ALFRED ZOTHANPUIA (MIZO FICTION DETECTIVE STORY) Written by : Aaron Malsawmdawngzuala

 ALFRED ZOTHANPUIA

(MIZO FICTION DETECTIVE STORY)

Written by : Aaron Malsawmdawngzuala

*********************

Police Inspector pakhat, David Lalmuansanga chu kah hlum a ni a. A kap hlumtu hi hmeichhia niin a hming chu Mary Rinsangzuali a ni a, Mary sawidan chuan he police inspector David-a hian a pawngsual a, chuvanga kap hlum ta mai niin a insawi. Mary Rinsangzuali hi pasal neilai a ni a, a pasal hming chu Robert Lalthanmawia a ni.

Robert-a hi mi hausa tak niin businessman a ni a, company lian tak Ralte Construction neitu a ni. An manna hmun hi Renglung khua (phuahchawp) a ni a, Mary insawi dan chuan treatment ti turin he khuaah hian a kal a, Renglung resort ah a awm mek niin a insawi bawk. Inspector David-a hian a pawngsual a, chutih lai chuan David-a pistol chu chuh vatin Mary chuan a kap hlum ta mai niin Mary hian a sawi a ni.

David-a ruang chu postmortem tura phurh phei nghal a ni a, Ralte Construction neitu Robert Robert Lalthanmawia nupui Mary Rinsangzuali leh Police Inspector David Lalmuansanga te hian eng inzawmna nge an neih tih erawh hriat a nilo. Mary chhungte leh Robert-a chhungte pawhin engmah official statement sawi tur an nei lova, Mary lawyer hnen atanga hriat thuai erawh beisei mek a ni.

Mary hi an man lai hian a tap nasa hle a, a taksa ah hliam hmuh tur a awm nual bawk. Mary nghawngah hian hamna hnuhma a awm a, a hmaiah pilh a awm nual bawk. A awm(chest) ah kuthlakna hnuhma niawm tak, duk kulh mai a awm bawk. Mary chu Renglung Khaw Police Station ah hruai a ni ta a, thu zawhfiah a ni ta a ni.

Inspector chuan thu zawtfiah in, "Aizawl Police Inspector daihin i roomah enge a rawn tih reng reng? Engtia inhria nge in nih?" tia a zawh chuan Mary chuan engtin mah a chhang lo. Mary taksa chu an han enchiang leh ta a, pawngsual ngei a ni tih finfiah a ni bawk. Mizoram pumah he case hi a lar nghal hle a, David Lalmuansanga chuan dem a hlawh hle bawk.

News reporter te pawhin theih tawp chhuahin thudik tak hriat an tum nasa hle a, Inspector David-a hi zuheh tak a ni tih an hre leh bawk a, Mary chuan thudik ngei a sawi a ang ta hle. Mary chu court chuan bail chhuah a phal sak a, police te'n he case hi an chhuichhuah ngei theih nan court chuan ni 10 lai a pe bawk.

Media hmaah chuan Mary chuan, "Zawhna tamtak in nei tih ka hria, mahse vawiin hian zawhna pakhat zawh che u ka duh a ni. Pawngsualtu hi police inspector a ni tiin police case an file a, tichuan tualthattu chu kei hi ka ni tiin an sawi a. Tunge dik a, tunge diklo zawk? Hmeichhe pawngsual hi thil dik a ni em ni? Pawngsualtu thah chu thi sual a ni em ni? Court chuan eng rorelna pawh nei se, ka thil tih kha keichuan thil dik tak a ni ka ti tlat ang. KA taksa hliamte hi chu kar lovah a dam mai anga, mahse ka thinlung hliam erawh ka damchungin a reh thei tawh lovang. Hmeichhe tamtak pawngsual lo tawk tawh te, sawichhuak ngam lova zep te, hrehawm taka nun hmang mekte in awm anih chuan hei hi ka hrilh a che u, kan beilet thei a, kan dolet thei a ni. In tan ka awm reng anga, in tan ka ding ang." tiin a sawi a ni.

Mary thusawi lai video chu Zoram pumah a viral nasa hle a, youtube lamah leh facebook lamah pawh entu an thahnem hle. Mi tamtakin an khawngaih a, tantu pawh a nghal hle bawk. Veng thenkhat nuho phei chuan kawng an zawh phah hial a, nuar tamtak an awm bawk a ni. Police te lam erawh chuan pawngsual ai mah chuan an police pui David-a thi ringawt chu an buaipui a, thudik tak chhuihchhuah tumin hma an la nasa hle.

******************

A tuk zanah chuan Mary chu hotel ah a awm mek a, darthlalang hmaah chuan a thu a. A awma hliam awm te chu powder hmang chuan a han ti reh a, chutih lai chuan a pasal Robert-a a lo lut a. "I haw dawn lovem ni?" tiin Mary chuan a lo zawt a. "Aih, hetah ka riak ve ang." tiin a pasal chuan a lo chhang a.

"Engvangin maw?"

"Engtin nge ka kalsan theih ang che?" Robert-a'n a tih lai chuan Mary chuan, "Mahnia awm ka duh a ni." a lo ti vat a. "Mahse MAry.." a sawi zawh hma chuan Mary bawk chuan, "Robert, khawngaihin...a chhan pawh i hriat kha. Khawngaihin kal tawh rawh.." a tih takah chuan Robert-a pawh chuan, "Awle." tiin a haw san ta a.

Robert-a kal hnu chuan Mary phone chu a rawn ri a, a lawyer Benjamin-a a lo ni. "Hello, Ben.." a han tih chuan, "Mary, news kha en vat teh." tiin Benjamin-a chuan a rawn chhang nghal a. Mary chuan TV chu a on a, news chu a en ta a. News ah chuan reporter pakhat hian, "Mary Rinsangzuali pawngsual chungchang a kan thu dawn hnuhnun ber chu hei hi a ni e, Inspector David-a te lam chuan lawyer atan Mizoram Criminal Lawyer no. 1 Lalremruata an bia nia hriat a ni. Hriat theih chinah Lawyer Lalremruata hian chakloh a la nei ngai lova, tu lawyer mahin an la tlawm ngai lo. Tunah media hmaa a thusawi i lo ngaithla ang u." a rawn ti zat zat mai a.

Chutah Lawyer Lalremruata chu a rawn lang a, "Inspector David Lalmuansanga hian dikna a hmuh hma chu kan beilet zel ang." tiin a sawi a. Mary chuan, "Tunge hepa hi?" tiin a lawyer chu a zawt a. Bena chuan, "Lawyer thiam tak a ni, evidence zawng zawng pawh a sawi bo vek thei. Phai ah pawh lawyer hna zu thawk tawh ngat ania, a tawrh hlelhawm khawp ang. Dawt emaw, thudik emaw...dawt pawh thudik ah a chantir thei a, thudik pawh dawtah a chantir thei." tiin a rawn chhang a.

"Mahse hnehna chan nan chuan proof angai ani lawm ni? Kan proof neih zawng zawng kan pe tawh a, David-a chi(semen), a DNA leh thildang te pawh. Hei hi chu Open and Shut case a ni tih a chiang renga, enge awmzia?"

"I sawi dik alawm, Mary. Mahse he mitthi hi Police Inspector a ni a, media te hian an TRP tih san nan police department te hi an target tlat a ni. Evidence an siamchawp thei, a nihloh pawhin lawyer Remruata puihna hmang hian evidence zawng zawng an thai bo vek thei bawk."

"Anih chuan enge...kan hlau ang maw? Kan tlanchhe dawn tihna em ni?"

"Kan fimkhur angai, Mary. Rungleng khua Sub-Inspector pakhat Alfred Zothanpuia chu he case chhui tur hian an ruai a, nichin lawk khan kan inbe fel zo chiah."

"Mahse, ani pawh police ve tho a ni sia?"

"Police dang ang a nilo, sum duh tak a ni. Zanin hian a rawn hmu dawn che, advance atan cheng nuai 25 chu ka pe tawh."

"Anih leh chu SI chuan a thusawi thlak leh daih tase?"

"A ngam bik lovang, thamna a la angin kan khing let daih thei ve tho alawm."

"Mahse i tellovin engtin nge ka hmuh theih ang?"

"Court lam te nen pawh kan inbia a, Lawyer Remruata chuan naktuk zing dar 10 ah evidence a submit dawn tiin min hrilh a ni. He case hi a serious ania, i fimkhur angai."

"Mahse BEn.."

"Mary, ka hnathawh mek hi a pawimawh zia i hriat kha"

Mary chu a maimitchhing vang vang , "Awle, a tha e. Chanchin min rawn hirlh zel ang che aw..." a ti a. Chutah door bell a lo ri a, "Lawk aw, Ben." tiin kawngka lam chu ava pan a. Kawngka a han hawng chu tlangval hmeltha tak mai, ft 5'10 vela sang, ngo lampang leh hmel nelawm tak mai hi a lo ding a.

MAry chuan tunge a nih  ahre nghal, chu tlangval chu tudang nilovin he case chhui tura an koh, Renglung tlangval, Sub-Inspector Alfred Zothanpuia ngei a ni. Mary chuan a phone chu pe in," Kha, Bena nen kan inbe mek, be rawh." a ti a. Inchhungah chuan Alfred-a chu a lut a, phone chu a la a.

"Aw ka pu?"

"Pawisa kha a lo lut em?"

"Hehe, ka hmang zo vek tawh. Mahse kha te chu advance chauh ala nia, ni lawm ni?....Khawnge i awm reng reng a?

"Hna pawimawh vangin ka chhuak lawk a, nakinah kan inhmu dawn nia."

"Lo let vat rawh aw...hei Pi Mary hi i chhanchhuah hram angai awm si a." tih pah chuan Mary chu a han en zeuh va, Mary chuan mak tih hmel tak hian a lo en hu mai. "Phone kha han pe teh." Bena chuan a rawn ti leh a, Alfred-a chuan phone chu a pe let leh a. "Ben, kan inbe leh dawnnia." tiin phone chu Mary chuan a dah a.

Alfred-a chuan meizial a phawrh a, tan a han tum ringawt chu Mary chuan a lo dang a. Inthlahrun hmel tak hian, "Ihh...meizial hi ka ngai thei lo lutuk a. CHubakah he room ah hian meizial zuk an phallova..." tih pah chuan inchunga fire sprinkler chu a kawk a. Alfred-a chu thutthlengah a lawn a, fire sprinkler chhunga battery chu a phawi ta daih mai.

A rawn chhuk leh a, "THEIH LOH..PHALLOH tih tawngkam hi keichuan ka hua, ka duhlo. Engpawh chu nise, engkim hi kan fimkhur tlan vek angai a ni tiraw?" tih pah chuan a nui suk a. "Khatiang vang leka dan zawmloh kha pawi tihna i nei miah lo em ni?" tiin Mary chuan a lo zawt let a.

"Dan te chu a kal kalin kal rawh se, keini pawh kan kal kalin kan kal zel mai aniang chu, ngaihtuah vak angai lo. Pawisawilo te mawhpuh an nih thinna ramah kan awm tlat alawm, pawngsual a thlen pawhin hmeichhe nasat vang, a incheina dikoh vang tih ten puh mualpho talh kan tum zel chu ania. Kan hlutna inthlauh zia i hria em? Nang nge kei hlu zawk?" tih pah chuan sikret chu tan a han tum a.

Lighter a hmet alh chiah chu TV ah chuan meizial thatloh zia an fakna chu a rawn chhuak hlawl mai, "Khai a...mood ava ti nguai veleh.." tih pah chuan TV chu a off a. Mary chu a en leh a, "Hetiang hian alawm kan thil tih sual chhete pawhin kan nun a ngawng theihzia min hriattir ni." a han ti leh a.

"Ni e, a tawpah duhthlanna thalo tak min neih tir thin." Mary chuan a lo ti a. "I experience atangin em ni i rawn sawi ve a?" tiin Alfred-a chu a han nui suk a. "Khawngaihin thu rawh.." tiin Mary chuan thutthleng chu a kawh hmuh a, an thudun ta a. "Eng information nge police te chuan Remruata chu an pek dawn a?" tiin Mary chuan a zawt a.

"Ka hrilh vek ang che." tih pah chuan Alfred-a chuan a bag chu dawhkanah a dah a, bag chhung atang chuan thlalak tamtak hi a rawn la chhuak teuh mai. Dawhkanah chuan  a rem khat dul mai a, chung thlalak te chu tualthahna hmuna hnuhma a lak hi te an ni. Thalak pakhata silai chu a kawk a, "Nirbeek Revolver...32 caliber, mu 6 awm, 15 meter range a ni. Vawikhat hmeh puahna kha chu hlauh vang pawh a ni thei e, mahse vawihnih hmehpuahna hi chu...phuba lakna a ang khawp mai." tiin thlalak dang chu a kawk leh a.

Lungawiloh hmel tak hian Mary chuan, "DAvid-a thil tih kha ngaihdam tlak a nilo, a thiltih avang khan vawi 100 pawh that mah ila thilsual a ni lovang. Ka room ah a lo kal a, tichuan kawngkhar a kalh a. BAngah min nam bet a, min fawp vak vak a. DArthlalang hmai keh dawt khawpin ka lu chu min tauh tir a, tichuan khumah min bawhbet a. Kut min thlak vak vak hnuah a duhtawkin min khawih ta a, mahse khum bula landline telephone chu ka ban thei hlauh va. Tichuan a lu ah chuan ka chhu vak a, khum atang chuan a tla ta a. A rawn tho leh tur chu khum bula pistol chuan a awmah ka kap a, a la rawn tho cheu va, ka kap nawn leh ta a ni." tiin a mittui chu a luang zawih zawih mai.

Alfred-a chu a ngawi vang vang a, "Coffee in ang hmiang.." a ti daih mai. A tho thut a, choka lamah chuan ava kal a. Coffe Machine chhung chu a hawng a, "Coffee Machine ami hi chu a tui ka ti ngailo." a han tih chhunzawm zat a. "Information min pe dawn angin Bena khan a sawi si a.." Mary chuan a han ti leh a.

Ngaihsak loh hmel tak hian Alfred-a chuan, "Nia...ihmaw..coffee hian bawnghnute rawng hi a thlak nge bawnghnute hian coffee rawng hi a thlak zawk le? Ka naupan lai atangin ka hre chak tawh, he case hi chu...ohh... he coffe hi ka tihna..he coffee hi chu a tui ngei ang." tih pah chuan gas-a coffee a chhuan lai mek chu a en a.

"Chu chu ka zawhna  anilo." tiin Mary chuan a lo vin deuh lek lek mai. Alfred-a chu a khi leh sak a, "File kha en la, khami chhunga ka thuziah khan i nun zel dan tur chu a hril ang." tiin a chhang a. "Nun zel dan tur a, chungte chu court lamin min rel sak ang chu." tiin Mary chuan a hrethiamlo kher mai.

"Court-a thu in va thehluh ve te kha chu information mai chauh ania, keiin ka thehlut ve a nih erawh chuan proof a ni thung ang." tih pah chuan coffee chu Mary hma zawna dawhkanah chuan ava chhawp a, "In vat rawh, a dai hman ange." tiin Mary zawnah tak chuan a thu a.

"Enteh ka pi, a awlsawm lutuk. Remruata chu police lamah a tang nasa dawn chiang sa a, chubakah police te pawh hian DAvid-a hi an police pui a nih avang hian an department mualpho loh nan he case hi an ngai serious hle bawk. Police te hi Remruata thu thu in an awm dawn, an tlawn nasa dawn lutuk." tiin Alfred-a bawk chuan  ahan ti leh a.

Hlauhthawn hmel tak hian Mary chuan, "Mahse...thudik te chu an thlak danglam thei dawn em ni?" a han ti leh a. "Thudik anihna lai tak kha an thlak danglam ang, he case hi ka rawn kal hma khan ka en deuh thuak thuak a, thil pakhat lek hriatthiamloh ka nei a ni. Company ah reception angin kum 5 chhung i thawk a, mahse thawk leh khatah company owner nen in innei thut a..." tiin Alfred-a chuan a khabe a han nuai nauh nauh a.

Mary ngaihdan a nilo kher mai, "Information min pe tura lo kal nge i nih min dawp tur zawkin?" a ti khur khur a. "Pawisa hlawh tura lo kal ka ni, ka pi. Dik takin min chhang la ka duh, kan pahnih tan pawh a tha zawk ang." a han ti leh a. "Robert-a hi ka hmangaih vanga nei ka ni." tiin Mary chuan a chhang a.

"Mahse Robert-a hian a hmangaih ve che em?"

