NATHAN SEASON-4 Written by : Aaron Malsawmdawngzuala Episode-21 (THE STOLEN LADY-4)

 NATHAN SEASON-4

Written by : Aaron Malsawmdawngzuala

Episode-21

(THE STOLEN LADY-4)

********************

Zingah chuan hma takah ka tho leh a, sana ka en chuan dar 5:30 a pel hret chauh. NAthana erawh a la muhil tui bawk aniang, ka room atang pawh chuan a hnar ri ka hre thei. Tichuan ka room chu chhuahsan in lobby-ah chuan ka zu chhuk a, mahse receptionist duty an lo la thleng lo a ni ngei ang.

Security guard pakhat chu Front Desk ah chuan a lo awm a, min hmuh veleh chuan a ding nghal a. "Good Morning, Sir.." alo ti vat a, "Morning...duty tur an lo la thleng nange?" tiin ka han zawt a. "La thleng lo, zing lam duty ho hi chu an rawn thleng har deuh thin a." tiin min chhang a.

Chhang let lemlo chuan pawnah chuan ka chhuak a, boruak chu a thiang tha kak kak hle mai. Park velah chuan ka tei kual mai mai a, a nihna takah chuan Muani kha ka nghak a ni. Ka hmeichhe duh zawng tak a nih vang te, hmeltha ka tih vang te nih lovin ka rinhlelh vang zawk a ni.

Zan hmasa lama kan thil tawn te kha ka ngaihtuah let a, Nathana'n staff zingah hian kidnapper puitu an awm a rin thu a sawi te khan ka rilru ah chuan Muani bak hi a awm lo. Mahse nimin zinga park-a a tap hawm hawm lai ka hmuh khan harsatna engemaw tak chu a nei tih ka chiang a ni.

Minute 10 vel hnuah chuan motor pakhat hi a lo kal a, a rawng chu a sen a ni. Rang takin thingkung phenah chuan ka biru nghal a, ka enthla ta a. A chhung atang chuan Muani chu a rawn chhuak a, driver chu motor pawn lam atang chuan a be mawlh mawlh a. A biak dan atang chuan chu driver chu Muani boss niawm tak a ni, a zah hmel em em a.

Tichuan Muani chu a lut ta a, motor chu a kal leh mai a. Lodge lam pan chuan ka phei leh nghal a, mahse ka ipte ka han zen chu ka bike chahbi a lo awm hlauh mai. Muani va biak chu tum viau mah ila, kha driver kha va umzui chu ka duh zawk ta tlat mai a. Tichuan ka bike awmna lam chu ka pan ta zawk a, rang takin chu motor sen chu ka um zui ta a.

Gate ka pelh hnu chuan motor chu a lo la tlan hla lo kher mai, ka zui ru zel a. Kawng a reh tha bawk a, a tlan chak par par kher mai. Ka umzui ve zel a, mahse ka tlan chak lutuk duh lo, a chhan chu ka umzui a ni tih a hriat ka hlauh vang a ni. Reiloteah chuan in pakhat, fal nalh mai zawnah chuan a ding ta a.

Kawng kawi lai takah chuan kei erawh chu ka ding daih thung, bike atang chuan ka chhuk a. Tichuan fimkhur tak chuan ka enthla a, kawngka chu a kik kauh kauh va. Pa pakhat, lian zet mai, samsei leh khabe hmul buk chhup mai hi a rawn chhuak a. Mizo pawh a nih ka ringlo, a hang em em bawk.

Hnamdang a nih ngei ka ring a, Maxie ru bo tute an nih pawh ka ring nghal hmiah. Mahse va kal chilh a, va bei turin silai ka keng bawk silo, hmanrua engmah ka keng hek lo. Ka phone chu ka phawrh a, tichuan an inbe lai chu video in ka record ta a. Rei fe an inbiak hnu chuan inchhung lamah chuan an inzui lut ta a, keipawh lodge lam pan chuan ka phei leh ta a.

****************************

Ka thlen hnu chuan inchhungah chuan ka lut a, Muani'n min lo hmu chiah chu a phu deuh zawk mai. Mahse engmah ka zawt ta lem lo, ngawi reng chuan ka room lam pan chuan ka kalsan mai a. Nathana room chu ka kik karh karh a, a rawn hawng ve mai a. A mit nuai nuah nuah pah chuan, "I va tho hma thei em em...enge maw i hriat le?" a lo ti nung nung mai.

