NATHAN SEASON-4 Written by : Aaron Malsawmdawngzuala Episode-7 (PROJECT WIZARD-3)

 NATHAN SEASON-4

Written by : Aaron Malsawmdawngzuala

Episode-7

(PROJECT WIZARD-3)

********************

Nathana te team chu Hotel Royal Plaza ah chuan va kalin Thlamuana thlalak chu an keng bawk a, "Hepa hi a detail kimchang kan hre duh a ni." tiin reception hnenah chuan thlalak chu an hmuh a. Reception chuan a han check a, "Room no 208 ah a awm e." tiin a lo chhang a. Rang takin an chho nghal a, Room no 208 zawnah chuan an ding chat a.

Mak tak maiin kawngka chu a lo inhawng sa a, fimkhur tak hian Nathana chuan a han bih a. A chhungah chuan staff pakhat hian chhuat a lo nawt mek a, Nathana te chu an va lut a. "Khawiah nge in mikhual hi a awm?" tiin ava zawt a. Staff chuan, "Ka hrelo, a chhuak aniang." tiin a lo chhang a.

"A kalna tur awm ang i hria em?" tiin a han zawt leh a. "Hrelo..Sir, misual em ni? Amah hi a buaithlak khawp mai, misual anih chuan man ngei ngei rawh u. A room te hi nikhatah vawi 5 chuang te tihfai a duh thin a, tips engmah min pe ngai bawk silo." a ti ta mai a. Staff pakhat dang lo lut leh in, "Buaina a awm em ni?" a rawn ti a.

Room lo tifai mek tu chuan, "Bro, hemi room a mi guest kha engtikah nge a lo let leh dawn i hre mial em?" tiin a zawt a. "Khitah..inchung lamah, bar ah a awm reng alawm." tiin alo chhang a. Nathana te chu room atang chuan an chhuak nghal a. Inchung lam bar pan chuan an chho ve ta nghal a.

Bar an han thleng chu an lo lam mup mup mai a, mipui pawh an thahnem hle. Nathana te chuan Thlamuana chu an zawng nghal a, mahse an hmu mai thei lo. Counter hmaa meizial zu a, zu lo in mek Thlamuana chu Nathana chuan ava hmu fuh ta hlauh mai. Ava pan hnai vat a, Thlamuana chuan a lo hlauh loh hmel kher mai.

Rum zet hian Nathana chuan a melh khur a, "Enge i in duh ang? Brandy nge Whiskey?" a lo ti vel a. "Hey, Miss India Mizoram Lalnunpuii thah thubuai ah rinhlelh mek i a, inquiry ti tura lo kal kan ni. Ngawi reng khan min rawn zui la, i nalo a ni mai." tiin Nathana chuan a lo chhang a. Thlamuana chuan a sikret zuk lai chu ashtray ah chuan a nawr hlum a, Nathana chuan a lo en reng a.

Thil hriatchhuah a nei leh ta, Thlamuana sikret zuk chu a dum hlang vek a ni leh ta tlat mai. Amah thah tumtu vaipa meizial zuk lai te leh Lalnunpuii te ina meizial bung a hmuh te chu a ngaihtuah chhuak a, mak a ti hle mai. Thlamuana chuan a zu no chu napkin hian fimkhur tak chuan a han hru hliau hliau a, "Ka ruih laia thu min zawt fiah a nih chuan thudik ka sawi phah in ring animaw, a dik em?" tih pah chuan napkin chuan no chu a tuam a, zu chu a in a.

Nathana thinrim chuan a kawr awmah a tham a, chuveleh Thlamuana chuan, "Hey hey...khatin mi ti suh, ka lo kal dawn alawm." tih pah chuan zu chu a in leh a, "SP Nathan, kan inbiak angai a ni....a fala biak che ka duh a ni." a ti ta mai a. Hotel roof top lam pan chuan an chho a, kawngka bulah chuan Nathana chuan, "Kamal..Liante..hetah hian min lo nghak ru." a ti a.

Kawngkhar hi darthlalang vek atanga siam a ni a, a hmuh tlang theih vek a ni. Nathana leh Thlamuana te chu an kal hrang ta a, inchung zawlah chuan an ding dun a. Thlamuana chuan sikret dum chu a han phawrh leh a, "I zu ve duh em?" tiin Nathana chu a zawt a. Nathana chuan a chhang lo, Thlamuana chuan sikret chu tan in a zu leh ta a.

