NATHAN SEASON-2 (Episode-14
NATHAN SEASON-2 (Episode-14)
"I LOVE YOU, SANVI" (Part-1)
Written by : Aaron Malsawmdawngzuala
"Sir, khawimaw a thlalak tal?"
"A ho mai mai, a tullo."
"Mawwhh...a chhiatloh hmel si."
"A tullo ka tih chu mawle."
"Engtin nge instagram-ah a indah?"
"Instagram a hmanglo."
"Facebook tal?"
"Facebook pawh a hmang lo."
"A thlalak tal chu minlo hmuih ve mai mai la mawle."
"Enga tan nge i tih?"
"Awww.....ka hmu ve chak, thlahpawlh te hi chu an hmeltha duh ropui sia."
"I ler emai, hmanni lawkah bialnu i rawn nei thar ve a, hmeichhe dang i ngaihtuah leh nghal a."
"Naa...Sir khawngaihin, a ho emai, i va uikawm ve a."
"Tluangtei ka hrilh khawp ang."
Rum deuha min melh chung chuan Nathana chuan a phone a phawrh a, Javed Ibrahim-a fanu Alia Khan thlalak chu min hmuh ta a. Karei...engtin nge Nathana hian a kal tir theih? Sanvi hi lo kawp phah pawh nise ka dem hauh lovang, ava han chhelo tehkher em. Ka over pawh inlo ti maithei a, mahse khawvel hmeichhia ka hmuh tawh ah chuan a chhelo ber ang, a hmeltha si, ngo si, rapthlak tak hi a ni ringawt. Nathana nen an in selfie-na a ni a, Nathana hmel hup meuhvin ka han en chiang leh a, ka en ning theilo, ka luangliam ngawih ngawih. Mahse ka rilru ah Tluangtei a lo lang thut a, ka insum leh ta mai mai zawk a. Nathana chuan a phone rawn lak pah chuan, "Khawimaw...ka'n delete nghe nghe teh ang." a la ti zui. Keichuan, "Sir, a thlalak dang ila nei em?" ka la ti hram a. Rum zeta min melh pah chuan, "Neilo neilo, nei mah ila ka pe lovang che." a ti deuh hmuk a, a thlalak mai mai ah pawh khati khawp khan ka luangliam thei ania, atakah phei chuan hmu ila ka thidang thei ang. Lerh minlo ti viau su aw...Tluangtei hi ka hmangaih loh phah ta vek e ka tihna anilo, hmeltha ka ti a, chhelo ka ti a, ka sawi ve animai. Nathana chuan, "News ah te khan minlo hmu em? Nang ai chuan ka lar leh tawh vet vet hle mai tiraw?" tih pah chuan a han vei nuih ngei ahh..ka va han ten tak! Keichuan, "Hmu e, an khaihlum dawn che emaw ka tia, ka lo lawm em em a." ka ti ve deuh ngat a. Nathana chuan nuih pah chuan, "Nang te chu vanneih vang liau liau in ASP i ni ve mai mai alawm, a nihna takah chuan i thluak hi chu Head Constable thluak ai pawn a hniam zawk." a ti leh deuh kher nia mawle, mi hi a hmusit thin ania. Nathana chuan a phone a phawrh a, "Thawnthu ngaithla ang aw.." tih pah chuan Cowboy thawnthu hi a play ta a. Keichuan, "Eng thawnthu nge a?" ka lo ti hu a, Nathana chuan, "A ngaihnawm lutuk, SUDDEN tih a nia, hman atang tawhin ka ngaithla thin alawm." a ti a. Ka han ngaithla ve vang vang a, mahse cowboy hi chu ka tui lemlo lutuk a, a ngaihnawm ka ti lemlo. Nathana lah chuan maimitchhing tehmeuh chuan a ngaithla a, ka va han eilo tak. Nathana bawk chuan, "A chhiar thiam hluah hluah ania thianpa Chhantea hi chu.." a ti a. Keichuan, "Tunge chu chu?" ka ti leh hu mai a. Nathana chuan, "Hei...tuna kan ngaihthlak mek chhiar tu hi, Chhantea Pautu a nih hi." a ti a, engemaw ka hrechhuak zawk mai. Hman kum deuh khan Tluangtei hian Chhantea Pautu hming hi chu a sawi tawh tak e, mahse ka ngaihsak lemlo, tiang hi chu Nathana te tuipui awm tawk vel chauh ani, keini mipa tak tak hi chuan thawnthu kan ngaithla ve hman meuhlo a nih hi. Dar 10 a ri dawn hnai ta, "Sir, ka haw tawh mai ange aw?" ka ti a, Nathana chuan, "Ala hma alawm.." tih pah chuan sana a en a, "E...haw tawh leh si rawh, a tlai tawh emai." ala ti zui. Min thlah nachang pawh a hrelo, Sanvi chuan pawn thleng min thlah a, ka chhuah pah chuan, "In pa saw engtin nge i duh a?" ka han ti hram a, Sanvi chu a nui suk ringawt a. Ka bike chuan inlam pan chuan ka haw ta a, Nathana te inah lo hi chuan lenna tur ka hre hlawl lo a ni. Ka bialnu hmeltha Tluangtei lah an khuaah a awm daih bawk si, ka han zin chhung lah khan ka buai em avangin kan inhmu rei hman ngai bawk silo. Thla 3 ka cham chhung khan vawi 10 vel bak kan inkiss hman lo hrim hrim, mahse inkiss kha chu a nuam a ni. Nathana ka fak khawp mai, ka zin bo hlan khan hna tha tak amahin a lo thawk leh tawh a. Achang phei chuan ka tel ve hian ka hnawk lek lek zawk hian ka hre thin, mahse ka tello chuan nuamlo a tih thu hi a sawi ve chhen tho thin bawk si a, tak tak nimaw? INDIA'S MOST WANTED CRIMINAL Javed Ibrahim a zu hmachhawn ngam hrim hrim te kha a huaisen ka ti em em a, chupawh ama tan nilovin, a nupui Sanvi tan vek a ni.
Chutia ka tlan lai chuan kawngsira mi pakhat lo let reng hi ka hmu a, ka phu chiang kher mai. Zan a rei tawh si a, tutak chu ni ang maw? Ka bike ka ti ding a, ka va pan hnai a. Kum 50 bawr vel, patling hang lampang, hmel chhuanawm loh ve tak hi alo ni a, a hmai chu thisen in a bual khat vek a ni ber mai. Ka sawi vak vak a, mahse a thi tawh tih chu a chiang ngang mai, a thaw tawhlo hrim hrim. Rang takin Nathana ka phone nghal a, thil awmzia te ka hrilh hnu chuan ani pawh chuan alo phei vat tur thu min rawn hrilh a. Minute 10 dawn lai ka nghah hnu chuan a rawn thleng ve ta a, chumi rual chuan constable dang ka phone te ho pawh an lo thleng ve nghal bawk a. Nathana chuan, "I hmuh tirhin ti hian a lo awm tawp ami? Midang i hmu lo ami?" tiin min zawt a. Keichuan, "Aw hmulo, ka tlan laiin kawngsirah ti hian a lo let reng a, ka va pan hnai a, mahse a lo thi tawh a." tiin ka chhang a. Nathana chu a ding hluai a, a hawi kual vel a, a bul hnai te chu light chuan a en kual a. Nathana chuan, "Constable, ruang hi post-mortem turin phur phei phawt teh u...in hnungah kan lo zui ang che u." a ti a, tichuan constable ho chuan ruang chu an phur phei ta a, Nathana nen chuan kan bike ve ve khalhin kan zui ve ta nghal bawk a. Thil awmzia te chu kan DGP kan hrilh a, DGP pawh chuan, "Awle, Station ah khan lo awm ru, ka lo kal ve nghal." a ti a, hetih lai hian zan dar 11 leh achanve a pel tawh a ni. Dar 12 a rik hma hret chuan DGP pawh chu alo thleng ve ta nghal a, reife thil kan sawi ho hnu chuan constable pakhat chuan, "Sir, mitthi hi tunge a nih kan hre tawh e. Lalawmpuia Chanmari, Pu Ramnghaka leh Pi Zorinpuii te fapa a ni a, kum 55 a ni a, a nu leh pate hi an thi tawh. Fapa pahnih a nei a, a nupui nen hian an inthen tawh a ni." arawn ti a. Nathana chuan, "Umm...a tha e, achhungte chuan an hre tawh em?" a ti a, Constable chuan, "Aw, Amanda Ma'm a kal mek e." a ti a. Keichuan, "Sir, kan va kal ve kher dawn em?" ka lo ti a. DGP chuan, "A ngaihloh chu, Inspector Amanda-i leh SI Liantea te an kal kha...hetah chanchin ilo ngaichang phawt ang u." a ti a. Nathana chuan, "Sir, keichu Rinawma'n ruang a hmuhna hmunah khan va let leh lawk ka duh a ni, engemaw kan hmuchhuak maithei asin." a ti a. DGP chuan, "Ummm...anih chuan Rinawma nen hian va kal ula, Amandai te ka lo nghak ange." a ti a, Nathana chuan, "Awle Sir, chanchin kan inhrilh leh dawnnia." tih pah chuan a chhuak vut a, mi te pawh hi nghah ve thin tur a nia, hahthlak lutuk mai. Rang tak chuan ka zui chhuak ve ta nghal a, tichuan ruang ka hmuhna lam pan chuan kan inphur phei ta nghal a. Ruang ka hmuhna hmun chu kan thleng a, Nathana chuan a han enfiah a, keipawh chuan ka han thlek ve nual a. Ruang ka hmuhna bula kawr ah chuan Nathana chuan thingbung hi a rawn la chhuak a, "Rinawm, en teh." tih pah chuan ka hma zawnah chuan a rawn lek kang a. Chu thing bungah chuan thisen a kai nuai mai bawk a, a lan dan chuan chu thing bung hmang chuan tualthattu hian Pu Awmpuia hi a vua ni ngei tur a ni. Nathana bulah chuan, "Hemi thing hmang hian a vua tihna a nimaw?" ka ti a. Nathana chuan, "A ni maithei, a lu ah chauh khan hliam a tuar a, a vaw na hle ni tur a ni." a ti a. Keichuan, "Naktuk ah post mortem result ah a chiang mai ang chu, kan kal dawn nge i la en fiah dawn?" ka ti a. Nathana chuan, "Kal ila, engmah enfiah tur dang ka hmu tawh lo." a ti a, tichuan Station lam pan chuan kan let leh ta a. Station kan thlen rual rual chuan Amandai leh SI Liantea te pawh chu an lo thleng ve nghal a, Station chhungah chuan kan lut rual a ni ber ang chu. DGP chuan, "Amanda, enge chanchin?" a lo ti a, Amandai chuan, "Pu Awmpuia te chhungkua hi pathum chauh an ni a, mipa vek an ni. Fapa pahnih a nei a, a fate pahnih chu thu eng eng emaw kan zawt nual a, mahse hmasawnna a awm lemlo khawp mai. A nu leh pate an thi tawh a, a nupui nen an inthen tawh bawk si a, abak engvak mah kan hriat belh lo." a ti a.
