NATHAN SEASON-2 (Episode-20)
NATHAN SEASON-2 (Episode-20)
POLICE VS MIZORAM : MUMBAI CBI RAIDS MIZORAM (Part-1)
(Based on a true incident of 1987 Opera House heist in Mumbai)
Written by : Aaron Malsawmdawngzuala
(Tun tum chu Rinawma a tel ve dawnlo a, a awmloh hlan chuhin keimah, a ziaktu ngei mai hian ka han sawi ve thung ange aw...mahse Rinawma ang em em chuan ka sawi ngaihnawm ve thiamlo maithei ania. Chubakah kei chuan Rinawma sawi dan ang nilovin, ka duh dan dan in ka sawi dawna, ka rawn thawnthu sawi ve dawn lo ania. Hei...titi mai mai ang hian ka rawn sawi tawp dawn ania, min lo hrethiam hram dawn nia, ka thiam ve dan ania.)
DGP chuan ASP Rinawma chu amaha case chingfel turin khaw dangah a tir bo leh ta a, tun tum chu Nathana pawh Amandai nen an thawh dun leh angai ta, Rinawma erawh a tel thei dawn leh talo. SI Liantea lah accident vangin a keruh a ti tliak a, damdawiinah a awm mek bawk si, Nathana pawh Rinawma a zin bo leh tak avang chuan phur lo tak chuan a duty leh ta. Tuk khat chu Nathana a duty lai chuan a office ah chuan DGP a rawn lut a, phone rawn pek pah chuan, "Nathan, Mumbai CBI Officer a ni a, a be duh che a." a rawn ti a. Nathana chuan phone chu la vatin, "Hello Sir, DCP Nathan Malsawmkima, Crime Branch." tiin zah takin a han bia a. CBI Officer chuan, "CBI Officer Uttam Raj ka ni a, Mizoram kan rawn thleng tawh a, raid tur kan nei a, chutah chuan Police kan mamawh dawn a, nang hi ka thlang che a ni, DCP Nathan." a rawn ti a. Nathana chuan, "Awle Sir, khawi hmunah nge?" tiin a zawt a. Officer Uttam chuan, "A hmun chu nakinah ka hrilh ang che, vawiinah hna tan a ni dawn a, khawngaihin i Assistant tur rawn hruai ang che. Tunge i rawn hruai theih ang? A hming i rawn sawi nghal mai thei em?" a ti a. Nathana chuan, "Awle Sir, Inspector Amanda-i nen kan lo kal ange." a ti a, Officer Uttam chuan, "A tha e, i Whatsapp message lo check la, location ka rawn thawn che a, minute 10 hnuah lo thleng ang che." a ti a, phone chu a dah ta a. DGP chuan, "Enge ni a, DCP?" tiin a lo zawt a. Nathana chuan, "Sir, a rawn be lawk tawh che em ni? Mumbai CBI Officer Uttam hian tinge kei kher min duh le?" a ti a. DGP chuan, "Aaa....nangmah hi a chhawr duh thu che kha chu a sawi ngei a, mahse a chhan erawh a sawi lova." a ti a. Nathana chuan, "Mizoram an rawn raid dawn a ni awm a, mahse khawi hmun nge tih chu engmah a sawi chuang lo." a ti a. DGP chuan, "A tha alawm, chutia Mumbai CBI ten an mamawh che chuan va kal ta che, Amandai pawh chu hruai rawh." a ti a, tichuan Nathana chuan a phone a phawrh a. Whatsapp message chu a en a, Officer Uttam chuan location chu a rawn thawn a, tichuan Amandai ko vatin an chhuak dun ta nghal a. Officer Uttam-a sawina hmunah chuan an va kal a, CBI te chuan an lo nghak reng tawh a. Nathana te hian police force 30 rual vel an hruai tel bawk a, Officer Uttam-a thupek vang a ni. CBI leh Police hi an in ang amaw inlo ti maithei a, an danglam hlak a ni. Police, CBI, CID te hi an in anglo vek a, CBI te hi Police te aiin thuneihna an nei tam zawk a ni. CBI Senior Officer te chuan Nathana te rank, DCP te hi an thuhnuaiah an dah thei vang vang thei a, Nathana te rank mai nilovin, Senior SP te pawh an thuhnuaiah an dang vang vang thei a ni. Inla bialnu nei zet Rinawma te ang phei kha chu an tan chuan vai thirchhe zawng ang vel mai chauh an ni, ka sawi na mah mah lo ang chu maw. Nathana te chu an va thleng a, CBI Officer 5 te chu an lo ding tlar thap mai a, anzingah chuan hmeichhia, kum 45 vel mi niawm tak alo tel ve bawk. Officer te zinga a thunei deuh bik pahnih te chu an rawn pen hnai a, pakhat zawk chuan a batch hmuh in, "CBI Officer Uttam Raj ka ni a, Tamil Nadu mi ka ni a, Mumbai ah CBI Officer hna thawk turin ka awm a, ka ngenna i ngaipawimawh a, ka lawm e, DCP." a ti a. Hmeichhia zawk chuan a batch chu rawn hmuh veleh in, "CBI Officer Jhansi Rani ka ni e." a ti a. Nathana chuan salute a pe a, "DCP Nathan Malsawmkima ka ni e." a ti a, Amandai pawh chuan salute pek ve pah chuan, "Inspector Amanda Lalrempuii ka ni e." a lo ti ve bawk a. Officer Uttam chuan Amandai chu a en vung vung a, "Inspector Amanda, i lukhum kha a sawi ania, khum tha rawh." a ti a, zak takin Amandai chuan a lukhum chu a khum tha sawk sawk a. Officer Uttam chuan, "In ram, Mizoram ah hian University Professor pakhat, Chandra Shekhar a awm a, Andhra Pradesh a mi a ni. A eiru nasa hle tih hriat a ni a, politician ni bawkin black money pawh tam tak a inchhungah sawn a kawl teuh ani, chu chu report kan dawng a, kan va raid a ngai a ni." a ti a.
Nathana chuan zah tak chuan, "I thu ang zelin le, Sir." a ti a, tichuan an kal ta a. Inchhung chu an lut a, Shekhara chuan, "Ehee...tute nge in ni a?" a lo ti hu mai a. A nupui chuan, "Police maw? Enge kan tihsual?" alo ti nghal vak vak mai a. Officer Uttam chuan a batch hmuh pah chuan, "CBI Officer Uttam Raj." a han ti vak a. Officer Rani chuan a batch hmuh ve pah chuan, "CBI Officer Jhansi Rani...in in dap phalna warrant kan nei a ni." tih pah chuan search warrant chu a han hmuh tir a. Chuveleh ring tak hian Uttam chuan, "Officers....SEARCH!" a han ti vak a, tichuan Nathana te leh CBI Officer dangte chuan an in chhung chu an dap ta a. Chutia an dap lai chuan Shekhar-a te nupa chuan, "Enge awmzia, khawngaihin chhuak rawh u. Engmah kan kawl lo, engmah kan ti sual lo." an lo ti chiam chiam mai a. An han zawn ngial hnu pawhin eng pawisa mah an hmu chuang lo a, CBI zawk te chu an beidawng hman lek lek a. Mahse DCP Nathana erawh a beidawng ve duh lo, ngun tak chuan a zawng kual char char a. Nathana chuan room pakhat, biru deuh taka awm chu a hmu fuh hlauh mai. Nathana chuan, "Sir, heta hi room ka hmu ania,hei hi secret room chu a ni ngei ang." a ti a. Officer Uttam chuan room chu hawn a han tum a, mahse a thei thak lo. Shekhara bulah chuan, "Chahbi lo la rawh...vatin." a han ti vin tuar a. Mahse Shekhar chuan, "Ka pu, chahbi ka nei lo, hemi room hi chu he in kan luah tir atangin a hawn theih tawh loh hrim hrim." a lo ti tlat mai a. Nathana chu lo kal hnaiin, "Sir, rem i tih chuan hawn ka lo tum ve chhin dawn em ni?" a ti a, Uttam chuan, "A tha e, han tum ve chhin ta che." tiin a lo chhang a. Chuveleh Nathana chuan na em em hian kawngkhar chu a han chhuih thuai mai a, a in hawng chiang teh asin le. A chhung an han lut chu Hindu Pathian lim a lo tam em em a, bangah te chuan Indian Freedom Fighters te leh Indian Politician thlalak tam tak alo intar teuh mai bawk a. Mahatma Gandhi thlalak te, Subhash Chandra Bose, APJ Abdul Kalam, Jawaharlal Nehru, Atal Behari Vajpayee te leh Indian mi ropui tak tak thlalak te chu alo intar khat vek mai a. Chumi thlalak hnuaiah chuan Hindu Pathiam lim tam tak, Krishna lim te, kut tam deuh deuh nei te, sai lim te leh Chhota Bheem te pawh aniang, alo in hung fur hlawm mai a. Amandai chuan, "Sir, heta hi locker a awm a nia." tih pah chuan room sira locker chu a kawk a. Officer Uttam chuan, "Hemi chhungah hian enge awm?" tiin Shekhara chu a zawt a. Shekhar chuan, "Ka thawmhnaw hlui te, ka roh em em ka pu chapal te, ka pu thawmhnaw te leh ka pa sana te a awm a, ka ro bawm ve liau liau a nih kha." tiin a han tap nghal tuau ringawt a. Uttam chuan, "Chahbi lo la teh." a ti a, Shekhara chuan a nupui bulah chuan, "Duhtak, pe mai teh...hemi te hi an rapthlak emai. Ka duh theilo, Lalpa enge kan chunga thil thleng hi?" a han tih zawm nghal zawt zawt a. Thil pakhat ka'n sawi leh lawk, Nathana nupui hian Tamil tawng hi Amandai a zirtir thin a, kum 1 dawn lai an in zirtir tawh a, Amandai hian a thiam ve thawkhat tawh hle. Chuvang chuan Nathana hian heng Tamil Officer te bulah hian a hruai ve a ni. Tin, heta Officer Uttama te leh Nathana te an inbiak hian Tamil tawng vek an hmang a, Shekhara erawh Andhra Pradesh mi a ni a, Telugu tawng a hmang thung a, mahse Officer Uttam te, Rani te leh CBI Officer dang te hian Telugu tawng pawh an thiam tho a, Nathana chu sawi ngailo law law ta se, Amandai pawh hian Telugu tawng chu Sanvi vang thovin a thiam ve sawih sawih bawk a ni. Tumah hian mizo tawng an hmang lova, chhiartute hriatthiam nan mizo tawngin ka ziak mai zawk a ni e. Tamil tawng leh Telugu tawngin han ziak vek ila chu, a zialo dawn emai. Tichuan chahbi chu Shekhara nupui chuan a pe a, Uttam-a chuan a hawng a. Locker chhungah chuan Shekhara sawi ang ngei in chapal hlui zet zet te, sana hlui zet zet te leh thawmhnaw hmuar zet zet te chua an phawrhchhuak teuh mai a.
