UNHOLY CONFESSIONS (MIZO FICTION TEEN SLASHER/HORROR STORY) Written by : Aaron Malsawmdawngzuala WARNING : 18+ Chapter - 6

 UNHOLY CONFESSIONS

(MIZO FICTION TEEN SLASHER/HORROR STORY)

Written by : Aaron Malsawmdawngzuala

WARNING : 18+

Chapter - 6

********************

Alex-a chu zing chuan a mit a han nuai nuah nuah a, a phone a han en chu dar 8 a lo ri tep tawh mai. Rang takin a tho vat a, message a han check a, Abawihi message engmah a lo la awm chuang lo. "Good Morning." tiin a han wish leh hram a, mahse Abawihi chuan a chhang chuang hauh lo.

Room atang chuan a chhuak a, anu chuan chaw ei a lo siam mek a. Pu Tluanga chuan zaidam tak hian, "Bawiha, i va tho tlai ve a...class i kal dawn lo em ni?" tiin a lo zawt a, mahse chhang lo chuan bathroom ah a lut tlang ta daih mai. Anu chuan mak a ti angreng hle a, "Ngati nge a? Nizan lamah in inhau em ni?" tiin a pasal chu a han zawt a.

"Ngaihzawng chungchangah ka titi pui e ka tia, ala titau deuh reuh a nih kha." tiin a lo chhang a. "Enge in sawi reng reng a? Bialnu a nei ve em ni?" tiin a lo zawt leh a. Pu Tluanga chu a khi suk a, "Amah aia kum 5 laia upa a nei a, chupawh thla 6 liam taa Sawmtea case kan chhuina ami, party naa tel ve tho kha ania." tiin a lo chhang leh a.

"Engtin nge i sawi pui reng reng a?"

"Amah aiin a upa a, chubakah khatiang party naa kal chin tawh hmeichhia kha chu tha ka tilo."

"Amak thin...tleirawl an nia, ngaihzawng kan duh tak kher an nei thei bik hleinem. Tun atanga ngaihzawng chungchanga i thuhnuaia dah nghal ringawt i tum te chuan a sual phah zawk anga sin, nge i lo hauh vak a?"

"Chutin ka hau vak kher lo, a tha lo hrim hrim kha hmeichhia kha."

"College party te a ni ve a, an kal ve a ni mai alawm."

"Chu pawh nise, khatiang upa lutuk kha chu ka duhlo hrim hrim. Sawn te a thlak palh mai ang tih ka hlau alawm, nanga pawh chu enge maw i lo tan viau le?"

"Ka tan a ni hleinem, bialnu a nei ve dek dek a, khatia naupang ang maia i hauh nghal vak ringawt...a awm lo lutuk emai, hrethiam tur zawk i ni asin."

Pu Tluanga chu a tho a, "Chaw pawh ka ei peih lo ea." tiin room ah a lut ta hmak mai. "Pa ber si hi..Police Inspector lai ani ve lehnghal a, titau bur bur reng mai." tiin Alex-a nu chu a phun nuah nuah a. Alex-a pawh a rawn chhuak a, "Bawiha, chaw rawn ei vat rawh...khi darzat khi en teh, i tlai ange." a lo ti leh a.

Mahse Alex-a chu a room a luh tlang pah chuan, "Ka ei peih lo." tiin kawngka ka khar bur mai. Nu ber chu a lungawilo kher mai, "Tuman min thawh chhawk duh bawk silo, kawng na chung chungin rawng ka bawl ve a, chutah an pafa in an la titau zui a. Ei malek ula ni mai alawm, zahpuiawm pafa lutuk." tiin a ang bawrh bawrh mai.

*************************

Abawihi chu class kal tur chuan a insiam mawlh mawlh a, a phone a rawn ri thut mai. Mary a lo ni a, "Hello Abawih, vawiin chu min rawn lam lo mai rawh..ka kal dawn lo." hi a rawn ti a. "Naa..tinge? Kawm tur ka nei nang...lo kal rawh." tiin Abawihi chu a vin deuh nghal hlur a. "Ka nuamsam thlawt lo, ka lo kallo mai ang." tiin Mary chuan phone a dah daih mai.