Nathana chuan, "A fate chu biak ve ka duh a ni, chubakah a nupui hlui pawh chu hmuh ve hrim hrim a ngai a nih chu." a lo ti a. DGP chuan, "Umm....hei zan a rei tawh si a, i haw phawt teh ang u. Naktuk zing lamah kan inhmu khawm leh dawnnia, ka hmanhmawh deuh a, ka lo va haw hmasa ange aw.." tiin a chhuak nghal a, keini pawh chu kan haw ve ta a. Atukah chuan Stationah chuan hma takah ka thleng a, mahse a ngaite ang bawkin Nathana chu a lo awm leh daih tawh, a riah chilh thin amaw tih mai tur a ni. Nathana chuan, "Ilo thleng ta maw? Nizana kan thing bung-a thisen kha kan test tir a, Pu Awmpuia thisen ngei alo ni a, chuan post mortem result ah pawh alu ah khan vawi 10 chuang a zawna vuak a ni an ti nih chu." a lo ti nghal zuah zuah a. Eiloh hmel taka melh pah chuan, "I inla hria nih chu.." ka ti deuh hmuk a. Nathana chuan, "Keichu midang hi ka ring zo ve vak thinlo a ni, hawh teh Pu Awmpuia te inah chuan va kal ve teh ang." a ti a, keichuan, "Engvak nge kan va zawh leh anga?" ka lo ti hlur a. Nathana chuan, "I thatchhe sia maw....engtin nge tualthattu kan chhuichhuah thei ang tiang te chuan?" a ti a. Tichuan Pu Awmpuia te inlam pan chuan kan chhuak dun leh ta a, Pu Awmpuia te hi Chanmari ah an awm a ni. Reilo teah kan thleng thuai a, an lo zai thup thup mai a, veng danga an chhungte an ni ngei ang, puitling thenkhat chuan minlo welcome tha hle a. Pu awmpuia room ah chuan kan lut a, kan han enkual a, mipa room tih takah a felfai biklo hle mai. Thu eng eng emaw kan zawh fiah hnu pawh chuan engmah hmasawnna a awm chuang lo, kut bengin kan haw leh ta ringawt mai a ni. Kan haw pah chuan Nathana chuan, "Hmelma a nei nge ni anga rukru ten an that zawk ni ang aw?" a ti nuah nuah a, keichuan, "A ni thei ve ve." ka lo ti thla ve ngawt a. Nathana chuan tum hmuk hian min melh a, "A ni thei ve ve tihte chu kan hre vek ang chu mawle.." a lo ti vin hlur a, han chhaih thinrim hi a nuam ve hrim hrim hepa hi chu. Station kan thleng a, Amandai chuan min rawn pan vat a. Nathana bulah chuan Amandai chuan, "Sir, he case hi chu ka kutah dah mai la, ka chhuichhuak em em ang. Tualthahna pakhat ve mai ani a, nangni chu lo hahchawl rawh u." a ti a. Nathana chuan, "Amanda, tualthahna reng reng hi tenau a awm lo, tualthahna a nih tawh chuan thil pawi lian tham tak a ni tih hriat tur. He case hi i kutah DGP in a dah leh tawh em ni?" a ti a. Amandai chuan, "Aw..ka dil a, SI Liantea nena chhui turin min ti ani." tiin alo chhang a. Nathana chuan, "A tha e, mahse buaina in nei emaw...puih in ngaih chuan kan awm reng a nia aw?" a han ti a, Amandai chuan, "Awle Sir, kan theih tawp kan chhuah ang." a ti a. Chhun chawlh hun a lo ni a, Nathana erawh engmah a ei chakloh avangin keimahin chow satui leih ngat chu ka ei leh ta a. Ka eikham pawna meizial ka zuk lai chuan kan Station bula school hlui tlang lam pan mek mi pahnih te chuan ka mit an la tlat mai, a chhan chu chumite pahnih chu nizana boral ta Pu Awmpuia fapa te an nih vang a ni. Ka ringhlel deuh ta a, an mahni pa Pu Awmpuia a boral a ni a, an vui mek a, tunah phei chuan thlanmuala kalpui hun a ni tawh. Anni lah kan Station bulah an la awm daih si, chubakah tlang lam an panchho lehnghal. Ka ngaih a tha chiah lo, ka zui ta a, tlang lam pan chuan ka kal chho ve ta a. School tlang ka han thleng a, tual zawl ah chuan an thu dun a. Thingkung phenah ka biru a, ka en reng a, an hawi kual zuk zuk bawk a. Pakhat zawk Johnny-a chuan bag a ak a, a fapa naupang zawk hi Muantea a ni. Johnny-a chuan a bag ah lai chu a zipper a hawng a, a chhung atang chuan pawisa tam em em mai hi an phawrh chhuak ta teuh mai a. Mak ka ti hle mai, rinhlelhna hlirin ka khat ta, hemi te unau hian anmahni pa ngei mai chu an that a ni tih hi ka ring nghet bur nghal a. Johnny-a zawk chuan, "A lo kal dawn tih i chiang amaw?" a ti a, Muantea chuan, "Aw...hetah hian amah zawkin lo awm ru a ti alawm." a ti a.
Ka pistol ka phawrh a, anmahni lam va pan phei pah chuan, "Che tawh suh u....enge hetah intih?" ka ti a. An phu dun chiang kher mai, an dinga, ban an phar nghal a. Bag chhunga pawisa chu ka en a, pawisa tam tak a ni. Anmahni lam chu ka en leh a, "Hetah hian enge in tih ka tih chu?" ka ti leh a, Johnny-a chuan, "ASP, i buailoh na turah i buai a ni." a rawn ti khanglang a. Ka thinrim kher mai, "Engmaw i sawi a? Han sawi nawn leh teh.." ka ti vin tuar a. Muantea erawh a hlauh hmel em em a, Johnny-a erawh a zam hauh lo thung. Johnny-a chuan, "ASP, min kal tir mai rawh, i inchhir lovang." a la rawn ti deuh deuh a. Ka insum zo lo chuan a hmaiah ka hnek thal tawp a, Muantea chu a ding khur char char thung a. Johnny-a chu pistol chuan ka tin a, "Na tawrh leh i duhloh chuan in unau hian Station ah thuawih takin min rawn zui rawh u...anih loh chuan.." ka sawi zo hman lo, ka hnuglam atang chuan tu emawni hian min rawn tlawh thal tawp a. Pistol chu ka thlauh a, rang em em hian Johnny-a chuan a chhar a, min tin nghal a. Ka tho a, min tlawhthlu tupa lam chu ka va en a, palian ve tak, sek em em mai, tawnzau dum ha, tattoo ngah em em mai hi alo ni a. Min th(r)am tho lawp a, "Police ka ni e..i tih avang khan tupawh hi i man thei turah i inngai em ni?" tih pah chuan min theh thal leh thuai mai a, tha a ngah phian mai. Rum zet hian min melh a, "Vawiin chu ka naute ilo zui ruk avang hian i thih angai dawn ta a nih hi..police officer tam tak hi ka tlawm tawh tih i hria em?" a ti pang pang a, Johnny-a lah chuan inla changtupa zet hian pistol chuan minlo tin reng a, a pistol humdan hrim hrim pawh kha a diklo reng reng. Chu paliana chu a mitah tak chiang kek kawk hian ka en a, "Ihmaw thianpa, hman kuma 2004 vela drug addict inla pa deuh hi i ang lutuk. I lu ah rawmawl i hreng vel a, tattoo thing zet i nei bawk a. I tattoo-a chinese tawng inziak te kha a awmzia i hre miahlo ami? Momo & Chow Available tihna a nih kha.." tih pah chuan ka nuih vak vak a. A thinrim kher mai, a rawn tlan phei a, ka dulah tak chuan a khupin min rawn do pawp mai chuh, ka uak thawt thei nia mawle. Na tak ani, pum dawm vawng vawng chung chuan leiah chuan ka bawkkhup thlawp mai a. Johnny-a pistol ken lai chu va laksak in, "Khawimaw...keimah hian kan that law law ange, ve lutuk chuan.." tih pah chuan silai chuan min tin a. Ka tho thut a, silai chu ka benthlak sak thei hlauh mai, ka tihfuh pawh ka inring lo, ka khawloh khak fuh mai mai ani. Theih tawp chuan ka rek a, mahse awlsam tak hian ka kut chu a man bet a, a elh ri tuar mai, a na lutuk ringawt. Min chawi kang lawp a, min paih thla leh tawp mai, ava na thei tak em. Mahse ka tlawm mai mai dawn lo, pum dawm vawng vawng chung chuan ka tho leh a, "Hey Palian, eng em em nge i ei bik a? Tha i va nei ngah ve.." ka han ti leh hram a. A intithei kher mai, "I tlawm ta elaw? Lo kal ta che...Police i ni lawm ni?" a ti vel ham ham a. Thawk ka'n la te te a, rum zeta melh pah chuan, "Changtupa a tirah an che tha ngai hleinem." ka'n ti ve leh ngat a. Tichuan ka va tlan phei leh a, a ngai te bawkin min lo man leh chat mai, min man bet a, a lu chuan min tauh pawp mai a, ka hai chhu mai. Arsi an tam ngei mai, ka luhai chu ka thal leh tawp mai. Pistol chu a chhar a, min rawn tin a, "Nep ropui si, ka peih tawh lo, thi law law teh." a ti a. Mahse silai a puak dur a, chu Paliana pistol ken lai chu a per lawp a, a kut chu a thi ta zur zur mai. Ka va hawi phei a, Nathana a lo ni a, ka va lawm em. Nathana chuan min rawn kai tho a, "Khawnge i awm daih a? Duty lai i ni tih i inhre nange?" a rawn ti a. Keichuan Paliana kawh pah chuan, "Saw pa saw alawm, a chak reuh lutuk a, ka hneh ngang lo." ka ti a. Nathana chuan Johnny-a te unau chu a hmu a, "Johnny, enge in tih a?" a ti a, mahse an chhanglo. Pawisa chu a zu hmu ve ta a, Nathana bawk chuan, "Ehe...ngawiteh, thil awmzia ka man thiam nghal deuh mai." a ti nuah nuah a.