"Engvangin nge Lalnunpuii kha i thah?" tiin a zawt a. Confi zet hian, "Sawifiah eng ang mah ila i hrethiam pha ve chuang lovang." tiin a lo chhang a. "Engvangin maw? Nangang tualthattu tenawm chauh te hian ami hrethiam dawn?" tiin Nathana chuan a zawt let ve sak mai a. "Hriatthiam chu a nilo..ngaihtuah chi zawk a ni. Rudran-a seminar ah i kal ve kha, i hre tawh nange?" tiin a lo zawt veleh a.

Nathana chu a lung ni vak tawhlo khawp mai, "Hey, engvanga a fala min be duh nge i nih?" tiin a zawt a. Hlauh loh hmel tak hian Thlamuana chuan lo melh letin, "Ka tualthah hnuhnung zawk kha engvanga tlai nge ka nih i hria em?" a ti ta mai a. Mak ti tak hian, "Enga? Tualthah vawi hnihna a? Anih leh vawikhatna chu tunge?" tiin Nathana chuan a zawt a.

"Tual ka thah hmasak zawk kha, ka thah zawh hnu minute 5 ah chiah i rawn thleng a. Min um a, kan insual ta anih kha. Chuan...ka thi a, nangchu i dam chhuak." a ti leh ta mai a. Thinrim tak hian Nathana chuan, "Eng thil awmze neilo nge i sawi hi?" tiin a kut a hum ruh nasa tawh kher mai.

"Lo nghak lawk aw.." tih pah chuan Thlamuana chu a kal sawn a, Kamal-a te, Liantea te leh police dangte lo din na, kawngkhar chu a va kalh ta daih mai. "Hey, engvangin nge i kalh? Lo hawng rawh.." tiin Liantea te chuan an au zui nasa mai a. Thlamuana chuan Nathana lam chu ava pan leh a, a meizial chu a paih a.

Chutah Nathana chu a nam vak a, hnek a tum ta mai. Nathana chuan a lo bum a, a sawisa let hrep mai. Kawngka chu ava hawng a, Liantea te pawh an rawn kal nghal a. Thlamuana chu a nui vur vur a, "Ka taksa hi chu a chak vaklo a nih hi...nakinah ka la buaipui ang che." tiin Nathana chu ala cho nasa mai.

"Liante, man rawh u." Nathana'n a han tih chuan Thlamuana chu a tlan thut mai a, rang takin an um nghal a. Chutah Thlamuana chu inchung atang chuan a zuang thla ta mai a, a nui thla uar uar lehnghal. A rapawm lek lek zawk hial, Nathana te pawh chu an hrilhhai takzet. A sang tha bawk a, lei a thleng chiah chu Thlamuana chu a thi chiang ngei mai.

****************

DGP chuan NAthana chu a hau nasa ngei mai, "Nathan, nangni hian in chingfel thei dawnlo a ang riau mai, he case hi chhui chian takzet angai a ni. Tunchiah chance in nei e, fimkhur ang che u." tiin a zilh hlak mai. Press mite an lo pungkhawm a, Nathana te Station chu an buai ngei mai.

"Ka thi a, nang chu i dam chhuak hlauh thung." tia Thlamuana sawi te chu Nathana chuan  a ngaihtuah let a, a rilru a buai takzet. A tuk lawkah chuan mitthi ruang chhar a ni leh ta a, veng mawng tak pakhatah a ni. A hmunah chuan Nathana chu ava thleng ve nghal vat a, Liantea leh Kamal-a te pawh an lo awm der tawh.

"Advance Centre of Neurology-ah head a ni a, a hming chu Nelson-a a ni." tiin Kamal-a chuan a lo hrilh a. "Neurology a?" tiin Nathana chuan a han zawt leh a. "Aw ni e, thluak lam zir mi ania, a special-na ber a ni. Brain research ah pawh lawmman a dawng pha hial a, Science Institution tamtak te pawhin a boral avang hian vawiin hian chawlh an puang hial, chutiang khawpa lar chu a ni awm e." tiin a lo chhang a.

