NATHAN SEASON-4 Written by : Aaron Malsawmdawngzuala Episode-5 (PROJECT WIZARD-1)

 NATHAN SEASON-4

Written by : Aaron Malsawmdawngzuala

Episode-5

(PROJECT WIZARD-1)

******************

Dawr rawk avanga an man, tlangval pakhat chu Nathana chuan a um hrep mai a. Mi in kil khawr kawmkar, chep tak tak ah te chuan chu misual chu a tlan chhia a, Nathana lah chuan a um char char a. Chutah chu misual rukru chu mi inah a tlan lut a, an verandah ah chhuakin an inbula thingkung ah chuan ava pakkai zeuh mai.

A in neitunu chuan mak a lo ti kher mai, Nathana pawh a rawn lut ve nghal a. Chutia police form nena Police Officer lo tlan lut ve nghal a hmuh chuan in neitunu pawh chuan a hrethiam nghal a, verandah bula thingkung chu a lo kawk vat a. Nathana chu ava chhuak a, "Hey.. lo chhuk teh." tia va ban a tum chu rukru chuan hlauvin a tawlh sawn a, thingkung atang chuan a chhuk leh nghal a.

Nathana chuan inhnuai lama lehkhalh tumin inchhung atang chuan chhuah a tum a, mahse hmeichhe te thawm a hre tlat mai. Bedroom kawngka chu a lo inhawng huau mai a, fimkhur tak hian ava bih a. Chutah le, in neitunu ber chu chhuatah thisen nen a lo mu kawi zun mai a, a bulah chuan vai palian tak pakhat, dum zet mai hi a lo ding run bawk a.

Chu vai chuan in neitunu dulah chuan chemte hmang hian a lo vit siah siah mai a, a kuta thisen kai chu bangah chuan a tat a, a kutthla a lang ta kulh mai. Nathana chuan mak a ti em em mai a, ka hau hian a en ringawt a. Chu vaipa chuan meizial dum hlang vek hi a zu bawk a, zawi muang charh hian tamil tawng hian, "Thu a awih thlawt lo a ni." a ti thum bul bul mai.

Nathana lam chu a rawn hawi a, Nathana'n pistol phawrh a tum chiah chu vaipa chuan a hnek siah mai a. A tlan chhuak nghal a, a rang thei ang berin Nathana pawh chu tho leh in chu vaipa chu a um ve nghal a. Mi huan ah vaipa chu a tlan chhia a, a bi bo ta daih mai. Nathana pawh chuan huan chu a zu thleng thla ve nghal a, mahse vaipa chu a hmu hman lo.

A hawi kual vak vak lai chuan a tukhum chu a rawn ri dawt mai, a lu a hai muai muai a. A thal nghal tawp a, chianglo ruai chuan vaipa chu a hmu thei a. Chu vaipa chuan Nathana ban chu a la lawk a, a hnuk ta mai a. Khawl chhia niawm tak, lo tlu run mai lam pan chuan a hnuk phei zel a.

Chu khawl chhe tak mai kara thir zum tak lo lawr fur ah chuan Nathana lu chu va nawr tlum pawk a tum a ni ber, mahse Nathana chuan a remti hauh lo aniang chu. Theih tawp chuan a tang a, perek zum, leia lo tla chu chharin chupa hrawkah tak chuan a vit tlum ta pawk mai, chu vaipa chu a thi chiang hle. Nathana erawh chu thi ve lo mahse a lu a hliam chu na a ti em a, nikhawhrelovin a awm zui ta a ni.

*******************

THLA 3 HNUAH CHUAN...

DGP office kawngka chu Nathana chuan a han kik karh karh a, "Lo lu rawh, Nathan." tiin DGP chuan a lo chhang vat a. Nathana chu a thu a, "Sir, force hi rawn join leh turin ka inpeih tawh e." a han ti a. "In lama awm reng chu i ning tawh a nimaw? Haha..i lo join leh vat thei tur chu a lawmawm hle mai. Clearance report erawh a ngai dawn a, naktukah test i pal tlang anga, naktip ah i rawn join thei ang." tiin DGP chuan a lo chhang ta daih mai.

