UNHOLY CONFESSIONS (MIZO FICTION TEEN SLASHER/HORROR STORY) Written by : Aaron Malsawmdawngzuala WARNING : 18+ Chapter - 4

 UNHOLY CONFESSIONS

(MIZO FICTION TEEN SLASHER/HORROR STORY)

Written by : Aaron Malsawmdawngzuala

WARNING : 18+

Chapter - 4

*****************

Class chu an bang ta a, Abawihi te zawk chu an bang hmasa a. Scooty dahna lam chu an pan a, "Aw haw...a changtupa te an lo la bang velo anih hi." tiin Mary chu a han nui vel huah huah a. "Hawh..meizial lo zu ang..Alex-a awmloh lai hian.." tiin Abawihi chuan a bag-a meizial chu a phawrh a.

"Alex-a bulah a han zu ngam lo nghal ringawt a...i va han over tak." tiin Mary chuan a han nghawk vak a. "Hmeichhe zakthei lo deuh anga min ngaih ka hlau alawm, amah a fel hmel sia." tiin a lo chhang a. "Amah pawh khan  azuk ve tho kha." Mary chuan a lo la ti hram a. "Mipa te chu...mipa an ni miau va." tiin a lo hnial let leh a.

"A hrim hrimin..engtik atang khan nge meizial i zuk tan a? A hma khan a rim pawh i ngei theilo kha ania." tiin Mary chuan a han zawt a. Abawihi chu a khi suk a, "Thla 6 kal ta a kan thil tawn atang khan...tun thleng hian zan ka la chhuah ngam loh phah. Khata tang khan ka mu thei ngai lova, ka patea meizial zuk ban hi ka zu ve thin a, chuta tang chuan nimai." tih pah chuan a han nui vak vak a.

Chutih lai chuan Alex-a leh Bena te chu an rawn phei ve ta a, "Enge..min ban khalh animaw?" Alex-a chuan nui sang hian a han ti a. A meizial zuk paih nghal pah chuan, "Nia, vawiin chu kan English teacher a lo kal lova...last period ah kan nei a." tiin Abawihi chuan a lo chhang a. Mary chu a han ngawi vang vang a, "Bena..vawiin chu inphur haw ila..Ruthi'n a thik em lovang chu maw?" tih pah chuan a han nui sen sen a.

Lai lek lek hian Bena chuan, "Nia...a pawi hleinem. Mahse tinge? Hawna tur i neilo mi?" tiin a lo zawt let a. Mary chu a han nui put put a, "Aa..hemite pahnih hian tih tur dang a neiin ka hria." tih pah chuan Alex-a leh Abawihi te chu a han melh zeuh va. "Khawiah mah kalna tur kan nei lo." Abawhi chuan a lo ti vat a.

Bena chuan a hrethiam a, "Umm...hawh..lo kal rawh, a nih leh.." tiin a bike ah chuan a chuang a. Mary chuan Abawihi chu a nuih sak a, "Mangtha u aw.." a han ti a. Bena pawh chuan, "Anih kan kal ange aw..Alex...naktukah kan inhmu leh vek dawnnia." tiin a bike chu a han rap nung a, an tlan ta a.

Alex-a leh Abawihi chu an in en deuh vung vung ringawt a, an han nui rual leh ringawt a. "Lenna tur kan nei ami?" Abawihi chuan a han ti a. Alex-a chu a lo ner saka, "Ka hrelo...leng turin min duh emai, kan leng mai dawn mi?" a han ti a. "Khawnge kan len ang?" tiin a lo zawt leh a. "Kal phawt ila, min lo zui dawnnia." tiin a chhang a.

*****************************

Station lamah chuan Pu Tluanga leh Mamuana te chu an let leh a, computer hmaah chuan Pu Tluanga chu a thu nghal a. Sawmtea thi lai video chu a han en leh a, ngun tak chuan a han thlir vang vang a. Sawmtea inpuang lai leh a mangang lai te, principal berin phone a lak lawk theih loh laia Sawmtea hlau hmel te chu chiang tak chuan a en a.

