NATHAN SEASON-4 Written by : Aaron Malsawmdawngzuala Episode-6 (PROJECT WIZARD-2)

 NATHAN SEASON-4

Written by : Aaron Malsawmdawngzuala

Episode-6

(PROJECT WIZARD-2)

***************

Susan-i chuan Nathana chu a chiu a, a muhil thei ta hram a. Tlai lam a lo nih chuan DGP chuan Nathana chu a office ah a ko phei a, a hau hrep mai. "Enge awmzia, Nathan? Miss India Mizoram Nula Lalnunpuii chu thah a ni a, mahse nang chu crime scene ah minute 5 pawh i awmlo niin thu ka dawng a. Hei hi High Profile Recommendation a ni, a zahthlak khawp mai." a ti ta hrep mai.

Inthlahrung tak hian Nathana chuan, "Sir, ni 15 chhung chawlh ka mamawh a ni." a ti a. Hrethiam lo tak chuan DGP chuan, "Enga? Enge awmzia?" tiin a lo zawt a. "Sir, nimin khan Mental Breakdown ka nei a, stress disorder a ni. Kha psychiatrist doctor khan a sawi dik a ni, kha thil ka tawn khan minla ti thalmuang lo a ni ber. Chumai nilovin nimina Lalnunpuii thih dan kha, tualthattu chetdan kha min thah tumtu, kha vaipa chetdan nen khan a inang riau lehnghal a. Ka awm a nuamlo lutuk a, ka lu te a rawn hai a. Ka tihpalh lutuk, Sir." tiin Nathana chuan ngaihdam a dil mawlh mawlh a.

******************

Susan-i chuan chumi zan atang chuan Nathana chu a enkawl ta a, treatment te lakpuiin a hlauhna te chu tihreh a tum nasa hle a. Chumi kawngah chuan Sanvi leh Rinawma pawhin an pui nasa. Nathana hian PSTD an tih mai, Post Traumatic Stress Disorder a lo nei reng mai a, a chhan chu thla thum kal taa kha vaipa in thah a tum vang leh tual thahna a mit ngeia a hmuh vang kha a ni.

Hetiang hian Nathana hi a awm ngai lova, kan hrait theuh angin mi huaisen tak a ni kan tih tawh kha. Mahse mihring hriselna a in ang lova, Nathana pawh a lo hrisel famkim bik kher lo tihna mai chauh a ni. Susan-i pawh psychiatrist tih takah Nathana han enkawl dan chu a thiam hle a, ni 15 zet an in enkawl a, treatment te an lak hnu chuan Nathana pawh a ziaawm ve ta.

*****************

Vawikhat chu Nathana chuan Susan-i chu phone in, "Hello Doctor, vawiin chu lawmthu sawi nan thil engemaw surprise duh che ka nei a, inhmu lawk ang hmiang.." tiin a sawm a, Susan-i pawh a phur hle mai. Susan-i nen chuan an inhmu ta a, "Enge min surprise tur chu?" tiin a han zawt a.

"Surprise a nih te chuan sawi chhuah chi nang." nui chung hian Nathana chuan a lo ti a. "Um..mahse police motor chuan kan kal lovang, ka car in kan kal dawnnia." tiin Susan-i chuan a lo chhang a, Susan-i motor chuan an inphur chhuak ta a. Conference Hall lian tak mai ah chuan Susan-i chu Nathana chuan a kalpui a, a chhungah chuan an lut a.

Thlalak lo in tar chu Nathana chuan a kawk a, "Hepa hi Rudran-a  ani a, India's number one Motivational Speaker a nih hi. Mizoramah hian company a rawn nei a, a thusawite hi a rintlakin awmzia a nei thei fu asin. Mi nunna tam tak a thlak danglam a, ama bulah hian min hruai mai tur ania, nangpawh hi.." tiin a han nui deuh suk a.