Hriatthiam loh hmel tak hian Nathana chuan, "Eng test maw? Ka va hrethiam lo ve.." a ti hu mai a. DGP chuan, "Enteh SP Nathan, accident satliah chu nise fitness test bak a ngailo tur ania, mahse kha i thil tawn kha chu 'near to death' case a ni a, traumatic experience niin i thih phah thelh a nih kha. Chuvang chuan psychiatric test i neih angai dawn a, doctor i pan leh phawt angai." tiin a lo chhang leh a.

"Sir, thla 3 lai a liam tawh a...doctor pawhin i tha tawh e a tia..." a tih lai chuan DGP chuan, "Nilove Nathan, formality mai chauh ania. Tupawhin i tha tawh a, i fit tawh tihte chu kan hria alawm. Formality mai chauh a ni ka tih kha, hrethiam hram rawh." a lo ti leh a. Nathana pawh chuan, "Awle Sir." tiin a chhuahsan ta a.

******************

Psychiatrist doctor chu Nathana chuan ava pan a, a lo buai hmel kher mai. Darkar khat vel a nghah hnu chuan Doctor chuan a ko ve ta a, nula hmeltha tak leh la naupang tak a lo ni reuh lehnghal a. File chu Nathana chuan  ape a, doctor chuan file chu a han en a. A en zawh hnu chuan NAthana chu a han en leh vang vang a, Nathana pawh a lai lek lek mai.

A aw a han thian kharh a, "Ihh..Senior Superintendent of Police, Nathan Malsawmkima ka nia..thla thum liam ta khan accident ka tawk a. Psychiatric evaluation ti turin min ti a, ka lo kal a ni." a tih lai chuan doctor chuan, "Incident zawk.." a lo ti a. "Engmaw?" tiin Nathana chuan a hrethiamlo kher mai.

"Ka sawi awmzia chu..accident nilovin incident zawk a ni...High Traumatic, near death incident." tiin doctor chuan a lo chhang leh a. Inthlahrun hmel tak hian Nathana chu  a nui suk a, "Aww..ni tak e, thla 3 lai a liam tawh a, ka tha tawh e. Kan senior officer ten formality tan tiin psychiatric test nei turin min ti a, official pawh a ni lo an tia. " a tih lai chuan doctor chuan, "Formality a?" a lo ti leh a.

"Aaa..aw ni e. Ka tha tawh lutuk, ka doctor pawhin i fit tawh e min ti a." a ti leh a. Chu doctor nula chuan strict hmel zet hian Nathana chu a han melh leh hraw a, "Psychiatrist an ni ve ami?" a lo ti leh a. Nathana chu a lungawi vak tawh lo, "Nilo." a ti hmuk a. Doctor chu a han thaw deuh hak a, "A bul tanna atan chuan a fulo hle mai, a zialo takzet. A hmasa in min hrethiam dawnnia, ka mizia hian a ti lung nilo che anih chuan.." a han tih meuh chuan Nathana chuan nuamlo a ti leh angreng lawi si a.

Nuih suk pah chuan, "Aa..a pawilove, a ho lutuk." a han ti leh a. Doctor chuan, "Nihleh eng film nge i en hnuhnun ber?" tiin a zawt leh ta daih mai. "Haha, thla thum chuang khumah ka awm a..eng movie mah ka en ngailo." tiin Nathana chuan a chhang a. "Khumbeta damlo te chu tunlai te chuan an nun hi  a boring thei vak tawh hleinem, an phone ah film te an en a, internet an khawih a. Ka han hrilh ve mai mai ang che, nikum khan typhoid natna avangin ka damlo nasa em em a. Ka damloh chhung zawng khan movie ka en char char a, movie 11 chuang ka en hman ang." tiin a nui har har a.

"Enteh doctor, Police Officer ka ni a, chutia piracy deuh a movie thar la release loh lo enruk tih vel hi ka tih ve a rem hleinem." tih pah chuan a nui a. "Nidanga khum beta i damloh leh hunah chuan DVD in film hlui ho lei la, en char char la, a boring lo mai ang. Ka ti tak tak ania, i dam sawt mai ang. I dam hunah phei chuan i ngaihtuahna thalo te leh hlauhthawnna te kha a  dah bo anga, chu zawk chu a ni ka sawi ni." doctor chuan a lo ti leh a.

