NATHAN SEASON-4 Written by : Aaron Malsawmdawngzuala Episode-20 (THE STOLEN LADY-3)

 NATHAN SEASON-4

Written by : Aaron Malsawmdawngzuala

Episode-20

(THE STOLEN LADY-3)

**************************

Tlai dar 4:30 a pel tawh a, kan zinna khaw police ho chuan hma an la mek zel bawk. A tawp a tawpah chuan resor neitu Pu Lalbiaknunga chu a rawn thleng ve ta a. Police te nen chuan an inbia a, kei leh Nathana erawh department hrang ami kan nih avang chuan va inlak thu teh chiam emaw, va inrawlh ve chhen kan tum lem lo.

Pu Nunga pawh chuan chutia ama resort ngeia inrukbona a thleng ta mai chu pawi a tih hmel em em a, a hmel atang chuan a hriat vek. Nathana nen chuan lobby-ah chuan kan thu a, a khat tawkin check-out an rawn awm deuh reng bawk. "Rinawm, nangpawh i thawmhnaw vel han in pack fel rawh." a ti ringawt mai.

"Mahse Sir, ka haw ve daih te chuan, nangmah chauhvin i awm dawn asin."

"Tunge keimah chiahin ka awm dawn ti a?"

"I thawmhnaw han pack rawh i ti sia."

"Sanvi in hawn ve rawh se ka tihna alawm, i han hrilh nghal dawn nia."

"E awle."

Ka room ah chuan ka han chho a, ka thawmhnaw vel chu ka pack tha sauh sauh va. Sanvi te room ah chuan ka phei a, ani pawh a lo in pack fel vek tawh. "Sanvi, inpa in ka thawmhnaw leh bungrua vel lo hawn ve nghal rawh a ti che a, saw..ka roomah sawn ka pack fel sa thlap tawh aw.." ka han ti a.

"Awle...athat chu, enge chanchin ni reng reng?"

"Khaw police hovin hma an la mek."

"Ka ngaihtuah e, Maxie chu...a tha angem le?"

"A tha turah ngai ang."

"A hrim hrimin i haw ve dawn tihna em ni?"

"Dawn love...Nathana ka ngaichang mek."

"Tu phiangsen nge maw ni le? Ka khawngaih emai...nula fel tak a ni asin."

"Engpawh nise ka zu chhuk ange...DCP Maenga pawh a lo thleng tep ang."

*********************************

Lobby lamah chuan ka chhuk leh a, Police ho chu an lo chhuak chiah a, Nathana chuan a lo thlah a. Ka va pan a, "Enge chanchin?" tiin ka han zawt a. "Khaw police ho kutah an dah anih chu, keini chu duh chuan kan haw thei a, kan la awm thei bawk a, kan thu thu." tiin min chhang a.

"A that chu..mahse kan thiannu a ni ve a, MAxie hi...chutia hawsan tawp chu ka hreh mange.." ka han ti nuah nuah a. Nathana chuan a sana chu a han bih zeuh va, "Dar 5 a ri dawn a, dar 6 velah chuan DCP pawh a lo thleng thei mai turah ngai ila..i in pack fel maw?" tiin min han zawt a.

"Umm..ka zo tawh...engtin nge ni dawn? Kan la awm ve dawn nge, kan haw dawn?" tiin ka han zawt veleh a. "A him lo riau, keini pawh haw nghal law law chu a tha ka ti. Kan case a ni lemlo bawk nen, chubakah boruak a nuam tawh lo emai." tiin min chhang a. Chutih lai chuan Pu Nunga, resort neitu chu kan lam pan chuan a lo phei a.

Nathana chu rawn chibaiin, "SP Nathan maw i nih?" a rawn ti a. "Aw ni e, hei hi ka thianpa ACP Lalrinawma.." tiin min inhmelhriat tir nghala, ka chibai ve a. "Khawngaihin pawi intih loh chuan ka office lamah kan titi lawk dawn em ni?" a ti ta daih mai. Kan remti a, a office lam pan chuan kan kal ta a.

Kan thu khawm a, "Enge ni ta a?" tiin Nathana chuan azawt a. "Eng ti turin nge kan resort-ah te in lo thlen ve reng reng a?" Pu Nunga chuan  a han ti a. "Leave kan la ve ve a, chawl kan rawn hmang ve a nih hi. Chubakah resort thar te a ni a, fankual kan chak ve mawle." tiin Nathana chuan a chhang a.

