NATHAN SEASON-4 Written by : Aaron Malsawmdawngzuala Episode-8 (PROJECT WIZARD-4)

 NATHAN SEASON-4

Written by : Aaron Malsawmdawngzuala

Episode-8

(PROJECT WIZARD-4)

************

Ni reilote hnuah Nathana te pawh chuan Tamil Nadu chu an thleng ta a, institute ah chuan an va kal ta ngei a. Manager bulah te chuan thil awmzia leh Mizoram atanga an lo kal chhan te chu an han hrilh a, Manager pawh chuan a lo welcome tha kher mai. Nathana chu file pakhat hi a pe a, "Hei hi kan conference hnuhnung bera kan brochure a nia, thlalak a veilam ami kha kan former CEO Mizorama mi, Scientist Nelson-a chu a ni a. Tichuan a chibai pa kha army Officer a ni. Chuan a bula tarmit vuah kha Pramod-a chu ania." tiin a hrilh a.

Nathana chuan chiang tak hian a en a, Pramod-a signature copy chu a han enchiang a. Ahmaa Rudran-a signature nen chuan a han enkawp leh a, a lo in ang chiah chiah mai. "A address hi a ngai ala ni em? Nge a thlak tawh zawk?" tiin Nathana chuan a zawt a. Manager chuan mak tih hmel deuh hian, "A thi daih tawh alawm, thla ruk lai a liam tawh." a lo ti ta mai a.

"Engtia thi nge?" tiin Nathana chuan a zawt leh a, "Natural death.." tih ringawt hian manager chuan a lo chhang a. "A chhungte emaw biak tur an awm angem?" tiin a zawt leh a. "Awmlo..a nupui a nimai. Chupawh hmanni deuh khan a tlusual lehnghal a, a lu a sawhna lutuk a, coma in a awm mek." tiin a lo chhang leh a.

Nathana chu a han inngaihtuah vang vang a, "Dr Pramod-a hian thian kawmngeih bikte a nei mial em?" tiin a zawt leh a. "Aw nei e, Dr Velayudham nen hian an inkawmngeih lutuk. Scien lab lamah a awm ang, inchung lamah khian.." tiin Manager chuan a lo kawhhmuh a. Nathana te chuan, "Kan lawm e." tiin inchung lam pan chuan an chho leh ta a.

Dr. Velayudham chu an han hmu leh a, "A thih hnuah pawh Mizoram lam thlengin buaina a la rawn siam a nimaw?" tiin Doctor chu a han khi suk a. Nathana te pawh an lo nui suk ringawt a, "Kei aiin kum 2 chiahin a senior a, mahse thluak tha tak a ni thung." Doctor chuan a han ti leh a. "Doctor, Pramod-a hi Nelson-a hnuaiah em ni a awm, nge ni a Pramod-a hnuaiah Nelson-a hi a awm zawk?" tiin Kamal-a chuan a lo zawt ve bawk a.

"Ni e, kan vai hian Nelson-a hnuaiah vek alawm kan awm. He institute ah hian Director a ni thin a, Pramod-a hian a mil chiah lova, a chhan chu Pramod-a zawk hi Director tur a nia. Mahse Nelson-a fin hi Pramod-a hian a chelh zo ngang lo a niang, Nelson-a zawk chu director a ni ta a ni." tiin a lo chhang leh a.

Doctor Velyudham-a office chu Nathana te pahnih chuan an han enkual a, lehkhabu a lo tam khawp mai. Sawi zawm zelin, "Pramod-a hian Nelson-a, Mizoram daih ami lehnghal thuhnuaia awm chu a ngai thei ta lova, a inhnial pui reng mai thin a ni." a han ti leh a. Kamal-a chuan, "A hrim hrimin Pramod-a nge Nelson-a chu thiam zawk, tunge thluak tha zawk?" tiin a lo zawt ve leh a.

"Pramod-a lee..ani te chu tuman kan tluk lo. Wizard hi a ni tawp mai, mi turu tak a ni. Medical science ah MBBS a zir laiin All India Gold medalist a ni a, neuro science ah doctorate degree a nei bawk. Tamil Nadu ah a rawn in beng bel a, chutah chuan Siddha MEdicine ah master a zo leh bawk. Nano medicine lam a zir leh a, chutah pawh chuan University topper a ni leh bawk a ni. Kum 50 a lo tling a, neuro science breakthrough tha ber a rawn siam chhuak a, khawvel pumah a lar a ni." tiin Doctor chuan a lo chhang a.

Nathana chuan, "Sir, a research chungchang tlem azawng min hrilh thei angem?" tiin a zawt leh a. MAhse Doctor chuan a lu a thing ta tlat mai, "Chu erawh ka theilo, Mr Nelson-a rawn thlaktu tur hi khawilam scientist rilru chhia nge ni leh dawn pawh kan hre silo. Chutiang research information te chu kei chuan ka sawichhuak thiang lo, dikna ka neilo." tiin a chhang a.

