NATHAN SEASON-2 (Episode-15)
NATHAN SEASON-2 (Episode-15)
I LOVE YOU, SANVI (Part-2)
Written by : Aaron Malsawmdawngzuala
Nathana chuan phone a dah a, Mary chu a pawm a, tichuan in atang chuan kan chhuak ta a. Motor ah chuan kan lut a, Nathana chu chak takin a tlan a, Station lam min panpui a. Station chu kan thleng a, Nathana chuan Amandai bulah chuan, "Amanda, Mary hi lo pawm teh." a ti a, Mary chu a pawm a. Hriatthiamloh hmel tak hian Amandai te leh SI Liantea te chuan Nathana chu an lo en hu hlawm mai a. Nathana chuan cell chhunga awm mek Henry-a chu a va pan a, Henry-a lah chuan alo la nuih vur vur zui a. Nathana chuan constable bulah chuan, "Chahbi minlo pe teh.." a ti vin tuar a, constable chuan rang takin a pe a. Nathana chuan cell chhung chu a hawng a, Henry-a chu a tlawh thal nghal tawp mai a. Nathana chuan a tham tho lawp a, bangah a nam bet a, "Sawi rawh anih loh chuan ka that ang che.." thinrim tak chuan ahan ti a. Henry-a chuan, "Min that rawh...min that mawlh rawh. Mahse min thah rual rual hian i nupui kha a thi ve nghal ang." tiin zam miahlo chuan a lo chhanglet a. Nathana chuan a hnek thal tawp a, a ban hliamah chuan a rah sak ta vak vak mai a, Henry-a na ti lutuk chu a t(r)e chel chul mai a. Rang takin SI Liantea nen kan tlan lut nghal a, Nathana chu kan dang vat a, mahse kan hnehlo hle mai. Nathana chuan Liantea nen chuan min lo nam sawn dawrh mai a, keiphei chu ke pali vawr thuau in ka thal tawp mai. Nathana chuan Henry-a chu na tak hian a chhuih pawp pawp a, "Sawi rawh..khawnge ka nupui?" tiin dim miah lo hian a sawisa vak vak mai a. DGP alo lut a, Nathana chu a va thelh a, "DCP..DCP duhtawk teh.." a ti lawm lawm a. Nathana chu lo hawi letin DGP chu a tin uai hman hial a, mahse DGP hmel a hmuh chuan a inbeng dai thei ta hram a. DGP chuan vin zet hian, "DCP Nathan, enge awmzia?" a ti a, Nathana chuan thinrim hmel tak hian, "Sir, hepa thiante hian ka nupui an kidnap a ni." a ti khur dar dar a. DGP chuan, "Enga? Sanvi an kidnap amaw?" a lo ti a. Nathana chuan, "Aw...vawiin tlai khan ina ka haw kha ka fanu Mary hi khumhnuaiah tap chungin hlau leh thlabar em em in a lo awm a, Sanvi an kidnap thu min hrilh a ni." a ti a, a mittui chu a tling teuh mai a, ka khawngaih hle mai. DGP chuan, "Enge awmzia? Engtin nge Henry-a thiante an ni tih i hriat theih a?" tiin a zawt a. Nathana chuan, "Min rawn phone a, Sanvi an kawl thu a sawi a, Henry-a chhuah turin min ti bawk a ni. Engti kawng mahin hepa hi ka chhuah lo ang." tih pah chuan Henry-a chu va hnek leh a tum a, DGP chuan Nathana chu lo dan pahin, "DCP in control hram teh." a ti a. Henry-a chuan a ban hliam dawm vawng vawng pah chuan, "Enge ka thiamloh awm a? I nupui chu tunge a nih pawh ka hre ve hleinem..enge min sawisak rikngawt a? Vawi 3 lai min kap a, chupawh duh tawk lovin min sawisa leh amaw?" a lo ti ve pang pang a. Nathana chuan, "Ila tawng ngam a nimaw?" tih pah chuan a va hnek thal leh tawp mai a, mahse DGP chuan Nathana chu nam sawnin, "DCP Nathan, khawngaihin in control rawh." a ti a. Nathana chuan rum zet hian Henry-a chu a melh a, Henry-a lah a hnar a thi phung tawh mai a. DGP chuan min rawn en a, "ASP, Nathana hi hruai chhuak rawh u." a ti a, Liantea nen chuan Nathana chu kan hruai chhuak ta a. DGP leh Henry-a chu an inbe mawlh mawlh a, an tawng ka hre pha chiah lo. Henry-a inla innocent hmel vel leh a mitmeng phakar zet chu ka ngei hle mai, va tlawh zawt a nia ka chak ni. Nathana chu thinrim tak hian a office ah a lut a, ka va zui lut a. Nathana chu a chair-ah chuan a thu a, "Hrep tak hian.." a ti nuah nuah a. Ka va pan hnai a, "Sir, lungngai suh..Sanvi chu kan hmu leh em em ang." tiin ka theih ang tawk chuan ka hnem a. Nathana chuan, "Ni e...ka insum zo hmanlo a ni. Henry-a sawn a hria, Sanvi kidnap tute hi a hre chiang khawp mai." a ti a. Keichuan, "Sir, keiman ka lo zawt fiah ang, nang chu tihian lo awm hahdam rawh. I insum zolo leh ang, Amandai pawh a awm a, Liantea pawh a awm a, lungngai reng reng suh." ka ti a, ka chhuahsan ta a.
DGP chuan a office ah min ko lut a, "Rinawm, engthil chiah nge thleng? Chiang deuhvin min han hrilh teh." a ti a. Keichuan, "Sir, tlaia kan haw kha Sir Nathana te ina len kawi zawk ka tum a, tichuan an inah chuan kan lut a. Mahse tumah an awmlo a, Sanvi kan koh vak vak pawhin a eih thei silova. Tichuan an nupa room ah chuan kan chho dun a, room chhung chu a hnawkin thawmhnaw te chu a let nuai mai a. Khum te chu a inchinglet nasa em em a, khum hnuaiah chuan Mary a lo awm a, tichuan Mary chuan Sanvi chu an kidnap thu min hrilh ta a ni." ka ti a. DGP chu a lu a bu nghauh nghauh a, "Anih leh Mary chuan engtin chiah nge a sawi?" a ti leh a. Keichuan, "Mi pathum lo lutin Sanvi chu an sawisa hrep a, tichuan an hruai bo ta daih a ni tiin a sawi." ka ti a. DGP chuan, "Anih phone call chungchang kha?" a ti leh a. Keichuan, "Nia...Sir Nathana phone kha alo ri a, mipakhat aw thum deuh hian Sanvi an kawl mek thu leh Henry-a chhuah turin Sir Nathana hi a rawn hrilh a ni." ka ti a. DGP chuan, "Umm....anih chuan Henry-a hi kan dawp deuh a ngai dawn a nih chu. Thil pakhat han ti teh, SI Liantea leh Amandai bulah Nathana lo call tu number chu trace turin hrilh la...NAthana erawh he case ah hian tel hrih suh se. A thinrim insum zolo hi a ri leh hlut ang tih ka hlau a ni, thil pawi zawk a thleng palh hlauh ange." a ti a. Keichuan, "Sir, khawngaihin he case ah hian min tel ve thei angem? Achhan chu Sanvi hi ka nau angin ka en a, Sir Nathana pawh ka unaupa ang mai ani a, an lakah hian bat ka nei ve in ka hria." ka ti a. DGP chuan, "Awle, ASP in theihtawp chhuah ang che u." a ti a. "Awle Sir." tiin salute ka pe a, tichuan ka chhuak ta a. SI Liantea leh Amandai te chu ka ko a, "He case hi kan pathum kutah a awm tawh a, DCP Nathana lo call tu number hi trace ula, keiin Henry-a ka lo dawp thung ang." ka ti a. Number dil tur chuan Nathana office chu kan pathum chuan kan pan a, DGP leh Nathana te chu an lo inhnial nasa mai a. DGP chuan, "Nathan, i hrethiamlo a ni...he case ah hian i tel ve a remlo alawm." a lo ti a. Nathana chuan, "Sir, ka nupui a ni a, ka nupui chhanchhuah chu ka mawhphurhna a ni dawn lovem ni?" a ti a. DGP chuan, "Nathan, i senior thupek che hi zawm hram teh...khawngaihin ka ngen a che." a tih takah chuan Nathana pawh chu a thaw hak a, "Yes Sir." a ti chuai raih mai a, ka va han khawngaih tak em. DGP chuan, "Mary hi haw pui la, kanlo buaipui ang. I tel ve dawnlo hrim hrim tihna a nilo, mahse tunah rih chuan i thinrimna kha tihdaih hmasak i mamawh a ni." a ti a. NAthana tap insum hmel chu hmuh hrehawm tak a ni, kan lo en thap mai a. NAthana chuan Mary chu a pawm a, "Haw tawh ang aw, Bawihte." a ti a. Mary lah chuan, "Apa, engtikah nge anu chu alo haw dawn?" tiin a lo la zawt zui a. Nathana chu a ngawi vang vang a, a mittui a khap per sak a, "Bawihte, alo haw leh vat dawn alawm." a ti a, kan hmel pawh a en duh lo, hnuailam bih reng chung chuan Mary chu a pawm chhuak ta a. Hmanah kha chuan ka thinrim insum zolo kha Nathana hian min dang hram hram zel a, kei chuan tharum hmanga chinfel zel ka duh thin laiin Nathana erawh chuan a thluak a hmang thung thin kha a ni a. Mahse tunah erawh chuan NAthana thinrim chu keimah zawkin ka dan a ngai ta mai chu a mak ngei mai, a fanu Mary lah kum 8 lek ala ni bawk si, ka khawngaih tak zet a ni. DGP chuan paper them hi min rawn pe a, "Hei hi Nathana rawn call tu number chu a ni e." a ti a, min chhuahsan ta nghal a. Number chu ka phone ah chuan ka save a, tichuan paper them chu Amandai ka pe a, "Tunah trace nghal ang che u, kei erawh Henry-a saw ka va buaipui thung ange." ka ti a. Nathana office atang chuan kan chhuak a, DGP chuan min rawn pan a, "ASP, hei ka nupui a damlo a, ka haw a ngai tlat mai. I kutah ka dah ania aw...ka haw phawt ange." a ti a, keichuan, "Lungngai suh Sir, ka chhuichhuak em em ang." ka ti a, DGP chuan min hawsan ta a.
Constable ho bulah chuan, "Henry-a saw interrogation room-ah hruai ula, ka lo kal vat ang." ka ti a, constable ho pawh chuan an hruai ta a. An rawn hruai phei pah chuan Henry-a chuan rum zet hian minla melh ve khanglang zui, keilah chuan, "Khanglanga.." tih pahin a mawngah ka'n pet hram kha, a eu zawk mai. Pawnah ka chhuak a, khua a thim tep tawh a, tlai dar 5 vel a ni tawh. Meizial chu phawrhin ka han fawp vang vang a, "Sanvi, khawnge i awm?" tiin keima hriat tawk lek chuan ka phun sap a. Anihna takah chuan Sanvi hi vai mah nise vai thing chi kan tih ang kha ani hauh lo ania, vai changkang tak a ni. Kei phei chuan vai ang pawn ka ngai tawh lo, kan sawi fo tawh angin mizo tawng hi chhete mahin a pai thak lo, mahse thil a chhiar hi chuan tlem chuan a pai ve deuh thin. Mizo tawng a chhiar thiam a, a ziak thiam bawk a, hun reilote chhunga India rama tawng hrang hrang zinga a har ber pawl Mizo tawng, a ni South Indian mi daih ina a thiam zung zung thei hi a fakawm thlawt a ni. Ft 5'5 vel laia sang a ni a, Inspector Amandai nen hian an inchen vel chiah chiah in ka hria. Min duhsak a, a unaupa ang maiin min en a, ka harsatna ah te pawh min pui nasa thin hle. An mahni tawng (telugu) te hi min zirtir nasa ve thei em em a, mahse tun thleng hian chhete mah ka thiam thei chuang lo. He case hi ka kuta awm a nih angin chhuichhuah ngei ka duh a, ka chhuichhuak ngei bawk ang. Meizial chu ka zu zo a, tichuan interrogation room lam chu kan pan phei ta a. Room chhung ka luh dawn chiah chuan ka phone a rawn ri a, Nathana a lo ni a, "Hello, Rinawm...engtik velah nge ilo haw theih ang?" a rawn ti a. Keichuan, "Ka hrelo Sir, zan thleng pawh ka awm tlang a ngai maithei a ni." ka ti a. Nathana chuan, "Rinawm, puih in ngaih chuan ka awm reng a nia aw.." a ti a, ka van khawngaih tak em. Zaidam tak chuan, "Sir, lungngai suh...lo in enkawl tha rawh, Mary kha lo veng tha la, theihtawp ka chhuah dawn alawm." ka ti a. Nathana chuan, "Henry-a khan engkim ahria, engkim ahre vek. Zawt la, dawp char char rawh u. A tul chuan a ban ruh te kha vuak tliah sak mai rawh u...DGP in a hauh che pawn Nathana'n ti rawh u a ti in ti mai dawn nia." a rawn ti lawm lawm a, a mangang hle a ni. Keichuan, "Awle Sir, hei ka zawt dawn mek e." ka ti a, phone chu ka dah ta a. Room chhungah chuan ka lut a, Henry-a chu ngawi rengin alo thu a, a maimitchhing vel nia mawle. A hmaah tak chuan ka va thu a, "Henry.." tiin ka han ko a, mahse min chhang duhlo. A maimitchhing reng tho a, "Henry, ka biak che chu i hrelo mi?" ka han ti leh a, ala meng chuanglo, min la chhang chuanglo bawk, ngêng tak a ni. Vin lek lek hian, "Luhlul kual vel lo teh, ka khawih hreh miahlo che a nia." ka ti a, ala ngawi char char tho. Ka insum zolovin ka khawih ve hrep ang tih chu ka hlau a, ka kut ka hum ruh a, insum a har ngei mai. A mizia chu ngeng tak a ni, a la maimitchhing char char tho a, a awm ngaiin a la awm reng. "Enteh Hmela, nang aia luhlul hi mitam tak ka buaipui tawh, ka kutthlak inchhirlo an awm ngailo ania, na i tawrh belh duh em ni?" ka han ti leh a. Zawi muang hian a rawn meng a, min nuih suk ringawt a. Thutthleng nghenchhan chu muangchang hian a ngheng ar ar a, a thaw hak a, mahse ala tawng chhuak duh chuanglo. Rum zet hian ka melh a, "Henry, khawnge Sanvi a awm? A kidnap tute pawh kha i hmelhriat te an ni tiraw?" tiin ka han zawt leh a. Hmuhsit hmel zet hian min melh a, min chhang lem chuanglo chuan a lu a thing ringawt a. Ka dawhtheihna in a tlin ta lo, na em em hian ka beng hawi sawk mai a, na ti hmel pawn a lang lo, a nui vur vur ringawt. Chutah muang chang hian mi rawn melh a..