Nathana chuan ka darah a beng thak thak a, "Rinawm, vawiin chu kan vannei hle mai, a tawp kan khar dawn a ang ta khawp mai." a ti a, a nui vur vur a. Keichuan, "Nia, mahse mahni chauh chuan khar a har a ni, he palian pui hi lo awm ve khanglang a." ka ti a. NAthana chuan Paliana lam chu a hawi a, "Hey, Brock Lesnar..i kut kha a na lutuk ange, lo kal rawh Station ah damdawi kan lo hnawih sak ang che." a ti a. Paliana chuan thinrim zet hian, "Khawiah mah kan kal lovang, helai hmunah hian inthi dawn." ala ti pang pang a. Nathana chuan, "Ava luhlul reuh e, kan man velo tawp mai tur che ania, kan duhsak lai che hian thu awih mai rawh." a ti a. Paliana chuan, "Min man lovang...police ni eng ang mah ula, ka hlau lo che u." a la ti ham ham a. Keichuan, "Enteh Sir, a ban a tattoo saw en teh, chinese tawng saw...Momo & Chow available tihna tiraw?" tih pah chuan ka nui khi sung mai a. Nathana chuan a en vang vang a, "Haha...ni nang, CORONA VIRUS tihna a nih saw." tih pah chuan a nui tiah tiah a. Johnny-a chuan, "DCP Nathan, in buailoh na turah in buai ani....in thih hma hian kalsawn vat mai rawh u." a lo ti ve chhen a. Nathana chuan, "Hets....puitling titi laiin naupang lo inrawlh ve loh tur." a lo ti a, Johnny-a chu a thinrim kher mai. Nathana chuan Paliana lam chu a en leh a, "Hey Brock Lesnar, lo kal rawh le, Stationah min lo zui rawh le." a ti a. Paliana chuan, "In ngam a nih phawt chuan....mipa leh mipa te chu insual ila. I silai kha dah rawh le...in pahnih pawh khan tang rawh u, hliam ka tuar lehnghal a, in ngam em? Sawi rawh u?" a ti pung pung a. Nathana chuan, "Ka silai hi maw? Ka dah bawk lovang, i thu lo emai." tih pah chuan pistol chuan a tin a. Johnny-a chuan mangan hmel zet hian, "Hey....hey....a fair lo lutuk." a ti chel chul mai a. Nathana chuan nuih suk pah chuan, "ASP Rinawma leh DCP Nathana te chuan nizan lawka boral ta Pu Lalawmpuia te fapa pahnih, Johnny-a leh Muantea te chu anpa an vui hun vel, thlanmual an panpui vel hunlai taka thlanmual lam pan lova, school tlang lam an pan lai chu an hmu a. Thu zawhfiah tuma an han biak dawn chuan Brock Lesnar-a a lo kal a, alo dang a. Brock Lesnar-a chuan DCP leh ASP te chu kutthlak a tum a, self-defence hmangin Brock Lesnar-a ke ah chuan Nathana leh Rinawma te chuan an kap ta tawp mai a ni." tih pah chuan Paliana ke veilamah chuan a kap thut mai a, a thingthi hnawk a. Na a ti lutuk chu a then chawk chawk mai a. Nathana bawk chuan, "Brock Lesnar-a chuan khawih let a tum leh hram a, mahse DCP Nathana chuan a band dinglamah a kap leh a.." a tih lai chuan keichuan, "Sir, a ban dinglam chu i kah tawh hi...veilam zawk angai." kalo ti a. Johnny-a chuan, "Hey, kap tawh suuuuu." alo ti chel chul mai a. Nathana chuan Johnny-a en pah chuan, "Tichuan DCP Nathana chuan Brock Lesnar-a kut dinglam leh veilam chu a kap leh a." tih pah chuan Paliana kut veilamah chuan a kap leh a, thisen a per leh ta chhawk mai. A na ti lutuk chu a tap pur tawh mai, keichuan nuihsawh pah chuan, "Ana em? Ana ngawt ang. Pistol hi Glock 30 PT a nih hi.." ka lo ti vel ham ham a. Nathana chuan min rawn nghawk zeuh pah hian, "Naa...van kawlo tak..Glock 30SF an tia lawm." alo ti a. Keichuan, "Aw..ni tak maw....ka lo theihnghilh daih alawm." ka ti a. Paliana chuan tap pur chuan, "Police dawihzep tak inni....silai tellovin min bei ngamlo amaw?" a ti nuah nuah a. Nathana chuan, "I taksa kha en ta che...tunge maw bei ngam ang che le.." alo ti hrep a. Paliana chuan, "Zawnga, i chak lovang." a ti vak a. Keichuan, "Tah kher angailo, tap lovin sawi rawh." ka lo ti leh hram a. Nathana chuan police dang te chu a ko a, tichuan Johnny-a te unau leh Paliana te chu station lam kan pan pui ta a.
DGP bulah chuan kan thil tawn te chu kan sawi a, Paliana erawh kan kah hliam nual avangin hospital an pan pui a. Johnny-a te unau chu he tualthah case chhui mek tu Amandai chuan thu a zawt fiah mek a, an bulah chuan kan awm ve a. Amandai chuan, "Johnny, enge awmzia? Tha deuhvin sawi la, na i tuarlo a nimai." a ti a. Johnny-a chuan zam hauh lo hian Amandai chu a melh a, "Police ni tur chuan i chhelo mah mah a ni, innei ang hmiang." ala ti zui. SI Liantea a insum zo lo, Johnny-a hmaiah chuan a hnek siah mai a, Johnny-a ha hmai a bal thawt mai. Amandai chu za lo tih hriat tak hian a nui suk a, "Johnny, vawikhat chiah ka zawt leh ang che...i pa kha in unau-a in thah a ni tiraw? Chuan pawisa hi khawia mi nge?" a ti leh a. Johnny-a chuan rum zet hian Amandai chu a melh a, "Ka la mutpui khawp ang che...i zei dawn tih ka hria alawm." a la ti ta deuh deuh a. Amandai chu a ding hluai a, na em em hian Johnny-a hmaiah chuan a beng hawi sawk mai a. Johny-a nau Muantea chu a lo tap pur tawh mai a, Amandai chuan SI Liantea bulah chuan, "Liante, Johnny-a hi va hlap deuh teh u...mahse a nunna erawh zuah ula, min mutpui te kha a tum si a, a che tha theilo palh ange." a ti ve deuh ngat a. Johnny-a chu SI Liantea chuan a tham tho lawp a, cell lampan chuan a hnuk phei dawr dawr a. Amandai chuan Muantea bulah chuan, "Muante...thudik min hrilh rawh..thil awmzia hi han sawifiah teh le.." a ti a. Chutih lai chuan Johnny-a chuan, "Muante...engmah hrilh suh, engmah sawi suh ange che." tiin ala rawn au lauh lauh a. Muantea chuan hlauhthawn hmel tak hian, "Ka...ka hrelo." a ti hluam hluam a. Amandai chuan, "Muante, i u ang sawn hlap ve i duh em?" tih pah chuan cell chhunga Johnny-a an lo hlap t(r)e tuar tuar chu ava kawk a. Muantea chuan, "Duhlo." tiin a tap pur mai a. Amandai chuan, "Anih chuan sawi teh le...engtin mah kan tilo ang che." a ti a. Muantea chuan, "Kan unau hian drugs addict kan ni a, ka nu leh pa te an inthenna chhan pawh kha kan unau vang a ni. Kan sim thei silova, ka nu hian min hau reng a, mahse ka pa hian kan unau hian min t(r)an zel a, tichuan ka nu chu a chhuak ta nge nge a ni. Ka pa hi contractor a ni a, pawisa a ngah hle tihpawh kan hria. Kan damdawi tihna tur hi kan dil chhuak fo thin a, mahse ka nu a tlan tak avang leh kan damdawi ti reng mai hi a nin ve tak deuh avang chuan pawisa min pe duh tawh ngailova. A pawisa dah thatna hi chu kan hria a, a wardrope chhunga safe pakhat ah a ni. Safe chahbi hi kan unau hian kan zawng dun nasa thei hle a, mahse ka pa lo chuan a awmna tuman an hrelo. Pawisa kan nei tawh ngailova, kan suffer nasa dun em em thin a. Damdawi tih tur a awmloh chuan kan buai vek zel a, zan pawh kan mu thei ngailo. A tawpah chuan kan insum thei ta ngang lova, ka pa chu kan dil leh ta a. Mahse ka pa chuan pawisa chu min pek ahnekin kan unau chuan min hlap ta hrep mai a, min hau a, chhuah phal lovin kan inah chuan min tawm tir ta reng mai a ni. Ka u Johnny-a hian khami ni, ka pa'n kut min thlakdun ni atang chuan ka pa hi a haw ta em em a, thah a tum thu hi nitin a sawi ta mai a. A tir chuan ka ngam biklo, mahse kan damdawi chakna nasa lutuk hian ka rilru pawh a bual a ve zo ta a, tichuan rem kan ruat ta a ni. Nizan khan ka pa chuan a room ah pawisa a chhiar mual mual a, ka u Johnny-a chu ka pa roomah chuan lutin lighter a zawng der a. Chuveleh hnunglam atang chuan ka pa chu a rek thut a, tichuan kei chuan ka thirtiang kenlai chuan ka pa luah chuan na takin ka vua a, nikhaw hrelovin a awm ta a ni. A tir chuan kan hlauthawng dun em em a, mahse kan ti ve laklawk tawh si a, motor la chhuakin ka pa chu kan phur chhuak ta a. Zan a rei deuh tawh bawk a, tumah khawlaia veivak an awmloh lai tak a ni bawk a. Ka pa chu khawlaiah chuan kan dah tawp a, kalsan kan tum ta a. Mahse a la thi silova, lo damchhuak ta se, police a hrilh ngei awm si a. Tichuan ka u Johnny-a chuan thingbung la in ka pa chu vawi engemaw zat a lu ah chuan a vaw leh a, a thi tih kan hriat hnuah kan haw leh ta a ni." a ti a.
Nathana chuan, "Anih leh kha Paliana kha? Khawia mi nge?" a ti a. Muantea chuan, "Kan damdawi ruih tur min supply sak thin tu a nih kha...ahming chu Henry-a a ni a, anihna takah chuan ka pa kha that mai tura min titu ber leh min fuihpawrh tu ber pawh amah kha a ni." a ti a. Amandai chuan, "Anih chu...nih leh pawisa te kha? I pa pawisa inruk chhuah chu em ni?" tiin a zawt leh a. Muantea chuan, "Aw ni e...kan thah zan khan a chahbi chu kan laksak a, tichuan pawisa bawm chu hawngin a pawisa zawng zawng chu bag ah kan khungkhawm a. Khami zan khan damdawi pawh chu kan la lei nghal bik mai lova, achhan chu kan chiai em vang a ni. Pawisa chu bag ah dah in bag chu kan huanah kan dahtha a, achhan pawh police te lo kalin kan in an rawn dap dawn tih kan hriat lawk vang a ni." a ti a. Amandai chuan, "Umm...nimina kan lo kal khan i hmel ah khan hlauhthawnna a awm tih chu ka hmu in ka hre reng a ni. Anih leh damdawi supply tu che u kha...Henry-a khan damdawi te chu khawia mi nge a neih thin?" tiin a zawt leh a. Muantea chuan, "Ka hrelo...ka hrelo tak tak, ihh..damdawi hi min leitir thin a, chu chiah chu ka hria." a ti a. Amandai chuan, "Anih leh engtin nge in inhmelhriat reng reng a?" tiin a zawt leh a. Muantea chuan, "Amah kan dawr thin hma hian kawng laia standing ho hi kan dawr thin a, an ti to thei em em a. Pawisa kan nei tam thin silo a, kan hek phah thin hle bawk. Zankhat chu Henry-a hi kan tawng fuh hlauh a, ani chuan min leitir ta a, a number min pe a, tichuan kan dawr ta ziah thin a ni." a ti a. Nathana chuan, "Amanda, khawnge an nu chu a awm hrim hrim a? A pasal a thi tihte hi a hre ve lo em ni? Biak ve te pawh a tha ang." a ti a. Amandai chuan, "A nu hi Myanmar lam mi daih a nia, nizan kha chuan kan hrilh tawh a, vawiinah a lo haw mek anih hmel." a ti a. Nathana chuan, "A tha e...Henry-a chu ka duh aiin ka kap hnem deuh a, nikhawhrelovin a awm a ni awm e, a zia lo tak tak." a ti nuah nuah a. NAthana beng bulah chuan, "Azia azia, min sawp nasat zia chu e..a phutawk chiah." ka han ti leh hram a, Nathana pawh a nui suk ringawt. Amandai chuan Muantea bulah chuan, "Henry-a hian midang rawn kalpui thin a nei em?" a ti a, Muantea chuan, "Aih...nei ngailo. E..vawikhat chu mipakhat a lo kal pui a, a unaupa a nih thu a sawi a. Mahse vawikhat chiah, abak chu amah hlirin a ni." a ti a. Amandai chuan, "Umm anih tak chu...Constable, cell chhungah han khung phawt teh u." a ti a, cell chhungah chuan an khung ve ta a. Johnny-a chuan, "DCP Nathan, ila inchhir ang..ila inchhir khawp ang." ala rawn ti t(r)alh a, ka thin in a tuar ta lo. Va phei ka tum a, mahse Nathana chuan minlo dang a, "Aho lutuk, saw...an vuak mek saw..tisawn lo râk mai mai rawh se." a ti a, a nui suk a. He case hi sawi tawh ang khan kan case a nilova, Amandai leh SI Liantea te case a ni. Zan alo ni a, ka duat em em, ka tleitir lenmawii...i ti mai teh ang, ka bialnu hmangaih em em Tluangtei chuan min rawn phone ve ta hlauh mai..
