NATHAN (Episode - 2)

NATHAN (Episode - 2)
(Who is she?)

[Some of this story plot is copied from the 2005 Indian Tamil-language horror film ‘Chandramukhi’]

(Ahma khan thla khatah vawi 3 ka ti takzet naa, ka story hi a hlut loh phah dawn niin ka hriat avangin kar khatah vawi khat zawkin ka tichhuak tawh ang. Mahse college zirlai te kan la ni ve si a, rei tak chhung break ka neih ve te a ngai dawn si a, chhiar tute minlo hrethiam dawnnia.)


Nizan lamah ka thawk hah deuh nge ka mutui deuh aniang, ka kawngka kik dat dat ri chu ka mang hriat ruai ruai a, mut la khamlo nen, hah nen, ninawm lutuk...

"Enge ka nuuuu??"

"I nu ka ni lo...lo hawng vat teh."

"Tunge?"

"ACP Bajirao Singham ka nih hi.."

Khai aww...inla ACP lutuk mai tih rilru pah chuan ka va hawng a, Nathana chu a rawn lut tlang nghal a. "Enge ni ta?" ka lo ti deuh haw a..

"Rinte, mi bo case ania, ahma in i khawih tawh ngai em?"

"Kum engemaw zat Police ka ni ve a, vawitam ka chingfel ve tawh ang chu mawle."

"Chuvang renga ka zawh che, chhan chu mibo kher hi chu ka peihloh zawng tak ania."

"Kidnap pawh nihlei nem..."

"Kidnap te chu a awlsam daih zawk alawm, pawisa min dil anga, anihloh chuan an kidnap-a te chhungte bulah an kidnap a kha thah ah an vau anga. Pawisa inpekna hmun tur an sawi anga, anva pe anga, chuveleh hnunglam atangin emaw kan va man anga..chuzawng chu. Mahse mibo pangngai, kidnap pawh nilo te chu ramhnuaiah uisathiam nen tihvel kha angai anga.."

"Boss..boss..boss, haha atawk e, chutiang angai nang, kan ti dun anga, a fel leh vek mai ang."

"Khawi aww, Rintea nge nge, nihleh Station ah inhmu ang aw.."

Station ah chuan kan pute nen kan inbe fel a, mibo chhungte chu kan ko ta a. A ngai te bawkin zawhna inzawt tan leh ang aw... Nathana chuan a style pangngai ang bawkin pa ber atangin a zawt leh ta a.

"Pu Ram, i fapa a bo ani a, hei nupui anei lehnghal bawk si a, abuaithlak ngawt ang tih chu ka hria. Mahse a awmna chin kan hriat angai si a, chuvangin ngaihloh lamah lo ngailo la, inchhungkua ah hian han rinhlelh deuhte i nei em?"

"Aih rinhlelh tur an awmin ka hrelo, chutiang thil tiduh kan awmlo."

"Anih leh a bo hma khan amizia te a inthlak em, rilru hah hmel te a pu thin em? Inchhungkua in buaina te in tawk hrim hrim em?"

"Abo hma thla hmasa vel atang khan an nu nen hian an inhau a, annu hi a vin hrep hrep zel a, thil awmzia zawh lahin nupa inhau satliah ve mai ani tiin min chhang zel a, kan monu kan zawh lahin kan inhau lo a ti tlat zel bawk sia, angaihna ka hre biklo."

"Nihleh zu te a in thin em? Buaina siam chang a nei em?"

"Chutiang i sawi takah chuan hmanni khan a rawn nam ve deuh a. Ka fapa hian zu a in ngai miahlo a, mahse khami zan a office bang kha chu a nam chiang alawm. An nupa in an inhau leh a, kut inthlak ri kan hre leh bawk a, va luh kan tum lahin an kalh daih sia, an tawng ri hriat ahar si a, atukah chuan kan monu Tluangi chu a mit a duk deuh a, ka fapa bulah kut i thlak ami ka tihin amah kha zawt mai rawh min ti a, Tluangi lahin engmah hrelo ang maiin engtik laia duk nge ka hrelo a ti zel bawk sia, angaihna kan hre biklo."

"Ka pu Tluangi chuan engemaw tal hriat anei ang, ka ring tlat, in zawt lo ami?"

"Kan zawt alawm, mahse angaihna a hre biklo. Intihbuaina kan neilo a ti zel bawk si a, a rilru ahah ve ngang aniang, a en ngai a en vung vung a, hrehawm a tih hmel thei khawp mai."

“I kal thei e...”

Pa ber a kal hnu chuan keichuan, “Sir, a nupui Tluangi chu ka ringhlel deuh tlat mai, a sawidan hmang khan..” ka lo ti a, Nathana chuan awlsam te hian, “Amak thin e aw...midang kan zawt leh phawt ang chu..kan chhui dawn chauh alawm mawle, lo nghak ve thin teh..” min ti a, min van chhang hlawk thei tak em. A dawtah chuan an nu ber chu kan ko leh a.

