UNHOLY CONFESSIONS (MIZO FICTION TEEN SLASHER/HORROR STORY) Written by : Aaron Malsawmdawngzuala WARNING : 18+ Chapter - 7 (LAST)

 UNHOLY CONFESSIONS

(MIZO FICTION TEEN SLASHER/HORROR STORY)

Written by : Aaron Malsawmdawngzuala

WARNING : 18+

Chapter - 7

(LAST)

*******************

Nghaka leh Siama te chuan factory chu an thleng ta a, a reh em em mai a, a bul vel pawh factory rauh san tawh a nih vang pawh aniang, a ramhnuai vek tawh. Kawngka chu an han hawng chhin a, a lo inkalh lo hlauh mai. "I tiang kha hum nghet tlat ang che, engpawh kan tawk thei ania." tiin Nghaka chuan a han hrilh nawn leh a.

Tichuan a chhung chu an lut ta a, a thim hian a thim deuh ruih mai. Engmah hmuh theih loh khawp a thim chu nilo mah se, eng a tlem em em a, dim light thenkhat in on chu a awm ve nual mai. An pahnih chuan an kal zel a, "Kan au vak mai dawn em ni? Nge ti hian kan zawng tawp dawn?" Siama chuan a han ti a.

"Nangman au rawh." Nghaka chuan a lo ti a. An tiang ve ve keng chuan an han inhnung chhawn a, an inring dun tawh khawp mai. "Kan lo thleng e, police pawh kan hrilh lo...lo chhuak ta che." tiin Siama chu a han au vak vak a, a khawk rum rum mai. Mahse chhanna an dawng lo, "Lo chhuak ta che." tiin Nghaka pawh chuan a han au ve bawk a.

Chhanna an dawn tak silovah chuan Siama chuan, "Kan inthen hrang dawn em ni? A chhung hi a zau angreng si a.." a han ti a, mahse Nghaka chuan a lo duh lo nasa mai. "I mawl em ni? Kan inhloh vaih chuan he tualthattu hian min that ve mai anga sin, kal dun zel ang." a lo ti vat a. "A tha alawm, nih chuan kal ila." tiin a lo chhang a.

An kal pah chuan Nghaka chuan, "Siama..police kan lo hrilh zawk lo a ni...keichu kan thil tih hi a fuh ka ring lo." a han ti nuah nuah a. "I dawih emai, tinge chuti si min rawn zui." a lo ti hrep mai. Khawl mak deuh deuh, hlui hmel zet zet hi a awm teuh bawk a. A chhung chu zau tak a ni a, kum 5-10 vel chu rauh san a ni tawh ngei ang.

Dawhkan pakhat ah chuan kawrlum niawm tak hi Siama chuan ava hmu a, "Enteh saw..." tiin Nghaka chu a kawh hmuh a. An pahnih chuan an va pan ta a, Siama chuan chu kawr lum chu a han en chiang a, jumper dum a lo ni. A han la kang a, jumper hmaah chuan chiang em em hian SHADOW X tih chu a lo inziak a.

"A la thar tha phian mai...tu ta nge mawni le?" Siama chuan a han ti nuah nuah a. "Tualthattu ta....anih loh pawhin factory hman a nih lai hian tu emaw hnathawkin a hnutchhiah a ni ngei ang." tiin Nghaka chuan a lo chhang a. Siama chuan a han hnim a, "Perfume rim a nam, chubakah a bal lo emai...a awmna a la rei hauh lovang." a han ti leh a.

Nghaka chuan thil hriat chhuah zawk nei niawm tak hian, "Ehe...SHADOW X..ka hriat hnu a ni tlat." a han ti deuh thut a. "Enge awmzia?" tiin a lo zawt vat a. "Professor Lalchungnunga College kha...thla 6 liam ta a, an college farewell after party a an student pakhat thihna video viral vak kha ila hria em?" Nghaka chuan a han ti leh a.

"Hria e...ngati nge?"

"Video kha i en ve tiraw?"

"En ve e."

"Kha jumper ang chiah chiah kha a ha."

"Tu chuan maw?"

"Aww...tualthattu ber khan."

Siama pawh chu a han ngawi vang vang a, "Ehe...ni dawn tak." tiin jumper chu a han en leh a. "A awmzia chu..kha tualthattu bawk kha ani chiang mai, tuna Zothana leh Liantea kidnap tu hi." Nghaka chuan a han ti leh a. Siama chuan a lu a bu nghauh nghauh va, "Anih leh Zothana leh Liantea te hi an la dam i ring em?" tiin a han zawt a.

"Ka hre lo, phone ah kha chuan kan pahnih hian helai hmuna kan kal a nih chuan damin an chhuak ngei ang a tih kha." tiin a lo chhang a. "Umm..kal zel phawt ang." tiin Siama chu a kal leh nghal a, Nghaka chuan a zui ve leh a. An kal zel hnu chuan chhuat a tu emawni, a kawng achin hnuailam zawng chhuat hnuaia lo awm, a chung lam zawng chhuata lo bawk chu an va hmu ta.

"Ehe..saw..saw mihring ani em?" tiin Nghaka chuan a thianpa chu a han kawh hmuh ve thung a, Siama pawh chuan mak a ti kher mai. Zawi muang chuan an va pan hnai dun a, "Hey...tunge i nih?" tiin Siama chuan a han au vak a. Mahse chupa chuan a chhang lo, che miah lo chuan ala bawk reng a.

An va pan hnai zel a, "Siama...Zothana ava ang ve.." tiin Nghaka chu a ngaih a that loh hmel kher mai. An va thlen nak chuan an thianpa, Zothana ngei mai chu a lo ni a, a beng chhungah chuan fanghmir lian em em mai hi an lo khat vek mai. A hmai chu te reuh te te hian a bawl khat vek mai a, fanghmir sehna a ni.

Siama chuan ring zet hian, "Nilo..nilo..Zothan.." tiin va pan a tum a, mahse Nghaka chuan a lo pawt bet a. "Kal suh...fanghmir an tam lutuk, fanghmir sehhlum a nih hi." a lo ti a. Siama pawh chu a ding a, a mittui a tla zawih zawih mai. "Siama...chhuak ang, police va hrilh mai teh ang." hlauhthawn hmel tak chuan a han ti leh a.