A han maimitchhing a, Kima thih dan tur awm ang te chu a han ngaihtuah a. Jenet-i nena an conversation te chu a han en leh a, a lu a bu nghat nghat mai. Video chu a off a, Mamuana chu a han en a. Nui sak pah hian, "SHADOW X ngei kha a ni e, ama thil tih tho a ni." a han ti a. A lu hiah nauh nauh pah chuan, "Khami video kha a viral vak kha ania, khami style hria khan midangin Kima hi an that ve anilo maw?" Mamuana chuan a lo ti ve a.

"Nilo...X tho hi a ni...hepa hi kidnapper leh tualthattu chu a ni." tiin a chhang a. Chutih lai chuan SI Gilbert-a a lo lut a, "Sir..ui neitu chu kan hre tawh e." a rawn ti a. "Ehe..khawi ami nge? Khawi veng nge?" tiin a lo zawt vat a. "Ka rawn hruai alawm, saw ta saw." tiin kawngka lam chu a kawk a.

Kawngka lam an va en chuan pa pakhat, thau pui mai hi a rawn lut a. Pu Tluanga chuan thutna lo kawh hmuh in, "Lo thu rawh,ka pu." a ti a. Chupa chu a thu a, "Thingpui i in duh em?" tiin a han zawt leh a. "In duh love, ka lawm e." tiin a lo chhang leh a. Pu Tluanga chu a han thu tha sauh sauh va, "Tunge i hming le?" tiin a han zawt a.

"Sanglura ka nia.."

"Khawi veng?"

"Bawngkawn."

"Anih tak chu...engtikin nge i ui te chu an bo?"

"Thla hmasa daih tawh khan ania ka pu...."

"A pahnih khan i ui ve ve tihna em ni?"

"Aw ni e."

"A bo tirhin i report em?"

"Aw report e...mahse kan Veng Police Station ah zawk ania."

"Hma an la nghal lo vem ni?"

"Tun thlengin an la reh char char a, kan zawh lahin kan buaipui mek an ti zel bawk sia. Tih gnaihna ka hre tawh lova, tihian theihnghilh ka tum lai tak a nia."

"A nih tak chu....anih leh i ui te hi an kawlh em? Mihring han beih tawp te an ching em?"

"An kawlh a, a chak pawh an chak bawk. KA duat a, ka enkawl tha bawk a. Mahse chutin mirhing an seh ngai lo, thil tam tak ka zirtir ve thin alawm. Fa ang chiah in ka en a, mihring chu an bauh nasa, mahse an seh ngai lo."

"A tha anih chu...Mamuana hi zui la, i ui chu i lam nghal thei ang, i kal thei e."

Sanglura chuan Mamuana chu a zui a, Pu Tluanga chu a han thaw deuh hak a. Gilbert-a chu a han ko leh a, "Enge ni, Sir." tiin a rawn zawt a. "Gilbert, kalna tur ka nei a. Ka rawn let tawh lovang, i kutah ka dah aw.." a han ti a, "Awle Sir." tiin a lo chhang a. Pu Tluangtea chu a chhuak nghal a, motor-ah lutin chak takin a tlan a.

********************************

Engemaw ri bur chuan Zothana chu a ti harh zawk mai, a hawi kual nghal vak vak a. A awmna chu tuikhuah ni awm tak a ni, mahse tui engmah a awm lo. A bulah chuan a thianpa, Liantea chu a lo mu ve reng mai. A sawi vak vak a, "Liante..Liante..tho vat teh." tiin a ko vak vak a. Liantea pawh chu a rawn tho ta, "Ka lu ana lutuk." a ti nung nung a.

A han hawi kual ve a, "Ehe..khawnge kan awm?" tiin a au chel chul mai a, a khawk rum rum mai. An awmna chu tuikhuah ngei chu a ni a, nizung tlem lo lut bak chu eng dang a awm lo. "Tinge hetah kan awm, Zothan..mawh, enge thleng?" tiin Liantea bawk chu a rak vak vak mai a. "Ka hre biklo...tho vat teh." tiin Zothana chuan kaithawh a han tum a.

