NATHAN SEASON-4 Written by : Aaron Malsawmdawngzuala Episode-1 (THE LION RETURNS - 1)

 NATHAN SEASON-4

Written by : Aaron Malsawmdawngzuala

Episode-1

(THE LION RETURNS - 1)

*******************

(A hmasain Nathana hnuchhuina lo chhiar thin tute leh ngaithla thin te, in zavaiin chibai leh vek u. Nathana thawnthu hi tih tawp mai ka tum tawh viau nangin zawm zel tura min ngen nasat em avangin ka rawn ziak leh dawn chu ania, mahse a hma ang em kha chu ka pha tawh lo maithei. Min lo chhiar sak leh vek dawn nia, ka lawm e.)

ACP lampum hi in hria em? Assistant Commissioner of Police tihna a ni. In lo hre tawh tho mai thei a, mahse ka han sawi leh duh kher nachhan chu ka nihna, ka hna chelh mek lai hi ACP a ni ve tawh tlat. ACP nih tak chinah chuan hna pawh a lo hautak deuh a, office ah thuin midang kan tir kual zat zat ang chu tih nakalaiin case buaipuitu ber ka ni ta fo mai.

Kan SP thar Nathan Malsawmkima ve lah hi, a kum a tam tulh tulh a, a lang naupang tawlh tawlh zawk emaw tih mai tur a ni. ASP Amanda-i erawh case dang buaipuiin vai ramah a zin a, a cham rei angreng tawh khawp mai. Kan post an sawn dun daih tawh a, an sawnna pawh a rei tawh mai.

A tir chuan Nathana nen chauh min sawn a, ahnuah Amandai leh Liantea te an rawn tel ve leh a, kan awmho leh vek tawh zawk. Kan post an sawn hnu hian Nathana hian kan Station bul hnaih deuhah in a luah a, a nupui fanau te nen an awm mek a. A nu leh pate erawh an mahni in lamah an awm thung a, engtia han awm zel tur nge tiin an chhungkua in thu an la rel fel zo hleithei lo a ni awm e.

*******************

Nathana awmna bulah hian nuthlawi pakhat, keini aia u ve fe mai hi a awm a. A hming chu Lalhlupuii  ani a, U Hlupui tiin kan ko mai thin. Fa pathum, mipa 2, kum 10 leh kum 8 mi leh an te ber hmeichhe naupang kum 6 mi lek te an ni. Nathana nen chuan an innel em em a, Nathana pawhin chaw eiah te pawh a sawm fo a ni awm e.

Kei erawh mi rethei tih takah chutia in han luah ve tawp mai chu ka budgetin tlin ve hek lo le, petrol ren deuh deuhvin ka Gixer nen chuan kan la inchhawm dun chho zel a. CAse chinfel harsa deuh lah tunlai tak chu a tlem bawk nen, duty pawh a kalkawng a hla tih mai loh chu  anuam thin khawp mai.

Kan Station hian hmanni deuh atang khan IG thar kan nei a, a hmel en reng reng pawh a eiru hrat tih hriat reng reng ang chi deuh kha ania. Kan pa te rual daih emaw tih mai tur hian a hmel a chal reuh a, mi lah chu a han tham lo em em mai thin lehnghal a. Nathana hnen atangin zaidam ka zir tawh hlauh zawk a, ka mize hlui a chhuak thin teuh khawp mai.

*******************

Vanduai thlak tak maiin chumi venga mi tho, reporter pakhat, Nathana thiannu chu zan khat chu accident vangin a thi hlauh mai. Keimah tak phei chuan ka lo hre lutuk lo zawk a, mahse a thih nia Nathana tuar na lutuk khan a thiantha tak a ni tih min hriat chian tir ve chauh a ni. Mahse accident vang liau liau a ni a, case engmah siam zui a ni ta lemlo.

