IT'S MY LOVE STORY Written by : Aaron Malsawmdawngzuala. CHAPTER-5 (LAST)

 IT'S MY LOVE STORY

Written by : Aaron Malsawmdawngzuala.

CHAPTER-5

(LAST)

****************

A tuk tlaiah chuan ka pa chu a office bulah chuan Sangtea nen kan nghak ran mai a, refe hnuah chuan a rawn chhuak ta. Min rawn hmu a, kan lam pan chuan a lo kal a. A rawn thleng chiah chu eng sawi set set lo chuan Sangtea hmaiah chuan a rawn beng siah mai, ka va han phu chiang tak em.

"Ka pa.." ka ti hman tawk. Ka banah min vuan a, "Tawng suh." tiin a motor lamah chuan min kai phei nghal dawr dawr a. Sangtea lam chu ava pan leh a, "Ka fanu nun hi tichhe lul suh, khawngaihin...kan nun atang hian kal bo vang vang ang che." tiin a nam sawk mai a. Motor lam pan chuan a lo let leh a, "Lut rawh." a ti vin tuar mai.

"Pa..ka thusawi." ka sawi zo hman lo, "Lut rawh ka tih chu." tiin min nam lut rawk rawk a, chak takin min tlanpui nghal a. In kan thleng a, ka roomah ka tlan chho nghal a. Ka nu chuan ka pa thinrim hmel a hmu chu a ngaih a tha chiah lo a ni ngei ang, "Duhtak, tinge i va thinrim hmel ve..enge thleng ta a?" tiin a lo zawt a.

Vin zet hian ka pa chuan, "I fanu sa zawt la ti nia." a ti vak mai a. "Vanlalchhuang, lo kal teh." tiin ka nu chuan min kova, hreh tak chung chuan ka va kal a. "Eng thil nge thleng a?" tiin ka nu chuan min zawt a. Ka chhan hma hma chuan ka pa chuan, "Kha tlangval Sangtea kha ka office ah a rawn hruai a nih chu.." a lo ti vin leh hlur a.

Ka nu chuan min melh rum ngei mai, "I zak miah nange a? Tinge i luhlul tak em em a? Lut rawh..i room ah lut rawh." tiin min hau hrep a, ngawi reng chuan ka room lam chu ka pan leh ta a. Ka na takzet, tah pawh ka tap thei tawh lo hial zawk. Ka ngui em em a, ka khawvel zim ta lutuk chu thih daih mai ka chak zawk hial a ni.

*****************

Nikhat chu ka pa chuan ka room atang chuan min ko thla a, sitting room ah chuan nnupa niawm tak hi an lo thu a. Thil awmzia ka hriat meuh chuan chumite nupa chuan an fapa nupui turin min rawn bia tih ka hrethiam ta, tinge maw ka nu leh pate rilru hi hmanlai rilru ang kha ala nih tlat le tiin ka thinlung chu a tap vawng vawng mai.

"A hming chu Kimkima ania, New York ah hna a thawk a." ka pa chuan a han ti te te a. Ka pa pawh chu melh pawh ka melh duhlo, "Nupui atan min duh tihna animaw?" ka lo ti zawi sap ringawt. "Haha, hei Pu Rina hi ka thianpa a ni a, an fapa hian a lo duh ru ve che a ni awm a. Min rawn bia anih hi...haha." tiin ka pa chu ala hlim hmel em em zui.

Chu mite nupa, Pu Rina leh Pi Zuali te chuan min lo nuih sang a. Pu Rinah chuan laptop chu a khawih mual mual bawk a, "Hei ka fapa nen chuan online in kan in video call mek a, a hmu ve duh che a nih chu." min la ti zui. Laptop chu dawhkanah chuan a dah a, Kimkima hmel pawh chu a rawn lang a.

