NATHAN SEASON-4 Written by : Aaron Malsawmdawngzuala Episode-10 (THE KING-1)

 NATHAN SEASON-4

Written by : Aaron Malsawmdawngzuala

Episode-10

(THE KING-1)

***************

(Rinawma a tel khat bawk a, tun tum chu telh tawh ang aw..mahse a sawi anga ziah erawh a ni dawn lo thung.)

Veng pakhat, Aizawl pawn lampang ah tualthahna a thleng a, hal hlum a ni. He mitthi hi an veng Police Sub-Inspector a ni a, night duty a neih lai a ni. He case chhui tur hian an Veng Police te chuan SP Nathana te team chu an kova, Crime Branch...SP Nathana, ACP Rinawma leh Inspector Liantea te chu investigation nei turin an ti a ni.

Veng han tih ah khua a ni deuh mah zawk a, Aizawl atang hian tlan ve deuh vang vang a ngai. An veng Hospital ah chuan Nathana leh Rinawma te chu an va kal a, Hospital kawtah chuan veng mipui lungawilo chu an lo phun nuai nuai mai.  Theih tawp chhuah chuan constable te chuan an dang hram hram a, mipuite lah chu an lungawi lo nasa mai si.

"Vawi 17 vih  ani a, chumi hnuah hal hlum a ni. Petrol emaw, khawnvartuiin emaw an leih huh hmasa niin a lang. Detail dang ho chu report ah a inziak ang, naktuk zingah emaw, vawiin tlaiah emaw i rawn lam thei ang." tiin Doctor chuan Nathana chu a be mawlh mawlh a. "Doctor, report chu naktuk zingah ka rawn lam ang. Mahse tunah hian a detail kimchang tak min hrilh la, investigation kan tan nghal thei mai dawn a." Nathana chuan a han ti a.

"Ka pu, night duty ka nei ziah a, ka chau lutuk." tiin Doctor chuan a lo chhang a. "Doctor, mitthi hi Police a ni a, hriatthiam tum ta che."  atih chuan doctor chuan, "I hrethiamlo zawk a ni, zantin ka tlaivar a, ka chau takzet, mut ka mamawh ve alawm." tiin a lo chhanglet leh a, Nathana ngaihdan a ni vak ta lo.

Pawn lama mipui thawm ri mur mur lam chu ava hawi a, ring zet hian, "Hey..engthil nge thleng a? Rinawm, va ngawih tir hlawm teh, bengchheng lutuk." a ti ta vak mai. Rinawma chu a kal a, tichuan Nathana chuan doctor chu a han melh leh a. "DArkar chanve mutna hun ila nei, detail chu min pe rawh, tunah.." a ti ta fak fak mai a.

Doctor pawh chuan a hlau deuh aniang, a hrilh ve ta mai a. Kal pah chuan, "A awmah incher 2 vela thuka vih a ni a.." a tih lai chuan pawn lama mipui zinga pakhat chuan ring leng lawng hian, "Police OFficer tih mai mai, kan hlau lo...engatan mah kan ngai lo.." a rawn ti lauh lauh mai a. Nathana beng a verh zar mai, rang takin pawn lamah chuan ava chhuak a.

Chupa chu a lo la tawng nasa mai, "Tunge Nathana chu...lo chhuah tir rawh...kan hlau..." a tih lai tak chuan police tiang a rawn thlawk a, chupa hmuiah chuan a rawn ri chawrh mai. A tawng lai a tawp chat, ava hawi phei chu thinrim hmel tak hian NAthana chu a rawn phei a. "Investigation nei tura lo kal kan ni a, nangni phun ri ngaithla tura lo kal kan nilo." tiin a vau ta hlawm a.

Chupa lah chu ala pawr nasa mai, "Enga? Kut thlak theih na in neilo.." a tih lai chuan Nathana chuan a vaw pawp mai a, na  a ti kher mai. "In kal dawn em? Nge vuak ve in duh zawk?" tiin midang ho chu a vau leh bawk a, police dangte pawh chu lo chhuakin tiang an rawn hum fur takah chuan mipuite pawh chu an kal kiang ta hram a.