Nathana leh Amandai chu an in en a, mak an ti ngei mai. Shekhara lah chuan, "Ka sawi reng kha..kha bak engmah kan kawllo." tih pah chuan a chal a han dawm a, "Awww..Lalpa, enge awmzia, enge kan tihsual?" tiin a han rak nghal vak vak a, vai ho tak hi chuh. Nathana chuan Shekhara chetdan chu ngun tak chuan a lo en reng a, Shekhara chu a che over ta mah mah deuh aniange. Chung Freedom Fighters te thlalak te chu en pah chuan, "En ta che u, ka thlalak tar te hi, ka mi ngaihsan te an ni a, ka hero te an nih hi. Engmah kan tisual lo, min chhuahsan teh u. Eiruk hi ka hua, ka duhlo, ka tih chi anilo. Mi dik, zirtirtu tha leh rinawm, mi rethei te pui thin ka nih hi." tih pah chuan Mahatma Gandhi thlalak chu a han chul vel a, "Awww Gandhiji, hei leh chen i thu zawmin diktakin ka kal thin a, mahse heng CBI te leh Police te hian enge an tih hi...enge awmzia?" tiin a han tap vel vak vak a. Mahse a pawi ta, a over sual ta. Nathana chuan Shekhara'n Mahatma Gandhi thlalak a chul mek chu a chul pah chuan chu thlalak chu a khuar leh duk zel tih chu a hmu fuh ta a, chu thlalak chu glass ni ve lovin, puan a ni zawk tlat mai. Nathana chuan, "Hey...kalsawn rawh." tih pah chuan Shekhara chu a pawt tho lawp a. Gandhi-a thlalak chu a han chul ve chhin a, a rin ang ngeiin puan a lo ni, "Sir, hei hi glass a ni ve lo, puan a ni." a ti a. Shekhara pawi ti lutuk chuan a lu a dawm vawng vawng mai a, a nupui chuan a tukhumah bengin, "Over leh lutuk man a nih kha." a lo ti vin hlur mai a. Officer Uttam-a chuan chemte a phawrh a, puan chu a zai t(r)et ta a, a chhungah chuan pawisa tam em em mai hi a lo awm a. Pawisa te chu an la khawm a, bag ah chuan an khung ta vek a. Shekhara chuan, "Kha bak kha kawl engmah ka nei lo, min ngaidam rawh u." ati lawm lawm a. Officer Uttam chuan, "I nei tawhlo takzet maw?" a ti a. Shekhara chuan tap chungin, "Aw...ka nei tawhlo tak tak. Ka pa thlalak hmingchhal khian ka sawi ngam e, ka pa hmingchhala thu ka sawi tawh anih chuan dawt ka sawi ngailo." a han ti vel zuah zuah a. Nathana beng a verh leh tlat mai, Shekhara pa thlalak chu inchung lamah a awm a, inhnuai atanga han hawi chhoh mai pawhin a hmuh theih ani. Thlalak lianpui mai hi a ni a, Nathana chuan thlalak chu a han en chho vang vang a. Officer Uttam-a bulah chuan, "Sir, khi thlalak khi enfiah leh ka duh ani." a ti a, Uttam chuan, "A tha e....Officers...let's check that photo." a han ti leh tuar a. Shekhara nupui chuan, "Lo ngawi mai mai tawh teh...i inpuan zo vek dawn." tiin Shekhara chu rum zet chuan a melh a, Shekhara pawh a lu a dawm leh ta vawng vawng mai. Nathana chuan thlalak chu a la thla a, thlalak hnunga bang chu a han kik karh karh a, a ri adang ta tlat mai. Nathana chuan, "Sir, hemi chhungah hian room dang a awm a ni." a han ti a. Officer Uttam chuan, "Tichhe rawh u.." ati a, Nathana chuan bang chu a tlawh chhe leh ta vek mai. A chhungah chuan pawisa tam mangkheng hi a lo awm teuh mai a, chung zawng zawng te pawh chu la khawmin bag ah an khung leh ta vek mai a. Shekhara chu a thu tum bur tawh mai a, Officer chuan, "DCP, a dang anla kawl i ring em?" a han ti a. Nathana chuan, "Lawk aw...ka han enfiah leh ange." a ti a. Tichuan Shkhara hma ah tak chuan Nathana leh Amandai te chu an thu a, an talent an show dun leh dawn ta. Amandai leh Nathana chuan ngawi reng hian Shekhara chu an han en vang vang a, Shakhara chuan hrethiamlo tak chuan Amandai leh Nathana chu a lo en let ve a. Amandai leh Nathana chuan uluk em em hian mitkhap miahlo chuan an en a, Shekhara chuan a en let ngam tha tawhlo. Shekhara thlekna lam apiangah chuan Nathana leh Amandai chu an thle ve zel a, atawpah chuan Nathana chuan, "Sir, an nei tawh ka ring lo, i kal ang u." a han ti chiah chu Shekhara chu a thaw huai mai. In chung step chhona zawna chhuat-dawh chu melh zeuh pah chuan, "Atawp atawp ah chuan...huiham." a han ti thawp sat a.
Chuveleh Amandai leh Nathana te chu an innuih a, "Sir, inchung chhuat-dawh kha check leh angai." an han ti rual dun ngei ah, hemi te pahnih hi chu lo innei daih se tha tur, mahse sawi zawm lovang, Sanvi'n min hau palh ang. Officer Uttam chuan, "Check leh nghal rawh u." a ti a, Nathana chuan thirtiang a la a, inchung chhuat dawh chu a han hawlh pawp leh ta vak vak a, pawisa a rawn tla leh ta nuai nuai mai a, Shekhara pawh a tap pur tawh mai. Tichuan Uttam chuan, "Pawisa zawng zawng hi khungkhawm ula, Goverment kutah hlan a ni ang." a ti a. Nathana chuan Amandai beng bulah chuan zawite hian, "Mi rinawm tak an ni ngei ang, CBI nih ka chak theih zia kha. An mahni anga rinawm leh dik nih hi ka duh ve ngawt mai, ka ngaisang takzet." a ti a. Amandai chuan, "Sir, nang tluka ngaihsan awm an awm hleinem le...mi rinawm leh diktak chu nang ngei hi i ni alawm." alo ti a. Chutih lai chuan Shekhara chuan Nathana bulah chuan, "Officer, hetah lo kal teh." a ti a, tichuan Nathana chuan ava zui a. Zawite hian Shekhara chuan, "Hetia min rawn raid vak hi a tul lo sin, min pui la, pawisa pawh ka pe ve dawn che alawm." a lo ti su su a. Nathana chuan, "Animaw...engzah nge min pek ang?" tiin a zawt a. Shekhara lawm lutuk chu a thaw huai mai a, "Awww....tinge nichinah khan ka lo zawh daih tawhloh che le? Umm....cheng nuai 5 a tawk angem?" a han ti a. Nathana chuan, "Ka hrelo le...lawk aw...han tawlh hnung deuh lawk teh." a ti a, Shakhara chu a tawlh hnung a. Chutah na em em hian Shakhara chu a beng hawi sawk mai a, "Min tham te i tum amaw? Ve khanglang a, Police Officer dang ang ka ni velo." a ti khur khur a. Uttam-a chu lo kalin, "Enge ni a, DCP?" a rawn ti a. Nathana chuan, "Enteh Sir, hepa hian tun lawk khan minlo tham a ni." a ti a, Officer Uttam chuan, "Khanglang chuan le...tikhawp hian kan man chiang tawh che a, i thil tihsual pawh kan hailang zo vek tawh a. DCP Nathana hi ilo la tham vel amaw?" tih pah chuan a han beng ve thuai a, Shekhara pawh a thal tawp mai. Pawisa zawng zawng te chu an khung khawm leh ta vek a, tichuan CBI ho chuan an motorah an dah a, tichuan Officer Uttam chuan Nathana chu ava pan a, "DCP i chungah ka lawm takzet e....nang awmlo la chuan a pawisa dahna pawh kha kan hre thei dawn miahlo a nih kha." a ti a. Nathana chuan, "Ka duty ania, ka tihtur alawm Sir...engtik hunah pawh minlo ko thin dawnnia." a ti a. Officer Uttam-a chuan, "Anih chuan DCP, keini CBI Officer te hi kan lo va kal hmasa anga, anni erawh hi chu tihian lo buaipui ula, pawisa zawng zawng te pawh hi Sawrkar hnenah thlen ala ngai dawn si a, kan kal phawt ange." a ti a. Nathana chuan, "Awle Sir, tluang takin in kal dawnnia, abak chu ka lo buaipui ange." a ti a, tichuan CBI Officer te chu pawisa zawng zawng nen chuan an inphur liam ta a. Minute 10 vel a ral meuh chuan vai palian pui pui 10 vel an lo lut a, an zinga sam var vek, hmuihmul leh khabe hmul t(r)uak bum mai chuan Nathana chu a en a, "Nang hi DCP Nathana i ni em?" a rawn ti a. Nathana chuan hriatthiamloh hmel tak hian a lo en a, chupa chuan tamil tawng a rawn hmang ve lehnghal. Nathan chuan, "Aw..ni e, tunge i nih a?" alo ti hu mai a. Chupa chuan thinrim hmel zet hian, "CBI Officer Uttam Raj ka ni." a ti ta mai a. Nathana chuan mak ti tak chuan a en hau ringawt mai a, "Mahse...Officer Uttam te kha chu..." a tih lai chuan chupa chuan a batch hmuh pah chuan, "Kei hi CBI Officer Uttam chu ka ni e...nichina keimah anga rawn insawi leh CBI Officer anga rawn insawi te kha rukru vek an nih kha. Kan Mumbai CBI department ah hian Officer Jhansi Rani tih hmingpu pawh tumah an awm lo hrim hrim, an bum mai mai che a nih kha. He in pawh hi raid tura plan siam engmah kan neilo." a ti ta mai a. Nathana chu a zak kher mai, a awmzia chu nichin lawka CBI Officer anga rawn insawi te kha Tamil Nadu-a mi satliah, hna neilo te ve mai chauh an ni a, search warrant te leh an badge te pawh kha siam chawp vek alo ni tihna ani.