"Enge i sawi awmzia?"

"Aaa..englo ania. Tualthah thubuai awrh tir i ni a, mahse nangchuan pawngsual case i ti tlat mai si a. I pasal Robert-a lah chuan statement pakhat pawh a siam der si lova, mipui hmaah a support tlat si lo che a.."

"Robert-a hian mipui mit hmuh a min support kher angailo, chuan kha cheng nuai 25 i account-a rawn lut pawh kha Bena pawisa a nilo bawk."

Alfred-a chu a han nui leh suk a, "Engvangin nge i nuih a?" tiin alo zawt vat. "Mipui hmaah Robert-a hian a support che a ngai lo..umm, a tha e. Mahse, mipui hma nilovah tal chuan a support tur che anilawm ni? Kha..hei hi en teh." tih pah chuan thlalak thenkhat chu phawrh lehin Mary chu a entir a.

"Heng thlalakte hi nikuma events thenkhata in kalnaa in lak te a ni..he thlalak ah hian in inhrilhru lai emaw, in inkuah lai emaw, ku tin invawn sak lai tlem azawng tal awm se chu a hmangaih ve ngei che a ni tih pawh kan awih ve thei mahna." a han ti leh a, Mary ngaihdan chu a ni tawh lo khawp mai.

"Kuta invawn, inkuah..chutiang thil ho lutuk...thudik chu maw, ka nun hi private taka hman ka duh a ni." tiin a chhang a. "I pasal pawh nangmah ang tho hian a nun private takin a hmang ve em?" tih pah chuan thlalak pakhat chu a hmuh tir leh a. Chu thlalak ah chuan Mary pasal, Robert-a chu mipa dang pa 5 vel nen an lo inkuah a.

"Engemaw diklo chu a awm a ni.." tiin Alfred-a chu a han ner deuh nung a. Mahse Mary chuan, "Party na a an lak a ni ngei ang, an rui anga...tiang hian thla an la ta mai aniang." tiin a chhang ve tlat mai a. "Heh...keipawn a tir chuan i sawi ang chiah khan ka ngaihtuah ve tho. Mahse ka chhuichiang a, he thlalak hi Robert-a London-a lehkha a zir lai ami a ni a, he thlalak hi ka trace a, tichuan dating site ah ka trace chhuak a ni. Chu dating website lah chu mipa leh hmeichhe inngawihzawnna lam a nilo lehnghal, mipa leh mipa inngaihzawnna zawk a ni." a ti ta mai a, Mary chu a meng phawk hle mai.

ZAwite hian Alfred-a chuan, "Anih chuan...Robert-a hi mawngkawhur em ni?" a han ti chiah chu vin zet hian Mary chuan, "Ngawi rawh..i huang chin i pel ange. Enge Robert-a leh he case hian inzawmna an neih ve?" a ti vak a. Alfred-a chu a han thu tha sauh sauh a, "Ka pi, heng information te hi SI chauh ni chungin ka nei thei a, Lawyer Remruata phei chuan a nei awlsam dawn lutuk. Evidence engpawh a hmu a nih chuan court ah nangmah tihchhiat nan hmanrua ah a hmang dawn, in inneihna chungchang pawh hi  a sawi ngei ang." a han ti leh a.

"Nilo chungtiang a theih loh." Mary chuan a lo ti vat a, mahse Alfred-a chuan sawi zawm zelin, "He in inneihna ah hian hmangaihna pakhat mah a tello, pawisa vang chauh a ni. Robert-a hi pawisa vanga nei i ni, i hmangaih lo." a ti ta siah siah mai. "Ngawi rawh...a tawk." tiin Mary chu a thinrim kher mai.

Mahse ala sawi zo hauh lo, "I pasal hian hlimna a pe lo che, dinhmun zawk a ni a pek che. Chuvang chuan a ni lawmni, ngaihzawng dang te pawh i neih?" a la ti ta deuh deuh a. "A tawk, ngaihzawng ka nei emaw neilo emaw, hmeichhia in anilo kan tih chuan a nilo a nimai. Chuan he thil hian a ti chiang bawk ang.." tiin a hrawka hliam chu Alfred-a a hmuh tir a.

Alfred-a chuan dawhkan a beng vak a, a ding hluai a, "Helai hmunah hian pui tur che a lo kal ka ni a, Robert-a hi gay a ni ngei a ni tih pawh ka sawi tel bawk. Ngaihzawng dang i neih chungchang pawh ka sawi leh a, mahse nang chuan a theih loh, a nilo i ti amaw? Anilo tih mah la Remruata chuan court ah a ngaipawimawh dawn hlek lo, i ngaihzawng neih chungchang thlengin a sawi dawn. Mawilo tak takin a sawi che anga, awlsam takin a chak ang." a ti hrep mai.

A han ngawi leh vang vang a, zaidam tak hian, "I hriatthiam theih nan khatia ka vin hrep che kha a ngai a ni, ka pi...thudik tak chu kan sawi tawh dawn em ni?" a han ti leh a. Mary pawh a thaw huai mai a, a thutna atang chuan a thova. Alfred-a chu enin, "Alfred, nupui i nei tawh em?" tiin a zawt a.

"Aih, neilo."

"Nihleh bialnu i nei em?"

"Rempuii tih hmingpu nen chuan whatsapp ah kan inbe ve thin a, mahse kan inbe leh tawh ngailo."

"Inngaihzawnna leh inhmangaihnaa thil nuihzatthlak deuh chu maw...kan beisei, kan suangtuahna leh a tak ram hi a ni. Kan suangtuahna te chuan min ti thinur thin a, a tak ram erawh chuan min ti na thin thung. Ka pa kha a thih khan ka thinurin ka lungawilo hle a, ka nu lah a natna te chu ka hnem zo silo, chu chuan min tina thin a ni. Mahse Robert-a ka tawng ta a, kha ta tang khan ka danglam a ni. Tichuan kan innel telh telh a, engtik laiin nge kan inlaichinna kha  athuk tak em em ka hre tawh lo. Vawikhat chu inneih puiah min sawm ta a, mak ka ti takzet. Mahse mak ti lo tur leh reilote hnua a dinhmun ka hriatthiam pui theih tur thu min hrilh a. Pawisa tam tak min pek tur thute, dinhmun sang tak min pek tur thute min hrilh bawk a. Hamngaihna chungchang a sawi tel miahlo chu mak tiin ka zawt a, ani chuan min hmangaih theihloh thu leh hmangaihna awmzia a hriatloh thuin min chhang ta a ni. Mahse engmah zep lova thudik a sawi ngam avang chuan ka ngaisang hle a, keiin ka lo duh em em bawk nen, engtik niah emaw chuan ka la inhmangaih tir thei em em ang tih rilru pu chungin ka nei ta a ni. Honeymoon pawh ka hmang ngei a, mahse room hranah min muttir a, ani erawh a thianpa nen an riakdun daih thung a ni."

Alfred-a chu a ngawi vang vang a, "Robert-a hi businessman a ni a, marketing a buai reng rengin a nun a hmang a. A tir chuan i thil hriat duh zawng a hrilh che a, a hnuah chuan i hriat duh zawng nilovin i hriat tur diktak a hrilh che a nih chu." a han ti a. Inthlahrun hmel tak hian MAry chuan, "Alfred, he case ah hian Robert-a hi tel ve lul suh se." tiin a dil a.

Alfred-a chu a han hawi kual a, "Aww..animaw..he room a Robert-a a awm velo pawh a mak hran love. Mahse a harsa asin, thiannu. Police station chhung iva luh chiah khan i chhungte chungchang zawng zawng an lo la khawm nghal vek a, tin DAvida i thah veleh he case ah hian i pasal chu a rawn inrawlh ve nghal a ni. Remruata chuan court ah in inneihna chungchang hi chu a sawi khawp ang. Pha buai vak duh suh, Robert-a hi gay a nih thu sawi mai rawh." a han ti leh a.

"Mahse ka sawi kha thudik alawm."

"Animaw...anih chuan Robert-a chu gay a ni tih hre reng chungin i then miahlo tihna ania. Remruata chuan Robert-a hi pawisa vang chauhva i neih a nih a ring nghet bur dawn, chu chu nimai."

"Chuan....enge?"

"Achang chuan zawhna hian zawhna dang chhanna a pe daih thin."

"Ka van hrethiam lo."

"Thiannu, Remruata hi awlsam taka lawyer a ni bik hleinem, a nupui hi Judicial Judge fanu ania. Engtin nge a bum a, engtin nge a thlem thluk erawh ka hrelo. Mahse an inneih zawh meuh chuan a nun chu a inthlak hlawk a ni ber mai, a hausa tulh tulh mai alawm."

"Anih chuan Remruata chuan a nupui chu sum vang chauhvin a nei tihna a nimaw?"

Alfred-a chu a nui leh huk mai, "Ni chiah e, khatia min zawh daih tawh tur alawm. Haha, Benjamin-a hian a hrilh fing tawklo che animaw...engpawh nise he case aia pawimawh hi a awm dawn chuang em ni?" a ahan ti leh a. Chutih lai chuan Mary phone a rawn ri a, a lawyer, Bena alo ni reng mai.

"Hello."

"Tu emaw chuan kan thuruk hi a hre ru a ni."

"Enga? Engtin?"

"Ka hre biklo, mahse private message ka dawng a, WELCOME TO LUNGRENG tih number hriatloh atangin min rawn thawn a ni."

"Fimkhur ang che."

"Awle, Alfred-a nen chuan inla inbe mek em ni?"

Mary chuan choka lama coffee in mek Alfred-a chu ava en a, "Remruata laka hnehna kan chan theihna tur thil min hrilh a, mi fing tak niin ka hria." a ti a. "Awle, ka thlen veleh ka hrilh ang che." tiin Bena chuan a lo chhang a, phone chu an dah ta a.

***********************

Intercom atang chuan Alfred-a chuan Hotel Reception lam chu a han phone a, "Pi Mary tan hian french fries leh fish curry aniang a, keichu fried rice animai..awle, hmanhmawh in aw.." tiin eitur chu a chah a. Mak ti tak hian Mary chuan, "Engtin nge ka duhzawng i hriat theih a?" tiin a lo zawt vat a.

"Investigation kan tih hian information chauh hi kan hriat tum ber a ni hleinem, a khawn a khawn khawm te a ngai ve alawm." tiin a chhang a. Ani chuan, "Anih leh engdang nge i hmuh chhuah?" tiin a lo zawt veleh a. "DAvid-a." tih ringawt chuan Alfred-a chuan a lo chhang a.

"David-a a?" Enge awmzia?" tia Mary'n a zawh chuan Alfred-a chu a khi suk a, "David-a nen hian engtia rei nge in inhriat tawh?" tiin a han zawt daih a. Mary chuan phur loh hmel tak hian, "Robert-a'n min hmelhriat tir a, kan company events atan police security incharge ah Robert-a hian a hmang thin a, hlawh pawh a pe thin." tiin a chhang a.

"Khatia corruption sawi mawi kher kha angai em ni? Thamna ti mai ta che..haha." tiin Alfred-a chu a lo nui a, MAry chu  ameng no lo kher mai. Alfred-a chuan ava pan hnai a, "David-a nen hian kum 2 chuang in inhre tawh tihna nimaw?" tiin a han zawt leh a, Mary pawh chuan a lu a lo bu nghat mai.

Alfred-a chuan a phone a phawrh a, video pakhat hi a hmet chhuak a. "Enteh, thiannu..hei hi Hotel Surveillance footage a ni a, David-a thihni ami kha a ni. A rawn thleng a, reilote pawh a nghak eih lo. I room kawngka ah a rawn lut tlang nghal a, kik pawh a kik hek lo. Chutah kawngka lah chu awlsam deuhin  ahawng nghal a, ilo nghak zawk te pawh a ang hial mai." a han ti deuh kher a.

"Kawngka kha ka kalh theihnghilh a ni." Mary chuan a lo ti hmuk mai. "FIR ah pawh tiang tho chuan a inziak, FIR-a tello..thildang i lak atang hian ka hre duh a ni. David-a kha chhun dar 1:25 ah a rawn thleng a, a rawn thlen hnu atanga darkar chanve velah chauh i that a ni. Nihleh khami chhung zawng khan, darkar chanve chhung zawng khan enge in tih? Enthil nge thleng? VAwi tam tak a pawngsual che tihna em ni? Nge ni a...reideuh a pawngsual zawk che?" tiin a zawt ta sak sak mai a.

Mary thinrim chuan, "Alfred, i tawngkam kha fimkhur rawh." tiin a vin tuar mai. Hlauh loh hmel tak hian Alfred-a chuan, "Heh..court ah chuan i thinrimna kha finfiahna ai chuan a hlu lo daih zawk ang, awmzia a nei lo." tiin a lo chhang leh a. "Finfiahna a? Eng finfiahna maw?" tiin Mary chuan a lo zawt leh hu mai.

Nathana chuan thlalak pakhat a phawrh leh a, "2010 Hrangbana College Annual DAy Function..hei hi nangmah i ni a, a sir bera ding hi...chuan heta mipa, a sir lehlam kil bera ding hi DAvid Lalmuansanga, i mi thah ngei chu a ni." tiin a kawk ta chat chat mai. Hriatthiamloh hmel tak hian Mary chuan, "Chuang enge? Hetiang College function te chu tupawh, college mi nilo te pawh an lo kal fo thin alawm. Thlalak ho naah kan lo tel dun animai a, kan inhria tihna a ni hleinem." a lo ti a.

"Chutiang lam ka sawilo, David-a chungchang ka zawh che khan a tir khan i hriatloh thu i sawi tlat a. Hetiang chiah hian Court ah Remruata hian a zawt veleh dawn che ania, illegal affair angin a chhuah ngei ang. Chuvang chuan inngaihzawnna in neilo a nih chuan dawt sawi kher a ngailo, i dawtsawi kha an manchhuak anih chuan thudik sawi leh chuan pawh a ngai tawh nang." tiin a lo chhang leh a, Mary chu a mangang ru tawh khawp mai.

"Khatianga thu tawpna i siam anih chuan ka ngaihtuahna te, ka feelings te hlutna hi engtin nge ni ta ang?"

"Hlutna te chu awm lutuk e, thudik min hrilh a nih chuan he buaina lak ata hi ka chhanchhuak thei ang che anga.." a tih lai chuan inthlahrun hmel tak chuan a nui suk a, "Chuan...ka pawisa duhzat ka dil leh bawk che anga." a han ti leh a. Mary chu a ngawi ta vang vang a, tichuan a chanchin chu a sawi tan ta a.

******************

Robert-a chu ka nei ngei a, mahse ka bulah a awm ngai lo. Ka nun chu a ruak em em a, khatia mal taka hun ka hman lai khan vawikhat chu David-a hi ka hmu hlauh mai a. Ka hmuh tirh phat khan kan nunhlui te ka hrechhuak nghal vek a, tichuan kan in hmu chho ta zel a ni. Han sawi vak dan pawh ka thiam lo, ka chungah a fel em em a ni tawp mai.

Zawi zawiin ka ngaina tial tial a, he ka nunruak tak ah hian Davida chuan hmun a chang ngei a ni. Ka thian, ka thian tha tak a ni. Engmah zawhna min zawt ngai lova, ka ring em em bawk. Tichuan Renglung khua a Trip neih ka tum thu ka sawi khan kal ve a duh thu a sawi a, engmah zawhna ka zawt lo. Khami ni pawh khan diktak chuan ka lo nghak a ni, chuvang chuan kawngka pawh kha ka kalh lo a ni.

A rawn kal ngei a, kan inkawm a. Ka thian tha tak angin ka ngai a, mahse thian ang chauh chuan min lo en hauh lo tih ka hre ta a. Min khawih thui telh telh a, achang leh min zut a. Ka thinrim chuan chhuak turin ka ti a, mahse chhuak ta mai lo chuan kawngka chu a kalh hmak a. Tichuan ka hmui rawn hupin darthlalang hma keh thawt khawp chuan ka tukhum chu min tauh tir a, ka taksa a duh lai lai chu a khawih a.

Hun rei tak chhunga kan inthianthatna chu sex vang chauhin a tichhe ta vek a ni, sual let ka tum a, ka tal nasa. Ring takin ka au va, mahse ka ka min hup sak zel si. Ramsa ang mai a ni, rapthlak tak a ni. Ka thawmhnaw te chu a pawt thler a, tichuan a duhtawk chuan min mutpui ta a. Ka thian, ka hmangaih em em chuan min pawngsual ta a ni.