"Police kan nih hi, tinge min hrilh lovang?" tiin Nathana chuan a lo zawt let a. "SP NAthan, hei chu central government hnuaia awm a ni. I zawhna min zawh hi zawhna sensitive tak a ni a, military secret ang velah a ngaih theih ang." tiin a lo chhang leh tlat mai. "Doctor, he case ah hian hriatthiam theihloh tam tak a awm a, chhui a hahthlak hle bawk. Kan buai tawh lutuk, kan chhuichhuah awmchhun chu Pramod-a chauh hi a ni. Ani lah a lo thi ve daih tawh bawk si nen, information dang kan hmuh belh lo a nih chuan he case hi a tawp a nimai." Kamal-a chuan a han ti a.

"Enge maw in sawi le? Tualthahna a awm tihna em ni? Pramod-a hi thah a ni tihna em ni?" tiin Doctor chuan a han zawt ve leh a. "Chutiang anilo." tiin Nathana chuan a lo chhang a. "Anih leh Pramod-a chuan mi a that tihna em ni?" tiin a han zawt leh a. Nathana chuan, "Ka thiam ang tawkin engkim ka hrilh vek ang che, i pawi ka sawi tel anih chuan min hrethiam dawnnia. Thla ruk kalta khan Mizoramah hnamdang pakhat, mi inluah, a hming Devi tih chu thah a ni a, a thattu hming chu Dheena a ni. Kan hriat dan chuan a mah chu Gym Trainer a ni awm e.." a tih lai chuan Doctor chuan, "Lawk aw...thil hriatchhuah ka nei tlat mai. Dheena chu PRamod-a gym trainer a ni a, an in thian tha lutuk nghe nghe asin." a ti ta mai a.

Mak ti tak hian Nathana chuan, "Enga? Dheena chu Pramod-a trainer maw?" a ti hu mai a. "Aw ni e, Pramod-a  athih hnu khan Dheena hi Mizoram lamah a rawn in bengbel daih a, engtin nge pem lehkha te, permit a neih erawh ka hriatpui lo, kan inkawm ve ngailo a." tiin Doctor chuan a lo chhang a.

"Ka rin aiin he case hian link a ngah riau mai, engtin nge chu ka hrelo..mahse he tualthahna te hian Pramod-a chu a inrawlh ve chiang a  ni. Tualthahna panga lai a awm tawh a, chupawh a in ang deuh vek a ni. A awlsam theih dan berin ka'n sawifiah ange, mi pakhat mizia chu chawp leh chilh ah a inthlak vek ang mai hi a ni. Entirnan mi pangngai tak pakhat chu thawk leh khatah a mizia dangin thil tihfai a peih ta em em a, a tui intur no pawh tissue paper chhanah zel a vuan thin a. Tin sikret zuk a ching ta em em a, chutah pawh zuk bik brand a nei bawk. Chuzawng ai chuan a pawimawh ber chu hmeichhia te an haw em em a, an haw takzet a ni." tiin a Nathana chuan a han sawifiah a.

Chutah Doctor chu a thaw hak a, "Lawk aw.." tiin a tarmit a vuah tha sauh sauh a. A dawhkana lehkhabu te chu a han enkual den den a, minute 2 vel hnuah chuan meizial bawm pakhat hi a rawn la chhuak a. Chu meizial bawm lah chu ahmaa tualthattu leh Thlamuana leh Rudran-a te zuk ang chiah, sikret dum hlang vek bawm chu a lo ni reng mai.

"Hetiang sikret hi em ni?" tiin doctor chuan a zawt a. "Aw.." tiin Nathana chuan a lo chhang vat a. Doctor chuan mak tih hmel leh hlauhthawn hmel tak hian, "He sikret hi chu Pramod-a zuk ber thin a ni." a ti ta mai a. Chuveleh Nathana chuan, "Nichina entirna ka sawi kha, a chetzia leh rilru ah a inthlakdanglam hlawk a ni. Ka hriatthiam loh ber chu mi an thah hma ni 4-5 velah an mizia a inthlak thut vek a, mi an thah laiin man an hlau thak lo bawk. Finger prints te lain chhuichhuah chu awl hle mahse tualthattu chu kan nangching a, kan han man a, intihhlumna tur an zawng awlsam leh em em mai bawk si." a han ti ve leh a.

Kamal-a chuan, "Sir sawi ang deuh khan an taksa ah chuan tualthattu thlarau chu a lut ang mai  ani, midang kawchhungah a insawn zel ang a ni." a lo ti ve bawk a. "Tualthahna thleng zawng zawngah khan Nelson-a thihdan chiah kha danglamna awm chu a ni, achhan chu tualthattu khan a thah lai khan glove a bun bik tlat a ni." tiin Nathana chuan a han sawi ve leh a.

Doctor chuan, "Anih leh heng tualthahna zawng zawng in chhui lai hian engtin nge Pramod-a hi in rawn hriat daih theih a?" tiin Nathana chu a zawt a. "Tualthattu hnuhnung ber kan man mek hian a signature ah Pramod tiin a sign a, mahse thaichhe lehin ama signature chu a ziak leh a ni." tia Nathana'n a chhan chuan Doctor chu a meng phawk nasa ngei mai.