Siama chu a thinrim kher mai, "Teuh lo mai....pen khat pawhin ka tawlh dawn biklo. A ngam anih chuan min hmachhawn rawh se..helai hmun atang hian ka chhuak lovang." a ti pung pung mai a. Chutah inchung te chu enin a hawi kual a, "Zawnga..lo chhuak ta che, lo chhuak rawh." tiin a au vak vak mai.

"Siama...inlak pa vak a hun lo ania...chhuak vat zawk ang." tiin Nghaka chuan a au vak vak a, mahse Siama chuan a ngaithla duh lo, a thinrim takzet. Tiang chu a vai vut vut a, a vei kual chhen bawk a. A thianpa, a kalpui Nghaka chu a ngaihtuah tawh reng reng lo. "Mipa i nih chuan min rawn hmachhawn rawh...insual ila, ka that ve khawp ang che." tiin a pawr kher mai.

Chutih lai chuan Nghaka chu a t(r)e thawt a, "Ana lutuk..Siama.." a ti vak a, Siama chu ava hawi let nghal. Nghaka keah chuan hrui hi a lo intawn bet a, "Enge awmzia?" ava ti nghal a. "Ka hrelo...hrui hi a rawn invet ringawt, ka ke ah hian...a invet nghet lutuk, fimkhur rawh, thang a ni ngei ang." tiin Nghaka chuan a lo chhang a.

Siama chuan ava pan a, mahse hrui chu a inpawt thut mai. Nghaka chu a bawk thlawp mai, "Nghaka...nilo." tiin Siama chu ava tlan phei a, mahse hrui chu amahin a inpawt leh vak mai a, Nghaka chu a hnuk phei ta daih mai. Nghaka hlau lutuk chuan, "Siama...Siama..min chhan rawh." tiin a au vak vak a.

Mahse Siama chuan a man hman lo, room pakhat, kawngka lo inhawng sa ah chuan Nghaka chu hrui chuan a hnuk lut ta daih mai a, room chhung lah chu a thim em em mai lehnghal. Kawngka chu a inkhar hmak mai a, Siama chu ava thleng hman lo chiah chiah. Kawngka chu a chum bur bur a, "Nghaka...nghaka, i tha em?" tiin au vak vak a.

Mahse a thil hriat zawng chu Nghaka na tuar thawm ri chauh a ni, "Nilo...avan pawi tak." tiin Siama chu a thlan a tla buah mai a, a mangang kher mai. Kawngka chu hawn a tum a, mahse a thei thak lo. A phone phawrhin police call mai chu a tum ta a, mahse signal pakhat mah a lo awm lo.

Pawna chhuah tum chuan pawn lam chu a pan leh a, mahse an luhna ber kawngka chu pawn lam atangin a lo inkalh daih tawh hi a lo ni. A pawr tawh lo kher mai, a tah a chhuak takzet tawh zawk. A tiang chu a hum nghet sauh va, "Hey...min fiam kual mai mai suh aw...ka thin i ti rim ange.." a han ti vak vak a.

Mahse a tawng chu  a khawk rum rum ringawt a, chhana erawh engmah a dawng lo. Hruiin Nghaka a pawh luhna kawngka lam chu ava pan leh ta a, a chum vak vak a. "Nghaka..Nghaka...i awm em?" tiin a han au leh vak vak a, mahse Nghaka chu a reh hmak mai a, thawm engmah a awm lo.

Kawngka chu a vaw vak vak ringawt a, mahse a inhawng thei der mai silo. A han tlawh leh chiam a, chutah a tlawh hawng thei ta hlauh mai. A chhung chu a thim em em mai a, ai mit thlawn chu nep te a ni. A phone flash light chu phawrhin a en kual a, bungraw hlui deuh deuh bak engmah a hmu lo.

A en kual zel a, "Nghaka...i awm em?" tiin a han au leh a, mahse a ngai te ang bawkin chhanna a dawng chuang lo. Chutah kawngka chu a inkhar thut mai a, a phu nasa kher mai. "Hey...tunge i nih? Rawn inlan ta che...ka vaw hlum palh ang che aw.." a han ti khur dar dar a, a mittui a tla phung tawh mai.

A han en kual leh a, mihring thaw leh hak ri te chu a hre leh thin. Tichuan chhuat lam chu a han en a, engemaw tle zeuh hi a hmu tlat mai. A va pan hnai a, a han enchian chuan Nghaka zungbun a lo ni. Thisen a lo kai lehnghal a, a thianpa Nghaka chu a dam a ring tawh hauh lo. Chutah hnunglam a han hawi leh chiah chu a hma zawn takah chuan X chu a thuam famkim nen a lo ding run mai a, chet a lak hma chuan Siama ka chu a hup thut a, Siama chu a zal ta riai riai mai.

***************************

Abawihi chu a harh a, chhuat vawt tak maiah chuan a lo mu reng mai a. Rang takin a tho va, a lu chu na a ti kher mai. A han hawi kual a, a hma zawn a, ft 12 vela sangah chuan thir len atanga siam, bawm ni awm tak, mihring leng tawk tur vela siam, kil li nei hi a lo awm a. A chhungah chuan Timothy-a chu kekawrte nen chiah awmin a lo mu a, bawm chu thirlen atanga siam a nih avang chuan a lang tlang thei vek a ni.

Bawm chungah chuan thir len tho, net angreng deuh hian a inkhuh bawk a, a chungah chuan bati tam tak, 200 chuang vel zet chu a awm bawk a, vum thur mai. Timothy-a taksa chu thirzai hian a invet khat vek bawk a, a rek em em lehnghal. Bang kilah chuan TV tereuhte, hlui hmel zet hi a awm bawk a. Tichuan a bul lawkah chuan glass box bal zet chhungah hian Mary chu nikhaw hrelovin a awm bawk a, glass sirah chuan pipe, thir atanga siam bawk chu a invuah bawk.