****************

"Thudik i hre duh tiraw? Hei hi thudik tak chu a ni." tiin Mary mittui chu a luang zawih zawih mai. "Davida nena in inthianthanna hi midang hre ve an awm em?" tiin Alfred-a chuan a zawt a. A mittui hruk pah chuan Mary chuan, "Bena ania, Robert-a a ni leh a, chuan tunah nang.." tiin a lo chhang a.

"Kha college photo soft copy kha in lamah a awm a, naktuk zingah ka lo delete ange. Lungngai suh, i college life engmah ka sawichhuak lovang. Nangpawhin tumah bulah sawi lo la, tuna kan buaipui ber tur chu David-a'n  apawngsual hma che khan engthil nge a tih tih hi  ani." tiin Alfred-a chu a inngaihtuah vang vang a.

"Kan thei ang, kan thei em em ang.." tih pah chuan dawhkan lam chu ava pan a. "FIR kha chuan lu a hliam ang khan a sawi a, i lu i tauh chiah khan nikhawhrelovin i awm a. Medical Certificate ah chiang deuhin kan ziah tir anga, i harh chhuah leh chiah khan i taksa chunga a lo awm a. Tiang chuan ziak ila, a tha angem?" tiin FIR chu a han en leh a.

"Lawyer Remruata hian a awih dawn em ni?" tiin a lo zawt vat. "Dawt sawi dawn chuan thudik thaibo a ngai thin alawm, mahse thudik sawi tur chuan huaisenna i mamawh thung. A chang chuan thudik azirin dawt sawi ngaih hun te pawh a awm a, a in ang lo thin, a diklohna a awm lo bawk. Ahmasa ber ah chuan i rin phawt angai, chumi hnuah Remruata chu kan buaipui zawk dawnnia. E..chuan thil pakhat, idea pahnih lai ka pe tawh che. Idea pakhatah khan cheng nuai 20 zel ni tase, a vai chuan nuai 40 a nih chu." Alfred-a chuan a han ti leh zung zung a. Mary chuan mak ti tak hian, "Engmaw?" a lo ti hu mai. "Tlai khaw hnuah ka hlawh hi thlak danglam hlek suh, tunah phei chuan Bena a awm lo lehnghal." tiin A;fred-a chuan a lo chhang a.

**********

Reilote hnuah chuan an eitur chah pawh a lo thleng ta, an pahnih chuan an eidun mawlh mawlh a. Mary chuan a phone chu a khawih nauh nauh a, chutah Bena chuan video hi a rawn thawn a. Mary chu  atho nghal nalh mai, a han kal hla deuh a. Video chu a en a, video ah chuan tualthahna thlenna hmu, Crime scene chu a lo lang a. Police duty te, security te chu an lo lang bawk a, a ruka lak a ni.

Chutah Bena message a lo thleng a, "Security a tight lutuk." tih hi a lo ni a. Mary chuan thawn let in, "Engpawh nise, hna chu kan zo fel tur a ni." a va ti ve leh a. "A awlsam lo khawp mai." tiin Bena chuan a rawn reply ve leh a. "Khawngaihin Ben, ka innghana awmchhun i ni." tiin Mary chuan ava thawn let leh a, phone chu a ak ta a.

Megazine chhiar pah chuan Alfred-a chuan, "Tinge i ngawih reng a, thiannu?" tiin a han zawt a. "Ngatimah.." tih ringawt chuan a lo chhang a. Alfred-a chu a tho va, Mary bulah chuan ava kal a. Mary chuan whiskey glass ah chuan vur tlang pathum a dah a, whiskey chu thli in a in a. "I sawi duh chu sawi mai la.." tiin Alfred-a pawh chuan zu chu a han thli ve a.

"Alfred, kawngka inlah tlat chhungah thil la duh ta la, engtin nge i lak ang?" tiin a zawt daih mai. Alfred-a chu a khi suk mai, "A awl lutuk, engzat nge ka hlawh ang?" a lo ti nghal vat. "Engzat nge i inchhiar a?" tiin Mary chuan a lo zawt let a. Alfred-a chuan a kutzungtang pathum chu hmuhin, "Maktaduai thum ka tihna anilo, nuai 30 ka tihna zawk a nih hi." tiin a nui var var mai.

Chutah a rinloh lutukin Mary chuan, "A tha e." a ti ta mai a. Alfred-a pawh chu a phu zuk mai, "Ummm a nih chuan chu room chhungah chuan thil tha tak a awm a ni ngei ang maw..." tiin a khi var var mai a. "Min hrilh rawh le?" Mary chuan  a han ti a. Alfred-a chuan meizial chu phawrh pah chuan, "Sikret kan tan a, lighter kan hmeh alh veleh fire alarm a ri anga. Alarm a rik meuh chuan mipuite mangangin an tlan darh anga, chutah tak chuan kan va lut zeuh mai dawn lawm." a han ti a.

Chuveleh Mary chuan a phone a phawrh a, message a type nghal zat zat mai. "Enge thildang i la hriat duh, min zawt zel rawh. A discount tawh dawn che nia..." a tih lai chuan a phone a rawn ri a. Alfred-a chuan phone chu a la a, "Hello..aw...eng case maw? Mibo case.....Kumkhat kal ta ami kha maw? Awle, ka buai deuh a, ka lo be leh ang che." tiin phone chu a dah leh a.

Alfred-a chu Mary lamah chuan ava let leh a, "Tihpalh lutuk...enge kan sawi lai kha?" a han ti leh nghal bawrh bawrh a. Mary chuan, "Eng mibo case nge ni a?" tiin a lo zawt a. "Aaa...cse dang daih alawm, kan case hi a pawimawh zawk." tiin a lo chhang a. "Kum khat kalta i ti tiraw? Engthil nge a?" tiin Mary chuan a lo zawt leh a.

"Tlangval pakhat mawle, rin loh lutukin beidawng leh rilru na takin ka siam a. Tunah chuan kha case kha chhuichhuah lohvin a ral ta mai mai si a, a pawi ngawt mai." Alfred-a chuan a han ti a. Hriat chak hmel tak hian Mary chuan, "Tunge chu chu?" tiin a han zawt leh a. Tichuan Alfred-a chuan chu tlangval a tawn dan te, case an chhui zui dante chu a sawi ta a.

**********************

Police Station-a kan titi ho lai chuan tlangval pakhat hi a lo lut a, mask a rawn vuah a. A thaw a hah hmel em em a, a kal ngil hleithei lo. A rawn khuh lut vak vak mai a, a tawpah phei chuan chhuatah a let tawp mai. Midang ho chuan an zawn a, thutthlengah chuan an mut tir a. Chu tlangval, la naupan hmel tak chuan lehkha hi a hum a.

Chumi ni chu ka vawikhat hmuhna a ni a, a chauh hmel takzet. Mahse a mitmengah khan manganna a nei tih ka hmu thei a, chiang takin a lang thei a ni. Tichuan a lehkha ken chu kan han en a, a pa bo thu rawn report tura lo kal hi a lo ni. Chumi ni atang chuan nitin mai hian a lo kal a, a ngai bawk a rawn sawi leh thin.

Nikhat chu chu tlangval chu a lo kal leh a, a thinrim a ang nasa ngei mai. "Ka pa  abo mek a ni a, mahse tuman min ngaihsak tha duh lo. Nitin ka lo kal a, mahse awmzia a awm der bawk silo. Khawngaihin min pui rawh u, hetiang ringawt hi chu a diklo a ni." tiin a lo tap lek lek mai. KA va kal phei a, hlauh hmel tak hian min lo en a.

"Helai hi Police Station a nih hi, engvangin nge i auh vak vak a?" ka va tih chuan a mitmeng pawisawilo tak mai chuan min han melh ran a. "Ka pu, nithum kal ta khan ka pa a bo a. Mahse tumah hian min ngaihsak duh bawk silo, min pui hram teh ka pu." tiin min dil ngawih ngawih mai a.

"Hming?"

"Ihh...Proffesor Pu Lalfakawma.."

"Nilo..i hming zawk alawm ka zawh che?"

"Rinzuala."

"Um Rinzual...kan district ah hian Police Station pali a awm a. Case pending 200 chuan a awm a, mibo case 25 chuang a awm mek bawk. Chung zawng zawng buaipuitu chu keini hi kan ni a, hun kan mamawh ve a ni. Engtin nge kan ngaihsaklo tia i sawi theih zawk a? Complain i thehlut tawh em?"

Constable pakhat lo kalin, "FIR pawh a thehlut tawh, Sir." tiin min rawn hrilh a. "Um, va haw la, thuthar kan hriat veleh kan lo be dawn che nia." ka ti a. "Mahse ka pu.." a tih lai chuan, "Va haw rawh...kan lo be dawn che nia." tiin ka hrilh leh a. Hreh hmel tak chuan a inher a, min en zui leh vawng vawng a, tichuan a haw ta a.

A kal hnu chuan, "Tinge maw mask a vuah char char le?" ka han ti nuah nuah a. Constable chua, "Sir, cancer natna a vei mek a." a rawn ti mauh mai. Rinzuala pa bo ta pawh chu han ngaihtuah chhunzawm em em pawh ka tum chuang lo, mahse constable hnen atang chuan Rinzuala pa hian resort lian tak a nei tih ka hre ta a.

Chutiang khawpa hausa an ni tih ka hriat takah chuan kei corrupt ve tak hian case chu ka buaipui ta nge nge a, Rinzuala nen chuan kan inhmu leh ta a. An resort ah chuan kan inhmu a, "Hei hi in resort em ni?" tiin ka han zawt a. "Aw ni e." tiin min chhang a. "Property lamah buaina te a awm em?" ka han tih chuan a hriatthiamloh hmel kher mai.

"Ka sawi awmzia chu maw..a chang chuan property lian tak te phei hi chu a then chuan an enkawl huam lo thin a, a then phei chu an rilru a buai a, an in tihhlum phah hial thin." ka han ti leh a. "Ka pa hian tlanbo nachhan tur a neilo, mahni inthat tur khawpin a dawihzep lo bawk. Tun thlenga ka la damna chhan pawh hi ama min fuih vang te, min enkawl vang te a ni asin." tiin min chhang a.

"Anih chuan tuten emaw an that pawh a ni thei." ka han ti chu a mengphawk chiang ngei mai. "Aaa..a thi ka tihna nilovin, thil awmthei mai ania ka sawi. Enteh Rinzual, kawng awmchhun chu maw, pahnih chiah a ni. Pakhatnaah chuan superior te order hmangin ania, a pahnihna chu thamna a ni. Order kan hmuh theih nan chuan kum khat emaw, thla tamtak angai ngei ang. Chutah pawh hna chu tha takin zawh fel ani angem pawh hriat loh, keichuan a pahnih hian pawi tihna ka neilo ve ve, a tha ve ve ka tia...engtin nge min chhan dawn?" tiin ka phakar chu ka han chhuah leh tan ta a.

"Engzat nge niang, ka pu?" a ti ta nge nge a. "Nuai 10.." ka lo ti a. A ngawi vang vang a, "Cash in nge a cheque in?" a ti ta mai a. "A theih a nih chuan a cash in aw, a cheque pawhin a pawi chuang lo." tiin ka lo chhang vat a. "Pawisa chu ka lo buaipui ange." tiin min chhang ta a. Tichuan Rinzuala chuan apa bo case chhui nan chuan pawisa cheng nuai 10 min pek a tiam a, keipawh chuan case chu ka bawihzui ta a ni.

Rinzuala te inah chuan kan kal a, "Khami ni khan Biak In sak that chungchang vel vangin Collector hmu turin kan kal vek a.." Rinzuala te awmpuipa chuan a han ti a...

"Chuan..?"

"Tlai ka rawn haw leh chuan a car chu a awm ngei a, ka pu chu a lo haw tawh ngei a nih ringin keipawh inchhungah lutin ka room lam ka pan ve nghal ta mai a ni." tiin min chhang a. Pu Fakawma car chu ka han enchiang a, a sir a rang nasa kher mai. A side glass a uai hnawp bawk a, "Engati nge car hi?" tiin Rinzuala chu ka zawt a.

"Ka hrelo, ka pu." tiin min chhang a. Pu Fakawma room chu kan han check leh a, Rinzuala chuan phone pakhat hi min rawn pe a. "Ka pu, hei hi ka pa phone ania." a han ti a. "Phone chu hetah, a roomah a awm a, mahse a car chu pawnah a awm bawk si a, a neitu lah a bo daih bawk si. A tha e, passowrd chhu la han hawng teh." tiin Rinzuala chu phone chu ka pe leh a.

"Ka hrelo." a lo la ti zui. Constable Sawma bulah chuan, "Lo unlock tum ang che u." tiin ka pe a. Pu Fakawma nupui, Pi Mawii chu ka han en a, "Khami ni khan khawnge i awm, ka pi?" tiin ka han zawt veleh a. "Chemo session la turin kan kal a..kan haw meuh chuan dar tlai 5:30 a ri tawh. Ruah a sur nasat em avang chuan ka khalh muang em em a, kawnglakah nula pakhat hi kan hmu a, kan phur tel ve bawk. Khanu hming kha Cindy niin ka hria." tiin min chhang a.

"Cindy a? Tunge chu chu?" tiin ka zawt a. Rinzuala chuan, "Ka hrelo, khami zan khan kha nula, Cindy kha amah chauhvin ruahsur hnuaiah khan a kal a, chuvang chuan ka nu hian  a phur ta a ni." tiin min chhang a. "Tinge chutia hmelhriatloh in phurh rikngawt a, khawthim hnuah phei chuan a him lo asin." ka lo ti a.

"Misual a nih ka ringlo, nula fel hmel tak a ni. Hotel ah drop turin min ti a, kan thleng a...chuan min hrilh lovin a lo bo leh daih a. A insawi dan chuan trekking ti tura kal ania, kawng a bo va." tiin min chhang leh a. Chulai hmun, nula Cindy an phurhna hmunah chuan kan va kal leh ta a. "Hetah hian, helaiah tak hian min lo phar ding a." tiin Rinzuala chuan kawngpui chu a kawk a.

Chutah phone a rawn ri a, mak tak maiin kan mi zawn mek, Pu Fakawma phone a ni tlat mai. Phone chu kan han pick up a, "Hello." ka han tih chuan phone ami chuan, "Hello ka pu, SBI Bank atangin ania. I loan cheng nuai 60 kha clear a ni tawh e, clearence certificate lam turin ilo kal dawnnia. Ka lawm e." a rawn ti ta mai a. "Sawma, call detail zawng zawng chhui nghal ang che u." tiin Constable chu ka hrilh a. Tichuan Rinzuala nen chuan kan inphur a, bank lam pan chuan kan kal ta nghal a.

************

"Loan period hi kum khat dang ala awm a, mahse hmanhmawh thil avangin a khar thu a sawi a ni." tiin bank manager chuan file chu min pe a. "Vawi khatah nuai 60 hi a pe nghal vek em ni?" tiin ka zawt a. "A account atangin nuai 11 a pe a, a dang nuai 49 te chu Chhanhima'n a pe a ni." tiin min chhang a.

Tunge Chhanhima chu kan hre leh ta tlat lo, Rinzuala ka zawh pawh chuan a hriat loh thuin min chhang a. Constable Sawma chu ka phone nghal a, "Thil pali tihtur i nei, pakhatnaah chuan tunge Chhanhima hi lo zawng chhuak ang che. A account hi Singapore based a ni a, chuan Pu Fakawma phone signal pawh trace bawk ang che. Location i hmuh zawng zawnga CCTV footage pawh la vek la, Pu Fakawma car detail, a dinna hmun apiang..a detail kimchang ka duh bawk ania. Kan area a police station zawng zawng ah Pu Fakawma thlalak thawn vek bawk la, veng tinah mibo poster siam ula, tar vek ang che u." tiin ka hrilh a.

Tichuan hnuchhui chu kan chhunzawm ta zel a, nitin mai chuan Rinzuala chuan ka hlawh tur pawisa thahnem tak min pe zel bawk a. Pu Fakawma phone pawh chu hacker ho chuan an unlock thei ta a, phone chu ka check nghal a. A phone camera a thlalak hnuhnung ber ka han hawng chu mel lung thlalak hi a lo ni a, chumi hmun lam pan chuan Rinzuala hruaiin kan kal ta nghal a.