"Sir, thil pawimawh deuh hrilh tur che ka nei." ka han ti a, a la ham bui bui zui. A zi mar leh te te a, "Thu phawt la, ka hmai ka han phih ve lawk." tiin bathroom ah chuan min luhsan daih a. Ka han ngaihtuah a, Muani chungchang chu sawi ka tum uai nangin a tul berin ka hre leh ta lova. A chhan chu Nathana chuan a zu dawp leh bawrh bawrh anga, chu chu ka duh lo a ni.

Chubakah Muani hi kidnapper puitu ber pawh lo nise, a duh vang a nih ka ring hauh lo. Tihluihna hmangin an vaubet a nih ka ring nghet bur, a chhan chu kha driver a biak dan te, nimin zinga rilru nat hmel taka a loh tah hawm hawm te leh a mit duk chur te khan misual a nih hi min rin tir theilo a ni ber.

Nathana chu a rawn chhuak a, "Enge ni ta?" tiin ka bulah chuan a rawn thu a. "Sir, englo ania maw....tukin khan pawnah ka tei kual mai mai a. Chuan gate bulah sawn car sen hi a lo ding a, driver kha ka en khan kha jacket-uk ha pa kha a nih duh hmel riau ka tia. Ka zui ru a, lodge atanga hla vak lovah sawn in fal deuh pakhat, lian ve deuh mai hi a awm a, chumi bulah chuan a ding a. Vai palian deuh a lo chhuak a, ka ringhlel riau a..chu chu ania." tiin dawt tlem chu ka han phuah belh ta zeuh va.

"Chu zawng chu maw? Midang daih pawh an lo ni thei asin." tiin Nathana chu a lo ner nung mai. "Va kal hrim hrim a tha in ka hria, thil ho te te anga kan ngaih atang pawh hian chhui a ngai tawh i tih kha." ka han ti leh a. A lu a bu deuh nghauh va, "A tha alawm, ni e...engpawh nise, thingpui in phawt ila, kan va finfiah dawn nia." tiin min chhang a.

**********************

Thingpui chu kan in zova, tichuan Nathana car hmang chuan in chu kan va pan ta a. Kan thleng a, "Saw in saw maw?" NAthana chuan a han ti hu a. "Aw ni e...saw tah ngei sawn, saw...a car sen pawh saw ala din saw." tiin car chu ka kawk a. "A tha e, va kal ila." tiin motor atang chuan a chhuak a, ka zui ve nghal a.

In bulah chuan mipa pahnih hi an lo awm a, an lo titi dun nasa mai. Kan va phei a, "Nangni aiin kan hmasa zawk ania.." pakhat chuan a lo ti a. Kan hrethiam lo kher mai, tawng ka tum a, mahse Nathana chuan tawng lo turin min mit mei zeuh va. Kan kal hla deuh va, "Rinawm, kan fimkhur angai." a han ti ringawt a.

"Enge awmzia?" ka lo ti deuh hu a. "Sumdawnna enge maw tak an kalpui pawh a ni maithei a, saw mi te saw customer pawh an ni maithei. Civil dress ve ve in kan awm a, police kan ni tih tuman an hre dawn lo. Kan wallet a mi police badge hi la thla ve ve ila, police id pawh hi motor ah dah ang." a ti ta mai a.

"Mahse, ngati nge?" tiin ka zawt leh a. "Thil hrethiam lo ang deuha lan kha a chi loh, engkim hrethiam leh man thiam vek angin lang ila, saw mite saw ka han be kual vel anga, lo tawng ve miah suh ang che. Engtin tin emaw thil ka zawt kual anga, a chiang vek mai ang. Customer an lo ni anih chuan customer angin kan awm ve ang, i hrethiam em?" a han ti a.

"Awle, a tha alawm." tiin ka chhang a. Kan Police ID leh kan badge te chu motor ah chuan kan dah a, kan ID pangngai chauh chu wallet ah chuan kan dah a, tichuan akan va phei leh ta a. NAthana sawi ang ngei chuan kei chu tawng velo in ka ding ngawi reng a, Nathana chuan ava be dun ta a.

