NATHAN EPISODE-13

NATHAN EPISODE-13
SPRING HEELED JACK

Ka room dawhkan a ka phone vibrate nghawr dat dat chuan min ti harh a, zawi muang chuan ka tho a, sana ka en leh te te phawt a, dar 8:30 alo pel der tawh mai. Rang takin ka tho a, ka phone chu ka han ban a, Nathana alo ni a, "Hello.." ka han ti dek dek chu vin zet hian, "Mut duhpa, i va la har ve.." a rawn ti nghal ringawt a. Ka haw hran lo, min vin hi chu ngaiah ka nei tawh, zaidam tak chuan, "Enge a?" ka ti mai a. Nathana chuan, "Salem Veng ah mithi ruang an chhar an tia, lo phei rawh.." a rawn ti a, ka chhanlet hma chuan a dah daih a, ka va han ngei tak em. Peihlo deuh chung chuan ka room chu ka chhuahsan a, ka intifai a, Station lam chu ka pan ta nghal a. Nathana chuan min hmuh rual rual chuan, "I rei emai aw Eka, hmanhmawhin kal vat ang." a ti a, tichuan Police motor chuan rang thei ang berin Salem Veng-a mithi ruang an hmuhna lam chu kan pan a.

A hmun kan thlen meuh chuan mipui anlo tam tawh ngei mai, mipui thenkhat te chu kan han hnawt kiang a, ruang chu puanin anlo khuh a. Ruang awmna lai hi Salem Veng hnuai, Traffic point thlen hma kawng reh lai deuh, in awm tamlohna lai a ni. Puan an khuhna chu kan la sawn a, a va han rimchhe tak em. Chu mithi chu tlangval kum 25-30 vel ni awm tak, pian pangngai ve tak, 5'8 vela sang a ni a, a hmel erawh thisen in bual khat vek avangin eng ang hmel pu nge tih chu a hriat mai theihloh. A dulah chuan kutin hriam tak ina a ham niawm tak hian hmun 4 laiah a indawtin a lo in zaithler a, chutiang bawk chuan a hrawkah pawh a awm bawk, ka rap lek lek a, tho in a bawm luai luai bawk a. Nathana chu a ding hluai a, "Ruang hmu hmasa ber tu hi tunge?" a ti a, hmeichhe tleirawl pahnih hi kan bulah chuan an rawn kal hnai a, pakhat zawk chuan, "Keimahni hian kan hmu.." a ti khur der der a. Nathana chuan, "Hlauthawng lo ula, kan bulah Stationah inlo kal angai tlat mai, inchhungte chu kan lo hrilhfiah leh vek mai ang." a ti a, keichuan chu nula pahnih te chu motorah ka luhpui ta a, Nathana chuan constable ho bulah chuan, "Ruang hi tunge a nih lo chhuichhuah tum ula, postmortem turin in thawn nghal bawk dawnnia." a ti a, tichuan kan kal liam ta a.

Station chhungah chuan chu nula pahnih te chu zawhna kan han zawt ta a, a ngaite ang bawkin Nathana chuan a zawt leh tan ta a...

"Mami, in hming minlo hrilh teh ule..."

"Lallawmzuali ka nia, ka thiannu hi Rinhlui a nia."

"Umm...khawi vengah nge in awm?"

"Salem vengah kan awm ve ve."

"Nihleh ruang chu engtin nge in hmuh?"

"Exer la turin khami kawngah khan tuktin kan kal thin a, chuan tukin zing pawh khan kan kal leh a, kan kal lam chuan ruang kha min hnungchhawn zawng hian a awm a, mi zurui chatthla anih kan ring a, kan ngaihsak duhloh mai bakah kan hlau deuh a, tichuan kan kal pel ta a. Kan haw leh lampang khan alo la mu reng a, kan ngaih a tha vak lo a, va biak chhin kan tum a, kan ngam chiah silo a, mahse kan va kalhnaih deuh khan a mutna bula thisen lo kawinuai mai chu kan hmu ta a, midang kan phone ta a ni.

"Nihleh he mithi hi tunge a nih in hria em?"

"Aih hrelo, midang pawn tunge a nih an hrelo."

"Awle, in fel e, in haw thei tawh ang, in phone number minlo pe ula, nakinah a tul dan azirin kan la mamawh maithei che u ania."

Nula pahnih an haw hnu chuan constable pakhat hi alo kal a, "Sir, mithi kha tunge anih kan hre tawh e. A hming chu Laltlanthanga ani a, kum 23 Mission Venga awm an ni, Pu K. Lalhmingthana leh Pi Lalchhuanmawii te fapa neihchun a ni." a rawn ti a. Nathana chuan, "Good...engtikah nge postmortem result hi a chhuah theih ang?" tiin a zawt leh a, constable chuan, "Naktuk zing dar 8 hma chuan a chhuah kan beisei." tiin a chhang a. Nathana chuan, "Rinawm, thingpui in lawk ang." tih pah chuan pawnah min kuah chhuak a, kan Station bula vainu hmeithai thingpui dawr tereuhte ah chuan kan lut a, thingpui leh pakora chu kan ei dun a. NAthana chuan, "Rinbawihte...a ruang kha i en vang vang khan engvanga thi nge a nih i rin? Accident nge ni anga tualthahna?" tiin min zawt a, min koh dan mai mai chuh, kei aia naupang lehnghal. Thingpui lemsak pah chuan, "Accident chu a nilo phawt, achhan chu motor a neilo a, abulah khan bike emaw scooty pawha awm lo a, chubakah motorin lo su pawh ni se a hliam en khan a pum leh a hrawk a zaina hnuhma awm kha, chemte a zai pawh a ang lo, ramsa sehhlum anih ka ring, entirnan savawmina ham pawh a ni thei a sin." ka ti a, Nathana chuan, "Nia tiraw, chu chu keipawh ka buaina a nia, a hliam kha savawm emaw, sakei emaw eng ramsa ber emaw kutin hriam takin a hamna a ang ka ti. Mahse chutiang ramsa chu khalai hmunah a awm ka ringlo. Abikin savawm leh sakei ngat phei chu Mizoramah an awm lo hrim hrim ang, sahuanah bak an awmlo ang." a ti a. Keichuan eiloh hmel zet hian, "Anih leh ramsa sehhlum anilo i tihna em ni?" ka ti a, Nathana chuan, "Aww...mihring tih pawh a ni thei tho asin...entirnan Wolverine pawh ni thei a.." a ti ta daih a, ala nui suk zui a, ka va han ngei tak em, mi thutak lai lai a. Nathana bawk chuan, "Tak tak chuan mihring a ni ve thei tho, a hnu thup nan ramsa tihhlum angin a hliam te kha asiam thei a. A rek hlum phawt anga, tichuan a hrawk leh a dul kha a zai pawh a ni thei a. Anihloh pawhin fiamthu a ka sawi ang deuh khan Wolverine-a claws lem pawh a siam thei a.." a ti a, kei pawh chuan, "Ani ve thei tho mai, mahse keichuan ramsa a nih ka la ring tho." ka ti a. Nathana chuan, "Nia ka dem biklo che...hetiang lam hi chu Raymonda nena han chhui ho ka chak khawp mai, ani alo experience tawh a.." a ti a, mak ka ti angreng hle mai. Hriatthiamloh hmel tak chuan, "Tinge Raymonda chu i sawi chhuah kher a?" ka ti a, Nathana chuan, "E...alo hrilh velo che nimaw? Hmanah detective hna a thawh hma khan a bialnu thihna chungchangah Inspector Ramtea a lo pui tawh a, chutah chuan werewolf te a hmuh thu a sawi a, Satanic ho thiltih a nih thu te a sawi a, a ngaihnawm takzet." a ti a, keichuan, "Werewolf a? A takah an awm a mi?" ka ti hu a, ka nui lek lek, ka awihlo lutuk a. Nathana chuan, "An awm ani mahna...ehe lawk..kan va theihnghilh teuh ve, Mission Vengah kal ang, kan mithi Laltlanthanga te inah chuan, thu va zawhfiah ve pawh a tha ang chu." a ti a, tichuan kan kal ta a.

