IT'S MY LOVE STORY Written by : Aaron Malsawmdawngzuala. CHAPTER-3

IT'S MY LOVE STORY

Written by : Aaron Malsawmdawngzuala.

CHAPTER-3

 Nikhat chu office a ka awm lai chuan Angeli'n min rawn call ve khiah mai, "Hello Angel, i dam maw?" ka han ti nghal vat a. "Dam e, i dam zawk maw? Min la theihnghilh em lo maw?" a han ti deuh kher a. "Awi i over, i buai ka ring a." tiin ka lo chhang a. "Nia ka buai khawp mai, ka hriatna te hi ka hloh then tawhin ka hria. Anih nang, i chanchin te han sawi ve la.." a rawn ti leh a.

"Amak lutuk, a tir kha chuan ka inhrethiamlo hle a. Haw leh mai ka duh rum rum hman a, mahse tunah chuan engkim a fel tawh e." tiin ka chhang leh a. "Avan lawmawm ve, lo haw vat teh. Lenchhuah ho a chakawm tawh, kan ngai tawh che." a rawn ti leh a. "Umm anih phawt le." tiin phone chu kan dah ta a.

*****************

Tlaiah chuan Sangtea message ka dawng a, "Park ah lo kal rawh, ka nghak mek che." tih hi a lo ni. Ka ban veleh chuan park lam chu ka pan a, a bula restaurant ah chuan Sangtea leh nupa niawm tak, mizo hmel ang tak mai te hi an lo thu ve bawk a. KA va pan hnai a, "Sangte.." ka va ti chu a phu zuk mai.

A tui in lai ala hak zui, a bula mite nupa pawh chuan min lo melh dun heu lehnghal a. Sangtea chu a khuh vak vak a, min rawn melh a, zawi te hian, "Tinge ilo kal?" tiin a phun sup mai. Chutah pangngai tak hian, "Ahh..nu, hei hi Vanlalchhuangi ania, ka thawhpuinu a nih hi...VL, hei hi ka nu leh pate an nih hi." a han ti leh nghal zung zung a.

Ka lai kher mai, "E..ih..in dam maw?" ka ti bah nuai a. Chutah Sangtea chuan min han en leh a, "File chu ilo keng em?" a ti ringawt a, ka hrethiamlo kher mai. "Eng file maw?" ka lo ti hu a, min melhrum vak a. "File kha.." tiin a mitko a han san zeuh a, a chhuanlam a ni tih ka hrethiam nghal mai.

"E, lo keng e." tiin ka file ah lai, ka project neih mek chu ka han pe ta tawp a. File chu a la a, "Nu, minute 5 hnu velah ka lo kal leh ang. VLi nen hian hna chunchangah kan han inbe lawk ange, kan rei lovang." tiin min kai phei deuh dawr dawr a. Kan kal hlat deuh hnu chuan, "Tinge ilo kal a?" tiin min zawt daih mai.

"Nangman lo kal rawh i ti a nih kha."

"I message ka hmu alawm."

"Hmel ho chuh, ka phone an khawih animaw?"

"Tute maw?"

"KA thawhpuite mawle...hmel ho chuh..a tha e, pangngai deuhin awm rawh aw..office a thawkdun angin kan insawi tawh bawk a, pangngai deuhin awm ang che."

"Awle."

Sangtea nu leh pate bulah chuan kan va let leh a, "Kan zo ta e, kan kal tawh dawn mi niang?" a han ti a. Chutah Sangtea nu chuan, "Bawiha, kan thil eiman vel hi lo pe la, VLi nen hian kan han titi lawk ange." tiin min hruai hrang ta daih mai, a zam awm duh teh kher asin. An awmna atanga hla deuh fe ah chuan min hruai a, min melh nghal deuh hru mai.

"Eng kohhran nge in nih?" a han ti ringawt a. KA hrethiamlo lutuk chuan, "Engmaw?" ka lo ti hu ringawt. A nui deuh huk a, "Ka sawi awmzia chu...i pa in eng hna nge a thawh?" a han ti leh a. "Bank Manager ania.." tiin ka chhang a. "Aw Bank Manager maw..englo ania, kan fapa Sangtea hi kan hmelhriat hausa deuh ten an fanu pasal atan min rawn be ve deuh a, hehe..pawisa kan ngainat vang ani lo ania. Mahse mi hausa tak an ni a, an nungchang pawh a mawi ngei ang a, i hrethiam em?" a han ti leh a.

