NATHAN SEASON-4 Written by : Aaron Malsawmdawngzuala Episode-11 (THE KING-2)

 NATHAN SEASON-4

Written by : Aaron Malsawmdawngzuala

Episode-11

(THE KING-2)

**************

An thu hriat ang te chu zanah chuan NAthana chuan DIG a hrilh a, "An khua a hruaitu lu ber, Pu Vala hi a ni, Sir. Market, travels, granite, real estate, timber leh sumdawnna dang dang te...market pumpui hi a control-na hnuaiah a awm vek a ni. An khua a thil thleng te hi a hriat loh a awm ngailo, chumai nilovin police station kal dawn pawhin a phalna lak thlap angai thin. Dan a siam a, chu chu khaw mipuite hian an zawm mai thin. Pu Vala hian fanu pakhat a nei a, a duat hle bawk. Tichuan hemi khua a sub-Inspector nen a fanu chu an inei ta a. Mahse Kimtea chu a ngaithei lo tan a, a hne ta em em a. Kimtea erawh police rinawm tak a ni a, Pu Vala lak atangin puihna engmah a dil duh ngailo. Kimtea chu a nupui chuan then a duh a, mahse Kimtea erawh chuan a fanu a hmangaih em avang chuan divorce paper chu a sign duh tlat lova. Pu Vala pawh chu inrawlhin then turin Kimtea chu a vau a, mahse Kimtea chuan a sign duh chuang lo. Pu Vala chu a thin a rim a, Kimtea chu a haw ta em em a. Kimtea te nupa chu an inhauh reng avang chuan vawikhat chu Kimtea chuan a nupui chu a beng a, tap chungin a nupui chu a tlan ta a. A pasal chu a thi a nih pawhin pawi a tihloh thu Pu Vala fanu chuan a sawi ta mai a, Pu Vala chuan a ruk thei ang bera Kimtea thah dan tur chu a ruahman ta a. Mahse khami zan khan Kimtea chu a inhliam a, tichuan amah aiin Sangpuia chu a duty ta a ni. Khang tualthattu tura a rawih hote khan Sangpuia chu Kimtea emaw an ti a, an hal hlum ta a ni.."

DIG chu a ngawi vang vang a, "LEgal action lak vat angai a nih chu, order ilo nghak dawnnia." a ti a, an in kalsan ta a. A tuk zingah chuan Nathana chuan chaw a ei mek a, chutih lai chuan a phone a rawn ri a. "Hello.." a han ti chu phone ami chuan, "Aw SP NAthan maw? Mama ka nia, Pu Vala hi ka patea ania." a rawn ti ham ham a.

"Enge ni?" tiin Nathana chuan a han zawt leh a. "Engdang nilove, ka patea hian a be duh che a. I duh chuan appointment ka lo siam sak che anga, a fala biak che a duh a. Nang meuh hmuh a duh che a, thil engemaw tak chu a ni ngei ang." tia a tawng zuah zuah lai chuan Nathana chuan phone chu a dah hmak mai.

**************

Chumi ni chuan Nathana chu Station ah chuan thu in a phone a khawih mual mual a, chutih lai chuan constable Moses-a a lo kal a. "Sir, Pu Vala fapa te an lo kal a, an hmu duh che a." a rawn ti a. Nathana chuan a phone khawih reng pah chuan, "Umm...fax machine kha a in on leh on loh va check rawh." a lo ti daih mai.

Hrethiamlo tak hian Moses-a chuan, "Sir...Pu Vala.." a tih lai chuan rum zet hian Nathana chuan a melh a, "Fax machine va check rawh ka tih chu." a lo ti leh a. Moses-a chu ava let leh a, Pu Vala u fapa, Mama leh a thiante chuan, "Khawnge Pu Nathana chu?" an lo ti a. Zawite hian Moses-a chuan, "A mood a fuh chiah lova, nidangah lo kal mai ru." a han ti su su a.

Mama chuan vin deuh tak hian, "A tlai tawh ania, ka patea bulah engtin nge ka sawi ang? Vawiin ngeia hmuh a duh a, min han pui hram teh.." a tih lai chuan NAthana chuan Moses-a chu a rawn ko leh a, Moses-a chu ava lut leh a. Nathana chuan nui deuh suk chung chuan, "Enge in va sawi a, Moses?" tiin a lo zawt a.