Mel lung pawh chu ka hmu ta ngei a, thlalak nena ka han enkawp chuan a inang chiah chiah mai. "Ka pu, tinge hetah hian min hruai a?" tiin Rinzuala chuan min zawt a. "Thlalak hi en teh, hei hi i pa'n a phone a thla a lak hnuhnun ber a ni. Sawlai mel lung thla saw ala a, a hmanhmawh hle ni tur a ni. Anih loh pawhin a lak lai hian thil engemaw tak a thleng a ni ngei ang, a thlalak kha  afiah lo emai." tih pah chuan thlalak chu ka entir a.

"Eng thil nge thleng ang..helai hmun..engmah ka hrethiamlo." mangan hmel tak chuan Rinzuala chuan a han ti nang nang a. Kawnglai takah chuan a ding a, chutia a tawng mawlh mawlh lai chuan a poster ken chu lamlianah chuan a thlauh a. Kun hniamin a chhar nghal malh malh a, chutih lai tak chuan chak tak mai hian motor a rawn tlan thut mai.

Rinzuala chu a su hman thelh a, ka lo pawt sawn hman hlauh. A khuh nghal vak vak a, "Engemaw i tih le? I thih phah thei asin. A sut teuh zia che kha, i hmulo em ni?" tiin ka hau hrep mai a. Chutih lai chuan kawng sira motor side glass lo let reng mai chu ka hmu a, ka va chhar a, clue pakhat chu kan hmu ta.

Station lamah chuan kan let leh a, "Chhanhima in tih hi call ka tum a, mahse a la theilo va. Singapore mobile network te pawh ka call leh a, mahse engmah awmzia awmlo." tiin Sawma chuan min lo hrilh a. Phone log book chu ka va check leh a, "Enteh Sawma, July ni 23 chawhnu dar 2 ah deposit siam a ni a. Tin, dar 2:30 ah call a awm bawk. July 27 chawhma dar 11 ah deposit siam leh a ni a, dar 11:30 ah call a awm leh bawk. Call zawng zawngte hi number ngai atang vekin a ni, chuan he number hi 040 a ni." tiin ka hrilhfiah a.

Chumi tlai chuan Rinzuala chu Station-a lo kal turin message ka thawn a, mahse a nawmsamloh thu min hrilh avang chuan an inah chuan ka va kal a. Kawngka ka kik chu a nu chuan minlo hawn a, "Lo lut rawh." tiin min luh tir a. "Rinzuala hi stationa lo kal turin ka hrilh a, mahse a nawmsamloh thu min hrilh a. Enge tunah a an tawh a?" tia sofa lam ka va hawi chiah chu Rinzuala chu a lo mu kawm ngal mai.

Puan a lo sin a, a lo khuh vak vak a. Min hmuh veleh chuan, "Ka tha alawm, Sir..ka ngaihntuah awmloh." tiin muangchang chuan a rawn thu chhuak a. "Chhanhima hi kan la be tlang thei lova, pawisa hi a in deposit apiangin darkar chanve hnuah number ngai vek atangin call a awm bawk." tiin ka hrilh a.

"Khawi hmunah nge?" tiin Rinzuala chuan min lo zawt a. "Aizawl ah, Bawngkawn Police Station." tiin ka chhang a. Mak tih hmel tak hian Rinzuala nu chuan, "Police Station a?" a lo ti hu mai a. "Tunge a nih kan hrelo, Chhanhima hi tunge a nih tih hre turin account details kan khawn khawm mek a ni." ka han ti leh a.

Rinzuala nu bawk chuan, "Ka pasal a bova, chuan Chhanhima, Singapore ami in ti leh a..chuan tunah Bawngkawn Police Station in ti leh a..enge a inzawmna?" tiin hriatthiamloh hmel tak leh mangan hmel tak chuan min han zawt leh a. Keipawh chuan chhandan mai ka hre lo, enge inzawmna a neih chhan ka la hre tlat lo a ni.

Ka Senior Inspector chuan a office ah min ko lut a...

"Alfred...Pu Fakawma case kha enge a an zel?"

"Investigation neih mek ala ni e, ka pu."

"File leh evidence awm ang ang te min han hmuh la, ka lo buaipui chhunzawm ang. Duhtawk tawh rawh, case dang i khawih angai tlat mai."

"Sir..ihh...Rinzuala bulah pawh ka tiam tawh a..." ka tih lai chuan Inspector chuan, "PAwisa engzah nge i laksak tawh?" tiin min zawt ta mai a. Chhan ngaihna ka hrelo, Rinzuala lahin min ring em em mai bawk si. Mahse ka senior berin chhui zui a phal tlat tawh silo, ka tlawm ta a ni. Enge a chhan ka hrelo, pawisa vang nge...khami boruak ipik lutuk vang zawk? Case chu ka buaipui chhunzawm ta lova, Rinzuala hnena ka thutiam chu ka bawhchhe ta a ni.

Rinzuala chuan apa chu a thi tawh nge ala dam tih pawh a hrelo, apa  abo mek a, ani lah cancer natna nei a ni bawk si. Pawisa tamtak sengin tanpuina min dil a, kei chuan ka thutiam ka hlen ta silo. Tichuan Rinzuala chu ka hmulo der ta ziah a, biak pawh ka be duh ta ngailo a ni. VAwitam min call a tum a, mahse ka chhang duh lo.

Khawlaia min hmuh pawhin min au vak vak zel a, ka hrelo der tlat thin. ZAnkhat chu ka door bell a rawn ri ral ral a, kawngka ka va hawng chu Rinzuala a lo ni a. "Rinzual, enge i rawn tih?" tiin ka zawt a. A tap nasa tih hriat tak hian a mit a sen rum mai a, "A tir atang khan i senior ten order dang an pek che chuan pawisa hian ka buaina te hi a chingfel zo dawnlo tih tinge min hrilhlawk loh, ka pu?" tiin rilru nat hmel tak chuan min zawt a.

"Enteh Rinzual..ka.." ka sawi zawh hma chuan tap chung hian, "Ka pa khan min hrilh fo thin...BUAINA I NEI A NIH CHUAN NANGMAH NGEIIN CHINFEL DAN I ZAWNG TUR A NI...tiin, mahse ka ring che a, i kutah ka innghat a, ka tisual a ni." tiin a mittui chu a hru leh zeuh a. "Rinzual, case hi ka kutah a awm tawhlo, Sir Sangtea kutah a awm tawh a ni, a lo buaipui ang." inthlahrung tak chuan ka han ti a.

"A buaipui ang maw? Pawisa engzat fakau nge ngai leh dawn? Thamna kan pe a nih chuan police te hian an hna chu tha taka an thawh ve mai ka lo ring thin a, min bum duh ka ring ngai lo." tiin a mittui a tla zawih zawih mai. "Rinzual, i hrethiamlo a ni. Ihmaw..i pa case hi.." tia a dara ka va vuan chu ka kut min lo paihthlak sak a.

"Ka pa case chungchang lam a nilo, ka pu. Ani kha ka pa  ani, ka pa neihchhun a ni asin." tiin min vin hrep mai. A ipte atang chuan pawisa thahnem tak hi a rawn phawrh a, "Hei hi i inchhiar zat kha a ni a, tunah chuan nangnen hian thawhdun nachhan tur kan nei tawh lo. A tawp tawh e, ka lawm e." tiin pawisa chu dawhkanah chuan a dah a.

"Ih..englo, Rinzual.." tiin ka dang a awk vek, ka inthlahrung takzet tawh. "Sir, nang angin hna zo fel lovin a chanve ah ka duhtawk ve theilo. Chuvang ani i hlawh duh zat ka pek che, ka kal mai ange." tiin tap chungin min kalsan ta a ni. Ka khawngaih em em a, ka inthiamlo hle bawk. Ka rilru ah Rinzuala a awm reng a, chutia ka thutiam ka hlen lo ta mai chu ka inngainep hle bawk.

Atukah chuan Station ah chuan ka kal leh a, "Sawma, Traffice Signal CCTV footage zawng zawng la vek rawh." ka ti a. Sawma chuan, "Sir, Inspector Sangtea'n hre ta se.." a hna ti chu ka melh rum kher mai. "Sorry Sir." tiin CCTV footage chu a khawn khawm nghal vat a. "Phone signal in a tarlan dan chuan khami ni khan Pu Fakawma hi a kal kual nasa hle a ni.." tiin footage en pah chuan Sawma chuan min hrilh a.

"VEnglai leh Kawnveng panna kawng chauh ka mamawh." tiin ka lo chhang a. Sawma chuan mak tih hmel tak hian, "Tinge chulai hmun kher?" tiin min zawt a. Kan khua, Renglung khaw map chu ka la a, "En rawh, hei hi VEnglai a ni a, helai hi Kawnveng a ni. Chuan helai hi mel lung awmna kha a ni a, accident thlenna hmun kha. Helai hmun kal nan chuan eng motor pawh nise helai gate hi paltlang angai, he gate paltlang apiang, motor dum...motor dum zawng zawng an detail ka duh vek a ni." tiin ka hrilh a.

Chulai gate paltlang apiangte chu CCTV footage ah chuan kan en zel a, a tawpah motor dum, side glass neilo chu ka hmu ta. "Hei hi...he car ngei hi a ni." tiin video chu ka pause a. "Engtin nge he car hi a ni tih i hriat theih?" tiin Sawma chuan min zawt a. "Side glass a awm lo.." tiin ka lo chhang a.

Kan han enchiang leh deuh a, sticker inbel a awm tlat mai. "Eng sticker nge mawni le?" ka tih lai chuan SAwma chuan, "Zote Car Rental Company...Aizawl ami anih hi, Sir." tiin Sawma chuan min lo chhang a. Atuk zingah chuan a rang a rangin Aizawl lamah chuan kan kal a, kan khua hi Aizawl atang hian a hla lutuk lo.

Tlai lamah chuan Zote Car Rental ah chuan ka va kal a, "Renglung Khua Police Department atanga lo kal kan ni a, he car detail hi kan hre duh a ni." tiin an manager chu car number te chu hmuh tirin ka be fel thei ta a. Chu car ang chi awmna bulah chuan min hruai a, "Hetiang car hi tuin nge rawn hawh?" tiin ka zawt a.

"Mi tam takin min dawr tawh a, tuber nge ka sawi theilo." tiin min chhang a. "July ni 30-ah a rawh lei." ka tih takah chuan, "Ka han check lawk ange." tiin min chhang a. Chumi ni a car hawh tute list chu min pe a, ka han enthla zel a. A tawp lamah chuan chu cardum hawhtu hming chu ka hmu ta a, Cindy Lalnuntluangi tih a ni.

Pu Fakawma nupuiin zan an haw pah a, ruahsur hnuaia nula an phurh a sawi kha ka hre chhuak zawk a, a hming pawh Cindy ve tho a ni kha ania. "Cindy address hi min pe thei angem?" tiin manager chu ka zawt a. Manager chuan min pe hlauh mai a, tichuan Cindy address lam pan chuan ka inkhalh phei leh ta nghal a.

Kawngka chu ka kik a, hmeichhe pakhat hian a rawn hawng a. "Ka pi, Cindy ka rawn zawng a?" ka han ti deuh tawp a. "Keimah hi ka nia, tunge i nih a?" tiin min lo zawt let a. Ka nihna te ka han sawi chuan inchhunglamah min luh tir a, kan titi ta a. "Kar liam ta mai khan kan khua, Renglung Khua ah rukru kan man a, he bag hi kan mansak a. Zawhna te kan zawt a, Car Rental Company atanga a ruk niin a insawi a. Company lam chu kan be leh a, anni chuan chu car chu nangma hminga book a nih thu minlo hrilh leh a. Chuvang chuan hei, bag hi ka rawn pe let leh dawn che u a nih hi." tiin dawt ka phuahchawp a.

"Renglung khua a? Khawiah nge a awm a? Chutah chuan kan la kal ngailo hrim hrim." tiin a hriatthiamloh hmel kher mai. "Rukru ina detail min pek te hi nangma car nen hian a inmil chiah si a ni." tiin ka han chhang leh a. "A ni lovang, ka pasal hi station pawnlamah hian case azirin a chhuak ve fo thin a, aman a lo book aniang." tiin min chhang ta daih mai.

"CAse a? Eng case maw?"

"Police i ni a, Police chenna inah i lo kal tih i hre miah nange?"

"I pasal chu police maw?"

"AW ni e, Inspector David Lalmuansanga." a ti ta mai a. Ka hrethiam ta nghal vek mai, "Bawngkawn Police Station ah a ni em?" ka han ti a, "AW ni e." tiin min lo chhang a. "Anih tunah khawnge a awm?" tia ka han zawh chuan Cindy chuan, "Ralte Constuction ten event an neih apiangin kan pa hi security ah an hmang thin a, incharge ania. Tunah pawh SL Resort ah event an nei mek a, chutah chuan a awm." tiin min chhang leh a.

Chutih lai chuan ka phone a rawn ri a, Inspector Sangtea a lo ni. "Hello.." ka han ti dek dek chu vin zet hian, "Case kha i kutah a awm tawh lo ka ti mawlh mawlh a, nang erawh Aizawl ilo thleng hman a, ka hrilh lo che em ni?" tiin mi rawn hau hrep mai. "Chutiang anilo, Sir.." ka han ti leh a.

"Inla changtupa viau suh, Pu Fakawma fapa Rinzuala hi tunah Aizawlah khan a awm mek asin. Ni 2 liam ta atang khan Inspector DAvid Lalmuansanga hmuh tumin Bawngkawn Police Station ah a kalziah thu kan dawng bawk." a rawn ti leh ta mai a. "Sir, Rinzuala chu Aizawlah a awm lo tawp ang. Treatment ti turin kan khuaah khan a awm alawm.." ka tih lai chuan Sir Sangtea chuan, "Alfred, engemaw i sawi le? Mi a emaw min ti em ni? A kalthui zel anih chuan Rinzuala hi a thih phah thei asin.." tiin min rawn vin leh hrep mai.

"Ka pa chuan kan buaina te chu midang puihna dil lovin, keimah ni ngei hian a chinfel dan kan zawng tur a ni tiin min hrilh thin." tia Rinzuala sawi kha ka hre chhuak zawk a, amahin case chu a lo buaipui chhunzawm a, apa chu aman a lo zawng ve reng a ni tih ka hrethiam ta a. David-a nupui Cindy in a pasal DAvid-a chu Police HEad Security a nih thu min hrilh zo chiah bawk nen, Rinzuala dinhmun chu a derthawng hle tih ka hrethiam ta nghal a.

Zanah chuan Ralte Construction te chuan event an lo nei mek a, SL Resort lam chu ka va pan ve ta nghal a. Ka police badge te chu hmuh in gate chu ka lut tlang ve thei mai a, Rinzuala chu ka zawng ta nghal a. Achhan pawh David-a hmu tur hian Rinzuala hi helai hmunah hian a kal ngei dawn tih ka hria, chuvanga zawng chu ka ni.

Reife ka zawn hnu chuan balcony lama David-a leh Rinzuala lo ding dun chu ka hmu a, bang phenah biru in an thusawi chu ka ngaithal a. "Ka pu, ka hming chu Rinzuala a ni a. Renglung Khua atangin ka lo kal a.." inthlahrung tak chuan a han ti a. Meizial zuk khuk tulh tulh pah chuan David-a chuan, "Renglung khua a? Chutiang khua nen kei hi inzawmna kan neilo." tiin a lo chhang a.

Rinzuala chuan a phone a phawrh a, apa thlalak chu hmuh tirin, "Ka pa a bo va, kan zawng hmu zolo a ni. Chhanhima tih hmingpu in pawisa a deposit a, chumi hnu lawka Bawngkawn Police Station atangin call a dawng nghal bawk. Ka sawi awmzia chu, chu call chu nangmah atangin a ni." a han ti khur leh dar dar a.

Lehlam hawi hmak pah hian DAvid-a chuan, "Engmah ka hrelo." a ti ta hmak mai. "Sir..khawngaihin.." tia Rinzuala a han tawng leh dek dek chu vin zet hian Davida chuan, "Ka hrelo ka tih chu, Hmela..chhuak rawh.." tiin a melh rum kher mai. Rinzuala chu a ngawi vang vang a, "I hria, min hrilh hma chu ka kal bo lovang." a ti ve ta tlat mai.

Thinrim tak hian Davida chuan, "Ka hrelo, Pu Lalfakawma tih hmingpu tumah ka hrelo. Kal rawh, chhuak rawh." a ti leh ta hrep mai. Chutah le, mak tih hmel tak hian Rinzuala chuan, "Ka pa hming ka sawi lo hrim hrim, a awmzia chu ka pa chu tunge a nih i hre chiang a ni." a ti ta siah siah mai.