"A zia lo hle mai a, in rawn thlen tum bera hetiang a thleng hi." a ti nuah nuah a. Nathana chuan nui chung hian, "Inthiamlo duh suh, thil thleng tur tuman kan hre lawk bik hleinem. A hrim hrimin enge min koh chhan ni reng reng a." tiin Nathan chuan a han zawt a. "Pu Nathan, i chanchin hi ka lo hre thin a. Hnuchhui thiam tak i ni a, in pahnih phei hi chuan Mizoram Police ah chuan in lar khawp mai. Ka mi rin zawng tak in ni, abikin nang phei chu ramdangah pawh i che bawn riap riap khawp mai." a han ti te te a.

Nathana chu a nui suk a, "Ka lawm e, enge i sawi tum ber ni a?" tiin a han zawt a. Pu Nunga chu a thaw deuh hak a, "He mibo, Maxie hi ka hmelhriat a nilova, a hmel phei chu a takah pawh ka la hmu velo hrim hrim. Mahse ka resort ah kidnapping a thleng a, chuvang chuan a pawi ka tiin, ka mualpho phah thei a ni." a han ti leh a.

"Enge ti tura min duh a?" Nathana chuan a lo ti vat a. "Pu Nathan, in pahnih hian min chhuisak ula ka ti a ni...ka mualpho loh nan, pawisa pawh in phut zah zah ka pe ang che u." a ti ta mai a, Nathana nen chuan kan in en hu mai. "Ngati maw? A rukin maW? A chi dawn em ni?" ka lo ti vat a.

"Khang police ho ai khan ka ring zawk che u a ni, nangni in lo thleng hlauh a, in awm lai law law hian min chinfel sak ula ka ti a ni." a han ti leh a. "Chutia keini lo chhui ve ngawt a theih hleihnem, kan case a ni silova. Chubakah dan anga che thin kan ni a, dan lo anga chet hi kan duh lo a ni." tiin Nathana chuan a chhang leh a.

"Pawisa in duh zat zat inchhiar rawh u, ka pe ang che u." a ti leh tlat mai. Nathana chu a thaw hak a, "Police hovin an buaipui dawn kha, keini te chuan tih ve tur kan nei hleinem." a han ti leh a. Pu Nunga chuan chiang tak hian Nathana nen chuan min en dun a, "Kan khaw police ho hi engmah an ni lo, ka ring hlawl lo a ni." a ti daih mai.

"Engtia ring lovin maw?"

"He khuaah hian nula pathum lai an bo tawh a, hman kum atang khan kumtin pakhat zel an la bo. Kan khaw police ho hian pakhat pawh an la hmu let lo chu sawiloh, an thi nge an dam pawh kan hre lo. Ruang tak ngial pawh an hmulo a, rinhlelh tur takngial pawh an hmu zo lo." a han ti leh ta mai a.

Nathana nen chuan kan in en hu ringawt, mak kan ti takzet. "Engtikah nge chu chu a thlen hmasak ber?" tiin ka zawt a. "Nikum hmasa khan hmeichhe pakhat a bo a, nikumah pahnih, chuan tunah Maxie hi  ani leh a." tiin min chhang a. "Kum engzat bawr nge an nih hlawm?" tiin Nathana chuan a zawt veleh a.

"Kum 18-25 bawr vel an ni, chuvang chuan police ho hi an zuzi ral leh mai mai dawn. Keipawh hian fanu kum 18 mi ka nei ve a, chuvang chuan ka hlauthawng a ni. Kan khua ah kum tin mai bo an awm ziah bawk si a, nangni in lo awm hlauh va, min chhuisak hram teh u." a han ti leh lawm lawm a.

"Anih leh i pawisa chu pawmin keini pahnih hian lo chhui ta ila, lo chhui chhuak leh silo ila...pawisa min thing leh vak vak mai lo maw?" tiin Nathana chuan a han zawt deuh kher a. "Chutiang mi ka nilo...ka rin vang che u in ka ngen che u a, pawisa pawh ka seng huam a ni." tiin a chhang a.

