HAIHAWTLIANA

HAIHAWTLIANA

by : Aaron Malsawmdawngzuala

"Pu Rintluang, i fapa pawh chu ava rei ve mawle? A hmel hmuh te pawh a chakawm tawh alawm."

"Nia, in hmel te a hmu dawn si a, a inchei uluk deuh pawh aniang nge...hehe."

"Nang meuhvin min rawn dil si a, i fapa pawh chu thiamna ngah tak a ni ngei ang. Kan school ah hian Mizo teacher kan mamawh lai tak alo ni bawk nen...i dilna te chu kan hnial ngam nang le.."

"A lawmawm thin teh e, ka fapa ve hi chu ka neihchhun tak meuh meuh a ni a, mahni fa te a nih vanga fak angah minlo ngailo la, a inchhiar zau ve thawkhat thin viau chuan ka hria."

"Umm, engpawh chu nise...amah rawn biak ve hrim hrim duh vang chauha kan nu nena lo kal hi kan ni a, chutia han insiam vak angai em mawnile?"

"Ka'n phone chhin ange, alo chhuk har riau mai."

Pu Rintluanga chuan a fapa Malsawma chu a han call ta a, inchung lama a room a lo insiam mek, tlangval hmeltha leh piannalh tak, a hmel en reng reng pawha nula tamtak te tan chuan han in Lock Down pui mai pawh iai awmloh tak mai, Malsawmsanga, MS-a tia an koh thin pawh chu a kamis zinga a duh ber chu thur chhuak nalhin, neck tie nen smart em em chuan darthlalang hma ah a lo insiam mawlh mawlh a. A pa, Pu Rintluanga hian Msa hi hna a hmuh theih ngang loh avangin a thianpa, Private Middle school Principal, Pu Hruaitluanga hnenah chuan teacher atana a fapa chu hna lo pek ve a dil ta ringawt mai kha a ni a. Subject ah pawh a fapa thluak mil tawk tura a ngaih, Mizo subject lo lak tir ve chu a dil a ni. A room dawhkana a phone lo vibrate hlarh hlarh chu Msa chuan a han la a, "Enge ni ka pa?" a han ti a. Pu Rintluanga chuan, "Bawiha, i hman tawh em? Hei Pu Hruaia ten an nghak rei tawh che ania.." a rawn ti a. Msa pawh chuan, "Awle ka pa, ka lo chhuk nghal e." tih pah chuan a phone a dah a. Room a chhuahsan pah chuan, "Vawiin Sunday amaw ka han tih thut chu le...pawilo, tihian a smart zawk." a ti nuah nuah a.

Inhnuai lamah chuan a chhuk a, Pu Hruaitluanga te hmaah chuan inla polite tak hian nui sang chuan ava ding a, "Min lo nghak rei em? Ka inbual rei deuh mah mah alawm le." a han ti vel deuh luam a. Mahse Msa pa chuan Msa chu a lo entha ngam lo, inthlahurn hmel tak chuan lehlam a hawi daih mai a. Chutiang bawkin Msa nu pawh chuan zah hmel tak hian bang lam chu a hawi vung vung mai a, Msa pawh anu leh pa awmdan chuan a ti hrilhhai ngang aniang, hriatthiamloh hmel tak chuan a hawi hru ringawt mai a. Pu Hruaitluanga te nupa erawh chuan ka hau hian Msa chu anlo en a, hmundang an hawisan thei thak lo.

MSa pawh a ngaih a tha ta hauh biklo, amah ah chuan diklo lai a awm a ni mai angem tia a rilru a inbe mawlh mawlh chung chuan a han in enfiah a. A kawng achin chunglam chu nalh tak a ni, kamis var, thianghlim leh fai em em mai a ha a. Necktie dum hlarh mai a awrh bawk a, amah pawh a rimtui vang vang hle. Mahse a kawng achin hnuailam chu a zu melh leh a, eng kekawr mah alo halo chu niin. A kawng achin chunglam chu nalh viau mah se, a hnuai lam erawh boxer leh chapal inkhinglo chauh alo ni. A awmzia chu...he tlangval kum 26 mi hian a insiam lai khan kekawr a hak theihnghilh daih tihna a nih chu. A zak lutuk chu a thlan a tla nghal bawrh bawrh a, zalo tih hriat tak hian a nui suk a. Pu Hruaitluanga chuan Msa en reng pah chuan, "Ngati nge?" tih ringawt a sawi thei. Msa chuan zah lutuk avanga aw khur dar dar chung chuan, "Hehe..ka kekawr ka han ha leh lawk ange tih rawn sawi turin ka rawn chhuk zuai a, ka chho leh phawt ange." tih pah chuan rang em emin a room ah chuan a tlan chho lehnghal a.

A room-a luh pah chuan, "Mawl lutuk, haihawt thlak lutuk." tih pah chuan a chal ah chuan amah leh amah chu a inbeng vak vak a, tlangval pui si kekawr han hak theihnghilh tlat mai chuh, a va mak ngai vele. Rang takin a kekawr chu a ha sawk sawk a, a mangang hle mai. Hna a hmuh ve ngei a inring tawh a, a haihawt lutuk avang hian hna ahmu hleithei lova, a hmuh ve pawhin kar hnih-khat hnu velah ban lehnghal a ni thin. "He hna hi ka hmulo a nih vaih chuan...hna ka hmulo kumkhua tawh ang. Malsawmsang, Mawla, thluak thawl lutuk.." tih pah chuan a inhau mawlh mawlh a. Chutia ama tawka a lo buai em em lai chuan a phone a rawn ri a, a thianpa Victor-a alo ni. "Hello, Ms...enge i tih, i buai em?" a rawn ti nghal chel chul mai a. Msa chuan, "Ka buai lutuk, ka hman hrihlo." a lo ti hmuk a. Victor-a chuan, "Thiana, enteh...ka bialnu khan min then a, min lo kawp reng tih ka hrechhuak a." t(r)ah aw tuau chuan a rawn ti a. Msa chuan a thianpa, a hmangaih leh a duhsak em em mai, Victor-a chu ti taka a rawn beidawng chu a khawngaih rual rual in a bialnu pawh chu a haw nghal hle a. Thinrim tak chuan, "Enga? Tunge i bialnu chu?" a han ti nghal tun tun a.

Victor-a chuan vin lek lek hian, "Mawla, ka bialnu khaa..nangma min tihpui a nih kha. Emily, Emily Zosangzeli khaaa.." a rawn ti khur khur a. Msa chuan a room tukverh lam a pan a, dahchhuah pah chuan, "E..kha nu kha maw...ka hre leh si. Ka tihpui che anih kha, i theihnghilh tawh ami?" a han ti leh daih a. Victora chuan ring tak hian, "Malsawmsang, min tihpui thu ka rawn sawi zawh chiah kha..enge maw thil hi i theihnghilh reng le? Rilru na em em in ka awm a, ka rawn hrilh ve che a, biaktlak loh lutuk mai." a rawn ti pung pung a. Msa chuan, "Sorry Bawiha, lungngai suh..engtin tak nge in intih thiamloh a? A grass root atangin min han hrilh teh." tih pah chuan a meizial chu a tan a, tukverh bulah chuan thutna a rem tha sauh sauh a. Meizial zuk khuk hluah hluah pah chuan Victora thusawi chu a ngai thla a, a lo thinrim pui kher mai.

Msa chuan a hna chungchang te, Pu Hruaia te nupa in an nghak mek a ni tih te chu a hre leh tawh lo, Victor-a'n a rawn phone khan engkim a theihnghilh leh vek tawh a ni. A theih ang tawk chuan a hnem a, chutia an inbiak mawlh mawlh lai chuan Msa chuan a necktie awrh lai chu a khal nuap nuap a. Chutia necktie a lo awrh reng tih a han hmuh chuan mak a ti angreng hle a, Victor-a tawng mawlh mawlh lai chuan, "Lawk aw Vic...vawiin hi Sunday ami?" a han ti hu a. Victor-a chuan, "Nilove...vawiin chu inrinni ania, engatinge? Teh thut che chuan?" a rawn ti a. Msa chuan, "Ava mak awm ve...tinge ka va inchei smart em em si ve?" tiin a phun bul bul a. Victor-a chuan, "Huiham...Sunday amaw i ti aniang chu..engmah a sawi tui theihloh, hrilh tlak loh lutuk." a ti hrep a. Inthiamlo takin, "Sorry bro, sawi rawh sawi rawh." a han ti leh a. Victor-a pawh chuan a tui vak tawhlo hle mai, mahse a sawi chhunzawm ve leh zel mai bawk a. Msa pawh chuan Victor-a thusawi ngaihthlak pah chuan a thawmhnaw chu a hlip mawlh mawlh a, boxer nen chauh chuan khumah a let tual a.

Darkar chanve dawn an inbiak hnu chuan an duhtawk thei ta hram a, "Huiham...Victor-a te ang hi chu an vanduai ve hrim hrim a ni e." a han ti zawk zamah a. Chu veleh a room kawngkhar chu na takin a rawn inhawng thuai a, Msa nu leh pa te chu thinrim em em hian an rawn lut a. Pu Rintluanga chuan, "Mawla, kekawr pawh chu ilo la ha chuang nange? Ehee...kawr pawh i ha tawhlo lehnghal." tiin rum zet chuan a fapa haihawt zet chu a vin khur khur a. Msa lah chuan a aia vin hian, "Amak e aw..rawn kik hmasak ve phawt thin tur a nia." a lo la ti let hrep zui. A nu chuan, "Khanglang che chuan, nangmah vanga i pa nena kan zah zia hi i hria em? I insiam dawn pawhin, 'Ka lo awmpui ang che, thil eng eng emaw i theihnghilh anga, i buai leh ang.' ka ti mawlh mawlh a, 'Nu te siam rual ka ni tawh lo, ka confi ve tawk.' i ti pang pang a, kekawr i rawn hak theihnghilh a, awii ka sawi hne takzet tawh, thuawih lo si." a ti vak vak a. Pu Rintluanga pawh chuan, "I hna hmuh theihna tur chance hnuhnug ber a ni tawh a, mahse engmah lo maiah i chan tir leh ta a nih kha. Pu Hruaitluanga min tawngkhum dan kha i hria em? 'Zah lo takin kekawr halovin kan hma ah a rawn inlan ngam a, engti kawng mahin ka school ah hian khatiang mi zaktheilo kha a thawh ka phal ngai lovang.' tiin min chhuahsan asin." hnuk ulh lek lek chuan a han ti a. Msa chuan a hrechhuak ta, mahse engmah a sawi lo, hnuailam melhin a kun reng ringawt a. Anu leh pate chuan an hauh chhunzawm mawlh mawlh a, Msa chu muangchang hian a rawn hawichhuak a, chutah zawi sap hian, "Pa, ka duh vanga theihnghilh ka nilo tih chu i hriat kha...duhtawk tawh rawh u." a ti tham tiak a. A pa chuan thinrim tak hian, "I duh vang reng anilo tih chu kan hria, i naupan lai atang tawh a he natna hi vei tawh i ni tih pawh a hrechiang ber tu chu kei leh i nu te hi kan ni. Mahse i luhlul em em a, vawiinah pawh buaina i tawk leh ang tih hlauvin i nu in awmpui che i tum a, i han duhlo ve khanglang a. Kekawr halovin i rawn chhuk a, i roomah chho in i han ha vat dawn amaw tih laiin hetah i khumah saruak deuh thaw in ilo mu leh a. Angaihna ka hre tawh lo, tikhan hna neilo khan awm reng la, nupui neilovin leng tar mai rawh. Kei ni nupa zawng kan vanduai a ni e, min chawm thei tu tur fapa kan nei ve ta e tiin kan lawm ve em em a, mahse fapa thu awihlo leh haihawt em em mai kan nei che a, tutakin min chawm ve ang maw?" tiin a vin leh ta hrep a, room atang chuan an chhuahsan ta a.

Muangchang chuan a khum atang chuan Msa chu a tho chhuak a, "A va han vanduai thlak bik tak em!" tiin a mittui chu a hru zeuh a, tichuan a thawmhnaw te chu a ha a. Meizial chu phawrhin a tan leh a, a beidawng takzet a ni. Msa hian kum 12 a nih lai atang khan natna chimawm tak mai, Alzheimer natna chu a vei ve ta hlauh mai a, harsa takin tuition te la in theihtawp a chhuah hnuah pawl 12 chu a pass ve ta hram a ni. Amah hi lehkha thiamtheilo pawh a ni hran lo, thiam chak tak zawk a ni. Mahse a thil hriat thar hlim hi amah an biak buai emaw, thil dang a ngaihtuah chuan a theihnghilh leh vek zel thin a. A nu leh pate hian thu awihlo tiin an hau fo thin a, mahse thu a awihloh vang anilo. He a natna hi amah ngei pawh hian a theihtawp chhuahin a beilet ve hram hram thin a, theihnghilh loh tuma a inzir mek avangin hemi ni pawh hian a nu puihna chu a hnial a ni. Mahse a vanduaina erawh a kaltluang zel zawng a nih hi, tlangval kum 26, nupui nei rual tawh, han en mai pawh a mi pangngai tak, hmeltha vur leh piannalh em em ni si hi mi ang zân lo chu a ni ta ber mai.

Haihawt viau e tilo chuan a thil hriat tawh hi chu a hrechiang thei hle a, mahse thildangin a tihbuai erawh chuan a theihnghilh leh nghal thin thung. Entirnan...rawng lo bawl mek ta se, a rawngbawl hlan chuan a nu in room ah lo ko phei ta se, a rawngbawl lai chu theihnghilhin a nu kohna ringawt chu a rilru ah a awm nghal a. A hrechhuak ve mai ngailo a, hrilhchawp zel angai thin bawk. A pa in Mizo teacher tal chu a nih theih a ring a, achhan chu thu leh hla lampang hi a thiam fu mai a, mahse sawi tak ang khan a thu phuah lai mek te pawh hi a theihnghilh leh nghal mai zel. Achang phei chuan ama thuziak ngei a chhiar te pawh hian, "Hei hi tu ziah nge? Ka rilru ang chiahin a ziak a nih hi.." te a ti leh hu thin. Vanduai viau mahse hlim hmel hi a pu reng thung a, a chhungrilah tap nasa thin hle mahse midang hmuh ah chuan hlim hmel a pu reng thin a, chuvang chuan mi pawhin an ngaina hle a ni. A thiante pawh hian vawitam an bum thin a, an pawisa a ba ang ten an hrilh thin a, ani lah chuan a hre tawh ngai silo nen, a pe ve leh mai thin bawk a. Mahse a thiante zingah hian thian rinawm tak mai pathum lai a nei a, chu chu nichin lawka kan sawi lan tak Victora leh Mapuia leh Hmingmawia te an ni. He athiante pathum avang hian amah bum tumtu tamtak te lakah a him leh nge nge thin a, Victora, Mapuia leh Hmingmawia te hi chuan Msa hi thian tak tak angin an en a, a haihawt em avang hian buaina tam tak lak atangin an chhanhim fo thin reng a ni. Pu Rintluanga hi Msa pa a ni a, a nu hi Pi Sangzuali a ni. An fapa mal neih chhun liau liau a ni a, an duat hle a, Alzheimer natna hi a nautet lai atanga nei a ni biklo. School a kal theih tan atang khan Msa hi lehkha thiamthei leh naupang duhawm tak a ni a, a fel em em a, zirtirtu te pawhin an duhsak thin hle. Mahse kum 12 a rawn tling chho a, pawl 7 chu mak tak maiin a fail ta hlauh mai a. Lehkha thiamthei tak, pakhatna ni ziah thin kha pawl 7 a beinawn ta mai chu mak an ti hle a. Chuta tang chuan a haihawt ta em em a, a nu leh pa ngaih ti thalo khawpa a haihawt tak em avang chuan doctor hnenah an hruai ta ringawt a, doctor chuan Alzheimer natna a nei tih a lo hrilh ta a ni.

Msa pa Pu Rintluanga hian afapa Msa hi a fapa neichhun liau liau anih avangin alo pian tirh pawh khan Pathian malsawmna sang tak kan dawng ani tiin ahmingah pawh Malsawmsanga tih a vuah ta a nih kha, mahse chu an malsawmna dawn lah chu a haihawt em em mai si. Pu Rintluanga hi kum 60 zeta upa a ni ve tawh a, sawrkar hna chhete a thawk ve a ni. Tin Msa nu Pi Sangzuali hi kum 56 niin, in lam enkawl tu ber a ni thung. Pu Rintluanga hlawh tam lemlo tak hmang hian an nung ve tawk tawk a, Msa pawh theih ang tawkin mi in sak naah te a inhlawh ve a, mahse a hlawk lemlo khawp mai. A haihawtna chu a thawhpui ten hmang tangkaiin an bum an bum a, ani lahin awih tur nge awih loh tur a hre silo, an sawi ang ang chuan a awm mai thin a ni.

Fapa neichhun kha a ni miau a, Pu Rintluanga chu han beidawng viau thin mahse afapa hian hna engemaw tal chu hmu ve ngei se a ti em em a, a zawnsak leh ta tho a. An kawmthlang pa, Pu Rintluanga thianpa Pu Muana chuan Msa tan hna a hmuhsak theih maitheih thu a rawn hrilh ta nge nge a. Pu Muana chuan, "Hei aia nasa hian Msa hi fimkhur se, nangpawh in hrilh ngun deuh la. Ka thianpa hi Hotel Manager a ni a, pa fel leh zaidam tak a ni a, mahse a thin thawk erawh ana ania. A hnuaia hnathawk te hi a duhloh zawnga vawikhat an awm anih vaih chuan chance dang a pe ve mai mai ngailo, a ban nghal vang vang a nimai. Chuvang chuan Msa pawh hi hna a neih theih nan kan Manager hi ka lo sawipui anga, ahmuh ve hlauh chuan fimkhur nasa rawh se." a ti a. Pu Rintluanga chuan, "Tunge a hming ni reng reng?" tiin a zawt a. Pu Muana chuan, "Zorema a ni a, Pu Zorem kan ti mai thin." tiin alo chhang a. Pu Zorema hi Pu Muana sawi ang deuh khan pa zaidam tak a ni a, mahse a thinrim tawh chuan mi hlauhawm tak a ni thung. Mi hausa tak leh khawsa thei tak a ni a, fa pahnih a nei a, a upa zawk chu vanduaithlak takin accident vangin a boral tawh a ni. A fapa boral ta hi a hming chu Chhandama a ni a, a thihhma hian nupui a nei hman a, a nupui pawh hian fa a pai mek nghe nghe a ni. Chhandama a boral khan a nupui Akimi pai mek, an fa chu thla khat chiah ala ni. Pu Zorema nupui pawh hi a thi tawh a, an fanu, Chhandama nau Deborah Zothanpuii pian hlim hian a boral ve nghal a ni. Pu Zorema hian a fanu Deborah leh a monu Akimi te hi a duat dun hle a, Akimi pawh a fanu upa zawk ang maiin a en a, Akimi pawhin Deborah-i hi nau ang chiahin a en a, a duat thin hle.

Pu Rintluanga leh Pu Muana te chu Pu Zorema te inah chuan lengin Pu Muana chuan a thiam ang tawk chuan Pu Zorema chu a han titi pui a, Msa chu a han fak vel luam a. Pu Rintluanga pawhin a fapa haihawt em em mai Msa chu a han sawi khawngaihthlak vel a, pawl 12 thleng chiah a kalna chhan te pawh Alzheimer natna a neih vang tih sawi duh lovin, an retheih em vang zawk a ni tiin a hrilh a. Achhan chu Alzheimer natna a nei tih Pu Zorema hian hre chiah se chu eng ti kawng mahin Msa hi a duh dawnlo hrim hrim tih a hriat lawk vang a ni. Pu Zorema chu a han thu tha sauh sauh a, thingpui no dawm pah chuan, "Mmmm...Thianpa Muana meuhvina chutia min rawn hrilh tak si ah chuan kan hnial ngam dawn em mawni le." tih pah chuan a han nui khi deuh sûng a. Pu Rintluanga chu a han en leh a, "Pu Rintluang, ngaihloh lamah lo ngailo la, kei hi chu mi fimkhur tak hi ka nia, ka hnuaia thawk te hi chu an tha em em tur hi a ni tawp. Tin, ka huat ber chu tihtur hrilh chawp zel ngai te, thil theihnghilh hrat em em te hi an ni a, i fapa erawh a nih veloh ngei ka beisei." a han ti chu Pu Rintluanga chu a phu zuk a, a thingpui sa ver vawr inlai pawh chu a hnar khu chhuah teuh ngei mai. A sa ti lutuk sî vawng vawng pah chuan, "Nilo ve, aaa..chutia haihawt em em a ni hran lo, tiraw Muana." tih pah chuan Pu Muana chu a han nghawk zeuh a. Pu Muana pawh chuan thaw dep dep hian, "Hehe...a fing lutuk, kan nau Msa hi chu...tlem hian a naupangchhia deuh a." tih pah chuan zalo tak hian a nui suk a. Pu Zorema chuan, "Anih chuan interview ni pah fawmin i fapa chu vawikhat tal ka hmu ve reng reng duh a ni." a han ti a. Lawm tak chuan Msa pa chuan, "Awle..khawiah nge i hmuh duh? Tunah ka ko dawn em ni?" a han ti nghal deuh luam a. Pu Zorema chuan, "Vawiin ah law law hian hmuh ka duh a, ka hotel ah lo kal se...hei tunah dar 10 a ri tawh a, dar 1 velah a theih chuan lo thleng se a tha ang." a ti a. Pu Rintluanga pawh a lawm ngei mai, "Anih chuan ka lo hrilh ange...kan haw phawt ange." tiin an inthlah liam ta a. Pu Rintluanga chuan phur tak hian Msa bulah chuan a hna hmuh theih dan tur vel chu a hrilh a, Msa pawh a lawm kher mai. Pu Rintluanga chuan, "Bawiha, tun tum chu hlawhchham tawh suh ang che. Fimkhur takin aw..tha takin chhang la, engmah dang ngaihtuah reng reng suh ang che. I pa Muana pawhin a fak teh mai che ania..." a tih lai chuan inla confi zet hian Msa chuan, "Dad...don't you worry. Engmah diklo a awm tawh lovang..be cool." te a'n lo ti vel a, engtak ang maw?

"Pa, vawiin hotel lamah i kal dawn lo em ni?" Deborah-i chuan a ti a, Pu Zorema chuan, "Kal dawn e, ka thianpa in vawiin khan a hmelhriat pakhat a rawn hruai a, a fapa in hna a duh ve a ni awm e. Interview ka han neih pui ve hrim hrim ange, ka lo haw har lovang." tiin zaidam tak chuan alo chhang a. Deborah chuan, "I thiante fa an nih avang ringawt te hian staff te hi la mai mai thin suh, lo mawl viau ta se nangma tan vek anih hi." tiin a lo âng ve bawrh bawrh a. Akimi chu room atanga lo chhuah pah chuan, "A ve vak vak che hian.." tih pah chuan nui chungin Deborah-i mawnga chuan a han beng taih a. Deborah lah chuan, "Ania lawm..an qualify ngei em tihte hi hriat ve phawt tur..kan hotel ah pawh sawn pawl 12 pawh pass lo thawk an awm tam mah mah ka ti." a han tih chhunzawm nghal pung pung a. Pu Zorema chu nuih huah huah pah chuan, "Mmmmm...anih ka kal ania awww." tiin a chhuak ta a. Deborah hi hmeichhe ngo tak, ft 5'4 vela sang, samsei tak, amawng thleng tep khawpa sei dum hlarh mai, hmeltha leh pianthiam tak mai hi a ni a. A luck em em a, bemtu pawh a tawng hnem thei khawp mai. Mahse a mipa duhzawng tak ala hmuh loh vang nge, high school leh higher a kal laia mi pahnih thum vel a nihpui ve zuai zuai bak kha chu ngaihzawng a nei leh ta miah lo. Kum 23 mi a ni a, hmeltha viau e tilo hian a chut ru reuh phian a, mi a ring hma em em a, mi thusawi a awih hma em em lehnghal. Nichin lawka apa bula khatia fimkhur tak awm ang fahrana a han âng vel bawrh bawrh pawh kha a u Akimi'n sawi tura a tih vang chauha sawi a ni. Music ah atui em em a, college pawh BA thleng a kal a, ala zo lo zui. Music lam a tui em avang chuan an neihin a tlin bawk a, music class a kal thin a. Tunah phei hi chuan amah zawk hian music class siamin naupang te music a zirtir thin tawh hial zawk a ni. Thu leh hla erawh thiam ve viau lo mahse a tui phian a, Korean Serial lah hi a atchilh em em lehnghal. Korean film-a changtupa ten changtunu te bula thu mawi tak tak an han sawi vel te hian alo luangliam thei em em a, tap purin a en tlaivar thak peih a ni.

Hotel lam pan chuan taxi in Msa pawh chu a kal mek a, dar 12:40 vel a ni tawh. A thlen dawn tepah chuan a thianpa Victor-a bawk chuan a rawn phone leh ta. "Hello, enge ni Vic?" a han ti a, Victor-a chuan, "Bawiha, thil awmzia ka hre vek tawh. Emily kha a thianten min then turin an lo tilui a, hei engkim min hrilh ta a nih hi." a rawn ti a. Chuveleh phur lutukin Msa chuan, "Driver ding teh." a ti a, driver chuan motor chu a tiding a. Motor atang chuan chhuakin mi dawr kawtah chuan ava phei a, "Ka rin ang chiah a ni....anva zak lo ve a thiante chu." a han ti nghal bawrh bawrh a, a interview neih tur pawh chu a theihnghilh leh ta daih mai. Hotel ah chuan Pu Zorema chuan a office ah alo nghak ran tawh mai si a, dar khat a pelh hnu pawh chuan Msa chu ala rawn lang ta reng reng silo. "Traffice a jam anga, a tang hrih te pawh ani mahna." tiin a nghak lui leh hram hram a, mahse a rawn thleng thei hauh lo. Pu Zorema chauh hian Msa hi a nghak lo, kawng sira ding reng taxi driver pawh chuan Msa'n taxi fare a pek hun tur alo nghak ve char char bawk a ni. Msa lah chu a tui tulh tulh mai si a, an inbe rei telh telh a, "Kidnap hmiah ila nimai lawm, bro." te a ti thul. Taxi driver ngaihdan chu a ni talo, ava chhuak a, Msa bulah chuan, "Hey Hmela, engtia rei nge ka nghah dawn che? Fare min pe dawn lo em ni?" tiin ava vin hrep a. Msa lah chuan a be tui laklawk si, "Lawk aw, Vic." tih pah chuan driver chu a en a, "Engzat tur nge?" a han ti a. Driver thinrim lutuk chuan, "Cheng 100 ka chawi tir nghe nghe dawn che amaw ni." a lo la ti khur khur a. Msa lah chuan ngaihtuah mang hleilo chuan, "A em em lutuk, 80 aw?" tih pah chuan cheng 80 chu a phawrh a, driver chu a pe a. Driver pawh a ka hau mai, cheng 40 chiah chawi tur a nih laiin cheng 80 lai a chawi a, driver pawh chu a intithei kher mai, nuih vur vur pah chuan a tlan san ta a.

Pu Zorema ngaihdan pawh a pel ve ta, thinrim tak chuan a tho a, a office chu a chhuahsan a. Reception duty te bulah chuan, "Hepa hi alo kal a, ka awmna min zawt a nih chuan ka haw tawh thu leh naktuk lama lo kal mai turin in hrilh dawnnia." tih pah chuan a phone-a Msa thlalak chu a hmuh a, tichuan a chhuak ta a. Msa pawh chu Victora a biak zawh chuan a awmna vel chu a han en kual a, "Ehee, enge hetah ka tih a?" a ti hu mai a. A bul lawka restaurant-a tlangval pakhat chow lo ei lai chu ahmu a, "Eive teh ang." tih pah chuan a lut a. Chow chu a order ve a, tui ti tak chuan a ei a. Chutia a ei lai chuan a phone a rawn ri a, apa alo ni. Phone chu la in, "Enge ni ta?" a han ti a. Pu Rintluanga chuan, "Interview chu i nei zo tawh em ni?" a rawn ti a. Msa chuan, "Eng interview maw?" a ti hu a. Apa chuan a chal a dawm nghal vawng vawng a, Pi Sangzuali melh pah chuan, "I fapa hiiiiiii.." a ti vak ringawt a. Msa chuan, "Interview i ti em ni kapa? Khawi hmunah nge an neih dawn?" te a la ti ta deuh deuh a. Apa chuan vin zet hian, "Ka theihnghilh lovang, 'dawn wari' te i ti vel a nilawm ni. Mawla, hotel ah interview i neih dawn kha." tiin a rawn vin hrep a. Msa chuan a hrechhuak tlai ngei mai, a tihngaihna hrelo chuan, "Ka van inchei smart ka ti reng a ni." a ti sup ringawt a. Apa chuan, "Tunah va kal vat rawh, darkar khat laiin i tlai tawh ania.." a rawn ti leh vak a. A chow eilai pawh chu a kalsan tawp a, a eiman pawh a pe lem ta chuanglo a, pawisa a neihloh vang anilo, a man pek a theihngilh leh tihna a ni. Hotel chu a thleng a, reception te bulah chuan, "In manager a awm em?" a han ti a. Duty te chuan, "Awmlo, naktukah lo kal leh mai rawh se a ti che a." tiin polite takin an lo chhang a. Msa chuan pawi ti takin a lu a dawm vawng vawng a, "Haihawt ah pawh tiang em em hi chuh.." tiin a phun bul bul a. Reception duty te bulah bawk chuan, "Khawngaihin a number minlo pe thei angem?" tiin ava dil a, tichuan phal takin an lo pe a. Pawnah chhuakin Msa chuan Pu Zorema chu a call nghal vat a.

"Hello, tunge ni?"

"Ka pu, keimah, Malsawmsanga ka nia."

"Msa maw? Ka hman tawh lo, naktukah lo kal mai rawh."

"Ka pu, ihhh....ka rawn kalna lamah khan ka taxi chuanna a driver kha..englo..englo..midang nen an intibuai a, kan rei phah ta alawm."

"Darkar khat chuang in buai tihna animaw?"

"Ka pu, tunah khawnge i awm a, minute 10 hnuah ka lo thleng nghal ang."

"Umm..TEPUII COFFEE SHOP ah ka lo awm ang."

Phone chu a dah a, coffee dawrah chuan Pu Zorema chuan Msa chu a lo nghak leh ta a. Minute 10 vel a ral hnu chuan Msa pawh alo thleng ta, Pu Zorema pawh a thaw ta huai mai. Coffee dawr a rawn lut chiah chu kawngka bul sira thu chuan, "Hey, MS." tiin a lo au a. Msa chu a va hawiphei a, "Ehe Lalhmingmawi, enge hetah i tih a?" a han ti vak a, chupa chu Msa thiantha tak, nichina kan sawi lan zeuh, Hmingmawia kha a ni. Hmingmawia bulah chuan hmeichhe pakhat alo thu ve a, "Ms, lo thu phawt teh..hei, kan nu a nih hi." a han tih chuan phur tak chuan Hmingmawia te bulah chuan Msa chu ava thu ve leh ta chawt mai a. Pu Zorema chuan thinrim zet hian, "Mawla mai mai chuh.." tiin rum zet hian Msa chu a melh khur mai a. Msa leh Hmingmawia te lah chu an titi tui tulh tulh mai si, minute 15 dawn a nghah leh hnuah chuan Pu Zorema thinin a tuar ta lo. A tho thut a, Msa te lam pan chuan ava phei a, "Hey, engchena rei ngei ka nghah dawn che..i mawl em ni a? Nge min fiamkual mai mai zawk?" tiin a vin hrep mai a. Msa lah chuan Pu Zorema chu a vawikhat hmuhna chauh ala ni bawk si chuan alo la hrelo zui, "Ka pu, tunge i nih a? Tinge min rawn hauh ve rikngawt a?" tiin alo la zawt let zui a. Pu Zorema chuan vin zet hian, "Zawk zamah che chuan, kei hi Zorema ka nih hi, i pa in hna i hmuh theih nan tiin ka khawngaihna min rawn dil a. Nang chuan hetah thian ilo kawm mai mai a, darkar engemaw zah ka nghak tawh che tih i hria em?" a ti khur khur a. Msa chu a inthiamlo ngei mai, a ding a, "Ka pu, min ngaidam rawh...ka lo theihnghilh a." a ti ringawt a. Pu Zorema chuan, "Hmh, theihnghilh hmak rawh...hna hmuh chu inbeisei duh suh." tiin a chhuahsan ta daih a.

Msa chuan ava umzui a, "Ka pu...khawngaihin min ngaidam hram rawh...ihh..keichu thil hi ka theihnghilh hma thei lutuk a. Hna pakhat ka tih laiin thildangin minlo tih buai chuan ka hna thawhlai chu ka theinghilh hmin thak zel a. Ka pu, Alzheimer natna ka nei a, min hrethiam rawh." a ti a, Pu Zorema mitah pawh chuan en ngamlovin hnuai lam a melh reng a. Pu Zorema chuan, "Ka hun i khawhral hnem lutuk, chutiang khawpa haihawt chu e..kei hian ka chhawr theilo a ni. He hna hi i hmu lovang, i hmu lul lovang. Ka hmaah hian rawn inlan leh tawh ngai suh ang che. HAIHAWTLIAN.." tiin a kalsan ta a.

Ngawi reng chuan ahma zawna chaw chu Msa chuan a en vung vung ringawt a, a pa lah chuan rum zeta Msa melh pah chuan chaw chu a bar mawlh mawlh a. Pu Muana pawh hemi ni hian chaw ei ah an sawm a, Pi Sangzuali chuan, "Malsawmsang, chaw kha ei ta che.." a ti vin hlur a. Msa chuan zawi te hian, "Ka ril a tam lo." tih ringawt chuan alo chhang a.

Pu Rintluanga chuan, "Vel che chuan, i vawikhatna ang maia khatia i lungngaih vel le. Ei mai mai teh, khaa..Pu Zorema lah chuan hmingthar a phuah sak lehnghal che ania. I inhmeh angreng phian leh nghal, Haihawtliana han nih tawp mai chuh." tih pah chuan thinrim tak chuan chaw chu a bar baw nuai nuai mai a.

Pu Muana chuan, "Doctor thiam deuh hlek hnena kalpui chi a ni, phai lam doctor te pawh.." a tih lai chuan Pu Rintluanga chuan, "Khai khai...specialist te pawh kan panpui tawh, sum zawng zawng kan hmang zo vek tawh. Doctor panga vel lai chu beidawngin amah vang hian an hna an bansan hial tawh mawle.." a ti vak vak a, Msa lah chuan, "Animaw? Tak tak ami?" a lo la ti hu zui. Pu Rintluanga chuan, "Nilo nilo, hahthlak lutuk mai. Ti hian ti teh, nangmah anga mi ang zan lo, bawl theih deuhreuh, ti deuh hehu deuh va zawng la, innei ula, tlan bo daih rawh u." tiin alo vin let hrep mai a.