*****************

Nathana leh Rinawma chu tualthahna thlenna hmunah chuan an va kal a, lei tetakte, zim angreng tak hi a ni a. A hnuiah chuan tuiluan kawr a awm bawk a, "Helai hmun hi tualthahna thlenna hmun chu ania, zu bur leh meizial bung ho te chu evidence an hmuh ho a ni mai." Rinawma chuan a ti a.

"Khawnge evidence te chu a awm?" tiin Nathana chuan a zawt a. Rinawma chuan, "Car ah a awm." tiin a lo chhang vat a. "Khawnge car chu?" a han ti leh a, kawngpui kawh pah chuan Rinawma chuan, "Tah sawn..ka va la dawn mi?" a han ti leh a. "Angailo, kan va endun zawk dawnnia." tiin car lam pan chuan an phei dun a.

"Sir, post mortem report-in a tarlan dan chuan mi pathum in an vih rawn a, kan evidnece neih te nen pawh hian a inmil khawp mai." Rinawma chuan a han ti a. "Animaw..nihleh bottle-a vawm tu kha?" a han tih chuan Rinawma chu a ngawi vung vung a, "Ihh,,,pali an ni leh si aniang."  ahan ti leh vel a.

"Anih leh bottle kengtu kha?" a han ti leh a, "Ihh..anih chuan mi panga an niang." Rinawma chuan a han ti leh a. Nathana chu a nui suk a, "Engdang nge he investigation neih mek ah hian i hmuh chhuah belh?" tiin Nathana chuan a zawt leh a. "Ka la bei mek chu a nih hi.." tiin a lo chhang a.

"Engemaw i hmuhchhuah hunah min hrilh ve ang chu tiraw?" Nathana chuan a han ti leh deuh kher a. "Tehreng mai, pu ber." tiin Rinawma chuan a chhang a. Liantea pawh crime scene bulah chuan a lo awm a, "Tunge witness intih kha?" tiin Nathana chuan Liantea chu a zawt a. Liantea chuan tlangval pakhat hi a lo hruai a, "Hepa hi.." a ti a.

Chu tlangval bulah chuan Nathana chuan"Nangmah em ni hmu hmasa ber?" tiin a zawt a. "Aw ni e, ka pu. Ka hnathawk haw chu helai vel ka thlen hian savun kang rim niawm tak hi ka hria a, ka va kal hnai a, a rimchhe em em a. Police te ka phone nghal a, chuzawng chu a nimai. Engmah adang ka hrelo, ka pu." tlangval chuan a lo ti a.

"Awle, i kal thei e." tiin Nathana chuan a kal tir lehnghal a. "Khawnge car chu a awm?" tiin Nathana chuan Rinawma chu a zawt leh a, "Tah sawn a awm." tiin kwngpui lam chu a kawk leh a. "Engtin nge a awm? A letling zawngin nge a awm a, tha takin a lo in park zawk?" tiin Nathana chuan a han zawt leh deuh kher a.

"A lo in park.." tiin Rinawma chuan tum hmuk hian a chhang a. "Hetah hian motor park nachhan tur a awmlo.." tiin Nathana chu  aphun nuah nuah a. Chutah amah bawk chuan, "Siama hetah lo kal teh." tiin constable Siama chu a ko va. Mutchhuah hmel em em hian Siama chu a rawn ham phei bui bui mai.

"Thil pakhat han ti teh....thingpui sa ver vawr va in rawh." a ti ta daih mai. Siama pawh chuan hrethiamlo tak hian.."Engmaw? Tinge?" a lo ti hu mai. "Thingpui inla i harh kawk mai ang, i in zawh ah helai hmuna hnathawk tura kal thin zawng zawng te lo zawng chhuak la , he khuaa pem thar te, chhuak tawh te thlengin lo zawng chhuak vek ang che. Kal rawh....thingpui chu va in rawh." Nathana chuan a han ti leh a, Siama pawh chu a kal ve mai a.