David-a chuan Rinzuala chu a rek thut a, "Thih i duhloh chuan kal bo vat rawh." tiin a namthlu tawp mai. Kalsan a tum chiah chu Rinzuala chu a rawn tho leh a, "Ka pa hming pawh i hria a, a awmna chin pawh i hre ngei tur a ni. Khawngaihin min hrilh rawh, kar thum chhung ngawt mi a ang maiin ka zawng tawh asin. KA pa a ni a, ka hmangaih asin." tiin a tap a.

Chutah David-a chuan Rinzuala chu a hnungchhawn a, a pistol phawrhin a mu a thun ta kauh kauh mai le. Rang takin DAvid-a hmuhloh lai chuan Rinzuala chu ka va pawt hrang a, a hmui ka hup a. Bang phenah chuan ka bikruk pui a, ka rin ang ngeiin DAvid-a chuan silai chu rawn lekchhuakin a rawn hawi phei a.

Mahse Rinzuala a hmuh tak silovah chuan a mangang kher mai, rang takin a kalsawn nghal vat a. Rinzuala chu ka thlah a, "Inspector kha ka be mek anih kha..tinge min rawn man ringawt a?" tiin a lungawilo kher mai. "Rinzual, a that duh mai ang che. Hriatthiam tum rawh, i rinai daihinn boruak hi a rit ania." ka han ti a.

"Boruak a rit hle anih chuan engemaw thil thalo tak an ti tihna aniang tiraw?" tiin min zawt a. A darah ka vuan a, "Rinzual, khawngaih takin tun chiah hi hun min pe leh rawh." ka ti a. Chutah Rinzuala chu a thawhah a rawn chhuak a, a khuh ta vak vak mai. Davida te chuan an zawng mek a ni tih ka hre bawk si, ka kuah a, chhuahpui ka tum ta a.

Mahse DAvid-a chuan min hmu hman teuh thei khawp mai, gate ah lah police an duty bawk si. Ka mangang chuan mipui ding thup karah chuan ka biruk pui ta tawp a. Chutia kan kal leh dawn chiah chu Rinzuala chu a ding ta tlat mai a, "Rinzual, kal vat ang, min man hlauh dah ange." tiin a banah ka vuan a.

Mahse Rinzuala chuan mit khap miah lo hian stage lam chu a en a, "Sir...Cindy.." a ti ringawt a. "Cindy nen chuan tlaiah khan kan inbe tawh.." ka tih lai chuan stage chu a kawk a, "SAw saw Cindy chu a ni?" a ti ta mai a. Stage lam chu ka va en a, Ralte Construction neitu Pu Robert-a chuan thu alo sawi mek a.

"Zanin hian ka nupui, ka hmangaih em em hi ka hmelhriat tir duh che u a ni..." a ti a, mipui chuan kut an beng dur dur a. Tichuan chu hmeichhia chu stage ah chuan va pheiin Robert-a nen chuan an inkuah a, mahse min hnungchhawn tlat avangin a hmel ka la hmu ve thei lo. Chutah muangchang chuan a rawn hawi a, chu nula chu tudang nilovin...Pu Robert-a nupui ngei..Mary Rinsangzuali a ni.

****************

Alfred-a chuan rum zet hian Mary chu a en a, "Khami zan a stage a ding kha, kha Cindy kha..nangmah ngei hi i ni. Pu Fakawma a bo ni khan DAvid-a nen hian Relung ah in awm ani, mahse boruak a rih tak em avang chuan case chu call off a ni ta a ni. Case chu cinfel a ni thei dawnlo niin kan hre ta a, mahse nang lah chuan Pu Fakawma Resort ah ngei David-a chu i that leh ta si a." a ti ta sak sak mai.

Mary chuan rum tak hian Alfred-a chu a en a, "Khami ni khan spa dawrah ka awm, i duh chuan record pawh check rawh." a ti khur khur mai a. Alfred-a chu a nui hak mai, "Hetiang situation a thlen hi chuan ka inring thlap zel alawm, inpeih sa thlapa ka lo kal i ringlo em ni?" tih pah chuan a bang a phawrh a.

A chhungah chuan saranga tuam, mobile phone chhia, thisen kai chu a rawn phawrh a. Mary chu a meng phawk nasa mai, Alfred-a chuan phone chu dawhkanah a dah a, "I phone bo kha..hei hi a nih hi. I finger prints tamtak a awm bawk, mahse Pu Fakawma thisen a awm tel a ni." a ti ta mai a.

Mary chu a meng bial ta kawk kawk mai, Alfred-a bawk chuan, "Khavang kha tiraw nichina mibo case ka sawi a, phone ka hman lai khan i hriat duh em em chhan?" tiin a nui sen sen a. Chutah rum zet hian Mary chu a melh a, "Ka pi, engthil chiah nge thleng sawi rawh.." a ti ta khur khur mai a, a melh ngai melhin Mary chu a ngawi reng ringawt mai.

******************

A melh ngai melh reng chung chuan Mary chuan zu a in a, Alfred-a erawh chu a thutna hmunah chuan a thu reng thung. Mary zu in mek chu ava en a, "Smoking and drinking is injurious to health..achang chuan ngawih reng pawh hian hriselna a ti chhe thei ania. I tawng duhlo hrim hrim nge sawi tur i hrelo pawh ka hrethiam love, mahse Pu Fakawma case ah khan FIR thehluh niin rinhlelh ber chu nang leh David-a te in ni. Lawyer Remruata chuan naktuk zingah a hre thuai ang, inngaihtuah chiang vat rawh. Han mitthla chhin teh, i hmaah judge a thu vung anga, i sira Remruata chuan FIR a hum ran bawk anga, engemaw tak i sawi ve ngei chu a ngai dawn ania." tiin a nui suk a.

MAry chu a thaw hak a, "Alfred, thudik tak chu ka hrilh ang che. Engmah ka zep lovang, Renglung khuaa ka kal tuma ka thil tawn te, chipchiar takin ka hrilh ang che. DAvid-a nen hian kan inngaizawng ngei alawm, Robert-a'n min ngaihsak miau silo a ni..." tiin Mary chuan Renglung khuaa a thil tawn te chu a sawi ve ta thung a.

***********************

DAvid-a hi mi pasal a ni a, keipawh mi nupui nimai tur ka ni. Mahse kan inngaizawng reng thova, Robert-a nena kan inneih hma a ni. REnglung khaw lam pan chuan motor ah kan inphur a, keimah zawk chuan ka khalh a. Kan tlan pah chuan Davida chuan ka sam a chul a, min en ngawih ngawih a.

"I sam colour hi a mawi ka ti." a han ti a. "I nupui Cindy pawh hetiang rawng chiah chiah hi i leisak ve tho kha." tiin ka lo chhanglet deuh kher a. A tum ta hmuk mai, "Instagram ah pawh ka hmu alawm." ka han ti leh hram a. Lungawilo tak hian, "Enge chu chu i buai vak a?" tiin lehlam min hawisan nghal hmak a.

"Engthil nge min surprise tur chu?" tiin ka zawt leh a. Tum hmuk hian, "Nghak mai mai rawh, chumi lam pan chuan kan kal mek hi..lungngai suh." a han ti leh deuh hmak a. Chutih lai chuan ka phone a rawn ri a, ka pasal hual Robert-a a lo ni. David-a chuan ka phone screen a Robert-a hming lo lang a hmuh chuan  alungawi lo hle a, inthiamlo rilru tak chung chuan phone chu ka la a.

"Hello Robert, ka la buai deuh a...nakinah ka rawn phone ang che." tiin phone chu ka dah leh nghal vat a. David-a chu a thinrim em em a, a mitmeng chu thikna hlirin a khat tih ka hmu thei a ni. "Cindy-i'n rawn call ve ta se, khatiang chiah khan awm ve ta ila, i duh em ni?" tiin ka han zawt a.

Min chhang lo chuan seat hnung lama bag chu ava la a, a chhunga zu chu la chhuakin tui pawh pawlh lo chuan a in nghal khawlh khawlh mai. "David, ni 10 hnuah Robert-a nen hian kan innei mai dawn a, khatia a phone call chhanloh tawp kha a nuamlo alawm." ka han ti chu vin zet hian, "Engvangin nge pasal neih kher i tum a? Mawh?" tiin min vin hrep mai.

"Anih chuan a ruka i ngaihzawng ni reng turin min duh ami? I hmei ni turin min duh tihna ami?" tiin ka zawt leh a, min chhanglo chuan a chek tlawk tlawk ringawt a. "David, Cindy nena in inneih pawh khan ka hrethiam che a.." ka tih lai chuan rum zet hian min melh a, "Kha chu a danglam alawm...a inang lo." a ti khur khur a.

"A awmzia chu i tih ang apiang chu ka pawm zel anga, kei chu i thu ang zelin ka awm dawn i tihna em ni?" tiin ka han zawt ve leh a. A thinrim lutuk chuan car tukverh chu chum vak vak pah chuan, "Hrep taka.." a ti vak vak mai. Robert-a nena kan inhualna zungbun chu ka phelh a, "A tha e...hei zungbun chu ka dah bo ta e. Kan awmdun mek hi, tihian awm suh.." tiin ka thlem a.

Mahse ala lungawi thei tlat lo, "David, min han en teh." tiin a banah chuan ka va vuan a. KAwng ka lo enchiang lo nen, kan hma takah chuan car pakhat chu a rawn lang thut mai. Chutah kan insu thawi fua a, kan motor side glass chu a tla hlawk mai. Motor chu ka ti ding thei hram a, "Mary, i tha em?" David-a chuan a han ti vat a.

Motor atang chuan DAvid-a chu a chhuk a, motor dang atang chuan patling pakhat hi a rawn chhuk ve bawk a. Thinrim tak hian DAvid-a chuan ava pan phei a, "Hey, i mit a del em ni? Tuin nge license pe che?" tiin ava vin ta vak vak mai. Chupa chuan, "Engemaw i sawi le, nangmahni zawk anih kha thiamlo. Car inkhalh thiamlo zawk em ni? Lehlam khamah hian min su thla daih ta ula engtin nge in tih ang? Kalkawng in en lo anih kha, min puh reng reng suh." tiin a lo chhanglet ve a.

"I thiamloh zawk anih kha, enge khatia i insawi thiam vel a?" tiin DAvida chuan a vin leh khur khur a. "I mawl em ni? I thluak kha i hmang thiamlo em ni?" tiin chupa chuan a vin ve ta hrep mai. "Ka thluak ka hman vang zawkin ka khawih lo mai mai che anih hi...kan car i sutchhiat man saw min pek ngei angai ang." Davida chuan a han ti leh a.

Car atang chuan ka chhuk a, "David, i kal teh ang." ka va ti vak a, ka mangang kher mai. "Aia upa te zahna i nei miah lo em ni?" a han tih leh chuan David-a rui pawr bawk si chuan, "Engvangin nge ka zah ang che? Mawhh...min cho ami?" a ti ta vak vak mai. Chupa chu a lungawi ta bik hauh lo, "Rui chungin motor i khalh a, hremna i dawng thei tih i hria em? Police hnenah ka report thei che tih i hria em?" a ti ve ta khur khur mai a.

"Hey, engmaw i sawi a? Nang hian police hnenah min hruai ang maw?" tiin DAvida chuan a nam ta vak vak mai a. Chupa chuan a phone a phawrh a, kan motor number chu thla rawn lak a tum a. Mahse a phone chu Davida chuan a lo ben thlak sak a, camera shot ri chu ka hre hman. Mahse kan car number chu a la hmanlo, mel-lung bulah chuan a phone chu a thlawk phie daih mai.

Chutah DAvida chuan a man bet thut a, a hnung khirh a, ama motor hnunglamah chuan a nam bet a. "Thla lak i tum amaw? Police chu keimah ka nih hi i hria em?" a ti leh khur khur mai. "David, thlah rawh..kal ang, kal vat ang." tiin DAvid-a chu va dan ka tum a, min lo tin uaih mai a. Ka thinrim hle mai, car lamah chuan ngawi reng chuan ka let leh nghal a.

Davida chuan min rawn umzui a, "Mary, MAry ka tihpalh.." tiin ka banah chuan a rawn vuan a. "Mary, ka tihpalh." a han ti leh a. "I hlim tawh em? I thinrimna zawng zawng chu tikhan i leih baw zo tawh em?"...."Mary, ka tihpalh, ka insum zo lo a ni." a han ti leh a, mahse ka lung a awi hlawl lo a ni.

Min kuah a, "Mary, thinrim suh...ka hmangaih che." tiin ka chalah chuan a fawp a, tichuan motor ah chuan kan lut a, kan kal leh ta nghal a ni. Kan kalna hmun tur chu kan thleng ta a, hmun nuam tak a ni. In lian vaklo, nawm hmel tak si hi a lo awm a, a boruak lah a thiang em em bawk.

In awmna bul lawkah chuan kham hi a awm a, kawngchen vel hian kham koah chuan thir a inhung bawk. Chu kham chu sang tak mai  ani a, a mawng chu ramhnuai a ni. A hmunhma vel ka en lai chuan Davida chuan, "I thinrim a reh tawh em?" a rawn ti a, mahse ka chhang duh lo.

A bula thutthlenga thut ka han tum chu vaipa pakhat hi a lo kal a, "Ka pi, nangmah thu suh aw...rawng hnawih zo chiah a, nangma kekawr ah kai nimai." a rawn ti lauh lauh mai a. Chu vaipa bawk chuan DAvida chu a han en leh a, "Ka pu, i dam maw?" a han ti leh a. "Ka dam alawm." tiin DAvid-a chuan a lo chhang a.

"Ka pu, hei hi nangmah nupui, Cindy kha mi?" a ti ta mai a, DAvida chuan min en vung vung pah chuan, "Aw." tih ringawt hian a chhang a, ka nui suk ringawt. "Ilo kal dawn tih chu keimah hre tho a, mahse khawchhung lamah hna awm tlat a. Keimah pawh kal ve ngai a, lo let leh vat ang." vaipa bawk chuan a han ti leh a, a kal ta a.

Inchhung ka han lut chu a nuam ngei mai, inchung pan chhohna step design mawi tak a lo awm bawk a. David-a chu a lo lut a, thlahlel tak hian ka lo kuah a. "Room zawng zawng ka lut chhuak vek tawh a, khawnge i surprise ber chu?" tiin ka zawt a. Min nuih suk a, "I nghah a ngai." a ti leh a.

"Nangpawn i nghah a ngai a nimai." tiin inchung lamah chuan ka chhoh san a. Ka chhoh pah chuan a hmuh tur ngei chuan ka kawr te chu ka han phelh thawl vel a, min rawn zui nghal a. Min man bet a, ka taksa chu a rawn chul kual vel a. A tih ang ang chuan ka lo indawh tawp a, kan thisen pawh a lum dun tawh hle.

Min kiss a tum chiah chu door bell a rawn ri a, "Tunge ni?" ka lo ti vat a. "Ka zu en ange.." tiin Davida chu a chhuk a, ka zui ve nghal a. Kawngka a hawng chu rinloh tak maiin kha pa, kalkawnga kan tawh, DAvida nena inhnial hrep, kha patling zaidam hmel zet kha a lo ni reng mai. Phone a lo hmang mawlh mawlh a, Davida a hmu chiah chu a ngawi ta hmak mai.

"Hey, enge i rawn tih dawn?" tiin Davida chuan a vin leh nghal khur khur a. "Pu Chhanhima hmu tura lo kal ka ni." tiin a lo chhang a. Mak tih hmel tak hian Davida chuan, "Nang hi...Pu Lalfakawma em ni i nih?" tiin a zawt a. "Chhanhima chu a awm em?" tiin alo zawt let daih mai a.

"Chhanhima chu ka thianpa ania, kei hi DAvid Lalmuansanga ka ni. Keimah hi ania i property lei tur chu.." tiin Davida chuan chibai a tum a, mahse Pu Fakawma chu a kal daih mai. DAvida chuan a umzui a, "Lo ding teh ka pu.." tiin a au vak vak a. Thinrim tak hian Pu Fakawma chuan, "KA property te hi i lakah kher hi chuan ka hralh hauh lovang." a ti tlat mai.

Davida chuan a banah a va pawt a, "Engemaw i sawi le?" tiin a thinrim leh nghal der tawh. Pu Fakawma chu a ding a, "Ka property a ni a, ka thu thu a ni. Tu hnenah nge ka hralh anga, tunge ka lei tir ang tih pawh ka thu thu a ni. I hnenah chuan ka hralh lovang, chu chu thutawp a ni." a ti leh hmak mai a.

