IT'S MY LOVE STORY Written by : Aaron Malsawmdawngzuala. CHAPTER - 4
IT'S MY LOVE STORY
Written by : Aaron Malsawmdawngzuala.
CHAPTER - 4
******************
A tukah chuan Sangtea a lo kal dawn avang chuan in chu ka ti fai hliau hliau a, ka pa chuan min en vung vung mai. "I va hlim hmel ve a, enge ni a?" tiin ka pa chuan min zawt a. "Engmah nilove..thil sawipui duh che ka nei a.." ka tih lai chuan ka nu a lo kal thut a. Vin deuh tak hian, "Vanlalchhuang, hetah lo kal teh." a rawn ti leh ta hlur mai.
"Aww thil min sawipui duh a nei a, kan han inbe lawk ange. Bawihte, sawi rawh." zaidam tak chuan ka pa chuan a lo ti a. Ka pa hmaah chuan ka ding a, "Pa, ka thianpa pakhat a lo leng dawn a, a hmu duh che a ni." ka ti leh a, "Vanlalchhuang, lo kal teh ka tih chu." tiin ka nu chuan min rawn vin leh vak a.
"I thianpa maw? Keimah hi min hmu duh amaw? Haha..tunge a?" tiin ka pa chu a nui huah huah a. Chutih lai tak chuan door bell a rawn ri a, ka nu chuan ava hawng a. Ka va kal ve nghal a, ka rin ang ngeiin Sangtea chu a lo ni ngei mai. Ka nu chuan a lo melh rum em em a, nui sang hian Sangtea chuan, "In tha maw kha..ka pi?" a han ti a.
"Lo lut rawh, Sangte." ka lo ti vat a. Sangtea chu a lo lut a, ka nu chu a lungawiloh hmel takzet. Ka pa bulah chuan ka va hruai a, "Pa, hei hi Sangtea a nih hi." ka han ti leh a. "Umm..lo thu ta che." ka pa chuan a lo ti a, Sangtea chu a thu a, ka nu pawh a lo phei ve lehnghal vat a. "Duhtak, thingpui va lum ta che." tiin ka pa chuan ka nu chu a han melh zeuh a. Phur lo tak chung chuan ka nu chuan choka lam chu a pan a, min melh rum kher mai.
KA pa chuan Sangtea chu a en vang vang a, a chang leh min rawn en ve leh a. A zamawm duh kher mai, Sangtea pawh a zam hle tih ka hria. A aw a han thian kharh a, "Ka pu, i fanu hi nupui atana neih ka duh a ni." a han ti chu ka pa chu a meng deuh kawk mai. "Ihh..ka sawi awmzia chu..i fanu nen hian kan inhmangaih tak zet a ni." a han ti leh a.
"Eng hna nge i thawh?" tiin ka pa chuan a han zawt a. "GAme designer ka nia, Bangalore-a Game Shastra Company ah ka thawk a. Thla khatah cheng 63,800 ka hlawh ve thin a." tiin Sangtea chuan a lo chhang a. Lawm loh hmel tak hian ka pa chuan, "Chutiang ka zawt lo che." a lo ti hmuk mai.
"Aaa...ka sawi tel palh a nih kha.." tiin Sangtea chu a zam hle mai. "I chhungte bulah i hrilh tawh em?" tiin ka pa chuan a zawt leh a. "Aih hrilh lo." tiin alo chhang a. "Engvangin maw? An pawm i ringlo tihna em ni?" ka pa chuan a lo ti leh a. "Nilove, ka hrelo. Ka hrilh anga, an pawm em em ang." tiin a chhang leh a.
"Khawnge i nu leh pate chu an awm?"
"Warangal ah.."
"Eng kohhran nge in nih?" tiin ka pa chuan a zawt ta mai a. Sangtea chuan inthlahrung tak hian, "Ka pu, tun ang generation ah Kohhran chungchang tinge min zawh a?" tiin a nui suk a. "Inneih in duh tih min hrilh a, chuvang chuan a ni ka zawh che." tiin ka pa chu a mood a fuhloh hmel tawh kher mai.
