NATHAN SEASON-2 (Episode-17)
NATHAN SEASON-2 (Episode-17)
WHO IS THE MURDERER?
Written by : Aaron Malsawmdawngzuala
Nuthlawi ft 5'10 inches vel laia sang, Mizo hmeichhia ka hmuh tawh zawng zawng a la sang ber, pian nal tak leh hmeltha tak, USA a Nathana nena intawng, coffee dawr lian tak nei, aw mawi leh no zet mai Muanpuii kha inla hria em? Kha nuthlawi Muanpuii kha USA lamah bawk a kal leh tawh a, hna thar hmuin min liam san leh tawh dawn a nih chu. A ngaihawm dawn khawp mai, Lengpui Airport thleng chu Nathana nen pawn kan zu thlah ve ngei kha, ka lo sawi ve mai mai a nih chu. Awle keimah Rinawma, police rorum, ASP Rinawma, mi bawn lutuk mai ka lo lang leh ta e, Nathana nena kan hnuchhuina chungchang ka han hrilh leh ang che u. Mahse khawngaih takin mipa ho kha, a bik takin bialnu pawh hmu zo ve lo ho kha, lo ngaithla ve tawhlo mah ula apawi lo. Bialnu nei te leh nei velo te hi kan in anglo teh mai ania, bialnu hi nei ve tawh rawh u, a zah te pawh in zaklo emaw ni te ka ti hial thin. Ka sawi thui mah mah thin, ka insum zo thinlo a ni, ilo sawi leh tan dawn teh ang aw...
Nathana office-a Nathana nen kan titi dun melh melh lai chuan constable pakhat hi alo lut a, "Sir, tlangval pakhat alo lut a, DCP Nathana ka hmu duh a tia." a rawn ti a. Nathana chuan, "Lo luh tir rawh." tiin a lo chhang a. Tlangval tawi lampang,hmeltha bik lemlo tak, khabe hmul nei hi alo lut a. Nathana'n a hmuh veleh chuan, "Zuala i ni em?" a lo ti nghal a, Nathana hmel chu ka en a, a hlim hmel kher mai. Chupa pawh chu rawn luh pah chuan, "Police Officer Nathana maw ilo nih tawh bik a?" tih pah chuan a rawn nui lut var var a. Nathana chuan chibai pah chuan, "Lo thu rawh, enge i rawn tih dawn a? Inhmuh lohna ava rei ta vawng vawng ve, thianpa." a ti a, chupa pawh chu a thu a. Chupa hming chu Zuala ngei chu a ni, kei ai chuan a chhe ve hle tih kha lo hre phawt mai teh u. Zuala chuan, "I chanchin hi ka hre thin a, news ah te i lang nasa thin alawm. Tual thah case, eiru case, mibo case tih vel han awm se, a chhui tu tur chu DCP Nathana tih hlir, chhuichhuah an nih pawhin a chhuichhuak tu chu DCP Nathana tih tho, i ropui hle mai. Mizoram news chauh nilovin Mumbai news ah te, Andhra Pradesh news ah te leh Hyderabad news ah te pawh i lang zel mai chu a nia, kan kawm ve phak tawh dawn che amawni le?" tih pah chuan a nui huah huah a, a fel hmel reuh zek lehnghal. Nathana chuan nuih pah chuan, "Tehduah thin che hian...enge i rawn tih dawn reng reng a?" a han ti a. Zuala chuan, "Aaaa...hei hmanni lawk khan ka nau a boral a, kan chhungkua ah zirlai awmchhun a ni bawk nen. Kei BA pawh pass lo hian lehkha ka han zir tha leh ta a nih hi, pawisa neih zawng zawngin J.Thankima college ah hmuihmul buk chhurin 1st semester ka zu tan veleh a. Kan 1st day ah pawh class room ka lut chu, 'Good Morning, Sir.' minlo la ti zui mawle." tih pah chuan a han nui leh rih a. Nathana chuan, "A zialo kher mai, engtia boral nge a?" a ti a. Zuala chuan, "Tlai alo haw kha, truck nen an insu a, a vanduai thlak tak tak a ni. Mahse zep lo chuan a thiamloh zawk a nia, license a la nei lova, khalh pawh ala khalh thiam tha manglo lehnghal a. Tih ngaihna a awmlo em a, kan inngaidam ta mai a nih kha." a ti a, a khawngaihthlak awm reuh kher mai. Nathana chuan, "I nau kha hmeichhia tiraw?" a ti a. Zuala chuan, "Aw...Lalruatpuii a nia, kum 19 a ni ve tawh." a ti a. Nathana chuan, "Engtik khan nge a boral a?" a ti leh a. Zuala chuan, "Nikum December thla khan...an exam zawh ni a ni lehnghal a, alo haw lam a nia, a zialo khawp mai. Mahse mihringte hi kan hma hun kan hrelo em a, tu nge thi hmasa dawn a, tunge thi hnuhnung dawn tih hi tuman kan inhre lo a. Kan tana tha tura Pathian ruat a niang chu kan ti ta mai a ni, mahse pawisa tlem azawng chu kha Truck Driver khan min pe ve a." a ti deuh luam a. Nathana chuan, "Police te in rawn reng reng em? Truck driver chu a dimkhur loh vang te pawh a ni ve thei tho a, chutia inngaihdam rikngawt chu a dik dawn em ni?" a han ti leh a, Nathana chuan a lak serious hmel kher mai. Zuala chuan, "Rawn ve ang chu, mahse sawi tak ang khan ka nau khan license a neilova, a scooty ah khan 'Learner' sign kan bel lo bawk a, thiam chan chu a har khawp mai. Chubakah a la thiam chiang silo nen, midang hmu tute pawhin ka nau thiamloh a nih thu an sawi vek a, hun kal tawh a ni tho a, harsa hle mahse kan inngaidam tawn ta mai a nih kha." a ti a. Nathana chuan, "Anih chu mawle, azia lo hle mai. Anih leh tichuan Aizawlah inlo peng tihna em ni?" a ti leh a. Zuala chuan, "Kan lo awmna chu a rei tawh a, ka rawn be ngailo mai mai che alawm. Ka nau pawh hi J.Thankima college ah a kal ve thova, accident thlenna hmun pawh college bul lawk alawm. Ka pa hian a theih ang tawkin mistiri hna hi a thawh chhunzawm zel a, kan inchawm tawk tawk a ni ber e. Ka nu lah a damlo hleithei bawk silova, kei lah ka lo awmtha duhlo khanglang bawk nen. Ka nau ber a awm talo chu hreh chung chungin ka pa chuan college min kal that tir leh ta a nih hi." a ti a. Nathana chuan, "Enteh Zuala, puih in ngaih chuan ka awm reng a nia aw..pawisa in mamawh pawhin, ka hausa e ka tihna nilovin, sawi hreh reng reng suh aw?" a ti a. Zuala chuan, "Awle, enteh Nathan, ka kal phawt ange. Naktuk ah class banah ka lo leng leh ang." a ti a, Nathana nen chuan pawn thleng chu an inthlah a.
Nathana chu a rawn lut leh a, lungawiloh hmel zeta min rawn melh pah chuan, "Lo biak ve thin tur alawm, Eka...polite lo thei lutuk." a rawn ti ringawt a. Rum zeta lo melh let pah chuan, "Enge maw mi hauh leh rikngawt thin le? Biak dan tur ka hrelo ve a ni mai a, thinchhe lutuk." ka lo ti hrep a. Nathana chuan, "Hmeichhe chhelo deuh chu ni se, engmah pawh ka sawi veleh hman tawp nang. I be leh hawr hawr anga, hmeichhe lawm lutuk." a han ti leh ngawt a. Ka hnial vel peih tawh lo, "Engtin nge in inhriat a? Tunge a nih a?" tiin ka han zawt a. Nathana chuan, "Lalbiakzuala a nih kha, Hyderabad atanga Mizorama ka lo haw khan kan inah a pa nen an rawn inhlawh thin a. Apa hi mistiri ania, kan inhnuai kan sak that khan an rawn thawkdun alawm. Khata tang khan kan innel a, kan inkawm thin a. Ala naupang lutuk, i fapa rual lek, kum 30 chauh." a han ti kherah, ka kum nen a inthlauhna a nasa kher lo asin mawle, ngeiawm thei lutuk mai. Keichuan, "Deuh kher zela che...anih chuan kum 30 a ni tawh a, college 1st year a kal tha leh tihna nimaw...a zahthlak ve det ang." tih pah chuan ka han nui a. Nathana chuan, "Mizorama ka nu leh pa te bulah ka rawn awm tirh khan Zuala leh Francisa hi ka kawmngeih ber te an ni a, anni pahnih bak thian ka nei ngai lo. Francisa lah chawlh i hman lai khan constable hna rawn thawkin ka department a rawn join ve dek dek a, politician eiru hovin an that lehnghal mai bawk sia. Zuala te inah pawh hian ka leng fo a, a nau Ruatpuii pawh ala te lutuk, middile school vel chauh ala kalin ka hria khatih hunlai khan." a ti a. Keichuan, "Umm..anih chu. Nihleh khaw dangah an pem tihna em ni?" tiin ka lo zawt leh a. Nathana chuan, "Um...kan department ka join chiah khan Francisa kha khawndangah an pem ta daih a. Zuala erawh hi chu Aizawl mi anilo hrim hrim a, rawn pem ve mai chauh annia. Francisa a pem hnu khan an khaw lamah a haw ve ta nghal anih kha." a ti a. Tlai alo ni a, keini pawh kan duty kan zo leh ta, vai tuai inngaizawng ang maiin ka bike-ah kan inphur a, kan haw dun leh ta. Zan alo ni a, computer hmaah thu in ring takin hla ka ngaithla a, ka ri leh ta bur bur mai. Ka hla ngaihthlak duhzawng hi ka han sawi ve reng reng ange, vainu pasal Nathana te angin vai hla ka ngaithla ve ngailova, hip-hop tih angreng, pop tih angreng, RnB tih angreng ka ngaithla ve peihlo. Keichuan Rock lampang hi ka duh in ka atchilh deuh bur a, Metallica, GnR, Pantera, Dream Theatre te leh A7X tih te ngat ani keini mipa diktak chuan kan ngaihthlak thin ni. Ka nu chuan ka room bang a rawn chum ri bur bur a, ka hla play lai chu ka tizawi a, "Enge?" ka ti vin tuar a. Ka nu chuan, "Ti zawi ve deuh thin la, hei Nathana te an lo leng a nia." a rawn ti a. Ninawm lutuk, nilengin kan inhmu a, in lamah lehzel mnlo zui hi chu ka hne ve tep thin. Ka computer chu ka off a, ka va chhuak ta a. Nathana leh Amandai leh SI Liantea te an lo ni a, eng tak chu nimaw? Nathana chuan, "Rockstar alo chhuak e." tih pah chuan min lo nuih a, SI Liantea pawh a lo th(r)en th(r)aw kha.Amadai pawh duhawm zetin min lo nuih leh seih tawh, henu hi chu....sawi leh lo mai ang, Tluangtei a thinrim palh ang. Ka va pan hnai a, "Enge ni ta, pute u?" ka han ti deuh kher a. Nathana chuan, "Keini Police nep tak te hian nang police officer rothap zet leh fing em em mai hi nichin lawk khan ruang an hmuh thu kan rawn hrilh che anih hi." ahan ti kher a, ka va han hlap chak tak. Amandai chuan, "I phone i silent a mi? Ka rawn call nasa lutuk che a?" a lo ti ve bawk a. Ka nu lah chuan, "A mawl ania, ring deuh deuh hian hla a ngaithla a, hla pangngai pawh a ngaithla ngailo, t(r)e vak vak zel mai..." a lo ti hlur bawk a, ka nu lah hi. Nathana chuan, "Hawh teh, iva en ve ang hmiang." a ti a, peihlo tak chuan ka insiam a, kan inzui chhuak ta hlawm a.