Thalak chu Susan-i chuan a en a, vaipa pakhat, smart tak mai, hang lampang, tarmit bun, thiamna neih san hmel tak thlalak hi a lo ni a. Susan-i chu a nui suk a, "Haha, ka fiamthu mai mai a nih kha. Seminar a nei thin a, mizo mipuite pawh kal an tam thei khawp mai. Mahse mizo tawng erawh a thiam hauh lo, saptawng hlirin thu a sawi thin. A seminar hming kha..enge kha awww.." Nathana chuan a han ti vawng vawng a.

Chutah Susan-i chuan, "Confidence is Believing..." a lo ti chat mai. Nathana chuan Susan-i chu a en vung vung a, "Khatin min en suh, hetah hian ahma pawn ka kal tawh alawm. Surprise chu a ni tho e, a pawi lo." tiin a han nui suk a. "Ka vawikhat kalna ania keichu, anih leh enge a thusawi a an?" tiin Nathana chuan a zawt a.

"A boring ka ti keichuan.." tiin Susan-i chuan a lo chhang a. Conference Hall ah chuan an han lut dun a, mipui pawh an lo thahnem hle mai. Palian pui, dum zet leh sual hmel em em mai chu Nathana te thutna turah chuan a rawn thu nalh mai a. Nathana chuan polite tak hian, "Thianpa, hei ka thiannu nen hian kha kha kan thutna tura kan hual sa a nia, khawngaihin.." a tih lai chuan chupa chuan, "Hmundangah thu mai rawh u." a lo ti hmuk mai.

Nathana chuan a kut a hum hman a, mahse Susan-i chuan lo khap vatin, "Apawi lo Nathan, lehlamah sawn thu mai ang." a ti a, Nathana pawh chu a insum hman hram a. Chutah Rudran-a chu a rawn lut ta, Rottweiler ui dum lian zet mai hi a rawn kai lut a, mipuite chu an lo ding a. Stage ah chuan  a lawn chho a, "Rocky, sit down.." tiin a ui chu a bawh tir a.

Tichuan Rudran-a chuan thu a sawi ta a, hetah hian saptawng vekin thu a sawi a, mahse hriatthiam a awlsam nan mizo tawngin kan sawi zel ang. Mipuite chu a han enkual a, "Heng thumal...self confidence te, beiseinate...a awmzia in hre vek. A awmzia leh a nihna chu in hrethiam a, mahse tuman a finfiahna in ngaihtuah zui ngai lo. Hriatthiamna leh finfiahna hi a in anglo takzet a, ahmasa in...thawhrimna hi kan habit ah neih kan tum tur a ni. A harsa a ni maithei, mahse dicipline khauh tak leh tumruhna nen chuan tih theih loh a awm lo. Talent chu thil ho tak a ni, mahse tumruhna erawh engkim a ni thung.." tiin a han sawi dap dap a.

Susan-i chuan boring a ti hle mai, a ham bui bui mai a. NAthana chuan ava en a, a nui suk ringawt. Rudran-a chuan sawi zelin, "TEchnique awlsam te te vawiin hian ka hrilh dawn che u a ni...in zawm anga, habit ah in nei tur a ni." a tih lai chuan mipui zinga mi, vaipa pakhat chuan hindi hmang hian, "Hey, ngawi rawh...ka cheng 15,000 kha min pe let leh rawh." a rawn ti ta khur khur mai.

Chuveleh Rudran-a ui, Rocky chu a ding a, chu vaipa chu a bauh vak vak mai a. Rudran-a chuan, "Rocky, stop.." a ti vak a, Rocky-a pawh chu a bawk tha ve leh mai a. Chu vaipa bawk chuan, "I seminar ah hian kar khat chuang ka kal tawh, mahse ka la danglam lo. Ka ba te, ka harsatnate chuan minla kian san chuang lo. Confidence chungchangte chu sawi velo mai teh, mipuite hi bum reng tawh suh." a ti leh vak vak mai a.

Security te chuan an rawn man bet vat a, chu vaipa chu a tal nasa mai. "Hey..mizo mipuite u..hepa hi in ram atang hian hnawtchhuak rawh u, bumhmang a nih hi. In pawisa te kha in seng thlawn mai mai a ni, mi lepchiah a nih hi." tiin a au chel chul mai a. Rudran-a chuan, "Security, han thlah lawk teh u." a han ti a.