"Hello, U Rin...enge i tih a?"
"Engmah tilove....ka mu mai mai."
"Zanin chu ka nui hnem ngei mai...iva che nawi awm ve a?"
"Enge ka chet nawi na? Ka van hrethiam lo."
"U Nathana'n tlai chaw eikham vel khan min lo phone a, vawiinah drugs addict pakhatin a sawisa che a nimaw?"
(Hrep tak chuan, min sawisa lai kha a lo hmu reng a nimaw? Minlo chhan ve vat mai tur hi ania, sual lutuk mai.)
"Ah...ih..hehe..min sawisa pawh a nilo, ka awm a nuamlo lutuk a, ka che tha theilo alawm."
"Haha....apawi hleinem. Mi zawng zawng i hneh thei vek kher hleihnem tiraw?"
(Zawng Nathana mai mai chuh!!! Amah pawh khan a bei ngam tawp silo...silai chu keng lo se a sawisa ve awm tho emai.)
"Umm..ni mai teh se. Enge i tih a?"
"Ka bialpa ka be mek a nih hi."
"Ka ngai tawh lutuk che."
"Kei pawn ka ngai che...Duat, ka'n mu tawh mai ange aw...naktuk kan in exam dawn a, thawh hma a ngai sia...phal em?"
"Umm phal e, tha deuhin i ti dawnnia."
"Ka lawm e...ka hmangaih che. Muttui auh.."
"Ummm keipawn ka hma.."
Sawi zo leh hman ta lo, Nathan Malsawmkima....Chow satui leih heh-a, inla luck-a, inla-finga, DCP thawveng ber, vai pasal mai mai lehnghal. Ka room a rawn hawng thuai mai chuh ka phu nasa lutuk ringawt, ka phone ka thlauh a, a la thi hmuk zui. Ka tho a, va hnek nghal mai ka duh rum rum hial a ni. Engemaw Tluangtei ka hmangaih thu ka hrilh dawn apianga min rawn tibuai ziah hi ka hrethiam thei hlawl lo, ka phone chu ka chhar a, a sir ala khi zui, ka va han thinrim tak em. Vin zet hian, "Lo kik ve phawt tur alawm...thut thut zela che." ka ti vin hlur mai a. Nathana chuan, "Enge ilo tih a? I phut zuk a? Thil thalo te hi ilo tiru anilo maw?" tih pah chuan a la khi sung zui, chhe ver vur ania. Rum zeta melh pah chuan, "Ka phone hi en rawh...a thi hmak mai, ala khi zui." tih pah chuan ka phone chu ka hmuh a. A nui suk a, "Ava chhe hma ve, a man a tlawm em bawk alawm. A thar ka lei dawn che nia, titau hma ropui si." a ti a, a nui vur vur a. A hmel pawh ka en peih tawh lo, "Enge ilo tih dawn...zan zan ah?" ka ti hmuk a. Nathana chuan, "Henry-a kha alo harh chhuak tawh a, tlanchhuah a tum nasa a ni awm e. Amandai ten tunah Station ah an kawl mek a..iva kal ve ang hmiang." a ti a. Ka va han ngei tak, "Chumi vang chuan maw min rawn tihbuai a? Kan case khawih tur a ni lo a, Amandai te case khawih tur a nia...enge kan va tih ve ang?" ka lo ti vin hlur a. Nathana chuan, "Min rawn ko ve alawm, chubakah an thusawi te ka hre ve duh hrim hrim alawm. Insiam teh....senior tawh ropui si, titau bur bur reng suh." ala ti zui. Senior te chu minla tizui, mahse ka boss a ni miau si a, a thu ka zawm leh mai loh chuan. Peihlo rilru tak chuan ka insiam ta a, tichuan Station lam pan chuan kan kal ta a. Station chu kan thleng a, Henry-a chu alo thu kun lap a, Amandai leh SI Liantea chuan an lo dinchilh a. Nathana chuan, "Amanda, Pu Awmpuia nupui chu alo thleng tawh em?" a ti a, Amandai chuan, "Aih, kawnglaiah an motor a chhia a ni awm e, guest house ah an riak khawm dawn a." a ti a. Nathana chuan Henry-a chu a en a, "Hey, Brock Lesnar....i hliam chu enge a an a?" a ti a. Henry-a chu a rawn hawi chhuak a, NAthana chu rum zet hian a melh a, "DCP...ila inchhir dawn alawm...ila inchhir khawp ang." a rawn ti khur khur mai a. NAthana chuan, "Khanglang chuan.." tih pah chuan a beng hawi sawk mai a, ala nuih huah huah zui. Zan khua chuan kan dawp a ni ber mai, mahse engmah a sawi duh bawk silo. Kut kan thlak a, ka hnek a, kan vua a, kan beng a, mahse a inpuang duh lo. A sawi awmchhun chu, "DCP Nathan, ila inchhir ang." tih chauh hi a ni. Sawi tak ang khan Amandai case chhui mek a ni a, kan haw san ta ringawt a. Atukah pawh chuan nileng chuan kan dawp leh a, mahse engmah a inpuang duh silo, phone a nei bawk silo a, a hahthlak ngei mai. Tlai kan duty kan haw lam chu Nathana chuan, "Rinawm, nimin kha chu i va han zawr em em ve...i hneh ngang lo a nih kha tiraw?" tih pah chuan min han nuih vak vak a. Keichuan, "Sir, enge Tluangtei bulah i sawi kher a? Ka zak teh ania, nangpawh khan i insual pui ngam bik miah loh kha.." ka ti a. Nathana chuan, "A nuam ve alawm.." tih ringawt chuan min chhang a, ka la beng khawp ang, hepa hi chu. Keichuan, "Nimin pawh khan min sawisa lai i hmu vek tih ka hria a nia aw...nge minlo chhan mai loh a?" ka ti leh a. Nathana chuan, "I nuihzatthlak em alawm....ka rawn chhan che kha ngawi mai mai teh." a la ti zui. Hnial peih tawhlo, tawngthei emai..."I nu a awm em inah? A thingpui lum ka in chak emai.." ka ti a, NAthana chuan, "An zin leh tawh...an monu rai lah hi an ngaihsak lo ania, ka pa nen an zin, Champhai ah.." a ti a. Keichuan, "Nihleh inah tunge awm?" ka ti a, Nathana chuan, "Mary leh Sanvi nimai.." a ti a. Keichuan, "Anih leh ka lo leng dawn....vainu thingpui lum in teh ang." ka ti ve deuh kher a, a nui suk ringawt.
Nathana te in kan thleng a, inchhung kan lut a, NAthana chuan, "Sanvi...Sanvi..ka lo haw e." a han ti lauh lauh a, mahse Sanvi chuan a chhang hauh lo. Nathana te room kan lut chiah chu kan thil hmuh chuan min barakhaih hle mai, room chu a hnawk nuai a, khum te chu a inchinglet nasa kher mai. Tumah lah chu hmuh tur an awm der mai silova, make-up bawm te, thawmhnaw te chu a darh nei nuai mai a. NAthana chu a mangan hmel hle mai, keipawh ka hrilhhai takzet. NAthana chuan a nupui leh Mary chu a au vak vak a, chutah khum hnuaia hmeichhe naupang tap ri chu kan hre ta. Khum hnuai chu kan han bih a, Mary a lo ni reng mai. Nathana chuan Mary chu a pawm chhuak a, Mary chuan, "Apa..." tih pah chuan Nathana chu a kuah a, a tap hawm hawm mai a. Nathana chuan, "Bawihte...tinge hetia i awm? Khawnge i nu?" a ti a. Mary chuan, "Apa...anu an hruai daih..mi pathum anlo lut a, a nu an hruai daih.." a ti a, a tap vak vak a. Nathana chuan, "Tute nge? Tute nge lo kal?" a ti chel chul mai a. Mary chuan tap chungin, "Ka hrelo, anu kha an beng vak vak a, tichuan an hruai chhuak daih.." a ti a. Chuveleh Nathana phone a lo ri a, Sanvi a lo ni. Rang takin a pick up a, "Hello, Sanvi..khawnge i awm?" a ti nghal chul mai a. Mahse phone a mi chu Sanvi a ni hauh lo, mipa aw...aw thum tak mai hian, "I nupui chu kan kawl e, a dam tha e." a rawn ti ta mai a. Nathana chuan vin zet hian, "Tunge i nih?" a ti vak a. Chupa chuan, "Henry-a kha chhuah rawh...i chhuah hma chu i nupui hi i hmu let bik lovang." a rawn ti khur khur mai a. NAthana chu a ding hluai a , Mary chu rang takin ka lo pawm vat a. Nathana chu a mit a sen vek thei hial a, "Zawnga, tunge i nih a? Khawnge ka nupui i dah? Engvanga ka nupui kha kidnap nge i nih?" a ti khur dur dur a. Chupa chuan, "Henry-a khan i bulah a sawi kha, ila inchhir ang a tih mawlh mawlh kha....i inchhirna tur thil i ti a nih tâk hi....i hrethiam tawh em?" a rawn ti a, a nui huah huah a. Nathana chu a maimitchhing vang vang a, "Awle...a tha e, ka nupui chu ka lo bia ange." a ti a. Second 5 vel chu a reh vung vung a, chutah Sanvi aw ngei mai chuan chauh hmel tak hian, "Nathan..duhtak, ka hlauthawng lo, ka tha a nia, reilo la, lo kal vat rawh aw..." a rawn ti tham tiak mai a. Nathana chu a mittui a tla zawih zawih mai a, chutah zawi sap, mahse fiah tak si hian, "Lo lungngai suh duhtak..ka lo kal ang...KA HMANGAIH CHE, SANVI..KA HMANGAIH LUTUK CHE." a ti a.