Abawihi chu a tum bur mai a, a phone message chu a han en leh nghal a. Alex-a message zozai te chu open lohvin a la dahkhawm ruih mai, thawk deuh hak pah chuan a han hawng ta a. Mahse a reply duh chuang lo, ngawi reng chuan a insiam zawm leh mawlh mawlh a. A insiam zawh hnu chuan a scooty lam chu a pan nghal a, Alex-a lo thlen hman hlau niawm tak chuan chak thei ang ber chuan a tlan ta a.

Minute 2 hnu velah chuan Alex-a chu a rawn thleng ve a, Abawihi te inzawnah chuan a ding chat a. Mahse Abawihi scooty dahna a han en chuan a lo awm tawh lo, a kal tawh tih a hrethiam nghal a. Hrehawm a tiin apa chungah chuan a lungawilo zual kher mai, "Tiangte chuan bialnu pawh kan nei ve ngam nang." tia ama hriat tham leka phun supin a tlan ve leh ta a.

College a thleng a, Abawihi scooty lo side tha lai chu ava hmu ta. Rang takin ava pan a, "Abawih..lo ding lawk teh." ava ti a, Abawihi pawh chu a rawn hawi vat a. Mahse Alex-a hmel a hmuh chuan a tum hmuk mai, chhang lo chuan a bag chu a ak tha sawk sawk a, en pawh en lo chuan kal sawn a han tum a.

Alex-a chuan ava umzui a, "Ding teh...khawngaihin.." tiin a kutah chuan ava vuan a. MAhse Abawihi chuan a kut chu a lo paih thlak sak a, "Min khawih suh...class ah ka luh vat angai." a lo ti vin hlur a. "Ngati nge min huat em em ringawt a, nimin lawkah min duh thu i sawi kha..tinge tunah khatia i awm leh daih a?" tiin Alex-a chuan a zawt a.

"I pa in min duh hleinem...ngaihzawng dang zawng mai rawh." a lo ti hmuk mai. Alex-a chu a han thaw hak a, "Engtin nge ka pa chuan a tih che a?" tiin a zawt a. "I duh leh amah va zawt mai rawh." a lo ti hmuk mai. "Ka tihpalh lutuk, Abawih...min hrethiam hram rawh, min ngaihtuah vang mai mai a nih kha." tiin Alex-a chuan sawifiah a han tum a.

"Vawikhat mah khatiang kha ka la tawng ngai lo, mahse i pa kha chuan nangmah kalsan turin min rawn ti asin. Chutah Police Inspector a ni lehnghal a, misual ang maiin min rawn dawp a, min rawn vau anih kha." tiin a mittui a tling nghal teuh mai. Alex-a chuan pawi tih hmel tak hian Abawihi chu a en a, "Tihpalh...khawngaihin khati khan awm suh...Abawih...ka duh takzet che asin...khatiang vang mai mai kha chuan inthen lovang." tiin a ngen a.

Mahse Abawihi chu a thinrim laklawh tawh tlat, "I pa berin i tan kei hi min duh hleinem, keipawn ka duh che alawm...mahse a rem dawn lo a nih hi." tiin a chhang leh a. Alex-a pawh rilru no tih takah a tah a chhuak nghal em em a, "Nilo Abawih, chutiang ngawt tur a nilo. Bul kan tan dawn chauh va, hetia kan awm nghal chuan a fair lo emai." a han ti a, a tah aw lek lek mai.

"Ni e..bul kan tan dawn chauh va, a zia zawk alawm. Kan kal thui hma hian inthen zawk ila, chubakah tun semester bak kan inhmu ve thei dawn chuang lo. Bialnu dang i nei leh vat mai ang, keichu tihian min theihnghilh tawp rawh." tiin lehlam a hawi a, a kal ta daih mai. Alex-a chuan ring deuh tak hian, "KA HMANGAIH CHE." a han ti vak a, Abawihi pawh chu a ding a.

