NATHAN SEASON-4 Written by : Aaron Malsawmdawngzuala Episode-9 (PROJECT WIZARD-5)

 NATHAN SEASON-4

Written by : Aaron Malsawmdawngzuala

Episode-9

(PROJECT WIZARD-5)

****************

Airport ah chuan Nathana leh Liantea te chuan Sathyam-a chu an lo nghak reng a, chutih lai chuan Nathana phone chu a rawn ri a. Kamal-a chuan Rudran-a thih thu chu a rawn hrilh ta mai a, Nathana chu a mangang kher mai. "Enge ni ta, Sir?" tiin Liantea chuan a lo zawt a, mahse Nathana chuan a chhang lo.

Chutah le, Army Major Sathyam leh sipai dangte chu an lo thleng ta a. Nathana chuan a lo en a, Sathyam-a ber chu tunge a nih tih pawh a hrechiang ngang mai. An lo kal hnaih veleh chuan Nathana chuan, "Sir, minlo hrethiam lawk." ava ti dek dek chu Sathyam-a chuan a lo nam sawn a, a kal tlang ta daih mai.

************

Nathana chuan DGP hnenah chuan, "Khawngaihin Sir, meeting vawikhat chiah neih leh ka duh a ni. Eng thil emaw tak chuan hma kan la thei a ni, Rudran-a phei kha chu man lo ila chu hetiang chen chen hi kan thleng thei miah lovang." tiin meeting neih leh chu a dil a. "Nathan, he system vang hian kan buai tam tawk ta e. Kan buaina te hi kan chinfel vat angai, chubakah he mihring pa phei hi chu mi pangngai a nilo lehnghal, Major a nih hi. A thin kan tirim a nih vaih chuan engpawh a ti thei a, keini aiin thil tihtheihna a ngah zawk." tiin DGP chuan a lo chhang tlat mai.

"Sir, khawngaihin..." tiin Nathana chuan a dil leh a, mahse DGP chuan a phal tlat lo. Nathana chu a rilru a hah ngei mai, Kamal-a nen chuan Station lam an pan leh mek lai chuan a phone a rawn ri a. A han pick up chiah chu aw thum tak mai hian, "Hello SP Nathan, min hmuh i duh viau a ni tiraw? Army Campus-ah..tlai dar 4 ah aw.." tiin phone chu a dah lehnghal daih mai.

**************

Tlai dar 4 a lo ri a, Nathana chu Army Campus ah chuan ava kal ta ngei mai a. Sathyam-a office ah chuan a lut a, "Khawngaihin thu rawh." Sathyam-a chuan a lo ti a. Nathana chu a thu a, chuveleh sipai dangte chuan NAthana chu an man bet thut mai a. Thutthlengah chuan an phuar ta mai a, "Engemaw in tih le?" tiin Nathana chu a tal vak vak a.

An phuar zawh chuan Sathyam-a chuan, "Naute u, chhuak ru le." a ti a, sipai dangte chu an chhuak ta a. Chutah Sathyam-a chuan Nathana hmaiah chuan abeng siah siah mai a, "Haha, ahma pawn ka hrilh tawh che kha. Engpawh ka ti thei, min en ta che, Sipai major ka nih tak der hi. A dawh lehah chuan Minister pawh ka ni thei, chuan...prime minister pawh. Anihna takah chuan American President pawh ka ni thei, ka duh phawt chuan. Enteh Nathan, kum 1000 chuang zet ka dam thei tih hre rawh. Thi theilo ka nih hi, hei tunah pawh vawi 5 lai ka thih hnuah ka rawn dam leh zel hi, nangpawn i hmuh vek kha. I tih theih awmchhun chu thil pakhat chiah, tlanchhe mai rawh. Min bei ve vak duh suh, tlawm mai rawh." tiin  anuih tiah tiah mai a.

Thinrim tak hian Nathana chuan, "Ka dam a ka thawk tek tek chhung hi chuan ka tlanchhe lovang, ka bei zel ang che." tiin a chhanglet ve sak mai a. "Haha...naute u, hepa hi hruai chhuak teh u." tiin Sathyam-a chuan a naute chu a au leh a. An lo lut a, Nathana chu an rawn phelh a. An kai chhuak a, "Vawikhat mah lo kal tawh suh." tiin an luhsan ta hlawm a.

