NATHAN (Episode-1)

NATHAN
(Episode-1)
(A Violent Love Story)

Zing dar 6 a ri a, ka alarm chuan min kaitho chiang ngei mai. Huiham...vawiin hi boss thar, kei aia arsi bel hnem ka neih ni a ni tak e, ka van kham tawh tak em, Ofiicer ni ve si a, police thu lo chi hi chu. Men pawh meng tha hleithei lo chuan bathroom lam ka pan a, ka hmai ka phih a, ha te ka nawt a, ka inti fai a, ka inbual a, chaw ka ei a, ka coat suit duh ber ka ha a, fresh vervawrin ka chhuak a, YES BOSS tia zah taka ka chhan tur chu hmelhriat turin ka chhuak ta a. Ka Boss thar chu ka han hmu ta a, a ngo veng a, a fin vak loh hmel. Anih na takah chuan tuai a ang mah zawk, kei ai chuan tha lamah chuan min hneh ka ringlo, insual a thiamloh hmel em em bawk a, a hmantlak ka ring hlawl lo. Ala naupan hmel em em a, vai film a en hrat hmel ropui lehnghal, tleirawl awmtha duhlo a ang mah zawk. Mahse mite hi an landan ang ngawt an nilo tih chu kan hriat vek kha, mahse thawhpui chu ka phur teh chiam lo, ka boss ala ni dawn zui. Nui sang hian ka lam chu a rawn hawi a, “Hi DSP Nathan ka nia, Nathan Malsawmkima.” tiin min rawn chibai a, keichuan chibai pahin, “Hi Sir, ka hmu che chu ka lawm hle mai, Inspector Lalrinawma ka ni e.” tiin ka chhanglet a. Hemi ni hian case chingfel tur pakhat kan kutah a awm a, tualthahna lampang a ni. Nathana nen chuan kan va thleng a, police te chuan thil awmzia minlo hrilh a, Pi Duhi leh Pu Thuama te fanu Vanlalveni kum 22 ni a ansawi chu chhuatlai ah a ruang alo let reng mai a. A bulah chuan a bialpa ni a ansawi chu a lo tap nasa khawp mai a, alu a na taka chhut na hnuhma a awm a, a hnungzangah chemte a bur vu bawk a, thisen chu chhuatlaiah a tling nuai mai bawk a, a rapthlak takzet a ni. A bialpa nen chuan innei mai tawh tur an la ni zui a, abialpa hming chu Zorina a ni a, atan chuan a van a dawn em, mahni chunga thleng tur a tan chuan kan inchan phal teuhlo mai. Atap nasa lutuk chu a thaw tha theilo hial a, police te chuan pawnah an kuah chhuak a, keichuan ka lo en reng a, “Hmmh...constable ho tangkaina nei tlem ho lah hi a,” ka lo ti rilru a, ka phun peih ve hrim hrim pawh a ni mahna. Nathana chuan chiang deuh hian ruang chu a zuh bih hnai a, an thlek kual vel a, inlak finhmel ka lo tie m em a, ka ngei deuh tlat nia mawle he mihring pa hi. A rawn ding chhuak a, ka beng bulah hian min rawn hrilh ru a...

“Rina, he nu hi engtik hun vela thi nge anih?”

“Sir, tukin zing dar 5 vel khan a ni.”

A khabe dawm vang vang pah chuan, “Chaw a e i ring em?” a ti a daih mai a.

“Ka hre bik nang...”

Nuih seih pahin, “Aaaa...englo nia, zing dar 5 ah daih a thi sia, chaw eina hman awm awm siloa, riltam kawruah lain a thi a, puar pengpawnga thih tal tur nia, ka’n khawngaih deuh mawle..”

Police Inspector lai ni ve si, engthu nge a sawi kha? A va han sawi ho em em ve le? Tiang kha chuan a thawhpui tlak loving. A fiamthu ral mai mai dawn, nge ni a min ngainep zawk, ve khanglang chuan vawikhat hnek pawh dawl lo tur si hi. A nui vur vur a, mak titakin ka en vung vung a, “Thu zawh fiah turin an chhungkua zawng zawng leh a bialpa te a thian hnaivai te rawn ko ang che aw.” min ti a, a thu ka awih mai loh chuan, a hnungzuitu ve mai chauh ka ni sia. An chhungkua zawng zawngte leh a thiante leh a bialpa te chu thu zawhfiah turin kan ko ta a. Ahmasa ber chuan a nu chu Nathana chuan thil a zawt hmasa ber a, a bulah chuan kei ka lo ding a, note bu te ah ka lo ziak thla zel a, Nathana chuan zawhna chu a zawt tan ta a.

“Ka pi, tualthahna thlen lai hian khawnge i awm?”

“Nizan atang khan ka pasal nen hian inah kan awmlo hrim hrim, kan fate pahnih Veni leh a nau Hminga hi inah an awm a.”

“Anih leh ka pi, i fate pahnih inah hnutchhiahin khawnge in kal a?”

“An mahni tawkah puitling an ni ve tawh a, ka pa nau nupui pu a boral a, kan venga mi tho ania, chumi chu ruang tlaivar pui turin kan pa nen hian kan kal a, kan chhungkuaa kal chu kan duh viau naa, an unauin in kanlo nghak ang an ti tlat sia, kan kalsan ta ani.”

Nathana chuan a lu a bu nghauh nghauh a, “Anih chu, in in chu in kalh em? Nge chahbi in pe zawk?”

“Pe love, chu tak chu kan hrethiam lo, chhunglam atangin an unau khan kan kalhnan tawp a, zan dar 8 velah mithi in kan pan a, an mahni in min kalh hnan mai ru an tia, kan kalh hnan a, tumah an lut thei awm silova, a nau Hminga tih ah an ring vek a, mahse ka hrechiang a ni, ka fapa hian tiang thil hi a ti loving tih ni...” a tap nasa kher mai.

“Awle ka pi, vawiin atan chuan tawk rawh se. I kal thei e.”

Adawtah chuan Veni pa Pu Thuamkunga chu kan ko leh a, ka boss chuan a be leh a..

“Ka pu, ahun lo hle ang tih pawh ka hria a, mahse i fanu rawng taka thattu hi kan chhuichhuah ngei angai si a, pawi ka ti khawp mai, zawhna tlem ka zawh che angai dawn ania. Awle ka pu, ngaihloh lamah lo ngai lola, i fapa Hminga hian a u Veni hi han ngei emaw, huatna anei em?”