TO BE CONTINUE.....
"I LOVE YOU, SANVI" (Part-1)
Written by : Aaron Malsawmdawngzuala
"Sir, khawimaw a thlalak tal?"
"A ho mai mai, a tullo."
"Mawwhh...a chhiatloh hmel si."
"A tullo ka tih chu mawle."
"Engtin nge instagram-ah a indah?"
"Instagram a hmanglo."
"Facebook tal?"
"Facebook pawh a hmang lo."
"A thlalak tal chu minlo hmuih ve mai mai la mawle."
"Enga tan nge i tih?"
"Awww.....ka hmu ve chak, thlahpawlh te hi chu an hmeltha duh ropui sia."
"I ler emai, hmanni lawkah bialnu i rawn nei thar ve a, hmeichhe dang i ngaihtuah leh nghal a."
"Naa...Sir khawngaihin, a ho emai, i va uikawm ve a."
"Tluangtei ka hrilh khawp ang."
Rum deuha min melh chung chuan Nathana chuan a phone a phawrh a, Javed Ibrahim-a fanu Alia Khan thlalak chu min hmuh ta a. Karei...engtin nge Nathana hian a kal tir theih? Sanvi hi lo kawp phah pawh nise ka dem hauh lovang, ava han chhelo tehkher em. Ka over pawh inlo ti maithei a, mahse khawvel hmeichhia ka hmuh tawh ah chuan a chhelo ber ang, a hmeltha si, ngo si, rapthlak tak hi a ni ringawt. Nathana nen an in selfie-na a ni a, Nathana hmel hup meuhvin ka han en chiang leh a, ka en ning theilo, ka luangliam ngawih ngawih. Mahse ka rilru ah Tluangtei a lo lang thut a, ka insum leh ta mai mai zawk a. Nathana chuan a phone rawn lak pah chuan, "Khawimaw...ka'n delete nghe nghe teh ang." a la ti zui. Keichuan, "Sir, a thlalak dang ila nei em?" ka la ti hram a. Rum zeta min melh pah chuan, "Neilo neilo, nei mah ila ka pe lovang che." a ti deuh hmuk a, a thlalak mai mai ah pawh khati khawp khan ka luangliam thei ania, atakah phei chuan hmu ila ka thidang thei ang. Lerh minlo ti viau su aw...Tluangtei hi ka hmangaih loh phah ta vek e ka tihna anilo, hmeltha ka ti a, chhelo ka ti a, ka sawi ve animai. Nathana chuan, "News ah te khan minlo hmu em? Nang ai chuan ka lar leh tawh vet vet hle mai tiraw?" tih pah chuan a han vei nuih ngei ahh..ka va han ten tak! Keichuan, "Hmu e, an khaihlum dawn che emaw ka tia, ka lo lawm em em a." ka ti ve deuh ngat a. Nathana chuan nuih pah chuan, "Nang te chu vanneih vang liau liau in ASP i ni ve mai mai alawm, a nihna takah chuan i thluak hi chu Head Constable thluak ai pawn a hniam zawk." a ti leh deuh kher nia mawle, mi hi a hmusit thin ania. Nathana chuan a phone a phawrh a, "Thawnthu ngaithla ang aw.." tih pah chuan Cowboy thawnthu hi a play ta a. Keichuan, "Eng thawnthu nge a?" ka lo ti hu a, Nathana chuan, "A ngaihnawm lutuk, SUDDEN tih a nia, hman atang tawhin ka ngaithla thin alawm." a ti a. Ka han ngaithla ve vang vang a, mahse cowboy hi chu ka tui lemlo lutuk a, a ngaihnawm ka ti lemlo. Nathana lah chuan maimitchhing tehmeuh chuan a ngaithla a, ka va han eilo tak. Nathana bawk chuan, "A chhiar thiam hluah hluah ania thianpa Chhantea hi chu.." a ti a. Keichuan, "Tunge chu chu?" ka ti leh hu mai a. Nathana chuan, "Hei...tuna kan ngaihthlak mek chhiar tu hi, Chhantea Pautu a nih hi." a ti a, engemaw ka hrechhuak zawk mai. Hman kum deuh khan Tluangtei hian Chhantea Pautu hming hi chu a sawi tawh tak e, mahse ka ngaihsak lemlo, tiang hi chu Nathana te tuipui awm tawk vel chauh ani, keini mipa tak tak hi chuan thawnthu kan ngaithla ve hman meuhlo a nih hi. Dar 10 a ri dawn hnai ta, "Sir, ka haw tawh mai ange aw?" ka ti a, Nathana chuan, "Ala hma alawm.." tih pah chuan sana a en a, "E...haw tawh leh si rawh, a tlai tawh emai." ala ti zui. Min thlah nachang pawh a hrelo, Sanvi chuan pawn thleng min thlah a, ka chhuah pah chuan, "In pa saw engtin nge i duh a?" ka han ti hram a, Sanvi chu a nui suk ringawt a. Ka bike chuan inlam pan chuan ka haw ta a, Nathana te inah lo hi chuan lenna tur ka hre hlawl lo a ni. Ka bialnu hmeltha Tluangtei lah an khuaah a awm daih bawk si, ka han zin chhung lah khan ka buai em avangin kan inhmu rei hman ngai bawk silo. Thla 3 ka cham chhung khan vawi 10 vel bak kan inkiss hman lo hrim hrim, mahse inkiss kha chu a nuam a ni. Nathana ka fak khawp mai, ka zin bo hlan khan hna tha tak amahin a lo thawk leh tawh a. Achang phei chuan ka tel ve hian ka hnawk lek lek zawk hian ka hre thin, mahse ka tello chuan nuamlo a tih thu hi a sawi ve chhen tho thin bawk si a, tak tak nimaw? INDIA'S MOST WANTED CRIMINAL Javed Ibrahim a zu hmachhawn ngam hrim hrim te kha a huaisen ka ti em em a, chupawh ama tan nilovin, a nupui Sanvi tan vek a ni.
Chutia ka tlan lai chuan kawngsira mi pakhat lo let reng hi ka hmu a, ka phu chiang kher mai. Zan a rei tawh si a, tutak chu ni ang maw? Ka bike ka ti ding a, ka va pan hnai a. Kum 50 bawr vel, patling hang lampang, hmel chhuanawm loh ve tak hi alo ni a, a hmai chu thisen in a bual khat vek a ni ber mai. Ka sawi vak vak a, mahse a thi tawh tih chu a chiang ngang mai, a thaw tawhlo hrim hrim. Rang takin Nathana ka phone nghal a, thil awmzia te ka hrilh hnu chuan ani pawh chuan alo phei vat tur thu min rawn hrilh a. Minute 10 dawn lai ka nghah hnu chuan a rawn thleng ve ta a, chumi rual chuan constable dang ka phone te ho pawh an lo thleng ve nghal bawk a. Nathana chuan, "I hmuh tirhin ti hian a lo awm tawp ami? Midang i hmu lo ami?" tiin min zawt a. Keichuan, "Aw hmulo, ka tlan laiin kawngsirah ti hian a lo let reng a, ka va pan hnai a, mahse a lo thi tawh a." tiin ka chhang a. Nathana chu a ding hluai a, a hawi kual vel a, a bul hnai te chu light chuan a en kual a. Nathana chuan, "Constable, ruang hi post-mortem turin phur phei phawt teh u...in hnungah kan lo zui ang che u." a ti a, tichuan constable ho chuan ruang chu an phur phei ta a, Nathana nen chuan kan bike ve ve khalhin kan zui ve ta nghal bawk a. Thil awmzia te chu kan DGP kan hrilh a, DGP pawh chuan, "Awle, Station ah khan lo awm ru, ka lo kal ve nghal." a ti a, hetih lai hian zan dar 11 leh achanve a pel tawh a ni. Dar 12 a rik hma hret chuan DGP pawh chu alo thleng ve ta nghal a, reife thil kan sawi ho hnu chuan constable pakhat chuan, "Sir, mitthi hi tunge a nih kan hre tawh e. Lalawmpuia Chanmari, Pu Ramnghaka leh Pi Zorinpuii te fapa a ni a, kum 55 a ni a, a nu leh pate hi an thi tawh. Fapa pahnih a nei a, a nupui nen hian an inthen tawh a ni." arawn ti a. Nathana chuan, "Umm...a tha e, achhungte chuan an hre tawh em?" a ti a, Constable chuan, "Aw, Amanda Ma'm a kal mek e." a ti a. Keichuan, "Sir, kan va kal ve kher dawn em?" ka lo ti a. DGP chuan, "A ngaihloh chu, Inspector Amanda-i leh SI Liantea te an kal kha...hetah chanchin ilo ngaichang phawt ang u." a ti a. Nathana chuan, "Sir, keichu Rinawma'n ruang a hmuhna hmunah khan va let leh lawk ka duh a ni, engemaw kan hmuchhuak maithei asin." a ti a. DGP chuan, "Ummm...anih chuan Rinawma nen hian va kal ula, Amandai te ka lo nghak ange." a ti a, Nathana chuan, "Awle Sir, chanchin kan inhrilh leh dawnnia." tih pah chuan a chhuak vut a, mi te pawh hi nghah ve thin tur a nia, hahthlak lutuk mai. Rang tak chuan ka zui chhuak ve ta nghal a, tichuan ruang ka hmuhna lam pan chuan kan inphur phei ta nghal a. Ruang ka hmuhna hmun chu kan thleng a, Nathana chuan a han enfiah a, keipawh chuan ka han thlek ve nual a. Ruang ka hmuhna bula kawr ah chuan Nathana chuan thingbung hi a rawn la chhuak a, "Rinawm, en teh." tih pah chuan ka hma zawnah chuan a rawn lek kang a. Chu thing bungah chuan thisen a kai nuai mai bawk a, a lan dan chuan chu thing bung hmang chuan tualthattu hian Pu Awmpuia hi a vua ni ngei tur a ni. Nathana bulah chuan, "Hemi thing hmang hian a vua tihna a nimaw?" ka ti a. Nathana chuan, "A ni maithei, a lu ah chauh khan hliam a tuar a, a vaw na hle ni tur a ni." a ti a. Keichuan, "Naktuk ah post mortem result ah a chiang mai ang chu, kan kal dawn nge i la en fiah dawn?" ka ti a. Nathana chuan, "Kal ila, engmah enfiah tur dang ka hmu tawh lo." a ti a, tichuan Station lam pan chuan kan let leh ta a. Station kan thlen rual rual chuan Amandai leh SI Liantea te pawh chu an lo thleng ve nghal a, Station chhungah chuan kan lut rual a ni ber ang chu. DGP chuan, "Amanda, enge chanchin?" a lo ti a, Amandai chuan, "Pu Awmpuia te chhungkua hi pathum chauh an ni a, mipa vek an ni. Fapa pahnih a nei a, a fate pahnih chu thu eng eng emaw kan zawt nual a, mahse hmasawnna a awm lemlo khawp mai. A nu leh pate an thi tawh a, a nupui nen an inthen tawh bawk si a, abak engvak mah kan hriat belh lo." a ti a.