Security te chuan an thlah a, "Hna i hmu dawn tiin ka tiam che em ni? Nge ni a...i ba chu i rul thei ngei ang tiin ka hrilh zawk che? Ka theih tawpin ka pui che a, ti hian maw min rulh let dawn a?" tiin Rudran-a chuan chu vaipa chu a han zawt a. Chu vaipa chuan thinrim tak hian, "Hmela, ka nunphung chu hei tunah pawh ala pangngai reng tih hre rawh." a rawn ti leh hrep mai.

Rudran-a chu a nui suk a, "Heh...han in en teh...khatia min rawn chhuahchhal avang khan mipuite hi i ti chiai tih i hria em? Tikhan i confi em? Min han chhang teh, i confi phah sawt em? Hei vang hi alawm hetia ka zilh che u..he confidence hi thil tha lam zawk ah hmang ta che," tiin a vin let hrep mai a.

"Zawnga, thu lawilao sawi suh.." tiin chu vaipa chu a tal nasa mai a, security te chuan an nam chhuak ta a. Chutah Rudran-a chuan sawi zawmin, "Helai hmunah hian marketing ti tura lo kal ka nilo, hlawhtling nghal thei tura fuih che u ka ni hek lo. Nikhat lek chhunga hlawkna in hmuh theihna tura he seminar hi buatsaih zawk ka nih hi, abak zawng chu inthu a ni e." a han ti leh dap dap a.

Seminar a zawh meuh chuan Susan-i muhil pawh Nathana chuan a kai tho a, "Hey, i muhil char char alawm." a han ti a. Susan-i pawh chu a tho a, Rudran-a pawh stage atang chuan a rawn chhuk a. Mipuite chuan an chibai sap sap hlawm a, Nathana leh Susan-i pawh chuan Rudran-a chu an va pan a.

Nathana chuan Rudran-a chu chibai pah chuan, "Hello Sir, Nathan ka nia, Superintentdent of Police, Crime Branch." a han ti a. Rudran-a chuan mak tih hmel tak hian, "Ehe, ava mak ve. Police Officer, ka class ah..police officer huaisen leh rinawm tak i nih ngei ka beisei." tiin a lo chhang a.

"Thank you, Sir...i seminar chu ka hlawk pui hle mai, i thusawi te pawh a tha takzet e." Nathana chuan a han ti a. Susan-i chu kawhhmuh in, "Hei hi Dr. Susan-i ania, psychiatrist a nih hi." tiin a han hmelhriat tir a. Rudran-a chuan Susan-i chu a han en vang vang a, "Hello, i dam maw?" a han ti a.

Susan-i pawh chuan, "Ka tha e." tiin a lo chhang a, hetah hian saptawng vekin an inbia tih kha ka han hriattir nawn leh teh ang che u. "I sawm vanga lo kal a ni em?" tiin Rudran-a chuan Nathana chu a han zawt deuh kher a. Nathana chuan nui chung hian, "Aw ni e." a lo ti a. Rudran-a chu a nui suk a, "Ka rindan vel a ni." tih pah chuan a kal sawn a.

******************

Nathana pawh in duty chu a join leh thei ta, DGP Office ah chuan ava in report a. "Case ngai bawk kha chu thleng tawh suh se aw?" tiin DGP chuan fiamthu ti tak deuh chuan a han hau vel a. "Min ring rawh, Sir..ka chhuichhuak em em ang. Intercom hmang chuan DGP chuan phone a hmang a, "Hello, Crime Branch Officer Pu Lallungmuana hnenah khan case chu SP Nathana'n a la dawn e tih lo hrilh ang che u." a han ti a.