“Chutiang engmah ka hrelo, ka fapa hi...zep lovah chuan kan khawtlang tana mi hnawksak a ni a, zurui leh insual hrat tak mai a ni a, drugs addict ani bawka, mahse a u a thah duh em hi chu ka ring lo. Achang chuan a thil tihsual te hi a u hian a thup pui thin zawk a sin. Chuti khawp chuan unau intan leh inhmangaih an ni asin”

Pu thuama thusawi ka ngaithla zo chu, keichuan Venin au Hminga thiltih anih ka ring a. Thilsual tak tiin Veni hian anu leh pate bula sawichhuah a tum anga, chumi chu hlauvin a u hi a that ta mai ah ka lo ngai hmaih mai a.

“Anih leh ka pu, i fanu hi tunhma ah emaw, tunlai hian...ihh, minlo hrethiam la, a nungchang enge, a khawlo nge, mi fel tak a ni zawk?”

“Ka fanu hi KTP ah pawh Committee membe niin, inkhawm te a thulh ngailo, Pathian tih mi tak niin, a nu leh pate hi min chawimawi theihle a. Mahse kan buaina ber zawk chu anau hi a tan tlat zel a, engkim a thuppui thin hi a ni. Kei lah ka kut alo rang ve bawk nen, ka fapa Hminga hi a ruih deuh chuan ka lo khawih leh hrep zel bawka...”

Nathana chuan sarang chhunga chemte chu a phawrh chhuak a, “Anih leh ka pu, he chemte hi Veni hnungah khan vihluh ani a, han en vang vang chin teh, i hmu tawh ngai em, nge in chemte a ni em?”

Pu Thuama chuan chemte chu a en vung vung a, “Ka la hmu ngailo, kan ta ani lo aniang, chawhmeh channa chem hnim samna chem chiah kan nei a, chung kan neih ho pawh chu ka hrechiang lutuk, pathum lai chu miin min hawh bosak tawh nghe nghe, abak kan neilo.”

“Awle a tha e, i kal thei ang. I fapa chu thu tlem ka zawh ve angai a, lungngai suh, i fapa tih anih kan ring bik miah lo ania.”
An fapa, ka rinhleh ber drug addict lehnghal, Hminga chu kan ko ve ta a, keichuan Hminga bak hi a nih ka’n ringlo khawpa. Room chhunga arawn lut chu, a la ngeng em em lehnghal. Thei patawpa han sawisak ka van chak tak, mi rawn melhrum ve khanglang lehnghal.

“Awle Hminga, thu tlemte chauh kan zawt dawn che a, kan rinhlelh vang che ani lo ania, lo dawh hram hram ang che aw?”

Vin deuh hian, “Ka hria, keimah chauh rinhlelh tur ka awm, induh leh min man ula, sawi mawi vel pawh angai lo. Mahse ka u hi ka hmangaih a, engtikah mah ka that loving, chu chu hre rawh u, inla fing ho.” tiin a au nghal vak vak mai a, ka che hrut hman a mahse Nathana chuan min rawn mitmei nghal vat a, min khap lo se chuan ka beng thal nghal thuai ang mawle.

Nathana chuan zaidam tak hian, “I tih ani kan tihloh kha, tumah kan ringhlel lo, i pa te i nu te pawh kan ko vek alawm. I u rawng taka that tu hi kan zawnchhuah hunahchuan maw, i duhtawkin i sawisa dawn nia, zawhna tlemte chauh kan zawt ang che.”

A tap deuh fep fep a, “Umm...mi..min zawt ta ch..che..” a ti bah deuh nuai mai a.

Nathana chu a thungil a, a thaw huai a, “Awleee...Hminga, kum engzah nge i nih le?”

“Kum 20, ka u Veni kumzat min zawh tho ka ring, kum 22 ania..a chiang em?” a ti nghal ringawt a, ka kut a za tawh hle mai, engmah pawh ka ziak tha hlei theilo,naupang nghal ve tak chu anih dawn hi.

“Akhai, i fing hle mai, zawh che ka lo tum chiah che a, mahse min hrilh lawk nghal a, ka van lawm tak em, kawm i nuam bik dawn hle mai a.”

Intihtheih hmel deuhin a la nui suk lehnghal, a hawi chapo nghal em em ringawt a, ka boss chu awmlo se i van na tawh dawn tak em, Hmelpawng leh...hmelchhe phian lehnghal. Nathana bawk chuan, “Anih leh dawt sawi miahlovin min chhang rawh aw... I u hian hmelma emaw, mi huat emaw, amah ngeitu anei em? I hriatpui em?” a ti a.

“Ka u chuan hmelma aneih awm ang chu ka hre miah loa, mahse keimah hian hmelma lian tak, hnek chak deuh mai ka nei a..”

“Eheu, tunge ni a?”

“A bialpa kha mawle, ka u nen hian kan inkawmngeih em em a, mahse a bialpa alo len tawh hi chuan biak pawh biak theih ani lo, min ngaihsak lo vek zel a, hman zan an titi ka ngaithla phei chu ka u bulah ‘I nau hi chu ka la beng ang, min melh ve khanglang ze.’ Min ti ve khanglang lehnghal, sawi pawh ka sawi peihlo, ka beng chak ania.” A ti bian bian mai a, inla pawr ve khawp mai, ka vawikhat ben a thal der tur si hi, kan bulah inla pa ve ngam ania, ka boss ve lah hi dawih zezaw si, a tlawn zawk amaw tih mai tur, a be tha em em lehnghal.

“Anih tak chu, nihleh maw Hminga, nangmah nen chiah in riak dun a, thawm engmah i hre lo mi a, i u au thawm tal paw hi hrelo mi?”

“Ihhh...englo..ka pu, damdawi ka rui a, ka chatthla a, engmah ka hrelo, zing dar 6 rikhma vel khan ka mumang rapthlak lutuk vangin ka harh hlawl a, chuan ka room lehlam chiah ah hian ka u room a awm bawk a, chuan ka zungtur ka room atanga ka chhuak chu ka u chu chhuata thisen nen a inchiahpiah nuai a lo let reng chu ka hmu a, ka hlau lutuk chu ka au chelchul a, chuvang zawk chuan ania, thenawm khawveng te pawh an rawn kalkhawm vek.”