Tum hmuk hian Msa chuan, "Ka duh vang renga theihnghilh ka ni lo tih te chu i hriat ve vek kha.." a ti bul bul a. Pu Rintluanga chuan, "Anih chuan i duh vang rengin hre reng tal ta che, hahthlak lutuk mai. Mi fate chuan nupui te hial pawh an nei tawh a, fate an nei tawh a. Nang ve...tu hmel hmuh tur chu sawiloh, bialnu tak ngial pawh hmu zolo, hna pawh hmu thei mang silo." tiin a ang bawrh bawrh a.

Msa chu a ding thut a, "Ka nu nen hian min siam fu lo aniang chu mawle, ka chhun che a nih hi, ka mawl emai." tih pah chuan a room lamah a chho ta daih a. Atuk zingah chuan Msa chu a thianpa Mapuia'n a rawn phone a, "Hello, MS...ka pa hi a zual thut mai a, thisen pek a ngai an ti a. I Blood group kha B+ a ni em khah, i hria em?" a rawn ti a. Msa chuan tum hmuk hian, "Ka hming pawh ka hre t(r)awk ania, engtin nge ka blood group chu ka hriat reng theih ang?" a lo ti vin hlur a. Mapuia chuan, "Bawiha, uang lo teh, a serious ania." a rawn ti hluam hluam a. Msa chuan, "Lawk aw, ka pa ka'n zawt ange." tiin apa chu ava zawt ta a. Pu Rintluanga chuan, "B+ i nih kha, B+ ah pawh a chhe chi." alo la ti zui.

Msa chuan, "Mapui, B+ chhe chi a nih chu...i pa chu thisen ka pek i beisei tihna em ni?" a han ti a. Mapuia chuan, "Kan chhungkua ah ka pa chiah hi B+ a ni a, thisen pe tu tur kan mamawh a ni." a rawn ti a. Msa chuan zaidam tak hian, "Lungngai reng reng suh, ka lo kal nghal ang." tiin phone a dah a, a insiam nghal mawlh mawlh a. Pu Rintluanga hian Bike hlui ve tawh tak hi a nei a, Msa hian a khalh sak ve zeuh zeuh thin a, vawi 4 lai chu taxi in apa bike chu a hawsan tawh bawk a ni awm e. Apa bike chu la chhuakin damdawiin lam chu a pan ta a, traffic jam ah ala tang zui.

Traffic jam-a a tan lai chuan a sira nula chhelo zet, scooty a chuang, mit meng pawl ram mai leh piannalh em em mai Deborah chu Msa chuan ava hmu fuh hlauh mai. Hmeltha a han ti em em khawp a, a thlek hian a thlek ngawih ngawih mai a. Deborah-i a hmuh rual rual chuan a thianpa, Mapuia pa thisen pek angai tih pawh chu a theihnghilh leh ta thak mai, a ngaizawng nghal em em ringawt mai a ni. Traffic jam chu a zia deuh ta a, Msa chuan Deborah-i chu a zui leh ta nghal ringawt mai. Deborah-i tlanna lam ah chuan a tlan ve zel a, "Hnunglam atang pawh sawn a chhelo tho anih saw mawle." tiin ama hriat tham lek chuan a phun bul bul mai a. Mak tak maiin Deborah-i chu damdawiin lam pan tho chuan a kal ve a, Msa chuan a zui ve zel bawk a. Damdawiin chu an thleng a, Deborah-i pawh Scooty atang chuan chhukin hmanhmawh hmel zetin Damdawiin chhungah chuan a tlan lut nghal a. A aia hmanhmawh hian Msa chuan a umzui ve nghal a, va biak a chak takzet a ni. Damdawiin Ground floor ah an awm mek a, Deborah-i chuan nurse te chu a bia a, a mangan hmel kher mai. Tichuan room pakhatah chuan Deborah-i chu a lut daih a, Msa lah chu va luh ve ngawt a tum a.

Nurse pakhat chuan lo dangin, "Ka pu, enge i tih dawn? Pawn lam mi luh ve kan phal hleinem, tunge i nih a?" a lo ti a. Msa chuan nui sûng hian, "Aaa..ih..khanu kha, ka hmelhriat a nia." a han ti thla ngawt a. Nurse chuan, "E..nangmah em ni thisen pe tu tur chu?" a lo ti a. Msa chuan ngaihtuah mang hleilo chuan, "Aw.." tih ringawt chuan a lo chhang a. Nurse chuan, "Minlo zui rawh, helamah aw.." tiin room pakhat ah chuan a hruai lut a. Msa chuan thisen chu a pe a, ball-te hum pah chuan Deborah-i hmel ringawt chu a mitthla ah a awm a, thisen a pe nui vur vur a ni ber mai.

Mapuia chuan a rawn phone leh a, "Hello, Mapui..enge ni ta?" a han ti chuh Mapuia chuan vin zet hian, "Enge ni ta te i tia law??? Ilo thleng tawh em? Thisen pe turin kan nghak vek tawh che ania." a rawn ti khur khur mai a. Msa chu a han in en chiang a, "Thisen te chu ka pe mek alawm." a ti nuah nuah a. Mapuia chuan hrethiamlo tak chuan, "Enga? Khawi floor ah nge i awm a?" a ti hu a.

Msa chuan a bula nurse pakhat bulah chuan, "Thiannu, khawi floor nge hei lai hi?" tiin a han zawt a. Nurse chuan, "Ground floor a nih hi." tiin a lo chhang a. Msa chuan Mapuia bulah chuan, "Ground Floor-ah ka awm e.." a ti a. Mapuia chuan thinrim zet hian, "3rd floor ah daih alawm kan awm, iva han mawl tak. Tunge thisen chu i pek reng reng a?" a rawn ti vin hlur tawh mai a. Msa chuan, "Awww...ka theihnghilh daih alawm. Thisen ka pe laklawh tawh, ka thisen ka ui ve tawh..midang lo zawng mai teh u." tih pah chuan phone chu a dah a, Deborah-i bawk chu a dream leh ta veng veng mai.

Mapuia thinrim lutuk chuan, "Huiham, nang kher kher ka lo dil che a, i thisen pawh kha a thianghlim ka ring nek love, i thisen dawngtu pawh chu a haihawt phah vek dawn a nih chu." tiin a phun nuah nuah a. Msa chuan thisen chu a pe zova, damdawiinah chuan Deborah-i zawng chuan chawhma chhung zawng chu a vei kual th(r)ak a, mahse a hmu zo hauh lo. A phone a rawn ri a, a pa alo ni a. Vin em em hian Pu Rintluanga chuan, "Haihawtlian, khawnge ka bike?" a rawn ti hrep mai a, Msa chuan, "I hre zawk ang chu...i bike alawm." tiin a lo la chhang let zui. Pu Rintluanga chuan, "Mawla, ka hmuh loh vang alawm ka zawh che..khawnge i awm?" a rawn ti leh khur khur a.

Msa chu pawnah chhuah pah chuan, "Zawng ve mai la..damdawiinah ka awm." a tih rual rual chuan a hma zawn taka a pa bike lo ding chu a hmu leh thut mai si a, aman a keng chhuak tih a hre chhuak leh ta, mahse a va hrechhuak tlai thei si em. Apa lah chuan, "Enge damdawiinah i tih? Tinge ilo chhuah leh hman thawt thawt a? Khawnge ka bike chu a awm? I kenglo takzet amaw?" tiin a rawn vin khur khur mai a, Msa inthiamlo leh inthlahring lutuk chuan, "Aaa...i thinchhe thei lutuk a, ka han fiam ve hlak che a nih kha. Ka lo haw dawn, hei ka keng chhuak lawk a." tih pah chuan apa tawng leh hmain phone chu a dah vat a, chak em em chuan a tlan haw ta nghal a, Deborah-i pawh chu a theihnghilh zui ve leh nghal mai bawk a.

Deborah-i chuan mangang tak hian nurse bulah chuan, "Thiannu, thisen pe tu tur chu alo la thlenglo em ni, ka call a minchhang thei bawk silo." tiin a tap titih der mai a. Mahse nurse chuan hlim hmel tak hian, "Lungngai suh, alo thleng tawh a, thisen pawh a pe zo tawh e." a lo ti a. Deborah chuan, "Anih leh Cindy chu a harh tawh em?" tiin a zawt vat a. Nurse chuan "Harh tawh e, i duh chuan iva hmu thei ang." a ti a, Deborah-i chuan Cindy, kum 7 mi, a music class student, damloh vanga thisen mamawh em em chu a tha chhuak leh tih a hmuh chuan a hlim em em a. Deborah-i chuan nurse bulah chuan, "Khawnge thisen petu chu a awm a? Ka hmu ve reng reng duh, lawmthu pawh ka la hrilh hleinem, pawisa pawh pek ka duh alawm." a ti a. Nurse chuan, "A kal leh daih tawh, nichin kha chuan a vei kual ang vut vut a, a haw tawh aniang. Mahse hei...a ID card a theihnghilh a." tiin Msa ID card theihnghilh chu a pe a.

Deborah-i chuan ID card-a Msa thlalak a hmu chiah chu a han ngaisang nghal em em khawp a. Sawi tak ang khan Deborah-i hi hmeltha viau e tilo chuan a chut ang reng hle a, mi a ngaisang hma si a, mi a ring hma si a, mi thusawi apiang hi a awih zel a, Korean film lah a addict em em lehnghal. Chutia pawisa pawh la duhlova, thisen pek zawh hnua haw lehnghal, tlangval fel tak chu a ID card-a a thlalak atang ringawt pawh chuan a ngaisangin a vei nghal bur mai, a hnuk te a ulh deuh reuh lehnghal amawni..a en hian a en ngawih ngawih mai a.

Zan ah chuan Msa chu an inkawtah chuan apa bike a side that lai lo su tu tleirawl pahnih te chu a lo hau mek a, "Engtin nge in sut theih? Naupang lehnghal engvanga lirthei khalh chhuak ngam nge in nih?" tiin a lo hau hrep mai a. Tleirawl te chuan an hlau ngei mai, pakhat zawk chuan, "Ka pu, min ngaidam rawh..balance a buai thut a, pawisa pawh kan chawi mai ang." a han ti dek dek chu vin zet hian Msa chuan, "Ka pu te mi tih le..i pu rual ka ni em ni? Balance buai tih vel mai mai, steering cut hun tur pawh hrelo khawpa haihawt te chu in zak nange?" a han ti zawk zamah a, amah pawh chuan a thusawi chu a zahpui deuh ni ngei tur a ni, lehlam hawiin a kiai suk a. Chutih lai chuan Deborah-i chuan Msa ID card-a Msa phone number chu a phone ah chuan chhulutin a call ta a, Msa chuan a phone chu phawrh vatin, "Ninawm buai lai lai a." tih nuah nuah pah chuan a pick up a.

Deborah chuan inthlahrung tak chuan, "Hello, Malsawmsanga a ni em aww?" a rawn ti dek dek chu Msa chuan, "Aw...mahse tunah chuan ka buai." tih pah chuan phone chu a dah leh nghal hmak a, "Pawisa pawh in nei em ni? Engzah man nge a nih in hria em? A ran nasat zia te hi...ka sut sak ve ngat dawn che nu mawni le!" a han tih zawm nghal zung zung a. Tleirawl pahnih te pawh chuan an hlau ngei mai, chutia a hauh mek lai chuan Msa phone bawk chu a rawn ri leh ta. Nin hmel tak chuan phone chu la lehin, "Ka hmanlo ka tih kha mawle...enge ni tei vet?" a ti vin hlur mai a. Deborah-i chuan zawi sap hian, "Ihh..englo ania, i ID card i theihnghilh a. Vawiin khan, damdawiinah i theihnghilh a..hei ka kawl a." inthlahrung tak chuan a rawn ti leh a. Msa chuan, "Aw..anih chu mawle, naktukah ka lo lam ange...damdawiinah tho chuan em ni ka lo kal dawn?" a han ti leh a. Deborah-i chuan, "Aw..ihh ilo kal ang tiraw?" a rawn ti leh a, Msa chuan, "Awww...kal ang, nih phawt." tih pah chuan a dah leh hmak a.

Tleirawl pahnih te chu a han en leh vang vang a, "Engzah maw ka pek dawn che u?" a han ti leh daih mai a. Tleirawl te pawh chuan mak an ti ngang a niang, an phu dun zuk mai. Msa bawk chuan, "Engzat maw ka pek dawn che u? Sawi vat ru..khatiang mai mai, a chhiat hnem loh kha." ala ti ta deuh deuh a. Tleirawl pakhat zawk chuan, "Ihh..500 ni mai." a han tih chuan Msa chuan, "Ava tam ve...pawilo mai rawh se, kha...kal nal nal rawh u." tih pah chuan 500 chu a pe a, intithei takin chu tleirawl pahnih te chu an tlan ngal vang vang a. An tlan liam chiah chu Msa chuan a en zui vawng vawng a, "Engvanga cheng 500 kha pe ringawt nge ka nih a?" a han ti leh nuah nuah a, a pa bike rang ruai mai leh a side glass lo uai hnawp mai a hmuh chuan a hrechhuak thut a, mahse ava hrechhuak tlai leh ta si em! Lu dawm vawng vawng pah chuan, "Hrep tak chuan...kha mihring nu min rawn call vang vek." a ti bul bul a.

Chutia thinrim taka amaha a inhauh mawlh mawlh lai chuan a phone chu a rawn ri leh ta, thinrim tak chuan en mang hleilo chuan a pick up leh a, "I va ninawm chhen ve mawle...nangmah vang in pawisa ka chân phah hi i hria em?" a han ti nghal vak vak a. Phone ami chu apa, Pu Rintluanga alo ni leh si a, "Enga? Malsawmsang, pawisa ka chân e a? Khawiah nge i awm?" a rawn ti thum leh ta bul bul mai. Msa pawh a phu zawk mai a, a tihngaihna hrelo lutuk chuan, "Pa, nang i ni maw? Enge tunlai i tih thin?" a han ti ringawt a. Pu Rintluanga chu a sa ngang mai, "Ka thil tih thin i hriat angailo, lo hawt vat rawh." a rawn ti vin khur khur mai a, hreh tak chung chuan inchhungah chuan alut a.

Deborah-i chuan Msa ID card chu a en ngawih ngawih a, "Awiiii hetiang em em a tlangval fel hi chu an piang leh tawh ngai lovang, mahse a thinchhe ve deuh a nih kha. Mahse a ho emai, keipawh ka thinchhe ve tho alawm. Thisen a pe a, chupawh pawisa la duh lovin a chhuak lehnghal daih a, mizo tlangval tlawmngai diktak ani e." a han ti nghal deuh chiam chiam a. Hnunglam atang chuan Akimi chuan, "Tunge i lo biak mawlh mawlh a?" a rawn ti a. Deborah-i chuan phur zet hian, "Enteh Kim, vawiina Cindy thisen rawn pe tu tura kan tih kha alo kallo a, mahse mi pakhat, chhelo tawk, piannalh tawk, tarmit vuah, fel deuh mai alo kal a, thisen a rawn pe a. Mahse pawisa pawh la duhlovin a haw leh nghal daih a, awii hmaichhana ka biak chak teh reng nen." a han ti nghal chiam chiam a.

Akimi chuan nui sung hian, "Tinge i biak mai loh?" tiin alo zawt a. Deborah chuan, "Ka hmu ve hmanlo alawm." a han tih chuan mak ti tak hian Akimi chuan, "A pianzia te, tarmit a vuah tih te pawh i hre vek sia, i hmu hman leh bawk silo a, enge awmzia?" a ti hu mai a. Deborah-i chuan, "A ID card a theinghilh a, a ID card-a a thlalak ka en a, awii...a hmelthat zia chu." a han ti vawng vawng a. Nuih huah huah pah chuan Akimi chuan, "Thlalak atang mai mai chuan mi te hi hmeltha tih vak vak loh tur, a takah a lo hmelchhe pian thei asin." a han ti a. Deborah chuan, "Hmm..ID card ah tunge lang tha ngai? ID card ah pawh a lang tha em em a, a takah chuan a hmeltha dawn chiang sa." tih pah chuan a han nui deuh sang a. Akimi chuan, "Anih chuan khawi maw, a ID card chu kalo en ve chhin ange.." a ti a.

Mahse Deborah-i chuan, "A teuhlo, ilo star ve palh ang...nang chu nau pai mek i nih kha." tiin alo phallo nasa mai. Chutih lai chuan Pu Zorema a lo lut a, "Bawihi, inva mu har ve..enge ni inlo sawi a?" a ti a. Deborah-i chuan, "Pa, vawiin chu maw...tlangval fel tawk maiin ka student Cindy thisen a rawn pe a, mahse pawisa pawh la duh lovin a chhuak leh nghal daih mawle." tiin apa huat em em Msa chu a fak leh ta chiam mai a. Pu Zorema chuan, "Ehe..anih tak chu mawle, ava fel ve aw..tunge a hming?" tiin a han zawt a. Deborah-i chu a han nui seih a, "In hriat ve angai bawklo." tih pah chuan a han nui tha duhlo der vel a, Msa chu a inla neitu nghal em em ringawt mai a ni.

Atuk zingah chuan Msa te pafa pawh an lo inhau leh nasa ta bian bian khawp mai, "Lo ding teh, ka hlap dawn che." tih pah chuan Pu Rintluanga chuan an inkawtah chuan Msa chu a um kual zuai zuai mai a. Pi Sangzuali chuan kil khat atangin, "Duhtawk teh u, miin min hmu ange." tiin alo rak ve chiam chiam bawk a. Msa chuan tlanchhiat pahin, "Ka ID card lam tura ka kal angai ania, duhtawk teh.." tiin inchhungah chuan a tlan lut daih mai a. A roomah a tlan chho nghal a, rang takin a inkalh hnan nghal a.

Pu Rintluanga chuan kawngkhar chum bur bur pah chuan, "Malsawmsang, lo hawng teh...ka bike khu i khalh leh tawh ngai lovang tih hria ang che." a ti khur khur a. Pi Sangzuala chuan, "Mama pa, hawh teh i chhuk teh ang...khatia zing kar kar a patling i au vak vak mai le, thenawmte pawhin mak min ti lutuk ang." tiin alo khap a. Beidawng tak hian Pu Rintluanga chuan, "Huiham, fapa haihawt deuh nei ve ta se chu kei ai ai hian an au ring ang mawle..neih zawng zawngin kan in kan sa tha ve a, a room tur tiin inchhawng kan han sak belh ve khanglang a, Haihawtliana dik tak chu alo ni e." tih nuah nuah pah chuan a room lam a pan tau nghawng nghawng a. Pi Sangzuali lah chuan, "Pa ber si hi titau bur bur reng mai." tiin a phun ve sup bawk a.

Msa chuan a phone phawrhin a thianpa Hmingmawia chu a phone a, "Hello, Hminglian.." a han ti a. Hmingmawia chuan, "Hmingliana ka nilo, mawla." a lo ti hrep a. Msa chuan, "Aa...Hmingmawia zawk maw khah..Hmingmawi, i motorin damdawiinah min kalpui lawk ta che." a han ti nghal zung zung a. Hmingmawia lah chuan, "Kal kal duh suh, tu doctor mahin an ti dam thei chuang lovang che." tiin alo nuih huah huah a. Msa chuan thinrim deuh tak hian, "Chutiang lam anilo, ka ID card ka theihnghilh a, minva lampui lawk teh." a ti a. Hmingmawia chuan mak ti tak hian, "ID card i theihnghilh amaw? Damdawiinah maw? Enge awmzia?" a lo ti hu a. Msa chuan vin tak hian, "I ninawm, min kalpui mai mai teh. Thawnthu thui tak a ni, ka sawi peihlo...ka theihnghilh leh hma hian min kalpui vat teh." a ti khur khur a. Hmingmawia pawh chuan, "Awle...in inkawtah lo awm la, kalo lam ang che." a ti ve mai bawk a. Tichuan Msa pawh chu a insiam nghal mawlh mawlh a, tichuan Hmingmawia nen chuan damdawiin lam chu an pan ta a.

Damdawiin chu an thleng a, Deborah-i chu nghakin Hmingmawia nen chuan an thu dun reng a. Hmingmawia chuan, "MS, i upa ve tawh si a..nupui neih te hi i tum ve lo em ni?" tia a han zawh chiah chuan a hma ni a, Deborah-i a hmuh kha ahre chhuak leh ta zuai zuai mai a. Chunglam melh vang vang pah chuan, "Ngawi teh...i sawi takah chuan nimin khan hmeichhe chhelo zet mai ka hmu a, amah vang khan a ni tak e...damdawiinah hian ka zui luta, thisen ka pe ringawt a, tu ber nge thisen ka pek pawh kha ka hre leh tawh love a.." ati nuah nuah a. Hmingmawia chuan, "Thisen i pe amaw? Mahse Mapuia kha chuan thinrim zetin a pa thisen i pek leh tak loh thu kha min hrilh a, tunge thisen chu i pek reng reng a?" tia a han zawh chuan Msa chuan, "Ka theihnghilh tawh ti mawlh mawlh a." a lo ti vin hlur mai a.

Chutih lai chuan Mapuia an lam pana tum hmuka lo kal phei chu an hmu a, Msa chuan, "Aiiiiii...alo la kal zui." tih pah chuan lehlam a hawi nghal a. Mapuia chuan lungawi lo tak hian, "Malsawmsang, nangmah vangin ka pa kan chan tep asin. Thisen pe tu tur dang an awm hlauh a, nilo se chu..." a sawi zawh hma hma chuan Hmingmawia chuan, "Aww...enge amah kher i tih? A dinhmun i hre ve reng a, midang pawh zawn vat mai tur alawm." tiin Msa chu a lo chhan vat a. Chutia an inhnial lai chuan Msa phone chu a rawn ri leh ta, Deborah-i bawk alo ni leh a. Msa chuan, "Hello, tunge ni?" a han ti a. Deborah-i chuan, 'Malsawmsanga maw? Keimah ka nia...nizan ami kha?" a rawn ti a. Msa chuan hre leh tawh hek lo, "Nizana mi a? Anih leh vawiina mi i ni tho em?" a han ti deuh kher a.

Deborah-i chuan nui har har chung chuan, "Thianpa, i ID card i theihnghilh kha.." a han tih takah chuan Msa pawh in a hrechhuak leh ta. A aw a han thian te te a, inla mi tak zet chuan, "E, aw nia...hei lam turin kalo kal a, nurse kha em ni i nih? Damdawiinah ka awm mek a.." a han ti a, a aw te chu a han ti thum lui vel ngei a. Deborah-i chuan, "Aih, nurse ka nilo. Ihh...music class ka pe mek a, lo kal la, kalo pe ang che." a ti a. Msa chuan, "Awle...mahse khawnge i music class chu a awm?" a ti a, Deborah-i chuan, "Message ka rawn thawn ang che..." a ti a. Msa chuan, "Awle, ka lo kal ange." tia phone dah ahan tum chu Deborah i chuan a cute thei ang ber hian, "Ihh..ilo kal takzet ang tiraw, Oppa?" a han ti chuai raih mai a, a insum zo hmanlo, Korean film-a chang mek amaw a inti leh tawh a ni ngei ang. Msa chuan ner nung hian, "Opa a? Opa ka nilo, Msa zawk?" a lo la ti hu zui. Deborah-i pawh a zak leh hnuhnawh kher mai, "E..nia..ih, lo kal rawh aw." a ti bah deuh nuai a, Msa chuan chhan pawh chhang let lo chuan phone chu a dah hmuk a.

Mapuia chuan, "Tunge ni a?" a lo ti a, Msa chuan, "Ka hrelo, ka ID card a kawl a, lo lam turin min ti a. Ka hming pumin min ko ziah lehnghal, chuan tunah lawk khan OP te min rawn ti leh daih mawle..." a ti nuah nuah a. Msa hriat phak loh tawk lek chuan, "Nangmah ang bawka mi anglo a ni ang chu mawle." tiin Mapuia chu a lo phun sup a, thisen pek chungchang avang khan a la ngei ve em bawk a ni. Msa chuan, "Hmingmawi, min va kal pui teh aw...hei a awmna hmun pawh message ah min rawn hrilh tawh a." a ti a, tichuan Msa leh Hmingmawia te chu Deborah-i music school lam pan chuan an kal ta a.

"Hello, ṭhiannu kan lo thleng ania, khawiah nge i awm?" tiin Msa chuan Deborah-i chu zawngin a hawi vual vual a. Hmingmawia chuan, "Khatin hawi vual vual suh...i ât hmel lutuk." tih pah chuan a tukhumah a lo kuk fuk a. Deborah-i pawh chu pawnah a rawn chhuak a, a music school kawta Msa lo hawi vual vual a hmuh chuan a lawm ngei mai. Phur tak chuan, "Ṭhianpa, helam lo hawi rawh, i hnunglam..." a han tih chuan Msa chu a va hawilet a.

A phu zuk mai, mit khap nachang pawh a hre tawh lo. Deborah-i chu a hma ni chiah a alo hmuh tawh, a vei em em, a thinlung lalnu, damdawiina chawhma chhung zawnga a zawnkual hrep tawh, hmuh leh a châk ngawih ngawih khan a hma zawn takah a ban vai meuhin a lo hui chu a ni a, va kal mai nachâng pawh a hrelo. Deborah lah chuan a rilru in, "Awiii...atakah phei chuan i hmelṭha lehzual a nih hi mawle, Oppa." a lo ti ve vawng vawng bawk a, Korean thei bawk sia. Msa leh Hmingmawia chu anva kal hnai a, Deborah leh Msa te chu induh tawn hmel tak chuan an in en reng a. Hmingmawia chuan, "ID card chu khawnge?" a han ti deuh hmuk a, Deborah-i chuan Msa en reng pah chuan Hmingmawia chu ID card chu a pe a.

Hmingmawia chuan Deborah-i bulah chuan, "Music i thiam viau animaw?" nuih pah chuan a han ti a. Msa chuan thinrim hmel tak hian Hmingmawia chu a han melh hrawk a, "Thiamlo se music school a hawng dawn em ni?" a lo ti vin hlur a. Deborah-i melh lehnghal pah chuan inthlahrun hmel deuh hian, "Hehe, lo hrethiam hram rawh aw ka thianpa hi chu...a mawl angreng lutuk a." a han ti chu Hmingmawia chuan a ngei kher mai.

Deborah-i chuan nuih sâng pah chuan, "A pawi hleinem..chuan ka lawm lutuk aw.." tih pah chuan Msa chu a chibai a. Msa chuan, "Nia..keichu thil ṭha tih hi nuam ka ti ve hrim hrim a.." tih pah chuan a han khi deuh sûng a, Hmingmawia chuan a eilo kher mai. Msa bawk chuan, "Enteh, engtin nge ka ID hi i kawl daih a?" a han ti leh hû pek a. Deborah-i chuan, "Nimina thisen i pek kha...ka student te zinga mi ania." tiin alo chhang a. Msa chuan, "Awww...animaw..thisen ka pelo ang tih ka va hlau em." a han ti zauh chu Deborah-i chuan, "Maw? Engvangin maw?" tiin hriatthiam loh hmel tak chuan a lo ti hu a. Msa chuan, "Aa..englo, thisen pelo ila chu...ID hi ka hmulet lo maithei a, ilo fel hlauh a, a tihzia kher mai." tiin chhuanlam chu a han siam zung zung a.

Deborah-i chuan, "A nih tak chu, ka lawm takzet. Ka pa pawh i chanchin ka lo hrilh a, hmuh ve a chak ngawt ang che.." a han tih chuan Msa chu a insum zo lo leh ta. Phur tak chuan, "Eee..tehreng mai, kan sawirem nghal anga nimai lawm." a han ti leh khut a. Deborah-i chuan, "Eng sawi rem maw?" a lo ti leh vat a. Nui lui tih hriat tak hian Msa chuan, "Aaa..ihh..sawi rem han tih a. Mihring te inlaichinna reng reng chu thisen inzawm atanga lo piangchhuak a ni a, chuvang chuan khatia thisen ka han pe te kha..ṭhian kan nihna bul tan tu tura min sawirem sak tu a ni a, thiantha lo pianchhuahna dik tak a ni thei a.." a han ti leh vel zuah zuah a. Chutia inlaichinna a han sawi kual vel chu thu leh hla ngaisang em em, thiam ve dér chuang bawk silo Deborah-i tan chuan luanliamna tham a lo tling leh ngang mai.

Msa en ngawih ngawih pah chuan, "Aww..i fel bawk a, thu pawh i thiam hle mai." ahan ti leh vawng vawng a. Msa chuan ngaihtuah miahlo chuan, "Nitin kan inhmu thei angem?" a han ti leh zauh a. Deborah-i chuan ahrethiam leh ta lo, "Engvangin maw?" a lo ti leh hu mai a. Chhuanlam siam leh vat in, "Ihh...music..music hi ka zir ve duh a?" a han ti veleh ringawt a. Deborah-i chu a nui ta huah huah a, "Aww..animaw..mahse pawnlam mi lo luh ve kan phal lo a. Chubakah naupang tan chauh a nia, nau mipa emaw hmeichhia emaw i neih chuan, ihh tlema naupang deuh, kum 6-10 vel ni thei se." a tih lai chuan Msa chuan, "Aw aw...ka nau ka lo hruai dawnnia." a lo ti vat a.

Hmingmawia chuan Msa kheuh zeuh pah chuan zawi te hian, "Nau i neih loh kha, Mawla." a lo ti su su a. Deborah-i chuan mak tih hmel deuh hian a lo en a, Msa chuan nuih luih pah chuan ring zet hian, "Aww...thianpa, ka nau kha, nia kan hruai dawnnia..music a zir ve chak alawm." a han ti vak vak a. Hmingmawia pawh za lo zet chuan a han khi ve suk a, Deborah-i chuan, "Ka lut leh tawh mai ange, hei class ka la nei a." a ti a. Msa chuan, "Awle...i number ka lo save ange, naktukah chuan ka nau chu ka lo hruai ang." a han ti nghal zung zung a. Lai deuh tak chuan Deborah-i chuan Msa chu a han melh leh zauh a, inchhungah chuan a luhsan ta a.

Deborah-i alut chiah chu Hmingmawia chuan vin zet hian, "I mawl ami? Nau mipa i nei reng reng ami?" a ti khur khur a. Msa chuan intithei tak hian, "Nau mipa tur te chu a zawn chawp theih lutuk alawm...ṭhiana, khanu kha alawm ka star té chu." a han tih chuan Hmingmawia pawh a phur leh angreng lawi si a. Phawk hru chuan, "Animaw...ehee, i chetdan kha mak ka ti reng a." a han ti ve nghal chél chúl bawk a. Tichuan Msa leh Hmingmawia te chu an haw ta a, Hmingmawia pawh chuan Msa nau lem tur chu a zawn pui nghal a.

A tuk zingkar atang chuan Msa nau lema ṭang tur chuan Mapuia, Victor-a, Hmingmawia te leh Msa te ṭhian pali chuan an veng naupang te chu an han be ta hlawm a, atam zawk chuan an duh lo nghal phawt. Chutia an zawn kual hrep hnu chuan an venga naupang mi ang zan lo pakhat, mi pawisa dil hrat tak, vai naupang, mizo hmel pu deuh reuh si, Mizo ṭawng pai ṭhak lo, Raju-a chu Msa chuan a hmu fuh ta hlauh mai.

Mapuia chuan, "MS, Raju-a saw chu a chiloh ang, mizo pawh nilo lehnghal, naupang phakar leh nghal tak a ni tih pawh i hriat kha. Mi pawisa dil a ching si, meizial a heh reuh si, mi a ang zân lo lehnghal." a lo ti vat a. Mahse Msa chuan, "He naupang bak hi chu lemchang thiam kan vengah an awmlo ang, chubakah kan tih ang angin a awm anga, bawl a nuam phian ang." alo la ti zui. Hmingmawia pawh chuan, "MS, ngaihtuah chiang teh...Deborah-i hian a man chhuak che ange..He naupang Raju-a te hi chu kan veng pawh ina an huat rawn leh an ngei rawn a nih hi. Mi pawisa dil a hrat si, a nghal ropui si. Chubakah a dum si, nang i ngo vur a, a awihawm dawnloh emai." a lo ti ve bawk a.

Mahse Msa chuan, "Amah bak hi chu kan hmu tawh lovang, cheng 50 vel pe ila, meizial leisak bawk ila, kan tih dan ang ang in a awm duh mai ang." a ti tlat mai bawk si. Victor-a chuan, "He vai naupang hi lo hmang tehreng pawh ni ila, Deborah-i chuan a awih dawn chuang em ni? In hmel en reng reng pawhin in inang lo em em a, a hmel en hian a hang ropui si, nang lah i ngo vur a, a man chhuak dawn chiang che alawm." alo ti ve bawk a. Mahse Msa'n chu naupang kher chu a thlan tlat avang chuan Raju-a chu awmdan tur te, lemchan dan tur te chu an hrilh a, Farstar bawm khat leh cheng 50 an pe bawk a, tichuan atukah chuan Deborah-i music class ah chuan an va kal pui ta a.

Deborah-i chuan alo hmu a, Raju-a hmel a han hmu chu mak a ti hle mai. Msa bulah chuan, "Hei hi i nau chu maw?" a han ti hu mai a. Msa chuan, "Ni e...ka nau duatlai a nih hi, kum 10 lai chu a ni ve tawh ania." tih pah chuan na deuh fek fawk hian Raju-a lu ah chuan a han beng deuh fawk fawk a. Deborah-i chuan mak ti tak hian, "Ava mak ve, in va in ang lo ve, chubakah ka ṭawng lo haw lo la, vai te pawh a an deuhreuh hi a.." a han ti a. Confi zet hian Msa chuan, "An ti fo reng alawm...ka nau hi chu apiang danglam deuh bik a, mi pawhin mak an ti alawm." tiin a lo chhang awlsam et mai bawk si. Deborah-i chuan a awih ve ta mai bawk a, a ṭhiannu Muani chu a han ko a, "Muani, Application form lo la teh...hei student thar kan nei ania." ahan ti vak a.