"Engmah kan sawilo Sir, ka hmelhriat te an nia." tiin za lo tak chuan a nui a. Nathana chu a khi leh suk a, "I hmelhriat te an nih te chuan khatia va hrilh ruk sur sur kha angai ami?" Nathana'n a han tih chuan Moses-a chu a nui tawp chiang kher mai. "Thian in ni emaw, inlaichinna chu pawn lamah ni rawh se. Hei chu Police Station a nih hi, ka rawh." tiin Nathana chuan a hau hrep mai.

Moses-a chu a let leh a, a dawhkanah chuan a va thu hmak mai. Mama te chuan lo be lehin, "Moses..khawnge Pu Nathana chu?" an lo ti leh a, Moses-a chuan en pawh a en lo. Ahnu deuhah chuan Nathana chu a Office atang chuan a rawn chhuak a, "Rinawm, fax machine kha a tha tawh em?" a han ti vak a.

"A tha tawh e, Sir." tiin Rinawma chuan a lo chhang a. Kawngka bula thu mek, Mama te thian ho bulah chuan Nathana chu ava kal a, an lo ding thap a. Mama chuan chibai tumin a kut a lek kang a, "Sir, Mama ka nia..Pu Vala hi ka patea a nia.." a lo ti nghal zuah zuah a, mahse Nathana chuna  a chhanglo.

A mit sirin a melh zeuh a, a chhuak tlang nghal daih mai. Pawn a chhuak chu ahma ni a th(r)i bo, an ruksak nu ngei mai kha alo awm a. "Ka pu, hmuh che ka lo tum chiah a. Ka la dawnglet miah lo a, in chhui mek em ni?" a rawn ti a. Nathana chuan Rinawma chu a en a, "Engtia rei nge buaipui i tum a?" a han ti a.

"Ka buaipui mek alawm, Sir." tiin a lo chhang a. "ACP i ni tawh a, tinge thi rukbo mai mai pawh i va chhuichhuak har ve? Puih zel i ngai em ni?" a han ti leh khur khur a, Rinawma chuan a chhang lo. Nathana chuan chunu bulah chuan, "Kan lo buaipui nghal ange, ni 2 hnuah i hmulet ang. Chuan an ruk sak na lai che kha, khawilai nge i tih kha?" tiin a zawt a. 

"Theatre bulah.." tiin chunu chuan a lo chhang a. A kal chiah chu Rinawma chuan, "Tinge mi vin khur khur kher a?" a han ti nung nung a. "Aww...lo buaipui ve vat mai tur che lawm." Nathana chuan a han ti leh hlur a. "I kalna apiangah min hruai ve zel anih kha..." Rinawma chuan a han ti leh hram a.

*********************

Chumi zan chuan an khua chuan concert te nau hi an lo nei a, mipui pawh an awm ve nual mai. NAthana leh Rinawma chuan Pu Vala thu zawtfiah turin chumi hmunah chuan an va kal ve a, pawn lamah chuan an titi a. "Hetah hi chuan tih theihloh ka neilo, hruaitu ber ka ni. Tualthahna chu plan tha tak nena ruahman tur a ni a, mahse a fuhloh avangin Kimtea chu ala dam tihna nia. Mahse engtia rei nge a dam chuan ang..chuan kha SI, thi zawk ta pawh kha tunge a nih ka hrelo. Mamawh an neih te chu pek an ni ang, Sawrkar hian an pe thei dawn lo..keiman ka pe mai ang." a han ti vel ham ham a.

Nathana erawh chuan a chhang lo, chutih lai chuan ACP Awmpuia, ahmaa Nathana'n a hnek hrep pa kha a lo kal a. "Pu Val, i thusawi a hun e." a rawn ti a. "Aw animaw...Pu Nathan, tikhan minlo nghak ru aw..." tiin a kal daih mai. Darkar chanve vel hnuah chuan a rawn let leh a, mi 20 velin an rawn zui bawk.