Hmeltha tak chu a ni, a changkang hle bawk. Mahse duhna chhete mah ka neilo, Sangtea a tluk hlawl lo bawk. "Bawiha, i dam maw?" Pi Zuali chuan a han ti a. "Ka dam alawm, ka nu." tiin Kimkima chuan a rawn chhang a. Pu Rina chuan, "Hei hi VLi pa ania, hei hi VLi nu ania." a han ti a.

Ka nu leh pate nen chuan an han inbe luam a, "Pa, VLi ber chu min han introduce vela.." Kimkima chuan a rawn ti leh a. "Haha hei hi anih hi.." tiin ka lanchian theih deuh tur chuan laptop chu Pu Rina chuan a han hung rem a. "I dam maw, VL?" tiin a rawn nui sang a, "Ka dam alawm." tiin tha deuh chuan ka lo chhang ve mai a.

Ka nu leh pate, Kimkima nu leh pate, midang zawng chu an hlim. Fiamthu an thawh a, an nui dar dar a. Kei erawh ka hlim hlawl lo, dam ve reng ringawt pawh hi hrehawm ka ti hial tawh zawk. Ka rilru ka siam fel a, SAngtea nen chuan ruahmanna kan nei ve ta a. Chu ruahmanna chu engdang anilo, SAngtea nen chuan inruk a, tlanbo mai kan tum ta a ni.

*******************

Ka thawmhnaw te chu ka pack fel a, ka pawisa neih ang angte chu ka khungkhawm bawk a. Tichuan zinglam dar 1 velah chuan kan in atang chuan ka chhuak ru ta zal zal a, ka hlauthawng kher mai. Kan inbulah chuan a motor nen Sangtea chuan min lo nghak ran tawh mai a, ka va pan vat a.

"Sangte, ka hlauthawng a ni. Kan thil tih hi a dik chiah amaw?"

"Duhthlan tur dang kan nei chuang em ni?"

"Aih..neilove."

"KAn innei anga, engkim a fel vek a nimai."

*******************

Khaw tam tak chu kan tlan pel tawh a, kawng lakah chuan kan ding a. "CAr ah hian lo awm la, eitur ka va lei lawk ange." tiin Sangtea chuan min chhuahsan a. Chutih lai chuan ka phone a rawn ri a, number hriatloh atangin a ni. Ka han pick a, "Hello?" ka han ti chiah chu tap vak vak chung chuan Angeli aw ngei mai chuan, "VL, i pa...i pa.." a rawn ti vak vak a.

"Tinge? Tinge ka pa chu?" tiin ka hlauthawng ngei mai. "VL, i pa in a hmu vek che u, in tlandun lai kha.....heart attack...i pa.." tiin a tap vak vak a. Engmah ka ngaihtuah thei tawh lo, hmanhmawh em em hian motor atang chuan ka chhuak a. Sangtea pawh ka ngaihtuah thei tawh lo, taxi ka phar a, ka bungrua te chu tlansanin kan in lam ka pan leh nghal vat a.

******************

In ka thlen meuh chuan khua a var tawh a, an lo zai thup thup mai. Mipui an lo tam em em a, min hmu chiah chu min lo melh thup mai. Hla an sa zo a, mittui tla zawih zawih chuan inchhungah ka va lut a. Boruak a reh diak a, mipui zawng zawng chuan min en thup a, tumah tawng an awm lo.

Ka pa chuan nunna a nei tawh lo, a ruang chu an lo kil bial thup mai. Ka tap a, ka bing mup hian ka hria. "Pa..pa.." tiin ka va pan a, ka va thingthi a. Ka nu chuan en pawh minlo en duhlo, mittui tla zawih zawih hian a melh ngai a lo melh reng a. Ka nu kutah chuan ka va vuan a, "Nu, min ngaidam rawh." tiin ka tap a. Ka nu chuan ka kut minlo thin thlak sak a, a hmai hupin ring em em hian a tap ta vak vak mai. 

*******************

Ka pa boral atang chuan ka nu chuan min be ngai ta miah lova, engmah a ei duh ngai lo bawk. Nasa takin biak tumin ka bei a, mahse tawngkam khat pawhin min chhanglet duh ngai lo. Chumai nilovin a melh pawh min melh duh ngailova, a bula ka kal hnaih hlek chuan a awmsawn vat zel.

