STUDY CAMP-NA AH!!!

STUDY CAMP-NA AH!!!

Ziaktu : Aaron Malsawmdawngzuala

**********

Private school pakhat ah zirtirtu hna ka thawk ve a, Maths subject ka la a. Ka thawhna school hi alian lem lova, compund pawh a zim angreng hle. High School a nih angin class 9 leh 10 chiah zirlai naupang kan nei a, an vai hian zirlai zawng zawng te hi 70 vel an ni ang. Class 10 bik te hi zirlai 45 vel an ni a, kumtawp September thla vel atangin study camp kan neihpui thin a ni. Hostel a awmlo a, sawi tawh ang khan school compund leh building te alian lem lo bawk a, kan Principal hian Hostel siam chu tul a ti lemlo  ani ngei ang. 

Ahma pawhin Study camp naah hian naupang te hi ka riahpui ve fo thin a, thil danglam engvak ka tawk ngai lemlo. Zanrei tawh lamah zurui ho intibuaiin an rak leh chiam thin a, achang leh inngaizawng ten kan school bul lawk step ah chance an rawn nei ve leh zeuh zel a, chubak chu buaina em em kan tawng ngai lemlo. Naupang te hi anmahni class roomah kan mut tir mai thin a, a riahpuitu zirtirtu te erawh office ah kan riak mai thin. 

Zantin hian zirtirtu pakhat te te in kan inriah chhawk thin a, kei erawh pasal la nei ve lo leh zan lama nula awm awl ve tak ka lo ni bawk nen, achang chuan kar khatah vawi hni/vawi thum te min riah tir bik thin. Ka sawisel ngai lemlo a, ka hah phah em em chuang hlei lo bawk a. Chubakah naupang fel tak tak te an ni hlawm a, han ven em em pawh an ngai hran lo. Mipa thenkhat meizial zuru ka man zeuh zeuh a, chutiang tihloh chu han khak deuh ngai emaw, han inla ngeng fal emaw pawh an awm ngailo.

September thla chu kan lo chuang kai leh ta a, naupangte pawh study camp nei turin an rawn inpu lut leh ta sup sup mai. Tuntum pawl 10 zirlai te phei hi chu kum dang zawng ami te ai khan an fel fal bik larh emaw tih mai tur a ni, a hmei apa in lehkha an thiam thei em em a, han tichhe fal em em pawh an awm ngailo. 

Pahnih pathum vel chu loh theihlohvin tlem chuan an nghal deuh bik a, mahse kum danga mi te ang em em a thiamtheilo leh thuawihlo chu an ni bik chuanglo. Zankhatnaah erawh kan Sir Mapuia'n a riahpui a, zanhnihna ah ka riahpui ve ta thung a. Ka riahpui zan hian rinloh takin ruah a sur nasa em em a, "Khaw enlaia khua a that tehreng nen, ka va han riak peihlo tak." ti nuah nuah chung chuan nihliap nen chuan zan dar 7 rik hma hret chuan kan in chu ka chhuahsan ve ta a. School chu ka thleng a, ka inthlak fel hnuah chuan dar 7 a ri ta a. 

Devotion te neihpuiin tawngtaina te ka han hmang a, tichuan dar 7:30 rik nan minute 10 vel ala awma, "Dar 7:30 rik veleh in lehkha zirna hmun theuh pan nghal ang che u." ka ti a, tichuan Office ah lutin ka inthiar a. Hmeichhe ho hi class 9 room ah an riak thin a, mipa te erawh class 10 room ah an riak thin thung. Ruahsur pawh a bang ta a, ka inthiar zo chu Office bathroom-a tui a tlem em avang chuan tui khai tur chuan pawna student toilet bula barrel lam chu ka va pan a. Ka thleng tep tawh tihah chuan current a rawn thim ta thut mai. Student te han khai tir mai pawh thil awlsam tak ni viau mahse a harsa lemlo bawk a, zandangah pawh Office bathroom tui tur chu keimah hian ka khai mai thin.

