NATHAN SEASON-4 Written by : Aaron Malsawmdawngzuala Episode-22 (THE STOLEN LADY-5) LAST AND FINAL EPISODE OF NATHAN

 NATHAN SEASON-4

Written by : Aaron Malsawmdawngzuala

Episode-22

(THE STOLEN LADY-5)

LAST AND FINAL EPISODE OF NATHAN

****************

(Thian duhtak, Nathana thawnthu lo ngaithla thinte leh lo chhiar thin zawng zawngte u. Tun episode hi Nathana, Police a nih anga a hnuchhuina hnuhnung ber a ni tawh dawn a, kan mangtha a ngai ta. Nathana thawnthu hi ka story te ah chuan ka ngaih hlut ber pawl a ni a, kei ngei pawh hian mahni story mah nise ngaihnawm ka ti ve thin khawp mai. Thenkhatin zawhna tam tak min zawt thin a, last episode a ni tawh bawk a, ka han chhang tawh ang che u. Nathan tih hming hi ka lakna ber chu British Singer Nathan Skyes hming atanga ka lak a ni a, nalh ka tih em vang a ni. Hnuchhuina story ah chuan Nathan hi ka ziah hmasak ber a ni a, kum 2016 atang khan ka ziak tan a ni. Season 4 thleng ka ziah theih phah a, a chhan chu in lo ngaihhlut em vang a ni. Tunah chuan Nathan Malsawmkima chu kan mangtha a ngai ta tlat mai, in za vaia chungah ka lawm takzet zet a ni e.)

***************************

Lodge-a kan let leh chuan chhun dar 12 leh a chanve a lo pel der tawh mai, Nathana nen chuan kan mangang takzet a ni. Rosy ruang mawlh mai khan rilru a ti buai, kan kalsan tawp mai chu a ni si a. Lodge neitu Pu Nunga kan tiam tawh si a, a ruka investigation ti kan nih avangin police dang kan hrilh ngam tawh bik silo.

"Engpawh nise, Rinawm...he lodge atang hian kan haw ve angai tawh a ni." Nathana chuan a han ti ringawt a. "Mahse Sir, Rosy ruang kha.." ka han ti a. "Ni e..saw sawn min tibuai ber, engtin nge kan tih ang?" tiin a lu a han dawm vawng vawng a. "Police kan hrilh tawh mai dawn em ni?" ka han ti a.

Mahse Nathana chuan a lu a thing a, "Nilove, kan thutiamah kan ding nghet tlat tur a ni. Tupawhin chetsual chu kan nei vek, hnuchhuina dangah pawh pawisawilovin nunna an chan phah fo alawm. Kan thiamloh vek a ni bik hleinem, thil thleng tur chu a thleng vek tawh." tiin min chhang a.

"Anih chuan ruang saw engtin nge kan tih ang?" tiin ka zawt leh a. A ngawi vang vang a, "Check-out ila, pawisa pe fel ila...inah khan kan va let leh ang." tiin min chhang a. "Enge kan va tih leh dawn?" ka lo ti hu mai. "Rosy ruang kha kan la anga, tichuan Aizawl lamah kan phur phei ang." a ti ta mai a.

"Mahse miin min hrechhuak ange? Check Gate ah te min lo check anga?" ka lo ti vat a. "Check gate engmah a awm dawn lo, chubakah police kan ni a, khawiah hian tuman min check ngam lovang. Ruang saw kalsan tawp a chi loh, kan chinfel vek hunah a chhungte pawh kan hrilh mai dawnnia." tiin min chhang a.

"A tha alawm, chuan Aizawlah chuan let leh ta ila, khawiah nge ruang chu kan dah chuan anga?" tiin ka zawt leh a. Pu Mawia flat ka lei thar kha ila hria em? Engemaw changa police ho kan party na thin kha?" tiin min zawt a. "Aw hria e." tiin ka lo chhang vat a. "Kha tah khan kan dah dawnnia, a ruang a chhiat loh nan freezer ah kan dah mai dawnnia." tiin min chhang a.

Tichuan Pu Nunga chu kan phone a, Aizawl lamah hnuchhuina kan chhunzawm a ngaih thu te chu kan hrilh a, mahse Rosy thihna chungchang leh khawchhungah hnamdang hovin a rukin nawhchi zawrh sumdawnna an lo kal pui tih thu erawh engmah kan hrilh lo thung. Lodge atang chuan kan check-out a, kan tlan chhuak ta.

*********************

Inah chuan kan va let leh a, Rosy ruang pawh a ngai ngaiin a lo la awm. Misual, a ruka tualthat thin ang mai chuan Rosy ruang chu bed sheet chuan kan tuam hlawm a, tichuan car hnungah chuan kan hnawh lut ta a. Kan thil tih chu inthiam lo viau mah ila, tih ngaihna dang a awm silo. Tichuan car ah chuan kan lut leh a, Rosy ruang phur chung chuan Aizawl lam kan pan leh ta a.

Aizawl kan thlen meuh chuan tlai dar 4 a ri dawn der mai, inah pawh haw tlang lovin flat ah chuan kan kal tlang a. Fimkhur takin ruang chu kan la chhuak a, flat ah chuan kan zawn lut a. Nathana freezer ah chuan Rosy ruang chu a tawih chhiat mai loh nan kan dah ta a, kan tih fel zawh hnu chuan kan thaw huai mai.

Hahchawlh pah chuan beer vawt reih rawih tak mai chu kan han indun phawt a, "DEpartment pawh kan la join mai thei rih lovang, police anga chhui zui kan la thei lo." Nathana chuan a han ti a. "Sir, plan mumal tak kan nei lo anih chuan kan chetsual mai ka hlau a ni. Hetah ruang kan kawl a, chupawh khawdang daih lehnghal." ka han ti a.

"Nia ka hria...chuvang chuan ti phut phut lovin rilru fim tak nen kan ngaihtuah a ngai a ni. Maxie pawh a chungah thil thalo a thleng hman mai ang tih pawh a hlauhawm, hmanhmawh tak siin, ngaihtuahna fim tak kan hman angai." tiin min chhang a. "A thi nge a dam pawh kan hre tawh bawk silo, rilru a hah duh khawp mai." ka lo ti ve leh a.

"Aih, a la thi lovang."

"Engtin nge i hriat?"

"Niminah chauh ruk bo a ni a, chupawh thah turin an ru lo, nawhchi zuar turin an ru bo a ni. Vainu sawi danah khan Maxie kha an ngai hlu bik a, a man pawh an chhiar to em kha. An that phal teuh lo mai, ka hlauh ber zawk chu Delhi lamah an thawn thla hmanah tih ka hlau a ni." tiin min chhang a.

"Anih chuan enge kan tih leh dawn, chet lak mai dan tur pawh ka thiam tawh lo." ka han ti chuai raih a. "Rinawm, ACP i nih tawh kha, ka tel lovin case tamtak i chhui chhuak tawh. Tuna kan dinhmun hi beiseiawm loh hle mahse, tlawm reng reng suh ang che." tiin min fuih a, Nathana hi chu ka trainer ka ti lo thei lo, chona thar min pe takzet.

Aizawla kan awm tawh thute chu Sanvi takngial pawh kan la hrilh duh lo, vawi tam chu a lo phone tawh. Mahse Nathana chuan Lodge ah kan la awm reng thu in a chhang zel a, loh theih lohvin dawt kan hrilh mai angai a ni. Kan Station lam pawhin Lodge-a thil thleng te chu an lo hre ve bawk a, mahse khaw police lam ten an chhui thuin kan chhang ta daih a nih kha.

*****************

Chaw te kan eikham hnu chuan zan a lo ni der mai, flat chu chhuahsan in Rosy ruang pawh chu inchhungah chuan kan kalh hnan a. Kan pistol te chu paiin kan chhuak dun ta a, mahse engtianga hmalak tur nge tih leh engtin nge kan chet chhuah tan dawn tih erawh kan hre bik hauh lo. Mahse che chhuak lova awm tawp erawh kan tum hauh lo thung, kan thiannu Maxie kan chhanchhuah ngei a ngai tlat a ni.