"Umm...enge i sawi duh a?"
"Henry, khawnge Sanvi?"
"Tunge Sanvi chu?"
"DCP Nathana nupui, i thianten an kidnap kha...khawnge?"
"Ka thian te maw? Tu ka thiante maw?"
"Luhlul kual vel lo teh...tha takin min chhang mai rawh."
"Ih e ASP, Sanvi chu mizo nge vai?"
"Chutiang i hriat a ngai lo, ka zawhna che chu min chhang la a nimai."
"Chuti chu engmah i hriat ve a ngai biklo."
(Ka maimitchhing vang vang a, ka va khawih hman teuh em!)
"Awle....mizo a nilo. A tawk em? Min chhang tawh rawh le."
"Enteh ka pu, Sanvi chu tunge a nih ka hrelo. Chuan...ka thiante chu tu ka thiante ber nge an nih ka hrelo..thian tamtak ka nei ve alawm."
"Anih tak chu....khawi venga awm nge i nih?"
"Aizawl ami ka nilo...keichu khawdang atanga lo kal ka nia."
"Anih leh khawi khua nge i nih? Tunge i nu leh pate?"
"Ka hrilh nachhan tur che ka hrelo."
Ka insum zo tawh lo, a thutna chair nen chuan ka tlawh thal tawp a. Bangah ka nam bet a, "Zawnga, na tawrh belh i duh em ni?" ka ti a, hlauh ahnekin min nuih vur vur mai. Zam hauh lo chuan min melh a, "Insual ah pawh min hneh mang silo, hliam ka tawrh veleh i inla huai leh viau si, nep lutuk." minla ti zui. Ka thinrim lutuk chu ka puak keh lo chauh tawh a ni, ka hnek thal tawp mai a. Chutah muang chang hian a rawn tho a, rum zet hian min rawn melh a, "Tikhan in hrethiam tawh em? Inla inchhir ang ka tih kha...tunge ka nih hi in hrelo a ni. Drugs ka zawrh te hi maw...midang drugs zuar ang mai mai ka ni velo. Dealer ka nei thlap a, sumdawnna lian tak a ni asin. Min tihbuai hma khan ka vau lawk tawh che a, mahse ka thu i awih lova. Ka thil tih theih zia hi tikhan i hrethiam tawh em? Keite chu lo hralh chhuaktu pakhat ve mai chauh ka nih hi, kei aia thu zawk te, ka boss te phei chu kei ai hian thil an ti thei zawk tih hre rawh. Ka boss te chuan min man tih hi an hre nghal tawp mai ani, phone in ka hrilh lo, news ah pawh an puang hek lo, mahse an hre tawp mai a ni. Chutiang khawp chuan information hi a chak asin...nangni Police Officer satliah mai mai hian min inpuan tir theih in ring a mi? Phuba chu ka la ve ta a nih hi...mi satlaih ka nilo, mi hlauhawm tak ka nih hi. DCP nupui kidnap tute pawh kha ka boss te an ni, ka thiante nilovin. Aizawl khawpuiah hian thiante ka nei lo, Johnny-a te unau pawh saw ka thiante an nilo, ka customer te ve mai chauh an ni. Ka boss te pawh hian DCP Nathana te in hi an hre nghal tawp thei a, an zawng kual lemlo. Chuvang chuan kan hnathawhna ah hian lo inrawlh ngam an awm ngailo, police officer tamtak te hi an hna atangin kan ban tir hnem tawh asin." a ti ta phiar phiar mai a. Sawi tur pawh ka hre lo, mak ti em em chuan Henry-a chu ka en tlawk tlawk ringawt mai ani. Henry-a bawk chuan, "I hlau ta em ni? Ka nihna ka sawi meuh chuan i hlau ta em ni?" a la rawn ti ham ham zui. Rum tak chuan ka melh a, "I inpuang ang, i inpuang khawp ang. I inpuang lo a nih chuan ka that ang che...ka that hreh lo che." ka ti a, mahse a hlau hlawl lo, a nui vak vak a. Chutah thinrim hmel em em hian min rawn melh a, "Min that ang maw? Min that ta che...min that rawh. Ka thih thu hi ka boss ten an hriat rual rualin Sanvi chu an that ve nghal ang. Ka vau che a nilo, thil awmdan tur ka sawi zawk ani. Ka boss te hian hman atang tawh in ka hna thawh that avangin ka duhzawng engkim min tihsak a, nula pawh nise, pawisa pawh nise, damdawi ruih tur, zu leh thildang ka mamawh engkim min pe vek thin. Chuvang chuan an tana thih te chu ka inpeih reng, a pawi ka tilo..ka duh chu ka hmu hnem tawk tawh. Mahse ka thih thu hi an hre ngei anga, DCP nupui chu a thi ve nghal ang. Kan sumdawnna chungchang ka hrilh che hi i duh phawt chuan i puangzar thei ang, a hre hmasa ber tute chu ka boss te tho an ni dawn. An hria anga, Sanvi chu an that nghal ang. Mahse thil chiang deuh pakhat chu maw...Sanvi an thah hma hian an duh tawkin an pawngsual rawn phawt ang." tih pah chuan a nui huah huah mai a. Ka thin a khei ta zak mai, ka insum zo tawh ngang lo a ni. Ka hnek thal tawp a, "An pawngsual ang maw? Ka unaunu chu i boss te chuan an pawngsual anga maw? An kut hmawr pawhin an khawih lovang...chu chu hria ang che." tih pah chuan ka chhuih zui hrep a. Vawi 20 vel ka chhuih hrep hnu chuan keipawh ka hah hial thei a, Henry-a chu muangchang chuan a rawn tho chhuak a, a ka chhunga thisen chu a chhak pherh pherh a, min rawn en a, ala rawn nui leh hram a. A zi mar vel te te a, "In tihtheih awmchhun lah hi a tlem sia tiraw? Min sawisa a, min dawp a, ka chhang duh silo che u a, min sawisa leh a. A boring ta khawp mai, min chhuah ve hle hle ula, engkim a fel nimai tur. Anih loh chuan min that law law mai ula, DCP nupui nen pialral ah kan lo innei ve thung dawn lawm." a la ti ham ham mai a, awm ngaihna pawh ka hre tawh lo.
Ka thinrim insum zo lo chuan ka that mai dawnin ka hria a, inngaituah fim phawt ka ngai a ni. Room chu chhuahsan rih mai ka duh ta a, ka chhuah hma chuan vawikhat ka tlawh thal leh hram a, ka haw em atin ni. Ka office lam ka pan a, ka vei kual sek ringawt mai. Zan dar 8 a ri ta der mai a, Henry-a erawh interrogation room ah a la awm reng thung. Constable pakhat alo kal a, "Sir, ka lo lut thei angem?" a rawn ti a. Keichuan, "Lo lut rawh." tiin ka lo chhang a. Constable chuan, "Sir, Henry-a sawn a ril a tam thu a sawi reng ania." a rawn ti a. Keichuan vin zet hian, "Lo tam mai mai ang hmiang, duhleh tam hlum hmak se a ni mai alawm." ka lo ti vin vak mai a. Constable chu inthlahrun hmel deuh chuan a chhuak a, thutthlengah chuan ka thu hnawk a, ka mangang a ni. Ka ngaihtuah chiang a, Henry-a lakah hian tun dinhmunah hi chuan tlawm hrih a ngaiin ka hre ta a, a luhlulin a ngeng em em si a. Thih a hlau der mai silo, a inpuanna tur khawpa hrem chu ka thiam a, mahse DGP thulo chuan engmah ka ti ngam bawk silo. Henry-a hi riltam a ka dah reng chuan a thinrim anga, Sanvi chu a boss te chuan anlo that mai ang tih ka hlau bawk si. Constable chu ka ko leh a, "Canteen-ah sawn fried rice plate 1 va lei rawh, chuan Henry-a chu i ei tir dawnnia." ka ti a, tichuan constable pawh chu a kal ta a. Dar 8:30 velah chuan Amandai leh Liantea an lo thleng a, ka office ah lo lutin tlangval la naupan hmel tak pakhat hi an lo hruai lut a. Amandai chuan, "Sir, hepa phone number hi alo ni a. Mahse a phone chu nizanah a tihbo thu min hrilh a." a rawn ti a. Keichuan, "Lo thu teh le, Mama." ka ti a, chupa chu a thu a. A zam hmel kher mai, "Tunge i hming?" tiin ka zawt a. Chu tlangval chuan, "Sawmtea ka ni e." a ti a. Keichuan, "Sawmte, i phone chu engtin nge i tih bo?" ka ti a. Sawmtea chuan, "Ihmaw...nizanah ka inkhawm a, ka phone pawh ka keng ngei tih ka chiang. Mahse ka haw leh hnu khan ka hmu ta miahlo a, ka zawn vak vak pawhin ka hmu chuang miahlo a. Tichuan Biak Inah pawh ka va let leh a, ka la hmu chuanglo. Ka thutna bul te, Hlabu dahna te chu ka en kual a, ka thutna tlar chauh lo pawh, tlar dang te pawh thutthleng hnuai te nen lam ka zawng vek a, ka hmu chuanglo. Ka beidawng a, ka haw a, phone neilova awm hrih mai chu ka tum ta a, tihngaihna dang a awm chuang silo. Tichuan zanin khan police te hi anlo kal a, tihian min rawn hruai tawp a ni." a ti a. Keichuan, "Nihleh inkhawm naah chuan i bulah tunge thu?" tiin ka zawt a. Sawmtea chuan, "Ka thianpa athu a, a ni chu a nilo tih ka chiang. Achhan chu kan ban dawn hnaih pawh khan ka ipte ka dap a, phone chu ka la ak a ni." a ti a. A phone erawh chu kan hmulet chuang lo a, mahse a phone number kan trace-na lamah amah Sawmtea number ngei a ni tih hi ka hre thei mai chauh a ni. Sawmtea pawh chu a tangkai dawn lemlo, ka haw tir leh ta tawp a. Interrogation room lam ka pan leh a, Henry-a chuan a ha alo kher mual mual a, min hmu chu min la nuih vur vur leh ta nghal a. A bulah chuan ka va thu leh a, "Enge i duh?" ka va ti ringawt mai a. Henry-a chuan thawk huai pah chuan, "I hriat kha...min chhuah mai rawh." a ti a. Keichuan, "Chhuah tawp tur che hian thu neihna engmah ka nei ve lo, Henry." ka ti a. Henrya chuan a lu a han dawm vawng vawng a, "Hei tak hi lawm buaithlak chu....in inla rinawm vel thei lutuk a, DGP bulah i dil mai dawn alawm." a la ti ham ham zui.
