NATHAN SEASON-4 Written by : Aaron Malsawmdawngzuala Episode-3

 NATHAN SEASON-4

Written by : Aaron Malsawmdawngzuala

Episode-3

(THE LION RETURNS - 3)

***************

Chutia rei fe card denga police station kawta kan lo awm lai chuan DGP a lo kal ta thut mai, rang takin kan ding a. Salute kan va pe a, a hlim loh hmel kher mai. Rum tak hian Nathana chu en in, "SP Nathan, engvanga police station hi khar nge i nih?" tiin a zawt a. "Engtin nge ka tih chuan ang? Kan IG Sir berin a duh tlat silo alawm, ka senior a ni si a, ka hnial ngam lo a ni. Sir, amah pawh a lungawi lovang." tiin Nathana chuan a lo chhang a.

"Eng thil nge IG chuan a tih a?" DGP chuan a han ti leh a. "Thil tha tak a ti a ni, Sir. Ihmaw, harsa takin dan phal lova silai a ruka zuar tute chu ka man thei ve hlauh mai a. Mahse ka awmloh hlanin IG Sir chu lo kalin lock up chu a rawn hawng a, misualte chu  a chhuah zalen ta a ni. Hetiang khawpa rilru tha hi ka la hrelo, a fel takzet a ni. Midang ho pawh hian tilo turin an hrilh nasa, mahse a ngaithla duh tlat lo a ni. IG KA NI A, TUMAN KA THU INHNIAL TUR A NILO tiin a chhuah lui ta thova, enge keinin kan tih theih chuan anga? Chuvang chuan police station hi ka khar ta mai a ni." tiin Nathana chuan a lo chhanglet leh sak mai.

DGP chuan, "SP Nathan, khang misual dangte i chhuah zalen ve kher kha thil tha tak ti angah i inngai em ni?" tiin a zawt leh a. "Ka tihpalh a ni, mahse maw Sir...ka chhuah lo a nih chuan an lungngawi lo anga, anni aia sual pawh kan chhuah a, min khing daih thei asin." tiin Nathana chuan a lo chhang leh a.

"Nathan, i thil tih hi a diklo a ni." DGP chuan  ahan ti leh a. Nathana chuan thutak zet hian, "Eng thil nge dik ber chu ni ta ang? Khang terrorist ho chhuah zalen kha thil dik a ni bik em ni? Sir, ka tihpalh a ni. Tihian i hmaah ka tawng a ngai ta mai hi a pawi ka ti, mahse ka tih a ngai si a ni." tiin a chhang a.

Mipui zingah pawh chuan U Hlupuii chu a lo awm ve reng mai a, "DGP Sir, a thil tihsual nilovin, a huaisen zia zawk ka hmu asin keichuan." a lo ti a. DGP chu a ngawi vang vang a, "A tha e, Nathan. Thudik min hrilh dan kawng pawh i thiam khawp mai, kei DGP, ka office chhung chauh a hun hmang thin leh misual chhui pawh thei tawh lo hi vawiin hian min ti harh zawk mai. IG chu ka lo bia anga, action pawh ka lo la ange. SP Nathan, Station hi han hawng leh ta che." a ti ta a. Nathana chuan salute pein, "Yes Sir." a ti a, Station chu hawn a ni leh ta.

********************

Zan a lo ni a, Nathana nen chuan kan chhuak dun a. Dar 8 vel a pelh hnu chuan kan haw a, "Rinawm, whiskey sial tawk ka nei asin. Zanin chu lo riak ve mai rawh, ka nupui fanau te lah ka nu te in lamah an riak vek bawk si." tiin min sawm a, keipawh chuan ka lo remti ve mai a. Inchhung kan han lut chu Nathana whiskey bur chu U Hlupuii fate chuan an lo keng a, "Hey, enge in tih..hetah rawn la vat ru." tiin Nathana chuan a hau va.

"Aih, Anu Sanvi pawhin zu hi a thalo a ti, lo in tir tawh su a ti." tiin zu bur chu an pawm tlat mai. "Bawihi...bawiha..in thlauh keh hlauh ange, fiamthuna hun a nilo ania." tiin va laksak an tum a. Naupang ta na na na chu an tlachhia a, an pathum chuan whiskey bur chu an in pass chhawng ta zak zak hlawm mai.