Pawnah chuan kan chhuak a, mask kan vuah a. Kan hmel pawh kan thup ve hle, "Sir, enge kan tih ang?" tiin ka han zawt leh a. "Nimina kha ina kan kal khan, guard pahnihin min check lai khan Ranjita khan phone kha a khawih mual mual a. Kha tah khan a contact ho a en tih ka hmu a, pakhat ah khan MD Colony tih ka hmu tel a ni." a han ti a.

"Anih chuan chu chu enge awmzia ni ta ang?" tiin ka lo zawt leh a. "Ka hre biklo, mahse khata tang khan kan chhui mai a ngaih hmel." a han ti leh a, mahse MD Colony chu khawiah nge a awm kan hre bawk silo. Chubakah Ranjita contact ah a awm chuan mihring phone number a nih ngei a rinawm a, mahse MD Colony tih chu mihring hming a nih hmel bawk silo.

Chhiartu/Ngaithlatu lampang ten in lo hriatthiam loh takin, sawi tawh ang khan Lodge-a riak tur leh hun hmang tura kan va zin khan bike ka keng ka tih tawh kha, kan haw pah pawh khan bike thovin ka haw a, nichin khan ka sawi lang lo mai mai a nih kha. Chuvang ania haw kang thui takah pawh Nathana nen kan inbiak miah loh nachhan, lirthei hran ve ve a kan haw vang a ni.

Chutih lai tak chuan car sen pakhat hi motor tam tak zingah chuan a rawn tlan tel ve a, a tir chuan ka lo en liam mai a. Mahse ka va en nawn leh ngat a, ka phu zuk mai. Kha car ngei kha a ni, Muani chuanna car ngei mai kha. "Sir..saw car saw.." tiin ka kawk nghal a. Nathana chuan ava en ve vat a, "Saw saw tiraw..i phone-a car min hmuh kha?" tiin min zawt nghal a.

"Aw ni e, saw ngei saw a ni." tiin ka lo chhang vat a. Nathana car ah chuan kan lut a, car sen chu kan zui ve ta. Zan a ni tawh a, traffic a zam lem lo bawk nen kawng pawh a tlang tha par par khawp mai. Chubakah hemi zan hi Sunday zan a ni a, khawlai chu a reh angreng hle bawk. Tichuan car chu vengthlang lamah chuan a chhuk a, a tlan pilril sawt khawp mai.

Kan zui ru ve zel a, min hriat kan hlauh avang chuan kan tlan muang angreng hle bawk. Tichuan building tam deuh, indawt thluah mai bulah chuan a ding ta a. Kawng lan chu a zim em em a, a tawp hle bawk. "I kal tawh ngai em? Helai hmunah hian.." tiin Nathana chuan min zawt a. "Aih la kal miah lo." tiin ka lo chhang a.

Car dinna bulah chuan mi panga vel hi an lo ding a, lehlamah chuan music a ri dup dup bawk. A lan dan chuan building chhawng hnuai berah chuan party a awm a ni awm e, Sunday ah lehnghal, a mak kan ti dun kher mai. A sir velah chuan hmeichhe thenkhat an lo awm bawk a, a then chu hnamdang an ni.

An ruih hmel hlawm em em a, mahse nichina ka sawi, mi panga lo dingkhawm te erawh kha chu a hlawmin hmun khatah an ding bik a ni. An hmuh theih loh chiah chiah turin motor chu kan dah a, tichuan kan chhuak ve ta a. Building lehlam phen atang chuan Nathana nen chuan kan enthla dun a, car chhung atang chuan mipakhat chu a lo chhuak a.

A hmel ka han en chuan khapa ngei kha a ni, Muani rawn thlah tu ngei mai kha. "Sawpa ngei saw ani...tukina ka hmuh kha." ka ti a, "I chiang chiah maw?" tiin Nathana chuan min lo zawt a. "Ka chiang alawm, Sir." tiin ka chhang a. "Enthla leh deuh phawt ang, engtin nge an awm zel ngaichang phawt ang." tiin Nathana chuan min chhang ve leh a.

Rei fe an inbiak hnu chuan chumite chu party na lamah chuan an lut a, tichuan an zinga pakhat, driver nilo zawk chu a lut ve lo. Car sen lam chu a pan a, a bulah chuan a ding vang mai. Party-na bul kawngka sirah chuan guard niawm tak hi an ding ve bawk a, a lut tur apiang te chu an lo dap zel a.

Car sen bula ding chu street light chuan a hmel a chhun fuh ta, a hmel leh a pian en chuan kidnapper ber, Jacket uk-a kha a nih duh hmel kher mai. "Um..sawpa ngei saw kidnapper kha  ani chiang lutuk." Nathana chuan  a han ti a. "Engtin nge niang? Kan va kal chilh nghal mai dawn em ni?" ka han ti a.

"Nilove...buaina a chhuak nuai nuai palh ang. Lo enthla la, kei party-na ah sawn ka va lut ve zawk ang. Kan inbe leh dawnnia, i phone kha lo ngaichang reng la. Ka silai hi keng la, ka va lut ve ange." a ti a, a pistol chu min pe a. Tichuan party-na ah chuan ava lut ve ta a, guard ho pawh chuan an lo dap ngei a.

A luh hnu chuan chupa chu ka enthla reng a, meizial te chu a han zu leh te te a. Minute 5 hnu velah chuan car chu a han bih a, tichuan a kalsawn ta hlauh mai. Chu veleh ka va pan hnai a, car chu hawn ka han tum a. Mak tak maiin a lo inkalh lo hlauh mai, ka hawi kual a, tuman min en lo hlauh bawk.

Tichuan car seat hnung lam chu ka hawng a, kan thiannu Maxie ngei mai chu nikhawhrelovin a lo mu reng mai a nih chu. A chal ah chuan bandage a lo intuam bawk a, thawmhnaw pawh a ngai a lo la ha bawk. "Maxie, Maxie..harh teh." tiin ka sawi vak vak a, mahse a harh thei hauh lo. A ban chu ka en a, syringe hmanga vihna hnuhma a lo awm thluah mai.

Chutih lai tak chuan ka hnung atang chuan tu emawni hian min rawn tham a, min theh thal tawp mai. Ka va en chuan kha jacket uk-a ngei mai kha a lo ni a, min tlawh zui hre bawk. Hmeichhe dang, a sira lo awm te chu an au va an tlan chhe nghal a. Ka pistol chu ka phawrh a, mahse min rawn man bet hman leh tlat.

Kawngsira motor ah chuan min nawr betin ka kut, pistol ka humna zawk chu manin a nambet a, pistol chu ka la thlauh phah zui. Ka rin ai daihin a chak lehnghal a, a khup chuan min do siah siah mai. "Tu phiangsen nge i nih a? Mawh..pistol te i pai vel amaw?" tiin min sawisak chhunzawm a. Mahse ka rek ve nghal a, chhuatah chuan ka bawhbet a.

Rang takin min lehthal leh a, min hnek siah siah mai. A tho vat a, pistol chu ava chhar a. Min rawn kap ta mai, ka ban chu a thip zawk a, mahse a kap thawi ringawt zawk. Chuveleh a hnung atang chuan Nathana chuan a rawn man bet a, kawngsira car lo in park tukverh keh chhuai khawp chuan a lu chu a tauh tir a.

A pistol ken lai chu Nathana chuan a chhuhsak nghal a, mahse chupa chu a rawn tho leh vat a. Nathana chu a silai chhuhsak tumin a bei ve leh ta ngat ngat mai a, chuveleh keipawh chuan Nathana pistol min kawl tir chu ka phawrh chhuak a, "Che suh..ka kap ang che." ka han ti vin thak a.