Tlana (victim) te in chu kan zawn kual hrep hnu chuan tlai lam dar 4 vel ah kan hmu thei ta hram a, ruang pawh alo thleng daih tawh hi alo nia, tichuan an inah chuan lutuin a nu leh pate bulah chuan Police kan nih thute kan han sawi a, tichuan Tlana room chhung chu enfiah kan dil a, a chhungte chuan min remtih sak ta a, kan en ta a. A room chhung chu tlangval room tih takah a hnawk ve hle a, zu rim a nam hum hum a, a khum hnuaiah te chuan zu um ruak a let phung hlawm mai a. Nathana chuan, "Tlana nu leh pa tihloh chu chhuak vek rawh u." a tih avang chuan an chhuak dial hlawm a, Tlana nu chuan, "Thingpui ka zu siam anga, ka rawn pe ang che u a ti a, a chhuk a, tichuan Tlana pa chu kan kawm ta a.

"Ka pu, Tlana thihna ah hian rinhlelh te i nei em?"

"Nei lemlo, kan fapa hi mi awmtha duhlo, zu leh ruihtheihthil dang khawih ve nasa tak mai hi ania, ka rindan chuan tlangval hawklak ho nen an ruiphur an insual anga, an that ta anih te hial ka ring."

"I sawi awmzia chu a thianten an thah i ring amaw?"

"Nilove, nizanah kha chuan a thiante nen an chhuak ho a, chumi an haw lamah mi an tibuai anih ka ring."

"A thian akalpui te chuan thil awmzia an hrelo mi? In zawt lo mi?"

"Zawt e, a thiante chuan birthday kan lawm a, keimahin kalo haw ang a tia, scooty i keng silo a kan tih pawn, ka thian dangte hian min rawn thlah mai ang a ti tlat a, a ti e an tia."

"Umm....anih chu."

Chutia kan inkawm ho lai chuan Tlana nu chu alo lut a, thingpui hi a rawn dah a...a thu a, kan kawm ve nghal a.

"Ka pi, Tlana hian hmelma aneih awm in hria em?"

"Awii..chutiang awm chu kan hre miahlo mai.."

"Bialnu a nei em?"

"Neih chu a nei ve thin a, mahse tunah tak hi chuan a nei lo.."

"Amah la duhreng tu, anin a alo duh tawhloh te an lo awm mial lo maw, anihloh pawn a duh em em in a duh let ve siloh te?"

"Ka hre lo ka pu, kan fapa hian hmeichhia ai chuan zu hi a thlang zawk a...ruihtheihthil hi a duh ber chu ani mai."

"Anih leh a room hi kan enfiah leh lawk thei angem?"

"Thei tehreng e.."

A room chu kan han enfiah a, bangah chuan milem rapthlak tak tak leh satanic rock band thlalak leh poster sexy tak tak a intar teuh mai a. A lehkhabu dahna lampang ah te chuan megazine sexy tak tak, nula thawmhnaw ha tha duhlo lem hlir hian a khat a, tlangval fel tak chu a ni bik lemlo tih a hriat khawp mai. Minute 10 vel kan han en hnu pawh chuan chutia han hmuhchhuah tur leh kan hnuchhuina lama min pui thei tu tur awm ang kan hmuhloh avang chuan Nathana chuan, "Taka ka pi, Tlana kha nizan khan a thiante nen an chhuak i ti tiraw?" a ti a, Tlana nu chuan, "Aw chhuak e, chuan an rawn haw san ta a, a rui lutuk e an tia." a ti a, Nathana chuan, "Tunah inah hian an awm em?" tiina zawt leh a. Tlana pa chuan, "Aw awm e, in hmu duh em ni?" a ti a, Nathana chuan, "Nizana a chhuahpui te ho bik chu lo ko chho mai ta che." a ti a, tichuan Tlana thiante chu an rawn chho ta hlawm a. Tlangval pali hi an ni a, an hming kan zawh chuan Ruatfela, Jimmy-a, Mawia leh Roberta te an ni. Nathana chuan, "Nizan chuan engthil chiah maw thleng a?" tiin a zawt a, Mawia chuan, "Sir, nizan khan dar 12 a pel tawh a, kan birthday lawmnaah khan..ih..kan rui tawh hle a, mahse haw mai atha in kan hria a, motor ka keng a, kan panga hian kan inphur a, tichuan kan haw dawn khan Tlana chuan haw ala duh ve tlat lova, ka thianten min rawn thlah mai ang a ti tlat a, kan hawsan ta ani, abak chu engmah kan hrelo." a ti a, a tawngdan atang chuan a zam hle tih a hriat a. Nathana chuan, "Anih leh nangni thianho hian nizan lamah mi tihbuai emaw, insual pui emaw in nei em?" tiin a zawt leh a, Roberta chuan, "Aih, ka pu, chutiang engmah kan neilo.." a ti khur dar dar a. Nathana chuan, "Hmelma tal emaw in nei em? Anih loh pawn Tlana ngeitu emaw amah haw deuhtu awm ang in hria em?" a ti leh a, mahse an hriat loh thu hlir an sawi a. Nathana chuan, "Awle, kan kal phawt mai nge, tikhan lo in enkawl tha ula, in thianpa thattu hi kan man chhuak ngei ang." a ti a, an in chu kan chhuahsan ta a.

Station lamah kan let leh a, Nathana office a kan thu fel chiah chu constable pakhat alo lut a, Post mortem result a rawn keng a, "Hei Sir, Post mortem result a chhuak ta e." a rawn ti a, Nathana chuan a han en vang vang a, "Ehee...a taksa chhungah venom hmuh a nih thu a sawi tlat mai.." a ti a, mak ti tak maiin, "Poison i tihna em ni?" ka lo ti vat a. Nathana chuan, "Aww...a taksa chhung zawng zawng hi a tawih vek a ni, chuvang anih kha a rimchhiat dan kha a rapthlak bik em em. a ruang kha nikhat pawh tlinglo ani a, mahse thlakhat vel hnua ruang tawih hmuhchhuah ang mai khan a rimchhe em em a, achhan awmthei chu hei hi a ni, a taksa chhunga tur hian a kawchhung a eichhe hneh hle tihna ni." a ti a, mak ka ti tawlh tawlh mai. Nathana bawk chuan, "A hnunzangah ramsa sehna ni awm tak in ha hriam tak hnuhma niawm tak alang bawk a ti a, mihring tih chu a nih ka ring ta hauh lo mai." a ti a, keipawh chuan, "Ni e...ramsa in aseh hlum chiang a ni, chuan a dul leh a hrawk ah a kuttin in a ham bawk anga.." ka lo ti ve luam a. Mahse Nathana erawh chuan, "Mahse eng ramsa nge ni thei ang tih hi ka buaina a ni, tur a nei bawk sia, sakei seh ti ila sakeiin tur a nei awm silo a, savawm seh ti ila savawm pawn tur a nei silo a. Rul chuk ti dawn ila, rulin kuttin hriam a nei bawk silo...chumai bakah ramsa pawh lo ni se, a hliam en atang hi chuan eng ramsa kawlh mah Mizoramah hian a awm ve bawk silo. Mihring taksa chhung ti tawih vek thei tur khawpa venom chak nei eng ramsa mah an awm ka hre bawk silo, mihring thiltih ala ni thei tho angem le?" a ti nuah nuah a. Reife kan titi hnu chuan khua alo thim tep tawh a, kan duty pawh chu kan bang ta a, keipawh chu inlamah ka haw a.