*****************

A thil tawn te chu Nathana chuan Dr. Velyudham hnenah chuan  a hrilh ta vek a, "A pawi hle mai Nathan, tihtheih kan va nei talo ve. Tih theih awmchhun chu a laboratory hmuhchhuah a nimai, kan tihchhiat vat a ngai a ni." Dr. Velyudham-a chuan a han ti a. Nathana pawh chuan, "Hma ka lo la vat ange." a ti a.

Zanah chuan Nathana leh Kamal-a leh Susan-i te chu an titi a, "Kamal, team 2-a kan in then angai ang. Lab chu kan zawn hmuh angai phawt anga, chutih lai chuan Pramod-a hi lab-a a lo kal tur kan lo dang bawk ang. Team 1 ten amah chu an zui ru anga, tunge a hmuh a, khawnge a kal tih an enthla anga, team 2 ten staff-te profile, Susan-i'n a filter ho hmang hian survey an lo nei thung ang. Retired Police Officer te, Tamil Nadu Police te zinga ka hmelhriat tha tak tak te leh detective tha tak tak te pawh an puihna kan dil mai ang." tiin Nathana chuan ro a rel ta a.

*******************

A tukah chuan nurse pakhat hian Nathana chu rawn phone-i'n Pramod-a nupui, coma-a awm mek chu a rawn harh zeuh thu a rawn hrilh ta mai a. Rang tak chuan Nathana, Susan-i leh Kamal-a te chuan Hospital lam chu an pan ta nghal a. An han thlen chuan Pramod-a nupui chu che miah lo hial maimitchhingin a lo mu leh reng tawh a, "Nichin deuh khan a rawn meng a, a kut a rawn ti che a. Ka rawn call che a, mahse tihian unconcious in a awm lehnghal daih alawm." tiin doctor chuan a lo hrilh a.

Nathana kal leh tur chiah chu Pramod-a nupui chuan Nathana kutah chuan a rawn vuan ta tlat mai, NAthana pawh a ding chat a. "Ka pi, ka pi." tiin Nathana chuan a be vak vak a. Pramod-a nupui chuan a lu a rawn ti che a, "Ka pi, i pasal chungchang engemaw tal min hrilh thei angem?" Nathana chuan a zawt leh a.

Maimitchhing chung reng chuan Pramod-a nupui chuan a lu a lo bu nghat mai a, a kut chu a lek kang a. Chuveleh Nathana chuan doctor bulah chuan, "Paper leh pen lo la vat rawh." a ti a. tichuan Pramod-a nupui chu pen an han hum tir a, theih leh theilo hian paper ah chuan a rawn ziak a. Mahse rinbial (circle) ringawt chu a ziak a, nikhawhrelo chuan a awm leh ta nghal daih mai.

Han biak leh an tum pawh chuan a chhang thei tawh hauh silo, "Enge a ziah a, Sir?" tiin Kamal-a chuan a lo zawt a. "A thai bial ringawt." tiin Nathana chuan a chhang a. Beidawng tak chuan ward atang chuan an chhuak leh a, "Pawisa thir emaw, thla(moon) emaw, ni(sun) emaw, ngun pawh a ni thei." tiin Susan-i chu a phun nuah nuah a.

Chutih lai chuan hmaia thisen kai hnuang mai, na ti a rum vawng vawng damlo pakhat chu doctor te chuan an rawn nawr phei a. Nathana'n a han hmu chu a lu a hai leh ta der mai, "Thu rawh...hetah hian thulawk ang u." tiin Susan-i chuan a bula thutthleng ah chuan Nathana chu a thuttir a.

"Engati nge, Sir?" tiin Kamal-a chuan a lo zawt a. "I naupan laia in tuichhunchhuah a i tlak khan traumatic experience a neih tir che a, kha kha ila hlau ni berin ka hria, Nathan..hmanni ah min hrilh kha, khavang khan niin ka hria." Susan-i chuan a han ti a. Chuveleh Nathana chu a rawn harh zawk mai a, "Tuichhunchhuah...tuichhunchhuah..Pramod-a nupui khan circle a ziak a, tuichhunchhuah pawh a bial tho ania. A tel ve thei tho lo maw?" a rawn ti a.