A va hawi let a, "Engmaw?" a ti hu mai. Alex-a chu ava kal hnai a, "Ka hmangaih che, Abawih...khawngaihin min kalsan suh." a han ti leh a. Abawihi pawh chu a tah a rawn chhuak ta hle mai, "Tak tak em?" a han ti thawp sat a. "Um..ka hmangaih lutuk che." tiin a lo chhang leh a. Zah pawh dawn lo chuan an inkuah ta vawng vawng mai a, mahse tu vak mah chuan an rawn en lem lo.

**************************

Zing lama chaw a ei loh avang chuan Pu Tluanga pum chu a ruak em em a, a ri ruih ruih reng mai. Mamuana chu a rawn kal a, "Sir, nimin lama mibo report te khan an fapa te chu an rawn la haw lo ve ve an ti a nih chu.." a rawn ti a. "Mibo a? Niminah mibo report a awm em ni?" a ti hu mai a.

"Ehe..i hria emaw ka tia..an rawn report alawm."

"Tinge ka hriat veloh?"

"Kalna tur ka nei tiin i kal ta daih sia, SI Gilbert-a hnenah khan an rawn report a."

"Tinge min hrilh loh a?"

"Ka tihpalh Sir, SI Gilbert-a'n a hrilh turah che ka lo ngai a."

"Gilbert-a chu va ko teh."

Mamuana chu a kal nghal a, reiloteah chuan Gilbert-a nen chuan an rawn let leh a. "Gilbert, niminah mibo report a awm em ni?" tiin a han zawt a. "Aw awm e, Sir..mahse nikhat pawh ala tling lova, chubakah an kum zah an sawi khan puitling kum 30 ve ve an nia..chutia mibo anga lo pawm kha a ni chiah lovin ka hria a." tiin a lo chhang a.

Pu Tluanga chu a thinrim kher mai, a dawhkan a chum bur a. "Tunlai boruak hi i hre ve reng ani lawm ni? Chubakah engvangin nge min hrilh loh? Engkim hi a hlauhawm vek tawh, tualthattu kan zawn mek lai a ni a, mibo report anga an rawn thehlut anih chuan hma lo lak vat chu i hna a ni tih i hrelo em ni?" tiin a vin hrep mai.

"Ka tihpalh a ni, Sir." tiin Gilbert-a chuan ngaihdam a dil a. "Engvangin nge min hrilh loh?" a han ti vin leh thak a, "Nangmah ber khan kalna tur ka nei i ti si a, sawi tak ang khan tlangval an ni a, an haw leh mai ka ring a." a lo ti leh a. "I va han nikhua lo ve, police i ni lawm ni? I mawhphurhna hre ta che, darkar 6 lek pawh bo se, an chhungte berin mibo anga an report anih chuan hmalak chu i hna a ni tih hre tawh ang che." a han ti vin leh thak a.

"Yes Sir..a thleng nawn tawh lovang." tiin Gilbert-a chu a inthlahrung kher mai. "Kal la, mibo chhungte chu va call la, an address kimchang hriat tum la, min rawn hrilh leh ang che." a han ti leh a, Gilbert-a chu a kal ta a. "Sir, enge kan tih dawn?" tiin Mamuana chuan a lo zawt ve leh a. "Ka ril atam emai, thil ka va ei lawk." tiin Pu Tluanga chu a chhuak daih mai.

****************************

Mary chu darthlalang hmaah chuan a thu a, a inchei mawlh mawlh a. A nihna takah chuan Mary chu a damlo hauh lova, dawt a sawi mai mai a ni. A bialpa, an senior pass chhuak ta, Sawmtea te class a mi, Timothy-a nena an len chhuah dawn vang zawk a ni. A chhungte bulah chuan class a nei tlai dawn angin a insawi a, class bunk a tum zawk a ni.

A phone chu a rawn ri a, "I va rei ve?" a han ti nghal tun tun a. "Nia, ka pa ka pui leh lawk a...hetah, pengah khan ka awm tawh..lo kal rawh." a lo ti a. "Awle...ka nghak reng tawh che alawm, ka lo kal nghal." tiin a room atang chuan a chhuak a. "Ka kal ania..nih phawt u." tiin a chhungte chu a thlah a, pawnah chuan a chhuak ta a.