"A tha e...mahse mamawh kan nei ang." tiin Nathana chuan a chhang ta a. Pu Nunga chu a lawm kher mai, "Ka lawm e, engzat nge in phut...i duh zah zah sawi rawh u." a ti nghal zung zung a. Mahse Nathana chuan a lu a thing a, "Pawisa kan duh lo, he lodge ah hian kan pahnih pualin room kan nei tur a ni a, ei leh in zawng zawng pawh hetah hian kan dawng tur a ni." tiin a chhang a.

"Awle, kha kha chu lungngai suh u...a free vek a nimai. Enge mamawh dang inla neih?" tiin min zawt leh a. "He kan hnuchhui tur hi...a ruka ti kan nih avangin tuma beng a thleng tur a nilo, a bik takin police ho beng a thleng tur a nilo." tiin Nathana chuan a chhang leh a. Pu Nunga chu a lawm kher mai, "Tinge pawisa chu in lak duh loh a?" tiin min zawt leh a.

Nathana chu muang chang chuan a ding a, "Dan anga thil ti thin kan ni ka tih kha...mahse a tul tawp khawkah chuan dan lo angin ka che fo. Tunah pawh hian mibo hi kan thiannu liau liau  ani a, chuvang chuan i mi ngenna pawh hi ka pawm mai chauh  ani. Kan thiannu an ru bova, zawn chu kan hna ania lawm, pawisa angai love." tiin a chhuak a, ka zui chhuak ve nghal bawk a.

Lodge ah chuan Nathana nen kan la cham rih dawn avang chuan ka thawmhnaw te chu ka dah let leh a, mahse a tam zawk chu Sanvi ka thawn haw tho. Tichuan khua a thim a, dar 6 a ri ta. DCP Maenga pawh a lo thleng ve ta a, Sanvi leh naupang te chu an haw dawn ta. "Tluang takin in thleng dawnnia, naupang te kha veng tha ang che aw.." tiin Nathana chuan a thlah a.

"NAthan, Maxie chu nungdamin chhanchhuak ngei ang che u. Kan inah i rawn hruai lut ngei tur a ni, nung damin ka hmu duh ania." Sanvi chuan a ti a. "Ka tiam a che, nungdamin i hmu ngei ang." tiin Nathana chuan a chhang a, kan inthlah liam ta. Sanvi te kal hnu chuan, "Chaw ei phawt ila, zanah kan che chhuak nghal dawnnia." a ti a, kan lut ta a.

**************************

Chaw kan eikham hnu chuan Nathana room lamah chuan ka va phei a, Sanvi camera chu a lo en a. Kei erawh tukverh bulah meizial ka zu thung a, Maxie chu ngaihtuah viau mah ila ka rilrua awm chu Muani tho kha a ni. "Rinawm, lo kal teh." tiin Nathana chuan min kova, a bulah chuan ka va thu a.

Camera chu laptop ah chuan a connect a, thlalak chu a hmet chhuak a. Pipu a an chhungkua, Maxie-i'n a click sak ngei mai chu a hmet chhuak a. "Hei hi en teh, a background ah sawn...thingkung bula mi saw i hmu em?" a han ti a. Ka han enchiang a, mipa pakhat, jacket uk ha hi thingkung bulah chuan a lo ding a.

Mahse a awmna a hlat avang leh a fiah loh avang chuan a hmel erawh a hriat theih loh, "Hmu e." tiin ka chhang a. Nathana chuan thlalak dang a hmet leh a, naupang inbukna bula MAry, Nathana fanu leh Maxie inbuk lai thlalak, keima laksak ngei mai chu  a tilang leh a. "Hei hi en leh la, hepa tho hi a sira hi a lo len leh hi." tiin a han kawk leh a.

"Sir, a lo lang ve leh palh pawh a ni thei a. Chutia han rinhlelh nghal ngawt chi chu a ni dawn mi?" ka han ti ve luam a. Nathana chuan thlalak dang a hmet chhuak leh a, chu chu kei leh MAxie kan thudun lai a ni. "Hei hi waiting shed-a in thut dun lai, in hriat loh hlana ka click sak che u a nih hi." a han ti a.