Nathana chuan, "A fate chu biak ve ka duh a ni, chubakah a nupui hlui pawh chu hmuh ve hrim hrim a ngai a nih chu." a lo ti a. DGP chuan, "Umm....hei zan a rei tawh si a, i haw phawt teh ang u. Naktuk zing lamah kan inhmu khawm leh dawnnia, ka hmanhmawh deuh a, ka lo va haw hmasa ange aw.." tiin a chhuak nghal a, keini pawh chu kan haw ve ta a. Atukah chuan Stationah chuan hma takah ka thleng a, mahse a ngaite ang bawkin Nathana chu a lo awm leh daih tawh, a riah chilh thin amaw tih mai tur a ni. Nathana chuan, "Ilo thleng ta maw? Nizana kan thing bung-a thisen kha kan test tir a, Pu Awmpuia thisen ngei alo ni a, chuan post mortem result ah pawh alu ah khan vawi 10 chuang a zawna vuak a ni an ti nih chu." a lo ti nghal zuah zuah a. Eiloh hmel taka melh pah chuan, "I inla hria nih chu.." ka ti deuh hmuk a. Nathana chuan, "Keichu midang hi ka ring zo ve vak thinlo a ni, hawh teh Pu Awmpuia te inah chuan va kal ve teh ang." a ti a, keichuan, "Engvak nge kan va zawh leh anga?" ka lo ti hlur a. Nathana chuan, "I thatchhe sia maw....engtin nge tualthattu kan chhuichhuah thei ang tiang te chuan?" a ti a. Tichuan Pu Awmpuia te inlam pan chuan kan chhuak dun leh ta a, Pu Awmpuia te hi Chanmari ah an awm a ni. Reilo teah kan thleng thuai a, an lo zai thup thup mai a, veng danga an chhungte an ni ngei ang, puitling thenkhat chuan minlo welcome tha hle a. Pu awmpuia room ah chuan kan lut a, kan han enkual a, mipa room tih takah a felfai biklo hle mai. Thu eng eng emaw kan zawh fiah hnu pawh chuan engmah hmasawnna a awm chuang lo, kut bengin kan haw leh ta ringawt mai a ni. Kan haw pah chuan Nathana chuan, "Hmelma a nei nge ni anga rukru ten an that zawk ni ang aw?" a ti nuah nuah a, keichuan, "A ni thei ve ve." ka lo ti thla ve ngawt a. Nathana chuan tum hmuk hian min melh a, "A ni thei ve ve tihte chu kan hre vek ang chu mawle.." a lo ti vin hlur a, han chhaih thinrim hi a nuam ve hrim hrim hepa hi chu. Station kan thleng a, Amandai chuan min rawn pan vat a. Nathana bulah chuan Amandai chuan, "Sir, he case hi chu ka kutah dah mai la, ka chhuichhuak em em ang. Tualthahna pakhat ve mai ani a, nangni chu lo hahchawl rawh u." a ti a. Nathana chuan, "Amanda, tualthahna reng reng hi tenau a awm lo, tualthahna a nih tawh chuan thil pawi lian tham tak a ni tih hriat tur. He case hi i kutah DGP in a dah leh tawh em ni?" a ti a. Amandai chuan, "Aw..ka dil a, SI Liantea nena chhui turin min ti ani." tiin alo chhang a. Nathana chuan, "A tha e, mahse buaina in nei emaw...puih in ngaih chuan kan awm reng a nia aw?" a han ti a, Amandai chuan, "Awle Sir, kan theih tawp kan chhuah ang." a ti a. Chhun chawlh hun a lo ni a, Nathana erawh engmah a ei chakloh avangin keimahin chow satui leih ngat chu ka ei leh ta a. Ka eikham pawna meizial ka zuk lai chuan kan Station bula school hlui tlang lam pan mek mi pahnih te chuan ka mit an la tlat mai, a chhan chu chumite pahnih chu nizana boral ta Pu Awmpuia fapa te an nih vang a ni. Ka ringhlel deuh ta a, an mahni pa Pu Awmpuia a boral a ni a, an vui mek a, tunah phei chuan thlanmuala kalpui hun a ni tawh. Anni lah kan Station bulah an la awm daih si, chubakah tlang lam an panchho lehnghal. Ka ngaih a tha chiah lo, ka zui ta a, tlang lam pan chuan ka kal chho ve ta a. School tlang ka han thleng a, tual zawl ah chuan an thu dun a. Thingkung phenah ka biru a, ka en reng a, an hawi kual zuk zuk bawk a. Pakhat zawk Johnny-a chuan bag a ak a, a fapa naupang zawk hi Muantea a ni. Johnny-a chuan a bag ah lai chu a zipper a hawng a, a chhung atang chuan pawisa tam em em mai hi an phawrh chhuak ta teuh mai a. Mak ka ti hle mai, rinhlelhna hlirin ka khat ta, hemi te unau hian anmahni pa ngei mai chu an that a ni tih hi ka ring nghet bur nghal a. Johnny-a zawk chuan, "A lo kal dawn tih i chiang amaw?" a ti a, Muantea chuan, "Aw...hetah hian amah zawkin lo awm ru a ti alawm." a ti a.
Ka pistol ka phawrh a, anmahni lam va pan phei pah chuan, "Che tawh suh u....enge hetah intih?" ka ti a. An phu dun chiang kher mai, an dinga, ban an phar nghal a. Bag chhunga pawisa chu ka en a, pawisa tam tak a ni. Anmahni lam chu ka en leh a, "Hetah hian enge in tih ka tih chu?" ka ti leh a, Johnny-a chuan, "ASP, i buailoh na turah i buai a ni." a rawn ti khanglang a. Ka thinrim kher mai, "Engmaw i sawi a? Han sawi nawn leh teh.." ka ti vin tuar a. Muantea erawh a hlauh hmel em em a, Johnny-a erawh a zam hauh lo thung. Johnny-a chuan, "ASP, min kal tir mai rawh, i inchhir lovang." a la rawn ti deuh deuh a. Ka insum zo lo chuan a hmaiah ka hnek thal tawp a, Muantea chu a ding khur char char thung a. Johnny-a chu pistol chuan ka tin a, "Na tawrh leh i duhloh chuan in unau hian Station ah thuawih takin min rawn zui rawh u...anih loh chuan.." ka sawi zo hman lo, ka hnuglam atang chuan tu emawni hian min rawn tlawh thal tawp a. Pistol chu ka thlauh a, rang em em hian Johnny-a chuan a chhar a, min tin nghal a. Ka tho a, min tlawhthlu tupa lam chu ka va en a, palian ve tak, sek em em mai, tawnzau dum ha, tattoo ngah em em mai hi alo ni a. Min th(r)am tho lawp a, "Police ka ni e..i tih avang khan tupawh hi i man thei turah i inngai em ni?" tih pah chuan min theh thal leh thuai mai a, tha a ngah phian mai. Rum zet hian min melh a, "Vawiin chu ka naute ilo zui ruk avang hian i thih angai dawn ta a nih hi..police officer tam tak hi ka tlawm tawh tih i hria em?" a ti pang pang a, Johnny-a lah chuan inla changtupa zet hian pistol chuan minlo tin reng a, a pistol humdan hrim hrim pawh kha a diklo reng reng. Chu paliana chu a mitah tak chiang kek kawk hian ka en a, "Ihmaw thianpa, hman kuma 2004 vela drug addict inla pa deuh hi i ang lutuk. I lu ah rawmawl i hreng vel a, tattoo thing zet i nei bawk a. I tattoo-a chinese tawng inziak te kha a awmzia i hre miahlo ami? Momo & Chow Available tihna a nih kha.." tih pah chuan ka nuih vak vak a. A thinrim kher mai, a rawn tlan phei a, ka dulah tak chuan a khupin min rawn do pawp mai chuh, ka uak thawt thei nia mawle. Na tak ani, pum dawm vawng vawng chung chuan leiah chuan ka bawkkhup thlawp mai a. Johnny-a pistol ken lai chu va laksak in, "Khawimaw...keimah hian kan that law law ange, ve lutuk chuan.." tih pah chuan silai chuan min tin a. Ka tho thut a, silai chu ka benthlak sak thei hlauh mai, ka tihfuh pawh ka inring lo, ka khawloh khak fuh mai mai ani. Theih tawp chuan ka rek a, mahse awlsam tak hian ka kut chu a man bet a, a elh ri tuar mai, a na lutuk ringawt. Min chawi kang lawp a, min paih thla leh tawp mai, ava na thei tak em. Mahse ka tlawm mai mai dawn lo, pum dawm vawng vawng chung chuan ka tho leh a, "Hey Palian, eng em em nge i ei bik a? Tha i va nei ngah ve.." ka han ti leh hram a. A intithei kher mai, "I tlawm ta elaw? Lo kal ta che...Police i ni lawm ni?" a ti vel ham ham a. Thawk ka'n la te te a, rum zeta melh pah chuan, "Changtupa a tirah an che tha ngai hleinem." ka'n ti ve leh ngat a. Tichuan ka va tlan phei leh a, a ngai te bawkin min lo man leh chat mai, min man bet a, a lu chuan min tauh pawp mai a, ka hai chhu mai. Arsi an tam ngei mai, ka luhai chu ka thal leh tawp mai. Pistol chu a chhar a, min rawn tin a, "Nep ropui si, ka peih tawh lo, thi law law teh." a ti a. Mahse silai a puak dur a, chu Paliana pistol ken lai chu a per lawp a, a kut chu a thi ta zur zur mai. Ka va hawi phei a, Nathana a lo ni a, ka va lawm em. Nathana chuan min rawn kai tho a, "Khawnge i awm daih a? Duty lai i ni tih i inhre nange?" a rawn ti a. Keichuan Paliana kawh pah chuan, "Saw pa saw alawm, a chak reuh lutuk a, ka hneh ngang lo." ka ti a. Nathana chuan Johnny-a te unau chu a hmu a, "Johnny, enge in tih a?" a ti a, mahse an chhanglo. Pawisa chu a zu hmu ve ta a, Nathana bawk chuan, "Ehe...ngawiteh, thil awmzia ka man thiam nghal deuh mai." a ti nuah nuah a.