"Aw haww...thingpui te lo in ta che u.." tiin Pu Vala chu a han nui vel a, tichuan Nathana te hmazawnah chuan ava thu leh a. "Enge ka sawi lai kha....aw ni tak e. Kha SI boral ta kha tunge a nih ka hre ngailo, mamawh an nei anih chuan ka pe vek ang." a tih lai chuan Pu Vala fanu Inspector Kimtea nupui Muani chu a lo kal a.

"Ka pa, chaw lo ei tawh ula.." a rawn ti a, "AWle ka lo kal vat ang...Bawihte, hei Police Officer la sawi thin kha nia.." tiin Nathana chu a han kawk vel a, Nathana erawh a la thu ngawi reng. Pu Vala bawk chuan, "Ka nauten ka thu an zawm nan chuan ka vawi khat siai zeuh pawh hi a tawk lutuk, mahse kan kohna i ngaipawimawh a, heta ilo kal avang hian kan zah hle tur che anilovem ni? Enteh Nathan, he case hi ti tawp mai mai teh. Engpawh i duh chu ka pe ang che, enge i ngaihdante han sawi ve la?" a han ti zuah zuah a.

Nathana chu Pu Vala hma takah chuan a ding a, "Pu Val, tawngkam khat lek pawh han chhak chhuak leh teh, tawng mawilo leh tawng malsawmlo i hriat ang zawng zawng ai nasa daih khan ka sawisa ang che. Ngawirengin motorah sawn lut rawh, anih loh chuan ka duh aiin ka khawih na mai ang che." a ti ta sak sak mai a.

Chutah a naute zinga pakhat chuan, "Pu Nathan, zahna lan tir ve deuh rawh...nang aia upa  anih kha.." a lo ti a. Chutah Nathana chuan Pu Vala chu a hnek pawp mai a, "ZAhna maw? Ti hian ka zah tha tawk em?" tiin a beng siah siah mai. Midang ho chuan engmah an sawi ngam lo, chet pawh an che ngam lo.

Nathana chuan a tham tho lawp a, motor lam pan chuan a phei pui ta a. Mipuite chuan an en sup sup a, an phun sap sap bawk a. A fanu Muani pawh chu lo kalin, "Enge awmzia?" tiin a rawn rak chiam chiam a. Mahse NAthana leh Rinawma chuan an ngaithla duh hauh lo, Station lam chu an panpui ta a.

**************

Station ah chuan Nathana chu ava lut a, Mama leh a thiante chu an lo la awm reng a. Nathana an hmuh veleh chuan an lo ding a, "Ka pu, ka pu...kan lo nghak char char che a." an lo ti nghal vak vak a. Mahse Nathana chuan en pawh a en lo, a office ah chuan a lut tlang nghal daih mai a.

Mama te chuan va umzui an tum a, Moses-a chuan lo dangin, "Hey, va kal suh u..enge maw in tih le?" a lo ti vat a. "Engtia rei nge kan nghah daw? Nilengin kan nghak tawh, hei zan a nih tawh hi." tiin an phun nasa mai. "Ngawi rawh u, a hman tep ang...va thu leh rawh u." tiin Moses-a chuan a han hrilh leh hlawm a.

Lungawilo tak chuan an thutna lam chu Mama te chuan an va pan leh a, mahse an thutnaah chuan hnar thi phung a Pu Vala lo thu tum bur mai chu an va hmu fuh ta. Rang takin an va pan a, "Pate, pate...tinge hetah i awm?" tiin Mama chuan a sawi vak vak a, mahse Pu Vala erawh thinrim hmel em em hian a thu tum bur mai.

"Hey, Sir Nathana'n a ko che u." Liantea chuan a rawn ti a, "Pate lo lungngai suh, kan va bia ange." tiin Mama leh a thianpa chu Nathana Office ah chuan an va lut a. NAthana chuan, "Umm...zing atangin min lo nghak tawh a ni awm a, enge ni ta?" a lo ti a. Mahse Mama te chu a tawng miah lo, a thianpa nen chuan an inmelh zuk zuk ringawt mai a.