Zan dar 8 leh a chanve velah chuan pawnah ka chhuak a, meizial zuk pahin ka tei kual mai mai a, ka hnung atang chuan Tluangtei (Episode-12 ah khan Tluangtei chu tunge anih ka sawi tawh kha) hian, "U Rin, i lung ava leng awm ve a?" a rawn ti a, ka hawi phei a, ava han chhelo reuh tak.."Engmah tilove, story i chhiar nange zanin chu?" tiin ka zawt let a. Tluangtei chuan, "Umm chhiar tur chu a tam a, mahse ka chhiar peihlo zanin chu...enge i tih reng reng a?" a ti leh a, amak lutuk, he ka nau, ka cousin Tluangtei bulah hian tlangval senior ve pui tawh si hi ka lai tep zel nia mawle. A mitah pawh en ngam chiah lo chuan, "Hei, ka rilru ka lo sawrbing vel mek ani, kan hnuchhui lai hi a hahthlak hmel lutuk a." ka ti a, Tluangtei chuan, "A niang, police nih hi chu a hahthlak viau ang, mahse Police Officer hi bialpa atan ka duh ber." a ti thut mai chu ka phu deuh zuk a, keimahah hian lawmna a lo awm ve ringawt nia mawle. Nui sang chung chuan kan inmelh a, "Ngati nge Police kher?" ka ti deuh kher a, Tluangtei chuan, "Ka bulah a awm chuan engmah hlauh tur a awm dawn lova, min venghim hneh dawn em a..." a ti a, engmah sawilo chuan ka nuih ringawt a, ka mitah tak min en chung chuan, "Anih, ka mu phawt mai ang aw...ka awm a nuam vaklo a.." a ti a, nui sang chung chuan min en reng a, inchhungah chuan min luh san ta a. Mitkhap leklo chuan ka en reng a, he nu tereuh hi ka ngaizawng amawni le, ka inhrethiamlo hman hial a. Ka hnung atang chuan, kutbeng ri ka hria a, ka hawilet chu Nathana chuan minlo nuih vur vur a, "EHEMMM.." a la rawn ti zui, ka va han ngei tak. Min rawn pan hnai a, "Tlangval senior Lalrinawma pawh tan ala ve tan tawh dawn animaw?" a rawnla tizui. Ka zak deuh bawk si, ka ngei lutuk chuan, "Nanga vainu ngaizawng mai mai.." kan ti teh ngawt a, a nui huah huah a. Ka dara min ben thawk pah chuan, "A hmelthat kha...nihpui hmiah rawh, ka lo tihpui ang che.." a la ti ta deuh deuh. Keichuan nui chungin, "I ti awmang lo emai Sir, ka cousin anih khaa.." ka ti a, NAthana chuan, "Ani pawh khan a duh ve che niang, in inmelh dan kha maw, awmzia a nei alawm." a ti a, kan nui dun leh rih a. "Sir, enge i rawn tih hrim hrim a, tun ang zanah lehnghal?" ka ti a, Nathana chuan, "Nia, englo, thu lawmawmloh lampang a nia.." a ti a. Ka beng a verh zawk mai, hriatchak hmel tak chuan, "Enge thleng a?" ka ti nghal vut a. Nathana chuan, "Ruang dang an hmu leh a, chuan tualthahna thlen lai chuan mita hmu tu an awm thu an sawi a, mahse kan eye witness ber chu a hlau lutuk biak theih lovin ala khur char char a ni awm e." a ti a, "Khawi hmunah nge?" tiin ka zawt leh a, Nathana chuan, "Vaivakawn field ah..." a ti ta daih mai a, keichuan, "Field ah maw?" ka ti hu a, NAthana chuan, "AWww...inngaizawng annia, an sawi dan chuan drugs an ti dun thin a, zanin pawh hian drugs ti dun turin an ruiphur sa nen Vaivakawn field ah an kal a, tichuan au thawm avangin thenawm khawveng te an tlan khawm a, mahse a mipa zawk chu a hnungzang vun thler vek leh a ruh lang vek khawpin a lo awm a, a bulah khur zawih zawihin ahmeichhia zawk chu alo ding reng tih thu vel ani...i zu kal vat teh ang, midang ho chu ka tir liam tawh." a ti a, rang takin ka insiam a, tichuan VAivakawn Field lam chu kan pan ta a.

Ahmun kan thlen chuan mipui pawh anlo tam leh hman tawh khawp mai, NAthana chuan Inspector pakhat bulah chuan, "Enge chanchin?" tiin a zawt a, Inspector chuan, "Veng mipui te sawi dan chuan dar 7:20 vel khan au thawm an hria a, an tlan thla nghal a, mahse ahmun an thlen chuan mipa zawk hi a taksa thler vek leh thisen baw nuaiin bawkkhup zawngin alo tlu a, hmeichhia zawk hi chu a bulah a lo ding khur char char a, biak pawn a chhang theilo, tunah chuan hmeichhia zawk chu kawmchhak te inah khian an zawn lut a, chuan hei ruang hi chu tihian puanin anlo khuh a ni." a ti a, Nathana chuan ruang chu a en a, "Inspector, a puan hi a kang sawr a nia, hei helai hi a khu vut vut mai." tih pah chuan ruang an khuh na puan chu a kawk a, ka en chiang a, puan chu a lo khu vut vut a, mahse chu tia khu nasa chu a nilo, constable pakhat chu puan la sawn tura ka tih avang chuan puan chu a hlip ta a. Chuveleh chupa taksa chu a rawn khu ta vut vut mai a, a khu lah chu a pawl (blue) vek leh nghal a, eng chemical tak emaw ni chu a ni hrim hrim, a rimchhe em em lehnghal a, a then chu hlauvin an tlan chhia a, a then anlo tap bawk. Nathana chuan, "Field a vaivut kha la ula ruangah hian phul rawh u, a zia deuh ang." a ti a, tichuan vaivut chu kan la sup sup a, ruang ah chuan kan phul ta a, a khu pawh a zia deuh ta a. Nathana bawk chuan, "Tunge he tlangval leh nula kha inngaizawng ti a sawi kha?" a ti a, putar pakhat hi alo kal hma a, "Keimah a ni e." a rawn ti a. Nathana chuan, "Midang zawng hian he nula leh tlangval hi an hriat ngailoh thu leh an vengmi annih loh thu an sawi a, engtin nge an inngaizawng tih i hriat?" a ti a, chu putar chuan, "Ka hmudun fo alawm ka pu, an inzui hi ka hmu fo, kan vengah pawh hian bike hian an rawn inphur a, hmanni pawh khan kan kawmthlanga kan tuikhuah bulah an lo inchiu a, ka hauh hrep nghe nghe kha.." a ti a. Nathana chuan, "Khawnge hmeichhia kha a awm?" a ti leh a, chu putar bawk chuan, "Kan inah khian kan zawn lut, biak theih a ni tawh maithei a ni." a ti a, Nathana chuan, "Inspector, i nau te nen hian ruang hi lo buaipui ula, chuan mipui ho hi haw darh tir vek ang che u, kei leh Rinawma hian nula chu kan han buaipui ange." a ti a, tichuan chu nula kawm tur chuan putara inah chuan kan lut ta a.