Chutih lai chuan pengah chuan Timothy-a chu a lo awm vang tawh mai a, a car chhungah chuan a lo nghak mek a. Hla a lo ngaithla a, "Ava rei ve mawle." tih nuah nuah pah chuan a phone chu a khawih mual mual a. Heta Mary a nghahna lai, peng an tih lai hi veng thenawm chiah nena an inrinna lai tak a nih avangin chu ti lutukin mi an tam ngai lemlo.

Hemi ni pawh hian khawlai kal an tlem hle a, a reh deuh diak mai. Chutia hla a ngaihthlak mek lai chuan a motor tukverh ah chuan a han dak chhuak a, mi pakhat, face mask dum vuah, jumper ha leh hoodie khum a, amah lo melh reng mai chu ava hmu a. Mahse engah vak a ngai lo, lehlam a hawi leh mai a.

Mahse chupa chuan hmundang hawi miah lo chuan a en reng mai a, mak a ti angreng kher mai. Tukverh ah chuan a han dak chhuak a, "Thianpa..mamawh i nei em ni?" a han ti vak a, mahse a chhang hauh lo. "Enge maw a hriat ni?" tih nuah nuah pah chuan a phone chu a khawih leh mial mial a.

Mary lah a rawn thleng thei lawk bawk silo nen, "Ava rei tak e aw.." tiin kha jumper ha bawk kha va en leh tumin tukverh ah chuan a han dak chhuak leh a. Mahse a lo awm tawh miah lo, "Enge maw a hriat le? Khati fakau a mi en ni.." tiin a nui suk a. Chutah a motor hnung chu a rawn ri dup mai a, a phu chiang kher mai.

"Tunge?" tia rak thawt pah chuan a chhuak nghal a, motor hnung lam chu ava en nghal a. Mahse tumah a hmu lo, a motor hnunglam erawh chumna tih hriat tak hian a khuar duk mai. A han hawi kual a, mahse tumah a hmu der mai silo. A khat tawk chuan motor chu a rawn tlan ve leh zeuh zeuh zel a, chubak chu midang tumah an awm lo.

"Tu phiangsen nge mawni le?" tih nuah nuah pah chuan a motor chhungah chuan a lut leh mai a, a phone a phawrh nghal a. Mary chu a phone a, "I va rei ve...ka nghak char char tawh che ania." tiin a han vin lek lek a. "Ka lo kal mek." tiin Mary chuan phone a dah leh hmak mai. "Min la rawn vin zawk leh ta nghal a." tia khi sukin meizial chu tan a han tum a.

A motor front mirror a han en chu seat hnungah chuan kha mihring, amah en rengtu, SHADOW X chu a lo thu reng mai. A phu chiang kher mai, "Ehe..tunge i nih?" tiin chet lak a han tum a, mahse X-a chuan a chet khalh leh ta tlat mai. A rawmawl hum chuan Timothy-a hmui chu a hup a, Timothy-a pawh a zal nghal riai riai mai.

Minute 10 vel hnuah chuan Mary pawh chu a rawn thleng a, Timothy-a car lam pan chuan a kal nghal a. Tukverh-a a han dak chu motor chhungah chuan tumah an lo awm lova, mak a ti kher mai. A phone phawrhin a bialpa chu a han call a, mahse a ring quit thak thak mai. "Khawiah nge maw a kal le?" tiin a phun nuah nuah a.

Car chhunga lo nghah mai chu a tum ta a, a chhungah chuan a lut a. A phone chu a khawih leh mual mual a, chutah X chu a seat hnung atang chuan a rawn lang leh thut mai. Mary hmui chu a rawn hup leh nghal a, hnim hlum chuan Mary pawh chu a tuk zal ve leh ta riai riai mai. tichuan an pahnih chuan X chuan a seat hnungah a muttir a, motor chu khalhin chak takin a tlan ta a.