Aw..hrethiam e." tiin ka lo chhang leh mai a. "Kan hma hun atan pawh a tha zel dawn a, ka han sawi vel mai mai mawle. Anih leh Sangtea mizia hi enge a an? Office velah te...i ngaihdan min han hrilh teh." a han ti leh a. "Hehe, a fel lutuk." tiin ka lo chhang leh a. "Umm nia a fel a, ka hria alawm." a han ti leh a.

Chutih lai chuan Sangtea leh apa chu an lo kal a, chuveleh SAngtea nu chuan, "VL, bus in i haw mai angai dawn nih hi..bus lah a a vang ropui si a..i nghah deuh vang vang angai dawn nih chu..kan haw phawt ange." a han ti leh a, a nuamlo duh kher mai. Sangtea chuan, "Anih phawt u aw..nu..pa, mangtha u." a ti a, an kal liam ta a.

********************

"Ka fapa hi chhungkaw hausa deuhin an makpa atan an duh a ni awm a..mahse pawisa ngaina tak kan ni tihna anilo ania..." tiin Sangtea melh zeuh zeuh pah chuan ka nui vak vak a. Lukhama min rawn vawm pah chuan, "I ninawm Vanlalchhuang...duhtawk rawh." tiin a thu tum bur mai.

Ka nuih za lutuk chu ka insum thei ngang lo a ni, "I nu strict zia kha, kum 30 i tling ve dawn tawh a...i flat ah hmeichhe pakhat i chenpui mek tih hre phei se chu.." tiin ka nui leh vak vak a. Rum zet hian min en a, "A tawk, ka nu ania...fiamthu thawh nan hmang suh aw...ka vel mai ang che." a han ti leh khur khur a, ava han cute reuh tak.

Ka phone a rawn ri a, ka nu a ni ve thung ta tlat mai. "Sangte, ka nu in minlo phone...lo bengchheng suh aw." tiin phone chu ka pick a. Mutchhuah hmel tak chuan ka han ham vel a, "Umm..nu, tun ang zanreiah tinge min rawn call a?" ka han ti vel a, Sangtea chuan min lo en a, a ner sak mai.

"Dar 10 chauh ala nih hi, iva mu hma ve?" a rawn ti nghal khur khur a, ka nu tak hi chu. "Ka chau em alawm.." ka han ti leh vel a, Sangtea chuan lukhamin min rawn vawm leh pawp. "Anih chuan naktuk zingah min rawn call ang che aw.." a rawn ti leh a. Chutah hmanhmawh hmel deuh hian ka pa chuan, "La dah suh, la dah suh...Hello Bawihte, i tluang zel amaw?" a rawn ti ve lung lung a.

"Aw pa, ka tha e." tiin ka lo chhang a. Ka nu chuan ka pa chu hauvin, "A chau anih hi....mut hahdam tir rawh..awle Bawihte, muttui aw." tiin phone chu kan dah ta a. Sangtea chu a lo nui vur vur mai, "Lemchan chu ilo thiam hle mai." min lo ti deuh kher a. "Hmm..hmeichhia ni ve la e..dawt sawi hunah te chuan zir chawp ngai lovin i sawi ve mai ang." tiin ka lo chhang a.

Kan ngawi dun deuh vang vang hnuah chuan, "Sangte, ka nu leh paten min rawn biak hian dawt sawi zel angai a, achang chuan ka inthiamlo thin." ka han ti a. "Enge maw chutiang i sawi le? Hetah hian i him a, anuam i ti zawk a, enge buaina awm?" alo ti a. "Thil diklo anilo tiraw? Tuna kan awmdan hi?" tiin ka han zawt leh a. "Umm..engmah diklo a awmlo. Min ring rawh...thil diklo engmah kan tih ngai chuanloh hi.." tiin min chhang a, he mihring hi chu a va han fel chiang tak.

*****************

A tuk zanah chuan Sangtea chu a rawn haw har ngei mai, ka va phone ta tawp a. "Sangte, ilo van haw har em em ve...i buai em ni?" tiin ka zawt a. "Um, hna ka ngah deuh a." tiin min lo chhang a. "I rawn haw tlai dawn mi?" ka han ti leh a. "Um, dar 8:30 velah ka lo thleng ang." tiin min chhang leh a.