Nathana chuan ruang chu a en a, patling kum 50 bawr vel, thau lampang hi a ni a. Leiah chuan a lo thusawp a, cement lung lian tak mai hi a lo ngheng a. Rod zum lo lawr ah chuan a hrawk chu a lo in thil tlang a, a hmai chu thisen hian a khat vek bawk. Nathana mitthla ah chuan kha vaipa in thah a tum lai a, khawl chhia niawm taka thir zum tak lo lawr hmanga thah a tum lai velte chu a lo lang leh ta chuai chuai mai.

A bula lungpui lian tak chu a han en leh a, chutah chuan thisen, kuta tah niawm tak chu a lo awm leh a, Nathana chuan mak a ti ngei mai. Doctor lo awm ve chuan, "Sir, tualthattu hian glove a vuah a ni ngei ang, finger prints kan hmu thei lo." tiin Nathana chu a han hrilh a. Nathana chuan ruang awmna bul vel chu a han en kual a, Nelson-a chapal khing chu a lo let bar mai a.

A bul kawng te chu a han en leh a, kha vaipa in thah a tum laia leia a hnuh phei lai te chu a mitthla ah chuan a hmu leh a. A enkual zel a, darthlalang kehthem lo tla nuai mai te chu a hmu tel bawk a. "Sir, engemaw hmuhchhuah i nei em?" tiin Liantea chuan a han zawt a. "He tualthattu hian Nelson-a hi a thah dan tur awm ang ka mitthla thiam mai, zingkarah he scientist Nelson-a hi helai kawngah hian zing exer a la a ni ngei ang. Banga thisen kai ah hian mihring vun them a awm a, a awmzia chu tualthattu hian bangah hian Nelson-a lu hi a tauh tir a ni. Tichuan helai kawr ah hian a nam thla a, a hnuk phei a. A thah hma hian vawi 4-5 vel a hmaiah a beng leh phawt a, tichuan rod zum lo lawr ah hian a hrawk chu a thil tlang ta a ni. Tualthattu hian glove a bun a, a kuta thisen kai te chu lung ah hian a tat bawk a ni. Mahse he tualthahna hi chu ahmaa ami ai chuan a danglam deuh, tlem chuan." a han ti a.

"Ni e, victim hi tun tum chu mipa a ni tlat." Kamal-a chuan a lo ti ve bawk a. "Tualthattu hian tual a thah lai hian a fimkhur hle bawk a, man a nih loh nan plan fel tak a siam lawk a ni. Kutkawr a bun a, mahse chutih rual chuan ahmaa tualthahna thleng nena in ang tur khan a che leh lawi bawk si." Nathana chuan a han ti leh a.

"Kei chu a awmzia ka hre nei nuai love, tualthattute hi mi hran vek an ni bawk sia. Ka buaina hmasa ber chu tualthahna zawng zawng hi a in ang deuh vek a, mahse tunah hei chu a danglam i ti leh bawk sia." Liantea chuan a lo ti ve leh a. "Sir, thlarau sual emaw, ramhuai thil tih a nih i ring em?" tiin Siama chuan a lo zawt ve bawk a.

Nathana chu a nui suk a, "Ka hre biklo, tualthahna hmasa ho kha chu nuam tih vang emaw, thisena tuihal vanga thah niin a lang a. Mahse hemi hi chu a danglam alawm, engemawni tak chu a awm a ni." tiin a chhang a. Scientist thi ta, Nelson-a te in lam pan chuan investigation nei turin Nathana te chu an va kal leh ta a.

***************

Nelson-a room te chu Nathana chuan a han enkual a, scientist tih takah lehkhabu a tam kher mai. Dawhkan hnuai pawhdawh chu a hawng a, pistol a lo awm tlat mai. "Siama, he pistol hi a serial number la ula, Liantea khan lo buaipui zawm nghal rawh se. Engtik huna apply nge a nih tih te leh a detail kimchang takin lo chhui chiang ang che u, hmanhmawh tak khan aw..." tiin pistol chu a pe a. 