Mahse Liantea ke chu engemawni hian a pawt tlat mai, "Ehe..ka ke...ka en hi..enge awmzia?" tiin ni zung enna lamah chuan a han tawlh phei a, a ke chu chain hian a lo inthlung reng mai. "Zo..Zothan, min thlung bet ania..ka ke hi a thlung bet daih." a han ti leh chul a. Zothana chuan a ke chu a han en ve a, a han khawih chhin a.

Mahse engmah a lo inthlung ve lo, "Kei chu min thlung ve lo." a han ti a. "Min lo pui teh....ka ke hi...a hreng na vek ania." tiin Liantea chu a mangang hle mai. Zothana chuan phelh pui a han tum a, mahse a nghet lutuk tlat. "A theih loh....a nghet lutuk." a ti a. Liantea chu a tap deuh nghal pur mai, "Ngati nge hetah kan awm a...engthil nge thleng a?" a han ti a.

Zothana chu a ngawi vang vang a, "Kima te inah kan awm a...thutthleng te pawh kha kan pu ve vek a. Zung tura ka kal khan, zung tura ka kal khan...pawn zuninah khan nikhaw hrelovin ilo awm a, chuan...ka hnung atangin tu emawniin ka hmui a rawn hup a, thil rimna deuh ka hmin a, a bak engmah ka hrelo." a han ti a.

Liantea chuan mak tih hmel tak hian.."Keipawh..keipawh chutiang chiah chuan, pawn zunin a ka lut chiah kha..ka hnung atangin tu emawni in ka hmui a rawn hup..thil rimna deuh ka hnim a, ka lu a hai a, abak engmah ka hre lo." a lo ti ve bawk a. Zothana chu a hlauthawng kher mai, "Hnimhlum...hnim hlumin min hrai a ni." a ti khur dar dar mai.

"Tunge? Tunge anih ang? Engvangin nge hetia kan chungah kher a tih?" tiin Liantea chu a han tap leh pur a, "Ka hrelo..tunge a nih engtin nge ka hriat bik ang." tiin Zothana chuan a lo vin hlur mai. Chutih lai chuan tuikhuah chung chu mihring leng tawk vel lek hian a rawn in hawng a, X-a chu a rawn dak ta.

Zothana leh Liantea te chu an han dak chho va, "Hey..tunge i nih? Min la chhuak teh...khawngaihin min la chhuak hram teh." tiin Liantea chuan a au vak vak a. Mahse X chuan a en reng ringawt a, a ipte chu a zen ruk ruk a. Tape recorder hi a phawrh chhuak a, tuikhuah ah chuan a zu vawm thla a.

Zothana chuan a lo dawng chat mai, X-a ber lah chu a kal lehnghal daih a. "Hey..tinge i kal leh daih a? Min chhan rawh...hey..tunge i nih?" tiin Zothana chuan a au zui vak vak a, mahse X-a chu a reh hmak mai. Tape recorder chu a han play a, robot aw ang maia aw mak tak mai chu a rawn tawng chhuak leh ta.

"Zothan...:Liante, in pahnih hian thil sual lian tak in ti a ni. Nunna hlu tak, khawvela mi hausa ber pawh ina a lei theih loh nunna hlu tak mai chu nangni pahnih hian enga tan mah ngai lovin infiamnan leh nawmsip bawl nan in hmang a ni. Tupawh hi tisual thei vek kan ni a, mi famkim kan awm lo. Mahse ka kutah in awm tawh a, in thil tihsual avangin hremna in hmu ngei ang." a ti ta mai a, Liantea leh Zothana te chu an in en a, an hlau kher mai.

X-a chuan sawi zawm zelin. "In thianpa bialnu Jenet-i khan a ring em em thin che u a, thian ang tak takin a ngai che u. Mahse nangni misual khan hrai ruiin in pawngsual a, Kima leh a bang bik lo. Jenet-i nunna kha in ti chhe vek a ni, Jenet-i pa nunna in a tawrh phah bawk. Tunah chuan in sual man chu in hmu ve ngei tawh dawn e...hremna tawk turin inpeih rawh u le. He tuikhuah ah hian tun atanga rei lo teah tui a rawn lut anga, a khah thlengin a rawn lut char char ang." a ti leh ta mai a.