"Lalrinawm, min lo pui ve ta che." tiin min la vin hrep zui, "Haha, naupang mai mai an nih hi." tiin ka la pui duh thak lo zui. Pawnah an tlanchhuah pui a, Nathana chuan a umzui zel a. U Hlupuii pawh chu lo kal ve in a nui nasa kher mai, "Anu kha..lo dawng rawh." tiin whiskey um chu naupang ho chuan U Hlupuii lamah an va vawrh phei a, ani chuan a lo dawn thelh a, chhuatah chuan a tla keh ta.

A tlak rual rual chuan a puak dur mai a, U Hlupuii chu a kang ta hluah hluah mai. Naupang ho mangang chuan, "Anu..anu." tiin va pan an tuma , Nathana nen chuan kan lo dang vat a. U Hlupuii chu chet pawh a che tawh lo, a thi tih chu chiang takin kan vaiin kan hria. Thenawm khawveng te an lo kal khawm nghal a, U Hlupuii chu kan chan ta der mai.

Kan rindan mai pawh nilo, thil awmzia diktak chu Minister Rosanga hian Nathana hi zu heh ve tak a ni tih a hria a, chuvang chuan a zu in tur chu bottle bomb nen a thlak thleng tih a chiang reng. Nathana inah hian tu emawni chu a lut ru a, chuan chu bottle bomb chu a whiskey bur nen a thlak thleng a ni.

******************

A tukah chuan U Hlupuii vuina ah pawh ka tel thei ta lo, IG Duhsaka nen Minister Rosanga chawimawina ah kan duty a ngai tlat mai. Tlai lam deuh hret tawh ah chuan pawnah chuan mipui te chu an titi sup sup a, chutia mahni buai buai a an buai sup sup lai chuan Pu Rosanga chu stage atang chuan tu emawni hian a rawn chhui thla tawp mai.

Kan va hawi phei chu Nathana a lo ni reng mai a, a thinrim hmel takzet. MP chu rawn kalin, "Hey, enge maw i tih le? Police nge i nih misual zawk?" tiin a rawn vin hrep mai. Nathana chuan zam hauh lo hian, "Police ka nih vangin he mihringpa hi ka rawn khawih a ni, misual phei chu ni ila ka that daih tawh ang." tiin a lo chhanglet a.

Pu Rosanga assistant chuan, "Officer Nathan, kan minister hi kut i thlak ngam amaw? I thil tih hi i hria em? Jail i tan phah thei asin." a lo ti ve bawk a. Nathana chuan a kawr awmah lo thamin, "Nang uicho hi...ka bulah nilovin i pu bulah zawk hian bauh ta che." tiin a nam phei lawp mai.

Chutah Minister chu melh leh in, "Tunah in hmaah keimah chauhvin, puitu neilovin ka din mek hi. Min that ta che u, i duh ang ngei chuan min that ta che. Ka bottle ah bomb i lo dah a, ka thiannu Hlupuii chu a thih phah asin. A fate, naupang tak tak te chu fahrah ni turin a kalsan asin, annu ngaiin an tap a, nang hetah chawimawina te ilo la nei vel amaw?" tiin a au vak vak mai.

MP chuan, "Nathan, journalist pakhat accident vangin a thi a, chu chu hetah i rawn tlangau pui chiam nachhan tur a awm lo. I bottle chhunga bomb lo dah tute chu va zawng chhuak la, va man ta che." tiin a hau leh hrep mai a. "Aw..chumi ti tur chuan alawm ka lo kal. Chu bomb dah tu, chu terrorist ngei chu helai hmunah hian a awm a ni." tih pah chuan IG Duhsaka chu a en a.

"He mihring, he police officer corrupt, mahni nupui te pawh tihlim theilo khawpa sum buaipui...a fate tan pawh hun nei ngailo. Mahni nupuite pawh ti hlim thei lotu chuan engtin nge kan khawtlang a siamthat teh lul ang? Ani hi terrorist diktak chu a ni, he officer hi." tiin a vin hrep mai.