Ni engemaw zah a liam hnu chuan ka tuar thei ta ngang lo, Angeli leh ka nu titi lai chuan ka va kal a. "Nu, kumkhuain min be tawh dawnlo tihna em ni?" ka va ti a. Angeli pawh chuan, "Nu Zorem, i fanu a nih hi..be ve tal la." a lo ti ve bawk a. Min en miah lo hian ka nu chuan, "Angel, i thiannu hnenah hian kan chhungkua hi a mah vangin kan hming tha takzet a ni tih ilo hrilh dawnnia, ka chhuang khawp mai. A duh duh ang chuan awm rawh se, amah control thei tu tur ber lahin min boral san tawh bawk si. Fanu tha tak a ni, a chhuanawm khawp mai." tiin min kalsan daih mai a. 

Ka na lutuk chu sawi pawh ka sawi thiam lo, ka na vawng vawng hi a ni ber mai. Ka nu chuan min hlat telh telh mai bawk si. A tawpah chuan thuthlukna azawnga harsa ber, ka hmangaih em em Sangtea then mai chu ka tum ta a ni. Ka bia a, inhmu turin ka sawm a. A lo phur em em a, chumi ringawt pawh chuan min ti na thei a ni.

********************

Kawngka chu ka kik a, rang takin a lo hawng a. Min nuih sang chung chuan, "Hi..VL..lo lut rawh." a lo ti vat a. Inchhungah chuan ka lut a, min kuah nghal a. "Ka ngai tawh lutuk che." tiin a nui leh sang a, mahse ka nui ve thei ngang lo a ni. A kut chu ka lo dahsawn a, "Tinge a? Tinge hetia i awm a?" tiin a hrethiam lo kher mai.

"Ka tuar thei tawh lo a ni, Sangte."

"Eng chu maw?"

"KA inngaihtuah a, duhthlan tur dang ka nei tawh lo a ni."

"Umm..anih chuan min hrilh la."

"Sangte..inthen mai ang."

A meng bial kawk mai a, "Inthen a? Engtin nge awlsam taka i sawitheih zawk a? I tan chuan a awlsam viau animaw?" tiin a mittui a hnam nghal sak mai. "Nilo, a awl biklo asin..mahse...a hrehawm em ani." tih ringawt chuan ka chhang leh a, boruak ava rit tak em. A thaw deuh hak a, "Um a tha e, nihleh chhan tha tak pakhat tal min han hrilh teh." tiin min zawt leh a.

"Sangte, kan chhungkaw dinhmun i hriat vek kha.." ka han ti leh ringawt a. Ka kutah chuan a vuan a, "VL, hetia thuthlukna siam ngawt chu a tha lovang, ngaihtuah chianglovin eng thuthlukna mah siam suh. Hun engemaw chen han nghak leh deuh ila, a tha leh vek mai ang. Khawngaihin, tiang chuan ti lul suh." tiin min ngen a.

"Sangte, ka nghak thei tawh lo a ni. Ka nu lah chuan min be duh der mai bawk silo, a hrehawm em ani?" tiin a ban chu a ka dahthla leh a. Thinrim deuh tak hian, "Anih chuan...anih chuan enge..VL, mahni hmasial tak i ni. Hei hi kan hringnun a ni a, engtin nge nangmaha thuthlukna i siam tawp theih zawk a? VL, he i thuthlukna hian kan hun kal zel turah nghawng thui tak a nei dawn tih hi i hrethiam pha lo a ni." tiin a mangan hmel hle mai.

A lu a dawm vang vang a, ring deuh tak hian, "I hmu thiamlo em ni..Ka hmangaih che asin Vanlalchhuang...Ka hmangaih che." a ti vak vak a. "Keipawh ka hmangaih che alaw, mahse ka dinhmun hian a zir lo a nih hi." tiin ka chhang leh a. "Anih chuan han sawifiah ta che..enge i buaina chu?" tiin min vin vak vak tawh mai.