Chutia current a rawn thim takah chuan Office ah ka let leh a, bati te chu lakhawmin zirlaite chu a sem kual a, ka chhit en sak zawh vek hnuah chuan tui khai tur bawk chuan ka chhuak leh ta a. Classroom atanga kan school Barrel awmna hi ahla em emlo nangin, current a thim hi chuan light tello chuan a hmuhthat theih loh thin hle mai a. 

Ka phone light chu a han on a, tichuan tui dawh tur chuan ka phei zel a. Tui chu ka dawh ta a, chutia tui ka dawh laia phone ka khawi mual mual lai chuan toilet hnunga phun ri bul bul hi ka hre ta a, mipa ho meizial zuru bawk an nih ringin thinrim deuh tak chuan ka va pan phei a. Mahse ka rinloh tak maiin ka student te zinga thiam thei ber leh term exam tina pakhtna hauh char char thin, Zodinsangi alo ni reng mai. 

Mak ti tak chuan, "Ehe, Zodin, enge i tih a?" ka ti a, mahse min chhang miahlo. Zunin bang chu a en reng a, a mit a khap miahlo lehnghal. Ka va pan hnai lehdeuh a, "Enge i tih ka tih chu...lehkha zir a hun tawh, class room ah phei vat rawh." vin lek lek chuan ka han ti a, mahse min chhang chuang lo. Ka thin a rim deuh ta a, "Zodinsang, ka tawng chu i hria em?" ka han ti vin tuar a, chutah zawimuang hian a rawn hawi a, min melh ta run mai. Thla eng hnuaia inhmachhawn kan ni a, a hmel chu a lang chiang em em lo a, chubakah amah Zodini hi a ngo vak lo hrim hrim bawk. 

Ngawi reng chuan min melh a, enge pawh ka hrelo, ka hlau deuh ta tlat mai. Hmeichhia ka nih vang hrim hrim pawh a niange, Zodini chuan mi rap riau mai a, "Phei vat ang che." ka ti leh ringawt a, tichuan ka tui dawhna lamah chuan ka let san ta a. Ka tui dawh pawh chu  alo liam zawih zawih tawh a, tichuan Office bathroom lamah chuan ka khai phei ta a.

Ka ngaih a thalo angreng hle mai a, ka tlawmngai deuh bawk nen, toilet lam pan chuan ka kal leh ta ngat a. Kan Sir Mapuia'n zirlaite eu zawk zawk khawpa a hlap thinna tiang, ama siam tir ngei mai keng chuan Zodini chu va tihthaih ve deuh ka tum a. Phone light chu on engin toilet lam ka va pan leh tur chiah chu barrel bulah zawk chuan ngil at hian a lo ding run mai, ka phu chiang lutuk chu ka tawlh hnug dawr thei hial. Hemi zan hian devotion naah pawh khan ka hmu a, Zodini hian jumper var, lukhum nei hi a ha, alukhum chu a khum reng bawk. 

Barrel bula ding pawh chu Zodini ngei a ni, an inchei dan pawh a in ang vek. Mahse hetiang hian a awm ngailo a, naupang fel leh ngawichawi tak, innocent tak a ni. Mahse tuna Zodini ka hmuh hi chuan min ti hlau tlat mai, jumper lukhum chu khumin hnuailam a melh reng a. A dawih chi hrim hrim ka lo ni bawk nen, ka va pan hnai ngam mai lo. Mipa ho han koh mai lah chu ka inthlahrung ve deuh a, dawih min tih ka hlau bawk si. Zawimuang chuan ka han pan hnai hret hret a, "Zodin, enge ila tih." ka han ti khur dar dar a. Ahma ang bawk chuan a ngawi reng a, min chhang chuang lo. Tichuan keipawh chu ka ngawi reng a, a hmel han enchiang dawn ila a kun reng mai si. Ka biak lahin min chhang duh bawk silo, ka thlan a tla zawih zawih mai. 