Nathana pawh a thiannu boral chuan thawng hle mahse, kar hnih khat vel bak a daih bik chuang lo. Mak tak maiin Nathana hian tunlai tak chu zu hi a heh angreng khawp mai a, Sanvi pawh hian a mangan thin thu min hrilh ta zauh zauh mai. Engpawh chu nise, kan titi rei ta. Hnuchhuina lamah i lut tawh ang aw, khai le...

****************

Nikhat chu Station ah chuan U Hlupuii a lo lut hlawl mai, "Ehe..nangmaw?" tiin ka lo be nghal vat a. DGP nen a office-a kan lo inbiak lai tak a ni lehnghal a, kan bulah chuan kan IG thar sual zet Duhsaka pawh a lo awm ve bawk. "Enge ni ta, ka pi?" tiin DGP chuan a lo zawt a. A bag atang chuan diary tereuhte hi rawn phawrhin DGP chu a pe a, "Kha en rawh." a ti a.

DGP chuan diary chu  ala a, a lai takah chuan phone number hi  alo inziak a, abak engmah dang a inziak lo. "Ka hnathawk zo ka scooty parkna lam ka pan a, garage ah chuan kan thawhpui officer pakhat chu patling 5 vel hian an lo man a. A duhlo chung motorah an hnawh lui a, an kal dawn khan diary kha oofficer chuan a thlauh a ni." a ti ta mai a.

IG Duhsak chuan awihloh hmel zet hian, "I hmu tak tak amaw?" a lo ti deuh kher a. Mahse U Hlupuii chuan  achhang lo, DGP chu en lehin, "An man bet lai leh motora an hnuk lut lai kha chiang takin ka hmu a ni, Sir. An kal dawn chiah khan diary kha a thlauh a, a chhunga number kha kan Minister zinga pakhat Pu Rosanga phone number ngei a ni tih pawh ka hria." a ti ta siah siah mai.

"Ava mak awm ve." ka lo ti ve zauh pek a. U Hlupuii bawk chuan, "Engtin emaw kawng zawng tak chuan Minister hian inrawlhna a nei ve hian ka ring tlat a ni, Sir." a han ti leh a. DGP chuan IG chu a en a, "Pu Duhsak, government employee pakhat kidnap chungchang a ni a...nang Minister Rosanga vengtu ber i ni bawk a, engvanga he an victim diary ah hian Minister Rosanga phone number awm nge a nih i hre mial em?" tiin a han zawt a.

Ngaihsam hmel zet hian Duhsaka chuan, "Ani tan te chuan hetiang diary te hi chu chhuanlam pakhat mai a ni, politician te tih hmingchhiat nan te chuan thil ho te te pawh an hmangtangkai thiam vek alawm. Journalist a ni miau a, journalist te chuan Politician te tih hmingchhiat bak tum dang an nei hleinem."  ati ta zuah zuah mai. Ni e, U Hlupuii hi Journalist a ni.

Thinrim tak hian U Hlupuii chuan, "Engmaw i sawi a? Hetah hian Minister Rosanga diklohna leh tlinlohna sawi tura lo kal ka ni lo, complain ziak tura lo kal mai chauh ka ni." a ti ve hrep mai. "Dawr hrang hrangah hetiang diary te chu cheng 15-30 in a tam lutuk, Sir. Hetiang hian Minister  te tlinlohna leh diklohna pholan tum reng rengin an buai a, thang an kam thin a ni." tiin Duhsaka chu ala pawr nasa mai.

"Pu Duhsak...ngaithla teh.." tia U Hlupuii han tawng ve dek dek chu vin zet hian Duhsaka chuan, "Ngawi hmak rawh, ka la sawi zo lo." a lo ti let hrep mai. Chutah DGP chu a en leh a, "Hetiang hmeichhia te hi chuan maw ka pu, Pu Rosanga hi tunge a nih an hrelo. Pu Rosanga hi minister zahawm tak a ni a, mi tha tak a ni bawk." a la ti ta deuh deuh a.