Ka lo ngaithla uluk khawp mai a, ka va han awihlo ber kher mai em, “Chutiang ani thei dawn mi...” ka lo ti dek dek a, Nathana chuan min lo tawng khalh vat a, “Rinawm, i lo ziak zel em, lo ziak zel rawh aw.” tih pah chuan min siai zeuh a. Hrep tak chuan, enge maw a hriat le, ka tawng ve pawh phallo, min khap ziah le? Hminga chuan min rawn melhrum lehpek hle mai, ka va han beng dawn chiang em, engtik niah emaw chuan. Nathana bawk chuan a aw a thian kharh kharh a,”in in kawngkhar leh tukverh kha a inkalh vek tiraw, pawn lam atanga hawnruk theih emaw, mihring luhna leng kua a awm lo tiraw?”

“Um ka pu a awm lo, a inkalh vek, ka pu min ring rawh, ka tih a ni lo, Pathian hmingin, ka tih ani lo.”

“Nihleh, i u bialpa thil tih hi a ni thei angem? A ngei che sia, i u nena in inkawm reng hi a ning lutuk anga, a thik che anga a that te ani mai lomaw?”

“Aih nilo, Uzorina hi chu ngei viau mah ila, ka u hi a hmangaih takzet a, a thlahlel em em a, a tih anih chu ka ring phallo. Chubakah nizan khan U Zorina chu ka nu leh pate pawn kan chhungte mitthi tlaivar naah pawh a tlaivar ve ani tia, an hmu alawm.”

“Awle, a tha e, mahse thuchiang kan hriat hma chu inchhungkua hian khawiah mah lo zinbo emaw, lo awmhla lo turin ka duh che u ania aw, i kal thei e.”

A kal hnu chuan Nathana chuan tui no khat a thli a, a in khawlh khawlh a. “Rina, he tualthahna nen hian in inzawm deuh tlatin ka hria...” a ti ringawt a, kei chuan hriatthiam loh hmel tak chuan, “Enga? Sir, ka tel ve lo, tinge chutiang i sawi a?” ka ti hu a, ani chuan min en vung vung a, ka hlauthawng hman hle , second 10 vel ka mitah rum taka min en hnu chuan a nui chhuak huk a, “Haha, englo mawle, i hming hi, Rinawma ania, Veni bialpa hi Zorina ania, Rina v eve in nia..haha, ka fiamthu nih kha.” a la nui huah huah zui. A ngaihna awm dawnlo hle mai a, a chhuitu tur ber hi a uang reng a, min fiam reng ringawt mai, ka va han hnek chak thin tak. Boss chu ka en vung vung a, “Sir, keichu Hminga kha ka ringhlel bur mai, a u bialpa a thik vang ani chiang mai.” ka ti a, Nathana chuan min en a, “Rina, i ngaihdan chu a dik chiah alawm, mahse thil kan tih tut tut chuan kan kalsual ahlauhawm alawm, mi zawng zawng rinhlelh a nia, drug addict alo ni bawk nen, chuan ka hriatdan phei chuan a nu leh pa pawh kut a thlak hreh lo an tia, hmankumah phei chuan a pa saw silaiin a kap tawh an ti bawk asin, a la naupan nen..hmh, apa ve riap riap khawp mai, tiraw?” a ti a, chuveleh keichuan, “Ehe, anih te chuan amah anih chian chu, hlap hrep ila dawp char char ila, a inpuang mai ang, chutluka chiang a awm tawh hleinem..” ka lo ti vat a. “Nia, mahse chutia kan rik nghal tut tut te chuan, lo nilo palh ta se, lo hlap hrep ta ila, kan lakah case a file ve thei tho alawm, chubakah biak that deuh chi anih kha.” a ti a, keichuan, “Amak kalo ti lutuk a, khatiang khawp khan min zahlo a, min chhang pawng pawng a, a la pawr ve khanglang zui, minlo khaplo la chuan a ha hmai kha ka hnek bal chiang ngawt ang, drug addict mai mai lehnghal...” ka lo ti pung pung a. Nathana chuan ni huah huah pah chuan, “Rin bawihte, insum teh. Mi ang vaklo anih kha, a chian em kha.” a ti a, keichuan mak ti takin, “Enge a mi anlohna?” ka lo ti vat a. Nathana chuan ka mit a chiang taka min en pah chuan, “Mi ang lo tih ah..hei tlema 99 an tih ang deuh chi hi ani tih ka chiang mai, ka fak deuh a, intihtheih hmel takin a nuih vur vur kha. Kum 20 lai ni ve tawh si, tiang boruak ah pawh vawikhat naupang treat takin ka fak chhin a, a hawikual a, tifuh inti takin a nuih ve kha, mahse pawikhawihtu a ni thei tho mai.” a ti leh a. A ni dawn tak e, nia mi ang vaklo chu aniang, rin aiin a fin ve zek hi mawle ka boss chu, “Sir, a rilru chu a chhe ve khawp mai tiraw? Keini pawh min zahlo ania, a unaunu pawh that duh tu chu..” ka ti dek dek a, Nathana chuan rang zetin, “Khai aww...mai mai thin a, a rilru chu a chhiat bik loh kha, khatiang tawh ah, amah an ringhlel vek a, an pahnih chiahin an awm a, tukverh leh pawn a inkalh vek a, luhruk na tur a awmloh thu pawh amah ngeiin a sawi a, khati khawpa an ringhlel chung pawhin. Amah lo chu puh tur dang an awm loh laia, khawi atang maha misual tan luhrukna tur a awmlo tih min hrilh ngam te kha, dawt a la sawi duh miah lo te kha mak i ti velo mi? A thah a nilo chu ka ti ngam biklo a, mahse a thah chu nit a se, dawt phuah chawpin a himna turin min bum zawk awm tak ania, mahse a ti miah lo. Ilo hria em? A mi huat em em a asawi Veni bialpa pawh kha tualthattu ah a puh duh miah loh kha, a chhan chu a bialpa hian a u hi ngei hle mahse a hmangaih tih a hre ve tlat a, a ring phal bik hlei nem. A rilru chu a chhelo a nilawm ni?” a ti a, ka ngawi vung vung a, “Nia a nit ho mai, ka hrethiam tawh biklo.” ka ti ringawt a. Mahse keichuan a inla fel a, kan rintheih nana dawt sawiah ka la ngai talh mai a, achhan chu amah lo chu thattu tur dang tumah an awm hleinem. Kawngka inkar chhia emaw, tukverh keh pakhat mah a awm lo a, thenawm khawveng te pawn thawm bengchheng an hre lo bawk nen, tiangkhawpa chiang tawh te chu tinge maw boss hian a tan tlat mai le, Nathana hi a inhnamhnawih ve zawk amawni le? Aaa..min ti buai. Chutia ka inngaihtuah vung vung lai chuan Nathana chuan, “Rina, Veni bialpa Zorina, Rina vet ho kha va ko teh, thu zawh ve angai ang.” a rawn ti a, Rina vetho tih kha cu van tul kher lo tak, mahse YES BOSS tia zawm mailoh chuan, ka va ko ta a. Boss Nathana chuan zawhna a zawt ta a...