Mahse ka bul lawk a bike ding side glass chu a rawn keh chhuai mai, Ranjit-a leh midang panga vel chu hla party-na atang chuan an rawn chhuak a. Silai an lo la hum thap zui, Motor dang phenah chuan ka biru kual a. NAthana leh jacket uk-a insual mek pawh chu an va kap bawk a. Mahse Nathana chuan indan nan jacket uk-a chu a hmang daih mai, an thianpa ngei chu an kap fuh ta.

An zinga pakhat, car sen driver ber chu a au vak vak a, "Nilo..Bawiha.." tiin va pan a tum a. Mahse Ranjit-a te chuan an man bet a, "Kal ang u...Officer Nathana te an nih saw..police an nih saw.." tiin car sen ah chuan an chuang a. Driver ber erawh kha chu  alut duh ve lawk lo, "Bawiha..nilo, ka nau a nih saw.." tiin a tap pur mai a, mahse Ranjita chuan a man bet tlat a.

Nathana chu ka bulah rawn tlan pheiin motor phenah chuan kan biru a, kan inkap chiam mai. "Nakinah...nakinah kan la buaipui dawnnia..kan kal phawt angai." tiin a duhlo chung chu Ranjit-a chuan carah chuan a luh tir lui a. A dang ho pawh car dangah an chuang a, Maxie pawh chu kan chhan hman leh ta lo.

Tukverh ah chuan driver chu rawn dak chhuakin tap tuau hian, "Officer NAthan...ila hre khawp ang...i hre khawp ang." a ti vak vak mai a, tichuan an tlan liam ta. "Sir, um nghal ang." tiin motor lam pan ka tum a, mahse Nathana chuan min lo dang a. "Rinawm, i kut kha...a thi ania." a ti a, "Sir ka tha alawm...Maxie kha car ah khan a awm ania." tiin car lam pan chuan kal leh ka tum a.

Mahse min man bet a, "I mawl em ni? An kap fuh che anih kha...nakinah kan kal mai ang. Haw phawt ang, hliam i tuar a nih kha." tiin min vin hrep mai. Keipawh chu ka inbeng dai thei hram a, "Anih leh ruang saw.." tiin jacket uk-a ruang chu ka va kawk a. Kan va pan hnai a, a ipte vel chu kan han check a.

WAllet leh phone chiah  alo ak a, a wallet chu kan han en a. Cheng 5000 bawr vel chu a cash in a lo awm a, mahse card emaw ID emaw engmah a awm lo thung. Chuveleh phone chu a rawn ri a, "Big Bro..." tih hian a rawn call a. Nathana chuan loud speaker ah a dah a, "Ka nau phone kha in la dawn tih ka hria alawm, chuvang chuan anih hi ka rawn call. ZAwnga, i chak lo khawp ang." a rawn ti nghal buan buan mai.

Nathana chu a nui a, "Animawww...phuba i la dawn tihna em ni? A tha alawm, i nau chu i ui viau anih chuan phuba chu rawn la ta che. In sumdawnna tenawm tak hi ka puang chhuak vek ang, hre rawh...ka kut ngei hian ka man che anga, jail ah ka khung bawk ang che." tiin a chhang let a. Chutah chupa chuan vin zet hian, "Kan hria ang chu...tunge chak a, tunge tlawm zawk chu kan hria ang chu. Chuan tuna ka number hi i duh phawt chuan rawn trace rawh, engtikah mah min trace chhuak chuang lovang." tiin phone chu a dah hmak mai.

"Sir, tunah trace vat ila...kan man hman maithei asin." ka lo ti a. Mahse Nathana chuan a lu a thing a, "Trace angai lo, kan zawng chhuak em em ang. DCP Maenga phone la, ruang hi rawn buaipui rawh se." a ti a, hetih lai hian party naa awm ho zawng zawng chu an tlanchhe fai vek tawh thung a ni.

"Enge ka sawi anga?" tiin ka han zawt leh a. "Silai keng an lo awm a, inkahna a thleng tiin sawi la, kan pahnih hming erawh thup tir ang che. Kan rawn haw thu hi tuman an hre tur ala nilo, DCP Maenga chuan duhleh dawt phuah chawp kual mai rawh se. A lo thlen hunah thudik engkim ka hrilh anga, a zep thei em em ang." a ti a.

DCP Maenga chu ka phone a, reiloteah a lo thleng a. Ruang pawh chu a buaipui nghal a, thudik engkim chu kan hrilh ta vek a, mahse Rosy ruang kan kawl thu erawh engmah kan sawi lo. Dawt tlem kan phuah belh keuh bawk, "Sir, ka lo pui ve ang che u." a ti a. "Police Officer rual pathum zet buaipui atan chuan a ho emai, kan pahnihin kan ti thei mai ang." tiin Nathana chuan a chhang a.

************************

Flat lamah chuan kan let leh a, ka bana hliam chu damdawi te ka hnawih mawlh mawlh a. Chutih lai chuan Nathana a rawn lut a, "Enge i an, ala na em?" a rawn ti a. "Na love...engmah a ni hleinem." tiin ka lo chhang a. "Silaimu a lut lo tiraw?" tiin min zawt leh a. "Aw...a thawi fua ringawt." tiin ka lo chhang a.

"Amak kher mai, Sunday zanah lehnghal..party a awm tlat mai chu."

"Nia...ka hre ngailo reng reng, public ang zawng phei chuan...chubakah kha lai hmunah khan ka la kal ngai lo hrim hrim."

"Car ah khan Maxie a awm maw?"

"Aw awm e, a banah chiuna hnuhma a awm teuh a, a lu ah hliam a awm bawk. Nikhaw hrelovin a awm a, a thawmhnaw hak pawh nimin ami, kan hmuh hnuhnun ber ami tho kha a ni."

"A room banga thisen kai kha a lu a hlim a nih ngei dawn chu, lungngai suh..kan chhanchhuak em em ang. Hliam dang a nei em, a lu ah lo?"

"A hmai velah kha chuan kutthlakna hnuhma niawm tak chu a awm, mahse a dangah chuan ka hmu lo."

Nathana chuan a sana chu a han en a, "Dar 10 a ri chauh mai a...khawnge, hepa phone hi ka'n check chiang leh teh ang." tiin jacket uk-a phone chu a han check leh a. Mahse mak tak maiin chutia thil tangkai engmah a awm lo, thlalak engmah a awm lova, contact ah pawh Big Bro tih chiah a lo awm.

"A che fimkhur ve hle a nih dawn hi, engmah check tlak a awm lo." tiin call log chu a en leh a, chutah pawh a u nena an inbiakna hlir a ni a, number dang pakhat mah a awm lo. Whatsapp a awm lo mai nilovin, apps dang hrim hrim engmah a awm lo bawk. Chutih lai chuan kan awmna flat door bell chu a rawn ri ta tlat mai, kan phu dun zuk mai a.

"Ehe..tu tak ni maw?" ka han ti hu a. Nathana chuan pistol chu la in, "I pistol kha la ve la, min lo zui rawh...khami te pawh kha an ni maithei asin." a ti a, tichuan kan pistol hum chung chuan kawngkhar lam chu kan va pan hnai a. Kawngka bulah chuan kan ding dun a, "Tunge ni?" tiin Nathana chuan a han zawt phawt a.

Hmeichhe aw hian, "Ihh...Officer Rinawma a awm em?" a rawn ti ta daih mai. Nathana chuan min en hu a, "Nangmah a tihna em ni?" a ti deuh hu a, "Ka hre bik lo." tiin ka lo chhang a. "Tu Officer Rinawma maw?" tiin Nathana chuan a han zawt leh a. "Englo..ih, Muani ka nia...Lalmuanpuii..Officer Rinawma khan min hria ang." a rawn ti leh mai chu ka phu zuk mai.