"I nu hian kei hi min nei anih chuan a biak tawh loh tur thu che hrilh che in vau ve ta che sela, engtin nge i tih ang. Han ngaihtuah teh, ka nu hian hmelma ang maiin min en tawh anih hi. Kan chhungkua hi kan kehchhe vek asin, engkim kha ka thiamloh vek ani. Keimah vangin, keimah vang vek a ni. A tawk tawh, Sangte..ka pawm e, mahni hmasial tak ka ni. Min theihnghilh rawh, Sangte." tiin ka tap zawih zawih a.

Ka banah chuan min vuan leh a, "VL, khawngaihin ti suh..min kalsan suh, khawngaihin." tiin a mittui a tla hial a. "Nilo, min theihnghilh rawh..khawngaihin.." tiin hreh tak chung chuan ka chhuahsan ta a. Mahse kawngka bulah chuan ka ding a, ka kalsan thei ngang lo a ni. Sangtea chuan anu a phone ni ngei tur a ni, a tawng ri chu ka hre thei a.

"Hello nu, i dam maw.....nu.." a inhnit ta feih feih mai a. "Nu...hmeichhe pakhat hmangaih deuh ka nei a..tunah khan min then a, min kalsan a ni..Vanlalchhuangi ania, nu ka hmangaih takzet a ni...umm lo kal vat rawh u, ka ngai lutuk che, nu." tiin a tap hawm hawm mai a, ka va han khawngaih tak em.

********************

"Ka tan thil min tihsak turin ka dil lo che, ka duh engkim kha chu kan pa khan min tihsak zel thin. Tichuan SAngtea ka tawng a, Sangtea chuan ka mamawh engkim min pe in ka duh min tihsak thin leh bawk a. MAhse tunah chuan keimah vangin ka pa chuan min kalsan tawh si a, Sangtea chu ka kalsan a ngaih phah ta a ni. Ka tina takzet tih ka hria, ka dil apiang engkim min pe thin kha a ni a. Min theihnghilh tura ka hrilh khan...a hreh takzet a ni. Lalpa, khawngaihin khawngaihin hriatthiam tir ang che, tluang takin a nun hmang sela, hmeichhe tha tak tawng se ka duh a ni. Veng him ang che aw, Lalpa...venghim ang che."

*******************

(KAR KHAT HNUAH CHUAN)

Biak In atanga ka tawngtai zo ka haw chiah chu ka nu chu a melh ngai melh reng hian khumah a lo thu a, a bulah chuan ka va thu ve a. Chutih lai chuan Kimkima nu leh pa, Pu Rina leh Pi Zuali te chu an lo leng leh a. "Hetia i indawm kun reng chuan a tha lovang, Pi Zorem..." Pi Zuali chuan a han ti a.

"Ni e, apa awm tawh lo mahse i remti a nih chuan kan fapa Kimkima leh i fanu te hi in kutsuih tawh mai se kan ti a ni." Pu Rina chuan a lo ti ve bawk a. Pi Zuali chuan min en a, "I nu hian nangmah pawh hi zawt tur che in min ti a, enge i ngaih ve dan?" tiin min zawt a. Ka nu erawh a ngei reng a, a la haw chhuak lo hrim hrim.

Ka nu kutah chuan ka vuan a, "Pi Zual, ka nu thu thu animai.." tiin ka lo chhang a. Ka nu chuan min rawn en ve ta, a mittui a luang zawih zawih mai. "Anih chuan kan haw phawt ange." tiin an ding a, pawn thleng chuan kan thlah a. An kal hma hret chuan motor hi kan inkawtah chuan a rawn ding a, kan lo en thap mai.