Chutih lai chuan Amandai a lo lut a, "Sir, DGP a lo kal a." a rawn ti a, ka ding a, ka chhuak tur chiah chu Henry-a chuan, "ASP, chuu...DGP pawh alo thlen tawh chu, dil nghal law law rawh aw.." ala rawn ti hram a. Mahse ka chhanglet vel peih tawh lo, ka chhuahsan ta a. DGP chuan min hmuh veleh chuan min rawn pan a, "Hmasawnna a awm em?" a rawn ti a, ka chhang mai theilo. Henry-a'n a nihna diktak te, a boss ten Sanvi an kidnap a ni tihte chu DGP hi ka hrilh angem? Nge hrilh lovang? Ka hrilh a nih chuan DGP hian engtin nge a tih ang? Henry-a hi eng ang pawhin dawp mah ila a inpuang dawn chuang bawk silo, ka case a ni miau a, keimah ngeiin ka chingfel tho tho ang. DGP chuan, "Hmasawnna a awm em ka tih chu..ASP, a inpuang tawh em?" a ti leh a, "Aih inpuang lo." tih ringawt chuan ka chhang ta a, ka hrilh hrih lo phawt mai teh ang. DGP chuan, "Anih number neitu chu in hmu tawh em?" a ti a. Keichuan, "Aw Sir, tlangval kum 20 mi vel a ni a, a phone chu nizanah a tihbo thu a sawi a, a phone pawh chu khawnge a awm kan hre chuanglo. A number neitu a ni tih chiah kan hria, phone lah chu kan call pawh in OUT OF SERVICE a inti zel a, simcard chu an tichhia a nih ka ring." ka ti a. DGP chuan, "Khawnge Sawmtea chu?" a ti a, keichuan, "Ka haw tir rih...a chhungte number pawh kan la tho a, SI Liantea'n a thlah mek." ka ti a. DGP chuan, "Khawnge Henry-a chu a awm?" tiin min zawt leh a. Keichuan, "Interrogation room ah." ka ti a, DGP chuan, "Hawh teh, iva kal dun teh ang." a ti a, kan inzui phei ta a. Henry-a chuan DGP a hmuh chiah chuan ahmaa a mizia zawng zawng chu a thlak leh ta vek mai, innocent hmel em em hian a han awm leh vela, ka va han sawisa chak tak em. DGP chu abulah ava thu a, "Henry, engvangin nge i zep tlat a? Inpuang mai rawh...i tan a tha zawk ang." a ti a. Henry-a chuan, "Ka pu, engmah ka hrethiamlo a ni. DCP lo phone tu pawh chu tunge a nih ka hrelo, han rin tur pawh ka hrelo." a han ti kual leh vel chu ka va han haw tak em. A awmzia chu Henry-a hian a thil min hrilh zawng zawng te kha DGP bulah hian ka sawi ngam dawnlo tih a hrelawk vek tihna a ni. DGP chuan, "Hlauh i nei a ni tiraw? Tumah hlau suh, sawi mai rawh...i himna zawk tur a nih chu." a ti leh a, Henry-a chuan, "Thil thleng hi a awmzia ka hrelo a ni ka pu, min man chhan chu drugs ka hralh thin vang a ni tih ka hria, chuan ka zep lo. Johnny-a te unau hnenah khan ka hralh thin a, min man nachhan pawh hi ka sawisel lo, thilsual ka tih vang a ni. Chumai bakah min mantu police te kha ka lo beilet a, tichuan an pistol-i'n min kah phah ta hial a, mahse chung zawng zawng pawh chu ka pawm vek. Thil ka tisual a, min man a, ka hria e. Mahse DCP nupui Sanvi chu tunge a nih ka hrelo a ni, hei kher hi chu inrawlhna ka nei ve tawh lo." a han ti kual vel phei chu...DGP kha chu awmlo se ka khawih nasa khawp ang le. DGP chuan, "Anih leh khawi veng nge i nih?" a ti a, Henry-a chuan, "Dawrpui Vengthar ah ka awm a, mi in ka luah a." a ti a. DGP chuan min rawn en a, "Rinawm, an veng awmna leh an in awmna engmah ilo zawt nange?" tiin min rawn melh a. Min hrilh duh loh thu chu sawi ka duh hle mai, mahse chutia DGP chuan ka lam a rawn hawi lai chuan Henry-a chuan rum zet hian min rawn melh a, a phun sap a, a hmuiphun ka en atang chuan ,"SANVI." a rawn ti tih chu ka hai lo. Hreh tak chung chuan dawt ka sawi angai ta, "Ni e,Sir..ka lo theihnghilh a ni." ka ti a.
DGP chuan vin lek lek hian, "Chutiang mai mai te chu nachang hriat ve tur alawm, ASP i nih kha...i thianpa Nathana a awmlo a, i buai zo vek anih ber kha." min ti ta hrep a, ka rilru ana angreng hle mai. DGP chuan Henry-a bulah chuan, "Drugs i zawrh ho chu khawia mi nge i neih?" a ti a. Henry-a chuan, "A hma chuan addict satliah ve mai ka ni thin a, mahse damdawi ka tih tak zel atang chuan ka zuar ve ta a. Ka neihna thin hian a hming hi a sawi duh ngailo a, inhmuhna tur hmun a sawi a, tichuan ka lo leichhawnsak teuh ta thin a ni." a han ti vel a, ava han daw peih tak em. DGP chuan, "Mahse phone i nei silo a, khawnge i phone?" a ti a. Henry-a chuan, "Ka hre tawh biklo, nimin chhuna ka insual naah khan ka thlauh bo aniang, Police Station lama min hruai lai pawh khan ka phone chu ka hmu tawh lo." a ti a. DGP chuan, "Anih chuan tunah hian Inspector Amandai leh SI Liantea ten i inluahna lam chu an panpui che anga, tlanchhuah tum hlek suh ang che." a ti a. Henry-a chuan, "Awle...ka tlanchhuak lovang." a han ti vel a, a chak dawnlo khawp alawm, hepa hi chu. DGP chu a ding a, rumzet hian min melh a, "ASP, i mak khawp mai. Darkar engemaw zah i dawp tawh hnuah pawh an veng leh a in awmna pawh zawh nachang ilo hrelo a. Achhan i hre duh em? DCP Nathana i ring leh lutuk a, i ring laklawh a, a tello chuan i buai zo ta a nih hi. He case atang hian inthiarfihlim mai rawh, Amandai leh Liantea ten chhunzawm mai rawh se." a ti ta mai a. Inthlahrung tak si hian, "Sir, chutin ti lul suh. Ka tiam ache, ka chhuichhuak em em ang." ka ti a. DGP chuan, "ASP, ka ring zo hrihlo che a ni. Ka lo thleng a, an veng leh a in awmna ka zawtchhuak ve chauh a ni a, hetiang reng te chuan a hahthlak emai. Hna chhete pawh i thawk tha theilo ania, he case hi i kutah a awm ve tawh lo." a ti a, ka mangang hle mai. Ka sawichhuah chuan Sanvi nunna atan a hlauhawm thei bawk si a, mahse ka sawilo a nih chuan he case atang hian min ban dawn bawk si, "Sir, DCP Nathana tello pawhin hmanni lawkah Champhaiah pawh case pakhat chu ka han chinfel kha.." inthlahrung tak chuan ka han ti a. DCP chuan, "Chutiang chhuanlam a tling lo, min hnial suh....ka thusawi chu zawm mai rawh." a ti a, duhthlan tur dang ka nei ta lo, "Ka tihpalh a ni Sir, awle...i thu ang zelin le." ka ti ta ringawt mai a. DGP chuan, "Haw tawh rawh, abak chu Amandai leh Liantea kut a ni tawh." a ti a, min chhuahsan ta daih a. Ka chhuak ve tur chiah chu Henry-a chu a rawn faifuk rat rat a, ka va hawi phei a, minlo nuih vur vur lehnghal a. Rum zet hian ka melh tlawk tlawk ringawt a, Henry-a chuan, "Darkar 24 hun ka pe ang che, min chhuahlo a nih vaih chuan Sanvi chu theihnghilh rawh..a thi angah ngai rawh." a rawn ti a. Keichuan zawi sap hian, "Engtikah mah ka chhuah lovang che." ka ti a, ka chhuahsan ta a. Zanin zet zawng, ka tlawm ngei mai. Nathana te inah chuan ka peng kawi a, Nathana chuan kawngka a lo hawng a, a tap zo hlim tih hriat tak chuan a mit a sen rum mai a, "Lo lut rawh." tih ringawt hian min chhang a, a room ah chuan min chhoh san leh daih a. Ka zui chho a, a roomah chuan ka lut a, zu alo in chu niin. Mary erawh chu tui takin a muhil a, Nathana chuan a han thli leh karh karh a, tui a pawlh a, a tlak pap a, meizial chu a zu khu hluah hluah a.
Min rawn melh a, "Ehe....sorry aw.." tih pah chuan a khum bula pawhdawh atang chuan no pakhat hi a phawrh a, ka hmazawnah chuan a rawn dah a. Zu chu a thli a, "In hnem lutuk suh aw, ka thlah haw thei dawn biklo che a nia." a ti a, ngawi reng chuan ka en ringawt a. Zu chu tui min rawn pawlh sak thlap a, tichuan ka in ve ta mai bawk a. Rilru na ve ve kan ni a, mahse kei ai chuan a rilru natna chu a nasa zawk. No thum vel ka in hnu chuan ka hai ve ta chhak mai, "Sir, engkim ka hrilh ang che." ka han tih chuan mi rawn melh hru mai a, a mitmeng chu a hring nghulh mai a, a mit ko vel erawh a sen vek thung. Hriat chak hmel tak hian, "Engthil nge?" alo ti vat a, keichuan, "Lo ngaithla rawh.." tih pah chuan engkim chu ka hrilh ta vek a. Ka hrilh zawh hnu chuan a ngawi vang vang a, "Rinawm, ka rindan vel chiah a ni. Ka hlauhthawn ang ngeiin thil chu a thleng ta a nih hi...mahse zaninah chuan engmah tih theih a awm tawh hrih lo, haw phawt la, naktukah rilru fimin kan ngaihtuah dawnnia." a ti a, tichuan keipawh chu ka haw ve ta a. Atukah chuan hma takah Nathana te in lam chu ka pan a, ka day-off a ni bawk a, case atangin kan DGP in min ban bawk nen, a ruka Nathana nena kan chet chhuah mai angai dawn a ni. Nathana chuan an in bulah minlo nghak reng tawh a, a bulah chuan Mary alo awm bawk a. Mary chungchang hi ka'n sawi lawk teh ang, a chanchin chu in hre tawh tho nangin, kum 8 lai chu ni ve tawh mahse naupang kum 6 mi lek ang mai hian ala â ve em em a, a pangchangin a rilru pawh ala naute hle bawk. Chuvang a nia kum 8 lai ni ve tawh mahse a nu Sanvi hian a puak phawt loh chuan a muhil duh ngailo. Naupang duhawm tak leh chum biang mai hi a ni a, a hmel tha reuhvin vai a ang lek lek a, Sanvi fanu tak tak amaw an ti fo reng a ni. Nathana chuan, "Rinawm, Mary hi in in lamah i nu ten lo awm hrih mai rawh se...hna kan thawh angai dawn sia." a ti a, keichuan, "Um...pawilo." ka ti a, tichuan kan inlam pan chuan kan kal ta a. Kan inah chuan Mary chu kan dah a, Mary pawh hi kan inah a tlangnel ve tawh tho bawk a, a duh ve mai bawk a. Tichuan Nathana nen chuan carah chuang dunin kan kal chhuak ta nghal a, kan tlan pah chuan, "Khawnge kan kal dawn?" ka ti a. Nathana chuan, "Sawmtea te inah." a ti ta daih mai a. Keichuan hrethiamlo takin, "Ehe, Sawmtea te inah daih maw?" ka ti hu mai a. Nathana chuan, "Um...ka ringhlel a nilo, thil zawh ve hrim hrim ka duh a ni." a ti a. Keichuan, "Sir, DGP hian a hre hlauh ange aw...min suspend dun chiang viau ang." ka ti a. Nathana chuan, "Min suspend mai mai teh se, min suspend te chuan tuma thuhnuaia awm lovin kan duh duh danin hna kan thawk thei tihna a nimai alawm. Mahse zeplo chuan min suspend chu ka hlau angreng, suspend ka ni zing tawh bik si." a han ti leh hnuhnawh a, a pawr reilo phian bawk sia, hahthlak thin mange. Sawmtea address hi nizan khan Amandai'n min hrilh a, chuvang chuan an in awmna lai pawh ka hriat phah a ni. Sawmtea te in chu kan han lut a, a nu leh pate bulah chuan police kan nih thu te, a phone bo ta number vanga kan buaina kal zel chungchang te chu kan hrilh a, anu te chuan kan hruai chhuah chu an phal ve ta mai bawk a, Station lama hruai phei tur angin kan insawi a ni.
Nathana chuan hmun fianrial ve tak ah hian motor chu a park tha a, tichuan Sawmtea chu thu a zawt fiah ta a. Mak ka tih deuh chu Sawmtea hian lungphur a kai amawni...a in hiat neuh neuh reng mai.
"Sawmte, i phone bo dan kha chu ka lo hre tawh a...inkhawm naah khan i bula thu kha tunge i tih khah?
"Rinzuala, ka thianpa."
"I ringhlel miah lo maw?"
"Aw...ringhlel lo...achhan chu ka phone kha ka la ak ngei alawm, kan ban dawna pawn kan chhuah thleng pawh khan."