Dar 10 a pelh hnuah pawh a lo la haw miah lo mai, ka ngaihtuah lutuk chuan ka va phone leh a. "Sangte, 8:30 i tia, dar 10 a pel tawh ania." ka va ti leh a. "Hna ka ngah lutuk ka tih kha, engtikah nge ka lo haw theih ang ka hrelo. Min lo nghak suh, lo mu mai rawh." tiin phone a dah hmak mai.

Umm, a buai hle aniang. Zanin ngei hian ka thil surprise chak em em thin chu ka ti thovang, ka lo nghak mai ang. Dar 12 a rik meuh chuan min rawn phone ta a, "VL, tinge kawngka hi i kalh a?" a rawn ti a. "Ka thin i ti rim alawm?" ka lo ti deuh hmak. "Ava ho thin tak, lo hawng vat teh." a rawn ti leh a.

"Inchhungah ka awm lo."

"Khawnge i awm a?"

"Terrace ah.."

"Terrace ah a?"

"Umm."

"Awle, ka lo kal."

Terrace ah chuan Sangtea chu ka nghak reng a, thla eng mawi tak hnuaiah chuan ka thawmhnaw zinga ka duh ber leh nalh ka tih ber nena inthuamin, puan phahin chhuatah chuan ka thu ran tawh mai. Ka bulah chuan nautelem tamtak ka tlar phei a, ka hmaah chuan cake lian tak chhawpin bati ka chhi eng nual bawk.

Min rawn hmu chiah chu mak a tih hmel kher mai, nui sang hian min rawn pan a. Ka bulah rawn thu in, "Eng ang surprise nge ni ngai?" a rawn ti a. "NAngmah ngeiin min hrilh kha...thla eng hnuaiah, hmeichhe chhelo tawk nen..bati eng mawi tak nen..hei bati a awm a, khita khi thla eng mawi tak a awm bawk a." tiin thla chu ka kawk a.

A nui sen sen a, ava han duhawm chiang tak. Lai deuh lek lek chung chuan, "Tlem chuan ka chhelo ve tho tiraw..hehe...HAPPY BIRTHDAY, SANGTE.." ka han ti leh a, ni e...vawiin hi Sangtea Birthday a ni. Cake chu kan zai dun a, "Ka lawm e, VL..ka dream thin ang chiah a ni, nang hian min tih hlawhtlin sak a ni." tiin a hnuk a ulh lek lek mai.

**************

A tuk zingah chuan Sangtea chu a insiam mawlh mawlh a, chutih lai tak chuan door bell a rawn ri ral ral a. Rang takin ka biru nghal a, Sangtea chuan ava hawng a. "Enge ni ta, ka pi?" Sangtea'n a tih ri chu ka hre thei a. Chutah ka nu aw ngei mai chuan, "Khawnge Vanlalchhuangi a awm?" a rawn ti ta mai a.

Ka thinphu a rang ngei mai, ka thlan a tla nghal zawih zawih a. "Tunge i nih aww?" Sangtea chuan a han ti leh a. Chutah ka nu chu a rawn lut lui a ni ngei a, "Hey ka pi, tunge i nih ka tih chu?" tiin a au zui a. "Vanlalchhuang...Vanlalchhuang..khawnge i awm?" tiin ka nu chuan min au ta vak vak mai.

Engtin nge ka nu hi helai hmunah a rawn kal theih? Engtin nge ka awmna a hriat? Ka ngaihtuahna a buai kher mai, ka hlauthawng takzet. Chutah ka nu chuan in rawn hmu ta a, keilah ka off-day a nih avangin tawnzau leh kekawr bul chhing tak nen chauh ka lo awm si a. Ka nu chuan min en rum kher mai, "I thawmhnaw va siam fel la, min rawn zui nghal rawh." a ti ta mai a.

"Nu...ihhh..i hrethiamlo a ni." ka han ti dek dek chu vin zet hian, "I thawmhnaw va pack rawh ka tih chu.." a ti leh tuar a. KA tawng tha thei lo hialin ka hria, "Nu..ihh.." ka sawi zo hman lo, ka hmaiah chuan min beng hawi sawk mai a, ka mittui a tla nghal zawih zawih mai. "Min bum amaw, dawt min lo hrilh char char thin amaw? Kal rawh, i thawmhnaw va pack rawh." tiin min vin leh vak mai a.