Nathana chuan ka darah a beng thak thak a, "Rinawm, vawiin chu kan vannei hle mai, a tawp kan khar dawn a ang ta khawp mai." a ti a, a nui vur vur a. Keichuan, "Nia, mahse mahni chauh chuan khar a har a ni, he palian pui hi lo awm ve khanglang a." ka ti a. NAthana chuan Paliana lam chu a hawi a, "Hey, Brock Lesnar..i kut kha a na lutuk ange, lo kal rawh Station ah damdawi kan lo hnawih sak ang che." a ti a. Paliana chuan thinrim zet hian, "Khawiah mah kan kal lovang, helai hmunah hian inthi dawn." ala ti pang pang a. Nathana chuan, "Ava luhlul reuh e, kan man velo tawp mai tur che ania, kan duhsak lai che hian thu awih mai rawh." a ti a. Paliana chuan, "Min man lovang...police ni eng ang mah ula, ka hlau lo che u." a la ti ham ham a. Keichuan, "Enteh Sir, a ban a tattoo saw en teh, chinese tawng saw...Momo & Chow available tihna tiraw?" tih pah chuan ka nui khi sung mai a. Nathana chuan a en vang vang a, "Haha...ni nang, CORONA VIRUS tihna a nih saw." tih pah chuan a nui tiah tiah a. Johnny-a chuan, "DCP Nathan, in buailoh na turah in buai ani....in thih hma hian kalsawn vat mai rawh u." a lo ti ve chhen a. Nathana chuan, "Hets....puitling titi laiin naupang lo inrawlh ve loh tur." a lo ti a, Johnny-a chu a thinrim kher mai. Nathana chuan Paliana lam chu a en leh a, "Hey Brock Lesnar, lo kal rawh le, Stationah min lo zui rawh le." a ti a. Paliana chuan, "In ngam a nih phawt chuan....mipa leh mipa te chu insual ila. I silai kha dah rawh le...in pahnih pawh khan tang rawh u, hliam ka tuar lehnghal a, in ngam em? Sawi rawh u?" a ti pung pung a. Nathana chuan, "Ka silai hi maw? Ka dah bawk lovang, i thu lo emai." tih pah chuan pistol chuan a tin a. Johnny-a chuan mangan hmel zet hian, "Hey....hey....a fair lo lutuk." a ti chel chul mai a. Nathana chuan nuih suk pah chuan, "ASP Rinawma leh DCP Nathana te chuan nizan lawka boral ta Pu Lalawmpuia te fapa pahnih, Johnny-a leh Muantea te chu anpa an vui hun vel, thlanmual an panpui vel hunlai taka thlanmual lam pan lova, school tlang lam an pan lai chu an hmu a. Thu zawhfiah tuma an han biak dawn chuan Brock Lesnar-a a lo kal a, alo dang a. Brock Lesnar-a chuan DCP leh ASP te chu kutthlak a tum a, self-defence hmangin Brock Lesnar-a ke ah chuan Nathana leh Rinawma te chuan an kap ta tawp mai a ni." tih pah chuan Paliana ke veilamah chuan a kap thut mai a, a thingthi hnawk a. Na a ti lutuk chu a then chawk chawk mai a. Nathana bawk chuan, "Brock Lesnar-a chuan khawih let a tum leh hram a, mahse DCP Nathana chuan a band dinglamah a kap leh a.." a tih lai chuan keichuan, "Sir, a ban dinglam chu i kah tawh hi...veilam zawk angai." kalo ti a. Johnny-a chuan, "Hey, kap tawh suuuuu." alo ti chel chul mai a. Nathana chuan Johnny-a en pah chuan, "Tichuan DCP Nathana chuan Brock Lesnar-a kut dinglam leh veilam chu a kap leh a." tih pah chuan Paliana kut veilamah chuan a kap leh a, thisen a per leh ta chhawk mai. A na ti lutuk chu a tap pur tawh mai, keichuan nuihsawh pah chuan, "Ana em? Ana ngawt ang. Pistol hi Glock 30 PT a nih hi.." ka lo ti vel ham ham a. Nathana chuan min rawn nghawk zeuh pah hian, "Naa...van kawlo tak..Glock 30SF an tia lawm." alo ti a. Keichuan, "Aw..ni tak maw....ka lo theihnghilh daih alawm." ka ti a. Paliana chuan tap pur chuan, "Police dawihzep tak inni....silai tellovin min bei ngamlo amaw?" a ti nuah nuah a. Nathana chuan, "I taksa kha en ta che...tunge maw bei ngam ang che le.." alo ti hrep a. Paliana chuan, "Zawnga, i chak lovang." a ti vak a. Keichuan, "Tah kher angailo, tap lovin sawi rawh." ka lo ti leh hram a. Nathana chuan police dang te chu a ko a, tichuan Johnny-a te unau leh Paliana te chu station lam kan pan pui ta a.
DGP bulah chuan kan thil tawn te chu kan sawi a, Paliana erawh kan kah hliam nual avangin hospital an pan pui a. Johnny-a te unau chu he tualthah case chhui mek tu Amandai chuan thu a zawt fiah mek a, an bulah chuan kan awm ve a. Amandai chuan, "Johnny, enge awmzia? Tha deuhvin sawi la, na i tuarlo a nimai." a ti a. Johnny-a chuan zam hauh lo hian Amandai chu a melh a, "Police ni tur chuan i chhelo mah mah a ni, innei ang hmiang." ala ti zui. SI Liantea a insum zo lo, Johnny-a hmaiah chuan a hnek siah mai a, Johnny-a ha hmai a bal thawt mai. Amandai chu za lo tih hriat tak hian a nui suk a, "Johnny, vawikhat chiah ka zawt leh ang che...i pa kha in unau-a in thah a ni tiraw? Chuan pawisa hi khawia mi nge?" a ti leh a. Johnny-a chuan rum zet hian Amandai chu a melh a, "Ka la mutpui khawp ang che...i zei dawn tih ka hria alawm." a la ti ta deuh deuh a. Amandai chu a ding hluai a, na em em hian Johnny-a hmaiah chuan a beng hawi sawk mai a. Johny-a nau Muantea chu a lo tap pur tawh mai a, Amandai chuan SI Liantea bulah chuan, "Liante, Johnny-a hi va hlap deuh teh u...mahse a nunna erawh zuah ula, min mutpui te kha a tum si a, a che tha theilo palh ange." a ti ve deuh ngat a. Johnny-a chu SI Liantea chuan a tham tho lawp a, cell lampan chuan a hnuk phei dawr dawr a. Amandai chuan Muantea bulah chuan, "Muante...thudik min hrilh rawh..thil awmzia hi han sawifiah teh le.." a ti a. Chutih lai chuan Johnny-a chuan, "Muante...engmah hrilh suh, engmah sawi suh ange che." tiin ala rawn au lauh lauh a. Muantea chuan hlauhthawn hmel tak hian, "Ka...ka hrelo." a ti hluam hluam a. Amandai chuan, "Muante, i u ang sawn hlap ve i duh em?" tih pah chuan cell chhunga Johnny-a an lo hlap t(r)e tuar tuar chu ava kawk a. Muantea chuan, "Duhlo." tiin a tap pur mai a. Amandai chuan, "Anih chuan sawi teh le...engtin mah kan tilo ang che." a ti a. Muantea chuan, "Kan unau hian drugs addict kan ni a, ka nu leh pa te an inthenna chhan pawh kha kan unau vang a ni. Kan sim thei silova, ka nu hian min hau reng a, mahse ka pa hian kan unau hian min t(r)an zel a, tichuan ka nu chu a chhuak ta nge nge a ni. Ka pa hi contractor a ni a, pawisa a ngah hle tihpawh kan hria. Kan damdawi tihna tur hi kan dil chhuak fo thin a, mahse ka nu a tlan tak avang leh kan damdawi ti reng mai hi a nin ve tak deuh avang chuan pawisa min pe duh tawh ngailova. A pawisa dah thatna hi chu kan hria a, a wardrope chhunga safe pakhat ah a ni. Safe chahbi hi kan unau hian kan zawng dun nasa thei hle a, mahse ka pa lo chuan a awmna tuman an hrelo. Pawisa kan nei tawh ngailova, kan suffer nasa dun em em thin a. Damdawi tih tur a awmloh chuan kan buai vek zel a, zan pawh kan mu thei ngailo. A tawpah chuan kan insum thei ta ngang lova, ka pa chu kan dil leh ta a. Mahse ka pa chuan pawisa chu min pek ahnekin kan unau chuan min hlap ta hrep mai a, min hau a, chhuah phal lovin kan inah chuan min tawm tir ta reng mai a ni. Ka u Johnny-a hian khami ni, ka pa'n kut min thlakdun ni atang chuan ka pa hi a haw ta em em a, thah a tum thu hi nitin a sawi ta mai a. A tir chuan ka ngam biklo, mahse kan damdawi chakna nasa lutuk hian ka rilru pawh a bual a ve zo ta a, tichuan rem kan ruat ta a ni. Nizan khan ka pa chuan a room ah pawisa a chhiar mual mual a, ka u Johnny-a chu ka pa roomah chuan lutin lighter a zawng der a. Chuveleh hnunglam atang chuan ka pa chu a rek thut a, tichuan kei chuan ka thirtiang kenlai chuan ka pa luah chuan na takin ka vua a, nikhaw hrelovin a awm ta a ni. A tir chuan kan hlauthawng dun em em a, mahse kan ti ve laklawk tawh si a, motor la chhuakin ka pa chu kan phur chhuak ta a. Zan a rei deuh tawh bawk a, tumah khawlaia veivak an awmloh lai tak a ni bawk a. Ka pa chu khawlaiah chuan kan dah tawp a, kalsan kan tum ta a. Mahse a la thi silova, lo damchhuak ta se, police a hrilh ngei awm si a. Tichuan ka u Johnny-a chuan thingbung la in ka pa chu vawi engemaw zat a lu ah chuan a vaw leh a, a thi tih kan hriat hnuah kan haw leh ta a ni." a ti a.
Nathana chuan, "Anih leh kha Paliana kha? Khawia mi nge?" a ti a. Muantea chuan, "Kan damdawi ruih tur min supply sak thin tu a nih kha...ahming chu Henry-a a ni a, anihna takah chuan ka pa kha that mai tura min titu ber leh min fuihpawrh tu ber pawh amah kha a ni." a ti a. Amandai chuan, "Anih chu...nih leh pawisa te kha? I pa pawisa inruk chhuah chu em ni?" tiin a zawt leh a. Muantea chuan, "Aw ni e...kan thah zan khan a chahbi chu kan laksak a, tichuan pawisa bawm chu hawngin a pawisa zawng zawng chu bag ah kan khungkhawm a. Khami zan khan damdawi pawh chu kan la lei nghal bik mai lova, achhan chu kan chiai em vang a ni. Pawisa chu bag ah dah in bag chu kan huanah kan dahtha a, achhan pawh police te lo kalin kan in an rawn dap dawn tih kan hriat lawk vang a ni." a ti a. Amandai chuan, "Umm...nimina kan lo kal khan i hmel ah khan hlauhthawnna a awm tih chu ka hmu in ka hre reng a ni. Anih leh damdawi supply tu che u kha...Henry-a khan damdawi te chu khawia mi nge a neih thin?" tiin a zawt leh a. Muantea chuan, "Ka hrelo...ka hrelo tak tak, ihh..damdawi hi min leitir thin a, chu chiah chu ka hria." a ti a. Amandai chuan, "Anih leh engtin nge in inhmelhriat reng reng a?" tiin a zawt leh a. Muantea chuan, "Amah kan dawr thin hma hian kawng laia standing ho hi kan dawr thin a, an ti to thei em em a. Pawisa kan nei tam thin silo a, kan hek phah thin hle bawk. Zankhat chu Henry-a hi kan tawng fuh hlauh a, ani chuan min leitir ta a, a number min pe a, tichuan kan dawr ta ziah thin a ni." a ti a. Nathana chuan, "Amanda, khawnge an nu chu a awm hrim hrim a? A pasal a thi tihte hi a hre ve lo em ni? Biak ve te pawh a tha ang." a ti a. Amandai chuan, "A nu hi Myanmar lam mi daih a nia, nizan kha chuan kan hrilh tawh a, vawiinah a lo haw mek anih hmel." a ti a. Nathana chuan, "A tha e...Henry-a chu ka duh aiin ka kap hnem deuh a, nikhawhrelovin a awm a ni awm e, a zia lo tak tak." a ti nuah nuah a. NAthana beng bulah chuan, "Azia azia, min sawp nasat zia chu e..a phutawk chiah." ka han ti leh hram a, Nathana pawh a nui suk ringawt. Amandai chuan Muantea bulah chuan, "Henry-a hian midang rawn kalpui thin a nei em?" a ti a, Muantea chuan, "Aih...nei ngailo. E..vawikhat chu mipakhat a lo kal pui a, a unaupa a nih thu a sawi a. Mahse vawikhat chiah, abak chu amah hlirin a ni." a ti a. Amandai chuan, "Umm anih tak chu...Constable, cell chhungah han khung phawt teh u." a ti a, cell chhungah chuan an khung ve ta a. Johnny-a chuan, "DCP Nathan, ila inchhir ang..ila inchhir khawp ang." ala rawn ti t(r)alh a, ka thin in a tuar ta lo. Va phei ka tum a, mahse Nathana chuan minlo dang a, "Aho lutuk, saw...an vuak mek saw..tisawn lo râk mai mai rawh se." a ti a, a nui suk a. He case hi sawi tawh ang khan kan case a nilova, Amandai leh SI Liantea te case a ni. Zan alo ni a, ka duat em em, ka tleitir lenmawii...i ti mai teh ang, ka bialnu hmangaih em em Tluangtei chuan min rawn phone ve ta hlauh mai..