Minister lam chu ava melh leh a, "He minister hian..he mihring hian, a fapa ang chiaha kan ram hi kebaia awm tir a tum a ni. Ani hi terrorist anihlohna a awm bik em ni?" a ti leh a, Pu Rosanga chuan a melh no lo kher mai. Pu Rosanga fapa hi kum 12 mi  ani a, rualbanlo niin ke in a kal theilo a ni.

DGP chu lo tawngchhuakin, "Nathan, dan pelin i che ania." tiin a rawn hau a. Nathana chuan, "Ka tihpalh a ni, Sir. Ka huangchin ka pel tih pawh ka hria, vawiin hian heng mipui lo pungkhawm te hian Pu Rosanga chu Pathian ang maia bia in an chawimawi a, a tlangval laia a thil tih thin in hria em? Vai ramah awmin a seilian a, keimah ang chiahin. Tichuan suamhmang te pawlah telin train passenger te a rawk thin a, a nunhlui tuman an hrelo. Mi hausa tak a nih chhan pawh engdang a nilo, eiruk vang leh smugling vang vek a ni." a ti ta piap piap mai.

MP chu ava en leh a, "Tichuan he MP hi...middleman tiin, midik tiin a insawi a, mahse eiruk chu a hreh chuang miah lo." a han ti leh a, MP thinrim lutuk chu a che hman uai a. Inla fel tak hian Pu Rosanga chuan, "Nilove MP Sir, keiman kan bia ange." zaidam tak chuan a han ti vel a. Nathana bulah chuan Pu Rosanga chu va kalin, "Nathan, khawngaihin buaina rawn chawk chhuak suh. Heng mipui lo kalkhawm te hian ka thusawi an ngaithla duh a, hlawkna beiseia lo kal an ni. Nangpawh lo tel ve zawk ta che, buaina siam lovin.." a han ti vel a.

"I thusawi ngaihthlak ai chuan ka thisen tam tak hloh pawh ka thlang zawk, i hria em?" tiin a thinrim insum zolo chuan Minister chu khawih leh a tum a, mahse kan lo dang vat a. A ban a phar a, "Awle a tha e...ka kal ang." a ti a, mahse a la thinrim khawp mai. Thil thalo zawk a thlen belh ka hlau a, Nathana chu a motor awmna thleng chu ka va kuah phei thei ta hram a.

*******************

Kan dept police officer zawng zawngte chu dawhkan kilin kan thukhawm a, kan hma takah chuan hremna dawng turin Nathana chu a uniform nen a ding run mai a. DGP chuan, "Uniform ha chungin chhia i chham a, mipuite venghim turin thu i tiam a. I nunna hial pawhin tuar dawn mahse, theih tawp chhuahin i beih zel tur thu i tiam bawk. Mahse chutiang chuan i che hauh silo, misual ang maiin i che a. Kan Minister zahawm takte zinga mi Pu Rosanga chu kut i thlak a, police officer tih tur a ni lo hrim hrim. Mipui tamtak leh i senior officer te mit hmuh ah Minister Rosanga i ti mualpho a, dan i bawhchhe bawk a ni. Chuvang chuan hremna i hmuh angai, he department atang hian suspend i ni anga, i post pawh sawn a ni ang. I lukhum kha la thla la, i arsi te leh i revolver te kha la thla vek rawh le." a ti a.

Nathana chuan a melh ngai a melh reng a, muang chang chuan  alukhum te, a batch te leh a pistol te chu la thla in insawifiahna nei miah lo chuan hremna an pek chu a pawm thlap mai. Chutah zam hauh lo hian a rawn hawi chhuak a, "Vawiin hian ka police uniform chu min hlih sak a ni thei e, mahse uniform tel lo pawhin ka thinlungah hian Police nihna chu a awm reng thovang. Mi pangngai anga awmin, ka hmelma te chu ka bei zel thovang." tiin salute a pe a, a chhuak ta a.