"Ngawi teh, Dr.Pramod-a te in hnungah khan tuichhunchhuah a awm kha..mahse a lab chu a awm ka ringlo. A chhan chu  heta a lab te kha chu a tichhe vek tawh a, Mizoram lamah a rukin lab thar a siam thu a sawi kha..." Kamal-a chuan a lo ti a. NAthana chu a ding thut a, "Nilo, tunah Tamil Nadu ah a awm a. Kha a lab kha a tihchhiat tak tak ka ringlo, tichhia pawh nise a siamtha leh vek tawh ang. Mizoram lama a lab zawk kha eng tin tin emaw a tichhe leh daih tawh zawk ang, an in hnunga tuichhunchhuah chu va check hrim hrim teh ang." Nathana chuan a lo ti a, an kal ta a.

*****************

Zan ah chuan investigation nei tur chuan Police Force te chu PRamod-a te in hnunga tuichhunchhuah awmna lam chu an pan a, hnahthel hian a lo bawm khat vek mai. A chhinna rangva lian tak mai chu an han la sawn a, chutah hnaite ah hian chu tuichhunchhuah chu a lo tawp der mai, thuklo tak ani, khu chen vel bak a nilo.

Kamal-a chu a nui suk a,"Tuichhunchhuah pawh va ni suh, tui pakhatmah pawh a awmlo." a han ti a. Police pakhat chu a chhuk a, kawngka tereuhte, mihring len tawkna awm vela te chu a lo awm leh a. A han hawng a, a chhungah chuan chamber ni awm tak hian herhhawn turin motor steering ang tak mai biak hi a lo awm leh a.

"Sir, chamber ava ang ve." police chuan a han ti a. "Kamal, driller hmangin tichhe rawh u." a ti a. Tichuan a zan a zan chuan mechanic an ruai a, driller hmang chuan chamber chu hawn an tum leh ta a. Reife hnuah chuan an lai khuar thei ta a, rin ang ngeiin lab a lo ni ngei bawk. Mahse a chhung erawh an la lut theilo, password a ngai tlat mai.

Nathana chuan expert te chu a ko leh a, tichuan password chu an hack thei ta a. A chhungah chuan an lut thei ta, laboratory zau tak leh pui tak a ni. An han enkual a, khawl thil hlir hi a lo awm a. CT Scan tihna ni awm tak lian pui a lo awm bawk a, a chhung chu a zauvin a ropui kher mai.

******************

Sathyam-a chu thlamuang takin zu a in a, a zai rut rut a. A phone a rawn ri a, Nathana message a ni tlat mai. A han hawng a, video hi a lo ni a. Chu video chu a download a, a han play a. Video ah chuan Nathana leh police dangte chu an lo lang a, "Major Sathyam, hei hi animaw i hringnun office chu? Tunah chuan kum 1000 chuang i dam thei dawn em lo en chiah ila, anih phawt le." tiin video chu a tawp leh daih mai. Chutah Sathyam-a chu a nui ta huah huah mai a, engatan mah a ngaih loh hmel kher mai.

*****************

Chu lab ah chuan Doctor Velyudham-a pawh chu an hruai lut ve a, doctor chuan lab chhung chu uluk tak chuan a han enkual a. "Institute-a a lab nen khan a inang chiah a ni, a structure a thlak hret chauh mai a ni. Mahse component pawimawh tak pakhat chu a awmlo niin a lang, ka han enchiang leh lawk." tiin doctor chuan khawl te chu a han enchiang leh a.

Chutah bang kila screen tereuhte, number lo awm teuh mai chu doctor chuan a hmu fuh a, "Nathan, ka hmu e." a ti vat a. NAthana pawh chuan ava pan hnai a, number chu doctor chuan a han chhu a. Mahse wrong password a inti tlat mai, hacker te chuan password chu hack tumin an han bei leh ta a.

Mahse an thei ta tlat lo, "A theih ngang loh a ni, Sir. Random passowrd generator chak tak a ni, minute 5 tinin passowrd a inthlak zel a ni." hacker pakhat chuan a ti a. Chutih lai chuan Kamal-a phone a rawn ri a, a nupui a lo ni reng mai. "Sir, ka nupui ania, ka'n be lawk aw.." tiin pawnah chuan a chhuak a.

"Enge ni a? Ka lo haw dawn lawm...hna kan la thawk a, Mizoramah ka la let mai dawnlo, enge i lungngaih vak a?" Kamal-a chuan a han ti nghal bawrh bawrh a. Mahse a nupui chu a hlauhthawn hmel kher mai, phone chu a dah daih lehnghal. Ahnuah chuan video call hmang chuan a rawn call leh a, Kamal-a chuan a han la a.