Muani chu alo chhuak a, mahse Raju-a hmel a han hmuh chuan a ding chat mai. Muani chuan Raju-a chu a han en vang vang a, "He naupang hi ka hria, mizo ṭawng pai ṭhak lo kha a nih hi...kutdawh a nih hi...hmanni ah pawh pawisa min dil tawh." a rawn ti ta mai a. Msa leh Hmingmawia zak lutuk chu sawitur pawh an hrelo, lehlam hawiin an ṭhen chawk chawk mai a. Muani lah chuan, "Ka hrechiang lutuk, ka kawrah te a pawt vak vak a, pawisa min dil vak vak a, ka pe duhlo a, minla insiamchhiat khum hrep zui." ala ti ta deuh deuh a. Hrethiamlo tak chuan Deborah-i chuan Msa leh Hmingmawia te chu a en a, "Ms...tak tak em ni?" a han ti a. Msa tih ngaihna hrelo chuan Raju-a chu a nam tlu tawp a, ringzet hian, "Ni e...kutdawh mai mai a nih hi.." a han ti ringawt a. Deborah chuan mangang tak hian, "Awiii..enge maw i tih le?" tih pah chuan Raju-a chu a kai tho a.

Msa chuan Raju-a chu abulah chuan pawt pheiin, "Deborah.. i ṭhiannu sawi kha a dik e...he naupang hi kutdawh a ni. Mi hrang hrang pawisa a dil a, a theihtawp chhuahin a nu leh pate chu a pawisa dil khawm te hmang chuan a enkawl ve hram hram asin. A nu leh pate a hmangaihna hi han en hian, a ni hi kutdawh nilovin, nang leh kei zawk hi kutdawh chu kan ni. Ani chuan zah pawh dawn lovin a theihtawp chhuah in kut a dawh a, a pawisa tlemte dawn hmang chuan a nu leh pate chu a chawm asin." tih pah chuan a hnuk te chu a'n ti ulh der vel a. Deborah-i lah chu a lo luangliam leh der tawh, Msa thusawi chu a awih nghal em em a, a thinlung a lo fan leh riai riai hman tawh.

Chu chu Msa chuan hrethiamin a aia uar hian, "Ka khawngaih em em a, a pa bulah ti hian ka tiam ta a, a châk ve thin em em music zir chu tih hlawhtlin sak ka tiam a, music a zir em em ang tiin ka tiam a, ka unaupa ang chiah in ka en ta a ni." a han tih chuan Suraj-a lah chuan inla zei fahran hian Msa chu a han melh a, ṭap der chung chuan, "Au MS.." tih pah chuan a han kuah vel a. Msa lah chuan lo kuah letin, "Lungngai suh Bawiha, i u ka awm alawm. Kutdawh ini lo, i ni reng reng lo." tiin a hnuk te chu a han ti ulh lui vel a.

Deborah-i chuan Msa chu a hma aia nasa in a ngaisang leh ta, amah zawk pawh chu a lo ṭap deuh pur mai lehnghal. Muani bulah chuan, "I lo hria maw? Engmah hrechiang lo hian thil hi rawn sawi ve pawp pawp tawh suh...khawi maw form kha." tih pah chuan Muani chu a hau hrep a, Raju-a hming chu an ziak lut ta a, mahse Msa hian Raju-a hming chu phuahchawpin mizo hming a vuah sak a, LALZAWNCHHUAHA tiin a han phuahsak deuh kher lehnghal, lemchang tura an zawn chhuah kha a ni ve miau alawm le.

Msa chu haihawt hle mahse Deborah-i a hmangaih em avang leh a duh em avang chuan Alzheimer natna a vei tih chu hriattir a duh bik thak lova, a lo chet nawi deuh pawhin a insawi thiam hman leh hram thin a, Deborah-i lah 'ṭha-mawl' an tih ang chi alo ni ve tho bawk nen, a awih leh vek zel mai bawk si.

Msa leh Deborah-i te pawh chu an inkawm chho zel a, an in ngaina dun ta khawp mai. An in duh ve ve a, mahse an inhrilh ngam lo ve ve thung. Deborah-i chuan a propose hun tur a nghak reng a, Msa lah hian a ngam mai bik silo. Raju-a vang liau liau chuan nitin an inhmu thei ta a, Deborah-i a hman changin an lengchhuak dun thin bawk. Msa hi a che fuhlo teuh thei hle a, vawikhat pawh Deborah-i'n leng dun tura an inkawta a lo nghah laiin Msa chuan pheikhawk a bun theihnghilh a, thawmhnaw nalh ve vur siin chapal a lo bun daih a. Deborah-i'n a chhan a zawh chuan, "Aaa..ka lo kal lamah putar kutdawh pakhat kelawngin a lo kal a, a chauh hmel si a, ka pheikhawk ka bun tir ta a nih kha." te alo ti vel a ni awm e.

Vawi khat leh pawh park ah an leng dun a, ice cream zuar an hmu duh hlauh mai a. Inla polite tak chuan Msa chuan, "Ice cream i ei chak em?" a han ti a. Deborah-i chuan, "Ei chak e.." tiin a lo chhang vat a. Msa chu ice-cream zuar bulah chuan va kalin amahin ice-cream chu ava ei ta tuam tuam mai a. Deborah-i chuan hrethiamlo tak chung chuan ava pan a, "Min leisak dawn maw ka tia, tinge hetah nangmah a i ei tuam tuam a?" tiin a va zawt a.

Msa chu a buai hman teuh hle mai, "Ihh..englo, tunlai ice-cream hi ei vak a himlo e an tia, a kha deuh fek te hi a awm ṭhin a, i ei atan a him em tih ka han check hmasa alawm le." tih pah chuan Ice-cream zuar tupa bulah chuan, "Pakhat lo siam ve rawh le." a han tih zawm zat a. Msa hian chhuanlam a siam hnem poh leh Deborah-i hian a ngaisang zual emaw tih mai tur a ni, a en ngawih ngawih zel mai. Deborah-i pawh chuan Msa chanchin chu a u Akimi bulah chuan a sawi thin a, Akimi pawh chuan tunge a nih hre hek lo, a lo duhpui ve em em mai a. Vawi thum vel lai chu Msa pawh hi Deborah-i te inah chuan a leng ve tawh a, mahse vanneihthlak takin Pu Zorema a lo chhuak bo hman ziah ṭhin a ni. Mak ve deuh mai chu Msa rilru ah hian Deborah-i hi a awm ve reng zel a, thildang chu theihnghilh fo mahse Deborah-i erawh a vei em em a, a theihnghilh khât bik hle a ni.

Ṭum khat chu Deborah- te inah chuan Pu Zuala, Pu Zorema ṭhian kawmngeih em em mai chu a rawn lenglut ve ta khiah mai a. Pu Zorema nen chuan inkawmin thingpui an in dun a, rei fe an titi hnuah chuan Pu Zuala chuan, "Ka fapa pawh chu minlo va lam har tawh ve mawle.." a tih lai chuan inchhungah chuan palian tak, hang lampang, police form ha, sual hmel zet mai hi a lo lut a. Pu Zuala chuan, "E..saw alo thleng alawm." a ti a. Pu Zorema chuan mak ti tak hian, "Hei hi Thantea kha em ni?" a lo ti vat a. Pu Zuala chuan, "Anih hi...Sub-Inspector lai a ni ve tawh ania." a lo ti a. Pu Zorema chuan Thantea chibai pah chuan, "Ilo va lian tawh ve, i naupan lai a la rei loh tehreng nen.." a ti a. Pu Zuala chuan, "Anih chuan Zorem, kan kal phawt ange." a ti a. Pu Zorema chuan, "A la hma alawm, Thantea pawh hian thingpui te in ve phawt se." a ti a. Thantea chuan, "Nilove...hna pawimawh tak mai kala nei a, kan kal phawt ange." a ti a.

Kal an tum chiah chu sitting room lam pana Deborah-i'n thingpui a rawn chawi phei lai chu Thantea chuan mit tla lek lo hian alo en a, hmeltha a tiin a duh nghal ngawih ngawih mai. Deborah-i en reng pah chuan, "Ka pa, thingpui chu ka han in ve phawt ange." tih pah chuan a ṭhu leh a. Deborah-i chuan thingpui rawn chhawp pah chuan nui sâng hian, "Kha thingpui aw.." a rawn ti a.

Thantea chuan Deborah-i chu thingpui in pah chuan a en reng a, Pu Zorema chuan, "Taka...hei hi ka fanu neihchhun Deborah Zothanpuii a nih hi." a ti a. Thantea'n duh hmel tak leh ît hmel taka Deborah-i a en ngawih ngawih mai chu apa Pu Zuala chuan hrethiamin, "Zorem, Thantea hian i fanu hi a duh deuh a ni ngei ang, han innei mai se...ṭhian kan ni tho bawk a, a tih chi phian lo maw?" tih pah chuan a han nui vel huah huah a. Deborah-i erawh a nuih aza ve hauh lo, ten hmel tak chuan Thantea chu a melh rum kher mai, choka lamah chuan a phei san ta daih a.

Pu Zorema pawh a zak angreng hle a, engmah sawi lo chuan choka lam chu a va pan ve vat a. Deborah-i chuan lungawilo tak chuan, "Eng ang mi nge ni ngai, ka pa? Vawikhat lo kalnaah tikhan min ti vel a, khatiang police lehnghal, ka duh teuhlo mai." a lo ti vak vak a. Akimi chuan, "Bawihi, i ṭawng ring lutuk an hre pha anga sin." tiin a lo khap vat a. Deborah-i chuan a aia ring hian, "Duh leh hre pha rawh se...enge khatia min tih vel, min en dan te kha, ka ten lutuk." a ti leh vak vak a. Pu Zorema chuan zaidam tak hian, "Duhtawk teh Bawihi, a fiamthu mai mai anih kha...ka va thlah lawk ange aw, kan sawi leh dawnnia." tiin a va phei leh a. Deborah-i ṭawng ri chu Thantea te pafa chuan an lo hre pha ve vek a, Thantea chu a lungawilo kher mai.

Pu Zuala chuan inthiamloh hmel tak hian, "Azia lo hle mai ṭhianpa, ka han fiamthu ve deuh hluai alawm mawle...khatia a thinrim kha ka ringlo hrim hrim a." a lo ti vat a. Pu Zorema chuan, "Akhaii..ala naupang ve em a, lo hrethiam zawk teh u." tih pah chuan Thantea lam chu a va hawi a, "Thante...khawngaihin.." a sawi zawh hma chuan thinrim hmel tak leh chiang fek fawk hian Thantea chuan, "Apawi lo Pa Zorem, enga tan mah ngai suh. Ka pa...kal ang." a ti deuh hmuk a, an chhuak ta a.

Zanah chuan beidawn hmel zet hian a room tukverh bulah chuan Deborah-i chu a lo ṭhu kun lap a, Akimi chuan a va pan hnai a. A bula va ṭhut pah chuan, "Tinge a, Bawihi? Ala bem na che nge?" a va ti a. Deborah-i chuan, "Hmm...tu chuan maw?" a lo ti hu a. Akimi chuan, "Ka hrethiam vek alawm, Msa kha i duh a ni tiraw?" a han ti a. Deborah-i chuan lai lek lek hian, "Chutiang engmah a awmlo, ṭhian chauh alawm kan nih." a lo ti vel a. Akimi chuan, "Bawihi, i u ka nih hi...engmah zep angailo." a lo ti leh a.

Deborah-i chu a ngawi vang vang a, "Ni e..ka duh alawm. Mahse min duh ve em chu ka hrelo, min hmu turin nitin alo kal ziah tho bawk sia, mahse engmah min hrilh duh bawk silo." a ti nuah nuah a. Akimi chu a nui har har a, "A nawm hunlai tak anih chu...mahse maw, i duh thu hi hrilh mai lo la, duh hluah hluah ang pawhin la lang rih suh. A hmangaih takzet che em tih hriat tum phawt la, a propose hma che chu i duh thu hi hrilh suh aw.." a ti a.

Deborah-i chuan, "Kim, hei hi hmangaihna an tih chu a ni thei angem?" tiin a han zawt a, Akimi chuan, "Hmangaihna tia sawi dawn chuan ala hma mah mah, mahse i duh takzet ani tih chu a chiang reng alawm." a ti a, Deborah-i chu a nui var var a.

Tuk khat chu Deborah-i chuan Msa chu a phone a, "Hello, Ms, vawiin chu inhmu ila, Tepuii Coffee Shop ah ka lo nghak ang che." a rawn ti chiah chu Msa chu a phur ngei mai. Rang zet hian, "Awle..dar engzatah? Tunah i hman nghal em? Ka bike a chhia a, taxi a ka lo kal mai a ngai ang." a han ti nghal zung zung a.

Deborah-i chuan nuih har har pah chuan, "Tunah tut tut nilove, chaw pawh kan la ei lo. Dar 11 velah kan inhmu dawnnia, ka lo nghak ang che." a ti a. Msa chuan, "Awle, ka lo kal vat ang." tiin phone chu a dah a, a intithei lehpek hle mai. Dar 11 a rik meuh chuan Msa chuan Deborah-i'n inhmu tura a sawmna chu a theihnghilh leh vang vang tawh, Mapuia te inah lengin card an deng luih luih mai. Msa hi haihawt viau e tilo chuan card den hi a thiam khawp a, tuman a biak buai loh phei chuan a thiante hi a ei kâwt vek zel, a hnuah an pawisa hmuh let nan an dawt hrilhin an bum leh thei mai zel bawk a.

Dar 1 a rik meuh chuan Deborah-i chuan a nghak rei ta bawk a, a phone lahin a chhang thei silo. Lungawilo tak chuan a haw ta a. Msa pawh haw tumin a inbuatsaih mek a, a phone ahan en chu 'Ka Thinlung Lalnu' tih chuan vawi 10 dawn lai a lo missed-call hman tih chu a hmu ta.

Msa hian Deborah-i hi a hminga save mai lovin, 'Ka Thinlung Lalnu.' tih kherin a save a, Deborah-i erawhin a hre hauh lo thung. Msa chuan, "Ehe...min hmuh a duh a mawni le...umm, min vei ve deuh ṭan a nih hi." tih pah chuan nui var var chung chuan a call let a. Deborah-i chuan rang takin a lo la vat a, "Hello, Ms...i buai viau em ni a?" a rawn ti a. Msa chuan, "Buai lutuk love, enge ni ta?" a ti a. Deborah-i chuan, "Vawiin kha ka nghak rei khawp mai che...i hmanlo anih chuan rawn sawi ve mai tur a nia." lungawilo deuh tak chuan a rawn ti a.

Msa chuan a hrechhuak thut, a lu dawm vawng vawng pah chuan ama hriat tham leh hian, "Avan pawi tak..ka theihnghilh leh ta." a ti bul bul a. A aw a han thian kharh kharh a, "Ka cousin a damlo alawm le, a zual thut a, damdawiinah kan tlan chhoh pui a. Tunah phone ka khawih ve hman chiah, hrilh che ka tum a, hun ka neilo a ni." a han ti leh zaih a. Deborah-i chuan inthlahrung tak chuan, "Ehe, avan pawi ve...ka lo hrelo a nih chu. Dawt i sawi em lo maw?" a rawn ti chu Msa thinphu a rang kher mai.

Thaw dep dep hian, "Dawt ka sawi i ring em ni?" a han ti a, Deborah-i chuan nuih suk pah chuan, "Ring love...dawt min hrilh dawnlo tih ka hria alawm." a ti a, Msa pawh a thaw huai mai. Thawk halh pah chuan, "Anih chuan hotunu...min hrethiam a, ka lawm e." a han ti leh vel a. Deborah-i chuan pangchang vel tak hian, "Ka hmingin min ko ve mai la, i sual kher kher thei lutuk." a han ti tham ṭiak a. Msa chu a nui huah huah a, Deborah-i han koh a tum chu a hming a theihnghilh thut mai, ava hunlo tak. Abula thutthleng seia Mapuia lo muhil bawrh bawrh lai chu a han tlawh tho lawp a, zawite hian, "Mapui, ka bialnu hming kha tunge khah?" a han ti su su a.

Mapuia chuan vin zet hian, "Ka hre nang, bialnu pawh i nei bawklo." alo ti hlur a. MSa chuan chhuanlam siam tur a han ngaihtuah vang vang hnuah chuan a hrechhuak ta. Deborah-i chuan, "Tinge...i ngawih reng a? Min be chak vaklo em ni?" a rawn ti a. Msa chuan, "Ahh..nilove. Phone atang nilovin, inhmu ila, i hming mawi tak hi i hmaah ngei ka lam ri dawn alawm, phone atang nilovin." a han ti leh vel a, Deborah-i lah chuan Msa chu zei hi a han ti em em khawp a.

Deborah-i chuan zawh ngei a tum ta, hreh tak chung si chuan, "Ms...thil zawh duh che ka nei a." a rawn ti ta. Msa lah chuan thawveng zet hian, "Eeee...min zawt mawlh teh..diktakin ka lo chhang ang che." a lo ti nghal zuah zuah a. Deborah-i chu a zâm ve hle mai, "Ihh..nang hian, kei hi..min..min." a han ti bah deuh nuai a, Msa lah chuan hrethiam hek lo, "Sawi ta che...signal a chianglo em ni, i ṭawng kha a double ania." te alo ti vel.

Deborah-i chuan, "Ms, nang hian maw..kei hi.." a tih lai chuan Mapuia te inah chuan Msa pa, Pu Rintluanga chu a rawn lut thut mai. Msa phu nasa lutuk chuan a phone chu a dah thla a, Deborah-i lah chuan a lo sawi hman, "Ms, nang hian kei hi min duh em?" mit hup pah chuan zak tak chungin a han ti a.

Mahse Msa chuan a lo ngaithla lo, apa lo kalphei chu en reng pah chuan phone chu la kangin, "Lawk aw.." a ti a, line cut chuanglo chuan a ak ta daih mai. Pu Rintluanga chuan, "I lo leng bo daih a, hetah animaw ilo awm?" a rawn ti a. Msa chuan, "Enge ni a?" a lo ti vin hlur a. Pu Rintluanga chuan, "Lo haw rawh...ka bike saw i khawih dun lawk teh ang, i tihchhiat manah." ala rawn tizui. Msa chuan peihloh hmel tak hian, "Lo va haw rawh, ka lo haw ang." alo ti hmuk a. Pu Rintluanga chuan, "Kan in te kha i rawn theihnghilh vel ange." a han ti hram a, Msa chuan a melhrum kher mai.

Msa phone atang chuan Deborah-i chuan, "Hello, Hello.." a la rawn ti lauh lauh mai a, mahse Msa chuan a theihnghilh leh daih tawh. Mapuia pawh alo harh a, Msa nen chuan an thudun a, Msa chuan a titi pui leh ta mial mial mai. Chutia an titi lai chuan Mapuia chuan, "Taka, music hi zir ve ka duh ngawt mai, tlangval pui tawh ina guitar key pakhat lek pawh han thiam miahloh chu ka zak a ni." a han tih chuan Msa chuan thil hriat chhuah a nei, mak ti tak chuan, "Music..zir a??" a ti hu mai a. Mapuia chuan, "Aww...nangpawh zir ve la a tha ang. A zahthlak loh, kei ni aia upa fe fe pawh thiamlo an tam alawm. Phone-a han biak mai tur music instructor hmelhriat ṭha deuh te i nei lo maw?" tia a han zawh leh chuan Msa chuan a hre chhuak ta..."Phone biak a?? Ehe.." tih pah chuan pawnah a tlan chhuak a.

A phone chu a phawrh a, Deborah-i chuan phone chu alo la dah miahlo, a lo la nghak char char a ni. Inthiamlo tak chuan Msa chuan, "Hello, ila awm em?" ava ti ringawt a. Deborah-i pawh chuan, "Aw...tinge i reh daih a?" a rawn ti nghal vat a. Msa chuan, "Aaa...ka pa alo kal thut a, thil pawimawh kan sawi lawk alawm le." a han ti kual leh vel a. Deborah-i chuan phur fahran lo hian, "Umm...a nih chu." a lo ti hmuk a.

Msa chuan, "Thil min zawh duh kha i neiin ka hria, han sawi la.." a ti a. Deborah-i chu a lungawi chiah tawh lo, "Engmah a nilo, ka fiamthu mai mai anih kha." a lo ti leh hmuk a. Msa lah chuan, "Fiamthu a? Fiamthu i duh ve animaw? Keipawh hi fiamthu duhtak ka nia..." tih pah chuan a han nui vel huah huah a, Deborah-i pawh chuan a ngaihna a hre lo takzet. Titau deuh reuh chung chuan, "Ms, a nih phawt aw.." a ti leh hmuk a, Msa chuan, "Lawk aw...thil zawh duh che ka nei a, hman atang tawhin ania. A hun viau lo maithei a, mahse min chhanna ka hre chak tawh em a ni." a ti a.

Deborah-i chu a phur thar leh ta, "Enge...sawi rawh." a lo ti vat a. Msa chuan sawi mai a han tum a, a ngam leh tlat lo. A ngawi vang vang a, "Ihhh....englo...nang hian.." a han ti te te a. Deborah-i chuan a hrechak tawh kher mai, "Umm sawi vat rawh." a lo ti chung chung tawh mai a. Msa chuan a ngam leh talo, a zawt laklawh tawh si, a tihngaihna hrelo chuan, "Nang hian...ihh...thla khatah engzat te nge i hlawh thin? Fee te hi a to viau lo maw?" a ti ta daih mai.

Deborah-i chu a down vek, chhan pawh a chhang peih lo. Thinrim tak chuan, "Ka buai, a nih phawt le.." tiin a dah hmak a. Msa pawh a inthiam lo angreng hle, mahse he Haihawtliana hi...a dawih reuh em a ni.

Chumi tlai chuan lungawilo tak chuan Deborah-i chu an sitting room ah chuan a ṭhu tum bur mai a, a phone a rawn ri a, Msa alo ni. Mahse a la duhlo, a la titau laklawh tlat. Akimi chu lo pheiin, "Bawihi, i phone a rik hi.." a rawn ti a. Deborah-i chuan tum hmuk hian, "Lo ri vel mai mai rawh se." a lo ti deuh hmak a.

Akimi chuan phone chu a en a, "Ehe, Msa a nih hi..chhang ta che." a ti a. Deborah-i chuan lungawilo tih hriat zet hian, "Min duhna chhe te mah a neilo, min play vel mai mai a ni. A duh chen chen min innghah tir a, a reh leh vung vung zel a, ka beidawng tawh." alo ti vin hlur a. Akimi chuan phone chu a pick up a, Deborah-i va pek pah chuan, "Kha, chhang mai mai teh." nui chung chuan a ti a. Phur lo zet chuan Deborah-i chuan phone chu a la a, "Hello, enge?" a ti vin hlur mai a.

Msa chuan, "Bawihte, zanin chu movie en ang hmiang...5D theatre ah ngat aw.." a rawn ti vel ham ham a. Mahse Deborah-i chuan nelawm loh zet hian, "Ka peihlo...i duh leh hmeichhe dang kalpui rawh." a lo ti deuh hmak a.

Msa chuan, "Naa..ticket pawh ka lei vek tawh asin..ihh, thil pawimawh deuh zawh duh che ka nei bawk a." a han ti leh zeuh a. Deborah-i chuan thinrim tak hian, "Vawiinah thil pawimawh deuh chu min zawh tawh kha." a lo ti leh hmuk a. Msa chuan, "Thinrim tawh suh, ticket ka lei lawk vek tawh...mawwhh, bawihpui, ka naute, lalhmeltha." a han ti vel chiam chiam a. Akimi chuan zawite hian, "Mawli, aw ti vat rawh, a duh che..100% in ka chiang." a lo ti sup a. Deborah-i chuan, "Tak tak em, Kim?" a han ti a, Akimi pawh chuan a lu a lo bu nghat a. Mi thusawi apiang awih nghal zel Deborah-i chuan hlim takin, "Awle...ka lo kal ang." a ti a, phone chu a dah ta a.

Zan alo thleng a, Deborah-i chuan Theatre bulah chuan Msa chu a nghak leh ta rán mai a. Mahse Msa erawh khawnge a awm? Movie en chungchang chu engmah a hre leh tawh lo, a thianpa Victor-a te inkawtah Board an lo pen vel leh mai mai tawh. Movie ṭan dawn tep ah chuan Deborah-i bulah chuan Sub-Inspector Thantea kha alo lang thut mai, "Hello, Deborah." tih pah chuan a rawn nuih vel a. Deborah-i'n Thantea a hmu chiah chu a ngei hmel kher mai, chhan pawh a chhanglo. Thantea chuan inla nelawm tak hian, "Tunge i nghah a? Movie i en ve dawn em ni?" tiin a han zawt a. Vin zet hian Deborah-i chuan, "Theatre bulah ka awm a, bazar tur ka ang em ni? Enge chutiang zawhna mawlmang lutuk min zawh a?" a lo ti hrep mai a.

Thantea chu za lo tak chuan a han khi suk a, "Huh...hmanni vang khan ila thinrim a ni maw?" a han ti a, mahse Deborah-i chuan en pawh a en ṭha peihlo. Thantea bawk chuan, "I mi nghah chu alo kal mai silo a, hei tunah movie an ṭan der tawh bawk si a. Kan pahnih hian endun mai ila, ka duty a zo tawh a...ka hman lai tak a nia." a han ti vel ham ham a.

Deborah-i chuan ten hmel tak hian Thantea chu a en a, "Nang en pui ai chuan kan vawkpui nena en pawh ka thlang zawk." tih pah chuan a kalsan ta daih a. Thantea chu ngeiawm zet hian a han khi ver ver a, "Engang pawhin min hlat tum mahla, ka nei tho tho ang che..Hmeli." tih pah chuan Deborah-i chu ît hmel zet hian a thlir zui vawng vawng a.

Thinrim tak chung chuan Deborah-i chu taxi-i'n in lam pan chuan a kal mek a, mahse mi inkawta Msa leh midang pathum vel board lo pen pah a, an lo nui huah huah chu a hmu fuh ta. Rang zet hian, "Ding rawh..hetah hian kalo chhuk ang." a ti a. Tichuan Msa te lam chu ava pan phei ta a, chutia thinrim hmel taka alo kal phei chu Victora chuan a lo hmu fuh hlauh mai. Rang takin Msa bulah chuan, "Ms...saw Deborah-i alo kal ania." a han ti chiah chu Msa chu a ding zawk mai, "Khaiiii...ka theihnghilh chiang lutuk, zanin hian movie enpui turin ka sawm tak e." a ti vawng vawng mai a.

Mapuia chuan, "Engtin nge chhuanlam i siam dawn..ngaihtuah vat teh." a ti a. Msa chuan a han ngaihtuah vang vang a, Deborah-i lah chu a lo thleng ṭep tawh bawk si. An board penpui, zu heh zet, kum 75 chuang tawh, Victor-a pu chu Msa chuan a han en ta vang vang a. Msa chuan, "Pu....a sen(red) hi penluh tum ang deuhin tin vang vang la, i kut te kha han ti khur lui vel la..abak chu keiman ka buaipui vek ang." a tih zawh rual rual chuan Deborah-i chu a rawn thleng ta.

Thinrim tak hian Msa chu a melh a, "Malsawmsang.." a ti chiah chu Msa chuan, "Shhhhhh...." a lo ti vat a. Mapuia te, Victora te leh Hmingmawia te chuan Victora pu, Pu Dika chu an en thup mai a. Pu Dika chu a han khur deuh dar dar a, chauh hmel tak hian a han tin vang vang a. Msa lah chuan, "Pu...zâm lo la, i ti thei a ni" a lo ti vak vak a. Deborah-i chuan a hrethiamlo kher mai, Pu Dika chu ngawi reng chuan a en ve hû ringawt mai a. Pu Dika lah chu a han khur deuh dur dur a, a maimitchhing vel thul. Msa lah chuan hnuk ulh der tih hriat tak hian, "Khawngaihin ka pu...zâm suh." tih pah chuan a han inhnit deuh feih feih a. Pu Dika chuan a han tin vang vang a, a pen ta pawp mai. Ava lut nalh chiang kher em..a ti fuh anilo, a thiam hrim hrim, board penah a tûte rual pawh hian an hneh ngailo, chumai nilovin lemchan pawh thiam tak a ni.

Victor-a chuan a pu chu a han kuah vel a, "Pu..ka va han lawm tak, i dam dawn alawm, i dam zel dawn." tih pah chuan a han ṭap der vel a. Msa chuan Deborah-i chu inthiamloh hmel tak hian a en a, "Han auh mai a tum a, a hming ala theihnghilh zui." Mapuia bulah chuan, "Tunge khah?" ava ti zauh a, Mapuia chuan nuih suk pah chuan, "Deborah." alo ti zauh bawk a.

Msa chuan, "Deborah, ka tihpalh takzet a ni. Mahse ka rawn chhuah pah khan Victora hian min rawn call a, ka pu hian Board pen a châk tlat thu a rawn sawi a. Ni 3 vel chaw a ei duh tawh lova, tui chauh a in ṭhin a. Cancer natna a vei mek a, a chau em em a, board ka pen loh chuan engmah ka ei dawn lo a ti tlat bawk si a. Tichuan ka va phei ta a, a duh ang ngei chuan ka han tihpui ta a, tunah chuan chaw a ei ve thei tawh anga, a damrei phah sawt pawh ka ring a ni. Deborah, ka tihpalh aw...phone-a rawn hrilh che ka tum reng a, mahse ka pu hian min mamawh si a, i hauh huamin tihian ka kal ta mai a ni." a han ti vel zuah zuah a.

Deborah-i chuan dawt an sawi tih te, lem an chang mai mai tihte chu engmah a hrethiam leh ta peklo. A rilru ah chuan Korean film feelings ringawt a awm leh ta..Msa chu a ngaisang thar zual em em a, "Apawilo, i va han fel tak em. Diktak chuan kan inṭhianṭhatna hi tih tawp hmak ka duh a, rawn hauh hrep che ka tum a. Mahse thil ṭha tak ilo tih vang zawk a nih hi, ka thinrim leh love." tih pah chuan a han nui seih a, ava han duhawm chiang tak, mahse a mawl mah mah ani.

Victor-a lah a lo over fâl, Msa rawn kuah pah chuan, "Ṭhiana, ka van lawm tak...doctor tamtak ai hian i ropui lohna hi ka hre lo.." te a rawn ti ta vel a, Msa chuan rum zet hian alo melh a, kuah let pah chuan a bengbulah chuan zawite hian, "I over hret awww." a han ti zauh a. Deborah-i chuan, "Ms, ka kal phawt ange aw...naktukah kan inhmu dawnnia." a ti a. Msa chuan, "Ka lo thlah dawn che em ni?" a han ti a. Deborah-i chuan, "Angailo mai, kein ka kal tawh mai ang, a hnai tawh tho." a ti a, tichuan a kalsan ta a.

Deborah-i a kal chiah chu Victora chuan, "Hmela, ka pu hian cancer natna a vei tak tak ange aw.." a ti bul bul a. Msa chuan, "Ngawi mai teh...i over mah mah ṭep ania aw...min manchhuah teuh zia kha." tiin a lo vin let hrep a. Mapuia chuan, "Ms...i engemaw ropui phian mai. Tikhawp hian i natna avang hian i haihawt em em a, mahse Deborah-i lakah chuan hniak phawi miahlovin dawt i sawi zung zung a, chhuanlam i siam nghal zuah zuah thei hi amak em mai." a lo ti ve vawng vawng bawk a.

Msa chu intithei tak chuan a han khi deuh suk a, "Ka duatlai Dorothy hi chu awww.." a han ti daih a. Mapuia chuan nuih pah chuan, "Ngaihna awmlo, ka fak zo chauh che a, Dorothy anilo...Deborah-i zawk awwww!" a han ti chuan amah Msa zawk pawh a nui huah huah mai. Huiham....atha vek e.

An in a thlen dawn ṭepah chuan Deborah-i chu hnuglam atang chuan tu emawni hian a rawn ko a, "Hey..nangkha lo ding teh." a rawn ti vak a. Deborah-i chu a hawi let a, hmeichhe constable pakhat leh nula inchei parh tak, KS niawm tak te hi anlo ni a. Chu nu chuan constable hmeichhe bulah chuan, "Ka pi, sawnu ta saw a nia ka lei ṭhin." tih pah chuan Deborah-i chu a kawk a. Constable chuan Deborah-i chu a va pan a, abâna pawh pah chuan, "Lo kal rawh le." a ti a, Deborah-i chuan a hrethiamlo kher mai. Hlauthawng tak chuan, "Enge ni a? Enge ka tihsual a?" a ti vak vak a. Constable chuan, "Number 4 ilo zuar ru vel ṭhin amaw? Ngawi reng khan Station ah min rawn zui mai rawh.." a ti khur khur a.

Pu Zorema chuan sana en zauh pah chuan, "Deborah-i hi alo va haw har ve mawle, dar 10 a ri ṭep tawh asin." a lo ti nuah nuah a. Akimi chuan, "Ka phone a, a la theilo a, alo haw tep ang." a lo ti a. Pu Zorema phone chu a lo ri a, a han en chuan Deborah-i alo ni a. Rang zet hian phone chu a la a, "Hello, Bawihi..khawnge i awm a?" a han ti a. Deborah-i chuan ṭap chung hian, "Pa, Police Station ah ka awm." a rawn ti ta mai a. Pu Zorema chu a hlauhthawng kher mai, "Bawihi...tinge? Engvangin nge Police Station ah chuan i awm a?" a ti nghal chel chul mai a. Deborah-i chuan hlauthawng tak chuan, "Ka hre biklo, min man ringawt a." tiin a ṭap zawih zawih mai a.

Pu Zorema chuan, "Bawihi, Inspector hnenah khan phone han pe teh." a ti a. Assistant Sub-Inspector chuan phone chu a han la a, inla engemaw zet hian, "Hello, enge i sawi duh?" a han ti vel ham ham a. Pu Zorema chuan zah tak hian, "Ka pu, tinge ka fanu kha in man a?" tiin mangang tak chuan a zawt a. ASI chuan, "Hmh..tinge in fate hi tunlai nu leh pate hian in hriatchian loh em em le? Number-4 a lo zuar kual ṭhin a, chuvanga man chu kan ni." a lo ti khur khur a. Pu Zorema chuan mak a ti hle mai, "Damdawi a zuar maw? A ni theilo...chutiang a ti lovang." a ti a. ASI chuan, "Lo kal la, hetah rawn sawi rawh." a ti a, phone chu a dah hmak a.

Akimi chuan mangang tih hriat tak hian, "Ka pa, enge ni?" a lo ti a. Pu Zorema chuan, "Deborah-i an man anih chu. Hetah hian lo awm la, ka va hruai haw ange...lo mangang suh." a ti a. Akimi chuan hlauthawng tak hian, "Tinge? Engvangin nge an man a?" alo ti nghal chiam chiam a, a ṭap nghal deuh titih der mai. Pu Zorema chuan, "Akim, inah lo awm la, ka lo hruai haw vat ang." tiin a chhuahsan ta a.