Dawhkana lehkhabute chu a han enkual leh a, Rudran-a ziah lehkhabu a lo awm ve tlat mai. Lehkhabu chu la in Nelson-a fapa, Rintea bulah chuan ava kalpui a. "He lehkhabu hi.." tih pah chuan a pe a. "Aw he lehkhabu chungchang hi chu a sawi tawh tak e, he lehkhabu hian a beisei a phakloh thute pawh a sawi alawm. A chhiar chhuak vek ta em tih pawh ka hrelo, tinge min zawh a?" a lo ti a.

"Rudran-a hian seminar a nei thin a, i pa hi a tel ve ngai em?" tiin Nathana chuan a zawt leh a. Rintea chuan, "Aih ngailo, seminar chu ama hnathawhna ah chiah a nei thin. Chutiang midang seminar chu a kal ka ringlo, Sir." tiin a lo chhang a.  Nathana chu a thaw hak a, "Um, ka lawm e." tiin a kalsan a.

*******************

Nathana leh Kamal-a te chu Rudran-a seminar ah chuan an va kal leh a, "Ka pu chu tunah class a nei mek a, lo nghak rawh u." tiin reception te chuan an lo hrilh a, NAthana te chuan an nghak ta a. Minute 5 hnu velah chuan Hall atang chuan mipui an lo chhuak sap sap a, Rudran-a pawh chu a rawn chhuak a.

"Sir, hei an hmu duh che." tiin reception chuan a lo hrilh vat a, Rudran-a'n Nathana te police uniform nena an lo ding reng mai a hmuh chuan mak a tih hmel hle mai. Polite tak hian Nathana chuan, "I tha maw, Sir?" a han ti a. Tum hmuk hian Rudran-a chuan, "Lo lut ru, ka office ah." a lo ti ringawt a.

Nathana leh Kamal-a chu Rudran-a office ah chuan an lut a, Rudran-a dawhkana ashtray ah chuan sikret dum hlang, ahmaa a hmuh fo thin chu ava hmu leh ta. "Ka pu, i tha em?" tiin Nathana chuan a han zawt ringawt a. "Ka tha alawm, enge ni ta a? Mak i va tih hmel ve, Mr..." a tih lai chuan, "Nathan.." tiin a lo chhang vat a.

"Aww..ni tak e, Nathan..i dam maw?" Rudran-a chuan a han ti leh a. "Ka dam alawm, pawi i tih loh chuan thil ka zawt thei che angem?" Nathana chuan a han ti leh a. Sikret dum peh vu pah chuan Rudran-a chuan, "Tehreng mai, min zawt ta che." tiin a lo chhang a. "Ihh..sikret hi i zu zing viau em?" tiin a han zawt a.

"Ka nghei zuai a, ka zu leh tawh zawk." tiin sikret chu tan ta lo chuan dawhkanah a dah a. Nathana chuan, "Scientist Nelson Lalchhandama hi i hre ngai em?" tiin a zawt leh a. Rudran-a chu a ngawi vang vang a, "Scientist a? Eng domain ber nge? A hming chu ka hriat tawh hnu a ang khawp mai, Mizoram Scientist tlemte ho hi chu ka hre ve nual hlawm a, enge a special na?" tiin a lo zawt let a. 

"Brain Neurology, a lar ve thawkhat." tiin Nathana chuan a chhang a. "Ka hrelo tlat mai." Rudran-a chuan a ti a. Nathana bawk chuan, "An in kan enfiah khan, i lehkhabu ziah a chhiar thin tih kan hmuchhuak a. Englo ania, i seminar ah hian a rawn kal ve thin em tih kan hre duh mawle." a han ti a.

Chutah Rudran-a chuan napkin hi a phawrh a, dawhkana tui no chu napkin chuan a tuam a, fimkhur tak chuan tui chu a han in a. Nathana chuan mak a ti hle mai, a chhan pawh ahma zana mahnia inthat, Thlamuana tihdan chiah a nih vang a ni. Tui chu a in zova, "A lo kal ngailo aniang, chutiang mi ka hrelo." a han ti a.

Nathana mak ti lutuk hmel chu Rudran-a chuan a han en vang vang a, "Mr Nathan, i tha maw?" tiin a han zawt a. Chuveleh Nathana chu a tho thut a, Rudran-a office atang chuan a chhuak a. Reception te bulah chuan va kalin, "Pu Rudran-a hi engtia rei nge meizial a zuk tawh? Ahmain a zu ngai em?" tiin a va zawt ta tawp mai.