Chuveleh class room lam atanga darthlalang keh ri niawm tak hi a rawn ri chhuai mai a, ka va phu nasa teh kher em. Zodini pawh chu ala ding reng a, mahse classroom lam chu ka pan ta zawk a. Hmeichhe hovin class room bula filter no chu an lo ti tla palh hi a lo ni a. An han insawi thiam nghal zung zung hlawm a, mahse kei rawh chuan ka ngaihsak lo. Achhan chu thil mak em em ka hmu tlat a ni, Zodinsangi, nichin lawka barrel bula ngawi renga lo ding run mai kha, classroom ah chuan bati hnuaiah a zirlai chu alo chhiar melh melh mai. Mak ka ti lutuk chu hmeichhe dang hovin min biakna pawh chu ka chhang lo, Zodini chu ka en tlawk tlawk mai.

Ka va pan hnai a, thinrim tak hian, "Zodinsang, engvangin nge nichin khan ka biak che a, min chhan duh miahloh a?" ka va ti thawr mai a. Zodini chuan hrilhhai hmel zet hian min rawn melh a, "Miss, engtikah maw?" a lo ti hu mai. A tider anih te ka ring hial tawh zawk a, "I hrelo amaw? Nichin lawkah zunin bulah ka biak mawlh mawlh che kha." ka han ti leh a. Zodini chu a nui suk ringawt a, "A awihawmloh e, Miss...zuninah ka kal lo hrim hrim." a ti a. Abula thu Sangtei pawh chuan, "Miss, Zodini te hi chu devotion zawh hnu khan ka bulah a awm char char alawm, khawiah mah kan la kalsawn lo hrim hrim." a lo ti ve bawk a. Mak ka ti lutuk chu ka ka hau mai a, hlauhna in ka khat nghal. Zodini bawk chuan, "Ngatinge Miss, tinge min zawh a?" a ti a. 

Ka thilhmuh te kha ka sawi chuan an hlau ang tih ka hlau bawk sia, "Aaa..ihh, mipa hovin min tihthaih a niang." tiin zalo deuh chuan ka nui suk a, Office lam ka pan leh ta nghal a. Zirlaite lehkha zir pawh chu ka veng mang lo, ka rilru ah chuan Zodinsangi ringawt chu a awm a. Ka ngaih a thalo talzet, a khat tawk chuan ka va en leh zeuh zeuh thin a. Ani lah chuan ngaihthat hmel tak hian a chhiar mual mual reng mai si, Office-a mahnia mut tawp mai chu ka ngam dawn amawni aw te ka ti hial a ni. Dar 12 a lo ri a, zirlaite pawh chu ka mut tir ta hlawm a. Ngai ngam zan lo chuan ka mu ve ta a, ka mitthla ah chuan Zodini ringawt chu a awm a. Eng vak chu ka tawng zui ta lemlo, hriatloh hlanin keipawh chu ka lo muhil ve ta ani ngei ang. Hmeichhe riahna lam atanga au tuar ri chuan min ti harh chiang ngang mai, ka thu chhuak hlawl thei hial a. Office room light chu off lovin ka lo dah hi alo ni a, current a lo awm tawh ani ngei ang, a eng pup mai. Rang tak chuan ka tho chhuak a, hmeichhe riahna lam chu ka pan nghal a. 

Room chhung ka va luh chuan hmeichhei ho chu kil khatah an lo tawm khawm vek a, Sangtei chuan hlauh hmel tak hian, "Miss...Zo..Zodini saw.." tih pah chuan a hma zawn chu a kawk a. Ka va hawi phei chu Zodini, enge maw ni sawi niawm taka lo thu chunga lo phun bul bul chu ka hmu a, a lu a bu ngut ngut lehnghal. An mahni vengtu tura riahpui kha ka ni maiu a, phur fahran lo chuan Zodini awmna lam chu ka va pan phei a. Zodini chu a phun malwh mawlh a, enge a sawi phei chu ka hre hauh lo. Muang chang chuan ka va pan a, lehkha chhiar niawm tak hian a lo phun sep sep mai a. Hlau deuh tak chuan, "Zodin i tha maw?" ka va ti a, mahse min chhang lo, ala phun mawlh mawlh mai. Chiang deuh zawka ka han ngaihthlak chuan a thil sawi chu an lehkha zirlai mek ni awm tak a ni, lehkha zir a, note book chhiar niawm tak chuan a lu buk lawp lawp pah chuan  aphun char char a.