“Awle, Zorin, ahun lo hle mai tiraw? Mitthi awm lai lain, mitthi dang kan neih belh leh a, chupawh i hmangaih ber mai ala ni bawk sia, a pawi kan ti khawp mai, mahse engemaw zawh che angai tlat mai, khawngaih takin thudik tkin min chhang ang che aw...nizan khan khawnge i awm?”

A tah nasat em avang chuan amit a bui vek a, inhnit hlawp hlawp pah chuan, “Ka pu, Veni te chhung, Pa Roa thih zan ania, ka tlai var a, ka chauh em avangin zing dar 4 velah ka haw a, darker khat pawh ka muhil hman lo ang, a thih thu in rawn hrilh a....” a ti a, a sawi hlei theilo a tap zel mai a.

“Zorin, inti pachang hram teh, i hmangaih ber thattu hi kan chhuihchhuah angai a nia. Enteh kei hian ka pui dawn che a, ka hming chu Nathan Malsawmkima ka ni a, Police Officer ka ni a, Deputy Superentendent of Police (DSP) ka ni a, chuan ka thianpa hi Inspector Rinawma ani a, lungngai reng reng suh.”

Ava han tullo tak, kan rank sawi khwr a tullo e, amah aia ka nihna ahniam zawk vang mai a, min hmusit nge a intithei zawk, miin an bialnu an chan a, rilru nat nak alaia, alo la intithei kual zui, hahthlak mang e awww....Nathana chuan a zawt zel a.

“Inhauhna emaw, tunlai hian rilru natna, i chungah emaw, a thiante chungah emaw a nei em?”

“Ka hre lo ka pu, kan hlimdun lai ania, ka phone pawh hi check rawh u, nimin khan nilengin kan inbe lo a, ka va text nawn tlut tlut a, whatsapp ah pawh a online lo. A phone a chhia amaw ka ti hman hial alawm, ka pu, ka message hnuhnung ber pawh, ‘Muttui aw, ka text i hmuh chuan khawngaihin min lo chhang ang che, ka ngai lutuk che.’ tih ania, kha i duh chuan check vek rawh.” tih pah chuan a phone chu a pe a, Nathana chuan a en vung vung a, a check vel mek a niang e, “I phone hi siam tir rawh, touch a har emai..” ala rawn tizui, hrilhhai hmel takin Zorina chuan, “Awle...” a ti a, “Awle Zorin, thuchiang kan hriat hma chu, kan sawi hunah lo chuan he khua hi chhuahsan lo ula, engtik lai pawhin thu zawhfiah theih turin lo awm ang che u, kal tawh rawh le.” a ti a, a kal ta a. A chetdan chu amak ka tihle mai, kan chhuichhuak thei em ang chu maw.

Veni phone kan check pawh khan chutia han chhuichhuahna em em tur pawh a awm bik chuanglo, a lukham hnuaiah a awm a, a message zawng zawng a in delete vek bawk si. A whatsapp, sms, fb inbox phei chu engmah check tlak a awmlo. Hike leh Viber, Wechat, Line leh apps dang awm ang engmah a khawih bawk silo a, whatsapp leh sms chu check theih awmchhun a ni a, han check tur engmah a awm bawk si lo. Zorina phone pawh chute bawk, mahse a delete vet ho pawh a ni thei tho mai. Hminga phone pawh message rinhlelh awm hmuh tur awm bawk silo, chhuichhuah a har hle mai, kan pu ber Nathana lah fiamthu hlirin a pawt reng bawk si. Chumi ni chu a ral ta der mai, atuk zingah chuan Nathana chuan min ko a, Zorina te ina kal turin min hrilh a, kan kal ta a, enge a tih dawn engmah lah chu min hrilh chuang hlei lo a. An in chu kan thleng a, a room ah chuan kan lut a, mipa room tih takah a hnawk ve hle mai, achhungte tumah an awmlo a, Veni te in lamah an phei vek thu a sawi a. Zawhna chu Nathana chuan Zorina chu a zawt tan leh ta a.

“Zorin, kan lo kalna chhan chu..ihh Veni hian best friend emaw han kawmngeih deuh bik a nei em?”

“Aw nei e ka pu, a hming chu Angaihi a nia, kei ngei nen pawh kan inkawmngeih khawp mai. Veni min hrilh thin dan chuan an thuruk zawng zawngte pawh an inhrilh dun vek thin a ni. An rilru hah changing an inhnem tawn a, an in hmangaih em em a ni tih chu ka hria.” (A sawi pah chuan a inhnit faih faih a.)

“Anih tak chu, mahse a thih ni khan alo kal ve em?”

“Umm kal e, a thiante ho an lo kal khawm a, police ho khan a ruang kha hmuhtir ve in phal siloa, pawnah an awm a, mahse a hmu hman tho a, a thidang an tia, damdawiinah an kalpui an ti bawk a, keichuan ka hmu velo a, mahse ka nu leh pate sawidan ania.”

“Anih chuan a ni pawh chu biak ve deuh angai dawn nih chu.”

“Ihh..englo ka pu, ani chu nakin deuh ah be ula ka van ti zawk em, ka thulo viau nangin. Thawhah nei a nia, lungphu thalo anei bawk a, a hrisello bawk sia, a dawih bawk sia, ka lo ngaihtuah mai mai a. Engvak mah in zawh chhuah ka ringlo, mahse in thu thu a ni e.”