Chutah kawngka lam atang chuan aw nalh zet leh pa tak mai hian, "Animaw IG Sir..mahse ka lo hriat ve dan chuan Pu Rosanga hi eiruk vang leh a assistant khuaikhem tum vang khan a hmingchhe hrep tawh a, mi tha tak a ni tia an sawi ka van hre ngai silo ve." a rawn ti thut mai a. Kawngka lam kan va en chu, SP Nathana a lo ni reng mai.

Nathana chu a rawn nui lut neuh suk a, "Ti hian ti teh ang, IG Sir. Police Station hi khar vek ila, Lodge atan hmang daih mai ila. Han ngaihtuah teh, Sawrkar tana a hlawk dan tur zia mai chu." a la rawn ti zui, ka nui teuh thin ngei mai. Thinrim tak hian Duhsaka chuan, "SP NAthan, fiamthuna hun a nilo ania." a lo ti hrep mai.

"Awww..ka lo tawnghnem deuh em ni, Sir?" ala ti deuh kher zui, Nathana hi chuan he IG inla pa satialh hi chu a senior mah nise a hlau lo ve tawk, a chhang fawk fawk zel mai a, a chang chuan ka lo ip nasa thin. U Hlupuii chuan Nathana chu a en a, "Pu Nathan, mi tupawh..i fak nasat poh leh a zahawmna a tlahniam zel ang." tih pah chuan Duhsaka chu a en leh deuh kher a.

Duhsaka chuan rum zet hian U Hlupuii chu melhin, "Min sawichhan em ni a?" a ti khur khur mai. U Hlupuii lah chuan, "Nangmah ka ti kher lo che, mahse i duh chuan i inngaihbel thei ang." a ti leh deuh sak mai. "Enga? Tiang chuan min lo ngai amaw?" tiin a aia rum chuan a melh leh khur mai a.

"I nihna anih chu ka sawi.." tiin U Hlupuii chu ala tlawm lo nasa mai. "Ngawi rawh.." tiin Duhsaka chuan a han vin leh hrep a, "Nang zawk kha ngawi rawh." tiin pakhatin a lo chhanglet leh, an inhnial ta vak vak mai. DGP chuan vin zet hian, "A tawk, engthil nge in tih hi? Hei hi ka office a nih hi, bazar a ni lo." tiin a hau dun hrep mai a.

U Hlupuii chuan hlau lo tih hriat tak hian Duhsaka chu a han melh leh ran mai a, "Eng ang pawhin thup pui tum mah la e, thudik chu a lang chhuak tho tho ang. Police Officer tu emaw ber chuan Minister Rosanga hi a thurual pui a ni tih hi a dikzia ka la lan tir khawp ang, ka kal ange." tiin a chhuak ta daih mai.

Nathana chuan U Hlupuii chhuak chu a han en vang vang a, "Khai awww...ani ang hmeichhia saw alawm kan Police Department hian kan mamawh chu ni." a lo la ti zui. "SP Nathan, fiamthu hian chintawk anei aw...lehpekah chuan thil pawimawh tih tur i nei te a nih loh chuan DGP Office ah hian lut ngawt tawh suh ang che." tiin inla mark tha tawk chuan Nathana chu a han hau vel a, ka va han beng chak tak.

******************

Nathana nen chuan tlai ban veleh U Hlupuii te inah kan va leng dun a, a mood ala fuhlo tih hriat tak hian a lo la thu tum bur mai. Nathana chu a bulah ava thu a, "Ngatinge U Hlupui, vawiin khan kan IG kha iva huat hmel em em ve a?" tiin a han zawt a. A mittui a rawn tla ta mai, "Nathan, thinrim loh hram ka tum a, mahse ka indang zo ta ngang lo a ni. In hrelo mai mai  anih kha..saw IG Duhsaka saw...ka pasal a ni." a ti ta mai a.