"Sir, ka hria...hawn sak rawh." ka lo ti vat a. Mahse Nathana chuan a hawng ngam mai lo, "Tu Muani nge?" tiin min zawt a. "Lodge ah khan receptionist ania, ka thiannu alawm...hawnsak rawh." ka ti ta tawp a. A ner nung a, "Engtik laiin nge maw thian ilo siam hman le?" tih pah chuan kawngka chu a hawng a.

Muani chu inthlahrun hmel tak hian a lo ding a, "Lo lut rawh." ka ti a, a rawn lut a. Nathana chuan kawngka chu a kharh leh nghal a, a kalh lehnghal bawk. "Enge i duh a?" tiin Nathana chuan a zawt a, mahse Muani chuan keimah min en daih mai. "Officer Rinawm, kidnapper puitu kha keimah ka ni." a ti zawi ta sap mai.

Nathana chuan mak ti tak hian Muani chu a en a, "Engmaw i sawi a? Maxie kidnap tu te zinga i tel amaw?" tiin a vin tuar mai. "Nilo Sir, a duh vang a nilovang..sawi tir phawt rawh." tiin ka lo dang a. "Ni e, ka duh vang a nilo.He sumdawnna ah hian tih luihna hmangin ka thawk ve a ni, kei hi khang nawhchi zuar ho zingah khan ka tel ve a ni." a ti leh ta mai a.

"Enge awmzia, Muani? Chiang deuhvin min han hrilh teh, tunah khawnge Maxie chu a awm?" tiin ka zawt a. Muani chu a tap a, "Tunah chuan MD Colony ah an awm...a hmunpuiah, Delhi lamah thawn thlak an tum mek. Naktuk zingah an kal tawh dawn, zanin chiah hun in nei tawh." a ti leh a. "Anih chuan eng vangin nge min rawn hrilh?" tiin Nathana chuan a lo zawt a.

"A chhan chu hemi te zinga tel hi ka hne tawh a ni...vai hmelchhe pui pui in duh duh danin min khawih a, pawisa lah a chanve pawh ka dawn ve leh si lo. Lodge an rawn siam thar khan ka thawk ve nghal a, chupawh ka hlawh zawng zawng an nei leh vek bawk si. Tuman an hre si lova, puitu ka hmu ngai lo. Mahse in lo lang hlauh va, zanin inkahnaah khan ka awm ve alawm...tunah huan ka rawn chhuak ru a ni, min zawng mek ang." tiin a chhang a.

"Lodge ah nitin i duty ziah thova, free-time i nei reng a, an veng reng lo che anih chuan police hrilh vat mai ta che." tiin Nathana chuan a lo vin leh vak mai. "Ka hteilo, a chhan chu ka pianpui unaupa te pahnih an tel ve tlat vang a ni." a ti ta mai a. Receptionist pakhatin Muani chungchang ka zawh a, u sual deuh a nei a tih chu ka hre chhuak zawk mai.

Mahse kha nu kha chuan unau pahnih chiah an nih thu kha a sawi si a, mahse Muani hian ka unaupate pahnih a ti bawk si. "Muani, tute nge i unaupa te chu?" tiin ka zawt a. "Zanina thi kha..ka u chiah a nia, a hming chu Richard-a a nia. Chuan rawn phone tu che u kha kan unau zinga upa ber, Valpuia a ni." tiin min chhang a.

"Maxie kidnap tu chu thi ta, Richard-a zawk hi a niang maw?" ka han ti leh a, Muani chuan a lu a lo bu nghat a. "Engtin chiah nge Maxie kha in kidnap?" tiin Nathana chuan a han zawt ve leh a. "Ka u Richard-a khan Maxie kan lodge-a a lo thlen khan a target nghal chat a ni. Tichuan plan a siam a, min hrilh leh vek a. Tichuan sweeper anga inthuam kha a remchang ber a, tichuan MAxie room-a va chhoh hun tak kha ka signal a ni, lobby-a a thut lai khan. 3rd floor CCTV a chhiat avangin MAxie pawh 3rd floor ah kher ka thlen tir a, room dang a awl tho, khatiang thil ka tih lai khan nuam ka ti bik hauh lo asin." tiin a chhang a.

"Engtia rei nge i tel ve tawh?" tiin Nathana chuan a zawt leh a. "Kum 2 leh a chanve, a tir atang chuan ka tel lo. Ka u te pahnih hi Pu Ranjit-a'n a sawm hnu khan keimah hi Ranjjita khan min duh tlat a. Ka nu leh pate an thi tawh bawk nen, kan khawsak a har bawk nen. Sum a offer lah a tha hnem si a, tichuan ka u te chuan an unaunu taksa ngei pawh sum hmuh nan tiin min tel tir lui ve ta a ni." tiin a chhang leh a.

Chutah Muani bawk chuan min en leh in, "Park a ka tah lai min hmuh pawh khan ka tah chhan min zawt a tiraw...a chhan chu engdang a nilo, tihluihna hmanga thil sual tih ziah angai hi a ni. Ka u te berin min tilui tlat si a, duh thlan tur dang ka nei lo a ni. MAhse ka kham tawh takzet a, ka thei tawh ngang lo a ni. Zanin khan party-naah khan ka awm ve a, ka u te nen in inkah lai zawng zawng kha ka hmu vek. Tichuan ka u te tlan liam hnu khan ka zui ru che u a, ka lo kal ta a nih hi. Officer..Maxie saw tuman an la dawr lova, an la khawih hek lo. Chhanchhuak hram rawh u, kei chu induh chuan min man thei ang. Tihian ka inpe nghal ni rawh se, engkim hmachhawn ka huam vek." tiin a tap zawih zawih mai.

Chutih lai chuan Muani u, zanin inkahna avanga thi ta Richard-a phone chu a rawn ri leh ta a. Nathana chuan pick up in loud speaker ah a dah leh a, VAlpuia chu a rawn ang nghal buan buan mai. Thinrim hmel zet hian, "Nathan Malsawmkim...tunge ka nih i hrelo a ni. Tuna ka thil tih zawh chiah hi i hrelo, i nun zawng zawng ka tihchhiat sak vek che. Tun atanga rei lo teah ka thil tih chu i hre dawn..a reng reng thuah, hnamdang nupui ilo nei renga, a chhelo kher mai." tiin a nui vak vak a, a dah leh ta daih mai.

Nathana nen chuan kan in en a, "San..Sanvi..Sanvi." tiin a nupui hming chu a lam mawlh mawlh mai. Chuveleh Nathana phone chu a rawn ri a, DCP Maenga a lo ni. "Sir..khawngaihin in inah lo haw rawh.." a rawn ti chuai raih mai. "Maeng..enge thleng? Enge ka nupui chungah thleng?" tiin Nathana chuan a vin nghal vak vak a.

"Tunah chuan ka sawi thei lo, nangmah ngei lo kal la a that ka ring." tiin a rawn chhang leh a. "Rinawm, kal ang." tih leh chhuah a tum nghal a. "Muani hi..." tiin Muani chu ka kawk a. "Lo hruai ve mai rawh." tiin a chhuak nghal a. Kawngka chu ka kalh tha a, Nathana chu Muani hruaiin ka zui ve nghal a. Motor ah chuan kan lut a, a tlan chak per per kher mai.

*******************************

REiloteah Nathana te in chu kan thleng thuai a, "Muani..motor ah hian lo awm la, lo chhuak hlek suh ang che. Rinawm, kal ang." tiin motor chu a kalh hmiah mai. Nathana te in lam pan chuan kan va phei a, mipui an lo tam khawp mai. Kan police department ho pawh an lo awm nual a, DGP, IG leh DSP te, DCP MAenga te leh Officer dangte pawh an lo awm kim thap mai.