Nathana chuan Zorina room chu a en kual a, thlalak vel chu a en a, Zorina leh Veni leh Angaihi thlalak lian pui lo intar chu a en a, tleirawl changkang ho tih takah, a mawiin an lang chhelo hlawm kher mai. Nathana chu a ngawi vung vung a, min rawn en a, “Rina, Angaihi hi a chhelo ve reuh hle mai tiraw?” a rawn ti ringawt a, ka nui chhuak tep a ni, tawngkam mak thei lutuk mai, ngaiah ka la nei ve mai ang. A dul ala hiat neuh neuh zui, “Lungphur ka kai amawni ni, ka dul a thak tlat nia mawle, Zorin i room hi tifai rawh ka thak sup sup mai.” a la rawn ti zui mawle, ka lo ip chawih chawi a, Zorina pawh a nui ringawt a. “Anih chuan Zorin, Angaihi address min hrilh thei angem?” a ti a, Zorina chuan min hrilh a, kan chhuak ta a. Pawna kan chhuak chu Nathan chuan, “Rina, i ril a tam em?” min ti a, keichuan rang zetin, “Tehreng mai, **** Restaurant saw an nei tui hlawm lutuk, kal ila?” ka lo ti vat a. Anui vur vur a, chu aia tui ka hria lawm, minlo zui rawh.” a ti a, nhawi reng chuan ka zui leh ta hna hna a. Kan kal zel a, kawngsir a dawr tawp le ung ve tak (hmuhsitna lampang nilo se) maiah chuan min luhpui a. Khai khai khai.. a zim sia, tel hmui rim a nam bawk si, restaurant changkang ve tak tak a tam tehreng nen, police officer pahnih chawlhna atan chuan a va iai em, “Hei hi lawm ka favourite thingpui dawr chu, enge i ei duh ang?” min ti a, phurlo tak chuan, “I ei ang ang a nimai, Sir.” ka ti a, a dawr nghak tu nuthlawi ni awm tak, chhe lutuk lemlo, khal ve zet bulah chuan, “Thiannu, chow full, satui leih plate hnih aw?” a ti a, an innuih seih seih lehnghal. Kan ei zawh chuan haw tur leh, va chawl hahdam turin min ti a, kan hna kan thawk dawn chauh amaw tih nak alaia, min hawtir leh ringawt a, mangan thlak thin mang e.

Zanah chuan chanchin engmah min rawn hrilh bawk silo nen, ka ngaihtuah em em a. Ka thinrim lek lek zawk. Chhuichhuah dan tur ka ngaihtuah char char a, ka muhil thei bawk silo chu pawnah ka tei chhuak a, meizial ka zu a, ka ngaihtuah nasa hle mai. Chutia ka kal mai mai lai chuan tawng bul bul thawm ka hre ta tlat mai, ka ding chat a, thawm dim thei agn berin thawm awmna lampang chu ka va pan hnai a. Dawr kawt a mipa pahnih lo inbia chu ka hmu a, pakhat zawk chu ka hmuh hnu a ang hle mai. Ka mit ka nuai a, ka en chiang leh a. Ka rin ang ngei ngei in, ka mi rinhlelh ber mai Venin au Hminga leh a thianpa ni awm tak an lo ni a. An inbiakna chu kan ngaithla chiang a...

“Hminga, sawi tawp rawh, inpuang mai rawh, i rilru a nuam thei dawn chuanglo, hlau reng rengin i hun i hmang tawh zawk ang, police hnenah chuan khami zan khan ka bulah i rawn kalruk thu kha sawi mai rawh.”

“Ka sawi anih chuan, min man dawn sin, dawt ka lo sawi laklawh ve tawh sia, mahse khami zan kha chu ka suffer tak tak alawm, ka mu thei lo a, mahse ka mut leh hnu khan ka harh leh tawh eihlo, ka chatthla nghal a ni mai.”

“Engmah i hre lo tak tak maw? Han ngaihtuah leh teh, thawm chhete mah hi hre lo maw?”

“Um, zana ka lo chhuah ruk khan...” a sawi zo hmanlo, min hmu thut a, “IN...INSPECTOR!!!!” tiin a au vak a, an thiandun chuan an tlanchhe chiam ta mai a. Kan in um ta chiam mai a, ka thinri, tawh lutuk chu ka tlanchak hle mai, a thianpa zawk chu a tlanmuang ve bawk a, ka umpha vat a, a hnungzangah chuan ka beng thlawrh a, a eu zawk a, bawkkhup zawng chuan a hmai a sawh chawrh mai a, zal nghal der a. Hminga zawk chu ka umzui leh a, atlan chak zek a, a ai chakin ka tlan leh a, ka va lehpel a, a hma zawng chuan ka zuang a, a dulah tak chuan ka khupin ka do chawrh a, tukhum vaw chawrh in a thal thuai mai a, ka tham tho a, a samah chuan ka hnuk phei a, athianpa pawh chu ka tham tho a, ka hnuk phei dun a, dawr pakhat bula step ah chuan ka thehtlu dun thuai a. Hminga chuan, “Ka..ka pu, please...ka sawifiah thei..” a ti dek dek a, ahmai ah ka beng thuai a, “Ngawi rawh, engmah sawi suh, police hnena dawt sawi hi ka chhuah dawn lo reng reng tih hre rawh u..” ka ti vin hlur a, kei hi chu ka thinrim tawh chuan khua hi ka hmulo, ka ri hlut zel ve hrim hrim a. Ka phone ka phawrh a, Nathan ka phone a, thil awmzia ka sawi hnu chuan a rawn kal a, Nathana te in lamah kan inphur phei a. Inchhung kan lut a, Nathana chuan min en a..

“Rina, ka lo buaipi amg, hei chu keimaha ka tih angai.”

“Nilo Sir, ka hawsan loving che, engkim ka hr eve duh a ni.”

“Aih nilo, haw rawh. Ka lo buaipui ang, chanchin ka lo hrilh leh ang che.”

“Sir, engemaw i sawi le, keima man an nia keimah hi ka awm ve tur a ni dawnlawm ni?”

“Rina, thinrim chung chuan lo awm ve suh, chubakah hei chu ka chan ani, ka lo buaipui ang ka tih chu.”

“Sir, a teuhlo mai, anni hian hriat annei ani, anmahni tih hi a niang, ka hre vek lawm.”

“Ka hria, min hrilh vek kha phone ah pawh, va haw phawt teh.”