*****************

"SI Sangpuia chu mi tutih hriatloh ten an that a, tualthahna thlen chhan leh tual thattute chu chhuichhuah an la nilo. Police te chuan investigation an nei mek a, police SI chunga hetiang thil a thleng ta mai hi khaw mipuite pawh an chiai hle." tiin news ah te chuan an puang leh ta sup sup mai a, chu tualthahna chuan news a luah khat hle.

Tlaiah chuan Siama pawh a lo let leh ta a, Nathana bulah chuan, "Negative remarks engmah a nei ngai lo, khaw mipuite pawhin an fak lutuk. A nupui chuan a thih chhanah hian Police te hi min puh nasa khawp mai, chanchin dang ka hriat leh hunah ka hrilh ang che." a ti a. Chutih lai chuan Nathana phone a rawn ri a, Rinawma a lo ni.

"Hello, Rinawm.."

"Wathmen nen kan inbe zo chiah a, a sawi dan chuan nupa niawm tak pakhat chu khami zan khan khalai hmun lam pan khan an kal a. Tute nge an nih chu a hrelo va, mahse khaw chhung mi an nilo tih erawh a chian thu min hrilh a ni."

"Tute nge an nih lo chhui nghal ru."

"Yes Sir."

******************

Atukah chuan Nathana chu Station ah hma takah a thleng leh a, pafa hi a office ah chuan an rawn kal a. "Enge ni ta?" tiin Nathana chuan a lo zawt a. "Ka pu, ka nupui a bo a, kan intihthiamloh lai tak a ni bawk a. Hmanniah pawh kan inneih zungbun a vawm bova, a tlanchhuak daih a. Ka chiang ani, midang nen an inngaizawng chiang a ni." a han ti nghal zuah zuah a.

Vin deuh tak hian Nathana chuan, "Hey..i fanu a awm ve reng kha." tiin a hau va. Hmeichhe naupang bulah chuan Nathana chuan, "Tunge i hming, Mami?" tiin a han zawt a. "Peki ka nia." tiin naupang chuan a lo chhang a. "Class engzat nge i nih le?" tiin a han zawt leh a. Naupang chuan, "Pawl ruk." tiin a chhang leh a.

"Inu chu a lo haw vat ang, pawnah sawn lova thu la, i pa nen hian kan inkawm lawk dawn a..lo nghak rawh aw." a han ti leh a, naupang chu a chhuak a. Nathana chuan naupang pa chu a han en leh a, "Engtia rei nge a bo tawh?" tiin a zawt leh a. "Ni 4 chhung.." tiin a lo chhang a. "Ni li chhung chuan enge i tih?" Nathana chuan a han ti leh a. "KA zawng char char, ka pu...ngaihzawng dang a nei tih ka chiang alawm." a han ti leh nghal zuah zuah mai a.

"Hey..chutin hmeichhiate hi dem rikngawt loh tur. Complain ziak la, kan lo buaipui ang." Nathana chuan a han ti leh a, chupa pawh chu a kal ta a. "Rinawm, roll call nei ang le." a han ti a. Rinawma chuan Police te chu a ko khawm a, police te chu an ding tlar thap mai. Nathana chu zah hmel tak hian an en thap mai a, Nathana chu an hma taka dawhkanah chuan a thu a.

"Tunge vawiinah court a duty tur?" a han ti a, constable Moses-a chuan, "Mamuana." a lo ti nghal nalh a. Nathana chuan a han melh kual leh hlawm a, "Emanuel..lo kal hnai teh." a han ti leh a, constable Emanuela chu a lo chhuak a. "Enge ni, Sir?" a han ti a. Nathana chuan, "Chaw i ei tawh em?" tiin a han zawt a.