Officer Uttam-a tak tak zawk chuan, "Khang an search warrant te leh an badge te kha ilo en chianglo em ni?" a ti khur khur a. Nathana chuan, "Sir, anmahni kha CBI tak tak angin an che ani, hriat hran an har em a, ka lo awih mai a ni." a ti a, Uttam-a mitah pawh chuan a en tha ngam lo. Uttam-a chuan, "Mumbai ah pawh in pakhat an lo raid tawh a, kha fake CBI ho te kha kan zawng char char a, Mizoram thlengin kan rawn zawng chho ta a nih hi. In DGP lah khan Nathana nen mi hausa eiru pakhat in kan raid tur angin min lo hrilh a, keiin engmah ka hre silo...kan rawn thleng tlai ta anih hi, ava han pawi tak." a ti vawng vawng a. Nathana pawh a zak hle mai, hnuai lam a melh char char a, chutiang bawk chuan Amandai pawh chu a kun reng a, a hawi chhuak ngamlo. Chutih lai chuan Shekhara chu a rawn t(r)awng chhuak ve a, "Sir, khang CBI lem ho khan ka pawisa dahna engmah anmahniin an hmu chhuak lo, khalai DCP vang vek kha a ni, ka awmdan atang ringawtin ka pawisa thuhruk na a hre vek thei." a lo ti zuah zuah a. Officer Uttam chuan rum zet hian Nathana chu a melh a, "DCP, i fing hle bawk si a, pawisa a thuhrukna te pawh awlsam tak takin i hre thei zel bawk si a, mahse an batch leh an warrrant paper te erawh en fiahna chang i hre leh silo...i thil tih pawizia hi i hmu em?" a ti vin khur khur a. Nathana chuan inthlahrung takin, "Sir, mahse Chandra Shekhar pawh hian a eiru tho a, a eiru tih chu kan hriat phah tho a.." a tih lai chuan vin zet hian Uttam-a chuan, "Ngawi hmak rawh DCP, i zak nange? I thil tih sual hi thil lian tham tak a nih hi...Chandra Shekhar hian lo eiru pawh nise, khawi ami nge a eiruk? Search warrant i nei em? Engvangin nge Shekhara hi complaint leh FIR pawh tuman thehlut silovin ilo chhui ve ngawt anga? Eiru te emaw, thil tisual te emaw hi FIR thehluh a nih loh chuan mahni ngawtin Police te hian an va man ngawt theilo tih te chu i hre ve ang tiraw, DCP?" a han ti deuh kher a. Nathana chuan, "Yes Sir." a ti a, a zah hmel hle mai. Officer Uttam chuan Nathana chu a en a, "I hming hi Nathan Malsawmkima tiraw...Mizoram chuan an fak hle che tih kalo hria a, mahse ka han belchiang ve ta che a, ilo mawl hleeeee mai. Tihian ti teh ang, khang Fake CBI ho kha kan manchhuah hma zawng leh he case hi chinfel anih hma chu i hming hi thlak hrih teh ang. Nathan Malsawmkima nilovin, Nathan Mawllianpuia (Bewakoof Nathan)tiin ka ko hrih ang che aw?" tih pah chuan hmuhsit hmel tak chuan a nuih vel a. Nathana leh Amandai te pawh chu zak takin Station lamah chuan an haw leh ta a, cheng nuai tel chu rukru te an rukpui a ni ta ringawt mai chu ania. DGP pawhin engkim a lo hria a, mahse Nathana leh Amandai te chu a hau miahlo thung, "Thil hriatsual te hi chu a awm ve a, chubakah..khang CBI lemchang ho te khan pawisa chu lo ru pawh nise, kha Chandra Shekhara kha a eiruk thu leh a black money te in haichhuah sak a, engmah tihloh ai chuan a tha tho tho." tiin Nathana leh Amandai te chu a hnem hram hram a. Officer Uttam-a erawh chuan Nathana chu he case ah hian hman chhunzawm zel a la duh tlat thung a, mahse case an chhui chhung zawng chuan he CBI Officer chapo zet hian Nathana chu 'Mawllian' tih hlirin a au a, Nathana pawh a lungawilo thei kher mai. He case hi Mizoram Sawrkar chuan ala serious hle a, nasa taka chung CBI lemchang te chu zawn mek zel an ni a. Heng Fake CBI Officer te panga hi tute nge an nih tih leh an hming tak tak te hi tuman an hrelo a ni. Mumbai ah in pakhat anlo raid tawh bawk a, chutah pawh chuan a in neitupa chauh chuan an hmel a hria a. Mizoram an lo thleng a, Pu Shekhara te in an raid leh a, DCP Nathana chuan a pui leh ta nghal a. Nathana, Amandai, Police Force 30 te leh Pu Shekhara te nupa chauhvin an hmel an hmu bawk. Officer Uttam te leh CBI Officer dangte chuan eng ang hmel nge an put erawh an hre ve lo thung.
Kar khat chhung teh meuh an zawn hnu pawh chuan chung Fake CBI te chu an la zawng hmu thei chuanglova, Mizoramah hian an la awm ngei em tih pawh hriat ala ni thei chuanglo. Mipui titi a ti tam em em a, chutia Fake CBI Officer ten Mizoram an rawn raid ta mai chu Zoram mipui te pawh an thla a muang lo hle a, chumai nilovin Officer anga insawi hrim hrim te pawh an ring tawp ngam tawh lo hrim hrim a ni. Nathana pawhin a hriatsual palh vang liau liau in a lo pui kha a ni a, Nathana demna pawh a nasa hle a. Social Media ah pawh alarin diriamna pawh a tawk nasa hle, tun tum zet zawng, DCP Nathan Malsawmkima pawh a thlang tlawm ta ngang mai. Chutia an zawn hmuh mai theih tak silovah chuan Home Minister chuan Chennai atangin CBI Senior Officer, fing leh phakar zet mai, tualthah mai pawh hreh lo leh pawisa ngaina ve tak, mi nunrawng tak leh hausa tak Sathya Kumar-a chu Mumbai CBI te pui turin a chah chho ta ringawt mai a, Kumara pawh chu reilote ah Mizoram a rawn thleng ve ta thuai a. Tichuan fake CBI ho zawn hna chu Police te nen tang kawpin an bei leh ta ngat ngat mai a, Sathya Kumar-a a rawn tel ve meuh chuan rinhlelh pakhat chu an nei nghal der mai. Chu an rinhlelh ber chu CBI Officer Jhansi Rani anga insawi kha a ni a, Ramthar Venga mi inhnuai luah a ni. Kumara chuan Uttama bulah chuan, "Henu hi enthlak angai a, ka theih ang tawkin ka chhui a, Jhansi Rani anga insawi nu kha, a hmel hmu tawh tu ten a hmel awmdan an sawi khan, Aizawla South Indian hmeichhia thlakhat liam ta atanga lo pem thar zawng zawng an hming ka la vek a, a mal te te in an inah ka kal tawh bawk. A ang ka tih ber leh ka rinhlelh ber chu henu, tuna kan mi rinhlelh ber hi a ni." a ti a. Uttama chuan, "Mahse a ni dawn em ni? Mi inhnuai luah ve mai a ni a, a retheih hmel bawk si. Chubakah CBI ang mai khan a che zei a, engkim chu a hre ve deuh vek ania. Helaia mi inhnuai luah a, harsa taka a fate pahnih chawm tu hi chu a nih ka ringlo a ni." a lo ti a. Kumara chuan Nathana chu a en a, "Nang enge i ngaihdan DCP?" tiin a han zawt a. Nathana'n a chhan hma hma chuan Uttama chuan, "Sir, hepa hi chu zawt ve duh suh. Mawlliana a nih hi, engmah a hre ve tak tak lovang. Thil chhui chu a thiam, mahse thil hrechiang lovin a che phut phut thin a, a laktlak vak loh." a lo ti zuah zuah a, Nathana chu a thinrim kher mai. Kumara chuan, "Officer Uttam, inbeng dai teh...engemaw tal chu han sawi tir ve la mawle." a han ti a. Nathana chuan, "Sir, ka ngaihdan chuan he kan rinhlelh nu pawh hi kan ringhlel a ni tih thu hi news ah te la puang vak vak lo ila, a lo nih leh siloh khan a zahthlak dawn emai." a lo ti a. Uttam-a lah chuan, "Lo ngawi mai mai rawh...in DGP kha ka thianpa anih avang chauhvin he case ah hian i thil tihsual zahthlak tak i hliah khuh leh theih nan Inspector Amandai nen khan ka tel leh mai mai che u a nih kha." a lo ti hrep a. Mahse Kumara chuan, "Khaih khaih, Uttam, insum teh. Nathan, han sawi zel teh.." a ti a. Nathana chuan, "Sir, hetia kan thu hriat thar apiang kan puanzar zel chuan Veng danga police te pawh an lo che ve buan buan dawn si a, Mizoramah a darh hneh tawh bawk si. Tlema lo inla hnuchhui hovin he kan mi rinhlelh nu hi an lo zuk man ngawt ang tih te a hlauhawm ania." a ti a. Kumara chuan, "Ngaihdan tha tak chu a ni ve tho mai, khanu hmel kha nangchuan i hmu tiraw?" a ti a. Nathana chuan, "Aw hmu e....mahse khatah kha chuan make up a hmang ve deuh a, a hmel pawh a tha angreng. Kum 45-50 bawr vel a nih ka ring a. Mahse tuna kan mi rinhlelhnu nen hi chuan in ang viau mahse, a nilo deuh tlatin ka hria. A hang deuh bawk si a, chubakah a cher angreng si a." a ti a. Kumara chuan, "A thlalak chauh ka hmuh tir che a, nakinah an inah ngei kalin kan zu enfiah leh dawnnia. Keipawhin ka hmuchiang biklo, an inah khan ka lut lo hrim hrim a. Pawn atang chauh khan ka en a, fa pahnih a nei tawh tih ka hre bawk a, hmeichhia ve ve an ni." a ti a.