"Accident vang kha em ni? Ngaihdam dil tur chein min duh em ni? Lo lut la, i titi ang hmiang." DAvida chuan a han ti leh a. "Thil pakhat ka hrilh ang che, i advance min pek pawh kha naktukah ka rawn thawn let leh vek ang." tiin kal a tum leh a. DAvida thinrim a insum zo leh talo, "Ding teh, i tawnghnem mah mah ta khawp mai. Hmela, ka duh chuan helai hmunah hian ka that thei che asin." a ti ta khur khur mai a.

"I tawngkam kha fimkhur rawh.." tiin Pu Fakawma pawh a thinrim kher mai. "Ka fimkhur anga maw? Ka property a ni tawh, ka ta a ni tawh." tiin Davida chu a au vak vak mai a. Ka va inrawlh vat a, "DAvid..insum rawh." tiin ka va pawt hrang a. Ani lah chuan, "Mary, hepa hi hrilhfiah rawh. Ka that duh mai ang, hrilh rawh." tiin a rak vak vak mai.

"Keiman ka'n bia ange, inchhungah lo va lut rawh." ka han ti leh a, thinrim tak chung chuan inchhung ah chuan a lut a. Inthlahrung tak chuan Pu Fakawma bulah chuan, "Ka pu, khawngaihin hrethiam rawh." tiin ka inthiamlo kher mai. "Zinga min tihdan atang khan eng ang mi nge a nih tih chu ka hre daih tawh." a lo ti hmuk a.

"Ka pu, khawngaihin...motor kha keima khalh a ni a, ka thiamloh a ni. Chuan..tunlai hian pawisa i mamawh hle ani tih kan lo hria a, chuan i property hi kan duhzawng tak alo ni bawk nen. Advance kan pe tawh che a, balance pawh kan pe nghal ang che, i duh chuan...ihh, car kan tihchhiat sak man che pawh kha kan pe bawk ang che." tiin ka thlem char char a.

"Ngawi teh, inzahna hi pawisa in a lei thei lo. I hrethiam lo a ni...a theih loh." tiin kal a tum leh a. "Ka pu,  pangngai takin ngaihdam ka dil tawh che hi...he property hi hralh turin i sawi lawk vek tawh a, i thutiamah ding nghet la, tichuan i zahawm a ni mai." ka ti ve ta ngat a. Chutah min en vang vang a, "Nula, i tawnghnem khawp mai. Zahawmna chungchang te i sawi a, huh...sawi ve suh, nang ang hmeichhe sawi chi a ni velo. Kei hi min hrelo a ni maithei, mahse keichuan chiang takin ka hria che a ni." a han ti a.

"Enge awmzia?" ka lo ti vat a. "A awmzia chu ka han hmuh tir ang che." tiin a phone a phawrh a. Chutah thlalak pakhat chu min rawn hmuh tir a, Robert-a nena kan inneih sawmna thlalak a lo ni reng mai. Ka thinphu a rang nghal em em a, hlauhthawnna hlirin ka khat nghal bawk.

"Robert-a pa nen hian college kan kal ho thin a, i tan enge a nih ka hrelo. Mahse Robert-a te chhungkua hian i awmdan hi hre ta se i tan a nuam lo khawp ang. Ala tlai lo ania, an hriatchhuah hma che hian i awmdan hi sim vat rawh. Anih loh chuan ka sawichhuah mai angai hlauh dah ange.." tiin min vau ta khur khur mai.

Chutah DAvida chu a rawn kal a, na em em hian Pu Fakawma chu a hnek ta siah mai. Pu Fakawma chu a hawi sawk a, kham ko hungna chu a chhuih a, khamah chuan a tla ta mai a. Ka hlauthawng ngei mai, "David..engthil nge i tih hi? I a ta em ni?" tiin ka au chel chul mai a. Davida lah chuan, "A vau che a nih kha...a vau ve khanglang che a nih kha." a lo la ti hlur zui.

"Chupawh nise.." tia tawng ka tum leh lai chuan Pu Fakawma chu ka zu en leh a, a la thi hauh lo. A che tual tual mai a, "David, ala dam...ala dam ania. Kan la chhan thei, engemaw tal ti teh." tiin ka sawi vak vak a, mahse DAvida chuan ngawi reng chuan Pu Fakawma chu a en vung vung ringawt a.

Leihlawn, hrui atanga siam, in bul kudam sira lo inbang chu ka hmu hlauh mai. Ka va la vat a, DAvida nen chuan thir inhungna ah chuan leihlawn hmawr chu kan tawn a, abak zawng chu kan zu thlakthla a, a thui lo kher mai. "David, zu chhan rawh..kal vat rawh." ka ti a, hreh tak chung chuan a chhuk a.

Mahse leihlawn chu a che luih luih a, DAvida chu a au tuar mai. "Nilo, DAvid..DAvid.." tiin ka zu bih thla a, ka hmu ta hauh lo. Ka au leh vak vak a, chutah leihlawh chu a rawn che leh dut a. Ringtak hian, "Mary....hetah ka awm..min pui rawh." a rawn ti a, ka hlauthawng ngei mai. "Ka lo chhuk e." tiin ngam lo chung chuan ka chhuk ve ta a.

Leilawn tawp ka zu thleng a, lunglian tak pahnih karah chuan a ke a lo tang a. REife kan beih hnu chuan a ke chu kan phawi thei ta hram a, chutah tang chuan Pu Fakawma lo let reng pawh chu kan hmu hnai thei ta. A awih vak tawh lo bawk nen, fimkhur tak chung chuan kan chhuk zel a.

Pu Fakawma chu thei leh theilo hian a lo che tual tual a, zangthal zawng hian a lo mu a, a thaw hrawk hrawk mai. KA va pan hnai a, "Ka pu..i tha leh mai ang..awii, engtin nge kan tih ang?" tiin ka mangang hle mai. DAvida pawh chu a rawn bai phei auh auh a, "Ambulance call vat angai." tia ka phone ka phawrh chu DAvida chuan min benthlak sak daih mai.

"I mawl em ni? Damdawiina kan hruai a nih chuan keini hi jail ah kan tang thung ang." a ti khur khur mai a. "Accident angin kan sawi thei alawm, a nunna hi chhan vat ang, hun kan nei tlem ania." ka ti leh a. "Nilo, a damchhuak anih chuan engkim a sawi chhuak vek mai ang." tiin a kal daih mai.

"Kan chhan angai alawm...DAvid.." ka tih pawh chuan min ngaithla duh lo, ka mangang hle mai. Pu Fakawma lah chu a thaw muang tial tial tawh mai si, a meng tawk tawk a ni ber. Ka phone ka thlauh chu ka zawng a, a tawpah chuan ka hmu ta hlauh mai. On ka han tum a, a lo la thi hmak zui.

Chutia ka buai lai chuan DAvida chu lunglian tak chawiin a lo kal leh a, "Nilo..DAVID.." ka ti hman tawk. Chu lunglian tak mai chuan Pu Fakawma lu ah tak mai chuan a chhu chawrh mai a, thisen a per chuai mai. Ka lungphu a rang ngei mai, boruak zawng zawng pawh a reh diak hialin ka hria.

Pu Fakawma chu a thi chiang em em a, chet pawh a che tawh lo. Mit khap miah lo chuan ka en reng a, "David...enge i tih tak?" tiin ka khur zawih zawih a. "Mary, min ngaithla rawh..han chho leh la, car ah chuang la. Kawng lehlam ah khan minlo nghak ang che, ka lo kal ang." tiin ka tawng leh hma chuan min nam phei rawk rawk a.

Thawk pawh ka thaw tha hleithei lo, hlauhthawnna hlira khat chung chuan ka chho leh ta a. Leihlawn ah chuan ka lawn leh a, ka thleng tep tihah chuan thawm ka hre tlat mai. "Khawnge a awm le? Ka pu...ka pu.." tih ri ka hria a, rang takin ka chhuk leh nghal a. Lung phenah chuan ka biru a, chutah leihlawn chu tuemaw hian a la pawt chho daih zui.

Khua a thim tep tawh a, Pu Fakawma ruang lah chu ka hmu tawh hauh lo lehnghal. Ka phone lah chu ala in on thei reng reng lo mai a, a thim hmak reng ringawt. Chutah ruah a la rawn sur zui a, ka mangang takzet tawh. Ruah do chung chuan ramhnuaiah chuan ka vak kual ka vak kual ta ringawt mai a. Khami ni atang khan a vawikhatna atan hlauhna awmzia chu chiang takin ka hre ve ta a ni, nungdama tun thlenga ka la awm hi mak ka ti hial zawk.

Ka vah kual vak hnuah chuan kawngpui ka thleng hlauh mai a, ka thaw huai mai. Mahse a reh em em a, lamlian tihloh chu ramhnuai vek tho ala ni. Vawt ti taka ruahsur hnuaia ka kal reng lai chuan motor pakhat hi a lo tlan a, ka zawnah chuan a rawn ding a. Tukverh a hawng a, nu pakhat hi a lo ni a.

"Nula, khawnge i kal dawn a?" a rawn ti a. "Ihh..ka..ka..ihh.." tiin ka tawng bah nuai mai. "Lo lut rawh, lo chuang rawh." a ti a, ka chuang ve ta tawp a. "Enge ruahsur hnuaiah mahni chauh a i kal a, hmeichhia i ni lehnghal.." tiin min zawt a. "Ihh..trekking ti turin ka kal a." tiin ka chhang ta ringawt a.

"Trekking a? I va bei tlai ve?"

"Zinglamah khan ka thiante ho khan min kalsan vek a, kawng laka intawk turin kan sawi fel a. Mahse ka phone a chhia a, kawng ka bo a, ka vak kual ta mai mai a ni." tiin dawt ka han sawi leh a. Chutah mipa tleirawl aw tak mai hian seat hnunglam atang chuan, "Helai ramhnuai hi a hlauhawm asin." a rawn ti thut mai a.

Ka han hawi let chu seat hnungah hian mipa tleirawl pakhat, puan nuam sina hmai lo tuam, hrisello hmel em em hi a lo mu a, lukhum lum a khum bawk a, a lo khuh kharh kharh mai. "Hei hi ka fapa a nia, Rinzuala a nih hi...nang tunge i hming?" tiin min phurtu nu chuan min han zawt veleh a.

Ka hming diktak sawi mai ka han tum a, mahse dawt ka sawi ta sa sa tiin Davida nupui angin, "Cindy ka nia." tiin ka chhang ta zawk a. "Khawiah nge ka drop ang che?" tiin min zawt leh a, "Hotel hnai berah a ni mai." tiin ka lo chhang a. "Hotel hnai ber chu...Chawlhna Run(house) tih saw a ni mai ang chu tiraw, Bawiha?" tiin ava chu a han zawt a.

"Aw ni e, mahse ruah hi a sur nasa emai, kawng a chhe viau ang." tiin Rinzuala chuan a lo chhang a. "Nia, a kal ngam ka ringlo. A kawng a chhe sia, ti hian ti teh...kan inah lo kal ve phawt la, ruah ban veleh Hotel ah chuan ka va dah leh mai ang che." a tih chuan, "Angai hleinem, auto vel emaw, taxi vel ka chang tawh mai ang." tiin ka lo chhang a.

"Hetah chuan taxi avang khawp ang, hmu ta pawh nila buaina chu a ngai tho..kawng a tlang lovang, khua a chhe emai." tiin min chhang leh a. Khuh kharh kharh pah chuan Rinzuala chuan, "Ruah sur ban veleh i thiante chu phone la, an lo lam mai dawn che alawm." a rawn ti ve leh a. "In phone ka lo hmang thei angem?" tiin ka dil ta a.

Chunu chuan a phone chu min pe a, Davida number chu ka chhu kai nghal a. "Hello, David...keimah ka nia, kawng ka bova, min lo lam thei angem?" ka ti a. "Khawnge i awm? Khawiah nge i awm? Khawnge ka rawn lam dawn che?" a rawn ti nghal chul mai. Rinzuala nu bulah chuan, "Ka pi, khawiah nge min lo nghak se tha ang, hei ka thianpa ka be mek a?" ka han ti leh a.

"Location kha share mai la.." Rinzuala bawk chuan a lo ti leh a, "DAvid, location ka lo thawn ang che." tiin phone chu ka dah a. "Nula, ka phone ah khan kan pa number a awm anga, a message ah khan lut la, khatah khan location chu a awm ang." a ti a. "Tunge in pa chu a hming, engtin nge a number i save?" tiin ka zawt leh a.

Chuta min chhanna chuan ka thinphu a ti rangin min thawng ngei mai, chiang fek fawk hian, "Lalfakawma.." a ti ta mai a, ka phu zawk mai. Ka ngawi ta reng a, "Ruah sur chu a han tan e...Bawiha, i pa han phone teh." Rinzuala nu chuan a han ti leh a. Rinzuala chuan a call a, "Nu, a in switch off." tiin a chhang a.

Chutah Rinzuala chu a rawn thu chhuak a, a khuh ta vak vak mai. "Bawiha i tha maw?" tiin anu chuan  abe mawlh mawlh a. Mahse Rinzuala chuan a awm a dawm a, a khuh nasa tulh tulh mai. "Bawiha kan thleng tep ania." tiin a han tlan chak leh deuh a, kei erawh ka thla a muang tawh hlawl lo.

An in chu kan thleng ta a, "Bawiha, lo chhuk rawh le..fimkhur la." tiin Rinzuala chu a kuah chhuak a, inchhung lamah chuan an lut dun a, kei erawh motor chhungah chuan ka la awm reng thung. An room light chu a in on eng a, tukverh atang chuan Rinzuala nu phone khawih melh melh chu ka han hmu a.

Ka phone chu ka phawrh leh a, on leh ka han tum a. Rei fe ka beih hnuah chuan a in on ta hlauh mai a, ka thaw huai mai. Mahse password a lo awm ta tlat mai a, mak ka ti hle mai. Chutah phone call ka dawng thut a, LAPUII tih a lo inziak kulh mai. Ka hrethiam ta, ka phone amaw ti a ka lo ken ve char char chu ka phone nilovin Pu Fakawma phone a lo ni reng zawk tih ka hre ta a.

Kan phone a lo in ang chiah a, ka lo hai zawk chu niin. Ka mangang kher mai, chutah phone ri chu a tawp a. Rinzuala nu, Pi Lapuii chu rawn chhuakin, "Cindy...Cindy.." tiin min rawn ko vak vak a, ka tihngaihna hrelo chu motor atang chuan ka chhuak a, ka ding ngawi reng ringawt. Min rawn hmuh hma chiah chuan phone chu ka bula car dingah chuan ka vawm lut ta ringawt a, a tukverh chhete a lo awng hlauh mai.

Min rawn hmu ta a, "Tinge pawnah i din reng a? Lo lut ta che.." a ti a. "Ihh..motor chhung atang hian phone ri ka hria a.." ka han ti a, motor chhung atang chuan Pu Fakawma phone chu ala chhuak a. Nuih suk pah hian, "Kan pa ve hi chu, thil hi a theihnghilh reng mai a ni. Lo kal rawh, lut ila.." a ti leh a.

Chutih lai chuan inchhung atang chuan Rinzuala chuan a nu chu a rawn ko vak vak mai, rang takin Pi Lapuii chu a tlan lut nghal a, kei erawh ka la lut chuang lo. Chu chu remchangah la in ka tlan ta daih a, dawr lo awm hmasa berah chuan ka tlan lut a. DAwr nghaktu bulah chuan phone hman ka dil a, a phal hlauh mai.

DAvida chu ka awmna ka hrilh a, tichuan darkar chanve vel hnuah a lo thleng a. Motor ah chuan ka lut a, "David, kan let leh angai. Ka phone ka thlauh a, let leh ang." ka ti a. "Nilove, i phone bo thu Police Station ah kan va thlen zawk dawn nia, phone network lam kan bia anga, i SIM CARD pawh kan block dawnnia, a bak chu ka lo buaipui mai ang." tiin min chhang a, chak takin kan tlan ta a ni.

Hlauthawng tak chuan, "Engtin nge a ruang kha i tih?" tiin ka zawt a. "Ngaihtuah buai tawh suh...Pu Lalfakawma hi tunge a nih i hrelo, keipawn ka hrelo. Chuan Renglung khuaah hian kan kal lo bawk..theihnghilh vek rawh." a ti a. "MAhse DAvid.." ka tih lai chuan, "Theihnghilh rawh, engkim theihnghilh vek rawh." a ti leh a, tichuan Aizawl lam kan pan leh tanghal a ni.