"A zuk ngai awm pawh kan hrelo, a zu ngailo hrim hrim zawk." tiin an lo chhang ta mai a, Nathana chuan mak a ti kher mai. Pawnah chuan a chhuak a, Kamal-a chuan a rawn zui a. Motor lam apan a, "Sir, tinge i chhuah daih a?" tiin Kamal-a chuan ava zawt a. Nathana chuan a chhang lo, motor chhungah chuan luh a tum chiah chu ui a rawn bauh vak vak mai.

Ava hawi phei chu rottweiler lian em em mai, Rudran-a ui ngei mai, Rocky chu a lo ni a. Nathana chuan ava pan phei a, chutah security guar chu lo tlan pheiin Rocky chu a rawn hau a. "Hei hi Rudran-a ui kha tiraw?" tiin Nathana chuan a zawt a. "Aw ni e." tiin a lo chhang a. "Seminar velah kha chuan he ui hi a ngawichawi hle si a, tinge ava bauh peih ta ve?" tiin a zawt leh a.

"Keini pawn mak kan ti alawm, ni 4 vel kalta atang khan a mizia a dang thut a, Pu Rudran-a phei hi chu a bauh nasa thei khawp mai. Niminah phei chuan seh a tum hial a, chuvang chuan alawm hetah hian kan thlun tak tawp ni." tiin security chuan a lo chhang leh a. Nathana chu rang takin Rudran-a office ah chuan ava let leh a, Rudran-a chuan meizial dum chu a lo zu khu tual tual mai.

"Ka pu, khawngaihin min hrethiam la, ka thusawi hi lo ngaithla teh. Ka pu, police custody ah hian rawn inpe mai rawh. I dinhmun hi a hlauhawm a, midang tan pawh i hlauhawm thei a ni. Ka pu, he thu ka sawi nachhan hi chhan tha tak a ni, khawngaihin hrethiam rawh. Engthil emawni tak chu i chungah hian a thleng mek a ni, i awmdan, i mizia leh i chetphung ang chiah nei mi pahnihte chu an thi tawh a, a chhan enge tih erawh kan hrelo. Kan chhui mek a, engvanga hengthil te hi thleng nge anih kan la hre biklo." a tih lai chuan Rudran-a chuan chiang fek fawk hian,"Chhuak rawh." a rawn ti thut mai.

Nathana chu a ngawi hmak a, a ngaihdan a nih bikloh hmel kher mai. Rum tak hian Rudran-a chu a melh a, "Police Officer ka ni a, ka thiltihtheihna hmang hian i chungah enge ka tih theih engmah i hrelo. Zah tak leh polite takin ka bia che a, inla ngeng hlek suh ang che." a han ti a. Hlauh loh hmel tak hian Rudran-a chuan, "Ka thiltihtheihna hmang hian i chungah enge ka tih theih i hre biklo. KA lawyer ka bia anga, mental torture case in court ah ka khing thei che asin. Min zahlo khawp mai, chhuak rawh." a han ti khur khur a. Nathana chu a nui suk a, "Kan hria ang chu." tiin a chhuahsan ta a.

*****************

Station lam pan chuan Nathana leh Kamal-a te chu an inkhalh phei a, "Coincident a tam lutuk, Rudran-a hi kan enthlak a, kan thanga kan awh ngei a ngai a ni. A pawimawh ber chu nungdamin kan man ngei tur a ni, fimkhur taka kan chet angai." Nathana chuan a ti a, Kamal-a pawh a lo bu nghat mai.

Police te chuan Rudran-a chu an chhui ru ta a, insem darhin a then chu a seminar ah te chuan an kal ve a, a then chuan a restaurant chawlhnaah te an zui ru bawk a. Zankhat chu damdawi dawr pakhatah Rudran-a chu ava kal a, damdawi eng eng emaw chu a lei a. A bul hnai dawr ah chuan police te chu civil dress ha in an thu ve reng a, Rudran-a chetla lai chu an en reng a.

