan chu maw...hun hi ka thuhnuaiah ka dah a ni. Entirnan tunah pawh hian, helai hmuna i awmna chhan pawh hi ka koh vang che a ni." tih pah chuan meizial chu a paih a.

Amandai chuan, "Engvangin?" alo ti vin hlur a. Mike-a chuan, "Achhan chu he khawvelah hian ka fing ber a, ka thiam ber a ni tih i hriat ka duhvang a ni. Zanin hian Mizoram mipui zawng zawngte hian ka tha ber ani tih an hria ang, engtin nge ka fiah dawn i hre duh em? A thiam ber, Inspector fing ber leh hnuchhui lama numer one, nang..Amanda Lalrempuii hi ka hneh che anga, tichuan a tha ber ka ni tih a chiang ang." ati a.

Amandai chu a nui suk a, "Engtin maw i sawi a?" a ti a. Mike-a chuan, "Enteh, sawi tak ang khan nangnen hian inhuatna kan nei hran lo, ka hmelma i nilo bawk. Mizoram Inspector tha ber anga an sawi nena game khelh dun ka chak mai a ni e, tunah pawh hian hetah hian ka ko che a, he round pawh hi ka chak leh ta a ni." a ti a.

Amandai chuan DAvida chu a va en a, "A pawi khawp mai, Mike. He round hi chu i chak ta lo a ni, i game khelh chu a tawp tawh e. Ka hmaah i ding a, i thil tihsual i puang a, chu chu point khatna a ni. Point hnihna chu maw..." a tih lai chuan Liantea leh Siama te pawh an rawn thleng ta a. Mike-a chuan, "Liante, minute 2 velin i rawn tlai ania. Chuan present bawm kha ilo ken avangin ka lawm e, chuan Amanda...enge i sawi lai khah?" a lo ti vel a.

Amandai chuan, "Point hnihna chu maw...helai hmunah hian dar 9 ah lo thleng tur i ni a, mahse tunah chuan dar 9 a pel vang vang tawh, nang erawh chu.." a tih lai chuan Mike-a chuan, "Ka game a ni a, i hrethiamlo ang." a lo ti a. Amandai chuan, "Game over...a tawp tawh." a ti a. Mike-a chuan, "Lawk aw...mi pathum nilovin, mi 5 zawk. Mi panga ka that angah min ngai rawh, Inspector Amanda." a ti a.

Amandai chuan, "Mi panga a? Nang leh kei hi kan tel ve dawn i tihna em ni? Ni lul love Mike, heng police force te hi min that tur nilovin min venghim tura heta duty an ni." a ti a. Mike-a chuan, "Inspector Amanda, min hneh lo a ni. I mit khan i hmaah ka ding mek a ni tih a hmuh tir che a, mahse a bum tel che a ni. Ka hrilh che kha, mi mit chu a tha, 6/6 a ni. Mahse i khawhmuh a tawi a, i vision chu a chhia ka tih kha." a ti a.

Chutih lai chuan Liantea phone a lo ri a, Mike-a chuan, "Liante, i phone a ri ania." a lo ti leh zung zung a. Liantea chuan phone chu a la a, hmundangah chuan ava bia a. Mike-a bawk chuan, "Amanda, tual ka thah leh hun tur chu ka hriattir ngei che a, zanin dar 9 a ni. Mahse a hmun erawh i vision tawi lutuk vang khan i hre lo thung a ni." a ti a.

Amandai chuan present bawm chu a hawng a, Mike-a chuan, "RK Optical ah khan mit thalo dang pakhat in entir ve a awm a, minus 2.0 tho a ni. Register kha chu en vek mah la, i enkim lo a ni." a ti a, a faifuk rat rat a, a tarmit a la chhuak a, a vuah a. Amandai chuan present bawm chu a hawng thei ta a, achhungah chuan tarmit hi a lo awm a. Mike-a chu a nui suk a, "DAISY...i fanu." a ti ta mai a.

Amandai chu a meng phawk chiang ngei mai, "ENGA?" a ti vak a. Mike-a chuan, "Vawiin tlai khan tarmit rawn lam turin i thianpa Doctor Joshua nen dawrah khan an lo kal a, mahse i hrelo a ni." a ti a. Amandai chu a khawng nghal vek a, tarmit chu a thlauh a. A thingthi hnawk a, a mittui a luang nghal zawih zawih mai.

Liantea chu a lo phei vat a, Mike-a bawk chuan, "Naupang hmeltha tak a ni, chutah pawh Police Inspector fanu ngat lehnghal. Daisy..fanu tha ber a ni hial ang chu." a ti a, a nui ver ver a. Amandai chu a tap vak vak a, a khur nghal char char bawk. Mike-a chuan, "KA tihpalh a ni, apawi ka ti." a ti thawp sat a. Amandai chu a ding a, silai phawrhin Mike-a chu a tin a.

Liantea chuan lo dang vatin, "Nilo...nilo, that suh, kap suh. Madam, hei hi alawm a duh chu. Nang aiin a tha zawk a ni tih hi faih aduh a, a duh tih hlawhtlinsak suh." ati a, Amandai chu a au vak vak a, a t(r)e vak vak a ni ber mai. Mike-a bawk chuan, "Daisy chuan anu in a rawn chhan a beisei ngei awm si a, mahse tunah chuan a thi tawh ngei ang. AWww..he khawvel hi chu, Daisy thlarau pawh a hrilhhai khawp ang le, anu berin a ngaihthah ta mai chu a ni si a." a ti vawg vawng mai a.