"Khai awww..Lalpa leh.." a ti vawng vawng mai a. Nathana chuan, "Tinge ka pu? I va hlauhthawn hmel ve." tiin Nathana chuan a lo zawt vat a. "Nathan, meeting neih angai. Tamil Nadu Polive Station lamte nen inbe fel ula, meeting nei ila, thil sawi duh tamtak ka nei a ni. A rang lamin tih vat angai ang, hmanhmawhin.." a ti a.

***************

Tamil NAdu Police Station-a Officer te leh Forensic lamte nen chuan Nathana te chu an inbe fel a, meeting chu neih a ni ta. Doctor Velyudham-a chuan thusawiin, "SP Nathana case buaipui mek leh kan institute-a thil thleng hian inzawmna tam tak a nei a, chuvang chuan Pramod-a confidential details leh a research chungchang hi ka disclose dawn a ni. Rules ngaipawimawh chung zelin engkim ka sawichhuak vek dawn a, media leh news ten an lo hre ve a nih erawh chuan thil pawi tak a thleng dawn tih ka chah lawk a che u." a ti a, tichuan Doctor Velyudham-a chuan engkim a sawi ta a.

"Project Wizard, hei hi Pramod-a project hming chu a ni. Technology dangdai tak, mihring te rilru ang chiah pu thei siam a tum ta a." a tih lai chuan DGP chuan, "Enge awmzia?" a lo ti hu mai. Doctor chuan, "Entirnan.." tih pah chuan Nathana chu ava melh a. "Tunge i hming khah?" a han ti a. NAthana chuan, "NATHAN.." tiin a lo chhang a.

"Um..mi tupawh tunge an nih kan zawh chuan engtin nge in chhan thin? Kan hming kan sawi thin a ni, chu chu engtia lo thleng nge? I nu leh paten i hming atana an sak, an phuah a ni. Tichuan i hming Nathan tih chu i nu leh pa mai nilo, i hmelhriatte leh i thiante pawhin koh nan che an hmang ta a. Chu hming chu i thluakah khan a awm a, i hming an zawh apiang che in i hrilh ta thin a ni. Kha i hriatrengna tak khan i hming hi Nathan a ni tih a hriatfiah tir che a ni, mi tupawh chutiang vek chu kan ni. Mahse kan hriatrengna te chu a in anglo thung a, chuvang chuan kan hming pawh a in anglo hlawm reng a ni. Mahse i hriatrengna leh i thluaka i thil vawnte khan he investigation hi a investigate tir che a, keipawh ka hriatrengna hian researcher min nihtir thung a ni. Mahse i thluak pawn lam ve thung kha, a copy siam ta ila...nangmah ang chiah siamchhuh a ni tihna a ni mai lovem ni? Kan hriatrengnate hi biological taka sawi chuan kan thluak chhunga chemical tamtak awm te a ni mai a, chu chemical zia inanglo tak tak te zawmkhawmtu chu neurons kan ti thin  a ni. Pramod-a hian he research hi enchhin nan sazu thluak a hmang hmasa ber a, a chhan chu sazu thluak leh mihring thluak a mechanism te hi a danglam lutuk loh vang a ni. Sazu thluak ah chuan silicon electronic gel a chiu lut a, chu chuan sazu thluaka shock waves te kha a lo generate ta a, chutah chiah chuan chu damdawi chuan nano transmitter sang chuang vel sazu thluakah chuan chu electronic gel chuan neurons zawng zawngah a lo install ta a ni.  Copying process chu a in activate veleh chuan nano transmitter te chuan thluak chhunga physical information awm zawng zawngte chu a fawm khawm a, fiber optic cable hmangin a transfer ta zung zung mai a ni. Sazu thluak a digital structure te chu copy in hard disk ah a dah a, a sawi awlsam dan ber chuan cassette-a hla ngaihthlak thin, CD-a kan copy leh chhawn ang deuh hi a ni. Pu Nelson-a kan CEO a nih hmaa kan CEO hlui khan he project hi a duh in tha a ti hle a, mihring thluak copy chhawn phalna chu a hmu ta a. Chumi research tihna tur bik laboratory pawh chu kan institute ah vek hian a hranin a nei thlap bawk a, he thil hi a risky em em nachhan chu mihring thluak a khawih dawn a ni a, engemaw tihsual chhe te pawh awm se chu a mihring hman chu coma in a awm phah emaw, mi anglo rilru buaiah a chhuah phah thei hial a ni. Anih loh pawhin rualban lovah an chhuah phah thei a, a thih phah thei bawk. Chuta tang chuan Pramod-a chuan mihring nunna hlu tak chu a ngaih thah in a zahlo ta hle a, a research hlawhtlinna tur a nih phawt chuan tumah a ngaihtuah lo. Vawi khat phei chu ama nunna thap in ama taksa pawh chu a hmang ve ta hial a, electronic gel chu a thluak chhungah chuan a chiu lut ve ta a. A thluak chhunga physical data te chu wireless technology chhuakthar ber hmang chuan a copy a, a zawh hnu chuan digital hard disk chhungah a dah ta a ni. He memory back up hmang hian i thih hnuah pawh i hriatrengna te chu an dam chhung chuan tuman an tih bo sak thei dawn lo che a, immortality tiin kan sawi thei bawk ang." tiin doctor chuan PRamod-a research chungchang chu a sawi fiah ta a.