"Enteh ka pi...min lo ngaithla lawk teh.." tia Sangtea a rawn tawngchhuak chu ka nu chuan vin zet hian, "Nang kha lo ngawi rawh, nang nen khan engmah sawidun tur kan neilo." a lo ti hmak mai. Ka thawmhnaw chu hreh tak chung chuan ka pack fel a, ka rilru ava hah tak em. Ka insiam zo a, ka nu chuan min kai chhuak nghal a.

Sangtea chu ka han en a, a lungngaih hmel takzet. Pawnah chuan kan chhuak a, ka nu chuan auto a lo ko lawk sa vek chu niin. "Nu, ka phone ka theihnghilh a." inthlahrung tak chung chuan ka han ti a, "Va la vat la, lo let leh nghal ang che." a lo ti a, ka va let leh ta a. Ka phone ka theihnghilh tak tak lo, Sangtea kha vawikhat chiah hmuh leh ka duh a ni.

Ka va let leh a, Sangtea chu a din ngaiin a lo la ding reng a. Ka va lut a, tap chungin nghet takin ka kuah a. Ani pawh chuan min lo kuah let a, mahse engmah kan sawi lo. Tichuan ka chhuak lehnghal a, Sangtea chuan min thlir zui vawng vawng a. Chumi ni atang chuan a ni, hmangaih ka lo nei tih ka hriatchhuak tak ni. Ni e, ka thianpa, ka rin em em Sangtea hi ka lo hmangaih takzet a ni tih ka hrechhuak ta chiah a ni.

*********************

Mizoram kan thleng ta a, Sangtea ka va han ngai tak em. Kan in kan luh dawn chuan ka nu chuan, "VA kal hmasa rawh, hlim hmel tak khan awm ang che. I pa bulah dawt sawiin Bangalore atangin i lo haw tur thu ka hrilh a, ka rawn hruai tur thu che leh kan bazar dun nghal tur thu sawiin dawt ka hrilh tawp a ni. I pa hian a fanu awmdan a hre ve anih chuan a tuar zo lovang, va lut rawh." a ti a, ka rilru ava na tak em.

Ka pa pawh chuan min han hmu chu a lawm kher mai, min kuah a, min be bawrh bawrh a. Ka nu ka hlauh em avang chuan hlim reng anga ka awm a ngai si, ava han hrehawm tak em. SAngtea chu ka ngai thei em em a, ka nu lah chuan ka phone a la hmak mai si. Landline atanga phone ka tum pawhin min hmu hman zel a, min hau hrep zel.

*******************

Nikhat chu kan verandah ah chuan ngawi rengin ka ding a, Sangtea chuan ka rilru a luah khat vek a ni ber mai. Chutih lai chuan ka pa a lo kal a, min rawn kuah a. "I lo haw atang khan i awmdan hi ka en reng zel a, i hlim loh hmel thei khawp mai. Min han hrilh teh, rilru nawmlohna i nei ami?" a rawn ti a.

Ka lo nui lui sak a, "Nei love, ka pa." tiin ka chhang a. "I nu khan i hna atanga i ban thu kha min hrilh bawk a, i duh tawh lo em ni?" tiin min zawt leh a. "Nilove, chutiang anilo..Bangalore chu ramdang alo nibawk nen, nuam ka ti tawhlo a..chuan, ka ngai tawh bawk si che u a." tiin ka chhang leh a. Ka pa chu a nui huah huah a, "A tirah te kha chuan i tawng pawr ve em em a, tunah naupang ang maiin i tawng leh a, haha..a pawi love, hetah hna dang a tam alawm." tiin min kalsan a.

******************

Vawikhat chu Angeli a lo leng a, mahse ka hmel hlim lo tak avang chuan a ngaih a thalo hle tih ka hria. "VL, dawt min hrilh suh aw...Bangalore ah khan hmangaih i zu tawng a ni tiraw?" tiin min zawt ta nge nge a. Ka lu ka lo bu nghat a, "Tunge a hming?" tiin min zawt leh a. "Sangtea ania, kar khat chhung kan inbe tawh lo. Angel, ka a lo chauh tawh a ni. Ka nu in ka laptop te, ka phone te min laksak vek bawk si. Landline takngial pawh a cut vek a, engtin nge ka tih ang?" tiin ka tap nghal tuau mai.

