IT'S MY LOVE STORY Written by : Aaron Malsawmdawngzuala. CHAPTER-2

IT'S MY LOVE STORY

Written by : Aaron Malsawmdawngzuala.

CHAPTER-2

*****************

 Zana in ka haw chu inchhung a lo khu rum rum mai, inchhung ka lut chu Priya-i leh a thiante pahnih chu an lo meng si sap hlawm mai a. Meizial an lo zu khu tual tual bawk a, a rimchhe ngei mai. "Ehe..tinge khatia in awm a, inva ruih hmel ve?" ka ti lut nghal a. Priya-i chuan mengmang lo hian bottle pakhat chu a rawn lek kang a, "Hei hi in ve la, i ruih hmel ve thovang." tiin a nui huah huah mai.

"Ka duh bawk lo." tiin ka vin deuh hlur a. "FAshion technology chu i zo tawh em ni?" tiin min zawt leh a. Ka lu ka bu ringawt a, chutah a thiannu chuan, "Anih chuan fashion show tih hun chu, mipa model ho an va chhelo dawn hlawm ve." tiin a lo nui vak vak a. "Chutiang mi ka ni velo." ka ti leh deuh hmak a.

"Chutiang mi chu kan ni thung alawm, in office ami mipa tu emaw tal rawn hruai haw la...kan enjoy ho thin dawn lawm." Priya-i bawk chuan a ti leh a, ka lungawi lo kher mai. Step ah chuan ka thu a, ka ngaih a tha ta hauh lo. KA room mate Priya-i ber chu hmeichhe khawlo tak a lo ni bawk si nen, ka thla a muang tawh lo takzet. Ka phone chu phawrhin Sangtea chu ka be ta ringawt a.

"Hello?"

"Sangte..ka awm anuamlo."

"Tinge?"

"Ka room mate te hi ka hmu peihlo."

"Tinge? Engtin nge an tih che a?

"Zu te an ina, zahmawh an sawi vak vak bawk a..."

"Zu a in amaw?"

"Aw an rui lutuk, an nasa hlawm si."

"VL, Mizoram a ni hleinem. Bangalore ah chuan tiang hmeichhia kha an tam lutuk, fimkhur viau ang che. Room ah in kalhkhum hmak la, i mu daih dawnnia."

"Mahse ka mu thei hleinem."

"Um a tha e, i mut theih hma chu kan inbe dawnnia."

Sangtea nen chuan kan inbe ta char char a, thian fel tak a ni. Kan inbiak zawh hnu chuan inchhungah chuan ka lut leh a, laptop ka phawrh a. FB ah lutin, "I'M IN A BAD COMPANY." tiin status chu ka update leh a. Reilote hnuah Sangtea chuan rawn comment in, "Lungngai suh, chak takin awm rawh." a rawn ti a, ka thla  amuang huai thei nia.

******************

A tukah pawh chuan Sangtea nen bawk chuan kan lengdun leh a, nileng chuan min bazar pui a. Zan alo ni a, Sangtea chuan a bike ah min phurin ka flat thleng chuan min thlah haw a. "Umm tah hian ka lo chhuk ang, khi mite khian min hmuh phei chuan min chhaih nasa dawn lutuk." tiin bike atang chuan ka chhuk a.

Inchhung ka lut chiah chu vai palian pui pui an lo awm a, midum (negro) pakhat a lo awm tel ve bawk. Bang kilah chuan Priya-i leh a thiante pahnih chu hnuailam melh reng chungin an lo ding reng bawk a, ka hrethiam lo kher mai. "Tute nge in nih?" tiin ka zawt a, min melh hru hru hlawm ringawt.

Thil zawn nei ang tak hian an melh kual reng bawk a, "Hey..police ka phone dawn ania, chhuak ru." ka han ti ve leh ngawt a. Chutah an zinga mi chuan, "Police chu keimahni hi kan ni e." a rawn ti ta mai a. Chu negro-pa bulah chuan, "Henu hi i hre ngai em?" tiin an zawt a, chu mihang pa chuan a lu a thing a.