Nathana nen chuan kan in en hu ringawt mai, "IG Duhsaka saw maw?" tiin Nathana chu a meng phawk chiang ngei mai. "Aw ni e, kei hi  a nupui ka ni. Engvanga hetiang Police Officer corrupt lutuk mai hi nei ta mai nge ka nih pawh ka inhre bik lo, fa pathum lai kan neih hnuah nupui dang neiin min kalsan a. MAhse keichuan vawi khat mah a puihna ka dil duh ngai lo, a chhan chu, a ni ang mi tenawm saw khawngaihna ka dil duhloh mai bakah ka fate pathum, pawisawi lo te pa atan ka duhlo hrim hrim bawk a ni. A sum thianghlimlo takte saw, ka fate hian an hman ka duh lo a ni. Mahse chuti chung chung pawhin Kohhran mipui leh Pathian hmaa kan lo intiam tawh angin kan inneih zungbun erawh ka la phelh lo, ka la bun reng a ni. Hei hi ka thawnthu chu  ani e, Nathan." tiin tap chungin room ah min luhsan ta daih mai.

Mak kan ti dun hle mai a, U Hlupuii hian kan IG hi a pasal a nih thu nidangah a sawi ngai lo hrim hrim. Engpawh chu nise, chutia kan lenna nu berin tap chunga room a min luhsan tak daih avang chuan han awm ve reng thu awm suh, inbe miah lo chuan Nathana nen chuan kan chhuak ve leh ta tawp a.

******************

A hmaa kan sawi tak Minister Rosanga kha, a fanu te inneihna chu open air ah hmangin an inkawt zau tak maiah chuan party a buatsaih a. Chumi zan ber kher chuan IG Duhsaka nen kan la duty dun zui a, ka va han hne tak em. Minister fanu Mamuani, a monu ber lah chu a hmel a ngui em em lehnghal a, mahse ka buai vakna tur awma ka hriat loh avang chuan ka ngaihtuah zui lem lo.

Pastor chuan a inneih tir hman tep tihah chuan silai a puak dur mai, tlar hnung ber atanga lo puak a ni. Kan va hawi chu le, tlangval pakhat thi deuh hnuang leh Nathana an lo ding reng mai. Minister Rosanga'n a han hmu chiah chu a phu zuk mai a, "ACP Rinawm, IG Sir...lo kal vat teh u." a han tih zawm nghal zat a.

Kan rual chuan MP pawh a lo kal ve a, Nathana lam chu kan va pan ta a. NAthana chuan hand cuff hi a rawn phawrh a, Minister hmaah chuan a khai ta vu vu mai. Hawi kual rulh rulh pah chuan Minister chuan zawite hian, "Hey..SP Nathan..hetah nilo, hei chu public a nih hi.." a ti su su a.

Nathana chuan ring lenglawng hian, "Attempt to murder case vanga man tur che a lo kal ka ni, ngawi reng khan min lo zui rawh." a ti ta lauh lauh mai. "Enteh...nuai 1 ka pe ang che." tiin Nathana chu a han siai leh zauh a. Nathana chu a nui suk a, "Nuai khat a? Chungte chu kan in chei thatna atan bak a hmantlak nang mawle." a lo ti sam et a.

"Ihh..nuai 2 a tawk em?" a han ti leh a. Nathana chu a han ngawi vang vang a, "Ala tlem lutuk...a aia sang han sawi zel teh.." a lo ti leh a. "Nuai 3 leh Bolero pakhat ka pe ang che." a lo ti leh a. Chutah Nathana chuan, "Umm a tha e, tunah chuan charge pakhat mai nilo, charge pahnih a awm ta. Pakhat chu attempt to murder case a nia, pakhat leh chu Police Officer tham i tum avangin." a ti leh ta daih mai.

Chutah rum zet hian Minister chu a en a, "Kum 6 jail tan theihna a ni...ngawi reng khan min lo zui rawh le." a han ti leh a, Minister chu a meng no lo tawh khawp mai. Mipui lah chu an lo hawi thup tawh mai a, kei erawh ka nuih a za tulh tulh thung. Thinrim zet hian Minister chuan, "Eng angah nge min ngaih a? Min man anga maw? Jail ah min khung anga maw? MP Sir...han hrilhfiah teh." tiin MP chu ava melh a.