Abawihi chuan a hrethiam lo em em a, glass box chu ava pan a. Glass chu a beng vak vak a, "Mary...Mary...harh rawh...harh rawh..harh vat rawh." tiin  a au vak vak a. Mary chu a rawn harh ta, a lu na ti lutuk chu a dawm vawng vawng mai. Tichuan Timothy-a awmna thirlen bawm chu a han en a, "Timothy...i harh em..Timothy." tiin a au vak vak bawk a.

Mary chu a rawn meng a, glass box chhah em em chhungah a lo awm reng a hmuh chuan mak a ti kher mai. Abawihi chu  ahmu a, "Abawih...min chhuah tir rawh...min chhuah rawh...ka chhuak duh." tiin glass chu a beng vak vak a. Abawihi chuan glass box chu a han en fiah nghal a, mahse hawnna lai tur engmah a hmu lo.

Hmanraw hman tur a han zawng a, engmah a hmu mai silo. Chutih lai chuan Timothy-a chu a rawn harh a, "Ehe..enge awmzia...tinge hetia ka awm." tiin a au nghal chul mai. Thirzai chuan a taksa zawng zawng chu a lo inphuar vek bawk si a, tal chah tumin a han tal vak a. Mahse thir zaiah chuan current a kal thut a, a khur ta cher cher mai.

A han che lo a, a reh ve leh mai a. "Enge awmzia? Min chhan ru...min chhan ru." tiin a au vak vak a. Mary chuan a bialpa chu a han en chho va, "Timothy...enge awmzia? Ka tawng i hrethei em?" tiin a han au va. Timothy-a chuan a tawng chu a hre thei, mahse a awmna a san em avang chuan a hmu ve thei lova, a dak thla thei bawk hek lo.

Chutah TV chu a rawn in on a, X-a chu a rawn lang leh ta. "In dam tlang maw...Abawih, Timothy...Mary, inhmuh ava khat hlawm ve." a rawn ti ta mai a. Abawihi leh Mary chuan TV chu an en thei a, Timothy-a erawh chuan a hmu ve thei lo. "Tunge? Tunge tawng kha? Min chhuah rawh..Mary..Mary..min chhan rawh." tiin Timothy-a chu a au chel chul mai a.

X bawk chuan, "Tuman zawhna min zawh tum duh suh u, hei hi video record chawp vek a ni. Tunah hian in bulah mi pahnih dang an rawn tel ve leh dawn a, in hmelhriat a ni nge nilo lo en ang che u." a rawn ti leh a. Tichuan bawm pakhat hi trolley ah thim zing atang chuan a rawn lir phei a, Abawihi hma zawnah tak chuan a tawp chat mai.

Bawm chu amah in a inhawng a, Siama leh Nghaka te pahnih chu an rawn tla chhuak nawlh mai. An pahnih chuan an rawn harh ve nghal a, "Nghaka..ka va han lawm tak em." tiin Siama chuan a kuah nghal thlawp mai. Mahse Nghaka chuan Abawhi chu a en vang vang a, "Ehe...Abawih, nangmaw?" a ti hu mai.

Siama chuan Abawihi chu ava en ve a, mahse tunge a nih a hre ve thei mai lo. Abawihi chuan mak ti zet hian Nghaka chu a en a, "Nghaka...enge hetah i tih ve?" tiin a lo zawt ve bawk a. "Chu chu keipawh ka zawhna a ni...enge hetah i tih? Enge awmzia? Engthil nge thleng hi?" tiin alo zawt let a.

Mary chuan zawi sap hian, "Nghaka.." a rawn ti ve bawk a. Nghaka chuan ava en a, "Mary...nangpawh maw?" a ti hu mai a, chutih lai zawng chuan video chu a in pause a. Siama chuan Abawhi chu a han en vang vang a, "Nghaka, henu hi hmana i bialnu thin kha a ni em?" a han ti a.

Nghaka chuan a lu a lo bu nghat mai, "Hey..engthil nge thleng a, tute nge in nih? Enge awmzia...min chhuah vat teh u." tiin Timothy-a chu a lo rak ve chul mai. Tichuan video chu a rawn in-play nawn leh ta, "Ngaithla rawh ule..tunah hian in panga khan a mal te te in in thil tih sual in puang ang." X-a chuan a rawn ti leh a.

"Engmah tihsual kan nei lo...nangmah anih kha thil tisual tu chu...tual i that a, kan thianpa pawh i that." tiin Siama chuan a lo vin vak mai. Mahse Abawihi chuan, "Record chawp a nih saw...kan tawng a hre thei lo." a lo ti vat a. X-a chuan sawi zawm leh in, "A hmasa ber atan chuan Timothy-a'n a puang hmasa ber ang." a ti leh a.

"Engmah sual puan tur ka nei lo...engmah tihsual ka nei lo." tiin Timothy-a chu a au vak vak a, mahse a tal na lamah chuan thirzaiah current a kal leh ta tlat mai a, a khur leh ta cher cher mai. A chau tawh hle a, "Ana...a hrehawm...min chhuah rawh...min chhan teh u." a ti chul mai a. "Timothy, i chet apiang khan current-in a man che ania, che tawh suh." tiin Abawihi chuan a hrilh a.

X chuan a sawi zawm leh a, "Minute 5 chhung hun i nei..Timothy, minute 5 chhung ka nghak ang che. I chunga bati tam tak kha i hmu em? Bati awmna thirlen kha a rawn sa(hot) vak dawn a, bati kha a rawn tui tan anga, i taksa ah a rawn far ang. Chu chu hremna a ni, i thil tihsual vanga hremna chauh a ni. Khami chhung khan i inpuag ang, tichuan i inpuan zawhah in panga zingah khan ngaidam tu tur che an awm a, a ngaidam che a nih chuan i awmna atang khan i chhuak thei ang. Mahse a ngaidam lo che anih erawh chuan khang bati zawng zawng far ral thak thleng khan khalai hmunah khan i tang anga, i nunna i chan bawk ang. Minute 5 chhung ka ngawi dawn a, tichuan minute 5 hnuah midang an inpuang leh ang. Hun in a nghak lo che, inpuang rawh..a nih loh chuan i thi ang." tiin video chu a tawp ta daih mai.