DGP nupui, Nu Thangi chuan min lo hmu hmasa ber a. Nathana chu rawn panin, "Bawiha...ava pawi tak em." tiin a tap zawih zawih mai. "Nu Thang, enge thleng?" tiin Nathana chuan a zawt a. Midang pawh chuan min rawn hmu a, ka nu leh pa an lo awm ve bawk a, Inspector Liantea leh ASP Amanda-i te pawh an lo awm bawk.

"Nu Thang..enge thleng ka tih chu?" tiin Nathana chuan a vin vak vak a, mahse Nu Thangi chuan a chhang thei lo. RAng takin Nathana chu inchhung luh tumin a tlan a, ka va zui bawk. Kawngka bulah chuan police dang ho an lo awm a, Nathana chu lut lo turin an lo dang a. MAhse Nathana chuan ring takin, "Nilo..a ni theilo...min dang suh u." tiin a lut lui a.

Keipawh ka va lut ve nghal, ka thil hmuh chuan min va thawng tak em. Ka nghilh dup thei hial, a khur nghal hialin ka hria. Inchhung chu thisen hian a lo kawi nuai mai a, inchhung chu a hnawk hian a hnawk rem rum mai. TV bulah chuan Nathana pa chu thisen nena inchiah piah nuai hian a lo let reng a, a thi tih a chiang em em bawk.

Chumai ala nilo, sitting room sofa bulah chuan NAthana fate pathum, Mary..Brandon-a leh Marcus-a te ruang chu an lo let reng bawk a. Nathana nu, pi Duhzuali raung chu choka lamah a lo let ve reng bawk. Nathana chuan apa chu ava en a, "Nilo pa..harh rawh.. nilo." tiin a tap zawih zawih a.

A fate ruang chu ava pan leh a, "Bawiha..MAry, enge awmzia? Harh teh u, ani theilo." tiin tah pawh a tap hleithei lo. Anu ruang chu ava pan leh a, "Nu...nu..nang tal chuan min chhang teh." tiin a sawi vak vak a, a che buai vek a ni ber mai. Awm ngaihna ka hrelo, ka mittui chu a sur hian a sur zung zung mai.

Chutah Nathana chu a ding hluai a, "Sanvi..khawnge Sanvi? Khawnge Sanvi a awm?" tiin a au vak vak a, mahse midang ho chuan an en thup ringawt. Hnuai lam melh renga lo kun tlawk tlawk, Amanda-i chu Nathana chuan ava pan a. "Amanda..khawnge Sanvi?" tiin a zawt leh a. Mahse Amanda-i chuan a chhang thei lo, a tap hawm hawm ringawt mai.

Liantea chu a lo kal a, "Room ah a awm, Sir." tiin a rawn chhang ta a. Rang takin room ah chuan a lut a, Sanvi pawh thah a lo ni. A pumah chuan vihna hnuhma a lo awm a, bed sheet ah te chuan thisen a khat vek bawk. Nathana chuan a sawi vak vak a, "Sanvi..duhtak...nilo, harh rawh." tiin a tap a.

Mahse Sanvi chuan a chhang thei tawh der mai silo, Nathana chuan Sanvi ruang chu a kuah a. Tap chung hian, "Min ngaidam rawh...min ngaidam rawh, Duhtak..ka thiamloh a ni." tiin a tap hawm hawm mai. Khumah chuan a mut leh a, "Ka hmangaih che, Sanvi...mangtha le." tiin a tawp nan, a hmangaih ber hmuiah chuan a fawp vawng vawng a.

Chutah a tap bang hmak mai, thinrim hmel tak hian a rawn hawi let a. Ka bulah chuan lo kalin zawi sap hian, "Motor-ah lo va let leh la, Muani kha lo chhuah tir miah suh ang che. Ka rawn kal vat ang, mahse tuma hriat lohvin kal ang che." a ti a, DGP bulah chuan ava kal leh a. Keipawh chu room atang chuan ka chhuak a, mipui chuan Nathana chu an han hnem sup sup a, chu chu remchangah la in motor lam pan chuan ka va phei ta a.

Motor chhungah chuan ka lut a, Muani pawh chu a lo la awm a. "Enge thleng a?" tiin min lo zawt a, "Nakinah kan sawi dawnnia, Nathana lo nghak phawt ang." tiin ka chhang a. Muani pawh chuan min zawt zui lem lo, ngawi reng chuan kan thu dun a. Rei vak lo hnuah chuan NAthana chu a rawn lang hlawh mai a, motor ah chuan a rawn thu lut a.

Muani chu a en a, "Khawiah nge MD Colony chu a awm i hria em?" tiin a zawt a. "Aw hria e, ka pu..enge thleng a?" tiin Muani chuan a zawt ve leh a. Chutah vin zet hian Nathana chuan, "Engkim hi i hriat ve angai lo, ka zawhna chu chhang mai rawh. MD Colony awmna chu i hria em?" a ti hrep mai.

Muani chuan a hlauh hmel em em a, "Aw hria e." a ti zawi sap mai. "Tunah min hruai nghal rawh." a ti vin leh thak a, Muani chuan a lu a bu ringawt tawh, melh pawh a melh ngam tawh lo. Motor chu a start a, "Zanin hian engkim a tawp vek tawh tur a ni...phuba chu ka la ngei ang." tiin chak takin a tlan ta a.

**********************

REi fe kan tlan hnuah chuan veng hnuai, pilril angreng tak mai chu kan thleng a. Ding lam leh veilamah chuan building a lo awm phei tuar mai, "Khilai khi MD Colony chu ania." tiin Muani chuan a kawk a, motor chu kan tiding a. Chuveleh Richard-a phone kan kawl chu a rawn ri leh a, Valpuia tho a lo ni.

Nathana chuan loud speaker ah a dah leh a, "SP NAthan...tikhan mi namai lo tak ka nih zia chu i hre tawh em? I cho ve chi ka nilo, misual satliah mai mai ka nih loh zia chu i hre tawh em. Police Officer lar ve thawkhat tak i ni a, chuvang chuan in in awmna te, i chhungte chhui chhuah hi ka tan thil har a nilo. Darkar khat...darkar khat bak i chhungte thah nan khan hun ka hmang lo. Haha..i nupui vainu ve lah khan KA PASAL CHUAN A MAN CHE ANGA, A THAT THO THO ANG CHE te min ti ve khanglang a. I fate ka thah dawna an mangang hmel kha hmuh a nuam takzet, tikhan i tlawm tawh viau ang chu tiraw? Kha kha warning chauh a nih kha, min la rawn tibuai chhunzawm emaw, min la rawn chhui talh anih chuan in police department zawng zawng kha ka that chimit vek ang." ala rawn ti ham ham mai.

NAthana thinrim lutuk chu a mit a sen vek a, a khur dar dar mai. ZAwi tak si, chiang em em si hian, "KA nupui chuan a sawi dik a nih chu....ka man che anga, ka that khawp ang che." tiin phone chu a hmet tawp hmak a, pawnah chuan a paih chhuak nghal a. Muani chu rum tak hian a melh a, "I phone phawrh la, i u chu phone lehnghal rawh." a ti a.

Muani chuan rang takin a phone chu a phawrh a, "Loud speaker ah dah rawh." a ti leh a. Chutih lai chuan ka phone a rawn ri a, "Tunge ni?" tiin Nathana chuan minlo zawt vat a. "Sir, DGP ania." tiin ka lo chhang a. "Valpuia ka thah hma chu i phone kha switch off rawh, i nu leh pa pawh ni rawh se. Call engmah i chhang tur a nilo, chu chu i senior ka nih anga ka thu pek che a ni." a ti chang fak mai.

Keipawh chuan a thu awihin ka phone chu ka off ta a, "Muani...in ngaihdan tur leh thildang engmah ka care lo, min hua pawh ni la pawi ka ti lo. Mahse zanin hian i u hi ka that dawn, chuan an sumdawnna hi ka tichhe vek bawk ang." tiin NAthana chuan Muani chu a hrilh a. "That rawh, an vaiin that vek rawh. I sawi ang apiangin ka awm ang, ka pu." tiin Muani chuan a lo chhang a.