Pu Zorema chuan rang takin a ṭhianpa Pu Zuala fapa, SI Thantea chu a phone a. Thantea bula thil awmzia a sawi hnu chuan Thantea pawh chu Station lamah chuan a kal ve ta nghal a. Pu Zorema leh Thantea te chu Station chhungah chuan an lut a, Deborah-i'n a pa a hmuh veleh chuan ṭap chungin ava kuah nghal a. Thantea chuan thinrim hmel tak hian, "Tunge man? Tunge a man tu ber?" a ti vin khur khur a. ASI chuan, "Sir, keimah ka nia...number-4 a zuar ru ṭhin an tia." a lo ti a. Thantea chuan ASI kawr awmah chuan ṭhamin, "Hmela, damdawi a zuar anga maw? I man saw tunge anih i hria em? Ka nupui hual a nih saw.." a ti ta mai a.

Huat hmel em em hian Deborah-i chuan Thantea chu a lo melh a, a ṭap zawih zawih a. ASI chuan inthiamloh hmel tak hian, "Ka tihpalh ka pu, kan lo hriatsual a ni." a ti a. Thantea lah chuan vin zet hian, "Ka bulah nilo...ka nupui hual leh ka puzawn te bulah sawn ngaihdam dil rawh." ala ti ta deuh deuh a. ASI chuan Deborah-i te pafa bulah chuan, "Min ngaidam ru." ava ti a. Thantea chuan Deborah-i te pafa chu a chhuahpui ta a, Pu Zorema bulah chuan, "Pa Zorem, min hrethiam rawh aw..khatia ka nupui hual anga ka sawi avang khan. Ihh...ka nupui hual amaw an ti anga, an tibuai ngam tawh miah lo ang che u." a han ti vel a. Zaidam tak hian Pu Zorema chuan, "A pawi love..kan lawm e." a lo ti a.

Thantea chuan Deborah-i chu a han melh a, "Deborah, min hrethiam rawh aw." a ti a. Chhan pawh a chhang peihlo, rum zet hian alo melh a. Thantea bawk chuan, "Pa Zorem....in chhungkua hian police chu inla mamawh dawn chauh ania, tiang thil hi a thleng leh lovang tih pawh a sawitheih miah loh ania." a han ti leh deuh kher a. Deborah-i chuan, "Pa...kal ang." a ti hmuk a, an kal ta a. An kal liam chiah chu ASI chu a rawn chhuak a, Thantea chuan pawisa a phawrh a, ASI hnena pek pah chuan, "Kha le...in thawk ṭha e." a ti a.

Chumi zan la la chuan Msa chuan Deborah-i chu a hmangaih thu va hrilh a duh ta tlat pek a, inah a haw, nalh em em hian a inchei a. A hunlo viau maithei, mahse a huaisen ber lai a ni bawk si a, nidangah a ngam leh dawn rauh silo. Tichuan a ṭhianpa Hmingmawia phallo chung chu a motor a hmansak lui a, Deborah-i te in lam pan chuan a kal ta a. Deborah-i te in zawn a thlen chuan a zâm ve angreng hle mai, Hmingmawia hlauthawng chuan a rawn call a.

"Ms, ka motor kha i rawn hawsan daih ange aw?"

"Mai mai ṭhin a, ka tiam ache...him takin ka rawn dah let leh ang."

"Deborah-i chu i propose tak tak dawn em ni?"

"Tun bak chu hun ṭha ka nei leh tawh lovang, naktuk a lo ni anga, ka theihnghilh leh daih a nimai."

"A ṭha e, mahse a hun lo khawp mai, a tlai tawh si a."

"Ka ngam hunlai ber alawm..chubakah apa a chhuak a ni ngei ang, hei apa motor pawh a awmlo."

"Aṭha alawm, mahse ka motor mawlh kha aw?"

"Lungngai suh...kan in bulah minlo nghak dawnnia."

Phone chu a dah a, motor aṭang chuan chhukin inla Romeo tawk chuan pangpar kengin Deborah-i te in lam chu a pan ta a. Inchhunga amaha lo awm mek Akimi chuan mangang takin Deborah-i leh a pate chu a lo nghak mek a, a vei kual a vei kual lai chuan a pum a rawn na ta thut mai. A naute pai chu a rawn che tlat hian a hria a, chhuatah chuan a thal tawp mai. Au vak a tum a, mahse a thei lo, a pum na lutuk chuan a thawk ṭhat tir theilo a ni. Phone phawrh a tum a, mahse a phone chu a room ah a dah daih tih a hrechhuak a, a mangang hle mai.

Msa chuan door bell chu a hmet a, mahse tuman an lo chhang lo. Door bell ri chu hria in a theihtawp chuan, "Min pui ru.." a han ti a, mahse a aw a chhuak hleithei tlat lo. A pum lah chu a na tulh tulh mai si a, a mittui a tla thei hial. Msa chuan vawi 5 vel lai door bell a hmeh hnu pawha chhang tu an awm tak silo ah chuan an mu tawh a nih ringin let leh mai a tum a. Akimi chu a theih tawpin an filter dahna lamah chuan a vak phei a, a tha neih zawng zawng chuan filter chu a tlawh pawp mai a, an filter darthlalang aṭanga siam chu a tla kek ri chhuai mai. Thawm chu Msa chuan a lo hria a, rang takin kawngka chu va hawn a tum a, vanneihthlak takin a lo inkalh lo hlauh. Inchhung a lut chiah chu Akimi, na tuara lo let reng chu a hmu a. Rang takin ava pan a, "Ka pi...enge awmzia?" ava ti vat a.

Akimi chuan thei leh theilo hian, "Dam...damdawiinah..min hruai rawh." a lo ti ṭawk ṭawk a. Msa chuan a pawm tho lawp a, tichuan motor lam a panpui nghal a. Motor seat hnungah chuan Akimi chu a muttir a, Deborah-i te in kawngkhar chu a va khar ṭha leh te te phawt a, tichuan rang takin damdawiin lam pan chuan a kalpui ta a. Mahse maw...nasa em em hian ruah a rawn sur ta buan buan mai, Msa...mit ṭha vak bawk silo chu kawng a hmu chiang thei ta tlat lo.

Akimi lah chuan na a ti lutuk chu a ṭap ṭap a, "Hmanhmawh rawh...khawngaihin.." a lo ti chel chul tawh mai a. Chak takin a tlan a, mahse a tlan chak lutuk chuan kawng a hmu chiang thei bawk silo, chhum a zing nasa bawk si chu a accident mai ang tih a hlau ve bawk si, a motor a ni bawk silo. A kalna chin pawh a hre tawh lo, kawngsira vai watchman pakhat duty chu ahmufuh hlauh mai a, azawnah chuan va dingin, "Ka pu, khawilai nge damdawiin kawng khahh?" ava ti ta ringawt mai a.

Chu watchman chuan, "Eeee..ilo pel thui tawh lutuk, helamah a nilo, sawlamah let phei leh vang vang rawh." alo ti daih mai si. Hmanhmawh em em hian a in-turn a, chhumzing ruai karah chuan a tlan risk leh ta pawp pawp mai.

A rilru mangang tawh bawk si chuan speed breaker te chu hmu tawh hek lo, a tlan sawt bauh buah reng mai a, an insawh zawng apiang chuan Akimi chuan na tiin a lo ṭe tuar tuar bawk a. Msa tihngaihna hrelo chu a ṭap pur tawh mai, "Engtin mah i awm lovang...lungngai suh." tiin a khat tawk chuan a hnem ve reng bawk a. Chutia an tlan zel lai chuan an hma takah chuan scooty pathum vel hi kawnglai ah chuan a lo ding fur hlawm mai a, hmanhmawh tawh nen, ava hahthlak ṭhin tak em.

Rang zet hian a chhuk a, mi 10-20 vel an lo awm ṭhup mai a, Police pahnih pathum vel an lo awm ve lehnghal. Msa chuan Police bulah chuan, "Enge thleng a? Tinge kawnglaiah scooty hi a awm a?" a va ti vin hlur tawh mai. Police chuan, "Accident a thleng a, scooty pakhatin taxi ding lai a su ringawt a.." a lo ti a. Msa thinrim lutuk chuan, "Khawnge scooty khalh tupa chu?" a ti khur khur a. Police chuan, "Sawlaia mi saw.." tih pahin kil khata pa pakhat nihliap khuma lo ding chu a va kawk a. Msa chuan ava pan phei a, ruah lah chu a sur nasa tulh tulh mai si. Msa chuan chupa bulah chuan, "I va fimkhur awm love a..khawi venga awm nge in nih?" te a va ti vel. Chupa chuan hlauh hmel tak hian, "Ka pu, Aizawla awm kan ni lo, Mamit atanga lo kal ka nia." a han ti chiah chu Msa chuan Akimi a theihnghilh leh ta daih mai.

Phur zet hian, "Mamit a? Mamitah keipawh ka zin tawh asin, kar khat vel kan awm tawh alawm. Khawilai takah nge in awm? Pu Biaka i hria em? Khabe hmul buk deuh nei, YMA Leader kha.." a han ti nghal zung zung a. Akimi erawh a chau chhe ta der mai, nikhawhrelovin a awm ta a. Chupa chuan, "YMA Leader te chu veng tinah an awm a, tuber nge i tih a. Pu Biaka ka hriat chu kan kawmthlang ami a nia, YMA Leader chu a nilo. Mahse OB zingah chuan a tel ve a, hmanni khan a nupui raicheh in a thi an ti lehnghal." a han tih chiah chuan Msa chu a harhchhuak leh ta zawk mai.

Akimi a phur tih a hre chhuak a, hmanhmawh takin ava tlan let leh a, police bulah chuan, "Ka pu, damdawiinah ka kal vat angai a, khawngaihin kawng hi min clear sak thei angem?" tiin a va dil ta tawp a. Police chuan zaidam tak hian, "Helam ah damdawiin a awm hlei nem, sawmi peng ah zawk sawn kal tur." tih pah chuan kawng peng lehlam chu a kawhhmuh a, tichuan Msa chu rang tak chuan motor ah a lut a, a tlan leh nghal char char a. Akimi chu a be vak vak a, mahse a chhang thei tawhlo. Mitthi ang der hian a zawi nguai tawh mai, Msa pawh a mangang takzet tawh. A kal zel a, mahse damdawiin awm ang reng reng a hmulo. Ruah chu a sur bang a, chhum erawh ala zing chuai chuai mai. Motor chu a tiding a, Akimi chu a sawi vak vak a, "Ka pi, harh rawh...khawngaihin harh rawh." a ti a, mahse Akimi chu a harh thei ṭhak lo. Msa hian Akimi hming hi a hre ṭhin a, mahse a hre leh tawhlo a ni, chuvang chuan 'ka pi' tiin a ko ta mai a ni.

Motor aṭang chuan a chhuak a, a thihngaihna hrelo chu a ṭap zawih zawih ta ringawt mai. Chutih lai tak chuan Hmingmawia chuan a rawn phone a, "Hello MS, enge i an? Deborah-i chuan engtin nge a lo chhan che?" a rawn ti ham ham a. Msa erawh chuan ṭap ṭeuh chung chuan, "Ṭhianpa, a tawp vek...engkim ka tichhe zo vek a ni." tiin a lo chhang a. Hmingmawia chu a mangang hle mai, "Enge awmzia?" a rawn ti vat a. Msa chuan lungchhe tak hian, "Keimah vangin Deborah-i u leh a fapai mek hi an thi dawn ta a nih hi....amah chauhin inah a lo awm a, ka va luh chuan chhuatah na tuarin a lo let reng a. Damdawiin pan pui turin ka phur nghal a, mahse dawmdawiin kawng ka hre leh tawhlo ani, chhum a zing nasa si, a pawi lutuk ṭhiana..a pawi takzet." tiin a lu a dawm vawng vawng mai a.

Hmingmawia chuan, "Awle...mangang suh, i bulah midang an awm em? Damdawiin hnai ber khawilai nge tiin zawt la, tunah khawnge i awm i hre thei em?" a rawn ti a. Msa chuan, "Aih...chhum a zing nasa lutuk, engmah ka hmu theilo. Sign board pakhat chu a awm a..mahse.." a tih lai chuan sign board a han en chu TRM PRIVATE HOSPITAL (phuahchawp) tih a lo inziak reng mai. A thaw huai mai, "Hmingmawi, TRM Hospital ah lokal vat rawh." tih pah chuan phone chu a dah a, rang zetin Akimi chu a pawm chhuak a, damdawiin ah chuan a tlanluh pui ta nghal a.

Darkar chanve vel hnuah chuan nurse chu alo chhuak a, Msa bulah chuan, "Ka lawmpui ache ka pu, mipa a ni e, pa i ni ta e." a la rawn ti zui. Msa chuan, "Leh ringawt zel a, ka nupui a ni ka ti reng reng em ni?" alo ti nuah nuah a. Nurse chuan, "E...i nupui amaw ka ti a." inthiamloh hmel tak chuan a ti a. Msa chuan, "Engpawh nise, enge a an? Engkim a ṭha vek maw?" tiin a zawt a. Nurse chuan, "Aw..aṭha vek e. Thil mak tak a ni, naute kha a tâng a, mahse a dik thlapin a rawn chhuak leh thei a. A awmzia chu in rawn thlen hma khan naute kha amahin a lo insiam rem tihna a ni." a tih chuan Msa chuan mak a ti hle mai, a han ngaihtuah vang vang a, speed-breaker lian tawka an tlan sawt bauh bauh kha a hrechhuak a, a nui huk ringawt.

Intithei tak chuan, "Nia, ka theihtawp ka chhuah ve a, eng eng emaw hi chu ka hre ve nual a." a han ti deuh ngei a. Nurse chuan, "I duh chuan iva hmu thei ang." a ti a. Nurse a kal liam chiah chu Hmingmawia a lo thleng a, thaw hluam hluam hian, "Ms, hetah animaw ilo awma, ka zawng kual nasa che alawm. Enge a an? Naute chu a ṭha em?" a rawn ti a. Msa chuan, "Naute chu a ṭha, anu pawh a ṭha, mahse keimah hi ka ṭhalo, ka la hlauthawng a ni." tih pah chuan a awm a dawm vawng vawng a.

Hmingmawia chuan, "Deborah-i i hrilh tawh em?" a ti a, Msa chuan, "Ehe...ka theihnghilh daih." tih pah chuan phone a phawrh a, Deborah-i chu a call nghal a. Deborah-i te pafa pawh inlam panin an lo haw mek a, ruahsur nasa lutuk leh chhum zing avang khan an lo tâng rei ve deuh a, an haw tlai phah a ni. Deborah-i chuan, "Hello.." a han ti a. Msa chuan, "Deborah, i u damdawiinah a awm aw, nau a nei zo chiah." a tih chuan Deborah-i chu a mangang hle mai. Hrethiamlo tak chuan, "Enga? A ṭha em? Khawi damdawiin?" a ti nghal chel chul a. Msa chuan, "A ṭha e, engmah hlauhthawmawm a awmlo. Tunah lo kal vat la, TRM Hospital ah, ka lo nghak ang che." a ti a. Pawnah chuan Msa leh Hmingmawia te chu meizial zu turin an chhuak a. Deborah-i te pafa pawh an lo thleng a, mahse Msa te ṭhiandun chu an hmulo, Msa te pawhin an hmulo bawk.

Deborah-i chuan Akimi fapa thar chu a en ngawih ngawih a, "Kim, a hnar hi ka pa chiah chiah mawle." tih pah chuan a nui har har a. Akimi chuan chauh hmel tak hian, "Bawihi, khawnge kha tlangval kha?" a ti a. Deborah-i chuan, "Tu tlangval maw?" a lo ti hu a. Akimi chuan, "Damdawiina min hruai tu kha mawle...i ṭhianpa Msa kha ani tiraw? A hun takah alo thleng a, a hun takah damdawiin min panpui bawk a. Vantirhkoh ang mai ani, a ni kha chu awmlo se...ka fapa nen hian kan dam tawh hauh lovang. Ka hmu duh ani, lawmthu hrilh ka duh." a ti a. Deborah-i chuan, "Ka'n call ange, damdawiin pawn lamah a awm aniang." a ti a, a call ta a.

Msa chuan phone chu lo la vatin, "Hello, Deborah...ilo thleng tawh em?" a ti a. Deborah-i chuan, "Ms, khawnge i awm?" a ti a. Msa chuan, "Damdawiin pawnah ka awm a, khawnge i awm?" a ti a. Deborah-i chuan, "Lo awm rawh." tih leh tlanchhuah a rual nghal a. Msa chuan, "Hmmm....a han dah leh daih a, awmzia lo thei." a ti nuah nuah a. Hmingmawia chuan, "Enteh bro, chance ṭha lutuk a nih hi aw...tunah tak hian propose vat rawh, hun remchang ber a nih hi.." a lo ti a. Msa chuan, "I mawl ami? Buaina kan tawk zo chiah a, lo bem leh vel te chu...a hun lo lutuk." a tih lai chuan hnunglam atang chuan Deborah-i chuan, "MS.." a rawn ti lauh lauh a. Msa chu a hawlet a, Deborah-i chu a rawn tlan phei a, a Korean thei ang ber chuan a rawn tlan cute vel khawp mai.

Msa chuan a lo en char char a, Deborah-i chuan Msa chu a rawn kuah chat mai. Nghet takin a vuan a, a beng bulah chuan zawite hian, "Ms, ka hmangaih che." a ti vawng vawng mai. Msa lah chu a lo phu zawk mai, a chhanlet ve mai loh avang chuan Deborah-i chuan a en hu a, "Tinge? I duh lo em ni?" a han tih chuan Msa chuan ka hau hian, "Ka sawi tur zawk ani lawmni?" a han ti hu mai a. Deborah-i chuan nui chung chuan, "Sawi vat ta che anih chuan.." a han ti a. Msa chuan a kuahlet ve a, "Ka hmangaih che, Deborah." a ti ve ta a, Deborah-i chuan, "Keipawn ka hmangaih che.." a han ti a, zawite hian, "Oppa." a han ti leh deuh kher a, a ṭul em a ni.

Hmingmawia pawh a lawm ngang aniang, a thianpa Msa'n a tawp atawpa bialnu chhelo zet mai a han nei ve ta chu a hnuk te alo ulh vel. Deborah-i chuan, "Ka u Kimi'n a hmu duh che a, ka pa pawh a awm ang. Lo kal rawh...va lut ang." a ti a. An kal tur chiah chu Hmingmawia chuan, "Ms, motor saw park ṭha phawt ila, saw security in min hau ania." a lo ti a. Msa chuan, "Lo va lut la, ka lo kal vat ang." a ti a, tichuan motor chu an park tha a. Msa chu a pa in a rawn phone a, "Hello, Malsawmsang khawnge i awm?" a rawn ti leh ta khur khur mai. Msa chuan, "Awww...tlangval te kan ni ve a, kan duh chen chen kan leng ang chu." a lo ti nghal zuah zuah a. Pu Rintluanga chuan, "Chutiang lam ka sawilo, i nu Biaki fanu a chatthla a, kan nupa hian kan kal ve duh alawm." a rawn ti vin hlur mai a.

Msa chuan, "Ekhai, zan a rei tawh sia, naktuk lamah kal mai ula." a lo ti vel a. Pu Rintluanga chuan, "I thulo ve emai, lo haw vat rawh..kan kal duh tawh." a rawn ti vin leh tuar a. Msa chuan, "Awww..ka dang che u ami? Kal ula nimai lawm, i bike ṭawng tawk nen khan va kal ula." tih pah chuan a han nui vel a. Pu Rintluanga chuan, "I mawl ami? Bike chahbi i ak daih alawm...bike hetah a awm a, achahbi i kengchhuak daih a, chanbi tellovin a nung thei nâng." a rawn ti vin vak vak a. Msa chu a han indap a, bike chahbi chu a lo ak reng mai a, mahse engvanga ak ringawt nge a nih tih chu a inhre chhuak zo leh ta chuanglo. A nui huk ringawt a, "Hehe..ka lo ak daih a nih hi." a ti ringawt a. Vinzet hian Pu Rintluanga chuan, "Lo haw vat teh." a rawn ti leh khur khur a. A thianpa Hmingmawia leh a bialnu thar Deborah-i pawh chu a hre leh tawh lo, taxi lo ding chu a be mawlh mawlh a, a haw ta daih mai

Atuk zingah chuan Akimi chu a fapa nen chuan damdawiin atang chhuah tir nghal an ni a, mak tak a ni. Naute chu a hrisel ṭha em em a, chutiang bawkin Akimi pawh, Msa hian magic a thiam amaw tih hial tur ani. Naute chu Deborah-i leh Akimi chuan ṭhutchilhin an lawm a. Pu Zorema chu a lo lut a, "Bawihte, Thantea pa in vawiin chu chaw eiah min sawm a, kan va kal ve dawn em ni?" a han tih chuan Deborah-i hlim hmel chu a ngui nghal bûr mai. Pu Zorema chuan, "Bawihi, Thantea kha awmlo se chu Police te lak atang khan i him kher lovang, amah vang liau liau a nih kha. I ringsual mai mai ani...mi fel tak ania, han belchiang ve phawt la. Hmanhmawh angai lo, in innei dawn e ka tihna a nilo.." a tih lai chuan Akimi chuan, "Pa, Deborah-i hian bialpa a nei a." a lo ti a.

Pu Zorema chuan, "Bialpa a? Tunge chu chu?" a lo ti vat a. Akimi chuan, "Nizana damdawiina min hruaitu kha a nia, afel lutuk. Amah pawn Deborah-i chu a hmangaih ve lutuk bawk asin, chuan maw...Deborah-i student Cindy thisen pe tu kha ania." a han tih chuan Pu Zorema chuan, "Ee...khapa kha maw...a pawi hleinem. Mifel tak a nih ka ring...hmuh ka duh a ni." a ti a. Deborah-i chu a lawm ngei mai, "Pa vawiinah i hmu duh nghal em?" a han ti nghal chung chung a. Pu Zorema chuan, "Apawi miahlo ang, park-ah min lo nghak se...keichu i hriat kha, i pasal tur chu a hranpa in ka belchiang phawt tur a ni ka tih kha." a han ti deuh luam a. Deborah-i chuan hlim tak hian, "Awle ka pa, ka'n call nghal ange." tih pah chuan inchungah a tlanchho vat a.

A roomah chuan a lut a, phone phawrhin Msa chu a call nghal a, "Hello duat?" a va ti vel a. Msa lah chuan, "Hello duuuaaattt...enge ni ta?" a lo ti kûr ve duam bawk a. Deborah-i chuan, "Kan innei thei dawn chiang ta e.." hlim tak chuan a rawn ti nghal ringawt a. Msa lahin a lo hrethiamlo, "Enga, nizanah ka hmangaih che i ti a, tunah midang nen in innei dawn amaw?" a han ti nghal khur khur a.

Deborah-i chuan, "I mawl ami? Nangmah nen alawm ka sawi.." a han ti chuan a han nui leh suk a, "Ka fiamthu a nih khaa.." a ti leh vel zaih a. Deborah-i chuan, "Vawiinah park-ah, kan inhmuhna ṭhin ah khan ka pa in a hmu duh che aw?" a han ti a, Msa chu a lawm ngei mai, Pu Zorema a ni tih a hre miau silo. Hlim tak chuan, "Awle...ka lo kal ange." a ti a, phone chu an dah ta a. Chuveleh Msa chu a zuang tho nghal a, choka lamah tlan pheiin a lam ta ṭiah ṭiah mai. A lam pah chuan, "Kha kha nimai...van nuam em...huuuuiiiizzz." a han ti vel chiam chiam a, a hlim ngang a ni.

Pu Rintluanga inthiar zo bathroom aṭanga lo chhuak chuan a fapa lo lam chiam mai a hmuh chuan a ngaih aṭhalo lek lek zawk a, "Sangzual, lo tlan teh...i fapa hi a kawchhungah ramhuai a lut aniang." a la ti vak vak zui. Msa nu leh pate chuan Msa chu an va pan hnai a, Pu Rintluanga chuan, "Haihawtlian, enge khatia i lam vak vak a." a va ti hrep a. Msa chuan zâm hauh lo hian a pa chu a han melh a, a dâk vah mai a, "Pu Rintluang, engmaw i sawi khah? Tuman an nei duh lo ang che! Nang ang em em a haihawt te chu i dam chhungin bialnu i hmu lovang...eke bale...min ti mawww? Huuhahahahah...tunah khan ka bialnu pa-in min hmuh duh thu a rawn sawi mauh mai...ka han insiam ange awwww?" tih pah chuan a room lam pangah a chho nghal nal nal a, Pu Rintluanga te nupa chuan mak ti tak hian an en hau ringawt mai.

Park-ah chuan rilru hah tak leh zâm em em hian Msa chu a ṭhu ran tawh mai a, a bula vai pakhat lo zai âl âl mai te chu a vin hrep a, "Hey...vaichhia, zai zai suh. Ka hla duh deuh i sa lehnghal, thildang min ngaihtuah tir suh.." tiin a hnawtbo a. A in hum ruh nasa ngei mai, "A hma pawhin ka tisual fo tawh a, tun ṭum chu ka tisual tawh tur a nilo. Deborah-i pa nen kan inhmu dawn...ka bialnu Dorothy..oh..a ni ziah lo..DEBORAH-i..DEBORAH-I PA NEN KAN INHMU DAWN...abak thildang ngaihtuah suh Malsawmsang!!!" tiin a inbe mawlh mawlh a. Chutih lai chuan a bulah chuan hmeichhe naupang kum 4 mi vel lek hi nu pakhat hian a lo kai phei a, Msa bulah chuan, "Ṭhianpa, ka fanu hi lo veng lawk teh a, ATM ah pawisa lak lawk ka duh a." a rawn ti a. Msa chuan a hnial hreh bawk si, a theihnghilh leh a hlau bawk si, "Apa a awm lo mi?" te alo ti ringawt a. Chunu chuan, "Aww...lo veng lawk aw, ka reilo ang." a ti a.

Msa chuan naupang chu a melh a, "Min en suh..ka rilru lak pên i tum." te a ti ringawt a, a mangang em a ni. Ama hriattham leh chuan, "Ka puzawn tur nen kan inhmu dawn.." tiin a phun mawlh mawlh a. A hawi kual a, Pu Zorema a hmu thut mai, ama lam pan chuan alo kal lehnghal. Msa chu a phu zawk a, "Khai...engvangin nge hetah kher alo kal?" tih pah chuan a inhliah nghal a, naupang pawh chu a ngaihtuah leh tawh lo, a kalsan leh ta daih mai. Naupang chuan a ball ken lai chu a thlauh a, kawngpuiah chuan a lir phei ta daih mai a. Naupang chuan chhar tumin kawngpui lam chu a pan ve nghal a, mahse truck lian tak mai hi chak em em hian a rawn tlan mek bawk si. Kawnglai takah chuan naupang chu a ding a, ball chu a chhar a. "Naupang khaaaa.." tia mipui râk tuar tuar ri chu Msa chuan a lo hria a, ava hawi phei a.

Truck chu chak em em hian a rawn tlan mek a, naupang nu pawh chu lo hawilet vatin, "Nilo..ka fanu." tiin ava tlan phei ve nghal. Mahse Truck chu vanneihthlak takin a ding hman hlauh a, Pu Zorema pawh chu lo thleng ve nghalin naupang chu a rawn pawm vat a. Msa pawh ava thleng ve nghal bawk a, naupang nu chuan Msa chu rum tak hian a melh a, "Lo veng rawh tiin ka dil che a, thil har a ni em ni? Minlo vensak ve lawk mai la, tinge i hreh viau a?" a ti hrep mai a, nu âncheh leh nu nasa ve tak mai alo ni kher kher bawk nen. Pu Zorema chuan Msa chu a han hmuh chuan, "Ehe...nangbawk maw?" a ti a, Msa chuan hnuailam a melh nghal a, a zak kher mai. Chunu chuan, "Ka pu..hepa hi i hria em ni?" a han ti a. Pu Zorema chuan, "Hria ang chu mawle....ahming chu Haihawtliana a nia, i fanu kha hnaihtir tawh reng reng suh. Thil theihnghilh lamah chuan specialist a nih hi.." tiin a deuhsawh vak vak a.

Mipui te pawh chu an kal darh ta a, Msa pawh zak tak chung chuan kal ve mai a han tum chu a bialnu Deborah-i aw ngei mai ina, "Ka pa, hetah lo kal teh.." a ti ri chu a hre ta. Ava hawi phei chian chu Deborah-i leh Pu Zorema lo nui dun har har chu a hmu ta, Deborah-i'n KA PA tia a koh chu Pu Zorema ngei mai chu a lo ni si. A phu nasa lutuk chu, "ANUUU." tiin a ṭe tuar lehnghal, rang takin lehlam a hawi a, a haw nghal nal nal mai.

"Van a duai chuang e hring chan chhungin..." tiin Pu Rintluanga chu a han zai hlurh hlurh a, a bulah chuan Msa chuan rum taka melh chungin apa zai chu a lo en reng a, a ṭhu tûm bur mai. Pi Sangzuali chuan, "Amak e aw..hnem tu tur zawk i nih laiin tinge ilo chhaih vel a, a patling hna lo emai." tiin a pasal chu a lo khap a. Msa chuan, "Nu, engtin nge ka tih ang? I pasal lah hi fate rilru na hnem nachang pawh hrelo, min la hmusit zui.." tiin a lo vui ve nuah nuah bawk a. Pu Rintluanga chuan, "Lungngai mah ta che ka fapa, nang aia haihawt kan zawng dawnnia. Khuu..kan kawmtlang lawkah pawh khuan Pu Râla fanu Gorkhali thlah ngat, ṭawngfiah theilo a awm khu, in inhmeh phian ang." tiin a han nui huah huah a. Msa chu a thinrim kher mai, "Eng ang pa nge maw i nih ngaile??" tih pah chuan a room ah a chho a, na em em hian kawngka chu a khar ri bur mai.

Minute 5 vel hnuah chuan Msa room ah chuan Pu Rintluanga chu a rawn lut a, Msa bulah chuan ṭhuin a dar ah a beng thak thak a, "Bawiha, i hmangaih takzet em ni?" a han ti dam diai a. Msa chuan, "Hmangaih e...ka thinlung zawng zawngin." a lo ti vin hlur a. Pu Rintluanga chu za lo deuh chuan a nui lui sak a, "Bawiha, keini chhungkua hi zawng kan vanduai a ni e...thil pakhat ka hrilh ang che aw..." a han tih chuan Msa chuan tûm hmuk hian, "Enge?" a lo ti vak a.

Pu Rintluanga chuan, "Bawiha, Alzheimer natna hi i nei tih ka hriat khan ka rilru a na em em a, ka fapa neih chhun liau liau a ni a. I tet tê aṭang tawh khan lehkha thiam thei tak leh mi rilru chak tak kha i ni ṭhin a, i lo puitlin hun ka nghakhlel thei khawp asin. Mahse kum 12 ilo tling a, doctor-i'n Alzheimer natna i vei tih min hrilh khan ka keh chhe vek a, ka beidawng takzet a ni. Mahse i pa ka ni a, ka thin tirimin, eng ang pawhin hau ṭhin che mah ila, ka hmangaih tho che a nia. Lungngai reng reng suh, i pa ka la dam alawm...hna neilovin, he i natna chimawm tak avang hian nupui pawh nei theilo hial mahla, keichuan engtik ah mah ka kalsan lovang che. Deborah-i hi i nei thei lo anih pawhin lungngai suh, Pathianin i tana a ruat a nilo a nimai. I hmangaih tak leh nangmah hmangaih tu che chu i tawng em em ang, lungngai suh." tiin Msa chu a kuah a, Msa pawh chu hnuk ulh ṭeuh chung chuan a pa chu a kuah let a, "Ka lawm e ka pa." tiin a kuah vawng vawng a.

Thantea chu Deborah-i te inah chuan a tlangnel sâwt khawp mai, nitin mai chuan a leng reng mai a. Tûk khat phei chu Pu Zorema te inah chuan chaw a ei ve ta vel a, Deborah-i chuan a ning thei khawp mai. Thantea leh apa, chaw ei pah a an titi lai chu rum zet hian sitting room atang chuan a lo en a, "Ninawm lutuk, engtik lai pawha lo leng reng mai...ka pa lah hian a duhsak si." a ti bul bul mai a. A phone a phawrh chhuak a, Msa ava call a, "Hello, duat..i buai em?" a va ti a. Msa chuan, "Buai love..enge ni ta?" tiin a lo zawt let a.

Deborah-i chuan, "Tinge nimin chhun khan ilo kal leh siloh a? Phone i switch off daih bawk si a, enge i tih a?" tiin a zawt a. Msa chuan, "Social Service vel vangin ka buai deuh alawm le...ka phone lah ka thlauh a, a thi hmak a. Nichin deuh lawk khan a ṭha chiah a, rawn phone che ka tum a, ilo phone chiah a.." tiin chhuanlam a siam leh nghal zung zung a. Deborah-i chuan, "Ka pa in hmuh che a duh tak tak tawh ania, nimin te kha chuan lo kal la chu kan inhual chiang tawh ngawt ang." a ti nuah nuah a. Msa chuan phurlo zet hian, "Nia...kan la inhmu ang chu." a ti thawp deuh sat a. Deborah-i chuan Thantea va runluih deuh kher chu a châk ta tlat a, choka lamah chuan a va kal a.

Apa bulah chuan, "Pa, Msa nen kan inbe mek a..vawiina inhmuh a hman tawh a nih chu." a ti a. Thantea chu a lo mengrum kher mai, Pu Zorema chuan, "A ṭhat chu..ahman takzet tawh angem? Nimin kha chuan a phone a switch off i ti bawk si a.." a lo ti a. Deborah-i chuan, "Social Service vangin ka buai a tia, vawiin chu a hman tak tak tawh ang." a ti a. Pu Zorema chuan, "A ṭha e...dar 1 velah park ah bawk khan kalo nghak leh ange." a ti a.

Deborah-i chuan rum zet hian Thantea chu a han melh leh phawt a, tichuan a kalsawn ta daih a. Hlim tak chuan, "Duat, vawiin ah dar 1 ah park ah aw.." a ti a. Msa chu a phurlo kher mai, "Um." a ti chuai raih mai a. Thantea chaw ei pawh chu a tui tawh lo kher mai, "Pa Zorem, tunge ni a?" tiin a han zawt a. Pu Zorema chuan, "Msa a nia, a fel khawp mai." a han ti a. Thantea mitmeng chu thikna hlir hian a khat a, "Anih chu..Deborah-i'n fel a tih chuan tlangval fel tak a ni ngei ang." a han ti vel a. Pu Zorema chuan, "Nia, tlangval fel tia han sawi tur hi an vang tawh khawp asin." a lo ti a. Thantea chuan, "Pa Zorem, pawi i tih loh chuan ka lo kal ve teh ang...Msa pawh chu ka hmu ve châk alawm." a ti a. Pu Zorema chuan, "Tehreng mai, i motorin kan kal dawnnia." a lo ti a.