Ka han en chiang a, kha jacket uk ha bawk kha a lo lang leh ta tlat mai. Nathana chuan a kawk a, "Hetah phei hi chuan a rawn en lehnghal che u a, a hmel pawh tlem chuan a hmuh chian theih deuh." tih pah chuan a zoom a. Chiang lutuk chuan hmuh theih loh mahse ngo lam a ni a, khabe hmul a nei bawk.

Kei pawh chuan ka ringhlel ve tan ta, "Hei chauh hi ala nilo, thildang ala awm." ala ti ta deuh deuh va. Lui kan kalna thlalak ho chu a han hmet chhuak leh a, Maxie-i'n Nathana fate pathum tui a chen pui lai leh a infiampui lai thlalak pathum ngawt mai chu a han ti lang leh a. "Luiah khan mi tam tak chu an awm ve nge a, mahse hepa tho hi a lo lang ve leh a ni." tiin a kawk leh a.

Maxie te hnungah, hla deuh hlekah chuan chu jacket uk ha bawk chu a lo lang leh ta. "Tikhan enge i ngaih dan? I ringhlel ve tawh em?" tiin min han zawt a. "Mahse Sir, engtin nge hepa hi kan hmuh theih tak ang?" tiin ka han zawt veleh a. A han ngawi vang vang a, "Vawiina lobby-a kan koh khawm khan hetiang jacket ha hi i hmu em?" tiin min zawt a.

Ka han ngaihtuah vang vang pawh chuan jacket uk ha reng reng ka mitthla thei lo, "An awm ka hrelo.." tiin ka chhang a, "Keipawh ka hre thei tawh lo." Nathana chuan a lo ti ve bawk a. Laptop chu a khup a, "A pawi ber chu Maxie khan tumah a phone number min pe ta lo kha a ni." a han ti leh a.

"A veng awmna te kan zawt ta lo em ni khah?" ka han ti a, Nathana chuan a lu a lo bu nghut ringawt. "A chanchin engmah zawhna chang kan lo hre bawk silova, a va hahthlak dawn ve.." ka han ti nuah nuah a. "Kan thiam loh em em ani hleinem, ruk bo a ni dawn tih kan hre lawk bik silo alawm." tiin min chhang a.

Chutih lai chuan Nathana phone chu a rawn ri a, room verandah lamah chuan ava bia a. Reiloteah a lo let leh a, "Sanvi te pawh tluang takin an thleng a nih chu." a rawn ti lut a. "A lawmawm a nih chu...chuan case hi engtin nge kan chhui tan dawn?" tiin ka han zawt leh a. Min chhan hma chuan room intercom telephone chu a rawn ri a, Nathana chuan a chhang vat a.

"Hello."

"Pu Nathan, reception atangin a nia, khawngaihin inlo chhuk thei angem?"

"Eng thil nge ni ta a?"

"Staff room kudam chhungah hian thawm kan hria a."

"Kan lo chhuk nghal e."

*********************************

Lobby ah chuan rang takin kan chhuk a, receptionist pakhat chuan hlauh thawn hmel tak hian min lo en a. "Engthil nge ni a?" tiin ka han zawt a, "Saw...staff room ah sawn min lo zui ru, thawm a awm." a ti leh a. Kan zui phei ta a, staff dang te pawh an lo awm nual a, Pu Nunga ber erawh a haw tawh thung.

Kudam chu a lo ri bur bur a, a lan dan chuan kudam chhungah chuan mihring emaw ramsa emaw tal an awm chu a ni ngei ang, kawngka chu a rawn ri bur bur mai. Nathana chu ava kal hma a, kitchen-a chemte chu a hum ran bawk a. "He kudam hi vawiinah tuman in hawng lovem ni?" a han ti a.

"Aw...kan hawng khat lutuk...pawn lam atangin tala in kan kalh bawk si a, kan hawn hnuhnun ber chu kar hmasa daih tawh kha ania. Thawm hi nichin deuh lawk khan a rawn awm a, nangmahni hrilh lo chuan kan hawng ngam bik lo a ni." tiin staff pakhat chuan a lo chhang a. Nathana chuan kawngka kalhna tala chu a han hawng a, tichuan kawngka chu a han pawt hawng thuai a.