"An la hman lo ami?" tiin Nathana chuan in chu a han kawk zeuh va, "Customer an tam deuh va, fimkhur deuh a tlem te te a an rawn chhuah angai a...chuvang mawle." pakhat chuan a lo ti a. Nathana chu a khi suk a, "An va tho hma awm hlawm, zingkarah an kal tihna a ni ang maw?" a han ti leh a.

"A hausa zual pui an ni aniang, an riah chilh thin alawm. Keini tlema thalai deuh zawk hian a man tlawm kan chang a, Pu Ranjit-a hi chuan patling pui pui, sum nei ho hi a duhsak bik a. Officer choice ho hi an chhelo hlawm sia, keinin vai nula mai mai kan dawr pha a." tiin a han nui huah huah a, ala ruih hmel em em lehnghal.

Tikha chuan engkim a chiang nghal uar mai, he khuaah hian Human Traficking hmanga sumdawnna a rukin he an sawi, Pu Ranjit-a hian a lo kalpui reng a ni ngei ang. Nathana nen chuan kan inmelh zeuh va, kan hrethiam ve ve tih lan dan kan nui dun sak bawk. Chutih lai chuan kawngka a rawn inhawng a, vai patling dulkiar deuh pahnih leh mizo patling pakhat, hrisel hmel zet, palian zet hi an rawn chhuak a.

Rilru ana duh kher mai, kan ram ngeia chutiang sumdawnna, a ruka lo awm ta mai chu. "Darkar khat ah khan engzat nge khah?" tiin Nathana chuan a han zawt leh a. "Aww..a hmeichhe rate a zir aniang chu, zingkar leh zanrei ah bak kal ngam a ni silova..chhunah an kalh hmak zel bawk sia..a buaithlak a nih hi." tiin a lo chhang a.

A khat tawk chuan mipa thenkhat chu an rawn chhuak leh zauh thin a, "Engtin nge in hriat ve reng reng a?" tiin kan biak mek pa chuan min rawn zawt ta thut mai. Mahse awlsam zet hian Nathana chuan, "Kan sawi duh bik nang.." a lo ti ve ngat a, chupa pawh chu a khi suk ringawt. Chutah kha vaipa, Ranjit-a ngei mai, palian zet, dum zet, khabe hmul buk chhup mai kha a rawn chhuak ta.

Kan hma ami tlangval pahnih te chu a ko lut a, Nathana nen chuan min rawn en a. "Lo la nghak rih ru aw.." tiin luh a tum a. "Cheng sing 7 man vel in kawl em?" NAthana'n a han ti chu Ranjita chu a ding chat mai. A rawn hawi let leh a, "Engzah man maw i tih a?" tiin a phur hmel kher mai. "Sing sarih..sing 8 emaw vel..tha ve deuh.." tiin Nathana chuan a lo chhang a.

A ngawi vang vang a, "A cash in in rawn pai em ni?" tiin min han zawt leh a. Nathana chu a nui suk a, "Swipe Machine in nei lo em ni?" tiin a lo zawt let a. Ranjita chapo hmel chu a inthlak chiang ngei mai, min tlawn hmel tak chuan, "Lo lut ru ka pu." tiin tlangval pahnih te chu, "Lo nghak ru." tiin a chhuah tir leh daih mai.

Nathana nen chuan kan lut a, rin ai daihin inchhung chu a lo reh a. Dawhkan lian tak pakhat bulah hian vainu hmelchhe zet, thau em em mai hi a lo awm a, a bulah chuan security atana an tih niawm tak, Asian lam ni niawm tak pa pahnih, sek zet mai hi an lo ding bawk. An rawn kal phei a, Nathana nen chuan min dap a.

Kan ID te chu kan hmuh a, vainu chu en leh in an lu an bu nghat a. Ranjita chuan vainu chu a han hrilh ru a, mak tih hmel deuh hian Nathana nen chuan min en dun a. Min han thlek kual vel a, "Police in ni lo maw?" a han ti te te a. "Ni love..civil mi diktak kan ni e." tiin ka chhang a. Chutah Ranjit-a chuan, "Sing chuang chuang man chu hetah chuan kan kawl hrih lova, a hmunpuiah zawk an awm ang." a lo ti a.