Nathana chu a nui suk a, abula lo thu ve Rinawma chu ava en a. "Rinawm, min en dan hian ka nuih a tiza tlat nia, en ve teh khipa hmel khi.." tiin Mama chu a kawk a, Rinawma pawh a lo khi ve suk mai. Nathana bawk chuan, "Chhuah tir teh..ka insum zolo, ka nuih a za." tiin a nui vur vur a.

Rinawma chuan nui chung hian, "Hey, engmah sawi tur nei leh mang silo. Chhuak ru, chhuak vat ru." tiin a nam chhuak dun a, an lungawilo hle mai. MAma chuan Pu Vala bulah chuan, "Pate, min hrethiam rawh. Kan lo kal leh ang, lawyer nen kan lo kal leh ang." tiin an chhuahsan ta a, Pu Vala erawh a la thu tum bur mai.

***************

Darkar 4 hnu velah chuan Mama te thian ho chu Station ah chuan an va kal leh a, "Pate..pate..khawnge ka patea kha?" tiin Mama chu ava rak chiam chiam a. Rinawma chu a office atang chuan a rawn chhuak a, "Hey, enge in rawn au luh chiam chiam a." a rawn ti a. "Khawnge ka patea a awm?" tiin Mama chu a thinrim hmel kher mai.

"I patea kan veng lo, chhuak ru." Rinawma chuan a lo ti hrep mai. "In man hnu khan khawnge in dah?" tiin Mama chuan a zawt leh a. Rinawma chu a nui khi suk a, "I patea kan man reng reng lo, tumah kan man lo." tiin a lo chhang leh a. "Min fiam kual mai mai suh aw, ACP...kan thil tih theih hi i hrelo a ni." tiin Mama chuan a han vau leh pung pung a.

"Awle..awle...kan lo hre tawh dawnnia..chhuak phawt mai teh u." tiin Rinawma chuan a lo chhang leh a, "Inla hre khawp ang." tiin Mama te chu lungawilo tak chuan an chhuak leh ta a. An chhuah veleh chuan Rinawma chuan NAthana chu a phone a, "Sir, an chhuak chiah e...Pu Vala pawh kan phur chhuak tawh, Constable Francis-a ten an kalpui." a han ti a. "Awle, tiding lo ula, khawchhung lut lo bawk ang che u. A awmthat duhloh chuan hlap hrep ula, mahse a ei duh zawng apiang in eitir dawnnia." tiin Nathana chuan a lo hrilh a. 

********************

A tuk zingah chuan Nathana chu Station ah chuan ava kal leh a, tlangval pahnih hi Rinawma chuan a lo vau mek a. Nathana chuan ava en a, "Rinawm, engthil nge ni a?" tiin ava zawt a. "Sir, hemite pahnih hi th(r)i rutu te kha annia." tiin a lo chhang a. "Anih chuan khatia vau ringawt lo khan hlap ta che, khawnge th(r)i chu a awm tih zawt la, kha nu kha in hrilh nghal bawk dawnnia." Nathana chuan a lo ti a.

"Sir, hemite hi chuan an ru ringawt a, mahse thi kawltu anni lo. Saw mite pahnih zawk saw thi kawl tute chu an ni, sawlai naupang pahnihte saw." tiin a sira school naupang pahnihte chu Rinawma chuan a kawk a. "Enge awmzia?" tiin Nathana chuan a zawt leh a. "Hemite hian an ru a, mahse an man hman a. An intihbuai vel naah thi chu an thlauh a, hemite pahnih hian an lo chhar ta a ni." tiin Rinawma chuan a lo chhang leh a.

"Pawl engzat nge an nih?" tiin Nathana chuan a zawt leh a. "Pawl 10." tiin a chhang a. "I zawt chiang amaw, he naupangte hian hlauh vangin thu lawi lo an sawi mai mai te pawh a ni thei ania." Nathana bawk chuan a han ti leh a. Rinawma chuan, "Nilove, thudik a ni e. He naupangte hi rukruk vangin vawi tam man an ni tawh, naupang sual tak an ni. Thi kha an hralh a, mobile phone an lei a ni." tiin a chhang leh a.