“Ka pi i fapa hi engtia bo nge ni hrim hrim a?”

“A nupui nena an inhauh vak zan khan a chhuak tau a, kan monu kan zawh lah hian amah in a thinrim ringawt anih kha a tizel bawk sia. Nidangah pawh an inhauh apiangin achhan an sawi duhlo ve ve a, keini tan tihngaihna avang thin lutuk. Chumi zan chuan alo haw ta miah lova, kan monu pawh chu rilru hah hmel pawh a pulo, ka thinrim lek lek zawk a, kan zawh kan zawh pawhin ka hrebiklo a ti zel sia. Tichuan a tuk zingah pawh alola haw lova, kan phone lahin a phone alo kenglo bawk nen, athiante zawng zawng kan phone pawhin a awmna chin hria tumah an awm silo kan mangang lutuk ringawt. Ni 3 lai alo haw tak loh ah chuan kan rawn report tawp a ni.”

“Khai aww..ka pi, inva rawn report tlai em em ve a, tiang te chuan thil pawi dang alo thleng hman tawh thei asin..”

“Awii Lalpa, ka fapa chungah chuan thil thalo a thleng lovang tiraw?”

“Nilo...nilo..ka pi tap suh, theihtawp kan chhuah dawn alawm...kal tawh rawh le.”

Nu ber a kal hnu chuan an monu ringawt chu ka rilru ah a awm a, amah chu ka ringhlel em em ringawt mai a. Chutia ka rilru a alo awm lai tak chuan a rawn lut a.

“Ka pi..”

“Nilo nilo...Tluangi min ti ula a tawk mai, ka pi min ti duh su.” (A thawveng em em lehnghal.)

“Aa...animaw, nihleh Tluangi, i pasal hi a awmna awm ang i hre thei angem?”

“Ka pu, engtin nge ka hriat ang. Thil ho te vangin kan inhau a, a titau a achhuak daih a, alo let ve leh mai ka ring a, mahse alo let silo a, tiang em em a alaknat ka ringlo a, ka lo tawng hnem deuh aniang.”

“Anih chu...ih ka pi..oh...Tluangi, ngaihloh lamah lo ngailo la, tinge in inhauh a?”

“Ka..ka..ihh..ka sawi ten...chi nang, nupa thil ania.”

“Min hrilh angai alawm, i pasal zawnhmuh kan tum a nih hi.”

“Awle, nihleh ka sawi anga, mahse ka nu te bulah sawi suh u aw.”

“Tehreng mai...sawi lo ang.”

“Ihhh...mi a i nih kha, i kawchhungah ramhuai alut anih kha...tiangte chuan ka thi mai ang..te atia, chubakah mawilo tak tak in min ankhum a..Z**ngsen, Mi h*rnu, L*pchiahnu, tenawm lutuk...te min ti vak vak zel a...”

“Anih leh in atanga chhuah duhna khawpin engtin nge i chhan let a?”

“Ihhh....chil ka chhak khum a..”

(Nathana chuan min rawn en a, kan nui dun huk a..)

“Tluangi, i pasal chuan tinge chutia a tawngkhum thin che a?”

“Ka hre biklo, engmah ka hre mumal tawhlo, boruak kha a rit lutuk a, office lamah a buai deuh aniang. Achang leh ngaihzawng dang nei angah te min puh a, ka chungah hian a thinrim em em zel ringawt mai ani.”

“I pasal hian hmelma emaw, nangmah thiktu deuh, ihh...i thian mipa te emaw, thik deuh a nei em?”

“Aih neilo...ihh ka pu i thianpa sawn alo ziak thla zel sia, ka pasalin min kohdan ka sawi te kha a ziak tel vek tihna mi?”

(Nathana chu muangchangin a rawn hawi a, angaihna hriatloh hmel tawkin min melh a, ka nuih a za tep.)

“Nilove, love letter a ziak anih khi...”
(Ka nui chhuak tep.)

“Nia ka ring rengah.”

“Tluangi, naktuk ah emaw, atuk lehah emaw, engtik hunah pawh kanlo kal leh dawn a, lo chhuak bo suh u aw..i kal thei e.”

“Awle ka pu.”