"Awi alo nimaw..kha, ka phone atang hian call rawh." a ti ta hlauh mai. "Mahse ka nu saw.." ka tih lai chuan, "I nu chu alo kal anih chuan ka lo be buai mai ang, kha..call rawh." tiin a phone chu min pe a. Ka va han lawm tak em, rang takin Sangtea chu ka call ta nghal a, mahse a dah busy zel.

Vawi 10 chuang ka call hnuah pawh a dah busy zel bawk si, "Nidangah kan tum leh chhin dawnnia, a buai aniang." tiin Angeli pawh chu a haw ta a, ka va han ngei tak. Tlaiah chuan Angeli chu a rawn kal a, ka roomah a rawn lut a. Phur tak hian, "Sangtea'n min rawn call a, a ngai lutuk che a nih chu." a rawn ti ta mai a.

Ka lawm lutuk chu ka zuang lo chauh, "Animaw...tinge phone kha a lak theih loh a?" tiin ka lo zawt nghal vat a. "A buai lutuk a, nangmah biak tlang dan zawngin. I thawhna office ah te alo va kal a ni awm a, kan inbe char char alawm. E chuan maw, Mizoramah a rawn kal dawn." a la ti ta deuh deuh, ka lawm zia chu ka sawi thiamlo zawk.

Angeli nen chuan plan kan siam a, Sangtea lo haw veleh inhmu turin thu kan titlu ta a. Chhuanlam pawh kan siam lawk vek tawh, ka nu bula dawt sawidan tur thleng chuan kan sawi lawk a. Sangtea pawh Mizoram lam panin a lo kal mek tih ka hre leh zel a, ka va han phur tawh tak em.

****************

Sangtea nena inhmuh kan tum ni chu a lo thleng ta, ka phur tawh ngei mai. Room ah chuan ka insiam a, a nalh thei ang ber chuan ka inchei a. Ka nu a lo lut thut mai, "Khawnge i kal dawn?" a rawn ti leh nghal hlur a. "Ihh vawiin hi ka thiannu Seni birthday ania, min sawm ve a." ka ti khur dar dar a.

"I tellovin a lawm thei lo tihna ami?" a ti leh hmuk a, "Nilove..ka nu." tih ringawt chuan ka chhang a. "Anih ahnu, kal kal a tullo..." a ti leh ta hmak mai. "Nu please...ni thum hnuah Singapore ah a chhuk leh nghal dawn a, engtikah nge kan inhmuh leh dawn pawh kan hre silo. Khawngaihin nu...please." tiin kutsuih meuh chuan ka ngen a.

"A tha e, lo haw hma ang che. Ka ring che a, ka kal tir hram che a ni tih hi hre reng la, min bum tawh suh ang che." tiin min chhang ta a, ka thaw huai mai. Rang takin ka insiam chhunzawm nghal zung zung a, rimtui thei ang berin ka perfume chuan ka han inkap a. Phur tak chuan ka scooty ka la chhuak a, ka hmangaih Sangtea hmu tur chuan ka chhuak ta.

******************

Park ah chuan Sangtea chuan min lo nghak reng tawh a, ka va hmu chiah chu ka lawm lutuk ka hnuk a ulh hial zawk. Min rawn hmu ve ta, a rawn nui sang mai a, ava han hmeltha chiang tak. Min rawn pan a, nghet tak hian min kuah a, keipawh chuan ka lo kuah let ve nghal a. A mitah chuan chiang takin ka en a, "Sangte, engti turin nge ilo kal?" tiin ka zawt a.

"Nangmah hmu turin..."

"Iva rawn tlai ve.."

"Film ah pawh a changtupa te pawh an tlai ve thin tho alawm, ka rawn tlai ve ta mai a ni." tih pah chuan a nui suk a. "Hmmp..i sual e a.." tiin ka han pangchang lui vel a. "Nang i fel alawm." tiin min nuih leh suk a. "Sangte, chan nawn leh che ka duh tawh lo." tiin ka en ngawih ngawih a.

"Keipawn.." tih pah chuan rose par nalh tak mai hi min pe a. Kan in en a, kan innuih a. Ka khabe ah chuan a kuai dak a, ka hmuiah chuan dim tak hian min rawn fawp a. Khawvel hi a ding ni berin ka hria, ka mumang a nilo chu ka lawm takzet. Chumi ni atang chuan Sangtea pawh chuan min lo hmangaih ve reng tih ka hre ta a, inngaizawng kan lo ni ta a ni.