**********************

Station ah chuan pa pahnih hi an rawn kal a, chu mite chu Liantea pa leh Zothana pa te an ni. Pu Tluanga chu an va hmu a, an nihna te chu an han insawi a. "Dar engzatah maw i fate chu an chhuah a?" tiin a han zawt a. Liantea pa zawk chuan, "An thianpa Kima thih an hriat khan, zingkar atangin an chhuak a, mahse tun thleng hian phone tlang theih lohvin an awm a." tiin a lo chhang a.

"Niminah pawh an bo thu kan report tawh a, mahse an lo haw ve leh mai ang tiin police ho khan min hrilh a..mahse tukin thleng pawh khan an la rawn haw thei ta silova, kan mangang in kan rawn phone leh tawp mai che u a ni." tiin Zothana pa zawk chuan a lo ti ve leh a. "An number ve ve min lo pe teh u." Pu Tluanga chuan a han ti a.

Zothana pa leh Liantea pa chuan an fapa phone number ve ve te chu an han ziak thla a, Pu Tluanga chu an pe a. "Um..kan lo trace nghal anga, chanchin kan inhrilh leh dawnnia. Lungngai reng reng suh u, kan hmu em em ang." Pu Tluanga chuan a han ti a. "Kan lawm ngawt ang." tiin Liantea pa leh Zothana pa te chu an chhuak ta a.

"Mamuan, hemi number pahnihte hi kan trace nghal angai." a han ti a. "Awle, Sir? Tunah em ni?" tiin Mamuana chuan a lo zawt let a. "Aw...kan chet vat vat angai, Shadow X thil tih tho a nih ka ring." a han ti a. "Tinge Shaodw X thil tih vek anga i ngaih a, Sir?" tiin Mamuana chuan a han zawt leh a.

"A hmasa berah chuan Sawmtea case atang khan tualthah hmang a ni tih kan hre tawh phawt a, Kima case atangin kidnapper a ni bawk tih kan hre leh a. A awmzia chu X hi tualthattu chauh nilovin, mi kidnap ching tak a ni tih a chiang reng. Chuvang chuan Liantea leh Zothana te pawh hi X hian a kidnap ngei ang, chu chu thil chiang sa a ni." tiin a lo chhang a.

"Mahse Sir, thildang vang pawh a lo ni thei asin."

"A ni lovang, Liantea leh Zothana te hi Kima thiante tho an ni a, chuvang chuan hemite pahnih chungah pawh hian thinrimna a nei emaw, thah a tum emaw tal chu a ni hrim hrim." Pu Tluanga chuan a han ti leh a. "Awle Sir, enge ti tura min duh?" tiin Mamuana chuan a han zawt leh a. "Team 2 in kan in then hrang ang, kei leh nang leh midang 4 velin phone number pakhat zawk hi kan trace anga, pakhat zawk hi team dangin.." tiin a chhang a.

**********************

Lunch Break a ni a, phur tak hian Alex-a chu a chhuak nghal vat a. Ground ava thlen chuan Abawihi chuan a lo nghak ran tawh mai, rang takin ava pan nghal a. An thu dun a, an inkuah ngawih ngawih mai. Abawihi chuan nui sang chung hian, "I duh angem chu ka hre lova, mahse thil engemaw tih ka duh a ni." a han ti zawi sap a.

"Eng thil maw?" tiin Alex-a chuan a lo zawt vat a. Zak deuh chung leh inthlahrung deuh tak hian, "Chawhnu chu bunk ila...leng ang." a han ti a. Alex-a chu a nui suk mai, "Chu chu maw i duh?" tiin a han zawt a. Abawihi chuan a lu a lo bu nghat mai, "Umm..anih chuan ka bag ka va la leh lawk ange aw.." tiin Alex-a chu calss roomah chuan a lut leh a.

Reiloteah chuan a rawn chhuak leh a, "Khawnge kan kal ang?" tiin a han zawt a. "Ka hrelo...khawnge niang?" tiin Abawihi chuan a lo zawt let a. Alex-a chu a han ngawi vang vang a, "Kan inbemna hmunah bawk khan kan kal leh mai dawn mi?" a han ti a. Nui chung hian, "Um...a pawi hleinem." tiin a lo chhang a.