"Helai hmunah hian enge thleng a?" tiin ka zawt leh a, police pakhat chuan lukham hnuai te chu a dap a, number 4 a rawn la chhuak nual mai. "Drugs...drugs kan man sak che u a nih hi. Kha tia mifel awm ang taka lemchan vel angailo, i tel ve tih pawh kan hre vek." a ti ta mai a. "Nilo ka pu, ka nu hmingchhalin engmah ka hre ve lo." tiin ka mangang kher mai.

Inspector chuan abula mi chu nghawk zeuhvin, "Jeeva, henu pawh hi hruai ve ang che u." a ti ta mai a. Ka duhlo chung chu min man bet a, ka tap nasa ngei mai. Police Station ah chuan min hruai lui ta a, ka tih ngai miahloh leh ka tih duh ngai reng reng loh tur, damdawi ruih ching angah chuan min chhuah ta mai chu ania, ka va na vawng vawng tak em.

******************

"Kan chhungten an hriat chuan min vawhlum duh hial ang, ka pu. Khawngaihin min chhuah rawh, kan ti leh tawh ngai lovang." tiin Priya-i chu a tap pur mai a, kei erawh kil khatah ka thu ngawi reng thung. Inspector chuan negro-pa bulah chuan, "Lehkha zir turin India ah ka rawn zin i ti si a, enge i zir a? Drugs zawrh kual hi em ni i sumdawnna chu?" tiin a zawt a.

Mahse chupa chuan chhanglovin a en rum em em ringawt a, constable pakhat a lo lut a. "Sir, doctor in report a peih fel tawh e." a rawn ti a, doctor chu a rawn lut a. "Priya-i, Meena-i leh Swathi te thisen result hi positive a ni a, VLi erawh negative a ni." tiin doctor chuan a sawi a. Inspector chuan, "Khanu kha a chhungte call ula, an rawn lam thei ang." tiin police dangte chu a hrilh a.

Ka phone leh ka purse te chu min pe a, tichuan rang takin Sangtea ka call nghal a. TAp chungin ka thil tawn te chu ka sawi a, Sangtea pawh a mangang kher mai. Reiloteah Station chu a rawn thleng a, ka lo kuah nghal tawp. "Ka hlau lutuk, sangte." tiin ka tap zawih zawih a. "Hlau suh..ka awm alawm." tiin min hnem a.

"Sangte, engmah thilsual ka ti velo...ka ti velo tak tak." tiin ka tap bang hleithei lo, "VL, tap suh..ka lo thlen tawh hi." tiin min thlamuan mawlh mawlh a. "Darkar 5 chhung hetah hian min thuttir a...chuan, ka thisen an la a.." ka sawi hleithei lo. Sangtea chuan min kuah a, pawn lamah min chhuah pui ta a.

*************

Bike-ah chuan min phur leh a, ka flat lam panin min haw pui ta a. KAn tlan pah chuan, "Sangte, drugs addict hmel ka pu em ni?" tiin ka han zawt a. "Teuhlo mai VL..tinge chutiang te i sawi a?" Sangtea chuan a lo ti a. "Ka nu in a hriat vaih chuan..." ka tih lai chuan Sangtea chuan, "I hrilh dawn em ni?" tiin min lo zawt a.

"A teuhlo, ka sawi dawnlo hrim hrim."

"Anih chuan engtin nge a hriat tehlul ang?"

"Nia, mahse ka hmel te kha camera khan an la tel sia, news ah an puang em lovang chu tiraw?"

"Puang lovang, lungngai suh."

"Engtin nge an puang lovang tih i sawi theih?"

"Press mite pawh tumah an awmloh kha, an puang lovang."

"Police Station ah hian ka la kal ngai miah lova, ka vawikhat kalna a nia. Movie ah chiah ka la hmu, awi ka hlauh zia kha."

Sangtea chu a nui a, "Nitin ka hmu bik hleinem...lungngai suh, i him tawh alawm."

"Hmmph..fiamthu angah i ngai em ni?"

