NATHAN SEASON-4 Written by : Aaron Malsawmdawngzuala Episode-2 (THE LION RETURNS - 2)

 NATHAN SEASON-4

Written by : Aaron Malsawmdawngzuala

Episode-2

(THE LION RETURNS - 2)

****************

"Harsatna tam tak tuar chhuakin zanin atang hian nupa in ni dawn ta, pastor chu ka nilo nangin, malsawmna tam takin vur che u rawh se. In inneih zan hmasa ber chu lock up ah hian in hmang mai dawn ania, SP Nathana phalna thlapin hun nuam tak hmang ang che u." tiin Constable Siama chuan thu chu a han chham ve vel deuh duah a, Sangtea leh Mamuani te chu kan Station ah chuan an innei ta a.

Zan a rei ta, kei pawh chu in lam panin ka haw ve ta a. Ka muhil dawn tep tih ah chuan ka phone a rawn ri a, kan Station number a ni tlat mai. Rang tak chuan ka la a, "Hello, enge ni ta?" ka ti vat a. Phone atang chuan havildar pakhat hian, "Sir, kan Police Station ah bomb an lo kam a, hei a chanve deuhthaw chu a chhe nual mai." a rawn ti ta mai a.

Rang tak chuan ka zuang tho nghal a, ka insiam a, ka chhuak ve nghal vat a. Station ka han thleng chiah chu a lo khu rum rum mai a, pawnah chuan ruang pahnih niawm tak, muan vara khuh hi an lo mut bawk a. Ka thlen rual deuh chiah chuan Minister Rosanga pawh a lo thleng a, MP te pawh an rawn tel leh bawk a.

Pu Rosanga chu a tap ta vak vak mai a, "Nilo ka fanu...Sangte..Mamuan, enge thleng ta hi le? Ava pawi tak em, ka fate chungah hian enge thleng ta hi le?" tiin a rak chiam chiam mai. Rum zet hian Station kawt ah chuan Nathana chu dingin Pu Rosanga chu a melh ran mai a. Pu Rosanga lah chu a tap uar telh telh a, "Fate in nei anga, tu hmel hmuh ve te ka chak tehlul nen. Khawngaihin lo meng leh hram teh u, bawihte i thil tih sual pawh hi ka ngaidam nghal vek che asin." a han ti vel a.

Midangte chuan an lo hnem a, "Bawihte..i duh apiang, make up a ni emaw...thuamhnaw  ani emaw, eng anga to pawh nise leisak che ka hnial lo asin. I pasal Sangtea pawh hi a duh phawt chuan motor pawh ka leisak mai ang, malsawmna hlan tur che u a lo kal ka ni asin." tiin a han tap kur leh duam duam a.

Chutah a ding thut a, rum zet hian Nathana chu melhin, "Heng thil zawng zawng hi nangmah vang vek a nih hi, min ti zak a, mipui hmaah min ti mualpho a, anni pahnih hi Station ah la pheiin i that dun ta a nih hi. Lo ngaireng rawh, Home Minister ka phone anga, i uniform kha ila chan khawp ang." tiin a vin ta hrep mai.

Ngaihnep hmel tak hian Nathana chuan, "Insum teh , Pu Rosang...i lemchan kha duhtawk rawh. I hmel ka han hmu thut chu ka rilruah zawhna pathum a lo lang nghal tlat mai, police station ah bomb  apuak a, i fanu leh i makpa te chu an thi a..a pahnihna ah chuan police station-a bomb puak hi kan station ngei a ni. Mahse engtin nge chung zawng zawng chu rang taka i lo hriat ve ngawt theih a? A pathumnaah chuan, bomb hian i fanu te chu a that ngei dawn tih i ring chiah em?" a ti ta mai a.

Pu Rosanga chu a hawi deuh hrek hrek a, "Eng..enge maw i sawi le...engmah ka hrelo." a ti bah nuai mai. Nathana chu a nui a, "Atha e...an hmel te kha en ve hrim hrim la." a han ti leh a. Chutah ruang tuamna puan chu an han keu va, mannequin (mihring lem) pahnih lek hi an lo ni a, Pu Rosanga leh IG te leh midangte pawh chu an phu rual dual mai.