Ruang awmna chu Chhinga Veng a ni a, Pu Rintluanga te inhnuai ah a lo let reng a ni awm e. Kan va thleng a, mipui lo zi mur mur chu kan han hnawt kiang a. Ruang chu kan han en chiang a, a thihna ala rei lutuk lo tih a hriat theih, a taksa pawh a la lum. A lu ah na taka vuak a ni a, chumai nilovin vawi khat aia tam vuak a ni. Hmuh a nuam teh chiam lo khawp mai, a hmai chu thisenin a bual khat vek a, a ban ruh a tliak bawk. Tualthattu hian a thah hma hian nasa takin a sawisa tih a hriat theih a, a mit a vung bur bawk. Ruang chu constable ho chuan post mortem turin an phur phei a, Nathana chuan a phone light on in a bul vel chu a han en kual a. Hnuhma a awm lemlo nangin Pu Rintluanga te inhnuaia thah chu a nilo tih a chiang. A chhan chu kawngsir atang chuan Pu Rintluanga te inhnuai thleng hian thisen far a awm tlat a, tualthattu hian a hnuk phei a ni ngei ang. Nathana chuan, "Tualthattu hian hepa hi hmundangah a that a, a thah zawh veleh rang takin hemi te inhnuaiah hian a dah a ni. Ka rindan chuan a thah zawh veleh motor ah a phur anga, tichuan kawngsir ah a motor chu a park tha leh phawt anga, tichuan ruang hi motor atang chuan la chhuakin hetah hian ava hnuk phei a ni ngei ang." a ti a. Amandai chuan, "Sir, mitthi hi Bawngkawn ami ani. A hming chu Zarzokima a nia, kum 28 mi, Hotel Employee a ni awm e. Hei, Constable Siama'n message min rawn thawn e." a ti a. Nathana chuan, "Amanda, Liantea nen mitthi chhungte inah lo va kal ula, kei leh Rinawma hian Pu Rintluanga te hi thu kan han zawt fiah ve reng reng ange." a ti a. Amandai leh Liantea te chu an kal ta a, kei leh Nathana erawh Pu Rintluanga te inah chuan kan inzui chho a. Pu Rintluanga nupui Pi Hmangaihi chuan thingpui min rwan pe a, thingpui no dawm pah chuan Nathana chuan, "Pu Rintluang, ruang hi dar engzat velah nge in hmuh? Tu berin nge hmu?" a ti a. Pu Rintluanga chuan, "Keiman ka hmu a, kuhva leiturin ka chhuak a. Kan inhnuaiah hian alo let reng a, a tir chuan tlangval zurui chatthla emaw tiin engah vak pawh ka ngai lemlo. A thim em avangin a hmel pawh ka hmu chiang thei vak lova, en mang hleilovin ka va sawi vak vak a. Mahse a che eih silova, kuhva chu ka va lei ta a, ka let leh chuan kan in bul kawnga thisen niawm tak lo awm hi ka hmu a. Ka phone lightin ka han en a, thisen tak tak a lo ni a. Tichuan ka va pan hnai a, a hmaia thisen lo luang nuai mai te chu ka hmu a, tichuan a mar ka en a, a thi tawh tih ka hre ta a, ka lo phone ta che u a ni. Ruang ka hmuh hian dar 8 a pel tawh, chuzawng chu ka hriat a ni e." a ti a. Nathana chuan, "Anih chu mawle, anih leh thawm enge maw tal in hria em?" a han ti leh a. Pu Rintluanga chuan, "Hre miahlo, chubakah khawlaia vei vak hi an tam a, motor tlan ri lah chawl lovin a awm reng a, kan lo ngaihtuah loh vang nge, engmah kan hrelo." a ti a. Nathana chuan, "Rina, pawnah sawn mipui an la awm nual a, tualthattu in ruang a dah that lai vel hmu an awm nge awmlo va zawt lawk teh." a ti a, tichuan ka chhuak ta a. Mipui lo phu nuai nuai te chu ka ko khawm a, tichuan inla Singhama tawkin ka han hawikual vel a, "A lan dan chuan ruang hi tualthattu hian Pu Rintluanga te inhnuaiah hian a hnuk phei niin kan ring a, ruang inhmuh hma khan inhnuai zawnah hian mihring ding emaw, tu emaw tal inhmu em?" ka han ti a, mahse engmah an hmuhloh thu hlir chuan min chhang hlawm a. Naupangte pakhat chuan, "Ka pu, zanin dar 7 leh achanve vel khan Pu Rintluanga te inkawt ah hian car var pakhat chu minute 5 vel lai a ding a, mahse engah vak ka lo ngai lova." a rawn ti a. Naupangte bulah chuan ka va kal a, "I chiang amaw? I hmu tak tak em?" tiin ka han zawt a. Naupang chuan, "Aw...Pu Rintluanga te in zawn chiah hi kan in a ni a, tukverh atang hian ka hmu alawm. Mahse mihring awm ang chu ka hmulo, maruti car a ni a, car ding satliah ve mai turah ka ngai a." a ti leh a. Keichuan, "Anih chu, i ti lawmawm e." tih pah chuan mipui te bulah chuan, "Haw rawh u, Pu Rintluanga te pawh in ti mangang mai mai, engmah tihtur in neilo." tiin ka han hau hrep hlawm a, an haw darh ta a, a then chuan min ngei deuh aniang, an phun phei nung nung hlawm a.
Nathana bulah chuan ka thil hriat te chu ka sawi a, Pu Rintluanga chuan, "E...Lawma a nih ngei dawn chu, kan inbul ami anih chuan." a lo ti a. Nathana chuan, "Nakinah Lawma pawh chu thu kan zawt fiah leh dawn nia. Pu Rintluang, lo fimkhur ru aw...tualthattu hian in inhnuai kher a hmang bawk si a, chhan aneih ngei ka ring." a ti a, tichuan kan chhuahsan a, Station lam kan pan ta a. Station chu kan thleng a, Amandai te pawh chu an lo thleng ve nghal a. Amandai chuan Nathana bulah chuan, "Sir, Zarzokima hotel thawhna hi Hotel Regency a ni a, kum 1 lai chu a thawk ve tawh a ni awm e. Amah hi Front office department ah a awm a, mi pawisawi lo leh tlangval fel tak a ni tiin an sawi a. A chhungte pawn hmelma a neih awm te, hawtu a neih awm pawh an hrelo. Amah pawhin mi huatthu a sawi khat hle an ti a, mi huat a neih awm pawh an hrelo a nih chu." a ti a. Nathana chuan, "Anih leh ngaihzawng a neih leh neihloh in zawt em?" a ti a. Amandai chuan, "A neilo a ni awm e, bialnu hlui chu a nei a, mahse chu chu khawdang daih a mi a ni an ti." a ti a. Nathana chuan, "A tha e, post mortem result hi engtik velah nge a chhuah theih ang?" a ti a. Amandai chuan, "Naktuk zing dar 8 hma chuan a chhuak turah ka ngai." a ti a, chutih lai chuan DGP a lo lut hlawl mai a. Nathana chuan, "Ehe Sir, inah lo awm mai mai rawh ka tih a, ilo kal ve duh kher a.." alo ti a. DGP chuan, "Hna te chu a lian emaw a te emaw, kan thawk tlang dial dial ang chule...enge chanchin? Hmasawnna te a awm em?" a rawn ti lut nghal bawrh bawrh a. Nathana chuan, "Awm lutuk lo, ruang kan hmuhna bulah khan zanin dar 7:30 vel bawr khan car var a ding char char tih thu naupangte pakhatin a sawi a." a ti a. DGP chuan, "Tu naupangte maw?" a ti a, Nathana chuan, "Pu Rintluanga te in bul lawka awm a ni a, minute 5 vel lai chu car chu Pu Rintluanga te inhnuai zawnah chuan a awm a, mahse engah vak a lo ngai lova." a ti leh a. DGP chuan, "Pu Rintluanga i tih chu ruang an hmuhna inhnaui nei tute chhungkaw pa ber aniang maw?" a ti leh a, Nathana chuan, "Aw ni e." tiin a chhang a. DGP chuan, "A that chu, zan khatna lekah pawh hma kan sawn khawp alawm le...car var chu eng car nge?" a ti leh a, DGP hi chu zawhna hlir hian a khat a, amah tawp hi QUESTION MARK ani tawp. Nathana chuan, "Maruti car ania, a number erawh a lo chhinchhiah lemlo a ni." a ti a. DGP chuan, "Umm...atha e. Maruti car var chu kan zawn phawt angai anga, mahse maruti car var chu a tam awm ropui si a, zawn uluk deuh angai dawn a ni. Nathan, he case hi nang leh Rinawma leh Amandai leh Liantea te kutah awm leh rawh se aw....in pali hian in tha ber a, in chhuichhuak hma deuh ang chu..." a ti a. Nathana chuan, "Sir, keimah chauh pawn ka buaipui thei alawm, hetia officer leh inspector rualin case pakhat kan khawih rual thup chuan case dang pending a awm ve nual sia, hun a hek mai mai lomaw...te ka lo ti ve mai mai." a han ti deuh duah a, a zaktheilo ania. Ama kutah chauh hian dah ta se, "ASP Rinawma hian min pui bawk se.." a ti leh tho awm sia, lo ngai reng mah rawh u, a sawi leh ngei ngei ang. DGP chuan, "A ni tho mai, mahse tanrual chu chakna an tih thin kha....Nathan, nangmah chauh chuan i huam ang maw?" a han ti a. Nathana chuan, "Um...mahse ASP Rinawma hian min pui ve se chu ka duh khawp mai." a ti a. Ka sawi reng kha...a ti leh ngei ngei ang ka tih kha, LULIAN-A hian min tel ve ziah. DGP chuan, "Atha lawm, nangni pahnih hi chu in inhmeh ber mai." tih pah chuan a la nui huah huah zui. NAthana chuan min rawn en a, minla siai zeuh zui, ka ten lutuk. DGP phone a lo ri a, minute 2 vel a biak hnu chuan a lo let leh a, "Ka nupui pum ana leh thut a, ka va haw ange aw...nangni pawh in thu thu a ni maw, Nathan, i tih dan dan a ni tawh mai aw.." a ti a, DGP chu a haw ta a.
Amandai chuan, "Sir, puih in ngaih chuan ka awm reng ania aw...case dang pending hi chu midang khawih tur an tam emai." a lo ti a, SI Liantea pawh chuan, "Keipawh Sir, min mamawh chuan ka awm reng e." a lo ti ve bawk a, kan fel mah mah thin a ni. Theih phei se chu an pathum hian chhui zui se, kei erawh Tluangtei te run in bela, hmangaihna par lo tlan dun daih ania ka chak ni. Amandai lah hian, "Mahni cousin te lo ngaihzawn, hmuh zawhloh thlak lutuk." tiin min chhaih ve ziah leh nghal, min chanloh vang mai mai ani, a thikthu te hi a chhe reuh ania, Amandai te pawh hi. Nathana chuan, "I haw phawt teh ang u, naktukah kan sawi zawm dawnnia. Chuan Amanda, nang chu case pending kha lo khawih chhunzawm zawk la, Liante...nangpawh in venga in an rawk chungchang kha lo buaipui zawk rawh. Ka sawi tawh ang khan hei chu kei leh Rinawma'n kan buai pui leh mai ang." a ti a, huiham. Ni e, kan chhui dun leh mai loh chuan, a changtupa te pahnih kha kan ni miau bawk sia, hahthlak lutuk mai. Tichuan kan haw darh ta a, keipawh chu Nathana te ina peng kawi tawh lovin ka haw tlang ta a. A tukah chuan investigation nei turin Nathana nen chuan kan mitthi Zarzokima thawhna thin, Hotel Regency lam chu kan pan ta a. Manager bulah chuan kan nihna te kan sawi a, kan kal chhan te kan sawi a, tichuan ama office ah titi ho turin kan inzui chho ta hlawm a. NAthana chuan Manager chu thu a zawt ta a...
"Ka pu, Zarzokima hi eng ang mizia nge?"
"Ka hmuh danah chuan mifel tak a ni, mi pawi a sawi ngai lova, a taima a, sawiselna ka hrelo."
"A thawhpuite zingah hian itsiktu emaw, ngeitu emaw an awm in i hria em?"
"Chutiang an awm ka hrelo, zeplovah chuan hetia hna thawk ho te reng reng chu Hotel dangah pawh a ni vek a, han inkawm hrang bik te, han inngei zeuh te leh han in vin bawrh bawrh chang te hi chu a awmlo thei lova, mahse chutia inhaw ta em em an awm chu ka hrelo."