"Aww...ngai love..hlau tawh suh..i bulah ka awm tawh hi."

Reilote hnuah chuan flat chu kan thleng ta a, ka va han awm hre tawh tak em. Bike atang chuan ka chhuk a, "Ka hmel en hian drugs addict ka ang tak tak ami?" ka han ti leh a, ka lungawilo em a ni. "Nilo VL, i ang lo hrim hrim." tiin min chhang leh a. "MAhse kha..ka mualpho phah der ania." ka ti leh a.

"Theihnghilh rawh VL...a tlai tawh sia, i ril te a tam tawh lawm ni? Titeh...han inthlak la, thil ei turin kan chhuak dawnnia." a ti a, tichuan inchhungah chuan ka lut ta a. Ka inngaihtuah vang vang hnuah chuan he vairamah hian ka awm ngam tawh thlawt lo, haw mai tur chuan ka thawmhnaw te chu ka pack fel ta a.

KA suitcase nen chuan ka inpu chhuak a, Sangtea chuan mak a tih hmel kher mai. "Ehe, tinge?" a lo ti ringawt a. "HEtah hian ka awm thei tawh lo, Mizoram lamah hna ka zawng mai ang. Airport ah emaw, Railway Station ah min drop thei angem?" ka ti a. "I haw dawn maw?" a ti leh hu mai.

"Umm..ka nu pawh khan min hrilh mawlh mawlh a, mahse a thu awih lovin ka kal lui a. Ka thiamloh vek ani, ka awm ngam tawh lo." tiin ka chhang a. Sangtea chuan min en vang vang a, "Animaw? Tichuan i thuthlukna chu i siam fel ta nimaw?" tiin min zawt a, ka lu ka lo bu nghut ringawt.

Min rawn pan hnai a, "VL, naupang i ni tawh lo. I kum pawh  a tam ve tawh a, khatiang vang mai mai khan i dream chu i kalsan ang maw? I hlawhtling dawn chauh asin.." a han ti a. "Enge ti tura min duh chuan a?" tiin ka lo zawt a. "Ngaihtuah rawh, i nu leh pate phallo chungin harsa takin helai hmun hi i rawn thleng a, hmabak tihtur tamtak ila nei. Mahse khang vai nula awmtha duhlo te vang mai khan nang mizo nula hi i tlawm mai dawn em ni? I dream te chu i kalsan mai ang maw?" tiin min zawt leh a.

"HEtah hian ka awm duh tawh hleinem, chubakah helai hmunah hian chhungte tumah ka nei bawk silo. Enge ka tih chuan ang?" tiin ka tah a chhuak leh nghal der tawh. Sangtea chu a ngawi vang vang a, "Ka bulah i awm duh angem?" a ti zawi sap a. "Engmaw? I bulah maw?" ka lo ti hu mai.

"Aaa..ka sawi awmzia chu awmna tur dang i hmuh hma chu ka bulah i awm thei alawm. Ka flat ah, i him zawk ang. I duh angem, i awm duh angem?" tiin inthlahrung tak chuan min han zawt leh a. Diktak chuan khamite bula awm emaw, mahnia awm ai chuan Sangtea bula awm mai chu ka duh daih zawk.

"Ihh..ka hrelo." ka ti chuai raih a, ka lai lek lek mai. "Umm...awle..haw ang aw..ka flat ah chuan i haw dun ang hmiang." tiin min nuih suk a, ka remti ve ta a. KAwng lakah te chuan ice-cream te min leisak a, min tih hlim chu a tum nasa mai. A falt chu kan thleng a, a zau tha khawp mai.

Mipa room tih takah a hnawk angreng hle a, amah pawh a zah hmel khawp mai. Tichuan chumi zan atang chuan Sangtea nen chuan kan chengdun ta a, room hran ve ve ah kan mu a. Chengdun ni mah ila Sangtea hian vawi khat pawh ka taksa a si tha duh ngailo, a mawilo zawngin min khawsak pui a tum ngai eih lo bawk.