"Doctor, mihring thluak chhunga artificial silicon jection ah chuan side effect te a awm phah thei angem?" tiin DGP chuan a lo zawt a. "Hei vang hi alawm khawvel puma scientist thiam ber pawl nihna a hauh reng ni, a thil hmuhchhuah te pawh a tha thei thin reng a ni. Mahse kan bula hna a rawn thawh ni hnuhnun ber khan a thluak chhungah chuan ahma lawka a jection luh tak, electronic gel chu a lo la awm reng mai a. Medical history ah chuan mihring damlai thluakah hian silaimu hi kum 30 chuang pawh a awm reng thei tih a inziak a, chutiang deuh chuan a thluaka gel awm chung reng pawhin a normal vek tho a ni. A research chu level dangah pakai lehin mihring thluak a hriatrengna te chu midang thluaka aluh dawn chuan an tawng(language) hman te chu lehlin leh vek angai dawn tih a hria a, chumi kawnga hma la tur chuan a bei leh ta a  ni. Mahse kan CRO chu a bang a, amah thlaktu atan Mr Nelson-a hi a rawn lang ta a ni. Nelson-a bulah chuan a research neih mek chungchang te chu sawiin kalpui chhunzawm zel te chu a dil a, mahse Nelson-a chuan chu research chu mihring nunna la thei thil angah ngaiin a remti tlat lo. Pramod-a chu a thin a rim a, a bang ta a ni. A hnuah kan department minister hnenah kal lehin a project chungchang chu a hrilh leh a, mahse kan minister pawh chuan chu project chu mihring tana hlauhawm tak a ni tiin a lo hnawl leh ta bawk a ni. Chumi hnu chuan ka hmu leh ta ngailo, a hnu deuhah a thih thu kan hre leh ta chauh a ni. Mahse SP Nathana sawi tak ang khan a hnathawh, a project chu a hlawhtling mek niin a lang." doctor chuan a han ti leh a. "Thil theih a ni dawn em ni?" tiin Officer pakhat chu a lo phun nuah nuah mai. "Chu erawh PRamod-a chauhvin a chhang thei ang." tiin doctor chuan a lo chhang a.

********************

Rudran-a, Mizoram lama Police Custody a awm mek chu Nathana chuan Tamil NAdu lama hnuchhui chhunzawm a nih dawn avang chuan lak phei a dil ta a, DGP chuan Minister dangte bia in phalsak a ni ta a, Rudran-a chu Tamil Nadu Police Station lamah hruai phei a ni ta a. Ni relote hnuah an rawn thleng a, interrogation roomah chuan dah a ni leh ta a.

Doctor Velyudham-a pawh chu Station ah chuan a rawn kal ve a, Nathana te chu a pui dawn a ni. Interrogation room chhungah chuan Rudran-a chu a vei kual a, meizial dum bawk chu a zu khu tulh tulh mai a. Thutthlengah chuan a thu leh a, a pheikhawk a phelh a, a pheihkhawk chungah chuan a ke chu a han dah a.

Doctor chuan ngun tak hian a lo en a, "A ke dah dan te saw Pramod-a tihdan chiah chiah a ni, a kut veilamah meizia a keng a, Pramod-a chezia chiah chiah a ni." tiin Nathana chu a hrilh a. Doctor Velyudham-a assistant nula chuan damdawi bur chu rawn lek kangin, "I password hmangin lut thei e, doctor." tiin damdawi bur chu doctor hnenah chuan a pe a.

"Hei hi Truth Serum a ni a, LSD leh Truth Serum hi kan mix a nih chuan he damdawi hian mihring te chu thudik tak a sawi tir thei dawn a ni. Mahse India ramah hian hman a la ni ngailo, a chhan chu dan in a phal tlat lo a ni. He damdawi hi hmangin Rudran-a sawn thudik lo puangchhuak ta pawh nise, court chuan a pawm duh hauh lovang." Doctor chuan NAthana te bulah chuan a han ti leh a.

"He case hi dan piah lama kalpui hial chi a ni a, kan tana hriattur pawimawh ber chu thudik a ni. Dan chu keini police te hi kan ni, hmang rawh u." DGP chuan a ti a, Doctor Velyudham leh a assistant te chuan damdawi chu Rudran-a banah chuan an chiu lut ta a, Rudran-a chu an mut tir a, a mang ruai mai.

Minute 10 hnu velah chuan interrogation room ah chuan Rudran-a chu ala muhil reng a, Nathana leh Doctor chuan an thutchilh a. Doctor chuan Rudran-a chu hnai takah hian a han en a, "Pramod..Pramod, minla hria em? I thawhpui thin Velyudham ka nih hi..ka tawng i hre thei em?" tiin a han zawt a.

Maimitchhing chung chuan harsat hmel tak hian Rudran-a chuan, "Aw..ka..ka hre thei e." a rawn ti tawk tawk a. "I thih chhan ber hi enge? I intihlum nge accident vang?" tiin a zawt leh a. Rudran-a chuan, "Mahni intihhlumna a ni." a rawn ti ta mai a. "Engvang nge?" tiin a zawt leh vat a. Chutah Rudran-a chu a tal deuh vak a, Nathana chuan lo dan a tum a.