*********************

Chumi zan chuan Nathana inah chuan Nathana nen chuan beer kan in a, kan titi a. Mahse engvak mah ka sawipui theilo, a mood a off hmel em em ringawt mai a ni. A thenawm, U Hlupuii te inlama inhau thawm kan hriat veleh chuan rang takin kan tlanchhuak nghal a, kan thil hmuh chuan thin ava tirim veleh.

IG Duhsaka chuan a fate pathum chu a lo hnawtchhuak mek a nih chu mawle, naupang te chauh an la ni bawk si, a lo vin hrep hrep mai a, abulah chuan a nupui thar pawh a lo awm lehnghal. Va kal ka tum a, mahse Nathana chuan min dang tlat mai. "Nilove Rinawm, nangchu Police Officer i ni a, sawpa saw i senior a ni. Kei erawh chu Police ka ni tawh hrih lo, mi pangngai mai chauh ka ni. In IG saw tunah hian ka va sawisa dawn a, police i nih angin i tihtur chu i hria. I theih chuan rawn chhan ang che, mahse i thu thu a ni e." tih pah chuan ava kal a.

IG chu ava sawisa ta nghek mai a, chhan ka han tumlo mai mai khawpah. An hmuh loh tur chuan Nathana motor phen atang chuan ka lo bihthla vel, ka mi huat em em Nathana'n a han sawisa tak tak chu a hmuhnawm letling zawk hial. Mahse motor pathum vel chu rawn kalin inkawtah chuan an lo ding a, a chhung atang chuan palian tak tak hi an rawn chhuak a.

Nathana chu an rawn beihrawn ta chiam mai a, a hnek lo ta lek lek mai.Ruah lah chu a sur buan buan lehnghal a, an insual nasa piap piap kher mai. Chutah an zinga pakhat chuan U Hlupuii fanu chu manbetin chemte in a tin ta mai a, "Hey Nathan, i ngam chuan han che leh teh, a hrawk hi ka zai chat ang." tiin a vau ta khur khur mai le.

Nathana chu a che ngam ta biklo, chu chu remchangah la in Nathana chu an sawisak rawn ta vak vak mai a. Chumi hnu deuh chuan motor pakhat a lo kal leh a, a chhung atang chuan Minister Pu Rosanga chu a rawn chhuak a. Thinrim hmel tak hian, "Hlap rawh u, dim suh u.." a rawn ti vak vak mai.

Ka insum thei ta bik lo, chhan tuma ka va kal chu Nathana chuan min lo en a, a lu a thing tlat mai. Hrehawm ti tak chuan ka thianpa, ka unaupa leh ka boss ni bawk, Nathana an sawisa lai chu ka en ta tlawk tlawk mai a. An tiang ken te chuan an hlap rawn hrep mai a, mahse Nathana erawh chuan min rawn en a, a lu a thing zel mai si.

Chhuatah chuan thi hnuang hian a bawk thlawp tawh mai a, Minister chu va thu hniamin, "I uniform kha i chhuang viau a nilawm ni? Nangni ang Officer satliah te hi chu ka duh duh hunah ka dahtha thei che u tih hre mai rawh, mangtha phawt le." tiin Nathana chu na em em hian a lu ah chuan a vaw leh a, an kalsan ta a.

********************

Kar 2 zenzawn chu Nathana damdawiin a awm ta, ni 3 vel kha chu  a harh chhuak lo hrim hrim bawk. A ke ruh an lo vaw diklo deuh a ni awm a, a lu lam hliam pawh a tha chak khawp mai. Sanvi te leh anu te pawh an lo kal a, rin aiin a dam chak phian mai. Kar 3 zet a awm hnu chuan a ke pawh chu a damtha lehnghal vat a, damdawiin atang chuan a chhuak leh thei ta.

Minister Rosanga thusawi naah duty leh a ngai ta hlauh mai, ACP ACP tia min lam reng chu ka ning tawh takzet. Stage ah chuan thuin Minister Rosanga dawt sawi chu kan ngaithla leh ta a, ava han boring thei tak em. Mipui zinga Nathana kut lo beng vel chu ka zu hmufuh a, ka phu zawk mai.