An hlauthawng dun tawh khawp mai, "Zothan..i thianpa Liantea ke kha chain hmanga thlun a ni a, kutlawnga phelh in tum anih chuan in tisual hle ang. Chahbi chu tuikhuah chung rangva ah hian ka dah a, i lak a ngai ang. Hrui ka rawn thlak thla anga, chumi hmang chuan i lawn chho thei a, chahbi chu i la thei a ni. Tin, tui khuah sirah plug a awm a, chu chu tui drain chhuahna tur a ni. Hruiah hian i rawn uai chho va, plug hi i off thei anih chuan i thianpa chu i chhan thei tihna. Mahse i thianpa hi tuiin a chim pil hman a, a thaw a chham hman a nih vaih chuan a thi a ni mai. Mahse tih theih pakhat ila nei, i thianpa kha phatsanin he tuikhuah atang hian i chhuak nghal thei a, chu chu i tan a awlsam zawk ang. Duhthlanna chu i kutah a innghat e, GOOD LUCK." tiin audio chu a tawp ta hmuk mai.

Liantea chu a tap zawih zawih mai, "Nilo..ka thi dawn...ka thi ngei dawn a nih hi." a ti vawng vawng mai a. Zothana thinrim lutuk chuan recorder chu a vawm vak a, a darh chuai mai. Chuveleh hrui chu a rawn inthlak thla a, hrui hrawl leh lian tak hi a ni a. Zothana hi dulkiar leh thau ve tak mai hi a ni a, mahni intha zo lem lo tak a ni.

Liantea erawh cher fip tang mai hi a ni a, hruiah chuan awlsam takin a in pawt chhuak thei dawn tih chu thil chiang sa a ni, Mahse Zothana erawh chuan a thei angem tih chu a hriat hauh loh, a chhan chu palian tak, dul kiar tak a nih avang leh a inthazo lo em em bawk si a, chutak chu an manganna pawh a ni reng bawk a ni.

Liantea chuan tap chung hian, "Zothan..min chhan rawh..khawngaihin...thih ka la duh lo ania." a ti chul mai a. Zothana chu a hawi kual a, hrui te chu a han en leh thin. "Drain...tui drainna tur tih ka a sawi tel a. A awmzia chu khawi lai emaw berah hian kua a awm, tui luan chhuahna tur. I awmna lai kha han dap kual teh...a lo inhnawh mai mai te hi a nilo maw?" a han ti a.

Liantea chuan a awmna lai chu a han dap kual a, "Engmah kua a awm lo." tiin a lo chhang a. Zothana chuan a han dap ve a, mahse kua engmah a hmu bik lo. Chhuat chu a han dap kual a, nizung eng tlemte bak a luh loh avang chuan a hmu vek thei silo, a zawng kual a zawng kual a. Chutih lai chuan tuikhuah chung atang bawk chuan pipe hi a rawn inrawlh a, tui chu a rawn haw ta pur pur mai le.

"Tui..tui a rawn haw tawh ania...Zothan....engemaw tal han ti teh." tiin Liantea chu a rak chul tawh mai a. Chet lak mai ngaihna pawh a hrelo, Zothana chu a che buai a ni ber mai. Liantea ke a chain chu phelh ava tum leh thul, mahse a nghet em em mai bawk si. "Zothan...lawm chho rawh...lawn chho vat rawh." tiin Liantea chuan a vin vak vak a.

"Ka lawn theih ka ringlo...a sang si." tiin Zothana chuan a hreh em em a, an pahnih chuan an tap dun pur tawh mai. Tui chu a rawn tam telh telh a, chhuatah chuan a tling khawm tan ta. Liantea mangang lutuk chuan, "Zothan..khawngaihin min chhan rawh. I chhuak thei em em ang..khawngaihin." tiin a ngen mawlh mawlh a.

Zothana chu a ding a, a lu a dawm vang vang a. Hrui awmna lam pan chuan ava kal ta nge nge a, tichuan hruiah chuan pawtin lawn a han tum ta. Pen thum vel chu a pen chho hman a, mahse a tha in a tlin lo, a rawn tla leh thuai mai. A khum ala sawh zui a, na a ti kher mai. "Zothan..hmanhmawh rawh..i tha kha hmang ta che." tiin Liantea chuan a lo au ve chul bawk a.