"Anih leh amah ah hian tunhnai velah danglam a awmin i hre thin em? Entirnan a mizia a thlak thut emaw, han ngui riau chang a neih te a awm em?"
"Chutiang pawh ka hre chuanglo, Front Office department ah a awm a, mikhual lo welcome tu ber an nia. Kan regular guests te pawhin ka bulah ngei pawh an fak nasa thin hle a, a thawhpuite pawh hian an fak thin khawp mai."
"I duhsak bik avang hian thiktu a lo nei ru reng te hi a nilo maw?"
"Ani ve thei tho a, mahse ka staff te hi ka hre chiang a, chutia tualthat duh tur khawpa nunrawng chu an awmlo ang."
"A hrim hrimin vawiin chu i staff te hi an va tlem reng reng ve, tinge a?"
"Nia, Zara vuina ah an kal ve hlawm a. Keipawh kal tur chu ka nia, mahse tukin khan inlo kal dawn tih min rawn hrilh lawk avang khan ka lo nghak tawp mai che u a ni."
"Umm....a lawmawm e, kan lo la leng leh maithei ania, kan kal phawt ange."
"Awle, in duh duh hunah inlo leng leh dawnnia. Thingpui te in in duh lo maw?"
"In lo mai ang, hna kan la ngah si a, kan kal leh zawk mai ange."
Hotel chu kan chhuahsan a, motorah lutin Bawngkawn lam kan pan leh ta a, Zarzokima te inah kan kal dawn a ni. Motora tlan pah chuan Nathana chuan, "I ril a tam em? Thil kan ei phawt dawn em ni?" a ti a. Keichuan, "Tam mai mai lo, mahniin ka chhui thei reng alawm ti vel zuah zuah a, ASP hian min pui se...tih leh tho zel si." ka ti nuah nuah a, nizan vang khan ka la lungawi thlawt lo a ni. Nathana chuan min en hraw a, "Tingeeee? Hmeichhia ang maia i phun nuah nuah zel a? A hahthlak emai, ti hi chuan Inspector pangngai kha ni leh mai rawh...chupawh chu i phu lo, SI Liantea nen hian in nihna hi inthleng teh u." a la ti zui, motor atanga ka tlawh thla tawp lo kha chu lawm hle rawh se. Zara te in chu kan thleng ta, an lo zai mup mup mai a. Zarzokima pa chupawna thute zinga pakhat chu kan koh chhuah tir a, kan motor park-na bulah chuan kalin kan titi pui ta a. Nathana chuan, "Ka pu, i hming kha ka theihnghilh daih mai, enge khah?" a han ti te te a, a inla Raymonda vel hi ka'n ti khawpah. Zara pa chuan, "Lallawmsanga ka ni a, mahse Mapui min ti mai rawh u." a ti a. Nathana chuan, "Umm...anih chuan Pu Mapui, nizan lam khan kan naute kan rawn tir tawh tho nangin, thu han zawh ve che kan duh hrim hrim a, kan lo kal tawp a ni. A pawi emlo ang chu tiraw?" a ti a, Pu Mapuia chuan, "Pawi love, in duh duh min zawt rawh u." a ti a. Nathana chuan, "I fapa hian tunhnai velah in lakah lungawilohna a neih awm i hria em? Anih loh pawn a mzia han inthlak thut te a awmin i hria em?" a ti a, Pu Mapuia chuan, "Ka hre lo, chutiang a awm awm pawh ka hrelo." a ti a. Nathana chuan, "Anih leh rinhlelh deuh te in nei em?' a ti leh a, mahse Pu Mapuia chuan, "Rinhlelh tur pawh an awmlo, hmelma a neih awm kan hre silova, kan hrethiam biklo." a ti leh a. Zawhna tamtak kan zawh hnu pawhin a ngei hlirin, engmah a hriatloh thute, rinhleh a neihloh thute leh hetia thah a ni ringawt hi mak a tih thu te hlir chuan min chhang zel a, keini pawh chu kan beidawng ta, Station lamah chuan kan phei leh ta a. Station kan thleng a, NAthana office ah chuan Nathana nen chuan kan inzui lut a. Nathana tih hming sawi reng pawh hi ka ning mange awww...a nghal si, min ti duhdah si. NAthana office hi chu ka office ai pawh hian ka awmtam zawk mahin ka hria. Kan luh rual deuh chiah chuan Doctor pakhat hi alo lut tel ve nghal a, chu doctor chu Zarzokima post mortem tu kha a ni. Doctor chuan Nathana bulah chuan post mortem result pek pah chuan, "Kan tihpalh a ni Sir, duh aiin result kan peih har deuh a, kan tlai ta anih hi. A ruang kha chu tukin zing khan an inah kan dah phei tawh a, mahse a result hi kan lo beirei deuh a." a han ti deuh luam a. Nathana chuan, "Apawi hleinem, thil danglam deuh hmuh chhuah in nei em?" a han ti a. Doctor chuan, "Thlalak ka zeh tel ho kha han en mah la, mitthi taksa ah khan, a hrawk zawnah khan alphaber 'R' tih a inziak a, enge awmzia chu ka hrelo. Chemte hmanga ziah niin a lang, chuan tualthattu hian thah mai duh tawk lovin na takin tuar se a duh a ni ngei ang." a ti a. Nathana chuan thlalak chu min hmuh tir ve a, doctor sawi ang ngei chuan thlalak ah chuan Zarzokima hrawk ah chuan alphabet 'R' hi alo inziak a, awmzia chu a nei ngei ang. Doctor chu a chhuak a, Nathana chuan, "Rinawm, enge awmzia nia i rin?" a ti a. Keichuan, "Ka hre biklo, awmzia chu a nei ngei ang." ka lo ti a. Nathana chuan, "Keichu ka rindan chuan Rinawma tihna a nih ka ring." a ti deuh kher a, rum tak hian ka melh a, "A ni kher lovang, keichu ka rindan chuan 'Raymonda hnek hnu Nathana' tihna a niang." ka ti ve deuh ngat a, a nui huk mai. Nathana chuan, "Eee...i sawi takah chuan, a nat zia kha...ka khawih tha ve hmanlo lehnghal a." tih pah chuan a nui ver ver a, hmeichhe ho chuan hmu se a nui hmel chu tha an ti lehpek ang chu, a chhiat chhiat nen hian.
Chutia kan titi lai chuan Nathana thian pa Zuala chuan kawngka rawn kik karh karh pah chuan, "Ka lo lut thei angem?" a rawn ti a. Nathana chuan, "E...nang i nimaw? Lo lut rawh...kha lo thu rawh." a ti a. Zuala nen chuan an inkawm thin lai vel te chu sawidunin an titi dun bawrh bawrh a, ka ning ania, sawi ve tur a vang bawk si, a khat tawkin ka lo khi ve leh suk ringawt thin a, duhleh an inah leng se titi pui ve mai tur ania. Nathana chuan, "Class i bang chiah ami, college naupang chuuu?" tiin a han chhaih vel a, Zuala chuan, "Bang tawh e, kan bang hma a...teacher thenkhatin teacher ve tho amaw min ti leh tawh...a hahthlak ania." tiin a nui vak vak a. Tichuan an titi zawh meuh chuan tlai ban a lo hun ve ta der mai, Nathana chuan, "Zual, engin nge ilo kal?" a ti a. Zuala chuan, "Taxi in, ka motor a chhia a, a t(r)awng ve tawh lutuk a, ka keng zak ve deuh mawle." a ti a. Nathana chuan, "In inah chuan ka lo leng teh ang, i nu te pawh ka hmu chak alawm." tih pah chuan min rawn en a, "Rinawm, nangmahin lo haw mai rawh aw?" tih pah chuan Zuala chu a bike-in a phur a, min kalsan nghal vang vang a nih chu mawle. Hei leh chen kan lo inkawm ve tawh a, a thianpa hlui hmelchhe zet alo lang ve dek dek a, kei aiin a ngaihsak zawk a, fairlo hle mai. Ka thik vang amaw inlo ti ange, ka thik peih vel lo, saw DCP Luluian-a saw, duhleh inkawm daih rawh se. Zan alo ni a, a ngaite bawkin computer ah chuan hla ka play a, ka rak leh ta vak vak mai. Ka phone a rawn ri a, NAthana a lo ni. Ka hla play chu ka tizawi a, "Hello, Sir?" ka ti a. Nathana chuan, "Ruang dang an hmu leh tawh, tun tum chu Lower chanmari ah a ni, kawnghnuai ah...kan in bulah ka nghak che, lo thlawk phei vat rawh." a ti a, phone a dah nghal. Peihlo tak chuan ka insiam leh ta a, Nathana te inlam pan chuan ka bike chuan ka inkhalh phei ve leh ta nghal a. Nathana chuan min hmuh veleh chuan, "I va rei ve." tiin min han vin nghal vak a, chhan pawh ka chhang peih lo. Tichuan kan bike ve ve khalhin ruang an hmuhna lam pan chuan kan kan ta nghal a. A hmun chu kan thleng a, ruang chu kawngsira side-drain ah a alo mu a. Nathana chuan mipui lo awmve ho chu a en kual a, "Tunge ruang hi hmu hmasa ber?" a ti a. Pa pakhat chuan, "Keiman ka hmu." a lo ti a. Chupa lam chu kan hawi thap a, Nathana chuan, "Dar engzat vel khan nge?" a ti a. Chupa chuan, "Dar 8 vel khan ka hmu a, zurui chatthla emaw ka tia. Mahse a mutna zawn side-drain ah hian thisen luangthla ka hmu a. Ka ngaih atha lova, ka en chianga, a thi tih ka hre ta a, keimah hi ania lo phone tu che kha." a ti a. Nathana chuan, "Rinawm, constable ho phone la, ruang hi post mortem turin hrilh rawh." a ti a. Nathana sawi ang chuan constable ho chu ka phone ta a, kan nghah pah chuan ruang hmutupa chu thudang eng eng emaw te kan han zawt leh nual bawk a. Constable ho an lo thleng a, ruang chu motor ah chuan an hlangkang a. Nathana chuan constable Siama bulah chuan, "Siama, mitthi hi tunge a nih a, khawi vengah nge a awm tih te, tute nge a nu leh pa tihte, tute nge achhungte tih zawng zawng hi Station-a ka rawn let leh hunah ka hre ngei tur a ni, lo zawng vat ang che." a ti a, tichuan ruang chu an phur phei ta a. Nathana nen chuan side-drain bul vel chu kan en kual leh a, minute 5 vel kan en hnu chuan Nathana chuan, "Rinawm, lo kal teh." a ti a. Nathana bulah chuan ka va kal hnai a, NAthana chuan, "Helaia motor kehniak hi en teh." a ti a, motor kehniak chu ka en a. Nathana chuan, "Zarzokima thattu leh tuna mitthi thattu hi thuhmun an ni...kehniak hi en la, maruti motor ke hniak a ni. Nizan khan naupang khan maruti var kha Pu Rintluanga te inkawtah a awm tiin a sawi a, tualthattu car ngei a ni. He kehniak hian a ti chiang zual khawp mai, hawh teh...Station lamah i let leh phawt teh ang." a ti a, engmah pawh ka sawi ve hman leh ta lo, Station lamah chuan kan let leh a.