"A nih chuan, in inkhawm bang a, pawn in chhuah thlengin i phone ila ak tih chu i hria a, mahse tinge i haw leh hnua i phone a bo tih i hriat khan, Biak Ina i let leh khan, i thutna lai vel kha i en leh kher a? Ka sawi awmzia chu i thutna vel ah khan i zawng a, mahse i thutna velah kha chuan a awm dawnlo tih chu nangpawn i chiang reng a, achhan pawh in inkhawm bang pawna i chhuah pawh khan ila ak tih i inhre sia, enge awmzia?"
"Ahh..ih..nia, englo....ka ui lutuk kha ka hamhaih a ni ber mai, a awm dawnlo tih hre reng chung khan a tawp lamah beidawn nan hrim hirm tiin ka va zawng leh tawp a ni."
"Umm..a nih tak chu. Anih leh hei....i phone number atang hian tu emawni chuan min rawn vau chiam mai a, kan call leh pawhin a tlang thei tawh silo a. Nangmah chu i nilo takzet ang tiraw?"
"Aih..teuhlo, ka ti tak tak ka pu...ka phone chu ka sawi ang khan a bo a, chuan a thar lei a, ka sim-card pawh renew leh ka tum a, chutiang vel ka ngaihtuah lai tak chuan nizan khan police te kan inah anlo kal a, min rawn hruai ta ringawt a ni."
"Ummm..nihleh an lo hruai chhan che kha an hrilh che em?"
"Ummm hrilh e...mahse ka pu, engmah ka hre lo tak tak. Tunge Johnny-a leh Muantea te pawh chu ka hrelo a, tunge Henry-a pawh chu ka hrelo...engmah ka hrelo hrim hrim."
Nathana chuan a lu a bu ngat ngat a, "Ummm anih tak chu.." a ti zawi sap a. Vawi lehkhatah Sawmtea chu Nathana chuan na em em hian a hmaiah a beng ta siah mai. Sawmte chu a hawi sawk mai a, hlauh hmel em em hian NAthana chu a melh a. Keipawh ka phu zawk nghe nghe, a awmzia ka hre biklo. Nathana chuan Sawmtea kawr awma tham pah chuan, "Tunge Johnny-a leh Muantea chu? Tunge Henry-a chu? Engtin nge an hming ilo hriat ve ngawt a? Mawhh...sawi rawh..tuman kan misual man te kha an hming kan hrilh lo che..engtin nge ilo hriat ve sawi rawh?" a ti ta phiar phiar mai a. Sawmtea chu a tap nghal pur mai, "Ihhhh...englo...ASP hian min hrilh." a la ti zui. Keilah pek chuan Nathana ban chu vai kiangin Sawmtea hmaiah chuan ka han beng ve leh thuai a, a kawr awmah ka tham ve leh a, "Engtik laiin nge ka hrilh che? Awihawm loh lutuk.." ka ti a, a tap pur mai. Sawmtea chuan thaw hlawp hlawp hian, "Niii..nizana minlo hruaitu hmeichhia leh mipa te khan min hrilh." a han ti leh a, ava awihawm tawhloh tak e awww. Nathana chuan, "Rinawm, Amandai phone la, han zawt chhin teh." a ti a. Sawmtea chu Nathana bulah chuan ka nam phei dawrh a, Nathana chuan motor ah chuan a nambet a. Amandai chuan, "Hello Sir, enge ni ta?" a rawn ti a. Keichuan, "Amanda, nizana Sawmtea in rawn hruai dawn khan...Johnny-a te unau hming te, Henry-a hmingte kha in hrilh em ni?" ka ti a. Amandai chuan, "Tumaw? Sawmtea chu maw? Engmah kan hrilh lo, kan DCP lo vautu an awm a, i number atangin ania...kan ti ringawt alawm. Ngatinge Sir? News a awm em ni?" a rawn ti a. Keichuan, "Aaaa..awmlo, ka hre duh mai mai..nih phawt le." tih pah chuan phone chu ka dah a. Sawmtea lam ka va hawi leh a, a lo tap pur tawh mai, a hlauthawng hmel chu hmu ve ula, chhia in ti ve tho ang. Nathana chuan, "In in atanga kan hruai chhuah che atang daih tawh khan i awmdan hi a diko, i inhiat neuh neuh a, i ha i thial ri leh zeuh zeuh thin bawk. Hei hi damdawi ti thinte awmdan a ni, sawi rawh...khawnge ka nupui a awm?" tih pah chuan a beng hawi leh sawk mai a. Sawmtea chuan, "Ka hrelo...ka hre velo. Kan boss ten an kawl mek a, an awmna ka hre ve lo." a ti a. Nathana chuan, "Tunge in boss hming chu?" tiin a vin leh khur khur a. Sawmtea chuan, "Kan hotupa ber chu Victor-a a nia, ka phone pawh nimin piah khan min laksak a, chuan police ten min rawn man dawn tih pawh hi a sawi lawk a, in bula dawt sawi dan tur pawh min hrilh lawk vek a ni." a ti a, a inhnit feih feih a. Nathana chuan, "Tunah in boss chu phone la, inhmuh i duh thu sawi rawh." a ti a. Sawmtea chuan a phone a, tichuan inhmuh a duh thu chu a sawi a. Nathana hian an inhmuhna hmun tur pawh chu a hrilh a, chu hmun chu khawidang mah nilovin, kan Station bula School tlang bawk kha a ni. Tichuan tlangah chuan Victor-a te chu kan lo nghak ta a, darkar 1 zet kan nghah hnu chuan anlo thleng ve ta. Thingkung phenah chuan kan biru a, Sawmtea erawh an hmuh theih turin tualzawl lai takah kan din tir a. Tichuan motor pakhat hi a rawn tlan a, Sawmtea bulah chuan a rawn ding chat a. Motor atang chuan mi pali anlo chhuk a, eeeeekhai, palian hlawm tak an ni.
Sawmtea chu an rawn pan a, an zinga palian ber, ft 6'2 vel laia sang a ni ngei ang. An boss ber, Victor-a ngei mai chuan, "Enge a Sawmte? Inhmuh i duhna lai ber hi Police Station bul lawk a ni lehnghal. Police ten min hmu ange?" a ti a. Nathana chu thingkung phen atang chuan a kal chhuak a, "Kan hmu nghal che u....nang hi maw Victor-a chu?" tih pah chuan Victor-a chu rum zet hian a melh a. Victora chu a phu zawk mai, Sawmtea a melh leh a, "Mawla, ka hlauh ang ngei ngeiin maw? I chet buai kha ka ring reng a ni." a ti nuah nuah a. Kei pawh chu ka va pen chhuak ve ta a, "Victor, i game khelh chu a tawp ta e...man i ni e." ka ti a. Nathana nen chuan pistol kan phawrh a, Victor-a te chu kan tin a. Victor-a chu a nui huah huah a, "DCP Nathan, phone atang kha chuan min rawn cho viau a nilawm ni..tinge silai hman i tum tak mai a? Ava dawihzep thlak ve.." a ti ham ham a. Nathana chuan, "Victor, ngawi chipcham rawh, khawnge Sanvi a awm? Min hrilh loh chuan i thluak hi ka kap darh vek ang." a ti a. Victor-a chuan thinrim zet hian, "Kap la, min kaphlum ta che....min that a nih chuan i nupui Sanvi hi i hmu let leh tawh lovang." a ti khur khur a. Nathana chuan, "Anih leh enge i duh?" a ti a. Victor-a chuan, "Sawmtea kha hetah lo kal tir rawh." a ti a, Nathana chuan Sawmtea chu a kal tir a. Victor-a chuan Sawmtea darah chuan a beng thak thak a, "Sawmte...apawi lo, ka ngaidam che. Engtikah mah i tisual leh tawh dawn lo tih ka hria alawm, achhan chu maw...tisual leh turin he khawvelah hian a i awm tawh dawn silo." tih pah chuan Sawmtea lu chu a man bet thut a, ri tuar khawp hian a ringruh a herh tliak ta mai a. Sawmtea chu a thal tawp a, a thi chiang hle. Nathana chuan vin zet hian, "Zawnga.." ti a silai hmeh puah a tum chiah chu Victora chuan, "Hey...DCP, i ngam chuan han kap teh...i nupui pawh i kap hlum tel angah ngai rawh." a ti khur khur mai a. Nathana chuan, "Enge i duh? Sawi ta che.." a ti a. Victor-a chuan, "In silai kha paih rawh u, mipa te chu...insual ila." a ti a. Nathana chu ka bulah chuan a rawn tawlh phei hrut hrut a, zawite hian, "Rinawm.....i ngam em?" a rawn ti su su a. Keichuan, "Ngam deuh tho, mahse huphurh ve det." tiin ka lo chhang a. Nathana chuan, "Nia, Brock Lesnar-a pawh kha a chak ropui sia, hemi te phei hi chu amah aia lian hlir anni lehnghal sia.." a tih lai chuan Victor-a chuan ring zet hian, "Hey....enge in inhrilh ruk sur sur a, phakhar chhuah intum animaw?" a rawn ti lauh lauh a. Nathana chuan, "Lawk aw..." a ti a, zawi te hian, "A tlawmngaih thlak ve deuh alawm...ti teh, Indonesian kick boxer te pawh kan hneh kha maw, kan hneh em em ang." a ti a. Mahse ka ngam chiah lo a ni, "Naa Sir, khatih hunlai te kha chuan kanla naupang deuh a, tlangval thazat lai a nia.." ka lo ti nung nung a. Nathana chuan, "A ho lutuk, tunah pawh tlangval tho alawm ila nih...hawh teh, ka nupui tan, mipa takin, insual pui teh ang." a ti a, ka remti ve ta a. Silai chu kan paih a, an chhar theihloh nan hla tawkah kan vawm bo daih nghe nghe kha, ka ui angreng khawp mai. Tichuan kan han insual ta aleeee...kan ti fuhlo deuh hret chu a ni. An han chak zia chu, ka in thal chhawk reng mai a, kan in t(r)e rinsiak hi a ni ber mai. Drugs tih hi chakna a ni hial lo maw le ka ti hman hial a, keiphei chu ka tlawm titih der tawh. NAthana pawh a thal zing ta khawp mai, ka chawntha te hi a chat hial hian ka hria.
Nathana nen chuan min sawisak hrep hnuah chuan Victor-a chuan chemte a phawrh a, "I nupui hi chu that lo mai teh ang, duhleh Henry-a te kha chu lo tâng mai mai teh se. Ka nupui a ni tawh anga, zantin ka mutpui ang." tih pah chuan Nathana vih a tum chiah chu silai a puak dur a, Victora chu a thal tawp mai. A ke atang chuan thisen a chhuak zur zur a, a na ti lutuk chu a th(r)en chawk chawk mai. Midang pathum te pawh chu an thal nghal tawp tawp a. Silai lo puahna lam kan va hawi chu Amandai alo ni a, silai a lo hum ran mai a. A hnungah chuan SI Liantea chuan Henry-a arawn hruai bawk a. Kan bulah chuan lo kalin Amandai chuan, "In tha maw...in na em?" a rawn ti deuh luam a. Keichuan, "KAn tha e." tih pah chuan kan tho chhuak a. Nathana chuan Victora chu a hnek nghal pawp pawp a, "Khawnge Sanvi?" a ti a. Victora chuan, "Mo...motor savawm bawmah.." a ti tawk tawk a. NAthana chu a insum zo ngang lo, Victora chu vawi 10 vel a hnek siah siah a, Victora pawh chu nikhawhrelovin a let der mai. Motor savawm bawm chu kan hawng a, Sanvi chu phuarbehin a lo awm a, a hmui tuam sak a ni bawk a, nikhaw hrelovin alo awm bawk. Rang takin Hospital lam kan panpui a, Amandai leh SI Liantea te chuan a tawp atawpah chuan an case chu an chingfel thei ta. Amaherawh chu Nathana awmlo se chuan an theih ka ring lo, Amandai te hian min rawn zawn hmuh theih nachhan chu NAthana hian ka hriatloh hlanin message a lo thawn leh hman keuh tawh a nih chu, khang palian pali te kha kan hneh a ring chiah biklo ni ngei tur a ni. Tlai dar 5 a ri a, Sanvi pawh a lo harh ta a. DGP pawh SAnvi kan tur chuan alo kal a, ngaihdam min rawn dil nasa mai. Keipawh chuan thudik ka sawi loh chhan te, Sanvi nunna in a tuar ka hlauh vanga ngawi ta mai ka nih thute chu ka hrilh ta a, kan inngaidam tawn thei ta a ni. DGP chu a haw ta a, Mary ka pawm a, Nathana leh Sanvi erawh engmah sawilovin an in en ngawih ngawih ringawt nia mawle, vai nupui neih vang mai a, an che vai film dun thei a nia. Chutah Nathana chuan, "KA HMANGAIH CHE, SANVI." tih pah chuan an han in-kiss ta anih chu, Mary awm lai laiin. Lehlam ka hawi a, "Hawh teh Mary, Ice cream lei dun daih ang aw, i nu leh pa te saw maw..an hui si." tiin kan chhuak ta daih a.