Chutah le, a nupui chu thutthlengah phuar beh in a lo awm reng mai a. A nupui chuan tap chung hian, "Duhtak, khalai hmun atang khan kal vat rawh. Ka fate hi an him ngei tur a ni, engmah ti ve suh. Khawngaihin..ka.." a tih lai chuan thisen a per chhawk a, a chal darah chuan silai mu a bur va mai.

Kamal-a chu a phu zawk a, "Nilo..Duhtak..Subha..Subha.." tiin a tap a, a hmui a hup a. Chutah a fanu te pahnih aw ngei mai chuan, "Anu..anu.." tiin an au a, an tap bawk a. Chutah a phone creen ah chuan Sathyam-a  a rawn lang thut mai, "Ka sawi ang zelin ti la, tichuan i fanu te hi an him ang." a rawn ti ta chhur chhur mai.

********************

Ngawi reng chuan Kamal-a chu lab lamah chuan a chhuk leh a, password chu ava chhu ta mai a. Sathyam-a message thawn chu a en pah a, tichuan password chu a chhu zo ta. A secured name chu PROJECT WIZARD niin, password chu #UFC679* a ni. A chhut zawh veleh chuan cube box a rawn chhuak a, chu chu Kamal-a chuan a la a. A ak ta daih mai a, tichuan pawn lamah chuan a chhuak leh a.

Nathana leh hacker te chu pawn lamah chuan an lo inbe mek a, "Password generator develop tu company te hi kan zawnchhuah angai, chutilo chu kan hawng theilo." tiin hacker chuan a lo hrilh mek a. "Anih leh vaw chhe ta vek ila?" Nathana chuan a han ti a. Hacker chuan, "A puak mai ang tih te pawh a hlauhawm alawm." tiin hacker chuan a chhang a.

Nathana chu a nui suk a, "Enteh, hei hi movie a nilo...chutin a puak ngawt bik nang." a ti a. "Sir, movie ai ai pawhin a rapthlak thei a ni..chutiang chu a tih chi lovang." tiin hacker chuan a lo chhang leh a. Chutih lai chuan a ruk thei ang ber hian Kamal-a chuan motor lam a pan a, an inlam pan chuan a tlan haw ta daih mai.

****************

An in chu a thleng a, tichuan a kawrhmaah chuan recorder a vuah ru a. Tichuan Kamal-a chu motor atang chuan a chhuk a, an inlam chu a pan ta a. Chutih lai chuan Nathana te pawh chu lab ah chuan an chhuk leh a, mahse an thil zawn ber cube box lo awm ta miahlo mai chu an hmu ta.

"Liante, Liante...tinge cube box hi a bo daih a?" tiin Nathana chu a au vak vak a. "Ka hrelo Sir, nichin kha chuan Kamal-a  alo kal a, abak tumah an lo kal lo." tiin Liantea chuan a lo chhang a. Thinrim tak hian Nathana chuan, "Hrep tak a..." tiin pawnlamah chuan a chhuak ve leh ta nghal a.

***************

Kamal-a chuan inchhung a lut a, a hma zawn taka a nupui ruang, thutthlenga lo let reng mai chu ava hmu ta. A bulah chuan meizial dum hlang zu chung hian Sathyam-a chuan lehkhabu a lo chhiar a, Kamal-a chu a hlauthawng kher mai. Sathyam-a chu a rawn dingchhuak a, Kamal-a chuan cube box chu a pe a.

"Ka pu, khawngaihin ka fate saw tina ve lul suh..." a tih lai chuan room atang chuan afate chuan tap chung hian, "Anu...apa..." tiin an rawn au vak vak mai a. Ngawi reng chuan Sathyam-a chuan Kamal-a chu a melh reng a, "Ka pu...khawngaihin.." a tih lai tak chuan a pistol ken lai chuan Kamal-a chu a kap ta siah siah mai.

***************

Nathana chu Kamal-a te inah chuan ava lut a, kawngka bul lawka Kamal-a ruang lo let reng chu a hmu a. NAthana chu a thingthi hnawk a, "Nilo..Kamal.." tiin a mittui a tla a. A bula Kamal-a nupui Subha-i ruang chu ava hmu leh a, tichuan roomah a tlan lut leh a. Room ah chuan Kamal-a fanu pahnihte ruang chu ava hmu leh a, a rilru ana kher mai.