"Scooty pahnih ken chu a buaithlak dawn emai, ka scooty nge i scooty hi kan dah ang?" tiin Alex-a chuan a han zawt leh a. "Ka scooty zawk hi dah mai ang, chuan i scooty in kan inphur dawnnia." tiin a lo chhang a. Tichuan Abawihi te in lam pan chuan an tlan dun ta a, reiloteah chuan an thleng a.

Abawihi chuan a scooty chu a han dah tha a, tichuan Alex-a scooty ah chuan chuangin an tlan leh ta a. An kalna tur an thleng tep tih ah kawng reh lai taka car lo ding chu Abawihi chuan ava melh zeuh va, passenger seat a hmeichhia lo muhil niawm tak chu a thiannu Mary ni tlat chuan a hria a.

"Alex..ding lawk teh." a han ti a, Alex-a chu dingin, "Enge ni a?" tiin a han zawt a. "Motor ah sawn Mary ka hmu tlatin ka hria." tiin a chhang a. "Tu Mary maw?" a lo ti hu mai a, "Aw..ka thiannu Mary." tiin a chhang leh a. "Chu chu ngati nge?" tiin a lo zawt leh a. "Vawiin khan ka damlo a ti sia, chubakah saw car saw Timothy-a car ni tlatin ka hria." Abawihi chuan a han ti leh a.

"Aww...an chhuak dun ve a ni mai alawm."

"Mahse tinge dawt a sawi kher anga...ka va be hrim hrim teh ang."

"Um...hetah ka lo nghal ang che."

"Awle."

Abawihi chu a chhuk a, car lam pan chuan ava kal ta a. Car tukverh ah chuan a han dak a, Mary chu a lo muhil tui ngei mai, mahse Timothy-a erawh a hmu hauh lo. Mary chu a han sawi vak vak a, "Mary...harh teh..Mary.." tiin a be mawlh mawlh a, mahse Mary chu a harh thei hauh lo mai.

Driver seat lamah chuan a va chuang a, "Mary..harh teh..enge maw awmzia le..ka tawng i hria em?" tiin a han be leh mawlh mawlh a, mahse Mary chu ala harh thei chuang hauh lo. Chutah seat hnung atang chuan X-a chu a rawn lang leh thut mai, a tihdan ngai te bawkin Abawihi chu hnimhlum hmang chuan a hrai ve leh ta a, Abawihi pawh chu a zal der mai.

Alex-a erawh phone khawihin scooty ah chuan a lo la chuang reng a, thil thleng chu engmah a hre hauh lo. A rei a tih deuh avang chuan ava hawi let a, mahse Abawihi chu a hmu ta hauh lo mai. Scooty atang chuan a chhuk a, "Abawih...Abawih.." tiin a au vak vak a. Chutah car chu a rawn in start thut mai a, Alex-a lam pan chuan a rawn tlan ta mai.

A rawn la tlan chak em em lehghal a, "Hey..ding rawh..ding rawh." tiin Alex-a chu a au vak vak a. Mahse car chu a ding hauh lo, Alex-a sut tum niawm fahran chuan a thlan chak zuai sauh mai. Chutah Alex-a chu side drain lamah chuan a zuang phei hman hlauh a, a su teuh fia fia ngei mai. Chutah Alex-a scooty chu a la su zui a, a chhe chiang kher mai. Tichuan car chu chak em em hian a tlan liam ta daih mai a, Alex-a hrilh a hai ngei mai.

A phone phawrhin Abawihi chu a call nghal a, a lo pick up ve mai a. Mahse Abawihi aw reng reng a ni lo, mipa aw, chupawh robot aw ang mai hi a ni. "Alex-a maw i nih?" a rawn ti chhur chhur mai. "Tunge i nih a? Khawnge Abawihi?" tiin Alex-a chuan a vin nghal vak vak a. "Lungngai suh, engtin mah a awm lovang." tiin a lo chhang a.

"Hey, tunge i nih? Enge i duh a?"