Zothana chu a tho leh a, lawn leh a han tum a, mahse a ngai te bawkin a rawn tla leh a, a ban tha chuan a taksa rit tak chu a zo ngang lo a ni e.Tui lah chu a rawn haw hnem tual tual mai a, an ngal chen chu a rawn tling tawh. "Hmanhmawh rawh...Zothan..kan thi ve ve animai." tiin Liantea chuan awmngaihna a hre tawh lo.

Zothana chu a pilh pheng phung tawh mai, lawn leh a han tum ta a. A hlauh em vang pawh a ni mahna, a lawn sang ve ta telh telh a. Mahse a tha chuan a tlin leh ta ngang lo, a thlah leh ta nge nge a. Mahse tlak pawh a tla na tawh lo, a chhan chu tui chuan a chim sang tawh tlat a ni. An kawng thleng a ni tawh, Zothana tan pawh uai a harsa tulh tulh mai.

Tichuan a han lawn leh a, a lawn sang leh thei deuh ta. Theih patawp chuan a tang a, a lawn chho zel a. A chanve chu a lawn thleng ta hial mai, thei leh thei lo chuan a zu dak thla a. Liantea chu tui chuan a lo chim hial tawh a, a ban chu ala rawn vai vak vak a. Zothana chu mittui tla zawih zawihin a lawn zel a, "Thianpa..lo tang fan fan rawh." tiin a lawn zel a.

Tui chuan a rawn chim sang zel a, Liantea chu hmuh pawh a hmu tawh lo hrim hrim. Chutia a lawn tawk tawk lai chuan Liantea chu tui chhungah chuan a lo inhai nasa mai a, a thaw a chham takngial dawn. Chain chu a pawt vak vak a, mahse a pawt bung zo hauh si lo. A thaw a chham ta a, a hnarah chuan tui a hip lut hrawk mai.

Zawi zawi chuan chain chu a thlah riai riai a, a che ta miah lo mai. Zothana pawh chu a lawn zel a, a tawp a tawpah chuan a lawn chhuak ta. Ranva chunga chahbi chu a la nghal a, tichuan pipe pawh chu a dah sawn a. Tuikhuah sir chu a han melh kual leh a, plug chu a hmu ta ngei e. Plug chu a han hmet a, tui chu a in-drain chhuak ta.

Tuikhuah lam chu a zuk dak leh a, mahse tui chu a lo la tam khawp mai. A awmna hmun chu a han hawi kual a, factory chhung niawm tak a ni. Tuikhuah bang te pawh chu cement leh thir vek hi a lo ni a, a hrethiam lo kher mai. Tichuan tui in-drain na lai tur awm ang te chu a han melh kual leh a.

MAhse pipe kal kual dan vel chu a hrethiam hauh lo, tuikhuah ah chuan a zu dak leh a. Tui pawh a lo phai tan ta, mahse a thianpa erawh ala hmu thei tlat lo. "Liante...Liante...ka tawng i hre thei em?" tiin a han au khawk rum rum a. Mahse chhanna a dawn hauh lo, tichuan a awmna lai vel chu a han enkual leh deuh va.

A sirah chuan leihlawn sei zet mai hi a lo awm a, rang takin ava pan nghal a. Han chawi mai a tum a, a tha a lo hmang nasa tawh nen, a zo tha tlat lo mai. Chubakah chu leihlawn chu a sei tha em em a, thir atanga siam a nih avangin a rit hle bawk. Theih tawp chhuah chuan a han chawi leh a, thei leh thei lo chuan a hnuhin a hnuk phei a.

Tuikhuah chhungah chuan a rawlh lut ta a, a han siamfel meuh chuan tui pawh a lo inpaih zo ta. A thianpa chu a zu hmu thei ta a, che miah lo hian a lo mu a. Rang takin a zu chhuk a, "Liante...i harh em?" tiin a be mawlh mawlh bawk a. Mahse Liantea chu a che tawh miah lo, a zuk chhuk thleng ta a.