Nathana chu Crime Branch Officer bulah chuan va kalin reports te chu a va en a, "Nathan, keichu kum 50 ka ni tawh a, engmah ka ti ve hleithei tawh der silo. Nang erawh ila upa lova, i chhuichhuah leh vat ka beisei." tiin Pu Lungmuana chuan Nathana chu a fak vel chiam a. Report chu Nathana chuan a en mual mual a, "Ehe, Sir...forensic expert ho hian eng thil nge an tih hi? Hetiang chiah hian tualthihna dang a awm a ni, chumi ni pawh chu kha vaipa in min thah a tum ni, hospital a ka awm phahna kha..khami ni ngei khan a ni. Khami ni khan a thi a, thla 3 hnuah chutiang chiah chuan hei..thihna a thleng leh a. Case pahnih, in anna tamtak nei a ni a, investigation an ti theilo em ni?" tiin a ang hrep mai a.

"Enteh Nathan, case sheet i en duh thu min hrilh a, kha..ka pe che a, nangman i buaipui angei alawm. Tinge i buai em em a, enge i mamawh sawi la, ka pe ang che." tiin a lo chhang a. Lungawilo tak chuan Nathana chu a tho thut a, "A ngai love, ka kal ang e." tiin Office atang chuan a chhuak ta daih a."

*****************

Theihtawp chhuah chuan Nathana chuan investigation chu a nei tan ta a, a mitthla ah te chuan kha vaipa chetdan te kha a ngaihtuah a, a bei ngawrh hle mai. Tichuan a hmaa amah thah tumtu vaipa in misual a um luhna in neitu a lo thahna in te chu va kal nawn lehin a va en fiah a, rei tak luah tawh loh ang mai hian maimawm ril te chu a lo inzam nuai mai.

Chutah banga thlalak intar chu a han en a, nupa thlalak niawm tak hi a hmu a. A ding chat a, chu thlalak an en chiang chu mak a ti hle mai. A mipa zawk chu tundang nilovin kha vaipa, amah thah tumtu ngei mai kha  alo ni a. Hmeichhia pawh chu kha vaipa ina a thah nu, a in neitunu kha  alo ni reng mai.

Chu vaipa chu an han chhui chiang a, gym trainer a lo ni reng mai a. Amah hi tamil Nadu atanga lo kal niin mizo tawng pawh  a thiam lova, mi in rawn luah a ni. Amah chauh nilovin a nu pawh an bulah a khawsa ve a, a nupui pawh chu Mizo nilovin hnamdang tho a lo ni reng mai.

Nathana te chuan chu Gym Trainer, Nathana thah tumtu te inlam pan chuan zanah an va kal leh a, anu chu an va bia a. "Zawimuangin a mizia a danglam tial tial a, tichuan min be duh ta miah lo mai a. Huat hmel tak te hian min en thin a, mahse mak tak maiin min be leh thut bawk si a. Mahse a mizia erawh a danglam tih a chiang em em a, a tawng dan pawh  adanglam." tiin chu vai pitar chuan a lo hrilh a.

"A mizia danglam i tih chu enge awmzia?" tiin Nathana chuan  a han zawt leh a. "Gym trainer a ni a, mahse training pe turin  a kal duh tawh ngai lova. Lehkhabu chhiar hi a ngaina ngai lo, mahse ka monu chuan ka fapa hian saptawng lehkhabu te a chhiar thin thu min hrilh bawk. Meizial a zu ngai miah lova, meizial zuk te a rawn ching chho bawk." tiin a lo chhang leh a.

******************

Nathana te chuan Miss India Mizoram Lalnunpuii personal make up artist, Lalnunpouii a thih hnua tlanbo ta daih chu an chhui ve leh ta phawt a. Chupa hming chu Lalthlamuana a ni a, Nathana te chu Thlamuana te inah chuan an va kal a. "Lalnunpuii hi chu a rawn lar chhoh tirh atang khan Thlamuana hi a favorite make up artist a ni a, tunah Lalnupuii thihna atangin ni 15 a liam tawh a, tun thleng hian Thlamuana hi a lo la haw lo a ni. Kan phone lahin a tlang thei der bawk silo, kan tan chuan han tih vak ngaihna a vang khawp mai. Mahse thla 3-4 vel kalta kha chuan kan bulah a awm ve reng thin a, khatih lai vel kha chuan a mizia a mak khawp mai. Ka hlau deuh a, tichuan ka unaupa hi kan ina lo riak thla turin ka hrilh ta tawp a ni." tiin Thlamuana nupui chuan a thu hriat ang ang te chu a sawi a.