Chutah vaipa pakhat hi lo kalin Rudran-a chu chemte a rawn vih a tum ta mai a, mahse Rudran-a chuan a lo bum hman hlauh mai. Chu vaipa chu tudang nilovin, a hma seminar-a Rudran-a sawisel hreptu, security ten an nawr chhuah tak kha a ni. Hindi tawng chuan, "Ka mamawh zawng chu ka pawisa min peklet leh kha a ni." tih pah chuan vih leh a tum a.

Rudran-a chuan a ban a lo man sak a, a rek ta vak mai. Chu vaipa chuan Rudran-a chu abanah a seh sak vak a, Rudran-a chuan a wallet leh damdawi te chu a thlauh va. Chuveleh vaipa chuan a wallet chu a chhar a, a tlan ta daih mai. "Hey..lo ding rawh." tiin Rudran-a chuan a um zui ve nghal a.

SAngha zawrhna lamah chuan vaipa chu a tlan a, Rudran-a chuan a um zel a. A tawpah chuan a va man ta, mahse  vaipa chu a talchhuak leh hlauh mai. Rudran-a chu a nam thlu tawp a, a bula sangha phuhlip ziah sa, rimchhe em em mai an lo dahkhawm chu a bawm chawp chuan vaipa chuan a chawi lawp a, Rudran-a chu ava theh a.

Rudran-a chu a rawn tho leh a, a thawmna huh dum leh bal tak maite chu a en a. A han inhnim a, a lo rimchhe em em mai a. Sangha phuhlip te chu a kai teuh mai a, a inbeng fai nasa mai. A bul vel te chu a han en a, bawlhhlawh tamtak a lo awm a. A che buai kher mai, a au vak vak ringawt mai a.

Chutah ui bauh ri a hre ta, a ngawi hmak mai. Hnunglam ava hawi a, Nathana leh Rocky-a, ama ui ngei mai chu ava hmu a. Nathana chuan Rocky-a chu a lo kai a, a awmzia chu Nathana thil plan vek tihna a ni. Nasa takin Rocky-a chuan a bauh va, "Rocky..ngawi rawh...bauh tawh suh." tiin Rudran-a chu a au vak vak a.

Nathana chuan ava pan hnai a, "Pu Rudran, tinge a? Kha iva bal ve, sangha rim i nam rum rum alawm." tiin ava nuih a. Rocky-a lah chu a bauh ring tulh tulh a, "Rocky, ngawi rawh..a tawk." tiin Rudran-a chuan a hau leh vak vak a. A thu hniam a, a beng a hup a, a au vak vak ringawt mai. Chutah a thin in a tuar ta lo, a bula tiang chu la in Rocky-a, ama ui ngei mai chu a hlap pawp mai a, a vaw hlum ta der mai.

"Han bauh leh la, han bauh leh ta che." tiin a vin vak vak a, Nathana chuan Rudran-a chezia chu mak a ti kher mai. Rudran-a chuan rum zet hian Nathana chu a han melh leh khur a, vuak ava tum ta mai. Police dangte chu lo kal vatin Rudran-a chu an rawn dang a, an man bet a. Chutia a tal vel pah chuan Rudran-a chuan Nathana chu a en reng a, a nui uar uar mai.

***************

Rudran-a chu man a ni a, Station lamah chuan an hruai phei ta a. IG chuan, "Hetah hian i hming sign rawh le." a ti a. Rudran-a chuan a hming chu a sign a, mahse mak tak maiin 'PRAMOD' tihin a sign daih mai. A tawp chat a, a thai chhe leh vek a. Tichuan 'RUDRAN' tih chuan a han sign tha leh a, IG pawh chuan mak a ti hle mai.

A finger prints an la leh a, Rudran-a chuan ahmaa thu IG chu a han melh run a, "Diktaka thil in ti dawn a nih chuan, dental record pawh in siam vek angai dawn. Lo inhal hlumin emaw, ka ban te hi lo tan ta ila, engatan nge ka finger prints hi in tih tak ang?" a han ti deuh kher a, mahse tumah chuan an chhang lem lo.