Chutah le, Sangtea chu motor atang chuan a rawn chhuak a, a nu leh paten an rawn zui bawk. Ka thinphu a rang leh nasa nghal kher mai, "I dam tha maw, ka pi." tiin Sangtea nu chu a han nui sang a. "Kan fapa thil tih avang khan pawi kan ti khawp mai." inthiam loh hmel tak chuan a han ti a.

Tum hmuk hian ka nu chuan, "Engkim a tawp vek tawh hnuah tinge ngaihdam min rawn dil a?" tiin a lo zawt a. "Aa...kan rawn kalna chhan ber chu.." Sangtea nu in a tih lai chuan ka nu chuan, "In rawn kalna chhan chu engpawh a ni thei, mahse thil pakhat ka han hrilh ang che u. I fapa leh ka fanu te thil tihsual avangin ka pasal ka chan a, chu chu hria ula ka duh a ni. Chubakah tun lawk khan pasal a neih tur thu kan lo sawi fel zo chiah a, chupawh a duhthlanna ngei a ni." a lo ti leh a.

Sangtea chuan min melh kawk mai, a mittui tling teuh pawh chu ka hmu thei a. Sangtea nu chuan, "Enteh ka pi, an inhmangaih takzet asin." a tih lai chuan Sangtea chuan, "Nilove ka nu...kal ang u." tiin rum zet hian min rawn melh a. "Kan chungkua hian in chhungkua hi vawikhat mah kan rawn tibuai leh tawh ngai lovang che u." a ti deuh hmak mai.

"Bawiha, han ngaihtuah chiang teh.." Sangtea pa chuan a han tih chuan Sangtea chuan, "Nilove ka pa, a duhthlanna ngeiin pasal a nei dawn a, enge hetah kan la tih? Kal vat ang u, a zahthlak emai." tiin an kal ta a. Han thlir zui vawng vawng tal chu ka chak kher mai, mahse ka nu ka hlauh em avang chuan inchhungah chuan ka lut ve nghal a.

********************

Nikhat chu ka nu nen chuan mamawh vel lei turin kan bazar a, MC ah kan kal a. Lift a kan chuan lai chuan fllor pakhat a kan tawp chu rinloh tak maiin Sangtea a rawn lut ve thut mai, mahse min en miah lo. Ka nu chuan, "I dam maw, Sangte?" tiin a han bia a. Zaidam tak hian Sangtea chuan, "Ka dam alawm, ka pi.." tiin a lo chhang a.

"I bazar ve dawn em ni?" tiin a han zawt leh a, kei erawh chuan hnuailam ka melh char char. "Nilove, Bangalore ah ka insawn leh tawh dawn a. Transport office ah ka kal a, chumi pah chuan thil ka lei lawk a nih hi." a ti ta mai a, min thawng dawt mai. Lift kawngka chu a inhawng a, "Ka kal ange, anih u." tiin min chhuahsan ta a.

*****************

Ka nu chuan min be duh tawh mai nilovin min duat tawh hle a, pasal ka nei tur chu  aphur takzet. Chu chu ka tan chuan lawmawm hle mahse Sangtea erawh ka theihnghilh thei lo, ka hlim mawlh lo a ni. Ka mitthla ah chuan a awm reng a, minute khat lek pawha Sangtea chuan ka ngaihtuahna chu a chhuahsan ngai lo.

Nikhat chu Angeli a lo leng a, khumah chua ngawi rengin ka thu reng a. Ka bulah chuan a rawn thu a, "VL, Sangtea hi i theihnghil theilo a ni tiraw?" tiin min zawt a. "Ka hrelo, hmanni khan ka nu nen MC ah ka bazar a, chutah chuan kan inhmu a." tiin ka chhang a. "A bia che em?" tiin min zawt leh a.