Hmeichhe dang ho bulah chuan nui lui tih hrait tak hian, "Hlau suh u, a tho a anih hi. A mumangah lehkha ala zir a ni ngei ang, mu leh tawh rawh u." ka ti a. Hreh hmel tak chuan an mutna theuh ah chuan an rawn let leh a, an in melh hrek hrek hlawm a. Zodini hi a kil bera mu a ni a, a bul chiah ah hian a thiannu Sangtei a mu a ni. Zodini pawh chu zawi muang chuan kan mut riai riai a, pangngai tak chuan a mu vel leh mai a. A mu chiah chu  ahnar nghal suk suk mai a, keipawh chu ka thaw huai mai. Sangtei bulah chuan, "Sangte, engthil nge thleng a?" tiin ka han zawt a. 

Sangtei chuan, "Ihmaw Miss, ka muhil tep tawh tih ah Zodini hi a rawn phun bul bul a, min bia emaw tiin ka va chhang a. Mahse a tho thut a, tichuan a lu a bu ta ngeu ngut a. Tichuan a akhur nghal chur chur a, ka hlau lutuk chu ka au vak a, ak zuangtho nghal a. Ka thawm chu hriain mindang ho pawh anlo harh a, Zodini awmdan an hmu ve a, an hlau a, kan harh ta vek a ni." a han ti hluam hluam a. Ngaih tha chiahlo mah ila ka hnem hram hram a, "Engmah a nilo, lehkha a zir nasa lutuk aniang, hlau suh u. A mumang thleng thlengin lehkha a zir a nih ngei dawn hi, keipawh hetiang hian ka tho a ve fo alawm." tiin dawt te ka han sawi ta ringawt a. Office lam pan chuan ka kalsan leh ta a, office bulah chuan mipa ho pawh anlo ding thap mai, kan thawm kha an hre ve ngei ni tur a ni. 

Mak tih hmel deuh hian minlo en hu hlawm a, an zinga mi Muanawma chuan, "Tinge Miss? Hmeichhe ho au vak vak kha kan lo hria a, enge thleng a?" a rawn ti a. Zalo deuh chuan ka nui a, "Engmah a nilo, Zodini a tho a alawm mawle, an hlau a nih kha...va mu ru, naktuk zingah thawh hma  angai a nia." ka ti a, anni pawh chu an let ve leh ta mai bawk a. Hemi zan hian ka mulo chu a ni ber e, ka rilru ah Zodini ringawt chu a awm a. Lehkha zir hma lawka toilet bula ngawi renga a lo ding ringawt te, chumi hnu lawka class room-a ka hmu leh nghal ngawt si te. Ka ngaihtuahna a buai kher mai, ka thil hmuh kha Zodini nge ni anga, a damlai thla zawk ni ang tiin keimah leh keimah chu ka inzawt mawlh mawlh a. Hnuailam melh remg chunga ka hma zawna ding kha a inchei dan zawng zawng nen Zodini a ni tih ka chiang, chumai nilovin thla eng hnuaiah khan a hmel kha chianglo takin ka hmu ngei  ani. Min tihthaih ni ta se, engtin nge class roomah khan a lo awm lehnghal theih? Ka luh dawn pawh khan ka hmaah khan a la ding reng a ni si a. Chumai nilovin a thiannu Sangtei khan Devotion zawh veleh a,a bula a awm char char thu kha a sawi bawk si. Ka tlaivar ta thak a, minute tlem te chu ka lo chhingve sek pawh a ni mahna.