Msa chuan a rilru hahna chu a ṭhian te pathum, Victor-a, Hmingmawia leh Mapuia te chu a hrilh ta a. Victor-a chuan, "Tih ngaihna a awmlo, va kal tawp la, thudik va sawi mai rawh." a han ti a. Msa chuan rum zet hian a melh a, "Mawla, Deborah-i nen kan inneih a phal dawnlo hrim hrim." a lo ti vin hlur a. Hmingmawia chuan, "Tihngaihna dang a awm hleinem...anih loh pawhin Deborah-i bulah tal thudik sawi la, anih loh chuan chhuanlam dang siam leh a nimai." a lo ti ve bawk a. Victor-a chuan, "Chhuanlam dang i siam leh phei chuan Pu Zorema chuan tunge i nih tih a hriat hma hauhvin a fanu tan a pawm tawh lo ang che." a lo ti a.

Inla fing zet hian Mapuia chuan, "Awww..inva zei lo tak. Film te hi in en ve ngailo em ni? Tu emaw, nangmah angin a va insawi anga, Pu Zorema chu va bum mai tur alawm. A hre dawn hleinem, a tawpah lungkuai tâwkin thudik kan hrilh anga, Pu Zorema pawh a hmin nghal a nimai." a lo ti vel ham ham a.

Msa leh Hmingmawia leh Victora te chu an han in en a, an nui ta var var hlawm a. An pathum chuan Mapuia chu an en ta ṭhup mai a, Hmingmawia chuan hrethiamlo tak hian, "Hey, enge min en thup a?" a lo ti hu mai a. Msa chuan, "I sawi ṭha khawp mai...vawiin atan chuan nang hi Msa i ni hrih ang." a ti ta mai a. Mapuia chuan a thusawi chu a inchhir kher mai, mahse a sawichhuak tu ber a ni si a, a ṭhian dangte lah chuan a tlanchhiat loh nan an manbet tlat tawh mai bawk si, tihngaihna a hre ta biklo, a remti ta tawp a.

Mapuia hi tlangval kum 25 mi niin, hang lampang, hmel chhuanawmloh ve tak, pa te tak té hi a ni a. Msa lakah phei chuan chhe ve tak a ni, an in ang hlawl lo. Deborah-i hian Hmingmawia hi ahmu tawh a, Pu Zorema lahin Victora a lo hmu ve tawh bawk si nen, Mapuia chu an innghahna awmchhun a ni hrim hrim a, lemchan a hun leh ta.

Park ah chuan Pu Zorema leh Thantea te chuan MSa chu an lo nghak reng tawh mai a, Pu Zorema lah mi nghah thei lo zet mai a lo ni bawk nen, "Tunah dar 1:30 a pel tawh a, Msa pawh chu a va rei ve mawle." a ti nuah nuah a. Thantea chuan inla mark ṭha zet hian, "Ka lo sawi tum tak a nia, hun a vawng diklo emai." a lo ti vel zuah zuah a. Msa leh Mapuia te chu an va thleng ta a, MSa chuan, "Kal rawh le.." ahan ti a. Mapuia chuan a châk lemlo kher mai, "Nangmah alawm Msa te chu..." a han ti leh rih a.

Chutah Pu Zorema leh Thantea te chu an ding ta hluai mai, haw mai tum chuan motor lam an pan ta a. Msa chuan Mapuia chu a va nam phei rawk rawk a, a ban ah pawtin Pu Zorema te motor bulah chuan a va nam phei ṭhuai mai. Pu Zorema chu a va bawh lo chauh a, va inchhuih phei khut khut pah chuan, "Ka puzawwwnnn.." a va ti vak ringawt a.

Pu Zorema leh Thantea te chu rang takin an lo hawi phei a, Pu Zorema chuan, "Tunge i nih a?" a lo ti hu mai a. Mapuia chuan, "Ihh...Ma...nilo...Msa ka nia." a va ti bah deuh nuai mai a. Pu Zorema chuan, "Ehe...nang hi maw Msa chu...ka hmu che chu ka lawm e." tih pah chuan a chibai a. Thantea chuan Mapuia hmel chu a han en vang vang a, "Ava awihawmloh ee.." a ti nuah nuah a.

Mapuia lah chuan tham loh hmel zet hian Thantea chu a han melh a, "Engchu maw awihawmloh?" a han ti let ve deuh kher a. Thantea chuan nelawm loh zet hian Mapuia chu a en a, "Eng nilove...i hmelchhia ka tihna nilovin, Deborah-i mipa duhzawng hi a mak ka lo ti em a." a han ti let ve deuh sak a. Pu Zorema chuan, "I buai em ni Ms? Iva rawn tlai ve?" a han ti a. Mapuia chuan, "Nia..hehe..ka buai deuh alawm le." a han ti bah leh deuh nuai a. Pu Zorema chuan, "Tah sawn ṭhu ila, inbe lawk ang hmiang." a ti a, Thantea lah chu a lo kal ve zel a.

Pu Zorema chuan zawhna a zawh hma hma chuan Thantea chuan, "Enge i tih mek?" tiin a han zawt vel a. Mapuia lah chuan, "Aww...ka ṭhu mek a nih hi." a han ti hmuk a. Thantea chuan vin lek lek hian, "Chute chu kan hre ve tho..enge i thawh? I nu leh paten enge an thawh? Chu zawk chu alawm ka zawh che." a han ti deuh khur khur a. Mapuia chuan a eilo kher mai, a rilru chuan, "MS, hmelma kan nei tlat mai." a han ti nuah nuah a.

A aw a han thian vel kharh kharh a, "Zirtirtu ka nia, primary school ah. Chuan ka pa hi house-wife a nia." te a han ti vel a. Pu Zorema chuan mak tih hmel tak hian, "I pa chu house-wife maw?" a han ti hu mai a. Mapuia chuan inthiamloh hmel tak hian, "Ka nu...ka nu ka tihna..ka pa chu sawrkar hnathawk pangngai." a han ti leh vat a. Thantea ngaih chu a ṭha zân lo, "Thil diklo awm ang tlat hian ka hria, han inneih tir nghal tut tut chu a ṭha dawn em ni Pa Zorem?" a lo ti ve chhen a.

Mapuia chuan ngaihtuah mang hleilo hian, "Inneih tir ngei ngei ru..anih loh chuan a rilru a na lutuk ang." a lo ti ringawt a, Msa a sawina a ni. Pu Zorema chuan a hrethiamlo kher mai, "Tu chu maw rilru na ang?" tiin a han zawt a. Mapuia chuan za lo deuha nuih pah hian, "Hehe...ka pa mawle...ka pa rilru a na lutuk ang." a han ti kual leh vel a. Msa chuan thingkung phen aṭang chuan rilru hah takin a lo enthla reng a, "Khaii...enge saw tia a nuih hui reng mai le..an man chhuah vaih chuan ka chhe vek a nimai." a lo ti nuah nuah a. Chutih lai chuan a bul lawkah chuan scooty pakhat hi a rawn thal thuai mai a, a phu chiang kher mai.

Putar lam deuh tawh hi alo ni a, Msa chuan Mapuia chu a theihnghilh leh nghal hmak. Tlangval fel ta nanana chu a va kal phei a, chu putar chu a va pui a. Kaihthawh pah chuan, "I ṭha maw kha?" ava ti a. Chu putar chuan, "Umm....ka ṭha e...i fel hle mai." a lo ti a. Msa chuan, "I na lo maw? I khalh thei ang maw?" a han ti leh a. Putar chuan, "Ka hrelo le, ka ban hi a na deuh a.." a han tih chuan Msa chuan, "Saw lai lawk saw kan in a nia, khawi ka lo khalh anga, kan inah damdawi kan hnawih dawnnia." a ti a, putar chu phurin a ṭhianpa, ama tana lemchang mek Mapuia chu a kalsan leh ta daih mai.

Mapuia leh Pu Zorem te inbiak lai chuan Deborah-i chuan a pa chu a rawn call a. Pu Zorema chuan, "Hello, Bawihi?" a han tih chuan phur em em hian Deborah-i chuan, "Pa...Msa chu i hmu em? A hmelṭha i ti ve tho em?" a rawn ti nghal chung chung a. Pu Zorema chuan Mapuia hmel chu ahan en a, za lo tak hian a nui suk a, "Hehe...nia, a zia khawp hi. Hei kan inbe mek a.." a han ti a. Deborah-i chuan, "Phone kha pe teh, ka lo bia." a ti a. Pu Zorema chuan phone chu Mapuia pek pahin, "Khaa...a be duh che." a ti a. Mapuia lah chuan, "Chutin hmelhriat loh ka be ngailo." a lo la ti zui. Pu Zorema chuan, "Aww...Deborah-i alawm, be rawh." a han ti leh a.

Mapuia chu a mangang hle mai, "Ahh...ka tibuai duhlo ea." a han ti ringawt a. Pu Zorema chuan, "Engvangin maw?" tiin a han zawt a. Mapuia tih ngaihna hrelo chuan, "Ihh..insuk te, thleng sil te, hmunphiah te, chhuat nawh te angai awm sia. A buai dawn em a, ka tibuai phallo alawm." a han ti leh ringawt a.

Pu Zorema pawh a hrilhhai kher mai, "Kha, be rawh. Aman a be duh che alawm, be rawh." a ti leh a. Hreh tak chung chuan phone chu a la a, "He..hello..Deborah." ahan tih chuan Deborah-i chuan Msa aw a nilo tih chu alo hre chiang ngang mai. Mak ti tak hian, "Tunge i nih a?" a lo ti vat a. Mapuia chuan, "Aww..nia, adik alawm." te a ti kual ta vel mai mai a. Deborah-i chuan ahrethiamlo kher mai, "Engmaw dik? Khawnge Msa? Chuan...tunge i nih?" a han ti leh a. Mapuia chu a nui lui vel a, "Awle...anih phawt le." tiin phone chu a dah ta ringawt a.

Deborah-i chuan ahrethiamlo kher mai, "A van mak ve..tunge le? Msa aw a ni silova, mahse ka pa khan Msa a ti bawk sia." a ti nuah nuah a. Msa chu a call ta ngat a, Msa lah chu an inah a lo awm daih tawh a, putar ban pilh ah chuan damdawi a lo hnawihsak mawlh mawlh a. Dawhkana a phone lo ri nghawr dat dat chu la in, "Hello, ka duat..enge ni ta?" a han ti vel ham ham a. Debora-i chuan, "Hey..ka pa awmlaiin khatin min ko suh." a rawn ti vak a.

Msa chuan a hrethiamlo kher mai, a bula putar chu a han en a, "I pa maw? Haha..ava tar sawt ve." te a lo ti vel. Deborah-i chuan, "I mawl ami? I bulah a awm reng khaa.." a rawn tih takah chuan Mapuia a hrechhuak zawk mai. Rang tak chuan a tlanchhuak nghal a, putar pawh chu a theihnghilh leh nghal. Putar pawh chu a tho a, "Umm...a lawmawm tho e." tiin a haw ve mai bawk a.

Msa chuan, "Deborah...ih, nia..kan inhmu a, hei ka kal hla deuh a, chuvang chuan ka rawn fiam che nih kha." te a ti ta vel mai mai a. Deborah-i chuan, "Nihleh nichina ka pa phone atanga ka rawn phone che khan i aw ava mak ve?" a rawn ti leh a, Msa chuan thil awmzia a man thiam nghal vat a, "Ni e..ka aw ka ti danglam lui anih kha..haha...ka dah phawt aw..." tiin phone chu adah a, park lam pan chuan ke-in a tlan phei leh ta ngat ngat a. Pu Zorema chuan, "Awle Ms, kan haw phawt ange...nidangah kan inhmu leh dawnnia." a ti a. Thantea chuan, "Pa Zorem, pawi i tih loh chuan taxin in haw mai ta che, duh leh fare ka lo tum ang. Msa hi han kawm rih ka la duh tlat, pawi i tih loh chuan." a lo ti a. Pu Zorema chuan, "Awle...fare tumsak kher ka ngailo, ka kal ange." tiin a haw ta a.

Mapuia chuan hlauh hmel tak hian, "Ka buai a, haw vat ka duh ania." a han ti khur dar dar a. Thantea chuan, "Thingpui te pawh kan indun phawt ang chuuu.." muang fan raih chuan a han ti a, a nelawmloh kher mai. Tichuan thingpui dawrah chuan a chawlh pui a, Thantea chuan rum zet hian Mapuia chu a melh a, "Enteh MS, ka hrilh tlang law law ang che. Deborah-i saw ka nupui tur a ni a, ka hmangaih a ni. Hei hi First & Last warning ni rawh se." a han ti ta khur khur mai a, Mapuia chu a ngawi reng mai. Chutih lai tak chuan an thingpui dawr chawlhna bula barell chu bike pakhat hian a rawn su kek chhuai mai a, alo hmu tute pawh an au tuar mai.

Thantea chu a va chhuak a, bike khalhtu chu tleirawl té mai hi alo ni a, Thantea chuan a ṭham tho lawp a. Vin zet hian, "I va fimkhur lo ve a, helmet i khum lo lehnghal.." tiin a hau nghal chiam chiam mai a. Chu tleirawl lah chu a lo rui deuh lehnghal, "Enge min hauh ve vak vak a, ka tlusual a nih kha..tunge i nih a?" tiin a lo chhanglet pâng pâng a.

Thantea chuan a wallet a phawrh a, police ID hmuh pah chuan, "Sub-Inspector ka nih hi....khatia mi chhan ve khanglang...." tih pah chuan a beng ta siah siah mai a. Mapuia chuan hlauh hmel tak hian a lo en tlawk tlawk ringawt mai a, chu tleirawl samah chuan Thantea chuan a han kek vak a, "Khatia zahlo taka min chhan kha engtin nge i ngam zawk a?" a ti khur khur a. Chu tleirawl chuan ṭap pur chung chuan, "Ka pu min ngaidam rawh." a ti chel chul mai a.

Thantea chuan Mapuia chu rum zet hian a va melh a, "Vawikhat mah rui chungin lirthei khalh chhuak tawh suh ang che...ka ngaidam hram ang che. Ka thu i zawmlo a nih vaih chuan hei hi animai.." tih pah chuan a han beng leh siah mai a. Mapuia chuan a hlau kher mai, a chil a lem dawk dawk mai a. Chu tleirawl pawh chu a barrel (sintex) sutchhiat neitute chuan an khawngaih deuh vang nge, tui atlem tawh hrim hrim vang nge, Thantea'n khati taka a ben hrep vang khan an khawngaih nge ni, tuma hriat va ni suh, an ngaidam ve ta mai bawk a.

Zan alo ni a, Msa chu mangang tak chuan Victora te in bulah chuan a tei kual reng mai a, Victor-a leh Hmingmawia lah board anlo pen a, an lo tui dun nasa mai. Victor-a chuan, "Ms, i rilru ti hah duh suh, awmzia a nei chuanglo...lo ṭhu la, lo tel ve zawk teh." a tih chuan Msa chuan vin zet hian, "Engtin nge a hah loh theih ang? Ka nunna tluk zeta pawimawh a nih hi...Mapuia lah chuan min rawn call der mai silo." a ti nuah nuah a. Chutih lai chuan Mapuia chu a rawn lang hlawl mai, Msa chuan ava pan vat a. Hrechâk tih hriat tak hian, "Enge chanchin?" a lo ti vat a. Mapuia chuan phur lo tak chuan a thil tawn zawng zawng te, Thantea'n a tihdan te chu ahrilh ta vek mai a.

Pasalṭha Haihawtliana ngaihdan a pel ta, a thinrim tak zet a ni. Rum zet hian changtupa tâwkin a han ding hluai a, "Aṭha e...ka hrethiam e." a han ti thum chhak mai a. Mapuia chuan ngaihnep hmel zet hian, "Ka hrethiam e hi i tia, darkar chanve hnuah chuan i theihnghilh leh daih tho ang." a lo ti vin hlur a.

Msa chuan a melh ngai a melh reng a, "Nilove...Thantea chu ala inchhir khawp ang. Pu Zorema pawh chuan min pawm ngei bawk ang...chu chu ka tiam ache u. He ka thutiam hi ka hlen lo anih chuan ka hming hi Mal...Mal.." a hmingpum a theihnghilh thut, a inlâk pa tawh tehreng nen. Mapuia chu a va melh zeuh a, "Enge ka hmingpum khah?" ava ti zauh a. Mapuia chuan chal dawm meuhvin, "Huiham." alo ti ringawt. A sawi laklawh ve tawh si a, a sawi chhunzawm leh a, "Ka hming hi ka hming a ni lovang." te a han ti ta ringawt a, a va han pa rem rem em. Ala sawi zo lo, a aia rum hian a han meng leh a, "Tin, heti hi a ni...ngaithla rawh u, mi dawihzep apiang chu....:" a theihnghilh leh ta, "Nakinah abak chu ka sawi mai ang." tih pah chuan a kal sawn leh ta daih mai a, a thu a mawi dawn tehlul nen, a uiawm thin mange.

Msa chu a thinrim kher mai, chumi zan lala chuan apa hriatloh hlan bawkin bike chu a la chhuak ru leh ta zal zal a. A ṭhianpa, ama tana lemchang, a hmangaih em em mai chutia Thantea'n a lo tihṭhaih vel te chu a thin a rim a, Pu Zorema bulah pawh engkim va sawi a tum ta a ni. A huaisenna zawng zawng a sawm khawm a, thinrim inseh ruh ṭung chuan Deborah-i te in lamah a inkhalh phei ta. A mitmeng te chu rum rem rem tak a ni, a chetdan leh a bike khalh dan en mai pawh chuan changtupa a ni tih hi a hriat ngawih ngawih. Deborah-i te in chu a hnaih tulh tulh a, a zâm tulh tulh leh lawi si.

A thlen dawn tepah chuan, "Zu tlem tal lo lem ve sek ila aw..." a ti vawng vawng mai. Deborah-i te in chu a thleng ta a, a han inngaihtuah leh vang vang phawt a, "Ka duh angem awwww?" a han ti leh vang vang a, mahse alo insawi huai ve laklawh tawh si. A lu a bu ngat ngat a, "Ummm...MAN-TO-MAN in ka va bia ange...Deborah-i pawh ka hmangaih thu ka hrilh nghal ang." a han ti vel pung pung a.

Pu Zorema chu a kawngnâ a chhuak deuh nge mawni, tlai lama ke-a a haw ve khanglang avang khan a ni ngei ang, a sîl em em a. Khumah chuan a let a let a, saisir zawngin a han mu rem sauh sauh a. Chutih lai chuan Msa pawh chu Deborah-i te in kawngkhar lam chu a rawn pan ta chher chher mai le, engtak thleng ang maw? Kawngka chu inla Salman Khan tawk hian a han tlawh hawng thuai a, "De.." a ti hman ṭawk, tumah an lo awm lo.

A han lut ve ta thâwr mai a, ring zeta, "DEBORAH, LO CHHUAK TEH...PU ZOREM, NANG PAWH LO CHHUAK RAWH. HEI KA LO KAL E, I MAKPA TUR CHU KEI, HAIHAWTLIANA NGEI HI KA NI E." tia han au vak vak a tum lai tak chuan Pu Zorema aw ngei mai chuan a room aṭang chuan, "Deborah..Bawihi.." a rawn ti lauh lauh mai chu Msa pawh a phu chiang kher mai, Pu Zorema aw a hriat meuh chuan tu te emaw uipa til lak ang maiin a khup leh ta zul zul mai.

Pu Zorema chu a rawn kal mai ahlauh avangin inchung lamah a han tlan chho ve rawk mai a, Deborah-i room ni ngeia a rinah chuan a han lut ṭhuai a. Lehlam a hawi chiah chu amah hnungchhawn zawnga Pu Zorema lo mu chu a hmu leh thut mai si a, a au chhuak teuh kher mai. Chhuah leh mai a han tum chu Pu Zorema chuan, "Bawihi, ilo va lut har ve, ka koh mawlh mawlh che kha.." a rawn ti a, lehlam hawiin a la mu reng tho a. Pu Zorema bawk chuan, "Pawhdawh ah khan VOLINI ka dah a, ka hnung hi han nuai lawk teh." a tih chuan Msa chuan ngaihtuah miah lo hian pawhdawh chu a hawng a, Volini pawh chu a la ve mai bawk a.

Chutih lai tak chuan hnunglam aṭang hian Deborah-i chuan, "Ehe...hetah enge i tih a?" a rawn ti thut mai chu Msa phu nasa lutuk chu a zuang sâng teh asin. Lehlam hawia mu reng chungin Pu Zorema bawk chuan, "Awww...ka room ania, ka mu ve ang chu..min han hmet vat teh." a lo la ti zui. Deborah-i chuan Msa chu a kai chhuak nawk nawk a, pawnah chuan a chhuah pui ta a.

Deborah-i chuan Msa chu bangah a nam bet a, "Mawla, enge hetah ilo kal? Tinge ka pa room ah khan i luh rûk vel a?" a ti a. Msa chuan, "Ihh...i phone ila thei silova." a ti ringawt a. Deborah-i chuan, "Ka pa chuan a pawm thlap che, a fak lutuk che alawm. Ka bulah pawh a sawi a, mi ṭha tak a ni a ti che." a han tih chuan Msa awihlo lutuk chuan nui pah hian, "Naa...khapa kha a pawm amaw? Khatiang hmelchhe lutuk, hang si...pate si..engtin nge ipa chuan i pasal atan a pawm theih a?" a han ti zuah zuah a, Mapuia a sawina daih ani, engmah a ngaihtuah chiang leh tawh lo, Haihawtliana hian. Deborah-i chuan mak ti zet hian, "Tu chanchin nge i sawi a? Vawiin khan ka pa nen in inhmu anilawm ni?" ahan ti leh chuan Msa chu a han inngaihtuah vang vang a, zawi te hian, "Ee..a awmzia chu ani kha keimah angin a kal a, ani kha a fak anih chuan keimah min fak tihna animaw.." a han ti bul bul a. Deborah-i chuan, "Hey, enge i phun bul bul a?" a han ti leh vak a.

Msa chuan, "Aa...ka han inngaihtuah lawk alawm le...kan inneih huna kan awmdan tur vel te ka lo suangtuah a." a han ti leh zaih a. Deborah-i chuan a bianga piai zeuh pah chuan, "Nang hi chu awww..iva han hmelṭha tak." tih pah chuan a nuih sen sen a. Msa chuan zawite hian, "Hehe, hmelchu ṭha mahse, thluak hi a tlem deuh a ni." ahan ti zauh pek a.

Deborah-i chuan, "Ahrim hrimin tinge ilo kal reng reng a? Engti tura lo kal nge i nih?" a han tih chuan Msa pawh chuan van lam hawi meuhin, "Nia, enge ka rawn tih le?" a ti vang vang mai, a kal chhan a theihnghilh leh tawh. Deborah-i lah chuan a fiamthu vel mai mai amaw a lo ti a, "Uang lo teh, mawh...enge ilo tih?" a han ti a.

Hniak phawi miah lova dawt a sawi theihna awmchhun, a bialnu Deborah-i bulah chuan, "Aa..ka ṭhianpa mawle, hna a duh ve a. I pa te hotel-ah hian hna a duh ve a, chu chu dilsak turin ka lo kal mawle." a han ti nghal zung zung a. Deborah-i pawh chuan, "Awle, ka lo sawipui ang. I mawl emai, khatin a rukin lo lut tawh suh..pangngai deuhin lo leng ve mai ṭhin rawh." a ti a, tichuan an inthlah liam ta a.

Deborah-i chu a pa room ah chuan a tlan lut nghal a, Pu Zorema chuan, "Bawihi, tinge i chhuah leh daih a?" a lo ti hu mai a. Deborah-i chu a nui vur vur ringawt a, "Nia, inhnuaiah ka chhuk leh lawk a...enge ni ta?" a han ti a. Pu Zorema chuan, "Ka hnung kha han hmet teh, ka sil lutuk. Pawhdawh ah khan volini a awm ang, ka chau emai." a ti a. Deborah-i chuan a pa hnung hmeh pah chuan, "Pa, Msa chu enge a an? A hmelṭhat zia kha..i ti ve tho em?" tiin a han zawt a.

Pu Zorema chuan Mapuia kha Msa tura a ngaih tlat avang pawh a niang e, nuih suk pah hian, "Tunlai hmeichhe ho duhzawng hi a mak sawt e...fashion bawk a mi?" a han ti zauh pek a. Deborah-i chuan mak ti tak hian, "Enge i sawi awmzia? Hmelṭha i tilo ami? Khatiang bak bak...a ni aia hmelṭha kha kala hmulo hrim hrim, mizo ah ngat phei chuan.." a han ti deuh luam a. Pu Zorema chuan, "Nia, a fel hmel khawp mai." ala ti hram a, Mapuia kha chu a chhe ve bawk em a ni.

Deborah-i chuan, "Ihmaw pa, Msa'n min rawn phone a, i hotel ah a ṭhianpa a thawk duh dawn a.." a han ti a. Pu Zorema chuan, "Aww...chutin duh duh thawh theih a ni hleinem?" a lo ti deuh hmuk a. Deborah-i chuan, "Pa...Msa ṭhianpa ania, i makpa ni mai tur ania..please-in phal hram la. Chubakah Matric takngial pawh pass lo te pawh staff atan ila ṭeuh a, Msa thianpa te chu BA a zo ngat a nia aw.." te a han ti vel a. Pu Zorema chuan, "Staff ka nei tam tawh ropui sia, kan mamawh em em hleinem." a ti leh a. Deborah-i chuan pangchang deuh tak hian, "Paaa....please..Msa tan tal pawn." a han tih takah chuan Pu Zorema pawh chuan a remti ta a, "Awle...naktukah kan inah lo hruai rawh se." a ti ta a.

Deborah-i chu a lawm ngei mai, a room ah a tlan phei nghal a, Msa a call nghal a. Msa bulah chuan a pa in aphal thu chu a hrilh a, Msa erawhin lawm tur nge lawm loh tur pawh a hrelo. Achhan pawh a chhuanlam vang mai mai a sawi a ni si a, a tukah chuan a kal ngei angai si. Tih ngaihna dang awm heklo le, a ṭhianpa Mapuia bawk chu a mamawh leh dawn niin a lang.

Atukah chuan Mapuia duhlo chung chu Deborah-i te inah a hruai leh ta a, Mapuia pawh chuan lemchan reng mai chu a kham tawh takzet a ni. Deborah-i te in chu an thleng ta a, Pu Zorema pawh pawnah a lo thu a, Deborah-i erawh a music school lamah music class a pe thung. In kawtah Pu Zorema lo ṭhu an hmuh chuan Mapuia chuan a hlau hle a, a ding chat a.

Huphurh tih hriat tak hian, "Ms, let leh mai ang...min manchhuak dawn chiang lutuk." a ti a. Msa lah chu rum zet hian a han meng a, "A theihloh...khawi hmunah pawh nise, ka ke ka pen tawh naah chuan ka hnung tawlh leh tawh ngailo." a han ti vel a. Mapuia chuan eiloh hmel tak chuan a han en a, "Eng movie nge nizanah i en a? Inla changtupa viau suh...i haihawt ropui si, kan buai phah ange." a lo ti hrep a. Mahse Msa chuan a tum laklawh tawh tlat, Pu Zorema bulah chuan Mapuia duhlo chung chu ava kai phei dawr dawr a.

Mapuia chu Msa angin lem a chang leh ta a, Msa pawh Mapuia thianpa angin lem a chang ve thung dawn a ni. Pu Zorema chuan chanchinbu a lo chhiar a, Mapuia chuan, "Pa Zorem, hei hi nizana ka sawi kha a nia, khawngaihin lo chhawr ve hram la." a han ti chu Pu Zorema chuan Msa chu a han thlek vang vang a. Thinrim hmel tak hian a ding thut a, Mapuia chu a en a, "Hepa hi maw, hepa hi ka hotel ah a thawk anga maw?" a ti ta khur khur mai a. Msa chuan, "Ka pu, ka hria alawm. Mahse hma ka sawn tawh lutuk asin, thil ka theihnghilh khât tawh lutuk." te a han ti vel a.


Pu Zorema chuan Mapuia chu a en leh a, "MS, min hrethiam teh...hepa hi chu ka la lovang, ka sumdawnna a tla chhe mai ang." a ti ta hmak mai. Msa chuan, "Ka pu, nikhat chiah min enchhin tal la, i inchhir lovang. Ka ziaawm tawh lutuk, chance vawikhat chiah min pe leh hram teh." a han ti leh a. Pu Zorema chuan, "Nang hi chu ka ring hlawl lo che a ni...ngawiteh..nang pawh hi i hming hi Msa tho a niin ka hria.." a ti ta mai a. Msa leh Mapuia chu an in en ta hrek hrek mai a, Mapuia chu zalo deuh hian a han nui lui vel a, "Hehehe, niang chu...mak tak a ni. Malsawmsanga a nia, keipawh loh theihlohvin Malsawmsanga ka nih ve angai ta anih hi.." a han ti ta vel a.

Msa pawh chu za lo tih hriat tak chuan a nui hui ringawt a, Pu Zorema erawh a nuih a za hauh lo. Rum tak hian a melh a, "Haihawtlian, ka hrilh tawh che kha...engtikah mah i hmel hi rawn inlan tawh suh ka tih kha.." a ti khur khur mai a. Mapuia chuan, "Chutin ti lul suh, Pa Zorem...khawngaihin hun kal tawh chu theihnghilh la, vawikhat chiah chance han pe leh hram teh." tiin a ngen mawlh mawlh a.

Chutih lai chuan Msa phone chu a rawn ri a, Victor-a a lo ni a. Msa chuan a la vat a, "Hello, Victor...mi pawimawh lutuk leh mi zahawm lutuk nen kan inbe mek a, ka be hmanlo che." tiin a dah nghal daih a. Tichuan Msa bawk chuan, "Ka pu, khawngaihin tun chiah chance min pe leh hram teh...ka haihawt tawh miah lo....ahma ai chuan." a han ti a. A phone bawk chu a lo ri leh ta, Victora bawk a lo ni. Pu Zorema chuan, "La ta che....a pawimawh a niang chu." a han ti a. Msa chuan, "Ka pu, nangman la rawh i tih vang liau liau in ka la ang...a reilovang." a han ti vel a. Msa chuan, "Hello, Victor, ka hman hrihlo ka tih mawlh mawlh kha.." ahan ti nghal vak a. Victor-a chuan, "Lawk..dah lo teh...news a awm ania." a rawn ti a. Msa chuan, "Eng news maw?" a han ti a.

Victora chuan, "Ihmaw...Bawiha, chhas thar ka nei, a chhiatloh zia mai chu...a chicks rappppp mai." a rawn ti ta vak vak mai a. Chutah lee, Msa chuan phur zet leh ring zet hian, "ALEEEEE.....nuam awm bik veeee.." tih pah chuan a nui ta uar uar mai, Pu Zorema te in kawta pipu lam pan chuan Victora chu a be phei leh ta mial mial mai le. Pipu ah chuan a thu a, a nui huah huah a, Mapuia chu a mangang kher mai.

Pu Zorema pawh a insum zo bik chiah lo aniang, a khi suk suk mai. Mapuia chuan inthlahrung tak hian, "Ihh..Pa Zorem...signal a chiang vak lo aniang, sawlai velah sawn signal a zawng a nih hmel." te a ti ta vel mai mai a. Pu Zorema chuan, "Enteh Ms, sawpa saw ka duhlo...vawikhat mah lo hruai tawh suh ang che. Ka fanu pasal tur i ni emaw, nilo emaw..sawpa saw chu ka pawm ngai lovang. Hotel ah ka kal dawn a, nidangah kan inhmu leh dawnnia." tiin a kalsan ta daih mai a.

Mapuia chuan thinrim tak hian Msa lam chu ava pan a, vin zet hian, "Mawla, saw...i puzawn pawh a kal daih saw...hna chu i hmulo chiang khawp ang." a va ti hrep a. Msa chuan a hrechhuak thut, Pu Zorema chu a va umzui a, Pu Zorema chu motorah chuan achuang a. Msa chuan va panin, "Ka pu, nangman phone la rawh min ti a, ka la mai chauh anih kha. Ka tihpalh, a thleng leh tawh ngailo ang." a ti a, mahse Pu Zorema chuan a ngaipawimawh duhlo, a tlan ta daih a. Msa mangang lutuk, thinrim bawk si chuan, "Deborah-i music school ah kal ang." a ti vak ringawt a, Mapuia pawh chuan a hnial peih lemlo, phur fahran lo chuan a zui ve ta mai bawk a.

Deborah-i music school chu an thleng a, pawnah chuan Deborah-i chuan naupang panga vel chu guitar a lo zirtir mek a. Ral khat atang chuan Msa chuan thinrim tak hian, "Eng ang pa nge i neih hi....sual lutuk mai. Ka haihawt vang hian min hmusit amaw? Alzheimer natna ka neih avang hian min duhlo anga maw? A teuhlo mai...mipa ka nih hi, mi pangngai ve tho ka nih hi...ala hre khawp ang." a han ti khur khur a. Mapuia chuan, "Awww...heta tanga lo inhrosak chiam chiam te chu, a hre phak nang, va pan la va sawi ta che." a lo ti nuah nuah a.

Msa leh Mapuia te chu Deborah-i lam pan chuan anva kal ta a, Msa chuan, "Deborah, kan inbiak lawk angai. Naupangte hi inchhungah luh tir rawh, tunah." a han ti vel khur khur a. Deborah-i chuan a hrethiam lo kher mai, "Enge ni vak vak a? Class kan nei zo ṭep a, minlo nghak lawk teh u." a ti a. Msa chuan vin lek lek hian, "Tunah angai...a pawimawh ania." ahan ti leh vak a. Deborah-i chuan naupang te chu inchhungah a tir lut ta a, Msa bulah chuan, "Anih han sawi ta che." a ti a.

Msa chuan thinrim tak hian, "Eng ang pa nge i neih saw...nikhat na atangin tunge hna aṭanga inban ngai?" te a han ti nghal ngawt a. Deborah-i chuan, "Enga? Enge awmzia?" a ti hu mai. Msa chuan, "I pa sawn ka ṭhianpa hi hna alo pe duh lo, chupawh a rinloh vang leh..." a tih lai chuan Mapuia chuan Msa chu a rawn hrilh ru zauh a, "Changtupa deuh khan han sawi vel teh." a lo ti su su a. Msa chu a han thaw halh a, rum zet hian a han meng a, Deborah-i chu a han kal hual vel a. Ka kal hual pah chuan, "Piansual hian tlai luat a neilo.." te a han ti te te a. A sawi zawm zel a, "Chutiang chiahin ka thianpa hi a lo hmelṭha lemlo ani thei, a hmel enin a fing var lemlo a ni thei. Ka ṭhian a ni tih a hre reng a, mahse ka beng hriatah ngei ka ṭhianpa hi a hmusit vel asin. Hetiang a nih te chuan kan inneih hunah pawh tuman min kawm duh tawh lovang. I pa pawh saw ka ngaihsanna a tla hniam kher mai, vawiin ni aṭang hian ka hmuh dan a dang vek." a han ti khur khur a.