"Thla 6 liam ta khan kan intawng a.." a tih lai chuan ka pa chuan, "Thla ruk chhung lek chu i tan a tawk tihna em ni?" a ti ta khur khur mai. "Thla ruk mai nilo, kar 2 chhung lek inngaizawng pawh an innei thin tho alawm, ka pu." tiin Sangtea chuan a chhang leh a, ka lo ip nasa lutuk chu ka hah vek thei.
"Chutiang chu hetah a thleng ve lovang...ka fanu hi i nei thei lovang, i kal thei e." a ti ta hmak mai. "Ngatimaw ka pu? Engvangin maw?" tiin Sangtea chuan a zawt a. "Ka duh lo, ka phallo." a lo ti leh hmak. "Ngati maw? A chhan min hrilh la.." a han ti dek dek chu vin deuh tak hian, "Ka duhlo..chu chu animai.." a ti leh hlur mai a.
"Chhan engemaw tal chu a awm dawn lawm ni?" Sangtea chuan a ti leh a. Ka pa chuan rum tak hian a melh a, "Nangni chhungkua leh keini chhungkua chu kan in ang velo, in chhungkaw zingah hian ka fanu hi a awm thei lovang. Chubakah keini chu kan changkang velo, phaiah kan awm phak velo. Mizoram ngei a awm, Warangal emaw, Bangalore vel a awm nilo kan lo zawng ange." a ti leh ta hmak mai.
Sangtea chu beidawn hmel tak chuan a nui sak a, "Ka pu, a chang leh Kohhran chungchang in sawi a, achang leh Mizo hnam humhalh chungchang in sawi leh a. Tunah phai a lehkha zir ka nih avang leh ka nu leh pate pawh phaia khawsa thin an nih avangin min duhloh thu i swi leh a. Tun ang generation ah te chutiang thil i sawi mai hi amak ka ti, engkim a danglam tawh alawm." a han ti a.
Thinrim tak hian ka pa chuan, "Mama, kum 1960-a piang ka ni a, keini chu hetiang reng hi kan ni ang." a ti leh hmak mai a. "Nilo ka pu..hriatthiam tum teh." a tih lai chuan ka pa chu a ding hluai a, "Khawngaihin tlangval...engmah sawipui tur che ka nei tawh lo. Chhuak raw...buaina athlen hma hian chhuak rawh.." tiin a vin ta khur khur mai.
Lungawilo tak chuan Sangtea chu a chhuak a, ava han pawi tak em. Ka rilru ana takzet, tap chung chuan ka room ah ka chho a. Khumah chuan ka thu a, lukham khuahin ka tap hawm hawm mai. Ka pa chu a lo lut a, ka bulah chuan a lo kal hnai a. "I thin a rim em ni?" tiin min zawt a.
"Ka na takzet a ni...khatiang em em a i thinrim kha ka la hmu ngai lo."
"Khatiang khan tlangval inleng i la nei ngai lo..ka hlauthawng a ni, bawihte."
"Pa kum 18 lek ka ni tawh lo...Sangtea hi mi fel tak a ni, ka pa."
"Chuvang ringawt chuan in inneih hi ka phal theilo a ni. Inneihna awmzia i hrelo a ni...i damchhungin in chengdun tawh dawn, hrethiam tur chuan ila naupang lutuk."
"PA duhtawk rawh..kum 22 ka ni ve tawh, naupang ka ni tawh lo."