"Ei tawh e, Sir." tiin a lo chhang a. "Sentry book-a ziah tel a nih loh chuan walkie talkie kengchhuak tawh suh ka ti a nilawm ni?" tiin a hau va. "Sorry Sir.." tiin Emanuela chu a zah hmel kher mai. NAthana chuan a han enkual leh hlawm a, "Drunken driving check tura duty te kha tute nge?" a han ti leh a.

Constable pakhat chu lo penchhuakin, "Keimah, Sir." a rawn ti a. "NAngmah chauh maw?" a han ti a, chu constable chuan, "A..aih nilo.." tih pah chuan abula mi chu a han melh zeuh a. Vin deuh tak hian Nathana chuan, "Case chhui laia wine-shop a zu va lei kha i zak miah nange?" tiin a hau leh hrep mai.

Chutih lai chuan nu pakhat hi a rawn tlan lut a, a thiante chuan an rawn zui bawk a. A ngawng a rawn dawm a, a la thi lehnghal zui a. Mangan hmel tak hian, "Ka th(r)i min ruksak a ni, kawnga ka kal lai a rawn pawtthla a..min pui ru." a rawn ti lut nghal chiam chiam mai. Nathana pawh chu ava kal a, Rinawma leh constable dangte chuan an rawn zui bawk a.

"Tinge..enge ni a?" Nathana chuan a han ti a, chu nu chuan, "Ka thi an ru a, tute nge an nih ka hrelo." tiin a lo tap titih lehnghal a. Nathana chuan chunu nghawng a thisen luang chu a hmu a. "Ehe..kha i nghawng kha a thi ania, damdawiinah kal pui vat ru." a ti a. "Aih ka tha alawm, ka thi ber chu.." a tih lai chuan Nathana bawk chuan, "I thi chu kan hmulet em em ang, damdawiinah kal phawt i ngai." tiin a kal luih tir a.

Office ah chuan Nathana chu a let leh a, "Rinawm, khanu thi ruk chungchang kha inquiry nei hmasa ang che. DIG Office ah kal ka ngai a, Sangpuia file te kha ready sa vek turin Moses-a saw lo hrilh ang che. Chuan maw Rinawm, Moses-a sawn maw..writer in leave a la a..tiin a lo hrilh mai ang che." tiin a nui suk a.

Rinawma chu ava kal a, Moses-a bula file lo peih sa thlap tura ava hrilh chuan Nathana sawi ang ngei chuan Moses-a chuan, "Kan writer-i'n leave ala a..buaithlak khawp mai." a lo ti ta ngei a. Rinawma chu a nui suk a, "Sir Nathana te chuan a hre lawk vek alawm, nangman buaipui turin a ti reng che alawm." a han ti a.

"A ti tak tak em ni?" tiin Moses-a chu a hawi phawk hru mai. "Aw ti e." tiin Rinawma chuan a lo chhang a. Peihloh hmel tak hian Moses-a chu a tho tual tual a, "Khawiah nge file kha  adah kha awww.." a han ti nuah nuah a. Rinawma chuan, "File kha kan bulah a lo kal tawp dawnlo, a zawna zawn angai alawm." a han ti leh deuh kher a.

Tum hmuk hian Moses-a chuan, "Chupawh chu a sawitel em ni?" a lo ti a. "Sawi tel e." tiin Rinawma lah chu a nui duh hauh lo lehnghal. "Hehe...ka'n zawng ange." tiin file chu muangchang chuan a zawng a. NAthana chu a rawn chhuak a, "Rinawm, file chu in peih tawh em?" a rawn ti a.

"Kan zawng mek." tiin a lo chhang a. "DIG Office ah ka kal dawn a, tikhan lo zawng rawh u." Nathan chuan a han ti leh a, Nathana chu a chhuak a. A chhuak chiah chu Moses-a chuan, "Hei, ka hmu chiah e. A vin hma che hian va pe vat rawh..a thinchhe si." a ti nuah nuah a. Nui suk chung chuan Rinawma chuan file chu a la a, Nathana chu ava pe a.