NAthana chu a nui a, "Sir...a hma pawhin ka lo kal tawh kha, hmeichhia lo upgrade deuh te u ka tih kha." a han ti vel a, Ranjit-a chuan a hrethiam lo kher mai. Nathana chu a han en vang vang a, "I lo kal tawh maw?" a han ti deuh hu mai a. "Min hre tawh lo ami...ka vawihnih lo kalna a nih hi." a han ti leh a.

Min rawn en a, "Anih nang?" tiin min rawn zawt a. Ka chhan hma chuan Nathana bawk chuan, "Ka hrilh ve a...ani hi ka unaupa ania. Kei aiin a hausa zawk, chuvang chuan ka rawn hruai ve a nih hi." a lo ti leh zung zung a. Ranjit-a chu a ngawi vang vang a, "Engtik laiin nge chutiang i sawi le?" a ti nuah nuah mai.

"I rui anga i hre lo leh pek tawh aniang chu.." tiin vainu chuan a lo vin hlur a. "I hria em ni, hepa hi?" tiin Ranjita chuan a zawt a. "Customer tamtak an lo kal a, ka hre hrang vek bik hleinem." a lo ti vin hlur mai. "Naa..min ringhlel em ni a, nangni hi...inva ti awm ang love.." Nathana chuan a han ti kual leh vel a.

Inthlahrung tak hian Ranjita chuan, "Ni love...nia, ka rui vang a ni leh pek ang." tiin lehkha phek hi a la a, "Kha ule.." a han ti a. Lehkha phek ah chuan hmeichhe hrang hrang hi an lo lang a, an room number chu an thlalak hnuaiah chuan a lo inziak zel a. An vaiin 10 an ni a, mizo ang tak tak pawh an awm nual mai.

An zinga pasarih chu chiang takin vai hmeichhia an ni a, mahse tumah chu an hming a in tarlang lo thung. An rate chu a in ang lo ve nuai hlawm a, a tlawm ber chu 5000 niin a to ber chu sing hnih man a ni. Mahse MAxie hmel reng reng kan hmu ve lo, "Heng ho tho hi maw..a ngai deuh vek an nih hi.." tiin Nathana chuan a han chhimbu dawi leh hlawm a.

"Nia..ka pu, a to ho chu a hmunpuiah kan thawn thla zel a." tiin Ranjit-a chuan a lo chhang a. Chutah dawhkana hmeichhe dang thlalak an lo dah zingah chuan Maxie thlalak ka hmu ta tlat mai, "Bro, khu nu khi ava chhelo ve." tiin Nathana chu ka han nghawk zeuh va. Nathana chuan a zuk en ve a, "Khunu khu a awm lo em ni? Dawr ava chakawm ve.." a han ti ve nghal a.

"Heng ho hi chu tunah chuan Aizawlah kan thawn hlawm a, hmunpuia thawn thlak turin. An man pawh a to, kan hlawkna ber tur te an nia." tiin a lo chhang leh a. VAinu chuan vin tak hian, "A awm ho kha thlang ve mai teh u, hei a tlai dawn...dar 10 thleng chauh kan hawng ania. Customer dangte pawnah an la awm, ti vat rawh u." a lo ti hlur mai.

Nathana chuan mizo ni ngeia a hriat chu a kawk a, "Henu hi aw.." tiin pawisa chu a pe nghal a. Ranjit-a chuan min en a, "Anih nang ve?" a han ti leh a. Nathana chuan min lo tawng khalh leh in, "Henu hi kan intawm dawn." a lo ti vat a. Ranjit-a chu a khi suk a, "Eheu..in va che na dawn ve, a tha alawm." tiin room lamah chuan min chhohpui ta a.

********************

Room chu kan thleng a, "In mobile lo la ru le.." a han ti a. Mahse kan phone erawh car ah kan dah daih thung, "Kan lo keng lo, kan hre lawk ve vek alawm, phone ken luh phal a nilo tih te chu.." tiin Nathana chuan a lo chhang leh vat a. "Darkar 2 chiah hun in nei ania, nuam deuh khan in hmang dawnnia." tiin min chhuksan ta a.