Deborah-i chuan, "Enge awmzia? Chubakah enge i kal kual kher a? Ka pa chu a rilru a hah lai tak te pawh a lo ni thei asin.." a han tih chuan Msa chuan nuih suk pah hian, "Huh...ipa rilru chu a hah avangin ka ṭhianpa hi tikhan a hmusit anga maw? Anih ka rilru hahna te ve hi..." a han ti vin leh khur khur a. Mapuia chuan, "Hey Ms, insum rawh.." alo ti vel a. Msa chuan, "Deborah, hetiang a nih chuan fa kan neih hunah pawh kan fa chu i pa tupa emaw tunu emaw pawh a ni ve lovang, ka pa tupa/tunu chauh ani ang." a han ti leh vel a.

Mapuia chuan, "A pawi hleinem, hna te chu ka hmulo mai a niang chu. Ka pa chawmna tur khawp te chu ka inhlawh thei alawm...kan hausa ve miau lo atin ni." tiin a hnuk alo ulh der vel a. Msa chuan, "Deborah, hei hi hre rawh...ipa sawn hetia min hmusit reng anih chuan keipawh hi i pa hotel ah sawn ka thawk lovang a, kan innei kher angem tih pawh hi ka sawi thei lo. Chu chu thutawp ani...LAST WORD..OKAY!" a han ti vak a. Rum zeta melh pah chuan a hawi let thuai a, an kal ta daih a. An kalpah chuan Mapuia chuan, "Ms, tlemin, slow motion deuh hlekin kal teh ang....alang pa bik." a han ti a, slow motion chuan an han kal deuh ngei a.

Lungawilo tak chuan Deborah-i chu a haw a, apa pawh chuan chanchinbu a lo chhiar leh mial mial tawh a. Deborah-i chuan thinrim deuh tak chuan, "Pa, Msa hi i duhzanwg a nilo em ni?" a va ti ringawt a. Pu Zorema chuan hrethiamlo tak hian, "Enge awmzia? Engtik laiin nge ka duhlo ka tih a?" a lo ti hu mai a. Deborah-i chuan, "Vawiinah a lungawiloh thu min rawn hrilh alawm, ama awmlaiin a ṭhianpa hmusit takin ilo tawngkhum vel a...enge i hriat a? Khatiang mi i nih loh kha ka pa?" a ti a. Pu Zorema chuan, "Ngawih teh Bawihi, khapa kher kha chu ka hnathawk atan ka duhlo ani." a ti a. Deborah-i chuan, "Enge awmzia? Ahma pawhin Msa bulah i lak tur thu ka lo hrilh lawk ve tawh a, tunah engvangin nge i duhloh a?" tiin a zawt a.

Pu Zorema chuan, "Enteh, kha mihring kha chu thil theihnghilh lama specialist a nih kha. Ahmingah pawh Haihawtliana tihin ka phuah nghe nghe asin, ka hotel tlakchhiatna tur mai mai a nih kha." a ti a. Deborah-i chuan rum tak hian apa chu a melh a, "Pa, min hrilh rawh. I la dawn nge dawn lo?" a han ti chang fak a. Pu Zorema chuan, "Dawnlo...khatiang, haihawt subject chu la se PHD pawh a pass tawh ang. Ani vang mai mai khan ka hotel hi a tlakchhiat ka phallo, a theihloh." a ti hmak mai si. Deborah-i chuan, "Atha e..anih chuan ka hmangaih ber Msa hian min nei duh bik hauh lovang." a ti a. Pu Zorema chuan, "Enteh Bawihi, i hrethiamlo ani.." a han ti dek dek a, vin zet hian Deborah-i chuan, "Ka hmangaihna hi i hrethiamlo zawk ani...thil pakhat lek pawh ka tihsak vek thei dawnlo chu ania. Chupawh ama tan nilovin, aṭhianpa tan zawk ani lehnghal a. Thil tamtak min tihsak asin, ka engkim a ni asin." a ti a.

Pu Zorema chuan, "Amah Msa te kha chu ka hotel-a thawk turin ka la thei mai anga, mahse ani kha chu ka theilo a ni. Hmanni-a mipakhat haihawt deuh ka sawi thin kha ila hria em? Kha kha ania...ka theilo a ni." a la ti ṭalh mai a. Akimi pawh alo kal a, "Pa, khawngaihin la ve mai la, BA pass ve tawh te chu a chhawr tlak lohna tur ka hrelo." alo ti ve bawk a. Deborah-i chu a ṭap ta hial a, "I lo mak khawp mai ka pa, aṭhianpa tan hna a rawn dil ve a, mahse chupawh ilo tih hlawhtlin sak theilo ania. Kan tan engkim min tihsak a, ka student Cindy thisen a pe a..." a u Akimi ava melh zeuh a, "Kim, damdawiin thleng a hruai ṭum che kha ila hria em? Ani kha chu awm lo se..." a sawi zawm thei lo, a ṭap ta hawm hawm mai a.

Pu Zorema chu a inthiamloh hmel kher mai, "Awle...karleh aṭangin a lo thawk thei ang. Naktukah a Bio Data lo submit rawh se. Chuan ka makpa ni mai tur Msa pawh a duh chuan a Bio Data rawn submit ve se, ani phei chu athawk thei nghal chiang sa ang." a ti a, a ding hluai a. Deborah-i chu a han en vang vang a, "Hmmmm...anu leh pate pawhin an enkawl ve zel tho chu ania, keipawhin ka tuar thei mai ang." a han ti deuh kher a, tichuan a chhuak ta daih a. Deborah-i pawh ahlim leh ta ngei mai, phur tak chuan Msa chu chanchin a hrilh leh ta a.

Msa leh Mapuia te pawh chu a tuk zingah chuan Pu Zorema Hotel-ah chuan an va kal ta a, Pu Zorema chu Lobby-ah lo ṭhu in a thianpa nen anlo inkawm a, a thianpa chuan uite hi a pawm a. Msa chuan zah tak hian, "Good Morning, Sir." ava ti vel a. Pu Zorema chuan, "In CV chu inlo keng em?" a han ti a, Msa chuan, "Aw, keng chiangkuang." tih pah chuan Pu Zorema chu a pe a. Uite chu a lo bauh lauh lauh a, Pu Zorema chuan uite chu a han en a, ngeiawm tak hian, "Aww..Tommy, min khawngaih ve deuh a nimaw?" a han ti deuh kher a. Pu Zorema thianpa, uite neitupa chuan, "Ka haw phawt ange." a ti a, a haw ta a. Msa chuan Pu Zorema nuihtlawn pah chuan, "In Hotel ah hian ran lak luh in phal animaw, Sir?" a han ti a. Pu Zorema chuan ngei hmel tak hian Msa chu a han en hraw a, "Phal lo ila ka thianpa khan alo hruai lut dawn mi?" a ti let deuh kher a. Mapuia chuan, "Ka lawm e aw, Pa Zorem. Ka ṭhianpa hi a lo mangang hman lutuk a.." a tih lai chuan Pu Zorema chuan, "Nia, ka fanu Deborah-i vang liau liau a ni e...ngawiteh, amah pawh a awm ve kha mawle...DEBORAH." tiin a au ta vak vak mai.

Deborah-i pawh chu a lo awm tak tak a, Staff Room atang chuan a rawn chhuak ta mai. Msa chu a phu zawk mai, Mapuia chu a vuan nghal a, "Ehe...De..Deborah-i.." a ti nghal chel chul mai a. Pu Zorema chuan Msa chu a en hu a, "Enge ilo phut ve vak ringawt a? I enge a nih ve a? Ka makpa ni mai tur zawk hi a ni lawm ni phu zawk tur chu?" a han ti a. Msa chuan Mapuia chu a nghawk zauh a, "A phu dawn lawm...tiraw?" a han ti kual leh vel a, Mapuia pawh chu tlai khaw hnuah chuan tider tih hriat tak hian a han phu ve leh dawr a. Pu Zorema chuan ama hriattham lek hian, "An mawl duh mai siah.." a ti nuah nuah a.

Deborah-i chu a rawn kal ta, "Hi MS.." a rawn ti a. Mapuia leh Msa chuan, "Hi.." anlo ti rual vel. Pu Zorema chuan, "Karleh aṭangin ka ti tak nânga, naktuk atangin inlo thawk dun nghal mai dawnnia. Reception ah sawn in chhuah pahin rules & regulations vel inziahna va dil ula, inchei dan tur te, form hak tur te thlengin a awm vek a, tha takin zawm ang che u. In hming a in ang leh nghal a, a hahthlak mange." a ti nuah nuah a. Pu Zorema chuan Deborah-i chu a han en a, "Tikhan i lawm tawh em Bawihi?" a han ti a. Deborah-i chuan, "Kei min zawt lovin, amah hi zawt la." a han ti a. Msa chuan, "Aw..ka lawm e." tih pah chuan Mapuia chu a han nghawk zauh a, "Sawi ve ta che." a han ti a.

Mapuia chuan, "Aw..ihh nia lawm e lawm lutuk." a han ti bah deuh nuai a. Pu Zorema chuan a hrethiamlo kher mai, Msa te thiandun chu a en hu mai a. Msa chuan, "Nia..ihh...kan haihawtna te min hrethiam a.." a han ti phawt a, Mapuia chuan, "I thinrimna te i paihbo a.." tiin a lo tuihnih ve leh a. Msa chuan, "Chuvang chuan kan hlim em em mai ani." tiin a lo chhunzawm veleh a. Deborah-i pawh chuan a hrethiam chiah lo aniang, "Tinge? Khatia in duet kher a?" fiamthu ti tak deuh chuan alo ti a. Pu Zorema pawh chuan, "Nia...tinge a indawta in ṭawng zela?" a lo ti ve hu bawk a. Mapuia leh Msa chu an buai tawh kher mai, Mapuia chuan, "Kan hlau a.." a han ti ringawt a. Msa pawh chuan, "Ni..nia, kan thawkṭha lovang tih kan hlau a." tiin a han tuihnih leh a. Mapuia chuan, "Kan thinlung hi a hlim tawh ani.." tiin a chhunzawm leh a, Msa chuan, "Kan lawmthu ache." te a ti tawh vel, an zâm em a ni, an hrechhuak ang tih an hlau bawk si.

Pu Zorema chu athaw huai a, "Umm...kan nih nih kan ni mai ang chu." tih pah chuan a ding hluai a, "Anih aw MS.." a han ti a. Msa leh Mapuia chuan an lu an bu rual duh nghauh a. Pu Zorema chu a buai leh ta, "Engati nge khatia chibai min buk dun kher a?" a han ti leh hu mai a. Mapuia chuan, "Hehe..ahhh, lu kan nei ve ve a, chuvang chu niang." te a ti vel. Pu Zorema chuan, "Awww..anih chu..haw tawh rawh u...Front Office ah khan paper chu la ula...huiham." tiin a office ah a chhoh san ta daih a. Msa leh Mapuia pawh chuan paper chu la in rang em em hian an chhuak dun a, anla inkai zui. Deborah-i chuan nui var var chung chuan Msa chu a en reng a, "Ava han cute tak." tiin a lo thlir ngawih ngawih mai.


Chhun alo ni a, Akimi nu leh pate an rawn leng a. Pu Zorema chuan Akimi nu leh pate a hmuh veleh chuan, "Akim, hei i nu leh pate an lo kal ania." a ti a. Akimi pawh phur takin a lo kal vat a, a nu leh pate nen chuan an inkuah a.

An lunglen ṭhin zia te, an inngaih em em thute chu an inhrilh tawn mawlh mawlh a.Tichuan dawhkan kilin chhun thil an ei ho a, an titi a, an hlim tlang kher mai. Akimi nu leh pate Akimi pa nau, a patea, inla fing zet leh zu heh zet mai Ropuia chu an rawn hruai tel ve a.

Akimi nu chuan, "Akim, naktuk zanah hian naute thar lawm nan leh ka birhday lawm nan i pa (Pu Zorema) hian a phal chuan party buatsaih ve ila ka ti deuh a." tih pah chuan Pu Zorema chu a han melh deuh zuk a. Akimi chuan, "Awii, naktuk i birthday maw ka nu?" a lo ti hu mai a.

Akimi nu chuan, "Niang chu...ka birthday pawh i theihnghilh tawh a ni maw? I pa Zorema chuan a duat hle che a ni ngei ang." a han ti a, an nui dar dar a. Ropuia lah chuan, "Tun ang kuma party te lo la tih.." a lo ti bul bul a. Akimi nu chuan, "Chutia party rup rup ka ti hleinem...lawm ve ila, chaw te kan eikhawm anga..ka tihna alawm." a lo ti vat a. Pu Zorema chuan, "A pawi hleinem, kan inah ngei hian kan lawm dawn nia." a ti a.

Deborah-i chuan, "Pa, anih chuan Msa te pawh sawm ve ila.." a lo ti ve bawk a. Akimi pa chuan, "Ehee...Msa chu kan makpa tur kha ani ang maw?" a lo ti vat a. Deborah-i chu a lai lek lek a, zawi te hian, "Niang chu." a han ti sap a. Ropuia chu lo inrawlh ve lehin, "Deborah-i chuh...a hming sawi rik hlek pawhin i han lai ve chu ania, a hmelṭha viau em?" a lo ti vel a. Deborah-i chuan, "Hmelṭha tak ani...mizo ah ani tluk ka hrelo." intithei deuh tak chuan a lo ti a, Pu Zorema melh pah chuan, "Tiraw ka pa?" a han tih zawm zat a. Pu Zorema pawh a kiai suk mai, "Nia...mit hi a in ang lova." a han ti deuh kher a.

Akimi nu chuan, "Anih leh U Zorem, Msa nu leh pate i hmu tawh reng reng em?" a han ti a, Pu Zorema chuan, "Ehee..sawi takah chuan ka la hmu miahlo. Vawiin tlaiah hian va kal ila a ṭha ang, naktuk zana lo kal ve turin ka sawm nghal anga..." a tih lai chuan Deborah-i chuan phur zet hian, "Pa, ka lo kal ve." a lo ti vat a. Pu Zorema pawh chuan, "Awle...kan pahnihin kan kal dawnnia." a ti a.

Tlai chu alo ni ta, engtak thleng ang i maw? Msa pawh a mood a fuh ngang aniang, hna thar a hmu bawk nen, sitting roomah chuan speaker-i'n hla ring zet hian a play a, a lam nasa ngang mai. Apa Pu Rintluanga pawh chuan a lo lawmpui ve nge ni, a music kha a feel ve hrim hrim zawk? Inbual tura tui dawh pah chuan choka lamah towel vengin tawnzau nen chuan alo su ve ang dup dup a.

Chutih lai chuan door bell a rawn ri a, door bell siam nan pawh hian pawisa an hmang hnem teh asin awwww, Pu Rintluanga sawi dan chuan an retheih phah vek a ni awm e. Msa chuan lam haih hiah pah chuan, "Hey, Pu Rintluang, inleng kan nei ania, kawngka va hawng teh." a han ti vel a, Pu Rintluanga pawh chuan hnial lemlo chuan kawngka lam pan chuan a su phei durh durh a. Kil khatah chuan Pi Sangzuali chuan istiri in thawmhnaw a lo nawt mek bawk a, a pasal te pafa chezia chu lo thlirin, "A va han âtthlak tak e aw..pafa awm reng pawh in ni e." tih pah chuan a lo khi ve vur vur bawk a, an hlim tlang a ni.

Chutah lee..Pu Rintluanga'n tukverh atanga a han en hmasa phawt chu, a hmuh duhloh lutuk tak mai a hmu ta. Pu Zorema leh Deborah-i te chu an lo ding reng mai a, a phu chiang teh asin. Rang tak chuan a tlan let leh a, Msa hla play lai chu a va off a, Msa lah chuan, "Tinge i off a, ka la lam tui asin." tih pah chuan a lo la bu ngat ngat mai.

Pu Rintluanga chuan hlauthawng tak hian, "Hey, Pu Zorema a lo kal ania..." a ti a. Msa lah chu ala lam tui deuh nge mawni, "Tunge Pu Zorema chu? Lo luh tir la.." te alo ti vel. Pu Rintluanga chuan vin lek lek hian, "Mawla, i puzawn nimai tur...Deborah-i pa, Pu Zorema.." a han ti chiah chu Msa pawh a lam tawp hmak mai.

A hlau lutuk chu a khur nghal zawih zawih mai, "Nilo...ka duh theilo...tinge a lo kal?" a ti khur dur dur a. Pu Rintluanga pawh chuan mangang tak chuan, "Engtin nge ka hriat bik ang? Ava han hunlo tak em." a ti vawng vawng mai a. Msa chuan ṭap ṭep hian, "Pa...ka hmu ngamlo, nangman kawngka va hawng mai teh." a ti pur mai.

Apa lah chuan hreh hmel tak hian, "Keiman maw?" a lo ti ve pur mai bawk a. Msa chuan, "Aww...kal vat rawh. Ka lo biru anga, a chhuak i ti mai dawnnia." a ti a. Hreh tak chung chuan kawngka lam chu Pu Rintluanga chuan a va pan phei ta a, mahse engemaw hre chhuak thut niawm tak hian a ding chat a, rang em em hian Msa bulah chuan ava tlan let leh nghal vat a.

Pu Rintluanga chuan, "Malsawmsang....i puzawn sawn keipawh ka hmel a hmu tawh alawm, ka fapa i ni tih pawh a hria." a ti chel chul mai. Msa chu a mangang takzet, "Engtin nge niang? Engtin nge kan tih ang?" tiin a ṭap titih nghal der mai. Thil awmzia lo hmu ve tu leh lo hre ve vek tu Pi Sangzuali pawh kil khatah hlauthawng tak chuan a lo ding khur ve zawih zawih mai, lehlam a hawi tlat lehnghal. Msa chuan a nu chu ava au a, "Ka nu." ava ti chiah chu Pi Sangzuali pawh a lo hlauthawng ve bawk si nen, a phu nasa lutuk chu ring zet hian, "Bawiha!!!" tiin a lo chhanglet vat a, mahse hmun leh hmuna inchhang ah chuan a ring kher mai.

Msa te pafa chuan Pi Sangzuali chu an va pan vat a, Msa chuan, "Nu....nangmah chiah ala hmulo che, nangman va hawng la, ka pa nen hian kan lo biru mai ang." a ti a. Pi Sangzuali pawh chuan hreh tak chung chuan muangchang hian, "Ni e...ni e...nia.." thaw hlawp hlawp hian a lo ti a.

Msa te pafa chuan bathroom lam an pan nghal a, Pu Rintluanga lah chuan tawnzau a ha a, ahnuaiah towel chauh a veng lehnghal. Bathroom lam pan pah chuan, "Enge i nu kher? A che over thei ropui si, aman chhuak chiang ngawt ang." a ti phei nuah nuah a. Msa lah chuan, "Ngawi mai mai teh...biru vat ang." tiin a lo vin hlur mai.

Pi Sangzuali chuan kawngka chu ava hawng a, polite tak hian Pu Zorema chuan, "Eee...kha in awm maw? Msa te in a ni tiraw?" a han ti a. Pi Sangzuali chu a zâm kher mai, "Aw...hehe, a nih ve hi. Lo lut rawh u...hehe." tiin alo chhang a, a thlan a tla bawrh bawrh mai. Inchhungah chuan an lut a, Pu Zorema chuan, "Khawnge Msa hi?" ahan ti a. Pi Sangzuali chuan, "Ihh...englo, apa zunthlum a zual thut a, damdawiin ah a kal pui a." a han ti leh nghal vat a.

Pu Zorema chuan thut pah chuan, "Anih chuan vawiin tlai chu ka awl tho a, kan lo nghak ange." a han ti chiah mai chu Pi Sangzuali chuan ringzet hian, "A NGAILO." a ti thut mai. Pu Zorema chuan hriatthiamloh hmel tak hian, "Timaw?" a han ti hu mai a. Pi Sangzuali chuan Deborah-i te pafa chu a melh hrek hrek a, "Ihh..ka sawi awmzia chu, engmah tilo a nghah reng angai lo, in nghah dawn rau rau chuan thingpui in pah in innghak tal ang chu tiraw?" a han ti leh zaih a.

Pu Zorema chuan, "Awle...a lawmawm ngawt ang." a ti a. Thingpui chu a lum a, a lum zawh chuan Pu Zorema te pafa chu ava pe a, tichuan an titi ta a. Chutih lai chuan Msa te pafa pawh bathroom ah chuan anlo inhnial nasa kher mai, Pu Rintluanga chuan, "Engemaw ani kher saw i ngaihzawn le?" a han ti khur khur a. Msa chuan, "Aninawm....ani lo chu min duh tu tur an awm chuanglo, tunge Alzheimer natna vei hi duh reng reng ang ni?" tiin alo vin let hrep a.

Pu Rintluanga chuan, "Ani pawh sawn i nei tih a hre hleinem..hria se chu a ṭhen nghal ang che." a han ti leh pung pung a. Msa chuan, "Hmmh...min hau reng suh...ninawm!" tiin a tum hmuk a. Bathroom chhung lah chu alum em em a, an ṭhu tui pur mai, an thlan a luang zawih zawih a, a uap hian a uap churh mai bawk si.

Deborah-i chuan a phone a phawrh a, Msa chu a call a. Mahse Msa phone chu choka ah daih alo awm si, a ri ta ral ral mai. Msa chuan a phone ri chu a hriat veleh chuan a tho thut a, chhuah a tum ta mai.

Pu Rintluanga chuan ngei hmel zet hian Msa chu a melh a, "Ka fapa duatlai, khawnge i kal dawn a?" a han ti vel a. Msa lah chuan, "Awww..saw ka phone a ri a, thil pawimawh te a nih takin..ka va chhang ang chu." a lo la ti zui, a theihnghilh leh ta. Za lo tak chuan Pu Rintluanga chu a nui suk a, "Animaw? Inchhungah sawn i puzawn pawh a awm mek a, va be bawrh bawrh rawh." a han ti deuh kher a, Msa chuan a hrechhuak zawk mai. Hlau em em chuan a tawlh hnug nghal vat a, "Awww....ava ninawm em, Alzheimer Zawnghmelchhepa!" te a ti vel ta vak vak ringawt a.

Pu Zorema chuan, "Bawihi, saw a phone te chu choka ah a awm saw..a theihnghilh a ni ngei ang." a ti a. Pi Sangzuali chuan ngaihtuah mang hleilo hian, "Awii, thil hi a theihnghilh reng mai. A haihawt ania, achang chuan ka ning thin." a ti zauh pek a, Pu Zorema chu a hawi phawk hru mai. Pi Sangzuali chu chiang takin a han melh a, "Enga? A haihawt e a? Alzheimer natna te hi a lo vei a nilo maw?" a han ti nghal chung chung a, Pu Zorema tan pawh a awm ve tho e.

Pi Sangzuali chuan a ṭawng sual zeuh tih chu a inhre leh vat a, "Hehe...haihawt lah love. Ka ti vel mai mai a nih kha, apa hi a ngaihtuah lutuk a, a zunthlum te hi a nasa si a. Englo aniang..ihh..englo hi maw?" a han ti bah ta nuai mai a, Pu Zorema lah chuan a hrethiamlo tulh tulh mai, "Eng englo maw?" a han ti leh hu a.

Pi Sangzuali pawh a thlan a tla leh ta bawrh bawrh mai, "Ihh..hehe englo hi mawle..apa a ngaihtuah lutuk hi mawle, a phone a theihnghilh phah a nih dawn hi.." tiin chhuanlam chu a siam thei ta hram a.

Deborah-i chuan, "Ani ngei ang, a fel em alawm." tiin alo fak chhunzawm ve bawk a. Pi Sangzuali chuan Deborah-i chu a han en ngawih ngawih a, hmelṭha a ti takzet a ni. Nui sang hian, "Deborah, i hmelṭha hle mai. Ka fapa in a tawng hlauh che chu ka lawm ngei mai." a han ti a. Pu Zorema chuan, "Anih chuan hei...chaw ei a hun mai dawn si a, kan haw phawt ange. Ka pi, Msa chu lo hrilh la, naktuk zanah hian ka monu nu birthday kan lawm dawn a, inchhungkua in lo kal ang che u." a ti a. Pi Sangzuali chuan, "Awle, kan lo kal em em ang." a ti a, an inthlah liam ta a.

Msa te pafa pawh thlan hluamin bathroom atang chuan an rawn chhuak a, Msa phei chu sofa ah chuan a bawk thlawp mai. Pu Rintluanga chuan, "An kal tawh maw? Ekhaiii....ava den duh veee.." ahan ti hluam hluam a. Pi Sangzuali chuan, "Ka lo zei hlauh a, in vannei mai mai a nih kha." intithei deuh tak chuan a han ti vel a.

Pu Rintluanga chuan Pi Sangzuali chu a han dek vel a, "Hmmh, iva inla zei awm vel ve a..." tiin a han chhaih vel a, awwww..chhungkaw mak tak zawng an nih hi. Pi Sangzuali chuan, "Ka ning, ṭhu mai mai teh." tih pah chuan a nam vak a, thutthlengah chuan Msa te pafa chu an ṭhu a, an thlan bawrh bawrh mai.

Deborah-i te pafa pawh chuan motor lam an lo pan ve mek bawk a, Pu Zorema chu a indap mual mual a, "Ehe...ka phone ka theihnghilh daih a nih hi." a ti a. Deborah-i chuan, "Ka va la ang." a ti a, mahse Pu Zorema chuan, "Angailo, motor ah hian lo awm la, ka va la zawk ange." a ti a, tichuan ava let leh ta.

Pi Sangzuali chuan, "Bawiha, engemaw tal i tih angai ania, min hrechhuak vat dawn tih ka chiang a ni. Deborah-i kha ka duhzawng tak a ni, nei ngei ngei ang che." a ti a. Msa chuan a ṭhutna bula iphone lo let reng chu a hmu thut a, a han lek kang a, en vang vang pah chuan, "Ka pa, engtik laiin nge hetiang phone man to lutuk te hi ilo lei hman a?" a han ti a.

Pu Rintluanga chuan en mang hlei lo hian, "Mawla, Short-term memory lost...ka phone te chu room ah ka charge daih alawm." tiin alo chhang awlsam et a. Msa chuan, "Anih chuan hei hi tu phone nge?" a tih lai tak chuan Pu Zorema chu a rawn lut thut mai a, "Ka phone ka theih...." tih chiah a sawi hman.

Pi Sangzuali, Pu Rintluanga leh Msa, an chhungkua chuan an ding rual thup mai a. Pu Rintluanga chu a din pah chuan a towel ven chu ala tla zui a, a JOCKEY kekawrte ngei mai chu a lang chiang kher mai, ala fun puar em em lehnghal. Rang zet hian Msa chuan towel chu chharin a ven ṭhat tir nghal a.

Mit khap lek lo hian Pu Rintluanga chuan ahmaa ding Pu Zorema chu a en char char ringawt a, a ding khur zawih zawih mai. Pu Zorema chuan hriatthiamloh hmel tak hian Msa te pafa chu a en hu mai a, Msa chuan, "Sir, ilo kal animaw? Ihh...ṭhenawm lawkah sawn kan awm a, tui kan nghei a, ka pa hi a inbual duh si a, ka nu Sangzuali hi kan dil ringawt mai ani." a han ti nghal zung zung a.

Pu Zorema chuan rum zet hian Msa chu a melh a, "Ka zawt che a mi?" a ti hmuk a. Msa chuan, "Hehe...zawt love, i hriatduh takin...ka tiaa..hehe." hlauh hmel tak chuan a ti a, a han nuih tlawn vel a.

Msa chuan a nu chu ava melh zeuh a, "Tiraw Nu Sangzual?" a han ti a. Pi Sangzuali chuan, "Nia...aww..Msa nu Sangzuali hi ka nia..hehe. An ni hi chu an harsa lutuk a, tui connection pawh an neilo a, chuvang chuan kan inah inbual turin ka ti ta mai ani." tiin za lo tak chuan a han nui vel huah huah a, an buai tlang a ni e.

Pu Zorema chuan, "Mmm...nih chu." a ti sup ringawt a, Pu Rintluanga chu ahan melh leh a, Pu Rintluanga lah chuan hlau hmel tak hian che miah lo hian Pu Zorema chu a alo la en reng mai.

Msa chuan a han nghawk zeuh a, Pu Rintluanga pawh a phu zuk mai. Za lo tak chuan ahan nui a, "Heh..i ṭha maw khaa? Pathian zarah kan inhmu leh ani maw? Hmanah khan ka fapa hi i hotel ah lo thawk ve turin ka rawn dil che a, mahse a theih ta lova, tunah hetah ilo kal leh ani." a han ti ringawt a, thawnthu sawi te pawh a ang zawk. Pu Zorema chu a hrilhhai kher mai, "Engmaw?" a han tih chuan Pu Rintluanga chuan, "Aaa..eng nilove, hetah pawh hian fapa ang tho ania, kan innel lutuk, kan ṭhenawm te nen hi chuan.." te a ti kual ta nuai mai.

Msa chuan inthlahrung tak hian, "Sir, nichin khan ilo kal tawh sia, tinge ilo let leh a?" a han ti mai chuh..Pu Zorema chuan, "Engtin nge hetah hian a hmain ka lo kal tih i hriat a?" a han tih chuan Msa chu a phu zawk mai.

Rang tak chuan a nu chu a kawk a, "Nu Sangzuali hian min hrilh a...tiraw?" tih pah chuan a nu chu ava melh a. Pi Sangzuali lah chuan, "Engmaw?" a lo la ti zui. Msa chuan a mitko a han san zeuh zeuh a, "Min hrilh khaaaa..." a han ti vak a. Pi Sangzuali chuan, "Ee..aww..nia nitak, ka hrilh aaa..hehe." a han ti leh vel a, ava hahthlak tak.

Pu Zorema chuan nelawmloh zet hian Msa chu a han melh hraw a, "Ka phone kha lo la rawh." a han ti a. Msa lah chuan, "Eng phone maw?" a lo la ti zui, Pu Zorema phone chu alo la hum reng hi alo ni a. Inthlahrung tak hian, "E...sorry, khale, Sir." a han ti leh hnuhnawh a. Phone chu a la a, chhuah a tum chiah chu Msa nu Pi Sangzuali alo over fal ta...inla fing zet hian a pasal, Pu Rintluanga chu a han en a, "K'u Rintluang." a han ti vel a, Pu Zorema chhuak tur pawh a ding leh chat mai.

Pu Rintluanga chuan Pu Zorema a kohna zawk emaw te a ti tawh vel, "Sangzual, Rintluanga a nilo, Pu Zorema alawm." a lo ti ve bawk a, Msa chuan a lu a dawm tawp. Pi Sangzuali lah chuan, "Nangmah alawm ka koh che, K'u Rintluang." a han ti chu Pu Rintluanga chuan ring zet hian, "Keimah maw??" a ti vak a. Pi Sangzuali lah chuan inla zei fahran hian, "Aw...kan inkoh dan a nih kha...ṭhenawmpa.." te ala ti ta deuh deuh a, ava hun tawh lo tak em.

Pu Zorema pawh lo let leh in Msa te chhungkaw mize maksak tak chu a thlir ngawih ngawih ringawt a, Pi Sangzuali chuan, "Inchungah i kekawr ṭet kha ka ṭhui zo tawh a, i duh leh han ha tawh rawh." inla dawt sawi thiam fahran chuan a han ti vel a, a ṭul tawh kher lo asin mawle. Pu Zorema chu a nui suk a, "Pi Sangzual, naktuk zanah chuan hemi te pafa pawh hi lo hruai tel ve rawh aw...ka sawm ve nghal ni rawh se." a ti a. Msa chuan phur zet hian, "Thank you , Sir...kan lo kal em em ang..birhtday present pawh kan lo keng ang." a han ti nghal zung zung a. Pu Zorema pawh chu achhuak ta, an pathum chuan arualin an thaw huai hlawm mai.

Pu Rintluanga chuan, "Huiham, Malsawmsang. Nangmah vanga kan buai zia hi...i nupui nei tur vang hian i nu leh pate hi kan inṭhen ṭep anih hi mawle." a han ti vak a. Chutah Pi Sangzuali lam chu ava melh leh a, "Nangpawh kha...a kal dawn ṭepah khatia inla fing taka lem rawn chan leh vel kha angai em ni? Ka u Rintluang te mi ti lehnghal...i pasal nge ka nih i unaupa?" tiin a han vin vak a. Pi Sangzuali lah chuan, "Ngawi mai teh...keimah vang liau liau a him in nih hi...keichu awm lo ila, in buai khawp ang." a lo la ti zui.

Birthday lawm naah chuan an chhungkua chuan an kal ngei chu a ngai awm si a, lohtheih lovin Mapuia pawh a kal ve angai awm si a, chumai nilovin Pu Zorema leh Deborah-i ten an hriatchhuah loh nan Msa chuan Mapuia nu leh pate pawh a hruai tel ngei angai dawn bawk tih chu thil chiang sa a ni. Engtin tak va khawsa hlawm ang maw? Thil chiangsa bawk chu Thantea pawh a lo kal ve leh ngei anga, engtak thleng ang maw? Thlir zel phawt teh ang....

Birthday lawmna chu Pu Zorema te in tual zawl zau tak mai ah chuan an nei a, Deborah-i pawhin a ṭhian chhelo tak tak te pawh a sawm nual mai. Mipui pawh 60-70 vel lai an awm a, birthday party nuam tak a ni.

Msa te pawh an lo thleng ta, mahse tun ṭum chu mi pakhat an hruai belh tlat mai, chu chu Deborah-i tana Msa pa lem tur, Pu Zorema tana Mapuia pa lem tur, an venga mi ang chiah lo, pa tawi te, dulkiar zet, dum zet, ṭawng tlem tak, nui reng mai, Pu Taia a ni. Msa, Mapuia, Pi Sangzuali, Pu Rintluanga leh Pu Taia te chu an lo thleng ve ta. Mapuia pa kha Msa te ṭhiandun hian lemchang turin an sawm ngam thlawt lova, Mapuia nu lah a zin daih mai bawk si.

An kal pah chuan Mapuia chuan phur loh hmel zet hian, "Zanin chu ava nuam dawn em...Pa Rintluanga te chhungkua lem ka chan pui thei tur hi ka lawm takzet." te a han ti vel a. Pu Rintluanga pawh chuan tûm hmuk hian, "Mi fate chuan ngaihzawng an neih a,buaina an tawh ve pawhin an ṭhiante chauh an hnuk lut ṭhin a, ka fapa ve hi chuan chhungkua kua in min hnuklut tel ve ta a nih hi." a lo ti ve bul bul bawk a.