Naupangte pahnih chu Nathana chuan a han en vang vang a, "Khawng thi chu in dah?" tiin a han zawt a. Naupang pakhat Ruata zawk chuan, "Engmah kan hrelo." tiin a lo chhang a. "Engtin mah kan ti dawnlo che u, sawmite zawk saw alawm case kan siamsak dawn. Sawi ru le, engtin tak nge kha thi kha in tih?" tiin Nathana chuan a han zawt nawn leh a.

"Ka pu, engmah kan hrelo tak tak." tiin Ruata bawk chuan a lo chhang leh a. "In nu leh pate kan ko dawn ania." tiin a han vau leh a. "I duh leh ko la, engmah kan hrelo." a lo ti leh a. Rinawma thinrim chuan, "I va tawng chal tlai ve mawle.." tiin ben a han tum uai a, Nathana chuan a lo dang a.

Ruata bawk chuan, "Enge khatia min tih a, kum tlinglo kan nih hi...kutthlak theihna dan in nei bik lo aw.." a lo ti leh ar ar mai. "Insum rawh, Rinawm." tiin Nathana chuan a khap dai a. Ruata chuan thinrim hmel tak hian, "School naupang mai kan nih hi, tinge kut min thlak in tum a?" a lo ti leh zuah zuah mai.

Nathana chu a thu a, "An sawi dik alawm, Rinawm. Tinge zirlaite kut thlak i tum, thildanga kan dawp angai dawn nih hi." a ti a, Rinawma pawh chuan, "A tha e, awle Sir." tiin silai dahna roomah chuan ava kal a. A kal chhung chuan Nathana chuan naupangte chu a han en leh a, "Chaw in ei tawh em?" tiin a han zawt leh a.

"Engmah kan ei duh lo." tiin Ruata chuan a lo chhang hmuk a. "In ril atam chuan sawi mai rawh u, eitur kan lei dawn nia." a han ti leh a, mahse Ruata leh a thianpa Mawia te chuan an duh loh thu in an chhang zel a. Rinawma chu lo chhuak lehin pistol hi a rawn hum a, Nathana chu a rawn pe a.

Pistol chu Nathana chuan a han thlek vang vang a, "In sawi duh lo maw?" tiin dawhkanah chuan a dah a. Naupangte chu an ngawi ta ngal mai, "A tha e, panga thleng ka chhiar ang. Ka chhiar zawh hmain ka zawhna kha min chhang ngei ngei tur a ni, anihloh chuan...." a ti ta khur khur mai.

"Rinawm, chhiar rawh le." Nathana bawk chuan a han ti leh a, Rinawma chuan a chhiar tan ta. "1.....2.....3.." tiin a chhiar tan ta a. Chutah Mawia zawk chu a tlan thut a, silai dahna room lam pan chuan kal a. "Hey..man ru.." tiin Rinawma chu a au vak a, chutah silai a puak pup mai.

Lehlam an han hawi leh chu Ruata hrawk zawn chu a lo thi zawi zawih mai a, an en thup hlawm mai. Silai puak ri chu hria in mipui an rawn tlan khawm a, thawm a ring ngei mai. Ruata chu a thal tawp mai a, a thaw hrawk hrawk mai a. A hmaah chuan pistol hum chungin Nathana chu a ding reng a, ngawi rengin Ruata chu a en a.

Chutah Mawia chu a tlan chhuak a, ringzet hian, "Ka thianpa a kap, SP Nathana'n ka thianpa Ruata a kap hlum.." tiin a au chiam chiam mai a. Ruata chu Rinawma chuan a pawm a, "Ala dam ania, damdawiinah kal pui vat ru." tiin a rak chel chul mai a. Constable ho chuan Ruata chu an pawm a, an tlanchhuah pui a.

Mipui an thinrim ta, "Police Officer tualthattu.." tiin Station chhungah chuan rawn luh an tum ta mai a, guard ho chuan an lo dang hram hram a. Nathana erawh a la ding ngawi reng a, mit khap miah lo chuan Ruata thisen, chhuata luan kawi zun mai chu a en tlawk tlawk ringawt mai.

Rinawma chuan ava pan a, "Sir, kan kal vat angai. Khaw mipuite an thinrim khawp mai, chempui nen an rawn thawkchhuak ania." tiin a mangang hle mai. Zawi sap hian Nathana chuan, "Engatimaw ka tlanchhiat ngawt ang?" a ti tham tiak a. "Sir, khawngaihin...kan kal angai." tiin kawngka hnung lam atang chuan Rinawma chuan a chhuahpui ta a.