Station kan thleng a, constable Siama chuan, "Sir, mitthi hi Lalhmingmawia, kum 25, Pu Rualkhuma leh Pi Sangzuali te fa naupang ber a ni. Zarkawtah an awm a, amah hi High School zirtirtu a ni." a ti a. Nathana chuan, "Um a tha e, Rinawm...i duh leh haw tawh rawh, ka lo buaipui ange." a ti a, ka va han lawm chiang tak, MANGTHA pawh ka ti peihlo, ka haw nghal nal nal. A tuk ah chuan Station ah chuan dar 8 leh a chanve velah ka thleng a, NAthana chuan a ngaite bawkin office ah min ko lut leh nghal a. Nathana chuan, "Rinawm, post mortem report a lo thleng hma deuh a. Kan rin dan chiah a ni, report-a a inziah dan chuan kan mitthi Hmingmawia dulah hian alphabet 'R' tih a inziak leh a, tualthattu hi Zara thattu tho tihna a ni. Chuan chiang em em bawk chu tualthattu hian maruti car a nei chiang bawk, kha naupangte ina a hmuh car ngei kha a car a nih ka ring bawk." a ti a. Keichuan, "Anih chuan Sir, Hmingmawia chhungte chu thu kan va zawtfiah dawn em ni?' ka ti a. Nathana chuan, "Nizana i haw hnu khan ka kal daih tawh, engmah hmasawnna a awm lo." a ti a. Tichuan chumi ni chuan investigation nei dunin tu tu emaw te chu thu kan zawt kual a, Hmingmawia thawhna school ah te kan kal a, a thiante inah te nen, mahse engmah hmasawnna awmlo. Tlai a lo ni der mai, Nathana chuan a lu a dawm vawng vawng a, "Umm....a chiang ta e, Rinawm...kalna tur pakhat chiah kan nei ta." a ti a. Keichuan, "Khawiah maw?" ka ti hu mai a. Nathana chuan, "Minlo zui phawt teh." a ti a, tichuan motorah chuan inphurin Nathana nen chuan chak takin kan tlan a. Kawnglaiah chuan a ding thut a, "Tinge i din a?" ka ti a, Nathana chuan, "Saw...Zuala ka hmu a, phur ve ang." a ti a. Ka ning kher mai, Zuala Zuala ti reng mai..."Sir, hnuchhui lai te chuan inkawm lo ula. Chubakah a hunlo emai, min tibuai mai mai zawk." ka lo ti vin hlur mai a. Nathana chuan, "Amak e aw....an inthleng ka thlah ringawt dawn lawm, i thinchhe lutuk." a ti a, ngawi reng chuan ka thu a. NAthana chuan Zuala, amaha lo tei kual rulh rulh chu ava au a, tichuan alo phei a, motor ah chuan a rawn chuang ve ta nghal a. Nathana chuan, "Zuala, vawiin class a nuam maw?" a han ti a. Zuala chuan, "Nuam a nimai, mahse a boring lutuk a." a ti nuah nuah a. Nathana chuan, "Taka Zual, a ruka zu kan in thinna tlang kha ila hrai em?" a ti a, Zuala chuan, "Hria e...kan kal dawn mi? Zu i nei ami?" a ti deuh thawt thawt lehnghal. Nathana chuan, "Beer chu ka nei a, in ho lawk ang u." a la ti zui. Ka va melh hrawk a, Nathana chuan minlo nuih suk ringawt, hunlo thin khawp mai. Tlang chu kan thleng a, beer te chu kan in a, Nathana leh Zuala pawh chu an titi tui tan khawp mai. Zuala chuan hnuglam hawiin tlai ni tla tur chu a thlir vawng vawng a. Nathana chuan min rawn hrilh ru zeuh a, "In ring rawh aw.." a rawn ti thut mai, ka hrethiamlo hle mai. Nathana chuan Zuala, hnunglam hawi reng chu ava melh a, "Zuala, case chhui lai mek kan nei a. Tualthattu hian a tual thahte pahnih taksa ah hian alphabet 'R' a ziak tel ziah a, tichuan kan rindan chuan tualthattu hian maruti car var t(r)awng ve tawh tak a nei bawk niin kan hria a. Tin, he tualthattu hian a mithah te hi na takin a sawisa phawt zel a, chumi hnuah chuan a that chauh zel a ni." ati a. Zuala chuan min en chuang miahlo, hnunglam hawi reng chung chuan zawi sap leh fiah tak si hian, "Engvangin nge min hrilh kher a?" a ti khur khur a, a thinrim a ang lek lek zawk. Nathana chuan vin lek lek hian, "A chhan chu nang hian Maruti car var chu i nei a, tichuan i car ah khan hmanni a ka rawn len khan thisen khir nuai tawh chu ka hmu ani. A chhan ka zawt che a, mi khuva ei chil chhakna angin i sawi a, mahse thisen ani tih ka chiang a ni. Kha thisen khir kha i hriatloh laiin hmawlhtein ka ziat thla a, sarangah ka thun a, tichuan kan laboratory doctor hnenah thisen chu ka pe ta a. Tichuan tukin zing khan doctor chuan min rawn phone a, kha thisen leh Zarzokima thisen kha a inmil chiah tih a rawn sawi a ni." a ti ta phiar phiar mai.
Mak ka ti hle mai, Zuala chu ka en a, hnuglam a la hawi char char tho. Nathana'n, "Inring rawh.." a rawn tihna chhan kha ka hrethiam ta chiah e. Nathana chuan sawizawm zelin, "Mitthi te taksa-a R tih inziak kha...ngaihdan ka nei e. I nau hming Ruatpuii tihna a ni tiraw? Inpuang mai rawh Zuala, i thianpa ka nih hi, hlau suh....ka puih theih lai che hian thudik chu sawi rawh." a ti a. Chuveleh rum em em hian a rawn hawi let a, a mit a sen vek a, a mittui a tla zawih zawih bawk a. Thinrim hmel zet hian Nathana chu a melh a, "Ni e, ka thah an ni..an phutawk chiah. A chhan i hre duh em? Achhan chu ka nau Ruatpuii an thah vang a ni, accident kha an thlen tir lui a ni. Nathan, ka nau kha nangpawhin i nau angin i en ve anilawmni? I nau Ruatpuii kha an that asin...Zarzokima kha Ruatpuii bialpa, ka nau bialpa a ni a. Ka nau hian a hmangaih em avangin sex te hial pawh alo hmanpui thin a. Zarzokima khan Ruatpuii kha a duhlo chung a saruak thalak te a dil thin a, mahse ka nau khan a hmangaih em avangin a thawn leh mai thin. Mahse kha mi tenawm Zarzokima khan ka nau saruak thlalak te chu a thian te pahnih, Lalhmingmawia leh Laldingliana te chu a lo hmuh tir thin a. Tichuan chu mite chuan sex hmanpui ve an duh a, tichuan ka nau chu a saruak thlalak thehdarh ah vau in an mutpui lo anih chuan thlalak chu tih leak out an tum thu an hrilh ta a. Ka nau mangang leh thlapang chuan an thu chu a hnial ngamlo a, tichuan an pathum chuan an duhtawkin ka nau chu an mutpui ta a ni. Vawikhat chu kan inhnuaiah ka nau chu in awhhlum a tum lai ka hmu thut mai a, ka chhan hman hlauh a ni. Thil awmzia ka zawt a, tichuan engkim min hrilh ta vek a. Ka thinrim lutuk chuan chumite chu inhmuh puiah ka sawm a, an pathum chuan nasa takin ka sawisa hlawm ta a. Police hnena ka report tur thu te ka hrilh a, ngaihdam min dil a, mahse ka ngaidam dawnlo. Ka nau class bang anlo chang a, tichuan kha truck, ka nau su tu truck khalhtu kha tu dang nilovin, an thian zinga mi Laldingliana a ni. Enteh Nathan, police hnenah report ka tum a, mahse keini mi rethei te chuan thiam kan chang leh dawn chuang lo. I puihna dil ka tum a, mahse diktaka hna thawk thin i nih avangin heng misual pathum te hi jaila khung bak engtin mah iti dawn chuanglo tih ka hria a, chuvang chuan keimah ngeiin phuba lak ka duh ta a ni. KA hna chu ka zo tep tawh, Zarzokima leh Lalhmingmawia chu ka that tawh a, tunah chuan ka nau thattu diktak, Laldingliana chiah a bang tawh. Min dang suh, ka kal a hun e, min dang reng reng suh ange che, Nathan." a ti ta phiar phiar mai a. NAthana chuan a pistol a phawrh a, Zuala chu tin pah chuan, "Khawiah mah i kal lovang, Zuala...a tawk. Thudik i sawi tawh a, ka kutah dah rawh. Tual i thah belh tawh lovang, duhtawk tawh rawh." a ti a. Keipawh chuan ka pistol ka phawrh a, ka tin ve nghal a. Zuala chuan min rawn zuan thut a, ka pistol chu min laksak a, min tin ta. Nathana chuan, "Zuala, duhtawk rawh...ka kap tak tak ang che." a ti khur khur a. Zuala chuan vin zet hian, "Min kap rawh, i thianpa ASP hi ka kap ve nghal ang. Nathan, ka thianpa i nih kha..ka hna hi min thawh zawh tir phawt rawh." ati a. Tichuan muang chang chuan min tin reng chung chuan a kal a, keichuan, "Sir, kap rawh..kap ta che." ka lo ti vak vak a. Mahse Nathana chuan a tin reng ringawt, Nathana biangah chuan mittui a luang a, rum zet hian Zuala chu a en a, tichuan Zuala chu a tlanchhe ta. Ka thinrim lutuk chuan, "Engvangin nge i kah loh?" ka ti vin tuar a. NAthana chuan a aia vin hian, "Ka theilo ani, ka thianpa ani a, ka theilo a ni." a ti vak vak a. Rang takin motorah kan lut a, tichuan Zuala chu kan umzui ta a. An inlamah kan zawnga,a awmlo, kan zawng kual hrep a, kan hmu chuanglo. Mahse vanneih thlak tak maiin kawnghnuaia Maruti var tlan kan hmuh chuan NAthana chuan, "Khu...khuta khu." a ti a, rang takin kan umzui nghal a.
Maruti var chu building hlui, sak chhunzawm loh lam pan chuan a kal leh ta, chu building chu hmanni deuha Nathana'n amah lo ngaizawngtu Angeli a chhanchhuahna hmun, RTF building ngei kha ani. Motor chu garage ah a lo in park a, inchung lama, "Min pui ru....min chhuah hram rawh." ti ri chu kan hre ta a. Tichuan inchung lam chu kan pan a, inchung kan va thlen chuan Zuala chuan rod bung chuan LAldingliana ngei mai chu a lo hlap vak vak a. NAthana chuan, "Zuala duhtawk rawh.." a va ti tuar a. Zuala chuan pistol min laksak tak kha a phawrh ve vat a, min rawn tin ta a. Zuala chuan, "Lo kal hnai suh u...Nathan, ka that dawn, ka that phawt anga in duh leh min man dawnnia." a ti a. Chuveleh Laldingliana chu a rawn tho thut a, rod bung chu la in hnuglam atang chuan Zuala chu a vit ta mai a, chu rod chu Zuala dulah chuan a rawn tlang hrawk thei hial a. Nathana chu a au vak a, "Zuala...nilo.." tiin a rak chel chul mai a. Dinga chuan rod chawp chuan inchung atang chuan Zuala chu a la namthla leh ta nghal. Nathana chu a mittui a tla zawih zawih a, a meng sen rum mai. Hnuailam a melh vang vang a, chutah rum zet hian a rawn meng a, Laldingliana lam chu a va melh ta ran mai. Dinga chuan, "Enge tikhan min melh a? Min thah a tum a, self-defence a nih kha...inhmuh vek kha.." a ti chel chul mai a. NAthana chuan fiah fel fai zet, nelawm loh zet chuan, "Tuna i thah tak kha ka thianpa a ni, truck-a i sut hlum, i duhtawka a taksa i chen hmechhe tleirawl kha ka nau a ni bawk." tih pah chuan vawi 10 vel chu a silai chuan Dingliana chu a kap ta siah siah mai a, inchung atang chuan a tla ve ta nghal a, Dinga leh Zuala chu an thi dun ta. Nathana nen chuan in chung atang chuan ka dak thla a, keichuan, "Sir, engtin nge kan tih tak ang?" ka ti a. Nathana chuan, "Zuala khan thil dik a ti a ni...tualthah kha chu adiklo, mahse an phutawk hremna a pe a ni. Rinawm, khaw danga hna ka thawh lai khan ka inluahna neitute chhungkaw thattu te kha kei pawhin ka that ve vek a, ka puzawn, Sanvi pa keruh lo vaw tliak tute lakah pawh Spain ram thleng zu thlengin phuba ka zu la a, chutiang chiah chuan Zuala pawh hian a ti ve a ni." a ti a. Keichuan, "Anih chuan engtin nge kan tih ang? Enge DGP bulah kan sawi ang?" ka ti a. Nathana chuan, "Tualthattu kan zawn mek hi...Laldingliana hi a ni, Laldingliana mi thah te chu...Zarzokima, Lalhmingmawia leh ka thianpa...Zuala te hi an ni." a ti chuai raih mai a, a biangah chuan mittui a luang zawih zawih bawk a, mit khap leklo chuan Zuala ruang chu a en ngawih ngawih mai a ni.