Nathana chuan a kut chu huiin, "Lo kal ru le." a ti a, Police station atang chuan Sangtea leh Mamuani te chu an rawn chhuak ta mai a, an lo thi awzawng lo mai. Nathana chu Minister bulah chuan ava kal hnai a, "Make up i duh duh, thuamhnaw pawh nise..i fanu leisak kha i hreh lo tiraw? E..chuan motor thar pawh i makpa hi i leisak dawn kha...i sawi vek kha." tiin a nuih deuh huk a.

Chutah thinrim zet hian Pu Rosanga chuan, "Hey SP..tunge ka nih i hria em?" tiin Nathana chu a kawk a. "Hria e, Minister Rosanga, mi zahpuiawm tak i ni. Mo kawr nalh tak hak tir aiah i fanu chu kuanga khung i duh zawk chu ania tiraw? Pa mak tak, fate hmangaihna neilo i ni tih pawh ka hria e." tiin Nathana chuan a chhang let sak sak mai.

"SP Nathan...i tawnghnem mah mah aw.." tiin Pu Rosanga chuan  ahan melh leh khur khur a, mahse Nathana chuan ala sawi zo hauh lo. "He thil zawng zawng hi i plan vek a ni tih ka hria, tunah hian ka pho lang mek bawk. Bomb puak ah khan tumah thi leh hliam kan awm lo, achhan chu kha time bomb kha a puah hmain ka hmu chhuak a, mahse i dawtsawi pholan nan tiin kan tipuak lui a ni." a ti leh ta piap piap mai.

"SP Nathan, kei Minister hi nang Police Officer satialh mai mai khan dawtin min puh i tum amaw? Ka duh chuan i uniform kha ka laksak thei che tih i hria em? Hmun dangah transfer order ka pe thei che tih i hria em?" tiin Pu Rosanga chuan Nathana chu a han vau leh khur khur a.

"NAnga mi vauna khan ka police uniform kawrkilh pakhat pawh hi a ti chhe zo lovang, police diktak te hi nangni ang mai mai angah min ngai reng reng suh u. Training tam tak kan beihtlang hnuin he lukhum, sakeibaknei lim pathum chuanna ngei hi kan khum thei chauh asin." tiin a lo chhang let leh a.

Minister chu  anui suk a, "I lukhuma sakeibaknei limte kha chu ka duh hun hunah ka la bo thei, chutiang chu ka tilo a nih chuan ka hming hi i thlak dawnnia. I ngam chuan ka inchhungah lo kal leh vaih teh, sakei tak tak chu ka hmuh tir ang che. Nanga sakei te kha chu maw, ka sakei chuan a eizo vek ang." tiin a han nui vel a.

Rum tak hian Nathana chuan melhin, "Nilove Pu Minister, heng sakeite hi chu sakei i la tawn ngailoh te vek an ni tih hria ang che, PAthian tih loh chuan heng sakei lak atang hian tuman an chhang thei lovang che. Tichuan maw, i hming thlakna tur chu lo ngaihtuah nghal vat ang che." tiin a kalsan ta daih a.

*********************

A tuk ah chuan Station chu sak that leh a ni a, keini pawh chu kan duty leh ta a. Nathana phone chu a rawn ri a, "Hello, enge ni ta? Engmaw?....awle kan lo kal ang." tiin phone chu a dah lehnghal a. "Enge ni?" tiin ka lo zawt vat a. "Rinawm, case dang kal mek a awm chuang lo bawk a. U Hlupuiin min rawn phone a, hmanzana Officer pakhat an kidnap kha, kidnapper te zinga mi a hmuh thu a rawn sawi a, va kal dun ang hmiang." tih leh chahbi phawrh a rual nghal a.

Chhan pawh ka chhan hma hma chuan, "Liante, kan chhuak lawk dawn aw...lo ngaihtuah mai rawh.” a ti lauh lauh a, motor ah chuan kan lut dun a. Kan tlan pah chuan Nathana bawk chuan, “Kawnglaiah tazi driver nen an lo intibuai deuh ani awm e, U Hlupuii chuan fimkhur deuhvin ka umzui e chu atia, buaina a tawk ang tih ka hlau angreng khawp mai.” tiin a phun nuah nuah a.

U Hlupuii location chu kan chhui zel a, building sak mek, la luah loh tih hriat takah chuan a  tawp chat mai. A chhungah chuan kan lut a, a thim deuh khup lehnghal. Tawng ri kan hria a, Nathana nen chuan kan inthen hrang nghal a. Light eng deuh hlek awmna lam chu ka va pan a, an lo titi nasa khawp mai.