"Anih chuan ngaithla rawh...i u bulah chuan Maxie dawr duhtu an awm thu sawi la, abak chu nakinah ka hrilh leh ang che." a ti a, tichuan Muani chuan a u chu a call ta a. Valpuia chuan rawn pick up in, "Lalmuanpui, khawiah nge i awm daih a?" a rawn ti vin tuar mai. "Customer pakhat ka hmuh belh a, Maxie thlalak kha ka hmuh a...a dawr duh a nih chu." tiin a chhang a.

"MAxie te chu nuai 1 daih asin kan chhiar, Mizorama zawrh kan tum reng reng lo." a lo ti hmak mai. Nathana chuan a kut zung tang pahnih chu Muani a hmuh a, "Nuai 2 pawhin ka huam a ti." tiin a u chu a hrilh leh a. "A tah e, Colony ah rawn hruai rawh. Ka awm hrih lo ania, hmun dangah ka kal hrih..fimkhur ang che." tiin phone chu a dah ta a. "Engtin nge ka tih leh dawn?" tiin Muani chuan a zawt a.

"A chhungah sawn va lut la, Rinawma nena kan hmel hmu tawh tu an awm nge awm lo va en la, an awm lo anih chuan Rinawma a rawn lut ang. Customer chu Rinawma hi a nih thu sawi la, tichuan pistol hi kawl la, a chhan chu Rinawma chu an check awm si a. MAxie an dahna room ah hruai bawk la, tichuan Rinawma chu pistol i pe leh ang." a ti a.

Nathana chuan min rawn en leh a, "Abak chu tihdan tur i hriat ka ring." min rawn ti a, "Yes Sir." tiin ka lo chhang a. "Motor ah hian ka lo awm anga, ka phone pakhat zawk ah hian Muani phone atang khan buaina a awm a nih chuan chanchin min rawn hrilh vat dawnnia." a ti leh a, tichuan Muani nen chuan motor atang chuan kan chhuak ta a.

***********************

Pawnah chuan kan ding a, Muani chu ava lut hmasa ta a. Reiloteah a rawn chhuak leh a, "Tuman an hre lovang che, lo lut rawh." a ti a, ka va lut ta a. Guard pahnih chuan min lo dap a, "Engmah a pai lo." tiin Valpuia aia lo awm, vai hmelchhe zet chu guard chuan a hrilh a. "Muani..va hruai rawh le. Mahse ala harh chiang lo ania, kan chiu leh a, ala reilo." a lo ti a.

Muani chuan min hruai a, Maxie awmna room ah chuan kan lut dun a. Maxie chu a lo la harh lo va, khumah chuan a lo mu a. Muani chuan pistol chu min pe in, "Enge ka tih leh dawn?" a ti a. Chuveleh vaipa chu a rawn lut thut a, pistol chu ka thukru nghal. "Pu Ranjita te an lo kal dawn a, ka chhuah lawk angai. Lo awm rawh aw...ka lo let leh ang." a ti a, a kal ta daih mai.

"Muani, Ranjita chuan min hria a nia...ka hmel a hmu tawh." ka han ti a, "Awii..engtin nge kan tih ang?" tiin a mangan hmel kher mai. Ka han ngaihtuah vang vang a, "Khawimaw i phone.." ka ti a, a phone chu min pe a. Nathana chu ka phone a, "Sir, Muani hi ka rawn tir chhuak leh dawn a, pistol dang lo pe leh rawh." ka ti a, mak tak maiin Nathana chuan zawhna min zawn miah lo, "Awle." tiin min lo chhang a, a dah leh hmak mai.

"Muani, pistol dang va la leh la, tichuan a rukin pai ang che. Load sa thlap la, tichuan guard ho bulah sawn va awm la. Ranjit-a te lo thlen veleh ka hmuh duh thu hrilh la, room an rawn luh veleh silai puak ri i hria anga. Chutah tak chuan guard pahnih te kha i kap hlum ve nghal ang, i ngam angem?" tiin ka han zawt a.

Muani chu a nui sak a, "Chu aia hlauhawm chuan ka che hnem tawh lutuk, ka ngam khawp mai." tiin min chhang a. "Anih chuan kal tawh rawh le." ka ti a. Kal a tum a, mahse a ding leh a. Min rawn en a, "Lawmthu ka hrilh thei che angem?" a han ti leh a. "Aw..min hrilh la." ka lo ti hu mai. Chutah a rawn kal hnai a, min kiss ta mai a.

"Ka lawm e aw, Officer." tiin min chhuahsan daih mai. Second 5 vel chu ka ding deuh vang vang a, mahse chutia feel chiam hman ka ni hrih lo. Tichuan Maxie chu ka pawm tho va, khum hnuaiah chuan ka mut tir a. Khumah chuan ka mu a, ka pistol phawrhin puan chuan ka inkhuh a. Reiloteah chuan Ranjit-a te chu an rawn lut ta, "Muani, khawnge i u?" tia Ranjit-a'n a zawh chu ka hre pha a.

"In awm ho amaw ka tia? Ka hrelo...e taka, customer sawn a hmu duh che u." tiin Muani chuan a lo chhang a. "Customer a? Hetah te chuan MAxie chiah alawm kan dah....eng customer nge?" Ranjita chuan a ti lung lung mai. "Aw MAxie chu mawle..pawisa pawh a pe lawk vek tawh." tiin Muani chuan a lo chhang leh a.

"Anih customer chuan engvangin nge min hmuh duh a?" tiin a zawt leh a. "Ka hre bik nang, va lut ula." tiin a lo chhang leh a. Chutah Room kawngka chu a rawn ri ta rak mai, "Hey..enge min hmuh duhna chhan?" a rawn ti lut a. Puan kar atang chuan chiang lo ruaiin ka hmu thei a, pathum an ni.

Chutah thinrim hmel zet hian, "Hey...min chhang ta che." tih pah chuan puan chu a rawn hlip a. Chuveleh an pathum chuan ka kap nghal siah siah a, an thal nghal vek mai. Silai puak ri chu lehlamah chuan ka hre ve leh nghal bawk a, reilo teah chuan Muani chu a rawn lut a. "Ka kap hlum ve ve." a rawn ti lut a.

Ranjit-a leh midang pahnih te chu an thi chiang kher mai, MAxie chu pawn lamah chuan kan hruai chhuak a, Nathana chuan motorah chuan min lo la nghak reng a. Motor ah chuan kan zawn lut a, "I ti tha e, Rinawm." tiin Nathana chuan min lo nui sak mai. Ti chuan Nathana flat lamah chuan kan va let leh ta a, MAxie erawh ala harh eih lo.

*******************

Flat chhungah chuan kan zawn lut a, khumah chuan kan mut a. Sitting room lamah chuan kan pathum chuan kan phei a, "Sir..Valpuia ber hi engtin nge kan tih dawn?" tiin ka han zawt a. "A rawn call mai ang." tih ringawt chuan min chhang a. "Tu chu maw a lo call ang?" tiin ka zawt a. "Muani hi a rawn call mai ang, Ranjita te ruang a hmu anga...a lo call em em ang." tiin min chhang leh a.

Chutah Maxie au thawm kan hria a, rang takin kan va lut nghal a. Maxie chu a lo harh tawh a, Rosy ruang, freezer-a kan dah chu a lo hawng chu niin. RAng takin kan va lut a, chutah Muani pawh chuan Rosy ruang chu a hmu a, a han au ve leh hnuhnawh a, ava hahthlak thin tak. Freezer chu ka khar vat a, Maxie chu a hawi kual nasa mai.