Achhuah hnu chuan Nathana chuan, “Rina, ka thluak hi a puakkeh hman tep, thingtlang nula tih takah, chhaw ve hle mai.” (Nathana hian thingtlang nula ho a hmuhsit vanga sawi anilo ania, lo hrethiam ru aw...) a ti a, keichuan, “A mawl lo, sir afing zawk alawm, a mawl der mai mai nih kha, ani lo kha chu rinhlelh tur an awm lo, korean film a changtunu inla mawl der a ang ka ti..” ka lo ti vat a, Nathana chuan rang zetin, “Korean film i en thin a mi?” a ti a, ngeiawm thei lutuk mai. “En ngai nang, sir tinge zawhna i va zawt tlem thei ve a,nidangah pawh, case dangah pawh?” tiin ka zawt a, ani chuan, “Enge ka zawh vak anga, enge i favourite colour? Enge in hmeh? Tunge i bialpa, tunge i bialnu? Chung te thleng thlenga zawt turin min ti mi?” min ti hrep a, “Nilove sir, ka tihzawk chu i zawt chik lemlo em lawm..” ka ti a, ani chuan, “Rina, zawhna tamtak, chik deuh deuh a kan zawhte, a tullo thleng thleng a kan zawh te, apawimawh chin bak, chhuichhuah theih phahna ni mang silo kan zawh vak vak te hian, an rilru kan ti thlabar a, an chiai thin zawk alawm.” a ti a, a’n sawi tak tak hi chuan dik leh phian zel sia. Tlai lampang alo ni a, kan haw pah chuan kan titi dun nasa kher mai.

Atuk zingah chuan Pu Rama te inah chuan kan va phei a, uniform kan ha lo bawka, ka confi lo hlemai, special case ah hi chuan kan case-a zir hian uniform hak ngaih tum te, ngaihloh tum te a awm ve bawk sia, DGP vel han ni ve thei tawh ila ka ti mange aww. Nu ber chuan, “Tikhan lo thu rawh u, thingpui ka lum anga, pawnah khan thu zawk rawh u, inchhung chu a lum lutuk, nakinah kan lut dawnnia, tikhan lo thu ula, thingpui ka siam anga ka rawn pe ang che u..” a ti a, kan lo nghak a. In an nei nalh khawp mai, pawn lamah pawh thutthleng sei var nalh tak an dah a, abulah pipu a awm bawk a, changkang khawp mai. Naupang pahnih hi an lo in um a, Nathana chuan a ko a, “Lokal teh u, hei sweet ka nei ania..” tih pah chuan a pawm dun a, kum 6 vel mi leh kum 4 mi vel chiah anla ni ang. Keichuan tufa te nge tih hriat chakin ka zawt deuh kher a...

“Mami, in van hmeltha ve, tunge i hming?”

“Remremi ka nia, chuan hei hi ka nau Tepuii.”

“Invan fel em em, tunge anu hming le?”

“Beiseii...” (Mak tih hmel deuhin Nathana nen kan in en a, Beiseii kan hre tlat lo..Rangzetin Nathana chuan a lo zawt ve vat a.)

“Nihleh tunge apa hming le..?”

“Muanpuia.”

“Khawnge an awm a?”

“Kum 3 ka nih laiin an pahnihin an accident a, an thi tawh, Tepuii chu kum 1 chauh ala ni.”

(Pawi tih hmel tawkin Nathana nen chuan kan in en leh...an fapa upa zawk accident vanga boral tawh tih thu kha min hrilh tak e...ka lo sawi theihnghilh daih lawm, huiham..ka tar ve dawn tawh nih hi.)

Naupang upa zawk Remremi bawk chuan, “Apate, ihmaw kan in hi a hrang an ti thin a sin..” a ti mai chu, kan phu dun zawk mai a. Nathana chuan rang zetin, “Engtin, tuten maw ti?” a lo ti vat a, Remremi chuan, “Kan thianten an sawi alawm..ihh” a sawi zo hmanlo, nu ber thingpui lumzo chuan thingpi min pek pah chuan, “Remrem, tinge khatiangte i sawi, dawt ani ka tihtawh kha..hmundangah va infiam ru.” a ti a, an kal ta daih a, “Ka pu, hrethiam ru, naupang ho hi chu..” a ti dek dek a, Nathana chuan, “Ka pi, enge ni a?” a ti a, chuveleh a thu tha sauh sauh a..

“Ni e, thawm an sawi chu a awm alawm, he kan in hi kan lei ani a, kan luah hma daih tawh khan chhungkaw pakhat hi an cheng thin an ti a. 1976 kum khan nupa hi an chengdun thin a, an pa chu zurui thin a ni a, annu chu a hau vak vak zel a, kut te a thlak a, a vaw vak vak zel a. Tichuan zankhat chu an pa chuan a nupui chu a that ta a. An sawidan chuan anupui a thah zawh hnu chuan a tlanbo a, mahse an man a, jail ah kum 4 atan hnuah a cell chhungah thiin an chhar a ni an ti bawk a. A nupui ruang an hmuh chuan anupui chu a thi mengkur a, a mitmu chu rawn chhuak tur ni awm ang maiin a pawng bawk a, a hrawkah zeina hnuhma an hmu bawk antia. Chunu hming chu Kungi a ni a, anpa hming chu Ngura a ni. Tichuan 1976 kumah an thi a, chuta tang chuan tuman an luah leh tawh lova. He in hi a bula huan enkawltu Pu Ringa kutah a awm a, a upa tawh hle a, a hunlai pawh khan an inhau thawm hi a hre fova, mahse an thihnu hian a hrang tihthu vel engmah a awmloh thu a sawi bawk a. Tichuan 2007 kum khan he in hi kan lei a, engmah a hran awm ang kan hre ngailo. Kan chei tha a, khamite nupa room ah khan ka fapa tuna bo ta leh kan monu te hi an awm a, kan thenawm te ho hian an sawi hrang thei lutuk a, tunah pawh khan kan naute in a rawn sawi kha, abuaithlak ania.” a ti a, keichuan zeplo chuan a sawi lai chuan ka lo tim uai uai thei nia mawle, ka hlau lek lek. Nathana chuan, “Nihleh ka pi, Pi Kungi leh pu Ngura te chungchang chu i hriat dang han sawi zel teh..” a ti a, engemaw zawh zui kher a tulna le aww..