THE END
WHO IS THE MURDERER?
Written by : Aaron Malsawmdawngzuala
Nuthlawi ft 5'10 inches vel laia sang, Mizo hmeichhia ka hmuh tawh zawng zawng a la sang ber, pian nal tak leh hmeltha tak, USA a Nathana nena intawng, coffee dawr lian tak nei, aw mawi leh no zet mai Muanpuii kha inla hria em? Kha nuthlawi Muanpuii kha USA lamah bawk a kal leh tawh a, hna thar hmuin min liam san leh tawh dawn a nih chu. A ngaihawm dawn khawp mai, Lengpui Airport thleng chu Nathana nen pawn kan zu thlah ve ngei kha, ka lo sawi ve mai mai a nih chu. Awle keimah Rinawma, police rorum, ASP Rinawma, mi bawn lutuk mai ka lo lang leh ta e, Nathana nena kan hnuchhuina chungchang ka han hrilh leh ang che u. Mahse khawngaih takin mipa ho kha, a bik takin bialnu pawh hmu zo ve lo ho kha, lo ngaithla ve tawhlo mah ula apawi lo. Bialnu nei te leh nei velo te hi kan in anglo teh mai ania, bialnu hi nei ve tawh rawh u, a zah te pawh in zaklo emaw ni te ka ti hial thin. Ka sawi thui mah mah thin, ka insum zo thinlo a ni, ilo sawi leh tan dawn teh ang aw...
Nathana office-a Nathana nen kan titi dun melh melh lai chuan constable pakhat hi alo lut a, "Sir, tlangval pakhat alo lut a, DCP Nathana ka hmu duh a tia." a rawn ti a. Nathana chuan, "Lo luh tir rawh." tiin a lo chhang a. Tlangval tawi lampang,hmeltha bik lemlo tak, khabe hmul nei hi alo lut a. Nathana'n a hmuh veleh chuan, "Zuala i ni em?" a lo ti nghal a, Nathana hmel chu ka en a, a hlim hmel kher mai. Chupa pawh chu rawn luh pah chuan, "Police Officer Nathana maw ilo nih tawh bik a?" tih pah chuan a rawn nui lut var var a. Nathana chuan chibai pah chuan, "Lo thu rawh, enge i rawn tih dawn a? Inhmuh lohna ava rei ta vawng vawng ve, thianpa." a ti a, chupa pawh chu a thu a. Chupa hming chu Zuala ngei chu a ni, kei ai chuan a chhe ve hle tih kha lo hre phawt mai teh u. Zuala chuan, "I chanchin hi ka hre thin a, news ah te i lang nasa thin alawm. Tual thah case, eiru case, mibo case tih vel han awm se, a chhui tu tur chu DCP Nathana tih hlir, chhuichhuah an nih pawhin a chhuichhuak tu chu DCP Nathana tih tho, i ropui hle mai. Mizoram news chauh nilovin Mumbai news ah te, Andhra Pradesh news ah te leh Hyderabad news ah te pawh i lang zel mai chu a nia, kan kawm ve phak tawh dawn che amawni le?" tih pah chuan a nui huah huah a, a fel hmel reuh zek lehnghal. Nathana chuan nuih pah chuan, "Tehduah thin che hian...enge i rawn tih dawn reng reng a?" a han ti a. Zuala chuan, "Aaaa...hei hmanni lawk khan ka nau a boral a, kan chhungkua ah zirlai awmchhun a ni bawk nen. Kei BA pawh pass lo hian lehkha ka han zir tha leh ta a nih hi, pawisa neih zawng zawngin J.Thankima college ah hmuihmul buk chhurin 1st semester ka zu tan veleh a. Kan 1st day ah pawh class room ka lut chu, 'Good Morning, Sir.' minlo la ti zui mawle." tih pah chuan a han nui leh rih a. Nathana chuan, "A zialo kher mai, engtia boral nge a?" a ti a. Zuala chuan, "Tlai alo haw kha, truck nen an insu a, a vanduai thlak tak tak a ni. Mahse zep lo chuan a thiamloh zawk a nia, license a la nei lova, khalh pawh ala khalh thiam tha manglo lehnghal a. Tih ngaihna a awmlo em a, kan inngaidam ta mai a nih kha." a ti a, a khawngaihthlak awm reuh kher mai. Nathana chuan, "I nau kha hmeichhia tiraw?" a ti a. Zuala chuan, "Aw...Lalruatpuii a nia, kum 19 a ni ve tawh." a ti a. Nathana chuan, "Engtik khan nge a boral a?" a ti leh a. Zuala chuan, "Nikum December thla khan...an exam zawh ni a ni lehnghal a, alo haw lam a nia, a zialo khawp mai. Mahse mihringte hi kan hma hun kan hrelo em a, tu nge thi hmasa dawn a, tunge thi hnuhnung dawn tih hi tuman kan inhre lo a. Kan tana tha tura Pathian ruat a niang chu kan ti ta mai a ni, mahse pawisa tlem azawng chu kha Truck Driver khan min pe ve a." a ti deuh luam a. Nathana chuan, "Police te in rawn reng reng em? Truck driver chu a dimkhur loh vang te pawh a ni ve thei tho a, chutia inngaihdam rikngawt chu a dik dawn em ni?" a han ti leh a, Nathana chuan a lak serious hmel kher mai. Zuala chuan, "Rawn ve ang chu, mahse sawi tak ang khan ka nau khan license a neilova, a scooty ah khan 'Learner' sign kan bel lo bawk a, thiam chan chu a har khawp mai. Chubakah a la thiam chiang silo nen, midang hmu tute pawhin ka nau thiamloh a nih thu an sawi vek a, hun kal tawh a ni tho a, harsa hle mahse kan inngaidam tawn ta mai a nih kha." a ti a. Nathana chuan, "Anih chu mawle, azia lo hle mai. Anih leh tichuan Aizawlah inlo peng tihna em ni?" a ti leh a. Zuala chuan, "Kan lo awmna chu a rei tawh a, ka rawn be ngailo mai mai che alawm. Ka nau pawh hi J.Thankima college ah a kal ve thova, accident thlenna hmun pawh college bul lawk alawm. Ka pa hian a theih ang tawkin mistiri hna hi a thawh chhunzawm zel a, kan inchawm tawk tawk a ni ber e. Ka nu lah a damlo hleithei bawk silova, kei lah ka lo awmtha duhlo khanglang bawk nen. Ka nau ber a awm talo chu hreh chung chungin ka pa chuan college min kal that tir leh ta a nih hi." a ti a. Nathana chuan, "Enteh Zuala, puih in ngaih chuan ka awm reng a nia aw..pawisa in mamawh pawhin, ka hausa e ka tihna nilovin, sawi hreh reng reng suh aw?" a ti a. Zuala chuan, "Awle, enteh Nathan, ka kal phawt ange. Naktuk ah class banah ka lo leng leh ang." a ti a, Nathana nen chuan pawn thleng chu an inthlah a.
Nathana chu a rawn lut leh a, lungawiloh hmel zeta min rawn melh pah chuan, "Lo biak ve thin tur alawm, Eka...polite lo thei lutuk." a rawn ti ringawt a. Rum zeta lo melh let pah chuan, "Enge maw mi hauh leh rikngawt thin le? Biak dan tur ka hrelo ve a ni mai a, thinchhe lutuk." ka lo ti hrep a. Nathana chuan, "Hmeichhe chhelo deuh chu ni se, engmah pawh ka sawi veleh hman tawp nang. I be leh hawr hawr anga, hmeichhe lawm lutuk." a han ti leh ngawt a. Ka hnial vel peih tawh lo, "Engtin nge in inhriat a? Tunge a nih a?" tiin ka han zawt a. Nathana chuan, "Lalbiakzuala a nih kha, Hyderabad atanga Mizorama ka lo haw khan kan inah a pa nen an rawn inhlawh thin a. Apa hi mistiri ania, kan inhnuai kan sak that khan an rawn thawkdun alawm. Khata tang khan kan innel a, kan inkawm thin a. Ala naupang lutuk, i fapa rual lek, kum 30 chauh." a han ti kherah, ka kum nen a inthlauhna a nasa kher lo asin mawle, ngeiawm thei lutuk mai. Keichuan, "Deuh kher zela che...anih chuan kum 30 a ni tawh a, college 1st year a kal tha leh tihna nimaw...a zahthlak ve det ang." tih pah chuan ka han nui a. Nathana chuan, "Mizorama ka nu leh pa te bulah ka rawn awm tirh khan Zuala leh Francisa hi ka kawmngeih ber te an ni a, anni pahnih bak thian ka nei ngai lo. Francisa lah chawlh i hman lai khan constable hna rawn thawkin ka department a rawn join ve dek dek a, politician eiru hovin an that lehnghal mai bawk sia. Zuala te inah pawh hian ka leng fo a, a nau Ruatpuii pawh ala te lutuk, middile school vel chauh ala kalin ka hria khatih hunlai khan." a ti a. Keichuan, "Umm..anih chu. Nihleh khaw dangah an pem tihna em ni?" tiin ka lo zawt leh a. Nathana chuan, "Um...kan department ka join chiah khan Francisa kha khawndangah an pem ta daih a. Zuala erawh hi chu Aizawl mi anilo hrim hrim a, rawn pem ve mai chauh annia. Francisa a pem hnu khan an khaw lamah a haw ve ta nghal anih kha." a ti a. Tlai alo ni a, keini pawh kan duty kan zo leh ta, vai tuai inngaizawng ang maiin ka bike-ah kan inphur a, kan haw dun leh ta. Zan alo ni a, computer hmaah thu in ring takin hla ka ngaithla a, ka ri leh ta bur bur mai. Ka hla ngaihthlak duhzawng hi ka han sawi ve reng reng ange, vainu pasal Nathana te angin vai hla ka ngaithla ve ngailova, hip-hop tih angreng, pop tih angreng, RnB tih angreng ka ngaithla ve peihlo. Keichuan Rock lampang hi ka duh in ka atchilh deuh bur a, Metallica, GnR, Pantera, Dream Theatre te leh A7X tih te ngat ani keini mipa diktak chuan kan ngaihthlak thin ni. Ka nu chuan ka room bang a rawn chum ri bur bur a, ka hla play lai chu ka tizawi a, "Enge?" ka ti vin tuar a. Ka nu chuan, "Ti zawi ve deuh thin la, hei Nathana te an lo leng a nia." a rawn ti a. Ninawm lutuk, nilengin kan inhmu a, in lamah lehzel mnlo zui hi chu ka hne ve tep thin. Ka computer chu ka off a, ka va chhuak ta a. Nathana leh Amandai leh SI Liantea te an lo ni a, eng tak chu nimaw? Nathana chuan, "Rockstar alo chhuak e." tih pah chuan min lo nuih a, SI Liantea pawh a lo th(r)en th(r)aw kha.Amadai pawh duhawm zetin min lo nuih leh seih tawh, henu hi chu....sawi leh lo mai ang, Tluangtei a thinrim palh ang. Ka va pan hnai a, "Enge ni ta, pute u?" ka han ti deuh kher a. Nathana chuan, "Keini Police nep tak te hian nang police officer rothap zet leh fing em em mai hi nichin lawk khan ruang an hmuh thu kan rawn hrilh che anih hi." ahan ti kher a, ka va han hlap chak tak. Amandai chuan, "I phone i silent a mi? Ka rawn call nasa lutuk che a?" a lo ti ve bawk a. Ka nu lah chuan, "A mawl ania, ring deuh deuh hian hla a ngaithla a, hla pangngai pawh a ngaithla ngailo, t(r)e vak vak zel mai..." a lo ti hlur bawk a, ka nu lah hi. Nathana chuan, "Hawh teh, iva en ve ang hmiang." a ti a, peihlo tak chuan ka insiam a, kan inzui chhuak ta hlawm a.