Nathana te nen chuan min rawn hmu a, min hmuh rual rual chuan Maxie chu rawn tlan pheiin NAthana chu a kuah thlawp mai. "U NAthan...min chhan rawh, min chhan hram rawh." tiin a tap nghal hawm hawm mai a. "I him tawh alawm, lungngai suh." tiin Nathana chuan a lo kuah let a. MAxie chuan mittui tla phung chuan NAthana chu enin, "Ih...i chhungte, Sanvi te...thah an tum thu an sawi ka hria ania..dinhmun hlauhawm ah an awm ania." a han ti leh chul a.

Mahse Nathana chuan zawi sap hian, "Ka hria alawm..an thi vek tawh, min thah sak vek tawh." tiin Nathana chuan a chhang leh a. Maxie chuan a lu a dawm a, "A van pawi tak." tiin a tap zawih zawih mai. Chutah Muani chu ava en a, "Sawnu saw tinge hetah a awm ve a..an zingah khan a tel ve ania." tiin a kawk a.

"Min pui zawk alawm, engkim kan hrilhfiah vek ang che." tiin Maxie chu ka kal hran pui nghal a, engkim mai chu ka hrilh fiah ta vek a. A hmui hupin, "Keimah vang vek a ni...a van pawi tak. Keimah vangin U Nathana chuan a chhungte zawng zawng a chan vek amaw..a ni thei lo." tiin a tap leh a.

Chutih lai chuan Muani phone chu a rawn ri leh a, Valpuia a lo ni. "Khawi min lo pe rawh." tiin Nathana chuan phone chu a laksak a, "Lalmuanpui...enge awmzia? Khawnge nula kha? Chuan engvangin nge Ranjita te hi an thih vek a? Enge thleng? Khawiah nge i awm?" a rawn ti nghal tuar tuar mai.

Nathana chuan a chhang a, "I nau i be duh ami? Ka kutah a awm mek...nungdama i hmu duh anih chuan he phone location hi rawn chhui ang che." a han ti a. Vin zet hian Valpuia chuan, "ZAwnga..mai mai che chuan, ka nau min rawn pe let vat rawh, ka zirtirna che kha ala tawk lo deuh em ni?" a la rawn ti pang pang mai.

A aia vin hian Nathana chuan, "Aw...a tawk lo, a tawk hlawl lo. Mi namai ka nilo te i ti vel pang pang a ni lawm ni? Tunah chuan ka hun a ni ve ta, i duh zah zah rawn hruai la...min rawn hmachhawn ta che. I sawi ang chiah khan, tunge chak a tunge tlawm zawk chu kan hria ang chu." tiin phone chu a dah hmak mai.

Nathana chuan min en a, "I phone kha chu la on lo mai rawh, ka phone pakhat zawk hi keng la, inbiak nan kan hmang dawnnia. Muani nen Bike-in inphur ula, Maxie nen kan rawn zui ang che u. Mahse Muani phone hi ka kawl thung ang, Valpuia chuan location a rawn chhui zui ngei bawk ang." a ti a.

"Khawnge kan kal dawn?" tiin ka zawt a. "Kawng hnuaiah, Pi Puii Road ah khan..." tiin min chhang a. Tichuan kan chhuak nghal a, Nathana chuan Muani phone chu a kawl a, Muani nen chuan inphurin kan tlan ta nghal a. Maxie leh Nathana chuan kan hnungah car in min rawn zui ve bawk a, reilo teah chuan kan thleng thla ta a.

***********************

Pi Puii Road hi thalai ho ruihna hmun ber a ni a, a bikin road side party an uar thin hle. A hmun a fal avang leh a zau em avang hian nula leh tlangval ho kal an hrat leh a, chu chu hmanrua a hman kan tum a ni. Sunday zan a ni bawk a, nula leh tlangval pawh an lo road side party leh ngei bawk.

Rin ai takin an lo tam lehnghal a, carah tape play in an lo lam hut hut mai. A thenin mei an lo chhem bawk a, a then lah an lo inham ngawng ngawng bawk. Motor ah chuan Nathana chuan min ko lut a, Muani nen chuan kan va chuang ta a. "Rinawm, helai ah hian Valpuia te chu an lo kal ngei anga, Muani hi lam ho zingah sawn ava awm ve ang." a han ti te te a.

Muani chu a en leh a, "Tu emaw ber mipa saw va lampui la, rui ang deuhvin awm bawk ang che. Mahse chu chu i u lo thlen dawn hunah chauh a ni tur a ni, kan nghak phawt ang." a ti leh a. Minute 10 vel hnuah chuan motor pakhat chu a rawn ding a, "SAw saw ka u motor chu a nih saw.." tiin Muani chuan a kawk a.

Motor sen ngei mai kha a ni, keini pawhin kan hrechiang thawkhat khawp mai. "Kal rawh le, Muani.." Nathana chuan a han ti a, Muani chu a chhuk ta a. Mipa lam zinga mi tlangval pakhat chu ava pan a, ruih hmel em em hian a han lam kual vel a. Chutah chupa chuan a lo pawm nghal chawt a, chutih lai chuan Valpuia leh midang panga vel chu an rawn chhuk a.

Mahse Muani chu an hmu mai lo, an hawi hu hu hlawm ringawt mai a. "Rinawm, ka phone pakhat zawk hi kawl la, Maxie nen kan va chhuk ve anga, lam zinga tel angin kan va awm ve zawk ange. An mawl he hu emai, tikhan min rawn call nghal la, line ah dah reng ang che." a ti a, tichuan a pistol chu a pai tha sauh sauh va, Maxie chu hruaiin a chhuak ve ta a.

Maxie nen chuan an va lam der ve ta a, mahse Valpuia te chuan an lo hmu chuang lo. Muang chang chuan Nathana chuan lam pah chuan Valpuia chu a va pan hnai zel a, chumi pah chuan Nathana chuan bluetooth earphone vuah in min ber reng bawk. "Rinawm, motor kawngka kha lo hawng sa ang che, buaina a chhuak nuai nuai dawn ania." a han ti a.

"Awle Sir." tiin kawngka chu ka hawng sa a. Valpuia te chu an inthen hrang ta deuh deuh va, tichuan Valpuia amah a a hawikual lai tak chuan Nathana chuan ava pan hnai zel a. A pistol chu phawrh tumin a vuan sa reng bawk a, mahse ava thlen dawn chiah chuan Valpuia chu a rawn hawilet thut mai.

Keipawh ka lo ip zawk, "Sir..kha alo hawi let..." ka ti tuar a. Mahse Valpuia chuan a hmu hman lo, Nathana chu lehlam hawi leh vatin Maxie chu a kuah a, a kiss ta ringawt mai. Valpuia lah chuan, "Khawmaw kal teh u." tiin ala nam sawn dun zui. Mahse Nathana te chu ka rin ai daihin an inkiss rei leh ta nghal a, second 15 vel zet chu a nih ka ring.

Tichuan Valpuia chuan a nau Muani leh tlangval pakhat lo inzut vel a hmuh chuan a thinrim ta hle mai. A nau te chu ko khawmin Muani te lam chu ava kawk a, chuveleh an va phei a. Chu tlangval chu an sawisa ta hrep mai. Nathana chuan ring tak hian, "Saw..kan thianpa an sawisa ania." a ti ta vak mai a.

Chutah le, tlangval dang, rui phur ho chuan Valpuia te thian ho panga chu an va hnek nghal buan buan a, buaina a chhuak ta nuai nuai mai le. Maxie leh Muani chu car lamah chuan an rawn tlan a, an rawn lut nghal a. Nathana erawh intihbuaina karah chuan ala awm reng thung, Maxie leh kei leh Muani chuan kan en thap mai.

Chutah Nathana chuan Valpuia chu a tham lawp a, a rawn hnuk phei ta mai a. Mahse buaina a nasat em avang chuan tumah chuan an rawn ngaihsak lo, motor zawn thleng chu a rawn hnuk phei a. Tichuan NAthana chuan na em em hian a pistol chuan a lu ah a chhu pawp a, tichuan car trunk ah chuan a dah a, chumi hmun chu kan chhuasan ta a.