"Ka nu nen an inbia a, Bangalore ah a chhuk leh tawh dawn a ni awm e. Ka nun atang hian hla takah a kalbo hlen tawh dawn niin ka hria, a lo let leh tawh dawn lo. Sangtea nen nilova, mipa dang nena ka damchhung hun ka hmang tur hian min tina takzet a ni. Angel, ka ti diklo em ni? Hetia thuthlukna ka siam mai hi ka ti diklo em ni? Engmah ka hrethiam lo, ka nu hlimna hi ka tan a pawimawh ber angin ka ngai a, mahse ka hlimna tur ka ngaihtuah ve hauh lo niin ka hria. Naktuk maiah Kimkima nen kan innei tawh dawn a, enge ka tih ang? Angel, enge ka tih ang?" tiin ka zawt ta tawp a, ka mangang a ni.

Angeli chuan chiang tak hian min en a, "I thinlung kha ngaithla rawh." tih ringawt chuan min chhang a. Ka phone ka phawrh a, Sangtea chu ka call a. "Hello?"...."Hello, Sangte."....a ngawi vang vang a, "VL?" a rawn ti leh a. A aw ka hriat ringawt pawh chuan ka tah a chhuak nghal ngawih ngawih, "Aw..keimah VLi." tiin ka tap a.

"Hey, tinge i tah a? Enge thleng a?" tiin min rawn zawt a. "Ka tihpalh aw, Sangte. Ka thuthlukna siam hi a diklo a ni, ka tina takzet che tih pawh ka hria. Ka theihnghilh theilo che, naktuk ah mai hian pasal ka nei tawh dawn. Inthiam lo tak chungin thil pakhat chiah ka dil duh che a ni..Sangte, khawngaihin min rawn hruai thei ange em? Ka hmangaih che, Sangte." tiin ka tap zawih zawih a.

"Engemaw i sawi le, VL? I nu kha ngaihtuah ta che, thil dik a nilo." tiin min rawn chhang a. "Chutiang ka ngaihtuah thei tawh lo, ka nu hlimna chauh nilovin ka hlimna pawh a pawimawh ve tho asin. Hmeichhe mahni hmasial tak ka nih thu min hrilh thin tiraw? Ni e, mahni hmasial tak ka ni. Ka nunah hian nang leh ka nu hi ka mamawh che u a ni. Khawngaihin Mizoramah lo kal leh rawh, khawngaihin.." tiin ka dil ngawih ngawih a, mahse phone chu a dah hmak mai.

********************

Kan inneih ni a ni tawh a, mo hruai turin mipa lam an lo kal vat dawn tih pawh ka hria. Beisei ngam chiah silo chuan Sangtea chu ka nghak reng a, mahse min rawn be der silo. VAwi tamtak ka call a, a dah busy hmak hmak zel mai bawk si. Chutia mangang taka ka awm lai chuan ka nu chu roomah a lo lut a, "Bawihi, thil sawipui duh che ka nei a." a rawn ti a.

********************

Tlai dar 4 leh a chanve a ri tawh a, park ah chuan ka va thleng a. Min hnungchhawn zawng chuan amah chauh hian Sangtea chu a lo thu reng a, a bulah chuan a phone a lo chhawp bawk a. "Hmela mai mai chuh.." tiin ka phun sap a. Ka call leh ngat a, a phone chu a ri a. Chutah a phone chu la kang in, "Hey..bengchheng tawh suh..shhh.." tiin ama phone chu a hau nasa mai.

Ka va pan phei a, "Ka call mawlh mawlh che kha, i la dawn lo em ni?" tiin ka vin vak a. A rawn hawi phei a, min hmu chiah chu a phu zawk mai. Min rawn pan vat a, "Enge i rawn tih a?" a ti hu mai. "Mahni hmasial tak i ni, ilo va chapo ta ve...i lo kal duh lo amaw? I lo kal duhlo anih pawhin min hrilh ve tal ta che.." tiin ka vin leh vak vak a.

"Eng..enge hei hi a awmzia?" a ti leh hu mai. "Ka nu chu kei aiin i tan a pawimawh zawk em ni?" tiin ka zawt leh a. "VL, engmah awmzia ka hrelo..." tiin a la hawi a nansa mai. Mahse a hmel ka han en a, a ruih hmel em em a. A tawng zawng pawh chuan zu rim a nam huk huk mai, "Ehe, zu i in animaw?" tiin ka han vin deuh hlak a.