**************

ZAn thleng chuan mipuite chu Station awtah chuan an ding khawm a, "SP Nathana lo chhuah tir rawh u." tiin an la au nasa mai. Press mite an lo kal a, NAthana'n school naupang a kap tiin thu an chhuah chuai chuai mai. Ruata nu pawh a tap nasa hle a, a thinrim hle bawk. Khaw pumah chuan news chuan hmun a luah a, mipui thinrim an pung tual tual bawk.

"Inquiry ti turin school naupang pahnih, Ruata leh Mawia te chu Station ah koh an ni a. Mahse Police Officer Nathan Malsawmkima chuan Ruata zawk chu a revolver chuan  akap a, Ruata dinhmun hi a tha lo hle." tiin an puang dum dum mai a, police te chu an mualpho nasa hle mai.

*****************

A tuk zingah chuan DIG bulah chuan Moses-a chuan thil awmzia a sawifiah a, "SP Nathana enuquiry neihdan chu kan hre vek a, pistol hmangin misualte chu a vau thin a..Sir, nangpawn i hriat kha." a han ti a. "A kap lai i hmu em?" tiin DIG chuan a zawt a. "Aih hmulo." tiin a chhang a.

"Anih chuan Nathana chu tinge an puh vek kher, keiman ka lo buaipui ang. Kal tawh rawh.." tiin Moses-a chu a kal tir a. Constable Francis-a a ko leh a, "Engmah ka hrelo." tiin Francis-a chuan a chhang a. "Tinge tuman in hmuh loh a?" tiin a zawt a. "Sir, pawna ka awm lai ania." tiin Francis-a chuan a chhang a.

Naupang pakhat zawk Mawia pawh chu koh  ani a, "Sir, engmah kan tisual lo. Min vau a, thil tisualtu anga kan insawi nan pistol hmangin min vau a ni." tiin a thiamthu chu a sawi zat zat a. "Silai chuan a tin che u em ni?" tiin DIG chuan a zawt a. "Aw...kan hlau lutuk a." tiin Mawia chuan a chhang a.

Constable dang pakhat leh chuan, "Pawna ka awm lai ania, motor ka ti fai a. Silai puak ri ka hria a, ka va lut ta chauh a ni." tiin a chhang leh a. Rinawma a ko ve leh a, "Sir, silai chu a puak ngei alawm. Silaimu pawhin Ruata kha  afuh ngei a, mahse Sir Nathana kah a nilo. Mawia zawk kha a tho thut a, man kan tum a. Chutih lai chuan silai a puak a, kan va en chuan Ruata chu a lo let der tawh a." tiin Nathana chu a tan tlat thung a.

"Amah ngei anilawm ni silai hmetpuaktu chu? Silai chu amah in a puak tihna em ni?" tiin DIG chuan a zawt leh a, mahse Rinawma chuan a chhang lo. Rinawma a chhuak chiah chu Station hnunglam kawtah chuan Nathana chu a lo thu ngawi reng a, "Sir, lungngai suh. inquiry neih mek a ni a, engkim a fel leh vek mai ang." tiin a hnem a.

Nathana chu a ding a, "Rinawm, silai kha clock a nilova..mahse engtin nge silaimu khan pistol chamber kha a sut tlang theih?" tiin a zawt a. "Nia tiraw...silai kha keima dah luh a ni a, nimin khan keimah ngei hian ka la chhuak bawk a. Enge awmzia le?" Rinawma pawh chuan a ti ve nuah nuah a.

"A lock kha keima phelh anilo, anih chua.." a tih lai chuan chumi khua a an DCP leh SI pakhat an lo kal a. DCP chuan, "Sir Nathan, khawngaihin i phone min pe rawh le." a rawn ti a. "Enge awmzia, Sir?" tiin Rinawma chuan a lo zawt vat a. "Ruata kha tun lawk khan damdawiinah a thi a, DGP in nangmah hi a puh che a ni." a ti ta mai a.