**********************

Flat lamah bawk chuan kan let leh a, tichuan Nathana chuan Valpuia chu a pu lut a. Phone a phawrh a, DCP Maenga callin Pi Puii Road lama kal turin a hrilh a, engkim a sawifiah nghal bawk. Valpuia chu Nathana chuan tuiin a theh a, a rawn harh ta. A hawi kual a, "Khawnge ka awm? Enge awmzia?" a ti hu mai.

Nathana chuan a nuih suk a, "Ka inah i awm...a nupui fanau te i thah sak tak, a chhungte zawng zawng i thahsak tak, Senior Superintendent of Police..Officer Nathan MAlsawmkima flat ah i awm mek." a ti chang fak fak mai. Valpuia chuan Muani chu a en a, "Hey..Muani, nangpawh maw? Hemi te lamah hian ilo tang reng amaw? Min bum vel em ni a mi hurnu?" tiin a vin vak a.

Muani thinrim lutuk chuan ben a tum a, mahse ka lo dang vat a. Mittui tla chung chuan Muani chuan, "Mahni nau te ngei pawh nawhchi min zawrh luih tir a, thilsual tam tak min tih tir a. Sum hian i mit a ti del zo tawh a ni, thi rawh...tualthah ching unaupa ka duh lo." a ti ve ta siah siah mai. Nathana chuan silai chuan a tin a, "KA hmangaih ber min thah sak a, ka chhungte zawng zawng nen. FAhrah ka ni a, nu leh pa atan ka patea te nupa ka bel a. Nu leh pa nei ang maiin ka inngai leh thin, mahse nang chuan fahrah bawkah min chhuah leh ta a nih hi. SP Nathan Malsawmkima nun zawng zawng i ti chhia a, tunah chuan i hun a thleng ve ta." a ti a.

A kah hma chuan Maxie chu lo tawng chhuak vein, "Keipawh min thahsak...ka nu leh pa leh ka nau mipa kum 7 mi lek..ka chhungkaw neih chhun min thah sak a ni." a lo ti ve a. Mak kan ti kher mai, "Engmaw? A thah sak ve che maw?" Nathana chuan a ti hu mai. "Aw...ka nu leh pate an vau a, pawisa pe turin an ti a. Ka nau thlenga rawn hruai turin an vau a, tichuan ka hmuh lai ngeiin min thah sak a ni." a ti ta mai a.

Nathana chu a thinrim kher mai, "Rinawm, pistol dang lo la teh." a ti a, ka pistol chu ka pe a. NAthana chuan Maxie chu pistol a pe ve leh a, "Kan chhungkua zawng zawng min thah sak tu hi kan pahnih in ka that dun ang." a ti ta mai a. Maxie pawh chuan Valpuia chu a tin ve a, "Muani, roomah lo va awm rawh...Rinawm, va hruai lut rawh." Nathana chuan a han ti leh a.

Muani chu ka hruai lut a, a beng hup hup a. Keiin ka kuah bawk a, "Nilo..NAthan...min that suh, sum engzat nge i duh? Ka pe ang che, nuai 100 pawh nise ka nei ania." tiin Valpuia chu a rak chiam chiam mai. "Ka chhungte leh Maxie chhungte kha min pe let theilo, ka nupui kha min pe let thei lo. Ngawi reng khan i thih hun chu nghak mai rawh, mangtha le." tiin silai chu a puak nghal pawp pawp mai.

**************************

4 HOURS LATER

Nathana flat bulah chuan mipui an tam hle mai, media leh press mi te chuan DCP MAenga chu zawhna an zawt sup sup bawk. NAthana chuan DGP chu a ban thu a hrilh bawk a, chumi zan la la chuan resignation letter a sign nghal bawk. Kan pali chuan pawnah kan awm a, khua a var lek lek tawh.

DGP leh NAthana chu an inbiak zawk hnu chuan DGP chu a kal ta a, Nathana chuan min en a. A nui suk a, "Thianpa, tun ah chuan mangtha kan tih a tul ta. KA ngai ngawt ang che, ACP tha tak ni la, dik takin hna thawk zel ang che aw.." a han ti a. Nathana chu ka en a, ka khawngaih takzet.

"Awle Sir..keipawn ka ngai ngawt ang che." tiin ka chhang a. Min kuah thlawp mai, "Ka lawm e, nang tluka thawh pui nuam hi ka hrelo. Ka lawm takzet, thianpa." tiin a tap lek lek mai. Tichuan Muani chu a en a, "Muani..hei hi ka card a ni a, cheng nuai 10 a awm a. A bak i duh belh anih chuan min dil leh dawnnia, i zalen tawh e." tiin a pe a.

"Ka lawm e, ka lawm lutuk." tiin Muani chuan a nuih sak a. Maxie chu a en leh a, "Nang...engtin nge i awm dawn?" a han ti a. "Chhungte belh tur tumah ka nei lo, U Nathan...ka thiannu te inah ka awm tawh mai ang." tiin a lo chhang a. NAthana chuan Maxie kutah chuan a vuan a, "Keipawh tumah belh tur ka nei lo, mahse ka bulah i khawsa duh anih chuan min zui thei ang." a ti ta mai a.

Maxie chuan phawk hru hian a en a, "I ti tak tak em ni?" a han ti a. Nathana chu zalo tak chuan a nui a, "Tunah chuan ka chhungte neih awmchhun chu Rinawma hi a ni a, mahse ani pawhin chhungte enkawl tur a nei si a. Keimah chuan ka awm thei lutuk, mahse thian kawm tur ka mamawh ve dawn sia. Chubakah Sanvi khan a dam lai khan nangmah hi chhanchhuak ngei turin min ti a, mahse a hmu ve hma ti silo che a nih hi." a han ti a.

Maxie chu a nui a, "Umm...i bulah ka awm duh alawm." tiin Nathana chu a kuah a, Nathana chuan a kuah let ve bawk a. Tichuan min rawn en leh a, "Kan kal ange...Rinawm, Muani...mangtha u aw.." a ti a. "Sir, kan inhmu leh angem?" tiin ka zawt a. A ngawi vang vang a, "KA hrelo..min hmu leh a nih pawhin Police Officer Nathana ni tawh lovin, Private Detective Nathana zawk ka lo ni tawh maithei a ni." tiin a nui sak a.

"Awle..mangtha le, Sir." ka ti a, Maxie nen chuan motorah an inzui lut a, an tlan liam ta a. Muani nen chuan kan ding ngawi dun ta reng mai, "Tinge min kiss?" ka han ti ringawt a. Min en hu a, "Ihh...lawmthu ka sawi ve a nih kha." tiin a lai kher mai. "Anih chuan kan inngaizawng dawn tihna em ni?" ka han ti leh a, a nui huk mai.

"In luah tur min zawn pui la, chuan kan la hria ang chu...tumah belh tur ka nei bik hleinem keipawn." a han ti a. "Umm..nuai 10 lai i neih kha, i hausa emai." tiin ka chhang a. "Ka mut a chhuak tawh lutuk...chawlh hahdam ka duh." tiin a ham bai bai mai. "Anih chuan kan inah rawn hah chawl la." tiin ka sawm a, keini pawh chu kan inlam pan chuan kan inzui phei ve leh ta a ni.

***************************

A TAWP TA

(NATHAN thawnthu lo chhiar thin tute leh lo ngaithla thin tute, in za vaiin Nathana'n, "MANGTHA U..KA LAWM E." a ti a nih chu aw...Sub Inspector a nih atanga Senior Superintendent of Police a nih thlenga a chanchin kan chhiar a, kan ngaihthlak thin, Police Officer Nathan Malsawmkima chu tunah chuan Private Detective Nathan Malsawmkima zawk a ni tawh tihna a nih chu.)