Pu Rosanga pawh chuan a lo hmu ve ni ngei tur a ni, ka beng bulah chuan, "Saw mihring pa saw engtin nge a la rawn kal theih a? A damlo a ni lawmni?" a rawn ti su su a. Kei lah chuan, "I sawisa na tawklo deuh aniang." ka lo ti ve sak mai. "Enga? Kan sawisa lo..engtin nge.." a ti bah nuai mai a, ka nuih suk ringawt.

MP pawh chuan a lo hmu ve a, "Rosang, engtin mah min tina theilo...thusawi a hun leh tawh ania, sawi vat rawh." a rawn ti a, huphurh hmel zet chuan Minister chuan thu a sawi ta a. A thiam ang tawk chuan ram hmangaih ber niawm tak chuan thu chu a han sawi leh vel a, thusawi na na na chu thiam tak a ni.

"Ram tan, kan ram zimte, Mizoram tan chuan ka nunna pawh ka hlan mai a, mi lu la hnam kan ni a, hnamdang lakah kan tlawm tur a nilo. Kan Officer tha tak tak, hnamdang nupuia nei maite kan awm hi ka rilru ana takzet." tih pah chuan Nathana chu ava melh deuh kher a, Nathana lah kutbeng uar uarah alo la tang zui.

"Hmeichhe awmnem zawk te, naupang pawisawilo te tihnat emaw, khawih chhiat ai chuan keimah hi min kap hlum zawk mai rawh se, chutiang khawp chuan hmeichhia te zahawmna hi keichuan ka ngaipawimawh a ni. Kan Police Officer, India ram dengchhuak khawpa lar, ka ngaihsan em em hnung ka zui mek a ni, chu Police chu hmannia kan suspend tak, mawilo taka min ti mualphotu Nathana kha ani hauh lo ania, Tamil Nadu misual turu Veerapan-a umtu leh man thei tu ngat, South Indian Kannada ho pawhin ama chanchin movie ngata an lo chhuah, sawiselna tamtak dawngtu leh ram tana theihtawp chhuahtu, kan IPS retired Pu Sangliana zawk daih kha a ni ka sawi ni." a han ti leh deuh kher a, Pu Sangliana awm ve ta se a lawm hauhvin ka ringlo.

A thusawi pah chuan Nathana chu ava en zel a, Nathana lah chuan a lo nuih reng ringawt a. "Ka mi leh sate, zoram mipuite tawrh ai chuan keiman ka tuar mai ang, achhan chu Mizoram hi ka hmangaih a ni. Hnamdang lakah kan tlawm lovang, mizo kan nih chhung chu kan tlawm tur a nilo. A tul anih chuan silaimu pawh ka dawng mai ang, kan ram tan chuan pawi ka ti..." a sawi zo hman lo, a ban atang chuan thisen a rawn baw zawih mai.

A ban chu a dawm vawng vawng a, Nathana ka va en a, mahse Nathana kah a nilo. Nathana phei chuan mak a tih hmel kher mai, a hawi kual vak vak a. Mipuite pawh chu hlauvin an tlan darh suau suau a, tu rawn kah ber nge a hriat ta hauh lo mai. IG chuan mipui awmna lam kawngsir a kebai pakhat chu va kawk in, "Enteh u, sawpa saw.." a ti a.

Minister Rosanga chuan phawk hru hian, "Ehe...Lawmzuala...ala dam a maw?" a ti ta hu mai, ka bo ngei mai. Ka va en ve a, tunge a nih a, khawi ami nge anih pawh ka hre der si lo. "ACP Rinawm, sawpa saw min kaptu chu a ni..va man rawh." tiin thu min la pe zui, a thu chu ka zawm ngei angai si.

Tichuan Minister thuih hruaite nen, kei leh IG Duhsaka nen, chu kebaipa awmna lam chu kan va kal a, chuveleh kebaia pawh chu tlanchhe ve nghal a, a bai phei auh auh mai. Nathana pawhin a motor lam a pan ve nghal tih pawh ka hria, tichuan mipui karah chuan ka va inhnawh phei a, kan buai mup mup kher mai.

********************

TO BE CONTINUE