Atuk zingah chuan dar 5 velah ka kaitho hlawm a, lehkha zir chu an tan leh ta a. Mahse kei erawh chu ka rilru a nuam thei hlawl lo, a khat tawk chuan Zodini chu ka va melh leh zeuh zeuh thin a. Ka ngaih a ti thalo takzet, a zawi vek a, a damlo a ang hle bawk. A chauh hmel em em a, a hmel chu a dang vek a ni ber mai. Sunday ah hi chuan an in lamah kan riah tir ve thung thin a, hemi zing hi Sunday zing a ni nghe nghe. Zodini awmdan chuan min ti nuamlo hle a, a tawp atawpah chuan ka va pan ta a. 

Abulah chuan thu in, "Tinge Zodin, i nuamlo em ni?" ka va ti a. Zodini chuan chauh hmel tak hian, "Miss, ka lu ana lutuk, ka luak a chhuak bawk si." alo ti a. Ka kai tho a, "Haw mai rawh, nangmahin i haw thei angem?" ka ti a. Zodini chuan, "Ka hrelo, ka lu a hai lutuk, a hrehawm lutuk." tap tuau chuan a ti a. A nu leh pate chu ka call ta ringawt a, minute 10 vel hnuah chuan a pa lo kalin Zodini chu a rawn hruai haw ta a ni. Hemi ni hian chawhma chhung zawng chu rilru nuamlo tak chuan ka awm a, ka rilru ah Zodini hlir chu a awm a. Dar 2 velah chuan kan Principal hnen atangin call ka dawng a, ka thu hriat chuan min va thawng tak em. Principal chuan, "Zodini a boral." a rawn ti ta mai a. A boral chhan an sawi lah chu khawsik sang thut tih ringawt a ni a, mahse chhan dang a awm ka ring tlat a ni.

 Ka ngaihtuah let a, ahma zana ka thil tawn te, zanlaia khatia Zodini tho a thut te kha ka hrechhuak a, ka thau ah min man a, hlauhna hlirin ka khat a ni. A chhungte lah chuan ahmain natna aneih awm ang engmah an hre silo, mi hrisel tak a ni a,chutia a khawsik rawn sang thut mai leh, a thihpui ta hial mai chu thil mak tak zawng a ni. Zodini thih hnu hian ka chungah engthil hlauhawm mah chu thleng zui lemlo mahse, mi ti dawih em em a. Zantin mai hian ka mumangah ka hmu bawk a, thlamuangin min awm tir theilo chu  a ni ber e. Ka thil tawn te hi a hlauhawm viau em tih chu ka hrelo na a, mahse mak ka tih em avang leh, tun thlenga thlamuang taka min muttir theilo tu a la nih avangin ka rawn sawi chhuak ve a ni e. Zodini kha lehkha thiam thei tak a ni a, class 9 a rawn luh atang khan term exam apiangah pakhatna a ni char char a. A rilru achakin ka subject lak, Mathematics phei chu a man chak ber a ni hial ang. Hetia hunlo taka min boral san ta mai hi a ka ui em em a, a tuarna ber pawl pawh ka ni ta ve ang.

Zodini thih hnu hian zirlai te pawh ka riahpui loh theihlohvin ka riahpui leh ta tho a, mahse engvak chu kan tawng tawh chuang lemlo. Mahse ka dawih phah em em a, mahnia mut pawh a huphurh awm thin kher mai. In lamah chuan ka nau bulah ka mu ta mai thin a, mahse study camp naah erawh mahni student te bula va mut ve rikngawt thu awm suh, hlau chung chungin ka riak thin a ni. Teacher dangte bulah erawh ka sawi lemlo a, chubakah an lo awihlo ang tih ka hlau ve tho bawk si a. Tun thleng pawh hian ka rilru ah Zodini hlir kha ala awm a, ui viau mah ila, tun thleng hian thlamuang takin minla muttir theilo a ni.