Room chu kan kik a, "Come in." tiin hmeichhe aw hian min lo chhang a. Kan va lut a, mizo ang tak mai hi a lo ni a, a hmel lah chu a tha phian lehnghal. Za lo tih hriat tak chuan a nui suka , "In pahnih in maw?" a lo ti tham tiak a. Nathana chuan kawngka chu a kalh nghal a, "Thiannu, mizo maw i nih?" tiin a zawt a.

"Aw ni e." tiin a lo chhang a. Nathana chu a hawi kual a, "Camera an vuah em, room chhungah hian?" tiin a zawt leh a. "Aih, vuah lo ve." tiin a lo chhang leh a. "Anih leh kan tawng thawm hi an hre thei em?" tiin a zawt leh a. "Aih hre thei lo." tiin a chhang leh a. Nathana nen chuan kan thu a, "Thiannu, chi ai suh aw..kan pahnih hian police kan ni a, customer anga inlanin kan lo kal a ni." a ti ta a.

Chuveleh chu nula chu a mittui a tla nghal a, "Ka pu..ka van lawm tak, min chhanchhuak hram teh u." a ti nghal chung chung mai. "Bengchheng suh...eng thil nge helai hmunah hian thleng, heng ho hi eng mite nge an nih min han hrilh teh." a han ti leh a, chunu pawh chuan a mittui a hru a. "Kum 1 lai chu ka awm tawh a, tlanchhuah ngaihna ka hre lo a ni. Hei hi khawi hmun nge pawh ka hrelo, kum 1 chhung chu he room ah hian ka awm char char tawh a ni." tiin a inhnit feih feih a.

"Tunge i hming?"

"Rosy ka nia."

"Khawi khua nge i nih?"

Rosy chuan a chanchin chu a sawi ta a, kan zinna khua tho chu an khua a lo ni a. "Rosy...i awmna hi maw, in khua tho a ni." tiin a hrilh a, mak a ti ngei mai. "Kan khuaah tho maw ka lo awm char char a, ka pu, khawngaihin min chhanchhuak hram teh u." a han ti leh lawm lawm a. "Lungngai suh..engtin nge an rukbo che han sawi teh." tiin Nathana chuan a zawt leh a.

"Ihh...zanah ania, ahma pawh kan khaw tleirawl pakhat Mimi chu a hma kum lawkin a bo tawh a. ZAwn hmuh a ni ta miah lova, chuan...zankhat kha thil lei turin ka chhungten min tir a, tichuan ka haw leh lampang kha kawngsir zunina ka zun laiin tu emaw hian min rawn bei thut a, hnimhlum a hmang a, tichuan hetah hian ka taksa chu sumdawn nan an hmang a, tihian ka nun ka hmang ta a ni." tiin a tap zawih zawih mai.

"Anih leh a hmunpui an tih chhen hi khawi lai nge ni a?" tiin ka zawt a. "Hman deuh khan Pu Ranjit-a hian fel deuh va i awm a, customer te i ti hlim zel a nih chuan Delhi lamah i chhuk ve anga, sum tak tak i hlawh ang ti chu a sawi ngei a. Delhi chu a nih ka ring, ka pu." tiin min chhang leh a.

Nathana chuan a lu a bu nghauh nghauh va, "Kan lawm e, lungngai reng reng suh aw...kan chhanchhuak em em ang che. Nangmah chauh nilovin, hmeichhe dang zawng zawng pawh kan chhanchhuak em em ang." tiin a hnem a. "Tunah in rualin min hruaichhuak ve thei lo em ni? Helai hmuna awm hi ka duh tawh lo." a han ti leh a.

"Tunah chuan hetah hian i lo awm angai, chuan rinhlelh awmin lo awm hauh suh ang che aw...engmah lo sawi chhuak lo la, vawiin la la hian kan rawn chhanchhuak ang che." tiin Nathana chuan a chhang leh a. Darkar 2 a ral a, room kawngka chu a rawn inkik leh karh karh mai.

Kan va hawng a, Ranjita a lo ni. "In hun a zo ania." a rawn ti a, "Keini pawh kan zawhna a rei tawh." tiin Nathana chuan a lo chhang a. Tichuan min chhuk pui leh ta a, nula dang, a bik takin vai nula ho chuan min lo en hrek hrek hlawm mai. "Police in hrilh a nih vaih chuan...chuti khati." tiin vainu chuan min vau lawk nasa kher mai, tichuan kan chhuahsan ta a.