Thlamuana nupui unaupa pawh chu lo tawng chhuak ve in, "In ka luh chiah chuan Thlamuana hian min lo en a, min hre ngailo ang hrimin min en hu hu bawk a. Mahse a hnuah ka fiamthu te a ti leh vel a, enge a awmzia pawh ka hre bik lo." a lo ti ve bawk a. Hlauhthawn hmel tak leh inthlahrun hmel tak hian Thlamuana nupui chuan, "Ihh englo ania maw ka pu..." a han ti a.

Nathana chuan, "Sawi rawh..engmah hlau suh." a lo ti vat a. "Ka sawi ang khan a mizia a dang tial tial a, a thawmhnaw te chu a tifai hliau hliau zel a, a room pawh nikhatah vawi 3 te a tifai thin. Chuan kan fanu a en dan te hi ka ngaih a thalo lek lek zel, ka hlau lek lek thin. Thlahrang leh ramhuai tih vel hi chu ka awih ngai lova, mahse a chetdan ka hmuh hian ka hlau ru thin khawp mai." a han ti leh a.

"Anih leh a inchei danah te a danglam em?" tiin Nathana chuan a zawt leh a. "Aih danglam lo, a pangngai reng. Chuan heng lehkhabute hi chhiar a ching tan a, saptawng lehkhabu a chhiar ngai kan hre der bawk silo. " tih pah chuan Thlamuana nupui unaupa chuan Nathana chu lehkhabute chu a pe a.

"E chuan...a sam te pawh a dye thin bawk." Thlamuana nupui chuan a rawn ti ve leh a. "E nia..ni tak e, ka hmuh hnuhnun ber chuan  a sam a dye tak e." a unaupa chuan a lo ti ve bawk a. "A thlalak kan lo en thei angem?" Kamal-a chuan a lo ti a. Thlalak chu an rawn la a, Nathana chuan a han en a.

A hmuh tawh hnu ngei  ani tlat, Rudran-a seminar a Susan-i nen an kal khan, an thutna tura lo thu, palian dum zet kha Thlamuana, Lalnunpuii personal make up artist hi a lo ni reng tih chu a hre chhuak ta. Rang takin Nathana, Liantea leh Kamal-a te chu Rudran-a Conference Hall lamah chuan an va let leh a, reception te bulah chuan Nathana chuan Thlamuana thlalak chu hmuhin,"Hepa hi ni li liam ta khan session a rawn attend ve a, tualthah thubuaia rinhlelh mek a ni. CCTV footage kan hmu duh, khami ni mai bakah nidanga session footage pawh kan hmu duh." a han ti a.

CCTV footage chu an han en a, Thlamuana chu an hmu ta ngei mai. Thlamuana detail kimchang chu Nathana chuan a dil nghal a, reiloteah an peih nghal vat a. "Liante, phone number leh address vel hi lo verify ula, hmanhmawh ang che u." tiin file chu Nathana chuan a pe a. Number an chhuichhuah hnu chuan constable Siama chuan, "Sir, he number hi Thlamuana hian ni 10 chhung a hmang a, mahse call leh message engmah a awmlo." tiin Nathana chu a hrilh a.

"Sim card in track em?" tiin Nathana chuan a zawt a, "Sim hi inactive a inti a, mahse a phone IMEI number kan nei a, chumi atang chuan a SIM card hi kan activate thei ang. Tunah chuan SIM thar a hmang tawh a, chu SIM ah chuan call vawi khat chu hman a ni a, chupawh ni 6 hmalam daih a ni." a ti a. "Khawi hmun nge a call?" tiin Nathana chuan a zawt leh a. "HOTEL ROYAL PLAZA." tiin Siama chuan a chhang a.

*******************

TO BE CONTINUE