THE END
I LOVE YOU, SANVI (Part-2)
Written by : Aaron Malsawmdawngzuala
Nathana chuan phone a dah a, Mary chu a pawm a, tichuan in atang chuan kan chhuak ta a. Motor ah chuan kan lut a, Nathana chu chak takin a tlan a, Station lam min panpui a. Station chu kan thleng a, Nathana chuan Amandai bulah chuan, "Amanda, Mary hi lo pawm teh." a ti a, Mary chu a pawm a. Hriatthiamloh hmel tak hian Amandai te leh SI Liantea te chuan Nathana chu an lo en hu hlawm mai a. Nathana chuan cell chhunga awm mek Henry-a chu a va pan a, Henry-a lah chuan alo la nuih vur vur zui a. Nathana chuan constable bulah chuan, "Chahbi minlo pe teh.." a ti vin tuar a, constable chuan rang takin a pe a. Nathana chuan cell chhung chu a hawng a, Henry-a chu a tlawh thal nghal tawp mai a. Nathana chuan a tham tho lawp a, bangah a nam bet a, "Sawi rawh anih loh chuan ka that ang che.." thinrim tak chuan ahan ti a. Henry-a chuan, "Min that rawh...min that mawlh rawh. Mahse min thah rual rual hian i nupui kha a thi ve nghal ang." tiin zam miahlo chuan a lo chhanglet a. Nathana chuan a hnek thal tawp a, a ban hliamah chuan a rah sak ta vak vak mai a, Henry-a na ti lutuk chu a t(r)e chel chul mai a. Rang takin SI Liantea nen kan tlan lut nghal a, Nathana chu kan dang vat a, mahse kan hnehlo hle mai. Nathana chuan Liantea nen chuan min lo nam sawn dawrh mai a, keiphei chu ke pali vawr thuau in ka thal tawp mai. Nathana chuan Henry-a chu na tak hian a chhuih pawp pawp a, "Sawi rawh..khawnge ka nupui?" tiin dim miah lo hian a sawisa vak vak mai a. DGP alo lut a, Nathana chu a va thelh a, "DCP..DCP duhtawk teh.." a ti lawm lawm a. Nathana chu lo hawi letin DGP chu a tin uai hman hial a, mahse DGP hmel a hmuh chuan a inbeng dai thei ta hram a. DGP chuan vin zet hian, "DCP Nathan, enge awmzia?" a ti a, Nathana chuan thinrim hmel tak hian, "Sir, hepa thiante hian ka nupui an kidnap a ni." a ti khur dar dar a. DGP chuan, "Enga? Sanvi an kidnap amaw?" a lo ti a. Nathana chuan, "Aw...vawiin tlai khan ina ka haw kha ka fanu Mary hi khumhnuaiah tap chungin hlau leh thlabar em em in a lo awm a, Sanvi an kidnap thu min hrilh a ni." a ti a, a mittui chu a tling teuh mai a, ka khawngaih hle mai. DGP chuan, "Enge awmzia? Engtin nge Henry-a thiante an ni tih i hriat theih a?" tiin a zawt a. Nathana chuan, "Min rawn phone a, Sanvi an kawl thu a sawi a, Henry-a chhuah turin min ti bawk a ni. Engti kawng mahin hepa hi ka chhuah lo ang." tih pah chuan Henry-a chu va hnek leh a tum a, DGP chuan Nathana chu lo dan pahin, "DCP in control hram teh." a ti a. Henry-a chuan a ban hliam dawm vawng vawng pah chuan, "Enge ka thiamloh awm a? I nupui chu tunge a nih pawh ka hre ve hleinem..enge min sawisak rikngawt a? Vawi 3 lai min kap a, chupawh duh tawk lovin min sawisa leh amaw?" a lo ti ve pang pang a. Nathana chuan, "Ila tawng ngam a nimaw?" tih pah chuan a va hnek thal leh tawp mai a, mahse DGP chuan Nathana chu nam sawnin, "DCP Nathan, khawngaihin in control rawh." a ti a. Nathana chuan rum zet hian Henry-a chu a melh a, Henry-a lah a hnar a thi phung tawh mai a. DGP chuan min rawn en a, "ASP, Nathana hi hruai chhuak rawh u." a ti a, Liantea nen chuan Nathana chu kan hruai chhuak ta a. DGP leh Henry-a chu an inbe mawlh mawlh a, an tawng ka hre pha chiah lo. Henry-a inla innocent hmel vel leh a mitmeng phakar zet chu ka ngei hle mai, va tlawh zawt a nia ka chak ni. Nathana chu thinrim tak hian a office ah a lut a, ka va zui lut a. Nathana chu a chair-ah chuan a thu a, "Hrep tak hian.." a ti nuah nuah a. Ka va pan hnai a, "Sir, lungngai suh..Sanvi chu kan hmu leh em em ang." tiin ka theih ang tawk chuan ka hnem a. Nathana chuan, "Ni e...ka insum zo hmanlo a ni. Henry-a sawn a hria, Sanvi kidnap tute hi a hre chiang khawp mai." a ti a. Keichuan, "Sir, keiman ka lo zawt fiah ang, nang chu tihian lo awm hahdam rawh. I insum zolo leh ang, Amandai pawh a awm a, Liantea pawh a awm a, lungngai reng reng suh." ka ti a, ka chhuahsan ta a.
DGP chuan a office ah min ko lut a, "Rinawm, engthil chiah nge thleng? Chiang deuhvin min han hrilh teh." a ti a. Keichuan, "Sir, tlaia kan haw kha Sir Nathana te ina len kawi zawk ka tum a, tichuan an inah chuan kan lut a. Mahse tumah an awmlo a, Sanvi kan koh vak vak pawhin a eih thei silova. Tichuan an nupa room ah chuan kan chho dun a, room chhung chu a hnawkin thawmhnaw te chu a let nuai mai a. Khum te chu a inchinglet nasa em em a, khum hnuaiah chuan Mary a lo awm a, tichuan Mary chuan Sanvi chu an kidnap thu min hrilh ta a ni." ka ti a. DGP chu a lu a bu nghauh nghauh a, "Anih leh Mary chuan engtin chiah nge a sawi?" a ti leh a. Keichuan, "Mi pathum lo lutin Sanvi chu an sawisa hrep a, tichuan an hruai bo ta daih a ni tiin a sawi." ka ti a. DGP chuan, "Anih phone call chungchang kha?" a ti leh a. Keichuan, "Nia...Sir Nathana phone kha alo ri a, mipakhat aw thum deuh hian Sanvi an kawl mek thu leh Henry-a chhuah turin Sir Nathana hi a rawn hrilh a ni." ka ti a. DGP chuan, "Umm....anih chuan Henry-a hi kan dawp deuh a ngai dawn a nih chu. Thil pakhat han ti teh, SI Liantea leh Amandai bulah Nathana lo call tu number chu trace turin hrilh la...NAthana erawh he case ah hian tel hrih suh se. A thinrim insum zolo hi a ri leh hlut ang tih ka hlau a ni, thil pawi zawk a thleng palh hlauh ange." a ti a. Keichuan, "Sir, khawngaihin he case ah hian min tel ve thei angem? Achhan chu Sanvi hi ka nau angin ka en a, Sir Nathana pawh ka unaupa ang mai ani a, an lakah hian bat ka nei ve in ka hria." ka ti a. DGP chuan, "Awle, ASP in theihtawp chhuah ang che u." a ti a. "Awle Sir." tiin salute ka pe a, tichuan ka chhuak ta a. SI Liantea leh Amandai te chu ka ko a, "He case hi kan pathum kutah a awm tawh a, DCP Nathana lo call tu number hi trace ula, keiin Henry-a ka lo dawp thung ang." ka ti a. Number dil tur chuan Nathana office chu kan pathum chuan kan pan a, DGP leh Nathana te chu an lo inhnial nasa mai a. DGP chuan, "Nathan, i hrethiamlo a ni...he case ah hian i tel ve a remlo alawm." a lo ti a. Nathana chuan, "Sir, ka nupui a ni a, ka nupui chhanchhuah chu ka mawhphurhna a ni dawn lovem ni?" a ti a. DGP chuan, "Nathan, i senior thupek che hi zawm hram teh...khawngaihin ka ngen a che." a tih takah chuan Nathana pawh chu a thaw hak a, "Yes Sir." a ti chuai raih mai a, ka va han khawngaih tak em. DGP chuan, "Mary hi haw pui la, kanlo buaipui ang. I tel ve dawnlo hrim hrim tihna a nilo, mahse tunah rih chuan i thinrimna kha tihdaih hmasak i mamawh a ni." a ti a. NAthana tap insum hmel chu hmuh hrehawm tak a ni, kan lo en thap mai a. NAthana chuan Mary chu a pawm a, "Haw tawh ang aw, Bawihte." a ti a. Mary lah chuan, "Apa, engtikah nge anu chu alo haw dawn?" tiin a lo la zawt zui a. Nathana chu a ngawi vang vang a, a mittui a khap per sak a, "Bawihte, alo haw leh vat dawn alawm." a ti a, kan hmel pawh a en duh lo, hnuailam bih reng chung chuan Mary chu a pawm chhuak ta a. Hmanah kha chuan ka thinrim insum zolo kha Nathana hian min dang hram hram zel a, kei chuan tharum hmanga chinfel zel ka duh thin laiin Nathana erawh chuan a thluak a hmang thung thin kha a ni a. Mahse tunah erawh chuan NAthana thinrim chu keimah zawkin ka dan a ngai ta mai chu a mak ngei mai, a fanu Mary lah kum 8 lek ala ni bawk si, ka khawngaih tak zet a ni. DGP chuan paper them hi min rawn pe a, "Hei hi Nathana rawn call tu number chu a ni e." a ti a, min chhuahsan ta nghal a. Number chu ka phone ah chuan ka save a, tichuan paper them chu Amandai ka pe a, "Tunah trace nghal ang che u, kei erawh Henry-a saw ka va buaipui thung ange." ka ti a. Nathana office atang chuan kan chhuak a, DGP chuan min rawn pan a, "ASP, hei ka nupui a damlo a, ka haw a ngai tlat mai. I kutah ka dah ania aw...ka haw phawt ange." a ti a, keichuan, "Lungngai suh Sir, ka chhuichhuak em em ang." ka ti a, DGP chuan min hawsan ta a.
Constable ho bulah chuan, "Henry-a saw interrogation room-ah hruai ula, ka lo kal vat ang." ka ti a, constable ho pawh chuan an hruai ta a. An rawn hruai phei pah chuan Henry-a chuan rum zet hian minla melh ve khanglang zui, keilah chuan, "Khanglanga.." tih pahin a mawngah ka'n pet hram kha, a eu zawk mai. Pawnah ka chhuak a, khua a thim tep tawh a, tlai dar 5 vel a ni tawh. Meizial chu phawrhin ka han fawp vang vang a, "Sanvi, khawnge i awm?" tiin keima hriat tawk lek chuan ka phun sap a. Anihna takah chuan Sanvi hi vai mah nise vai thing chi kan tih ang kha ani hauh lo ania, vai changkang tak a ni. Kei phei chuan vai ang pawn ka ngai tawh lo, kan sawi fo tawh angin mizo tawng hi chhete mahin a pai thak lo, mahse thil a chhiar hi chuan tlem chuan a pai ve deuh thin. Mizo tawng a chhiar thiam a, a ziak thiam bawk a, hun reilote chhunga India rama tawng hrang hrang zinga a har ber pawl Mizo tawng, a ni South Indian mi daih ina a thiam zung zung thei hi a fakawm thlawt a ni. Ft 5'5 vel laia sang a ni a, Inspector Amandai nen hian an inchen vel chiah chiah in ka hria. Min duhsak a, a unaupa ang maiin min en a, ka harsatna ah te pawh min pui nasa thin hle. An mahni tawng (telugu) te hi min zirtir nasa ve thei em em a, mahse tun thleng hian chhete mah ka thiam thei chuang lo. He case hi ka kuta awm a nih angin chhuichhuah ngei ka duh a, ka chhuichhuak ngei bawk ang. Meizial chu ka zu zo a, tichuan interrogation room lam chu kan pan phei ta a. Room chhung ka luh dawn chiah chuan ka phone a rawn ri a, Nathana a lo ni a, "Hello, Rinawm...engtik velah nge ilo haw theih ang?" a rawn ti a. Keichuan, "Ka hrelo Sir, zan thleng pawh ka awm tlang a ngai maithei a ni." ka ti a. Nathana chuan, "Rinawm, puih in ngaih chuan ka awm reng a nia aw.." a ti a, ka van khawngaih tak em. Zaidam tak chuan, "Sir, lungngai suh...lo in enkawl tha rawh, Mary kha lo veng tha la, theihtawp ka chhuah dawn alawm." ka ti a. Nathana chuan, "Henry-a khan engkim ahria, engkim ahre vek. Zawt la, dawp char char rawh u. A tul chuan a ban ruh te kha vuak tliah sak mai rawh u...DGP in a hauh che pawn Nathana'n ti rawh u a ti in ti mai dawn nia." a rawn ti lawm lawm a, a mangang hle a ni. Keichuan, "Awle Sir, hei ka zawt dawn mek e." ka ti a, phone chu ka dah ta a. Room chhungah chuan ka lut a, Henry-a chu ngawi rengin alo thu a, a maimitchhing vel nia mawle. A hmaah tak chuan ka va thu a, "Henry.." tiin ka han ko a, mahse min chhang duhlo. A maimitchhing reng tho a, "Henry, ka biak che chu i hrelo mi?" ka han ti leh a, ala meng chuanglo, min la chhang chuanglo bawk, ngêng tak a ni. Vin lek lek hian, "Luhlul kual vel lo teh, ka khawih hreh miahlo che a nia." ka ti a, ala ngawi char char tho. Ka insum zolovin ka khawih ve hrep ang tih chu ka hlau a, ka kut ka hum ruh a, insum a har ngei mai. A mizia chu ngeng tak a ni, a la maimitchhing char char tho a, a awm ngaiin a la awm reng. "Enteh Hmela, nang aia luhlul hi mitam tak ka buaipui tawh, ka kutthlak inchhirlo an awm ngailo ania, na i tawrh belh duh em ni?" ka han ti leh a. Zawi muang hian a rawn meng a, min nuih suk ringawt a. Thutthleng nghenchhan chu muangchang hian a ngheng ar ar a, a thaw hak a, mahse ala tawng chhuak duh chuanglo. Rum zet hian ka melh a, "Henry, khawnge Sanvi a awm? A kidnap tute pawh kha i hmelhriat te an ni tiraw?" tiin ka han zawt leh a. Hmuhsit hmel zet hian min melh a, min chhang lem chuanglo chuan a lu a thing ringawt a. Ka dawhtheihna in a tlin ta lo, na em em hian ka beng hawi sawk mai a, na ti hmel pawn a lang lo, a nui vur vur ringawt. Chutah muang chang hian mi rawn melh a..