********************

MAry chuan mittui tla zawih zawih chung chuan a thil tawn te chu a sawi a, "Khami hnu khan event te, inneih leh sumdawnna avangin ka buai chhunzawm hle a. I zawhna chu tihian ka chhang tawh ang che, thlalaka hlimloh hmel tak a ka lanna chhan chu kha ka thil tawn rapthlak tak vang kha a ni. Robert-a pawh thudik engkim hrilh ka tum a, mahse ka theilo a ni. Kha thil ka tawn khan zan tam min mut tir thei lova, DAvida hming ka hriat ringawt pawh hian hlauhna in ka khat tawh a ni." tiin a mittui chu a hru a.

"Hlau hel si, i that tho sia lawm." tiin Alfred-a chu a nui hak a. A thu tha leh te te a, "Ka hriatthiam loh chu maw..Pu Fakawma resort ah chuan kum khat hnuah iva kal leh tho sia, chupawh i mi hlauh em em DAvida nen tho..enge a chhan?" tiin a zawt leh a. Mary chu a ngawi vang vang a, "Min blackmail a ni." a ti ta mai a, Alfred-a pawh chu a hawi phawk hru mai.

"BLACKMAIL maw? Tuin nge Blackmail che a?"

************************

Hun a lo kal zel a, nikhat chu kan inah chuan present box pakhat hi a lo awm ringawt a. Bawm chhung ka han hawng chu thlalak pakhat alo awm a, ka han en chu ka phu nasa kher mai. Chu thlalak chu Pu Fakawma resort, David-a lei tum ngei mai kha a lo ni a. Tichuan a hnuaiah chiang kelh kawlh hian 'TUNGE HELAI HMUNAH HIAN THI?' tih a lo inziak kuau bawk a.

Bawm chhungah chuan mobile phone pakhat a awm bawk a, mak ka ti ngei mai. Chutih laih chuan Robert-a a lo haw a, "Mary, enge kha kha?" a rawn ti thut mai a. "Aaa..ka thil chah ania, a lo thleng chiah a." tiin dawt ka sawi ta ringawt a, ani pawh chu a kal ve mai a. Ka phone ka phawrh vat a, Davida ka call ta nghal a.

Mahse a tlang thei lo, vawi 3 ka try hnuah pawh chuan a tlang thei chuanglo. Chutah present bawm a mi zawk phone chu a rawn ri ta ral ral mai a, ka han la chhuak nghal a. Ka pick up a, ka tawng hma hma chuan mipa aw hian, "Tunge ka nih tih hriat tum buai duh suh, ka thusawi ang zelin awm ang che. Duhthlan tur i neilo, naktuk ah Renglung khuaah lo kal ang che, cheng nuai 20 lo keng bawk ang che." tiin phone chu  a dah nghal hmak mai a.

Tichuan a tukah chuan pawisa te chu ka la chhuak a, Robert-a hriat loh chuan REnglung khaw lam pan chuan ka kal leh ta a ni. Resort chu ka va thleng a, mi an lo tam khawp mai. Pu Fakawma nupui pawh ka hmu a, min hmuh ka hlauh avang chuan ka biru nghal vat a. Phone chu a rawn ri leh a, "Hello, hei pawisa chu ka lo keng ania." ka han ti a.

"Ka thusawi ang zelin awm ang che, lut la, room no 501 ah khan lu ang che." tiin ka chhanlet hma hma chuan phone chu a dah leh ta daih mai. Ka thleng a, min rawn call leh a. "Pawisa zawng zawng kha TV hnunglam ah khan dah rawh." a ti leh a, a sawi ang apiang chuan ka ti zel a. "Hello, ka dah vek tawh e. Ka kal thei tawh angem?" tiin ka zawt a.

"Thil pakhat tih tur ila nei, darthlalang bula side drawer kha va hawng rawh le." a rawn la ti cheu mai a. Ka va hawng a, a chhungah chuan pistol a lo awm reng mai. "Room ah khan mi tu emaw a lo lut anga, kap hlum ang che." a la rawn ti ta deuh deuh a. "Engmaw? Tumaw ka thah dawn?" ka ti vak vak a, mahse phone chu a dah leh ta hmak mai.

Kawngka chu a rawn inhawng a, David-a a rawn lut hlawl mai. "MARY." tiin min rawn en hu mai a, min rawn pan hnai a. "Enge hetah i tih? Khapa khan a blackmail ve che a ni tiraw?" tiin min zawt ta mai a. "David, call che ka tum a.." ka tih lai chuan thinrim hmel tak hian, "Kum khat chhung khan ka tum char char asin." tiin min vin hrep mai.

Chhang lo chuan ka ngawi reng a, chutah amah bawk chuan, "Phone switch off turin min ti a ni, ka lo buaipui ang...chhuak rawh." a han ti leh a. "David, thil ka tisual dun a. Kan siam that leh a ngai a ni, engtia rei nge min blackmail dawn pawh  a hriat si loh. Pu Fakawma chhungte bulah hian i inpuang mai teh ang, ngaihdam ka dil angai a ni." tiin ka ngen a.

"Mary, lungngai suh..keiman ka buaipui vek mai ang. Min ring lo em ni?" Davida chuan a ti chiam chiam a, chutih lai chuan message a lo thleng a. Ka han en a, "THAT RAWH LE." tih hi a lo inziak kulh mai. "Tunge? Tu message nge?" tiin Davida chuan min zawt leh a. "That tur chein min ti a ni, engtin nge kan tih tak ang?" tiin ka tap a.

"That tur che in min ti amaw? ZAwnga chu ka chhuah lovang, ka that khawp ang." a ti pung pung a. "Mi engzat fakau nge thah i tum a?" tiin ka vin hrep a. Chuah thinrim tak hian min en a, "Mai mai a che, tutan nge ka tih i hria em? I tan vek a nih kha, mahse tunah min kalsan leh si a, engvang nge?" tiin min vin khur khur a.

"Ka hlau a ni, David...nang nena nun hmandun hi ka duh em em thin a, mahse i nu leh pate duhzawng ka nihloh thu min hrilh kha. Khatih lai khan engmah ka dil ngai lo che, ka nuna i lo luh khan engmah ka dil ngai lo che. Mahse tunah hian ka dil duh che, min hmangaih takzet anih chuan inpuang mai ang. Khawngaihin...David." tiin tap chungin ka ngen leh a.

Ka ban lehlam lehlamah chuan a kut pahnih chuan a rawn vuan a, "Ka hmangaih thin che a, tunthleng pawh hian ka la hmangaih reng che. Ka hmangaihna che hi i ringhleh anih chuan, kan inpuang ang..kan inpuang em em ang, ka hmangaih che alawm. Mahse thil pakhat hre reng rawh, thudik chuan engkim a thlak danglam vek dawn...tumah kan lamah an tang bawk hek lovang." tiin hnai takah min en a.

"Ka bulah i awm reng angem?" tiin ka lo zawt leh a. Min rawn fawp thut a, tichuan ka fawp veleh a. Kan duhthawh telh telh a, bungraw thenkhat te pawh kan ti tla nual mai. Tichuan khum lamah min pawm phei a, ka taksa te chu a fawp kual a. Chutia nuam taka ka awm lai chuan pistol a phawrh thut a, min tin ta mai a.

"David, engthil nge.." ka ti dek dek chu min rek vak mai a, "Ka tihpalh Mary, ka him theih nan nang hi that tur che in min ti a ni." tiin lukham chuan ka hmai chu a hup a. Ka ban ka vai na lamah chuan intercom telephone ka ban fuh hlauh mai. Alu ah chuan ka chhu pawp a, khum atang chuan a let thla tawp a. A pistol chu a thlauh va, ka la nghal vat a. A rawn tho leh a, tichuan pistol chuan vawi 2 lai ka kap a. Ka kah zawh rual rual chuan a thi ta nghal a ni.

********************

"Keichuan inpuan kha ka duh a, mahse ka mipa hmangaih tak mai erawh chuan thah min tum ta mai chu ania. Tih theih dang ka nei biklo ani, a chang phei Davida ka that kha Pu Fakawma te chhungkua tana ti ang mai te hian ka inhre thin. Min hrilh teh Alfred, ka thil tih kha thil dik a ni nge nilo?" tiin Alfreda chu a zawt a.

"A dik alawm." tih ringawt chuan a lo chhang a, dawhkana Mary phone bo an chhar, saranga an pack chu Alfred-a chuan a han kawk a, "He phone hi ka pelet che a nih chuan i lawm ngei anga, mahse i lo tiam tawh ang khan, he evidence ka pek che avanga pawisa ka phut zat kha min pe thei nghal la chu ka lawm daih zawk ang mawle." tiin a nui sak a.

"Phone chu min pe let mahla Rinzuala khan an inah ka va kal tih kha a hre ve tho bawk sia. Engtin nge i tih dawn?" tiin Mary chuan a lo zawt leh a. "I sawi tawh kha, Davida i that hi Pu Fakawma te chhungkaw tan rorelna dik i thlen ang ani i tih kha, Rinzuala chuan a ngaihdam loh che i ring em ni?" tiin Alfred-a chuan a zawt a.

Mary chu a ngawi reng a, a phone message chu a rawn ri leh ral ral mai a. A han en a, a lawyer Bena message a lo ni. "Ka ti fel tawh e." tih hi a lo ni a, Mary chu a thaw huai mai. Alfred-a chu a en leh a, "Alfred, Rinzuala nen khan in inpawh viau khan i sawi si a, tinge ani nilova keimah zawk hi min tanpui daih a?" tiin a zawt a.

"Rinzuala chu ka tapui alawm, damdawiinah a awm a. SL Resort-a thil thleng vang khan a rilru a hah lutuk a, depression te pawh a neih phah hial a. Phai lamah treatment tih theihna tha deuh a awm tih ka hria a, mahse cheng nuai 10 angai a. Chuta tang chuan Pu Fakawma thihna aichuan Rinzuala nunna hi a pawimawh zawk tih ka hre thar ta a ni. Tuna ka thil tih mek hi sual ni mahse, heng pawisa te hi Rinzuala treatment tihna tur a nih hi." tiin a lo chhang a.

"Alfred, evidence min pek vang ni miah lovin Rinzuala chu keipawhin ka ngaihtuah takzet a ni. Davida chungchang kha chu engpawh ni se, engpawh lo tise...ka duty ania, ka tihtur ka ti angah ka ngai." tiin a phone a phawrh a. "Aw Hello Assistant, mipa pakhat, a hming Alfred-a ka rawn tir anga, cheng nuai 10 a cash in lo dahchhuak rawh aw..." tiin Alfred-a chu a han en vang vang a, "Nilo, nuai 20 zawk lo dah rawh, RObert-a chu ka lo be mai ang." tiin phone chu a dah a.

Alfred-a pawhin mak a tih hmel kher mai, "Khami ni khan pe thei ila ka ti khawp mai, mahse...hei zanin hian ka pe mai ang." tiin Mary chu a nui sang mai a. "Thiannu, tlaung takin le." tiin Alfred-a chuan a chibai a, kawngka lam pan chuan Alfred-a chu a kal ta a. Chutah Mary phone a rawn ri a.."Hello..ENGMAW? HELLO...HELLO?" tiin a au vak vak mai.

Alfred-a pawh chu a ding leh chat mai a, mangan hmel tak chuan Mary chuan Alfred-a chu a en a, "Alfred, Police ten Bena an man."  ati ta mai a. Chutah Alfred-a phone a rawn ri a, "Hello, tu lawyer maw? Benjamina maw? Tu kutah nge a awm? Inspector Sangtea maw? Awle.." tiin phone chu a dah a.

"Cheng nuai 2 nen Bena chu crime scene bulah man a ni an ti, enge awmzia? Bena chu engtin nge kan khuaah a awm daih theih? Thudik min hrilh zo chian amaw ka tia, thil zep i nei animaw?" Alfred-a  chuan a ti ta khur khur mai. "A..ih...min blackmai tupa khan min rawn call leh a. Pawisa min dil leh a, cheng nuai 50 min dil leh a. Ka pelo anih chuan kha room chhunga cheng nuai 20, TV hnunga ka thuhruk kha police te bulah a hrilh vek tur thu a sawi a, vau nan min hmang a ni." Mary chuan hlauh hmel tak chuan a han ti a.

"Tichuan Bena chu i va tir ta a...engvangin nge i mawl em em a?  Hrep taka, tikha chuan min mamawh tawh lo. I plan ang chuan i kal dawnnia, keichu ka kal dawn." tiin Alfred-a chu chhuah a tum ta mai a. "Alfred, nilo...he buaina atang hian ka talchhuah ngei ngei a ngai a ni. Khawngaihin, a thlawnin min pui dawn hleinem." a han ti chiaih chu Alfred-a pawh a ding leh chat mai.

"Thiannu, engkim hi pawisa hian a chingfel vek thei lo. Engtin nge i mawl em em theih tih ka ngaihtuah mek a ni. Ka pawisa kha i pawisa ngei a ni tih i pawm thlap anih chuan blackmail tu che chungchang pawh kha i sawi tel tur a ni. Blackmail tu che chungchang an zawt che a nih erawh chuan Pu Fakawma hming i lam ri tur a ni. Davida'n Pu Fakawma hi a that tia i sawi anih chuan Davida nena in inngaihzawn ruk thu hi a darh vek ang. Pu Fakawma ruang awmna chu DAvida chauh hian a hria a, mahse Davida chu i that leh bawk si." Alfred-a chuan a han ti leh charh charh mai a.

MAry chu a thaw hak a, zu no khat chu a han tlak leh pawp a. "Blackmail tu che chu tunge anih i hrelova, Pu Fakawma ruang awmna pawh i hrelo bawk. Tumah i thusawi an awih dawnlo.." Alfred-a bawk chuan a han ti leh a. "Chuvang chuan alawm Bena hian nangmah a hire che." tiin Mary chuan a lo chhanglet a.

"Mahse court chuan fiahna alawm an mamawh, information nilovin. I thil hriat lampang a nilo, thudik a ni tih finfiah lam a ni zawk. Pu Fakawma ruang kan hmu thei anih chuan Davida DNA kan hmu thei ngei anga, tichuan DAvida chuan i inngaihzawn thu chu Robert-a hrilh ah a vau che angin kan sawi thei bawk. DAvid-a hi thil tisualtu ber angah kan siamchawp thei a ni, tunah chuan thil pakhat chiah kan mamawh tawh. Sawi rawh, khawnge ruang chu a awm?" tiin Alfred-a chuan a zawt leh a.

"Ka hrelo tak tak." tiin Mary chuan a lo chhang leh a. Chutah thinrim hmel zet hian Alfred-a chuan, "Dawt sawi suh...ruang thukru tu kha Davida nilovin nangmah zawk a ni. Khalai ramhnuai kha darkar 4 lai bona tur khawpa ramhnuai khawkrawk anilo. Tin Davida kha a ke ana i tia, khata tanga tlan bo thei tur khawpin chakna a nei theilo hrim hrim bawk. I thusawi zawng zawng kha ka awih i ring amaw? Mi a angah min ngai em ni?" a ti ta hrep mai.

Chutah a han ngawi leh deuh vang vanga , "Tikhan Lawyer Remruata'n court ah sawi ta se, engtin nge i tih ang?" a ti leh ta daih mai. Mary chu a thinrim kher mai, "Alfred, khawiah nge ruang chu a awm ka hrelo tak tak." a han ti leh a. Chiang tak hian Mary mitah chuan Alfred-a chuan a en a, "Ka ringlo che, Davida ai chuan Pu Fakawma thah nachhan tur i nei tha zawk a ni. Achhan i hre duh em? Pu Fakawma kha chu i tan chuan a hlauhawm a ni..Robert-a'n in inneihna kha a tihtawp i hlau a ni. I lo suangtuah thin, i dream te chu a hlawhtlin loh phah anga..chuvang chuan i dream i tih hlawhtlin theih nan Pu Fakawma kha nangmah zawk hian i thah angai a ni...ka sawi dik em?" a ti ta fak fak mai le.

Mary chu a hlauthawng kher mai, mahse Alfred-a chuan ala sawi zo lo. "Pu Fakawma khan thudik a sawichhuah i hlau a, khamah khan i namthla ta a ni. Lungkarah khan Davida ke chu a tang ngei a, tichuan i chhuk a i zuk pui a. Tichuan Davida chu eng tin tin emaw thlemin i i chhoh tir leh a, a chhoh hnu chuan i hawi thla leh a, mahse Pu Fakawma chu i hmu ta miah lova. Abak thildang thleng erawh tuman an hrelo, nangmah chiah in i hria." a ti leh ta mai a.