Ruang awmna chu Chhinga Veng a ni a, Pu Rintluanga te inhnuai ah a lo let reng a ni awm e. Kan va thleng a, mipui lo zi mur mur chu kan han hnawt kiang a. Ruang chu kan han en chiang a, a thihna ala rei lutuk lo tih a hriat theih, a taksa pawh a la lum. A lu ah na taka vuak a ni a, chumai nilovin vawi khat aia tam vuak a ni. Hmuh a nuam teh chiam lo khawp mai, a hmai chu thisenin a bual khat vek a, a ban ruh a tliak bawk. Tualthattu hian a thah hma hian nasa takin a sawisa tih a hriat theih a, a mit a vung bur bawk. Ruang chu constable ho chuan post mortem turin an phur phei a, Nathana chuan a phone light on in a bul vel chu a han en kual a. Hnuhma a awm lemlo nangin Pu Rintluanga te inhnuaia thah chu a nilo tih a chiang. A chhan chu kawngsir atang chuan Pu Rintluanga te inhnuai thleng hian thisen far a awm tlat a, tualthattu hian a hnuk phei a ni ngei ang. Nathana chuan, "Tualthattu hian hepa hi hmundangah a that a, a thah zawh veleh rang takin hemi te inhnuaiah hian a dah a ni. Ka rindan chuan a thah zawh veleh motor ah a phur anga, tichuan kawngsir ah a motor chu a park tha leh phawt anga, tichuan ruang hi motor atang chuan la chhuakin hetah hian ava hnuk phei a ni ngei ang." a ti a. Amandai chuan, "Sir, mitthi hi Bawngkawn ami ani. A hming chu Zarzokima a nia, kum 28 mi, Hotel Employee a ni awm e. Hei, Constable Siama'n message min rawn thawn e." a ti a. Nathana chuan, "Amanda, Liantea nen mitthi chhungte inah lo va kal ula, kei leh Rinawma hian Pu Rintluanga te hi thu kan han zawt fiah ve reng reng ange." a ti a. Amandai leh Liantea te chu an kal ta a, kei leh Nathana erawh Pu Rintluanga te inah chuan kan inzui chho a. Pu Rintluanga nupui Pi Hmangaihi chuan thingpui min rwan pe a, thingpui no dawm pah chuan Nathana chuan, "Pu Rintluang, ruang hi dar engzat velah nge in hmuh? Tu berin nge hmu?" a ti a. Pu Rintluanga chuan, "Keiman ka hmu a, kuhva leiturin ka chhuak a. Kan inhnuaiah hian alo let reng a, a tir chuan tlangval zurui chatthla emaw tiin engah vak pawh ka ngai lemlo. A thim em avangin a hmel pawh ka hmu chiang thei vak lova, en mang hleilovin ka va sawi vak vak a. Mahse a che eih silova, kuhva chu ka va lei ta a, ka let leh chuan kan in bul kawnga thisen niawm tak lo awm hi ka hmu a. Ka phone lightin ka han en a, thisen tak tak a lo ni a. Tichuan ka va pan hnai a, a hmaia thisen lo luang nuai mai te chu ka hmu a, tichuan a mar ka en a, a thi tawh tih ka hre ta a, ka lo phone ta che u a ni. Ruang ka hmuh hian dar 8 a pel tawh, chuzawng chu ka hriat a ni e." a ti a. Nathana chuan, "Anih chu mawle, anih leh thawm enge maw tal in hria em?" a han ti leh a. Pu Rintluanga chuan, "Hre miahlo, chubakah khawlaia vei vak hi an tam a, motor tlan ri lah chawl lovin a awm reng a, kan lo ngaihtuah loh vang nge, engmah kan hrelo." a ti a. Nathana chuan, "Rina, pawnah sawn mipui an la awm nual a, tualthattu in ruang a dah that lai vel hmu an awm nge awmlo va zawt lawk teh." a ti a, tichuan ka chhuak ta a. Mipui lo phu nuai nuai te chu ka ko khawm a, tichuan inla Singhama tawkin ka han hawikual vel a, "A lan dan chuan ruang hi tualthattu hian Pu Rintluanga te inhnuaiah hian a hnuk phei niin kan ring a, ruang inhmuh hma khan inhnuai zawnah hian mihring ding emaw, tu emaw tal inhmu em?" ka han ti a, mahse engmah an hmuhloh thu hlir chuan min chhang hlawm a. Naupangte pakhat chuan, "Ka pu, zanin dar 7 leh achanve vel khan Pu Rintluanga te inkawt ah hian car var pakhat chu minute 5 vel lai a ding a, mahse engah vak ka lo ngai lova." a rawn ti a. Naupangte bulah chuan ka va kal a, "I chiang amaw? I hmu tak tak em?" tiin ka han zawt a. Naupang chuan, "Aw...Pu Rintluanga te in zawn chiah hi kan in a ni a, tukverh atang hian ka hmu alawm. Mahse mihring awm ang chu ka hmulo, maruti car a ni a, car ding satliah ve mai turah ka ngai a." a ti leh a. Keichuan, "Anih chu, i ti lawmawm e." tih pah chuan mipui te bulah chuan, "Haw rawh u, Pu Rintluanga te pawh in ti mangang mai mai, engmah tihtur in neilo." tiin ka han hau hrep hlawm a, an haw darh ta a, a then chuan min ngei deuh aniang, an phun phei nung nung hlawm a.
Nathana bulah chuan ka thil hriat te chu ka sawi a, Pu Rintluanga chuan, "E...Lawma a nih ngei dawn chu, kan inbul ami anih chuan." a lo ti a. Nathana chuan, "Nakinah Lawma pawh chu thu kan zawt fiah leh dawn nia. Pu Rintluang, lo fimkhur ru aw...tualthattu hian in inhnuai kher a hmang bawk si a, chhan aneih ngei ka ring." a ti a, tichuan kan chhuahsan a, Station lam kan pan ta a. Station chu kan thleng a, Amandai te pawh chu an lo thleng ve nghal a. Amandai chuan Nathana bulah chuan, "Sir, Zarzokima hotel thawhna hi Hotel Regency a ni a, kum 1 lai chu a thawk ve tawh a ni awm e. Amah hi Front office department ah a awm a, mi pawisawi lo leh tlangval fel tak a ni tiin an sawi a. A chhungte pawn hmelma a neih awm te, hawtu a neih awm pawh an hrelo. Amah pawhin mi huatthu a sawi khat hle an ti a, mi huat a neih awm pawh an hrelo a nih chu." a ti a. Nathana chuan, "Anih leh ngaihzawng a neih leh neihloh in zawt em?" a ti a. Amandai chuan, "A neilo a ni awm e, bialnu hlui chu a nei a, mahse chu chu khawdang daih a mi a ni an ti." a ti a. Nathana chuan, "A tha e, post mortem result hi engtik velah nge a chhuah theih ang?" a ti a. Amandai chuan, "Naktuk zing dar 8 hma chuan a chhuak turah ka ngai." a ti a, chutih lai chuan DGP a lo lut hlawl mai a. Nathana chuan, "Ehe Sir, inah lo awm mai mai rawh ka tih a, ilo kal ve duh kher a.." alo ti a. DGP chuan, "Hna te chu a lian emaw a te emaw, kan thawk tlang dial dial ang chule...enge chanchin? Hmasawnna te a awm em?" a rawn ti lut nghal bawrh bawrh a. Nathana chuan, "Awm lutuk lo, ruang kan hmuhna bulah khan zanin dar 7:30 vel bawr khan car var a ding char char tih thu naupangte pakhatin a sawi a." a ti a. DGP chuan, "Tu naupangte maw?" a ti a, Nathana chuan, "Pu Rintluanga te in bul lawka awm a ni a, minute 5 vel lai chu car chu Pu Rintluanga te inhnuai zawnah chuan a awm a, mahse engah vak a lo ngai lova." a ti leh a. DGP chuan, "Pu Rintluanga i tih chu ruang an hmuhna inhnaui nei tute chhungkaw pa ber aniang maw?" a ti leh a, Nathana chuan, "Aw ni e." tiin a chhang a. DGP chuan, "A that chu, zan khatna lekah pawh hma kan sawn khawp alawm le...car var chu eng car nge?" a ti leh a, DGP hi chu zawhna hlir hian a khat a, amah tawp hi QUESTION MARK ani tawp. Nathana chuan, "Maruti car ania, a number erawh a lo chhinchhiah lemlo a ni." a ti a. DGP chuan, "Umm...atha e. Maruti car var chu kan zawn phawt angai anga, mahse maruti car var chu a tam awm ropui si a, zawn uluk deuh angai dawn a ni. Nathan, he case hi nang leh Rinawma leh Amandai leh Liantea te kutah awm leh rawh se aw....in pali hian in tha ber a, in chhuichhuak hma deuh ang chu..." a ti a. Nathana chuan, "Sir, keimah chauh pawn ka buaipui thei alawm, hetia officer leh inspector rualin case pakhat kan khawih rual thup chuan case dang pending a awm ve nual sia, hun a hek mai mai lomaw...te ka lo ti ve mai mai." a han ti deuh duah a, a zaktheilo ania. Ama kutah chauh hian dah ta se, "ASP Rinawma hian min pui bawk se.." a ti leh tho awm sia, lo ngai reng mah rawh u, a sawi leh ngei ngei ang. DGP chuan, "A ni tho mai, mahse tanrual chu chakna an tih thin kha....Nathan, nangmah chauh chuan i huam ang maw?" a han ti a. Nathana chuan, "Um...mahse ASP Rinawma hian min pui ve se chu ka duh khawp mai." a ti a. Ka sawi reng kha...a ti leh ngei ngei ang ka tih kha, LULIAN-A hian min tel ve ziah. DGP chuan, "Atha lawm, nangni pahnih hi chu in inhmeh ber mai." tih pah chuan a la nui huah huah zui. NAthana chuan min rawn en a, minla siai zeuh zui, ka ten lutuk. DGP phone a lo ri a, minute 2 vel a biak hnu chuan a lo let leh a, "Ka nupui pum ana leh thut a, ka va haw ange aw...nangni pawh in thu thu a ni maw, Nathan, i tih dan dan a ni tawh mai aw.." a ti a, DGP chu a haw ta a.
Amandai chuan, "Sir, puih in ngaih chuan ka awm reng ania aw...case dang pending hi chu midang khawih tur an tam emai." a lo ti a, SI Liantea pawh chuan, "Keipawh Sir, min mamawh chuan ka awm reng e." a lo ti ve bawk a, kan fel mah mah thin a ni. Theih phei se chu an pathum hian chhui zui se, kei erawh Tluangtei te run in bela, hmangaihna par lo tlan dun daih ania ka chak ni. Amandai lah hian, "Mahni cousin te lo ngaihzawn, hmuh zawhloh thlak lutuk." tiin min chhaih ve ziah leh nghal, min chanloh vang mai mai ani, a thikthu te hi a chhe reuh ania, Amandai te pawh hi. Nathana chuan, "I haw phawt teh ang u, naktukah kan sawi zawm dawnnia. Chuan Amanda, nang chu case pending kha lo khawih chhunzawm zawk la, Liante...nangpawh in venga in an rawk chungchang kha lo buaipui zawk rawh. Ka sawi tawh ang khan hei chu kei leh Rinawma'n kan buai pui leh mai ang." a ti a, huiham. Ni e, kan chhui dun leh mai loh chuan, a changtupa te pahnih kha kan ni miau bawk sia, hahthlak lutuk mai. Tichuan kan haw darh ta a, keipawh chu Nathana te ina peng kawi tawh lovin ka haw tlang ta a. A tukah chuan investigation nei turin Nathana nen chuan kan mitthi Zarzokima thawhna thin, Hotel Regency lam chu kan pan ta a. Manager bulah chuan kan nihna te kan sawi a, kan kal chhan te kan sawi a, tichuan ama office ah titi ho turin kan inzui chho ta hlawm a. NAthana chuan Manager chu thu a zawt ta a...
"Ka pu, Zarzokima hi eng ang mizia nge?"
"Ka hmuh danah chuan mifel tak a ni, mi pawi a sawi ngai lova, a taima a, sawiselna ka hrelo."
"A thawhpuite zingah hian itsiktu emaw, ngeitu emaw an awm in i hria em?"
"Chutiang an awm ka hrelo, zeplovah chuan hetia hna thawk ho te reng reng chu Hotel dangah pawh a ni vek a, han inkawm hrang bik te, han inngei zeuh te leh han in vin bawrh bawrh chang te hi chu a awmlo thei lova, mahse chutia inhaw ta em em an awm chu ka hrelo."
"Anih leh amah ah hian tunhnai velah danglam a awmin i hre thin em? Entirnan a mizia a thlak thut emaw, han ngui riau chang a neih te a awm em?"