Liantea chu a sawi vak vak a, "Liante...Liante.." tiin a awmah te chuan a chum a. A thiam ang tawkin CPR te chu a han pe a, mahse a thaw thei tawh lo. A tap zawih zawih a, "Nilo..Liante, ava han pawi tak em.." tiin a inchum vak vak a. Thinrim tak hian, "Tu phiangsen nge i nih? Mawhh...enge i duh a?" tiin a au vak vak mai.

**********************

Abawihi leh Alex-a te chu tlang pakhatah chuan an chho dun a, tutthleng pakhat lo awmah chuan an thu dun a. An hma zawn takah chuan tlang lehlam te, in tamtak te chu a lang thluah mai. "Awi a mawi lutuk..helai hmunah hian ka la kal ngailo reng reng." tiin Abawihi chu a hlim hle mai.

"Kan tetlai khan kan kal nasa thei lutuk...a nuam vak tawh lo zawk a nih hi." Alex-a chuan a lo ti a. "Hmm..kan tetlai a han ti ve khanglang a..tunah pawh naupang ila nih kha." tiin Abawihi chuan a lo chhaih a. Mahse Alex-a nuih chu a za chiah lo, "Nia...tlemin upa ve deuh ila chu ka duh em em pawh hian min duh let ve ngei ang." a ti chuai raih mai.

Chuveleh Abawihi nui lai chu a tawp hmak a, "Alex-a'n duh dang a nei amaw?" tiin a rilru chuan a inzawt nghal a, a nguai nghal ruih mai. Mahse a nui lui hram hram a, "Eheu..duh ruk deuh i nei tihna em ni?" tiin a han zawt a. Alex-a chuan a melh ngai melh reng pah chuan, "Umm..mahse kei aiin a upa zawk tlat a, a pawi a nih hi." a lo ti leh a.

"Tunge a nih reng reng a?"

"Hehe..hmeltha deuh mai mawle..engtik lai pawhin ka rilru ah hian a awm reng."

"Min va hrilh ngai love.."

'Min zawt ngai hleinem."

"Tunge a hming ni reng reng a? Khawi ami nge? Ka hriat zawng a ni angem?

ZAm tih hriat tak hian Alex-a chuan Abawihi chu a en a, "Ihh..nangmah ania." a ti ta mai a. Abawihi chu a hik chhuak nghal vek hian a inhre hial a, "Kei..keimah..keimah hi maw?" a ti bah nuai a. Zalo tak chuan Alex-a chu a khi suk a, "Umm..ka hmuh tirh che khan ka duh tawh che a, mahse kei aiin i upa tlat a. Chubakah bialpa i nei em pawh ka hre silova, min duh ka ring lo bawk nen, ka sawi ta lo mai a ni." tiin a chhang a.

Abawihi chuan sawi tur pawh a hrelo, a ngawi vung vung ringawt. Chu ringawt pawh chuan Alex-a chu a ti lai leh zual a, "Theihnghilh rawh...a zahthlak ka ti..mahse ka hrilh ve hrim hrim che anih kha..hehe, bialpa i nei reng awmsia..ka van zak tak." tiin a sen tawn tawn mai. Zawi te hian Abawihi chuan, "Bialpa ka nei bawk lo." a ti hmuk mai.

"Maw? Engtin maw i tih?"

"Bialpa ka nei lo."

Alex-a chuan a chil a han lem dawk a, "Anih...min..min.." a sawi ngam chiah bawk silo, a han ngawi leh rih thin. Chutah Abawihi chuan rang zet hian, "Keipawn ka duh che alawm." a rawn ti ve ta a. Alex-a chu ala phu deuh zuk lehnghal a, "Animaw?" a ti deuh hu mai. Abawihi chu a nui deuh huk a, "Um." tih ringawt chuan a chhang a.

A theihtawp chuan Alex-a chu a han insang mar a, a huaisenna zawng zawng sawm khawm chuan Abawihi chu a han thut hnaih a. A khabe ah chuan dawm chhovin a kiss ta a, Abawihi pawh chuan a chhanglet rang kher mai. An duh thawh tial tial a, boruak pawh a romantic tan tawh kher mai.