Nathana chuan, "Sir, ka hriatthiamloh chu maw...Inspector Amandai nen chiah kha nu, Jhansi Rani anga insawi kha a hmel kan hmu a, midang chuan in hmu velo. Mahse tuna kan rinhlelh mek nu hi an ina in kal tir khan tinge Amandai nen hian min hrilh ve miahloh a, thlalak in neih lah hi a chianglo em em bawk si. Ka sawi awmzia chu, khatia in zu kal te chuan min hruai ve ula, a ni nge nilo tih te chu kan hre nghal mai thei dawn a. MAhse nangni lah chuan hnadang min pe daih bawk si a, enge awmzia ka hre duh a ni, Sir." a ti a. Vin zet hian Uttam-a chuan, "Keiman hruai velo tur che u in ka hrilh a nih kha...ka sawi ang khan nang hi in DGP nen thiantha tak kan nih avangin i thil tihsual hliahkhuh nan he case ah hian ka tel leh mai mai che a ni." a lo ti vin hlur mai a. Nathana pawh angaihdan a ni ta chiah bik lo, zam hauh lo hian Officer Uttam-a mitah chuan a en a, "Sir, tuna kan mi rinhlelhnu hi, a zawngchhuak tu leh a ringhlel tu ber chu Officer Sathya Kumar hi a ni. Hmanni khan kha CBI Officer lemchang te kha kei leh Amandai te hian chiang takin an hmel kan hmu tih pawh i hria, mahse min ringlo a, he kan mi rinhlelhnu te ina in zu ka pawh khan min hruai velo. Enge a chhan? Sir Sathya Kumar pawh hi i ring biklo tihna a ni mai lo maw? I beidawng tawh anga, a ni chuang lovang tiin min hruai peih lo law law te hi ani zawk lo maw?" a ti ve ta ngat a. Uttam-a thinrim lutuk chuan, "Tikhan min tawng khum amaw?" tih pah chuan hnek a tum a, mahse Kumara chuan alo dang vat a, "Khaih khaih khaih, Officer, insum teh. Tunah chuan tumah hi inhnial buaithei kan ni lo, DCP Nathana pawh i lo tel ta sa sa, a tawp thleng min tel pui ang chu. Chutiang bawk chuan Inspector Amandai pawh, a tawp thleng kan tang ho ang." a ti a. Tichuan Uttam-a chuan, "Anih chuan Sir, enge i ruahmanna chu?" a ti a. Kumara chuan, "Nathana hi Amandai nen he kan mi rinhlelhnu te inah hian in zu kal anga, address pawh ka pe ang che u. Mahse Officer Jhansi Rani anga insawi nu kha a lo nih tak tak chuan in hmel a hmu anga, a hlauthawng anga, a tlanchhe hman thei. Kan hriat ang khan mi namai lo tak an ni a, fake CBI officer kha alo nih tak tak chuan man hmanloh te pawh alo awm thei a. Chuvang chuan a ruk thei ang berin in che ang, an inchhung enfiah turin in constable pakhat in hruai tel anga, civil dress nen a inthuam tur a ni. Tichuan constable chuan a kawrhma ah camera tereuhte a dah anga, chu nu hmel chiang taka lang thei turin amah pawh a insiam rem a ngai ang. Tichuan camera chu in check leh anga, a ni nge nilo chu in hre tawh mai dawn a ni. Constable chu duhleh tui in dil ang te pawhin in luh tir anga, mahse chunu chuan nangni pahnih hi a hmu ve tur che u a nilo. Engkim in zawh hunah ka hnenah rawn in report leh ang che u, in hria em?" a ti a. Nathana leh Amandai te chuan Kumar-a chu salute pein, "Yes Sir." tiin an kal chhuak ta nghal a. Tlai khaw thim hma vel chuan NAthana te chu an lo haw leh a, Nathana chuan phur tak chuan, "Sir, ani ngei e...Sir, order min pe la, tunah ka zu man nghal ang." a ti thawt thawt a. Mahse Kumara chuan, "Ni mai love, a thawpui mi 4 te kha an awmna chin kan hriat leh phawt angai alawm." a ti a. Amandai chuan, "Sir, amah chu zu man ila, kan dawp mai dawn lawm." alo ti a, hetah hian Amandai hian bah nuaiin tamil tawngin a lo sawi ve a ni. Mahse Kumara chuan, "Chu aia tha chu ka hria a lawm, engtik lai pawhin an in phone kual reng dawn tih a chiang sa a, an phone kan hack keuh mai dawn lawm. Mahse an hming tak tak kan hre lova, chu chu kan chhui leh phawt angai a ni. Chubakah zu man thut turin arrest warrant kan nei lova.." a ti lai chuan Uttam chuan, "DCP hian an station ah FIR chu ziak chawp mai se...a tha mai lo maw?" alo ti ve bawk a. Mahse Kumara chuan, "A tha tho anga, mahse chu aia fimkhura kan chet a ngai dawn a ni." a ti a.
Nathana chuan, "Sir, phone sawi takah chuan...a number kan trace theih nan kan constable khan a phone a kenglo der a, tichuan khanu phone kha hman a dil a. Mahse phone a neih loh thu a sawi a, landline chiah an neih thu alo hrilh a." a ti a. Kumara chuan mak tih hmel zet chuan, "Landline a? Tun angah landline chauh lo la hman te chu....mi zawng zawng, hausa ber atanga rethei ber te pawhin mobile phone an hum fur tawh a, Mizoramah phei chuan neilo an awm mang lovang tih tur khawp a ni. Chubakah CBI lem te kha an chang a, police meuh pawh a bum che u a nia, engtin nge mobile phone a neihloh theih anga?" a ti nuah nuah a. Officer Uttam chuan, "Sir, dawt a sawi pawh a ni thei tho asin..constable kha a ring lemlo pawh a ni thei a, mi fing ve tak chu a ni dawn tih a chiang a, dawt a sawi a ni hrim hrim ang." a lo ti ve bawk a. Kumara chuan, "Nia, mahse sawi tak ang khan, zu chet nghal buan buan chuan amah chauh kan man anga, a thiante awmna a sawi duh dawn chuanglo. Tiang professional aho hi chu lemchan an thiam em em a, chubakah dawp chhuah mai mai theih anni lo. Abikin tiang mi ho hi chu ka hrechiang a, hmeichhia hi mipa aiin dawp chhuah an har phian zawk ania." a ti a. Nathana chuan, "Sir, landline pawh chu a chhui theih tho ang chu...mahse i plan ang zel ni rawh se." alo ti ve bawk a. Kumara chuan, "Ummm heti hian kan ti ang...phone chhe siam angin in constable pakhat tir ula, complain dawng angin insawi se, tichuan landline phone ah chuan an hmuhloh turin chip vuah se, keinin control room atangin tutu nge a phone thin te chu kan lo ngaithla thei dawn a ni." a ti a, tichuan Kumara sawi ang chuan Nathana leh Amandai te chuan constable chu an tir leh ta a. He vainu, CBI Officer Jhansi Rani anga insawi hi a hming tak tak chu Meena-i a ni. Constable Siama chu a zu kal ta a, Meena-i hian mizo tawng pawh a lo thiam ve sawih sawih hial a ni awm e, mahse Rinawma min hrilh dan ania, ka awih chiah chuang lo. Siama chuan, "Ka pi, phone chhe siam ngai a awm tih report ka dawng a." a va ti a, Meena-i chuan, "Kan inchung zawk te an niang, keini chuan landline chauh kan nei a." a lo ti a. Siama chuan, "Landline phone chauh alawm ka siam thin, mobile phone ka siam ngailo." tiin alo chhang a. Meena-i chuan, "Engmah kan complain hleinem, i hresual aniang." a ti a. Mahse Siama chuan, "Khawimaw...hemi location ngei hi min hrilh sia, kan pute khan...ka lo en hrim hrim ange." a ti a. Meena-i pawh chuan ngaihtha tak chuan inchhung lamah chuan aluh tir ve ta nghal mai a, Siama pawh chuan thiam niawm tak chuan a han thlek kual vel a. An hmuh loh hlan chuan Phone hmawr chu a hawng zeuh a, chip chu a vuah ru ta a. Meena-i chu alo let leh a, Siama chuan phone chu lek kangin, "Hello, hello....ummmm, a tha tawh e." a ti a. Meena-i chuan, "Ahma pawhin atha reng alawm...engzat tur nge?" a ti a, Constable Siama lah sum duh ve hrim hrim alo ni bawk nen, "50 nimai." a'n la tih hram kha. Tichuan Siama chuan chanchin chu NAthana te a hrilh a, tichuan control room ah chuan Meena-i'n midang a call hun chu an nghak ta thap hlawm mai a. Meena-i chauh hi ahming kan sawi a, khang fake CBI te kha an hming tak tak te hi ka'n hrilh law law teh ang che u. Officer Uttam-a anga insawi pa kha an boss ber a ni a, a hming diktak chu Surya Sivakumar a ni. Tin midang CBI Officer lemchang ve tho pathum te kha Senthil-a, Mutthu-a leh Suresh-a te an ni. Surya hian heng a chhawr mi pali te hi a sawm chawp an ni a, an pawisa ruk zawng zawng te pawh hi a sem ve vek thin a ni. Mahse mak tak maiin an pawisa ruk te hi nawmchen nan an hmang ngailova, mi tanpui nan te an hmang zawk a, rethei pachhia te puih nan chung black money te chu white money ah an chan tir ka tilo thei lo ani, kei a ziaktu hi chuan. Surya hi mi fing tak, CBI Officer nih tum em em mai a ni a, mahse a ni thei talo a ni. A thiante, a lemchanpui te erawh hi chu mi mawl ve tak tak an ni a, ti tura a tih apiang an ti ve mai thin a, a thu an awih em em bawk a ni.