Sangtea flat bul chiah ah hian vai hmeichhe naupang kum 15 mi vel hi a awm a, Sangtea hi a star thei em em a. A ruka awm ka ni bawk si a, min man teuh thei khawp mai. Sangtea flat ah hian rawn len hi a tum ziah lehnghal a, Sangtea pawhin a ning thin khawp mai. Chu vai tleirawl chuan mizo tawng a thiam angreng hle bawk a, kan tan chuan hnawk tak a ni.

***************

A tawp atawpah chuan chu vai naupang, Sangtea star em emtu Pooja-i chuan Sangtea flat ah chuan ka awm ve tih a hre ta hlauh mai a, a la sawi pung chiam zui. Flat danga awm ve te chuan Sangtea chu an hau a, "Mizo tlangval fel tak amaw ka ti che a, ilo va lerh ve a..henu hi tungE?" tiin an zawt a. Sangtea chuan pawr zet hian, "Ka cousin anih hi, MBA exam tura lo kal a nih hi." tiin dawt a sawi ta tawp a.

"Khawi atanga lo kal nge?" Pooja-i chu a lo tawngchhuak ve leh a, ka va han beng chak tak. "Mizoram, amah pawh hi mizo ania, keipawh mizo...unau alawm kan nih..nimin khan a lo thleng chauh." tiin Sangtea chuan a chhang leh a. Anjali chuan puitling ho bulah chuan, "Dawt a sawi anih hi, ahma daih atang tawh khan an inphur lai pawh ka hmu ziah." a ti leh zawt zawt a.

"Aww...ahma atang daih pawh nise, enge i lo buai ve vak a?" tih pah chuan midang chu a han enkual leh a, "Buaina dang nei inla awm em? KA cousin ani a, VL-i a ni. MBA exam tura lo kal ani..a tha em?" a han ti leh a, engmah an sawi chhunzawm ta bik lo. Mahse chutiang a nih takah chuan ka rilru chu a nuam chiah tawh lo, insawn chhuah vat chu ka ngai a ni ka ti rilru neuh neuh a.

*****************

Office ah chuan hna thawkin ka buai leh ngei mai, Sandhya-i a rawn kal a. "VL, ka zawng char char che a.." a rawn ti a. "Enge ni a?" ka lo ti vat a. Ka hmel  ahan en vang vang a, "I va hlimloh hmel ve.." a han ti leh phawt a. "Paying guest accomodation tha deuh i hre mial lo maw? Ka insawn chhuah vat a ngai a.

"PAying guest accomodation a?"

"Khawngaihin Sandhya, han ngaihtuah teh."

"Umm..ka unaunu hi ECIL ah a awm a, a bul lawkah ruak a awm tih min hrilh khaw maw.."

"ECIL a? Ava rei duh awm ve.."

Chutih lai chuan kan boss Tuaia bawk chu a lo kal leh a, "Ni chiah e, VL...thil tha deuh ka hrilh ang che." tiin min ko phei a. "Ihmaw VL, flat lian tawkah ka awm a, keimah chiahin..pawi i tih loh chuan ka bulah awm ta che." a han ti leh hlawi hlawi a. "Aaa..Sir, angai lo mai." tiin ka chhang a.

"Awi VL..zanah pillow fight te kan nei anga, a nuam dawn asin. Mipa nena awmdun i duh chiah lo em ni?" tiin min han melh zeuh zeuh a. Nui chung hian, "Aa Sir, mipa nena awm chu ka thei mai a, mahse nangmah nena awm chu..." ka tih lai chuan ka hrechhuak zawk mai, a lawmloh hmel teh kher asin.

******************

Tlai ka hnathawk bang, Sangtea flat lam ka panlai chuan kha vai tleirawl tawngthei zet, Pooja-i khan min lo ti ding ve khanglang a nih chu. "Hello, Pooja-i ka nia.." tiin min rawn chibai a, "VLi ka nia.." tiin tha tak chuan ka lo chang ve mai a. "Sangtea cousin i ni tak tak maw?" tiin min han zawt vel a.

"Aw ni e."