“Kan luahtirh vel khan min sawithaih nasa hle a, a hrang an tia, mahse huan enkawltu khan engmah a awmloh thu kha a sawi bawk si a, chubakah kan hlau lo ve hrim hrim bawk a. Tichuan an nupa thawnthu hi kan awmtirh kha chuan kan ngaihtuah zui vaklo hrim hrim a. Mahse 2009 khan kan fapa te hi an innei ta a, kan monu hian mi sawithawm atangin alo hria a, khata tang khan kan sawi leh ta reng mai a. Abikin kan monu hian a ngaihven zual a, a dawih ve hrim hrim vang pawh a ni ange. An sawi hrang viau nangin tun thleng hian a hran awm kan la hrelo nih hi.” tih pahin a nui huah huah a, zalo deuh chuan ka lo nui lui a. Tichuan case lampangah kan lut a, zawhna chu kan zawt ta a. Ka sawi hmaih daih...hemi ni hma chiah hian Pu Rama nupui hi zawhna zawt tura kan kal tur thu kan hrilh lawk a, Pu Rama office a kal bawk si a, chubakah a zawh tlak deuh ber a, chhan chu a fapa ngei anih avangin, chhui te pawh a awlsam zawk takin. Zawhna chu Nathana chuan a zawt mial mial a, a style ngaite bawkin a veikual leh vel a, inla fing tawkin. Pawnah chuan kanla awm renga, inchhung tukverh lam hawi pah chuan Pu Rama nupui thusawi chu a ngaithla dauh dauh a, chutia thu kan inzawh lai tak chuan inchhung atang chuan an monu Tluangi chu a rawn au vak mai a, rang takin kan tlan lut a, a shawl bah lai chu a lo kang hluah hluah mai a, chhuatah chuan ka paihthlak sak a, meialh chu ka rap hlum a, a shawl chu a achanve hmawk akang hman lehnghal. Pu Rama nupui chuan, “Tluangi ngati nge...mawh?” tiin mangan hmel takin a zawt a, Tluangi chu a tap tuau a, thaw hlawp hlawp chungin, “Ka hre lo, ka hre biklo...amahin a kang ringawt..” a ti a, ka chil ka lem nghal khawlh a, a hrang tak tak ni hrim hrim. Kan han buaipui deuh a, ahnuah chuan kan haw ta a, motora kan chuan lai pawh chuan ka thinphu ala dik theilo, inhrang a sawi lai leh, nupa inthah chunchang asawi lai kha ka bengah a rawn ri reng a, Tluangi shawl rawn kang thut te kha ka mitthla ah a cham a, ka luhai lutuk chu Nathana ka en vung vunga...

“Atawk...case closed...”

“Hey, engvang ngawtin maw?”

“Khatiang in hrangah, enge kan tih ve anga?”

“A hran loh kha, au vak vak suh, mibo kan zawng nih hi.”

“Ni 5 dawn a bo tawh a, khawtlang mipui zawngte pawn an hmu lo a...tunah tihtur vak kan nei tawh lo, an in saw, hlauhawm si...midang kutah hlan mai ang, Police kan nih hi, Ghost Hunter pawh kan nihloh hi.”

“I dawih emai aw....police ni tlak inilo”

“Nangpawh i phut ve zuk tho kha.”

“A au ring em alawm, khatiang mai mai ah buai suh, midang kuta case kan hlan daih te chuan kan mualpho lutuk ang...mahni kuta case awm pawh chingfel zolo min ti anga sin.”

“Nihleh lo thi tawh tase...tihngaihna awmlo, FIR thehlut tlai si, abo hnu ni 3 ah chauh an rawn thehlut a, anthiam lo ve bawk alawm.”

“Aruang tal kan hmuh sak ang chu.”