Ngawi reng chuan Nathana chuan a phone chu a phawrh a, DCP chu a pe a. Mahse SI pakhat a lo kal a, Ruata chu ala dam reng thu leh fake news mai mai a nih thu a rawn sawi hlauh mai. Nathana pawh chu a phone pek let leh a ni a, Nathana chu inlam panin a haw tlang ta nghal a.

********************

Kawngka a kik a, Sanvi chuan a rawn hawn sak a. "Duhtak, hei ka nu chu a lo thleng tawh a." a lo ti a. "Bawiha, Hyderabad atangin Mizoram thleng ka rawn kal ve vang vang a, min v angai lo ve." tiin a lo nuih a, mahse Nathana chu  akhi suk ringawt. Chutah Nathana chu a ding chat a, kawngka lam chu ava melh leh a.

Kawngka chu a khar a, a hawng leh a, a khar leh a, a hawng leh a. A chetdan chu Sanvi te nufa chuan an lo en reng a, mak an ti kher mai. Engmah sawi lo chuan Nathana chu a chhuak leh a, a bike la chhuakin chak takin a tlan nghal vang vang mai. Sanvi pawh chuan mak a ti kher mai, "Enge maw a hriat le?" a ti nuah nuah ringawt a.

********************

Station lamah chuan Nathana chu ava let leh a, tumah belo chuan silai dahna room lam chu ava pan nghal a. Police dangte chuan an lo thlir thup mai a, NAthana chuan kawngka chu a han hawng a. Rinawma bulah chuan, "Tunge kawngka chhunglam hawlh kalhna khi tichhia?" tiin a zawt a.

"Ka hrelo." tiin Rinawma chuan a lo chhang a. "Chahbi awltu ber chu nangmah i ni lawm ni? Tala a kawngka hi kalh a nih chhung chu a hawlh kalhna khi amahin a chhe thei lo." a han ti leh a, an ngawi thap mai. Nathana chuan complain ziak mektute leh midang ho chu a chhuah tir vek a, police ho chauh chu an awm ta.

Kawngka a kalh a, "Khami ni..Ruata leh Mawia kan dawp ni a Station-a awm te chauh kha awm ula, abak zawng chhuak rawh u." a han ti vak a. Khami ni a a thutna ngaiah bawk chuan NAthana chu a thu leh a, "Rinawm, silai va la rawh." a ti leh a. A hma ni a an chetdan ang chiah chuan an che leh ta, Rinawma chuan silai ava la leh a.

Chutah a maimitchhing vang vang a, a han ngaihtuah let leh a. Minute 2 vel hnuah chuan a rawn meng leh a, "Francis.." tiin a au vak mai. Constable Francis-a chu a rawn lut a, "Enge ni, Sir?" a rawn ti a. Nathana chu a ding a, "Khami ni khan tinge inchhungah khan i rawn luh ve thut ringawt a?" tiin a zawt ta mai a.

"Engtikah maw?" Francis-a chuan a lo ti hu mai. Vin zet hian Nathana chuan, "Khami ni, naupang pahnihte kan man ni khan pakhat zawk kha ka kap palh a. Khami ni khan hmanhmawh hmel takin i rawn lut a, engvanga lo lut deuh thut nge i nih?" tiin a zawt leh a. "Ihh...silai puak ri ka hria a?" a han ti leh a.

"Francis, dawt ah pawh ka awih tur awm ang tal sawi thin teh." Nathana chuan a han ti leh a. Francis-a chu a ngawi ta vang vang a, "Ihh...ka hre leh si..police jeep pakhat saw a ke a thep a, chumi hrilh tur che chuan ka lo lut a ni." a han ti leh a, Nathana chuan a melh rum tawh khawp mai.

Hlauh hmel tak hian Francis-a bawk chuan, "Sir, a thep tak tak alawm." a han ti khur leh dar dar a. "Tu tan nge i thawh? Tu nen nge in in thurual?" tiin Nathana chuan a zawt ta mai a, a phu zuk mai. Francis-a hlau lutuk chuan Constable Dawnga chu ava en a, "Amah nen sawn kan inthurual.." a ti ta mai a.

********************

TO BE CONTINUE