In kan luh chuan chu nula chu alo la khur nasa hle a, kan hmel a hmuh meuh chuan Police kan nih vang te pawh aniang chu, a thaw huai a, thlamuang sawt ang mai hian a awmdan pawh chu a danglam nghal a. Nathana chuan a kutah vuanin, "Mami tunge i hming le?" a ti a, nula chuan tah aw tuau chuan, "Margareth-i..." a ti a, a kut te chu inchiuna tih hriat takin a vung deuh bur mai a, hmeichhe hmeltha tak a ni reuh lehnghal a. Nathana chuan, "Hlau reng reng suh aw, kan station lamah kan phur phei che anga, police ten an veng tlat ang che.." a ti a, chunu chuan, "Ka pu, a hlauhawm lutuk, ka hlau, a rapthlak lutuk.." tiin a tap leh rih a, ava han buaithlak tak. Nathana chuan, "Tunge i hlauh a? Enge i hmuh?" a ti a, Margarethi chuan, "A rapawm lutuk, mihring pawh a nilo.." tiin a tap tuau mai a. Nathana chuan, "Staion lamah hmun him zawk ah kan hruai ang che aw....lo kal rawh le..hlau reng reng suh, i bulah kan awm dawn lawm." a ti a, Station lamah chuan kan inphur phei ta a. Nathana chuan a Office ah chuan police dang 7 vel te nen chu nula chu kan hual thup mai a, nula chu tui te kan in tir a, thawk ala te te a, Nathana chuan, "Sawi rawh le...engthil chiah nge thleng?" a ti a. Margarethi chuan, "Ka bialpa kha Lalmuansanga ani a, kum 2 chuang kan inzui tawh. Tichuan damdawi kan ti dun thin a, drugs addict kan ni. Zanin khan kan rui phurin Vaivakawn field ah damdawi tih a, sex hman dun kan tum a, kan rui a tawh a ni ber mai. Mahse chutia kan inchiu lai chuan sava ina a thla a zap ri hluap hluap ang mai ri hi ring takin kan hria a, tichuan kan bulah lawk chuan thil dum lian tak mai hi a rawn thlawk kual vut vut a, a tir phei chuan thlawhna amaw ka ti hial a, kan bul lawkah chuan a rawn ding a, a thla chu a ang ka tih ber chu vantirhkoh thla a ang ber. Mahse a thim em avangin a mah chu a dum vek a, Muansanga chuan 'Tunge i nih?' tiin a zawt a, a chhang duh lo. Lightin kan va en chiah chu satana ang mai hian ki pahnih kual ruih mai hi a nei a, a hmel chu rapthlak tak a ni, ramhuai chiah chiah a ni, a mit meng chu a sen vek a, meialh ang mai hian a mit mu chu a alh hluah hluah a ni ber mai. Amah chu sang lampang a ni a, a cher em em a, kan lam pan chuan a rawn kal a, thawmhnaw dum vek hi a ha a, a ka a rawn ang a, vampire ang mai hian a ha a hriam em em bawk a, tlanchhiat kan tum a, mahse ka bialpa Muansanga chu a man hman a, a ka atang chuan meialh, rawng pawl(blue) leh var(white) inpawlh hi a rawn phuh chhuak a, Muansanga chu a bawkkhup zawngin lei ah a rap bet a, tichuan a ka atanga meialh pawl leh var a inpawlh chuan a phuh ta nghek mai a, a seh bawk a, tichuan a kuttin sakei tin ang maia hriam chuan a thai ta chiam bawk a, Muansanga chu a au vak vak a, thisen a per chuai chuai a, tichuan keichu ka hlau lutuk chu ka au chhuak thei lo, ka lam pan chuan a rawn kal a, ka mitah tak chuan a mitmeng sen vek leh rapawm tak chuan min rawn melh a, tichuan lehlam a hawi a, a tlan vak a, a thlawk bo leh ta a ni." a ti a, kan thu hriat chu awih a harsa in amak kan ti tlang hle a, chutih lai chuan constable pakhat hi alo lut a, "Sir, ahma ang bawk khan, tualthattu hi Tlana thattu tho kha a nih hmel. A taksa chhung chu a tawih chhe vek a ni, tualthattu hi a ngai tho a niin ka hria." a rawn ti a. Nathana chu a ngawi vang vang a, "Muansanga chhungte lo biakpawh dan ngaihtuah la, tichuan Inspector Remsanga emaw Liantea te nen lo buaipui ang che u." a ti a, Constable chua chhuak a. Nathana bawk chuan, "Margareth, i ruih vang anilo maw...i thil hmuh chu?" a ti a, Margarethi chuan, "Nilo...ka ruih zawng zawng pawh a reh vek, chubakah hriamhrei engmah ka keng lova, ka thah chu a ni theilo, chubakah ka ngam heklova, ka that phal heklo. Chuan a taksa te chu tawih chhe vek thei turin engtin nge kei hmeichhia hian ka tih theih ang?" a ti chiam chiam mai a, kan ngawi thap hlawm a.

Nathana chuan, "Margareth, nihleh i thil hmuh chu, mipa nge hmeichhia a nih i hre thei em?" a ti leh a, Margarethi chuan, "Mipa a nih hmel, a pian en kha chuan.." a ti ringawt a. Nathana chuan, "Anih leh i thil hmuh chu a pianzia te, a awmdan te ila hre chiang vek em?" a ti leh a, nula chuan, "Aw hria e.." tiin a chhang leh a, tichuan Nathana chuan, "Constable...lemziakthiam kha va ko teh.." a ti a. Lemziak thiam chu alo kal a, Margarethi nen chuan an inthutchilh a, tichuan Margarethi chuan a thil hmuh chu sawiin lemziaktupa chuan alo ziak zel a. Minute 20 vel a ral meuh chuan Lemziaktupa chuan, "Sir kan zo e.." a rawn ti a, lemziak chu kan han en ta a, keiphei chu ka nui huk nghe nghe. Cartoon hi a ang mah zawk, cher sang em em, kel ki (horn) ang hi a nei a, a mit chu a sen vek a, bak ang mai hian thla a nei bawk. a taksa chu a dum vek a, a hmul deuh therthur bawk. A hmel chu ramhuai ang chiah hi a nimai, a rapthlak angreng hle bawk. Keichuan ka awih lo nghal, hetiang hi chu khawvleah a takah a awm theilo hrim hrim. Boot dum a bun leh daih bawk si a, mihring pian zia chu a nei ve a, mahse ramhuai a nihduh hmel ber mai. Nathana chuan Margarethi chu a en vang vang a, "Hei hi maw i hmuh chu?" tiin a zawt leh a, Margarethi phei chuan a en tha ngam tawh lo, "Awwww.." a ti ringawt a. Chuveleh MArgarethi chhungte chu an lo thleng a, rang takin lemziak chu Nathana chuan a thuktu nghal a, tichuan Margarethi chu a chhungte chuan an hruai haw ta a. Keini pawh chu zan a rei deuh tawh avang chuan naktuk lama chhunzawm turin tiin kan haw darh ta a.

A tukah chuan Staion lam a duty turin ka phei leh ta a, Nathana chuan lemziak chu ngun takin a lo la en ngar ngar a. A bulah chuan va thu hnaiin, "Sir, i awih zawng a ni em?" ka va ti a, Nathana chuan, "Amak hle mai...he thil hi ka hria a ni." a ti ta mai a. Mak ti tak chuan, "Enga? I hria maw, i lo hmu ve leh hman tawh te hi anilo maw?" ka ti deuh kher a, Nathana chuan, "Hmu e, comics ah ka chhiar tawh." a ti a, ka rinloh lam daih a min chhang chu mak ka ti hle mai. Ka lu thaklo pui chu hiat nauh nauh chung chuan, "Engtia comic ah maw?" ka ti a, Nathana chuan, "SPRING-HEELED JACK.." a ti ringawt a. Ka bo tulh tulh mai, "Sir, enge chu chu?" ka ti leh a, Nathana chu a nui suk ringawt a, "Amak ka ti khawp mai, he lemziak hi kan en vang vang hian, hmanlai British thawnthu a an sawi ramhuai, London mipui te ti thlabar tu Spring Heeled-Jack nen an danglamna a awm lo." a ti leh a, mak tihna in ka khat lehzual. Nathana bawk chuan, "Ngun tak khan lo ngaithla teh...Spring-heeled jack chu maw, hmanlai a Victorian Era a English folklore a mihring pakhat a ni. An hmuh hmasak ber chu kum 1837 khan a ni. Chuan ahnuah Spring-heeled Jack chu Great Britain ah mi chi hrang hrangin an hmuh thu te an sawi a, abikin London ah te, Midlands ah te leh Scotland ramah te a ni. Ramhuai niin an sawi a, thla a nei a, kuttin hriam tak a nei bawk a, meialh pawl leh var inpawlh a ka atangin a phuh chhuak thei bawk a, a hmel chu lemziaka i hmuh ang hi animai, rapthlak tak niin an sawi bawk. A then chuan helmet ki pahnih nei a khum thin ti ten an sawi a, a mitmeng chu meialh sen mum ang mai ni ten an sawi bawk. Mi thenkhat phei chuan a tawng ve thei niten an sawi a, a thlawk tehi an ti bawk. Mahse Sring Heeled Jack an hmuh hnuhnun ber kha chu kum 1907 a Liverpool a an hmuh kha a ni daih tawh a ni." a ti a, amak hi ka ti em em a, "Sir, anih chuan chu ramhuai chu hetah kan ram zimte, Mizoramah hian a rawn inlar leh tihna em ni?" ka ti a, Nathana chuan, "Aih....Spring heeled jack chu a ni theilo ang, mihring a nih ka ring." a la ti talh a, keichuan, "Mahse Margarethi sawi dan khan chuan meialh pawl leh var inpawlh te kha a phuh chhuak a ti si a, British thawnthu ami ang chiah chuan a sawi ve si a, enge awmzia ni ang le?" ka ti a. Nathana chuan, "Spring-Heeled Jack a ni emaw nilo emaw, ka kut ngei hian ka man dawn a ni." a ti a, athusawi ah chuan a chiang em em tih a hriat mai bakah a tawngkam chu vin nisilo hian a nelawm lemloh khawp mai. Kan titi lai chuan SI pakhat hi alo lut a, "Sir, Tlana thiante pali zinga mi Roberta kha tukin khan a room ah thi a hmuh a ni a, kan rindan chuan tualthattu hi nizana Margarethi sawi tho kha niin kan hria, a taksa chhung a tawih vek a, a vun chu a zai thler a ni leh bawk." a rawn ti leh ta mai a, rang takin motor la chhuakin Roberta te in lam ah chuan kan kal nghal a.