Police dangte pawh chu an lo thleng a, in vel chu an enfiah a. Kamal-a kawr hmaa recorder pawh chu an hmu chhuak a, enfiah turin Station lamah an la phei nghal a. A tukah chuan Kamal-a te chhungkaw pali ruangte chu an sun a, Police te chuan zahna lantirin salute an pe a, ropui taka vuiliam a ni.

***************

Kamal-a recoder hmang chuan tualthattu chu Major Sathyam-a ngei a ni tih hriatchhuah a ni ta a, police force te chu Army campus lam pan chuan Sathyam-a man turin an va kal ta a. inchung berah chuan thlamuang tak hian Sathyam-a chuan coffee a lo in a, lehkhabu a lo chhiar bawk a. Police ho an rawn thleng chiah chu a hawi kual a, a nui suk ringawt.

"Khai aw..inva tam ve. Hrelawk ila chu eitur te ka lo order mai tur ania, ava pawi ve aw.." tiin a lo la nui ham ham zui. DGP chuan, "Man i ni e, Major...heta hi evidence pawh a awm e." tiin laptop chu a hmaah chuan an va dah a. Video ah chuan Sathyam-a'n silai  a hmet puak lai chu a lo lang a, Kamal-a record vek kha a ni.

"Dr. Pramod-a lab atangin engkim Colonel (kernel) hnenah report vek a ni." DGP chuan a han ti leh a. Dawhkana pen leh paper chu lain Sathyam-a chuan, "Lawk aw.." tih pah chuan paper ah chuan thil a ziak a. Paper chu DGP a pe leh a, DGP in a han en chuan paper ah chuan rinbial tamtak hi a lo inziak a.

Chuveleh Sathyam-a chuan pistol a phawrh thut a, DGP chu a tin ta mai a. NAthana leh midangte chuan Sathyam-a chu an tin ve nghal thup a, "Min kap hlek suh u, anih loh chuan DGP hi a thi a nimai." tiin Sathuam-a chuan DGP chu inchhungah a luh pui a. Cube box te chu lain an rawn chhuak leh a, tin reng chung chuan inhnuai lamah a chhuk pui ta a.

Chutih lai chuan SAthyam-a nupui leh fanu te chu an lo chhuak a, "Enge ni ta? Engthil nge thleng a?" an rawn ti a. Thawveng zet hian Sathyam-a chuan, "Chawhmeh tui deuh lo siam ang che, zanah ka lo haw ang." a han ti a, tichuan motor chhungah chuan DGP chu a luhpui ta a. Chak takin an tlan a, Nathana te chuan an umzui ve nghal a.

****************

DGP chuan motor chu a khalh a, a bulah chuan Sathyam-a chuan pistol chuan a tin reng a. "He pistol ah hian mu 12 a awm a, a tawk chiah ang ka ring." a han ti vel a. DGP chuan, "Major i ni a, engvangin nge hetiang thil hi i tih?" tiin a zawt a. Sathyam-a chu a nui a, "Enteh, mihringte kan lo pian chhuah hian enge kan duhthusam ber thin i hria em? Thih theihlohna, thihtheihlohna a ni." tih pah chuan motor-a tape chu ring takin a play a, nuam a tih hmel kher mai.

Chutah an chuanna motor petrol chu  zo dawn ta mai, "Petrol thun angai." DGP chuan a ti a. "A tha e." tih pah chuan Sathyam-a chu tukverh ah a dak chhuak a, abula bike-a tlan mek, police pakhat chu a kap thal tawp mai. Nathana chuan police dangte hnenah chuan, "Amah kha va hnaih lutuk suh u, a bikin two-wheeler phei kha chu.." tiin a au vak vak a.

Tichuan DGP leh Sathyam-a te chuanna motor chu petrol station bulah a ding a, reiloteah Nathana te pawh chu an rawn thleng ve nghal a. Silai chuan an tin thup a, NAthana chuan muangchang chuan ava pan hnai a. Mahse motor chhungah chuan Sathyam-a a lo awm ve hauh lo, DGP ruang chiah a lo awm.

DGP chu a lu a kah a lo ni a, NAthana chu a thinrim hle mai. Chutah tui far ri kauh kauh thawm a hre leh ta a, ava en nak chuan petrol a lo inthun baw zawih zawih mai hi a lo ni a. Chu pertol luang chu a chhui zel a, a bul hnaih lawkah chuan meizial bung, la ling vawt mai chu a lo awm reng mai.