Msa chuan nin hmel zet hian apa chu a han en a, "Ninawm....ka sawi ang thlap khan awm vek ula, buaina kan tawk lo a nimai." a han ti a. Pu Taia chu a han en a, "Pu Taite, zawhna an zawh che pawhin ṭha takin chhang la, nuih sâng reng tur aw? Han nui chhin teh.." ahan ti a.

Pu Taia chu a nui hui mai a, Msa chuan, "Khatia i ha 32 lang vek khawpa nuih kher angailo, pangngai deuh khan nui mai rawh...han nui leh chhin teh." a han ti leh a. Pu Taia pawh chu a han nui ve deuh suk a, Msa chuan, "Umm...tiang tur kha." tiin Pu Taia darah chuan a han beng thak thak a.

Pu Taia lah chuan, "Kuhva cheng 100 man chu min pe tak tak dawn em?" a lo la ti hu zui. Msa chuan, "Tehreng mai...thu i awih chuan.." a han ti a, Pu Taia pawh a lawm ngang aniang, a khi sûng mai.

Deborah-i'n Msa te a hmuh veleh chuan rang takin ava pan phei nghal a, "Inlo thleng ve thei maw?" a ti a. Msa chuan, "Nia..kan lo tlai deuhhlek ani." tiin alo chhang a. Deborah-i chuan Pu Rintluanga leh Pi Sangzuali te chu a han en a, "Msa pa i niang maw?" a han tih chuan Pu Rintluanga chu a lo bu nghauh mai.

Pi Sangzuali chuan Pu Rintluanga chu nghawk zeuh pah hian, "K'u Rintluang, i dinna hi adiklo.." tih pah chuan Pu Taia chu a va en a, "Duhtak, helamah lo kal ta che." ahan ti vel a, zei hi a inti hliah hliah mai ani.

Msa chuan Pu Taia chu melh pah chuan, "Deborah, hei hi ka pa a nia." a han tih chuan Deborah-i chuan mak a tih hmel hle mai. Nui lui tih hriat tak hian, "E..hehe, hei hi ipa maw? Aaa...i nu i chhun zawk a nih hi." tiin a ner deuh nûng mai. Pu Rintluanga lah chuan lungawilo zet hian ama hriat tham lekin, "Ka U mi tih chhen le.." a lo ti nuah nuah mai. Deborah-i chuan, "Lo kal ru..helamah." tiin a hruai phei ta a.

Pu Zorema leh Akimi nu leh pate chu an lo titi a, Deborah-i chuan, "Pa hei, Msa te chu an lo thleng e." a ti a. Pu Zorema chuan, "Ehe...kha, inṭha maw? Chaw kan ei thei ṭep ania...chaw te inlo ei lawk lo maw?" fiamthu ti tak deuh chuan a han ti vel a, a nui huah huah a. Pi Sangzuali chuan, "Ei bik love...chaw ei tur ngatin alawm kan lo kal." a han ti vel a.

Deborah-i chuan, "Tikhan lo inkawm rawh u aw...Nu Sangzuali nen hian chaw eitur vel kan va buaipui ange." a ti a, a kal pah chuan Msa nâk ah chuan a han piai zeuh a. Akimi patea, Ropuia chuan a lo hmu fuh chiang kher mai. Pu Zorema te chu an titi leh mial mial a, Ropuia chu Msa bulah chuan va kalin, "Hey...ka hmu hman ania aw.." ava ti vel a.

Msa chuan, "I hmu hman animai lawm." a lo la ti hmuk zui. Ropuia chuan, "Va umzui ta che, in innei dawn tho a. Chubakah a signal che tihna a nih kha...va tlan rawh." a han ti vel a. Msa pawh chuan, "Nia.." tiin a kal ve mai a, Mapuia pawh a lo ner nûng ringawt.

Msa a kal chiah chu Pu Zorema chuan Akimi nu leh pate bulah chuan, "Taka, hei hi Deborah-i bialpa, ka makpa hual Msa chu anih hi." tiin Mapuia chu a kawk a. Ropuia mak ti lutuk chu a phu zuk a, a chil a lem khawlh mai. Mapuia lah chuan nui chung hian Ropuia chu a melh a, a beng bulah chuan, "Mak iva ti awm ve.." a va ti a. Ropuia chuan zawite hian, "Nangmah hi maw kan makpa tur chu?" a ti hu mai a. Mapuia chuan, "Niang chu.." tiin a lo chhang a.

Deborah-i te inhnung lamah chuan Msa chuan Deborah-i chu a kai phei dawr dawr a, bang phenah chuan an ding dun a. Deborah-i chuan, "I mawl ami MS, miin min hmu ange?" a ti a. Msa chuan inla zei vel tak hian, "Min lo hmu mai mai teh se...engvangin nge mi zingah khatia min piai vel a?" a han ti a.

Deborah-i chuan nui sang hian, "Hmm...ka thu thu alawm, engtin nge min tih vak anga?" tih pah chuan a han piai lui leh vel a. Msa chuan, "I va pawr awm ve a? Hrem i duh ami?" tih pah chuan Deborah-i chu a pawt hnai a. Deborah-i chuan thlahlel tih hriat tak hian Msa chu a han melh vang vang a, "Min hrem ta che, ka duatlai." a han ti chuai raih mai a.

Msa chuan Deborah-i chu a kuai dak a, a hmui senno chek mai ah chuan a fawp vawng vawng mai. Ropuia bawk chuan alo hmu fuh leh ta, mak a ti lutuk chu a ding chat mai. A lu thaklo pui chu a hiat nauh nauh a, "Engemaw awmzia ni? Sawtah a makpa a awm a, hetah Deborah-i lah chu mipa dang nen an lo inkeih mial mial mai bawk si." a ti nuah nuah mai a.

Msa leh Deborah-i te chu Akimi te leh Deborah-i te ṭhian zaho nen chuan an lo inkawm a, Msa pawhin a theihnghilh leh tawh nge mawni, nuam ti ber ber ah a la ṭang zui. Deborah-i thiannu Rosy chuan, "Debo...i thlang thiam hle mai. Msa hi a hmeltha takzet, a tarmit zawng zawng te nen hian, a fel hmel si." tiin a han fak luam a, Msa chu alo lai vel.

Akimi chuan, "Fel hmel nilovin a fel alawm. Ka fapa lo pian dawn hian damdawiinah min hruai a, ka nunna a chhan asin." tiin a lo fak ve chiam bawk a. Tichuan thla te an la hova, an selfie vel a, nuam an ti tlang khawp mai.

Thantea pawh a lo thleng ve ta, chaw dawh tura a intlar lai chuan kil khata Msa leh Deborah-i te ṭhianza ho hlim taka thla an lo la ho a hmuh chuan a ngaih aṭha ta hauh lo mai. A bula mi, a thianpa constable hnenah chuan, "Hey, sawpa saw tunge?" tiin Msa chu ava kawk a. Constable chuan, "Ka va hre biklo ve, Deborah-i pasal tur Msa kha chu a ni bawk silo. Mahse inngaizawng anva ang ve.." a lo ti ve nuah nuah bawk a.

Chutih lai chuan Pu Zorema chu alo kal a, "Ehe Thante, ilo thleng tawh maw?" tiin ava chibai a. Thantea chuan, "Nia..ka lo thleng deuh chiah. Enteh Pa Zorem, sawpa saw ka va hmu ngailo ve...tunge a?" a han ti a. Pu Zorema chuan, "E...Msa ṭhianpa a nih saw..Msa ve tho a nia." tiin alo chhang a. An bulah chuan Ropuia pawh a lo awm ve a, Thantea chuan, "Anih chuan khawnge kan makpa tur Msa pawh hi a awm reng reng a?" a ti a.

Ropuia chuan rang zet hian, "Saw..sawta saw apa nen chaw an ei mek saw.." tih pah chuan Mapuia leh Pu Taia chaw ei lai chu ava kawk a. Thantea chuan ngaihṭhatloh hmel tak hian, "Deborah-i nen an inkawmngeih hle anih dawn saw." a han ti deuh kher a. Ropuia lah chuan, "Nia, midang ho pawh hian mo neitu tur zawk amaw an ti hrim hrim." a lo ti zuah zuah a.

Pu Zorema chu Mapuia te lam pan chuan ava kal a, Pu Taia bula va ṭhut pah chuan, "Ei ṭeuh rawh u aw...insum reng reng suh u." ava ti a. Mapuia chaw ei pawh a tui lo nghal vek, a zâm lutuk leh hlau lutuk chu a thlan nghal bawrh bawrh mai. Pu Zorema chuan, "Ms, Deborah-i leh i ṭhianpa te sawn enge an tih saw i hmu em?" a han ti a. Mapuia chuan ava en a, "Hmu e, thla an la a nih saw." tih ringawt hian alo chhang a.

Pu Zorema chuan, "Thla an la tihte chu ka hmu ve reng alawm, mahse an inhnaih mah mah i ti velo maw? Mi dang ho hian Deborah-i pasal tur zawk emaw an ti sup sup ania.." a han tih chuan Mapuia chuan, "Ihh..hehe, Pa Zorem...kei te, ka thianpa te, Deborah-i te hi chu ṭhian inkawmngeih lutuk tak mai hi kan nia, khawnge....ka'n kham tawh mai ange." tiin a tho thut a, a chaw ei thleng chawiin a kal daih mai.

Mapuia chu a insil fai a, tichuan Msa te bulah chuan ava kal a. Deborah-i leh Msa chuan an thlalak te chu endunin an lo nui dun nasa mai a, Mapuia chuan, "Deborah, Msa hi thil ka lo sawipui lawk aw?" tih pah chuan Msa chu a pawt hrang a.

Msa lah chuan, "Enge maw nile? Kan sawi ril dawn tan chauh asin..hunlo thei lutuk." tiin Mapuia chu alo la hau zawk zui a. Mapuia chuan Pu Zorema en pah chuan, "Ani viau mai tiraw ṭhianpa, mahse saw..i puzawn sawn a en uluk khawp mai che." a han ti chiah chu Msa chu a harhchhuak zawk mai.

Pu Zorema lam ava hawi a, Pu Zorema chuan rum em em hian alo melh rùn mai a. A phu nasa lutuk chu a ding ngil zawt mai. Mapuia chuan, "Khatin awm suh, a ringhlel ang che. Nui lui rawh, engmah thlenglo angin awm rawh. Keipawh hlau chung chungin a nih hi ka nuih vel mai mai ni....hahahaha." tiin a han nuilui vak vak a. Msa pawh chu zalo tak chuan a han nui lui ve bâwk bâwk a. Msa chuan, "Pa Zorema hmuh lai sawn Deborah-i saw va be vel rawh...min rinhlelh loh nan." a ti a, Msa chu a kalsawn ta a.

Mapuia chuan Deborah-i chu ava pan a, "Hi Deborah, zanin chu i nalh hle mai." ava ti vel a. Deborah-i chuan, "Khawnge Msa kha?" a lo ti a. Mapuia chuan, "A pum anuamlo a, ava inthiar dawn nih kha.." tiin dawt a sawi ta ringawt a. Deborah-i chuan, "Ehe...tinge min hrilh miah loh a?" tih pah chuan a kalsawn ta daih a. Pu Zorema'n a la en reng tih Mapuia chuan a hre bawk si, ring tak chuan Deborah-i chu en zui pah chuan, "Awle.....ka lo kal ang." tih pah chuan Deborah-i chu a han vai liam vel a.

Pu Taia lah chuan tui ti tak hian chaw chu alo la bar mawlh mawlh mai a, Pu Zorema chu Pu Taia bulah chuan ava ṭhu a. Pu Zorema chuan, "Ei bawrh bawrh rawh...va dawhnawn rawh aw.." polite tak chuan a han ti a. Chutih lai chuan Msa leh a nu leh pa te chu an lo kal a. Pu Zorema'n a hmuh chuan, "Pi Sangzual, lo ṭhu teh..hei i pasal nen kan titi mek a." a han tih chuan Msa te chhungkaw thum chu an phu rual leh suau mai. Msa chuan a nu chu kheuh zeuh zeuh pah chuan, "Va kal rawh.." a ti sur sur a.

Hreh tak chung chuan Pi Sangzuali pawh chu ava ṭhu ta a, Pu Zorema chuan, "Hei...titi lawk ka duh a. Hetia in fapa leh ka fanu ten inneih an duh takah chuan keipawhin ka hnial lem lo a, an inhual ni turte, man hlan ni te, inneih ni te kan sawi lawk dawn em ni ka lo ti deuh a, enge i ngaihdan?" tiin Pu Taia chu a han melh a. Pu Taia lah chuan sawi tur hre hek lo, a nui suk ringawt a. Pu Rintluanga lah chuan, "Aww...nidangah pawh a sawitheih alawm."a lo ti vin hlur a.

Pu Zorema chuan rum zet hian Pu Rintluanga chu a melh a, "Enteh Pu Tluang, chhungkaw thil a ni a, khawngaihin lo inrawlh suh." a ti ta hmak mai. Pi Sangzuali lah chuan inla zei fahran hian, "Nia..K'u Rintluang, lo va kalsawn hrih mai teh." a lo ti vel ham ham a. Pu Rintluanga chu a ṭap ṭep tawh, "Ninawm, ka role chan hi a har bik si, lemchan reng ringawt.." tiin a phun nuah nuah a, a kal ta daih a.

Pu Zorema chuan Pu Taia chu a han en leh a, "Enge i ngaihdan?" tiin a han zawt leh a. Pu Taia tihngaihna hrelo chuan Msa chu a han melh zeuh a, Msa chuan zaizirin kalsawn turin a lo hrilh a. Pu Taia chuan, "Hihihihihhh...kan la ngaihtuah ang chu...puar peng pawng hian chaw ei phawt ila. Ka va dawhnawn ange, ril a ṭam emai." tiin a kal ta daih a.

Msa chuan, "Sir, Msa pa hi chu zunthlum a neih avang hian a biak tlak vak loh a, lo hrethiam hram hram rawh aw.." tih pah chuan Pi Sangzuali chu a han melh zeuh a, "Tiraw ka nu?" a ti ta zauh mai. Pu Zorema chuan mak tih hmel zet hian, "Enga? KA NU a? Tunah khan KA NU tiin i ko tiraw?" tiin phawk hrû hian Msa chu a melh a.

Msa chuan muangchang hian Pu Zorema chu a melh a, "Tunah khan KA NU tiin ka ko palh ami?" a la ti zui. Pu Zorema chuan mak tih hmel tak hian, "Aw...KA NU tiin i ko alawm." a lo ti a. Msa tih ngaihna hrelo chuan, "Sir, ihhh....i beng a chianglo aniang, Nu Sangzual ka tia lawm." a han ti ta vel a.

Pu Zorema chuan, "I tilo...KA NU i tia lawm." tiin a ṭang tlat mai bawk si, Pi Sangzuali pawh chuan, "Aaa..ihh, nia...ni e." tiin a lo ṭawng bah ve nuai mai bawk a. Msa tihngaihna hre tawhlo chuan anu chu a kai tho lawp a, "Nu Sangzual, chaw i ei duh tawh tiraw?" a han ti ringawt a. Msa nu lah chuan, "Keiman maw?" a lo la ti hu zui.

Msa chuan, "Aw...i ei duh, i ei duh khaaa..." tih pah chuan a mitko a han san zeuh zeuh a. Pi Sangzuali chuan hrechhuak thut ni awm tak hian, "Niaa..hehe ka eiduh alawm. Ka va ei chak tawh tak em...ka va ei phawt ange." tiin an kal ta daih a, Pu Zorema pawh a hrilh hai hle mai.

Msa te chhungkua, Mapuia leh Pu Taia te pawh chu an awm reng ngam tawh lo, tumah hrilh lovin an haw ta ringawt mai a. Thil thleng zawng zawng chu kil khat aṭang chuan Thantea leh constable te chuan an lo hmu ve vek a, Thantea ngaih a ṭha hauh lo mai. A lu a bu ngat ngat a, "Constable....case thar chhui tur kan nei e." a ti a, a nui ta ver ver mai.

Atuk ah chuan Msa leh Mapuia te pawh chuan hna chu an ṭan ve ta a, a nikhatna chauh ala nih vang nge, Msa pawh a zia khawp mai. A rilru a pe a, be buai deuh tu an awm pawhin thil pawi tak a tisual lem lo. Msa hi rinloh tak maiin eirawng bawl a thiam hle a, chuvang chuan Pu Zorema te hotel ah pawh hian F&B Department ah a awm a ni. Chhuna an buailoh lai deuh chuan Msa chu Kitchen aṭang chuan a rawn chhuak a, Front Office Duty te nen chuan an inkawm a.

Pu Zorema pawh Lobby-ah ṭhu in chanchinbu a lo chhiar mual mual a, a phone a rawn ri a. Pu Zorema chuan phone chu la in, "Hello, aw enge nita?....Enga? A nasa viau em?...Awle doctor ka han phone nghal ange." tiin a phone chu a dah a, number dang a hmel leh mual mual a, Msa chuan alo en reng a.

Pu Zorema chuan phone chu be leh in, "Hello, Doctor Muana maw? Keimah Zorema, ka fanu Deborah-i kha i hria tiraw? Adam lo a, a khua a sik a ni awm e...khawngaihin lo kal ta che. Ka la haw hman mai silo a, i theih chuan ka lawm ngawt ang...awle, ka lawm e." tiin a personal doctor chu a bia a. Msa chu a lo mangang hle mai, Deborah-i a damlo tih a hriat meuh chuan awmngaihna a hre lo.

Zah pawh dawn lovin Pu Zorema chu a va pan a, "Sir, ka haw hma thei angem?" a va ti ringawt mai a. Pu Zorema chuan, "Engvangin maw?" a lo ti hmuk a. Msa chuan, "Sir, ka nu a damlo a, ka haw angai a ni." a ti ringawt a. Pu Zorema chuan, "Anih chu....order 2 vel ala awm a, siam zo leh phawt la i haw mai dawn nia." a ti a. Mahse Msa chuan, "Nilove Sir, nu te hi an pawimawh ber, chumi dawtah kan hna...min hrethiam rawh." tih pah chuan inthlak pawh inthlak lo chuan a tlanchhuak nghal a. Pu Zorema pawh chuan mak ti tak chuan a thlir zui vawng vawng ringawt a.

Deborah-i te in chu ava thleng a, Akimi ṭhiante leh Ropuia te anlo awm a. Msa chuan, "Deborah-i a awm em?" a ti lut nghal a. Akimi chuan, "Aw awm e, roomah a awm, han chho rawh." a ti a, Msa chu a tlan chho nghal a. Ropuia chuan thinrim hmel tak hian, "Akim, enge i kaltir ringawt a...a mawi pawh a mawilo." a lo ti ve pung pung a.

Akimi chuan, "Aww..innei mai tur an ni tawh tho a, a mawilohna ka hrelo." a lo ti hmuk a. Ropuia chu tum burin pawnah a chhuak a, "Amak mange, achang leh khapa kha Msa in tia, achang leh pate takte hmelchhe zet kha Msa in ti leh bawk sia, khapa nen khan an inkiss lai ka hmu a, Msa veve an ni te an tia, tuber hi nge maw kan makpa tur chu le?" a ti phei bul bul a.

Msa chu Deborah-i room ah chuan kik pawh kik lo chuan a va lut tlang pawp mai a, Deborah-i'n a lo hmuh chuan mak ti tak hian alo en a, "Ms, enge i rawn tih dawn a?" a lo ti hu mai a. Msa chuan Deborah-i hmai vel te chu a han khawih a, "Ehee..i sa vek alawm." tih pah chuan puan te chu a sin that tir a. Deborah-i chuan, "Enge i rawn tih dawn ka tih chu?" a ti leh a, Msa chuan, "I mawl ami? I damlo tih ka hria a, ka lo kal anih hi...enge ka rawn tih vak anga?" alo ti a.

Deborah-i chu a nui var var a, "Lo mu ve la, minlo kuah lum teh." a ti vel a, Msa pawh chu mu ve in Deborah-i chu a kuah a. Deborah-i chuan nghet tak hian alo kuah let a, "A nuam ee...ka dam sawng sawngin ka hria. Kan innei dawn a, a nuam ee.." a han ti leh a. Msa chuan, "Keipawh ka hlim takzet, khawvela ka hmangaih ber nen kan innei dawn bik a." a ti a.

Deborah-i chuan, "Hna i thawh lai a ni awm sia, engtin nge ilo kal theih a? Ka pa in a phal reng reng ami?" tiin a zawt a. Msa chu a nui sak a, "Hmmh, a makpa in thil ka dil a nih chuan engvangin nge maw a phalloh teh lul ang ni?" a han ti vel a. An hlim dun kher mai, Deborah-i pawh chu a sawi ang tak tak chuan a dam sawng sawng hialin a inhria a ni.

Doctor leh Pu Zorema te pawh an rawn thleng ve ta a, Pu Zorema chuan, "Khawnge Deborah-i hi?" a rawn ti lut nghal a. Akimi chuan, "A roomah a awm, Msa alo kal a, a awmpui mek. Deborah-i pawh a dam sawt mai ang, Msa a lo thleng chiah a, a reh hmak mai." a lo ti a. Msa chuan Deborah-i room aṭang chuan Pu Zorema aw chu a lo hre pha vek a, maimitchhing chung chuan, "I pa aw ava ang ve chuuu....a ṭawng thum bul bul mai." a han ti a. Deborah-i chuan, "Ka pa a nih chu Mawla.." a han tih chuan Msa chu a phu chiang kher mai, a va phu zing ta mawlh mawlh em!

Msa chuan hlauthawng tih hriat tak hian, "Deborah, i room atang hian chhuahna tur a awm em, a san vakloh chuan tukverh atang pawh hian ka zuangthla hreh miahlo ania." a han ti khur dar dar a. Deborah-i lah chuan a uang emaw a lo ti a, "I ho emai, khawiah mah i kal dawn lo, ka phallo." tiin Msa chu a aia nghet hian a kuah bet tlat mai a.

Pu Zorema chuan, "Anih chuan Doctor, i duh leh haw leh si mai rawh...engvak a ni lovang." a ti leh ta daih mai a. Doctor chuan, "Aww...ka lo thleng ve ta sa sa, a khawsik te tal ka han check ve ang chu.." a ti a. Ropuia lah chuan phur zet hian, "Nia, han check ang u...a damlo nasa awm si." a lo ti vel zuah zuah a. Mahse Pu Zorema chuan, "Ropui, a hmangaih ber, a damdawi mumlian in a awmpui mek alawm. Damdawi ṭha ber chu Hmangaihna hi a ni, i hrethiam ve phaklo ang VAL SENIOR.." a la ti zui, Ropuia pawh a ngawi chiang teh asin.

Doctor pawh chuan, "Anih chuan ka haw leh si mai ange, mamawh in neih apiangin minlo phone hreh suh aw U Zorem." a han ti a. Pu Zorema pawh chuan, "Tehreng mai, keipawh Hotel lamah ka han let leh tawh ange, Msa chu lo hrilh ula, lo leng char char rawh se." a ti a, an chhuak ta a. Msa pawh a thaw huai mai, an ṭawng ri kha a lo ngaithla uluk teh asin, Deborah-i lah chu a lo muthlu dêr mai lehnghal.

Atukah chuan Msa leh Mapuia te pawh chuan hna an thawk leh tan ta a, Msa pawh eitur siamin a buai lehpek kher mai. Mapuia erawh hi chu House Keeping Department ah a awm thung a, Msa vang liau liauin hna neilo khan hna a hmuh ve phah a, Msa chungah pawh hian lawmthu sawi chu a ba ve tho chuan alang. Msa pawh chu choka chhung lum lutuk chu a ning ta deuh aniang, intih harh nan tiin a rawn chhuak a, Front Office duty te nen chuan an inkawm leh vel a.

Pu Zorema chuan Reception te bulah chuan, "House Keeping Department lam han phone lawk teh u, Msa khan minlo hmu teh se." a tih chuan Msa zawk chu a lo hlauthawng leh kher mai. Mapuia pawh chu a rawn chhuk ta ngei mai a, Pu Zorema chuan, "Ms, tunah khan call ka dawng zo chiah a, Akimi nu leh pate khan Durtlang lama len an châk thu ansawi a, kei ka hman silova, tlawmngai hram la, han lenchhoh pui mai ta che." a ti a.

Mapuia chuan sawitur a hre lo kher mai, "Ihh...khawiah nge an kal duh a?" a han ti leh ringawt a. Pu Zorema chuan, "Aww...ka sawi zawh chiah kha, Durtlang ah." tiin a lo chhang leh a. Mapuia chuan hlauh hmel tak hian, "E..ihh, Durtlang khawilaiah?" a han ti leh a, Pu Zorema chuan, "KV Paradise ah kal an duh a ni awm e..a awmna lai i hria ang chu tiraw? KV Paradise te chu i hria ang, KV Multipurpose School bul lawk kha a nih kha, Durtlang field panna kawngah khan..i hria tiraw?" a han ti leh a. Mapuia chuan, "Aw..ihh...nia." a ti ringawt a.

Pu Zorema chuan, "A hrim hrimin tinge i phone i lak theih loh a?" a han ti leh chuan Mapuia zâm lutuk leh hlauthawng tawh bawk si chuan chhan mai nachang pawh a hre tawh lo. Msa chu ava tlan vat a, "Sir, ihh..a phone battery a low a, chuvang chu ania." a va ti ta tawp a. Pu Zorema lah chuan, "Enge maw ilo inrawlh ve ziah le...ka makpa nimai tur nen kan inbe mek anih hi.." a lo ti khur khur a.

Mapuia chuan, "Hehe, Sir..sawi ka lo tum chiah a, min rawn sawisak a nih hi." a lo ti vat a. Msa chuan, "Sir, eng titurin nge min duh?" a han ti ngawt a. Pu Zorema chuan, "Engmah, eitur va siam rawh." alo ti leh hmuk a. Msa a kal tur chiah chu Pu Zorema chuan Mapuia chu ahan en a, "Chuan maw MS?" a han tih chuan Msa chu rawn hawiin, "Enge ni ta?" a rawn ti heu mai.

Pu Zorema chuan, "Nang ka ko lo che." a lo ti leh hmuk a. Chutih lai chuan Hotel kawtah chuan car a rawn ding a, a chhung atang chuan Deborah-i, Akimi, Akimi nu leh pate leh Ropuia te chu an lo chhuak a. Motor khalhtu driver leh Deborah-i te chu an inbia a, MSa leh Mapuia ten an va hmuh chuan an ṭah a chhuak kher mai. Pu Zorema chu a nui suk a, "Ms, saw Deborah-i te pawh anlo kal a, i hruai ngei ngei angai animai." a ti a.

Mapuia chuan, "Driver a awm reng saw...amah sawn hruai mai se, hna ka thawk laklawk si a, hni 2-na chauh te ala ni si a, a inthlahrun awm emai." a han ti ringawt a. Pu Zorema chuan, "Driver saw a hman dawnlo, bungrua phur turin ka tir leh dawn a, chuvang chuan i hruai ngei ngei angai. I hna angah ngai tho rawh, hlawh ka pekloh phah dawn hleinem che." a lo ti tlat mai si. Mapuia chu a ṭap ṭep tawh, Bathroom bula step ah chuan a va ṭhu tung ût mai a, a ṭap ta pur mai.

Msa chuan, "Sir, Msa saw ka va be lawk aw?" a ti a, Pu Zorema pawh chuan, "Awle...va be ta poh che." a lo ti a. Msa chu ava kal a, Mapuia chuan ṭap pur hian, "Mawla, engtin nge nidawn? Lem ka chang peih tawh ngang lo, thudik va hrilh mai rawh, anih lo chuan keiman ka hrilh mai ang." beidawng tak chuan a ti a. Msa chuan, "A chiloh...i mawl ami?" a han tih chuan Mapuia chuan, "MS, a tawk tawh. Kan thup reng thei dawn chuanglo, kan vannei reng theilo. Tun hun hi kan vanneihna tawp ni chu a ni tawh dawn niin alang." a ti a.

Msa chuan chhuanlam dang siamtur a han ngaituah vang vang a, a haihawt ber hian chhuanlam thar a hrechhuak leh ta mauh mai. Tichuan Msa chuan, "Mapui,tikhan ṭhu tung reng la, pum nat hmel deuhin lo ner nûng reng rawh aw?" a ti a, Pu Zorema bulah chuan ava kal leh ta a. Pu Zorema bulah chuan, "Sir, Msa saw en teh...saw apum a na a, a kua a ṭhalo a, a sawi ngamlo a nih kha." a ti a.

Pu Zorema chuan Mapuia chu ava en a, Mapuia lo ner nûng a hmuh chuan, "E..anih saw." tiin ava pan a, "Ms, haw mai rawh, han inthlak la, i dam hunah chauh ilo kal leh dawnnia. I pum anat te chuan sawi mai tur a lawm, han inthlak rawh." a ti a, Mapuia pawh chu inthlak tur chuan Staff room lam chu a pan a.

Pu Zorema chuan Msa bulah chuan, "Anih chuan nangman hruai mai ta che, ka hman bawk silova. KV Paradise chu i hria tiraw...i kal tawh em?" ahan ti chuan Msa chu a phur hle mai. A nui suk a, "Kan kal fo alawm, a nuam asin aw...ka va hruai hlawm ange." a han ti nghal ham ham a, a nihna takah chuan Durtlang lam ah hian Msa hi a kal ngailo hrim hrim a, a kalkawng chu hre mahse KV Paradise awmna ber pawh a hre chuanglo.

Msa chuan a chef coat chu aphelh sawk sawk a, tichuan pawnah a chhuak nghal a. Driver chuan chahbi alo pe a, Ropuia chuan, "Hey, enge i rawn tih dawn a?" a lo ti hu mai a. Msa chuan, "KV Paradise ah ka hruai dawn che u mawle, in kal duh a ni lawmni?" a han ti vel a. Deborah-i chuan, "Nia, U Kimi te chhungkua hian kal an chak a, keipawh ka la kal miahlo, Durtlang lamah hian ka kal ngailo hrim hrim a, ka kal châk khawp mai." a lo ti ve bawk a.

Ropuia chu a bo tulh tulh mai, mahse engmah sawi lo chuan a motor ah chuan a lut ve mai a, tichuan an kal ta a. Msa hi haihawt viau e tilo chuan bike, scooty leh four wheel motor te hi a khalh thiam vek a, aṭhianpa Hmingmawia zarah lirthei lam hi chu a khalh thiam ve deuh vek a ni. Tichuan Durtlang lam pan tur chuan an tlan chhuak ta a, thleng thei tak ang maw?

Msa te leh Deborah-i te, Akimi chhungte chu motor chhungah chuan hla play-in an tlan pah chuan an zai hova, nuam an ti hle mai. Akimi nu leh pate hi thingtlang mi an ni a, Durtlang awmna an hrelo hrim hrim a, Aizawl veng chhung hi an hre mang lo vek ti ila kan sawi sual awm love. Deborah-i lah mahni veng chhung chhuahsan ngailo, Primary School aṭanga College BA thleng mahni venga zir ngat ngat kha a ni a, kalkawng a hriat hlat ber chu Bawngkawn bâk a ni der bik silo. Msa erawh Durtlang chu vawi 2 vel chu a kal ve tawh tho nangin, kan hriat ṭheuh angin a Alzheimer natna avang hian a kalkawng a theihnghilh vek tawh thung.

Hlauh ang ngei ngeiin Msa chuan kawng a bo ta, World Bank Road lamah te a tlan puia, Mualpui lamah te kualin kawng hnuai lamah chuan a tlankual pui ta vak vak mai a. Deborah-i te pawh chu an mangang ṭan hle mai, Msa lah chuan chhuanlam a siam zel mai bawk si. A tawpah chuan Chawlhhmun lam ah an tlan leh a, an tlanna kawng chu a hriat tawh hnu a ang tlat hian a hria a. A tawpah chuan a hrechhuak ta, ahma kum Krismas vuakvet lai khan a ṭhiante nen Solomon Temple ah an kal tawh tih a hrechhuak hlauh mai.

Tichuan idea thar a nei leh ta, Tichuan Solomon Temple kalkawng chu a hrechiang ngang mai, chumi lam chu a pan pui ta a. Temple an thleng chu Deborah-i te chuan mawi an ti ngang mai, Ropuia erawh chuan, "Darkar chuang fe min tlanpui vak vak a, helai hi Durtlang a ni awmlo emai. Chubakah ka thiante min hrilh dan kha chuan hetiang em em hian KV Paradise kha a lian lo, chubakah a hla em em lo bawk." a lo ti pung pung a.

Msa chuan confi zet hian, "Ni e...hei hi KV Paradise a ni lo, mahse heta kal hi afuh daih zawk. KV Paradise kalkawng hi an siam mek a, motor luh tlang an phallo a. Mahse in kal châk tih ka hre bawk si a, tichuan helai hmunah hian ka hruai ta mai che u a ni." a han tikual leh vel a. Akimi te lah chuan fel hi an han ti em em khawp a, tichuan hlim tak chuan a chhung vel chu an fang kual ta a. Msa leh Deborah-i te pawh kalhrang nalhin an hlimdun kher mai, mahse kil khat aṭang chuan tu emawni hian camera-in a lo la ru reng a.

Msa te chu an haw leh ta, Msa pawhin kawng a hre tawh bawk a, a confi tawh hle mai. Chutia hlim taka an tlan lai chuan an hma takah chuan Police Motor hi a rawn ding thut mai a, motor atang chuan Thantea a lo chhuak ta a. Msa te pawh chu an chhuak a, Deborah-i chuan, "Ehe Thante, enge ni ta a? Enge khatia i rawn din thut a?" a ti a. Thantea chuan rum zet hian Msa chu a melh a, "Pu zahawm, i lo ropui hle mai. Keini chu min theihnghilh ta a ni maithei e, mahse keini erawh chuan kan theihnghilh ve lo che asin." a han ti ham ham a.

Msa chuan, "Enge i duh a? Tunge i nih a?" a han ti a, Thantea chuan, "Khaih khaih..hmanhmawh suh." tih pah chuan a motor kawngkhar chu a hawng a, Mapuia alo awm a. Chumai nilovin Thantea bulah chuan police dang pahnih leh Pu Zorema pawh an awm ve bawk. Thantea chuan Mapuia chu dim baksak lo hian a ṭhamchhuak nawk a, Msa chu a hlauthawng kher mai. Thantea chuan Deborah-i chu a en a, "Deborah, hepa hi i pasal hual a ni em?" a ti a. Deborah-i chuan a chhang lo, a hrethiamlo takzet.