Roberta te in chu Ramthar Veng a ni a, an in chu mi zawhchawp ngai lovin an inkawta mipui tam em em chuan min hriattir nghal mai a. Roberta hi mahnia inluah a ni a, amha tak hi chu Champhai a mi a ni a, Aizawlah lehkha zir tura lo awm a ni a, tunah hian kum 25 niin Hrangbana College ah MA a zir mek a ni. Roberta in chhung chu kan lut a, a room ah chuan Police ho chuan min lo nghak a, a ruang chu an lo khuh a. Ahma ang bawk khan puan kan han hlip leh chu a taksa chhung chu a lo ku deuh vut vut a, a ril te chu a chhuak pur mai a, a la dum vek leh nghal a, a kawchhung chu acid in a chiah niawm tak hian a kang nasa hle a, a rimchhe em em a, hmuh a hrehawm ngei mai. Nathana chuan, "A ruang hi la sawn ula, post mortem turin phur phei ang che u, a room hi ka lo enfiah anga, chutih chhung chuan Rina, nangin a thian dnag pathum te kha lo va zawng teh, pawnah khan an awm in ka hria, lo hruai lut ang che." a ti a, tichuan ka chhuak ta a. Pawnah chuan Roberta thiante pathum Ruatfela, Jimmya leh Mawia te chu ka va ko a, anni hi Tlana thih zana a kalpui te kha an ni. Roomah chuan an rawn lut a, Nathana chuan, "Nizanah khawnge in awm?" a ti a, Jimmya chuan, "Keichu ka bialnu te inah ka leng a." a ti a, Mawia chuan, "Inah ka awm." a ti a, Ruatfela chuan, "Keipawh inah ka awm." a ti ve bawk a. Nathana chuan, "Roberta te inah hian tumah in leng lo amaw?" a ti leh a, an vai chuan an lenloh thu an sawi a. Nathana chuan, "Nihleh he thlalak hi enge a nih in hria em?" tih pahin Spring-heeled jack lemziak chu a entir a, mak an tih hmel em em a, Ruatfela chuan, "Ramhuai lem a nih kha.." a ti a, Jimmya chuan, "Nia...ramhuai ki nei a ni mai a, enge awmzia?" a ti hu bawk a, Mawia chuan, "Ka pu, tinge hei hi min hmuh tir a?" a ti a, Nathana chuan, "In hre duh amaw? He ramhuai hi...in thianpa Tlana leh Robertaa thattu chu a ni." a ti a, an phu zuk hlawm a, an hlauhthawn hmel em em a. Mawia chuan, "Ka pu, enge awmzia, ramhuai an awm tak tak em ni?" a ti chul mai a, NAthana chuan, "He ramhuai hian puitling te aiin tleirawl leh nula leh tlangval, a bikin nangmah ni ang rual te hi a target ber zawk a, chutah pawh a thah te hi ruihtheihthil ti mi te, mi awmtha duhlo te vek an ni." a ti a, Jimmya chuan, "Min that ve dawn i tihna ami?" a ti a, Nathana chuan, "Nilove, fimkhur turin ka chah che u a nih chu." a ti a, ka rinloh deuh mai chuan a kal tir leh daih ta hlawm a, tichuan keini pawh Stationah chuan kan let leh a. Nileng mai chuan kan hnuchhui hi a hahthlakin a tihbaiawm hle ani tiin kan titi a, han chhui dan vak hi a vang si a, he kan tualthattu ramhuai lah hi zanah chauh a che chhuak duh thin bawk si. Nathana chuan, "Ka lu a ti hai vek alawm le, enteh Rinawm, in lamah lo va chawl hahdam la, keipawh ka nuamsam lo emai, damdawiin lamah ka han in entir teh ang." a ti a, tichuan engvang nge zawt lem lo chuan ka haw ve ta mai a.

Zan dar 7 velah chuan ka nu chuan ka room bang a rawn chum ri dup dup a, "Bawiha, lo chhuak teh, news hi lo ngaithla ve teh, a rapthlak lutuk." a rawn ti a, chuveleh rang tak chuan ka tlan chhuak nghal a. TV chu ka en a, "Vawiin tlai dar 5:45 vel khan Aizawl North College Sport naa pakhatna Blue House te chu an champion lawmna a picnic naa an kal hawlam chu kalkawngah accidentin zirlai zawng zawng mi 57 te chu a hmunah an vaiin an boral nghal a, driver erawh chu a thilo hlauh a ni. Kan palai te thudawn danin he bus Driver hi tunah Greenwood Hospitalah a awm mek a, nikhaw hrelova a awm hma in eng ramsa emaw ni, mahse mihring pianzia ni si, thla sei tak nei hian bus hma ah rawn bet thutin a balance buai leh kawng a hmu thei silo chu kawng lehlam bawlhhlawh paihnaah an tlan liam ta niin an sawia, mahse tun dinhmunah erawh hi chuan Driver chu biak theihlohvin a thil hmuhin a tih thlabar em avangin nikhawhrelovin a awm ani tiin thu kan dawng bawk." News chu an puan zawh hma chuan TV chu ka off nghal a, ka insiam nghal sawk sawk a. Ka nu chuan, "Khawnge i kal dawn?" tiin min zawt a, keichuan, "Ka nu Stationah ka kal dawn, Bus accident tir tu hi kan misual chhui mek chu a nia." ka ti a, ka chhuak tur chiah chu ka kutah chuan Tluangtei chuan min rawn man a, "U RIn.." a rawn tia, a hlauhthawn hmel hle mai. Ngawi reng chuan kan in en a, zawi te hian, "Fimkhur rawh aw.." a ti a, ka lu ka bu nghauh a, tichuan ka chhuak ta a. ( Episode 10-a James-a nau tena ka bike min sutchhiat sak tak kha workshop ah ka dah a ka siamtha tawh tih minlo hriatsak teh u, ka lo sawitheihnghilh daih.) Ka bike Gixer pawl ngei mai chu ka han tlan chhuahpui ve ta rawk a, chak takin ka tlan a, ka tlan laklawh lai chuan ka hma tak maiah chuan engemawni lian tak hi a rawn thlawk fua mai a, ka balance a buai ta, ka thal tawp mai a, mahse ka na em em lo, thui tak maiin ka bike chu a tleng phei vawng vawng mai a. Tichuan ka tho vat a, ka pistol phawrh chhuak in ka bul vel chu ka tin kual a, ka accident-na lai chu kawng reh lai tak mai ala ni zui lehnghal a. Tichuan ka hnungah chuan thla zap ri hlup hlup ang mai ri hi ka hria a, ka lehhawi vat a, ka ding khawng chat mai, ka thil hmuh rapthlak zia chu. Ka lo awihloh ngei mai Nathana sawi, kan tualthattu kan chhui lai mek Spring-Heeled Jack ngei mai chu ka hmaah chuan arawn ding a, a hmel chu ramhuai hmel ka lo suangtuah thin piahlam ai pawhin a rapthlak zawk, ka phu nasa lutuk chu ka hmulthi te hi a ding vek hian ka hria. A mitmeng te lah chu a sen vek mai a, a thaw hrawk hrawk leh nghal a, a cher a, a sang takzet, ft 6'2 aia a hniam ka ringlo. Zawimuang chuan min rawn pan a, pistol a tin pah chuan ka hnungtawlh ve zel a, ani chuan min rawn pan hnai zel a. Hlau chung chung chuan, "Min rawn pan hnai tawh suh, ka kap ang che.." ka ti a, mahse a hlauhloh hmel ngei mai, min rawn pan hnai zel a, mahse silai a ri thuai a, a au thawt a, ka hmehpuah a nilo. Hnunglam a hawi a, Nathana alo ni. Nathana chuan pistolin a tin reng a, "Rinawm tlansawn vat rawh." a ti a, ka tlan sawn nghal a, NAthana chu beihlet tumin a ka atang chuan meialh pawl leh var chu Nathana hmaah chuan a phuh ta a, mahse Nathana chuan a Jacket a kawnga a hren chu a phelh a, mei alh lamah chuan a vawm a, amah chu a tlan sawn ta daih a. Nathana Jacket chu a alh pawl hluah hluah a, a sawr chhe vek thei lehnghal a. Nathana chu ka bulah lo kal in kan pahnih chuan chu ramhuai chu kan pistol chuan kan tin ve ve a, mahse rinloh tak maiin a thla a zap vak vak a, a thlawk bo ta daih a.