Ka thin a rim tawh lutuk chu ka insum zo lo, ka vin ta vak a...”Sir, ka kal dawn lo.”

A aia vin in Nathana chuan a kutzung chala min kawh pah chuan, “Rina, order ka pe che anih chu, tunah hian haw rawh, i kal dawn em? Ka thu i zawm dawn em?” min tit a vak mai a.

Ka ngawi chiang ngei mai, ka thinrim hle mai, a mizia hi ka hrethiam theilo, “Awle Sir..” ka ti a, ka chhuak ta a. Kalkawngah pawh chuan ka thinrim lutuk chu lung ka char a, ka vawm vak vak a. Khawlaia sangha tin bur lo let reng te chu na em em hian ka pet pawp pawp a, “DSP ni tlak paw hi nilo, inla fing si, engmah hre mang silo, i chungah engpawh thleng se ka tuar loving, mawh ka phur lovang, i hria em?” ka ti vin tuar tuar a, ka au vak vak a. Mut pawh ka muhil tha thei lo, ka tlaivar titih der mai. Atuk zingah chuan Nathana nen chuan chu tualthahna case hahthlak zet mai chu chhuidun turin kan inzui chhuak leh ta a, Angaihi te ina kan kal tur thu leh thu zawt ve tura kan kal tur thu chu min hrilha, engmah ka phur tawh lo. An in chu kan thleng a, anu leh pate chuan min lo welcome tha hle mai. Thu zawtfiah tura kan kal dawn thu hi kan hrilh lawk thlapa, chuvang pawh chu anih mahna, makpa ang maia minlo welcome that...zawnhna chu kan zawt ta a, kan bulah a nu leh pa te chu awm ve kan phallo a, constable pakhat kan hruai a, choka lamah lo va kawm turin kan tir phei a, Angaihi chu a room ah chuan kan luhpui a, thu kan zawt fiah a, diktak chuan ka zawt velo, Nathana thovin a zawt leh a...

“Angaih, Veni nen hian engtia rei nge in inkawm tawh?”

“Ka pu, class 8 atang khan Home Mission school ah kan inclass mate a, college kan kal thlengin kan luhna a in ang zel a, best friends kan ni a, kan in kawmngeih lutuk, unau ang mai kan ni.”

“Anih chu mawle, nihleh maw...tunhnai vel khan inhauhna in nei em, han intihthiamloh emaw, inhauh vel emaw in nei em?”

“Chutiang engmah ka hre lo ka pu...khami zan khan ka text a, mahse min chhanglo, Zorina pawn min rawn text a, a ngaih a tha vaklo aniang, mahse engmah ka hre bik silo a, ka ngaihtuah ve deuh a, ka call a, ka phone ah pawh hian call log chu ala awm ang.”

(Nathana chuan Angaihi phone chu a en a, a en zawh chuan a pe let leh mai a)
“Angaih, Veni emaw, Zorina zawk pawh hian, tu emaw zawnk zawk hian hmelma an nei em, ngei tu emaw, i hre mial em?”

(Mak tih hmel deuh a rawn hawi chhuah pah chuan) Teuhlo ka pu, mifel tak mai an ni a, hmelma nei tur khawp chuan an awm ngailo, an fel dun em em a, thiktu ai chuan lawmpui tu an nei tam zawk a, an innei tep tawh lehnghal a, chutiang a awm ka hre lo, aw se chuan a thiantha ber ka ni a, ka hre em em ang.”

“Anih chuan, athih tuk zinga a ruang kan rawn en lai khan, khawnge i awm?”

“Ka thiantha ber tiang khawpa nasal eh rawng taka anlo that kha ka hmuh khan, ka rilru na leh ka rap lutuk kha ka thidang a, abak chu engmah ka hrelo, ka harh leh chuan kan inah ka lo mu daihtawh.”

“Nihleh, Veni ngaizawngtu emaw, Zorina ngaizawngtu emaw, anmahni thiktu awm ang i hria em?”

“Ka sawi tawh kha ka pu, an awm ka hrelo.”

“Awle, nangpawh thuchiang kan hriat hma chu khawiah mah kal bo suh aw.”

“Awle ka pu.”

Angaihi te in chu kan chhuahsan leh ta a, Nathana chuan min en a, “Tunah chuan a awmsam tawh dawnin ka hria, naktukah hian engkim achiang thei tawh ang, lo inring rawh aw?” a ti ringawt a. Ka hrethiam lo hle mai, engtak chu chiang nimaw? “Sir, tualthattu chu i hre tawh ami? Hminga kha a ni tiraw?” ka lo ti vat a, ani chuan, “Ka sawi thei rih lo, mahse hei hi chu ka chiang a ni.” a ti a, hre chak tak chuan, “Enge ni?” ka lo ti vat a, ani chuan min en vung vung a, “Kha nuthlawi chow siamtui zia kha chu ka chiang a ni..” a ti leh daih a, ala nui miah lo zui, constable pa chu lo nui khanglang lehnghal. “Naktukah kan vaiin, VEni chhungte, Zorina chhungte, Hminga te leh Hminga thianpa te, Angaihin chhungte leh constable 6 vel te nen, Veni te inah kan inhmu khawm vek ang, lo buaipui vek rawh aw?” min ti a, min kalsan daih a, angaihna ka van relo tak em, mahse tualthattu chu kan hmu dawn ta niin a lang tlat mai.

Atukah chuan kan vaiin police constable paruk nen, kan kim thap mai, Nathana chuan pawn tukverh lam a chu a hawi vang vang a, a rawn hawi a, kan lo en thap a..

“Awle, Zorin, i hmangaih ber i nupui hual thattu chu kan hmu tawh ania?” a ti a, Zorina chuan rang zet hian tap tuau in, “Ani maw? Ka pu tunge a nih? Ka khawih khawp ang, ka pu min hrilh rawh...” tiin a inhrosa tun tun a. Nathana chuan muangchangin...

“Insum teh thiana, awle...tualthahna thlen zan khan Hminga hi in atangin a chhuak ru a, chu chu ka thawhpui Officer Rinawma hian a hre chhuak a, min hrilh a, keichuan thu ka zawt fiah a, le... Hminga, han sawi teh le...”