Tichuan Timothy-a awmna zawn, bati awmna thirlen chu namen lo hian a rawn sa ta vak mai a, a sen vek thei hial mai. Bati chu a tui zawih zawih a, saruak deuh thaw a awm, Timothy-a taksa ah chuan a far ta kauh kauh mai le. "Asa..asa lutuk..asa lutuk." tiin a rak vak vak a. Mahse a chet apiang chuan thirzaiah chuan current a kal zel mai si, a khur leh cher cher a.

"Nilo...chhan rawh u, chhan hram teh u." tiin Mary chu a rak nasa kher mai, Siama leh Nghaka chuan chet lak ngaihna an hre der lo mai a. Abawihi chuan a mitthla in X-a'n Sawmtea a inpuan tir lai te chu a han hmu a, "Timothy...inpuang vat rawh. Kan zinga mi in a ngaihdam dawn che chuan tupawh nise kan ngaidam nghal ang che, che tawh lo la. Inpuang rawh, tichuan i him a nimai." tiin a hrilh a.

Mahse Timothy-a hlauthawng bawk si chuan, "Ka hrelo...ka hrelo tak tak..enge ka tihsual ka hrelo." a ti chel chul mai a. Abawihi chuan Nghaka leh Siama te chu enin, "Engemaw tal ti teh u..khawngaihin." tiin a tap pur mai. Siama chuan hmanrua a zawng a, mahse engmah a hmu der mai bawk silo.

Nghaka chu bangah chuan lawn a tum a, mahse han lawnna mai tur a hmu lo tlat mai. Tih ngaihna dang a awm lo, mangang tak chuan Timothy-a na tuar lai chu an thlir ringawt mai a. "Timothy...inpuang mai rawh." tiin Siama pawh chuan a au vak vak a, bati lah chu a far hnem tulh tulh a, Timothy-a sa ti lutuk chu a t(r)e nasa kher mai.

Tichuan Timothy-a chuan a tuar thei ta ngang lo, "Awle..awle..ni e, ka tisual alawm. Mary..Mary..ka bum che a ni. I...i nu..i nu leh pa inthenna chhan kha, keimah vang a ni." a ti ta mai a, Mary phili buai lai pawh a tawp chat mai. "Engmaw? Engmaw i sawi a?" a ti vin ta thak mai a.

"Sawi zel rawh...sawi vek rawh..hmanhmawh rawh." tiin Nghaka chuan a au vak vak a. Na tih vanga thaw hlawp hlawp chung chuan Timothy-a chuan, "I nu kha..i nu nen khan kan mu dun thin a ni..mahse i nu khan min neih a duh tlat a, tichuan i pa pawh a then a. Mahse keiin neih ka duh silova, tichuan nangmah hrilhah min vau ta a ni. Chuvang chuan i nu kha ka dahtha ta mai a nih kha..i nu kha accident vanga thi a nilo, keima ruahmanna vek a ni." tiin a inpuang ta.

Mary chu a thingthi hnawk mai a, a tap ta zawih zawih mai. "Mary..min ngaidam rawh..min ngaidam hram rawh...ka la thi duh lo, ka la thi duhlo ania." tiin Timothy-a chu a tap zawih zawih a. Mary chuan lehlam a hawi a, a thinrim takzet. Aw rawl chhuah meuh chuan a tap a, "Nilo..ka nu...ka nu.." tiin a au vak vak mai.

Abawihi pawh chuan mak a ti kher mai, sawi mai tur pawh a hre lo. Nghaka chuan MAry awmna lam chu ava pan a, "Hey..Mary...ngaidam rawh...ngaidam ta che. I mawl em ni? Ngaidam rawh." tiin a vin vak vak a. Mahse Mary rilru chu a na em em a, Timothy-a chu a huat hian a haw ngawih ngawih mai.

"Timothy-a hmaiah chuan bati chu a far khat dawn ta mai a, a taksa dang zawng chu a far khat deuh vek tawh. A sa ti lutuk chu a khur cher cher tawh mai a, a awmna a sa bawk nen, a taksa chu a khu tan ta hial mai. Abawihi chuan a han en chho va, "MAry..ngaidam mai rawh, khawngaihin..ngaidam rawh." a ti ve ta a.

Mahse Mary chuan a ngaidam thei ngang lo, a maimitchhing a, a beng a hup tlat mai. Siama thin in a tuar ta lo, "Hey Hmeli...ngaidam mai la mawle....nangpawh thil tisual ve thin tho i nih kha, i famkim bik lo. Nakin lawkah inpuang turin a ti ve dawn tho che, ngaidam rawh." tiin glass chu a chhui vak vak mai.

Mary chuan thinrim tak hian, "Ni e...thil chu kan tisual vek alawm. Mahse i nu thattu chu i ngaidam thei dawn bik em ni? MAWH..sawi ta che." tiin a vin let hrep mai a. Timothy-a hmaiah chuan bati chu a far khat vek tawh a, a tawng thei tawh lo. Chutah minute 5 chu a liam ta a, Timothy-a mutna hnuai chu a in hawng a, a rawn tla tawp mai.

Rang takin Nghaka leh Siama chu an va tlan phei a, bati farna te chu an khawk nghal mawlh mawlh a. "Fimkhur rawh u, thirzaiah khan current a kal ania." tiin Abawihi chuan a rawn hrilh a. Mahse Timothy-a chu chhan theih a ni tawh lo, a thi tawh. Abawihi chuan Mary chu en in, "I hmu em? Saw...a thi ania, Timothy-a saw a thi der ania." tiin a tap a.

Mahse Mary chu a ngawi reng a, a mit hupin  atap khur tlawk tlawk mai. Chutah TV chu a rawn in on leh ta, "Le...pakhat chu kan zo ta phawt. A dawt leh chu nangmah kha i ni...MARY." X-a chuan a rawn ti leh ta mai a. Mary chu a phu zuk a, rang takin a ding chhuak nghal. "Nilo...tinge hetah hian ka tel ve...engmah ka tisual ve lo." a ti chel chul mai.