"Nihleh a patea fanu nge a nutei fanu nge? Engtia in-cousin nge in nih?"

"A ni(aunt) fanu ka nia."

"A ni maw?"

"Aw ni e, enge buaina i nei ami?" ka han ti chiah chu a ngawi hmak a, min en vung vung mai. "Tinge khatia min en a?" ka han ti leh deuh hlur a. Lungawiloh hmel tak hian, "Ihh..in awmda hi inngaizawng in ang thei em a...Sangtea hi ka star lutuk, minlo tihpui teh unaunu?" a han ti chu ka sa zak mai. "Naupang te te...i zak em? I flat number sawi teh, i nu ka hrilh vek dawn." ka ti mai chu a hlau kher mai.

"Nilo Unaunu, ka nu in a hriat chuan min that duh mai ang.." tiin a tap nghal pur mai. "Vawikhat pawh tiang khan han sawi leh teh...kal rawh. Zaklo lutuk.." tiin ka hau leh hrep a, ka hriat tham lek chuan, "VAi te te si.." ka han ti leh hram a. Pooja-i a kal chiah chu ka phone a rawn ri a, Sangtea a lo ni.

"VL, i haw tawh em?"

"Aw i flat lam ka pan mek a, Pooja-i pawh ka han zilh hlak kha.."

"Haha...engtin nge a lo awm leh hman tawh a?"

"Ka beng hrep mawle, haha...engtik nge ilo haw dawn?"

"Ka sawi thei mai lo, tinge?"

"Lo haw vat rawh..engemaw surprise duh che ka nei ania."

"Surprise a? Wow...anih chuan ka lo haw hma dawnnia."

********************

Zan dar 7 velah chuan Sangtea chu a rawn haw ve ta a, kei erawh ECIL-ah insawn tumin ka in pack fel vek tawh thung. A rawn lut a, ka suitcase leh airbag vel a hmu chu mak a tih hmel hle mai. "VL, enge awmzia?" tiin min zawt hu mai a. "PG Accomodation ka hmu tawh a, ka insawn chhuak thei tawh ang." tiin ka lo chhang a.

A hlim vakloh hmel kher mai, "Chuan i chhuak dawn maw?" tiin min zawt leh a. "Umm...ka tibuai rei tawh che emai." tiin ka chhang leh a. A ngawi vang vanga , "Hei hi em ni surprise i tih chu?" a ti leh hmuk a, ka lo ka lo bu ringawt. "Surprise nilovin hei chu thu thinthawng tak zawk a ni." a ti ta daih mai.

A ngawi leh vang vang a, chutah min rawn en a, "A tha lawm, ka va drop dawn che mi? Nge auto in i kal duh zawk?" a han ti a, a thlan a tla buah buah mai. "Auto in ka kal mai ang, Sangte...ivan chauh hmel ve a.." ka han ti a. Hlim loh hmel tak hian, "Ka tha alawm, nihcuan mangtha aw...bye.." tiin choka lamah chuan min pheisan daih mai.

"Tinge khatia i awm a?"

"Ka hre biklo."

"Awle..mangtha le." tia kal ka tum chiah chu min rawn pan leh a. Inthlahrun hmel tak hian, "Min kalbo san i tum tak tak ami, VL? Ihh..ka sawi awmzia chu..i bula awm hi nuam ka ti lutuk a. I insawn chhuah daih chuan ka khua a har dawn emai, tihian awm ve hrih mai la. Min hlau tawh em ni? Min ringlo em ni?" a han ti nang nang a.

"Ka ring che alawm." tiin ka lo chhang a. "Anih te chuan..tinge min awmbo san i duh si? Hetah hian i awm duh tawh lo em ni?" tiin min zawt leh a, ka lai vek. Zawimuang chuan, "Aaa..ka hrelo." ka ti ringawt a. A nui suk a, "Aw nge aih...thildanga min chhang a nih chuan aw i tihna...tu emawni min hrilh dan ania." tih pah chuan ka suitcase te chu room lamah a dah lut leh vek a, ka hnial phal thlawt lo a ni.

******************