Nathana chu a nui vak vak a, "Thiannu, khawiah nge doctor hi i zir a?" tiin a zawt a. Doctor chuan a pawhdawh a hawng a, a certificate chu a rawn phawrh chhuak a, "Hei hi ka certificate colour photocopy a nih hi, original chu bank ah a awm." tiin a chhang a. "Aw animaw? Aa..ka han zawt mai mai che a nih kha, i la naupang si a, amak ka ti deuh mawle." Nathana chuan a han ti a.

"A ho lutuk, min zawh kha  apawina a awm hleinem. Nangpawh tunah uniform i ha lova, miin i nihna zawt ta che sela, i badge i hmuh ngei ang chu tiraw?" tiin doctor chuan a lo nuih a, Nathana pawh chu a nui ve a, an nui dun bawk bawk a. Chutah doctor chuan, "I la hlau deuh chu anih kha tiraw?" a rawn ti thut mai.

"Engmaw? Ka va hrethiam love.." tiin Nathana chuan a lo zawt vat a. Doctor chuan Nathana mitah tak enin, "Kha i thil tawn khan a la ti hlau che a, nangmah ah khan hlauhna ala awm a ni. Tunah chuan police force i join a rem hrih lo, ila inpeih lo. Treatment i lak a ngai, ni tlemte tal chu chawl leh rawh." a ti ta mai a.

Nathana nui chu a tawp chat mai, "Engtin nge ka la hlau tih i hriat theih a?" tiin a zawt a. Chiang fek fawk hian doctor chuan, "Kei hi doctor chu ka ni a, nang chu ka damlo, ka patient i ni. X-Ray hmanga fiah chi a ni velo, ka sawi chu awih mai rawh." tiin a lo chhang a. Nathana ngaihdan a ni ta lo, "Engemaw i sawi le? Engmah i hrelo zawk a ni." a ti ve ta sak mai a.

Doctor nula chuan lungawiloh hmel tak hian, "Police Officer, a badge pawh phawrh duh lo leh chapo tak i ni tih hria ila chu ka certificate pawh kha ka hmuh tir hauh lovang che." a lo ti let hrep mai. Nathana pawh a lung ni lo ta khawp mai, "Ka rindan a dik chiah, i la hlau a ni, Pu Nathan." doctor bawk chuan a ti leh a.

Rum zet hian Nathana chuan doctor cu a melh a, "I thinchhe em em bawk a, kha khan i hlau a ni tih a tichiang bawk." doctor bawk chuan a lo ti leh a. Nathana chu a insum zo t alo, a file chu lak pah chuan, "A nih tak chu.." tiin a tho a, a chhuak ta daih mai. Pawna a kal pah chuan mak tih hmel tak hian, "Tinge maw ka va thinrim hma ve mawle, ka diklo tak tak aniang a?" a ti nuah nuah a.

****************

A tuk ah chuan Nathana chuan police force chu a join lui ta thova, thla thum kalta a rukru a um bawk kha Millenium Centre ah thil a ruk avangin a man leh a, tun tum chu a man fuh ta tlat mai. Pawnah chuan a kai chhuak a, a beng nek nek mai a. Chutih lai chuan psychiatrist, ahma ni lawka Nathana inhnial pui hrep, nula hmeltha em em Doctor Susan-i bazar haw chuan Nathana te chu a rawn hmu a.

Nathana chuan motor ah chuan rukru pa chu a khung a, an tlan pui ta nghal a. Chutia Nathana thinchhe em em mai Susan-i'n a hmuh chuana ngaih a tha lo hle a, a thlir zui vawng vawng mai. Motora an tlan mek lai chuan Nathana phone a rawn ri a, "Hello Sir...enga? Miss India Mizoram Lalnunpuii kha maw? Awle kan lo kal ang." tiin phone a dah a, "Liante, let leh rawh." tiin Miss India Contest a Mizoram ai awh a lo penchhuak, tun kuma kan Miss Mizoram India Lalnunpuii, kum 21 mi te inlam pan chuan Nathana te chu an kal ta a.