*************************

Lodge-ah chuan kan let leh a, Muani chungchang erawh chu NAthana bulah chuan engmah ka la sawi chuang lo. Inchhung kan lut a, mahse mak tak maiin Front Desk ah chuan Muani a lo duty miah lo mai. Hmeichhe dang daih a lo duty a, mak ka ti angreng kher mai. Mahse engmah sawi chuang lo chuan Nathana nen chuan an inzui chho a, room ah chuan kan lut a.

"A mak kher mai, Mizoram chhung ngeiah...a mak tak zet." tiin a vei kual a, a thinrim hmel kher mai. "Sir, engtin nge chet kan lak dawn?" tiin ka zawt a. "Silai kan keng lova, kan police form lah kan keng hek lo. Civil mi anga kan awm angai a, a ruka kan chet angai a ni." a ti ringawt a. "Engtin nge kan chet ang, silai kan nei silo nen?" tiin ka han zawt leh a.

Chutah a ding thut a, "E..ngawiteh, DCP Maenga kha pistol pahnih ka chah a, bawmah khan a dah thu a sawi tak e." tiin wardrobe chu a hawng a. Lehkha khawng bawm pakhat chu a rawn la chhuak a, dawhkanah chuan a dah a. Revolver pahnih a lo awm a, a mu pawh a lo awm tel nual mai.

"Engtin nge i theihnghilh theih zawk a?" tiin ka han zawt a. A nui suk a, "Kan tar ve tawh a nih hi." a lo la ti sam et zui. Mahse ka rilru ah chuan Muani bawk kha ala awm reng a, khawiah nge a awm ang tih mawlh chu ka zawhna a ni. A duty tur a rawn kal lai pawh ka hmu a, lodge chhunga a lut lai pawh chiang takin ka hmu ngei bawk kha a ni a.

Mahse midang an lo duty daih mai chu mak ka ti kher mai, "Sir, lobby-ah ka zu chhuk lawk." ka han ti a. "Enge i tih dawn?" a lo ti hu mai. "Tukthuan pawh kan la ei silova, chawhmeh ka duh dan ang thlapin ka zu siam tir teh ang." tiin dawt ka sawi a. "Um...lo chho leh vat rawh." tiin min chhang a, ka zu chhuk ta a.

REceptionist chu ka va pan a, "Ehe...tukin khan nangmah lo zawk kha a duty sia, khawnge a awm daih a?" ka va ti a. "Nia, nichin lawk khan anu a damloh thu an rawn hrilh a, a haw ta a nih kha." tiin min chhang a. "Nangmah hi chawhnu shift i ni tihna nge?" tiin ka zawt leh a. "Aih keichu day tur ka nia, dar 9-5 thleng..hei, ka duty hma a ngaih phah ta anih hi. Lodge bul chiah saw kan in ania, ka rawn thleng hma thei mai mai zawk a nih hi." tiin min chhang a.

Ka han ngawi deuh vang vanga, "Ava zia lo ve, a hming kha Muani tiraw?" tiin ka han zawt a. "Aw ni e." tiin min chhang a. "A mit kha a duk chur lehnghal a, a chhan a sawi mial em?" ka han ti leh a. "A u in kut a thlak leh tawh aniang chu." tiin min chhang ta mai a. "Engmaw? A u i ti em ni?" ka ti vat a.

"Aw...a u mipa, sual deuh mai a awm a. A hming chu Ngaihawma ania, mahse an chhungkaw chanchin hi a sawi duh vak ngai lo. A nu leh pate chu Aizawlah an awm a, a u nen hian kan khuaah hian in an luah a." tiin min chhang a. "A nih chuan a nu a damlo si a, Aizawlah a chhuk a ngai dawn tihna animaw?" tiin ka zawt leh a.

"Aniang..kan pu ber kan phone sak a, a phal sak ta a nih kha." tiin min chhang leh a, engmah zawt zui tawh lem lo chuan room lam pan chuan ka chhoh san leh ta a. "Rinawm, Pu Nunga khan a ruka chhui turin min ti a, chuvang chuan kan thil hriat te kha tumah kan hrilh thiang lovang, police te pawh nise." a lo ti nghal bawrh bawrh a.