Nghaka chuan chiang tak hian X-a video chu a en a, "Nanghi..helai hmunah hian i awm ve a ni. Ka tawng lai takin video i pause a, kan ngawih veleh i play leh a. Khawnge i awm? Rawn inlan rawh." tiin a vin vak vak a. Mahse X chuan a zawhna chu a chhang hauh lo, video in-pause chu a rawn in-play leh a.

"Mary...i thiannu Abawihi chunga i thil tih tenawm tak kha sawi rawh le. I inpuan chhungin i awmna glass box ah khan tui a rawn lut anga, nangpawh minute 5 chhung hun pek i ni ang. I inpuan zawh hunah Abawihi'n a ngaihdam che chuan tui pawh a in-off anga, nungdamin i awm ang. I hun a intan e, inpuang rawh...anih loh chuan i thi ang." tiin video chu a tawp leh ta hmak mai.

Abawihi chuan mak a ti em em a, "Mary..ka lakah tihsual i nei em ni?" tiin a zawt a. Mary hmel chu hlauhthawnna hlir hian a khat a, "Aih...neilo, Abawih..engmah ka ti sual lo." tiin a tap nghal pur mai. Chutah glass box chhungah chuan tui a rawn lut tan ta, "Nilo..Abawih...Nghaka, min chhan ru." tiin a au nghal chel chul mai a.

Nghaka chuan tui lo luhna pipe chu a en a, tih chhiat tumin a va tlawh nghal vak vak a. Mahse a nget lutuk tlat, "Inpuang rawh...inpuag rawh...Mary, ka ngaidam ang che." tiin Abawihi chuan a hrilh a. Mahse MAry chu a inpuang duh tlat lo, "Tihsual ka neilo...tihsual engmah ka neilo." ala ti tlat mai.

Tui lah chu a rawn lut chak em em a, a kawng chu a thleng nghal der mai. Nghaka pawh chuan vin zet hian, "Thih i duh em ni? Inpuang ta che..mawhh.." alo ti ve hlur bawk a. MAhse Mary chu a inpuang duh chuanglo, "Engmah ka ti sual hleinem...min chhan ru." tiin a au chel chul mai a. Tui lah chu a in khawh lut hnem tulh tulh a, a hnute zawn a thleng der mai.

Chutah TV chu a rawn in on leh a, video pakhat hi a rawn in play a. Abawihi leh Nghaka leh Siama chuan chiang takin an han en a, video ah chuan Mary hi a lo lang a. Khumah chuan Nghaka chu kawr phelh hian a lo mu bawk, Mary chu video-in a inla mek tihna a nih chu. Tichuan a kawr chu a phelh a, a hnute lang vekin a awm a.

Nghaka erawh a muhil a, engmah a hre lo. Mary chu Nghaka bulah chuan a mu a, video chuan a han inla vel a. "Abawihi chu a thinrim mai mai ang chu aw..." tiin a nui vel huah huah mai. Tichuan video chu a tawp a, X chu a rawn lang leh ta. "Abawih...Nghaka khan a bum lo che a, Mary thil tih vek a ni." a rawn ti ta mai a.

Nghaka leh Abawihi chu an in en a, an hrilh hai dunin tawng mai nachang pawh an hre lo. Chutah X chuan rawn sawi zawm lehin, "Nghaka nena in inngaizawn atang khan Mary hian a thik che a, Nghaka hi chhuhsak che a tum a ni. Tichuan Nghaka hi leng turin a sawm a, zu an in dun a. Mahse Nghaka erawh chuan thian ang bakin a kawm lo, tichuan Nghaka zu in turah chuan mut duhna pawlhin, tihian a che ta a ni. An pahniha thlalak chu editin Mary hian a hmel chu a hliah a, tichuan Nghaka'n a kawp thu che hrilh che in amah ngeiin then turin a ti che a nih kha. Mahse nang chuan engmah hrechiang lovin Nghaka chu a dem ta em em a, i then phah hial a. Mary khan Nghaka chu i then hnuah khan a bem leh ngei a, mahse Nghaka chuan a lo duh chuang lo. Chuvanga kawm leh mai mai che a nih kha, Nghaka hian lo duh se chuan nangpawh a kawm tawh lovang che." tiin video chu a tawp leh hmuk mai.

Siama, Nghaka leh Abawihi chu an ngawi dun reng a, chutah Siama chu ava hawi let a. "Ehe.Mary saw.." a ti vak a. Abawihi leh Nghaka chu an va hawi let a, glass box ah chuan tui a lo khat vek tawh a, Mary chu a lo thi der tawh mai. Abawihi chu a tap zawih zawih a, "Engthil nge ni zozai le? A rapthlak emai, ka haw duh." tiin a thingthi hnawk mai.

Nghaka chuan a lu a dawm vang vanga , "Tu phiangsen nge i nih? Engtin nge khang zawng zawng kha i hriat? Tunge i nih a?" tiin a au vak vak mai. Abawihi chuan Nghaka chu a en a, "Min..min ngaidam rawh, engmah ka lo hre lo a ni." a ti zawi sap a. Siama chuan, "A dawh leh tunge niang?" tiin a hlauhthawn hmel kher mai.

Tichuan TV chu a rawn in on leh ta a, X chu a rawn lang leh ta. An pathum chuan TV chu an thlir leh thap mai a, "Tunah chuan in zinga pahnihte inpuan a hun e, Nghaka leh Siama te kha in ni." a rawn ti leh ta mai a. Siama chuan pawr tak hian, "Sawi ta che..kan inpuang ang..kan inpuang em em anga, chuan kan inngaidam bawk ang." a ti nghal pung pung mai. 

Nghaka chuan, "Record chawp anih hi...i tawng a hre thei lo." a lo ti vin hlur a. X chuan sawi chhunzawmin, "Nghaka, tuna i thiamna ka sawi avang khan i him bik e tihna a nilo, tihsual i neilo tihna a nilo. In thianpa bialnu Jeneti, pawngsual a nih khan inhriat pui vek a ni. A bikin Siama, nang phei chuan video-in ila ru a nih kha." a rawn ti leh ta mai a.