***************

A tukah chuan Nathana chuan chumi Khua a an ACP Awmpuia chu inhmuh puiah a sawm a, thingpui dawrah chuan an inhmu ta a. Nathana chuan, "Ilo kal chu ka lawm hle mai, SI Sangpuia case chungchang kha ania. Kha tualthahnaah khan hriatthiam loh ka nei nual a, chumi chungchang chu ka sawipui duh che a. He case ah chian thil chiang deuh pathum a awm a, pakhatnaah chuan Sangpuia khan hmelma a neih hriat a nilova, hawtu a neih awm pawh hriat a nilo. A pahnihnaah chuan kha thihna kha plan lawk sa a ni bawk, a pathumnaah chuan Sangpuia kha khami ni kha a off-day a ni. Khami zan pawh khan amah kha duty tur a nilo, Kimtea zawk a ni. Anih chuan Sangpuia hi an thah tum nilovin, Kimtea zawk hi ani mai angem tih hi zawhna chu a ni. Detail i hriat ang ang min han hrilh la, ka kalthui deuh thei mai ang." a han ti a.

Mahse chu ACP Awmpuia chuan, "Ngawi teh...ka station-a lut a, ka record ho te lo en tur hian tuin nge phalna pe che a? Eng dikna nge i neih?" a ti ta hrep mai. Nathana chuan, "Biak pawh che ka tum a, mahse phone i la thei silova.." a tih lai chuan Awmpuia chuan, "Tunah min hmuhtheih reng hi, hetiang hian khami ni pawh khan min biak pawh dan zawn mai tur alawm." a lo ti leh hrep mai.

Nathana chuan zaidam tak hian, "Ka tihpalh a ni e, case chungchang chu sawi leh ta ila.." a tih lai chuan Awmpuia bawk chuan, "Ngawi teh..ka la sawi zo lo. He case hi infiamna ang mai mai a nilo, a hmasa berah chuan pangngai leh tha takin investigation nei ta che. Khami zan khan tualthattute chuan Police uniform ha anih phawt chuan an lo that dawn tihna em ni?" a lo ti leh a.

"Ka pu, in Station-a Sub-Inspector a ni a, tha taka kan sawidun a nihloh chuan.." a sawi zo leh hman ta lo. Awmpuia bawk chuan, "Keipawn chu tho chu alawm ka hrilh che, keini ai aiin tinge i lo mangan ve vak a? Nangni ang hi chu ka hria che u alawm, thamna tamtak in la a, mipui hmaah rinawm ber angin in insawi leh a." a han ti leh fak fak mai a.

Nathana chu a nui suk a, "Ka lawm e." tiin a ding a. Kal a tum lai tak chuan AWmpuia pawh chu rawn ding chhuakin, "SP NAthan...kei aiin i senior tih ka hria, mahse hei chu ka station a ni. I awmloh laiin in inah va kal ta ila, i duh bik angem? Khatiang chiah kha animai, ka zawhna chhanna i neih bikloh chuan keipawhin i zawhna ka chhan nachhan tur ka hre biklo." a rawn ti leh hram a.

NAthana ngaihdan a ni ta lo, muangchang chuan ava let leh a. Chutah ACP Awmpuia chu a hnek siah mai, a ding awn ta ruai ruai mai a. Thingpui dawra chawl ve dang ho chu an rawn hawi thup a, "Engmah a nilo, kan infiam a nih kha.." tiin Nathana chuan mipuite chu a lo hrilh vat a. Muangchang hian AWmpuia tlu tur chu a man bet a, thutthleng ah chuan a thuttir leh a.

**************

"SP i nih hun chhung pawh reilote chauh ala ni a, i hna thawhthat avangin promotion pawh hmu leh vat thei tur i ni. Mahse i chetdan erawh hi chuan promotion chu ala hlat khawp mai, engtin nge ACP kut i thlak theih zawk a? tiin DIG chuan Nathana chu a hau va. "Sir, min chhang tha duhlo lutuk a.." NAthana'n a tih lai chuan, "Chutiang chhuanlam a tling lo...tinge hetia i chet rum rum kher a?" tiin a lo hau leh hrep mai.