Mahse doctor chuan lo dangin, "Nilo, a damdawi hi a sual let ve a nih hi, hun kan nei tlem ania." a lo ti a. Chutah Rudran-a lam chu hawi lehin, "I thluak chhunga data te kha engtin nge midang thluakah i copy luh theih?" tiin a han zawt leh a. "Ka thluaka digital back up te chu midang thluakah ka thawn lut a, chumi atana ka mihring hman hmasak ber chu Dheena, ka gym trainer kha a ni. A thluak chhungah chuan electronic gel chu ka kap lut a, chumi hmang chuan seventh generation smar nano transmitter tamtak te chu Dheena neurons ah chuan ka install ta a ni. Tichuan ka digital memory te chu hard disk ah ka copy a, transmitter ah chuan ka dahlut ta a ni. Tichuan ka thi ruahman te chu ka ti zo ta a, Dheena erawh chuan nupui te a lo nei a, a chunga thil thleng tur engmah a hre hauh lo. Tichuan ka hnathawh mek te chu a thawk nge thawk lo tih hriat nan chuan ka thih angai ta a, tur ka in ta a ni. Ka hnuk a chah hma hret chuan ka thluak chhunga nano transmitter te chu Dheena thluakah a lut ta a, tichuan ka process neih mek chu a activate ta a ni. A tir chuan kha nano transmitter te khan Dheena hriatrengna te chu a thai bo ta vek a, tichuan ka digital memory, transmitter chhunga awmte chu a thluak chhungah a in copy ta a ni. Tichuan Dheena lo harh chhuah leh meuh chuan Dheena chu Dheena ni tawh lovin, keimah Pramod-a, Dheena taksa hmang ka lo ni ta a ni. Tichuan rang takin ka lab ah chuan ka kir leh a, ka ruang chu ka dahtha ta a ni. Min manchhuah mai lohna tiin ka thih hnu ni 5 na velah chuan hmun danga pem ka duh ta a, Dheena nupui pawh chu hruai telin tuma min manlohna tura ka rin, Mizoram lamah chuan ka pem ta a ni. Ka laboratory te pawh chu ka tichhe vek a, Mizoram lamah laboratory thar ka siam a, tuman a awmna an hrelo thung. Midang taksa ringa ka dam chhung chu ka lab a hard disk te chu a lo in update ve zel a, ka hnathawh mek te chu a hlawhtling ngei a ni tih ka hrechiang ta a ni." tiin a inpuang ta a.

"Anih leh kha gym trainer, Dheena nupui kha engvangin nge i thah?" tiin doctor chuan a zawt leh a. "A ninawm em a nih kha, ka meizial zuk te, ka mizia te chu ngai theilovin min hau ziah mai a, ka that ta mai a ni." a ti a. Doctor chuan, "Anih leh Miss India Mizoram Nunpuii kha engvanga that nge i nih?" tiin a zawt leh a.

"Khanu kha chu ka thah chhan tur awm ang chu i hriat ka ring." Rudran-a chuan a rawn ti ta mai a. Chuveleh doctor chu a phu zuk mai, Nathana chu a en hraw ringawt a. "Tinge? Enge awmzia?" tiin Nathana chuan a lo zawt vat a. "Miss India Contest kha Tamil Nadu ah tunkum khan neih a ni a, tah chuan Nunpuii pawh hi a lo kal ve ngei a ni. Restaurant ah kan nupa in kan chawl a, Pramod-a te pawh chuan kan dawhkan chu min rawn kilpui ve a. Chutih lai chuan contestant te hi an rawn kal a, mipuite chuan an lo bawr nasa mai a. Pramod-a thingpui in lai chu Nunpuii hian a rawn sut buak sak a, Pramod-a chu a thinrim em em a. A hau hrep a, Nunpuii pawh chuan ngaihdam a dil a. Mahse an inhnial zel takah chuan PRamod-a zawk chu fans te chuan an ankhum hrep mai a, chuta tang chuan Nunpuii hi a haw ta em em a ni. Chuvang chu a ni ngei ang, Nunpuii that tur hian Pramod-a hi Mizoramah a rawn zin a ni ngei ang." tiin doctor chuan a lo chhang a.

Chutah Rudran-a chu rawn tawngchhuak lehin, "Khami ni atang khan kha mihring nu kha ka haw ta em em a, a personal make up artist hmang ngei chuan thah ka duh a, Mizoramah chuan Dheena taksa hmangin ka zin ta a ni." a rawn ti leh a. "Mahse, Dheena taksa atang khan engtin nge Nunpuii personal make up artist taksa ah khan iva luh leh theih si a?" tiin doctor chuan a han zawt leh a.