*******************

Lalnunpuii te in an thlen chuan in kawtah Inspector thenkhat leh police constable te chu an lo awm a, Nathana chu ava phei a. "Inspector, tualthahna em ni?" tiin ava zawt a. "Aw ni e, nizan ah shooting an nei a, a rawn haw hnu a ni. A personal make up artist nen chauh an ni a, finger prints awm ang ang te chu lab lamah kan thawn tawh e. Mahse a make up artist chu a number a kan callin a biak pawh thei lova, chuan evidence thenkhat atang chuan pawngsual tumna a ni tih kan hmu chhuak bawk." tiin Inspector chuan a lo chhang a.

"Press leak a awm tawh em?" Nathana chuan a han ti leh a, "Aih la awmlo, DIG hnenah direct in kan report nghal." tiin a lo chhang leh a. Nathana chuan, "Henu hi a lar viau em?" a han ti leh a, "Lar ve thawkhat e, a hming chu Lalnunpuii  a ni a, Miss India Mizoram kha ania." tiin a lo chhang leh a.

"Ka hria alawm, a hming leh  anihna chu ka hre ve a, mahse a hmel pawh ka la hmulo." tih pah chuan Nathana chu inchhungah a lut a, midang te chuan an zui lut ve nghal bawk a. Lalnunpuii room lamah chuan a han chho a, doctor te chuan hnuhma vel an lo enfiah mek a. Lalnunpuii room thlen hma bang kila meizial dum hlang bung lo let reng chu a hmu fuh a, a ding chat mai.

A mitthla ah chuan kha vaipa sek zet mai, thla thum kal ta a mi, amah vaw thlu a thah tumtu ngei maiin nu pakhat a thah lai a, a meizial dum hlang vek a lo zuk khuh hluah hluah lai chu a rawn lang ta zawt zawt mai. Room chhungah chuan a lut a, bang a han en chu a phu zuk mai. Bangah chuan thisen, kut thla lang kulh mai chu a hmu leh ta a.

A mitthla ah bawk chuan kha vaipa ina kha pitar a thah zawh hnu a, a kuta thisen kai banga a tah lai vel te chu a hmu leh ta a. Room chhung chu a enkual a, bungraw lo darh nuai atang te chuan tualthattu in a sawisak dan vel tur chu a mitthla thiam nghal vek a. Make up dahna sira Lalnunpuii ruang chu ava hmu ta, thisen a lo kawi nuai mai bawk a.

Nathana lu chu a rawn hai ta muai muai mai, thisuk anei ngai hauh silova, mahse chutia a awmdan a diklo ta mai chu amah pawh chuan mak a inti hle. A lu a dawm a, room atang chuan a chhuak ta daih mai. Inhnuai lamah chuan hmanhmawh takin a chhuk a, a glove bun lai te chu a phelh a.

Police dangte chuan, "Sir, ngati nge? I tha maw?" tiin an lo zawt sap sap hlawm a. Mahse Nathana chuan a chhang lo, a thlan a tla zawih zawih a. Chutah a tlan vak a, lodge pakhatah ava lut a. Receptionist chuan, "Eng room nge i duh ang? Single a awm a, double...." a tih lai chuan vin zet hian Nathana chuan, "Engpawh kha nimai, ti vat rawh." a ti tuar a.

Receptionist chuan a hlau kher mai, "Kha le..202 aw.." tiin chahbi chu a pe vat a, rang takin Nathana pawh chuan chahbi chu a la a, a tlanchho nghal a. Roomah chuan lutin a kawr  aphelh a, bathroom ah a tlanlut nghal a. A hmaite chu  a phih a, darthlalang a han tuai chu thisen a lo pherh nuai mai.