"Ngaithla rawh...i thiannu hian thudik hriat a mamawh a, chuvang chuan ka hnenah ka hruai a ni. Engtin mah ka ti dawn lo, him dam takin i hnenah ka rawn thlen leh ang."

Alex-a chuan a hrethiam lo kher mai, "Eng thudik maw? Eng thudik maw, Zawnga? Tunge i nih a? Motor khalhtu kha i ni em? Min chhang vat rawh." tiin a vin vak vak a. "Alex, nang nen hian inhmelmakna kan nei lova, neih pawh ka duh hek lo. Abawihi bialpa i nih ngei ka beisei, lungngai suh...misual hrem nan i bialnu Abawihi hi ka mamawh mai chauh a ni." tiin phone chu a dah hmak mai.

"Hello...Hello..hrep tak chuan.." tiin Alex-a chu a mangang kher mai, a han call back lehnghal vat a. Mahse a tlang thei tawh hauh lo, a mangang lutuk chu a tap pur mai. A tawpah chuan apa chu a phone ta tawp a, "Hello..pa..pa..ka tawng i hre thei em?" a han ti nghal chul a. "Bawiha, enge ni ta a?" apa chuan a rawn ti a.

Alex-a mangang lutuk chu a tap titih nghal a, "Pa..Abawihi, Abawihi.." tiin a sawi hleithei lo. Pu Tluanga pawh a mangang kher mai, "Enge awmzia? Tinge Abawihi chu?" a rawn ti ve nghal vat a. "Pa..Abawihi an kidnap...misualin a ru bo..ka scooty pawh a su chhe vek." a tih chuan Pu Tluanga chu a mangang kher mai.

"Enga? Khawnge i awm? Tunah khawnge i awm?" tiin a zawt ve nghal a, Alex-a chuan a awmna hmun chu a hrilh a. "Awle...a hlat loh chu..tikhan lo awm rawh..ka rawn kal nghal ang." tiin a chhang a. "Pa..hmanhmawh rawh, khawngaihin." tiin Alex-a chuan a lu a dawm vawng vawng mai.

"Lungngai suh BAwiha...kan lo kal nghal e." tiin Pu Tluanga chuan phone chu a dah a, "Ka fapa thiannu an kidnap...SHADOW X tho a ni...ani bak midang an ni thei lo." tiin Mamuana chu a han hrilh a. "Abawihi..Sawmtea case ami...principal call tu ber kha em ni?" tiin a lo zawt let vat a. "Ni e, kan kal angai." tiin a lo chhang leh a.

"Mahese Sir..mibo pahnih te hi?"

"Tunah chuan an in ang vek tawh, Abawihi pawh a tel tawh."

"Anih chuan engtin nge kan tih dawn?"

"Team A hovin ka fapa chu kan va lam anga, tichuan nangin kan in lamah i hruai haw ang. Team B hovin Liantea leh ZOthana phone an trace anga, keiin Team A ho ka hruai anga, Abawihi phone kan trace thung ang."

"Awle Sir."

***********************

Siama te in kawngka chu a rawn in kik ri karh karh mai a, "Lo lut rawh." tiin a lo chhawn vat a. Nghaka alo ni a, "Siama, khawnge i chhungte?" tiin a zawt nghal a. "An feh vek a, keiman in ka nghak." tiin a lo chhang a. Nghaka chuan mangan hmel tak hian, "Liantea leh Zothana te kha an la hmu lo a.." a tih lai chuan Siama chuan, "Ka hria alawm." a lo ti vat a.

"Ngaithla rawh, min lo tawng khalh zung zung suh."

"Anih leh enge?"

"Tun lawk khan ka call leh amaw? A tlang a...chuan mi pakhatin min rawn chhang."

Siama chu a tho chhuak zawk a, "Engmaw? Tunge chu chu?" a ti nghal chul mai. "Ka hrelo...mahse a aw kha..voice effect hmang a ang lutuk robot tawng ang deuhvin a tawng." tiin Nghaka chuan a lo chhang leh a. "Anih chuan police hrilh vat ta che, MAwla." tiin Siama chuan a vin hrep mai.