TO BE CONTINUE........
POLICE VS MIZORAM : MUMBAI CBI RAIDS MIZORAM (Part-1)
(Based on a true incident of 1987 Opera House heist in Mumbai)
Written by : Aaron Malsawmdawngzuala
(Tun tum chu Rinawma a tel ve dawnlo a, a awmloh hlan chuhin keimah, a ziaktu ngei mai hian ka han sawi ve thung ange aw...mahse Rinawma ang em em chuan ka sawi ngaihnawm ve thiamlo maithei ania. Chubakah kei chuan Rinawma sawi dan ang nilovin, ka duh dan dan in ka sawi dawna, ka rawn thawnthu sawi ve dawn lo ania. Hei...titi mai mai ang hian ka rawn sawi tawp dawn ania, min lo hrethiam hram dawn nia, ka thiam ve dan ania.)
DGP chuan ASP Rinawma chu amaha case chingfel turin khaw dangah a tir bo leh ta a, tun tum chu Nathana pawh Amandai nen an thawh dun leh angai ta, Rinawma erawh a tel thei dawn leh talo. SI Liantea lah accident vangin a keruh a ti tliak a, damdawiinah a awm mek bawk si, Nathana pawh Rinawma a zin bo leh tak avang chuan phur lo tak chuan a duty leh ta. Tuk khat chu Nathana a duty lai chuan a office ah chuan DGP a rawn lut a, phone rawn pek pah chuan, "Nathan, Mumbai CBI Officer a ni a, a be duh che a." a rawn ti a. Nathana chuan phone chu la vatin, "Hello Sir, DCP Nathan Malsawmkima, Crime Branch." tiin zah takin a han bia a. CBI Officer chuan, "CBI Officer Uttam Raj ka ni a, Mizoram kan rawn thleng tawh a, raid tur kan nei a, chutah chuan Police kan mamawh dawn a, nang hi ka thlang che a ni, DCP Nathan." a rawn ti a. Nathana chuan, "Awle Sir, khawi hmunah nge?" tiin a zawt a. Officer Uttam chuan, "A hmun chu nakinah ka hrilh ang che, vawiinah hna tan a ni dawn a, khawngaihin i Assistant tur rawn hruai ang che. Tunge i rawn hruai theih ang? A hming i rawn sawi nghal mai thei em?" a ti a. Nathana chuan, "Awle Sir, Inspector Amanda-i nen kan lo kal ange." a ti a, Officer Uttam chuan, "A tha e, i Whatsapp message lo check la, location ka rawn thawn che a, minute 10 hnuah lo thleng ang che." a ti a, phone chu a dah ta a. DGP chuan, "Enge ni a, DCP?" tiin a lo zawt a. Nathana chuan, "Sir, a rawn be lawk tawh che em ni? Mumbai CBI Officer Uttam hian tinge kei kher min duh le?" a ti a. DGP chuan, "Aaa....nangmah hi a chhawr duh thu che kha chu a sawi ngei a, mahse a chhan erawh a sawi lova." a ti a. Nathana chuan, "Mizoram an rawn raid dawn a ni awm a, mahse khawi hmun nge tih chu engmah a sawi chuang lo." a ti a. DGP chuan, "A tha alawm, chutia Mumbai CBI ten an mamawh che chuan va kal ta che, Amandai pawh chu hruai rawh." a ti a, tichuan Nathana chuan a phone a phawrh a. Whatsapp message chu a en a, Officer Uttam chuan location chu a rawn thawn a, tichuan Amandai ko vatin an chhuak dun ta nghal a. Officer Uttam-a sawina hmunah chuan an va kal a, CBI te chuan an lo nghak reng tawh a. Nathana te hian police force 30 rual vel an hruai tel bawk a, Officer Uttam-a thupek vang a ni. CBI leh Police hi an in ang amaw inlo ti maithei a, an danglam hlak a ni. Police, CBI, CID te hi an in anglo vek a, CBI te hi Police te aiin thuneihna an nei tam zawk a ni. CBI Senior Officer te chuan Nathana te rank, DCP te hi an thuhnuaiah an dah thei vang vang thei a, Nathana te rank mai nilovin, Senior SP te pawh an thuhnuaiah an dang vang vang thei a ni. Inla bialnu nei zet Rinawma te ang phei kha chu an tan chuan vai thirchhe zawng ang vel mai chauh an ni, ka sawi na mah mah lo ang chu maw. Nathana te chu an va thleng a, CBI Officer 5 te chu an lo ding tlar thap mai a, anzingah chuan hmeichhia, kum 45 vel mi niawm tak alo tel ve bawk. Officer te zinga a thunei deuh bik pahnih te chu an rawn pen hnai a, pakhat zawk chuan a batch hmuh in, "CBI Officer Uttam Raj ka ni a, Tamil Nadu mi ka ni a, Mumbai ah CBI Officer hna thawk turin ka awm a, ka ngenna i ngaipawimawh a, ka lawm e, DCP." a ti a. Hmeichhia zawk chuan a batch chu rawn hmuh veleh in, "CBI Officer Jhansi Rani ka ni e." a ti a. Nathana chuan salute a pe a, "DCP Nathan Malsawmkima ka ni e." a ti a, Amandai pawh chuan salute pek ve pah chuan, "Inspector Amanda Lalrempuii ka ni e." a lo ti ve bawk a. Officer Uttam chuan Amandai chu a en vung vung a, "Inspector Amanda, i lukhum kha a sawi ania, khum tha rawh." a ti a, zak takin Amandai chuan a lukhum chu a khum tha sawk sawk a. Officer Uttam chuan, "In ram, Mizoram ah hian University Professor pakhat, Chandra Shekhar a awm a, Andhra Pradesh a mi a ni. A eiru nasa hle tih hriat a ni a, politician ni bawkin black money pawh tam tak a inchhungah sawn a kawl teuh ani, chu chu report kan dawng a, kan va raid a ngai a ni." a ti a.
Nathana chuan zah tak chuan, "I thu ang zelin le, Sir." a ti a, tichuan an kal ta a. Inchhung chu an lut a, Shekhara chuan, "Ehee...tute nge in ni a?" a lo ti hu mai a. A nupui chuan, "Police maw? Enge kan tihsual?" alo ti nghal vak vak mai a. Officer Uttam chuan a batch hmuh pah chuan, "CBI Officer Uttam Raj." a han ti vak a. Officer Rani chuan a batch hmuh ve pah chuan, "CBI Officer Jhansi Rani...in in dap phalna warrant kan nei a ni." tih pah chuan search warrant chu a han hmuh tir a. Chuveleh ring tak hian Uttam chuan, "Officers....SEARCH!" a han ti vak a, tichuan Nathana te leh CBI Officer dangte chuan an in chhung chu an dap ta a. Chutia an dap lai chuan Shekhar-a te nupa chuan, "Enge awmzia, khawngaihin chhuak rawh u. Engmah kan kawl lo, engmah kan ti sual lo." an lo ti chiam chiam mai a. An han zawn ngial hnu pawhin eng pawisa mah an hmu chuang lo a, CBI zawk te chu an beidawng hman lek lek a. Mahse DCP Nathana erawh a beidawng ve duh lo, ngun tak chuan a zawng kual char char a. Nathana chuan room pakhat, biru deuh taka awm chu a hmu fuh hlauh mai. Nathana chuan, "Sir, heta hi room ka hmu ania,hei hi secret room chu a ni ngei ang." a ti a. Officer Uttam chuan room chu hawn a han tum a, mahse a thei thak lo. Shekhara bulah chuan, "Chahbi lo la rawh...vatin." a han ti vin tuar a. Mahse Shekhar chuan, "Ka pu, chahbi ka nei lo, hemi room hi chu he in kan luah tir atangin a hawn theih tawh loh hrim hrim." a lo ti tlat mai a. Nathana chu lo kal hnaiin, "Sir, rem i tih chuan hawn ka lo tum ve chhin dawn em ni?" a ti a, Uttam chuan, "A tha e, han tum ve chhin ta che." tiin a lo chhang a. Chuveleh Nathana chuan na em em hian kawngkhar chu a han chhuih thuai mai a, a in hawng chiang teh asin le. A chhung an han lut chu Hindu Pathian lim a lo tam em em a, bangah te chuan Indian Freedom Fighters te leh Indian Politician thlalak tam tak alo intar teuh mai bawk a. Mahatma Gandhi thlalak te, Subhash Chandra Bose, APJ Abdul Kalam, Jawaharlal Nehru, Atal Behari Vajpayee te leh Indian mi ropui tak tak thlalak te chu alo intar khat vek mai a. Chumi thlalak hnuaiah chuan Hindu Pathiam lim tam tak, Krishna lim te, kut tam deuh deuh nei te, sai lim te leh Chhota Bheem te pawh aniang, alo in hung fur hlawm mai a. Amandai chuan, "Sir, heta hi locker a awm a nia." tih pah chuan room sira locker chu a kawk a. Officer Uttam chuan, "Hemi chhungah hian enge awm?" tiin Shekhara chu a zawt a. Shekhar chuan, "Ka thawmhnaw hlui te, ka roh em em ka pu chapal te, ka pu thawmhnaw te leh ka pa sana te a awm a, ka ro bawm ve liau liau a nih kha." tiin a han tap nghal tuau ringawt a. Uttam chuan, "Chahbi lo la teh." a ti a, Shekhara chuan a nupui bulah chuan, "Duhtak, pe mai teh...hemi te hi an rapthlak emai. Ka duh theilo, Lalpa enge kan chunga thil thleng hi?" a han tih zawm nghal zawt zawt a. Thil pakhat ka'n sawi leh lawk, Nathana nupui hian Tamil tawng hi Amandai a zirtir thin a, kum 1 dawn lai an in zirtir tawh a, Amandai hian a thiam ve thawkhat tawh hle. Chuvang chuan Nathana hian heng Tamil Officer te bulah hian a hruai ve a ni. Tin, heta Officer Uttama te leh Nathana te an inbiak hian Tamil tawng vek an hmang a, Shekhara erawh Andhra Pradesh mi a ni a, Telugu tawng a hmang thung a, mahse Officer Uttam te, Rani te leh CBI Officer dang te hian Telugu tawng pawh an thiam tho a, Nathana chu sawi ngailo law law ta se, Amandai pawh hian Telugu tawng chu Sanvi vang thovin a thiam ve sawih sawih bawk a ni. Tumah hian mizo tawng an hmang lova, chhiartute hriatthiam nan mizo tawngin ka ziak mai zawk a ni e. Tamil tawng leh Telugu tawngin han ziak vek ila chu, a zialo dawn emai. Tichuan chahbi chu Shekhara nupui chuan a pe a, Uttam-a chuan a hawng a. Locker chhungah chuan Shekhara sawi ang ngei in chapal hlui zet zet te, sana hlui zet zet te leh thawmhnaw hmuar zet zet te chua an phawrhchhuak teuh mai a.