Ka van ning tak, ka hlau rilru ve deuh alawm, mahse chhunzawm zel phawt mai teh ang. Atuk zingah chuan hma takah ka tho a, ruangchhar a awm an tih vangin...Nathana nen chuan kan kal ve ta nghal a, kan hlauh ang ngei ngei in Pu Rama fapa Lalrempuia, mibo kan zawn kan zawna ngei kha a ni. Aruang chu a rei tawh tih a hriat a, a rimchhe kher mai, tho in an bawm luai luai bawka. Nathana nen chuan kan in en a, pawi a tih hmel khawp mai, keipawn pawi ka ti. Engmah kan ti hman ta silo, apawi kher mai. Pu Rama te chhungkua pawh an lungngai in, an tap nasa hle mai a, hmuh an hrehawm kher mai. Ruang chu han en chuan mi kut tuara thi chu a anglo, achhan chu hliam engmah a awm lova, a chhar tute kha luia sangha man tum an ni a, chuta len an den naah chuan an chhar thu an sawi a, thu ka zawhfiah pawh chuan tuihnuai thuk lampang atanga an chhar niin an sawi bawk. Atawpah chuan a taksa vel an enkual hrep hnuah rul chuk vanga thi anih thu doctor te chuan min hrilh ta a. Nathana chuan Pu Rama te ina thuchiang zawk lo va hre turin min tir a, tichuan ka kal ta a. Engvak mah thuthar ka va hriat belh lem lo. Darkar 1 leh a chanve hnu velah chuan Nathana chu a lo thleng a, alo thlen rual chiah chuan Bedroom lam atang chuan hmeichhe au thawm kan hre ta a, kan vai chuan bed room lampangah ka tlan chho a, chhunglamah alo in kalh a, hmeichhe aw chuan thlabar hmel tak hian “MIN CHHAN RU, ANA LUTUK, MIN BENG TAWH SUH..” a ti vak vak a, Kawngkhar chu kan beng vak vak a, Nathana chuan, “Achhungah hian tunge awm?” a ti a, Pu Rama chuan, “Nichin khan Tluangi a chho a..” a ti a, keichuan vin tawk hian, “Midang an lut a mi? Tluangi ami au vak vak chu?” ka ti a, Pu Rama nupui chuan, “Tluangi aw a nilo, hmeichhe dang aw a ni...enge awmzia?” a ti a, kan au vak vak a, mahse rawn hawn a tum silo. Atawpah chuan kawngka chu ka tlawh chhe ta a, Tluangi chu hlauh hmel deuh in, bang nghengin kil khatah a lo thu chip a, akhur zawih zawih a...kan va pan hnai a, Tluangi chuan tap tuau in, “Ka nuuu..” tiin Pu Rama te nupa chu alo kuah a, tichuan khumah kan thut tir a, tui te kan in tir a, a hahdam deuh hnu chuan Nathana chuan akutah a vuan a..

“Tluangi, hlau suh aw...enge i hmuh a?”

“Ka hrelo, engmah ka hre tawhlo.”

“Tinge i au vak vak si a?”

“Ka hre lo, ka hrelo tak tak..” a tap tuau a, van hahthlak tak em, he in hi a hrang tak tak a niang.

“Nihleh..kha damdawi hi ei la, muhil rawh aw.”

Ngawi rengin damdawi chu a ei a, amuhil ta a. Nathana chuan Pu Rama bulah chuan, “A au laia a aw kha, Tluangi aw anilo in ti tiraw?” a ti a, ani chua, “Nilo, 2009 atanga tunkum 2016 thleng kanlo inkawl ve tawh a, a aw anilo reng reng, hmeichhe dang daih aw ani..” a ti a, mak kan ti hle mai. Chutia kan inbiak lai chuan hmanhmawh em em in huan enkawltu kha alo tlanlut a, “Enge thlenga?” a rawn ti a, kan han hrilhfiah hnu chuan a hmel a danglam chiang ngei mai. A chhan kan han zawh chuan ti hian min chhang a...