"Sir, Kimtea nunna chhan nan Sangpuia hian a nunna a hlan a ni. Kha, hei hi en rawh." tiin file chu DIG a pe a. NAthana bawk chuan, "Kha ACP kha huatna leh hmelmakna ka neilo, mahse khapa kha he case ah hian a inrawlh ve a ni tih ka hre nghal thei a ni. Kut ka thlak avang khan min zilh a tiraw..mahse kha ACP vang khan nu pakhat chu hmeithai a nih phah der asin. Eng chhanna nge i pek tak ang? Kan kutah an innghat a nih chuan, an beiseina te chu kan tih hlawtlinsak tur a ni dawn lawm ni? Sir, he case a inrawlh ve ka hriat apiang chu tumah ka chhuah lovang." tiin a ding a. DIG chu salute a pe a, "Promotion duh vanga hnathawk ka nilo, mipuite him nan zawka thawk ka ni." a ti a, a chhuahsan ta a.

********************

Rinawma pawh chuan khami zana watchmen sawi, nupa niawm tak a hmuhte kha a chhui chhuak ta nge nge a. Tlaiah chuan chumite inluah lam pan chuan an kal ta a, inchhungah chuan mipa pakhat, ang vak vak thawm an hria a. "Hetah enge i la tih? Kal bo rawh ka tih che kha. I chhuak vatlo a nih chuan nangmah mai nilo, i naute pawh kha ka that nghal ang." tiin a inhrosa nasa mai.

Chutah NAthana leh Rinawma te chu an va lut thut a, mipa pakhat leh hmeichhe pakhat hi an lo awm a. Hmeichhia chuan naute a lo pawm bawk a, chuveleh chupa chu tlanchhiat a tum a. Mahse NAthana chuan a man hman a, chhuatah keuh tlu in handcuff a bun tir a. "Khawnge..khawnge midang an awm? Khawnge i thurual puite an awm?" tiin a zawt a. Chupa chuan midang ho chu an veng bazar lamah an awm thu a sawi a, Nathana te pawh chuan bazar lam chu an pan ta a.

Bazar pawh chu an va thleng nghal a, an inum kawi ta zawr zawr hlawm mai. Chawhmeh zuarte an t(r)e tuar tuar hlawm a, bungrua an su tlu rem rum bawk a. A khat tawkin silai  apuak leh dur thin a, thawm pawh a ring tha hle mai. Rei fe an inum kawi hnu chuan Nathana te chuan an man kim thei ta a, hmun fal lamah chuan chumite gang ho chu an hruai ta hlawm a.

**********************

Chung misual panga te chu Nathana hmaah chuan an thingthi thap mai a, "Ka pu, min ngaidam rawh..kan ti leh tawh ngai lovang." tiin an tap pur hlawm mai. "Engvangin nge Police Officer te hi min sual let ngam zawk a?" Nathana chuan a han ti khur khur a. "Sir, kan tihpalh ani." tiin ngaihdam chu an dil leh malh malh hlawm a.

"Dimna tel miah lovin a nung chungin in hal a, tunah ngaihdam min dil maw?" tih pah chuan a sir ber ami chu a hnek thal tawp mai. A indawt te te chuan a chhuih thal pawp pawp hlawm a, a tawp ber ami chuan a hlau kher mai. "Sir, min khawih ve suh...engkim ka hrilh vek ang che." tiin a tap nghal zawih zawih mai.

"Engvangin nge ka khawih veloh ang che?" tiin Nathana chuan a vin leh khur khur a. "Sir, engkim ka hrilh vek ang che..ihh..ka sawi chhuak  anih chuan thah ah min vau a ni, ka pu.." a han ti leh hluam hluam a. "Tuna thih nge i duh nidangah? Sawi vat rawh..tunah.." Nathana chuan a han ti vin leh thak a, chupa chuan thudik engkim chu a sawi ta a.

***************

TO BE CONTINUE