Nathana nen chuan kan in lamah ka bike chu kan dah let leh a, a Scorpio dum nalh tak mai chuan kan inphur a, Greenwood Hospital lam chu kan pan ta a. Kan thil hmuh kha kan hlau dun bawk aniang, inbe miah lovin Greenwood Hospital chu kan thleng ta nghal mai a. Damdawiin chhung kan luh meuh chuan Driver pawh alo harh tawh a, mahse a hlauh vang ni ngei tur a ni, a lo tal nasa mai a, mahse kan hmel a hmuh a police kan nih thu a hriat meuh chuan a zal ve ta deuh a. Driver chu zawhna kan zawt ta a...

"Ka pu enge awmzia chiang takin han sawi teh.."

"Ni e, Zirlai te hian an house champion lawm nan tiin picnic an huaihawt thu min hrilh a, kei hi bus driver a tan min hmang a, tichuan ka hruai hlawm ta a. Kan haw khan khua a thim thet thet tawh a, thlamuang taka kan tlan lai chuan bus hma takah hian ramsa mak tak mai, mihring pianzia ni si, ka rin dan chuan Satana a ni hial ang, arawn tum thut a, ka mitah tak min rawn en a, ka hlau lutuk chu a break ka rap thut a, kalkawng min hliah vek avangin ka balance a buai ta a, tichuan khamah kan tlanliam ta a ni."

"Anih chu, nihleh zirlai te chu damchhuak an awm miahlo em ni?"

"Aw...ka thianpa Bawihpuia pawh ka hruai ve a, ani pawn nunna a chan ta a ni."

"Hliam te i nei nasa em?"

"Ka keruh hi a pahnih in a tliak a.."

"A va zialo ve awww...nihleh in accindent tirh khan i la harhfim em? Nge nikhawhrelovin i awm ve nghal?"

"Kan lum thlak kha ka la hria a, kham tawp thlenga kan lum kha ka hria. Ka lu hi ka sawh a, tichuan chianglo ruai in ka mit ka meng a, ka hmu phe vek. Chu Ramsa mak tak mai chu kan lumna kham hmawrah chuan ding chungin minlo en reng a, tichuan a thlawk bo ta a, kei pawh chu nikhawhrelovin ka awm ve nghal ta a ni."

"In accident-na hmun min hrilh thei angem?"

"Aw..thei lutuk e."

An accidentna hmun chu khaw pawn ani lova, Aizawl khawchhung tho a ni a, mahse a veng hming te chu tarlang lo mai ila. Police thenkhat kan tir a, thil chiang zawka va hre tur ten kan hrilh a, keini erawh chuan kan ramhuai hmelchhepa hi man dan tur ngaihtuahin kan rilru pawh kan seng nasa dun hle mai a. Atuk zing khawvar thleng chuan kan buai a ni ber mai, kan mu lo hrim hrim. Zing dar 10 vel a rik hnuah chuan Nathana chuan, "North College-ah zirlai boral ta te vuina programe an hmang dawn a, va tel ve ila, thuzawh fiah tur te pawh an awm maithei asin." a tih avang chuan kan kal ve ta a. Zirlai te leh zirtirtu te leh boral tate chhungte hmel chu hmuh an hrehawm ngei mai, an tap nasa hlawm bawk a, tichuan programe a zawh hnu chuan zirtirtute, an principal te chu zawhna tlem azawng kan han zawt luam a, mahse kan tana tangkai tur erawh kan hriat belh lemlo. An haw darh ta hlawm a, ruang te ho pawh chu thlanmual lama phum turin an nawr liam ta a. Nathana chuan ka bulah lo kal hnaiin, "Rinawm, kan tualthattu hian mi puitling chin ho hi chu a that duh miahlo a, nizan khan keini pahnih pawh duh chuan min chansawm vek thei, mahse min khawih tha duh miah lo kha a nia.." a ti a, keichuan, "Mahse thah che a tum ve tho kha, meialhin a phuh che kha, i jacket a i vawm vang chauh a thilo i nih kha.." ka lo ti vat a, Nathana chuan, "Khate chu silaia ka kah vang alawm, khakha a thinrimin min thah ve a tum a nih kha.." a ti a, keichuan, "Tinge tleirawl kher hi a target le?" ka lo tive bawk a. Nathana chuan, "Englo a ni...tleirawlah pawh ruihtheihthil ti ho leh chhungte tana hnawksak ho chauh a ni a thah ni. Ahmasa berah Tlana, zu in mi a ni a, adawtah Muansanga, drugs addict, chuan Roberta zu in mi tho. Chuan tunah zirlai te...anni pawh kha police dangten an bag chhungah leh bus chhungah zu bur ruak te, a tak la awm te leh wed te pawh an chhar nual a lawm." a ti a. Chutia kan inbiak lai chuan Nathana chuan, "Motor lo va start teh, ka va inthiar lawk.." a ti a, tichuan motor chu ka va start a, minute 10 vel hnu chuan alo phei leh a, ka nghak rei ning tawh si chuan, "Ek ngah pa i va rei ve.." ka ti deuh kher a, nui vur vur chung chuan, "Nia....nangni angin meian bai mai mai kan hmeh ve ngailo a, nitina sa hmeh hi chuan pum lam a khawih thin lawm." a la ti zui, a chang hi chuan thutak deuha inbiak hi a har thin a nia.