“Kum 1976 khan he inah hian inthahna a thleng tih kan hriat kha. Khami te nupa kha zantin an inhau a, pu Ngura khan a nupui kut athlak khan tunah tluangi au dan chiah chiah khan a au thin a ni. Ka la hre reng, ka bengah hian a ri ala cham reng, kha aw ngei kha a ni, Pi Kungi aw ngei a ni, nichina Tluangi aw kha...a au ri ka hriat vang ania hmanhmawh taka ka lo tlan luh ni, amak hle mai..” a ti a, Pu Rama chu beidawn hmel takin a lu a dawm a, “Kan monu kawchhungah hian Pi Kungi thlarau a lut ani em lo maw?” a ti dek dek a, Nathana chuan ring zetin, “Chutiang engmah a awmlo, thlahrang tih vel, in hrang tih vel. Thil thleng palh ve mai anih kha, tunah in fapa a thi a, engvanga in atanga chhuak bo nge pawh kan hriat loh laiin nangni chu thlahrangah inlo la buai a, puitling awmdan tur anilo..” a ti chiam chiam mai a, Pu Rama nupui chuan, “Nihleh a aw te kha, Tluangi aw nilovin Pi Kungi aw zawk a ni sia?” a ti a, kei chuan, “Ka pi, a in ang ve hrim hrim pawh ani thei asin..” ka lo ti a, Huan enkawltu chuan, “Nihleh enge ni ang?” a lo ti a, Nathana chuan min melh a, “Kan chhuichhuak em em ang.” a ti a, kan haw ta a.
Khami ni atang khan Tluangi chu a buai reng mai a, a chhungte chuan min rawn phone fo mai a, achang leh a au leh vak vak a, achang leh ‘min chhan ru’ ti tiin a au leh a, zan pawh an mu mang ngailova, zan khat phei chu a roomah inkalh hnanin “NGURA, DUHTAWK RAWH..” tiin a au vak bawk a, chumi zan phei chuan kan awm ve nghe nghe a ni. Atukah chuan Nathana nen chuan kan kal leh a, Pu Rama te nupa bulah chuan afal a kan kawm duh thu kan hrilh a, an lo remti a. Tichuan kan kal a, a room ah chuan kan awm ho a, tukverh bulah ka ding a, Tluangi chu min hnungchhawn zawngin a ding a, a hmaah chuan Nathana chu a ding a, an inbe ta a.

“Tluangi, 1976 kuma thil thleng kha i hria tiraw?”

“Hre ve e, ka ngaihtuah nasa thei lutuk, an sawi dan chuan maw..ih..ih, a nupui ning lutuk khan in te hi hal ral vek te a tum thin a, apasal kha a ning thei lutuk a, chuan..chuan, in kan luahtirh hian miin..min sawi thaih vel a, mahse maw...ka hlau miah lo. Ka hlau lo hrim hrim, an thawnthu hi ka ngaihtuah chiang a, an pa kha, misual tak ani, ahnua a thi ve pawh kha aphu tawk chiah a ni. Chuan ihh...he paper ah hian an thawnthu ni awm ang pawh ka ziak a, mahse..(a bual dawhkana lehkhabu inchhawp hnawk nuai chu hai vak vak pahin) Khawnge? Khawnge ka dah a..naaaa van pawi tak. Ka hmu lo, i chhiar duh ka ring a sin le..”

(A thusawi lai chuan chiang takin Nathana chuan a en a)

“Aho emai, i ziak tha leh mai dawnnia, kan haw phawt ange aw..” a tia a, kan haw ta a. A a tih ka chiang mai, a rilru a kimloh vangah ka ngai hmiah mai a. Zanah kan va leng leh a, min hnungchhawn zawng bawk chuan a ding leh a, Nathana chu a hmaah ading leh a, paper tam deuh hi Tluangi chu a pe a, “Hei hi in room tukverh atangin a tla a niang, ka chhar a...” tih pahin a pe a, Tluangi chuan rang zetin a la a, “Awii hei hi alawm ka zawn chu, ka thawnthu ziah chu hei hi alawm ka pu..” a ti chiam chiam a, Nathana chuan chiang takin a en reng a, “I ziah ani dawn mawni le?” a ti deuh kher a, a bawl titih deuhin ka hria vin zet hian Tluangi chuan, “Min ringhleh ami, mawh mawh?” a ti vak vak a, Nathana cuan, “Ringhlel lo...ka fiamthu nih kha..” a ti sam et a, reivaklo hnuah chuan kan haw leh a. Motora kan chuan lai chuan Nathana chuan...

“Rina, a a tak tak amawni le?”

“Achian em kha sir, apasal thih chhan kha chu rul chuk vang ani a, in a chhuahsan nachhan kha chu apasal in a atvangin a ning a, achhuahsan a, chumi hlan chuan rulin a chuka, a thi a, chuzang chu nimai.”

“A dik lutuk bawiha, mahse maw...ihh, damdawi inah min drop lawk teh, ka nuamsam lova, ilo va haw mai dawnnia.”

“Khai aww..Sir a na viau em, ka lo kalpui angche.”

“Na lutuk love lo va haw rawh, ka tha mai ang.”

“Awle.”

Hospital ah chuan ka drop a, chuan ka haw ta a. Atukah chuan thil awmzia engkim apuan chhuan tur thu min hrilh ta a, kan vai chuan kan kim thap mai a, Pu Rama te nupa, kei leh Nathana, naupangte pahnih leh Nathana thianpa Doctor Zuala te nen kan ni a, Tluangi erawh chu a roomah a inkalh hnan leh tawh a. Tichuan Nathana chuan ti hian a sawi ta a...