A lu a thing a, "Aih." tih ringawt chuan min chhang a. "Sawi rawh...i in tiraw?" ka han ti leh a. Inthlahrun hmel tak hian, "Pasal min neih san daih dawn sia, ka lungngai em a, tlem ka lo lem ve sak alawm mawle." tiin a ner nung mai. "Zu in mi pasalah ka duh hleinem?" ka lo ti leh hlut a. "VL, enge awmzia diktak min han hrilh teh..pasal chu i nei talo em ni?" tiin min zawt leh a.

KA nui suk a, "I la man thiam nange, Mawla...ka nu chuan min hmangaih takzet a ni tih a hrethiam tawh alawm. Chuan enge kan hmabak..kan inneih a phal tawh...ka nu pawhin Kimkima nu leh pate chu a bia a, khawngaihna a dil a...Mahse Kimkima chu mifel tak a lo ni hlauh a, an lo hrethiam hlauh a ni. Mahse an lung ni vaklo chuan ka hria, mahse enge pawi...nangmah ka nei theih phah che a, ka lawm tho tho." phur tak chuan ka han ti a.

A meng phawk hru mai a, "ANIMAW? Pasal i nei dawnlo maw? YESSS....avan nuam.." tiin a au vak vak a, nghet tak chuan min kuah bawk a. Min fawp tur chiah chu zurui deuh pakhat hi a lo kal a, "Hey Pu Sangte, zu ka zu lak hlanin hmeichhe dang ilo awmpui leh hman amaw? I rilru a na hle amaw tia?" tiin a rawn pei chhawn chhawn mai.

"Shh..hey...shh.." tiin Sangtea chuan a lo khap vat a. "Ehe..enge awmzia? Hepa nen hian em ni zu in indun a?" tiin Sangtea chu ka zawt a. "Aa.a...hei hi ka thianpa Bena ania, pangpar a zuar a, ka leisak thin a. Kan thawnthu te ka hrilh a, ka kawm ve ber a nih hi...min awmbo san hlan khan." nui suk chung chuan Sangtea chuan a han ti leh a.

"Tunge hei hi?" a lo ti leh hu mai. "Bena, hei hi a nih hi..Vanlalchhuangi chu.." a han ti chu mak a tih hmel kher mai. "VLi maw...pasal min neihsan i tih kha, i tah bui bui kha..." a han ti chu ka nuih aza ngei mai. "ZAwnga, ka tap kher lo aw...hei a neilo a nih hi.." tiin Sangtea chuan a vin khur khur a.

"Anih leh a rawn tlanbo tihna em ni?" a han ti leh a. Sangtea chuan, "Tlanbo love, ka tan a lo let leh a nih hi." tiin min nuih suk a. "Enge maw awmzia le..ka hrethiamlo." tiin chu zuruipa chuan a lu a hiat nauh nauh a. Sangtea chu a nui leh sang a, "Hei hi ka hmangaihna thawnthu chu a ni...ITS MY LOVE STORY.." a han ti a.

Ka lo inrawlh ve vat, "Nilo..kan hmangaihna thawnthu zawk...ITS OUR LOVE STORY.." ka lo ti ve bawk a, kan innuih a. Thil awmzia chu ho te a ni, Sangtea hi Mizoram lamah ka phone zan la la khan a lo let leh a, min rawn ruk a tum a ni. Mahse kan inbiak lai kha ka nu chuan a lo hre ru vek hi a lo ni a, Sangtea chu alo va hmu hmasa a, engthil mah tilo turin a ngen a. Mahse ka nu chuan ka hlim lo hle tih a hria a, chuvang chuan Sangtea chu a tawp a tawpah min pawmpui ve ta a ni.

Hei hi Sangtea nena kan hmangaihna thawnthu chu a ni e, ITS OUR LOVE STORY....

**********************

THE END