MP chuan Nathana chu a han melh vang vang a, Nathana chuan salute a lo pe vel a. "Tunge ka nih i hria em?" tiin Nathana chu a melh khur a. "Hria e, Sir. MP i ni a, chuvanga salute che ka ni." tiin a lo chhang a. "Enteh SP Nathan, i huang chin i pel ange aw..." tiin a han vau vel a. Nathana chuan nui chung hian, "Akhai a, pel love...ka duty ka ti mai a ni." tiin a lo chhang leh a.

"Duty a? Minister te hi min zirtir i tum em ni?" tiin a han vin leh deuh vak a. "Nangni minister te hi eng zirtirna mah pek che u ka tumlo, helai hmunah hian misual man tura lo kal mai chauh ka ni e." tiin awlsam zet hian a lo chhang leh a. IG Duhsaka ngaihdan a ni leh ta tlat lo, "Engmaw i sawi a? Inla changtupa vel taka rawn chet i tum leh ta em ni?" tiin a rawn tawng chhuak ve ta.

"Changtupa a? Changtupa chu ni love...ka sawi tawh kha, ka duty ka ti mek a nih hi. Khawimaw...helai deuhah hian kan ding teh ang." tiin a tlangval rawn hruai chu a kai phei a, stage bulah chuan  ading a, mipui chuan an en thup mai. Nathana lah chu a confi nasa mai, a aw a han thian te te a...

"Minister Rosanga fanu Mamuani leh he tlangval Sangtea te hi an inhmangaih em em a, an inngaizawng mek a ni. Mahse he tlangval Sangtea hi mi rethei tak a ni a, rosum a nei lova, hna sang tak pawh a nei ve hek lo. Chutiang tlangval rethei leh class hniam lutuk te chu, Minister Pu Rosanga hian enga tan nge a tih teh lul ang? Tichuan Pu Rosanga hian Sangtea leh a fanu Mamuani te inneih chu a phal ta lova.." a tih lai chuan mipui zinga lo thu ve, U Hlupuii chuan, "Tumaw a mipa hming i tih kha?" a lo ti zauh a.

Phur zet hian Nathana chuan, "Sangtea..Sangtea.." a lo ti nghal vat a, U Hlupuii chuan a paper ken laiah chuan a han ziak thla nghal a. Nathana bawk chuan sawi zawm zelin, "Tichuan Pu Rosanga chu a thinrim ta em em a, Sangtea chu kidnap a tum ta a ni. Min han hrilh teh u, kidnapping hi thil sual a ni em?" a han ti leh phawt a.

U Hlupuii lah chuan thutak hmel zet leh nui hauh lo hian, "Awww...thilsual lian tak a ni." tih pah chuan a ziak thla leh mawlh mawlh a. "Tichuan an kidnap ta nge nge a, an sawisa hrep bawk a ni. Khai khai, a hun takah va thleng hman lo phei ila chu a ruk kha an lo vaw tliak vek hman ang mawle. An thil tih chu thil sual a ni em?" tiin U Hlupuii bawk chu a han en leh a.

"Umm...100 percent crime a ni." tiin a lo chhang leh a, ka nuih insum nasa lutuk leh hlauthawng ru deuh tho bawk si chu a hrehawm ngei mai. Nathana bawk chuan, "Chutia a hmangaih berin midang a neih dawn takah chuan he tlangval hi a ngawi mai mai bik dawn em ni? Teuh lo mai, a theih tawpin a tang ve a, tichuan kidnapper ho lak ata chu a tlanchhuak ve thei ta a. Misual te chuan chem nen tiang nen an um a, a tawpah chuan an man ta. Tichuan thah an tum a, mahse an that thei tlat lo. Engvangin nge an thah teh lul ang, achang chuan a hun takah hian PAthian hian mihringte hmang hian tanpui ngaite tanpui turin a vantirhkoh t echu a tir thin a, vanneihthlak takin keilah khalai hmun velah khan ka lo duty hlauh mai si. Tichuan an sawisa lai chu ka va hmu a, tichuan ka va pui ta a ni. Khata kan insual kha chu e, ka che pui asin aww...Jackie Chan pawh hian min hmu se bawn min ti ve tho ang." a la ti zuah zuah zui a, ava han chhe phawr phawr tak.