"Dheena taksa ka hman lai khan ka target dawt leh chu ka melh ru leh tan ta a, Nunpuii personal make up artist, Thlamuana hi ka thlang ta a ni. Ka kidnap a, nikhawhrelovin ka sawisa a. Tichuan Thlamuana thluak chhungah chuan ka memory te chu ka dahlut leh ta a, ahma ang bawk khan. Tichuan Nathana hian min that a, ka memory te chu Thlamuana thluakah a in transfer leh ta chiah a ni. Tichuan Thlamuana chu a thi leh a, Rudran-a taksa ah hian ka memory te chu a in transfer leh ta a ni. Tunah chuan..Rudran-a hi a thih ve a ngai tawh a ni. Chutah chauh chuanka target dawt leh taksa chu ka hmang thei dawn a ni, Rudran-a hi a thih a ngai." a ti ta vak vak mai a.

"Engtin nge i tih theih?" tiin doctor chuan a zawt leh a, "Ka lab ah chauh a tih theih." tiin Rudran-a chuan a lo chhang a. "Khawnge i lab chu a awm?" tiin a zawt leh a. Mahse Rudran-a chu a tawng duh ta hauh lo mai, "Pramod, khawnge i lab chu a awm?" tiin a zawt leh a. Mahse a chhang duh lo, a tal vak vak ringawt mai.

Nathana chuan doctor beng bulah chuan va kunhniamin, "A target dawt leh tunge zawt rawh." tiin ava hrlh ru a. "Tunah hian thi ta la, tu taksa nge i hman leh dawn?" tiin a zawt a, mahse Rudran-a chu a tawng duh ta hauh lo. A tal vak vak a, "Sawi rawh....PRamod, min hrilh rawh.." atiin doctor chuan a zawt leh a, mahse a sawi duh hauh lo.

Chutah a zawi hnuk a, a phun sep sep mai. A tawng ri hriat tum chuan doctor chu a zu kun hniam a, chuveleh Rudran-a chuan Doctor beng chu a lo seh ta vak mai. Nathana chuan a lo pui vat a, doctor beng chu a thi phung mai. Chutah Rudran-a chu a rawn meng a, "Engvang phiangsen hian nge damdawia min chiu ruih ngam zawk a, Hmela?" tiin a rawn vin ta khur khur mai.

Na em em hian Rudran-a chu Nathana chuan a hnek siah siah mai a, doctor lah chuan a beng chu na tiin a dawm vawng vawng mai. Police dangte chu an lo lut a, Nathana chu an rawn dang vat a. Rudran-a lah chu a nui vak vak a, NAthana chu a thinrim ngei mai. Rudran-a chu an man bet a, an chiu muhil leh ta a.

********************

"Pramod-a next target hi tunge a nih tih kan chhuichhuah vat loh chuan kan chhe vek animai, hun tam kan nei tawh lo. Pramod-a thiante emaw, a chhungte emaw, a zirlaite leh staff te, a listin ka duh a ni, buaipui vat ang che u." tiin Nathana chuan Tamil Nadu Police te zinga a juinior te chu a hrilh a, an buapui tan ta nghal a.

Pramod-a nupui, accident vanga coma a awm mek chu an zawngchhuak thei ta. A awmna hospitalah chuan an va kal a, "Rawn harh emaw...a taksa rawn tih chet zeuh te a nei tawh em?" tiin Nathana chuan nurse chu a zawt a. "Nurse dangte sawi dan chuan vawikhat chu a mit a rawn tiche zeuh e an tia, mahse ka hmu ve lo hrim hrim." tiin nurse chuan a lo chhang a. "A lo harh emaw, biak theih a a awm hlauh a nih chuan minlo hrilh vat dawnnia." tiin Nathana chuan nurse chu a number a pe a, tichuan Hospital chu an chhuahsan leh ta a.

*****************

Station ah chuan an let leh a, hemi case an chhui chhunga Nathana tan bik liau liau a an siam, Senior Superintendent of Police Office ah chuan Nathana chu a thu a, a bulah chuan Inspector pakhat hi a ding bawk a. Nathana chuan Pramod-a thawhna hlui, Institute of Neuro Science history file vel chu a han en a.

"Sir, hetah hi chuan profile za chuang a awm a, kan mizawn ber, Pramod-a next target hi tuber nge a ni tih kan hriat theih ang?" tiin a lo zawt a. Nathana chu a ngawi vang vang a, chutah thil a ngaihtuah chhuak leh ta thut mai. "Susan-i, ka psychiatrist doctor..ani chuan min pui thei ngei ngei ang. Hetah a lo zin ve angai, a awmna tur chu ka buaipui mai ang." a ti ta a.

Case chu an buaipui chhunzawm reng a, ni reilote hnuah Susan-i pawh chuan tamil Nadu chu a lo thleng ve ta. A lo thlen tukah chuan meeting an nei ta a, Susan-i pawh chuan thil awmdan te chu a han hrechiang ve ta a. "He profile 134 te hi ngun takin ka en a, ka psychological analysis atanga en chuan list ka siam angai dawn niin alanga, tichuan list chu ka siam ta a. Hengte hi top 15 te chu an ni, heng mi 15 te hi a thiam ber pawl vek an ni bawk. An medical record en phei chuan khawtlangah pawh an nihna a sang hle a, heng mi 15 ah te hian kan mizawn mek chu a tel ve thei mai angem tih chu zawhna lian ber a ni. Engpawh nise, Rudran-a hian min hrilh ngei angai ang." Susan-i chuan a ti a.