Sangtea chuan phone thar min leisak bawk a, sim card thar nen, a nuam chiang a ni. Nilenga kan inhmuh zawh hnu chuan ka haw ve ta a, khua pawh a thim der tawh. Ka haw chiah chu room ah ka lut tlang nghal a, ka phone thar chu phawrhchhuakin ka han set tha vel a. "Mobile thar min leisak avangin ka lawm e." tiin message ka va thawn a.

**************

Vanneihthlak tak miin kan ti dawn nge,  atukah chuan ka nu a chhuak hlauh mai. Chance remchang lutuk a ni tih hriain Sangtea inluah thar ah chuan ka va kal a, a in vel pawh a lo la hnawk nuai mai. Bungrua vel chu ka rem fel pui a, "Ka nu a chhuak a, ka pi te inlamah a kal a. MAhse tlaiah a lo haw lehnghal dawn, chumi hma chuan ka haw ngei ngei angai." tiin Sangtea chu ka hrilh a.

"Umm a nih chu." tih ringawt hian min chhang a. "I in thar chu a nuam khawp mai, a zau nuam si." ka han ti leh a. "Nia, Bangalore lama kan company ten min provide a nih hi. CAr pawh installment a rulh turin ka la bawk a, Mizorama kal turin phalna min pe hram a ni." tiin min chhang a.

"Car i lei maw?"

"Lei ang chu.."

"Tak tak em?"

"Umm tak tak e." tih pah chuan a thu a, abulah chuan ka va thu ve a. "Tinge?" tiin ka zawt leh a. Min kuah a, "Bike a kan inphurh thin lai hunte kha chu a tawp tawh, tunah chuan car in kan lengdun thei tawh ang. Mirror sunglass a nia, a chhungah chuan duhtawkin in kiss mah ila tuman min hmu thei dawnlo." tiin a nui suk a.

"I va han chimawm tak." tih pah chuan ka piai vak a. "I va han hmeltha tak." tiin min kuai dak a, lungchim tak chuan kan infawp leh ta. TV kan en dun a, mahse Sangtea chuan a en manglo. Mit khap lek lo hian min en ngawih ngawih a, min ti lai lek lek. "Tinge khatia min en vung vung a?" ka han ti a.

"Eng nilove...kan inhmuh hmaa i hmel awmdan tura ka rin i hre duh em?"

"Hre duh e."

A nui leh suk a, "I tah nasat em avangin i hmel a bui vek ka lo ring a, mahse ahma aiin i lo chhelo daih a, tlemin i ngo bawk a, tlemin i thau bawk. Mahse..min ngailo riau." a han ti daih a. "Hmp..ka ngai che alawm. Chuan Mizorama i lo kal hi ka lo ring tak tak asin, ka tan hian iolo kal ngei dawn tih hi ka hre lawk a ni." tiin ka chhang a.

Nileng chuan kan awmdun a, a khat tawkin kan inmuah deuh reng bawk. Darkar fe aliam hnu chuan tlai lam a lo ni der mai, a mal chungah ka mu a, min chul heuh heuh a. "Sangte, naktukah ka pa rawn bia la.." ka ti ta tawp a, a ruka inhmuh reng chu ka peih lo lawk a ni. "Eng thilah maw?" a lo ti hu mai.

"Kan chungchang hi mawle, ka pa chu ka nu ang a ni velo. Min hmangaih lutuk, min hrethiam em em ang." ka han ti leh a. A ngawi vang vang a, "Um a tha e, naktukah ka lo kal anga ka rawn be dawnnia." a ti hlauh mai. "Ka hmangaih che, duat." ka ti a, a khi suk a, "Keipawn ka hmangaih che." tiin min chhang a.

Sangtea flat-ah ka khawsa ve a ni tih ka nu in a hriat nachhan kha chu kha naupang, Pooja-i vang vek kha a lo ni tih Sangtea chuan min hrilh a. A tir chuan ka thinrim khawp mai, mahse Sangtea'n a inthiamloh thu leh a inchhir thu a sawi chuan ka inbeng daih leh hram a ni. Kha vai naupang kha kan office ah lo va kalin ka thiannu angin a lo insawi a, kan boss tuaia chuan ka number leh ka nu number a lo pe anih chu. Mahse hun kal tawh a ni a, Pooja-i pawh ka haw zui hran lem lo.

*******************