"Chutiang pawh ka hre chuanglo, Front Office department ah a awm a, mikhual lo welcome tu ber an nia. Kan regular guests te pawhin ka bulah ngei pawh an fak nasa thin hle a, a thawhpuite pawh hian an fak thin khawp mai."
"I duhsak bik avang hian thiktu a lo nei ru reng te hi a nilo maw?"
"Ani ve thei tho a, mahse ka staff te hi ka hre chiang a, chutia tualthat duh tur khawpa nunrawng chu an awmlo ang."
"A hrim hrimin vawiin chu i staff te hi an va tlem reng reng ve, tinge a?"
"Nia, Zara vuina ah an kal ve hlawm a. Keipawh kal tur chu ka nia, mahse tukin khan inlo kal dawn tih min rawn hrilh lawk avang khan ka lo nghak tawp mai che u a ni."
"Umm....a lawmawm e, kan lo la leng leh maithei ania, kan kal phawt ange."
"Awle, in duh duh hunah inlo leng leh dawnnia. Thingpui te in in duh lo maw?"
"In lo mai ang, hna kan la ngah si a, kan kal leh zawk mai ange."
Hotel chu kan chhuahsan a, motorah lutin Bawngkawn lam kan pan leh ta a, Zarzokima te inah kan kal dawn a ni. Motora tlan pah chuan Nathana chuan, "I ril a tam em? Thil kan ei phawt dawn em ni?" a ti a. Keichuan, "Tam mai mai lo, mahniin ka chhui thei reng alawm ti vel zuah zuah a, ASP hian min pui se...tih leh tho zel si." ka ti nuah nuah a, nizan vang khan ka la lungawi thlawt lo a ni. Nathana chuan min en hraw a, "Tingeeee? Hmeichhia ang maia i phun nuah nuah zel a? A hahthlak emai, ti hi chuan Inspector pangngai kha ni leh mai rawh...chupawh chu i phu lo, SI Liantea nen hian in nihna hi inthleng teh u." a la ti zui, motor atanga ka tlawh thla tawp lo kha chu lawm hle rawh se. Zara te in chu kan thleng ta, an lo zai mup mup mai a. Zarzokima pa chupawna thute zinga pakhat chu kan koh chhuah tir a, kan motor park-na bulah chuan kalin kan titi pui ta a. Nathana chuan, "Ka pu, i hming kha ka theihnghilh daih mai, enge khah?" a han ti te te a, a inla Raymonda vel hi ka'n ti khawpah. Zara pa chuan, "Lallawmsanga ka ni a, mahse Mapui min ti mai rawh u." a ti a. Nathana chuan, "Umm...anih chuan Pu Mapui, nizan lam khan kan naute kan rawn tir tawh tho nangin, thu han zawh ve che kan duh hrim hrim a, kan lo kal tawp a ni. A pawi emlo ang chu tiraw?" a ti a, Pu Mapuia chuan, "Pawi love, in duh duh min zawt rawh u." a ti a. Nathana chuan, "I fapa hian tunhnai velah in lakah lungawilohna a neih awm i hria em? Anih loh pawn a mzia han inthlak thut te a awmin i hria em?" a ti a, Pu Mapuia chuan, "Ka hre lo, chutiang a awm awm pawh ka hrelo." a ti a. Nathana chuan, "Anih leh rinhlelh deuh te in nei em?' a ti leh a, mahse Pu Mapuia chuan, "Rinhlelh tur pawh an awmlo, hmelma a neih awm kan hre silova, kan hrethiam biklo." a ti leh a. Zawhna tamtak kan zawh hnu pawhin a ngei hlirin, engmah a hriatloh thute, rinhleh a neihloh thute leh hetia thah a ni ringawt hi mak a tih thu te hlir chuan min chhang zel a, keini pawh chu kan beidawng ta, Station lamah chuan kan phei leh ta a. Station kan thleng a, NAthana office ah chuan Nathana nen chuan kan inzui lut a. Nathana tih hming sawi reng pawh hi ka ning mange awww...a nghal si, min ti duhdah si. NAthana office hi chu ka office ai pawh hian ka awmtam zawk mahin ka hria. Kan luh rual deuh chiah chuan Doctor pakhat hi alo lut tel ve nghal a, chu doctor chu Zarzokima post mortem tu kha a ni. Doctor chuan Nathana bulah chuan post mortem result pek pah chuan, "Kan tihpalh a ni Sir, duh aiin result kan peih har deuh a, kan tlai ta anih hi. A ruang kha chu tukin zing khan an inah kan dah phei tawh a, mahse a result hi kan lo beirei deuh a." a han ti deuh luam a. Nathana chuan, "Apawi hleinem, thil danglam deuh hmuh chhuah in nei em?" a han ti a. Doctor chuan, "Thlalak ka zeh tel ho kha han en mah la, mitthi taksa ah khan, a hrawk zawnah khan alphaber 'R' tih a inziak a, enge awmzia chu ka hrelo. Chemte hmanga ziah niin a lang, chuan tualthattu hian thah mai duh tawk lovin na takin tuar se a duh a ni ngei ang." a ti a. Nathana chuan thlalak chu min hmuh tir ve a, doctor sawi ang ngei chuan thlalak ah chuan Zarzokima hrawk ah chuan alphabet 'R' hi alo inziak a, awmzia chu a nei ngei ang. Doctor chu a chhuak a, Nathana chuan, "Rinawm, enge awmzia nia i rin?" a ti a. Keichuan, "Ka hre biklo, awmzia chu a nei ngei ang." ka lo ti a. Nathana chuan, "Keichu ka rindan chuan Rinawma tihna a nih ka ring." a ti deuh kher a, rum tak hian ka melh a, "A ni kher lovang, keichu ka rindan chuan 'Raymonda hnek hnu Nathana' tihna a niang." ka ti ve deuh ngat a, a nui huk mai. Nathana chuan, "Eee...i sawi takah chuan, a nat zia kha...ka khawih tha ve hmanlo lehnghal a." tih pah chuan a nui ver ver a, hmeichhe ho chuan hmu se a nui hmel chu tha an ti lehpek ang chu, a chhiat chhiat nen hian.
Chutia kan titi lai chuan Nathana thian pa Zuala chuan kawngka rawn kik karh karh pah chuan, "Ka lo lut thei angem?" a rawn ti a. Nathana chuan, "E...nang i nimaw? Lo lut rawh...kha lo thu rawh." a ti a. Zuala nen chuan an inkawm thin lai vel te chu sawidunin an titi dun bawrh bawrh a, ka ning ania, sawi ve tur a vang bawk si, a khat tawkin ka lo khi ve leh suk ringawt thin a, duhleh an inah leng se titi pui ve mai tur ania. Nathana chuan, "Class i bang chiah ami, college naupang chuuu?" tiin a han chhaih vel a, Zuala chuan, "Bang tawh e, kan bang hma a...teacher thenkhatin teacher ve tho amaw min ti leh tawh...a hahthlak ania." tiin a nui vak vak a. Tichuan an titi zawh meuh chuan tlai ban a lo hun ve ta der mai, Nathana chuan, "Zual, engin nge ilo kal?" a ti a. Zuala chuan, "Taxi in, ka motor a chhia a, a t(r)awng ve tawh lutuk a, ka keng zak ve deuh mawle." a ti a. Nathana chuan, "In inah chuan ka lo leng teh ang, i nu te pawh ka hmu chak alawm." tih pah chuan min rawn en a, "Rinawm, nangmahin lo haw mai rawh aw?" tih pah chuan Zuala chu a bike-in a phur a, min kalsan nghal vang vang a nih chu mawle. Hei leh chen kan lo inkawm ve tawh a, a thianpa hlui hmelchhe zet alo lang ve dek dek a, kei aiin a ngaihsak zawk a, fairlo hle mai. Ka thik vang amaw inlo ti ange, ka thik peih vel lo, saw DCP Luluian-a saw, duhleh inkawm daih rawh se. Zan alo ni a, a ngaite bawkin computer ah chuan hla ka play a, ka rak leh ta vak vak mai. Ka phone a rawn ri a, NAthana a lo ni. Ka hla play chu ka tizawi a, "Hello, Sir?" ka ti a. Nathana chuan, "Ruang dang an hmu leh tawh, tun tum chu Lower chanmari ah a ni, kawnghnuai ah...kan in bulah ka nghak che, lo thlawk phei vat rawh." a ti a, phone a dah nghal. Peihlo tak chuan ka insiam leh ta a, Nathana te inlam pan chuan ka bike chuan ka inkhalh phei ve leh ta nghal a. Nathana chuan min hmuh veleh chuan, "I va rei ve." tiin min han vin nghal vak a, chhan pawh ka chhang peih lo. Tichuan kan bike ve ve khalhin ruang an hmuhna lam pan chuan kan kan ta nghal a. A hmun chu kan thleng a, ruang chu kawngsira side-drain ah a alo mu a. Nathana chuan mipui lo awmve ho chu a en kual a, "Tunge ruang hi hmu hmasa ber?" a ti a. Pa pakhat chuan, "Keiman ka hmu." a lo ti a. Chupa lam chu kan hawi thap a, Nathana chuan, "Dar engzat vel khan nge?" a ti a. Chupa chuan, "Dar 8 vel khan ka hmu a, zurui chatthla emaw ka tia. Mahse a mutna zawn side-drain ah hian thisen luangthla ka hmu a. Ka ngaih atha lova, ka en chianga, a thi tih ka hre ta a, keimah hi ania lo phone tu che kha." a ti a. Nathana chuan, "Rinawm, constable ho phone la, ruang hi post mortem turin hrilh rawh." a ti a. Nathana sawi ang chuan constable ho chu ka phone ta a, kan nghah pah chuan ruang hmutupa chu thudang eng eng emaw te kan han zawt leh nual bawk a. Constable ho an lo thleng a, ruang chu motor ah chuan an hlangkang a. Nathana chuan constable Siama bulah chuan, "Siama, mitthi hi tunge a nih a, khawi vengah nge a awm tih te, tute nge a nu leh pa tihte, tute nge achhungte tih zawng zawng hi Station-a ka rawn let leh hunah ka hre ngei tur a ni, lo zawng vat ang che." a ti a, tichuan ruang chu an phur phei ta a. Nathana nen chuan side-drain bul vel chu kan en kual leh a, minute 5 vel kan en hnu chuan Nathana chuan, "Rinawm, lo kal teh." a ti a. Nathana bulah chuan ka va kal hnai a, NAthana chuan, "Helaia motor kehniak hi en teh." a ti a, motor kehniak chu ka en a. Nathana chuan, "Zarzokima thattu leh tuna mitthi thattu hi thuhmun an ni...kehniak hi en la, maruti motor ke hniak a ni. Nizan khan naupang khan maruti var kha Pu Rintluanga te inkawtah a awm tiin a sawi a, tualthattu car ngei a ni. He kehniak hian a ti chiang zual khawp mai, hawh teh...Station lamah i let leh phawt teh ang." a ti a, engmah pawh ka sawi ve hman leh ta lo, Station lamah chuan kan let leh a.