Rang takin Nathana chu a tlan let a, chutah mezial ling chuan a kang kai ta. Motor chu a puak dur mai a, chumi kang chuan petrol station pum chu a ti puak bawk a. Vanneih thlak takin thi an awmlo hlauh a, an insaseng hman vek a ni. Nathana pawh hliam na lutuk a nei lova, mahse police dangte erawh an hliam nual a, hospital panpui nghal an ni.

*****************

ZAnah chuan Nathana chu hospitalah chuan a vei kual reng a, "Khawnge a awm ang? Khawnge a awm ang?" tiin a phun mual mual a. Chutah a ding chat a, ahmaa meeting an neih a doctor Velyudham-a sawi, Pramod-a'n institute ah a research tih nan bika lab a siam thu a sawi chu a hrechhuak zawk mai.

"Liante, Doctor Velyudham hi a next target chu a ni. Kha institute lab a access nei awmchhun chu Doctor Velyudham hi a ni." tiin hmanhmawh takin doctor te in lam pan chuan an kal leh ta nghal a. In an va thlen chuan kawngka chu tala in a lo inkalh tlat mai, tukverh chu a han bih leh a. Parda phen ah chuan Doctor Velyudham-a fapa, thutthlenga phuar hlawm a lo awm chu ava hmu ta.

Nathana chuan tala chu a kap chhia a, inchhungah chuan a lut a. Velyudham-a nupui leh a fapa, thutthlenga phuar hlawma lo awm chu a hmu a. Velyudham-a fapa chu thawh hah nei a lo la ni zui a, a thaw vak vak mai. "Liante, tui va la rawh." tiin Nathana chu a mangang hle mai. An phuarna te chu an phelh sak a, "Bawiha, khawnge i inhaler?" tiin a zawt a.

Chutah room atang chuan doctor fanu chu a rawn chhuak a, pistol a rawn hum chhuak tlat mai. NAthana leh Liantea chu a tin a, "In dam a nih chuan kha mihringpa khan ka pa a that dawn a ni." tiin a tap tuau mai a. Nathana chuan, "Bawihi, khawngaihin ti suh. Min ngaithla teh, tunge pistol kha pe che? Enteh...i nau hi a thaw a hah a, khawnge a inhaler a awm?" tiin a zawt a.

Liantea chuan, "Khawimaw..pistol kha.." tiin va chhuhsak a tum a. Doctor fanu chuan silai chu a hmetpuak ta, Liantea ban chu a thi zawih zawih mai a,  a thal tawp mai. A ipte atang chuan inhaler chu a phawrh chhuak a, a nau chu a pe a, a nau chuan a hip nghal hrawk hrawk mai. Doctor fanu chuan  aphone chu  a phawrh leh a, apa chu ava phone a.

***************

Sathyam-a leh Doctor erawh chu Institute lamah an lo awm daih tawh a, Pramod-a lab ah chuan an lo awm mek a. Doctor chu a phone a rawn ri a, "Umm...NAthana chu a thleng tawh animaw? Lee..password chhu la, access rawh le." tiin Sathyam-a chuan doctor chu a han vau khur khur a, doctor chuan a access ta a.

Hard disk a lo chhuak a, tichuan chu hard disk ah chuan doctor chuan cube box chu  a thun ta a. Chutah an hmaa khawl chu a rawn eng ta vut a, machine voice chuan "PROCESSING START" a rawn ti lauh lauh mai a. Chuveleh Sathyam-a chuan a pistol ken lai chuan doctor lu ah chuan a chhu chawrh mai a, doctor chu nikhawhrelovin a thal tawp mai.

***************

Doctor fapa chuan Liantea ban chu a tuam sak a, a fanu erawh chuan Nathana chu ala tin reng thung. Nathana chua tho a, pawnah chhuah a tum a. "Nilo..kal suh, ka kap ang che." tap chung chuan doctor fanu chuan a ti khur dar dar a. Mahse Nathana chu a chhuak lui a, Liantea chuan a zui bawk a, doctor fanu chuan a kap ngam ta lo.

**************

Sathyam-a chuan silicon injection chu a target dawt leh thluakah chuan a kap lut leh a, processing a in tan leh ta nghal a. Mahse chu a target dawt leh chu tunge a sawi hauh lo, machine chhungah chuan a muttir reng a. Chutah CCTV camera a han en a, screen ah chuan NAthana lo kal phei lai a lang ta tlat mai.