"Awle..vawiin ah enge kan tih dawn? Enge i plan?" tiin ka zawt a. "Plan i nei ve lo em ni?" min lo ti let daih mai. "Nei ve tho a, mahse i plan a fuh zawk ang." tiin ka chhang a. "A tha lawm, anih ka plan ang chuan kan kal ang. Kan pistol nen kan luhchilh tawp ang, security pahnih chiah an ni a, tumah hlauhawm an awm lo." a han ti ringawt a.

"A va RAW awm ve..chutiang, invenna eng emaw tal keng ve ila.." ka lo ti a. "Khawia invenna nge kan neih anga, bullet proof vest takngial pawh kan nei bawk silo. Pistol pahnih kan nei a, a tawk viau. A bak engmah a ngai lo, a ruka case chhui kan nih hi hre reng rawh." tiin min vin deuh hrep mai.

"Ni e, a tha alawm." tiin ka chhang mai a. Nathana chuan a lu a han dawm vang vang a, "Maxie chu tunah chuan Aizawlah a awm mek a, mahse a location ber kan la hrelo. A chhungte chuan police hnenah an report ve tawh ngei chu ka ring, a chhan chu an be tlang lo rei tawh dawn sia. Chuvang chuan tu emaw ber saw kan dawp angai a ni, chuvang chuan a location hriat nan kan va luhchilh tawp angai ang." a ti leh a.

"I plan chu ka pawm e, ni e..kan luhchilh mai dawnnia." tiin ka lo chhang leh a. "Pu Nunga'n a sawi kha, he khuaah hian hmeichhe pathum an bo tawh a tih kha. A hmasa bera bo chu Rosy-i'n Mimi a tih kha a nih ngei hmel a, chuan nikuma bo a tih chu Rosy hi a nih hmel bawk. Hmeichhe dang an ruk bo leh hma hian kan chet vat angai, Maxie pawh a chungah thil thalo a thlen hmaa kan zawn chhuah vat angai a ni." a han ti leh a.

"Um..anih chuan engtikah nge kan chet chhuah ang?" tiin ka han zawt leh a. "Helai hmuna an sumdawnna hi video velin ka lo record lo a ni..nakinah proof-na tur pawhin a tangkai dawn sia." a han ti nuah nuah a. Chuveleh ka phone chu ka phawrh a, "Tukina ka zui ruk khan ka la alawm, hei en la." tiin video chu ka hmuh tir a.

Nathana chuan video chu a en a, "Hepa hi..car sen driver i tih hi...jacket uk-a kha a ang i ti tiraw? Ava ang lemlo ve.." a han ti nuah nuah a. "Nia..a ang khan ka hria a." te ka ti kual ta vel mai mai a. "Umm..chaw ei phawt ila, kan sawizawm dawnnia." a ti a, chaw ei tur chuan kan chhuk thla ta a.

****************************

Chaw kan ei kham a, room ah chuan kan let chho leh a. Tichuan kan pistol te chu a mu kan han thun a, chu in, a ruka nawhchi zawrh nana an lo hman ruk chu va luh chilh tur chuan kan inpuah chah ta a. Sawi tak ang khan duh chuan police puihna pawh kan dil thei reng a, mahse Pu Nunga hnena kan intiam tawh angin a ruka chhui kan nih avangin kan pahnih chauh a kan chet chhuah a ngai a ni.

Nathana car hmang bawk chuan kan va pan leh ta a, reilo teah chuan kan va thleng a. Motor atang chuan chhukin pistol chu kan pai dun ta ran mai a, kawngka chu kan han kik leh ta a. Mahse mak tak maiin kan kik chiah chu amahin a lo inhawng a, a lo inkalh reng reng lo mai tihna a nih chu.

Nathana chuan min rawn en hu a, "A inkalh miah lo." a ti a. A chhungah chuan kan lut a, tumah an lo awm lo. Boruak chu a reh hian a reh diak mai a, thutthleng leh dawhkan te pawh engmah a lo awm tawh lo. In chu a ruah hian a ruak vek a ni ber mai, vainu thutna dawhkan ah pawh khan eng thlalak mah a lo awm tawh lova, engkim chu a lo fai vek mai.