Tichuan Rudran-a chu polygraph test hmang chuan Susan-i chuan interrogation room ah chuan zawhna a zawt ve ta a, "Hei hi enge a nih i hria em?" tiin a han zawt a. "Hria e, polygraph test a ni. Thudik ka sawi theih nan damdawiin min hrai rui phawt a, tunah polygraph test maw..in ti tha e." tiin thamlo tak chuan Rudran-a chuan a lo chhang a.

Susan-i chuan light a off thim vek a, tichuan projector chu a on eng a. Screen ah chuan Dr. Velyudham-a thlalak a lo lang a, a dawtah Institute of Neuro Science-a an manager thlalak chu a lo lang leh a, adawtah NAthana thlalak a lo lang leh a, a dawtah Pramod-a'n thlalaknaa a chibai, ahmaa Nathana te pawhina an en, Army Officer pakhat a chibai laite chu a lo lang leh a.

Thlalak dang dang a en tir hnuah chuan Susan-i chuan light chu a on leh a, projector chu a off ta a. Room atang chuan a chhuak a, "Ka rin ang chiahin pulse reading ah chuan Rudran-a hian min bum a, a pulse chu a tha vek angin a lang a, major flactuation engmah hmuh tur a awm lo." Susan-i chuan a han ti a.

Nathana chuan DGP bulah chuan, "Sir, he polygraph test hi a hmazawn taka neih a ni a. Test dang nei leh ila, hnunglam zawngin ni se, face reading...ka sawi awmzia chu minute tinin a face reaction kha a inthlak zel anga, a ngaihtuahna diktak kan hriat phah maithei asin. A lo hrechhuak anih pawhin a reaction thup nan a hmel awmdan pawh a danglam dawn a, tunah chuan polygraph test chauh hi a hria a, a face expression pawh camera in a ruka lak reng a ni anga, a tha lo maw?" a ti a, DGP chuan a lo pawm thlap mai.

Tichuan polygraph test chu hnungchhawn zawng chuan an nei leh ta a, camera in Rudran-a hmel chu an la reng bawk a. Tichuan an nei zova, video chu Nathana chuan a rawn la chhuak a. Face Reader expert te hnenah a kalpui a, reiloteah chuan Station lamah a rawn letpui leh a. Video chu a han play leh a, DGP te, Susan-i te leh police dangte nen chuan an enho a.

Video ah chuan Rudran-a hmel chu pangngai takin a awm reng a, mahse reife hnuah chuan hlauhthawnna leh mak tihna hmel a lo lang tlat mai. Chuveleh Nathana chuan, "Face reader expert hnenah he video hi ka entir khan, minute 3 leh second 8 velah a hmel a danglam thu min hrilh a, chumi hunah tak chuan ka thlalak a en mek a ni. Tichuan minute 3 leh second 22 ah chiah chuan thlalak ah chuan Pramod-a'n Army Officer a chibai lai chu a lo lang leh a, a hmel a danglam leh tih min hrilh a ni. Ka thlalak leh Army Officer thlalak a hmuh khan a lungphu a rang a, a hmelah diklohna a awm a ni tiin min hrilh a ni. Tin, he thlalak-a Army Officer hi Major a ni a, ahming chu Sathyam a ni. Enquiry kan neih ah chuan Sathyam-a leh Pramod-a te hi inkawmngeih tak an ni a, college te pawh an lo kaldun tawh a ni awm e. Tin, naktukah hian Major Sathyam chu dar 11 ah Chennai a lo thleng dawn a, thil engkim kan lo hrilhfiah vat a ngai dawn a ni. A next target hi Major Sathyam hi a nih hmel a, engemaw tak kan tih angai a ni." a han ti a.

DGP chuan, "Rindan ringawtah kan innghat thei lovang, Mr Nathan. Sipai a ni a, phalna kan neih loh chuan  abul hnaia awm pawh kan thei lo. Chubakah evidence tha tawk tak pawh kan la nei lova, kan thil tihtum hi a dik reng em tihte pawh kan ngaihtuah chian a tha." a ti a. Kamal-a chu lo tawngchhuakin, "Heti hian ti chhin ila Sir, Rudran-a bulah hian a target dawt leh chu Army Major Sathyam hi a ni tih kan hriat vek tawh thu hrilh ila. Tichuan a mangang anga, inthah a tum anga, chutah chuan a chiang mai ang chu." a lo ti ve a. "Umm..i ti chhin ang hmiang. Abak tihdan tur a vang emai, han ti chhin ila." tiin DGP chuan a lo remti hlauh mai.

*******************

Rudran-a awmna cell chhungah chuan Nathana leh Kamal-a te chu an va kal ta a, anva chhimbu dawi ta a. "Pramod, engtin nge Army Officer pawh chu i target nghal theih zawk a?" tiin NAthana chuan a han zawt vel a, Rudran-a chuan a melh rum kher mai. "Khate chu polygraph test mai chauh a ni a, mahse i next target chu face reading hmangin tunge a nih kan hrechhuak nghal a sin. Min han hrilh teh, hei hi Major Sathyam chu ani lawm ni?" tih pah chuan Kamal-a chuan thlalak chu a han hmuh a.