"Umm...enge i sawi duh a?"
"Henry, khawnge Sanvi?"
"Tunge Sanvi chu?"
"DCP Nathana nupui, i thianten an kidnap kha...khawnge?"
"Ka thian te maw? Tu ka thiante maw?"
"Luhlul kual vel lo teh...tha takin min chhang mai rawh."
"Ih e ASP, Sanvi chu mizo nge vai?"
"Chutiang i hriat a ngai lo, ka zawhna che chu min chhang la a nimai."
"Chuti chu engmah i hriat ve a ngai biklo."
(Ka maimitchhing vang vang a, ka va khawih hman teuh em!)
"Awle....mizo a nilo. A tawk em? Min chhang tawh rawh le."
"Enteh ka pu, Sanvi chu tunge a nih ka hrelo. Chuan...ka thiante chu tu ka thiante ber nge an nih ka hrelo..thian tamtak ka nei ve alawm."
"Anih tak chu....khawi venga awm nge i nih?"
"Aizawl ami ka nilo...keichu khawdang atanga lo kal ka nia."
"Anih leh khawi khua nge i nih? Tunge i nu leh pate?"
"Ka hrilh nachhan tur che ka hrelo."
Ka insum zo tawh lo, a thutna chair nen chuan ka tlawh thal tawp a. Bangah ka nam bet a, "Zawnga, na tawrh belh i duh em ni?" ka ti a, hlauh ahnekin min nuih vur vur mai. Zam hauh lo chuan min melh a, "Insual ah pawh min hneh mang silo, hliam ka tawrh veleh i inla huai leh viau si, nep lutuk." minla ti zui. Ka thinrim lutuk chu ka puak keh lo chauh tawh a ni, ka hnek thal tawp mai a. Chutah muang chang hian a rawn tho a, rum zet hian min rawn melh a, "Tikhan in hrethiam tawh em? Inla inchhir ang ka tih kha...tunge ka nih hi in hrelo a ni. Drugs ka zawrh te hi maw...midang drugs zuar ang mai mai ka ni velo. Dealer ka nei thlap a, sumdawnna lian tak a ni asin. Min tihbuai hma khan ka vau lawk tawh che a, mahse ka thu i awih lova. Ka thil tih theih zia hi tikhan i hrethiam tawh em? Keite chu lo hralh chhuaktu pakhat ve mai chauh ka nih hi, kei aia thu zawk te, ka boss te phei chu kei ai hian thil an ti thei zawk tih hre rawh. Ka boss te chuan min man tih hi an hre nghal tawp mai ani, phone in ka hrilh lo, news ah pawh an puang hek lo, mahse an hre tawp mai a ni. Chutiang khawp chuan information hi a chak asin...nangni Police Officer satliah mai mai hian min inpuan tir theih in ring a mi? Phuba chu ka la ve ta a nih hi...mi satlaih ka nilo, mi hlauhawm tak ka nih hi. DCP nupui kidnap tute pawh kha ka boss te an ni, ka thiante nilovin. Aizawl khawpuiah hian thiante ka nei lo, Johnny-a te unau pawh saw ka thiante an nilo, ka customer te ve mai chauh an ni. Ka boss te pawh hian DCP Nathana te in hi an hre nghal tawp thei a, an zawng kual lemlo. Chuvang chuan kan hnathawhna ah hian lo inrawlh ngam an awm ngailo, police officer tamtak te hi an hna atangin kan ban tir hnem tawh asin." a ti ta phiar phiar mai a. Sawi tur pawh ka hre lo, mak ti em em chuan Henry-a chu ka en tlawk tlawk ringawt mai ani. Henry-a bawk chuan, "I hlau ta em ni? Ka nihna ka sawi meuh chuan i hlau ta em ni?" a la rawn ti ham ham zui. Rum tak chuan ka melh a, "I inpuang ang, i inpuang khawp ang. I inpuang lo a nih chuan ka that ang che...ka that hreh lo che." ka ti a, mahse a hlau hlawl lo, a nui vak vak a. Chutah thinrim hmel em em hian min rawn melh a, "Min that ang maw? Min that ta che...min that rawh. Ka thih thu hi ka boss ten an hriat rual rualin Sanvi chu an that ve nghal ang. Ka vau che a nilo, thil awmdan tur ka sawi zawk ani. Ka boss te hian hman atang tawh in ka hna thawh that avangin ka duhzawng engkim min tihsak a, nula pawh nise, pawisa pawh nise, damdawi ruih tur, zu leh thildang ka mamawh engkim min pe vek thin. Chuvang chuan an tana thih te chu ka inpeih reng, a pawi ka tilo..ka duh chu ka hmu hnem tawk tawh. Mahse ka thih thu hi an hre ngei anga, DCP nupui chu a thi ve nghal ang. Kan sumdawnna chungchang ka hrilh che hi i duh phawt chuan i puangzar thei ang, a hre hmasa ber tute chu ka boss te tho an ni dawn. An hria anga, Sanvi chu an that nghal ang. Mahse thil chiang deuh pakhat chu maw...Sanvi an thah hma hian an duh tawkin an pawngsual rawn phawt ang." tih pah chuan a nui huah huah mai a. Ka thin a khei ta zak mai, ka insum zo tawh ngang lo a ni. Ka hnek thal tawp a, "An pawngsual ang maw? Ka unaunu chu i boss te chuan an pawngsual anga maw? An kut hmawr pawhin an khawih lovang...chu chu hria ang che." tih pah chuan ka chhuih zui hrep a. Vawi 20 vel ka chhuih hrep hnu chuan keipawh ka hah hial thei a, Henry-a chu muangchang chuan a rawn tho chhuak a, a ka chhunga thisen chu a chhak pherh pherh a, min rawn en a, ala rawn nui leh hram a. A zi mar vel te te a, "In tihtheih awmchhun lah hi a tlem sia tiraw? Min sawisa a, min dawp a, ka chhang duh silo che u a, min sawisa leh a. A boring ta khawp mai, min chhuah ve hle hle ula, engkim a fel nimai tur. Anih loh chuan min that law law mai ula, DCP nupui nen pialral ah kan lo innei ve thung dawn lawm." a la ti ham ham mai a, awm ngaihna pawh ka hre tawh lo.
Ka thinrim insum zo lo chuan ka that mai dawnin ka hria a, inngaituah fim phawt ka ngai a ni. Room chu chhuahsan rih mai ka duh ta a, ka chhuah hma chuan vawikhat ka tlawh thal leh hram a, ka haw em atin ni. Ka office lam ka pan a, ka vei kual sek ringawt mai. Zan dar 8 a ri ta der mai a, Henry-a erawh interrogation room ah a la awm reng thung. Constable pakhat alo kal a, "Sir, ka lo lut thei angem?" a rawn ti a. Keichuan, "Lo lut rawh." tiin ka lo chhang a. Constable chuan, "Sir, Henry-a sawn a ril a tam thu a sawi reng ania." a rawn ti a. Keichuan vin zet hian, "Lo tam mai mai ang hmiang, duhleh tam hlum hmak se a ni mai alawm." ka lo ti vin vak mai a. Constable chu inthlahrun hmel deuh chuan a chhuak a, thutthlengah chuan ka thu hnawk a, ka mangang a ni. Ka ngaihtuah chiang a, Henry-a lakah hian tun dinhmunah hi chuan tlawm hrih a ngaiin ka hre ta a, a luhlulin a ngeng em em si a. Thih a hlau der mai silo, a inpuanna tur khawpa hrem chu ka thiam a, mahse DGP thulo chuan engmah ka ti ngam bawk silo. Henry-a hi riltam a ka dah reng chuan a thinrim anga, Sanvi chu a boss te chuan anlo that mai ang tih ka hlau bawk si. Constable chu ka ko leh a, "Canteen-ah sawn fried rice plate 1 va lei rawh, chuan Henry-a chu i ei tir dawnnia." ka ti a, tichuan constable pawh chu a kal ta a. Dar 8:30 velah chuan Amandai leh Liantea an lo thleng a, ka office ah lo lutin tlangval la naupan hmel tak pakhat hi an lo hruai lut a. Amandai chuan, "Sir, hepa phone number hi alo ni a. Mahse a phone chu nizanah a tihbo thu min hrilh a." a rawn ti a. Keichuan, "Lo thu teh le, Mama." ka ti a, chupa chu a thu a. A zam hmel kher mai, "Tunge i hming?" tiin ka zawt a. Chu tlangval chuan, "Sawmtea ka ni e." a ti a. Keichuan, "Sawmte, i phone chu engtin nge i tih bo?" ka ti a. Sawmtea chuan, "Ihmaw...nizanah ka inkhawm a, ka phone pawh ka keng ngei tih ka chiang. Mahse ka haw leh hnu khan ka hmu ta miahlo a, ka zawn vak vak pawhin ka hmu chuang miahlo a. Tichuan Biak Inah pawh ka va let leh a, ka la hmu chuanglo. Ka thutna bul te, Hlabu dahna te chu ka en kual a, ka thutna tlar chauh lo pawh, tlar dang te pawh thutthleng hnuai te nen lam ka zawng vek a, ka hmu chuanglo. Ka beidawng a, ka haw a, phone neilova awm hrih mai chu ka tum ta a, tihngaihna dang a awm chuang silo. Tichuan zanin khan police te hi anlo kal a, tihian min rawn hruai tawp a ni." a ti a. Keichuan, "Nihleh inkhawm naah chuan i bulah tunge thu?" tiin ka zawt a. Sawmtea chuan, "Ka thianpa athu a, a ni chu a nilo tih ka chiang. Achhan chu kan ban dawn hnaih pawh khan ka ipte ka dap a, phone chu ka la ak a ni." a ti a. A phone erawh chu kan hmulet chuang lo a, mahse a phone number kan trace-na lamah amah Sawmtea number ngei a ni tih hi ka hre thei mai chauh a ni. Sawmtea pawh chu a tangkai dawn lemlo, ka haw tir leh ta tawp a. Interrogation room lam ka pan leh a, Henry-a chuan a ha alo kher mual mual a, min hmu chu min la nuih vur vur leh ta nghal a. A bulah chuan ka va thu leh a, "Enge i duh?" ka va ti ringawt mai a. Henry-a chuan thawk huai pah chuan, "I hriat kha...min chhuah mai rawh." a ti a. Keichuan, "Chhuah tawp tur che hian thu neihna engmah ka nei ve lo, Henry." ka ti a. Henrya chuan a lu a han dawm vawng vawng a, "Hei tak hi lawm buaithlak chu....in inla rinawm vel thei lutuk a, DGP bulah i dil mai dawn alawm." a la ti ham ham zui.