Nghaka chuan Siama chu a en a, "Enga? Siama...Jenet-i pawngsual a nimaw? Eng mah ka hre velo." a han ti a. Mahse X chuan, "Nghaka, nangpawn i hria, a hnuah a hranpa in i thiannu pakhat Esther-i i pawngsual ve bawk." a rawn ti leh a. Nghaka chu a meng phawk nasa kher mai, "Tunah chuan inpuang rawh ule...engthil tak nge in tih?" a rawn ti leh ta a.

Siama chuan, "Awle...ni e, khami tum khan Zothana leh Liantea ten an pawngsual a, a bul tumtu ber chu Kima a ni. Keichuan engtin mah ka ti velo, ka tel ve lo. An hriat loh hlanin video in ka la ru a, chuzawng chu a nimai." a han ti zung zung a. Nghaka pawh chuan, "Ni e..keipawh ka inpuang ang. Liantea leh Zothana te tactic kha ka apply ve a, ka thiannu Estheri chu ka pawngsual ve a ni." a lo ti ve leh a.

Abawihi chuan mak a ti kher mai, Ngahka chu a en tlawk tlawk mai a. Siama chuan, "Kan inpuang tawh..tunge min ngaidam dawn? Sawi ta che...kan inpuan tawh hi.." a han ti a. Chutah video in-pause chu a rawn in-play leh a, X chu a nui huah huah mai. "In inpuang nghal vat dawn tih ka hria alawm, chuvang alawm nangni pahnih tan hian thil special tak tih ka duh." a rawn ti ta daih mai.

Nghaka leh Siama te chu an in en hu mai a, "Siama...TV hnuaiah hian i tan engemawni a awm a, va la rawh le. Hlau suh, ka tina dawn lo che. Mahse iva la lo a nih erawh chuan i thi ang, tunah la vat rawh." a ti a, video chua in-pause leh daih mai. "Va la vat rawh..kan thih ve hma hian." tiin Nghaka chuan a vin hlur mai a.

Nghaka chuan TV hnuai chu a en a, pistol hi a lo awm a. Video chu a in-play chhunzawm leh nghal a, "Siama..nang chu i thil tihsual a ho em a, chuvang chuan chance tha tak ka siamsak dawn che a ni. Duhthlan tur i nei e, helai hmun atang hian mi pahnih chiah in dam khawchhuak ang. Pistol ah khan silai mu pakhat chian a awm a, Abawihi emaw...Nghaka emaw..pakhat zawk zawk kha i kah a ngai ang." a ti ta mai a.

Video chu a tawp a, TV pawh a thi leh ta hmak mai. Abawihi chu a lungawi lo kher mai, "Nilo...a fair lo lutuk, enge ka tihsual..enge ka inpuanna tur pawh a awm ve lo." a ti chul mai a. Nghaka chuan, "Siama..thil atthlak engmah ti suh ang che. Helai hmun atang hian chhuah dan kan ngaihtuah angai, tumah kan inthat lovang." a lo ti ve bawk a.

Mahse Siama chu a ngawi reng a, chutah Nghaka chu a tin ta mai. Nghaka chuan a ban a phar a, "Enge maw i tih le? I mawl em ni?" a ti vin tuar a. Siama chuan thinrim hmel tak hian, "Nunna...nunna a pawimawh ber. Helai hmunah hian mi pahnih chauh an damchhuah angai, chuvang chuan Nghaka..nang hi ka that dawn che." a ti ta mai a.

"I thianpa ka nih hi...i mawl em ni? Dah thla vat rawh...i rilru a fim meuh maw?" Nghaka chuan a lo ti a. Siama chu a khi suk a, "Tumah hi kan rilru a fim tawh lo....nang hi ka that che anga, tichuan Abawihi nen hian kan chhuak ang. A chhan i hre duh em? Nghaka..a chhan chu nang hi ka thik che a ni." a ti leh a.

"Enge..enge min thik na?"

"Tette atanga inkawm kan ni a, kei aiin i vannei ziah. Bialnu chungchangah pawh nise, nang chu i hmel a tha a, i luck em em a, chuvang chuan kei hi min thlauh thla a, bialnu i nei thei bik em em a. Zirna chungchangah pawh nise, kei aiin i ni sang ziah. Tun thleng pawh hian, chuvang chuan ka that dawn che." a ti leh ta mai a.

Abawihi chuan, "Eng ang mihring nge i nih le? I hma i sial hle mai, mi tenawm tak i ni." a lo ti ve bawk a. Siama chuan thinrim tak hian, "Nangnu kha lo tawng suh, ka that zawk mai ang che." a ti hrep mai. "Siama...ka hmangaih zia che i hria, ka unaupa ang tak tak in ka en che asin. Min that ang maw?" tiin Nghaka chu a thinrim kher mai.

Siama chu a khi suk a, "Ka tihpalh thianpa...min ngaidam rawh." tih pah chuan silai chu a hmet puak a, Nghaka awm zawn takah chuan a fuh a, thisen a per chhawk mai. Abawihi chu a au tuar a, "Nilo..Nghaka." tiin va pan a tum a. Siama chuan lo man betin a kek vak a, bang kilah chuan a theh phei lawp mai.

Chutah TV chu a rawn in on leh a, X chu a lo lang leh ta. "I ti tha e..Congratulation Siama, Abawih...tunah chuan tunge ka nih ka hmuh tir tawh ang che u." tiin X chuan a jumper hoodie chu a la thla a, a mask chu a han phelh ta a. Abawihi leh Siama chu an meng phawk nasa kher mai, X-a hmel dik tak chu an hmu ta.

SHADOW X chu tudang nilovin, Nghaka tho chu a lo ni. Chutah video chu a tawp a, TV chu a thim ta hmuk mai. Abawihi leh Siama chuan Nghaka, chhuata mu mek chu an zu en a. Nghaka awm zawn a thisen ah chuan, silaimu fuhna awm ang kua engmah a awm lo. Thisen chauh a awm a, chutah Nghaka chu a rawn che ta mai.

Muang chang chuan a rawn tho va, X-a aw..robot voice ngei mai chuan, "Keimah hi SHADOW X chu ka ni." a ti ta mai a, Abawihi leh Siama chuan mak an ti kher mai. Chutah Nghaka chuan a ipte atang chuan pistol tak tak zawk chu a phawrh a, Siama keah chuan a kap a. A tlu hnawk mai, Nghaka chu a nui sak mai a.