Thantea bawk chuan, "Lungngai suh, i chhan angailo. I bialpa Msa hian a chhang thei ang, a ni hi screen-writer ber chu a ni a, kan vai hian min bum ani. Ahma aṭang tawh khan dawt hlir a sawi a ni, Msa chu amah hi ani a, Msa anga asawi, aṭhianpa hi chu Mapuia a ni." a ti ta phiar phiar mai a. Msa erawh a hawichhuak ngam lo, a kun reng a. Deborah-i chuan mak ti em em hian Msa chu a en reng a, Thantea bawk chuan, "Hetia a tih chhan hi in hre duh em? Achhan chu hepa hi mi pangngai phalo a nih hi, Short-term Memory Loss, Absent Mind...Haihawtliana diktak chu amah hi a ni. Deborah, nangmah hi a bum char char che a ni, a theihnghilh ziah che a, mahse chhuanlam a siam nghal zung zung zel a, nang lah chuan ilo awih vek zel lehnghal." a ti leh ta zung zung mai.

Akimi te pawh chuan mak an ti em em a, Deborah-i phei chu a mittui a tling ṭeuh tawh mai. Thantea bawk chuan sawizawm zelin, "Thudik i hrechhuak anih chuan i ṭhen nghal dawn tih hi a inhre ve vek a, chuvang chuan Social Service tih te hmangin dawt a sawi kual vel mai mai a nih kha. Inchhungkua ah hian he mihringpa nihna diktak hre tu chu mipakhat chauh a awm, chu chu i pa hi a ni. Pa Zorem, hrilh ta che." a ti a.

Pu Zorema pawh chu a thaw hawk a, dam diai hian, "Umm..a dik e." a lo ti zawi sap a. Thantea bawk chuan, "Enteh Deborah, in intawn hmasak ber ni kha ila hria em? Khatah khan i student Cindy nilovin a ṭhianpa Hmingmawia pa zawk thisen pe tura kal a ni a, mahse a haihawt em avang hian Cindy zawk chu thisen a pe a. Nang lah chuan a fel vang emaw ilo ti a, chu chu hmang ṭangkaiin a ngaizawng ta che a ni. I pa hian nang nen hian inneih a phal dawn lo tih a hre vek a, chuvang chuan a ṭhianpa Mapuia hi amah angin lem a chan tir a, tichuan kan vai hian min bum ta a ni." a ti leh ta phiar phiar mai.


Deborah-i pawh chuan a han ngaihtuah let a, Msa'n a kalsan leh daih ṭhin lai te, film en tura an chhuah pawha, Victor-a te inkawta board an lo pen daih te, vai naupang Raju-a a unaupa anga a sawi te leh thil dang dang te chu a ngaihtuah let a, Thantea sawi chu thudik ngei a nih a ring a, mahse a awih phal silo. Mittui tla zawih zawih hian, "MS, thudik a ni em?" a ti a, Msa chu a ngawi reng. Thantea chuan vin zet hian, "Thudik chu hrilh ta che." a lo ti vin khur khur a. Msa chuan Deborah-i chu a en ngam lo, hnuailam melh chung chuan, "Thudik a ni e." a ti tham tiak a.

Deborah-i chu a ṭap zawih zawih mai, "Minlo bum char char amaw? Ka hua che MS, ka hmu duh tawh lo che." tih pah chuan apa car ah chuan a lut ta hmak a. Thantea chuan Msa kawr awmah chuan a ṭham a, "Man i ni e." a ti a. Mahse Pu Zorema chuan, "Nilove Thante, chhuah rawh khawngaihin, an pahnih khan chhuah rawh..ka ngen ache." alo ti a. Tichuan Thantea te leh Pu Zorema te chuan Msa leh Mapuia chu an kalsan ta vek a.

Mapuia chuan inchhir hmel tak hian, "Ṭhiana, ka tihpalh aw..ka zep char char a, mahse kut minthlak nasa em a, ka tuar theilo ani. Min ngaidam rawh, min ngaidam hram teh." tih pah chuan Msa hmaah chuan a ṭhingṭhi a. Msa chuan a kaitho a, a kuah a, "Nilove ṭhiana, hei hi kan chantawk a ni. Kha leh chen ka tan, min hmangaih avangin ka tan hrehawm i tuar a, ka lawm e aw...min ngaidam zawk lul teh." tiin an ṭap dun ta hawm hawm mai a, inlak pa a har ngang mai.

Msa chu inah a haw a, inchhungah chuan Pu Rintluanga leh Pi Sangzuali te chu an lo ṭhu ngui bar mai a. A ṭhianpa Hmingmawia pawh alo awm ve bawk a, Msa thil tawn te chu an lo hre ve a ni ngei ang. Msa chuan zawi sap hian, "Hmingmawi, ka nu te hi engkim ilo hrilh a nimaw? I va han â tak, a ho emai khatiang lek lek." tiin zalo tak hian a nui suk a.

Khua a thim tawh a, chaw ei turin Msa chu a nu leh pate chuan an lo nghak mek hi alo ni a. Hmingmawia chuan Mapuia chhungte hnen aṭangin an chanchin lo hria in Msa nu leh pate hi engkim alo va hrilh ve vek alo ni a. Msa chuan, "Nu, ka ril a tam lutuk...enge kan hmeh?" tih pah chuan chaw ei dawhkana chawhmeh inchhawp te chu a han en kual a. A ṭah a chhuak ngang mai, mahse a insum hram hram ani tih chu a nu leh pate chuan an hai lo. Chawhmeh chu a han en a, "Ehe, tui dawn veleh..arsa te kan hmeh ve dawn nih hi...ava ropui tak em." tiin zalo deuh chuan a nui lui sak a. A inhnit feih feih a, "Enge mawni...khatiang lek lek, Haihawtliana alawm ka nih le...ka theihnghilh leh vat tho ang." tiin amah leh amah chu a inbe mawlh mawlh a.

A â zo tawh a ni ber mai, a nu leh pate pawh chuan mittui nen an fapa khawngaihthlak tak chu an en reng a, Msa bawk chuan ṭah aw ṭeuh chuan, "Nu...i va han fel tak. Deborah-i ka theihnghilh theih nan tiin ka chawhmeh duhzawng te ilo siam animaw..ka ei anga, puar peng pawngin han ṭhu vang vang ila, ka theihnghilh mai ang." a ti leh a, mahse a hlim mawlh lo ani, a mittui chu a tla zawih zawih reng tih chu anu chuan chiang tak hian a hmu reng si a. Msa chu a han ngawi vang vang a, "Pathian pawh hi a fel ngawt mai, hetiang thluak special lutuk min pe hi ka lawm takzet, engkim ka theihnghilh leh mai anga, nakinah chuan tunge Debrah-i chu ka la ti leh hu hu anga...tiraw?" tiin a nui lui hram hram a.

Pu Rintluanga meuh pawh a insum zo lo, lehlam a hawi a, a hmui hupin a ṭap zawih zawih mai. Msa chuan a phone a phawrh a, ring tak hian, "Ehe..avan nuam dawn tak. Zanin ah United te an inkhelh dawn anih hi..Hmingmawi, en ngei ngei ang aw..zanin nanana chu kan.." a sawi zawm thei lo. A maimitchhing vang vang a, ṭap chung chuan, "Nu, tinge ka theihnghilh theihloh? Mawhh...ka theihnghilh theilo, a hrehawm emai." tiin a nu chu a kuah a, a ṭap hawm hawm mai a.

Anu chuan lo kuah letin, "Bawiha, apawi ka ti, apawi ka ti takzet." tiin alo ṭahpui ve bawk a. Msa chuan, "Alzheimer hi min tichak tu tur angah ngaiin theih tawpin ka lo suallet ve thin a, Mahse min ti piangsual tu ani, mi anglo diktak chu ka ni." a ti a. Anu kutah chuan a vuan a, "Nu, Deborah-i kha ka hmangaih asin, dawt ka hrilh tih chu ka hria, ka pawm thlap. Mahse ka bumlo asin, ka hmangaih em vang ani. Thudik a hriat chuan ani khan min kalsan mai ka hlau ani. Nu...HAIHAWT HLE MAH ILA TINGE ANI KHA KA THEIHNGHILH VE THEIHLOH?" tiin a nu chu ṭap chung chuan a zawt a, a nu tan chuan chhan ava har dawn em.

Pu Rintluanga chu a lo kal phei a, "Bawiha, kan hria alawm. I thiamloh a awmlo, keini zawng, kan vanduai a ni e." a rawn ti a. Msa chuan, "Ka thil hriat duh te ka hre thei ngailo a, ka theihnghilh vat zel a. Mahse tunah chuan ka hriatreng duh loh leh ka theihnghilh duh em em te ka theihnghilh leh thei silo. Ka hmangaih ber Deborah-i khan min hmuhduh tawhloh thu leh min huat thu chu ka hmaichhan ngeiah min hrilh asin....Tinge? ALZHEIMER NATNA VEI TE HIAN HMANGAIH KAN NEI VE THIANG LO EM NI?" tiin a ṭap zawih zawih a, a ṭap bang hlei thei ngang lo a ni e.

Tichuan a tho thut a, a mittui a hru a, "Pa, i sawi dik e...ka hmangaihna avangin invaiin ka hnuklut che u a, ka tihpalh a ni. A thleng leh tawh ngailovang, engtikah mah hmangaih ka nei leh tawh ngai lovang. Ka hre reng tawh ang, kei chu midang ang ka nilo, HAIHAWTLIANA MAI CHAUH KA NI E." a ti a, a room lam panin a chho ta daih a.

Ni thum lai mai chu Msa chuan chaw a ei mumal tawh lo, Deborah-i theihnghilh a tum nasat poh leh a rilru ah alang zing tulh tulh mai bawk si. A ṭap a ṭap a, a ṭhiante pawhin hnem tum nasa eng ang mahse awmzia a awm lo. A mu mang ngailo a, zu pawh a in hial phah a ni. Chutiang bawkin Deborah-i pawh chuan Msa chu a theihnghilh thei bik lova, Msa ang bawkin chaw pawh ei mumal lovin nitin mai chuan Msa ringawt a ngaihtuah ṭhin a.

Thantea erawh ahlim hle mai, Deborah-i nen chuan an inneih ngei a ring nghet bur tawh a. Chubakah Pu Zorema chu nitin mai chuan Deborah-i nupui atana neih a dil reng mai bawk si, apa Pu Zuala lah chuan a dilpui reng bawk. Deborah-i chuan Msa chu a huat rual rualin a ngai em em a, mahse dawt hlir a hrilh ṭhin avang te, Msa'n ngaihdam rawn dil pawh a tum miahloh avang leh biak pawh a rawn biak ngai miahloh avang chuan Msa chuan a lo play mai mai angin a ngai a, mahse chutiang erawh a ni hauh silo.

Msa chuan Deborah-i hi a be ngam tawh lova, ngaihdam dil takngial pawh a ngam tawh loh zawk vang a ni. Mi haihawt tak, Alzheimer natna nei, Short-term memory loss ni si khan Deborah-i chu ngaihtuah loh lai a nei ta ngai meuh lo. Mahni intihhlum thleng te chuan a ngaihtuah hial a, mahse a nu leh pate a ngaihtuah lo thei bawk silo. Rilru lâk pen nan tiin a ṭhiante chuan an vah chhuahpui thin a, mahse awmzia a awm lo. A rilru ah chuan Deborah-i chiah a leng a, thildang a ngaihtuah thei mawlh lo a ni.

Kar khat lai a liam leh ta, hun a va kal chak si em. Tuk khat chu Msa nu chuan Msa chaw ei duhlo, tûm bûr a sitting room-a a ṭhu chu ava pan a. Anu chuan, "Bawiha, engemaw tal ei teh." a ti a. Msa chuan, "Ka nu, ka ril a ṭam lo, ka ei peihlo." a lo ti hmuk a. Msa nu chuan, "Enteh Bawiha, engtia rei nge hetia i inhrem dawn? Nangpawhin i sawi kha...hmalam ka pan ang tiin i sawi a, mahse tinge hetia i awm tlat si a?" tia a han zawh chuan Msa chuan, "Ka ning ania...min tibuai lo teh." a ti vin hlur a.

Chutih lai tak chuan rinloh tak maiin Pu Zorema a lo lut hlawl mai, hlim hmel tak hian, "Ekhai, in dam maw?" a rawn ti lut ham ham a. Ṭhutthleng ah chuan a ṭhu a, "E..kha Pu Rintluang, i dam maw? Msa pawh inhmuh ava khat ve.." a han ti vel a. Rum zet hian Msa chuan Pu Zorema chu a lo melh a, Pu Rintluanga pawh a lawmloh hmel kher mai. Pu Zorema chuan, "Khai a...tinge khatia min en ṭhup a, misual tak angah min ngai em ni?" a han ti leh vel a. Msa chuan thinrim hmel tak hian, "Enge i lo tih dawn?" a lo ti khur khur a.

Pu Zorema chuan, "Awle, ka lo kal chhan ber chu ka han hrilh ang che u. Ms, Deborah-i pasal tur chu ka thlang fel tawh a, ka rawn hrilh ve che u a nih hi." a han tih chuan Msa mittui chu a tla nghal sawk mai, a thin a phu dup dup a. Pu Zorema lah chuan, "Inlo kal ve ngei ngei angai ania, chuan maw MS, inneih ni ah Deborah-i rawn kidnap te i tum vel ange, ngaihtuah pawh ngaihtuah duh suh. Mipa leh mipa angin ka hrilh che a nih chu, ṭha taka ka hrilh lai che hian thu awih mai ang che." a la ti ta deuh deuh a.

Pi Sangzuali chuan, "Pu Zorem, khawngaihin duhtawk teh. Tunah pawh ka fapa hi a thi mek anih hi, a nu leh pate kan awm ve a, chutah kan inchhungah lehnghal, hetia min rawn ṭawngkhum hi kan lawm bik hauh lo ania." a lo ti a. Pu Zorema chu a nui suk a, "Ka han sawi zo law law ange..." a tih lai chuan Pu Rintluanga chuan vin zet hian, "Nang khan engmah min hrilh angailo, engkim a tawp tawh. Ka fapa hi i duhlo a, i fanu nen an innei dawnlo. Enge sawi tur la awm? Engdang nge ila duh a? Khawngaihin chhuak rawh, kan ngen ache." a lo ti hrep a.

Pu Zorema chuan, "Amak pung pung e aw, Pu Rintluang. Ka fanu chu midang nena innei tur ang maiin tinge in ṭawng vak vak a? Enteh u...Deborah-i hian nei tura ka tih chauh a neih tur thu min tiam a, tichuan enge ka sawi in hre duh em?" a ti a.

*****

(AHMA A THIL THLENG CHU HEI HI A NI.)

Pu Zuala leh Thantea te pafa chuan Pu Zorema chu a thlem lungawi ta ngei aniang, Pu Zorema te inah chuan an ṭhukhawm a. Pu Zuala chuan, "Ṭhianpa Zorem, a lawmawm kher mai. Hei, ka fapa leh i fanu te chu a tawp atawpah chuan an innei thei dawn ta chu ania. Khawnge, Deborah-i pawh chu han ko la, i han sawi fel law law teh ang u." a ti a. Thantea pawh a intithei kher mai, a ṭhu nui ver ver mai. Tichuan a room aṭang chuan Deborah-i chu hlim loh hmel tak hian a rawn chhuak a, Thantea chuan ît hmel em em hian mittla lo chauh hian a lo en ngawih ngawih a.

Pu Zorema chuan Deborah-i chu a han melh a, "Bawihi, hei kan sawifel vek tawh ania. Enge i ngaihdan..nakinah min dem leh ange aw?" a han ti a. Zawi sap hian Deborah-i chuan, "Pa, i thu thu animai, engmah ka hnial love." a lo ti a. Pu Zorema chuan, "Aa...i duh leh duhloh te sawi vela, arrange-marriage hi keichuan ka duh velo ania. Chubakah Thantea nen hian in inneih hi ka duh vaklo hrim hrim a, makpa atana ka duh chi a nilo hrim hrim bawk." a ti ta mai a.

Deborah-i chuan mak a ti hle mai, a pa chu phawk hru hian a en a. Chutiang bawkin Thantea pawh chuan a thu hriat chu mak a tiin a lungawilo hle mai, "Pa Zorem, enge maw i sawi le?" a ti vak a. Pu Zorema chuan, "Thante, lo ngawi rawh. Ka fanu nen kan inbe mek a nih hi, chhungkaw thil a ni a, alo inrawlh suh." a ti ta hmak mai a. Deborah-i pawh chuan sawitur pawh a hrelo, mak ti tak chuan a ding ngawi reng a, Akimi te leh Pu Zuala te pawh chuan Pu Zorema thusawi chu mak an ti kher mai.

Pu Zorema bawk chuan, "Enteh Bawihi, ka makpa tur diktak chu Msa hi a ni. A hmangaih lutuk che, nanglo chu hmangaih dang a neilo. Engtin nge Msa nen hian in intawn chu ka hre lo a, mahse a thinlung zawng zawngin a hmangaih che tih hi ka hria a ni. Ihmaw, Akimi'n naute a neih zan khan, Damdawiin pawna in inkuah lai te, in infawp lai te kha maw, ka hmu vek alawm. Ka mi ngei em em leh i tan pawh a ka duh hlawl loh tur kha, nang chuan i hmangaih tlat a, i bialpa, i sawi fo ṭhin kha a lo ni reng tih ka hriat khan keipawh min ṭhawng takzet a. Atir kha chuan Alzheimer natna a neih avang khan ka lo hmusit vel a, a harsatna te kha ka hrethiam duhlo a. Mahse i u Akimi nunna a chhan a, tin ka tupa nunna pawh a chhan bawk a. Tichuan hmuh ngei ka duh thu ka sawi khan park ah chuan min lo nghak ngei a, min lo nghah reng lai pawh khan keichuan kil khat atangin a chetdan zawng zawng kha ka lo hmu vek a ni. Nu pakhatin a fanu lo veng lawk turin a ti a, a hreh hle tih pawh a hmel aṭang khan ka hmu thei a. A chhan pawh engkim a theihnghilh leh vek a hlauh vang a ni, tichuan kei min hmu ta a, min hlau a, chu naupang pawh chu a kalsan phah hial a. Chumi hnuah pawh chuan ala beidawng duh lova, a ṭhianpa Mapuia chu amah anga insawi turin park ah bawk chuan a rawn tir leh a. Engkim ka hre vek alawm, Bawihi, mahse hrelo anga ka awm char char nachhan chu he a dawtsawi zozai hmang hian engtia rei nge lem a chan theih a hriat duh vang a ni." a ti a.

Deborah-i chu ahlim kher mai, a nui var var a. Pu Zorema chuan sawi zawm zelin, "Kan hotel-a a rawn thawh ṭan tirh pawh khan a nui reng a, ṭhian a siam nghal zung zung a. Alzheimer natna a vei a, a haihawt em em a, chumai nilovin buaina lian tak a nei reng bawk a, chuti chung chuan anui reng thei te kha keichuan ka fak a, ka ngaisang a ni. I damloh thu a hriat khan anu damlo angin a sawi a, a hnathawh lai kalsan meuhvin a rawn pan nghal che a ni. Bawihi, anu a hmangaih ang chiahin Msa hian a hmangaih che a ni. A thuruk engkim kan hriatchhuah hnu khan Msa hi park ah te leh khawlaiah te pawh ka hmu fo a, thildangin a tihbuai hleka engkim theihnghilh nghal vek thin kha, a hlimlo a, a ṭhianten tih hlim an tum nasa a, mahse hlim hmel a pu mawlh lo. Achhan chu nangmah a ngaihtuah vang che ani a, a theihnghilh ve theilo che a ni. Deborah, Msa natna hi a damdawi chu nang chauh hian i nei a ni, chu chu i hmangaihna hi a ni. Kan chhungkua zawng zawng hian Msa hi kan ngaina vek a, keipawhin ka ngaina takzet a ni. Chuvang chuan thu min tiam tawh angin, ka mipa sawi apiang chu i pasal atan i pawm vek tur thu min tiam bawk a. Msa hi ka thlang e, nei ngei ang che." a ti a.

Deborah-i hlim lutuk chu a mittui a tla hial a, Thantea erawh thinrim takin a lo ṭhu tum bur mai. Pu Zorema chuan, "E..chuan maw, hmanni-a i damloh khan, i room ah a awmpui che tih ka hriat khan... Doctor pawh kha haw leh turin ka ti a, achhan chu Msa khan min hmuh chuan min hlau dawn si a, chuvang chuan keipawh Hotel lamah tihtur nei angin ka insawi a, ka chhuak leh ta zawk a nih kha. Bawihi, Msa tluka mipa ṭha hi chu i tawng leh tawh lovang, piang nawn leh mahla, i tawng leh tawh lovang. Alzheimer natna a neih avang hian i hlauthawng pawh a ni maithei e, mahse a ni chuan a theihnghilh che a hlau zawk a, chuvang chuan a hre reng zawk che a ni." a ti a.

Thantea ngaihdan a ni ta lo, "Min lo hrethiam teh Pa Zorem, i sawi ṭha khawp mai. Mahse i sawi hnem ta mah mah e, i ropui e, scientist ilo nilo hi amak zawk ngawt mai. I fanu chu bumhmang hnenah i pe anga maw? Nihleh han inneih tir ta mawlh che, i fanu nunna chu i tichhe vek angah ngai rawh. I fanu hi kha mihringpa haihawt lutuk avang khan boral tase, mawh i phur ngam dawn em ni?" a ti a.

Pu Zorema chu a nui suk a, "Anih chuan innei ula, ka fanu nen hian innei mawh rawh u. Mahse hei hi lo hre rawh, ka fapa neihchhun a boral tawh a, mahse Pathianin fapa thar min pe tih hria ang che. A hming chu Malsawmsanga a ni a, ka koh duat nan HAIHAWTLIANA ka ti ṭhin. Chuan ka fapa Msa hi ala dam a, ka fanu hi ahmangaih a, i ngam anih phawt chuan ka fanu chu han neih tum ta che, ka makpa Msa hian ka fanu zungbun i buntir hma ngei hian i ban ruh hi a vuak tliah sak ang che ti hre rawh." a han ti ta khur khur mai a, Deborah-i chu a lo nui sak mai.

Thantea chuan a pistol a phawrh thut a, Deborah-i chu a manbet a, "Che suh u, ka kap hreh miah lo che u a nia." a ti ta khur khur mai. Pu Zuala chuan, "Bawiha, engthil nge maw i tih le?" mangang tak chuan a lo ti a. Thantea chuan Pu Zorema chu a pistol chuan a tin a, "A ṭha e, min ti zak khawp mai. Hetiang em em hian ka la tlawm ngailo, i thil tih man chu i hmu khawp ang. I phal a ni lawmni? I fanu chu ka neih i phal a ni lawmni? Chuan...kha mihring, Haihawtliana khan ka ban ruh hi avaw tliak anga maw? Hahaha...kan hria ang chu." a ti ta khur khur mai a.

Pu Zorema chuan a hlau lo kher mai, a nui ta huah huah mai a. Chiang tak hian Thantea mitah chuan a han en ran a, "Atha e, i kidnap duh em ni? Hruai rawh, hruai rawh. Ka report lovang che, mahse Msa hnena ka sawi a nih vaih chuan i châk lo khawp ang. Thante, alo kal ang, a lo kal khawp ang. Ka fanu hi i thei anih chuan inneihna chu buatsaih la, a senso pawh ka tum vek ang. **** field ah, open-air ngeiin innei ang che u, ka chhungte pawh ka lo hruai anga, i chhungte pawh an lo awm ngei tur a ni. Mahse tun chiah ka hrilh leh ang che, Msa alo kal ve dawn, fimkhur ang che." a ti a.

Thantea chuan hmusit hmel tak hian Pu Zorema chu anuih a, "Awle, inlo kal vek dawnnia." a ti a, Deborah-i chuan ṭap chung chuan, "Pa, nilo..ka duhlo." a lo ti a. Pu Zorema chuan, "Lungngai suh Bawihi, i pasal diktak chu a lo kal dawn alawm." a ti a, Thantea chuan Deborah-i chu a chhuah pui a, tichuan Pu Zuala pawh chuan a zui ve nghal a.

***********

Msa chuan Pu Zorema chu a en a, "Sir, ka pa meuh pawh hian min hriatthiam ang hian min hrethiam ve lo asin. Ka lawm e, ka lawm takzet." a ti a. Pu Zorema chuan, "Sir min ti tawh suh, i puzawn ka nih hi Bawiha...i thuruk ilo zep ve ṭang ṭang te kha, a lo sawichhuah sak vek che a. I ngei ve lawm ni? Va hnek rawh, va beng hrep rawh. Ms, ka fanu chu va chhanchhuak rawh le." a ti a.

Chutah lee, Msa chu changtupa tak mai chuan rum zet hian a han meng sen ta rûm mai le. Pawn lampang pan chuan, "Ka lo kal e, James Bond ka lo kal e." ti tur ni awm tak hian a han âng zuau a, mahse engmah chu a sawi leh ta chuang lo a. Thantea leh Deborah-i te inneihna tur field ah chuan Thantea ṭhiante, police panga vel chu an awm a, civil dress vekin an inthuam a, an bulah chuan vaipa mix zuar a lo awm ve bawk. Msa bike-a a rawn tlan phei an hmuh chuan Police pakhat chuan Thantea chu a phone a, "Sir, Haihawtliana chu a lo thleng e." a ti a.

Thantea leh Deborah-i erawh hmun dangah an lo awm daih a, Thantea chuan a phakar chhuah in field-ah chuan Msa lo sawisa turin a police thawhpuite a lo ruai hi a lo ni a. Ani erawh hmun dangah Deborah-i a lo kalpui daih chu niin, "Awle, lo vaw hrep rawh u, mahse that em lo ula. Case kan saimchawp anga, kan man hmak dawnnia." tiin a nui huah huah a. Thantea chuan Deborah-i chu an huanah a hruai a, an huanah ngei chuan amah ngeiin nupui atana neih a, an thlama nupa nun hmanpui nghal a tum bawk a. Deborah-i chu ṭha tak leh a thu ang zela a awm theih nan pistol-in a tin reng a, a vau reng bawk.

Msa chu a rawn thleng ta, bike aṭang chuan a rawn chhuk a. Ava han pa rem rem tak em, a sunglass vuah lai chu a han phelh a, a han vawm bo daih bawk a. A rawn kalphei te reng reng chu slow motion ngat lehnghal mawle, rum mangkheng hian chung police hote chu a rawn melh a. A kalna chin te chu khua a dur khup khup mai te hian a lang a, a kawrban a rawn hlim chho malh malh bawk a. Police te pawh chu an lo inring hlawm kher mai, an kutte chu an lo elh ri tuar tuar hlawm a, Msa lah din mai a tum lo, zâm hauh lo hian a rawn kal phei zel a.

Police ho hmaah chuan ava ding a, rum zet hian police zinga a palian ber chu a han melh ran a, "Khawimaw...cheng 10 man aw...mawm deuhin tilo la, hmarcha kha telh hnem deuh ang che." a ti ta daih mai a. Police ho pawh chuan mak an ti kher mai, an in en hu mai a. Chupa chuan, "Ehee..vai amaw min ti em ni? Vaipa mix zuar amaw min ti a nimaw?" a ti khur khur a. Msa chuan, "E..i ni nange, anih chuan tinge a bulah ilo din a? Vai i ang ve ropui sia, sorry.." tih pah chuan an hnunga vaipa mix zuar bulah chuan, "Khawimaw..cheng 10 man han siam teh." a ti a.

Police ho chu an inmelh a, an nui tut tut mai. Msa chuan, "Vaipa mix ka eichak na hi a rei tawh lutuk, kan vengah a awm ve ngai silova." a ti nuah nuah a. Police te ho pawh chuan Msa chu han sawisak tlakah pawh an ngailo, vaipa mix te chu an eiho ta vel mai mai a. An zinga pakhat chu a kal hrang a, Thantea a phone a, "Sir, Msa i tih hi anuihzatthlak lutuk. Inla pa tawkin a rawn kalphei a, min rawn sawisa hrep dawn emaw kan tia, hei vaipa mix kan eiho mai mai anih hi." tiin a nui huah huah mai a.

Thantea chuan nui chungin, "Haha, ka rin ang vel a ni. Haihawtliana a ni miau alawm, tikhan mix kha ei ho ula, keinin hetah nuam kanlo chen ange." a ti a. Deborah-i chu a han en a, "I lo hria maw? I bialpa ve chuan a theihnghilh leh tawh che a nih chu, a ve lutuk chuan....kan innei anga, kan fapa hmingah Msa kan ti dawnnia." a han ti vel a. A sana chu a en a, "Umm...dar 12:20 a ri ta, dar khatah hian kan innei ang. Mo neitu ka ni nghal anga, Pastor pawh ka ni nghal dawn bawk a...haha. Mahse inneihna pangangai ang takin dar 1 ah tak tak hian nang hi ka nei dawn che..chuan i luhlul vaih chuan ka that hreh miahlo che ania. Ka thah zawhah che i ruang hi ka duhtawkin ka mutpui anga, tichuan luiah ka paih ang che." a ti khur khur a, Deborah-i chuan a hlau ngang mai.

Dar 1 rik hun nghah pah chuan Thantea chuan zu a han in vel a, Deborah-i chu a be reng a. Deoborah-i erawh a ṭap zawih zawih reng mai. Dar 1 a ri ta a, Thantea chu a ding hluai a. Lo kal rawh le, thlam lam i pan ang hmiang. Tiin Deborah-i chu a han kai a, chuveleh silai a puak dur mai. Silai lo rikna lam chu an va en a, Msa leh Police pakhat leh constable pahnih te hi an lo ni a. An hnungah chuan Pu Zorema te, Akimi te leh Msa nu leh pate pawh an lo awm ve bawk a.

Pu Zorema chuan Police Officer bulah chuan, "Ka pu, sawpa saw ania ka fanu kidnap tu chu." a ti a. Thantea'n Officer a hmu chu a phu chiang kher mai, "Sir..Sir.." a ti vak vak ringawt mai a. Officer chuan Thantea chu ava rek a, a beng thal tawp mai. Msa chuan nui chung hian, "Awww...Mathante, Thanbawihte...Inspector ah i kaisang ṭep tawh asin mawle. Ka nupui tur ilo kidnap kher hi chu apawi mange aw..i hna aṭangin ban i ni anga, tichuan khang i police rawih, min sawisa tura i tihte pawh kha nangmah vangin an hna an chân phah dawn ta nih hi." a han ti vel a.

Thantea chuan a hrethiamlo kher mai, "Eng..enge awmzia?" a ti hu mai a. Pu Zuala, Thantea pa chu a lo kal a. Thantea chuan mak ti tak hian, "Ka pa...nangmaw?" a ti hu mai a. Pu Zuala chuan, "Min hrethiam rawh Bawiha, mahse i thil tih hi thil dik anilo. Chuvang chuan hetiang thil tenawm tak i tih hi ka phallo a ni." a ti a. Police Officer chuan Thantea bulah chuan, "Man i ni e..." a ti a. Msa chuan Officer bulah chuan, "Lawk aw Sir.." tih pah chuan engemawni hi a beng bulah chuan a hrilh ru su su a. Officer pawh chu anui huk ringawt.

Tichuan Officer chuan, "Awle...kal vek ru le, he misual Thantea hi chu kan lo buaipui tawh ange." a ti a, tichuan Pu Zorema chuan Deborah-i chu hruaiin midang zawng te nen chuan an kal ta a. Msa leh Police te leh Thantea te erawh anla awm thung. Msa chuan Thantea chu a han melhrum te te phawt a, "Ka puzawn khan i ban ruh ka vuak tliah tur thu a hrilh che a, mahse chutiang em chu ka ti lo mai ang. Mahse vawikhat han piai hlak erawh chu i ngai ani, mai mai che hian." tih pah chuan a han chhuih thal tawp a.

Tichuan Officer chuan Thantea chu handcuff a bun tir a, Msa lah zawhna ngah tih takah Officer bulah chuan, "Sir, i phal pawh ka ringlo a. Tinge vawikhat tal ka khawih ve duh ka tih khan i phal reng reng a, ka dil vel mai mai che a nih kha.." ahan tih chuan chu Police Officer hmelṭha tak chu a nui sak a. Msa chu a han en a, "Min hrethiam lo ang, keichu Police dang ang ka ni velo. Police Officer ah pawh nupui atana vainu ngat nei kha ka ni miau a.." tih pah chuan a nui sak a, engtak chu awmzia nimaw? Chu Police pawh chu! Thantea chu man a ni ta.

******

(KAR 2 HNUAH CHUAN)

Pu Zorema te chhungkua chuan chaw an ei mek a, Deborah-i bulah chuan Pu Zorema chuan, "Bawihi, Msa hi ala tho lo em ni?" a ti a. Deborah-i chuan, "Tho nang mawle....thawh a hai reng mai." tih pah chuan anui var var a. Akimi chuan, "Makpa chhungkhung ah chuan Msa hi a ṭha ber mai, inneih tûk atangin thawh a han hai nghal ania." tiin a lo nui ve bawk a.

Msa pawh Hotelah chuan a thawh chhunzawm zel a, chutiang bawkin Mapuia pawh a thawh chhunzawm ve zel bawk a. Chumi zan chu Msa a buai ngang mai, Pu Zorema chuan, "Kan hawnrual dawnnia." a tih avang chuan a nghak reng a. Msa buai em em nachhan chu a phone a tibo pek alawm le, Pu Zorema chuan a zawnpui char char a, dar 11 a ri tep tawh. Hetih hun lai hi Covid-19 vanga Lock-Down an neih ṭan tirh vel dawn lai tak kha a ni a, Pu Zorema te Hotel pawh khar a ngai dawn a, an inhawn ni hnuhnung ber ani.

Mikhual tumah an nei tawh lo a, hotel chu khar hmak a ni dawn tihna ani. Pu Zorema chuan, "Ms, tikhan lo zawng la, ka'n inthiar lawk ange." a ti a, tichuan Msa chuan a zawng leh ta char char a. Atawp atawpah chuan a hmu ta hlauh mai, tichuan phone chu a ak ṭha sauh sauh a. Tala leh chahbi a la a, Hotel chu a kalh ta hmiah mai a, a haw nghal vang vang mai. In a thleng chiah chu Deborah-i chuan, "Duhtak, ilo haw ta maw? Khawnge ka pa?" a han tih chuan Msa chuan, "Awww...inchhungah a awm lo em ni?" a lo ti hu mai. Deborah-i chuan, "Awm nang, inlo haw rual tur thu a sawi a, enge awmzia?" a han tih chuan Msa chuan a hrechhuak zawk mai.

"HUIHAM...ALZHEIMER ZAWNG HMELCHHE PA!"

THE END

☺☺☺☺☺☺☺☺☺☺☺☺