Tlai lampang alo ni leh der tawh mai, kan hnuchhui lai pawh chuan ziaawm lam a pan thei hlawl bawk silo chu ka mangang ru tawh hle mai a, tualthahna dang a awm leh mai ang tih a hlauhawm takzet tawh a ni. Ka roomah chuan awmin ka inngaihtuah muk hle a, hmalakdan tur vel te pawh ka ngaihtuah ve nasa hle mai. Chutia ka rilru kalo sen ve em em lai chuan ka phone a rawn ri a, Nathana a ni, "Rinawm...hmanhmawhin lo phei rawh, kalna tur kan nei, a hmawr kan bawk dawn ta niin a lang." a rawn ti ringawt mai a, keichuan mak ka ti hle mai, a chanve pawh kanla thlenglo a amaw ka tih laiin, Nathana chu engtin tak lo che leh hman chu nimaw...ka chhuak nghal a, bike chahbi pawh ka zawng buai hmanlo, taxi chuan ka kal tawp a. Nathana te in ka thlen meuh chuan khua a thim tawh a, an inbulah chuan minlo nghak der tawh mai. Engmah sawi setsawt lovin motorah chuan ka lut nghal a, tichuan chak takin a tlan a. Venghlui lamah kan tlan thla ta daih a, tichuan in pakhatah hian kan lut a. Kawngka chu kik lemlovin Nathana chu a lut thuai a, inchhungah chuan Jimmy-a, Tlana te, Roberta te thianpa ngei mai kha alo awm a, min hmu chiah chu a hlauh hmel hle mai, NAthana chuan na tak maiin a hmaiah chuan a hnek nghal thuai mai a, a thal chiang ngei mai. a tham tho nawk a, Jimmya chuan, "Tinge a...tinge min hnek rikngawta.." a ti a, a tap tuau a. Nathana chuan, "Huh? Engvangin nge kutka thlak che i hre duh maw? Nang hi ilo inla ramhuai vel amaw? Spring-Heeled Jack ka ni e te ilo inti vel amaw?" tih pah chuan a hnek leh siah siah mai a, ka hrethiamlo ngei mai. NAthana bawk chuan, "Rina, motorah khan hruizen ka dah a, lo va la teh." a ti a, rang takin motor hnunga hruizen chu ka va la a. Nathana chuan Jimmya chu nghet takin thutthlengah chuan a phuar a. Keichuan ka la hrethiam thak lo, "Sir, tinge hetia i tih a, enge a awmzia?" ka ti a. Nathana chuan, "Amah hi alawm kan ramhuai chu...ve khanglang a, ka jacket duh ber min halchhiat sak lehnghal." a ti a, ka bo hle mai. Chuveleh kawngka a rawn inkik a, Tlana nu leh pa, Jimmya nu leh pa, Ruatfela, Muansanga nu leh pa, Mawia, Margarethi leh a nuleh pate leh police panga vel hi anlo lut a. Jimmya chuan tap tuau hian, "Nu..pa...enge awmzia? Tinge heng police ho hian min man a? Chuan...tinge inlo kal sup sup a?" tiin hamhaih hmel tak chuan a ti a, Nathana chuan, "Ka koh vek an nih hi, tualthattu chu nang ngei hi i ni." a ti ta mai a. Jimmya chuan, "Enga? Enge proofna i neih?" a ti a, Nathana chuan, "Eee...nei tehreng ele..inza vaiin lo ngaithla rawh u. Tlana a thih tuka Tlana te ina kan kal khan, Birthday lawm naa kal angin in insawi a, Rinawma nena kan haw hnu khan Tlana te inah khan ka ngaih a tha lova ka va let leh a, tichuan Tlana nu hian in thiannu Folkland ami Catherine-i birthday lawmnaa in kal thu a sawi a, an address chiang taka min hrilh hnuah chuan Catherine-i te inah chuan ka va kal a, thil awmzia te ka hrilh hnu chuan tihian min hrilh a, 'Nia, Tlana hi chu amah chuan an kalsan ngei alawm, mahse a hnu khan Jimmya hian a rawn lam leh a lawm.' tiin min hrilh a, khata tang khan ka ringhlel daih tawh che. Mahse engmah ka la sawi duhlo a, Roberta thih ni a Spring Heeled Jack lemziak ka hmuh che u pawh khan Jimmy, i hmel hi a danglam nasa ber a, i hlauthawng tih pawh i mitmeng atang khan ka hre thei. Mahse finfiahna tha tak ka la hmuhloh vang leh khatiang khawpa thil tithei tura ka rinloh che avangin ka la man mai duhlo che a, ka enthla leh reng che a. Chuan vawiina North College-a vuina programe ah khan ka hmu che a, ka revolver khan ahma a ramhuai anga ka hmaa i rawn inlan khan ka revolver in ka kap che a, chuvang chuan i kut i tuam bur kha ka ringhlel che a, Rinawma hi hrilh ve chu ka tum a, mahse a thin a rim a insum zawhloh ka hlauhvangin inthiar tur angin chhuanlam ka siam a, ka rawn pan ta che a. North College student i nih ve thu i sawi a, tichuan i kut hliam kha achhan ka zawt che a, i accident tiin min hrilh a, ka rinhlelna che a zual a. Vawiin tlaiah khan in in hi mi zawt kualin ka rawn hmu hlauh che a, i kut hliam vanga lo kan che angin i nu leh pa bulah ka nihna te sawiin chhuanlam ka siam a, pem damdawi te pawh kalo ken che kha. Tichuan i roomah ka zui lut che a, mahse i room lehlama pindan ah chuan luhve i phallo a, achhan ka zawh che in a hnawk lutuk tiin chhuanlam i siam a, engemaw chu i dah tih ka hria. Chuan i room ah khan ka veikual a, ka damdawi lo ken che pawh chu i hnawih ngam lo, achhan chu silaia ka kahna che hliam a ni tih ka hriat i hlauh vang a ni. Chuan i room bawlhhlawh bawm a lapua thisen kai chu ka hmu a, i hmuhloh hlanin ka rawmawla ka kut tuam chungin ka la zeuh a. Tichuan bang kila forsep (chaicheh) ka hmu bawk a, mahse ka la chiang ngam chuanglo. Bathroom ah ka lut a, lapua chu ka en a, lapaw chhungah khan silaimu alo intuam ngei a, USA atanga hmankuma ka thianpa in minlo hawn ka Desert Eagle Pistol mu ngei kha ani, Mizoramah nei dang an awm lo, ka manchhuak ta che a ni." a ti ta phiar phiar mai a. Margarethi chuan, "Mahse ka pu, kha ramhuai rapthlak zet kha Jimmya hi a ni thei dawn em ni? Chubakah thla a nei a, a thlawk thei a, chuan meialh a phuhchhuak thei bawk a..." a ti a, Nathana chuan, "Chungte chu kan ramhuaia hian a sawifiah ve tawh mai ang chu." a ti a.