Nathana leh Amandai chu an in en a, mak an ti ngei mai. Shekhara lah chuan, "Ka sawi reng kha..kha bak engmah kan kawllo." tih pah chuan a chal a han dawm a, "Awww..Lalpa, enge awmzia, enge kan tihsual?" tiin a han rak nghal vak vak a, vai ho tak hi chuh. Nathana chuan Shekhara chetdan chu ngun tak chuan a lo en reng a, Shekhara chu a che over ta mah mah deuh aniange. Chung Freedom Fighters te thlalak te chu en pah chuan, "En ta che u, ka thlalak tar te hi, ka mi ngaihsan te an ni a, ka hero te an nih hi. Engmah kan tisual lo, min chhuahsan teh u. Eiruk hi ka hua, ka duhlo, ka tih chi anilo. Mi dik, zirtirtu tha leh rinawm, mi rethei te pui thin ka nih hi." tih pah chuan Mahatma Gandhi thlalak chu a han chul vel a, "Awww Gandhiji, hei leh chen i thu zawmin diktakin ka kal thin a, mahse heng CBI te leh Police te hian enge an tih hi...enge awmzia?" tiin a han tap vel vak vak a. Mahse a pawi ta, a over sual ta. Nathana chuan Shekhara'n Mahatma Gandhi thlalak a chul mek chu a chul pah chuan chu thlalak chu a khuar leh duk zel tih chu a hmu fuh ta a, chu thlalak chu glass ni ve lovin, puan a ni zawk tlat mai. Nathana chuan, "Hey...kalsawn rawh." tih pah chuan Shekhara chu a pawt tho lawp a. Gandhi-a thlalak chu a han chul ve chhin a, a rin ang ngeiin puan a lo ni, "Sir, hei hi glass a ni ve lo, puan a ni." a ti a. Shekhara pawi ti lutuk chuan a lu a dawm vawng vawng mai a, a nupui chuan a tukhumah bengin, "Over leh lutuk man a nih kha." a lo ti vin hlur mai a. Officer Uttam-a chuan chemte a phawrh a, puan chu a zai t(r)et ta a, a chhungah chuan pawisa tam em em mai hi a lo awm a. Pawisa te chu an la khawm a, bag ah chuan an khung ta vek a. Shekhara chuan, "Kha bak kha kawl engmah ka nei lo, min ngaidam rawh u." ati lawm lawm a. Officer Uttam chuan, "I nei tawhlo takzet maw?" a ti a. Shekhara chuan tap chungin, "Aw...ka nei tawhlo tak tak. Ka pa thlalak hmingchhal khian ka sawi ngam e, ka pa hmingchhala thu ka sawi tawh anih chuan dawt ka sawi ngailo." a han ti vel zuah zuah a. Nathana beng a verh leh tlat mai, Shekhara pa thlalak chu inchung lamah a awm a, inhnuai atanga han hawi chhoh mai pawhin a hmuh theih ani. Thlalak lianpui mai hi a ni a, Nathana chuan thlalak chu a han en chho vang vang a. Officer Uttam-a bulah chuan, "Sir, khi thlalak khi enfiah leh ka duh ani." a ti a, Uttam chuan, "A tha e....Officers...let's check that photo." a han ti leh tuar a. Shekhara nupui chuan, "Lo ngawi mai mai tawh teh...i inpuan zo vek dawn." tiin Shekhara chu rum zet chuan a melh a, Shekhara pawh a lu a dawm leh ta vawng vawng mai. Nathana chuan thlalak chu a la thla a, thlalak hnunga bang chu a han kik karh karh a, a ri adang ta tlat mai. Nathana chuan, "Sir, hemi chhungah hian room dang a awm a ni." a han ti a. Officer Uttam chuan, "Tichhe rawh u.." ati a, Nathana chuan bang chu a tlawh chhe leh ta vek mai. A chhungah chuan pawisa tam mangkheng hi a lo awm teuh mai a, chung zawng zawng te pawh chu la khawmin bag ah an khung leh ta vek mai a. Shekhara chu a thu tum bur tawh mai a, Officer chuan, "DCP, a dang anla kawl i ring em?" a han ti a. Nathana chuan, "Lawk aw...ka han enfiah leh ange." a ti a. Tichuan Shkhara hma ah tak chuan Nathana leh Amandai te chu an thu a, an talent an show dun leh dawn ta. Amandai leh Nathana chuan ngawi reng hian Shekhara chu an han en vang vang a, Shakhara chuan hrethiamlo tak chuan Amandai leh Nathana chu a lo en let ve a. Amandai leh Nathana chuan uluk em em hian mitkhap miahlo chuan an en a, Shekhara chuan a en let ngam tha tawhlo. Shekhara thlekna lam apiangah chuan Nathana leh Amandai chu an thle ve zel a, atawpah chuan Nathana chuan, "Sir, an nei tawh ka ring lo, i kal ang u." a han ti chiah chu Shekhara chu a thaw huai mai. In chung step chhona zawna chhuat-dawh chu melh zeuh pah chuan, "Atawp atawp ah chuan...huiham." a han ti thawp sat a.
Chuveleh Amandai leh Nathana te chu an innuih a, "Sir, inchung chhuat-dawh kha check leh angai." an han ti rual dun ngei ah, hemi te pahnih hi chu lo innei daih se tha tur, mahse sawi zawm lovang, Sanvi'n min hau palh ang. Officer Uttam chuan, "Check leh nghal rawh u." a ti a, Nathana chuan thirtiang a la a, inchung chhuat dawh chu a han hawlh pawp leh ta vak vak a, pawisa a rawn tla leh ta nuai nuai mai a, Shekhara pawh a tap pur tawh mai. Tichuan Uttam chuan, "Pawisa zawng zawng hi khungkhawm ula, Goverment kutah hlan a ni ang." a ti a. Nathana chuan Amandai beng bulah chuan zawite hian, "Mi rinawm tak an ni ngei ang, CBI nih ka chak theih zia kha. An mahni anga rinawm leh dik nih hi ka duh ve ngawt mai, ka ngaisang takzet." a ti a. Amandai chuan, "Sir, nang tluka ngaihsan awm an awm hleinem le...mi rinawm leh diktak chu nang ngei hi i ni alawm." alo ti a. Chutih lai chuan Shekhara chuan Nathana bulah chuan, "Officer, hetah lo kal teh." a ti a, tichuan Nathana chuan ava zui a. Zawite hian Shekhara chuan, "Hetia min rawn raid vak hi a tul lo sin, min pui la, pawisa pawh ka pe ve dawn che alawm." a lo ti su su a. Nathana chuan, "Animaw...engzah nge min pek ang?" tiin a zawt a. Shekhara lawm lutuk chu a thaw huai mai a, "Awww....tinge nichinah khan ka lo zawh daih tawhloh che le? Umm....cheng nuai 5 a tawk angem?" a han ti a. Nathana chuan, "Ka hrelo le...lawk aw...han tawlh hnung deuh lawk teh." a ti a, Shakhara chu a tawlh hnung a. Chutah na em em hian Shakhara chu a beng hawi sawk mai a, "Min tham te i tum amaw? Ve khanglang a, Police Officer dang ang ka ni velo." a ti khur khur a. Uttam-a chu lo kalin, "Enge ni a, DCP?" a rawn ti a. Nathana chuan, "Enteh Sir, hepa hian tun lawk khan minlo tham a ni." a ti a, Officer Uttam chuan, "Khanglang chuan le...tikhawp hian kan man chiang tawh che a, i thil tihsual pawh kan hailang zo vek tawh a. DCP Nathana hi ilo la tham vel amaw?" tih pah chuan a han beng ve thuai a, Shekhara pawh a thal tawp mai. Pawisa zawng zawng te chu an khung khawm leh ta vek a, tichuan CBI ho chuan an motorah an dah a, tichuan Officer Uttam chuan Nathana chu ava pan a, "DCP i chungah ka lawm takzet e....nang awmlo la chuan a pawisa dahna pawh kha kan hre thei dawn miahlo a nih kha." a ti a. Nathana chuan, "Ka duty ania, ka tihtur alawm Sir...engtik hunah pawh minlo ko thin dawnnia." a ti a. Officer Uttam-a chuan, "Anih chuan DCP, keini CBI Officer te hi kan lo va kal hmasa anga, anni erawh hi chu tihian lo buaipui ula, pawisa zawng zawng te pawh hi Sawrkar hnenah thlen ala ngai dawn si a, kan kal phawt ange." a ti a. Nathana chuan, "Awle Sir, tluang takin in kal dawnnia, abak chu ka lo buaipui ange." a ti a, tichuan CBI Officer te chu pawisa zawng zawng nen chuan an inphur liam ta a. Minute 10 vel a ral meuh chuan vai palian pui pui 10 vel an lo lut a, an zinga sam var vek, hmuihmul leh khabe hmul t(r)uak bum mai chuan Nathana chu a en a, "Nang hi DCP Nathana i ni em?" a rawn ti a. Nathana chuan hriatthiamloh hmel tak hian a lo en a, chupa chuan tamil tawng a rawn hmang ve lehnghal. Nathan chuan, "Aw..ni e, tunge i nih a?" alo ti hu mai a. Chupa chuan thinrim hmel zet hian, "CBI Officer Uttam Raj ka ni." a ti ta mai a. Nathana chuan mak ti tak chuan a en hau ringawt mai a, "Mahse...Officer Uttam te kha chu..." a tih lai chuan chupa chuan a batch hmuh pah chuan, "Kei hi CBI Officer Uttam chu ka ni e...nichina keimah anga rawn insawi leh CBI Officer anga rawn insawi te kha rukru vek an nih kha. Kan Mumbai CBI department ah hian Officer Jhansi Rani tih hmingpu pawh tumah an awm lo hrim hrim, an bum mai mai che a nih kha. He in pawh hi raid tura plan siam engmah kan neilo." a ti ta mai a. Nathana chu a zak kher mai, a awmzia chu nichin lawka CBI Officer anga rawn insawi te kha Tamil Nadu-a mi satliah, hna neilo te ve mai chauh an ni a, search warrant te leh an badge te pawh kha siam chawp vek alo ni tihna ani.