Nathana chu a lo nui suk a, "Zawt zawt duh suh, Kamal..Sathyam-a chu keimahnin kan zawt mai dawnnia." tih pah chuan chhuah an tum a, Rudran-a chu a mangang hle mai. Chutah Rudran-a chu a rawn tho thut a, Nathana chu cell chhung atang chuan a tlawh chhuak ta daih mai. Kawngka chu a khar a, Kamal-a chu a hancuff hmang chuan a rek ta vak mai a.

Nathana chuan kawngka hawn a tum a, mahse chahbi chu Kamal-a zawkin a keng daih bawk si. NAthana chuan cell kawngkhar chu a chum vak vak a, "Nilo Kamal..hei Zawnga..kawngka hawng rawh." tiin a au vak vak a, Rudran-a chuan a rek na tulh tulh mai bawk si. Reife hnuah chuan a rek hlum dawn ta mai a, Nathana pawh a mangang kher mai.

Thei leh theilo hian Kamal-a chuan a revolver chu a phawrh a, Rudrana dulah tak chuan a kap ta siah mai a. Rudran-a chu a thal tawp a, Kamal-a chuan kawngka chu a hawng vat a. Nathana pawh hmanhmawh takin a rawn lut a, Kamal-a chuan a hrawk a dawm vawng vawng mai. Hmanhmawh takin Rudran-a chu an pawm tho nghal a, damdawiinah an kalpui ta nghal a.

*******************

Reife operation an neih hnuah chuan doctor chu a rawn chhuak a, "Enge chanchin?" tiin Nathana chuan a lo zawt vat a. "A taksa chhunga silaimu lut hian a wind pipe a tichhe hneh hle a, a hliam a ziaawm hnuah chauh a chhanna chu kan pe thei ang che u." tiin a lo chhang a, tichuan Rudran-a harhchhuah hun chu an nghak ta tawp mai a ni.

Hospital pawn lamah chuan press mite chu an lo pungkhawm a, India ram pum huapa lar, thusawi thiam Rudran-a damdawiina a awm leh police kah hliam a nih thu te chu a lo darh leh chiam tawh mai chu niin, mahse police te chuan mahni inthah tum angin chhuanlam an siam ve tang tang a. Press mite chuan, "Motivational Speaker lar lutuk a ni a, engvangin nge inthah a duh tehlul ang? Inthah a tum nge, Police Encounter zawk?" tih te chuan an zawt a.

"In zawhna te hi ka chhang vek thei hrih lo." tiin DGP chuan a lo chhang a. Press mite zinga pakhat chuan, "Sir, khawpuiah hian tualthahna chu a thleng fova. Mahse Rudran-a, Mizoram state daiha awm hi tinge hetah in man si a? Chubakah tinge helai hmun nilo, state danga case inchhui daih theih? Chubakah case tamtak chhuichhuah loh a awm a, engtia hmalak nge in tum?" tiin a rawn zawt a.

"Enquiry tih mek a ni a, press meet te kan neih hnuah inzawhna te hi ka chhang thei chauh ang." tiin DGP chuan a chhang leh a. Chumi live TV chu hospital atang chuan Kamal-a chuan a lo en ve reng a, hrehawm a ti takzet. Chutih lai chuan Liantea leh Nathana te chu Airport ah an lo awm mek a, Major Sathyam chu an lo nghak a ni.

"Sir, Major Sathyam pawh chu hrilh ta ila, a awih dawn em ni?" tiin Liantea chuan Nathana chu a zawt a. "Casual deuhin bia ila, appointment fix tur kan nei angin kan sawi dawnnia." tiin a lo chhang a. "Chutiang ringawt chuan maw?" tiin Liantea chu a ner nung mai. "Engtin vak nge kan tichuan ang? Sipai Major a nih hi, tih theih kan nei tlem lutuk." tiin Nathana chuan a lo chhang leh a.

******************

Hospital-a Rudran-a damlo veng mek tu Kamal-a chu a veikual chhen mai a, a ngaih a tha thei thlawt lo chu Rudran-a ward awmna lam chu ava pan phei a. A chhung a lut chiah mai chu Rudran-a chuan a oxygen mask chu a lo phawi lui mek a, a thaw a rawn hah ta. Mangang takin Kamal-a chu a tlanlut a, oxygen mask chu a vuah tir leh a.

"Doctor, lo tlan ru." tiin a au vak vak a. Doctor te pawh chu an rawn lut leh a, theih tawp chhuah in Rudran-a nunna chhan tum chuan an bei leh ta a. Mahse an tlai ta, Rudran-a chu thawchhamin a thi ta der mai. Chutah a thluaka nano transmitter te chu chhuakin van boruak lamah an chho a.

Thlawna pakhat, Chennai lam pan mek chhunga chuang, Army Major Sathyam-a thluakah chuan a in transfer veleh ta a. Chutah Sathyam-a chu a rawn harh zawk a, a taksa vel chu a han in en a. A nui ta var var mai a, chu Army Major Sathyam-a chu Sathyam ni tawh lovin, scientist Pramod-a bawk a lo ni leh ta.

******************

TO BE CONTINUE