“Kan zavaia kan rindan chuan, Tluangi hi Pi Kungi thlarauin a awmpui a, a kawchhungah Pi Kungi thlahrang a lut niin kan ring a, ni e...a dik maithei. (Kan phu deuh zuk hlawm a, chiang kekkawkin Nathana chu kan en a) Mahse a kawchhungah pi Kungi thlarau alut nilovin, Tluangi hi...Pi Kungi zawk chu a ni.”

Mak kan ti tlang bawk aniang, kan hawihai hlawm khawp mai, Pu Rama chuan naupang te chu pawna infiam turin a tir chhuak nghal a. “Engtin nge anih theih? A thih daih tawh kha?” tiin Pu Rama chuan a zawt a...

“Nia, ka pu, mahse Tluangi hi, Pi Kungi a ni. Awle...ka sawitum tak chu, Tluangi hian natna chikhat Multiple Personality Disorder a vei a, chu natna chu a hlauhawm em em a, mi pahnih anga inngaihna a ni. Hetiang natna vei ho hian an thil ngaituah te leh, an mi ngaihsan emaw, an atchilh tlat te emaw, an ngaihsak em em mihring te chu an mahni ni turah an ngai hmiah a, an mahni emaw inti in an chetdan in an che ve zel thin a ni.” a ti a. Chuveleh Doctor Zuala chuan...“He natna hi Dissociative Identity Disorder emaw Split Personality Disorder tiin an sawi bawk a, he natna hi amak in a rapthlak hle a, an aw te thlengin a danglam thei a ni. Mahse in enkawl theih a ni a, hospital ah admit in, therapy te tiin, zawi zawiin an tha chhuak ve leh thei tho a, mahse mi zawng zawng chu an ni kher lo. Hetiang tidam leh tur chuan doctor thiam tak an awm angai anga, tichuan muangchangin an dam ve leh thei a ni.” a ti a. Nathana chuan sawi chhunzawm lehin...

“Diktaka sawi chuan hei hi chu Police hna a ni tawh vaklo a, doctor hna zawk ani. Rempuia rul chuk vanga a thih khan, kan case chu a tawp thei daih tawh a, mahse engvanga chhuak nge anih ka hriat duh vang a ni. Chubakah kha mi ni a, Pu Rama nupuiin an inluah lai hi tunhmaa tualthahna thlenna hmun vel min hrilh tum a, thu ka zawhfiah lai khan pawn atanga tukverh lam ka thilr khan, Tluangi hi chokaah a awm a, a thinrim hmel em em a, a shawl bah lai chu gas ah a hal a, a phun nuah nuah a, a phunri ka hriat pakhat chu..KA HAL DARH VEK DAWN, KA HNE TAWH LUTUK...tihhi ka hre pha a, mahse a alh khan, a au leh vak sia, kan tlanluh khan amahin a kang a ti leh daih bawk a. Tichuan rooma a lo au vak vak a, ‘min chhan ru’ ti a aw dang daiha alo au vak vak pawh khan, khami ni khan Rina hi in inah ka rawn tir a, achhan chu Rempuia ruang an chharna hmuna ka kal duh vang a ni. Police dangte kha chu ahmain ka tir tawh tho a, mahse rinhlelhawm leh thil thar engmah an hmu silo a, keimahin tuma hriatlohin ka kal a, khami lui bulah khan kham sang deuh mai a awm a, ka hawi chho a, chuta tang chuan a tla a, tui ah hian a tla hlum ta a nih ka ring a. Chu kham chhip ah chuan kal ka tum a, ral lehlam atangin ka hel a, tichuan ka thleng ta a, a tlawlhthluk na lai awm ang tur ka zawng a, ka zawnna lamah chuan paper ka chhar ta a. Chutah chuan thu a inziak a, afiah vak tawhlo lehnghal...Rina, kha han chhiar chhuak teh.”

Paper chu ka la a, ka chhiar ta a..

“Ka nu, ka pa, ka nau Muanpuia ka chan tawh a, tunah chuan keimah chauh min nei tawh a, mahse keimah chauh a he in enkawl chu ka zuamloh avangin nupui ka nei ta a. Nimahsela ka nu, ka tisual a ni, ka nupui hi maw...mi a ani, mi a diktak a ni, zana kan inhauh te kha ka hrilh duhloh chhan che chu maw, ka nupui chungah in tuan anga, in hauh hrep ka hlau veleh bawk si a ni. Ka pa, ka nupui hian maw, ka hming pawh a hre tawhlo, NGURA tih hlirin min au a, tunge Ngura chu ka hre silo. Zankhat phei chu maw ka pa, zu ka rawn in ve anih kha, ka tihpalh aw. Mahse ka rilru a hah em ani, Tluangi hian min ti mangang em ani. Ka hau hrep a, I DUH LEH MIN THAT RAWH..te a ti leh tawp zel a, engtin mah ka tihloh pawhin tikhan min ko suh a ti bawk a, vawikhat phei chu amah leh amah a mit ah a inhnek vak vak a, ka dang a, amah zawkin kut minthlak a ti leh daih si a. Ka pa, a chetdan hi ahlauhawm a ni, a a tawh anih hi. Ka hrilh loh nachhan che u chu maw...in rilru anat ka hlau a, in monu hi a a ani tih inhriat ka hlau leh si a, min inthen tir ka hlau a ni. Keimah a ka chinfel theih ringin ka zep a, min zawh pawhin ka chhan ngailoh che u kha...mahse ka nu, ka pa...zanin hi chuan ka tuar thei ngang lo, chil min chhak khum a, ka na lutuk, chuvangin zanin chu ka lo haw dawn lo. Ka thianpa Ro-a bulah ka riak dawn. He lehkhathawn hmang hian ka hrilh mai ang che u, achhan chu in hmaichhanah ka sawi ngam lo ani. Apawi ka ti khawp mai, ka lo haw anga, doctor te kan ko anga, kan chingfel dawnnia.”