Officer Uttam-a tak tak zawk chuan, "Khang an search warrant te leh an badge te kha ilo en chianglo em ni?" a ti khur khur a. Nathana chuan, "Sir, anmahni kha CBI tak tak angin an che ani, hriat hran an har em a, ka lo awih mai a ni." a ti a, Uttam-a mitah pawh chuan a en tha ngam lo. Uttam-a chuan, "Mumbai ah pawh in pakhat an lo raid tawh a, kha fake CBI ho te kha kan zawng char char a, Mizoram thlengin kan rawn zawng chho ta a nih hi. In DGP lah khan Nathana nen mi hausa eiru pakhat in kan raid tur angin min lo hrilh a, keiin engmah ka hre silo...kan rawn thleng tlai ta anih hi, ava han pawi tak." a ti vawng vawng a. Nathana pawh a zak hle mai, hnuai lam a melh char char a, chutiang bawk chuan Amandai pawh chu a kun reng a, a hawi chhuak ngamlo. Chutih lai chuan Shekhara chu a rawn t(r)awng chhuak ve a, "Sir, khang CBI lem ho khan ka pawisa dahna engmah anmahniin an hmu chhuak lo, khalai DCP vang vek kha a ni, ka awmdan atang ringawtin ka pawisa thuhruk na a hre vek thei." a lo ti zuah zuah a. Officer Uttam chuan rum zet hian Nathana chu a melh a, "DCP, i fing hle bawk si a, pawisa a thuhrukna te pawh awlsam tak takin i hre thei zel bawk si a, mahse an batch leh an warrrant paper te erawh en fiahna chang i hre leh silo...i thil tih pawizia hi i hmu em?" a ti vin khur khur a. Nathana chuan inthlahrung takin, "Sir, mahse Chandra Shekhar pawh hian a eiru tho a, a eiru tih chu kan hriat phah tho a.." a tih lai chuan vin zet hian Uttam-a chuan, "Ngawi hmak rawh DCP, i zak nange? I thil tih sual hi thil lian tham tak a nih hi...Chandra Shekhar hian lo eiru pawh nise, khawi ami nge a eiruk? Search warrant i nei em? Engvangin nge Shekhara hi complaint leh FIR pawh tuman thehlut silovin ilo chhui ve ngawt anga? Eiru te emaw, thil tisual te emaw hi FIR thehluh a nih loh chuan mahni ngawtin Police te hian an va man ngawt theilo tih te chu i hre ve ang tiraw, DCP?" a han ti deuh kher a. Nathana chuan, "Yes Sir." a ti a, a zah hmel hle mai. Officer Uttam chuan Nathana chu a en a, "I hming hi Nathan Malsawmkima tiraw...Mizoram chuan an fak hle che tih kalo hria a, mahse ka han belchiang ve ta che a, ilo mawl hleeeee mai. Tihian ti teh ang, khang Fake CBI ho kha kan manchhuah hma zawng leh he case hi chinfel anih hma chu i hming hi thlak hrih teh ang. Nathan Malsawmkima nilovin, Nathan Mawllianpuia (Bewakoof Nathan)tiin ka ko hrih ang che aw?" tih pah chuan hmuhsit hmel tak chuan a nuih vel a. Nathana leh Amandai te pawh chu zak takin Station lamah chuan an haw leh ta a, cheng nuai tel chu rukru te an rukpui a ni ta ringawt mai chu ania. DGP pawhin engkim a lo hria a, mahse Nathana leh Amandai te chu a hau miahlo thung, "Thil hriatsual te hi chu a awm ve a, chubakah..khang CBI lemchang ho te khan pawisa chu lo ru pawh nise, kha Chandra Shekhara kha a eiruk thu leh a black money te in haichhuah sak a, engmah tihloh ai chuan a tha tho tho." tiin Nathana leh Amandai te chu a hnem hram hram a. Officer Uttam-a erawh chuan Nathana chu he case ah hian hman chhunzawm zel a la duh tlat thung a, mahse case an chhui chhung zawng chuan he CBI Officer chapo zet hian Nathana chu 'Mawllian' tih hlirin a au a, Nathana pawh a lungawilo thei kher mai. He case hi Mizoram Sawrkar chuan ala serious hle a, nasa taka chung CBI lemchang te chu zawn mek zel an ni a. Heng Fake CBI Officer te panga hi tute nge an nih tih leh an hming tak tak te hi tuman an hrelo a ni. Mumbai ah in pakhat anlo raid tawh bawk a, chutah pawh chuan a in neitupa chauh chuan an hmel a hria a. Mizoram an lo thleng a, Pu Shekhara te in an raid leh a, DCP Nathana chuan a pui leh ta nghal a. Nathana, Amandai, Police Force 30 te leh Pu Shekhara te nupa chauhvin an hmel an hmu bawk. Officer Uttam te leh CBI Officer dangte chuan eng ang hmel nge an put erawh an hre ve lo thung.
Kar khat chhung teh meuh an zawn hnu pawh chuan chung Fake CBI te chu an la zawng hmu thei chuanglova, Mizoramah hian an la awm ngei em tih pawh hriat ala ni thei chuanglo. Mipui titi a ti tam em em a, chutia Fake CBI Officer ten Mizoram an rawn raid ta mai chu Zoram mipui te pawh an thla a muang lo hle a, chumai nilovin Officer anga insawi hrim hrim te pawh an ring tawp ngam tawh lo hrim hrim a ni. Nathana pawhin a hriatsual palh vang liau liau in a lo pui kha a ni a, Nathana demna pawh a nasa hle a. Social Media ah pawh alarin diriamna pawh a tawk nasa hle, tun tum zet zawng, DCP Nathan Malsawmkima pawh a thlang tlawm ta ngang mai. Chutia an zawn hmuh mai theih tak silovah chuan Home Minister chuan Chennai atangin CBI Senior Officer, fing leh phakar zet mai, tualthah mai pawh hreh lo leh pawisa ngaina ve tak, mi nunrawng tak leh hausa tak Sathya Kumar-a chu Mumbai CBI te pui turin a chah chho ta ringawt mai a, Kumara pawh chu reilote ah Mizoram a rawn thleng ve ta thuai a. Tichuan fake CBI ho zawn hna chu Police te nen tang kawpin an bei leh ta ngat ngat mai a, Sathya Kumar-a a rawn tel ve meuh chuan rinhlelh pakhat chu an nei nghal der mai. Chu an rinhlelh ber chu CBI Officer Jhansi Rani anga insawi kha a ni a, Ramthar Venga mi inhnuai luah a ni. Kumara chuan Uttama bulah chuan, "Henu hi enthlak angai a, ka theih ang tawkin ka chhui a, Jhansi Rani anga insawi nu kha, a hmel hmu tawh tu ten a hmel awmdan an sawi khan, Aizawla South Indian hmeichhia thlakhat liam ta atanga lo pem thar zawng zawng an hming ka la vek a, a mal te te in an inah ka kal tawh bawk. A ang ka tih ber leh ka rinhlelh ber chu henu, tuna kan mi rinhlelh ber hi a ni." a ti a. Uttama chuan, "Mahse a ni dawn em ni? Mi inhnuai luah ve mai a ni a, a retheih hmel bawk si. Chubakah CBI ang mai khan a che zei a, engkim chu a hre ve deuh vek ania. Helaia mi inhnuai luah a, harsa taka a fate pahnih chawm tu hi chu a nih ka ringlo a ni." a lo ti a. Kumara chuan Nathana chu a en a, "Nang enge i ngaihdan DCP?" tiin a han zawt a. Nathana'n a chhan hma hma chuan Uttama chuan, "Sir, hepa hi chu zawt ve duh suh. Mawlliana a nih hi, engmah a hre ve tak tak lovang. Thil chhui chu a thiam, mahse thil hrechiang lovin a che phut phut thin a, a laktlak vak loh." a lo ti zuah zuah a, Nathana chu a thinrim kher mai. Kumara chuan, "Officer Uttam, inbeng dai teh...engemaw tal chu han sawi tir ve la mawle." a han ti a. Nathana chuan, "Sir, ka ngaihdan chuan he kan rinhlelh nu pawh hi kan ringhlel a ni tih thu hi news ah te la puang vak vak lo ila, a lo nih leh siloh khan a zahthlak dawn emai." a lo ti a. Uttam-a lah chuan, "Lo ngawi mai mai rawh...in DGP kha ka thianpa anih avang chauhvin he case ah hian i thil tihsual zahthlak tak i hliah khuh leh theih nan Inspector Amandai nen khan ka tel leh mai mai che u a nih kha." a lo ti hrep a. Mahse Kumara chuan, "Khaih khaih, Uttam, insum teh. Nathan, han sawi zel teh.." a ti a. Nathana chuan, "Sir, hetia kan thu hriat thar apiang kan puanzar zel chuan Veng danga police te pawh an lo che ve buan buan dawn si a, Mizoramah a darh hneh tawh bawk si. Tlema lo inla hnuchhui hovin he kan mi rinhlelh nu hi an lo zuk man ngawt ang tih te a hlauhawm ania." a ti a. Kumara chuan, "Ngaihdan tha tak chu a ni ve tho mai, khanu hmel kha nangchuan i hmu tiraw?" a ti a. Nathana chuan, "Aw hmu e....mahse khatah kha chuan make up a hmang ve deuh a, a hmel pawh a tha angreng. Kum 45-50 bawr vel a nih ka ring a. Mahse tuna kan mi rinhlelhnu nen hi chuan in ang viau mahse, a nilo deuh tlatin ka hria. A hang deuh bawk si a, chubakah a cher angreng si a." a ti a. Kumara chuan, "A thlalak chauh ka hmuh tir che a, nakinah an inah ngei kalin kan zu enfiah leh dawnnia. Keipawhin ka hmuchiang biklo, an inah khan ka lut lo hrim hrim a. Pawn atang chauh khan ka en a, fa pahnih a nei tawh tih ka hre bawk a, hmeichhia ve ve an ni." a ti a.