Chemte chu a lek kang nghal a, mahse rin loh tak maiin mipa pakhat hi a kut leh ke phuar niin, a hmui tuam a lo ni bawk a. Staff pakhat chuan, "Ehe..Zama nang maw?" tiin staff pakhat chuan mak a ti hmel hle mai. Midang pawh chuan chupa chu an hriat hmel hlawm khawp mai, "Enge awmzia, Zama?" an lo ti ve sap sap hlawm bawk a.

"In hria maw?" Nathana chuan a han ti hu a. Staff pakhat cuhuan, "Kan sweeper a nih hi....kan lodge a thawk tho." tiin a lo chhang a. Zama chu kekawrte nen chauh a lo awm leh nghal a, kudam light chu NAthana chuan a on a. Zama chu a kut phuarna te chu kan phelh sak a, a hmui tuamna te pawh chu kan phelh sak bawk a.

Mahse a la tawng thei mai lo, a khuh vak vak a. Kan kai tho a, chuveleh Nathana chuan Zama mutna a lo awm, jacket chu la in min rawn hmuh a. "Rinawm, enteh..." tiin a han lek kang a, chu jacket chu thlalak a kan hmuh, jacket uk ngei kha a ni. Kan ringhlel fuh cher cher kher mai, kha jacket-uk ha pa ngei kha kidnapper chu a ni tih a chiang.

Zama chuan tui te chu a in a, "Enge i chungah thleng a?" tiin Nathana chuan a han zawt nghal a. "Ka...ka hnunglam atangin tu emaw in min man bet a, min nghawngah min chiu a." a ti ta mai a. "Tunge chu chu? A hmel i hmu thei em?" tiin Nathana chuan a zawt leh a, "Aih..ka hnunglam atangin ka tih chu...min rek a, chuan min chiu a...ka zawi nghal vek a." a ti leh a.

"Enge thleng zel?" tiin Nathana chuan a zawt leh vat. "Ih...morning shift ka ni a, ka haw hun a ni tep tawh a. Inthlak turin staff room ah hian ka lut a, tichuan chahbi khaina velah pantry room chahbi vel ka khai that lai takin a nia. Ka hriat theih awmchhun chu kudamah chuan min nam lut a, ka va hawi phei nghal a. Mahse ka lu a hai tawh lutuk, a hmel ka hmuchiang lo hrim hrim. A thawmhnaw a phelh mawlh mawlh tih chu ka hria a, ka thawmhnaw min hlih sak lai kha ka hre hman ruai ruai bawk, abak chu engmah ka hre tawh lo." a ti hluam hluam mai.

Nathana chuan min en a, "CCTV-a kan hmuh kha..kha jacket uk-a ngei kha anih chiah chu, he sweeper thawmhnaw hi inbelin Maxie kha a han kidnap a ni." a ti a, kudam bulah chiah chuan chahbi khaina a awm a. A hnuaiah chuan room number a inziak zel a, kudam chahbi pawh chu a inkhai ve ngei e.

Nathana chuan sweeper chu a en leh a, "Kutkawr a bun in i hria em?" tiin a han zawt leh a, "Aw a bun ngei alawm...ka hmui a rawn hup khan ka hrethei a ni." tiin a lo chhang a. Staff ho chu Nathana chuan a han en kual a, "Engtin nge staff zinga mi pawh nilo, civil dress ha chunga staff roomah a luh theih? Tuman in hmu lo em ni?" a han ti vin deuh thak a.

Mahse sweeper bawk chuan, "Lunch an ei lai  ani a, khatih lai khan keimah chauh staff room ah hian ka awm a ni." a lo ti vat a. Nathana chu a ngawi vang vang a, "CCTV kha kan check that leh angai." a ti a. Tichuan Front Desk lamah chuan kan phei leh ta a, CCTV footage chu kan en tha leh ta a.

Receptionist pakhat, kei leh Nathana leh sweeper Zama te nen chuan CCTV chu kan en thap mai a, staff dangte erawh chuan an hnathawh lai chu an thawh zawm thung a. Dar 1:25 ah chiah chiah chuan tu emaw hi a lo lut a, "Khipa hi a nih duh hmel hle mai ka pu, khi..kut kawr pawh a bun." Zama chuan a lo ti chat mai.

Palian lutuk lo, ft 5'8 bawr vel a nih a rinawm. A jacket hak lai pawh chu kha jacket uk kha a nih duh hmel em em bawk a, sawi tak ang khan CCTV footage hi black and white vek a nih avang chuan chupa jacket hak lai pawh chu a dum angin a lang a ni. Chupa che thla chu kan en zel a, lobby ah chuan thuin chanchinbu te chu a han chhiar a.