Rum tak chuan Mary chuan a en a, "Court chuan kan thil hriat cahuh nilovin finfiahna zawk a ni a duh, nangmah ngei pawh i saiw kha.." a ti ve ta fak fak mai a. Alfred-a chu a nui suk mai, "Ka manchhuak leh ta che, rinhlelh hmel deuh chein ka tawng a...ka prove theilo angin i sawi a, mahse i pha leh ngai chuang silo. Anih chuan, ka sawi dik tihna animaw?" a ti leh ta daih mai.

Mary pawh chu a nui suk a, "Alfred, crime scene atang khan mipa puitling pangngai, ruang lehnghal, kg 80 chuang zet chu kei hmeichhia hian ka dahbo theih i ring ami?" tiin a zawt a.

"Ring chiah nang."

"Anih chuan ka thil sawi kha thudik vek a ni, Pu Fakawma kha DAvida thah a ni a, chuzawng chu ka thil hriat chu a ni."

"I hnen atang hian dawt sawi zir ila a tha viau ang. Robert-a kha gay ani tih min hrilh miah lova, keimahin ka hre chawp a ni. Davida kha i ex a nihloh thu i sawi a, mahse thudik ka sawi tir leh bawk che a. Tunah pawh hian thuruk zep ila nei tih ka hria, min hrilh dawn em?" Alfred-a chuan a han tih leh a, MAry chu a ngawi reng mai.

"I ngawih rengna khan thil a ti chiang tulh tulh zawk ania, blakmail tu che khan DAvida kha that turin a ti lo che. Chuan Davida khan thah a tum lo bawk che, engkim i ruahman lawk vek a, Davida kha i that ta a ni." a ti ta phiar phiar mai. Thinrim tak hian Mary chuan, "Confi taka dawt i sawi avang khan thudikah a chang thei chuanglo." a ti khur khur a.

"Huh...i pawmloh avang khan thudik hi dawtah a chang thei bik chuang lo." tiin a lo chhang let a. "Davida khan Pu Fakawma a that, chu chu thudik a ni. Tin Davida khan min thah a tum bawk, chuzawng chu ka hria." tiin Mary chu a sa tawh kher mai. "Blackmail tu che khan in pahnihin a blackmail che u a nih chuan pawisa kha inpahnih in a dil an dil ang che u, mahse Davida khan eng pawisa mah a keng velo." tiin Alfred-a chuan a lo chhanglet leh a.

"Engtin nge i hriat?"

"Davida zawk khan Pu Fakawma te chhungkaw hnena inpuan a duh a ni."

"Engtin nge i hriat ka tih chu?"

"Davida khan blackmail tu bulah khan thudik sawi turin a intiam a ni."

"Engtin nge i hriat..min hrilh vat rawh."

Alfred-a chuan meizial a phawrh chhuak a, lighter ah chuan a han sawh muk te te a. Chutah muang chang hian a rawn hawi chhuak a, "Achhan chu maw...kha blackmail tu che kha...keimah hi ka ni." a ti ta mai a. Mary chu a meng bial kawk kawk a, "Nang...mi tenawmpa." tiin a au vak vak mai.

"Rinzuala tan...in pahnih khan ka blackmail che u a ni."

"Min fiam kual vel mai mai em ni a?" tiin Mary chuan a kawrawmah a tham a. Alo nui hak a, "He game hi keima tan a ni a, mahse a dan leh dun te chu nang hian thlakin Davida chu i that ta a ni. Kham ni khan DAvida chuan pawisa a neihloh thu leh police hnena report pawh pawi a tihloh thu leh Pu Fakawma bo thu hla ah hian inrawlhna a neih loh thu min hrilh a. Engkim tuar a inhuam thu leh Pu Fakawma chhungte hmaa inpuan a tum thu a sawi bawk. Tichuan room ah khan in inhmu ta a, inpuan a duh thu a sawi a. A hmangaih em vang che a hrilh che a nih thu a sawi a, mahse nangchuan i hlat tulh tulh si, khaatih lai khan Davida khan phone kha ala on reng a, engkim ka hre ve vek thei a ni." a ti leh ta siah siah mai.

*********************

"I tan chuan pawisa chauh i a pawimawh a ni, ani kha kei aiin i thlang a. Robert-a khan gay a ni tih i hre reng a, mahse i thlang zawk tho. In inneihna pawh a thleng lovang tih i hlau va, Pu Fakawma pawh i that a nih kha. Thudik thup nan kei hi min hmang tangkai a, Rinzuala'n a hmuh hunah che chuan khang i lo suangtuah thin nun ang zawng zawng kha i nei thei dawn silova tiraw? Mary, min kalsan khan i tan thil diklo tam tak ka ti tih ka hrechhuak a, mahse nang erawhin min ngaih thah hmak si. Chuvang chuan keichu ka inpuang dawn a ni.." tiin a hrilh che a.

Nang chuan thiam takin i lo thlem leh vel a, "Kei aia tha i phu, i laka ka kal hran tak nachhan chu Cindy nena in inkara buaina thlentu nih ka duhloh vang a ni. I hlimna hi ka duh ber, kan inhriatthiam tawn angai. Mahse nang chuan min hrethiam lo, kha kum khat chhung kha ka tan a harsat zia i hria em? Min ngaidam thei angem tiin ka ngaihtuah thin a, a chhan chu nanglo chu tumah midang ka neilo a ni. Nang chauh hi ka hmangaih che, chutia inpuan i duh anih chuan kan inpuang ang, ka hmangaihna fiahna tur anih chuan kan inpuang ang. Mahse thil pakhat hre rawh rawh, thudik chuan engkim a thlak danglam anga, tumah kan lamah an tang dawn lo bawk." tiin tap chungin i hrilh a.

Ani chuan, "Min awmpui reng angem?" tiin a zawt che a, tichuan nang chuan chhang lovin a hmuiah i fawp a. Duhtawkin khumah chuan in khawsa dun ta a, mahse chutih lai chuan intercom telephone chu chuh thutin Davida lu ah chuan i chhu ta a, Davida chu khum atang chuan a tla ta a ni.

*******************

"Khatah khan khalai hmunah khan ka awm ve reng a, tichuan David-a t(r)e ri hriat khan engthil emaw tak chu i ti a nih ka ring a. Pawisa zawng zawng pawh chu bag ah i khung leh vek a, tichuan room chhung chu i ti hnawk ta vak a. Khatih lai khan room lam pan khan ka rawn tlan a, ka rawn thlen dawn chiah ah chuan silai puak ri ka hre ta a ni. Tichuan mipui an lo pung khawm a, keichu ka kal bo ta a ni. Secon 2 lek, second 2 lekin lo thleng hma ila chu room chhungah khan ka rawn lut hman anga, DAvida i thah avangin ka man thei che nimai tur ania. Mahse man i nih chuan Rinzuala ka chhan thei dawn silo, chuvang chuan engtin mah ka che talo a ni." tiin Alfred-a chuan engkim chu a sawi ta vek mai.

Mary chuan thinrim tak hian, "Min pui turin ailo kal amaw ka tia, mahse minlo fiam kual zawk amaw?" a ti khur khur a. "Information zawng zawng ka pek che kha, nang leh kei hian heng thil zawng zawng te hi sum vang chauhva ti kan ni." tiin Alfred-a chuan a lo chhang let a. "A tha e, anih chuan ka plan hi lo ngaithla ve rawh le. Ruang a awmloh chuan, tihsual engmah ka neilo tihna. Tunah hian Pu Fakawma thihna nen hian inzawmna engmah kan neilo." Mary chuan a lo ti a.

"Mahse Davida thihna nen hian inzawmna in nei thung alawm, Bena an man atang khan i game khelh lai hi chu a tawp daih tawh. Tualthattu i nih thup nan engkim chu Davida thil tih vek anga i lantir angai a, a awmzia chu Davida hi tualthattu anga a lan theih nan Pu Fakawma ruangah chuan evidence engemaw tal hnutchhiah a ngai a, chumi thilah chuan keimah chauh hian ka pui thei che. Thiannu, engkim hi ka kutah a awm vek ania." tiin Alfred-a chuan a chhang a.

"Khatia min vau avang khan ka tlawm mai i ring amaw?"

"Darkar khat lek pawh vauna leh tihthaihna angah i ngai ania tiraw? Pu Fakawma nupui Pi Lapuii chantur kha han ngaihtuah teh..kum 1 leh thla hnih leh ni 17 chhung a pasal bo chu a zawng reng thin asin. Rinzuala tawrhna te kha ngaihtuah teh, a natna sual let chungin harsa takin apa lo haw leh hun chu beisei bo takin a la nghak mek asin."

Mary chu a sa tawh kher mai, thinrim tak hian Alfred-a chu en in, "Chhuak rawh..eng pawisa mah i dawng lovang. Pu Fakawma ruanga evidence i hnutchhiah hma lo chu i hlawh engmah ka pe lovang che, i hria maw? Chumi hma zawng chu Rinzuala pawh i chhan thei hrih dawnlo anih chu, i hria maw?" a ti ve ta siah siah mai a.

Chutah a han nui vel a, "Chuan maw...engkim hi ka kutah a awm zawk aw..." a han ti leh a. ZAwi sap hian Alfred-a chuan, "Khawiah nge ruang chu a awm?" tiin a zawt leh a. "A lo tlanchhe hla hleinem, kawngpui a lo pawh mek tawh a. Hnunglam atangin thingtum in ka hlap a, a thi ta anih kha. KAwngsir lamah ka hnuk phei a, kawng an laihthat mek na lamah chuan ka hnek phei zel a. Tichuan lei laih khuar sa a lo awm a, tah chuan ka phum ta a nih kha." a lo ti sam et mai.

Alfred-a mittui chu a rawn tling teuh mai a, "Engtin nge khawngaihna tel miah lova i thah theih zawk a?" tiin a zawt a. "Hmmh...ka tih angai alawm. Enge ni vak? Hmalam kan pan zel angai miau si a nih hi." tiin a lo chhang leh a. Alfred-a chu a inher a, chhuah a tum a. "Lo ding teh." tiin Mary chuan a ko ding leh a.

Alfred-a chu ava hawi let a, "Eng infiamna mah min khelhpui tum hlek tawh suh ang che. I account ah nuai 25 ka rawn transfer tawh a..i la hria em...thamna...min vau anih vaih chuan thamna i lak thu hi ka sawi vek ang. KA sawi kha hre reng rawh, engkim hi ka kutah a awm ania. Tikha chuan, CASE CHU CLOSE A NI TA." Mary chuan a han ti leh a.

Chutah Alfred-a chuan rum zet hian Mary chu a melh a, stool a la a. Lawnin fire sprinkler chu  ahan herh hawng leh a,a chhunga voice recorder lo invuah chu a phawi a. A chhuk a, recorder chu a lek kang a. A awmzia chu Mary thusawi zawng zawng kha a lo in record vek tihna a nih chu, a tirah khan Alfred-a khan baterry phawi pah khan a lo vuah ru tihna a ni.

A nui suk a, "Ni e, case chu close a ni ta." a han ti ve leh a, Mary chu a mangang kher mai. Alfred-a chu chhuah a tum a, Mary chuan umzuiin, "Alfred..Alfred..nilo..ding teh. Engzat nge i duh? Nuai 10, 20, 30..engzat nge i duh?" a ti vak vak a. Mahse Alfred-a chu a ding duhlo, a kal lui zel tho va.

Mary chuan apawt leh a, a kawr awmah chuan a tham a. Alfred-a chuan chiang tak hian a mitah lo enin, "Ka tih angai ani...enge ni vak, hmalam kan pan zel angai miau si a nih hi." a ti ve ta sak mai. Alfred-a chhuah a tum chiah chu Mary chuan silai a phawrh a, a tin ta mai. Alfred-a chu ava hawi let a, Mary chuan a lo la tin reng a.

Chutah Alfred-a chuan kawngka  a hawng a, police an lo ding thup mai. An rawn lut a, Mary chu an va pan hnai a. An zinga SI pakhat chuan, "I silai kha lo la rawh le." a ti a, an laksak ta a. Alfred-a erawh a chhuak a, a hawi kir eih lo. SI bawk chuan, "Pu Lalfakawma leh Inspector David Lalmuansanga thah thubuaiah man i ni." a ti leh a.

Mary chuan ring tak hian, "Nilo..thil diklo a awm a ni. In hresual a ni, ka sawifiah thei." a ti vak vak a. SI chuan, "A pawi khawp mai, evidence tha tak kan nei a ni." tiin a lo chhang leh a. "Alfred Zothanpuia sawn min vau a, inpuang turin min ti a ni. Ka lah atangin cheng nuai 25 lai mai thamna ala bawk, Sub-Inspector Alfred Zothanpuia saw corrupt a ni." tiin Mary chu a au vak vak a.

SI chuan chiang kelh kawlh hian, "Min ngaithla teh ka pi, Sub-Inspector Alfred Zothanpuia chu kei hi ka ni. Renglung Police Station, Mizoram State Police." a ti ta mai a. Mary chuan a kawr hma a hming inziak chu a en a, ALFRED ZOTHANPUIA tih hi chiang em em mai hian a lo inziak a. Chutah amah bawk chuan, "Tuna i biak zawh tak kha chu Lalrinzuala, Pu Lalfakawma fapa zawk a ni." tiin a hrilh leh a, MAry chuan mak a ti kher mai.

************************

Ni e, Alfred-a tia kan sawi char char kha Alfred-a nilovin, Rinzuala zawk a ni. Cancer natna neiin a hrisel lo hle a, stage 2 hial a kai tawh a ni. Mahse apa Pu Fakawma chuan fuih hram hram in, "KAn lungngaihnate leh kan harsatnate hi midang lakah chuan thil hote ang pawhin alang thei, chuvang chuan tumah hi ring ngai suh. Eng dinhmunah pawh ding la, i pawm thiam a ngai. I sual let angai, i beih let angai a ni. Tin, a pawimawh ber chu maw ka fapa...tawm suh, tlawm ngai suh ang che." tiin a fapa chu beidawng lo turin a hrilh thin a ni.

Tichuan Pu Fakawma chu a bo ta ngei a, Rinzuala hian SI Alfred-a hnenah chuan complain a theh lut a. Khatia Mary, Cindy anga insawi an phurh tuk khan magazine pakhat ah Ralte Construction neitu Robert-a leh a nupui tur Mary thlalak chu Rinzuala chuan a hmu fuh a, Mary chuan dawt a sawi tih a hre ta a ni.

Tichuan Alfred-a chuan Rinzuala chu a puih theih loh thu a sawi a, mahse Rinzuala erawh a tlawm duh lo. "Nang chu i tlawm a, mahse kei chu ka tlawm ve ngai lovang. He cancer natna pawh hi ka pa vang liau liau in ka sual let thei a, he case hi ka buaipui chhunzawm zel ang. Ka pa in a phone  ahmanna hnuhnung ber pawh ka zawng chhuak tawh, plan ka nei a ni." tiin a hrilh a.

Chu plan chu hei hi a ni..."Kei hi Alfred a ka ni ang..Lalrinzuala, Lalfakawma fapa chu Police Sub-Inspector Alfred Zothanpuia a ni anga, thawnthu ka phuahchawp dawn a ni. Ka chunga thil thleng zawng zawngte behchhanin dawt ka phuah kual anga, Alfred-a chu kei hi niin Rinzuala chu ka siamchawp dawn a ni. Chu dawt te hmang chuan thudik ka hai lang dawn a ni, duhthlan tur dang ka nei lova, thil diklo a ni hek lo." tiin Rinzuala chuan  adil a.

"A hria che sia, a hmuh tawh che kha?" tiin Alfred-a chuan a lo zawt a. "Alfred Zothanpuia hmel hi eng ang hmel nge a hrelova, tin keipawh khan mask ka vuah a, lukhum a khum bawk a, ka mit chiah a hmu a ni." tiin a chhang a. Tichuan Rinzuala chuan contact lens vuah in a mit rawng chu a thlak a, lem chu a chan chhunzawm ta a ni.

******************

Mary man a nih hnu chuan Rinzuala leh anu, Pi Lapuii te chu Mary'n Pu Fakawma ruang a dah thatna lam pan chuan chuan police thenkhat te nen an kal a, Pu Fakawma ruang chu leichhuah leh a ni ta a ni. Rinzuala chuan apa ruang tawih chhe tawh tak chu a en vang vang a, "Kan chak e, hnehna kan chang ta e." tiin a phun sap a.

************************

THE END