Nathana chuan, "Sir, ka hriatthiamloh chu maw...Inspector Amandai nen chiah kha nu, Jhansi Rani anga insawi kha a hmel kan hmu a, midang chuan in hmu velo. Mahse tuna kan rinhlelh mek nu hi an ina in kal tir khan tinge Amandai nen hian min hrilh ve miahloh a, thlalak in neih lah hi a chianglo em em bawk si. Ka sawi awmzia chu, khatia in zu kal te chuan min hruai ve ula, a ni nge nilo tih te chu kan hre nghal mai thei dawn a. MAhse nangni lah chuan hnadang min pe daih bawk si a, enge awmzia ka hre duh a ni, Sir." a ti a. Vin zet hian Uttam-a chuan, "Keiman hruai velo tur che u in ka hrilh a nih kha...ka sawi ang khan nang hi in DGP nen thiantha tak kan nih avangin i thil tihsual hliahkhuh nan he case ah hian ka tel leh mai mai che a ni." a lo ti vin hlur mai a. Nathana pawh angaihdan a ni ta chiah bik lo, zam hauh lo hian Officer Uttam-a mitah chuan a en a, "Sir, tuna kan mi rinhlelhnu hi, a zawngchhuak tu leh a ringhlel tu ber chu Officer Sathya Kumar hi a ni. Hmanni khan kha CBI Officer lemchang te kha kei leh Amandai te hian chiang takin an hmel kan hmu tih pawh i hria, mahse min ringlo a, he kan mi rinhlelhnu te ina in zu ka pawh khan min hruai velo. Enge a chhan? Sir Sathya Kumar pawh hi i ring biklo tihna a ni mai lo maw? I beidawng tawh anga, a ni chuang lovang tiin min hruai peih lo law law te hi ani zawk lo maw?" a ti ve ta ngat a. Uttam-a thinrim lutuk chuan, "Tikhan min tawng khum amaw?" tih pah chuan hnek a tum a, mahse Kumara chuan alo dang vat a, "Khaih khaih khaih, Officer, insum teh. Tunah chuan tumah hi inhnial buaithei kan ni lo, DCP Nathana pawh i lo tel ta sa sa, a tawp thleng min tel pui ang chu. Chutiang bawk chuan Inspector Amandai pawh, a tawp thleng kan tang ho ang." a ti a. Tichuan Uttam-a chuan, "Anih chuan Sir, enge i ruahmanna chu?" a ti a. Kumara chuan, "Nathana hi Amandai nen he kan mi rinhlelhnu te inah hian in zu kal anga, address pawh ka pe ang che u. Mahse Officer Jhansi Rani anga insawi nu kha a lo nih tak tak chuan in hmel a hmu anga, a hlauthawng anga, a tlanchhe hman thei. Kan hriat ang khan mi namai lo tak an ni a, fake CBI officer kha alo nih tak tak chuan man hmanloh te pawh alo awm thei a. Chuvang chuan a ruk thei ang berin in che ang, an inchhung enfiah turin in constable pakhat in hruai tel anga, civil dress nen a inthuam tur a ni. Tichuan constable chuan a kawrhma ah camera tereuhte a dah anga, chu nu hmel chiang taka lang thei turin amah pawh a insiam rem a ngai ang. Tichuan camera chu in check leh anga, a ni nge nilo chu in hre tawh mai dawn a ni. Constable chu duhleh tui in dil ang te pawhin in luh tir anga, mahse chunu chuan nangni pahnih hi a hmu ve tur che u a nilo. Engkim in zawh hunah ka hnenah rawn in report leh ang che u, in hria em?" a ti a. Nathana leh Amandai te chuan Kumar-a chu salute pein, "Yes Sir." tiin an kal chhuak ta nghal a. Tlai khaw thim hma vel chuan NAthana te chu an lo haw leh a, Nathana chuan phur tak chuan, "Sir, ani ngei e...Sir, order min pe la, tunah ka zu man nghal ang." a ti thawt thawt a. Mahse Kumara chuan, "Ni mai love, a thawpui mi 4 te kha an awmna chin kan hriat leh phawt angai alawm." a ti a. Amandai chuan, "Sir, amah chu zu man ila, kan dawp mai dawn lawm." alo ti a, hetah hian Amandai hian bah nuaiin tamil tawngin a lo sawi ve a ni. Mahse Kumara chuan, "Chu aia tha chu ka hria a lawm, engtik lai pawhin an in phone kual reng dawn tih a chiang sa a, an phone kan hack keuh mai dawn lawm. Mahse an hming tak tak kan hre lova, chu chu kan chhui leh phawt angai a ni. Chubakah zu man thut turin arrest warrant kan nei lova.." a ti lai chuan Uttam chuan, "DCP hian an station ah FIR chu ziak chawp mai se...a tha mai lo maw?" alo ti ve bawk a. Mahse Kumara chuan, "A tha tho anga, mahse chu aia fimkhura kan chet a ngai dawn a ni." a ti a.
Nathana chuan, "Sir, phone sawi takah chuan...a number kan trace theih nan kan constable khan a phone a kenglo der a, tichuan khanu phone kha hman a dil a. Mahse phone a neih loh thu a sawi a, landline chiah an neih thu alo hrilh a." a ti a. Kumara chuan mak tih hmel zet chuan, "Landline a? Tun angah landline chauh lo la hman te chu....mi zawng zawng, hausa ber atanga rethei ber te pawhin mobile phone an hum fur tawh a, Mizoramah phei chuan neilo an awm mang lovang tih tur khawp a ni. Chubakah CBI lem te kha an chang a, police meuh pawh a bum che u a nia, engtin nge mobile phone a neihloh theih anga?" a ti nuah nuah a. Officer Uttam chuan, "Sir, dawt a sawi pawh a ni thei tho asin..constable kha a ring lemlo pawh a ni thei a, mi fing ve tak chu a ni dawn tih a chiang a, dawt a sawi a ni hrim hrim ang." a lo ti ve bawk a. Kumara chuan, "Nia, mahse sawi tak ang khan, zu chet nghal buan buan chuan amah chauh kan man anga, a thiante awmna a sawi duh dawn chuanglo. Tiang professional aho hi chu lemchan an thiam em em a, chubakah dawp chhuah mai mai theih anni lo. Abikin tiang mi ho hi chu ka hrechiang a, hmeichhia hi mipa aiin dawp chhuah an har phian zawk ania." a ti a. Nathana chuan, "Sir, landline pawh chu a chhui theih tho ang chu...mahse i plan ang zel ni rawh se." alo ti ve bawk a. Kumara chuan, "Ummm heti hian kan ti ang...phone chhe siam angin in constable pakhat tir ula, complain dawng angin insawi se, tichuan landline phone ah chuan an hmuhloh turin chip vuah se, keinin control room atangin tutu nge a phone thin te chu kan lo ngaithla thei dawn a ni." a ti a, tichuan Kumara sawi ang chuan Nathana leh Amandai te chuan constable chu an tir leh ta a. He vainu, CBI Officer Jhansi Rani anga insawi hi a hming tak tak chu Meena-i a ni. Constable Siama chu a zu kal ta a, Meena-i hian mizo tawng pawh a lo thiam ve sawih sawih hial a ni awm e, mahse Rinawma min hrilh dan ania, ka awih chiah chuang lo. Siama chuan, "Ka pi, phone chhe siam ngai a awm tih report ka dawng a." a va ti a, Meena-i chuan, "Kan inchung zawk te an niang, keini chuan landline chauh kan nei a." a lo ti a. Siama chuan, "Landline phone chauh alawm ka siam thin, mobile phone ka siam ngailo." tiin alo chhang a. Meena-i chuan, "Engmah kan complain hleinem, i hresual aniang." a ti a. Mahse Siama chuan, "Khawimaw...hemi location ngei hi min hrilh sia, kan pute khan...ka lo en hrim hrim ange." a ti a. Meena-i pawh chuan ngaihtha tak chuan inchhung lamah chuan aluh tir ve ta nghal mai a, Siama pawh chuan thiam niawm tak chuan a han thlek kual vel a. An hmuh loh hlan chuan Phone hmawr chu a hawng zeuh a, chip chu a vuah ru ta a. Meena-i chu alo let leh a, Siama chuan phone chu lek kangin, "Hello, hello....ummmm, a tha tawh e." a ti a. Meena-i chuan, "Ahma pawhin atha reng alawm...engzat tur nge?" a ti a, Constable Siama lah sum duh ve hrim hrim alo ni bawk nen, "50 nimai." a'n la tih hram kha. Tichuan Siama chuan chanchin chu NAthana te a hrilh a, tichuan control room ah chuan Meena-i'n midang a call hun chu an nghak ta thap hlawm mai a. Meena-i chauh hi ahming kan sawi a, khang fake CBI te kha an hming tak tak te hi ka'n hrilh law law teh ang che u. Officer Uttam-a anga insawi pa kha an boss ber a ni a, a hming diktak chu Surya Sivakumar a ni. Tin midang CBI Officer lemchang ve tho pathum te kha Senthil-a, Mutthu-a leh Suresh-a te an ni. Surya hian heng a chhawr mi pali te hi a sawm chawp an ni a, an pawisa ruk zawng zawng te pawh hi a sem ve vek thin a ni. Mahse mak tak maiin an pawisa ruk te hi nawmchen nan an hmang ngailova, mi tanpui nan te an hmang zawk a, rethei pachhia te puih nan chung black money te chu white money ah an chan tir ka tilo thei lo ani, kei a ziaktu hi chuan. Surya hi mi fing tak, CBI Officer nih tum em em mai a ni a, mahse a ni thei talo a ni. A thiante, a lemchanpui te erawh hi chu mi mawl ve tak tak an ni a, ti tura a tih apiang an ti ve mai thin a, a thu an awih em em bawk a ni.
TO BE CONTINUE........
Comments