Chutah Minister Rosanga aw ngei mai chuan, “Thianpa Muan, enge ka dawr chu ang i tih? Heng thei hrisel tak tak te hi ka dawr atang veka an supply alawm, thei karah te hian hmanrua te chu ka dahtha mai zel. Police te hian an hre ngailo hrim hrim, vawikhat mah minla man lo. Mahse maw, heng cheng nuai 15 tih vel lek hi chuan min pui thei tawh lo a ni, thianpa Muan...khawngaihin han tisang ve deuh tawh teh.” tih chuan a bula silai keng pa chu a lo be mawlh mawlh a.

A thianpa, Muana ni ngei tur chuan, “Awle, 20 ti ang aw?” a han ti a. Chutah Pu Rosanga chu  anui ta sang mai, “Nuai 20 maw? Ava nuam dawn em.” tih pah chuan a hnathawk vai thenkhat ho bulah chuan, “Hey, ti vat vat ru. Khang ho kha Delhi ah thawn angai dawn ania, office kal vat ka ngai.” a han tih zawm nghal zat a.

Muana leh Minister chu an chhuak a, midang ho chuan thei(fruits) kara silai te chu an lo pack mawlh mawlh hlawm a, chutah U Hlupuii ka hmu ta. Thla chu a lo la kual a, a theih ang tawk chuan a biru ve nasa. Chutia an man palh hlau taka ka thlir reng lai chuan U Hlupuii lo hmu ru rengtu an lo awm ta tak tak a, a chhip samah chuan a tham ta thut mai.

Chupa nen chuan U Hlupuii chu an inbei ta chiam mai a, camera inchuh chuan an inhruipawh lo chauh. Va kal mai ka tum a, mahse ka bulah chuan silai keng mek a ding khur bawk si a, ka thawm a hriat chuan min kap mai dawn si, ka mangang ta hle mai. MAhse Nathana a rawn lang ta hlauh mai, U Hlupuii lo bei tupa chu a va hnek siah mai.

U Hlupuii chu pawn lamah  a tlan chhuah tir nghal a, midang ho te chuan Nathana chu an beih rawn a. Silai pack lai an ni nangin, sarangah an pack vek avangin silai chu an hmang bik lo. Ka bula ding, silai keng ber chu a hnunglam atang chuan ka rek a, a pistol ken lai chu ka ben thlak sak a.

Tichuan NAthana nen chuan chung misual ho chu kan bei ta a, kan insual fe hnuah chuan an tlanchhe ta. Motor ah chuan lutin kan um ve nghal a, U Hlupuii pawh a scooty in a haw ve nghal bawk. Reife kan in um hnu chuan kan man thei ta hlauh mai a, an vai chuan lock up ah kan khung ta hlawm a.

****************

Chung vai misual ho chu kan vaw hrep a, “Minister Rosanga nen hian enge inzawmna in neih? Eng thil nge tih in tum?” tiin kan zawt a, mizo tawng thiamlo angin an insawi a. Nathana chuan a tawng thiam chi hrang hrang chuan a han zawt leh hlawm a, mahse tumah chuan engmah an sawi duh der chuang lo.

Chutih lai chuan constable pakhat a lo kal a, “Sir, Pi Hlupuiin a be duh che anih chu.” a rawn ti a. Nathana chuan a tiang ken lai chu min pe a, “Rinawm, an inpuan hma chu vaw char char ang che.” tiin min kalsan a. Mahse reiloteah lo let leh nghalin, “Rinawm, lo chhuak lawk teh.” a rawn ti a.

“Enge ni, Sir?” tiin ka lo zawt vat a. “U Hlupuii kha, a pasal...IG Duhsaka’n kut a lo thlak a, vawiin lama thla a lo lakna zawng zawngte kha camera chawpin a lo tihchhiat sak vek a ni awm e.” a ti a. Ka thin a rim kher mai, he IG sual lutuk hi chu ka kham tawh takzet. Nathana bawk chuan, “Hawh teh, va kal teh ang." a ti a, kan va kal ta a.

********************

"A fair lo khawp mai, U Hlupui. I pasal Duhsaka, IG ve meuh si hian misualte chu a hum a ni." tiin Nathana chu a thinrim hmel kher mai. A mittui hruk pah chuan U Hlupuii chuan, "Lungngai suh Nathan, i lamah ka tang tlat ang. Kha store-house a ka mit ngei a ka thil hmuhte kha, engkim a dik thlapin court ah ka puang vek ang. Chubakah kan employee pakhat an man lai pawh ka hmu bawk a, kan chak em em ang." tiin Nathana chu  a hnem a.