Jimmya chu a thu kun lap a, muangchangin a rawn hawi chhuak a, "Ni e, kei hi Spring-Heeled Jack chu ka ni e, tualthattu kha keimah ka ni." a rawn ti ta a. Nathana chuan, "Engvangin nge tual i thah?" a ti a. Jimmya chuan, "Ka nu leh pate thu awihin Mizoram thatnan zawk a ti ka ni, ka nu leh pate vang vek hi a ni." a ti ta mai a. Jimmya pa chuan, "Enga i sawi a, zaklo lutuk. Tualthat tur in ka zirtir che em ni? Tianga ramhuai ang maia mi ti thlabar tur hian ka enkawl seilianlo che asin." tiin a vin hrep a. Mahse Jimmya chuan a aia vin zet hian, "Ni e, ka nu leh nangma thiamloh a ni, ka tui em em na chu science a ni a, scientist nih ka duh thu te ka sawi thin. In bulah pawh thil hmuhchhuah ka nei ang tiin, min la chhuang hle ang tiin ka sawi thin, mahse min nuihzat a, a tawpah ka duhloh pui Arts Subject min laktirin North College ah min luh tir a, an principal nena in inthian that vang maiin. Tichuan ka rilru na lutuk chu lehkha zir tha peihlovin zu te ka in a, min hau a, min vua a, Zoram tana hnawksak zurui mi, ruihtheihthil ti tleirawl ho hi chu an hnawksak nangpawh hi hi hnawksak tiin min hau a, chuvang chuan i lawmnan tiin kan khawtlanga mi hnawksak ho ka thianfai animai alawm." a ti ve phiar phiar mai a. Jimmya pa insum zo lo chuan Jimmya chu, "Tenawm lutuk.." tih pahin a beng thuai mai a, police te chuan an lo dang a, Jimmya nu leh pa te chu pawnah an chhuahpui ta a. Nathana chuan, "Awle Jimmy, chiang takin sawi rawh le...enge thil awmzia?" a ti a. Jimmya chuan, "DCP Nathan, mifing tak i ni, tuman min hriatchhuah ka ring ngailo asin. Ni e, class-7 ka nih lai atangin scientist nih hi ka tum mai bakah mechanic lampang te, khawl siam tih te leh electronic lampang ah hian ka tui em em a. Class 10 ka nih khan keima thiamna hmang ngeiin Aeroplane remote control hmang ka siam chhuak asin. Intithei takin ka nu leh pa bulah ka hmuh a, mahse min lawmsakin min ngaihsak duhlo, chu ai chuan khawtlang an vei zawk a, ramthim ramthim tiin Pathian thu hlir an ngaihtuah a, mahse an nunah hmuh tur ka hmuh loh mai bakah an fapa neihchhun pawh hi min ngaihsak lo. Kan class ah science leh Maths ah letter ka hmu in pakhatna ka ni ziah a, chungte chu thenawmte bulah intihtheih nan an hmang a, mahse min ngaihsak chuang lo. Class 11 ah leh 12 ah Govt ah min luhtir a, Science ka la a, tichuan pakhatna tho ka ni leh a, mahse College chu North College a Arts la turin min ti ta tlata, ka duhlo ka tih pawhin min tihluih tir ta a. Ka zirlai chu ka tuilo a, tichuan ka fail ta fo a, zu in te ka ching a, ka nun chu a ruak ngawih ngawih a, mahse ka nu leh pate chuan kut min thlak a, min hau a, tumah hnemtu leh tantu ka neilo, ka room hi ka thiankawm ve ber chu a ni mai. Ka pa chuan, 'Khawtlang thatnan tiin hma kan la ve em em a, kan fapa ve berin a hnawksak zawngin zu te i in ve khanglang...heng tleirawl ngawlvei ho leh khawlaia pharvar thin ho hi khawtlang tihnawk tute an nih hi.' tiin min hau a, chutia hnawk duhlo nanana chu tiin ka thianfai hlawm ta nih kha." a ti a. Nathana chuan, "Anih leh Spring Heeled Jack thuamhnaw kha..." a ti a, Jimmya chuan, "Min phuarna hi phelh rawh u, ka room ah sawn pindan lehlam ah sawn a awm, ka hnathawhna ber alawm. Ka tlanchhuak lovang,ka tiam ache u." a ti a, tichuan a phuarna chu kan phelh a.

A roomah chuan min luhpui a, tichuan a room chhunga pindan lehlamah chuan kan lut leh ta a, chutah chuan khawl chi hrang hrang leh laboratory ang deuhreuh te hi a lo awm nuai hlawm mai a. Nathana chuan, "Heng ho hi khawia i neih te nge?" tiin a zawt a. Jimmya chuan, "Kan College atang ten, mi garage atang ten, kan school hlui atangte leh mi dawr atang tea ka ruk khawm a nih kha. Tikhan thil engemaw hmuhchhuah tumin thil ho te te hi ka hmang khawm ani." a ti a. Wardrobe pakhat hi a hawng a, Spring-Heeled Jack thuamhnaw ngei mai chu a lo awm a. Jimmya chuan, "Tualthahna rilru ka put khan tan han lak dan tur ka ngaihtuah a, computer chu ka khawi mai mai a, tichuan engtin emaw tak hmel tihdanglam a ngai niin ka hre ta a. Super hero ho anga inchei danglam ka tum chuan list hmasa ber a Spring heeled Jack ti chu ka hmu a, tichuan a chanchin te ka hriat hnu chuan a abilities te zawng zawng nei ve vek thei tur angin ka thil kawl te chu kan siam chhin vel ta a ni. Ka boot hman hi ka pa boot ka ruk a ni a, chuan thuam hnaw ho hi chu thawmhnaw dawr atanga ka ruk chhuah ho te an ni a, ka room ah hian dahkhawmin ka siam danglam leh a ni. Hmaikawr pawh hi ka lemziak atanga plastic nemchi atanga ka siam a ni a, tichuan ka ki(horn) pawh hi lehkha khawng atanga ka siam chawp mai mai a ni. Tichuan ka kutin hriam atan hian rangva ka hmanga, ka kutkawr nen ka thui zawm a ni." a ti a, Nathana chuan, "Nihleh meialh te kha, chuan i thla te kha? Engtin nge i thlawh theih a?" tiin a zawt leh a. Jimmya chuan a thla chu a rawn la chhuak a, mulukawlh thla ang mai hi a ni a, thir vek ala ni zui. A thla pawnlam hnuai lam deuhah chuan thil bial hi ding lam leh veilamah a awm a, bial chhung ah chuan thil vir thei ni awm tak hi a awm bawk a, chuan a thla hmawrah chuan kutrawlhna a awm a, chuan hmeh tur button hi dinglam leh veilam ah a awm ve ve bawk a. Jimmya chuan, "He tla pawnlam hnuai a thil bial chhunga vir thei khu in hmu em? Khu khu Helicopter vir aia let thumin a vir na thei a, chu chuan sang takah min thlawh tir thei a ni. A thla hmawra hmeh tur ka hmeh hian a vir ta a, tichuan he thil vir thei hi motor fan atang mai mai a ka siam a nih hi, heti khawp hian thil ka siamthiam tih in awih kher lo ang. A force ti chak tur hian inverter battery ka ruk chu ka hmang bawk a, tichuan he ka thla siam nan hian thla thum lai ka hmang asin." a ti a. Tichuan a hmaikawr chu alo la chhuak leh a, a ka zawnah chuan ha lem hriam tak hi a infuah bawk a, a ha chunglam leh hnuai lamah chuan box dum tereuhte hi a awm a, Jimmya chuan, "He box chhungah hian Pottasium Chloride leh liquid alcohol tak ber chi ka thun a, chu chu rawng pawl nen ka chawhpawlh a, tichuan box hmawrah hian dawt ka siam a, tichuan ka ka zawnah hian lighter ka hmet alh a, tichuan a dawt chu ka ham a, lighter alh chu ka phuh chuan meialh chu a rawn pawl ta thin a ni. Ka mit lemah hian marble transpert ka hmang a, asirah hian light sen a eng thei turin dinlam leh velamah ka vuah ve ve a, mahse ka mit tak tak zawk erawh chu hmaikawr hmel a a chal zawnah hian ka verhkua a, tuman ka mit tak tak zawk awmna an hre ngailo, achhan chu zanah chauh ka vahchhuah thin vang a ni. Ka awmah hian voice changer chip ka vuah a, chuchuan ka aw(voice) a ti danglam thei bawk a ni. Engtik lai pawh hian bur ah hian a hmeh chik theih turin LYE acid ka kawl reng bawk a, chu chuan an taksa ah ka kap lut thin bawk a ni." a ti a, kan ngaithla thap mai a.

Nathana chuan, "He i room hi i nu leh paten an hmu ngailo a mi?" tiin a zawt leh a, Jimmya chuan, "Ka nu leh pate hi ka hre chiang thawkhat a, an lut peih dawn lo tih hi ka chiang a, ka hlauthawng lo, min ngaihsak ve ngai hleinem." a ti a, Nathana chuan, "Atha e, Jimmy..khawtlanga mi hnawksak ho i thianfai in i siamtha emaw i ti a, mahse khawtlang i ti thlabar in i ti hrilhhai zawk a ni. Tunah chuan Jail ah i hun pum i hmang tawh ang, man i ni e." tiin Jimmy-a chu kan hruai chhuak ta a, kan chhuah hma chuan Nathana chu Jimmya nu leh pate bulah chuan ava kal hnai a, "In tan Jimmya kan man hi a tha zawk, nangni chu tikhan fa neilo khan khawtlang leh ramthim chu inlo vei char char dawnnia, fa pakhat pawh in nei leh a nih chuan tualthahhmangah bak inchhuah leh chuanglo ang." a ti a, Jimmya nu leh pa te chu an kun reng a, an hawi chhuak ngam lo. Tichuan Jimmya chu Jail ah kan phur liam ta a.

THE END