A phu nasa lutuk chu a tawlh dawr a, a mit a nuai vak vak a. A han en leh chu eng thisen mah  alo awm leh silo, "Enge awmzia? Tinge hetia ka awm?" tiin bathroom atang chuan  a chhuak a. Blanket chu la in bang kilah a thu a, a khur zawih zawih mai. A awmdan chu  a dik mawlh lo, chutih lai tak chuan door bell a rawn ri a.

Ava hawng chu Doctor Susan-i a lo ni reng mai, "Ehe..nangmaw?" tiin a mit a nuai vak vak a. Doctor Susan-i chuan, "Keimah tak tak ka ni..MC atanga ka chhuah khan ka hmu che a, ka zui char char che alawm." a lo ti a. Nathana chuan a kawr a ha tha sawk sawk a, Susan-i chu a nam sawn lawp mai a.

Room atang chuan a chhuak a, Susan-i chuan  aumzui a. "Enteh Officer Nathan, ka puihna i mamawh ania. Min ngaithla teh, i damlo ania." tiin abanah chuan a va vuan a. Nathana chuan a ban chu lo thin thlak sakin, "I ninawm, kal rawh." a lo ti hrep mai a. "I hrethiam lo a ni, min ngaithla teh." tia Susan-i'n ava ban leh chu Nathana chuan a beng thlu tawp mai a, a kalsan leh ta daih mai.

Chutih lai tak chuan Sub-Inspector Kamal-a, Tamil Nadu-a mi, Nathana te dept Mizoram lama rawn join thar, mizo tawng thiam zet mai chu a lo kal a. "Sir, hetah i lo awm daih a...enge awmzia?" tiin a rawn zawt a. Mahse Nathana chuan a chhang lo, a kal tlang daih mai. Pawnah chuan Nathana chu a chhuak a, Kamal-a chuan  a umzui zel a.

"Sir, tinge? Enge thleng a?" tiin a zawt leh a. Nathana chu a thaw hlawi hlawi a, "Ka diklo, ka dik lo...ka hrethiam biklo?"  a ti bah nuai mai a. "Sir hahdam rawh...hawh..sawlai lawk ah sawn ka inluah a awm a, va kal ang, hawh...min lo zui rawh." tiin Kamal-a chuan a inluahna lamah chuan a hruai phei ta a.

*****************

Inah chuan Kamal-a chuan Nathana chu a hruai lut a, fan on in khumah ah chuan  amut hahdam tir a. Chutih lai chuan kawngka a rawn inkik leh a, Kamal-a chuan ava hawng a. Doctor Susan-i a lo ni a, inchhungah chuan  a rawn lut a. "Nangmah hi a ni em, Sir Nathana duty join hrih lo tura hrilh tu kha?" tiin Kamal-a chuan a zawt a.

"Aw ni e, hei tunah chuan ka thil sawi kha a thlen dik tak hi. Police force kha join nghal lo se, han chawl leh deuh hret se chu tiang thil hi a thleng lo tur." tih pah chuan room ah chuan luh a tum a. Kamal-a chuan lo dangin, "Lawk aw, doctor...khawnge kal i tum?" tiin a lo dang a. Susan-i chuan a bag atang chuan damdawi bur leh syringe hi a rawn phawrh a.

"Injection ka pek vat angai, anih loh chuan  a thalo telh telh mai ang." a ti a. "Angai lovang, khuma ka mut tir hnu khan a mu hil bawrh bawrh a, a normal vek tawh e." Kamal-a chuan a han ti a. Susan-i chu a thaw hak a, "Va en la, a muhil nge muhil lo chu..." a lo ti deuh hmuk a. Kamal-a chu room ah ava kal a, a ding chat mai.

Khum kilah chuan Nathana chu a lo thu a, a lu dawmin a lo khur char char mai a. Kamal-a chuan mak a ti in a hlauthawng kher mai, Susan-i bulah chuan ava kal leh a. "Ka pi, kan department tana mi pawimawh tak a ni a, kan rin ber a ni. Hetiang hian vawikhat mah ka la hmu ngai lo, khawngaihin tidam rawh." tiin a ngen ta tawp mai. Susan-i chuan  alu a lo bu nghat a, "Awle, ka theihtawp ka chhuah ang." tiin a chhang a.

***************

TO BE CONTINUE