"Rinawm, inthen hrang ila, hmeichhe ho an dahna room kha a mal te te in en chhuak vek ang." tiin Nathana chuan min hrilh a, room chu a mal te te in kan en dun ta a. Mahse tu hmeichhia mah an lo awm tawh lo, room zawng zawng chu a ruak vek mai. Tichuan room tawpna ber, Rosy room lam chu kan pan dun ta.

"Tumah i hmu bik lo em ni?" tiin min zawt a. "Aw...a ruak vek." tiin ka lo chhang a, kan hrilh a hai dun khawp mai. Rosy room lam chu kan pan a, kan han kik te te a. Mahse chhanna kan dawn tak silo ah chuan kan lut ta a, kan thil hmuh chuan min va barakhaih em. Rosy chu a khumah chuan thi hnuang hian a lo mu a, a chal chu a lo kaw phut mai.

Silaia kahna tih a hriat em em a, a thi tawh tih pawh a chiang kher mai. Nathana chu ava phei a, "A va han pawi tak." tiin a lu  a dawm vawng vawng mai. Kan chhanchhuah tur thu kan tiam a, kan chhuahsan kha a ni si a. Beiseina nen min lo nghak ve awm si a, a lawm ve hman dawn teh lul nen.

A hmel en reng reng pawhin ala naupang tih a hriat em em bawk a, ka va han khawngaih tak em. Kan hnuk a ulh lek lek mai, "Rinawm, hei dawhkana hi lehkha a awm." a ti a, ka va en ve nghal a. Mahse hindi tawng hian a lo inziak a, ka chhiar thiam ve hauh lo. "Hindi tawngin a nih hi..kan chhiar lawk ange." tiin Nathana chuan a han chhiar a.

"Enge awmzia ni a?" tiin ka lo zawt vat a. Za lo tak chuan Nathana chu a khi suk a, "Officer Nathan, celebrity i ni tih i intheihnghilh ta em ni? Min lo chhui ruk vang lek maw lo ni a? Kan nula te zinga mi khan a hria che a, police i nih thu min hrilh a ni. Min rawn chhui buai duh tawh suh ang che, hei in lawmman atan, ruang kan hnutchhiah che u." tih hi a lo ni a.

A va pawi thin tak em, duh ai chuan kan lo che fimkhur lo deuh chu a ni e. Rosy chu ka en a, Maxie chungah a thlen ve ka hlau ngawih ngawih. "Sir, engtin nge kan tih dawn?" tiin ka zawt a, "Ka hre bik hrih lo...inngaihtuahna hun min pe lawk teh." tiin a indawm kun tlawk tlawk a, "Ka ngaih a lo sam mah mah a ni..ngaihtuahna fim deuh hlek lo hmang ila chuan.." tiin a a tap lek lek mai.

"Ruang hi engtin nge kan tih ang?"

"Ka hre biklo."

"Police ho kan hrilh mai dawn em ni?"

"Keimahni zawk kan tal awk thei asin, engkim a buai zo vek a nimai."

"Tih dan dang i hria em ni?"

"Ka hre biklo...enge i ngaihdan ni ve reng reng?"

"Kan phum mai dawn em ni?"

"Misual ang maiin kan che tihna a ni dawn sin."

"Tih theih dang kan nei chuang hleinem."

"Awle...anih chuan kalsan phawt mai ang."

"Enga? Kan kalsan tawp ang maw?"

"Rinawm...Rosy ruang hi midangin an hmu emaw, hmulo emaw...heng misual ho hi vawiin a ral hma hian ka man ngei ngei ang. Maxie pawh ka chhanchhuak bawk ang, chu chu mipa ka nihna anga ka intiamna a ni."

Nathana chu a ding a, "Lodge ah let leh phawt ila, in hi chu pawnlam atang khan kan vih kalh phawt mai dawnnia." a ti a, "A tha alawm." tiin in chu kan chhuahsan a. Pawnlamah chuan kan vih kalh a, lung a awi mawlh lo a ni. Nathana pawh hnuchhui a khat deuh vang nge ni, plan mumalh a nei thei tlat lo mai.

******************************

TO BE CONTINUE