*****************

Nathana te leh Officer dangte chuan meeting an nei a, Nathana chuan projector screen chu a han en vang vang a. "Hei hi Rudran-a hming sign pakhat zawk kha a ni a, mahse a thai chhe leh ta a nih kha. Expert hovin a hming sign a thai chhiat kha an siamtha a, alan dan chuan a hming sign hmasa zawk hi 'PRAMOD' tih a nih hmel. Mi tupawh nise, a hming sign a danglam a nih chuan a hming a thlak emaw a signature a thlak tihna a ni. Mahse Rudran-a erawh chutiang a nilo, tichuan zawhna ber chu he signature PRAMOD tih hi tu signature nge ni ta ang? Engvangin nge Rudran-a hian hetiang hian  a hming a sign?" Nathana chuan  a han ti a.

"Sir, min bum a tumna mai mai a nilo maw?" Liantea chuan a lo ti a. Kamal-a chuan, "Nilove Sir, he case hi chu thla 3 chuang kan buaipui tawh a, evidence tha tak pawh kan la hmu theilo ania. KA rindan chuan awmzia a neih ka ring tlat, kan chhuichian angai a ni. He case hi hriatthiam a har si a, science fiction lam te pawh a ang zawk mahin ka hria." a lo ti ve bawk a.

Nathana chuan, "Liante, Kamal-a hian a sawi dik a ni. Engpawh chu nise, he signature hi kan chhuichian angai ang." a ti a. "A signature neitu chu engtinge kan zawn hmuh tak ang? Pramod-a tih hmingpu chu Mizoramah chuan an vang ngawt anga, mahse ramdangah chutiang hmingpu chu an tam dawn lutuk. State hrang hranga kan zinkual a ngai awm sia, ava buaithlak awm ve." Kamal-a chuan a han ti leh a.

"Ni e, chutia han pawngtawng zawn tawp chu a theih lovang. Rudran-a hnaih ho, an state Tamil Nadu lam chauh kan thlur bing ang." tiin Nathana chuan a chhang a. Tichuan a office te chu an check chiang a, Tamil Nadu zinna tur ticket pawh an book fel a. A hnathawh puite pawh chu thu an zawt fiah hlawm a, an buai kher mai.

*****************

Chutia Rudran-a office-a an awm lai chuan Nathana chuan engemawni hi a hrechhuak zawk mai a, a phone phawrhin a hma ni lawka boral ta, Nelson-a fapa Rintea chu ava call a....

"Hello?"

"Aw..SP Nathan ka nia."

"Aw sawi rawh ka pu."

"I pa khan Pramod tih hmingpu a hria em? A college kalpui thin emaw, a hnathawh pui emaw, a thiante zingah emaw an lo awm mial lo maw?"

"Pramod-a a? Hnamdang i tihna em ni?"

"Aw ni e."

"Ka va hrelo ve, ka nu in a hre maithei. Ka nu nen inbe rawh u, lo nghak lawk." tiin Rintea chuan anu chu phone ava pe a. "Hello...ka pi, Pramod-a tih hmingpu i hre ngai em? I pasal hnathawh pui emaw, a thiante zingah emaw?" tiin Nathana chuan a zawt leh a. Rintea nu chuan, "Hria e, Pramod-a chu kan pa hian a sawi fo thin. A hnathawh pui thin ania, a sawi nasa thei lutuk." tiin a lo chhang ta hlauh mai.

"Hnathawh pui thin a? Tunah an thawk dun tawhlo tihna em ni?" tiin Nathana chuan a han zawt leh a. "Aw, a bang daih alawm." tiin a lo chhang leh a. "A chhan awm ang i hre thei em?" tiin Nathana chuan a zawt leh a. Rintea nu chuan, "Ka hre biklo, ihmaw..kan pa hi Tamil Nadu Institute pakhatah a thawk thin a, chutah chuan ania Pramod-a nen pawh an thawh ho. Mizoram ah a nilo, kumtawpah kan pa hi a lo haw ve zeuh zeuh thin." tiin a lo chhang leh a.

Nathana chuan meeting a ko leh ta a, "Tamil NAdu ah chuan kan kal vat angai dawn a, chutah chuan Pramod-a chu tunge a nih kan hre thei ngei ang. Institute of Neuro Science tih a ni a, kei leh Kamal-a leh Liantea kan kal ang." a ti a. Kamal-a chu a phur ngei mai, "Ava tihzia e, ka nupui fanau te ka tlawh nghal thei dawn anih chu." a lo la ti ham ham zui.

**********************

TO BE CONTINUE