Chutah Nathana chuan MP chu ava melh a, "MP Sir, tualthahte chu sual a ni lovem ni? Chuvang chuan alawm ka lo kal a, misual rawn man ka tum." tih pah chuan Minister Rosanga chu ava en leh a. Rum zet hian Minister chuan lo melhin, "Hey, nanga thawnthu phuahchawp ngaihthlak nan hun ka neilo. Ngawi reng khan helai hmun atang hian chhuak rawh, anih loh chuan ka pet chhuak ang che." a han ti leh vel khur khur a.

Nathana hmel nui reng mai chu a tum ta hmuk mai, thinrim hmel tak hian a melh let a. "Police Officer rinawm tak i be mek tih hre rawh, i lakah complain theh luh a ni a, chumi report chu ka kawl mek a ni. FIR pawh ziah vek a ni tawh, witness zawng zawng nen engkim ka kawl vek. Helai hmunah hian mikhual sawm ka ni velo tih ka hria, mahse mikhual ang nilovin, police officer anga lo kal ka ni. Police Officer sincere tak, rinawm taka hnathawk thin chuan ka duty ka ti mek a ni, police officer eiruk ching leh i thu ang anga awm te nen hian min tehkhin hlek suh." tih pah chuan IG chu a en deuh kher a.

DGP pawh a ngawi reng mai, Nathana chuan DGP bulah chuan, "Han hrilhfiah ve tawh teh, Sir...hnathawh tur ka la ngah ania." ala ti zui. MP chuan Minister Rosanga chu a han hrilh ru zeuh a, tichuan Nathana chu ava pan leh a. "Awle SP Nathan, inneihna hi zo se, tichuan Pu Rosanga hi keimah ngeiin Police Station ah chuan ka lo hruai dawnnia." a han ti a.

Nathana chu a nui leh ta suk mai, "Chutiang a theih loh.." a ti leh ta tlat mai. "Engvang chuan maw?" tiin MP chu a thinrim nasa tawh mai. "Ka kal a nih chuan a fanu Mamuani hi a duhloh chung pasal a neih luih tir dawn asin." tiin Nathana chuan a lo chhang a. "Ka danu hi tuin nge a duhlo chung pasal ka neih luih tir ti a? A duhthlanna thlap a nih hi.." tiin Minister chu a lo tang ve nasa mai.

Chutah Mamuani chu stage atang chuan a rawn chhuk a, "DAwt a ni, he inneihna hi ka duh lo. Sangtea hi then lo a nih chuan thah ah an vau thin a ni..tunah chuan Sangtea lo chu midang tumah ka nei lovang." a rawn ti ta mai a. Minister chu a thinrim kher mai, a che uai uai hman hial a, MP chuan a lo dang vat a.

Nathana chuan thawnven hmel zet hian, "Umm..a tawk e...kal tawh ang u." tiin kan a han tum a. Chutah vin zet hian Minister chuan, "Ngawi rawh u...SP Nathana vang hian inneihna hi a tawp tur a nilo, ka thlen tir lovang." tiin  a au vak vak mai. Nathana chuan ngaihnep hmel zet hian, "Amak thin e aw...Police Station ah lo kal la, rawn malsawm zawk ta che. Ngaithla rawh u, Sangtea leh Mamuani te hi Police Station ah an innei ang, chu chu thutawp a ni." tiin Sangtea leh Mamuani te chu a hruai ta daih mai a, DGP takngial pawhin a dang hauh lo, keipawh chuan Nathana chu ka zui ve nghal daih a.

TO BE CONTINUE