Chutih lai chuan Amandai a lo lut a, "Sir, DGP a lo kal a." a rawn ti a, ka ding a, ka chhuak tur chiah chu Henry-a chuan, "ASP, chuu...DGP pawh alo thlen tawh chu, dil nghal law law rawh aw.." ala rawn ti hram a. Mahse ka chhanglet vel peih tawh lo, ka chhuahsan ta a. DGP chuan min hmuh veleh chuan min rawn pan a, "Hmasawnna a awm em?" a rawn ti a, ka chhang mai theilo. Henry-a'n a nihna diktak te, a boss ten Sanvi an kidnap a ni tihte chu DGP hi ka hrilh angem? Nge hrilh lovang? Ka hrilh a nih chuan DGP hian engtin nge a tih ang? Henry-a hi eng ang pawhin dawp mah ila a inpuang dawn chuang bawk silo, ka case a ni miau a, keimah ngeiin ka chingfel tho tho ang. DGP chuan, "Hmasawnna a awm em ka tih chu..ASP, a inpuang tawh em?" a ti leh a, "Aih inpuang lo." tih ringawt chuan ka chhang ta a, ka hrilh hrih lo phawt mai teh ang. DGP chuan, "Anih number neitu chu in hmu tawh em?" a ti a. Keichuan, "Aw Sir, tlangval kum 20 mi vel a ni a, a phone chu nizanah a tihbo thu a sawi a, a phone pawh chu khawnge a awm kan hre chuanglo. A number neitu a ni tih chiah kan hria, phone lah chu kan call pawh in OUT OF SERVICE a inti zel a, simcard chu an tichhia a nih ka ring." ka ti a. DGP chuan, "Khawnge Sawmtea chu?" a ti a, keichuan, "Ka haw tir rih...a chhungte number pawh kan la tho a, SI Liantea'n a thlah mek." ka ti a. DGP chuan, "Khawnge Henry-a chu a awm?" tiin min zawt leh a. Keichuan, "Interrogation room ah." ka ti a, DGP chuan, "Hawh teh, iva kal dun teh ang." a ti a, kan inzui phei ta a. Henry-a chuan DGP a hmuh chiah chuan ahmaa a mizia zawng zawng chu a thlak leh ta vek mai, innocent hmel em em hian a han awm leh vela, ka va han sawisa chak tak em. DGP chu abulah ava thu a, "Henry, engvangin nge i zep tlat a? Inpuang mai rawh...i tan a tha zawk ang." a ti a. Henry-a chuan, "Ka pu, engmah ka hrethiamlo a ni. DCP lo phone tu pawh chu tunge a nih ka hrelo, han rin tur pawh ka hrelo." a han ti kual leh vel chu ka va han haw tak em. A awmzia chu Henry-a hian a thil min hrilh zawng zawng te kha DGP bulah hian ka sawi ngam dawnlo tih a hrelawk vek tihna a ni. DGP chuan, "Hlauh i nei a ni tiraw? Tumah hlau suh, sawi mai rawh...i himna zawk tur a nih chu." a ti leh a, Henry-a chuan, "Thil thleng hi a awmzia ka hrelo a ni ka pu, min man chhan chu drugs ka hralh thin vang a ni tih ka hria, chuan ka zep lo. Johnny-a te unau hnenah khan ka hralh thin a, min man nachhan pawh hi ka sawisel lo, thilsual ka tih vang a ni. Chumai bakah min mantu police te kha ka lo beilet a, tichuan an pistol-i'n min kah phah ta hial a, mahse chung zawng zawng pawh chu ka pawm vek. Thil ka tisual a, min man a, ka hria e. Mahse DCP nupui Sanvi chu tunge a nih ka hrelo a ni, hei kher hi chu inrawlhna ka nei ve tawh lo." a han ti kual vel phei chu...DGP kha chu awmlo se ka khawih nasa khawp ang le. DGP chuan, "Anih leh khawi veng nge i nih?" a ti a, Henry-a chuan, "Dawrpui Vengthar ah ka awm a, mi in ka luah a." a ti a. DGP chuan min rawn en a, "Rinawm, an veng awmna leh an in awmna engmah ilo zawt nange?" tiin min rawn melh a. Min hrilh duh loh thu chu sawi ka duh hle mai, mahse chutia DGP chuan ka lam a rawn hawi lai chuan Henry-a chuan rum zet hian min rawn melh a, a phun sap a, a hmuiphun ka en atang chuan ,"SANVI." a rawn ti tih chu ka hai lo. Hreh tak chung chuan dawt ka sawi angai ta, "Ni e,Sir..ka lo theihnghilh a ni." ka ti a.
DGP chuan vin lek lek hian, "Chutiang mai mai te chu nachang hriat ve tur alawm, ASP i nih kha...i thianpa Nathana a awmlo a, i buai zo vek anih ber kha." min ti ta hrep a, ka rilru ana angreng hle mai. DGP chuan Henry-a bulah chuan, "Drugs i zawrh ho chu khawia mi nge i neih?" a ti a. Henry-a chuan, "A hma chuan addict satliah ve mai ka ni thin a, mahse damdawi ka tih tak zel atang chuan ka zuar ve ta a. Ka neihna thin hian a hming hi a sawi duh ngailo a, inhmuhna tur hmun a sawi a, tichuan ka lo leichhawnsak teuh ta thin a ni." a han ti vel a, ava han daw peih tak em. DGP chuan, "Mahse phone i nei silo a, khawnge i phone?" a ti a. Henry-a chuan, "Ka hre tawh biklo, nimin chhuna ka insual naah khan ka thlauh bo aniang, Police Station lama min hruai lai pawh khan ka phone chu ka hmu tawh lo." a ti a. DGP chuan, "Anih chuan tunah hian Inspector Amandai leh SI Liantea ten i inluahna lam chu an panpui che anga, tlanchhuah tum hlek suh ang che." a ti a. Henry-a chuan, "Awle...ka tlanchhuak lovang." a han ti vel a, a chak dawnlo khawp alawm, hepa hi chu. DGP chu a ding a, rumzet hian min melh a, "ASP, i mak khawp mai. Darkar engemaw zah i dawp tawh hnuah pawh an veng leh a in awmna pawh zawh nachang ilo hrelo a. Achhan i hre duh em? DCP Nathana i ring leh lutuk a, i ring laklawh a, a tello chuan i buai zo ta a nih hi. He case atang hian inthiarfihlim mai rawh, Amandai leh Liantea ten chhunzawm mai rawh se." a ti ta mai a. Inthlahrung tak si hian, "Sir, chutin ti lul suh. Ka tiam ache, ka chhuichhuak em em ang." ka ti a. DGP chuan, "ASP, ka ring zo hrihlo che a ni. Ka lo thleng a, an veng leh a in awmna ka zawtchhuak ve chauh a ni a, hetiang reng te chuan a hahthlak emai. Hna chhete pawh i thawk tha theilo ania, he case hi i kutah a awm ve tawh lo." a ti a, ka mangang hle mai. Ka sawichhuah chuan Sanvi nunna atan a hlauhawm thei bawk si a, mahse ka sawilo a nih chuan he case atang hian min ban dawn bawk si, "Sir, DCP Nathana tello pawhin hmanni lawkah Champhaiah pawh case pakhat chu ka han chinfel kha.." inthlahrung tak chuan ka han ti a. DCP chuan, "Chutiang chhuanlam a tling lo, min hnial suh....ka thusawi chu zawm mai rawh." a ti a, duhthlan tur dang ka nei ta lo, "Ka tihpalh a ni Sir, awle...i thu ang zelin le." ka ti ta ringawt mai a. DGP chuan, "Haw tawh rawh, abak chu Amandai leh Liantea kut a ni tawh." a ti a, min chhuahsan ta daih a. Ka chhuak ve tur chiah chu Henry-a chu a rawn faifuk rat rat a, ka va hawi phei a, minlo nuih vur vur lehnghal a. Rum zet hian ka melh tlawk tlawk ringawt a, Henry-a chuan, "Darkar 24 hun ka pe ang che, min chhuahlo a nih vaih chuan Sanvi chu theihnghilh rawh..a thi angah ngai rawh." a rawn ti a. Keichuan zawi sap hian, "Engtikah mah ka chhuah lovang che." ka ti a, ka chhuahsan ta a. Zanin zet zawng, ka tlawm ngei mai. Nathana te inah chuan ka peng kawi a, Nathana chuan kawngka a lo hawng a, a tap zo hlim tih hriat tak chuan a mit a sen rum mai a, "Lo lut rawh." tih ringawt hian min chhang a, a room ah chuan min chhoh san leh daih a. Ka zui chho a, a roomah chuan ka lut a, zu alo in chu niin. Mary erawh chu tui takin a muhil a, Nathana chuan a han thli leh karh karh a, tui a pawlh a, a tlak pap a, meizial chu a zu khu hluah hluah a.
Min rawn melh a, "Ehe....sorry aw.." tih pah chuan a khum bula pawhdawh atang chuan no pakhat hi a phawrh a, ka hmazawnah chuan a rawn dah a. Zu chu a thli a, "In hnem lutuk suh aw, ka thlah haw thei dawn biklo che a nia." a ti a, ngawi reng chuan ka en ringawt a. Zu chu tui min rawn pawlh sak thlap a, tichuan ka in ve ta mai bawk a. Rilru na ve ve kan ni a, mahse kei ai chuan a rilru natna chu a nasa zawk. No thum vel ka in hnu chuan ka hai ve ta chhak mai, "Sir, engkim ka hrilh ang che." ka han tih chuan mi rawn melh hru mai a, a mitmeng chu a hring nghulh mai a, a mit ko vel erawh a sen vek thung. Hriat chak hmel tak hian, "Engthil nge?" alo ti vat a, keichuan, "Lo ngaithla rawh.." tih pah chuan engkim chu ka hrilh ta vek a. Ka hrilh zawh hnu chuan a ngawi vang vang a, "Rinawm, ka rindan vel chiah a ni. Ka hlauhthawn ang ngeiin thil chu a thleng ta a nih hi...mahse zaninah chuan engmah tih theih a awm tawh hrih lo, haw phawt la, naktukah rilru fimin kan ngaihtuah dawnnia." a ti a, tichuan keipawh chu ka haw ve ta a. Atukah chuan hma takah Nathana te in lam chu ka pan a, ka day-off a ni bawk a, case atangin kan DGP in min ban bawk nen, a ruka Nathana nena kan chet chhuah mai angai dawn a ni. Nathana chuan an in bulah minlo nghak reng tawh a, a bulah chuan Mary alo awm bawk a. Mary chungchang hi ka'n sawi lawk teh ang, a chanchin chu in hre tawh tho nangin, kum 8 lai chu ni ve tawh mahse naupang kum 6 mi lek ang mai hian ala â ve em em a, a pangchangin a rilru pawh ala naute hle bawk. Chuvang a nia kum 8 lai ni ve tawh mahse a nu Sanvi hian a puak phawt loh chuan a muhil duh ngailo. Naupang duhawm tak leh chum biang mai hi a ni a, a hmel tha reuhvin vai a ang lek lek a, Sanvi fanu tak tak amaw an ti fo reng a ni. Nathana chuan, "Rinawm, Mary hi in in lamah i nu ten lo awm hrih mai rawh se...hna kan thawh angai dawn sia." a ti a, keichuan, "Um...pawilo." ka ti a, tichuan kan inlam pan chuan kan kal ta a. Kan inah chuan Mary chu kan dah a, Mary pawh hi kan inah a tlangnel ve tawh tho bawk a, a duh ve mai bawk a. Tichuan Nathana nen chuan carah chuang dunin kan kal chhuak ta nghal a, kan tlan pah chuan, "Khawnge kan kal dawn?" ka ti a. Nathana chuan, "Sawmtea te inah." a ti ta daih mai a. Keichuan hrethiamlo takin, "Ehe, Sawmtea te inah daih maw?" ka ti hu mai a. Nathana chuan, "Um...ka ringhlel a nilo, thil zawh ve hrim hrim ka duh a ni." a ti a. Keichuan, "Sir, DGP hian a hre hlauh ange aw...min suspend dun chiang viau ang." ka ti a. Nathana chuan, "Min suspend mai mai teh se, min suspend te chuan tuma thuhnuaia awm lovin kan duh duh danin hna kan thawk thei tihna a nimai alawm. Mahse zeplo chuan min suspend chu ka hlau angreng, suspend ka ni zing tawh bik si." a han ti leh hnuhnawh a, a pawr reilo phian bawk sia, hahthlak thin mange. Sawmtea address hi nizan khan Amandai'n min hrilh a, chuvang chuan an in awmna lai pawh ka hriat phah a ni. Sawmtea te in chu kan han lut a, a nu leh pate bulah chuan police kan nih thu te, a phone bo ta number vanga kan buaina kal zel chungchang te chu kan hrilh a, anu te chuan kan hruai chhuah chu an phal ve ta mai bawk a, Station lama hruai phei tur angin kan insawi a ni.
Nathana chuan hmun fianrial ve tak ah hian motor chu a park tha a, tichuan Sawmtea chu thu a zawt fiah ta a. Mak ka tih deuh chu Sawmtea hian lungphur a kai amawni...a in hiat neuh neuh reng mai.
"Sawmte, i phone bo dan kha chu ka lo hre tawh a...inkhawm naah khan i bula thu kha tunge i tih khah?
"Rinzuala, ka thianpa."
"I ringhlel miah lo maw?"
"Aw...ringhlel lo...achhan chu ka phone kha ka la ak ngei alawm, kan ban dawna pawn kan chhuah thleng pawh khan."