Hminga chuan inthlahrung tak hian, “KA nu, ka pa, min ngaidam rawh u, khami zan khan pawisa ka nei silo a, ka damdawi rui chak lutuk chu ka suffer a, a hrehawm lutuk a, tichuan ka thianpa hi ka text ta ringawt a, a ni chuan kan pahnih ruih khawp alo la nei a, ka room tukverh ah khan bar a awm lo tih nangni pawn in hriat kha, awlsam takin ka chhuak ru a, tichuan ka thianpa nen hian kan inhmu a, kan rui dun hle mai a, ka haw leh a, ka u room pawh ka va en leh a, minlo hriat chhuah takin tiin, mahse a lo la mu a, tichuan ka chatthla nghal a, engmah ka hre lo abak kha chu, thawm chhete mah ka hre tawh lo, ka muhil nghal, ka nu i hmingchhalin thudik ngei ka sawi, ka u hi ka that lo” a ti a, a nu chuan, “Lalhminglian...i van zak lo..” a ti hman a mahse pu Thuama chuan, “Mami nu, lo ngawi hrih rawh, Officer..sawi zawm zel teh..” a lo ti vat a. Nathana chuan sawi zawm zelin, “TIchuan khami zan khan Hminga kha a sawi ang khan a chatthla ta a, engmah a hre lo a, chu chu remchangah hmangin tualthattu hian Veni chu a that a, thawm vel pawh hre theilo khawpin Hmingtea hi a muhil si a, chuan Hminga thianpa thusawi hi ngaithla vethung teh ang..” a ti leh a, Hminga thianpa chuan, “Khami zan khan Hminga kha an inbulah ka lo nghak a, a lo chhuah khan heath tilo ang ka u in min hria ang a ti a, tichuan hmun fianrial deuh ah kan kal a, damdawi chu kan ti dun ta a, tichuan kan inhaw san ta a, a tukah chuan min rawn fone a, a u thih thu vel min hrilh chuan police ten min rinhlelh loh nan tiin Hminga hi kan intextna leh call log vel delete vek turin ka hrilh ta a ni.” a ti a. Nathana chu a nui vur vur a, kan vai chuan min enkual a, athaw huai a...”Tualthattu chu kei hian ka hrai ani, tualthattu hi mi pakhat mai nilovin, mi pahnihin intiamruala ti anni.” a ti chiah mai chu mi zawng zawng chuan Nathana chu kan en hau mai a, zawhna tamtak chu kan hmelah chuan a hmuh theih ngei ang. Nathana chuan thawk an la leh phawt a, “Awle, nu leh pate u, min lo hrethiam ula, mahse engkim ka sawi angai a ni, Veni thattu hi tudang nilovin...(A ngawi vang vang a)...a bialpa leh a thiannu...Zorina leh Angaihi te hi an ni..” a tit a mai a, mi zawng zawng chuan ENG A???...kan ti rual thawt mai a, Zorina leh Angaihi chu an hlauhthawn hmel hle mai, an meng zawk zawk mai a, Zorina pa chuan, “Ka pu, ani theilo, ka fapa hian tual a that ang maw? In hresual aniang?” a lo ti a, Angaihi nu pawh chuan, “THil hriatsual a awm ngei ang, ka fanu lungphu thalo leh thawhah nei hian tual a that lovang.” a lo ti bawk a, Nathana chuan, inthiamloh hmel takin, “Ni e, ka hrethiam alawm, in fate an ni a, awih a harsa ang tih chu, mahse thudik a ni..” a ti tlat mai si a, Veni pa chuan, “Officer, sawi zel rawh, engmah pehhel lovin..” alo ti a, Nathana chu a maimitchhing vang vang a, a nui sak a...

“Awle, ka thianpa Inspector Rina nen hian Zorina te inah khan hmanni khan kan leng a, kha tah khan Zorina room ah kan inkawm ho a, Zorina lehkha zirna dawhkan niawm takah khan chemte kawm niawm tak hi ka hmu a, chu thil ka hmuh chu en chian ka chak avangin chhuanlamah rooma thlalak intar vel kha ka en a, chu ka thil hmuh chu ka pan hnai a, ka en chian chuan chemte kawm ngei chu a ni a, ka kapah ka pai a, min hriat ka hlauh avangin ka dul ka hiat der a, lungphur kai ang ten ka insawi vel a, Zorina pawh hian min nuih nghe nghe kha...tichuan Zorina hi rinhlelhna ka neih vang pawh ni chuanglovin, Veni an vihna chemte nen khan ka en mil ve hrim hrim a, a inmil chiah chiah a, chu chemte chu Equip Endure..American Knife a ni a, internet a a chah anih ka ring, (a nui deuh suk kher a). Chuan Angaihi te ina kan kal leh khan a roomah kan kawm vel leh a, a khumah khan ka thu a, a rizai thleh karah khan bracelet ka hmu a, chu chu Zorina rooma thlalak intar a Zorinan bracelet abun ngei kha ani a, chu bracelet ah chuan Z+V tih a inziak a, Zorina and Veni tihna a nih ka ring, ka rindik ngei pawh ka ring. Chu chu Angaihi hmuhloh hlanin ka la ru a, ka ak bawk a” ...tihpah chuan Chemte leh a kawm leh bracelet chu dawhkanah chuan a dah a. A sawi zawm lehnghal a, “Chuan Hminga thianpa hian thil hriat anei bawka, khami zan khan kan hriat vek angin Veni chhungten mitthi an nei a, an tlaivar a, Zorina pawh a tlaivar tih kan hriat kha, mahse Hminga thianpa Lawmtea pawh hi alo tlaivar vetho a, pawnah anla thuho zui a, thingpui an lum ho nghe nghe a, Lawmte..han sawi ve teh le..” a ti a,, Lawmtea chuan, “Khami zan khan dar 11 vel atang tawh khan Zorina hian a phone a khawih reng a, a thinrim hmel khawp mai. Sawhchiar kan sem lai pawh khan a sem ve lo a, mahse ka lo ngaihtuah vak lemlo a. Mahse dar 2 vel thleng khan min call tum ni awm tak hian a phone chuan mi a call reng a, a thinrim hmel em em a, mi tet niawm tak hian a awm leh thul. Tichuan dar 3 vel a rik khan Hminga nen kan inbia a, kan inbiak lai khan Zorina hi a bo daih a, tichuan Hminga nen kan inhmu a, mahse ka rui ve em em lova, zing dar 4 rikhma hret chuan mitthi in lamah ka phei leh a, khua ala var lo. Tichuan Zorina chu ka hmu leh a, mahse kawr dang, kekawr dang leh pheikhawk thlengin...alo inthlak a, mahse engah vak kalo ngailo a...chuzawng chu nimai ka hriat chu..” a ti a, Nathana chuan thutthleng pahnih hi ala a, Zorina leh Angaihi chu a thuttir te te a, “Zorin, thiamthu sawitur i nei em?” a ti a, “Daw...dawt vek a ni..” ala t ihram a, Nathana chuan Zorina nu leh pa te chu a en a, anlo tap pur a, an zah hmel hle mai, “Ka pu min hrethiam ru aw?” a ti a, min signal zeuh a, keichuan Zorina chu na em em mai in ka beng thuai a, a tap pur a, NAthana chuan sawi tur chuan a ti leh a...