Chutih lai chuan guest tam tak, rawn lut chhuak an awm reng a, vei an awm deuh sek bawk. A phone chu a han en zauh va, a ding deuh thut mai. Camera cover phak loh chinah chuan a kal liam ta daih mai a. Chuveleh Zama chuan, "Aw..a ni chiang lutuk. Dar 1:00 ah lunch kan nei thin a, 1:20 ah chiah chiah staff roomah ka let leh a ni. Khi sana khi, dar 1:20 chiah chiah a ni bawk. A kalna lam khi staff room, pawn lam atanga luhna lam a ni." a ti ta mai a.

"Engtia pawn lam atangin maw?" tiin Nathana chuan  a lo zawt vat a. "Pawn lam ah sawn tual zawl a awm a, chupawh chu guest te tan kal theih tho a ni. Mahse tunah tak hi chuan a diak chiau em avangin tumah an kal ngai lova, kan staff room luhna a awm a ni." tiin Zama chuan a chhang a.

Tual zawl lamah chuan Zama chuan Nathana nen min hruai ta a, a sawi ang ngeiin a lo diak chiau pur mai. Tichuan kawgkhar awmna chu min kawhhmuh a, kawngka biangah chuan "ONLY STAFF" tih hi a lo intar kuau mai. Nathana chuan a lu a han bu nghat nghat a, "He lam atang hian staff room a luh ruk theih tih pawh a hre chiang hle a nih dawn hi. He lodge hi a hre chiang hle a, he lodge-a thawk hlui pawh a ni maithei a ni." a han ti a.

"Zama, he lodge ah hian in thawh tirh vel khan thinrima bang ta emaw, in manager-in a ban tak te an awm mial em?" tiin ka han zawt ve nghal a. "Aih..tuna thawk zawng zawng te hi tumah kan la bang lo hrim hrim, tunkum kumtir atang chauh a hawng tan kan nia, tumah bang kan la awm lo." a ti tlat mai bawk si.

Nathana chuan min en a, "Staff zingah hian kidnapper puitu hi an awm a nih loh chuan kidnapper hi staff te zinga mi an ni thei tlat mai." a han ti a. "Keipawh mak tih deuh ka nei, ka pu." Zama chuan a rawn ti ve leh ta tlat mai. "Engchu maw?" tiin Nathana chuan a zawt nghal a. "He tual zawl hi a diak em avangin tumah kan kal ngai lova, chu chu sawiloh..tual zawl chhuahna hi kan hawng khat khawp mai." a han ti a.

"Enge i sawi awmzia?" ka lo ti vat. "In hmuh ang hian a diak em avangin he tual zawlah hian mikhual te chauh nilo, staff te pawh kan kal ngai lo. Chuvang chuan tuman kan hawng ngai meuh lo, a inhawng a nih loh chuan engtin mah a lo lut thei lo. In hmuh ang hian helamah hi chuan tukverh pawh a awm loh hi, an lo hawng palh pawh a ni maithei." tiin Zama chuan min chhang a.

Mahse NAthana chuan a lu a thing a, "Hawn palh a nilo, in staff te zingah hian kidnapper puitu an awm a nih ka ring zawk. Chubakah nangmah kher hi a target che a ni ngei ang, sweeper leh house keeping staff te tan lo chuan Maxie kha ruk bo ngaihna a awm lo. Room phiattu ber in ni a, house keeping ho pawh room tifaitu ber an ni. Staff dang hi room ah an kal ngai lo, nangmah hi a target hrim hrim che a ni." a ti tlat mai.

Kan ngawi deuh vang vang a, "Anih leh Zama, engtin nge nang hi i haw miah lo tih an hriat loh theih. Staff reng reng chu haw dawnin resigter-ah in in sign-out ziah a ngai awm si a. I in sign-out awm silova, tinge reception te sawn an hriat loh theih?" tiin ka han zawt veleh a. "Keimah bik hi chu ka hna zawng zawng ka zo va, inthlak hmain ka va in sign-out lawk thin a." tiin min chhang a.