"A nih chuan, in inkhawm bang a, pawn in chhuah thlengin i phone ila ak tih chu i hria a, mahse tinge i haw leh hnua i phone a bo tih i hriat khan, Biak Ina i let leh khan, i thutna lai vel kha i en leh kher a? Ka sawi awmzia chu i thutna vel ah khan i zawng a, mahse i thutna velah kha chuan a awm dawnlo tih chu nangpawn i chiang reng a, achhan pawh in inkhawm bang pawna i chhuah pawh khan ila ak tih i inhre sia, enge awmzia?"
"Ahh..ih..nia, englo....ka ui lutuk kha ka hamhaih a ni ber mai, a awm dawnlo tih hre reng chung khan a tawp lamah beidawn nan hrim hirm tiin ka va zawng leh tawp a ni."
"Umm..a nih tak chu. Anih leh hei....i phone number atang hian tu emawni chuan min rawn vau chiam mai a, kan call leh pawhin a tlang thei tawh silo a. Nangmah chu i nilo takzet ang tiraw?"
"Aih..teuhlo, ka ti tak tak ka pu...ka phone chu ka sawi ang khan a bo a, chuan a thar lei a, ka sim-card pawh renew leh ka tum a, chutiang vel ka ngaihtuah lai tak chuan nizan khan police te kan inah anlo kal a, min rawn hruai ta ringawt a ni."
"Ummm..nihleh an lo hruai chhan che kha an hrilh che em?"
"Ummm hrilh e...mahse ka pu, engmah ka hre lo tak tak. Tunge Johnny-a leh Muantea te pawh chu ka hrelo a, tunge Henry-a pawh chu ka hrelo...engmah ka hrelo hrim hrim."
Nathana chuan a lu a bu ngat ngat a, "Ummm anih tak chu.." a ti zawi sap a. Vawi lehkhatah Sawmtea chu Nathana chuan na em em hian a hmaiah a beng ta siah mai. Sawmte chu a hawi sawk mai a, hlauh hmel em em hian NAthana chu a melh a. Keipawh ka phu zawk nghe nghe, a awmzia ka hre biklo. Nathana chuan Sawmtea kawr awma tham pah chuan, "Tunge Johnny-a leh Muantea chu? Tunge Henry-a chu? Engtin nge an hming ilo hriat ve ngawt a? Mawhh...sawi rawh..tuman kan misual man te kha an hming kan hrilh lo che..engtin nge ilo hriat ve sawi rawh?" a ti ta phiar phiar mai a. Sawmtea chu a tap nghal pur mai, "Ihhhh...englo...ASP hian min hrilh." a la ti zui. Keilah pek chuan Nathana ban chu vai kiangin Sawmtea hmaiah chuan ka han beng ve leh thuai a, a kawr awmah ka tham ve leh a, "Engtik laiin nge ka hrilh che? Awihawm loh lutuk.." ka ti a, a tap pur mai. Sawmtea chuan thaw hlawp hlawp hian, "Niii..nizana minlo hruaitu hmeichhia leh mipa te khan min hrilh." a han ti leh a, ava awihawm tawhloh tak e awww. Nathana chuan, "Rinawm, Amandai phone la, han zawt chhin teh." a ti a. Sawmtea chu Nathana bulah chuan ka nam phei dawrh a, Nathana chuan motor ah chuan a nambet a. Amandai chuan, "Hello Sir, enge ni ta?" a rawn ti a. Keichuan, "Amanda, nizana Sawmtea in rawn hruai dawn khan...Johnny-a te unau hming te, Henry-a hmingte kha in hrilh em ni?" ka ti a. Amandai chuan, "Tumaw? Sawmtea chu maw? Engmah kan hrilh lo, kan DCP lo vautu an awm a, i number atangin ania...kan ti ringawt alawm. Ngatinge Sir? News a awm em ni?" a rawn ti a. Keichuan, "Aaaa..awmlo, ka hre duh mai mai..nih phawt le." tih pah chuan phone chu ka dah a. Sawmtea lam ka va hawi leh a, a lo tap pur tawh mai, a hlauthawng hmel chu hmu ve ula, chhia in ti ve tho ang. Nathana chuan, "In in atanga kan hruai chhuah che atang daih tawh khan i awmdan hi a diko, i inhiat neuh neuh a, i ha i thial ri leh zeuh zeuh thin bawk. Hei hi damdawi ti thinte awmdan a ni, sawi rawh...khawnge ka nupui a awm?" tih pah chuan a beng hawi leh sawk mai a. Sawmtea chuan, "Ka hrelo...ka hre velo. Kan boss ten an kawl mek a, an awmna ka hre ve lo." a ti a. Nathana chuan, "Tunge in boss hming chu?" tiin a vin leh khur khur a. Sawmtea chuan, "Kan hotupa ber chu Victor-a a nia, ka phone pawh nimin piah khan min laksak a, chuan police ten min rawn man dawn tih pawh hi a sawi lawk a, in bula dawt sawi dan tur pawh min hrilh lawk vek a ni." a ti a, a inhnit feih feih a. Nathana chuan, "Tunah in boss chu phone la, inhmuh i duh thu sawi rawh." a ti a. Sawmtea chuan a phone a, tichuan inhmuh a duh thu chu a sawi a. Nathana hian an inhmuhna hmun tur pawh chu a hrilh a, chu hmun chu khawidang mah nilovin, kan Station bula School tlang bawk kha a ni. Tichuan tlangah chuan Victor-a te chu kan lo nghak ta a, darkar 1 zet kan nghah hnu chuan anlo thleng ve ta. Thingkung phenah chuan kan biru a, Sawmtea erawh an hmuh theih turin tualzawl lai takah kan din tir a. Tichuan motor pakhat hi a rawn tlan a, Sawmtea bulah chuan a rawn ding chat a. Motor atang chuan mi pali anlo chhuk a, eeeeekhai, palian hlawm tak an ni.
Sawmtea chu an rawn pan a, an zinga palian ber, ft 6'2 vel laia sang a ni ngei ang. An boss ber, Victor-a ngei mai chuan, "Enge a Sawmte? Inhmuh i duhna lai ber hi Police Station bul lawk a ni lehnghal. Police ten min hmu ange?" a ti a. Nathana chu thingkung phen atang chuan a kal chhuak a, "Kan hmu nghal che u....nang hi maw Victor-a chu?" tih pah chuan Victor-a chu rum zet hian a melh a. Victora chu a phu zawk mai, Sawmtea a melh leh a, "Mawla, ka hlauh ang ngei ngeiin maw? I chet buai kha ka ring reng a ni." a ti nuah nuah a. Kei pawh chu ka va pen chhuak ve ta a, "Victor, i game khelh chu a tawp ta e...man i ni e." ka ti a. Nathana nen chuan pistol kan phawrh a, Victor-a te chu kan tin a. Victor-a chu a nui huah huah a, "DCP Nathan, phone atang kha chuan min rawn cho viau a nilawm ni..tinge silai hman i tum tak mai a? Ava dawihzep thlak ve.." a ti ham ham a. Nathana chuan, "Victor, ngawi chipcham rawh, khawnge Sanvi a awm? Min hrilh loh chuan i thluak hi ka kap darh vek ang." a ti a. Victor-a chuan thinrim zet hian, "Kap la, min kaphlum ta che....min that a nih chuan i nupui Sanvi hi i hmu let leh tawh lovang." a ti khur khur a. Nathana chuan, "Anih leh enge i duh?" a ti a. Victor-a chuan, "Sawmtea kha hetah lo kal tir rawh." a ti a, Nathana chuan Sawmtea chu a kal tir a. Victor-a chuan Sawmtea darah chuan a beng thak thak a, "Sawmte...apawi lo, ka ngaidam che. Engtikah mah i tisual leh tawh dawn lo tih ka hria alawm, achhan chu maw...tisual leh turin he khawvelah hian a i awm tawh dawn silo." tih pah chuan Sawmtea lu chu a man bet thut a, ri tuar khawp hian a ringruh a herh tliak ta mai a. Sawmtea chu a thal tawp a, a thi chiang hle. Nathana chuan vin zet hian, "Zawnga.." ti a silai hmeh puah a tum chiah chu Victora chuan, "Hey...DCP, i ngam chuan han kap teh...i nupui pawh i kap hlum tel angah ngai rawh." a ti khur khur mai a. Nathana chuan, "Enge i duh? Sawi ta che.." a ti a. Victor-a chuan, "In silai kha paih rawh u, mipa te chu...insual ila." a ti a. Nathana chu ka bulah chuan a rawn tawlh phei hrut hrut a, zawite hian, "Rinawm.....i ngam em?" a rawn ti su su a. Keichuan, "Ngam deuh tho, mahse huphurh ve det." tiin ka lo chhang a. Nathana chuan, "Nia, Brock Lesnar-a pawh kha a chak ropui sia, hemi te phei hi chu amah aia lian hlir anni lehnghal sia.." a tih lai chuan Victor-a chuan ring zet hian, "Hey....enge in inhrilh ruk sur sur a, phakhar chhuah intum animaw?" a rawn ti lauh lauh a. Nathana chuan, "Lawk aw..." a ti a, zawi te hian, "A tlawmngaih thlak ve deuh alawm...ti teh, Indonesian kick boxer te pawh kan hneh kha maw, kan hneh em em ang." a ti a. Mahse ka ngam chiah lo a ni, "Naa Sir, khatih hunlai te kha chuan kanla naupang deuh a, tlangval thazat lai a nia.." ka lo ti nung nung a. Nathana chuan, "A ho lutuk, tunah pawh tlangval tho alawm ila nih...hawh teh, ka nupui tan, mipa takin, insual pui teh ang." a ti a, ka remti ve ta a. Silai chu kan paih a, an chhar theihloh nan hla tawkah kan vawm bo daih nghe nghe kha, ka ui angreng khawp mai. Tichuan kan han insual ta aleeee...kan ti fuhlo deuh hret chu a ni. An han chak zia chu, ka in thal chhawk reng mai a, kan in t(r)e rinsiak hi a ni ber mai. Drugs tih hi chakna a ni hial lo maw le ka ti hman hial a, keiphei chu ka tlawm titih der tawh. NAthana pawh a thal zing ta khawp mai, ka chawntha te hi a chat hial hian ka hria.
Nathana nen chuan min sawisak hrep hnuah chuan Victor-a chuan chemte a phawrh a, "I nupui hi chu that lo mai teh ang, duhleh Henry-a te kha chu lo tâng mai mai teh se. Ka nupui a ni tawh anga, zantin ka mutpui ang." tih pah chuan Nathana vih a tum chiah chu silai a puak dur a, Victora chu a thal tawp mai. A ke atang chuan thisen a chhuak zur zur a, a na ti lutuk chu a th(r)en chawk chawk mai. Midang pathum te pawh chu an thal nghal tawp tawp a. Silai lo puahna lam kan va hawi chu Amandai alo ni a, silai a lo hum ran mai a. A hnungah chuan SI Liantea chuan Henry-a arawn hruai bawk a. Kan bulah chuan lo kalin Amandai chuan, "In tha maw...in na em?" a rawn ti deuh luam a. Keichuan, "KAn tha e." tih pah chuan kan tho chhuak a. Nathana chuan Victora chu a hnek nghal pawp pawp a, "Khawnge Sanvi?" a ti a. Victora chuan, "Mo...motor savawm bawmah.." a ti tawk tawk a. NAthana chu a insum zo ngang lo, Victora chu vawi 10 vel a hnek siah siah a, Victora pawh chu nikhawhrelovin a let der mai. Motor savawm bawm chu kan hawng a, Sanvi chu phuarbehin a lo awm a, a hmui tuam sak a ni bawk a, nikhaw hrelovin alo awm bawk. Rang takin Hospital lam kan panpui a, Amandai leh SI Liantea te chuan a tawp atawpah chuan an case chu an chingfel thei ta. Amaherawh chu Nathana awmlo se chuan an theih ka ring lo, Amandai te hian min rawn zawn hmuh theih nachhan chu NAthana hian ka hriatloh hlanin message a lo thawn leh hman keuh tawh a nih chu, khang palian pali te kha kan hneh a ring chiah biklo ni ngei tur a ni. Tlai dar 5 a ri a, Sanvi pawh a lo harh ta a. DGP pawh SAnvi kan tur chuan alo kal a, ngaihdam min rawn dil nasa mai. Keipawh chuan thudik ka sawi loh chhan te, Sanvi nunna in a tuar ka hlauh vanga ngawi ta mai ka nih thute chu ka hrilh ta a, kan inngaidam tawn thei ta a ni. DGP chu a haw ta a, Mary ka pawm a, Nathana leh Sanvi erawh engmah sawilovin an in en ngawih ngawih ringawt nia mawle, vai nupui neih vang mai a, an che vai film dun thei a nia. Chutah Nathana chuan, "KA HMANGAIH CHE, SANVI." tih pah chuan an han in-kiss ta anih chu, Mary awm lai laiin. Lehlam ka hawi a, "Hawh teh Mary, Ice cream lei dun daih ang aw, i nu leh pa te saw maw..an hui si." tiin kan chhuak ta daih a.
THE END
Comments