Hnuglam atang chuan tu emaw ni hian, "Khai a...kum 6 chauh ala ni a, thih tir hma iva tum ve.." a rawn ti a. Gate bul anva en chu Amandai senior, Deputy Commissioner of Police, Nathan Malsawmkima a lo ni a, a police form ngei mai hain DAisy chu a lo pawm a. Nathana bawk chuan, "Ti rawh le, Daisy..Anu bulah sawn va kal rawh le." a ti a, Daisy chu tlan pheiin Amandai chu a va kuah a.

Amandai chuan, "Ka fanu, bawihte...i tha em? I tha tiraw?" a ti chel chul mai a. Mike-a chu a hrilhhai kher mai, "Eng..enge awmzia?" ati hu mai a. Nathana chuan, "Lawk aw, ka pheikhawk hrui hi a inphelh a, lo nghak lawk rawh." a han ti te te a, tichuan a suih tha a, alo phei ta a. A rawn phei pah chuan Mike-a tukhumah chuan a han beng bulawp mai a, "Ve lutuk a, nanga game ve mai mai, Carrom ai pawhin a awl zawk." a rawn ti phei nuah nuah a.

Liantea chuan, "Sir, enge awmzia?" a ti hu a. Nathana chuan, "Ka thleng tlai hman teuh khawp mai, he mihring hi Amandai te inah dar 8:30 vela a phei lai kha ka hmu a. Vawiin tlaiah ka zin ka rawn haw a, tichuan Daisy thil ka hawnsak a, pe turin ka kal a. Mahse hepa hi ka hmu a, ka ringhlel a, Amandai te ina a lut chiah kha alo chhuak lehnghal a. Ka va lut chu Amandai nu a lo phuarbet a, Daisy lah a roomah chilphuan tla buah buahin alo awm bawk a." a ti a.

Mike-a chuan, "Mahse..engtin nge.." ati dek dek chu Nathana chuan a hnek pawp mai a, "DCP ka nih hi, DCP tawng lai chuan misual te chu an lo ngawi thap thin aw.." a han ti a. Tichuan a sawi chhunzawm zel a, "Tichuan Daisy chu Hospital ah ka hruai a, damdawi alo ei luih tir alawm le. Mahse Doctor Samuela alo awm hlauh a, a damdawi pek la kha, ala expire zui." tih pah chuan a han nui zeuh phawt a.

Amandai chuan, "Sir, engmah awmzia ka hrelo." ati a. Nathana chuan, "Thil awmzia chu maw...hepa hi mi chapo leh misual tak a ni. Kum 2008 khan Mizoram Police Service Examination ah interview te, exam na apiangah pakhatna i ni ziah a. Amanda, nang tluka thiam kha an awm ngailo, khatih hunlai khan ka la hre ngailo che a, mahse kan DGP boral ta Pu Sangliana khan min hrilh thin a ni. Mahse batch dangah khan he mihringpa Mike-a hi a rawn awm thar ve a, nang aiin a ti tha char char zel. Mahse Police Inspector a ni ve theilo, achhan chu medical report ah a tla zel a ni. Achhan chu a mit power hi ahniam em em a, minus 2.0 a ni. Exam naa a topper a nih vek hnuah pawh paih chhuah a ni a, a mit thatloh vang a ni." a ti a.

Mike-a chuan tap tep hian, "Ka lo dream ve thin te, ka lo suangtuah ve thinte chu a tawp nghal vek asin. Damchhan ka nei tawh lo, ka chhe vek a ni." a ti hluam hluam a. Amandai chuan rum tak hian mittui tling teuh chung chuan a melh a, "Police Inspector ah i kaisan ve theihloh avangin tual i that ta mai amaw?" a ti a. Mike-a chuan, "Tun thleng hian a tha ber chu kei hi ka ni." a la ti hram a. Nathana chuan a han beng leh hrep a, "Zaktheilo lutuk, i hmaah DCP Nathan Malsawmkima ka ding reng a, chuti chung chuan a tha ber ka ni e, ila ti ngam amaw?" a lo ti hrep a.

Liantea chuan, "Engmah sawi angai tawhlo, hepa hi man rawh u." a ti a, police force ho chuan an man ta a, jail lamah an phur liam ta a. Amandai chuan tap chungin Nathana chu a kuah ta ringawt mai a, "Sir, ka lawm e aw...ka lawm takzet." a ti a. Nathana chuan, "A tawk e, engkim a tha tawh e. Amanda, i thawk tha lutuk ania, ka chhuang takzet che. Chuan maw, case a zo tawh bawk a, ASP ini tawh dawn nia." a ti a, a nui var var a.

Nathana car chhung atang bawk chuan tu emawni hian, "Hei...a theihloh...Amandai te chu ka thunuaiah a awm reng tur a ni." a rawn ti lauh lauh a. Amandai chu a va hawi phei a, motor atang chuan kan tlangval Senior rorum em em, Assistan Superintendent of Police, Lalbialnu nei em em-a, Lalrinawma ngei mai chu a lo chhuak a. Amandai chuan nui chungin a va pan a, an inkuah a.

Amandai chuan, "Ni e, promotion ka duhlo, Inspector nih reng mai ka duh.." a ti a. Nathana chuan, "Umm...lo kal ru, Hospitalah kal leh ang u, Daisy hi ala dam chianglo a, a dam ngei ani tih proof nan ka rawn hruai mai mai a nih hi. Doctor Joshua-a'n min hauh hmain, i kal vat teh ang u." a ti a, chulai hmun chu an chhuah san ta a.

A TAWP TA