“Ni e, Veni kha ka thah a ni. Kan inngaihzawn tirh khan kan induh ve hle a, kum 3 lai kan inzui hnu khan thiannu kawmngeih deuh a neih thu hi min hrilh ziah a, mahse phaiah lehkha a zir thu min hrilh a. Chu nu chu Angaihi hi a ni a, alo haw ni chuan min inhmel hriat tir a, Veni hi ka duh ringawt a, ka hmangaih amaw ka lo inti thin a, inneih hial te pawh kan sawi a, ka nupui hual hial ani hman a, mahse khami ni a Angaihi hmel ka hmuh khah hmangaihna diktak chu ka chungah a thleng ve ta ani. Ka hmangaih em em a, Veni ka duhna a bo vek a, a number te ka nei a, kan inbia kan inbia a, Angaihi hian min luah hneh em a ni. Vawikhat chu ka bem tawp a, atir chuan min dang nasa a, mahse min lo duh ve reng alo ni a, tichuan a rukin Veni hriat loh chuan kan inhmu thin a, sex pawh kan hmangdun ta hial thin a ni. Chuta tang chuan min ringhlel tan ta a, inhmuh a sawi apiang hian chhuanlam ka siam zel a, phone check te ka phal ngai silo chu min ringhlel ta a, a titau ta fova. Vawikhat chu Angaihi nen hian kan inhmu ru leh a, a chhungte tumah an awm lo a, tichuan a roomah kan khawsa dun a, Veni chuan min rawn call a, mahse kan hlimdun em avang chuan kan ngaihsak lova, Angaihi pawh a rawn call a, phone ri reng reng kan ngaisak lo. Mahse kawngka kan kalh amaw kan tih kha kan lo kalh lo a, Veni chu a rawn lut tlang a, kan pahnih a kan khawsa lai chu min man ta a, a ang vaka, tap chungin a chhuak a, ka thawmhnaw ka ha a ka umzui a, mahse min then tur thu leh a nu leh pa te leh ka chhungte hnena a hrilh tur thu min hrilh a. Ka rilru a hah hle mai, chumi ni chuan mitthi kan nei a, ka tlaivar a, dar 11 vel atang khan ka call a, msg tamtak ka thawn a, ngaihdam ka dil a, min chhanglo a, min reply lo bawk. Angaihin ka call a, tih ngaihna hriat bikloh thu min hrilh a. Tichuan tih ngaihna ka hrelo chu zanrei pawh sawi thei lovin an in lam ka pan tawp a, tichuan an room bula Hminga tukverh inhawng chu ka hmu a, alo chhuak ru a, tichuan chu chu remchangah hmangin, enge pawh ka hrelo, Hminga room tukverh ah chuan ka lut ve tawp a, tichuan Veni room ah ka phei a, alo la meng a, min hau a, ka chhuah loh chuan a au vak tur thu a sawi a. Ngaihdam ka dil ngial a, ri ve kan in biak hnuah chuan a nau lo haw thawm kan hria a, akhum hnuaiah min bihruk tir a, a nau chuan room chu a rawn bih thuak a, akal leh a, tichuan kan inhaul leh tan a. Min vau nasa lutuk chu ka thinrim a, ka beng ta a. A ni chu au a tum a, a hmui ka hup sak a, room atangin ka pawm chhuak a, enge ka tih pawh ka hre tawh lo, ka mangang lutuk chu choka a tuboh lo awm chuan a lu ah ka chhu chawrh a, a thal tawp a, tichuan a rawn tho leh tur chu ka chemte pai, ka thianpa in USA atanga min lo hawn chuan ahnugah ka vit leh a, ka kawrah chuan thisen a kai nasa ngei mai. Chemte pawh chu ka phawi hman tawh lo, tuboh nen chuan rang takin ka kalna ah thisen a far ka hlauh avangin ka kawr ka phelh a, tichuan Hminga tukverh atang chuan dimtein ka chhuak a, bawlhhlawh paihna khamah tuboh chu ka peih a, ka va inthlak ta a ni.” a ti a. Nathana chuan, “Le...thu tlemte tal chu sawi ve tur i neih ka ring Angaih, han sawi vela..” a ti a, Angaihi chuan tap chungin, “Ka thiamloh a ni, ka thiantha ber anga ka ngaih ka bum a, a hmangaih ber ka laksak a, mahse ZOrina hi ka hmuh tirh atang khan kan hmangaih nghal a, aman min hmangaih thu a sawi ve phei kha chuan ka insum zo thlawt lo ani. Khami ni a Zorina nena kan inhmuh a Veni’n min rawn man tum khan Zorina hian a bracelet a theihnghilh a, mahse ka zawnhmuh hmain Police ten min hmuh khalh a ni.” a ti a, Nathana chuan< “Angaih, nang hian thian hlutna i ti hmingchhia a ni. Constable...hruai rawh u..” a ti a, an man ta a. Nathana chu....ni e, kei aia rank sang zawk nge nge, alo fing zawk ani.

Chumi tlai chuan thinpui dawrte ah khan min chawlh pui leh a, “Sir, ahma khan tha taka sawi ve mai tur che ania, tinge min hrilh mailoh a?” ka ti a, a ni chuan, “Anger management i zir angai, i thinrim lain thil ti tut tut suh, chuvang chu lawm..engpawh nise, thawhpui i nuam e..” a ti a, keichuan, “Sir, i chetdan hi ka hrethiam lo..” ka ti a, a num vur vur a..

“I hrethiam reng nang...DSP NATHAN KA NI MIAU ALAWM!!!” tiin min chhang a.....