Ka chhiar zo chu Pu Rama te nupa chu an tap nasa hle mai a, Nathana chuan a sawi zawm leh a...

“Tichuan a awmdan kha ka rawn hmu ta a, khami tuma kan rawn len a, Rina hnungchhawn zawnga a din khan, a mitah chiang takin ka en a, a thawnthu ziah vel min hrilh a tum lai vel khan, a thusawi pah khan a mit meng kha, apawng chhuak dawn amaw tihtur khawpin a meng a, arapthlak takzet a ni. A thusawi lai a min en loh laikhan a thawnthu bu ni a ka hriat chu ka la a, ka jacket ah ka thukru a, tichuan a zawng vak vak a, zana kan lo len leh khan ka pe a, mahse kha tah khan ka fiam a, tichuan MIN RINGHLEL AMI...MAWH, MAWH..tia min vin lai pawh khan, Pi Kungi thi lai a a mitmeng an sawi ang mai khan, nasa takin a mitmu chu a pawng chhuak a. Engemaw thatlohna a nei a nih ka ring ta a, tichuan khami zan khan Rina bulah ka lu ana tiin chhuanlam ka siam a, tichuan damdawiinah ka kal a, ka thianpa Doctor Zuala hi ka hrilh a, lehkhathawn te hi ka chhiar tir a, tichuan min hrilh ta a ni. Pi Kungi te nupa a ngaihtuah nasat lutuk vangin Pi Kungi chu amah amaw a inti ta a, a awmdan an sawi apiangin a awm phah ta a ni. He thu hi hriatchian ka duh vangin he case hi ka kalsan lova, chuvang chuan tun thlengin ka la umzui a ni. Tin, he case ah hian tumah tualthattu an awm lo a, pawikhawihtu an awmlo a, Tluangi pawh misual anilo a, Rempuia a thi hi chu...pawi ka ti khawp mai.”

A sawi zo chiah chu Tluangi chu room atang chuan a rawn au leh ta vak vak a, kan tlan chho a. Khumah chuan alo thu a, hnuailam alo melh reng a, kan en thap a, tichuan vawilehkhat ah mitmu pawng pawrh khawpin, chiang em em in kan vai chuan min rawn melh a, “KA THAT DAWN...KHAWNGE A AWM?” a rawn ti ta mai a. Tichuan Nathana chuan min mitmei zeuh a....ka va kal hnai a...

“Tunge i nih?”

“Kungi, Ngura chhiahhlawh leh nupui nibawk Kungi ka ni.”

“Enge i duh?”

“Kha mihringpa Ngura kha ka that duh...zantin kut minthlak thin tu kha.”

“That ta la, he taksa hi i chhuahsan angem? I lo kir leh tawh lo ang tiraw?”

“Ka thah phawt chuan he in hi ka chhuah san kumkhua tawh ang.”

“I pasal chu a police in an man a, cell chhungah a inawkhlum a nih chu..”

"Engtin nge ka rin theih ang, ka mit ngeiin ka hmu duh a ni.."

"Kha..thlalak hi en rawh"..tih pah chuan a, pasal ruang thlalak chu ka en tir a. Nasa takin a nui a, a nui vak vak a...A THI TA...a ti a, a rapawm duh ngei mai. Tichuan a zawi tial tial a, nikhaw hrelovin a awm a. Doctor te nen chuan damdawiinah kan admit ta a, Pu Rama te nupa chuan lawmthu minhrilh a, tuma hnena sawidarh lo turin kan intiam ta a. Chumi tlai ah chuan Nathana nen chuan dawr te ah khan chow satui leih ngat kan eidun leh ta a, tihian ka zawt a...

“Sir tinge engmah min hrilh loh a?”

“Achhan chu maw, police ve si...thlahrang i hlau a, dawih lutuk anih kha..” a ti a, kan nui dun a, tichuan kan eizawh chuan haw ta a.

The End