Nathana nen chuan Station ah chuan kan va let leh ta a, a chhung kan han lut chu an lo thu ngui bar hlawm mai. Chutah misual kan man kan dahna cell chu kan en a, a lo in hawng huau mai. "Enge awmzia? Tunge khang misual te kha chhuah a?" tiin Nathana chu a vin nghal tuar mai.

Siama chuan, "Sir, ihh...IG Sir a lo kal a, a rawn chhuah a ni. Thinrim tak hian Nathana chuan, "IG alo kal amaw? Ka nunna thapin khang misual te kha ka man a, FIR pawh ka buaipui fel vek tawh. Anih chuan, lo chhuah ringawt turin tunge a nih a?" a ti khur khur a. "FIR pawh a la tel daih alawm , Sir." Siama chuan a ti leh a.

Constable pakhat leh chuan, "Tilo turin kan ngen nasa, mahse kan senior a ni bawk si. Home Minister hming te a lam ri a, min vin vak vak a, kan hnial ngam ngang lo a ni." a lo ti ve bawk a. Nathana chu dawhkanah chuan ahan thu kang a, a nui ta var var mai. Phur hmel zet hian, "Inspector Liante, misualte chu chuti maia an chhuak thei a nih chuan engvangin nge tuna lock up a kan dah ho, insual buai vanga kan khung ho hi kan chhuah loh bik ang? Ti teh, chhuah vek rawh." a ti ta mai a.

"Sir, engemaw i sawi le?" tiin Liantea chu a ka hau mai. Vin lek lek hian Nathana chuan, "Chhuah rawh u..kal tir rawh u..vatin." a ti ta vak mai a. Liantea chuan gate chu a hawng a, tlangval pali, insual buai vanga kan man te chu an rawn chhuak a. Nathana bulah chuan an rawn ding a, "Enge in tih sual a?" tiin a han zawt a.

Pakhat chuan, "Bus stand ah kan ding mai mai a, chuan thianho hi an lo kal a. Min rawn chhang pawr vak a, kan insual ta lawm mawle." tiin a chhang a. Nathana chuan FIR chu en in, "Ehe..kan IG ai chuan ropui tak inla ni." tih pah chuan FIR chu a pawt thler a, "Kal ru, eng case mah a awmlo, chhuak ru." a ti leh a.

Liantea chuan, "Sir, i thinrim lutuk tih chu ka hria alawm. Mahse heng ho hi kan chhuah a nih chuan a tha lovang, thildik a nilo." inthlahrung tak chuan a han ti a. "Anih leh IG thil tih kha  adik bik em ni? Enteh Liante, khang ralthuam kenng, terrorist an ni em tih pawh rhiatloh khawpa mi hlauhawm, hnamdang lehnghal te kha khawlaiah duhtawka kan ram chhung ngeia zalen taka an lengkual thei anih chuan heng tlangval hawk lak, lo insual ve mai mai te hi chu engvangin nge kan hrem bik ang? A vanglai an chen a, a hunlai alawm." tih pah chuan chung tlangval te chu ava en a, "Enge inla tih a, chhuak vat ru." tiin a vin hrep mai a, an chhuak rang hlawm teh asin.

Station kawta security te pawh chu kovin, "Lo kal ru, he station hi ven a ngai tawh lo." tiin a chhungah chuan a luh tir a. "Liante, Siama...tukverh zawng zawng hi khar ru lem." a ti a, an khar ta sap sap hlawm a. "Vawiin chu Police Holiday ni rawh se, tiangte leh silai te kha khung bo ula, hnathawh a ngai lo. Lo chhuak ru, tala in kawngka kha kalh bawk ula." tiin pawnah chuan min chhuah tir leh vek mai.

"Kan IG Sir leh kan Minister te hian Police te hi minlo mamawh reng reng hleinem, kan tan hnathawh a ngai lo." tiin kan Police Station chu kan kalh ta rup mai. Mipui ho lah chuan min lo en ang sup sup a, Nathana lah chu a phur hmel em em lehnghal. "Siama, dawrah va kal la, playing card va lei teh, card i deng ang u..hei kan station kawtah hian..lunch ka treat vek bawk ang che u." a la ti zui.

*****************

TO BE CONTINUE