*****************************

Staff room ah chuan kan lut leh a, staff ho zawng zawng chu kan ko khawm leh a. Nathana chuan chiang em em hian a mal te te chuan a melh hlawm a, "Tual zawl panna lam staff room kawngka hi tunge hawng? Vawiin ah tuin nge hawng? A diak em avangin tumah in kal ngai lova, mikhual ho pawh an kal ngai hek lo. MAhse kidnapper a rawn luh theih phah tlat, tunge hawng che u, zep lovin sawi rawh u." a han ti ta charh charh mai a.

Mahse tumah chuan an hawn a nih thu an sawi ta tlat lo, lunch ei tura kitchena an kal dawn pawhin a inkalh thlap thu an sawi tlat mai bawk si. A mal te te a han dawp chiam kha a tih chi bawk silo nen, a mangan thlak duh reuh khawp mai. Nathana chuan Zama chu a han en leh a, "Anih leh misualin a rawn beih hma che khan saw kawngka saw a lo in hawng em? I la hre thei em?" tiin a han zawt leh a.

"Hawn chu a inhawng lo tih ka chiang, inhawng chu nise ka khar em em ang. A inkhar a, mahse a in kalh lo a ni ngei ang." tiin a lo chhang a. Nathana chu a ngawi vang vang a, "Um..engpawh nise in hnaah let leh tawh rawh u." a ti a, an kal darh leh ta hlawm a. "Rinawm, laptop kha han la teh." a ti leh a, rang takin ka han la a.

Staff room ah bawk chuan ka zu chhuk leh a, laptop-a jacket uk-a thlalak chu Nathana chuan a han hmet chhuak leh a. Zama chuan ngun tak hian a en a, "Aw ka pu..hepa ngei hi a nih ka ring. Damdawi khan min tirui rang em em a, chuvang chuan a hmel kha ka hmu chiang thei lova. MAhse a jacket kha chu ka hmu chiang lutuk, ka delh lai ngei pawh kha a ni e." a ti ta a.

Nathana chu a ngawi leh deuh vang vanga , "Umm a tha e, nangpawh i haw thei tawh ang i duh chuan...security te saw ka va biak pui ang che, nangmah chuan haw suh...i inthlah haw tir dawnnia." a ti a, tichuan security pakhat chu Nathana chuan ka bike a hman tir a, a va thlah ta a. Hemi khua a kan zin dawn hian Nathana hi car-in a kal a, kei erawh ka bike-in ka kal thung a ni.

"Sir, enge kan tih leh dawn?"

"Khawvar hma chu chet lak ngaihna a awm chuang lo, he pa hi naktuk khua lo var se...kan zawng tan dawnnia."

"Maxie chungah thil tha lo tak a thleng hman hlauh ang tih ka hlau kher mai."

"Keipawn ka hlau alawm, mahse tunah chuan chet vak ngaihna a awm rih lo."

"Anih chuan kan mu phawt mai dawn em ni?"

"Um..mu phawt ila, naktukah kan sawi chhunzawm dawnnia."

Mu tur chuan kan inbuatsaih a, kan thil hmuhchhuah te ka han ngaihtuah kir chuan ka rilru kap deuh tu an awm tlat. Kidnapper khan lodge kha a hrechiang hle niin  a lang a, mahse staff zinga mi a ni silo. Nathana sawi ang kha keipawh ka ngaihdan chiah a ni, staff zingah hian kidnapper puitu chu an awm chiang a ni.

Rinhlelh pawh ka nei nghal, chu chu tudang nilovin morning shift nei zawk, park-a ka hmuh, Muani kha a ni. Police ka nih thu ka sawia min hlauh dante, khati fakau a rilru nat hmel taka a lo tah kerh kerh te, a mit duk tluk mai, kutthlakna tih hriat lutuk mai te khan ka ngaih a ti thalo zual takzet. 

Mahse NAthana erawh ka la hrilh duh mai lo, a lo nih loh palh tak khan kha hmeichhia, Muani khan min haw dawn emai. Chubakah thil sual ti duh hmel a pu hlawl lova, a zia a zawih hmel em em bawk. Engpawh chu nise naktuk lo thleng se, tha thar nen kan thawk chhuak tan ta poh aniang chu..mu phawt mai teh ang.

*************************************

TO BE CONTIUNE