"Amak e aw...ka la sawi zo lo...ka voice hi record nghal rawh a rawn tia, chuan ka record a, hei ngaithla rawh.." tiin a phone chu a phawrh a, a play ta a. Chutah X-a aw ngei mai chuan, "Nghaka, i thianpa Siama nen khan ka sawina hmunah hian rawn kal ang che u. Police in call anih vaih chuan Zothana leh Liantea te hi an thi nghal anga, nangni pawh in chhungte zawng zawng nen ka that ang che u. Mahse ka thu in zawm anih chuan engmah na in tuar lo anga, in thiante pahnih pawh hi nungdamin in hmu ang. Landscape Park thlanga Chemical Factory hlui ah khan lo kal ang che u, kawngka ka lo hawnsak ang che u." tiin audio chu a tawp hmak mai.

Siama chuan mak ti tak hian, "Tunge...khapa kha tunge?" a han ti chul a. "Ka hre biklo..engtin nge kan tih dawn? Chumi zawt tur chuan ka lo kal a nih hi..tumah pawh ka la hrilh lo." tiin Nghaka chuan a lo chhang a. Mahse Siama chu a ngawi vung vung mai, "Siama..engtin nge kan tih dawn? Police chu kan hrilh tho dawn em?" tiin Nghaka chuan a han zawt leh a.

Rum tak hian Siama chu a han meng a, "Ka hlau lo...tupawh nise..a thusawi kha ka pawm e, kan pahnihin kan va kal ang." a ti ta a. "Mahse..a chi dawn mi? Thang pawh a lo ni thei sin?" Nghaka chuan a lo ti leh a. "I ngamloh chuan keimahin ka kal mai ang, tu phiangsen nge maw a nih ve khanglang le...keichu ka kal dawn." a ti leh a.

Nghaka pawh chu a han thaw hak a, "A tha e, anih chuan i kal dun ang hmiang. Mahse hmanrua engemaw tal kan ken angai, inven nan." a han ti ve leh a. "Umm...tiang kan ken ve ve chuan a tawk mai, ka hlau chhe te lo." tiin Siama chu a pawr khawp mai. An pahnih chuan tiang lian tha nelh nawlh chu an keng a, tichuan factory lam pan chuan an kal ta a.

************************

Pu Tluanga te chuan Alex-a awmna chu an va thleng ta, apa a hmuh veleh chuan Alex-a chuan a kuah a, "Pa...Abawhi, Abawihi.." a ti nghal vak vak a. "Ka hria, Bawiha...ka hria, a number min lo pe teh." a lo ti a. Alex-a chuan a number chu a pe a, "Mamuan, Alex-a hi in lamah lo va hruai haw rawh le." a han ti a.

Mahse Alex-a chuan a duh lo kher mai, "Nilo...ka lo kal ve duh..ka lo kal ve dawn." a ti ta tlat mai a. "A tul lo...i tan a hlauhawm. Ka awm alawm, ka lo hruai haw em em ang." tiin a hnem a, "Nilo Pa...ka lo kal ve dawn." tiin a la hnial tlat mai. Pu Tluanga chuan Alex-a biangah chuan a vuan a, "Bawiha, ka lo hruai haw ang. Ka tiam a che, i duh ang ngeiin Abawihi chu i nei dawnnia, ka thinrim tawh lo...i bialnu a nia, keipawhin ka pawm thlap." a tih takah chuan Alex-a pawh a ngawi ve ta.

"Mamuan...hruai haw rawh le." a ti a, Alex-a chu hreh chung chung chuan Mamuana bike ah chuan a chuang a, an tlan liam ta a. Thenkhat chuan scooty chhia chu an buai pui a, midang zawng chuan Abawihi number chu trace turin an tlan liam leh ta hlawm a. Pu Tluanga chuan ama hriattham lek hian, "Ka man tawh khawp ang che, i tlanchhe tawh hauh lovang." tiin a phun sap a.

***************************

(Naktuk zanah last chapter a ni tawh dawn a, comment lamah tualthattu inrinsiak ang u hmiang..hehe)

TO BE CONTINUE