Ka bulah chuan a rawn thu a, "Tuna in inhmangaihna hian rei a daih dawn lo...i thiannu Angeli pawh nangmah ang chiah hian bialpa anei a, inneih a duh nghal ringawt a. Saw en ta che, kumkhat em pawh an inneih hma in an inthen leh der tawh saw, i hriat ve vek kha." a ti a. "Kan thenawm ami Nu Lali saw a chhungte tihluihna avanga pasal nei a ni a, kum 10 chuang an innei tawh. Mahse nitin an inhau a, kut an inthlak zaih bawk. Entirna pakhat min pe anih chuan maw ka pa, keichuan 10 chuang ka pe thei ang che. Chendun ringawt ai chuan inhmangaih taka chendun hi a tha zawk dawn lovem ni? Min hrilh teh ka pa?" tiin a zawt ve ta sak mai a.
"Ni e, hmangaihte nena chen dun chu a tha zawk alawm. Mahse tuna mi hi hmangaihna amaw i ti a, a nilo asin, inhmel duhna chauh a ni. Hetiang hi nangmahni ang rual ah chuan tawng an tam lutuk, hmangaihna amaw in ti a, mahse inhrethiam der silo."
"Pa, Sangtea hi i duhlo anih chuan chu chu i buaina a ni. Mahse ka hmangaihna hi hmelduhna mai mai a nilo asin, chutiang chuan sawi lul suh." tiin ka chhang let a. Chutih lai chuan Angeli a lo lut a, "I nawmsak hi ka duh ani, ka fanu." tiin Angeli chu a han en a, "Angel, i thiannu hi han hrilh fiah teh." tiin min chhuahsan a. Angeli chu ka kuah a, ka tap hawm hawm ringawt mai a ni.
******************
Atukah chuan Angeli nen chuan kan chhuak dun a, Sangtea thawhna office ah chuan kan va kal a. Office canteen ah chuan kan chawl dun a, "Kan inthen chhante chu thildang daih ania, kan intihthiamlohna pawh thildang daih a ni. I pa in i hmangaihna zinkawnga entirna thalo taka min hman angai ta mai erawh pawi ka ti takzet." Angeli chuan a han ti a.
"Chutin sawi mah ta che, a ho lutuk." tiin ka lo chhang a. "Chuan..hei hi em ni Sangtea thawhna hmun chu?" tiin min zawt a. "Umm a nih hi.." tiin ka lo chhang a. Sangtea hi an puten Mizoram lamah hian chawlh hmang turin an kal tir anilova, an transfer zawk a ni. Bagalore a a thawhna company leh Mizorama Game Company pakhat te hi an in-link ve a, Sangtea hi a rawn thawh chhunzawm tihna a ni.
Kan titi lai chuan Sangtea chu a lo kal a, Angeli nen chuan ka inhmelhriat tir a. Kan bulah chuan a rawn thu a, "VLi hian i chanchin min lo hrilh thin a, a sawi nasa thei lutuk che a." Angeli chuan a han ti a, Sangtea pawh a lo khi suk mai. Angeli bawk chuan, "Ka kal ange, anih u aw." tiin a kal ta a.
"Anih chuan...engtin nge kan tih tak ang?" tiin Sangtea chu ka han zawt a. "Min hrilh zawk la, enge kan tih tak ang?" tiin min lo chhang a. "Sangte, ka pa chu vawikhat chiah rawn hmu leh la.." ka han ti chu lung nilo tih hriat tak hian, "Enga? Ani kha ka rawn hmu leh anga maw?" a ti deuh vak mai.
Ka sa ve phat mai a, "Sangte khawngaihin..ka pa ania, khatin sawi suh.." ka ti ve deuh thak mai a. A ner nang mai a, "Animaw...anih chuan i nu leh pate kha e, be leh turin huaisenna ka nei tawh lo a ni. Ka hmangaih zia che hi hrilh eng ang pawh ni ila, min vaw hrep animai. I nu phei kha chu, a mitmeng ringawt pawh khan min ti hlau thei alawm. Chhuak rawh min ti hmak mai ania, ka tan chuan a tlawm thlak ve asin." tiin a nui tha duhlo vel a.