Abawihi chuan a en hu mai a, "Nghaka..nangmah vek maw lo ni a?" tiin a zawt a. "Aw ni e, kei hi Shadow X chu ka ni. Khang mitthi..Sawmtea, Kima, Lecturer Richard-a leh tuna mi te hi ka thah vek an ni." a ti leh ta mai a. Siama mak ti lutuk chuan, "Enge awmzia?" a ti hu mai a. Nghaka...Shadow X-a ngei mai chuan a sawifiah ta.

**********************

Abawihi nena kan inngaihzawn lai khan Mary hian min ngaizawng ru deuh a ni tih chu ka hre daih tawh a, mahse ka thiannu a nih avangin khatia a chet kha ka ring bik lo a ni. Khami zan, min hrai ruih zan khan engmah ka hre lova. A tukah ka thlalak chu a lo darh chiam mai a, ka mutna khum kha Mary te in a nih siloh avangin Mary thil tih anih ka ring lo a ni.

Chubakah a hnu feah chauh a theh darh a, chuvang chuan Mary kha rinhlelh ngaihna ka hrelo a ni. Mahse thudik chu ka hre thuai a, chupawh khatih hun laia Mary bialpa, Sangtea kha ka thianpa a nih vang a ni. Sangtea kha Mary khan a kawp a, tichuan ahnu lawkah a then a. An inthen zan khan break-up sex an nei a, Mary mutthilh hlanin Mary phone ah kan video chu a hmuchhuak ta a ni.

Sangtea chuan engmah a sawi lova, a phone ah a inthawn mai a. Tichuan min hrilh leh a, mahse pangngai taka phuba ka lak theih nan tiin Sangtea pawh ngai rih turin ka hrilh a. Mahse vanduia thlak takin SAngtea chu an lui kal naah a tla hlum hlauh mai a, tichuan keimaha phuba ka lak a ngai ta a.

Abawihi berin min then tawh si a, thudik sawi lah ka tum hek lo. A chhan chu phuba na taka lak ka duh avangin Abawihi lakah pawh ka zep a, ka ngawi ta tawp mai a ni. Tichuan ka thianpa, Kima'n bialnu a rawn nei thar a. A hming chu Jenet-i  a ni a, mak tak maiin ka hmeichhe duhzawng tak mai a lo ni a.

A rukin ka duh ta em em a, mahse ka thianpa bialnu a nih avang chuan tihbuai ka tum lova, inrawlh pawh ka inrawlh duh hek lo. Zankhat chu Siama hi a lo riak a, a ruih em avangin a chatthla a. A nu in a rawn phone sek mai a, tichuan ka chhan sak ta nge nge a. Ka mutthilh theih loh avang chuan a phone-a video chu ka han enkual a, chutah chuan Jenet-i an pawngsual lai chu ka hmu ta a ni.

Mak ka ti a, ka rilru ana hle bawk. A whatsapp ah ka lut nghal a, Kima nena an inbiakna te, an plan zawng zawngte chu ka hriat phah ta a ni. Video chu ka inthawn leh a, tichuan phuba lak ka tum leh ta a. Kum 2 lai chu hemi te thian tenawm tak ho hi...ka kawm lui hram hram a ni. A ruka keimah a phuba lak a ka tum nghet bur a, chuvang chuan ka ngawi leh ta a ni.

Mahse phuba la hman tur pawhin ka hun tawnin a zir leh silova, a chhan chu ka pa, Zarzoliana..college security guard chu second floor kawngka vel a check laiin kangmei chhuak ah ka kan hlum vang a ni. Khatah khan a haltu kha Sawmtea a ni tih ka la hre mai biklo, mahse Lecturer pakhat, Richard-a nena an titi lai chu ka pa kan vui zan khan ka ngaithla ru a.

Pawnah khan zu an lo in dun a, ka thaw ipik lutuk intih harh ka tum khan ka va ngaithla ru ta a ni. Sawmtea khan an exam paper zawng zawng kha  a fail a hlauh avangin a ruih phurin a hal a, mahse duh aiin kangmai a chhuak nasa a. Khatih hunlai kha college ban dawn vel a ni a, building ah khan ka pa leh Sawmtea chiah an awm.

Sawmtea hlauthawng leh si chuan ka pa a awm ve tih hrelovin  2nd floor kawngka a kalh a, ka pa lah class room tukverh a check kual lai a lo ni bawk si nen. 2nd floor kha gas cylinder dahna ber a ni a, tichuan gas ah kang kaiin a puak ta a, ka pa chu a thi ta a ni. Sir Richard-a chuan a zep pui tur thu leh sawi chhuak lo turin a intiam a, a ka hup nan Sawmtea khan pawisa a pe bawk.

Khatih lai khan va sawisak dun hrep ka duh a, mahse phuba lak ka duh zawk avangin ka ngawi ta rih a ni. Ka nu ka chawm angai a, lehkha ka zir chhunzawm ta zel a. Mechanic ka ni a, ka thiamna hmang chuan phuba lak ka tum ta a ni. He chemical factory rauh san tawh hi a neitu fapa nen kan inhmelhriat a, a duplicate chahbi chu ka ru chhuak a, tichuan he factory hi tuma hriat lohvin ka hmang tangkai ta a ni.

After party ah khan khami hmuna thawk angin ka inchei ve a. Tichuan Screen hmaah khan camera leh mic chu ka vuah ru a. Tichuan Sawmtea chu ka zawng nghal char char a, atawpah Abawihi a lo sual lai chu ka va hmu ta a. Tichuan ka sawisa hrep a, factory ah chuan phur pheiin ka inpuan tir ta a nih kha.

Ka thah zawh hnu khan a ruang chu ranhnuaiah ka paih a, tichuan pawisa ka neih tlem hrih avangin ka chawl leh vang vang a. Theih tawpa ka inhlawh leh hnuah chuan ka nei ve leh deuh ta a, tichuan Kima chu ka target leh ta a ni. Khami zana a haw hnu khan ka zui ru a, tichuan tikhan a hma thla daih tawha ka ruk, Pitbull ui pahnih te kha ka seh hlum tir ta a ni.