Chutih lai tak chuan Abawihi phone chu a rawn ri thut mai a, an phu dun chiang kher mai. Abawihi chuan phone chu a phawrh vat a, anu a lo ni. "Aw hello..Nu, enge ni ta?" tiin a han zawt a. "I lo va haw har ve..hei, pa pakhat a lo kal a, a hmu duh che a nih chu." a rawn ti a. Abawihi chuan a hrethiam lo kher mai, "Tumaw? Tu pa pakhat maw?" a lo ti hu mai.

"Min hmuh chuan min hre mai ang a ti che a, lo haw vat mai teh."

"Chutiang patling thian ka nei lo...min hai aniang."

"Amak e aw..a hai lo che, chubakah a tlai tawh, lo haw vat vat teh."

"Awle, ka lo haw ang."

"Ngati nge a?" tiin Alex-a chuan a lo zawt nghal a, "Tu emaw alo kal a, a hmu duh che a ti ringawt a." tiin a chhang a. "Tu tak ni ang maw? Umm..anih chuan haw phawt ila nimai lawm." tiin Alex-a chu a tho va, Abawihi pawh chu a tho ve nghal a. An han inmelh vang vang a, "Tikhan, kan inngaizawng tiraw?" Alex-a chuan a han ti leh hu a.

Nui chung hian Abawihi chuan, "Umm..ni mai." a lo ti a. Alex-a chu a nui var var mai, "Yess..i bialpa ka ni ta." a han ti zawi sap a. Abawihi chuan chhang lovin a nui ringawt a, an han inkuah leh vawng vawng a, "Kan kal tawh dawn mi?" Alex-a bawk chuan a han ti leh a, Abawihi chuan  alu a lo bu nghat a, an haw ta a.

**************************************

Ni a tla dawn tawh a, khua pawn thim lam a hnaih tan ta. Alex-a te college lecturer pakhat, Richard-a pawh chu a bialnu te ina a lengkawi pawh a haw ve ta a. Richard-a hi kum 35 vela upa a ni a, ala tlangval a ni. Kumtin deuh thaw hian a student hmeichhe zinga pakhat tal hi a rukin a ngaizawng ngei ngei a, student thenkhatte pawhin an hre nual bawk.

Mahse an taksa mawinaa chen zawh hnuah a then leh mai thin a, tun tuma a bialnu erawh a student te zinga mi a nilo tlat. Richard-a hi Durtlang Leitan a awm a ni a, a bialnu chu Chanmari ami a ni thung. Tichuan Leitan Khurchhung a thlen chuan kawngsira nuho chawhmeh zuar te chu a han en a, a bike chu a tiding a.

DAwnfawh tuihnai tak tak, alo sen suah mai chuan a mit a la ta tlat mai. "Ka nu in a ei chak ang." tiin bike atang chuan a chhuk a, dawnfawh chu a han lei a. PAwisa a phawrh lai tak chuan a bike seat chu naupang pakhat hian perek zum tak mai hian a lo chhun pawp thluah mai. Ava hmu chu a thinrim em em a, "Hey..naupang.." tiin dawhfawh pawh chu a ngaihsak tawh lo.

Naupang chu ava um a, chu naupang lah chuan a hmui a tuam tlat mai. Richard-a chuan ava pan a, rang takin naupang chu a tlan chhe nghal a. Leitan Khur chhunga peng lehlam, foot path awmna bulah chuan a tlan phei ta daih mai. Richard-a chuan a um nghal a, a umpha lo em em mai lehnghal.

An in um thui zel a, kawng kawi ava thleng chu naupang chu a hmu ta miah lo mai. A hawi kual vak vak a, mahse kha naupang kha a bo daih tawh. "Mai mai chuan le..tufa nge maw a nih le?" a ti nuah nuah mai a. Let leh a tum chiah chu ahma zawnah tak chuan X-a chu a lo ding run mai, engmah a sawi hma hma chuan X-a chuan rawmawl a phawrh a, Richard-a hmuiah chuan ava hup a, Richard-a chu a tang reilo kher mai, a zal nghal der mai.

**************************

TO BE CONTINUE