Station kan thleng a, constable Siama chuan, "Sir, mitthi hi Lalhmingmawia, kum 25, Pu Rualkhuma leh Pi Sangzuali te fa naupang ber a ni. Zarkawtah an awm a, amah hi High School zirtirtu a ni." a ti a. Nathana chuan, "Um a tha e, Rinawm...i duh leh haw tawh rawh, ka lo buaipui ange." a ti a, ka va han lawm chiang tak, MANGTHA pawh ka ti peihlo, ka haw nghal nal nal. A tuk ah chuan Station ah chuan dar 8 leh a chanve velah ka thleng a, NAthana chuan a ngaite bawkin office ah min ko lut leh nghal a. Nathana chuan, "Rinawm, post mortem report a lo thleng hma deuh a. Kan rin dan chiah a ni, report-a a inziah dan chuan kan mitthi Hmingmawia dulah hian alphabet 'R' tih a inziak leh a, tualthattu hi Zara thattu tho tihna a ni. Chuan chiang em em bawk chu tualthattu hian maruti car a nei chiang bawk, kha naupangte ina a hmuh car ngei kha a car a nih ka ring bawk." a ti a. Keichuan, "Anih chuan Sir, Hmingmawia chhungte chu thu kan va zawtfiah dawn em ni?' ka ti a. Nathana chuan, "Nizana i haw hnu khan ka kal daih tawh, engmah hmasawnna a awm lo." a ti a. Tichuan chumi ni chuan investigation nei dunin tu tu emaw te chu thu kan zawt kual a, Hmingmawia thawhna school ah te kan kal a, a thiante inah te nen, mahse engmah hmasawnna awmlo. Tlai a lo ni der mai, Nathana chuan a lu a dawm vawng vawng a, "Umm....a chiang ta e, Rinawm...kalna tur pakhat chiah kan nei ta." a ti a. Keichuan, "Khawiah maw?" ka ti hu mai a. Nathana chuan, "Minlo zui phawt teh." a ti a, tichuan motorah chuan inphurin Nathana nen chuan chak takin kan tlan a. Kawnglaiah chuan a ding thut a, "Tinge i din a?" ka ti a, Nathana chuan, "Saw...Zuala ka hmu a, phur ve ang." a ti a. Ka ning kher mai, Zuala Zuala ti reng mai..."Sir, hnuchhui lai te chuan inkawm lo ula. Chubakah a hunlo emai, min tibuai mai mai zawk." ka lo ti vin hlur mai a. Nathana chuan, "Amak e aw....an inthleng ka thlah ringawt dawn lawm, i thinchhe lutuk." a ti a, ngawi reng chuan ka thu a. NAthana chuan Zuala, amaha lo tei kual rulh rulh chu ava au a, tichuan alo phei a, motor ah chuan a rawn chuang ve ta nghal a. Nathana chuan, "Zuala, vawiin class a nuam maw?" a han ti a. Zuala chuan, "Nuam a nimai, mahse a boring lutuk a." a ti nuah nuah a. Nathana chuan, "Taka Zual, a ruka zu kan in thinna tlang kha ila hrai em?" a ti a, Zuala chuan, "Hria e...kan kal dawn mi? Zu i nei ami?" a ti deuh thawt thawt lehnghal. Nathana chuan, "Beer chu ka nei a, in ho lawk ang u." a la ti zui. Ka va melh hrawk a, Nathana chuan minlo nuih suk ringawt, hunlo thin khawp mai. Tlang chu kan thleng a, beer te chu kan in a, Nathana leh Zuala pawh chu an titi tui tan khawp mai. Zuala chuan hnuglam hawiin tlai ni tla tur chu a thlir vawng vawng a. Nathana chuan min rawn hrilh ru zeuh a, "In ring rawh aw.." a rawn ti thut mai, ka hrethiamlo hle mai. Nathana chuan Zuala, hnunglam hawi reng chu ava melh a, "Zuala, case chhui lai mek kan nei a. Tualthattu hian a tual thahte pahnih taksa ah hian alphabet 'R' a ziak tel ziah a, tichuan kan rindan chuan tualthattu hian maruti car var t(r)awng ve tawh tak a nei bawk niin kan hria a. Tin, he tualthattu hian a mithah te hi na takin a sawisa phawt zel a, chumi hnuah chuan a that chauh zel a ni." ati a. Zuala chuan min en chuang miahlo, hnunglam hawi reng chung chuan zawi sap leh fiah tak si hian, "Engvangin nge min hrilh kher a?" a ti khur khur a, a thinrim a ang lek lek zawk. Nathana chuan vin lek lek hian, "A chhan chu nang hian Maruti car var chu i nei a, tichuan i car ah khan hmanni a ka rawn len khan thisen khir nuai tawh chu ka hmu ani. A chhan ka zawt che a, mi khuva ei chil chhakna angin i sawi a, mahse thisen ani tih ka chiang a ni. Kha thisen khir kha i hriatloh laiin hmawlhtein ka ziat thla a, sarangah ka thun a, tichuan kan laboratory doctor hnenah thisen chu ka pe ta a. Tichuan tukin zing khan doctor chuan min rawn phone a, kha thisen leh Zarzokima thisen kha a inmil chiah tih a rawn sawi a ni." a ti ta phiar phiar mai.
Mak ka ti hle mai, Zuala chu ka en a, hnuglam a la hawi char char tho. Nathana'n, "Inring rawh.." a rawn tihna chhan kha ka hrethiam ta chiah e. Nathana chuan sawizawm zelin, "Mitthi te taksa-a R tih inziak kha...ngaihdan ka nei e. I nau hming Ruatpuii tihna a ni tiraw? Inpuang mai rawh Zuala, i thianpa ka nih hi, hlau suh....ka puih theih lai che hian thudik chu sawi rawh." a ti a. Chuveleh rum em em hian a rawn hawi let a, a mit a sen vek a, a mittui a tla zawih zawih bawk a. Thinrim hmel zet hian Nathana chu a melh a, "Ni e, ka thah an ni..an phutawk chiah. A chhan i hre duh em? Achhan chu ka nau Ruatpuii an thah vang a ni, accident kha an thlen tir lui a ni. Nathan, ka nau kha nangpawhin i nau angin i en ve anilawmni? I nau Ruatpuii kha an that asin...Zarzokima kha Ruatpuii bialpa, ka nau bialpa a ni a. Ka nau hian a hmangaih em avangin sex te hial pawh alo hmanpui thin a. Zarzokima khan Ruatpuii kha a duhlo chung a saruak thalak te a dil thin a, mahse ka nau khan a hmangaih em avangin a thawn leh mai thin. Mahse kha mi tenawm Zarzokima khan ka nau saruak thlalak te chu a thian te pahnih, Lalhmingmawia leh Laldingliana te chu a lo hmuh tir thin a. Tichuan chu mite chuan sex hmanpui ve an duh a, tichuan ka nau chu a saruak thlalak thehdarh ah vau in an mutpui lo anih chuan thlalak chu tih leak out an tum thu an hrilh ta a. Ka nau mangang leh thlapang chuan an thu chu a hnial ngamlo a, tichuan an pathum chuan an duhtawkin ka nau chu an mutpui ta a ni. Vawikhat chu kan inhnuaiah ka nau chu in awhhlum a tum lai ka hmu thut mai a, ka chhan hman hlauh a ni. Thil awmzia ka zawt a, tichuan engkim min hrilh ta vek a. Ka thinrim lutuk chuan chumite chu inhmuh puiah ka sawm a, an pathum chuan nasa takin ka sawisa hlawm ta a. Police hnena ka report tur thu te ka hrilh a, ngaihdam min dil a, mahse ka ngaidam dawnlo. Ka nau class bang anlo chang a, tichuan kha truck, ka nau su tu truck khalhtu kha tu dang nilovin, an thian zinga mi Laldingliana a ni. Enteh Nathan, police hnenah report ka tum a, mahse keini mi rethei te chuan thiam kan chang leh dawn chuang lo. I puihna dil ka tum a, mahse diktaka hna thawk thin i nih avangin heng misual pathum te hi jaila khung bak engtin mah iti dawn chuanglo tih ka hria a, chuvang chuan keimah ngeiin phuba lak ka duh ta a ni. KA hna chu ka zo tep tawh, Zarzokima leh Lalhmingmawia chu ka that tawh a, tunah chuan ka nau thattu diktak, Laldingliana chiah a bang tawh. Min dang suh, ka kal a hun e, min dang reng reng suh ange che, Nathan." a ti ta phiar phiar mai a. NAthana chuan a pistol a phawrh a, Zuala chu tin pah chuan, "Khawiah mah i kal lovang, Zuala...a tawk. Thudik i sawi tawh a, ka kutah dah rawh. Tual i thah belh tawh lovang, duhtawk tawh rawh." a ti a. Keipawh chuan ka pistol ka phawrh a, ka tin ve nghal a. Zuala chuan min rawn zuan thut a, ka pistol chu min laksak a, min tin ta. Nathana chuan, "Zuala, duhtawk rawh...ka kap tak tak ang che." a ti khur khur a. Zuala chuan vin zet hian, "Min kap rawh, i thianpa ASP hi ka kap ve nghal ang. Nathan, ka thianpa i nih kha..ka hna hi min thawh zawh tir phawt rawh." ati a. Tichuan muang chang chuan min tin reng chung chuan a kal a, keichuan, "Sir, kap rawh..kap ta che." ka lo ti vak vak a. Mahse Nathana chuan a tin reng ringawt, Nathana biangah chuan mittui a luang a, rum zet hian Zuala chu a en a, tichuan Zuala chu a tlanchhe ta. Ka thinrim lutuk chuan, "Engvangin nge i kah loh?" ka ti vin tuar a. NAthana chuan a aia vin hian, "Ka theilo ani, ka thianpa ani a, ka theilo a ni." a ti vak vak a. Rang takin motorah kan lut a, tichuan Zuala chu kan umzui ta a. An inlamah kan zawnga,a awmlo, kan zawng kual hrep a, kan hmu chuanglo. Mahse vanneih thlak tak maiin kawnghnuaia Maruti var tlan kan hmuh chuan NAthana chuan, "Khu...khuta khu." a ti a, rang takin kan umzui nghal a.
Maruti var chu building hlui, sak chhunzawm loh lam pan chuan a kal leh ta, chu building chu hmanni deuha Nathana'n amah lo ngaizawngtu Angeli a chhanchhuahna hmun, RTF building ngei kha ani. Motor chu garage ah a lo in park a, inchung lama, "Min pui ru....min chhuah hram rawh." ti ri chu kan hre ta a. Tichuan inchung lam chu kan pan a, inchung kan va thlen chuan Zuala chuan rod bung chuan LAldingliana ngei mai chu a lo hlap vak vak a. NAthana chuan, "Zuala duhtawk rawh.." a va ti tuar a. Zuala chuan pistol min laksak tak kha a phawrh ve vat a, min rawn tin ta a. Zuala chuan, "Lo kal hnai suh u...Nathan, ka that dawn, ka that phawt anga in duh leh min man dawnnia." a ti a. Chuveleh Laldingliana chu a rawn tho thut a, rod bung chu la in hnuglam atang chuan Zuala chu a vit ta mai a, chu rod chu Zuala dulah chuan a rawn tlang hrawk thei hial a. Nathana chu a au vak a, "Zuala...nilo.." tiin a rak chel chul mai a. Dinga chuan rod chawp chuan inchung atang chuan Zuala chu a la namthla leh ta nghal. Nathana chu a mittui a tla zawih zawih a, a meng sen rum mai. Hnuailam a melh vang vang a, chutah rum zet hian a rawn meng a, Laldingliana lam chu a va melh ta ran mai. Dinga chuan, "Enge tikhan min melh a? Min thah a tum a, self-defence a nih kha...inhmuh vek kha.." a ti chel chul mai a. NAthana chuan fiah fel fai zet, nelawm loh zet chuan, "Tuna i thah tak kha ka thianpa a ni, truck-a i sut hlum, i duhtawka a taksa i chen hmechhe tleirawl kha ka nau a ni bawk." tih pah chuan vawi 10 vel chu a silai chuan Dingliana chu a kap ta siah siah mai a, inchung atang chuan a tla ve ta nghal a, Dinga leh Zuala chu an thi dun ta. Nathana nen chuan in chung atang chuan ka dak thla a, keichuan, "Sir, engtin nge kan tih tak ang?" ka ti a. Nathana chuan, "Zuala khan thil dik a ti a ni...tualthah kha chu adiklo, mahse an phutawk hremna a pe a ni. Rinawm, khaw danga hna ka thawh lai khan ka inluahna neitute chhungkaw thattu te kha kei pawhin ka that ve vek a, ka puzawn, Sanvi pa keruh lo vaw tliak tute lakah pawh Spain ram thleng zu thlengin phuba ka zu la a, chutiang chiah chuan Zuala pawh hian a ti ve a ni." a ti a. Keichuan, "Anih chuan engtin nge kan tih ang? Enge DGP bulah kan sawi ang?" ka ti a. Nathana chuan, "Tualthattu kan zawn mek hi...Laldingliana hi a ni, Laldingliana mi thah te chu...Zarzokima, Lalhmingmawia leh ka thianpa...Zuala te hi an ni." a ti chuai raih mai a, a biangah chuan mittui a luang zawih zawih bawk a, mit khap leklo chuan Zuala ruang chu a en ngawih ngawih mai a ni.
THE END
Comments