"Hello, U Rin...enge i tih a?"
"Engmah tilove....ka mu mai mai."
"Zanin chu ka nui hnem ngei mai...iva che nawi awm ve a?"
"Enge ka chet nawi na? Ka van hrethiam lo."
"U Nathana'n tlai chaw eikham vel khan min lo phone a, vawiinah drugs addict pakhatin a sawisa che a nimaw?"
(Hrep tak chuan, min sawisa lai kha a lo hmu reng a nimaw? Minlo chhan ve vat mai tur hi ania, sual lutuk mai.)
"Ah...ih..hehe..min sawisa pawh a nilo, ka awm a nuamlo lutuk a, ka che tha theilo alawm."
"Haha....apawi hleinem. Mi zawng zawng i hneh thei vek kher hleihnem tiraw?"
(Zawng Nathana mai mai chuh!!! Amah pawh khan a bei ngam tawp silo...silai chu keng lo se a sawisa ve awm tho emai.)
"Umm..ni mai teh se. Enge i tih a?"
"Ka bialpa ka be mek a nih hi."
"Ka ngai tawh lutuk che."
"Kei pawn ka ngai che...Duat, ka'n mu tawh mai ange aw...naktuk kan in exam dawn a, thawh hma a ngai sia...phal em?"
"Umm phal e, tha deuhin i ti dawnnia."
"Ka lawm e...ka hmangaih che. Muttui auh.."
"Ummm keipawn ka hma.."
Sawi zo leh hman ta lo, Nathan Malsawmkima....Chow satui leih heh-a, inla luck-a, inla-finga, DCP thawveng ber, vai pasal mai mai lehnghal. Ka room a rawn hawng thuai mai chuh ka phu nasa lutuk ringawt, ka phone ka thlauh a, a la thi hmuk zui. Ka tho a, va hnek nghal mai ka duh rum rum hial a ni. Engemaw Tluangtei ka hmangaih thu ka hrilh dawn apianga min rawn tibuai ziah hi ka hrethiam thei hlawl lo, ka phone chu ka chhar a, a sir ala khi zui, ka va han thinrim tak em. Vin zet hian, "Lo kik ve phawt tur alawm...thut thut zela che." ka ti vin hlur mai a. Nathana chuan, "Enge ilo tih a? I phut zuk a? Thil thalo te hi ilo tiru anilo maw?" tih pah chuan a la khi sung zui, chhe ver vur ania. Rum zeta melh pah chuan, "Ka phone hi en rawh...a thi hmak mai, ala khi zui." tih pah chuan ka phone chu ka hmuh a. A nui suk a, "Ava chhe hma ve, a man a tlawm em bawk alawm. A thar ka lei dawn che nia, titau hma ropui si." a ti a, a nui vur vur a. A hmel pawh ka en peih tawh lo, "Enge ilo tih dawn...zan zan ah?" ka ti hmuk a. Nathana chuan, "Henry-a kha alo harh chhuak tawh a, tlanchhuah a tum nasa a ni awm e. Amandai ten tunah Station ah an kawl mek a..iva kal ve ang hmiang." a ti a. Ka va han ngei tak, "Chumi vang chuan maw min rawn tihbuai a? Kan case khawih tur a ni lo a, Amandai te case khawih tur a nia...enge kan va tih ve ang?" ka lo ti vin hlur a. Nathana chuan, "Min rawn ko ve alawm, chubakah an thusawi te ka hre ve duh hrim hrim alawm. Insiam teh....senior tawh ropui si, titau bur bur reng suh." ala ti zui. Senior te chu minla tizui, mahse ka boss a ni miau si a, a thu ka zawm leh mai loh chuan. Peihlo rilru tak chuan ka insiam ta a, tichuan Station lam pan chuan kan kal ta a. Station chu kan thleng a, Henry-a chu alo thu kun lap a, Amandai leh SI Liantea chuan an lo dinchilh a. Nathana chuan, "Amanda, Pu Awmpuia nupui chu alo thleng tawh em?" a ti a, Amandai chuan, "Aih, kawnglaiah an motor a chhia a ni awm e, guest house ah an riak khawm dawn a." a ti a. Nathana chuan Henry-a chu a en a, "Hey, Brock Lesnar....i hliam chu enge a an a?" a ti a. Henry-a chu a rawn hawi chhuak a, NAthana chu rum zet hian a melh a, "DCP...ila inchhir dawn alawm...ila inchhir khawp ang." a rawn ti khur khur mai a. NAthana chuan, "Khanglang chuan.." tih pah chuan a beng hawi sawk mai a, ala nuih huah huah zui. Zan khua chuan kan dawp a ni ber mai, mahse engmah a sawi duh bawk silo. Kut kan thlak a, ka hnek a, kan vua a, kan beng a, mahse a inpuang duh lo. A sawi awmchhun chu, "DCP Nathan, ila inchhir ang." tih chauh hi a ni. Sawi tak ang khan Amandai case chhui mek a ni a, kan haw san ta ringawt a. Atukah pawh chuan nileng chuan kan dawp leh a, mahse engmah a inpuang duh silo, phone a nei bawk silo a, a hahthlak ngei mai. Tlai kan duty kan haw lam chu Nathana chuan, "Rinawm, nimin kha chu i va han zawr em em ve...i hneh ngang lo a nih kha tiraw?" tih pah chuan min han nuih vak vak a. Keichuan, "Sir, enge Tluangtei bulah i sawi kher a? Ka zak teh ania, nangpawh khan i insual pui ngam bik miah loh kha.." ka ti a. Nathana chuan, "A nuam ve alawm.." tih ringawt chuan min chhang a, ka la beng khawp ang, hepa hi chu. Keichuan, "Nimin pawh khan min sawisa lai i hmu vek tih ka hria a nia aw...nge minlo chhan mai loh a?" ka ti leh a. Nathana chuan, "I nuihzatthlak em alawm....ka rawn chhan che kha ngawi mai mai teh." a la ti zui. Hnial peih tawhlo, tawngthei emai..."I nu a awm em inah? A thingpui lum ka in chak emai.." ka ti a, NAthana chuan, "An zin leh tawh...an monu rai lah hi an ngaihsak lo ania, ka pa nen an zin, Champhai ah.." a ti a. Keichuan, "Nihleh inah tunge awm?" ka ti a, Nathana chuan, "Mary leh Sanvi nimai.." a ti a. Keichuan, "Anih leh ka lo leng dawn....vainu thingpui lum in teh ang." ka ti ve deuh kher a, a nui suk ringawt.
Nathana te in kan thleng a, inchhung kan lut a, NAthana chuan, "Sanvi...Sanvi..ka lo haw e." a han ti lauh lauh a, mahse Sanvi chuan a chhang hauh lo. Nathana te room kan lut chiah chu kan thil hmuh chuan min barakhaih hle mai, room chu a hnawk nuai a, khum te chu a inchinglet nasa kher mai. Tumah lah chu hmuh tur an awm der mai silova, make-up bawm te, thawmhnaw te chu a darh nei nuai mai a. NAthana chu a mangan hmel hle mai, keipawh ka hrilhhai takzet. NAthana chuan a nupui leh Mary chu a au vak vak a, chutah khum hnuaia hmeichhe naupang tap ri chu kan hre ta. Khum hnuai chu kan han bih a, Mary a lo ni reng mai. Nathana chuan Mary chu a pawm chhuak a, Mary chuan, "Apa..." tih pah chuan Nathana chu a kuah a, a tap hawm hawm mai a. Nathana chuan, "Bawihte...tinge hetia i awm? Khawnge i nu?" a ti a. Mary chuan, "Apa...anu an hruai daih..mi pathum anlo lut a, a nu an hruai daih.." a ti a, a tap vak vak a. Nathana chuan, "Tute nge? Tute nge lo kal?" a ti chel chul mai a. Mary chuan tap chungin, "Ka hrelo, anu kha an beng vak vak a, tichuan an hruai chhuak daih.." a ti a. Chuveleh Nathana phone a lo ri a, Sanvi a lo ni. Rang takin a pick up a, "Hello, Sanvi..khawnge i awm?" a ti nghal chul mai a. Mahse phone a mi chu Sanvi a ni hauh lo, mipa aw...aw thum tak mai hian, "I nupui chu kan kawl e, a dam tha e." a rawn ti ta mai a. Nathana chuan vin zet hian, "Tunge i nih?" a ti vak a. Chupa chuan, "Henry-a kha chhuah rawh...i chhuah hma chu i nupui hi i hmu let bik lovang." a rawn ti khur khur mai a. NAthana chu a ding hluai a , Mary chu rang takin ka lo pawm vat a. Nathana chu a mit a sen vek thei hial a, "Zawnga, tunge i nih a? Khawnge ka nupui i dah? Engvanga ka nupui kha kidnap nge i nih?" a ti khur dur dur a. Chupa chuan, "Henry-a khan i bulah a sawi kha, ila inchhir ang a tih mawlh mawlh kha....i inchhirna tur thil i ti a nih tâk hi....i hrethiam tawh em?" a rawn ti a, a nui huah huah a. Nathana chu a maimitchhing vang vang a, "Awle...a tha e, ka nupui chu ka lo bia ange." a ti a. Second 5 vel chu a reh vung vung a, chutah Sanvi aw ngei mai chuan chauh hmel tak hian, "Nathan..duhtak, ka hlauthawng lo, ka tha a nia, reilo la, lo kal vat rawh aw..." a rawn ti tham tiak mai a. Nathana chu a mittui a tla zawih zawih mai a, chutah zawi sap, mahse fiah tak si hian, "Lo lungngai suh duhtak..ka lo kal ang...KA HMANGAIH CHE, SANVI..KA HMANGAIH LUTUK CHE." a ti a.
TO BE CONTINUE.....
Comments