Processing chu a tan ta thova, 1% atanga in tanin zawimuang chuan a kal chho ta bek bek a. Nathana chu a rawn lut a, chuveleh Sathyam chuan a lo kap nghal a. Vanneihthlak takin a kap fulo hlauh mai, lab chhungah chuan an inkap ta tiah tiah mai a. Silaimu zawh thak thleng chuan an inkap a, silaimu awm tawh loh hnuah pawh chuan an insual leh a.

Rei fe an insual hnu chuan Sathyam chuan Nathana chu a hneh ngang lo, a thi phung mai. Mahse khawl off tuma Nathana kal tur chu a lo dang leh a, 90% lai a ni tawh. NAthana chuan a hnek siah siah a, darthlalang kehthem chu chharin Sathyam-a hrawkah chuan a chuktuah ran mai a.

"Khawl hi tichhe rawh...off rawh..anih loh chuan ka that ang che." tiin a vau a, mahse SAthyam-a chu a nui vak vak ringawt. Chutah 100% COMPLETE a rawn inti ta mai a, processing chu a zo ta. Machine lian tak mai kawngka chu a rawn inhawng a, Nathana chu ava hawi phei a, mak a ti kher mai.

Machine chhung atang chuan Dr Susan-i a rawn chhuak ta mai a, a next target chu Dr Susan-i a lo ni reng tihna a nih chu. "Awii..ka lu ana lutuk." tiin Susan-i chu a ner nung mai a, chutah Nathana ava hmu chu mak a ti kher mai. Sathyam-a chu a nui huah huah a, "Nathan..Nathan...min han enteh, ani saw en lo khan min han en teh." tiin a nui vak vak a.

Nathana chuan rum zet hian a melh a, "Nathan, min that thei tawh ang. Min that rawh le, min that anih chuan i doctor saw keimah ka ni tawh ang...min that rawh...min that ta che." tiin a nui tiah tiah mai a. NAthana chuan tih ngaihna a hre talo, a that a nih chuan PRamod-a chu rawn dam lehin Susan-i taksa ah a lut mai dawn bawk si.

Susan-i a that a nih chuan pawisawi lo that angin Nathana chu man theih hial a ni bawk si a, Sathyam-a chu a that ngam hlawl lo a ni. "NAthan, enge awmzia?" tiin Susan-i lah chuan a hrethiamlo kher mai, mahse Nathana erawh a ngawi reng thung. Chutah Doctor Velyudham chu a rawn harh chhuak hlauh mai, "I duh ang hlirin thil hi a thleng dawn biklo.." tih pah chuan Sathyam-a chu tiang lian tak hian a rawn hlap pawp mai a, "Nathan, lo manbet rawh." a ti nghal a.

Nathana chuan a lo man bet a, Sathyam-a chu a che thei der lo mai. Chutah Doctor Velyudham chu Susan-i lam apan a, machine chhungah chuan a  nawr lut leh a. "Hey, enge awmzia?" tiin Susan-i chuan a hrethiamlo kher mai. Mahse engmah sawi hman a ni tawh lo, Susan-i chu a chiu mu ta tawp a.

Chutah Doctor chuan khawl chu a han khawih ta a, Susan-i thluaka electronic gel chu a hip chhuak leh ta vek a, Susan-i pawh a him ta der mai. "Nilo...nilo...doctor..ka plan i tichhia  ani." tiin Sathyam chu a au vak vak a. Doctor chuan a zo ta, "A tawp ta...engkim a tawp ta." tiin a thaw hak mai.

Chutah Nathana chuan Sathyam-a chu a rek kang lawp a, "Dr PRamod...a tawpah chuan a chak zawk chu kei, SP NATHAN..Mizoram Police Officer ngei hi ka ni e." tih pah chuan a ringruh a thuai ri tuar a, Sathyam-a chu a thi ta a. Sathyam-a  athih rual rual chuan Dr PRamod-a thluak pawh a thi ve ta.

******************

Chu case hautak em em mai chu a tawpah chuan chinfel a ni ta a, Nathana pawhin chawimawina  a dawng hial mai. Liantea nen chuan Mizoram lamah an haw leh ta a, Kamal-a erawh chhan theih a ni ta lo a nih kha. Institute of Neuro Science chuan Dr, Susan-i pawhin hna sang zawk a hmu a, ramdanga zir chhunzawm turin Nathana te nen chuan an in thlah liam ta a ni.

****************

THE END