KA ngaihdan a ni ta bik hauh lo, "Sangte, ka nu leh pate hi khatia i sawichhiat kher angai lovang." tiin ka vin deuh hlur a. "Awww...animaw..anih leh khatia i pa'n min tawngkhum lai khan engtin nge ilo awm a?" a han ti leh a, ka mood a chhe tan ta khawp mai. Staff pakhat hi alo kal a, "Buaina a awm em ni? In thawm ava ring ve?" a rawn ti a.
Sangtea lah chuan, "Englo ania, bro..henu nen hian kan inhmangaih lutuk a. MAhse apa hian min duhlo a, an ina ka leng chu min hnawtchhuak hmak a nih chu mawle. Min pui thei angem?" a lo ti vel a. Chupa chuan hrethiamlo tak hian, "Engtin nge keiin ka puih theih ang che?" a lo ti hu mai.
Vin tak hian Sangtea chuan, "Anih ahnu, min pui thei dawnlo anih chuan enge kan buainai hriat ve a tulna..kal rawh..lo buai suh." a ti hlur a, chupa pawh chu a kal ve mai a. Sangtea chuan min en leh a, "Chuan enge ka sawi lai kha..e ni tak e, engtin nge ilo awm? Mawh..i pa'n hmusit taka min tawngkhum lai khan engtin nge ilo awm? Han sawi teh.." a han ti leh a.
KA thinrim ta takzet e, "KA HUA CHE...KA be tawh ngai lovang che." tiin ka tho a, ka kalsan hmak a. A la nui lui sak zui a, "Alo nimaw..ka be peih biklo che. Lalfanu pawh i nih loh kha...ka biakloh che avang hian ka ril a tam phah lo." a la rawn ti hram a. Ka ding chat a, "F**K YOU.." tiin ka au vak a, ka haw nghal hmak.
******************
ZAnah pawh chuan kan inbe chhunzawm ta miah lova, ka titau char char. Mahse ka ngai em em a, kan boruak chu rit tak a ni. Min rawn call a, mahse ka la duh lo lui ngat ngat. Ni engemaw zat kan inbiakloh hnuah chuan vawikhat chu Angeli a rawn leng a, "Sangtea'n biak che a duh thu min hrilh a, va be rawh..i ho thei emai, inngaizawng karah chuan tiang te hi chu awm ve tur alawm." a rawn ti a.
KA inngaihtuah vang vang hnuah chuan keipawh chu ka titau peih talo, ka ngai em a ni. Chumi zan chuan kan inhmu ta nge nge a, "Tihpalh aw, Sangte. Khatia ka nu leh pate chungchang i sawi kha, ka thinrim lutuk a." tiin ngaihdam ka dil a. "Nia, i pa min tihdan kha na ka ti em a ni. A hrim hrim in, F**K YOU tih tawngkam te kha engtin nge i hriat ve a?" tiin a nui vur vur a.
"Hmm..i ngeiawm emai aw.." tiin ka sik vak a. "Hawh teh...i lengchhuak teh ang." a ti a. "Khawnge kan kal dawn?" ka lo ti hu mai. "Ka hre chuanglo, nizanah mumang thalo tawk ka nei a." a han ti chu, "Mumang thalo a..awi min hrilh lo aw law rawh." ka lo ti vat. A thleng dik ang tih ka hlau em a, ka hre duh lo a ni.
"Sangte.."
"Enge ni.."
"VAwikhat chiah ka pa chu rawn hmu leh la."
"Aih..ka duh tawh lo e a."
"Naaa..Sangte please.."
"A teuh lo mai."
"Sangteee....ka duat..i fel kha."
"Huiham..a tha e..khatia min dil ngawih ngawih te chuan engtin nge ka hnial theih ang che?"
"YEsssss...ivan fel tak."
"MAhse i pa chuan lo phallo leh ta se?"
"Umm...abak chu i thu thu animai."
****************
Comments