Sawmtea thil tihsual zep puitu Sir Richard-a kha, ka zui ru leh bawk a. Tichuan naupang pakhat chu pawisa ka hlawh tir a, a bike seat ka chhun pawh tir a. Tichuan ka that ve leh ta a, a ruang erawh hemi factory chhungah hian ala awm. Nunna hi ka ngai hlu a, a ngai hlu velo te chu thi mahse pawi ka ti lo.

*************************

Siama chuan mak a ti em em a, tawng ngaihna pawh a hrelo. Nghaka chuan a nuih a, "Hemi hmuna kan luh tirh a, i au kual vak vak lai khan maw...ka ke kha hruiin ka phuar chawp a. Tichuan kha room thim takah khan khawl ka dah a, remote control hmang hian ka inpawt chawp lui a nih kha. Thianpa, mechanic ka ni a, chemistry ah degree ka nei bawk. Chuvang chuan ka thiamna hmangin phuba ka la ta a nih hi..enge sawi duh i neih le?" a han ti a.

Siama chuan a chil a lem dawk a, "Min that suh..keichuan ka zep pui ringawt a, tihsual ka neilo." a han ti hluam hluam a. Rum tak hian Nghaka chuan melhin, "Tihsual chu i nei zo chiah alawm...min thah i tum kha...chuvang chuan ka zuah bik dawn lo che." a ti ta mai a. Siama tawng leh hma chuan Nghaka chuan vawi thum lai mai chu a kap a, Siama chu a thi ve leh ta a ni.

Nghaka chuan a iptea remote control, TV-a X-a lo lan apianga a ruka a lo control char charna chu a paih a, a aw tih danglamna te chu a paih bawk a. Abawihi chu ava pan hnai a, "Ka tihpalh aw...thudik i hriat theih nan ka ti a ni. Min ngaidam ang che, kha i phone." tiin a phone chu a pe a, kal mai a tum a.

"NGati nge Timothy-a kha i thah ve a?" tiin Abawihi chuan a zawt a. Nghaka chu a nui suk a, "A chhan chu nunna hlu tak a lak ve vang a ni....ani pawh kha ka thianpa tho ania, ka chhui ru char char a, a thil tih zawng zawng min hrilh vek a, tunge ka nih a hrelo mai mai anih kha, a chhan chu min hmu thei tlat lova." tiin a chhang a.

"Engtin nge awm zel i tum? Khatia tual i thah a, phuba i lak khan i nu leh pate kha an rawn let leh dawn em ni?" tiin Abawihi chuan a han zawt leh a. Nghaka chuan ava pan hnaia, "Tupawhin thil kan tisual vek a, keipawhin ka tisual. Tual ka that a, ka tisual. Chuvang chuan helai hmun atang hian chhuak la, keipawh police hnenah ka inpe ang. I bialpa thar Alex-a kha..ngaihdam minlo dilsak la, hlim takin awm ang che u." tiin a chhang a.

Shadow-X thuam famkim nen chuan a han inthuam leh a, tichuan kawngka lam chu a pan ta. A thleng tep tawh tih ah chuan kawngka chu a rawn inhawng thut mai a, Pu Tluangtea leh police force te an rawn lut ta. Pu Tluangtea'n Nghaka a hmu chiah chu a hmelma lian ber, a zawn mek a hmu tih a inhre nghal a.

Nghaka lah chuan pistol a lo keng bawk si, "Um..ka tihsual man chu ka hmuh  a hun ve ta e." tiin a phun sap a. Police ho chuan silaiin an tin thap mai, Abawihi chu rawn tlan pheiin, "Nilo...kap suh u...kap suh u." a rawn ti vak vak a. Nghaka chu ava hawi phei a, a mask phelh thla in, "KA NU KHA MIN LO ENKAWL SAK ANG CHE." tiin a phun sap a.

Chutah a pistol chu lek kangin a maxine chu a hmet thla zeuh va, police ho chu ava tin a. Police ho chuan an kah rawn ta vak vak mai a, Nghaka chu a let tawp mai. "Nu..ka hmangaih che, Pa...i bulah ka lo kal ve dawn e." tiin a phun sap a, a tawpna atan chuan theih leh thei lo hian a nui leh sak bawk a, a thi ta.

A awmzia chu Nghaka pawh hian nunna  angai hlu a, mi nunna la thin, tualthattute chu an thi ve ngei ngei tur a ni tih hi a thupui ber a ni. Mahse amah pawh in nunna a la ve tho va, chuvang chuan amah pawh chuan thih a huam ve tho tihna a ni. A pistol maxine kha a hmet thla zauh va, a chhan chu tumah thah belh atum tawh loh avangin amah an kah theih nan tiin kah tum angin a awm der mai mai tihna a ni.

*************************

4 HOURS LATER

Alex-a chu a tei kual a tei kual a, a mangang kher mai. A phone a han en a, tlai dar 6:30 a ri tawh. Pawnah chuan a awm reng a, chutah police motor ri a hre ta. Apa te ngei chu an lo ni a, a lawm kher mai. A lo phar ding nghal chuk chuk a, Abawihi nung dama  ahmu chu a lawm kher mai.

Abawihi chuan Alex-a a hmuh veleh chuan a va pan a, Alex-a chuan a lo kuah a. An pahnih chuan an inkuah vawng vawng mai a, zah pawh dawn lovin police ho hmuh lai leh Pu Tluanga awm ve reng lai chuan an han infawp vawng vawng a, Pu Tluanga pawh a khi suk ringawt. "I tha em? I na lo maw?" tiin Alex-a chuan a zawt a.

"Umm ka tha...ka tha e." tiin Abawihi chuan a lo chhang a. An inkuah leh a, chutih lai chuan Nghaka ruang an phurhna motor chuan a rawn tlan pel a. Abawihi chuan a en zui vawng vawng a, "Nghaka, i nu chu ka lo enkawl ang. Mangtha le..ka lawm e." tiin ama hriat tham lek chuan a phun sap mai.

*************************

THE END

*********************

COMING SOON!!!!!!!!!!!!!